੭. ਸਤ੍ਤਮੋ ਕਣ੍ਡੋ (ਣ੍ਵਾਦਿ)
‘‘ਬਹੁਲਂ’’ (੧.੫੮) ‘‘ਕ੍ਰਿਯਤ੍ਥਾ’’ਤਿ (੫.੧੪) ਚ ਸਬ੍ਬਤ੍ਥ ਵਤ੍ਥਤੇ.
੧. ਚਰ ਦਰ ਕਰ ਰਹ ਜਨ ਸਨ ਤਲ ਸਾਦ ਸਾਧ ਕਸਾਸ ਚਟਾਯ ਵਾਹਿ ਣੁ.
ਚਰ-ਗਤਿਭਕ੍ਖਣੇਸੁ, ਦਰ-ਦਰਣੇ, ਕਰ-ਕਰਣੇ, ਰਹ-ਚਾਗੇ, ਜਨ-ਜਨਨੇ, ਸਨ-ਸਮ੍ਭਤ੍ਤਿਯਂ, ਤਲ-ਪਤਿਟ੍ਠਾਯਂ, ਸਾਦ-ਅਸ੍ਸਾਦਨੇ, ਸਾਧ-ਸਂਸਿਦ੍ਧਿਯਂ, ਕਸ-ਵਿਲੇਖਨੇ, ਅਸ-ਖੇਪਨੇ, ਚਟ-ਭੇਦਨੇ, ਅਯ-ਇਤਿ ਗਮਨਤ੍ਥੋ ਦਣ੍ਡਕੋ ਧਾਤੁ, ਵਾ-ਗਤਿਗਨ੍ਧਨੇਸੁ, ਏਤੇਹਿ ਕ੍ਰਿਯਤ੍ਥੇਹਿ ਬਹੁਲਂ ਣੁ ਹੋਤਿ. ‘‘ਅਸ੍ਸਾ ਣਾਨੁਬਨ੍ਧੇ’’ਤਿ (੫.੮੪) ਉਪਨ੍ਤਸ੍ਸ ਅਸ੍ਸ ਆ, ਚਰਤਿ ਹਦਯੇ ਮਨੁਞ੍ਞਭਾਵੇਨਾਤਿ ਚਾਰੁ=ਸੋਭਨਂ. ਦਰੀਯਤੀਤਿ ਦਾਰ=ਕਟ੍ਠਂ. ਕਰੋਤੀਤਿ ਕਾਰੁ=ਸਿਪ੍ਪੀ, ਮਘ ਵਾ, ਵਿਸੁਕਮ੍ਮੋ ਚ. ਰਹਤਿ ਚਨ੍ਦਾਦੀਨਂ ਸੋਭਾਵਿਸੇਸਂ ਨਾਸੇਤੀਤਿ ਰਾਹੁ=ਅਸੁਰਿਨ੍ਦੋ. ਜਾਯਤਿ ਗਮਨਾਗਮਨਂ ਅਨੇਨਾਤਿਜਾਨੁ=ਜਙ੍ਘੋਰੂਨਂ ਸਨ੍ਧਿ. ਸਨੇਤਿ ਅਤ੍ਤਨਿ ਭਤ੍ਤਿਂ ਉਪ੍ਪਾਦੇਤੀਤਿ ਸਾਨੁ=ਗਿਰਿਪ੍ਪਦੇਸੋ. ਤਲਨ੍ਤਿ ਪਤਿਟ੍ਠਹਨ੍ਤਿ ਏਤ੍ਥ ਦਨ੍ਤਾਤਿ ਤਾਲੁ=ਵਦਨੇਕਦੇਸੋ. ਸਾ ਦੀਯਤਿ ਅਸ੍ਸਾਦੀਯਤੀਤਿ ਸਾਦੁ=ਮਧੁਰਂ. ਸਾਧੇਤਿ ਅਤ੍ਤਪਰਹਿਤਨ੍ਤਿ ਸਾਧੁ=ਸਜ੍ਜਨੋ. ਕਸੀਯਤੀਤਿ ਕਾਸੁ=ਆਵਾਟੋ, ਅਸਤਿ ਸੀਘਭਾਵੇਨ ਪਵਤ੍ਤਤੀਤਿ ਆਸੁ=ਸੀਘਂ. ਚਟਤਿ ਭਿਨ੍ਦਤਿ ਅਮਨੁਞ੍ਞਭਾਵਨ੍ਤਿ ਚਾਟੁ=ਮਨੁਞ੍ਞੋ. ਅਯਨ੍ਤਿ ਪਵਤ੍ਤਨ੍ਤਿ ਸਤ੍ਤਾ ਏਤੇਨਾਤਿ ਆਯੁ=ਜੀਵਿਤਂ. ‘‘ਅਸ੍ਸਾ ਣਾਪਿਮ੍ਹਿ ਯੁਕ’’ ਇਤਿ (੫.੯੧) ਯੁਕ- ਵਾਤਿ ਗਚ੍ਛਤੀਤਿ ਵਾਯੁ-ਵਾਤੋ.
੨. ਭਰ ਮਰ ਚਰ ਤਰ ਅਰ ਗਰ ਹਨ ਤਨ ਮਨ ਭਮ ਕਿਤ ਧਨ ਬਂਹ ਕਮ੍ਬਮ੍ਬ ਚਕ੍ਖ ਭਿਕ੍ਖ ਸਂਕਿਨ੍ਦਨ੍ਦ ਯਜ ਪਟਾਣਾਸ ਵਸ ਪਸ ਪਂਸ ਬਨ੍ਧਾ ਉ.
ਭਰ-ਭਰਣੇ, ਮਰ-ਪਾਣਚਾਗੇ, ਚਰ-ਗਤਿਭਕ੍ਖਣੇਸੁ, ਤਰ ਤਰਣੇ, ਅਰ-ਗਮਨੇ, ਗਰ ਘਰ-ਸੇਚਨੇ, ਗਿਰਾਤਿ ਵਾ ਨਿਪਾਤਨਾ ਅਕਾਰੋ, ਹਨ-ਹਿਂ ਸਾਯਂ, ਤਨ-ਵਿਤ੍ਤਾਰੇ, ਮਨ-ਞਾਣੇ, ਭਮ-ਅਨਵਟ੍ਠਾਨੇ, ਕਿਤ-ਨਿਵਾਸੇ, ਧਨ-ਸਦ੍ਦੇ, ਬਂਹ ਬ੍ਰਹ ਬ੍ਰੂਹ-ਵੁਦ੍ਧਿਯਂ, ਕਮ੍ਬ-ਸਂਵਰਣੇ, ਅਮ੍ਬ-ਸਦ੍ਦੇ, ਚਕ੍ਖ ਇਕ੍ਖ ਦਸ੍ਸਨੇ, ਭਿਕ੍ਖ-ਯਾਚਨੇ, ਸਂਕਸਙ੍ਕਾਯਂ, ਇਨ੍ਦ-ਪਰਮਿਸ੍ਸਰਿਯੇ, ਅਨ੍ਦ-ਬਨ੍ਧਨੇ, ਯਜ-ਦੇਵਪੂਜਾਯਂ, ਅਟ ਪਟ-ਗਮਨਥਾ, ਅਣ-ਸਦ੍ਦਤ੍ਥੋ, ਅਸ-ਖੇਪਨੇ, ਵਸ-ਨਿਵਾਸੇ, ਪਸਬਾਧਨੇ, ਪਂਸ-ਨਾਸਨੇ, ਬਨ੍ਧ-ਬਨ੍ਧਨੇ, ਏਤੇਹਿ ਕ੍ਰਿਯਤ੍ਥੇਹਿ ਉ ਹੋਤਿ. ਭਰਤੀਤਿ ਭਰ=ਭਤ੍ਤਾ. ਮਰਤਿ ਰੂਪਕਾਯੇਨ ਸਹੇਵਾਤਿ ਮਰੁ=ਦੇਵੋ, ਨਿਜ੍ਜਲਦੇਸੋ ਚ. ਚਰੀਯਤਿ ਭਕ੍ਖੀਯਤੀਤਿ ਚਰੁ=ਹਬ੍ਯਪਾ ਕੋ. ਤਰਨ੍ਤਿ ਅਨੇਨਾਤਿ ਤਰੁ=ਰੁਕ੍ਖੋ. ਅਰਤਿ ਸੂਨਭਾਵੇਨ ਉਦ੍ਧਂ ਗਚ੍ਛਤੀਤਿ ਅਰੁ=ਵਣੋ. ਗਰਤਿ ਸਿਞ੍ਚਤਿ, ਗਿਰਤਿ ਵਮਤਿ ਵਾ ਸਿਸ੍ਸੇਸੁ ਸਿਨੇਹਨ੍ਤਿ ਗਰੁ=ਆਚਰਿਯੋ. ਹਨਤਿ ਓਦਨਾਦੀਸੁ ਵਣ੍ਣਵਿਸੇਸਂ ਨਾਸੇਤੀਤਿ ਹਨੁ=ਵਦਨੇਕਦੇਸੋ. ਤਨੋਤਿ ਸਂਸਾਰ ਦੁਕ੍ਖਨ੍ਤਿ ਤਨੁ-ਸਰੀਰਂ. ਮਞ੍ਞਤਿ ਸਤ੍ਤਾਨਂ ਹਿਤਾਹਿਤਨ੍ਤਿ ਮਨੁ=ਪਜਾਪਤਿ. ਭਮਤਿ ਚਲਤੀਤਿ ਭਮੁ=ਨਯਨੋ ਪਤਿਟ੍ਠਾਨਂ. ਕੇਤਤਿ ਉਦ੍ਧਂ ਗਚ੍ਛਤਿ, ਉਪਰਿ ਨਿਵਸਤੀਤਿ ਵਾ ਕੇਤੁ=ਧਜੋ. ਧਨਤਿ ਸਦ੍ਦਂ ਕਰੋਤੀਤਿ ਧਨੁ=ਚਾਪੋ. ਬਂਹ ਇਤਿ ਨਿਦ੍ਦੇਸਾ ਉਮ੍ਹਿ ਨਿਚ੍ਚਂ ਨਿਗ੍ਗਹੀਤਲੋਪੋ, ਬਂਹਤਿ ਵੁਦ੍ਧਿਂ ਗਚ੍ਛਤੀਤਿ ਬਹੁ=ਅਨਪ੍ਪਕਂ. ਕਮ੍ਬਤਿ ਸਂਵਰਂ ਕਰੋਤੀਥਿ ਕਮ੍ਬੁ=ਵਲਯੋ, ਸਙ੍ਖੋ ਚ. ਅਮ੍ਬਤਿ ਨਾਦਂਕਰੋਤੀਤਿ ਅਮ੍ਬੁ=ਵਾਰਿ. ਚਕ੍ਖਤਿ ਰੂਪਨ੍ਤਿ ਚਕ੍ਖੁ=ਨਯਨਂ. ਭਿਕ੍ਖਤੀਤਿ ਭਿਕ੍ਖੁ=ਸਮਣੋ. ਸਂਕਿਰਤੀਤਿ ਸਂਕੁ=ਸੂਲਂ. ਇਨ੍ਦਤਿ ਨਕ੍ਖਤ੍ਤਾਨਂ ਪਰਮਿਸ੍ਸਰਿਯਂ ਪਵਤ੍ਤੇਤੀਤਿ ਇਨ੍ਦੁ=ਚਨ੍ਦੋ. ਅਨ੍ਦਨ੍ਤਿ ਬਨ੍ਧਨ੍ਤਿ ਸਤ੍ਤਾ ਏਤਾਯਾਤਿ ਅਨ੍ਦੁ=ਸਙ੍ਖਲਿਕਾ. ਯਜਨ੍ਤਿ ਅਨੇਨਾਤਿ ਯਜੁ=ਵੇਦੋ. ਪਟਤਿ ਬ੍ਯਤ੍ਤਭਾਵਂ ਗਚ੍ਛਤੀਤਿ ਪਟੁ=ਵਿਚਕ੍ਖਣੋ. ਅਣਤਿ ਸੁਖੁਮਭਾਵੇਨ ਪਵਤ੍ਤਤੀਤਿ ਅਣੁ=ਸੁਖੁਮੋ, ਵੀਹਿਭੇਦੋ ਚ. ਅਸਨ੍ਤਿ ਪਵਤ੍ਤਨ੍ਤਿ ਸਤ੍ਤਾ ਏਤੇਹੀਤਿ ਅਸਵੋ=ਪਾਣਾ. ਸੁਖਂ ਵਸਨ੍ਤ੍ਯਨੇਨਾਤਿ ਵਸੁ=ਧਨਂ. ਪਸੀਯਤਿ ਬਾਧੀਯਤਿ ਸਾਮਿਕੇਹੀਤਿ ਪਸੁ. ਚਤੁਪ੍ਪਦੋ. ਪਂਸਤਿ ਸੋਭਾਵਿਸੇਸਂ ਨਾਸੇਤੀਤਿ ਪਂਸੁ=ਰੇਣੁ. ਬਨ੍ਧੀਯਤਿ ਸਿਨੇਹਭਾਵੇਨਾਤਿ ਬਨ੍ਧੁ=ਞਾਤਿ.
੩. ਬਨ੍ਧਾ ਊ ਵਧੋ ਚ.
ਬਨ੍ਧ-ਬਨ੍ਧਨੇ ਤਿਮਸ੍ਮਾ ਊ ਹੋਤਿ, ਬਨ੍ਧਸ੍ਸ ਵਧਾਦੇਸੋ ਚ. ਪਞ੍ਚਹਿ ਕਾਮਗੁਣੇਹਿ ਅਤ੍ਤਨਿ ਸਤ੍ਥੇ ਬਨ੍ਧਤੀਤਿ ਵਧੂ-ਸੁਣਿਸਾ, ਇਤ੍ਥੀਚ.
੪. ਜਮ੍ਬਾਦਯੋ.
ਜਮ੍ਬੂਆਦਯੋ ਸਦ੍ਦਾਊਪਚ੍ਚਯਨ੍ਤਾ ਨਿਪਚ੍ਚਨ੍ਤੇ, ਨਿਪਾਤਨਂ ਅਪ੍ਪਤ੍ਤਸ੍ਸ ਪਾਪਨਂ ਪਤ੍ਤਸ੍ਸ ਪਟਿਸੇਧੋ ਚ. ਜਨਿਸ੍ਮਾ ਊ, ਬੁਕਾਗਮੋ, ‘‘ਮਨਾਨਂ ਨਿਗ੍ਗਹੀਤ’’ਨ੍ਤਿ (੫.੯੬) ਨਸ੍ਸ ਨਿਗ੍ਗਹੀਤਂ, ‘‘ਵਗ੍ਗੇ ਵਗ੍ਗਨ੍ਤੋ’’ਤਿ (੧.੪੧) ਨਿਗ੍ਗਹੀਤਸ੍ਸ ਮੋ, ਜਾਯਤਿ, ਜਨੀਯਤੀ ਵਾ ਜਮ੍ਬੂ=ਰੁਕ੍ਖੋ. ਭਮਿਸ੍ਸ ਅਮਲੋਪੋ, ਭਮਤਿ ਕਮ੍ਪਤੀਤਿ ਭੂ=ਭਮੁ. ਕਰੋਤਿਸ੍ਮਾ ਊ, ਤਸ੍ਸ ਕਨ੍ਧੁਞ ਚ, ‘‘ਪਰਰੂਪਮਯਕਾਰੇ ਬ੍ਯਞ੍ਜਨੇ’’ਤਿ (੫.੯੫) ਧਾਤ੍ਵਨ੍ਤਸ੍ਸ ਬ੍ਯਞ੍ਜਨਸ੍ਸ ਪਰਰੂਪਤ੍ਤਂ, ਰੁਧਿਰੁਪ੍ਪਾਦਂ ਕਰੋਤੀਤਿ ਕਕ੍ਕਨ੍ਧੂ=ਬਦਰੀ. ਲਮ੍ਬ-ਅਵਸਂਸਨੇ, ਆਪੁਬ੍ਬੋ, ਸਂਯੋਗਾਦਿਲੋਪਦੀਘਰਸ੍ਸਾ, ਆਲਮ੍ਬਤਿ ਅਵਸਂਸਤੀਤਿ ਅਲਾਬੂ=ਤੁਮ੍ਬਿ. ਸਰ-ਗਤਿ ਹਿਂਸਾਚਿਨ੍ਤਾਸੁ, ਊਮ੍ਹਿ ਅਭੁਕ ਅਬੁਕ ਚ, ਸਰਤਿ ਗਚ੍ਛਤੀਤਿ ਸਰਭੂ=ਏਕਾ ਮਹਾਨਦੀ. ਸਰਤਿ ਪਾਣੇ ਹਿਂਸਤੀਤਿ ਸਰਬੂ=ਖੁਦ੍ਦਜਨ੍ਤੁਕਵਿਸੇਸੋ. ਚਮਅਦਨੇ, ਚਮਤਿ ਭਕ੍ਖਤਿ ਨਿਵਾਪਨ੍ਤਿ ਚਮੂ=ਸੇਨਾ. ਤਨ-ਵਿਤ੍ਥਾਰੇ, ਤਨੋਤਿ ਸਂਸਾਰਦੁਕ੍ਖਨ੍ਤਿ ਤਨੁ=ਸਰੀਰਂ, ਏਵਮਞ੍ਞੇਪਿ ਪਯੋਗਤੋ ਦਟ੍ਠਬ੍ਬਾ.
੫. ਤਪੁਸ ਵਿ ਧ ਕੁਰ ਪੁਥ ਮੁਦਾ ਕੁ.
ਤਪ-ਸਨ੍ਤਾਪੇ, ਉਸ-ਦਾਹੇ, ਵਿਧ-ਵੇਧਨੇ, ਕੁਰ-ਸਦ੍ਦੇ, ਪੁਥ ਪਥ-ਵਿਤ੍ਥਾਰੇ, ਮੁਦ-ਤੋਸੇ, ਏਤੇਹਿ ਕੁ, ਹੋਤਿ. ਕਕਾਰੋਨੁਬਨ੍ਧੋ ‘‘ਨ ਤੇ ਕਾਨੁਬਨ੍ਧਨਾਗਮੇਸੂ’’ਤਿ (੫.੮੫) ਏਓਨਮਭਾਵਤ੍ਥੋ. ਤਪ ਇਤਿ ਨਿਦ੍ਦੇਸਤੋਵ ਅਸ੍ਸ ਇਤ੍ਤਂ, ਤਾਪੀਯਤੀਤਿ ਤਿਪੁ=ਲੋਹਵਿਸੇਸੋ. ਉਸਤਿ ਦਾਹਂ ਕਰੋਤੀਤਿ ਉਸੁ=ਸਰੋ. ਵੇਧਤਿ ਰਂਸੀਹਿ ਤਿਮਿਰਨ੍ਤਿ ਵਿਧੁ=ਚਨ੍ਦੋ. ਕੁਰਤਿ ਕਿਚ੍ਚਾਕਿਚ੍ਚਂ ਵਦਤੀਤਿ ਕੁਰੁ=ਰਾਜਾ, ਕੁਰਵੋ=ਜਨਪਦੋ. ਪੁਥਤਿ ਮਹਨ੍ਥਭਾਵੇਨ ਪਤ੍ਥਿਰਤੀਤਿ ਪੁਥੁ=ਵਿਤ੍ਥਿਣ੍ਣੋ, ਮੋਦਨਂ, ਮੁਦੀਯਤੀਤਿ ਵਾ ਮੁਦੁ=ਅਥਦ੍ਧੋ.
੬. ਸਿਨ੍ਧਾਦਯੋ.
ਸਿਨ੍ਧੁ ਆਦਯੋ ਕੁਪਚ੍ਚਯਨ੍ਤਾ ਨਿਪਚ੍ਚਨ੍ਤੇ. ਸਨ੍ਦ-ਪਸ੍ਸਵਨੇ, ਅਸ੍ਸ ਇਤ੍ਤਂ, ਧੋਚਾਨ੍ਤਾ ਦੇਸੋ ਨਿਪਾਤਨਾ, ਸਨ੍ਦਤਿ ਪਸ੍ਸਵਤੀਤਿ ਸਿਨ੍ਧੁ=ਨਦਿ, ਵਹਿਸੁਪਨ੍ਤਸ੍ਸ ਦੀਘਾਦਿਬਤ੍ਤੇ, ਬਾਧਿਸ੍ਸ ਵਾਨ੍ਤਹਤ੍ਤੇ ਚ, ਵਹਨ੍ਤ੍ਯਨੇਨਾਤਿ ਬਾਹੁ, ਬਾਧਤਿ ਉਪਦ੍ਦਵੇ ਵਾਰੇਤੀ ਤਿ ਵਾ ਬਾਹੁ=ਭੁਜੋ. ਰਂਘ-ਗਮਨੇ, ਨਿਗ੍ਗਹੀਤਲੋਪੋ, ਰਙ੍ਘਤਿ ਪਵਤ੍ਤਹਿ ਰਾਜਧਮ੍ਮੇਤਿ ਰਘੁ=ਰਾਜਾ. ਵਿਦ-ਲਾਭੇ, ਨਕਾਰਾਗਮੋ, ਵਸ੍ਸ ਬੋ, ਵਿਨ੍ਦਤ੍ਯਨੇਨ ਨਨ੍ਦਨਨ੍ਤਿ ਬਿਨ੍ਦੁ=ਕਣਿਕਾ. ਮਨ-ਞਾਣੇ, ਨਸ੍ਸ ਧੋ, ਮਞ੍ਞਤਿ ਞਾਯਤਿ ਮਧੁਰਨ੍ਤਿ ਮਧੁ=ਮਧੁਕਰੀਹਿ ਕਤਮਧੁ, ਰਪ ਲਪ ਜਪ ਜਪ੍ਪ-ਵਚਨੇ, ਅਸ੍ਸਇਤ੍ਤਂ, ਰਪਤਿ ਜਪ੍ਪਤਿ ਮਨ੍ਤਨ੍ਤੀ ਰਿਪੁ=ਪਚ੍ਚਾਮਿਤ੍ਤੋ. ਸਸ-ਗਤਿ ਹਿਂ ਸਾਪਾਣਨੇਸੁ, ਅਸ੍ਸ ਉਤ੍ਤਂ, ਸਸਤਿ ਜੀਵਤੀਤਿ ਸੁਸੁ=ਯੁਵਾ. ਅਰ ਗਮਨੇ, ਅਸ੍ਸਉਤ੍ਤ ਮੂਤ੍ਤਞ੍ਚ, ਅਰਤਿ ਮਹਨ੍ਤਭਾਵਂ ਗਚ੍ਛਤੀਤਿ ਉਰੁ=ਮਹਾ, ਅਰਤਿਨੇਨਾਤਿ ਊਰੁ-ਸਤ੍ਥਿ. ਖਣ-ਅਵਦਾਰਣੇ, ਆ ਪੁਬ੍ਬੋ ਅਨਲੋਪੋ, ਆਖਨਤੀਤਿ ਆਖੁ=ਉਨ੍ਦੂਰੋ. ਤਰਤਰਣੇ, ਤਸ੍ਸ ਥੋ, ਤਰਤੀਤਿ ਥਰੁ=ਖਗ੍ਗਾਵਯਵੋ. ਲਂਘ-ਗਤਿ ਸੋਸਨੇਸੁ ਘਸ੍ਸ ਵਾ ਹਤ੍ਤਂ, ਨਿਗ੍ਗਹੀਤਲੋਪੋ ਚ, ਲਙ੍ਘਤਿ ਪਵਤ੍ਤਤਿ ਲਘੁਭਾਵੇਨਾਤਿ ਲਘੁ ਲਹੂ ਏਕਤ੍ਥਾ, (ਭਂਜ-ਓਮਦ੍ਦਨੇ, ਪ-ਪੁਬ੍ਬੋ, ਜਸ੍ਸ ਗਤ੍ਤਂ, ਪਭਞ੍ਜਤਿ ਵਿਸੇਸੇਨਾਤਿ ਪਭਙ੍ਗੁ=ਭਙ੍ਗੁਰੋ.) ਠਾ-ਗਤਿਨਿਵਤ੍ਤਿਯਂ, ਸੁਪੁਬ੍ਬੋ, ਠਾਤਿ ਪਵਤ੍ਤਤਿ ਸੁਨ੍ਦਰਭਾਵੇਨਾਤਿ ਸੁਟ੍ਠੁ=ਸੋਭਨਂ, ਦੁਪੁਬ੍ਬੋ ਠਾਤਿ ਪਵਤ੍ਤਤਿ ਅਸੁਨ੍ਦਰਭਾਵੇਨਾਤਿ ਦੁਟ੍ਠੁ=ਅਸੋਭਨਂ. ਏਵਮਞ੍ਞੇਪਿ ਵਿਞ੍ਞੇਯ੍ਯਾ.
੭. ਇ.
ਕ੍ਰਿਯਤ੍ਥਾ ਬਹੁਲਂ ਇ ਹੋਤਿ, ਅਭ-ਖੇਪਨੇ, ਅਸੀਯਤਿ ਖਿਪੀਯਤੀਤਿ ਅਸਿ=ਖਗ੍ਗੋ. ਕਸ-ਵਿਲੇਖਨੇ, ਕਸੀਯਤੇ ਕਸਿ=ਕਸਨਂ. ਮਸ-ਆਮਸਨੇ, ਮਸੀਯਤੀਤਿ ਮਸਿ=ਮੇਲ਼ਾ. ਕੁ-ਸਦ੍ਦੇ ਓ ਅਵਾਦੇਸਾ, ਕਵਤਿ ਕਥੇਭੀਤਿ ਕਵਿ=ਕਬ੍ਬਕਾਰੋ. ਰੁਸਦ੍ਦੇ, ਰਵਤਿ ਗਜ੍ਜਤੀਤਿ ਰਵਿ=ਆਦਿਚ੍ਚੋ. ਸਪ੍ਪ-ਗਮਨੇ, ਸਪ੍ਪਤਿ ਪਵਤ੍ਤਤੀਤਿ ਸਪ੍ਪਿ=ਘਤਂ. ਗਨ੍ਥ-ਗਨ੍ਥਨੇ, ‘‘ਤ ਥ ਨ ਰਾਨਂ ਟ ਠ ਣਲਾ’’ਤਿ (੧.੨੫) ਨਥਾਨਂ ਣਠਾ, ਗਨ੍ਥੇਤੀਤਿ ਗਣ੍ਠਿ=ਪਬ੍ਬੋ, ਗਣ੍ਠਿਚ. ਰਾਜ-ਦਿਤ੍ਤਿਯਂ, ਰਾਜਤਿ ਪਵਤ੍ਤਤੀਤਿ ਰਾਜਿ=ਪਾਲ਼ਿ. ਕਲ-ਸਙ੍ਖ੍ਯਾਨੇ, ਕਲੀਯਤਿ ਪਰਿਮੀਯਤੀਤਿ ਕਲਿ=ਪਾਪਂ. ਬਲ-ਪਾਣਨੇ, ਬਲਨ੍ਤਿ ਜੀਵਨ੍ਤਿ ਅਨੇਨਾਤਿ ਬਲਿ=ਕਰੋ. ਧਨ-ਸਦ੍ਦੇ, ਧਨਤਿ ਨਦਤੀਤਿ ਧਨਿ=ਸਦ੍ਦੋ. ਅਚ੍ਚ ਅਞ੍ਚ-ਪੂਜਾਯਂ, ਅਚ੍ਚੀਯਤਿ ਪੂਜੀਯਤੀਤਿ ਅਚ੍ਚਿ=ਜਾਲਾ. ਵਲ ਵਲ੍ਲ-ਸਂਵਰਣੇ, ਵਲਨਂ ਸਂਕੋਚਨਂ ਵਲਿ=ਉਦਰਾਦੀਸੁ ਪਲਿ, ਵਲ੍ਲੀਯਨ੍ਤਿ ਸਂਵਰੀਯਨ੍ਤਿ ਸਤ੍ਤਾ ਏਤਾਯਾਤਿ ਵਲ੍ਲਿ=ਲਤਾ. ਵਿਮ੍ਹਿ ਵਲੀ ਵਲ੍ਲੀਤਿਪਿ ਹੋਤਿ, ਸੋਯੇਵਤ੍ਥੋ, ਏਵਮਞ੍ਞੇਪਿ.
੮. ਦਝਾਦਯੋ.
ਦਧਿਆਦਯੋ ਸਦ੍ਦਾ ਇਪਚ੍ਚਯਨ੍ਤਾ ਨਿਪਚ੍ਚਨ੍ਤੇ. ਧਾ-ਧਾਰਣੇ, ਦ੍ਵਿਭਾਵੋ ਨਿਪਾਤਨਾ, ਘਤਮਾਦਧਾਤੀਤਿ ਦਧਿ=ਗੋਰ ਸਵਿਸੇਸੋ. ਅਂਹ-ਗਮਨੇ, ਨਿਗ੍ਗਹੀਤਲੋਪੋ, ਅਂਹਤਿ ਗਚ੍ਛਤੀਤਿ ਅਹਿ=ਸਪ੍ਪੋ. ਕਮ੍ਪ ਚਲਨੇ, ਸਂਯੋਗਾਦਿਲੋਪੋ, ਕਮ੍ਪਤਿ ਚਲਤੀਤਿ ਕਪਿ=ਵਾਨਰੋ. ਮਨ-ਞਾਣੇ, ਅਸ੍ਸ ਉਤ੍ਤਂ, ਮਨਤਿ ਜਾਨਾਤੀਤਿ ਮੁਨਿ=ਸਮਣੋ. ਨਸ੍ਸ ਣਤ੍ਤਂ, ਮਨਤਿ ਮਹਗ੍ਘਭਾਵਂ ਗਚ੍ਛਤੀਤੀ ਮਣਿ=ਰਤਨਂ. ਇਕ੍ਖ ਚਕ੍ਖ-ਦਸ੍ਸਨੇ, ਇਸ੍ਸ ਅਤ੍ਤਂ ਇਕ੍ਖਤਿ ਅਨੇਨਾਤਿ ਅਕ੍ਖਿ=ਨਯਨਂ. ਕਮਪਵਿਕ੍ਖੇਪੇ, ਅਸ੍ਸ ਇਤ੍ਤਂ, ਕਮਤਿ ਯਾਤੀਤਿ ਕਿਮਿ=ਖੁਦ੍ਦਜਨ੍ਤੁਕਵਿਸੇਸੋ. ਤਰ ਤਰਣੇ, ਤਿਤ੍ਤਿਰਾਦੇਸੋ, ਤੁਰਿਤੋ ਤਰਤਿ ਯਾਤੀਤਿ ਤਿਤ੍ਤਿਰਿ=ਪਕ੍ਖਿਵਿਸੇਸੋ. ਕੀਲ਼-ਵਿਹਾਰੇ, ਈਸ੍ਸ ਏਤ੍ਤਂ, ਕੀਲ਼ਨਂ ਕੇਲ਼ਿ=ਕੀਲ਼ਾ. ਉਸਿਸ੍ਮਾ ਇਸ੍ਸ ਖਲੁਞ, ਉਸਤਿ ਦਹਤੀ ਉਕ੍ਖਲਿ=ਭਾਜਨਂ, ਏਵਮਞ੍ਞੇਪਿ.
੯. ਯੁਵਣ੍ਣੁਪਨ੍ਤਾ ਕਿ.
ਇਵਣ੍ਣੁਪਨ੍ਤੇਹਿ ਚ ਉਵਣ੍ਣੁਪਨ੍ਤੇਹਿ ਚ ਕ੍ਰਿਯਤ੍ਥੇਹਿ ਬਹੁਲਂ ਕਿ ਹੋਤਿ. ਕਕਾਰੋ-ਨੁਬਨ੍ਧੋ, ਇਸ ਸਿਸ-ਇਚ੍ਛਾਯਂ, ਸਿਵਂ ਇਚ੍ਛਤੀਤਿ ਇਸਿ=ਤਪਸ੍ਸੀ. ਗਿਰ-ਨਿਗਿਰਣੇ, ਗਿਰਤਿ ਪਸਵਤਿ ਛਵਿਮਂਸਸਾਰਭੂਤਂ ਭੇਸਜ੍ਜਾਦਿਨ੍ਤਿ ਗਿਰਿ=ਸੇਲੋ. ਸੁਚ-ਸੋਚਨੇ. ਸੋਚਨਂ ਸੁਚਿ=ਸੋਚੇਯ੍ਯਂ, ਰੁਚ-ਅਭਿਲਾਸੇ ਰੁਚਨ੍ਤਿ ਏਤਾਯਾਤਿ ਰੁਚਿ=ਆਭਿਲਾਸੋ, ਏਵਮਞ੍ਞੇਪਿ.
੧੦. ਵਪ ਵਰ ਵਸ ਰਸ ਨਭ ਹਰ ਹਨ ਪਣਾ ਇਣ.
ਵਪ-ਬੀਜਨਿਕ੍ਖੇਪੇ, ਵਰ-ਵਰਣਸਮ੍ਭਤ੍ਤੀਸੁ, ਵਸ-ਨਿਵਾਸੇ, ਰਸ-ਅਸ੍ਸਾਦਨੇ, ਨਭ-ਹਿਂਸਾਯਂ, ਹਰ ਹਰਣੇ, ਹਨ ਹਿਂਸਾਯਂ, ਪਣ-ਬ੍ਯਵਹਾਰਥੁਤਿਸੁ, ਏਤੇਹਿ ਇਣ ਹੋਤਿ. ਵਪਨ੍ਤਿ ਏਤਾਯਾਤਿ ਵਾਪਿ=ਜਲਾਸਯੋ. ਵਾਰੇਨ੍ਤਿ ਏਤੇਨਾਤਿ ਵਾਰਿ=ਜਲਂ. ਵਸਨ੍ਤਿ ਏਤਾਯਾਤਿ ਵਾਸਿ=ਤਚ੍ਛਕ ਭਣ੍ਡਂ. ਰਸੀਯਤਿ ਅਸ੍ਸਾਦਨਵਸੇਨ ਸਮੋ ਸਰੀਯਤੀਤਿ ਰਾਸਿ=ਸਮੂਹੋ. ਨਭਤਿ ਹਿਂਸਤੀਤਿ ਨਾਭਿ=ਸਰੀਰਾਵਯਵੋ. ਹਾਰੇਤੀਤਿ ਹਾਰਿ=ਮਨੁਞ੍ਞਂ. ‘‘ਹਨਸ੍ਸ ਘਾਤੋ ਣਾਨੁਬਨ੍ਧੇ’’ (੫.੯੯) ਤਿ ਹਨਸ੍ਸ ਘਾਤੋ, ਹਨਨ੍ਤਿ ਏਤੇਨਾਤਿ ਘਾਤਿ=ਪਹਰਣਂ, ਪਣਤਿ ਵੋਹਰਤੀਤਿ ਪਾਣਿ, ਪਣਤਿ ਵੋਹਰਤਿ ਏਤੇਨਾਤਿ ਵਾ ਪਾਣਿ=ਕਰੋ.
੧੧. ਭੂਗਮਾ ਈਣ.
ਭੂ-ਸਤ੍ਤਾਯਂ, ਅਮ ਗਮ-ਗਮਨੇ ਏਤੇਹਿ ਈਣ ਹੋਤਿ ਭਵਿਸ੍ਸਤਿ ਕਾਲੇ. ਭਵਿਸ੍ਸਤੀਤਿ ਭਾਵੀ=ਭਵਿਸ੍ਸਮਾਨੋ. ਗਮਿਸ੍ਸਤੀਤਿ ਗਾਮੀ=ਗਮਿਸ੍ਸਾਮਾਨੋ.
੧੨. ਤਨ੍ਦਲਕ੍ਖਾ ਈ.
ਤਨ੍ਦ-ਆਲਸਿਯੇ, ਲਕ੍ਖ-ਦਸ੍ਸਨਙ੍ਕੇਸੁ, ਏਤੇਹਿ ਈ ਹੋਤਿ. ਤਨ੍ਦਨਂ ਤਨ੍ਦੀ=ਆਲਸ੍ਯਂ, ਲਕ੍ਖੀਯਨ੍ਤਿ ਸਤ੍ਤਾ ਏਤਾਯਾਤਿ ਲਕ੍ਖੀ=ਸਿਰੀ.
੧੩. ਗਮਾ ਰੋ.
ਗਮਿਸ੍ਮਾ ਰੋ ਹੋਤਿ. ‘‘ਰਾਨੁਬਨ੍ਧੇਨ੍ਤਸਰਾਦਿਸ੍ਸਾ’’ਤਿ (੪.੧੩੨) ਅਮਲੋਪੋ, ਗਚ੍ਛਤੀਤਿ ਗੋ=ਪਸੁ.
(ਇਤਿ ਸਰਪਚ੍ਚਯਵਿਧਾਨਂ).
੧੪. ਇ ਭੀ ਕਾ ਕਰਾਰ ਵਕ ਸਕ ਵਾਹਿ ਕੋ.
ਇ-ਅਜ੍ਝੇਨ ਗਤੀਸੁ, ਭੀ-ਭਯੇ, ਕਾ ਗਾ-ਸਦ੍ਦੇ, ਕਰ-ਕਰਣੇ, ਅਰ-ਗਮਨੇ, ਕੁਕ ਵਕ-ਆਦਾਨੇ, ਸਕ-ਸਤ੍ਤਿਯਂ, ਵਾ-ਗਤਿਬਨ੍ਧਨੇਸੁ, ਏਤੇਹਿ ਕਪਚ੍ਚਯੋ ਹੋਤਿ. ਏਤਿ ਪਵਤ੍ਤਤੀਤਿ ਏਤੋ=ਅਸਹਾਯੋ. ਭਾਯਨ੍ਤਿ ਏਤਸ੍ਮਾਤਿ ਭੇਕੋ=ਮਣ੍ਡੂਕੋ. ਕਾਯਤਿ ਸਦ੍ਦਂ ਕਰੋਤੀਤਿ ਕਾਕੋ=ਵਾਯਸੋ. ਕਰੋਤਿ ਵਣ੍ਣਕਨ੍ਤਿ ਕਕ੍ਕੋ=ਵਣ੍ਣਵਿਸੇਸੋ, ਪਿਸਿਤਦਬ੍ਬਞ੍ਚ. ਅਰਤਿ ਯਾਤੀਤਿ ਅਕ੍ਕੋ=ਸੂਰੋ, ਵਿਟਪਿਵਿਸੇਸੋ ਚ. ਵਕਤਿ ਓਦਨਂ ਆਦਦਾਤੀਤਿ ਵਕ੍ਕਂ=ਦੇਹਕੋਟ੍ਠਾਸਵਿਸੇਸੋ, ਸਕ੍ਕਤੀਤਿ ਸਕ੍ਕੋ-ਦੇਵਿਨ੍ਦੋ, ਸਮਤ੍ਥੋ ਚ. ਵਾਤਿ ਬਨ੍ਧਤਿ ਏਤੇਨਾਤਿ ਵਾਕੋ=ਵਕ੍ਕਲਂ.
੧੫. ਞੁਕਾਦਯੋ.
ਞੁਕਾਦਯੋ ਕਪਚ੍ਚਯਨ੍ਤਾ ਨਿਪਚ੍ਚਨ੍ਤੇ. ਊਹ-ਵਿਤਕ੍ਕੇ, ਹਲੋਪੋ ਨਿਪਾਤਨਾ ਊਹੀਯਤਿ ਵਿਚਿਨੀਯਤੀਤਿ ਊਕਾ-ਓਕੋਦਨੀ. ਉਨ੍ਦ ਕਿਲੇਦਨੇ, ਸਂਯੋਗਾਦਿ ਲੋਪੋ, ਅਕ ਚ. ਉਨ੍ਦਤਿ ਦ੍ਰਵਂ ਕਰੋਤੀਤਿ ਉਦਕਂ=ਜਲਂ. ਭੀ-ਭਯੇ, ਏਤ੍ਤਾਭਾਵੋ, ਭਾਯਨ੍ਤਿ ਏਤਸ੍ਮਾਤਿ ਭੀਕੋ=ਭੀਰੁ. ਸਕ-ਸਤ੍ਤਿਯਂ, ਉਪਨ੍ਤਸ੍ਸਿ, ਸਕ੍ਕੋਤਿ ਧਾਰੇਤੁਨ੍ਤਿ ਸਿਕ੍ਕਾ=ਉਪਕਰਣਵਿਸੇਸੋ. ਹਾ-ਚਾਗੇ, ਹੀਯਤਿ ਸਾਧੂਹਿ ਜਹੀਯਤੀਤਿ ਹਾਕੋ=ਕੋਧੋ. ਸਮ੍ਬ-ਮਣ੍ਡਨੇ, ਕਸ੍ਸ ਉਞ, ਸਮ੍ਬਤਿ ਉਦਕਂ ਮਣ੍ਡੇਤੀਤਿ ਸਮ੍ਬੁਕੋ=ਜਲਜਨ੍ਤੁਵਿਸੇਭੋ. ਪੁਥ ਪਥ-ਵਿਤ੍ਥਾਰੇ, ਓਤ੍ਤਾਭਾਵੋ, ਕਸ੍ਸ ਉਞ, ਪੁਥਤਿ ਪਤ੍ਥਰਤਿ ਅਤ੍ਤਨੋ ਬਾਲਭਾਵਨ੍ਤਿ ਪੁਥੁਕੋ=ਬਾਲੋ. ਸੁਚ-ਸੋਕੇ, ਸੋਚਨ੍ਤਿ ਏਤੇਨਾਤਿ ਸੁਕ੍ਕਂ=ਸਮ੍ਭਵੋ, ਸੇਤਞ੍ਚ. ਚਿ-ਚਯੇ, ਉਪਪੁਬ੍ਬੋ, ਏਤ੍ਤਾਭਾਵੋ, ਉਪਚਿਨਨ੍ਤੀਤਿ ਉਪਚਿਕਾ=ਵਮ੍ਮਿਕ ਕਾਰਾ. ਕਮ੍ਪ-ਚਲਨੇ, ਕਮ੍ਪਿਸ੍ਸ ਪਂ, ਕਮ੍ਪਤਿ ਚਲਤੀਤਿ ਪਙ੍ਕੋ=ਕਦ੍ਦਮੋ. ਉਸ-ਦਾਹੇ, ਉਸਤੀਤਿ ਉਕ੍ਕਾ=ਜਾਲਾ. ਕਸ੍ਸ ਮੁਞ, ਉਸਤਿ ਦਹਤੀਭਿ ਉਮ੍ਮੁਕਂ=ਅਲਾਤਂ. ਵਮ-ਉਗ੍ਗਿਰਣੇ, ਕਸ੍ਸ ਮਿਞ, ਵਮੀਯਤੀਤਿ ਵਮ੍ਮਿਕੋ=ਉਪਚਿਕਾਕਤੋ ਚਯੋ, ਮਸ-ਆਮਸਨੇ, ਸਸ੍ਸ ਤ੍ਥਙ, ਮਸੀਯਤਿ ਪੇਮੇਨਾਤਿ ਮਤ੍ਥਕਂ=ਸੀਸਂ, ਏਵਮਞ੍ਞੇਪਿ.
੧੬. ਭੀਤ੍ਵਾ ਨਕੋ.
ਭੀ-ਭਯੇ ਤੀਮਸ੍ਮਾ ਆਨਕੋ ਹੋਤਿ. ਭਾਯਨ੍ਤਿ ਏਤਸ੍ਮਾਕਿ ਭਯਾਨਕੋ=ਭਯਜਨਕੋ.
੧੭. ਸਿਙ੍ਘਾ ਆਣਿਕਾਟਕਾ.
ਸਿਙ੍ਘ-ਘਾਯਨੇਤੀਮਸ੍ਮਾ ਆਣਿਕ ਆਟਕਾ ਹੋਨ੍ਤਿ. ‘‘ਇਤ੍ਥਿਯਮਤ੍ਵਾ’’ਤਿ ੯੩.੨੬੦ ਆ, ਸਿਙ੍ਘਯਤਿ ਪਸ੍ਸਵਤੀਤਿ ਸਿਙ੍ਘਾਣਿਕਾ=ਨਾਸਾਸ੍ਸਵੋ. ਸਿਙ੍ਘਤਿ ਏਕੀਭਾਵਂ ਯਾਤੀਤਿ ਸਿਙ੍ਘਾਟਕਂ=ਵੀਥਿਚਤੁਕ੍ਕਂ.
੧੮. ਕਰਾਦਿਤ੍ਵਕੋ.
ਕਰ-ਕਰਣੇ, ਸਰ-ਗਤਿਹਿਂਸਾਚਿਨ੍ਤਾਸੁ, ਨਰ-ਨਯੇ, ਤਰਤਰਣੇ, ਵਰ-ਵਰਣ ਸਮ੍ਭਤ੍ਤੀਸੁ, ਜਨ-ਜਨਨੇ, ਕਰ-ਦਿਤ੍ਤਿ ਗਤਿਕਨ੍ਤੀਸੁ, ਕਟ-ਮਨ੍ਦਨੇ, ਕੁਰ-ਸਦ੍ਦੇ, ਥੁ-ਅਭਿਤ੍ਥਵੇ, ਏਵਮਾਦੀਹਿ ਅਕੋ ਹੋਤਿ. ਕਰੀਯਤੀਤਿ ਕਰਕੋ=ਕਮਣ੍ਡਲੁ. ਕਰੋਤੀਤਿ ਕਰਕਾ=ਵਸ੍ਸੋਪਲਾ. ਸਰਤਿ ਉਦਕਮੇਤ੍ਥਾਤਿ ਸਰਕੋ=ਪਾਨਭਾਜਨਂ. ਨਰਨ੍ਤਿ ਪਾਪੁਣਨ੍ਤਿ ਸਤ੍ਤਾ ਏਤ੍ਥਾਤਿ ਨਰਕੋ=ਨਿਰਯੋ. ਤਰਨ੍ਤ੍ਯਨੇਨਾਤਿ ਤਰਕੋ=ਤਰਣਂ. ਵਾਰੇਤੀਤਿਵਰਕੋ=ਵਰਣੋ, ਧਞ੍ਞਵਿਸੇਸੋ ਚ. ਜਨੇਤੀਤਿ ਜਨਕੋ=ਪਿਤਾ. ਕਨਤਿ ਦਿਬ੍ਬਤੀਤਿ ਕਨਕਂ=ਸੁਵਣ੍ਣਂ. ਕਟਤਿ ਮਦ੍ਦਤਿ ਰਿਪਵੋਤਿ ਕਟਕਂ=ਨਗਰਂ. ਕੁਰਤੀਤਿ ਕੋਰਕੋ=ਕਲਿਕਾ. ਥਵੀਯਤੀਤਿ ਥਵਕੋ-ਗੁਚ੍ਛੋ.
੧੯. ਬਲ ਪਤੇਹ੍ਯਾਕੋ.
ਬਲ-ਪਾਣਨੇ, ਪਤ ਪਥ-ਗਮਨੇ, ਏਤੇਹਿ ਆਕੋ ਹੋਤਿ. ਬਲਤਿ ਜੀਵਤੀਤਿ ਬਲਾਕਾ=ਪਕ੍ਖਿਵਿਸੇਸੋ. ਪਤਤਿ ਯਾਤੀਤਿ ਪਤਾਕਾ=ਧਜੋ.
੨੦. ਸਾਮਾਕਾਦਯੋ.
ਸਾਮਾਕਆਦਯੋ ਆਕਨ੍ਤਾ ਨਿਪਚ੍ਚਨ੍ਤੇ. ਸਾ-ਤਨੁ ਕਰਣਾਵਸਾਨੇਸੁ, ਸਾਸ੍ਸ ਮੁਕ, ਸਾਤਿ ਦੇਹਂ ਤ ਨੁਂ ਕਰੋਤੀਤਿ ਸਾਮਾਕੋ=ਤਿਣਧਞ੍ਞਂ. ਪਾ-ਪਾਨੇ, ਇਨਙ, ਪਿਵਤਿ ਰਤ੍ਤਨ੍ਤਿ ਪਿਨਾਕੋ=ਮਹਿਸ੍ਸਰਧਨੁ. ਗੁ-ਸਦ੍ਦੇ, ‘‘ਯੁਵਣ੍ਣਾਨ ਮਿਯਙੁਵਙ ਸਰੇ’’ਤਿ (੫.੧੩੬) ਉਵਙ, ਗਵਤਿ ਨਦਤਿ ਏਤੇਨਾਤਿ ਗੁਵਕੋ=ਪੂਗਫਲਂ. ਅਟ ਪਟ-ਗਮਨਤ੍ਥਾ, ਪਟਤਿ ਯਾਤੀਤਿ ਪਟਾਕਾ=ਵੇਜਯਨ੍ਤੀ. ਸਲ ਪਿਲ ਪਲ ਹੁਲ-ਗਮਨਤ੍ਥਾ, ਸਲਤਿ ਯਾਤੀਤਿ ਸਲਾਕਾ=ਵੇਜ੍ਜੋਪਕਰਣਦਬ੍ਬਂ. ਵਿਦ-ਞਾਣੇ, ਵਿਦਤਿ ਜਾਨਾਤੀਤਿ ਵਿਦਾਕੋ=ਵਿਦ੍ਵਾ. ਪਣਬ੍ਯਵਹਾਰਥੁਤੀਸੁ ਅਸ੍ਸ ਇਤ੍ਤਂ, ਊਕ ਚ, ਪਣੀਯਤਿ ਵੋਹਰੀਯਤੀਤਿ ਪਿਞ੍ਞਾਕੋ=ਤਿਲਕਕ੍ਕੋ, ਏਵਮਞ੍ਞੇਪਿ.
੨੧. ਵਿਚ੍ਛਾਲਗਮਮੁਸਾ ਕਿਕੋ.
ਵਿਚ੍ਛਾ-ਗਮਨੇ, ਅਲ=ਬਨ੍ਧਨੇ, ਅਮ ਗਮ-ਗਮਨੇ, ਮੁਸ-ਥੇਯ੍ਯੇ, ਏਤੇਹਿ ਕਿਕੋ ਹੋਤਿ. ਵਿਚ੍ਛਤਿ ਯਾਤੀਤਿ ਵਿਚ੍ਛਿਕੋ=ਕੀਟੋ. ਅਲਤਿ ਬਨ੍ਧਤਿ ਏਤੇਨਾਤਿ ਅਲਿਕਂ=ਅਸਚ੍ਚਂ. ਗਚ੍ਛਤੀਤਿ ਗਮਿਕੋ=ਗਨ੍ਤਾ. ਮੁਸਾਤਿ ਨਿਦ੍ਦੇਸਾ ਦੀਘੋ, ਮੁਸਤਿ ਥੇਨੇਤੀਤਿ ਮੂਸਿਕੋ=ਉਨ੍ਦੂਰੋ.
੨੨. ਕਿਂਕਣਿਕਾਦਯੋ.
ਕਿਂਕਣਿਕਾਦਯੋ ਸਦ੍ਦਾ ਕਿਕਨ੍ਤਾ ਨਿਪਚ੍ਚਨ੍ਤੇ. ਕਣਇਤਿ ਦਣ੍ਡਕੋ ਧਾਤੁ ਸਦ੍ਦਤ੍ਥੋ, ਕਸ੍ਸ ਦ੍ਵਿਤ੍ਤਂ, ਅਸ੍ਸ ਇਤ੍ਤਂ, ਨਿਗ੍ਗਹੀਤਾਗਮੋ ਚ, ਕਣਤਿ ਸਦ੍ਦਂ ਕਰੋਤੀ ਕਿਂਕਣਿਕਾ=ਘਣ੍ਡਿਕਾ. ਮੁਦ-ਤੋਸੇ, ਦਸ੍ਸ ਦ੍ਵਿਤ੍ਤਂ, ਮੁਦਨ੍ਤਿ ਏਤਮਯਾਤਿ ਮੁਦ੍ਦਿਕਾ=ਅਙ੍ਗੁਲਿਯਾਵੇਟ੍ਠਨਂ, ਫਲਵਿਸੇਸੋ ਅ. ਮਹੀਯਤਿ ਪੂਜੀਯਤੀਤਿ ਮਹਿਕਾ=ਹਿਮਂ. ਕਲ-ਸਙ੍ਖ੍ਯਾਨੇ, ਕਲੀਯਤਿ ਪਰਿਮੀਤਯਤੀਤਿ ਕਲਿਕਾ=ਕੋਰਕੋ. ਸਪ੍ਪ-ਗਮਨੇ, ਅਸ੍ਸ ਇਤ੍ਤਂ. ਸਪ੍ਪਤਿ ਗਚ੍ਛਤੀਤਿ ਸਿਪ੍ਪਿਕਾ=ਜਲਜਨ੍ਤੁਵਿਸੇਸੋ, ਏਵਮਞ੍ਞੇਪਿ.
੨੩. ਇਸਾ ਕੀਕੋ.
ਇਸ ਸਿਂਸ-ਇਚ੍ਛਾਯਂ, ਇਚ੍ਚਸ੍ਮਾ ਕੀਕੋ ਹੋਤਿ. ਇਚ੍ਛੀਯਤੀਤਿ ਇਸੀਕਾ=ਤੂਲਨਿਸ੍ਸਯੋ.
੨੪. ਕਮਪਦਾ ਣੁਕੋ.
ਕਮ-ਇਚ੍ਛਾਯਂ, ਪਦ-ਗਮਨੇ, ਏਤੇਹਿ ਣੁਕੋ ਹੋਤਿ. ‘‘ਣਿਣਾਪੀਨ’’ਨ੍ਤਿ (੫.੧੬੦) ਯੋਗਵਿਭਾਗਾ ਣਿਲੋਪੋ. ਕਾਮੇਤੀਤਿ ਕਾਮੁਕੋ=ਕਾਮਯਿਤਾ. ਪਜ੍ਜਤਿ ਯਾਤਿ ਏਤਾਯਾਤਿ ਪਾਦੁਕਾ=ਪਾਦੋਪਕਰਣਂ.
੨੫. ਮਣ੍ਡਸਲਾ ਣੂਕੋ.
ਮਣ੍ਡ-ਭੂਸਨੇ, ਸਲ-ਗਮਨਤ੍ਥੋ ਦਣ੍ਡਕੋ ਧਾਤੁ, ਏਤੇਹਿ ਣੂਕੋ ਹੋਤਿ. ਮਣ੍ਡੇਤਿ ਜਲਂ ਭੂਸੇਤੀਤਿ ਮਣ੍ਡੂਕੋ=ਭੇਕੋ, ਸਲਤਿ ਗੋਚਰਤ੍ਤ ਮੁਪਯਾਤੀਤਿ ਸਾਲੂਕਂ=ਉਪ੍ਪਲਕਣ੍ਡੋ.
੨੬. ਉਲੂਕਾਦਯੋ.
ਉਲੂਕਾਦਯੋ ਸਦ੍ਦਾ ਣੂਕਨ੍ਤਾ ਨਿਪਚ੍ਚਨ੍ਤੇ. ਉਲ-ਗਵੇਸਨੇ, ਓਤ੍ਤਾਭਾਵੋ ਨਿਪਾਤਨਾ, ਉਲਤਿ ਗਵੇਸਤੀਤਿ ਉਲੂਕੋ=ਕੋਸਿਯੋ. ਮਨ=ਞਾਣੇ, ਨਸ੍ਸ ਧਤ੍ਤਂ, ਮਞ੍ਞਤੀਤਿ ਮਧੂਕੋ=ਰੁਕ੍ਖੋ. ਜਲ-ਦਿਤ੍ਤਿਯਂ, ਜਲਤੀਤਿ ਜਲੂਕਾ=ਲੋਹਿਤਪੋ, ਏਵਮਞ੍ਞੇਪਿ.
੨੭. ਕਸਾ ਸਕੋ.
ਕਸ-ਵਿਲੇਖਨੇਤੀਮਸ੍ਮਾ ਸਕੋ ਹੋਤਿ. ਕਸਤੀਤਿ ਕਸ੍ਸਕੋ=ਕਸਿਕਮ੍ਮਕਾਰੋ.
੨੮. ਕਰਾ ਤਿਕੋ.
ਕਰੋਤਿਸ੍ਮਾ ਤਿਕੋ ਹੋਤਿ. ਕਰੋਨ੍ਤਿ ਕੀਲ਼ਂ ਏਤ੍ਥਾਤਿ ਕਤ੍ਤਿਕੋ=ਬਾਹੁਲੋ.
੨੯. ਇਸਾ ਠਕਨ.
ਇਸ ਸਿਂਸ-ਇਚ੍ਛਾਯਂ, ਇਚ੍ਚਸ੍ਮਾ ਠਕਨ ਹੋਤਿ. ਇਚ੍ਛੀਯਤੀਤਿ ਇਟ੍ਠਕਾ=ਮਤ੍ਤਿਕਾਵਿਕਾਰੋ.
੩੦. ਸਮਾ ਖੋ.
ਸਮ-ਉਪਸਮਖੇਦੇਸੁ, ਏਤਸ੍ਮਾ ਖੋ ਹੋਤਿ. ਸਮੇਤਿ ਉਪਸਮੇਤੀਤਿ ਸਙ੍ਖੋ=ਕਮ੍ਬੁ.
੩੧. ਮੁਖਾ ਦਯੋ.
ਮੁਖ ਆਦਯੋ ਖਨ੍ਤਾ ਨਿਪਚ੍ਚਨ੍ਤੇ. ਮੁ-ਬਨ੍ਧਨੇ, ਓਤ੍ਤਾਭਾਵੋ ਨਿਪਾਤਨਾ, ਮੁਨਨ੍ਤਿ ਬਨ੍ਧਨ੍ਤਿ ਏਤੇਨਾਤਿ ਮੁਖਂ=ਲਪਨਂ. ਸਿ-ਸੇਵਾਯਂ, ਏਤ੍ਤਾ ਭਾਵੋ ਨਿਪਾਤਨਾ, ਸਯਨ੍ਤਿ ਏਤ੍ਥ ਊਕਾ ਕੁਸੁਮ-ਦਯੋ ਚਾਤਿ ਸਿਖਾ=ਚੂਲ਼ਾ. ਵਿਪੁਬ੍ਬਸ੍ਸ ਸਿਸ੍ਸ, ਵਿਸਤਿਸ੍ਸ ਵਾ, ਵਿਸੇਸੇਨ ਸਯਨ੍ਤਿ ਏਤ੍ਥ, ਪਵਿਸਨ੍ਤੀਤਿ ਵਿਸਿਖਾ=ਰਚ੍ਛਾ. ਕਨ-ਦੀਤ੍ਤਿ ਗਤਿ ਕਨ੍ਤੀਸੁ, ਨਿਪੁਬ੍ਬੋ, ਅਨਭਾਗਲੋਪੋ, ਕਨਤਿ ਦਿਬ੍ਬਤੀਤਿ ਨਿਕ੍ਖੋ=ਸੁਵਣ੍ਣਵਿਕਾਰੋ. ਮਯਇਤਿ ਗਮਨਤ੍ਥੋ ਦਣ੍ਡਕੋ ਧਾਤੁ, ਖਸ੍ਸ ਊਞ, ਮਯਤਿ ਯਾਤੀਤਿ ਮਯੂਖੋ-ਕਿਰਣੋ. ਲੂ-ਛੇਦਨੇ, ਓਤ੍ਥਾਭਾਵੋ, ਲੁਨਾਤਿ ਛਿਨ੍ਦਤਿ ਸੋਭਨ੍ਤਿ ਲੂਖੋ=ਅਸਿਨਿਦ੍ਧੋ. ਅਰ-ਗਮਨੇ, ਅਰਨ੍ਤਿ ਯਨ੍ਤਿ ਏਤੇਨਾਤਿ ਅਕ੍ਖੋ=ਸਕਟਾਵਯਵਾ, ਪਾਸਕੋ ਚ. ਯਸ-ਪਯਤਨੇ, ਯਸ੍ਸਤਿ ਪਯਤਤਿ ਬਲਿਮਾਹਰਣਤ੍ਥਾਯਾਤਿ ਯਕ੍ਖੋ=ਅਮਨੁਸ੍ਸੋ, ਰੁਹ-ਜਨਨੇ, ਰੁਹਤਿ ਜਾਯਤੀਤਿ ਰੁਕ੍ਖੋ=ਪਾਦਪੋ, ਉਸ-ਦਾਹੇ, ਉਸਤਿ ਦਹਤਿ ਕਾਮਗ੍ਗਿਨਾਤਿ ਉਕ੍ਖੋ=ਬਲੀਬਦ੍ਦੋ. ਸਹ-ਮਰਿਸਨੇ ‘ਹਲੋਪੋ, ਸਹਤਿ ਅਤ੍ਤਨਿ ਕਤਾਪਰਾਧਂ ਖਮਤੀਤਿ ਸਖਾ=ਸਹਾਯੋ, ਏਵਮਞ੍ਞੇਪਿ.
੩੨. ਅਜ ਵਜ ਮੁਦ ਗਦ ਗਮਾ ਗਕ.
ਅਜ ਵਜ-ਗਮਨੇ, ਮੁਦ-ਤੋਸੇ, ਗਦ-ਵਚਨੇ, ਅਮ ਗਮ-ਗਮਨੇ, ਏਤੇਹਿ ਗਕ ਹੋਤਿ. ਅਜਤਿ ਗਚ੍ਛਤਿ ਸੇਟ੍ਠਭਾਵਨ੍ਤਿ ਅਗ੍ਗੋ-ਸੇਟ੍ਠੋ. ਵਜਤਿ ਸਮੂਹਤ੍ਤਂ ਗਚ੍ਛਤੀਤਿ ਵਗ੍ਗੋ=ਸਮੂਹੋ. ਮੁਦਨ੍ਤਿ ਏਤੇਨਾਤਿ ਮੁਗ੍ਗੋ=ਧਞ੍ਞਵਿਸੇਸੋ. ਗਦਤੀਤਿ ਗਗ੍ਗੋ=ਇਸਿ. ‘‘ਮਨਾਨਂ ਨਿਗ੍ਗਹੀਤ’’ਨ੍ਤਿ (੫.੯੬) ਮਸ੍ਸ ਨਿਗ੍ਗਹੀਤਂ, ਗਚ੍ਛਤੀਤਿ ਗਙ੍ਗਾ=ਸੁਰਾਪਗਾ.
੩੩. ਸਿਙ੍ਗਾਦਯੋ.
ਸਿਙ੍ਗਆਦਯੋ ਸਦ੍ਦਾ ਗਕਅਨ੍ਤਾ ਨਿਪਚ੍ਚਨ੍ਤੇ. ਸੀ-ਸਯੇ, ਨਿਗ੍ਗਹੀਤਾਗਮੋ, ਰਸ੍ਸਤ੍ਤਞ੍ਚ, ਸਯਤਿ ਪਵਤ੍ਤਤਿ ਮਤ੍ਥਕੇਤਿ ਸਿਙ੍ਗਂ=ਵਿਸਾਣਂ. ਫੁਰ-ਚਲਨੇ, ਲਿਮੁਙ, ਫੁਰਤਿ ਚਲਤੀਤਿ ਪੁਲਿਙ੍ਗੋ=ਜਲਿਤਙ੍ਗਾ ਰਾਵਯਵੋ. ਚਲ-ਕਮ੍ਪਨੇ, ਉਪੁਬ੍ਬੋ, ਚਲਸ੍ਸ ਚਾਲਿਂ, ਉਚ੍ਚਲਤਿ ਕਮ੍ਪਤੀਤਿ ਉਚ੍ਚਾਲਿਙ੍ਗੋ=ਸੁਕ੍ਕਕੀਟੋ, ਕਲ-ਸਦ੍ਦੇ, ਇਮੁਕ, ਕਲਤਿ ਅਭਿਨਾਦਂ ਕਰੋਤਿ ਬਹੁਰਜ੍ਜਤਾਯਾ ਤਿ ਕਲਿਙ੍ਗੋ=ਦਕ੍ਖਿਣਾਪਥੋ. ਭਮ-ਅਨਵਟ੍ਠਾਨੇ, ਅਸ੍ਸ ਇਤ੍ਤਂ, ਭਮਤੀਤਿ ਭਿਙ੍ਗੋ=ਭਮਰੋ. ਪਟ ਅਟ-ਗਮਨੇ, ਪਟਿਸ੍ਸ ਅਮੁਕ, ਅਕ ਚ. ਪਟਤਿ ਪਤਨ੍ਤੋ ਗਚ੍ਛਤੀਤਿ ਪਟਙ੍ਗੋ, ਪਟਗੋ=ਸਲਭੋ, ਏਵਮਞ੍ਞੇਪਿ.
੩੪. ਅਗਾ ਗਿ.
ਅਗ-ਕੁਟਿਲਗਮਨੇਤੀਮਸ੍ਮਾ ਗਿ ਹੋਤਿ. ਅਗਤਿ ਕੁਟਿਲੋ ਹੁਤ੍ਵਾ ਗਚ੍ਛਤੀਤਿ ਅਗ੍ਗਿ=ਪਾਵਕੋ.
੩੫. ਯਾਵਲਾ ਗੁ.
ਯਾ-ਪਾਪੁਣਨੇ, ਵਲ ਵਲ੍ਲ-ਸਂਵਰਣੇ, ਏਤੇਹਿ ਗੁ ਹੋਤਿ. ਯਾਤੀਤਿ ਯਾਗੁ=ਪੇਯ੍ਯਾ. ਵਲੀਯਤਿ ਸਂਵਰੀਯਤੀਤਿ ਵਗ੍ਗੁ=ਮਨੁਞ੍ਞੋ.
੩੬. ਫੇਗ੍ਗਾਦਯੋ.
ਫੇਗ੍ਗੁ ਆਦਯੋ ਗੁਅਨ੍ਤਾ ਨਿਪਚ੍ਚਨ੍ਤੇ. ਫਲ-ਨਿਪ੍ਫਤ੍ਤਿਯਂ, ਅਸ੍ਸ ਏਤ੍ਤਂ, ਫਲਤਿ ਨਿਟ੍ਠਾਨਂ ਗਚ੍ਛਤੀਤਿ ਫੇਗ੍ਗੁ=ਅਸਾਰੋ. ਭਰ-ਭਰਣੇ, ਰਲੋਪੋ. ਭਰਤੀਤਿ ਭਗੁ=ਇਸਿ. ਹਿ-ਗਤੀਯਂ, ਨਿਗ੍ਗਹੀਤਾਗਮੋ, ਹਿਨੋ ਤਿ ਪਵਤ੍ਤਤੀਤਿ ਹਿਙ੍ਗੁ=ਰਾਮਠਜਂ. ਕਮ-ਇਚ੍ਛਾਯਂ, ਕਾਮੀਯਤੀਤਿ ਕਙ੍ਗੁ=ਧਞ੍ਞਵਿਸੇਸੋ, ਏਵਮਞ੍ਞੇਪਿ.
੩੭. ਜਨਾ ਘੋ.
ਜਨ-ਜਨਨੇਤੀਮਸ੍ਮਾ ਘੋ ਹੋਤਿ. ‘‘ਮਨਾਨਂ ਨਿਗ੍ਗਹੀਤ’’ਨ੍ਤਿ (੫.੯੬) ਨਸ੍ਸ ਨਿਗ੍ਗਹੀਤਂ, ਜਾਯਤਿ ਗਮਨਮੇਤਾਯਾਤਿ ਜਙ੍ਘਾ=ਪਾਣ੍ਯਙ੍ਗਵਿਸੇਸੋ.
੩੮. ਮੇਘਾਦਯੋ.
ਮੇਘਆਦਯੋ ਘਨ੍ਤਾ ਨਿਪਚ੍ਚਨ੍ਤੇ. ਮਿਹ-ਸੇਚਨੇ, ਹਲੋਪੋ, ਮੇਹਤਿ ਸਿਞ੍ਚਤੀਤਿ ਮੇਘੋ=ਅਮ੍ਬੁਦੋ. ਮੁਹ-ਮੁਚ੍ਛਾਯਂ, ਹਲੋਪੋ, ਮੁਯ੍ਹਨ੍ਤਿ ਸਤ੍ਤਾ ਏਤ੍ਥਾਤਿ ਮੋਘੋ=ਤੁਚ੍ਛੋ. ਸੀ-ਸਯੇ, ਏਤ੍ਤਾਭਾਵੋ, ਸੇਤਿ ਲਹੁ ਹੁਤ੍ਵਾ ਪਵਤ੍ਤਤੀਤਿ ਸੀਘਂ=ਆਸੁ. ਅਹ-ਭਸ੍ਮੀਕਰਣੇ, ਨਿਪੁਬ੍ਬੋ, ਹਲੋਪਦੀਘਾ, ਨਿਦਹਤੀਤਿ ਨਿਦਾਘੋ=ਗਿਮ੍ਹੋ. ਮਹੀਸ੍ਸ ਹਲੋਪੋ, ਮਹੀਯਤਿ ਪੂਜੀਯਤੀਤਿ ਮਘਾ=ਨਕ੍ਖਤ੍ਤਂ, ਏਵਮਞ੍ਞੇਪਿ.
(ਇਤਿ ਕਵਗ੍ਗਪਚ੍ਚਯਵਿਧਾਨਂ).
੩੯. ਚੁਸਰਵਰਾ ਚੋ.
ਚੁ-ਚਵਨੇ, ਸਰ-ਗਤਿ ਹਿਂਸਾ ਚਿਨ੍ਤਾਸੁ, ਵਰ-ਵਰਣ ਸਮ੍ਭਤ੍ਤੀਸੁ, ਏਯੇਹਿ ਚੋ ਹੋਤਿ. ਚਵਤਿ ਰੁਕ੍ਖਾਤਿ ਚੋਚਂ=ਉਪਭੁਤ੍ਤਫਲ- ਵਿਸੇਸੋ. ਸਰਤਿ ਆਯਤਿਂ ਦੁਕ੍ਖਂ ਹਿਂਸਤੀਤਿ ਸਚ੍ਚਂ=ਅਵਿਤਥਂ. ਵਾਰੇਤਿ ਸੁਖਨ੍ਤਿ ਵਚ੍ਚਂ=ਗੂਥੋ.
੪੦. ਮਰਾ ਚੁਈਚੀ ਚ.
ਮਰ-ਪਾਣਚਾਗੇ ਤੀਮਸ੍ਮਾ ਚੁਈਚੀ ਹੋਨ੍ਤਿ ਚੋ ਚ. ਮਰਣਂ ਮਚ੍ਚੁ=ਮਰਣਂ. ਮਾਰੇਤਿ ਅਨ੍ਧਕਾਰਂ ਵਿਨਾਸੇਤੀਤਿ ਮਰੀਚਿ=ਰਂਸਿ, ਮਿਗਤਣ੍ਹਿਕਾ ਚ. ਮਰਤੀਤਿ ਮਚ੍ਚੋ=ਸਤ੍ਤੋ.
੪੧. ਕੁਸ ਪਸਾ ਛਿਕ.
ਕੁਸ-ਅਕ੍ਕੋਸੇ, ਪਸ-ਬਾਧਨੇ, ਏਤੇਹਿ ਛਿਕ ਹੋਤਿ. ਕੁਸੀਯਤਿ ਅਕ੍ਕੋਸੀਯਤੀਤਿ ਕੁਚ੍ਛਿ=ਉਦਰਂ. ਪਸੀਯਤਿ ਬਾਧੀਯਤਿ ਏਤ੍ਥਾਤਿ ਪਚ੍ਛਿ=ਭਾਜਨਵਿਸੇਸੋ.
੪੨. ਕਸ ਉਸਾ ਛੁਕ.
ਕਸ-ਵਿਲੇਖਨੇ, ਉਸ-ਦਾਹੇ, ਏਤੇਹਿ ਛੁਕ ਹੋਤਿ. ਕਸਨ੍ਤਿ ਵਿਲੇਖਨ੍ਤਿ ਏਤ੍ਥਾਤਿ ਕਚ੍ਛੁ=ਪਾਮਂ. ਉਸਤਿ ਦਹਤਿ ਸਨ੍ਤਾਪਨ੍ਤਿ ਉਚ੍ਛੁ=ਰਸਾਲੋ.
੪੩. ਅਸ ਮਸ ਵਦ ਕੁਚ ਕਚਾ ਛੋ.
ਅਸ-ਖਿਪਨੇ, ਮਸ-ਆਮਸਨੇ, ਵਦ-ਵਚਨੇ, ਕੁਚ-ਸਂਕੋਚਨੇ, ਕਚ-ਬਨ੍ਧਨੇ, ਏਤੇਹਿ ਛੋ ਹੋਤਿ. ਅਸਤਿ ਛਿਪਤੀਤਿ ਅਚ੍ਛੋ=ਭਲ੍ਲੂਕੋ. ਮਸਤਿ ਜਲਨ੍ਤਿ ਮਚ੍ਛੋ=ਮੀਨੋ. ਵਦਤੀਤਿ ਵਚ੍ਛੋ=ਨੇਲਕੋ. ਕੁਚੀਯਤਿ ਸਂਕੋਚੀਯਤੀਤਿ ਕੋਚ੍ਛੋ=ਭਦ੍ਦਪੀਟ੍ਠਂ. ਕਚੀਯਤਿ ਬਨ੍ਧੀਯਤੀਤਿ ਕਚ੍ਛੋ=ਤਨੁਪਦੇਸੋ, ਅਨੂਪੋ ਚ.
੪੪. ਗੁਚ੍ਛਾਦਯੋ.
ਗੁਚ੍ਛਆਦਯੋ ਛਨ੍ਤਾ ਨਿਪਚ੍ਚਨ੍ਤੇ. ਗੁਪ-ਗੋਪਨੇ, ਓਤ੍ਤਾਭਾਵੋ, ਗੋਪੀਯਤੀਤਿ ਗੁਚ੍ਛੋ=ਥਵਕੋ. ਤੁਸ-ਤੁਟ੍ਠਿਮ੍ਹੀ, ਤੁਸਨ੍ਤਿ ਏਤੇਨਾਤਿ ਤੁਚ੍ਛਂ=ਮੁਸਾ. ਪੁਸ-ਪੋਸਨੇ, ਪੋਸਨ੍ਤਿ ਤਨੁਮਨੇਨਾਤਿ ਪੁਚ੍ਛੋ=ਵਾਲਧਿ, ਏਵਮਞ੍ਞੇਪਿ.
੪੫. ਅਰਾ ਜੁ ਞਟ ਚ.
ਅਰ-ਗਮਨੇਤੀਮਸ੍ਮਾ ਜੁ ਹੋਤਿ, ਅਰਿਸ੍ਸ ਉਟ ਚ. ਟਕਾਰੋ ਸਬ੍ਬਾਦੇਸਤ੍ਥੋ, ਅਰਤਿ ਅਕੁਟਿਲਭਾਵੇਨ ਪਵਤ੍ਤਤੀਤਿ ਉਜੁ=ਅਵਙ੍ਕੋ.
੪੬. ਰਜ੍ਜਾਦਯੋ.
ਰਜ੍ਜੁਆਦਯੋ ਜੁਅਨ੍ਤਾ ਨਿਪਚ੍ਚਨ੍ਤੇ. ਰੁਧ-ਆਵਰਣੇ, ਉਸ੍ਸ ਅਤ੍ਤਂ, ਰੁਨ੍ਧਨ੍ਤਿ ਏਤੇਨਾਤਿ ਰੁਜ੍ਜੁ-ਯੋਤ੍ਤਂ. ਮਨ-ਞਾਣੇ, ਅਮਞ੍ਞਿਤ੍ਥਾਤਿ ਮਞ੍ਜੁ=ਮਞ੍ਜੁਲਂ, ਏਵਮਞ੍ਞੇਪਿ.
੪੭. ਗਿਧਾ ਝਕ.
ਗਿਧ-ਅਭਿਕਙ੍ਖਾਯਮਿਚ੍ਚਸ੍ਮਾ ਝਕ ਹੋਤਿ. ਗੇਧਤੀਤਿ ਗਿਜ੍ਝੋ=ਪਕ੍ਖਿਵਿਸੇਸੋ.
੪੮. ਵਞ੍ਝਾਦਯੋ.
ਵਞ੍ਚ੍ਯਾਦਯੋ ਝਕ ਅਨ੍ਤਾ ਨਿਪਚ੍ਚਨ੍ਤੇ. ਵਨ-ਯਾਚਨੇ, ਵਨੋਤਿ ਅਤ੍ਤਾਨਂ ਅਨੁਭਵਿਤੁਂ ਯਾਚਤੀਤਿ ਵਞ੍ਝੋ=ਅਫਲਰੁਕ੍ਖੋ, ਵਞ੍ਝਾ=ਅਪਸਵਾ ਇਤ੍ਥੀ, ਅਸ੍ਸ ਇਤ੍ਤਂ ਵਿਞ੍ਝੋ=ਪਬ੍ਬਤੋ, ਸਂਜ-ਸਙ੍ਗੇ, ਨਿਗ੍ਗਹੀਤਲੋਪੋ, ਸਞ੍ਜਿਯਤੀਤਿ ਸਜ੍ਝਂ=ਰਜਤਂ, ਏਵਮਞ੍ਞੇਪਿ.
੪੯. ਕਮਯਜਾ ਞੋ.
ਕਮ-ਇਚ੍ਛਾਯਂ, ਯਜ-ਦੇਵਪੂਜਾਸਙ੍ਗਤਿਕਰਣਦਾਨੇਸੁ, ਏਤੇਹਿ ਞੋ ਹੋਤਿ, ਮਸ੍ਸ ਨਿਗ੍ਗਹੀਤਵਗ੍ਗਨ੍ਤਾ, ਕਾਮੀਯਤੀਤਿ ਕਞ੍ਞਾ=ਕੁਮਾਰੀ. ਜਸ੍ਸ ਪਰਰੂਪਤ੍ਤਂ, ਯਜਨ੍ਤ੍ਯਨੇਨਾਤਿ ਯਞ੍ਞੋ=ਯਾਗੋ.
੫੦. ਪੁਞ੍ਞਂ.
ਪੁਨਾਤਿ ਪੁਣਤਿਸ੍ਮਾ ਵਾ ਞੋਓਤ੍ਤਾਭਾਵੋ ਚ ਨਿਪਚ੍ਚਨ੍ਤੇ. ਪੁਨਾਤਿ, ਪੁਣਤਿ ਸੁਨ੍ਦਰਤ੍ਤਂ ਕਰੋਤੀਤਿ ਵਾ ਪੁਞ੍ਞਂ=ਕੁਸਲਂ.
੫੧. ਅਰ ਹਾਞ੍ਞੋ ਹਾਸ੍ਸ ਹਿਰ ਚ.
ਅਰ-ਗਮਨੇ, ਵਾ-ਚਾਗੇ, ਏਤੇਹਿ ਅਞ੍ਞੋ ਹੋਤਿ, ਹਾਸ੍ਸ ਹਿਰਞ੍ਚਾਦੇਸੋ. ਅਰੀਯਤੇ ਗਮ੍ਯਤੇਤਿ ਅਰਞ੍ਞਂ=ਵਨਂ. ਜਹਾਤਿ ਸਤ੍ਤਾਨਂ ਹੀਨਤ੍ਤਨ੍ਤਿ ਹਿਰਞ੍ਞਂ=ਧਨਂ, ਸੁਵਣ੍ਣਞ੍ਚ.
(ਇਤਿ ਚਵਗ੍ਗਪਚ੍ਚਯਵਿਧਾਨਂ).
੫੨. ਕਿਰ ਤਰਾ ਕੀਟੋ.
ਕਿਰ-ਵਿਕਿਰਣੇ, ਤਰ-ਤਰਣੇ, ਏਤੇਹਿ, ਕੀਟੋ ਹੋਤਿ. ਸੋਭੇਤੁਮੇਤ੍ਥ ਰਤਨਾਨਿ ਵਿਕਿਰੀਯਨ੍ਤੀਤਿ ਕਿਰੀਟਂ=ਮਕੁਟਂ. ਤਰਇਤਿ ਨਿਦ੍ਦੇਸਾ ਅਸ੍ਸ ਇਤ੍ਤਂ, ਤਰਨ੍ਤਿ ਯਨ੍ਤਿ ਸੁਰੂਪਤ੍ਤ ਮਨੇਨਾਤਿ ਤਿਰੀਟਂ=ਵੇਟ੍ਠਨਂ.
੫੩. ਸਕਾਦੀਹ੍ਯਟੋ.
ਸਕ-ਸਤ੍ਤਿਯਂ, ਕਸ-ਗਮਨੇ, ਕਰ-ਕਰਣੇ, ਮਕ੍ਕ ਇਤਿ ਸੁਤ੍ਤਿਯੋ ਧਾਤੁ, ਦੇਵ-ਦੇਵਨੇ, ਕਮ-ਇਚ੍ਛਾਯਂ, ਏਵਮਾਦਿਹਿ ਅਟੋ ਹੋਤਿ. ਸਣ੍ਣੋਤਿ ਭਾਰਂ ਵਹਿਤੁਨ੍ਤਿ ਸਕਟੋ=ਯਾਨਂ. ਅਕਸਿ ਨਿਰੋਜਤ੍ਤਂ ਅਗਮੀਤਿ ਕਸਟਂ=ਨਿਰੋਜਂ. ਕਰੋਤਿ ਅਮਨਾਪਨ੍ਤਿ ਕਰਟੋ=ਕਾਕੋ. ਮਕ੍ਕਤਿ ਚਲਤੀਤਿ ਮਕ੍ਕਟੋ=ਵਾਨਰੋ. ਦੇਵੀਯਤਿ ਪੂਜੀਯਤੀਤਿ ਦੇਵਟੋ=ਇਸਿ. ਕਮਤਿ ਇਚ੍ਛਤਿ ਆਰੋਹਤ੍ਥਨ੍ਤਿ ਕਮਟੋ=ਵਾਮਨੋ.
੫੪. ਮਕੁਟਾਵਾਟ ਕਵਾਟ ਕੁਕ੍ਕੁਟਾ.
ਏਤੇ ਸਦ੍ਦਾ ਨਿਪਚ੍ਚਨ੍ਤੇ. ਮਂਕਿਸ੍ਮਾ ਉਟੋ, ਨਿਗ੍ਗਹੀਤਲੋਪੋ ਚ, ਮਂਕੇਤਿ ਸੋਭੇਤੀਤਿ ਮਕੁਟਂ=ਕਿਰੀਟਂ. ਅਵਤਿਸ੍ਮਾ ਆਟਣ, ਅਵ੍ਯਤੇ ਖਞ੍ਞਤੇਤਿ ਆਵਾਟੋ=ਕਾਸੁ. ਕੁ-ਸਦ੍ਦੇਤੀਮਸ੍ਮਾ ਆਟੋ, ਓਅਵਾਦੇਸਾ ਯਥਾਯੋਗਂ, ਕਵਤਿ ਰਵਤੀਤਿ ਕਵਾਟਂ=ਦ੍ਵਾਰਪਿਧਾਨਂ. ਕੁਕ ਵਕ-ਆਦਾਨੇਤੀਮਸ੍ਮਾ ਕੁਟਕ, ਕੁਕਤਿ ਗੋਚਰਮਾਦਦਾਤੀਤਿ ਕੁਕ੍ਕੁਟੋ=ਤਮ੍ਬਚੂਲ਼ੋ.
੫੫. ਕਮੁਸ ਕੁਸ ਕਸਾ ਠੋ.
ਕਮ-ਇਚ੍ਛਾਯਂ, ਉਸ-ਦਾਹੇ, ਕੁਸ-ਅਕ੍ਕੋਸੇ, ਕਸ-ਗਮਨੇ, ਏਤੇਹਿਠੋ ਹੋਤਿ, ਨਿਗ੍ਗਹੀਤਵਗ੍ਗਨ੍ਤਾ, ਓਦਨਾਦੀਨਿ ਕਾਮੇਤੀਤਿ ਕਣ੍ਠੋ=ਗਲੋ. ਓਕ੍ਕਪਰਰੂਪਾਦੀਨਿ, ਓਦਨਾਦੀਸੁ ਉਣ੍ਹੇਨ ਉਸੀਯਤੀ ਤਿ ਓਟ੍ਠੋ=ਦਨ੍ਤਚ੍ਛਦੋ, ਕਰਭੋ ਚ. ਕੁਸੀਯਤਿ ਅਕ੍ਕੋਸੀਯਤੀਤਿ ਕੋਟ੍ਠੋ=ਧਞ੍ਞਨਿਲਯੋ. ਕਸਤਿ ਯਾਤਿ ਵਿਨਾਸਨ੍ਤਿ ਕਟ੍ਠਂ=ਦਾਰੁ.
੫੬. ਕੁਟ੍ਠਾਦਯੋ.
ਕੁਟ੍ਠਆਦਯੋ ਸਦ੍ਦਾ ਠਨ੍ਤਾ ਨਿਪਚ੍ਚਨ੍ਤੇ. ਕੁਸਿਸ੍ਮਾ ਠੋ, ਓਤ੍ਤਾਭਾਵੋ ਚ, ਕੁਸੀਯਤਿ ਅਕ੍ਕੋਸੀਯਤੀਤਿ ਕੁਟ੍ਠਂ=ਛਵਿਰੋਗੋ. ਕੁਣ-ਸਦ੍ਦੇ, ਪਰਰੂਪਾਭਾਵੋ ਓਤ੍ਤਾਭਾਵੋ ਚ, ਕੁਣਤਿ ਨਦਤੀਤਿ ਕੁਣ੍ਠੋ=ਅਤਿਖਿਣੋ, ਕੁਣੀਯਤਿ ਅਕ੍ਕੋਸੀਯਤੀਤਿ ਕੁਣ੍ਠੋ= ਛਿਨ੍ਨਹਤ੍ਥਪਾਦਾਦਿਕੋ. ਦਂਸਿਸ੍ਸ ਦਾ, ਦਂਸਤਿ ਏਤਾਯਾਤਿ ਦਾਠਾ=ਦਨ੍ਤਵਿਸੇਸੋ. ਕਮਿਸ੍ਸ ਅਕ ਚ. ਕਾਮੀਯਾਤਿ ਦੀਨੇਤੀਤਿ ਕਮਠੋ=ਭਿਕ੍ਖਾਭਾਜਨਂ, ਵਾਮਨੋ, ਕੁਮ੍ਮੋ ਚ. ਫਸ੍ਸਿਸ੍ਸ ਫੁਟੋ, ਫਸ੍ਸੀਯਤੀਤਿ ਫੁਟ੍ਠੋ=ਫਸ੍ਸੋ, ਏਵਮਞ੍ਞੇਪਿ.
੫੭. ਵਰ ਕਰਾ ਅਣ੍ਡੋ.
ਵਰ-ਵਰਣੇ, ਕਰ-ਕਰਣੇ, ਏਤੇਹਿ ਅਣ੍ਡੋ ਹੋਤਿ. ਅਤ੍ਤਨਿ ਪੇਫਂ ਵਾਰਯਤੀਤਿ ਵਰਣ੍ਡੋ=ਮੁਖਰੋਗੋ. ਕਰੀਯਤੀਤਿ ਕਰਣ੍ਡੋ=ਭਣ੍ਡਵਿਸੇਸੋ.
੫੮. ਮਨਨ੍ਤਾ ਡੋ.
ਮਕਾਰ ਨਕਾਰਨ੍ਤੇਹਿ ਕ੍ਰਿਯਤ੍ਥੇਹਿ ਬਹੁਲਂ ਡਪ੍ਪਚ੍ਚਯੋ ਹੋਤਿ. ਸਮ-ਉਪਸਮੇ, ਸਮਨਂ ਸਣ੍ਡਂ=ਸਮੂਹੋ. ਕਮ-ਪਦਵਿਕ੍ਖੇਪੇ, ਕਮਤਿ ਯਾਤੀਤਿ ਕਣ੍ਡੋ=ਸਰੋ, ਪਰਿਚ੍ਛੇਦੋ ਚ, ਦਮ-ਦਮਨੇ, ਦਮਨ੍ਤ੍ਵ੍ਯਨੇਨਾਤਿ ਦਣ੍ਡੋ=ਨਿਗ੍ਗਹੋ. ਅਮ ਗਮ-ਗਮਨੇ, ਅਮਨ੍ਤਿ ਉਪ੍ਪਜ੍ਜਨ੍ਤਿ ਏਤ੍ਥਾਤਿ ਅਣ੍ਡੋ=ਪਕ੍ਖਿਪਸਵੋ, ਕੋਸੋ ਚ. ਗਚ੍ਛਤਿ ਸੂਨਭਾਵਨ੍ਤਿ ਗਣ੍ਡੋ=ਬ੍ਯਾਧਿ, ਵਦਨੇਕਦੇਸੋ ਚ. ਰਮੁ-ਕੀਲ਼ਾਯਂ, ਰਮਨ੍ਤਿ ਏਤ੍ਥਾਤਿ ਰੁਣ੍ਡਾ=ਵਿਧਵਾ. ਮਨ-ਞਾਣੇ, ਮਞ੍ਞਨ੍ਤਿ ਏਤੇਨਾਤਿ ਮਣ੍ਡੋ=ਓਦਨਾਦਿਨਿਸ੍ਸਾਵੋ. ਖਨ ਖਣ=ਅਵਦਾਰਣੇ, ਖਞ੍ਞਤੀਤਿ ਖਣ੍ਡੋ=ਉਚ੍ਛੁਵਿਕਾਰ ਵਿਸੇਸੋ. ਲਮ-ਹਿਂਸਾਯਂ, ਲਮਤਿ ਹਿਂਸਤਿ ਸੁਚਿਭਾਵਨ੍ਤਿ ਲਣ੍ਡੋ=ਵਚ੍ਚਂ, ਏਵਮਞ੍ਞੇਪਿ.
੫੯. ਕੁਣ੍ਡਾ ਦਯੋ.
ਕੁਣ੍ਡਆਦਯੋ ਡਨ੍ਤਾ ਨਿਪਚ੍ਚਨ੍ਤੇ. ਕਮ ਮਨ ਤਨਾਨਂ ਅਸ੍ਸ ਉਤ੍ਤਂ, ਕਾਮੀਯਤੀਤਿ ਕੁਣ੍ਡਂ=ਭਾਜਨਂ. ਮਞ੍ਞਤਿ ਹਿਤਾਹਿਤਨ੍ਤਿ ਮੁਣ੍ਡੋ= ਛਿਨ੍ਨਕੇਸੋ. ਤਨੋਤਿ ਏਤੇਨਾਤਿ ਤੁਣ੍ਡਂ=ਲਪਨਂ. ਈਰ-ਖੇਪੇ, ਏਰਂਆਦੇਸੋ. ਈਰਤਿ ਕਮ੍ਪਤੀਤਿ ਏਰਣ੍ਡੋ=ਬ੍ਯਗ੍ਘਪੁਚ੍ਛੋ, ਸਿ-ਸੇਵਾਯਂ, ਸਿਸ੍ਸ ਖਮੁਕ, ਸੁਗਨ੍ਧਂ ਸੇਵਤੀਤਿ ਸਿਖਣ੍ਡੋ=ਚੂਲ਼ਾ, ਏਵਮਞ੍ਞੇਪਿ.
੬੦. ਤਿਜ ਕਸ ਤਸ ਦਕ੍ਖਾ ਕਿਣੋ ਜਸ੍ਸ ਖੋ ਚ.
ਤਿਜ-ਨਿਸਾਨੇ, ਕਸ-ਗਮਨੇ, ਤਸ-ਪਿਪਾਸਾਯਂ, ਦਕ੍ਖ-ਵੁਦ੍ਧਿਯਂ, ਏਤੇਹਿ ਕਿਣੋ ਹੋਤਿ, ਜਸ੍ਸ ਖੋ ਚ, ਤੇਜਯਿਤ੍ਥਾਤਿ ਤਿਖਿਣਂ=ਨਿਸਿਤਂ. ਕਸਤਿ ਪਵਤ੍ਤਤੀਤਿ ਕਸਿਣਂ=ਅਸੇਸਂ. ਤਸਨਂ ਤਸਿਣਾ=ਤਣ੍ਹਾ. ਦਕ੍ਖਤਿ ਵੁਦ੍ਧਿਂ ਗਚ੍ਛਤਿ ਏਤਾਯਾਤਿ ਦਕ੍ਖੀਣਾ=ਕੁਸਲਂ.
੬੧. ਵੀਆਦਿਤੋ ਣਿ.
ਵੀ-ਤਨ੍ਤਸਨ੍ਤਾਨੇ, ਸਿ-ਸੇਵਾਸਂ, ਸੂ-ਪਸ੍ਸਵਨੇ, ਦੁ-ਗਮਨੇ, ਕੀ-ਦਬ੍ਬਵਿਨੀਮਯੇ, ਸਾ-ਤਨੁਕਰਣਾਵਸਾਨੇਸੁ, ਏਵਮਾਦੀਹਿ ਣਿ ਹੋਤਿ. ਵੀਯਤੀਤਿ ਵੇਣਿ=ਕੇਸਕਲਾਪੋ. ਸੇਵਨਂ ਸੇਣਿ=ਸਜਾਤੀਨਂ ਕਾਰੂਨਂ ਸਮੂਹੋ. ਨਿਪੁਬ੍ਬੋ, ਨਿਸੇਵੀਯਤੀਤਿ ਨਿਸੇਣਿ=ਸੋਪਾਨਂ. ਸਵਤਿ ਪਸ੍ਸਵਤੀਤਿ ਸੋਣਿ=ਕਟਿ. ਦਵਤਿ ਵਹਤੀਤਿ ਦੋਣਿ=ਕਟ੍ਠਮ੍ਬੁਵਾਹਨੀ, ਨਾਵਾ ਚ. ਨਦਾਦਿਪਾਠਾ ਵਿਮ੍ਹਿ ਸੋਣੀ ਦੋਣੀ ਤਿਪਿ ਹੋਤਿ. ਕਯਨਂ, ਕੀਯਤੇ ਏਤਾਯਾਤਿ ਵਾ ਕੇਣਿ=ਕਯੋ ਸਾਤਿ ਦੁਕ੍ਖਂ ਤਨੁਂ ਕਰੋਤੀਤਿ ਸਾਣਿ=ਤਿਰੋਕਰਣੀ, ਏਵਮਞ੍ਞੇਪਿ.
੬੨. ਗਹਾਦੀਹ੍ਯਣਿ.
ਗਹ-ਉਪਾਦਾਨੇ, ਅਰ-ਗਮਨੇ, ਧਰ-ਧਾਰਣੇ, ਸਰ-ਗਤਿਯਿਂਸਾ ਚਿਨ੍ਤਾਸੁ, ਤਰ-ਤਰਣੇ, ਏਵਮਾਦੀਹਿ ਅਣਿਪ੍ਪਚ੍ਚਯੋ ਹੋਤਿ. ਗਣ੍ਹਾਤੀਤਿ ਗਹਣਿ=ਅਸਿਤਾਦਿਪਾਚਕੋ ਅਗ੍ਗਿ. ਅਰੀਯਤਿ ਗਮੀਯਤੀਤਿ ਅਰਣਿ=ਅਗ੍ਗਿਮਨ੍ਥਨਕਟ੍ਠਂ. ਧਾਰੇਤੀਤਿ ਧਰਣਿ=ਮਹੀ. ਸਰੀਯਤਿ ਗਮੀਯਤੀਤਿ ਭਰਣਿ=ਮਗ੍ਗੋ. ਤਰਨ੍ਤ੍ਯਨੇਨਾਤਿ ਤਰਣਿ=ਨਾਵਾ, ਸੂਰਿਯੋ ਚ.
੬੩. ਰੀਵੀਭਾਹਿ ਣੁ.
ਰੀ-ਪਸ੍ਸਵਨੇ, ਵੀ ਵਾ-ਗਮਨੇ, ਭਾ-ਦਿਤ੍ਤਿਯਂ, ਏਤੇਹਿਣੁ ਹੋਤਿ. ਰੀਯਤਿ ਪਸ੍ਸਵਤੀਤਿ ਰੇਣੁ=ਰਜੋ. ਵੇਤਿ ਪਵਤ੍ਤਤੀਤਿ ਵੇਣੁ=ਵੇਲ਼ੁ. ਭਾਤਿ ਦਿਬ੍ਬਤੀਤਿ ਭਾਣੁ=ਰਂਸਿ.
੬੪. ਖਾਣ੍ਵਾ ਦਯੋ.
ਖਾਣੁਆਦਯੋ ਣੁਅਨ੍ਤਾ ਨਿਪਚ੍ਚਨ੍ਤੇ. ਖਣ ਖਨ-ਅਵਦਾਰਣੇ, ਣਸ੍ਸ ਆ, ਖਞ੍ਞਤਿ ਅਵਦਾਰੀਯਤੀਤਿ ਖਾਣੁ=ਛਿਨ੍ਨਸਾਖੋ ਰੁਕ੍ਖੋ. ਜਨ-ਜਨਨੇ, ਨਸ੍ਸ ਵਾ ਆਤ੍ਤਂ, ਜਾਯਤਿ ਗਮਨ ਮਨੇਨਾਤਿ ਜਾਣੁ, ਜਣ੍ਣੁ=ਜਙ੍ਘੋਰੂਨਂ ਸਨ੍ਧਿ. ਹਰ-ਹਰਣੇ, ਏਕ, ਹਰੀਯਤੀਤਿ ਹਰੇਣੁ=ਗਨ੍ਧਦਬ੍ਬ, ਏਵਮਞ੍ਞੇਪਿ.
੬੫. ਕ੍ਵਾਦਿਤੋ ਣੋ.
ਕੁ-ਸਦ੍ਦੇ, ਸੁ-ਸਵਨੇ, ਦੁ-ਗਮਨੇ, ਵਰ-ਵਰਣੇ, ਕਰ-ਕਰਣੇ, ਪਣ-ਬ੍ਯਵਹਾਰਥੁਤਿਸੁ, ਤਾ-ਪਾਲਨੇ, ਲੀ-ਨਿਲੀਯਨੇ, ਏਵਮਾਦੀਹਿ ਣੋ ਹੋਤਿ. ਕਵਤਿ ਨਦਤਿ ਏਤ੍ਥਾਤਿ ਕੋਣੋ=ਅਸ੍ਸਿ, ਵੀਣਾਦਿਵਾਦਨਦਣ੍ਡੋ ਚ. ਸੁਣੋਤੀਤਿ ਸੋਣੋ=ਸੁਨਖੋ, ਨਰੋ ਚ. ਦਵਤਿ ਪਵਤ੍ਤਤੀਤਿ ਦੋਣੋ=ਪਰਿਮਾਣਵਿਸੇਸੋ. ਵਿਰੂਪਤ੍ਤ ਵਾਰੇਤੀਤਿ ਵਣ੍ਣੋ=ਨੀਲਾਦਿ. ਸਵਨਂ ਕਰੋਤੀਤਿ ਕਣ੍ਣੋ=ਸਵਨਂ. ਪਣੀਯਤਿ ਵੋਹਰੀਯਤੀਤਿ ਪਣ੍ਣੋ=ਪਲਾਸੋ. ਲਾਯਤੀਤਿ ਤਾਣਂ=ਰਕ੍ਖਾ. ਨਿਲੀਯਨ੍ਤਿ ਏਤ੍ਥਾਤਿ ਲੇਣਂ=ਨਿਲੀਯਨਟ੍ਠਾਨਂ.
੬੬. ਸੁਵੀਹਿ ਣਕ.
ਸੁ-ਸਵਨੇ, ਵੀ-ਤਨ੍ਤਸਨ੍ਤਾਨੇ, ਏਤੇਹਿ ਣਕ ਹੋਤਿ. ਸੁਣੋਤੀਤਿ ਸੁਣੋ=ਸੁਨਖੋ. ਵੀਯਤੀਤਿ ਵੀਣਾ=ਵਲ੍ਲਕੀ.
੬੭. ਤਿਣਾਦਯੋ.
ਤਿਣਆਦਯੋ ਣਕਨ੍ਤਾ ਨਿਪਚ੍ਚਨ੍ਤੇ. ਤਿਜ-ਤੇਜਨੇ, ਜਲੋਪੋ, ਤੇਜੇਤਿ ਏਤੇਨਾਤਿ ਤਿਣਂ=ਬੀਰਣਾਦਿ. ਲੀ ਲਿਹ ਸਾਦ ਕ੍ਲੇਦਾਨਂ ਲੋ ਲਵਾ, ਲੀਯਤਿ ਰਸਤੋ ਸਬ੍ਬਤ੍ਥ ਅਲ੍ਲੀਯਤੀਤਿ ਲੋਣਂ ਲਵਣਂ, ਲੇਹੀਯਤੀਤਿ ਲੋਣਂ ਲਵਣਂ, ਸਾਦੀਯਤੀਤਿ ਲੋਣਂ ਲਵਣਂ, ਕ੍ਲੇਦਯਤੀਤਿ ਲੋਣਂ ਲਵਣਂ, ਗਮਿਸ੍ਸ ਓ, ਗਚ੍ਛਤੀਤਿ ਗੋਣੋ=ਗੋ. ਹਰ-ਹਰਣੇ, ਣਸ੍ਸਞ੍ਜਿ, ਹਰੀਯਤੀਤਿ ਹਰਿਣੋ=ਮਿਗੋ. ਈਰ-ਕਮ੍ਪਨੇ, ਰਸ੍ਸਤ੍ਤਂ, ਣਸ੍ਸ ਞਿਚ, ਅਤ੍ਤਨੋ ਲੂਖਭਾਵੇ ਸਮ੍ਪਤ੍ਤੇ ਈਰਤਿ ਕਮ੍ਪਤੀਤਿ ਇਰਿਣਂ=ਊਸਰਂ. ਥੁ-ਅਭਿਤ੍ਥਵੇ, ਦੀਘੋ, ਅਭਿਤ੍ਥਵੀਯਤੀਤਿ ਥੂਣਂ=ਨਗਰਂ, ਥੂਣੋ=ਘਰਤ੍ਥਮ੍ਭੋ, ਏਵਮਞ੍ਞੇਪਿ.
੬੮. ਰਵਣ ਵਰਣ ਪੂਰਣਾ ਦਯੋ.
ਰਵਣ ਵਰਣ ਪੂਰਣਾ ਦਯੋ ਅਣਪ੍ਪਚ੍ਚਯੇਨ ਸਿਦ੍ਧਾ. ਰਵਤੀਤਿ ਰਵਣੋ=ਕੋਕਿਲੋ. ਵਾਰੇਤੀਤਿ ਵਰਣੋ=ਪਾਕਾਰੋ. ਪੂਰੀਯਤੇ ਅਨੇਨਾਤਿ ਪੂਰਣੋ=ਪਰਿਪੂਰੀ.
(ਇਤਿ ਟਵਗ੍ਗਪਚ੍ਚਯਵਿਧਾਨਂ).
੬੯. ਪਾਵਸਾ ਅਤਿ.
ਪਾ-ਰਕ੍ਖਣੇ, ਵਸ-ਨਿਵਾਸੇ, ਏਤੇਤਿ ਅਤਿ ਹੋਤਿ. ਪੁਬ੍ਬਸਰਲੋਪੋ, ਪਾਤਿ ਰਕ੍ਖਤੀਤਿ ਪਤਿ=ਸਾਮੀ, ਵਸਨ੍ਤਿ ਏਤ੍ਥਾਤਿ ਵਸਤਿ=ਗੇਹਂ.
੭੦. ਧਾ ਹਿ ਸਿ ਤਨ ਜਨ ਜਰ ਗਮ ਸਚਾ ਤੁ.
ਧਾ-ਧਾਰਣੇ, ਹਿ-ਗਤਿਯਂ, ਤਨ-ਵਿਤ੍ਥਾਰੇ, ਜਨ-ਜਨਨੇ, ਜਰ-ਵਯੋ-ਹਾਨਿਯਂ, ਅਮ ਗਮ-ਗਮਨੇ, ਸਚ-ਸਮਵਾਯੇ, ਏਤੇਹਿ ਤੁ ਹੋਤਿ. ਧਾਰੇਤੀਤਿ ਧਾਤੁ=ਗੇਰੁਕਾਦਿ. ਹਿਨੋਤਿ ਪਵਤ੍ਤਾਤਿ ਫਲਂ ਏਤੇਨਾਤਿ ਹੇਤੁ=ਕਾਰਣਂ, ਸੇਵੀਯਤਿ ਜਨੇਹੀਤਿ ਸੇਤੁ=ਬਨ੍ਧਤਿ (ਪਦ੍ਧਤਿ). ਤਞ੍ਞਤੇਤਿ ਤਨ੍ਤੁ=ਸੁਤ੍ਤਂ. ਜਨੀਯਤੇ ਕਮ੍ਮਕਿਲੇਸੇਹੀਤਿ ਜਨ੍ਤੁ, ਜਾਯਤਿ ਕਮ੍ਮਕਿਲੇਹੀਤਿ ਵਾ ਜਨ੍ਤੁ=ਸਤ੍ਤੋ. ਜੀਰਤੀਤਿ ਜਤ੍ਤੁ=ਅਂਸਸਨ੍ਧਿ. ਗਚ੍ਛਤੀਤਿ ਗਨ੍ਤੁ=ਗਮਿਕੋ, ਸਚਤਿ ਸਮੇਤੀਤਿ ਸਤ੍ਤੁ=ਯਵਾਦਿਚੁਣ੍ਣਂ.
੭੧. ਅਰਿਸ੍ਸੁਟ ਚ.
ਅਰ-ਗਮਨੇਤੀਮਸ੍ਮਾ ਤੁ ਹੋਤਿ, ਅਰਿਸ੍ਸ ਉਟ ਆਦੇਸੋਚ. ਅਰਤਿ ਪਵਤ੍ਤਤੀਤਿ ਉਤੁ=ਹੇਮਨ੍ਤਾਦਿ,
੭੨. ਪਿਤ੍ਵਾਦਯੋ.
ਪਿਤੁਆਦਯੋ ਸਦ੍ਦਾ ਤੁਅਨ੍ਤਾ ਨਿਪਚ੍ਚਨ੍ਤੇ. ਪਾ-ਰਕ੍ਖਣੇ, ਆਸ੍ਸ ਇਤ੍ਤਂ, ਪਾਤਿ ਰਕ੍ਖਤੀਤਿ ਪਿਤਾ=ਜਨਕੋ. ਪਾਤਿਸ੍ਸੇਵਾਦਿਸ੍ਸ ਮੋ, ਪਾਯੇਤੀਤਿ ਮਾਤਾ=ਜਨਨੀ. ਭਾ-ਦਿਤ੍ਤਿਯਂ, ਭਾਤੀਤਿ ਭਾਤਾ=ਸੋਦਰਿਯੋ. ਧਾ-ਧਾਰਣੇ, ਆਸ੍ਸ ਈਤ੍ਤਂ, ਧਾਰੀਯਤੀਤਿ ਧੀਤਾ=ਪੁਤ੍ਤੀ. ਦੁਹ-ਪਪੂਰਣੇ, ਓਤ੍ਤਾਭਾਵੋ, ਤੁਸ੍ਸ ਞ੍ਛਿਚ. ਦੁਹਤਿ ਪਸਵੇ ਪਪੂਰੇਤੀਤਿ ਦੁਹਿਤਾ=ਪੁਤ੍ਤੀ. ਜਨ-ਜਨਨੇ, ਅਸ੍ਸ ਆਤ੍ਤਂ, ਮਾ ਚਾਨ੍ਤਾਦੇਸੋ. ਪਪੁਤ੍ਤੇ ਜਨੇਤੀਤਿ ਜਾਮਾਤਾ=ਦੁਹਿਤੁਪਤਿ. ਨਹ-ਬਨ੍ਧਨੇ, ਨਹੀਯਤਿ ਬਨ੍ਧੀਯਤਿ ਪੇਮੇਨਾਤਿ ਨਤ੍ਤਾ-ਪਪੁਤ੍ਤੋ. ਹੁ-ਹਵਨੇ, ਹਵਤਿ ਪੂਜੇਤੀਤਿ ਹੋਤਾ=ਯਞ੍ਞਕੋ. ਪੂ-ਪਵਨੇ, ਪੁਨਾਤਿ ਆਯਤਿਂ ਭਵਂ ਪਵਿਤ੍ਤਂ ਕਰੋਤੀਤਿ ਪੋਤਾ=ਸੋਯੇਵ.