੮. ਲਕ੍ਖਣਿ

ਲਕ੍ਖਣਾਦੀਸ੍ਵਤ੍ਥੇਸੁਤਿ ਨਾਮਸ੍ਸਾ [ਕਸ੍ਸਾ (ਪੋਤ੍ਥਕੇ)] ਯਮਤ੍ਥਨਿਦ੍ਦੇਸੋਤਿ ਆਹ ‘ਅਭਿਨਾਯੋ ਯੁਤ੍ਤੋ’ਚ੍ਚਾਦਿ, ਤੇਨਾਤਿ ਅਭਿਨਾ ਯੁਤ੍ਤਸ੍ਸਾਤ੍ਥਨਿਦ੍ਦੇਸ ਕਾਰਣੇਨ, ਲਕ੍ਖਣਸਦ੍ਦੇਨ ਹੇਤੁ ਵਤ੍ਤੁਮਿਚ੍ਛਿਤੋਤਿ ਆਹ-‘ਤਤ੍ਥੇ’ਚ੍ਚਾਦਿ, ਦੁਵਿਧੋ ਹੇਤੁ, ਵੁਤ੍ਤਞ੍ਹਿ ਸੁਬੋਧਾਲਙ੍ਕਾਰੇ ‘‘ਜਨਕੋ ਞਾਪਕੋ ਚੇਤਿ, ਦੁਵਿਧਾ ਹੇਤਵੋ ਸਿਯੁ’’ਨ੍ਤਿ (੨੫੨), ਸਮੁਪਲਕ੍ਖਯਤੀਤਿ ਸਮੁਪਲਕ੍ਖਣਂ, ਸਙ੍ਕੇਤਮਤ੍ਤਂ ਞਾਪਕਂ, ਨ ਤੁ ਜਨਕਂ, ਸਙ੍ਕੇਤੋਪਿ ਲਕ੍ਖਣਮੁਚ੍ਚਤੇ ਲਕ੍ਖੀਯਤੇ ਕਾਰਿਯਮਾਨੇਨਾਤਿ ਕਤ੍ਵਾ, ਜਨਕਸ੍ਸਾਪ੍ਯਤ੍ਰ ਲਕ੍ਖਣਤ੍ਤੇਨ ਗਹਣੇ ਪਯੋਜਨਂ ‘‘ਅਨੁਨਾ’’ (੨-੧੦) ਇਚ੍ਚਤ੍ਰ ਦਟ੍ਠਬ੍ਬਂ. ਕਞ੍ਚਿਪਕਾਰਨ੍ਤਿ ਇਮਿਨਾ ਇਤ੍ਥਂਸਦ੍ਦਸ੍ਸ ਅਤ੍ਥਂ ਵਦਤਿ. ਪਤ੍ਤੋਤਿ ਇਮਿਨਾ ਭੂਤਸਦ੍ਦਸ੍ਸ, ਏਤ੍ਥ ਹਿ ਭੂਧਾਤੁ ਪਤ੍ਤਿਯਂ ਵਤ੍ਤਤੇ, ਰੁਕ੍ਖੋਲਕ੍ਖਣਨ੍ਤਿ ਰੁਕ੍ਖੋ ਞਾਪਕਹੇਤੂਤਿ ਅਤ੍ਥੋ… ਰੁਕ੍ਖੇਨ ਵਿਜ੍ਜੁਯਾ ਞਾਪੀਯਮਾਨਤ੍ਤਾ, ਆਚਰਿਯਜਿਨਿਨ੍ਦਬੁਦ੍ਧਿ ਪਨ ਅਞ੍ਞਥਾ ਵਣ੍ਣਯਤਿ, ਤਸ੍ਸੇਦਂ ਮਤਂ-

ਕ੍ਰਿਯਾਯ ਜੋਤਕੋ ਨਾਯਂ, ਸਮ੍ਬਨ੍ਧਸ੍ਸ ਨ ਵਾਚਕੋ;

ਨਾਪਿ ਕ੍ਰਿਯਨ੍ਤਰਾਪੇਕ੍ਖੀ, ਸਮ੍ਬਨ੍ਧਸ੍ਸ ਤੁ ਭੇਦਕੋਤਿ.

ਅਯਮੇਤ੍ਥ ਅਤ੍ਥੋ ‘‘ਅਯਮਭਿ ਅਭਿਨਨ੍ਦਤਿਤ੍ਯਾਦੀਸੁ ਵਿਯ ਕਿਰਿਯਾਯ ਜੋਤਕੋ ਨ ਹੋਤਿ, ਛਟ੍ਠੀ ਵਿਯ ਸਮ੍ਬਨ੍ਧਸ੍ਸ ਵਾਚਕੋ ਨ ਹੋਤਿ, ਨਿਕ੍ਕੋਸਮ੍ਬੀਤ੍ਯਤ੍ਰ ਗਮਨਕਿਰਿਯਾਪੇਕ੍ਖੀ ਨਿਸਦ੍ਦੋ ਵਿਯ ਨਾਪਿ ਕਿਰਿਯਨ੍ਤਰਾ ਪੇਕ੍ਖੀ, ਕਿਞ੍ਚਰਹਿ ਸਮ੍ਬਨ੍ਧਸ੍ਸ ਤੁ ਭੇਦਕੋ ਵਿਸੇਸਕੋ ਭਵਤੀ’’ਤਿ ਤਮੁਪਦਸ੍ਸੇਤੁਮਾਹ-‘ਅਞ੍ਞੇ ਤ੍ਵਿ’ਚ੍ਚਾਦਿ, ਏਤ੍ਥ ਇਤਿਸਦ੍ਦੋ ਨਿਦਸ੍ਸਨੇ, ਰੁਕ੍ਖਮ੍ਪਤ੍ਵਾ ਵਿਜ੍ਜੋਤਤੇ ਇਤਿਏਵਂ ਪਤ੍ਤਿਕਿਰਿਯਾਯ ਪਤ੍ਵਾਤਿਵੁਤ੍ਤਰੁਕ੍ਖਪਾਪਨਕਿਰਿਯਾਯ ਜਨਿਤੋਤਿ ਅਤ੍ਥੋ, ਤਥਾਹਿ ਰੁਕ੍ਖਸ੍ਸ ਵਿਜ੍ਜੁਯਾ ਪਾਪਨਾਭਾਵੇ ਵਿਜ੍ਜੁਯਾ ਲਕ੍ਖਿਯਾਯ ਤਲ੍ਲਣਸ੍ਸ ਚ ਰੁਕ੍ਖਸ੍ਸ ਯੋ ਲਕ੍ਖਿਯਲਕ੍ਖਣਭਾਵੋ ਸਮ੍ਬਨ੍ਧੋ, ਸੋ ਕੇਨ ਸਮ੍ਪਾਦਿਤੋ ਭਵੇਯ੍ਯ, ਨਨੁ ਸਮ੍ਬਨ੍ਧੇ ਅਭਿਨਾ ਜੋਤੀਯਮਾਨੇ ਰੁਕ੍ਖਸ੍ਸ ਲਕ੍ਖਣਵੁਤ੍ਤਿਤਾ ਕਥਂ ਜੋਤੀਯਤੀਤਿ ਆਹ-‘ਲਕ੍ਖਣਤ੍ਥੋਚ ਵਿਸਯਭਾਵੇਨਾ’ਤਿ, ਤਥਾਚੇਤ੍ਯਾਦਿਨਾ ਤਸ੍ਮਿਂ ਪਕ੍ਖੇ ਸਮ੍ਭਾਵਿਤਂ ਦੋਸਮੁਬ੍ਭਾਵਯਤਿ, ਤਤ੍ਰਾਯ ਮਿਚ੍ਚਾਦਿਨਾ ਯਥਾਵੁਤ੍ਤਦੋਸਪਰਿਹਾਰਾਯ ਪਰੇਹੇਵਾਭਿਧੀਯਮਾਨਮ੍ਪਰਿਹਾਰਮਾਹ, ਪਰਿਹਾਰੋਪਦਸ੍ਸਨੇਨਾਸ੍ਸਾਪਿ ਪਕ੍ਖਸ੍ਸਾਦੁਟ੍ਠਤਾਖ੍ਯਾਪਨੇਨੇਸੋਪਿ ਪਕ੍ਖੋ-ਬ੍ਭੁਪਗਤੋਤ੍ਯਵਸੇਯੋ, ਅਤੋਯੇਵੁਪਰਿ ਯਥਾਵੁਤ੍ਤ ਪਕ੍ਖਨਿਸ੍ਸਯੇਨੇਵ ਬ੍ਯਾਖ੍ਯਾਯਤੇ, ਦੇਵਦਤ੍ਤਸ੍ਸ ਸਾਧੁਤ੍ਤਸਙ੍ਖਾਤਇਤ੍ਥਮ੍ਪਕਾਰਪ੍ਪਤ੍ਤਿਯਾ ਵਿਸਯਭਾਵੇਨਾਵਟ੍ਠਿਤਾ ਮਾਤਾ ਤਤ੍ਥ ਵਤ੍ਤਤਿ ਨਾਮਾਤਿ ਆਹ-‘ਮਾਤੁਯਾ’ਤਿਆਦਿ, ਮਾਤਾ ਚ ਇਤ੍ਥਮ੍ਭੂਤੇ ਪਵਤ੍ਤਾ ਵਿਸਯ ਭਾਵੇਨ ਦੇਵਦਤ੍ਤੋ ਚ ਤਤ੍ਥ ਵਿਸਯੀਭਾਵੇਨ, ਤੇਸਞ੍ਚ ਵਿਸਯਵਿਸਯੀਭਾਵਲਕ੍ਖਣੋ ਸਮ੍ਬਨ੍ਧੋ ਇਤ੍ਥਮ੍ਪਤ੍ਤਿਲਕ੍ਖਣਾਯ ਕਿਰਿਯਾਯ ਜਾਤੋ, ਸੋ ਮਾਤੁਸਮ੍ਬਨ੍ਧੋ ਹੋਤਿ ਕਾਰਣਵਸੇਨ, ਸੋਚਾਤਿਨਾ ਜੋਤੀਯਤੀਤਿ ਮਾਤੁ ਤੇਨਾਭਿਨਾ ਯੋਗੋਤਿ ਆਹ-‘ਯ੍ਵਾਯ’ਚ੍ਚਾਦਿ, ਮਾਤੁਸਮ੍ਬਨ੍ਧੋਇਤਿ ਯੋਜਨਾ, ਇਤ੍ਥਮ੍ਪਤ੍ਤਿਯਾਤਿ ਇਤ੍ਥਮ੍ਪਤ੍ਤਿਲਕ੍ਖਣਾਯ ਕਿਰਿਯਾਯ ਕਰਣਭੂਤਾਯ, ਏਵਂ ਮਞ੍ਞਤੇ ‘‘ਕਿਞ੍ਚਾਪਿ ਸੋ ਸਮ੍ਬਨ੍ਧੋ ਦੇਵਦਤ੍ਤੇਨਾਪ੍ਯਵਿਨਾਭਾਵੀਤਿ ਤਸ੍ਸ ਸੋਭਿਨਾ ਜੋਤੀਯਤੇ, ਤਥਾਪਿ ਮਾਤੁਸਮ੍ਬਨ੍ਧੋਭਿਨਾ ਜੋਤੀਯਤੀਤਿ ‘ਮਾਤੁ ਤੇਨ ਯੋਗੋ’ਤਿ ਚ (ਵੁਚ੍ਚਤਿ)… ਸਦ੍ਦਸਤ੍ਤਿਯਾ ਤਗ੍ਗਤਾਯੇਵ ਦੁਤਿਯਾਯ ਉਭਯਗਤਸ੍ਸਾਪਿ ਸਮ੍ਬਨ੍ਧਸ੍ਸ ਜੋਤਨਤੋ’’ਤਿ ਰੁਕ੍ਖੋ ਰੁਕ੍ਖੋ ਤਿਟ੍ਠਤੀਤਿ ਸਮ੍ਬਨ੍ਧੋ, ਠਿਤਿਮ੍ਪਟਿਚ੍ਚਾਤਿ ਠਿਤਿਨ੍ਨਿਸ੍ਸਾਯ ਏਸਂ ਰੁਕ੍ਖਾਨਂ ਯੋ ਚ ਸਮ੍ਬਨ੍ਧੋਤਿ ਯੋਜਨਾ, ਰੁਕ੍ਖਾਨਨ੍ਤਿ ਇਮਿਨਾ ਰੁਕ੍ਖਾ ਕਿਰਿਯਾਯ ਪਰੇ ਸਮ੍ਬਨ੍ਧਿਨੋਤਿ ਞਾਪੇਤਿ, ਠਿਤਿਮ੍ਪਟਿਚ੍ਚਾਤਿ ਇਮਿਨਾ ਪਨ ਤਿਟ੍ਠਤਿਸਦ੍ਦਵਚਨੀਯਾ ਸਾਧ੍ਯਰੂਪਾ ਠਿਤਿਕਿਰਿਯਾ ਰੁਕ੍ਖਤੋ ਪਰੇ ਸਮ੍ਬਨ੍ਧੀਤਿ, ਅਚੇਤਨਾਨਂ ਰੁਕ੍ਖਾਨਮਪੇਕ੍ਖਾਵਿਰਹੇਪਿ ਲੋਕਮ੍ਪਤੀਤਿਵਸੇਨ ‘ਪਿਪਤੀਸਾ’ਦੀਨਂ ਵਿਞ੍ਞਾਯਮਾਨਤ੍ਤਾ ਵਿਞ੍ਞਾਯਮਾਨਠਾਨਾਪੇਕ੍ਖਣਕਿਰਿਯਾਯਸਾਧ੍ਯਸਾਧਨਲਕ੍ਖਣੋ ਸਮ੍ਬਨ੍ਧੋ ਜਾਤੋਤਿ ਵਿਞ੍ਞੇਯ੍ਯਂ, ਸੋ ਚ ਰੁਕ੍ਖਸਮ੍ਬਨ੍ਧੋ-ਭਿਨਾ ਜੋਤੀਯਤੀਤਿ ਆਹ-‘ਸੋ’ਤਿਆਦਿ, ਦ੍ਵਿਬ੍ਬਚਨੇਨੇਵ ਜੋਤਨੀਯਾਤਿ ਵਿਚ੍ਛਾਤ੍ਥੇ ਵੁਤ੍ਤਿਮਤ੍ਤੇ ਸਤੀਪਿ ਵਿਭਤ੍ਤਿਯਾ [ਵਿਚ੍ਛਤ੍ਥੇ ਵੁਤ੍ਕਿਮਤ੍ਤੇਤ੍ਯਾਦਿਵਚਨਂ ਵਿਚਾਰੇਰੇਤਬ੍ਬਂਵਿਤਤ੍ਤਿਯਾ ਅਬਿਸਦ੍ਦਸ੍ਸਚ ਵਿਚ੍ਛਤ੍ਥੇ ਵੁਤ੍ਤਿਯਾ ਅਭਾਵਾ, ਲਕ੍ਖਣਿਤ੍ਥਮ੍ਭੂਤਿ ਹਿ ਪਕਤਿਵਿਸੇਸਨਂ] ਜੋਤੇਤੁਮਸਮਤ੍ਥਤ੍ਤਾ ਵਿਚ੍ਛਾਯ ਜੋਤਨਾਯ ਦ੍ਵਿਬ੍ਬਵਚਨਂ ਕਤ੍ਤਬ੍ਬਮੇਵਾਤਿ ਅਧਿਪ੍ਪਾਯੋ.