੬. ਛਟ੍ਠੋ ਕਣ੍ਡੋ (ਤ੍ਯਾਦਿ)
੧. ਵਤ੍ਤਮਾਨੇ ਤਿ ਅਨ੍ਤਿ ਸਿ ਥ ਮਿ ਮ ਤੇ ਅਨ੍ਤੇ ਸੇ ਵ੍ਹੇ ਏ ਮ੍ਹੇ.
ਵਤ੍ਤਮਾਨੇ ਆਰਦ੍ਧਾਪਰਿਸਮਤ੍ਤੇ ਅਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਥਾ ਤ੍ਯਾਦਯੋ ਹੋਨ੍ਤਿ. ਗਚ੍ਛਤਿ, ਗਚ੍ਛਨ੍ਤਿ, ਗਚ੍ਛਸਿ ਗਚ੍ਛਥ, ਗਚ੍ਛਾਮਿ ਗਚ੍ਛਾਮ, ਗਚ੍ਛਤੇ ਗਚ੍ਛਨ੍ਤੇ, ਗਚ੍ਛਸੇ ਗਚ੍ਛਵ੍ਹੇ, ਗਚ੍ਛੇ ਗਚ੍ਛਾਮ੍ਹੇ. ਕਥਂ ‘ਪੁਰੇ ਅਧਮ੍ਮੋ ਦਿਪ੍ਪਤਿ, ਪੁਰਾ ਮਰਾਮੀ’ਤਿ? ਵਤ੍ਤਮਾਨਸ੍ਸੇਵਵਤ੍ਤੁਮਿਟ੍ਠਤ੍ਤਾ ਤਂਸਮੀਪਸ੍ਸ ਤਗ੍ਗਹਣੇਨ ਗਹਣਾ, ਪੁਰੇਪੁਰਾਸਦ੍ਦੇਹਿ ਵਾ ਅਨਾਗਤਤ੍ਤਾਵਗਮੇ ਤਦਾ ਤਸ੍ਸ ਵਤ੍ਤਮਾਨਤ੍ਤਾ, ਕਾਲਬ੍ਯਤ੍ਤਯੋ ਵਾ ਏਸੋ, ਭਵਨ੍ਤੇਵ ਹਿ ਕਾਲਨ੍ਤਰੇਪਿ ਤ੍ਯਾਦਯੋ ਬਾਹੁਲਕਾ ‘ਸਨ੍ਤੇਸੁ ਪਰਿਗੂਹਾਮਿ, ਮਾ ਚ ਕਿਞ੍ਚ ਇਤੋ ਅਦਂ’ ‘ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਸਹਬ੍ਯਤਂ ਗਚ੍ਛਤਿ ਵਾਸਵਸ੍ਸ, ‘ਅਨੇਕਜਾਤਿਸਂਸਾਰਂ ਸਨ੍ਧਾਵਿਸ੍ਸਂ’ ਅਤਿਵੇਲਂ ਨ ਮਸ੍ਸਿਸ੍ਸ’ਨ੍ਤਿ.
੨. ਭਵਿਸ੍ਸਤਿ ਸ੍ਸਤਿ ਸ੍ਸਨ੍ਤਿ ਸ੍ਸਸਿ ਸ੍ਸਥ ਸ੍ਸਾਮਿ ਸ੍ਸਾਮ ਸ੍ਸਤੇ ਸ੍ਸਨ੍ਤੇ ਸ੍ਸਸੇ ਸ੍ਸਵ੍ਹੇ ਸ੍ਸਂ ਸ੍ਸਾਮ੍ਹੇ.
ਭਵਿਸ੍ਸਤਿ ਅਨਾਰਦ੍ਧੇ ਅਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਥਾ ਸ੍ਸਤ੍ਯਾਦਯੋ ਹੋਨ੍ਤਿ. ਗਮਿਸ੍ਸਤਿ ਗਮਿਸ੍ਸਨ੍ਤਿ, ਗਮਿਸ੍ਸਸਿ ਗਮਿਸ੍ਸਥ, ਗਮਿਸ੍ਸਾਮਿ ਗਮਿਸ੍ਸਾਮ, ਗਮਿਸ੍ਸਤੇ ਗਮਿਸ੍ਸਨ੍ਤੇ, ਗਮਿਸ੍ਸਸੇ ਗਮਿਸ੍ਸਵ੍ਹੇ, ਗਮਿਸ੍ਸਂ ਗਮਿਸ੍ਸਾਮ੍ਹੇ.
੩. ਨਾਮੇ ਗਰਹਾਵਿਮ੍ਹਯੇਸੁ.
ਨਾਮਸਦ੍ਦੇ ਨਿਪਾਤੇ ਸਤਿ ਗਰਹਾਯਂ ਵਿਮ੍ਹਯੇ ਚ ਗਮ੍ਯਮਾਨੇ ਸ੍ਸਤ੍ਯਾਦਯੋ ਹੋਨ੍ਤਿ. ਇਮੇ ਹਿ ਨਾਮ ਕਲ੍ਯਾਣਧਮ੍ਮਾ ਪਟਿਜਾਨਿਸ੍ਸਨ੍ਤਿ, ਨ ਹਿ ਨਾਮ ਭਿਕ੍ਖਵੇ ਤਸ੍ਸ ਮੋਘਪੁਰਿਸਸ੍ਸ ਪਾਣੇਸੁ ਅਨੁਦ੍ਦਯਾ ਭਵਿਸ੍ਸਤਿ, ਕਥਂ ਹਿ ਨਾਮ ਸੋ ਭਿਕ੍ਖਵੇ ਮੋਘਪੁਰਿਸੋ ਸਬ੍ਬਮਤ੍ਤਿਕਾਮਯਂ ਕੁਟਿਕਂ ਕਰਿਸ੍ਸਤਿ? ਤਤ੍ਥ ਨਾਮ ਤ੍ਵਂ ਮੋਘਪੁਰਿਸ ਮਯਾ ਵਿਰਾਗਾਯ ਧਮ੍ਮੇ ਦੇਸਿਤੇ ਸਰਾਗਾਯ ਚੇਤੇਸ੍ਸਸਿ? ਅਤ੍ਥਿ ਨਾਮ ਤਾਤ ਸੁਦਿਨ੍ਨ ਆਭਿਦੋਸਿਕਂ ਕੁਮ੍ਮਾਸਂ ਪਰਿਭੁਞ੍ਜਿਸ੍ਸਸਿ, ਅਤ੍ਥਿਯੇਵਿਹਾਪਿ ਨਿਨ੍ਦਾਵਗਮੋ. ਵਿਮੁਯੇ-ਅਚ੍ਛਰਿਯਂ ਵਤ ਭੋ ਅਬ੍ਭੁਤਂ ਵਤ ਭੋ ਸਨ੍ਤੇਨ ਵਤ ਭੋ ਪਬ੍ਬਜਿਤਾ ਵਿਹਾਰੇਨ ਵਿਹਰਨ੍ਤਿ, ਯਤ੍ਰ ਹਿ ਨਾਮ ਸਞ੍ਞੀ ਸਮਾਨੋ ਜਾਗਰੋ ਪਞ੍ਚਮਤ੍ਤਾਨਿ ਸਕਟਸਤਾਨਿ ਨਿਸ੍ਸਾਯ ਨਿਸ੍ਸਾਯ ਅਭਿਕ੍ਕਨ੍ਤਾਨਿ ਨੇਵ ਦਕ੍ਖਤਿ ਨ ਪਨ ਸਦ੍ਦਂ ਸੋਸ੍ਸਤਿ, ਅਚ੍ਛਰਿਯਂ ਅਨ੍ਧੋ ਨਾਮ ਪਬ੍ਬਤਮਾਰੋਹਿਸ੍ਸਤਿ, ਬਧਿਰੋ ਨਾਮ ਸਦ੍ਦਂ ਸੋਸ੍ਸਤਿ.
੪. ਭੂਤੇ ਈਉਂ ਓਤ੍ਥ ਇਂ ਮ੍ਹਾ ਆ ਊ ਸੇ ਵ੍ਹਂ ਅ ਮ੍ਹੇ.
ਭੂਤੇ ਪਰਿਸਮਤ੍ਤੇ ਅਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਥਾ ਈ ਆਦਯੋ ਹੋਨ੍ਤਿ. ਅਗਮੀ ਅਗਮੁਂ, ਅਗਮੋ ਅਗਮਿਤ੍ਥ, ਅਗਮਿਂ ਅਗਮਿਮ੍ਹਾ, ਅਗਮਾ ਅਗਮੂ, ਅਗਮਿਸੇ ਅਗਮਿਵ੍ਹਂ, ਅਗਮ ਅਗਮਿਮ੍ਹੇ. ਭੂਤਸਾਮਞ੍ਞਵਚਨਿਚ੍ਛਾਯਮਨਜ੍ਜਤਨੇਪਿ ‘ਸੁਵੋ ਅਹੋਸਿ ਆਨਨ੍ਦੋ’.
੫. ਅਨਜ੍ਜਤਨੇ ਆ ਊ ਓ ਤ੍ਥ ਅ ਮ੍ਹਾ ਤ੍ਥ ਤ੍ਥੁਂ ਸੇ ਵ੍ਹਂ ਇਂ ਮ੍ਹਸੇ.
ਅਵਿਜ੍ਜਮਾਨਜ੍ਜਤਨੇ ਭੂਤੇ-ਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਥਾ ਆਆਦਯੋ ਹੋਨ੍ਤਿ.
ਆਞਾਯ੍ਯਾ ਚ ਉਟ੍ਠਾਨਾ, ਆਞਾਯ੍ਯਾ ਚ ਸਂਵੇਸਨਾ;
ਏਸਜ੍ਜਤਨੋ ਕਾਲੋ, ਅਹਰੁਭਤਡ੍ਢਰਤ੍ਤਂ ਵਾ.
ਅਗਮਾ ਅਗਮੂ, ਅਗਮੋ, ਅਗਮਤ੍ਥ, ਅਗਮ ਅਗਮਮ੍ਹਾ, ਅਗਮਤ੍ਥ ਅਗਮਤ੍ਥੁਂ, ਅਗਮਸੇ ਅਗਮਵ੍ਹਂ, ਅਗਮਿਂ ਅਗਮਮ੍ਹਸੇ. ਅਞ੍ਞਪਦਤ੍ਥੋ ਕਿਂ? ਅਜ੍ਜ ਹਿਯ੍ਯੋ ਵਾ ਅਗਮਾਸਿ.
੬. ਪਰੋਕ੍ਖੇ ਅ ਉ ਏ ਤ੍ਥ ਅ ਮ੍ਹ ਤ੍ਥ ਰੇ ਤ੍ਥੋ ਵ੍ਹੋ ਇ ਮ੍ਹੇ.
ਅਪਚ੍ਚਕ੍ਖੇ ਭੂਤਾਨਜ੍ਜਤਨੇ-ਤ੍ਥੇ ਵੁਤ੍ਤਮਾਨਤੋ ਕ੍ਰਿਯਾਤ੍ਥਾ ਅ ਆਦਯੋ ਹੋਨ੍ਤਿ. ਜਗਾਮ ਜਗਮੁ, ਜਗਮੇ ਜਗਪਿਤ੍ਥ, ਜਗਮ ਜਗਮਿਮ੍ਹ, ਜਗਮਿਤ੍ਥ ਜਗਮਿਰੇ, ਜਗਮਿਤ੍ਥੋ ਜਗਮਿਵ੍ਹੋ, ਜਗਮਿ ਜਗਮਿਮ੍ਹੇ. ਮੂਲ਼੍ਹਵਿਕ੍ਖਿਤ੍ਤਬ੍ਯਾਸਤ੍ਤਚਿਤ੍ਤੇਨ ਅਤ੍ਤਨਾਪਿ ਕ੍ਰਿਯਾਕਤਾਭਿਨਿਬ੍ਬਤ੍ਤਿਤਕਾਲੇ-ਨੁਪਲਦ੍ਧਾ ਸਮਾਨਾ ਫਲੇਨਾ-ਨੁਮੀਯਮਾਨਾ ਪਰੋਕ੍ਖਾਵ ਵਤ੍ਥੁਤੋ, ਤੇਨੁਤ੍ਤਮਵਿਸਯੇਪਿ ਪਯੋਗਸਮਵੋ.
੭. ਏਯ੍ਯਾਦੋ ਵਾਤਿਪਤ੍ਤਿਯਂ ਸ੍ਸਾ ਸ੍ਸਂ ਸੁ ਸ੍ਸੇ ਸ੍ਸਥ ਸ੍ਸਂ ਸ੍ਸਾਮ੍ਹਾ ਸ੍ਸਥ ਸ੍ਸਿਂਸੁ ਸਸ੍ਸੇ ਸ੍ਸਵ੍ਹੇ ਸ੍ਸਿਂ ਸ੍ਸਾਮ੍ਹਸੇ.
ਏਯ੍ਯਾਦੋ ਵਿਸਯੇ ਕ੍ਰਿਯਾਤਿਪਤ੍ਤਿਯਂ ਸ੍ਸਾਦਯੋ ਹੋਨ੍ਤਿ ਵਿਭਾਸਾ. ਵਿਧੁਰਪ੍ਪਚ੍ਚਯੋਪਨਿਪਾਤਤੋ ਕਾਰਣਵੇਕਲ੍ਲਤੋ ਵਾ ਕ੍ਰਿਯਾਯਾਤਿਪਤਨਮਨਿਪ੍ਫਤ੍ਤਿ ਕ੍ਰਿਯਾਤਿਪਤ੍ਤਿ, ਏਤੇ ਚ ਸ੍ਸਾਦਯੋ ਸਾਮਤ੍ਥਿਯਾਤੀਤਾਨਾਗਤੇਸ੍ਵੇਵ ਹੋਨ੍ਤਿ ਨ ਵਤ੍ਤਮਾਨੇ ਤਤ੍ਰ… ਕ੍ਰਿਯਾਤਿਪਤ੍ਯਸਮ੍ਭਵਾ, ਸਚੇ ਪਠਮਵਯੇ ਪਬ੍ਬਜ੍ਜਂ ਅਲਭਿਸ੍ਸਾ ਅਰਹਾ ਅਭਵਿਸ੍ਸਾ, ਦਕ੍ਖਿਣੇਨ ਚੇ ਅਗਮਿਸ੍ਸਾ ਨ ਸਕਟਂ ਪਰਿਯਾ ਭਵਿਸ੍ਸਾ, ਦਕ੍ਖਿਣੇਨ ਚੇ ਅਗਮਿਸ੍ਸਂਸੁ, ਅਗਮਿਸ੍ਸੇ ਅਗਮਿਸ੍ਸਥ, ਅਗਮਿਸ੍ਸਂ ਅਗਮਿਸ੍ਸਾਮ੍ਹਾ, ਅਗਮਿਸ੍ਸਥ ਅਗਮਿਸ੍ਸਿਂਸੁ, ਅਗਮਿਸ੍ਸਸੇ ਅਗਮਿਸ੍ਸਵ੍ਹੇ, ਅਗਮਿਸ੍ਸਿਂ ਅਗਮਿਸ੍ਸਾਮ੍ਹਸੇ, ਨ ਸਕਟਂ ਪਰਿਯਾਭਵਿਸ੍ਸਾ, ਵਾਤਿਕਿਂ? ਦਕ੍ਖਿਣੇ ਨ ਚੇ ਗਮਿਸ੍ਸਤਿ ਨ ਸਕਟਂ ਪਰਿਯਾ ਭਵਿਸ੍ਸਤਿ.
੮. ਹੇਤੁਫਲੇਸ੍ਵੇਯ੍ਯ ਏਯ੍ਯੁਂ ਏਯ੍ਯਾਸਿ ਏਯ੍ਯਾਥ ਏਯ੍ਯਾਮਿ ਏਯ੍ਯਾਮ ਏਥ ਏਰਂ ਏਥੋ ਏਯ੍ਯਵ੍ਹੋ ਏਯ੍ਯਂ ਏਯ੍ਯਾਮ੍ਹੇ.
ਹੇਤੁਭੂਤਾਯਂ ਏਲਭੂਤਾਯਞ੍ਚ ਕ੍ਰਿਯਾਯਂ ਵਤ੍ਤਮਾਨਤੋ ਕ੍ਰਿਯਤ੍ਥਾ ਏਯ੍ਯਾਦਯੋ ਵਾ ਹੋਨ੍ਤਿ, ਸਚੇ ਸਙ੍ਖਾਰਾ ਨਿਚ੍ਚਾ ਭਵੇਯ੍ਯੁਂ ਨ ਨਿਰੁਜ੍ਝੇਯ੍ਯੁਂ, ਦਕ੍ਖਿਣੇਨ ਚੇ ਗਚ੍ਛੇਯ੍ਯ ਨ ਸਕਟਂ ਪਰਿਯਾਭਵੇਯ੍ਯ, ਦਕ੍ਖਿਣੇਨ ਚੇ ਗਚ੍ਛੇਯ੍ਯੁਂ, ਗਚ੍ਛੇਯ੍ਯਾਸਿ ਗਚ੍ਛੇਯ੍ਯਾਥ, ਗਚ੍ਛੇਯ੍ਯਾਮਿ ਗਚ੍ਛੇਯ੍ਯਾਮ, ਗਚ੍ਛੇਥ ਗਚ੍ਛੇਰਂ, ਗਚ੍ਛੇਥੋ ਗਚ੍ਛੇਯ੍ਯਵ੍ਹੋ, ਗਚ੍ਛੇਯ੍ਯਂ ਗਚ੍ਛੇਯ੍ਯਾਮ੍ਹੇ, ਨ ਸਕਟਂ ਪਰਿਯ੍ਯਾਭਵੇਯ੍ਯ, ਭਵਨਂ ਗਮਨਂ ਚ ਹੇਤੁ, ਅਨਿਰੁਜ੍ਝਨਂ ਅਪਰਿਯਾਭਵਨਂ ਚ ਫਲਂ, ਇਹ ਕਸ੍ਮਾ ਨ ਹੋਤਿ ‘ਹਨ੍ਤੀਹਿ ਪਲਾਯਤਿ, ਵਸ੍ਸਤੀਤਿ ਧਾਵਤਿ, ਹਨਿਸ੍ਸਤੀਤਿ ਪਲਾਯਿਸ੍ਸਤੀ’ਤਿ? ਇਤਿ ਸਦ੍ਦੇਨੇਵ ਹੇਤੁਹੇਤੁਮਨ੍ਤਤਾਯ ਜੋਤਿਤਤ੍ਤਾ, ਵਾਤਿ ਕਿਂ? ਦਕ੍ਖਿਣੇਨ ਚੇ ਗਮਿਸ੍ਸਤਿ ਨ ਸਕਟਂ ਪਰਿਯਾਭਵਿਸ੍ਸਤਿ.
੯. ਪਞ੍ਹਪਤ੍ਥਨਾਵਿਧੀਸੁ.
ਪਞ੍ਹੋ=ਸਮ੍ਪੁਚ੍ਛਨਂ ਸਮ੍ਪਧਾਰਣਂ ਨਿਰੂਪਣਂ ਕਾਰਿਯਾਨਿਚ੍ਛਯਨਂ ਪਤ੍ਥਨਾ=ਯਾਚਨਂ ਇਟ੍ਠਾਸਿਂ ਭਨਞ੍ਚ, ਵਿਧਿ=ਵਿਧਾਨਂ ਨਿਯੋਜਨਂ ਕ੍ਰਿਯਾਸੁ ਬ੍ਯਾਪਾਰਣਾ, ਸਾ ਚ ਦੁਵਿਧਾਵ ਸਾਦਰਾਨਾਦਰਵਸੇਨ… ਵਿਸਯਭੇਦੇਨ ਭਿਨ੍ਨਾਯਪਿ ਤਦੁਭਯਾਨਤਿਵਤ੍ਤਨਤੋ, ਏਤੇਸੁ ਪਞ੍ਹਾਦੀਸੁ ਕ੍ਰਿਯਤ੍ਥਤੋ ਏਯ੍ਯੋਦਯੋ ਹੋਨ੍ਤਿ, ਪਞ੍ਹੇ - ਕਿਮਾਯਸ੍ਮਾ ਵਿਨਯਂ ਪਰਿਯਾਪੁਣੇਯ੍ਯ? ਉਦਾਹੁ ਧਮ੍ਮਂ, ਗਚ੍ਛੇਯ੍ਯਂ ਵਾਹਂ ਉਪੋਸਥਂ ਨ ਵਾ ਗਚ੍ਛੇਯ੍ਯਂ, ਪਤ੍ਥਨਾਯਂ-ਲਭੇਯ੍ਯਾ-ਹਂ ਭਨ੍ਤੇ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ ਲਭੇਯ੍ਯਂ ਉਪਸਮ੍ਪਦਂ, ਪਸ੍ਸੇਯ੍ਯਂ ਤਂ ਵਸ੍ਸਸਤਂ ਅਰੋਗਂ, ਵਿਧਿਮ੍ਹਿ-ਭਵਂ ਪਤ੍ਤਂ ਪਚੇਯ੍ਯ, ਭਵਂ ਪੁਞ੍ਞਂ ਕਰੇਯ੍ਯ, ਇਹ ਭਵਂ ਭੁਞ੍ਜੇਯ੍ਯ, ਇਹ ਭਵਂ ਨਿਸੀਦੇਯ੍ਯ, ਮਾਣਵਕਂ ਭਵਂ ਅਜ੍ਝਾਪੇਯ੍ਯ, ਅਨੁਞ੍ਞਾਪਤ੍ਤਕਾਲੇਸੁਪਿ ਸਿਦ੍ਧਾਵ… ਤਤ੍ਥਾਪਿ ਵਿਧਿਪ੍ਪਤੀਤਿਤੋ, ਅਨੁਞ੍ਞਾਯਂ-ਏਵਂ ਕਰੇਯ੍ਯਾਸਿ, ਪਤ੍ਤਕਾਲੇ-ਕਟਂ ਕਰੇਯ੍ਯਾਸਿ, ਪਤ੍ਤੋ ਤੇ ਕਾਲੋ ਕਟਕਰਣੇ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ ਸਙ੍ਘੋ ਉਪੋਸਥਂ ਕਰੇਯ੍ਯ, ਏਤਸ੍ਸ ਭਗਵਾ ਕਾਲੋ ਏਤਸ੍ਸ ਸੁਗਤ ਕਾਲੋ ਯਂ ਭਗਵਾ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਪੇਯ੍ਯ, ਪੇਸਨੇਪਿਚ੍ਛਨ੍ਤਿ ‘ਗਾਮਂ ਤ੍ਵਂ ਭਣੇ ਗਚ੍ਛੇਯ੍ਯਾਸਿ’.
੧੦. ਤੁ ਅਨ੍ਤੁ ਹਿ ਥ ਮਿ ਮ ਤਂ ਅਨ੍ਤਂ ਸ੍ਸੁ ਵ੍ਹੋ ਏ ਆਮਸੇ.
ਪਞ੍ਹਾਦੀਸ੍ਵੇਤੇ ਹੋਨ੍ਤਿ ਕ੍ਰਿਯਤ੍ਥਤੋ. ਗਚ੍ਛਤੁ ਗਚ੍ਛਨ੍ਤੁ, ਗਚ੍ਛਾਹਿ ਗਚ੍ਛਥ, ਗਚ੍ਛਾਮਿ ਗਚ੍ਛਾਮ, ਗਚ੍ਛਤਂ ਗਚ੍ਛਨ੍ਤਂ, ਗਚ੍ਛਸ੍ਸੁ ਗਚ੍ਛਵ੍ਹੋ, ਗਚ੍ਛੇ, ਗਚ੍ਛਾਮਸੇ, ਪਞ੍ਹੇ-ਕਿਨ੍ਨੁ ਖਲੁ ਭੋ ਬ੍ਯਾਕਰਣਮਧੀਯਸ੍ਸੁ, ਪਤ੍ਥਨਾਯਂ-ਦਦਾਹਿ ਮੇ, ਜੀਵਤੁ ਭਵਂ, ਵਿਧਿਮ੍ਹਿ-ਕਟਂ ਕਰੋਤੁ ਭਵਂ, ਪੁਞ੍ਞਂ ਕਰੋਤੁ ਭਵਂ, ਇਹ ਭਵਂ ਭੁਞ੍ਜਤੁ, ਇਹ ਭਵਂ ਨਿਸੀਦਤੁ, ਉਦ੍ਦਿਸਤੁ ਭਨ੍ਤੇ ਭਗਵਾ ਭਿਕ੍ਖੂਨਂ ਪਾਤਿਮੋਕ੍ਖਂ, ਪੇਸਨੇ-ਗਚ੍ਛ ਭਣੇ ਗਾਮਂ, ਅਨੁਮਤਿਯਂ - ਏਵਂ ਕਰੋਹਿ, ਪਤ੍ਤਕਾਲੇ-ਕਾਲੋ-ਯਂ ਤੇ ਮਹਾਵੀਰ ਉਪ੍ਪਜ੍ਜ ਮਾਤੁਕੁਚ੍ਛਿਯਂ.
੧੧. ਸਤ੍ਯਰਹੇਸ੍ਵੇਯ੍ਯਾਦੀ.
ਸਤ੍ਤਿਯਂ ਅਰ ਹਤ੍ਥੇ ਚ ਕ੍ਰਿਯਤ੍ਥਾ ਏਯ੍ਯਾਦਯੋ ਹੋਨ੍ਤਿ. ਭਵਂ ਖਲੁ ਰਜ੍ਜਂ ਕਰੇਯ੍ਯ, ਭਵਂ ਸਤ੍ਤੋ ਅਰਹੋ.
੧੨. ਸਮ੍ਭਾਵਨੇ ਵਾ.
ਸਮ੍ਭਾਵਨੇ ਗਮ੍ਯਮਾਨੇ ਧਾਤੁਨਾ ਵੁਚ੍ਚਮਾਨੇ ਚ ਏਯ੍ਯਾਦਯੋ ਹੋਨ੍ਤਿ ਵਿਭਾਸਾ. ਅਪਿ ਪਬ੍ਬਤਂ ਸਿਰਸਾ ਭਿਨ੍ਦੇਯ੍ਯ, ਕ੍ਰਿਯਾਤਿਪਤ੍ਤਿਯਨ੍ਤੁ ਸ੍ਸਾਦੀ-ਅਸਨਿਯਾਪਿ ਹਤੋ ਨਾਪਤਿਸ੍ਸਾ, ਸਮ੍ਭਾਵੇਮਿ ਸਦ੍ਦਹਾਮਿ ਅਵਕਪ੍ਪੇਮਿ ਭੁਞ੍ਜੇਯ੍ਯ ਭਵਂ ਭੁਞ੍ਜਿਸ੍ਸਤਿ ਭਵਂ ਅਭੁਞ੍ਜਿ ਭਵਂ, ਕ੍ਰਿਯਾਤਿਪਤ੍ਤਿਯਨ੍ਤੁ ਸ੍ਸਾਦੀ-ਸਮ੍ਭਾਵੇਮਿ ਨਾਭੁਞ੍ਜਿਸ੍ਸਾ ਭਵਂ.
੧੩. ਮਾਯੋਗੇ ਈਆਆਦੀ.
ਮਾ ਯੋਗੇ ਸਤਿ ਈਆਦਯੋ ਆਆਦਯੋ ਚ ਵਾ ਹੋਨ੍ਤਿ. ਮਾ ਸੁ ਪੁਨਪਿ ਏਵਰੂਪਮਕਾਸਿ, ਮਾ ਭਵਂ ਅਗਮਾ ਵਨਂ, ਵਾਤ੍ਵੇਵ? ਮਾ ਤੇ ਕਾਮਗੁਣੇ ਭਮਸ੍ਸੁ ਚਿਤ੍ਤਂ, ਮਾ ਤ੍ਵਂ ਕਰਿਸ੍ਸਸਿ, ਮਾ ਤ੍ਵਂ ਕਰੇਯ੍ਯਾਸਿ, ਅਸਕਕਾਲਤ੍ਥੋਯਮਾਰਮ੍ਭੋ, ਬੁਦ੍ਧੋ ਭਵਿਸ੍ਸਤੀਤਿ ਪਦਨ੍ਤਰਸਮ੍ਬਨ੍ਧੇਨਾਨਾਗਤਕਾਲਤਾ ਪਤੀਯਤੇ, ਏਵਂ ਕਤੋ ਕਟੋ ਸ੍ਵੇ ਭਵਿਸ੍ਸਤਿ, ਭਾਵਿ ਕਿਚ੍ਚਮਾਸੀਤਿ.
ਲੁਨਾਹਿ ਲੁਨਾਹਿਤ੍ਵੇਵਾਯਂ ਲੁਨਾਤਿ, ਲੁਨਸ੍ਸੁ ਲੁਨਸ੍ਸੁਤ੍ਵੇਵਾਯਂ ਲੁਨਾ-ਤੀਤਿ ਤ੍ਵਾਦੀਨਮੇਵੇਤਂ ਮਜ੍ਝਿਮਪੁਰਿਸੇਕਵਚਨਾਨਮਾਭਿਕ੍ਖਞ੍ਞੇ ਦ੍ਵਿਬ੍ਬਵਚਨਂ, ਇਦਂ ਵੁਤ੍ਤਂ ਹੋਤਿ ‘ਏਵ ਮੇਸ ਤੁਰਿਤੋ ਅਞ੍ਞੇਪਿ ਨਿਯੋਜੇਨ੍ਤੋਵਿਯ ਕਿਰਿਯਂ ਕਰੋਤੀ’ਤਿ, ਏਵਂ ਲੁਨਾਥ ਲੁਨਾਥਤ੍ਵੇਵਾਯਂ ਲੁਨਾਤਿ, ਲੁਨਵ੍ਹੋ ਲੁਨਵ੍ਹੋਤ੍ਵੇਵਾਯਂ ਲੁਨਾਤਿ, ਤਥਾ ਕਾਲਨ੍ਤਰੇਸੁਪਿ ਲੁਨਾਹਿ ਲੁਨਾਹਿਤ੍ਵੇਵਾਯਂ ਅਲੁਨਿ, ਅਲੁਨਾ, ਲੁਲਾਵ, ਲੁਨਿਸ੍ਸਤੀਤਿ, ਏਵਂ ਸ੍ਸੁਮ੍ਹਿ ਚ ਯੋਜਨੀਯਂ, ਤਥਾ ਸਮੁਚ੍ਚਯੇਪਿ ਮਠਮਟ, ਵਿਹਾਰਮਟੇਤ੍ਵੇਵਾਯਮਟਤਿ, ਮਠਮਟਸ੍ਸੁ, ਵਿਹਾਰਮਟਸ੍ਸੁਤ੍ਵੇਵਾਯਮਟਤਿ, ਬ੍ਯਾਪਾਰਭੇਦੇ ਤੁਸਾਮਞ੍ਞਵਚਨਸ੍ਸੇਵ ਬ੍ਯਾਪਕਤ੍ਤਾ ਅਨੁਪ੍ਪਯੋਗੋ ਭਵਤਿ, ਓਦਨਂ ਭੁਞ੍ਜ, ਯਾਗੁਂ ਪਿਵ, ਧਾਨਾ ਖਾਦੇਤ੍ਵੇਵਾਯ-ਮਜ੍ਝੋਹਰਤਿ.
੧੪. ਪੁਬ੍ਬਪਰਚ੍ਛਕ੍ਕਾਨਮੇਕਾਨੇਕੇਸੁ ਤੁਮ੍ਹਾਮ੍ਹਸੇਸੇਸੁ ਦ੍ਵੇ ਦ੍ਵੇ ਮਜ੍ਝਿਮੁਤ੍ਤਮਪਠਮਾ.
ਏਕਾਨੇਕੇਸੁ ਤੁਮ੍ਹਾਮ੍ਹਸਦ੍ਦਵਚਨੀਯੇਸੁ ਤਦਞ੍ਞਸਦ੍ਦਵਚਨੀਯੇਸੁ ਚ ਕਾਰਕੇਸੁ ਪੁਬ੍ਬਚ੍ਛਕ੍ਕਾਨਂ ਪਰਚ੍ਛਕ੍ਕਾਨਂ ਮਜ੍ਝਿਮੁਤ੍ਤਮਪਠਮਾ ਦ੍ਵੇ ਦ੍ਵੇ ਹੋਨ੍ਤਿ ਯਥਾਕ੍ਕਮਂ ਕ੍ਰਿਯਤ੍ਥਾ, ਉਤ੍ਤਮਸਦ੍ਦੋ-ਯਂ ਸਭਾਵਤੋ ਤਤਿਯਦੁਕੇ ਰੁਲ਼੍ਹੋ, ਤ੍ਵਂ ਗਚ੍ਛਸਿ, ਤੁਮ੍ਹੇ ਗਚ੍ਛਥ, ਤ੍ਵਂ ਗਚ੍ਛਸੇ, ਤੁਮ੍ਹੇ ਗਚ੍ਛਵ੍ਹੇ, ਅਹਂ ਗਚ੍ਛਾਮਿ, ਮਯਂ ਗਚ੍ਛਾਮ, ਅਹਂ ਗਚ੍ਛੇ, ਮਯਂ ਗਚ੍ਛਾਮ੍ਹੇ, ਸੋ ਗਚ੍ਛਤਿ, ਤੇ ਗਚ੍ਛਨ੍ਤਿ, ਸੋ ਗਚ੍ਛਤੇ, ਤੇ ਗਚ੍ਛਨ੍ਤੇ, ਸਾਮਤ੍ਥਿਯਾ ਲਦ੍ਧਤ੍ਤਾ ਅਪ੍ਪਯੁਜ੍ਜਮਾਨੇਸੁਪਿ ਤੁਮ੍ਹਾਮ੍ਹਸੇਸੇਸੁ ਭਵਨ੍ਤਿ. ਗਚ੍ਛਸਿ, ਗਚ੍ਛਥ, ਗਚ੍ਛਸੇ, ਗਚ੍ਛਵ੍ਹੇ, ਗਚ੍ਛਾਮਿ, ਗਚ੍ਛਾਮ, ਗਚ੍ਛੇ, ਗਚ੍ਛਾਮ੍ਹੇ, ਗਚ੍ਛਤਿ, ਗਚ੍ਛਨ੍ਤਿ, ਗਚ੍ਛਤੇ, ਗਚ੍ਛਨ੍ਤੇ.
੧੫. ਆਈਸ੍ਸਾਦੀਸ੍ਵਞ ਵਾ.
ਆਆਦੋ ਈਆਦੋ ਸ੍ਸਾ ਆਦੋ ਚ ਕ੍ਰਿਯਤ੍ਥਸ੍ਸ ਵਾ ਅਞ ਹੋਤਿ. ਞਕਾਰੋ-ਨੁਬਨ੍ਧੋ, ਅਗਮਾ, ਗਮਾ, ਅਗਮੀ, ਗਮੀ, ਅਗਮਿਸ੍ਸਾ, ਗਮਿਸ੍ਸਾ.
੧੬. ਅਆਦੀਸ੍ਵਾਹੋ ਬ੍ਰੂਸ੍ਸ.
ਬ੍ਰੂਸ੍ਸ ਆਹੋ ਹੋਤਿ ਅਆਦੀਸੁ. ਆਹ, ਆਹੁ.
੧੭. ਭੂਸ੍ਸ ਵੁਕ.
ਅਆਦੀਸੁ ਭੂਸ੍ਸ ਵੁਕ ਹੋਤਿ. ਕਕਾਰੋ-ਨੁਬਨ੍ਧੋ, ਉਕਾਰੋ ਉਚ੍ਚਾਰਣਤ੍ਥੋ, ਬਭੂਵ.
੧੮. ਪੁਬ੍ਬਸ੍ਸ ਅ.
ਅਆਦੀਸੁ ਦ੍ਵਿਤ੍ਤੇ ਪੁਬ੍ਬਸ੍ਸ ਭੂਸ੍ਸ ਅ ਹੋਤਿ, ਬਭੂਵ.
੧੯. ਉਸ੍ਸਂਸ੍ਵਾਹਾ ਵਾ.
ਆਹਾਦੇਸਾ ਪਰਸ੍ਸ ਉਸ੍ਸ ਅਂਸੁਵਾ ਹੋਤਿ. ਅਹਂਸੁ, ਆਹੁ.
੨੦. ਤ੍ਯਨ੍ਤੀਨਂ ਟਟੂ.
ਆਹਾ ਪਰੇਸਂ ਤਿਅਨ੍ਤੀਨਂ ਟਟੂ ਹੋਨ੍ਤਿ. ਟਕਾਰਾ ਸਬ੍ਬਾਦੇਸਤ੍ਥਾ, ਆਹ, ਆਹੁ, ਅਤੋਯੇਵ ਚ ਞਾਪਕਾ ਤਿਅਨ੍ਤੀਸੁ ਚ ਬ੍ਰੂਸ੍ਸਾ-ਹੋ.
੨੧. ਈਆਦੋ ਵਚਸ੍ਸੋਮ.
ਈਆਦੀਸੁ ਵਚਸ੍ਸ ਓਮ ਹੋਤਿ. ਮਕਾਰੋ-ਨੁਬਨ੍ਧੋ, ਅਵੋਚ, ਈਆਦੋਤਿ ਕਿਂ? ਅਵਚਾ.
੨੨. ਦਾਸ੍ਸ ਦਂ ਵਾ ਮਿਮੇਸ੍ਵਦ੍ਵਿਤ੍ਤੇ.
ਅਦ੍ਵਿਤੇ ਵਤ੍ਤਮਾਨਸ੍ਸ ਦਾਸ੍ਸ ਦਂ ਵਾ ਹੋਤਿ ਮਿਮੇਸੁ. ਦਮ੍ਮਿ ਦੇਮਿ, ਦਮ੍ਮ ਦੇਮ, ਅਦ੍ਵਿਤ੍ਤੇਤਿ ਕਿਂ? ਦਦਾਧਿ ਦਦਾਮ.
੨੩. ਕਰਸ੍ਸ ਸੋਸ੍ਸ ਕੁਂ.
ਕਰਸ੍ਸ ਸਓਕਾਰਸ੍ਸ ਕੁਂ ਵਾ ਹੋਤਿ ਮਿਮੇਸੁ. ਕੁਮ੍ਮਿ ਕੁਮ੍ਮ, ਕਰੋਮਿ ਕਰੋਮ.
੨੪. ਕਾ ਈਆਦੀਸੁ.
ਕਰਸ੍ਸ ਸਓਕਾਰਸ੍ਸ ਕਾ ਹੋਤਿ ਵਾ ਈਆਦੀਸੁ. ਅਕਾਸਿ ਅਕਰਿ, ਅਕਂਸੁ ਅਕਰਿਂਸੁ, ਅਕਾ ਅਕਰਾ.
੨੫. ਹਾਸ੍ਸ, ਚਾਹਙ ਸ੍ਸੇਨ.
ਕਰਸ੍ਸ ਸੋਸ੍ਸ ਹਾਸ੍ਸ ਚ ਆਹਙ ਵਾ ਹੋਤਿ ਸ੍ਸੇਨ ਸਹ. ਕਾਹਤਿ ਕਰਿਸ੍ਸਤਿ, ਅਕਾਹਾ ਅਕਰਿਸ੍ਸਾ, ਹਾਹਤਿ ਹਾਯਿਸ੍ਸਤਿ, ਅਹਾਹਾ ਅਹਾਯਿਸ੍ਸਾ.
੨੬. ਲਭਵਸਚ੍ਛਿਦਭਿਦਰੁਦਾਨਂ ਚ੍ਛਙ.
ਲਭਾਦੀਨਂ ਚ੍ਛਙ ਵਾ ਹੋਤਿ ਸ੍ਸੇਨਸਹ. ਅਲਚ੍ਛਾ ਅਲਭਿਸ੍ਸਾ, ਲਚ੍ਛਤਿ ਲਭਿਸ੍ਸਾਤਿ, ਅਵਚ੍ਛਾ ਅਵਸਿਸ੍ਸਾ, ਵਚ੍ਛਤਿ ਵਸਿਸ੍ਸਤਿ, ਅਚ੍ਛੇਚ੍ਛਾ ਅਚ੍ਛਿਨ੍ਦਿਸ੍ਸਾ, ਛੇਚ੍ਛਤਿ ਛਿਨ੍ਦਿਸ੍ਸਤਿ, ਅਭੇਚ੍ਛਾ ਅਭਿਨ੍ਦਿਸ੍ਸਾ, ਭੇਚ੍ਛਤਿ ਭਿਨ੍ਦਿਸ੍ਸਤਿ, ਅਰੁਚ੍ਛਾ ਅਰੋਦਿਸ੍ਸਾ, ਰੁਚ੍ਛਤਿ ਰੋਦਿਸ੍ਸਤੀ, ਅਞ੍ਞਸ੍ਮਿਮ੍ਪਿ ਛਿਦਸ੍ਸ ਵਾ ਚ੍ਛਙ ਯੋਗਵਿਭਾਗਾ, ਅਚ੍ਛੇਚ੍ਛੁਂ ਅਚ੍ਛਨ੍ਤਿਂਸੁ, ਅਞ੍ਞੇਸਞ੍ਚ ਗਚ੍ਛਂ ਗਚ੍ਛਿਸ੍ਸਂ.
੨੭. ਭੁਜ ਮੁਚ ਵਚ ਵਿਸਾਨਂ ਕ੍ਖਙ.
ਭੁਜਾਦੀਨਂ ਕ੍ਖਙ ਵਾ ਹੋਤਿ ਸ੍ਸੇਨ ਸਹ. ਅਭੋਕ੍ਖਾ ਅਭੁਞ੍ਜਿਸ੍ਸਾ, ਭੋਕ੍ਖਤਿ ਭੁਞ੍ਜਿਸ੍ਸਤਿ, ਅਮੋਕ੍ਖਾ ਅਮੁਞ੍ਚਿਸ੍ਸਾ, ਮੋਕ੍ਖਤਿਮੁਞ੍ਚਿਸ੍ਸਤਿ, ਅਵਕ੍ਖਾ ਅਵਚਿਸ੍ਸਾ, ਵਕ੍ਖਤਿ ਵਚ੍ਚਿਸ੍ਸਤਿ, ਪਾਵੇਕ੍ਖਾ ਪਾਵਿਸਿਸ੍ਸਾ, ਪਵੇਕ੍ਖਤਿ ਪਵਿਸਿਸ੍ਸਤਿ, ਵਿਸਸ੍ਸਾ-ਞ੍ਞਸ੍ਮਿਮ੍ਪਿ ਵਾ ਕ੍ਖਙ ਯੋਗਵਿਭਾਗਾ ਪਾਵੇਕ੍ਖਿ, ਪਾਵਿਸਿ.
੨੮. ਆਈਆਦੀਸੁ ਹਰਸ੍ਸਾ.
ਆਆਦੋ ਈਆਦੋ ਅ ਹਰਸ੍ਸ ਆ ਹੋਤਿ ਵਾ. ਅਹਾ ਅਹਰਾ, ਅਹਾਸਿ ਅਹਰਿ.
੨੯. ਗਮਿਸ੍ਸ.
ਆਆਦੋ ਈਆਦੋ ਅ ਗਮਿਸ੍ਸ ਆ ਹੋਤਿ ਵਾ. ਅਗਾ ਅਗਮਾ, ਅਗਾ ਅਗਮੀ.
੩੦. ਡਂਸਸ੍ਸ ਚ ਛਙ.
ਡਂਸਸ੍ਸ ਗਮਿਸ੍ਸ ਚ ਛਙ ਵਾ ਹੋਤਿ ਆਈਆਦੀਸੁ. ਅਡਞ੍ਛਾ ਅਡਂਸਾ, ਅਡਞ੍ਛਿ ਅਡਂਸੀ, ਅਗਞ੍ਛਾ ਅਗਚ੍ਛਾ, ਅਗਞ੍ਛਿ ਅਗਚ੍ਛੀ.
੩੧. ਹੂਸ੍ਸ ਹੇਹੇਹਿਹੋਹਿ ਸ੍ਸਤ੍ਯਾਦੋ.
ਹੂਸ੍ਸ ਹੇਆਦਯੋ ਹੋਨ੍ਤਿ ਸ੍ਸਤ੍ਯਾਦੋ. ਹੇਸ੍ਸਤਿ, ਹੇਹਿਸ੍ਸਤਿ, ਹੋਹਿਸ੍ਸਤਿ.
੩੨. ਣਾਨਾਸੁ ਰਸ੍ਸੋ.
ਕ੍ਣਾਕ੍ਨਾਸੁ ਕ੍ਰਿਯਤ੍ਥਸ੍ਸ ਰਸ੍ਸੋ ਹੋਤਿ. ਕਿਣਾਤਿ, ਧੁਨਾਤਿ.
੩੩. ਆ ਈ ਞੁ ਮ੍ਹਾ ਸ੍ਸਾ ਸ੍ਸਮ੍ਹਾਨਂ ਵਾ.
ਏਸਂ ਵਾ ਰਸ੍ਸੋ ਹੋਤਿ. ਗਮ ਗਮਾ, ਗਮਿ ਗਮੀ, ਗਮੁ ਗਮੂ, ਗਮਿਮ੍ਹ ਗਮਿਮ੍ਹਾ, ਗਮਿਸ੍ਸ ਗਮਿਸ੍ਸਾ, ਗਮਿਸ੍ਸਮ੍ਹ ਗਮਿਸ੍ਸਮ੍ਹਾ.
੩੪. ਕੁਸਰੁਹੇਹੀਸ੍ਸ ਛਿ.
ਕੁਸਾ ਰੁਹਾ ਚ ਪਰਸ੍ਸ ਈਸ੍ਸ ਛਿ ਵਾ ਹੋਤਿ. ਅਕ੍ਕੋਚ੍ਛਿ ਅਕ੍ਕੋਸਿ, ਅਭਿਰੁਚ੍ਛਿ ਅਭਿਰੁਹਿ.
੩੫. ਅ ਈ ਸ੍ਸਾਆਦੀਨਂ ਬ੍ਯਞ੍ਜਨਸ੍ਸਿਞ.
ਕ੍ਰਿਯਤ੍ਥਾ ਪਰੇਸਂ ਅਆਦੀਨਂ ਈਆਦੀਨਂ ਸ੍ਸਆਦੀਨਞ੍ਚ-ਬ੍ਯਞ੍ਜਨਸ੍ਸ ਇਞ ਹੋਤਿ ਵਿਭਾਸਾ. ਬਭੁਵਿਤ੍ਥ, ਅਭਵਿਤ੍ਥਾ, ਅਨੁਭਵਿਸ੍ਸਾ, ਅਨੁਭਵਿਸ੍ਸਤਿ ਅਨੁਭੋਸ੍ਸਤਿ ਹਰਿਸਤਿ ਹਸ੍ਸਤਿ, ਏਤੇਸਨ੍ਤਿ ਕਿਂ? ਭਵਤਿ, ਬ੍ਯਞ੍ਜਨਸ੍ਸਾਤਿ ਕਿਂ? ਬਭੂਵ.
੩੬. ਬ੍ਰੂਤੋ ਤਿਸ੍ਸੀਞ.
ਬ੍ਰੂਤੋ ਪਰਸ੍ਸ ਤਿਸ੍ਸ ਈਞ ਵਾ ਹੋਤਿ. ਬ੍ਰਵੀਤਿ, ਬ੍ਰੂਤਿ.
੩੭. ਕ੍ਯਸ੍ਸ.
ਕ੍ਰਿਯਤ੍ਥਾ ਪਰਸ੍ਸ ਕ੍ਯਸ੍ਸ ਈਞ ਵਾ ਹੋਤਿ. ਪਚੀਯਤਿ, ਪਚ੍ਚਤਿ.
੩੮. ਏਯ੍ਯਾਥ ਸ੍ਸੇ ਅ ਆ ਈਥਾਨਂ ਓ, ਅ, ਅਂ, ਤ੍ਥ, ਤ੍ਥੋ, ਵ੍ਹੋਕ.
ਏਯ੍ਯਾਥਾਦੀਨਂ ਓਆਦਯੋ ਵਾ ਹੋਨ੍ਤਿ ਯਥਾਕ੍ਕਮਂ. ਤੁਮ੍ਹੇ ਭਵੇਯ੍ਯਾਥੋ ਭਵੇਯ੍ਯਾਥ, ਤ੍ਵਂ ਅਭਵਿਸ੍ਸ ਅਭਵਿਸ੍ਸੇ, ਅਹਂ ਅਭਵਂ ਅਭਵ, ਸੋ ਅਭਵਿਤ੍ਥ ਅਭਵਾ, ਸੋ ਅਭਵਿਤ੍ਥੋ, ਅਭਵੀ, ਤੁਮ੍ਹੇ ਭਵਥਵ੍ਹੋ ਭਵਥ, ਆਸਹਚਰਿਤੋਵ ਅਕਾਰੋ ਗਯ੍ਹਤੇ, ਥੋ ਪਨ-ਨ੍ਤੇ ਨਿਦ੍ਦੇਸਾ ਤ੍ਵਾਦਿਸਮ੍ਬਨ੍ਧੀਯੇਵ, ਤਸ੍ਸੇਵ ਵਾ ਨਿਸ੍ਸਿਤਤ੍ਤਾ, ਨਿਸ੍ਸਯਕਰਣਮ੍ਪਿ ਹਿ ਸੁਤ੍ਤਕਾਰਾਚਿਣ੍ਣਂ.
੩੯. ਉਂਸ੍ਸਿਂ ਸ੍ਵਂਸੁ.
ਉਮੀਚ੍ਚਸ੍ਸ ਇਂਸੁ ਅਂਸੁ ਵਾ ਹੋਨ੍ਤਿ. ਅਗਮਿਂਸੁ, ਅਗਮਂਸੁ, ਅਗਮੁਂ.
੪੦. ਏਓਤ੍ਤਾ ਸੁਂ.
ਏਆਦੇਸਤੋ ਓਆਦੇਸਤੋ ਚ ਪਰਸ੍ਸ ਉਮਿਚ੍ਚਸ੍ਸ ਸੁਂ ਵਾ ਹੋਤਿ. ਨੇਸੁਂ, ਨਯਿਂਸੁ, ਅਸ੍ਸੋਸੁਂ, ਅਸ੍ਸੁਂ, ਆਦੇਸਤ੍ਤਾਖ੍ਯਾਪਨਤ੍ਥਂਤ੍ਤਗ੍ਗਹਣਂ.
੪੧. ਹੂਤੋ ਰੇਸੁਂ.
ਹੂਤੋ ਪਰਸ੍ਸ ਉਮਿਚ੍ਚਸ੍ਸ ਰੇਸੁਂ ਵਾ ਹੋਤਿ. ਅਹੇਸੁਂ, ਅਹਵੁਂ.
੪੨. ਓਸ੍ਸ ਅ ਇ ਤ੍ਥ ਤ੍ਥੋ.
ਓਸ੍ਸ ਅਆਦਯੋ ਵਾ ਹੋਨ੍ਤਿ. ਤ੍ਵਂ ਅਭਵ, ਅਭਵਿ, ਅਭਵਿਤ੍ਥ, ਅਭਵਿਤ੍ਥੋ ਅਭਵੋ.
੪੩. ਸਿ.
ਓਸ੍ਸ ਸਿ ਵਾ ਹੋਤਿ. ਅਹੋਸਿ ਤ੍ਵਂ ਅਹੁਵੋ.
੪੪. ਦੀਘਾ ਈਸ੍ਸ.
ਦੀਘਤੋ ਪਰਸ੍ਸ ਈਸ੍ਸ ਸਿ ਵਾ ਹੋਤਿ. ਅਕਾਸਿ ਅਕਾ, ਅਦਾਸਿ ਅਦਾ.
੪੫. ਮ੍ਹਾਤ੍ਥਾਨਮੁਞ.
ਮ੍ਹਾਤ੍ਥਾਨਮ੍ਹਞ ਵਾ ਹੋਤਿ. ਅਗਮ੍ਹਮ੍ਹਾ ਅਗਮਿਮ੍ਹਾ, ਅਗਮੁਤ੍ਥ ਅਗਮਿਤ੍ਥ.
੪੬. ਇਂਸ੍ਸ ਚ ਸਿਞ.
ਇਮਿਚ੍ਚਸ੍ਸ ਸਿਞ ਵਾ ਤੋਤਿ ਮ੍ਹਾਤ੍ਥਾਨਞ੍ਚ ਬਹੁਲਂ. ਅਕਾਸਿਂ ਅਕਰਿਂ, ਅਕਾਸਿਮ੍ਹਾ ਅਕਰਿਮ੍ਹਾ ਅਕਾਸਿਤ੍ਥ ਅਕਰਿਤ੍ਥ.
੪੭. ਏਯ੍ਯੁਂਸ੍ਸੁਂ.
ਏਯ੍ਯੁਮਿਚ੍ਚਸ੍ਸ ਞਂ ਵਾ ਹੋਤਿ. ਗਚ੍ਛੁਂ ਗਚ੍ਛੇਯ੍ਯੁਂ.
੪੮. ਹਿਸ੍ਸ-ਤੋ ਲੋਪੋ.
ਅਤੋ ਪਰਸ੍ਸ ਹਿਸ੍ਸ ਲੋਪੋ ਵਾ ਹੋਤਿ. ਗਚ੍ਛ ਗਚ੍ਛਾਹਿ, ਅਤੋਤਿ ਕਿਂ? ਕਰੋਹਿ.
੪੯. ਕ੍ਯਸ੍ਸ ਸ੍ਸੇ.
ਕ੍ਯਸ੍ਸ ਵਾ ਲੋਪੋ ਹੋਤਿ ਸ੍ਸੇ. ਅਨ੍ਵਭਵਿਸ੍ਸਾ ਅਨ੍ਵਭੂਯਿਸ੍ਸਾ, ਅਨੁਭਵਿਸ੍ਸਤਿ ਅਨੁਛੂਯਿਸ੍ਸਤਿ.
੫੦. ਅਤ੍ਥਿਤੇਯ੍ਯਾਦਿਚ੍ਛਨ੍ਨਂ ਸ ਸੁ ਸ ਸਥ ਸਂ ਸਾਮ.
ਅਸ=ਭੁਵਿਚ੍ਚਸ੍ਮਾ ਪਰੇਸਂ ਏਯ੍ਯਾਦਿਚ੍ਛਨ੍ਨਂ ਸਾਦਯੋ ਹੋਨ੍ਤਿ ਯਥਾਕ੍ਕਮਂ. ਅਸ੍ਸ, ਅਸ੍ਸੁ, ਅਸ੍ਸ, ਅਸ੍ਸਥ, ਅਸ੍ਸਂ, ਅਸ੍ਸਾਮ.
੫੧. ਆਦਿਦ੍ਵਿਨ੍ਨਮਿਯਾਇਯੁਂ.
ਅਤ੍ਥਿਤੇਯ੍ਯਾਦਿਚ੍ਛਨ੍ਨਂ ਆਦਿਭੂਤਾਨਂ ਦ੍ਵਿਨ੍ਨਂ ਇਯਾ ਇਯੁਂ ਹੋਨ੍ਤਿ ਯਥਾਕ੍ਕਮਂ. ਸਿਯਾ, ਸਿਯੁਂ.
੫੨. ਤਸ੍ਸ ਥੋ.
ਅਤ੍ਥਿਤੋ ਪਰਸ੍ਸ ਤਕਾਰਸ੍ਸ ਥੋ ਹੋਤਿ. ਅਤ੍ਥਿ, ਅਤ੍ਥੁ.
੫੩. ਸਿਹਿਸ੍ਵਟ.
ਅਤ੍ਥਿਸ੍ਸ ਅਟ ਹੋਤਿ ਸਿਹਿਸੁ, ਟੋ ਸਬ੍ਬਾਦੇਸਤ੍ਥੋ. ਅਸਿ ਅਹਿ.
੫੪. ਮਿਮਾਨਂ ਵਾ ਮ੍ਹਿਮ੍ਹਾ ਚ.
ਅਤ੍ਥਿਸ੍ਮਾ ਪਰੇਸਂ ਮਿਮਾਨਂ ਮ੍ਹਿਮ੍ਹਾ ਵਾ ਹੋਨ੍ਤਿ, ਤਂਸਨ੍ਨਿਯੋਗੇਨਅਤ੍ਥਿਸ੍ਸ ਅਟ ਚ. ਅਮ੍ਹਿ ਅਸ੍ਮਿ, ਅਮ੍ਹ ਅਸ੍ਮ.
੫੫. ਏਸੁ ਸਿ.
ਏਸੁ ਮਿਮੇਸੁ ਅਤ੍ਥਿਸ੍ਸ ਸਕਾਰੋ ਹੋਤਿ. ਅਸ੍ਮਿ ਅਸ੍ਮ, ਪਰਰੂਪਬਾਧਨਤ੍ਥਂ.
੫੬. ਈਆਦੋ ਦੀਘੋ.
ਅਤ੍ਥਿਸ੍ਸ ਦੀਘੋ ਹੋਤਿ ਈਆਦਿਮ੍ਹਿ. ਆਸਿ, ਆਸੁਂ, ਆਸਿ, ਆਸਿਤ੍ਥ, ਆਸਿਂ, ਆਸਿਂ ਮ੍ਹਾ.
੫੭. ਹਿਮਿਮੇਸ੍ਵਸ੍ਸ.
ਅਕਾਰਸ੍ਸ ਦੀਘੋ ਹੋਤਿ ਹਿਮਿਮੇਸੁ. ਪਚਾਹਿ, ਪਚਾਮਿ, ਪਚਾਮ, ਮੁਯ੍ਹਾਮਿ.
੫੮. ਸਕਾ ਣਾਸ੍ਸ ਖ ਈਆਦੋ.
ਸਕਸ੍ਮਾ ਕ੍ਣਾਸ੍ਸਖੋਹੋਤਿ ਈਆਦੀਸੁ. ਅਸਕ੍ਖਿ, ਅਸਕ੍ਖਿਂਸੁ.
੫੯. ਸ੍ਸੇ ਵਾ.
ਸਕਸ੍ਮਾ ਕ੍ਣਸ੍ਸਖੋ ਵਾ ਹੋਤਿ ਸ੍ਸੇ. ਸਕ੍ਖਿਸ੍ਸਾ ਸਕ੍ਕੁਣਿਸ੍ਸਾ, ਸਕ੍ਖਿਸ੍ਸਤਿ, ਸਕ੍ਕੁਣਿਸ੍ਸਤਿ.
੬੦. ਤੇਸੁ ਸੁਤੋ ਕ੍ਣੋਕ੍ਣਾਨਂ ਰੋਟ.
ਤੇਸੁ ਈਆਦਿਸ੍ਸੇਸੁ ਸੁਤੋ ਪਰੇਸਂ ਕ੍ਣੋਕ੍ਣਾਨਂ ਰੋਟ ਵਾ ਹੋਤਿ. ਅਸ੍ਸੋਸਿ ਅਸੁਣਿ, ਅਸ੍ਸੋਸ੍ਸਾ ਅਸੁਣਿਸ੍ਸਾ, ਸੋਸ੍ਸਤਿ ਸੁਣਿਸ੍ਸਤਿ.
੬੧. ਞਾਸ੍ਸ ਸਨਾਸ੍ਸ ਨਾਯੋ ਤਿਮ੍ਹਿ. ਸਨਾਸ੍ਸ ਞਾਸ੍ਸ ਨਾਯੋ ਵਾ ਹੋਤਿ ਤਿਮ੍ਹਿ. ਨਾਯਤਿ, ਜਾਨਾਤਿ.
੬੨. ਞਾਮ੍ਹਿ ਜਂ.
ਞਾਦੇਸੇ ਸਨਾਸ੍ਸ ਞਾਸ੍ਸ ਜਂ (ਵਾ) ਹੋਤਿ. ਜਞ੍ਞਾ (ਜਾਨੇਯ੍ਯ).
੬੩. ਏਯ੍ਯਾਸ੍ਸਿਯਾਞਾ ਵਾ.
ਞਾਤੋ ਏਯ੍ਯਾਸ੍ਸ ਇਯਾਞਾ ਹੋਨ੍ਤਿ ਵਾ. ਜਾਨਿਯਾ, ਜਞ੍ਞਾ ਜਾਨੇਯ੍ਯ.
੬੪. ਈਸ੍ਸਤ੍ਯਾਦੀਸੁ ਕ੍ਨਾਲੋਪੋ.
ਈਆਦੋ ਸ੍ਸਤ੍ਯਾਦੋ ਚ ਞਾਤੋ ਕ੍ਨਾਲੋਪੋ ਵਾ ਹੋਤਿ. ਅਞ੍ਞਾਸਿ ਅਜਾਨਿ, ਞਸ੍ਸਤਿ ਜਾਨਿਸ੍ਸਤਿ.
੬੫. ਸ੍ਸਸ੍ਸ ਹਿ ਕਮ੍ਮੇ.
ਞਾਤੋ ਪਰਸ੍ਸ ਸ੍ਸਸ੍ਸ ਹਿ ਵਾ ਹੋਤਿ ਕਮ੍ਮੇ. ਪਞ੍ਞਾਯਿਹਿਤਿ ਪਞ੍ਞਾਯਿਸ੍ਸਤਿ.
੬੬. ਏਤਿਸ੍ਮਾ.
ਏਤਿਸ੍ਮਾ ਪਰਸ੍ਸ ਸ੍ਸਸ੍ਸ ਹਿ ਹੋਤਿ ਵਾ. ਏਹਿਤਿ ਏਸ੍ਸਤਿ.
੬੭. ਹਨਾ ਛਖਾ.
ਹਨਾ ਸ੍ਸਸ੍ਸ ਛਖਾ ਵਾ ਹੋਨ੍ਤਿ. ਹਞ੍ਛਾਮਿ ਹਨਿਸ੍ਸਾਮਿ, ਪਟਿਹਙ੍ਖਾਮਿ ਪਟਿਹਨਿਸ੍ਸਾਮਿ.
੬੮. ਹਾਤੋ ਹ.
ਹਾਤੋ ਪਰਸ੍ਸ ਸ੍ਸਸ੍ਸ ਹ ਹੋਤਿ ਵਾ. ਹਾਹਤਿ ਜਹਿਸ੍ਸਤਿ.
੬੯. ਦਕ੍ਖ ਖ ਹੇਹਿ ਹੋਹੀਹਿ ਲੋਪੋ.
ਦਕ੍ਖਾਦੀਹਿ ਆਦੇਸੇਹਿ ਪਰਸ੍ਸ ਸ੍ਸਸ੍ਸ ਲੋਪੋ ਵਾ ਹੋਤਿ. ਦਕ੍ਖਤਿ ਦਕ੍ਖਿਸ੍ਸਤਿ, ਸਕ੍ਖਤਿ ਸਕ੍ਖਿਸ੍ਸਤਿ, ਹੇਹਿਤਿ ਹੇਹਿਸ੍ਸਤਿਹੋਹਿਤਿ ਹੋਹਿਸ੍ਸਤਿ.
੭੦. ਕਯਿਰੇਯ੍ਯਸ੍ਸੇਯ੍ਯੁਮਾਦੀਨਂ.
ਕਯਿਰਾ ਪਰਸ੍ਸ ਏਯ੍ਯੁਮਾਦੀਨਂ ਏਯ੍ਯਸ੍ਸ ਲੋਪੋ ਹੋਤਿ. ਕਯਿਰੁਂ, ਕਯਿਰਾਸਿ, ਕਯਿਰਾਥ, ਕਹਿਰਾਮਿ, ਕਯਿਰਾਮ.
੭੧. ਟਾ.
ਕਯਿਰਾ ਪਰਸ੍ਸ ਏਯ੍ਯਸ੍ਸ ਟਾ ਹੋਤਿ. ਸੋ ਕਯਿਰਾ.
੭੨. ਏਥਸ੍ਸਾ.
ਕਯਿਰਾ ਪਰਸ੍ਸ ਏਥਸ੍ਸ ਆ ਹੋਤਿ. ਕਯਿਰਾਥ.
੭੩. ਲਭਾ ਇਂ ਈਨਂ ਥਂ ਥਾ ਵਾ.
ਲਭਸ੍ਮਾ ਇਂਈਇਚ੍ਚੇਸਂ ਥਂਥਾ ਹੋਨ੍ਤਿ ਵਾ. ਅਲਤ੍ਥਂ ਅਲਭਿਂ, ਅਲਤ੍ਥ ਅਲਭਿ.