੩੨. ਸਤ੍ਤ

ਯਨ੍ਤਂ ਸਦ੍ਦਾਨਂ ਨਿਚ੍ਚਤ੍ਤਾ ਸਮ੍ਬਨ੍ਧਸ੍ਸ ਯਤ੍ਥਾਤਿ ਪਰਾਮਟ੍ਠਂ ਸੋਤਿ, ਯੋਤਿ ਪਰਾਮਟ੍ਠਂ ਤਸ੍ਸਾਤਿ ਚ ਨਿਦ੍ਦਿਸਤਿ, ਯੋ ਯਤ੍ਥੇਤ੍ਯਾਦਿਕਞ੍ਚ ‘ਕਿਰਿਯਾਧਾਰਭੂਤੇ’ਚ੍ਚਾਦਿਵੁਤ੍ਤਿਗਨ੍ਥ ਵਿਵਰਣਨ੍ਤਿ ਯੋਤਿ ਕਿਰਿਯਾਧੇਯ੍ਯਭੂਤਾਧਿਪ੍ਪੇਤਾ, ਏਤਨੇਵਾਹ‘ਕਿਰਿਯਾ ਚਾ’ਤਿਆਦਿ, ਤੇਨਾਯਮਾਧਾਰੀਯਤਿ ਕਤ੍ਤੁਕਮ੍ਮ ਸਮਵੇਤਾ ਕਿਰਿਯਾਸ੍ਮਿਨ੍ਤ੍ਯਧਿਕਰਣੇ ਵਾ ਤਂ ਆਧਾਰਯਤੀਤਿ ਕਤ੍ਤਰਿ ਵਾ ਘਣਨ੍ਤੇਨ ਦਟ੍ਠਬ੍ਬੋ, ਕਤ੍ਤਾਰਂ ਕਮ੍ਮਞ੍ਚ ਕਿਰਿਯਾਨਿਸ੍ਸਯਭੂਤਮਾਧਾਰ ਯਤੀਤ੍ਯਾਧਾਰੋਤਿ ਵਾ ਕਤ੍ਤਰਿ ਘਣ, ਵੁਤ੍ਤਂ ਹਿ–

ਆਧਾਰਯਤਿ ਯੋ ਕਤ੍ਤੁ, ਕਮ੍ਮਂ ਕਿਰਿਯਨਿਸ੍ਸਯਂ;

ਆਧਾਰਂ ਕਾਰਕਞ੍ਚਾਹੁ, ਤਂ ਚਤੁਬ੍ਬਿਧਮੇਵ ਚੇਤਿ.

ਨਨੁ ਚ ਕਿਰਿਯਾਧਾਰਣੇਨਾਧਾਰੋਤ੍ਯੁਚ੍ਚਤੇ, ਤਂ ਕਿਮੇਵਮੁਚ੍ਚਤੇਤਿ ਚੇ, ਨੇਸਦੋਸੋ ਯਦੇਵ ਹਿ ਕਿਰਿਯਾਧਾਰਣਮਸ੍ਸ, ਤਨ੍ਤਨ੍ਨਿਸ੍ਸਯਭੂਤ ਕਤ੍ਤੁਕਮ੍ਮਧਾਰਣਂ, ਨਹ੍ਯਞ੍ਞਤਾ ਤਦ੍ਧਾਰਣਂ ਸਮ੍ਭਵਤਿ ਤਤੋ ਕਿਰਿਯਾ ਕਾਰਣੇਨਾਧਾਰਣੇਨਾਧਾਰੋਤ੍ਯ ਯਮੇਵਤ੍ਥੋ, ਨ ਕਤ੍ਤੁਕਮ੍ਮਪਰਿਚ੍ਚਾਗੇਨਾਧਾਰੇਨ ਉਜੁਕਂ ਕਿਰਿਯਾ ਗਯ੍ਹਤੇ, ਤੇਨੇਵ ਵਕ੍ਖਤਿ-‘ਕਿਰਿਯਾਯਯੋ ਆਧਾਰੋ’ਚ੍ਚਾਦਿ, ਨਨੁ ਯਦ੍ਯਪ੍ਯੁਜੁਕਮੇਵ ਕਿਰਿਯਂ ਧਾਰਯਤਿ ਕਤ੍ਤਾ ਕਤ੍ਤੁਸਮਵਾਯਿਨਿਂ, ਕਮ੍ਮਸਮਵੇਤਞ੍ਚ ਵਿਕ੍ਤੇਦਨਾਦਿਂ ਕਿਰਿਯਂ ਕਮ੍ਮਂ… ਤਥਾ ਸਤਿ ਤਾਨੇਵਾਧਾਰੋਤਿ, ਨ… ਲੋਕੇ ਸਤ੍ਥੇ ਚ ਤੇਸਮਾਧਾਰਤ੍ਥੇ ਨਾਪ੍ਪਤੀਤਿਤੋ, ਕਤ੍ਤੁਕਮ੍ਮਤਾਯੇਵ ਹਿ ਤੇਸਮ੍ਪਤੀਤੀਤਿ ਦਸ੍ਸੇਤੁਮਾਹ-‘ਕਿਰਿਯਾ ਚੇ’ਤ੍ਯਾਦਿ, ਤਥਾ ਚ ਵੁਤ੍ਤਂ–

ਕਤ੍ਤੁਕਮ੍ਮ ਬ੍ਯਵਹਿਤਂ, ਧਾਰੇਨ੍ਤਮਨੁਜੁ ਕ੍ਰਿਯਂ;

ਕ੍ਰਿਯਾਸਿਦ੍ਧੁਪਕਾਰਿ ਚ, ਸਤ੍ਥੇ-ਧਿਕਰਣਂ ਮਤਨ੍ਤਿ.

ਕਤ੍ਤੁਕਮ੍ਮਬ੍ਯਵਹਿਤਨ੍ਤਿ ਕਤ੍ਤੁਕਮ੍ਮੇਹਿ ਤਂਸਮਵੇਤਭਾਵੇਨ ਬ੍ਯਵਹਿਤਂ, ਅਨੁਜੁ ਪਾਰਮ੍ਪਰਿਯੇਨ, ਕ੍ਰਿਯਾਸਿਦ੍ਧੁਪਕਾਰਿਤਿ ਕਤ੍ਤੁਕਮ੍ਮਸਮਵੇਤਾਯ ਕਿਰਿਯਾਯ ਪਸਿਦ੍ਧਿਯਂ ਉਪਕਾਰੀ ਉਪਕੁਬ੍ਬਨ੍ਤਂ, ਨਨੁ ਚ ਨ ਕਿਰਿਯਾ ਧਾਰਣੇਨੇਵਾਯਮਾਧਾਰੋ, ਕਤ੍ਤੁਕਮ੍ਮਾਨਂ ਧਾਰਣੇਨਾਪ੍ਯਾਧਾਰੋਤਿ ਸਕ੍ਕਾ ਵਵਤ੍ਥਪੇਤੁਨ੍ਤਿ ਚੋਦਨਮ੍ਮਨਸਿ ਨਿਧਾਯਾਹ-‘ਨ ਚੇ’ਤ੍ਯਾਦਿ, ਕਿਰਿਯਾ ਨਿਮਿਤ੍ਤਸ੍ਸੇਵਾਤਿ ਕਤ੍ਤੁਕਮ੍ਮਸਮਵਾਯਿਨਿਯਾ ਕਿਰਿਯਾਯ ਨਿਮਿਤ੍ਤਸ੍ਸੇਵ, ਤਦੇਵਂਵਿਧਮਾਧਾਰਂ ਚਤੁਬ੍ਬਿਧਮ੍ਮਤਨ੍ਤਿ ਦਸ੍ਸੇਤੁਮਾਹ-‘ਆਧਾਰੋ ਚਾਯ’ਮਿਚ੍ਚਾਦਿ, ਚਤ੍ਤਾਰੋ ਵਿਧਾਪਕਾਰਾ ਅਸ੍ਸਾਤਿ ਚਤੁਬ੍ਬਿਧੋ, ਆਧੇਯ੍ਯੇਨ ਸਹੋਪਸਿਲੇਸੋ ਸਂਯੋਗਲਕ੍ਖਣੋ-ਸ੍ਸ ਅਤ੍ਥੀਤਿ ਓਪਸਿਲੇਸਿਕੋ ਆਧਾਰੋ-‘ਕਟੇਨਿਸੀਦਤਿ ਥਾਲਿਯਂ ਪਚਤਿ’ਤ੍ਯਾਦੋ ਕਟਾਦਿ, ਤਥਾਹਿ ਦੇਵਦਤ੍ਤਸਮਵੇਤਂ ਨਿਸੀਦਨਕਿਰਿਯਂ ਕਟੋ ਦੇਵਦਤ੍ਤਂ ਧਾਰਯਂ ਧਾਰਯਤਿ ਦੇਵਦਤ੍ਤਬ੍ਯਵਹਿਤਂ, ਏਵਂ ਥਾਲੀਪਿ ਤਣ੍ਡੁਲਸਮਵੇਤਂ ਵਿਕ੍ਲੇਦਨਾਦਿਕਿਰਿਯਂ ਤਣ੍ਡੁਲੇ ਧਾਰਯਂ ਧਾਰਯਤੀਤ੍ਯੋਪਸਿਲੇਸਿਕਾਧਾਰਤ੍ਤਂ ਕਟਾਦਿਨੋ. ਯਤੋ-ਞ੍ਞਤ੍ਰਾਧੇਯ੍ਯਂ ਨ ਵਤ੍ਤਤੇ ਸਬ੍ਬਥਾ ਭਿਯ੍ਯੋ ਵਾ, ਸੋ ਵੇਸਯਿਕੋ, ਵਿਸਯੋਹ੍ਯਾਧੇਯ੍ਯਸ੍ਸਾਨਞ੍ਞਤ੍ਰਭਾਵੋ, ਯਥਾ ਚਕ੍ਖਾਦਿਪ੍ਪਵਤ੍ਤੀਨਮਞ੍ਞਤ੍ਰਾਭਾਵਾ ਚਕ੍ਖਾਦੀਨਂ ਰੂਪਾਦਯੋ ਵਿਸਯਾਤਿ ਵੁਚ੍ਚਨ੍ਤੇ, ਏਵਮਾਕਾਸੇ ਸਕੁਨਯੋਤ੍ਯਾਦੋ ਸਕੁਨ੍ਯਾਦੀਨਮਾਕਾਸਾਦਿਤੋ-ਞ੍ਞਤ੍ਰਾਭਾਵਾਤੇ ਤੇਸਂ ਵਿਸਯਾਤ੍ਯੁਚ੍ਚਨ੍ਤੇ, ਵਿਸਯੋ ਏਵ ਵੇਸਯਿਕੋ. ਯੋ ਆਧਾਰਾਧੇਯ੍ਯਾਨਮਭਿਬ੍ਯਾਪੇਤ੍ਯਾਧੇਯ੍ਯਮਿਤ੍ਯਭਿਬ੍ਯਾਪਕੋ, ਤਥਾ ਹਿ‘ਤਿਲੇਸੁ ਤੇਲਂ, ਦਧਿਮ੍ਹਿ ਸਪ੍ਪਿ,ਤ੍ਯਤ੍ਰ ਤਿਲਾਦਿਕਂ ਤੇਲਾਦਿਕਮਾਧੇਯ੍ਯਂ ਬ੍ਯਾਪੇਤ੍ਵਾ ਤਿਟ੍ਠਤੀਤਿ ਤਿਲਾਦਿ ਬ੍ਯਾਪਕਾਧਾਰੋ. ਸਮੀਪੇ ਭਵੋ, ਸਮੀਪੋ ਏਵ ਵਾ ਸਾਮੀਪਿਕੋ, ਯਸ੍ਸ ਸਮੀਪਦੇਸੇ ਆਧੇਯ੍ਯਂ ਵਤ੍ਤਤੇ ਸੋ ਏਵਮੁਚ੍ਚਤੇ, ਅਤ੍ਰੋਦਾਹਰਣਂ ‘ਗੁਰੂਸੁ ਵਸਤਿ ਗਙ੍ਗਾਯਂ ਘੋਸੋ’ਤਿ. ਨਨੁ ਚਾਤ੍ਰਾਪ੍ਯਾਧਾਰੇ ਸਤ੍ਤਮੀ ਵਿਧੀਯਤੇ ਆਧਾਰੋ ਚ ਨਿਸ੍ਸਯੋ ਵੁਚ੍ਚਤੇ, ਨਿਸ੍ਸਯੋ ਚ ਸਂਯੋਗਸਮਵਾਯੇਹਿ ਹੋਤਿ, ਨ ਚ ਸਿਸ੍ਸਾਦੀਨਂ ਗੁਰੁਪ੍ਪਭੁਤੀਤਿ ਦੇਵਦਤ੍ਤਸਕੁਨ੍ਯਾਦੀਨਮਿਵ ਕਟਾਕਾਸਾਦੀਹਿ ਸਂਯੋਗੋ, ਤੇਲਾਦੀਨਮਿਵ ਚ ਤਿਲਾਦੀਹਿ ਸਮਵਾਯੋ ਵਾ ਅਤ੍ਥਿ, ਤੇਨਾਯੁਤ੍ਤਂ ਤੇ ਸਮਾਧਾਰਤ੍ਤਨ੍ਤਿ, ਨੇਤਦਤ੍ਥਿ, ਯਦਾਯਤ੍ਤਾ ਹਿ ਯਸ੍ਸ ਠਿਤਿ ਸੋ ਵਿਨਾਪਿ ਸਂਯੋਗਸਮਵਾਯੇਹਿ ਤਸ੍ਸ ਨਿਸ੍ਸਯੋ ਭਵਤਿ, ਤਥਾਹਿ ਪੁਰਿਸਸ੍ਸ ਨ ਰਞ੍ਞਾ ਸਹ ਸਂਯੋਗੋਸਮਵਾਯੋ ਵਾਤ੍ਥਿ, ਅਥ ਪਨ ਤਦਧੀਨਟ੍ਠਿਤਿਤ੍ਤਾ ਰਾਜਨਿਸ੍ਸਯੋ ਪੁਰਿਸੋਤਿ ਬ੍ਯਪਦਿਸ੍ਸੀਯਤੇ, ਸਿਸ੍ਸਾਦੀਨਞ੍ਚ ਗੁਰੁਪ੍ਪਭੁਤਿਨ ਮਾਯਤ੍ਤਾ ਠਿਤੀਤਿ ਤੇਸਮਯਂ [ਤੇਨਸ੍ਸਾਯਂ (ਪੋਤ੍ਥਕੇ) ਯੁਤ੍ਥੋ ਤੇ ਪਤਿ ਗੁਰੁਪਭੁਤੀਨਂ ਨਿਸ੍ਸਯਭਾਵੋ (ਜਿਨਿਨ੍ਦਬੁਦ੍ਧਿ)] ਯੁਤ੍ਤੋ ਗੁਰੁਪ੍ਪਭੁਤਿਨਂ ਨਿਸ੍ਸਯਭਾਵੋਤਿ, ਏਤ੍ਥ ਪਨ ਯਜ੍ਜਪਿ ਵੇਸਯਿਕਾਭਿਬ੍ਯਪਕਾਨਮਾਧਾਰਾਧੇਯ੍ਯੋਪਸਿਲੇਸੋ ਅਤ੍ਥਿ, ਤਥਾਪਿ ਪਕਾਰਨ੍ਤਰਸ੍ਸੇਵ ਪਰਿਪ੍ਫੁਟਤ੍ਤਾ ਤਥੇਵ ਵਚਨਿਚ੍ਛਾ, ਨਾਞ੍ਞਥਾ ਓਪਸਿਲੇਸਿਕੇਨ ਵਾ [ਓਪਸਿਲੇਸਿਕੇਵ] ਵਿਸਯਾਭਿਬ੍ਯਾਪਕਾਨਮਗ੍ਗਹਣਤੋ ਉਪਸਿਲੇਸਸ੍ਸੇ ਵਾ [ਉਪਸਿਲੇਸਸ੍ਸੇਵ] ਪਰਿਬ੍ਯਤ੍ਤਤ੍ਤਾ ਤਥੇਵ ਵੋਹਾਰੋਤਿ ਨ ਸਙ੍ਕਰੋ ਸਙ੍ਕਨੀਯੋਤਿ.