੬੦. ਘਬ੍ਰਹ੍ਮਾ

ਘਇਤਿਸਞ੍ਞਾ ਘਸਞ੍ਞਾ ਤਾਸਂ, ਕਞ੍ਞਾਸਞ੍ਞਾਤਿਆਦੀਸੁ ਘਸਞ੍ਞਾਨਂ ਬਹੁਤ੍ਤਾ ਬਹੁਵਚਨੇਨ ਨਿਦ੍ਦੇਸੋ, ਘਰੂਪਸ੍ਸਾਤਿ ਘਸ੍ਸਾਤਿ ਘਸਦ੍ਦਰੂਪਸ੍ਸ, ਤਥਾ ਭੋ ਬ੍ਰਹ੍ਮਾਤਿ ਏਤ੍ਥ ਤਥਾਤਿ ਇਮਿਨਾ ਬ੍ਰਹ੍ਮਾਤਿਰੂਪਸ੍ਸ ਨਿਰੁਤ੍ਤਿਯਂ ਨਿਦ੍ਦਿਟ੍ਠਤ੍ਤਾਵ ਏਤ੍ਥ ਸਙ੍ਗਹਿਤਭਾਵਂ ਦਸ੍ਸੇਤਿ. ਏਵਂ ਵਿਵਰਨ੍ਤੀਤਿ ਤਸ੍ਮਾ ਸ ਸਖਤੋ ਗਸ੍ਸ ਅਕਾਰਆਕਾਰਾ’’ਤਿਆਦਿਨਾ ਏਵਂ ਵਿਵਰਨ੍ਤਿ, ਤੇ ਹਿ ਅਚ ਆਚ ਇਚ ਈਚ ਏਚਾਤਿ ਦ੍ਵਨ੍ਦੇ ਪੁਬ੍ਬਸਰਾਨਂ ਲੋਪਂ ਕਤ੍ਵਾ ਏਤ੍ਤੁਪਸਿਲੇਸਨਿਦ੍ਦੇਸਂ ਵਣ੍ਣੇਨ੍ਤਿ, ਸਾਮਞ੍ਞਵਿਧਾਨਨ੍ਤਿ ‘ਬ੍ਰਹ੍ਮਕਤ੍ਤੁਇਸਿ ਸਖਤੋ’ਚ੍ਚੇਵਮਵਿਸੇਸੇਤ੍ਵਾ ਸਾਮਞ੍ਞੇਨ ਕਥਨਂ, ਕਿਮਤ੍ਥਨ੍ਤਿ ਕਿਂ ਅਤ੍ਥੋ ਪਯੋਜਨਂ ਯਸ੍ਸ ਤਂ ਕਿਮਤ੍ਥਂ. ਸਾਮਞ੍ਞਵਿਧਾਨਂ ਕਿਮਤ੍ਥਮ੍ਪਨੇਵਂ ਪਯੋਜਨਾਸਙ੍ਕਾਯਂ ਪਯੋਜਨਾਸਙ੍ਕਾਵਿਚਾਰਣਂ ਮਨਸਿ ਨਿਧਾਯ ‘ਆਗਤਿ ਗਣੋਯ’ਨ੍ਤਿ ਵੁਤ੍ਤਤ੍ਤਾ ਆਹ– ‘ਅਤ੍ਥਤੋ’ਚ੍ਚਾਦਿ, ਅਤ੍ਥਤੋਤਿ ਸਾ ਮਤ੍ਥਿਯਤੋ, ਅਨੇਨਾਤਿ‘ਆਗਤਿਗਣੋਯ’ਨ੍ਤਿ ਇਮਿਨਾ ਵਚਨੇਨ, ਇਦਂ ਵੁਤ੍ਤਂ ਹੋਤਿ ‘ਆਗਤਿਗਣੋਯਨ੍ਤਿ ਇਮਿਨਾ ਤਦਾਕਾਰਸਙ੍ਖਾਤਜਾਤਿਪ੍ਪਧਾਨਗਣਤ੍ਤਪ੍ਪਕਾਸਨੇਨ ਯਦਿ ਸਮ੍ਬੋਧਨੇ ਏਕਾਰਨ੍ਤਾਕਾਰਨ੍ਤਲਾਭੀਨਂ ਕਤ੍ਤੁ ਇਸਿ ਸਖ ਮੁਨਿ ਭਦਨ੍ਤਾਦੀਨਂ ਗਹਣਂ ਪਯੋਜਨਂ ਨ ਸਿਯਾ, ਅਞ੍ਞਥਾ ਅਨੁਪਪਜ੍ਜਨਂ ਸਿਯਾਤਿ ਏਵਮਞ੍ਞਥਾਨੁਪਪਤ੍ਤਿਲਕ੍ਖਣਸਾਮਤ੍ਥਿਯਤੋ ਸਾਮਞ੍ਞਵਿਧਾਨੇ ਪਯੋਜਨਮਾਹੇ’’ਤਿ, ਸੋਯਨ੍ਤਿ ਇਮਿਨਾ ਵੁਤ੍ਤਿਯਂ ‘ਆਗਤਿ ਗਣੋਯ’ਨ੍ਤਿ ਵੁਤ੍ਤਂ ਵਚਨਂ ਨਿਦਸ੍ਸੇਤਿ.