੧੧੪. ਲੋਪੋ

ਅਕਾਰਸ੍ਸਨ੍ਤਰਙ੍ਗਤ੍ਤੇ ਕਾਰਣਮਾਹ-‘ਪਕਤਿਨਿਸ੍ਸਿਤਤ੍ਤਾ’ਤਿ, ਪਕਤਿਯਾ ਇਦਂ ਪਾਕਤਂ ‘‘ਣੋ’’ਤਿ (੪-੩੪) ਣੋ, ਲੋਪਸ੍ਸ ਬਹਿਰਙ੍ਗਤ੍ਤੇ ਕਾਰਣਮਾਹ-‘ਪਚ੍ਚਯਨਿਸ੍ਸਿਤਤ੍ਤਾ’ਤਿ, ਅਨ੍ਤਰਙ੍ਗੇਚ੍ਚਾਦਿਨਾ ‘‘ਅਨ੍ਤਰਙ੍ਗਬਹਿਰਙ੍ਗੇਸ੍ਵਨ੍ਤਰਙ੍ਗਵਿਧਿ ਬਲਵਾ’’ਤਿ ਪਰਿਭਾਸਮੁਪਲਕ੍ਖੇਤਿ, ਅਙ੍ਗਸਦ੍ਦੋ-ਵਯਵਵਾਚੀ, ਅਨ੍ਤੇ ਸਦ੍ਦੋ ਸਤ੍ਤਮ੍ਯਤ੍ਥੇ, ਅਙ੍ਗੇ ਭਵਮਨ੍ਤਰਙ੍ਗਂ ਵਿਭਤ੍ਥ੍ਯਤ੍ਥੇ-ਸਙ੍ਖ੍ਯਸਮਾਸੋ ‘‘ਏਓਨਮ ਵਣ੍ਣੇ’’ਤਿ (੧-੩੭) ਅਤ੍ਤਂ ਰਾਗਮੋ, ਅਙ੍ਗਤੋ ਬਹਿ ਬਹਿਰਙ੍ਗਂ ‘‘ਪਯ੍ਯਪਾਬਹਿਤਿਰੋ ਪੁਰੇਪਚ੍ਛਾ ਵਾ ਪਞ੍ਚਮ੍ਯਾ’’ਤਿ (੩-੫) ਅਸਙ੍ਖ੍ਯਸਮਾਸੋ, ਅਤ੍ਰ ਚਾਨ੍ਤਰਙ੍ਗਂ ਬਹਿਰਙ੍ਗਨ੍ਤਿ ਨਾਙ੍ਗੇਭਵਮਨ੍ਤਰਙ੍ਗਂ, ਅਪਿਤ੍ਵਨ੍ਤਰਙ੍ਗਨਿਸ੍ਸਿਤਂ ਕਾਰਿਯਮਨ੍ਤਰਙ੍ਗਂ, ਨਾਪ੍ਯਙ੍ਗਤੋ ਬਹਿਭੂਤੋ ਸਮੁਦਾਯੋ ਬਹਿਰਙ੍ਗਂ, ਕਿਨ੍ਤੁ ਬਹਿਰਙ੍ਗਨਿਸ੍ਸਿਤਂ ਕਾਰਿਯਮ੍ਬਹਿਰਙ੍ਗਂ ਯਥਾ ਮਞ੍ਚਨਿਸ੍ਸਿਤੇਸੁ ਸਦ੍ਦਾਯਨ੍ਤੇਸੁ ‘ਮਞ੍ਚਾ ਸਦ੍ਦਾਯਨ੍ਤੀ’ਤ੍ਯੁਚ੍ਚਤੇ ਤਂ ਵਿਯੇਤਿ ਅਤੋਯੇਵਾ ਸਙ੍ਖ੍ਯਸਮਾਸੇਪਿ ਲਿਙ੍ਗਵਿਭਤ੍ਤਿਵਚਨਨ੍ਤਰਯੋਗੋ ‘ਅਨ੍ਤਰਙ੍ਗੋ ਅਨ੍ਤਰਙ੍ਗਾ’ਤਿ, ਸਙ੍ਕੇਤਿਕੋ ਹ੍ਯਯਮਸਙ੍ਖ੍ਯਸਮਾਸੋ, ਨ ਪੁਬ੍ਬਪਦਤ੍ਥਪ੍ਪਧਾਨੋ, ਯਥਾ-ਪਚ੍ਚਕ੍ਖਸ੍ਸਾਕ੍ਖਨਿਸ੍ਸਿਤਤ੍ਤਾਵਬੋਧਤ੍ਥਂ ‘ਅਕ੍ਖਮਕ੍ਖਮ੍ਪਤਿ ਵਤ੍ਤਤੇ’ਤਿ ਵਿਚ੍ਛਾਯ-ਮਸਙ੍ਖ੍ਯਸਮਾਸੇਪਿ ਕਤੇ ਪਚ੍ਚਕ੍ਖ ਞਾਣਸ੍ਸਾਕ੍ਖਨਿਸ੍ਸਿਤਤ੍ਤਞਾਪਨਤ੍ਥਂ ਸਙ੍ਕੇਤਵਸੇਨ ਕਤੋ-ਯਮਸਙ੍ਖ੍ਯ ਸਮਾਸੋ, ਨ ਪੁਬ੍ਬਪਦਤ੍ਥਪ੍ਪਧਾਨੋਤਿ‘ਪਚ੍ਚਕ੍ਖੋ ਪਚ੍ਚਕ੍ਖਾ’ਤਿ ਲਿਙ੍ਗਵਿਭਤ੍ਤਿ ਵਚਨਨ੍ਤਰਯੋਗੋ, ਤਥੇਵਾਯ-ਮਨ੍ਤਰਙ੍ਗਨਿਸ੍ਸਿਤੋ-ਯਂ ਸਮੁਦਾਯਨਿਸ੍ਸਿਤੋਤਿ ਞਾਪਨਤ੍ਥਂ ਸਙ੍ਕੇਤਵਸੇਨ ਕਤੋ-ਯਮਸਙ੍ਖ੍ਯਸਮਾਸੋਤਿ ਲਿਙ੍ਗਵਿਭਤ੍ਤਿਵਚਨਨ੍ਤਰਯੋਗੋ ਨ ਵਿਰੁਜ੍ਝਤੇ, ਅਥਵਾ ਅਨ੍ਤਰਮਙ੍ਗਮਸ੍ਸ ਕਾਰਿਯਸ੍ਸਾਤ੍ਥੀਤਿ ‘‘ਸਦ੍ਧਾਦਿਤ੍ਵ’’ (੪-੮੪) ਤਥਾ ਬਹਿਰਙ੍ਗਨ੍ਤਿ, ਅਨ੍ਤਰਙ੍ਗਞ੍ਚ ਬਹਿਰਙ੍ਗਞ੍ਚ ਅਨ੍ਤਰਙ੍ਗਬਹਿਰਙ੍ਗਾਨਿ, ਤੇਸ੍ਵਨ੍ਤਰਙ੍ਗੋ ਬਲਵਾਤਿ. ਅਨ੍ਤਰਙ੍ਗ ਕਾਰਿਯਸ੍ਸ ਬਲਵਤ੍ਤਂ ਸਾਧੇਤੁਂ ‘ਸਬ੍ਬਪਠਮਂ ਵਿਧੇਯ੍ਯਤ੍ਤਾ’ਤਿਆਦਿ ਵੁਤ੍ਤਂ, ਇਦਮ੍ਪਨ ਅਨ੍ਤਰਙ੍ਗਕਾਰਿਯਸ੍ਸ ਬਲਵਭਾਵਸਾਧਨੇ ਕਾਰਣਂ ਨ ਹੋਤਿ, ਅਨ੍ਤਰਙ੍ਗਤ੍ਤਾ ਬਲਵਭਾਵੋਯੇਵ ਹਿ ਸਬ੍ਬਪਠਮਂ ਵਿਧੇਯ੍ਯਤ੍ਤ ਕਾਰਣਂ, ਤਥਾ ਚਾਹ-‘ਯੋ ਲੋਪਤੋ ਅਕਾਰਸ੍ਸ ਪਠਮਮੇਵ ਭਵਨੇ ਕਾਰਣਮਾਹ ਅਨ੍ਤਰਙ੍ਗਤ੍ਤਾ ਅਕਾਰਸ੍ਸਾ’ਤਿ, ਤਸ੍ਮਾ ਨਾਯਂ ਪਾਠੋ ਘਟਤੇ, ਅਨ੍ਤਰਙ੍ਗਬਲਵਭਾਵਸਾਧਨਸ੍ਸ ਪਨ ਲੋਕਤੋ ਇਚ੍ਛਿਤਤ੍ਤਾ ਅਯਮੇਵਤ੍ਥੇ ਪਾਠੋ ਘਟਤੇ’’ਅਨ੍ਤਰਙ੍ਗਮੇਵ ਕਾਰਿਯਮ੍ਬਲਵਂ ਲੋਕੇ ਤਥਾਦਿਟ੍ਠਤ੍ਤਾ, ਤਥਾ ਹਿ ਲੋਕੋ ਪਾਤੋਵਾ’’ਤ੍ਯਾਦਿ, ਲੋਕੇ ਤਥਾਦਿਟ੍ਠਤ੍ਤਾਤਿ ਅਨ੍ਤਰਙ੍ਗਬਲਵਭਾਵਸ੍ਸ ਲੋਕੇ ਏਵਂ ਵਕ੍ਖਮਾਨਨਯੇਨ ਦਿਟ੍ਠਤ੍ਤਾ, ਅਥਵਾ ਕੇਨਚਿ ਵਿਧੁਰਪ੍ਪਚ੍ਚਯੋਪਨਿਪਾਤੇਨ ਕਾਰਣਵੇ ਕਲ੍ਲੇਨ ਵਾ ਕਦਾਚਿ ਕਤ੍ਤੁਮਸਕ੍ਕੁਣੇਯ੍ਯਤ੍ਤੇਪਿ ਅਨ੍ਤਰਙ੍ਗਸ੍ਸ ਅਵਸ੍ਸਂ ਵਿਧੇਯ੍ਯਤ੍ਤਂ ਦਸ੍ਸੇਤੁਮਾਹ ਸਬ੍ਬਪਠਮਂ ਵਿਧੇਯ੍ਯਤ੍ਤਾ’ਤਿ, ਸਤਿਸਮ੍ਭਵੇਤਿ ਨਿਮਿਤ੍ਤਸ੍ਸਾਨੁਪਹਤਤ੍ਤਾ ਕਾਰਿਯਸ੍ਸ ਸਮ੍ਭਵੇ ਸਤਿ.