੬੪. ਏਕ

ਘੋਚ ਓਚ ਘੋ ਘਾਨ੍ਤਓਕਾਰਨ੍ਤਾ, ਨਤ੍ਥਿ ਘੋ ਯੇਸਨ੍ਤੇ ਅਘੋ, ਤੇਸਂ, ਸਾਮਞ੍ਞਵਿਧਾਨਤੋਤਿ ਕਸ੍ਸਚਿ ਲਿਙ੍ਗਸ੍ਸ ਅਪਰਾਮਾਸਾ ਸਾਮਞ੍ਞੇਨ ਵਿਧਾਨਤੋ, ਨਾਦੇਕਵਚਨੇਸੂਤਿ ਨਾਦੀਸੁ ਏਕਵਚਨੇਸੂਤਿ ਅਤ੍ਥੋ, ਹਿ ਹੇਤੁਮ੍ਹਿ, ਯਸ੍ਮਾ ਕਸ੍ਸਚਿ ਏਵਂ ਦੁਟ੍ਠਾਧਿਪ੍ਪਾਯੋ ਸਿਯਾ, ਤਸ੍ਮਾ ਦੁਤਿਯਮੁਦਾਹਰਣਨ੍ਤਿ ਅਤ੍ਥੋ, ਦੁਤਿਯੋਪਿ ਹੇਤੁਮ੍ਹਿ, ਯਸ੍ਮਾ ਸਬ੍ਬੇਸਂ ਸਙ੍ਗਹਣਤ੍ਥਂ, ਤਸ੍ਮਾ ਨ ਚ ਤਥਾਧਿਪ੍ਪੇਤਨ੍ਤਿ ਅਤ੍ਥੋ, ਸਬ੍ਬੇਸਮੇਕਵਚਨਾਨਂ ਸਙ੍ਗਹਣਾਭਾਵੇ ਸੁਤ੍ਤਾਨਂ ਵਿਰਚਨਪ੍ਪਕਾਰਮਾਹ-‘ਅਞ੍ਞਥਾ’ਤਿਆਦਿ, ਉਪਰਿਚਾਤ੍ਯਾਦੀਸ੍ਵਯਮਧਿਪ੍ਪਾਯੋ ‘‘ਸੁਤ੍ਤਸ੍ਸ ‘ਅਂਯੋਸ੍ਵਘੋਨ’ਨ੍ਤਿ ਵਿਰਚਿਤਤ੍ਤਾ ਸਾਮਞ੍ਞੇਨੇ-ਕਵਚਨੇਸ੍ਵਘਸ੍ਸ ਨਰਸ੍ਸਤ੍ਤਪ੍ਪਤੀਤਿ ਤਪ੍ਪਟਿਸੇਧਾਭਾਵਾ’ਦਣ੍ਡਿ ਕੁਲ’ਨ੍ਤਿ ਰਸ੍ਸਤ੍ਤਂ ‘ਸਿਸ੍ਮਿਂ ਨਪੁਂਸਕੇ’ਤਿ ਵਿਧਿਸੁਤ੍ਤਂ ਵਦੇਯ੍ਯਾ’’ਤਿ, ਓਕਾਰਨ੍ਤਪ੍ਪਟਿਸੇਧਨ੍ਤਿ ‘ਅਘੋਨ’ਨ੍ਤਿ ਓਕਾਰਨ੍ਤਪ੍ਪਟਿਸੇਧਂ, ਆਦੇਸਨ੍ਤਰਂ ‘‘ਗੋਸ੍ਸਾ ਗਸਿਹਿਨਂ ਸੁਗਾਵਗਵਾ’’ਤ੍ਯਾਦਿਨਾ (੨-੬੭) ਕਰੀਯਮਾਨਂ ਗਾਵਾਦੇਸਾਦਿਕਂ, ਏਤ੍ਥ ਪਨ ਨਪੁਂਸਕੇ ਏਕਵਚਨਨ੍ਤਂ ਦਣ੍ਡਿ ਕੁਲਨ੍ਤਿ ਵਕ੍ਖਮਾਨਤ੍ਤਾ ਨੋਦਾਹਟਂ, ਯੋਸੁ ਪਨ ‘‘ਯੋਲੋਪਨਿਸੁਦੀਘੋ’’ਤਿ (੨-੮੮) ਅਦੀਘਸ੍ਸਾਪਿ ਦੀਘਵਿਧਾਨਸਾਮਤ੍ਥਿਯਾ ਪਠਮਮੇਵ ਦੀਘਸ੍ਸ ਰਸ੍ਸਾਭਾਵੇਕਾਵ ਕਥਾਤਿ ਨੋਦਾਹਟਂ, ਦਣ੍ਡੀਦਣ੍ਡੀਨਿ ਇਚ੍ਚੇਵ ਤੁ ਭਵਤਿ, ਨੋਸ੍ਸਵਾਤਿ ਪਾਠੋ ਦਿਸ੍ਸਤਿ, ਏਤ੍ਥ ਵਿਜ੍ਜਮਾਨੇ ਗੇ ਪਰੇ ਓਕਾਰਨ੍ਤਸ੍ਸ ਵਾ ਰਸ੍ਸਾਪਜ੍ਜਨਦੋਸਮ੍ਪਸਙ੍ਗਤੋ ਨੋਸ੍ਸਾ’ਤਿ ਪਾਠੇਨ ਭਵਿਤਬ੍ਬਂ.