੫. ਪਞ੍ਚਮੋ ਕਣ੍ਡੋ (ਖਾਦਿ)
੧. ਤਿਜ ਮਾਨੇਹਿ ਖ ਸਾ ਖਮਾ ਵੀਮਂਸਾਸੁ.
ਖਨ੍ਤਿਯਂ ਤਿਜਾ ਵੀਮਂਸਾਯਂ ਮਾਨਾ ਚ ਖਸਪ੍ਪਚ੍ਚਯਾ ਹੋਨ੍ਤਿ ਯਥਾਕ੍ਕਮਂ, ਤਿਤਿਕ੍ਖਾ, ਵੀਮਂਸਾ, ਤਿਤਿਕ੍ਖਤਿ, ਵੀਮਂਸਤਿ. ਖਮਾਵੀਮਂਸਾ, ਸੂਤਿ ਕਿਂ? ਤੇਜਨਂ, ਤੇਜੋ, ਤੇਜਯਤਿ, ਮਾਨਨਂ, ਮਾਨੋਮਾਨੇਤਿ.
੨. ਕਿਤਾ ਤਿਕਿਚ੍ਛਾਸਂਸਯੇਸੁ ਛੋ.
ਤਿਕਿਚ੍ਛਾਯਂ ਸਂਸਯੇ ਚ ਵਤ੍ਤਮਾਨਾ ਕਿਤਾ ਛੋ ਹੋਤਿ. ਤਿਕਿਚ੍ਛਾ, ਵਿਚਿਕਿਚ੍ਛਾ, ਤਿਕਿਚ੍ਛਤਿ, ਵਿਚਿਕਿਚ੍ਛਤਿ. ਅਞ੍ਞਤ੍ਰ ਨਿਕੇਤੋ, ਸਂਕੇਤੋ, ਕੇਤਨਂ, ਕੇਤੋ, ਕੇਤਯਤਿ.
੩. ਨਿਨ੍ਦਾਯਂ ਗੁਪ ਬਧਾ ਬਸ੍ਸ ਭੋ ਚ.
ਨਿਨ੍ਦਾਯਂ ਵਤ੍ਤਮਾਨੇਹਿ ਗੁਪ ਬਧੇਹਿ ਛੋ ਹੋਤਿ ਬਸ੍ਸ ਭੋ ਚ. ਜਿਗੁਚ੍ਛਾ, ਬੀਭਚ੍ਛਾ, ਜਿਗੁਚ੍ਛਤਿ, ਬੀਭਚ੍ਛਤਿ, ਅਞ੍ਞਤ੍ਰ ਗੋਪਨਂ, ਗੋਪੋ, ਗੋਪੇਤਿ, ਬਧਕੋ.
੪. ਤੁਂਸ੍ਮਾ ਲੋਪੋ ਚਿਚ੍ਛਾਯਂ ਤੇ.
ਤੁਮਨ੍ਤਤੋ ਇਚ੍ਛਾਯਮਤ੍ਥੇ ਤੇ ਖਸਛਾ ਹੋਨ੍ਤਿ ਬਹੁਲਂ, ਲੋਪੋ ਚ ਤੁਂਪਚ੍ਚਯਸ੍ਸ ਹੋਤਿ ਸੁਤਤ੍ਤਾ, ਬੁਭੁਕ੍ਖਾ, ਜਿਗੀਸਾਂ, ਜਿਘਚ੍ਛਾ, ਬੁਭੁਕ੍ਖਤਿ, ਜਿਗੀਸਤਿ ਜਿਘਚ੍ਛਤਿ. ਇਧ ਕਸ੍ਮਾ ਨ ਹੋਤਿ ‘ਭੋਤ੍ਤੁਮਿਚ੍ਛਤੀ’ਤਿ? ਪਦਨ੍ਤਰੇਨਾਭਿਧਾਨਾ. ਤੁਂਸ੍ਮਾਤਿ ਕਿਂ? ਭੋਜਨਮਿਚ੍ਛਤਿ. ਇਚ੍ਛਾਯਨ੍ਤਿ ਕਿਂ? ਭੁਞ੍ਜਿਤੁਂ ਗਚ੍ਛਤਿ. ਕਥਂ ‘ਕੂਲਂ ਵਿਪਤਿ ਸਤੀ’ਤਿ? ਯਥਾ ਕੂਲਂ ਪਤਿਤੁ ਮਿਚ੍ਛਤੀਤਿ ਵਾਕ੍ਯਂ ਹੋਤਿ, ਏਵਂ ਵੁਤ੍ਤਿਪਿ ਹੋਸ੍ਸਤਿ. ਵਾਕ੍ਯਮੇਵ ਚਰਹਿ ਕਥਂ ਹੋਤਿ? ਲੋਕਸ੍ਸ ਤਥਾ ਵਚਨਿਚ੍ਛਾਯ.
੫. ਈਯੋ ਕਮ੍ਮਾ.
ਇਚ੍ਛਾਕਮ੍ਮਤੋ ਇਚ੍ਛਾਯਮਤ੍ਥੇ ਈਯਪ੍ਪਚ੍ਚਯੋ ਹੋਤਿ. ਪੁਤ੍ਤਮਿਚ੍ਛਤਿ ਪੁਤ੍ਥੀਯਤਿ. ਕਮ੍ਮਾਤਿ ਕਿਂ? ਅਸਿਨੇਚ੍ਛਤਿ. ਇਧ ਕਸ੍ਮਾ ਨ ਹੋਤਿ ‘ਰਞ੍ਞੋਪੁਤ੍ਤਮਿਚ੍ਛਤੀ’ਤਿ? ਸਾਪੇਕ੍ਖਤ੍ਤਾ, ਨ ਹਿ ਅਞ੍ਞਮਪੇਕ੍ਖਮਾਨੋ ਅਞ੍ਞੇਨ ਸਹੇਕਤ੍ਥਿਭਾਵਮਨੁਭਵਿਤੁਂ ਸਕ੍ਕੋਤਿ. ਇਧਾਪਿ ਚਰਹਿ ਨ ਸਿਯਾ ‘ਅਤ੍ਤਨੋ ਪੁਤ੍ਤ ਮਿਚ੍ਛਤੀ’ਤਿ? ਨੇਵੇਤ੍ਥ ਭਵਿਤਬ੍ਬਂ, ਨ ਹਿ ਭਵਤਿ ‘ਅਤ੍ਤਨੋ ਪੁਤ੍ਤੀਯਤੀ’ਤਿ, ਕਥਂ ਚਰਹਿ ਪੁਤ੍ਤਸ੍ਸ ਅਤ੍ਤਨਿਯਤਾ-ਵਗਮ੍ਯਤੇ? ਅਞ੍ਞਸ੍ਸਾਸੁਤਤ੍ਤਾ ਇਚ੍ਛਾਯ ਚ ਤਬ੍ਬਿਸਯਤ੍ਤਾ.
੬. ਉਪਮਾਨਾਚਾਰੇ.
ਕਮ੍ਮਤੋ ਉਪਮਾਨਾ ਆਚਾਰਤ੍ਥੇ ਈਯੋ ਹੋਤਿ. ਪੁਤ੍ਤਮਿ-ਵਾ-ਚਰਤਿ ਪੁਤ੍ਤੀਯਤਿ ਮਾਣਵਕਂ, ਉਪਮਾਨਾਤਿ ਕਿਂ? ਪੁਤ੍ਤਮਾਚਰਤਿ.
੭. ਆਧਾਰਾ.
ਆਧਾਰਤੂ-ਪਮਾਨਾ ਆਚਾਰਤ੍ਥੇ ਈਯੋ ਯੋਤਿ. ਕੁਟਿਯਮਿਵਾ-ਚਰਤਿ ਕੁਟੀਯਤੀ ਪਾਸਾਦੇ, ਪਾਸਾਦੀਯਤਿ ਕੁਟਿਯਂ ਭਿਕ੍ਖੁ.
੮. ਕਤ੍ਤੁਤਾਯੋ.
ਕਤ੍ਤੁਤੂ-ਪਮਾਨਾ ਆਚਾਰਤ੍ਥੇ ਆਯੋ ਹੋਤਿ. ਪਬ੍ਬਤੋ ਇਵਾਚਰਤਿ ਪਬ੍ਬਤਾਯਤਿ.
੯. ਯ੍ਚਤ੍ਥੇ.
ਕਤ੍ਤੁਤੋ ਅਭੂਤਤਬ੍ਭਾਵੇ ਆਯੋ ਹੋਤਿ ਬਹੁਲਂ. ਭੁਸਾਯਤਿ, ਪਟਪਟਾਯਤਿ, ਲੋਹਿਤਾਯਤਿ, ਕਤ੍ਤੁਤੋਤ੍ਵੇਵ? (ਅਭੁਸਂ) ਭੁਸਂ ਕਰੋਤੀਹਿ, ਇਹ ਕਸ੍ਮਾ ਨ ਹੋਤਿ ‘ਭੁਸੀ ਭਵਤੀ’ਤਿ? ਵੁਤ੍ਤਤ੍ਥਤਾਯ.
੧੦. ਸਦ੍ਦਾਦੀਨਿ ਕਰੋਤਿ.
ਸਦ੍ਦਾਦੀਹਿ ਦੁਤਿਯਨ੍ਤੇਹਿ ਕਰੋਤੀਤਿ ਅਸ੍ਮਿਂ ਅਤ੍ਥੇ ਆਯੋ ਹੋਤਿ. ਸਦ੍ਦਾਯਤਿ, ਵੇਰਾਯਤਿ, ਕਲਹਾਯਤਿ, ਧੂਪਾਯਤਿ.
੧੧. ਨੁਮੋਤ੍ਵ-ਸ੍ਸੋ.
ਨਮੋਇਚ੍ਚਸ੍ਮਾ ਕਰੋਤੀਤਿ ਅਸ੍ਮਿਂ ਅਤ੍ਥੇ ਅਸ੍ਸੋ ਹੋਤਿ. ਨਮਸ੍ਸਤਿ ਤਥਾਗ੍ਤਂ.
੧੨. ਧਾਤ੍ਵਤ੍ਥੇ ਨਾਮਸ੍ਮਿ.
ਨਾਮਸ੍ਮਾ ਧਾਤ੍ਵਤ੍ਥੇ ਬਹੁਲਮਿਹੋਤਿ. ਹਤ੍ਥਿਨਾ ਅਤਿਕ੍ਕਮਤਿ ਅਤਿਹਤ੍ਥਯਤਿ, ਵੀਣਾਯ ਉਪਗਾਯਤਿ ਉਪਵੀਣਯਤਿ, ਦਲ਼੍ਹਂ ਕਰੋਤਿ ਵਿਨਯਂ ਦਲ਼੍ਹਯਤਿ, ਵਿਸੁਦ੍ਧਾ ਹੋਤਿ ਰਤ੍ਤਿ ਵਿਸੁਦ੍ਧਯਤਿ, ਕੁਸਲਂ ਪੁਚ੍ਛਤਿ ਕੁਸਲਯਤਿ.
੧੩. ਸਚ੍ਚਾਦੀਹਾਪਿ.
ਸਚ੍ਚਾਦੀਹਿ ਧਾਤ੍ਵਤ੍ਥੇ ਆਪਿ ਹੋਤਿ. ਸਚ੍ਚਾਪੇਤਿ, ਅਤ੍ਥਾਪੇਤਿ, ਵੇਦਾਪੇਤਿ, ਸੁਕ੍ਖਾਪੇਤਿ, ਸੁਖਾਪੇਤਿ, ਦੁਕ੍ਖਾਪੇਤਿ.
੧੪. ਕ੍ਰਿਯਤ੍ਥਾ.
ਅਯਮਧਿਕਾਰੋ ਆਸਤ੍ਥਪਰਿਸਮਤ੍ਤਿਯਾ. ਕ੍ਰਿਯਾ ਅਤ੍ਥੋ ਯਸ੍ਸ ਸੋ ਕ੍ਰਿਯਤ੍ਥੋ ਧਾਤੁ.
੧੫. ਚੁਰਾਦਿਤੋ ਣਿ.
ਚੁਰਾਦੀਹਿ ਕ੍ਰਿਯਤ੍ਥੇਹਿ ਸਕਤ੍ਥੇ ਣਿ ਪਰੋ ਹੋਤਿ ਬਹੁਲਂ. ਣਕਾਰੋ ਵੁਦ੍ਧ੍ਯਤ੍ਥੋ, ਏਵਮਞ੍ਞਤ੍ਰਾਪਿ, ਚੋਰਯਤਿ, ਲਾਲ਼ਯਤਿ, ਕਥਂ ‘ਰਜ੍ਜਂ ਕਾਰੇਤੀ’ਤਿ? ਯੋਗਵਿਭਾਗਤੋ.
੧੬. ਪਯੋਜਕਬ੍ਯਾਪਾਰੇ ਣਾਪਿ ਚ.
ਕਤ੍ਤਾਰਂ ਯੋ ਪਯੋਜਯਤਿ, ਤਸ੍ਸ ਬ੍ਯਾਪਾਰੇ ਕ੍ਰਿਯਤ੍ਥਾ ਣਿਣਾਪੀ ਹੋਨ੍ਤਿ ਬਹੁਲਂ, ਕਾਰੇਤਿ, ਕਾਰਾਪੇਤਿ. ਨਨੁ ਚ ਕਤ੍ਤਾਪਿ ਕਰਣਾਦੀਨਂ ਪਯੋਜਕੋਤਿ ਤਂਬ੍ਯਾਪਾਰੇਪਿ ਣਿਣਾਪੀ ਪਾਪੁਣਨ੍ਤਿ? ਪਯੋਜਕਗ੍ਗਹਣਸਾਮਤ੍ਥਿਯਾ ਨ ਭਵਿਸ੍ਸਨ੍ਤਿ ਚੁਰਾਦੀਹਿ ਵਿਸੁਂ ਵਚਨਸਾਮਤ੍ਥਿਯਾ ਚ. ਅਤੋ ਭਿਯ੍ਯੋ ਣਾਪਿਯੇਵ, ਣਿਯੇਵੁਵਣ੍ਣਤੋ, ਦ੍ਵਯਮੇਵਞ੍ਞੇਹਿ.
੧੭. ਕ੍ਯੋ ਭਾਵਕਮ੍ਮੇਸ੍ਵ-ਪਰੋਕ੍ਖੇਸੁ ਮਾਨ ਨ੍ਤ ਤ੍ਯਾਦੀਸੁ. ਭਾਵਕਮ੍ਮਵਿਹਿਤੇਸੁ ਪਰੋਕ੍ਖਾਵਜ੍ਜਿਤੇਸੁ ਮਾਨਨ੍ਤਤ੍ਯਾਦੀਸੁ ਪਰੇਸੁ ਕ੍ਯੋ ਹੋਤਿ ਕ੍ਰਿਯਤ੍ਥਾ. ਨ੍ਤਗ੍ਗਹਣਮੁਤ੍ਤਰਤ੍ਥਂ, ਕਕਾਰੋ ਅਵੁਦ੍ਧ੍ਯਤ੍ਥੋ ਏਵਮੁਤ੍ਤਰਤ੍ਰਾਪਿ. ਠੀਯਮਾਨਂ, ਠੀਯਤੇ, ਸੂਯਮਾਨਂ, ਸੂਯਤੇ, ਅਪਰੋਕ੍ਖੇਸੁ ਮਾਨਨ੍ਤਤ੍ਯਾਦੀਸੂਤਿ ਕਿਂ? ਬਭੂਵ ਦੇਵਦਤ੍ਤੇਨ, ਬਿਭਿਦ ਕੁਸੁਲੋ. ਭਿਜ੍ਜਤੇ ਕੁਸੁਲੋ ਸਯਮੇਵਾਤਿ ‘ਭਿਜ੍ਜਤੇ’ਤਿ ਸਵਨਾ ਕਮ੍ਮਤਾ-ਵਗਮ੍ਯਤੇ, ‘ਸਯਮੇਵਾ’ਤਿ ਸਵਨਤੋ ਕਤ੍ਤੁਤਾ, ਕਤ੍ਤੁਤਾਵਚਨਿਚ੍ਛਾਯਨ੍ਤੁ ‘ਭਿਨ੍ਦਤਿ ਕੁਸੁਲੋ ਅਤ੍ਤਾਨ’ਨ੍ਤਿ ਭਵਤਿ, ਏਵਮਞ੍ਞਮ੍ਪਿ ਯਥਾਗਮਮਨੁਗਨ੍ਤਬ੍ਬਂ. ‘ਅਪਰੋਕ੍ਖੇਸੁ ਮਾਨਨ੍ਤਤ੍ਯਾਦੀਸੂ’ਤਿ ਅਯਮਧਿਕਾਰੋ ਆ ‘ਤਨਾਦਿਤ੍ਵੋ’ਤਿ ੫.੨੬. ਅਪਿਚ ਏਤੇ ਕ੍ਯਾਦਯੋ ਤ੍ਯਾਦੀਸੁ ਪਰਭੂਤੇਸੁ ਕਤ੍ਤੁਕਮ੍ਮਭਾਵ ਵਿਹਿਤੇਸੁ ਕ੍ਯਲਾਦੀਨਂ ਵਿਧਾਨਤੋ ਤੇਸ੍ਵੇਵ ਵਿਞ੍ਞਾਯਨ੍ਤੀਤਿ ਅਕਮ੍ਮਕੇਹਿ ਧਾਤੂਹਿ ਕਤ੍ਤੁਭਾਵੇਸੁ, ਸਕਮ੍ਮਕੇਹਿ ਕਤ੍ਤੁਕਮ੍ਮੇਸੁ, ਕਮ੍ਮਾਵਚਨਿਚ੍ਛਾਯਂ ਭਾਵੇ ਚ ਭਵਨ੍ਤੀਤਿ ਵੇਦਿਤਬ੍ਬਾ. ਯਸ੍ਸ ਪਨ ਧਾਤੁਸ੍ਸ ਕਿਰਿਯਾ ਕਮ੍ਮਮਪੇਕ੍ਖਤੇ, ਸੋ ਸਕਮ੍ਮਕੋ, ਯਸ੍ਸ ਤੁ ਕਿਰਿਯਾ ਕਤ੍ਤੁਮਤ੍ਤਮਪੇਕ੍ਖਤੇ, ਸ੍ਵਾਕਮ੍ਮਕੋਤਿ ਞਾਤਬ੍ਬਂ.
੧੮. ਕਤ੍ਤਰਿ ਲੋ.
ਕ੍ਰਿਯਤ੍ਥਤੋ ਅਪਰੋਕ੍ਖੇਸੁ ਕਤ੍ਤੁਵਿਹਿਤਮਾਨ ਨ੍ਤਤ੍ਯਾਦੀਸੁ ਲੋ ਹੋਤਿ. ਲਕਾਰੋ, ‘‘ਞਿਲਸ੍ਸੇ’’ਤਿ ੫-੧੬੩ ਵਿਸੇਸਨਤ੍ਥੋ. ਪਚਮਾਨੋ, ਪਚਨ੍ਤੋ, ਪਚਤਿ.
੧੯. ਮਂ ਚ ਰੁਧਾਦੀਨਂ.
ਰੁਧਾਦਿਤੋ ਕਤ੍ਤੁਵਿਹਿਤਮਾਨਨ੍ਤ ਤ੍ਯਾਦੀਸੁ ਲੋ ਹੋਤਿ ਮਂ ਚ ਅਨ੍ਤਸਰਾ ਪਰੋ. ਮਕਾਰੋ-ਨੁਬਨ੍ਧੋ, ਅਕਾਰੋ ਉਚ੍ਚਾਰਣਤ੍ਥੋ. ਰੁਨ੍ਧਮਾਨੋ, ਰੁਨ੍ਧਨ੍ਤੋ, ਰੁਨ੍ਧਤਿ.
੨੦. ਣਿਣਾਪ੍ਯਾਪੀਹਿ ਵਾ.
ਣਿਣਾਪ੍ਯਾਪੀਹਿ ਕਤ੍ਤੁਵਿਹਿਤਮਾਨਨ੍ਤ ਤ੍ਯਾਦੀਸੁ ਲੋ ਹੋਤਿ ਵਿਭਾਸਾ, ਓਰਯਨ੍ਤੋ, ਚੋਰੇਨ੍ਤੋ, ਕਾਰਯਨ੍ਤੋ, ਕਾਰੇਨ੍ਤੋ, ਕਾਰਾਪਯਨ੍ਤੋ, ਕਾਰਾਪੇਨ੍ਤੋ, ਸਚ੍ਚਾਪਯਨ੍ਤੋ, ਸਚ੍ਚਾਪੇਨ੍ਤੋ, ਚੋਰਯਤਿ, ਚੋਰੇਤਿ, ਕਾਰਯਤਿ, ਕਾਰੇਤਿ, ਕਾਰਾਪਯਤਿ, ਕਾਰਾਪੇਤਿ, ਸਚ੍ਚਾਪਯਤਿ, ਸਚ੍ਚਾਪੇਤਿ. ਵਵਤ੍ਥਿਤਵਿਭਾਸਤ੍ਥੋ-ਯਂ ਵਾਸਦ੍ਦੋ, ਤੇਨ ਮਾਨੇ ਨਿਚ੍ਚਂ, ਚੋਰਯਮਾਨੋ, ਕਾਰਯਮਾਨੋ, ਕਾਰਾਪਯਮਾਨੋ, ਸਚ੍ਚਾਪਯਮਾਨੋ.
੨੧. ਦਿਵਾਦੀਹਿ ਯਕ.
ਦਿਵਾਦੀਹਿ ਲਵਿਸਯੇ ਯਕ ਹੋਤਿ. ਦਿਬ੍ਬਨ੍ਤੋ, ਦਿਬ੍ਬਤਿ.
੨੨. ਤੁਦਾਦੀਹਿ ਕੋ.
ਤੁਦਾਦੀਹਿ ਲਵਿਸਯੇ ਕੋ ਹੋਤਿ. ਤੁਦਮਾਨੋ, ਤੁਦਨ੍ਤੋ, ਤੁਦਤਿ.
੨੩. ਜ੍ਯਾਦੀਹਿ ਕ੍ਨਾ.
ਜਿਆਦੀਹਿ ਲਵਿਸਯੇ ਕ੍ਨਾ ਹੋਤਿ. ਜਿਨਨ੍ਤੋ, ਜਿਨਾਤਿ. ਕਥਂ ‘ਜਯਨ੍ਤੋ’ ਜਯਤੀ, ਤਿ? ਭੂਵਾਦਿਪਾਠਾ.
੨੪. ਕ੍ਯਾਦੀਹਿ ਕ੍ਣਾ.
ਕੀਆਦੀਹਿ ਲਵਿਸਯੇ ਕ੍ਣਾ ਹੋਤਿ. ਕਿਣਨ੍ਤੋ, ਕਿਣਾਤਿ.
੨੫. ਸ੍ਵਾਦੀਹਿ ਕ੍ਣੋ.
ਸੁਆਦੀਹਿ ਲਵਿਸਯੇ ਕ੍ਣੋ ਹੋਤਿ. ਸੁਣਮਾਨੋ, ਸੁਣਨ੍ਤੋ, ਸੁਣੋਤਿ. ਕਥਂ ਸੁਣਾਤੀਤਿ? ਕ੍ਯਾਦਿਪਾਠਾ.
੨੬. ਤਨਾਦਿਤ੍ਵੋ.
ਤਨਾਦਿਤੋ ਲਵਿਸਯੇ ਓ ਹੋਤਿ. ਤਨੋਤਿ.
੨੭. ਭਾਵਕਮ੍ਮੇਸੁ ਤਬ੍ਬਾ-ਨੀਯਾ.
ਤਬ੍ਬਅਨੀਯਾ ਕ੍ਰਿਯਤ੍ਥਾ ਪਰੇ ਭਾਵਕਮ੍ਮੇਸੁ ਬਹੁਲਂ ਭਵਨ੍ਤਿ. ਕਤ੍ਤਬ੍ਬਂ, ਕਰਣੀਯਂ, ਕਤ੍ਤਬ੍ਬੋ ਕਟੋ, ਕਰਣੀਯੋ. ਬਹੁਲਾਧਿਕਾਰਾ ਕਰਣਾਦੀਸੁਪਿ ਭਵਨ੍ਤਿ, ਸਿਨਾਨੀਯਂ ਚੁਣ੍ਣਂ, ਦਾਨੀਯੋ ਬ੍ਰਾਹ੍ਮਣੋ, ਸਮ੍ਮਾਵਤ੍ਤਨੀਯੋ ਗੁਰੁ, ਪਵਚਨੀਯੋ ਉਪਜ੍ਝਾਯੋ, ਉਪਟ੍ਠਾਨੀਯੋ ਸਿਸ੍ਸੋ.
੨੮. ਘ੍ਯਣ.
ਭਾਵਕਮ੍ਮੇਸੁ ਕ੍ਰਿਯਤ੍ਥਾ ਪਰੋ ਘ੍ਯਣ ਹੋਤਿ ਬਹੁਲਂ. ਵਾਕ੍ਯਂ, ਕਾਰਿਯਂ, ਚੇਯ੍ਯਂ, ਜੇਯ੍ਯਂ.
੨੯. ਆਸ੍ਸੇ ਚ.
ਆਤੋਘ੍ਯਣ ਹੋਤਿ ਭਾਵਕਮ੍ਮੇਸੁ, ਆਸ੍ਸ ਏ ਚ. ਦੇਯ੍ਯਂ.
੩੦. ਵਦਾਦੀਹਿ ਯੋ.
ਵਦਾਦੀਹਿ ਕ੍ਰਿਯਤ੍ਥੇਹਿ ਯੋ ਹੋਤਿ ਬਹੁਲਂ ਭਾਵਕਮ੍ਮੇਸੁ. ਵਜ੍ਜਂ, ਮਜ੍ਜਂ, ਗਮ੍ਮਂ. (੪੨) ‘‘ਭੁਜਾਨ੍ਨੇ’’, ਭੋਜ੍ਜੋ ਓਦਨੋ, ਭੋਜ੍ਜਾ ਯਾਗੁ, ਭੋਗ੍ਗਮਞ੍ਞਂ.
੩੧. ਕਿਚ੍ਚ ਘਚ੍ਚ ਭਚ੍ਚ ਭਬ੍ਬ ਲੇਯ੍ਯਾ.
ਏਤੇ ਸਦ੍ਦਾ ਯਪ੍ਪਚ੍ਚਯਨ੍ਤਾ ਨਿਪਚ੍ਚਨ੍ਤੇ.
੩੨. ਗੁਹਾਦੀਹਿ ਯਕ.
ਗੁਤਾਦੀਹਿ ਕ੍ਰਿਯਤ੍ਤੇਹਿ ਭਾਵਕਮ੍ਮੇਸੁ ਯਕ ਹੋਤਿ. ਗੁਯ੍ਹਂ, ਦੁਯ੍ਹਂ, ਸਿਸ੍ਸੋ. ਸਿਦ੍ਧਾ ਏਵੇਤੇ ਤਬ੍ਬਾਦਯੋ ਪੇਸਾਤਿਸਗ੍ਗਪਤ੍ਤਕਾਲੇਸੁਪਿ ਗਮ੍ਯਮਾਨੇਸੁ ਸਾਮਞ੍ਞੇਨਵਿਧਾਨਤੋ, ਤ੍ਵਯਾ ਖਲੁ ਕਟੋ ਕਤ੍ਤਬ੍ਬੋ, ਕਰਣੀਯੋ, ਕਾਰਿਯੋ, ਕਿਚ੍ਚੋ, ਏਵਂ ਤ੍ਵਯਾ ਕਟੋ ਕਤ੍ਤਬ੍ਬੋ, ਭੋਤਾ ਕਟੋ ਕਤ੍ਤਬ੍ਬੋ, ਭੋਤੋ ਹਿ ਪਤ੍ਤੋ ਕਾਲੋ ਕਟਕਰਣੇ. ਏਵਂ ਉਦ੍ਧਮੋਹੁਤ੍ਤਿਕੇਪਿ ਵਤ੍ਤਮਾਨਤੋ ਪੇਸਾਦੀਸੁ ਸਿਦ੍ਧਾ ਏਵ. ਤਥਾ ਅਰਹੇ ਕਤ੍ਤਰਿ ਸਤ੍ਤਿਵਿਸਿਟ੍ਠੇ ਚ ਪਤੀਯਮਾਨੇ ਆਵਸ੍ਸਕਾਧਮੀਣਤਾਵਿਸਿਟ੍ਠੇ ਚ ਭਾਵਾਦੋ ਸਿਦ੍ਧਾ, ਉਦ੍ਧਂਮੁਹੁਤ੍ਤਤੋ-ਭੋਤਾ ਕਟੋ ਕਤ੍ਤਬ੍ਬੋ, ਭੋਤਾ ਰਜ੍ਜਂ ਕਤ੍ਤਬ੍ਬਂ. ਭਵਂ ਅਰਹੋ, ਭੋਤਾ ਸਾਰੋ ਵਹਿਤਬ੍ਬੋ, ਭਵਂ ਸਕ੍ਕੋ, ਭੋਤਾ ਅਵਸ੍ਸਂ ਕਟੋ ਕਤ੍ਤਬ੍ਬੋ, ਭੋਤਾ ਨਿਕ੍ਖੋ ਦਾਤਬ੍ਬੋ.
੩੩. ਕਤ੍ਤਰਿ ਲ੍ਤੁਣਕਾ.
ਕਤ੍ਤਰਿ ਕਾਰਕੇ ਕ੍ਰਿਯਤ੍ਥਾ ਲ੍ਤੁਣਕਾ ਹੋਨ੍ਤਿ ਬਹੁਲਂ. ਪਠਿਤਾ, ਪਾਠਕੋ. ਬਹੁਲਮਿਤ੍ਵੇਵ? ਪਾਦੇਹਿ ਹਰੀਯਤੀਤਿ ਪਾਦਹਾ-ਰਕੋ, ਗਲੇ ਚੁਪ੍ਪਤੇਤਿ ਗਲੇਚੋਪਕੋ. ਸਿਦ੍ਧੋਵ ਲ੍ਤੁ, ਅਰਹੇ ਸੀਲਸਾਧੁਧਮ੍ਮੇਸੁ ਚ ਸਾਮਞ੍ਞਵਿਹਿਤਤ੍ਤਾ, ਭਵਂ ਖਲੁ ਕਞ੍ਞਾਯ ਪਰਿਗ੍ਗਹਿਤਾ, ਭਵਮੇਤਂ ਅਰਹਤਿ. ਸੀਲਾਦੀਸੁ-ਖਲ੍ਵਪਿ ਉਪਾਦਾਤਾ ਕੁਮਾਰਕੇ, ਗਨ੍ਤਾ ਖੇਲਂ, ਮੁਣ੍ਡਯਿਤਾਰੋ ਸਾਵਿਟ੍ਠਾਯਨਾ ਵਧੁਂ ਕਤਪਰਿਗ੍ਗਹਂ.
੩੪. ਆਵੀ.
ਕ੍ਰਿਯਤ੍ਥਾ ਆਵੀ ਹੋਤਿ ਬਹੁਲਂ ਕਤ੍ਤਰਿ. ਭਯਦਸ੍ਸਾਵੀ. ਅਪ੍ਪਵਿਸਯਤਞ੍ਞਾਪਨਤ੍ਥਂ ਭਿਨ੍ਨਯੋਗਕਰਣਂ, ਸਾਮਞ੍ਞਵਿਹਿਤਤ੍ਤਾ ਸੀਲਾ ਦੀਸੁ ਚ ਹੋਤੇਵ.
੩੫. ਆਸਿਂਸਾਯਮਕੋ.
ਆਸਿਂਸਾਯਂ ਗਮ੍ਯਮਾਨਾਯਂ ਕ੍ਰਿਯਤ੍ਥਾ ਅਕੋ ਹੋਤਿ ਕਤ੍ਤਰਿ. ਜੀਵਤੂਤਿ ਜੀਵਕੋ, ਨਨ੍ਦਤੂਤਿ ਨਨ੍ਦਕੋ, ਭਵਤੂਤਿ ਭਵਕੋ.
੩੬. ਕਰਾ ਣਨੋ.
ਕਰਤੋ ਕਤ੍ਤਰਿ ਣਨੋ ਹੋਤਿ. ਕਰੋਤੀਤਿ ਕਾਰਣਂ, ਕਤ੍ਤਰੀਤਿ ਕਿਂ? ਕਰਣਂ.
੩੭. ਹਾਤੋ ਵੀਹਿਕਾਲੇਸੁ.
ਹਾਤੋ ਵੀਹਿਸ੍ਮਿਂ ਕਾਲੇ ਚ ਣਨੋ ਹੋਤਿ ਕਤ੍ਤਰਿ. ਹਾਯਨਾ ਨਾਮ ਵਿਹਯੋ, ਹਾਯਨੋ ਸਂਵਚ੍ਛਰੋ, ਵੀਹਿਕਾਲੇਸੂਤਿ ਕਿਂ? ਹਾਤਾ.
੩੮. ਵਿਦਾ ਕੂ.
ਵਿਦਸ੍ਮਾ ਕੂ ਹੋਤਿ ਕਤ੍ਤਰਿ. ਵਿਦੂ, ਲੋਕਵਿਦੂ.
੩੯. ਵਿਤੋ ਞਾਤੋ.
ਵਿਪੁਬ੍ਬਾ ਞਾਇਚ੍ਚਸ੍ਮਾ ਕੂ ਹੋਤਿ ਕਤ੍ਤਰਿ. ਵਿਞ੍ਞੂ. ਵਿਤੋਤਿ ਕਿਂ? ਪਞ੍ਞਾ.
੪੦. ਕਮ੍ਮਾ.
ਕਮ੍ਮਤੋ ਪਰਾ ਞਾਇਚ੍ਚਸ੍ਮਾ ਕੂ ਹੋਤਿ ਕਤ੍ਤਰਿ. ਸਬ੍ਬਞ੍ਞੂ, ਕਾਲਞ੍ਞੂ.
੪੧. ਕ੍ਵਚਣ.
ਕਮ੍ਮਤੋ ਪਰਾ ਕ੍ਰਿਯਤ੍ਥਾ ਕ੍ਵਚਿ ਅਣ ਹੋਤਿ ਕਤ੍ਤਰਿ. ਕੁਮ੍ਭਕਾਰੋ, ਸਰਲਾਵੋ, ਮਨ੍ਤਜ੍ਝਾਯੋ, ਬਹੁਲਾਧਿਕਾਰਾ ਇਧ ਨ ਹੋਤਿ ਆਦਿਚ੍ਚਂ ਪਸ੍ਸਤਿ, ਹਿਮਵਨ੍ਤਂ ਸੁਣੋਤਿ, ਗਾਮਂ ਗਚ੍ਛਤਿ. ਕ੍ਵਚੀਤਿ ਕਿਂ? ਕਮ੍ਮਕਰੋ.
੪੨. ਗਮਾ ਰੂ.
ਕਮ੍ਮਤੋ ਪਰਾ ਗਮਾ ਰੂ ਹੋਤਿ ਕਤ੍ਤਰਿ. ਵੇਦਗੂ ਪਾਰਗੂ.
੪੩. ਸਮਾਨਞ੍ਞ ਭਵਨ੍ਤ ਯਾਦਿਤੂ-ਪਮਾਨਾ ਦਿਸਾ ਕਮ੍ਮੇ ਰੀਰਿਕ੍ਖਕਾ.
ਸਮਾਨਾਦੀਹਿ ਯਾਦੀਹਿ ਚੋਪਮਾਨੇਹਿ ਪਰਾ ਦਿਸਾ ਕਮ੍ਮਕਾਰਕੇ ਰੀਰਿਕ੍ਖਕਾ ਹੋਨ੍ਤਿ. ਸਮਾਨੋ ਵਿਯ ਦਿਸ੍ਸਤੀਤਿ ਸਦੀ ਸਦਿਕ੍ਖੋ ਸਦਿਸੋ. ਅਞ੍ਞਾਦੀ ਅਞ੍ਞਾਦਿਕ੍ਖੋ ਅਞ੍ਞਾਦਿਸੋ. ਭਵਾਦੀ ਭਵਾਦਿਕ੍ਖੋ ਭਵਾਦਿਸੋ. ਯਾਦੀ ਯਾਦਿਕ੍ਖੋ ਯਾਦਿਸੋ. ਤ੍ਯਾਦੀ ਤ੍ਯਾਦਿਕ੍ਖੋ ਤ੍ਯਾਦਿਸੋ. ਸਮਾਨਾਦੀਹੀਤਿ ਕਿਂ? ਰੁਕ੍ਖੋ ਵਿਯ ਦਿਸ੍ਸਤਿ. ਉਪਮਾਨਾਤਿ ਕਿਂ? ਸੋ ਦਿਸ੍ਸਤਿ. ਕਮ੍ਮੇਤਿ ਕਿਂ? ਸੋ ਵਿਯ ਪਸ੍ਸਤਿ. ਰਕਾਰਾ ਅਨ੍ਤਸਰਾਦਿਲੋਪਤ੍ਥਾ, ਕਕਾਰੋ ਏਕਾਰਾਭਾਵਤ੍ਥੋ.
੪੪. ਭਾਵਕਾਰਕੇਸ੍ਵ-ਘਣ ਘਕਾ.
ਭਾਵੇ ਕਾਰਕੇ ਚ ਕ੍ਰਿਯਤ੍ਥਾ ਅ ਘਣ ਘ ਕਾ ਹੋਨ੍ਤਿ ਬਹੁਲਂ. ਅ-ਪਗ੍ਗਹੋ, ਨਿਗ੍ਗਹੋ, ਕਰੋ, ਗਰੋ, ਚਯੋ, ਜਯੋ, ਰਵੋ, ਭਵੋ, ਪਚੋ, ਵਚੋ, ਅਨ੍ਨਦੋ, ਪੁਰਿਨ੍ਦਦੋ, ਈਸਕ੍ਕਰੋ, ਦੁਕ੍ਕਰੋ, ਸੁਕਰੋ. ਘਣ-ਭਾਵੇ ਪਾਕੋ, ਚਾਗੋ, ਭਾਵੋ, ਕਾਰਕੇਪਿ ਸਞ੍ਞਾਯਂ ਤਾਵ ਪਜ੍ਜਤੇਨੇਨਾਤਿ ਪਾਦੋ, ਰੁਜਤੀਤਿ ਰੋਗੋ, ਵਿਸਤੀਤਿ ਵੇਸੋ, ਸਰਤਿ ਕਾਲਨ੍ਤਰਨ੍ਤਿ ਸਾਰੋ ਥਿਰਂਸੋ, ਦਰੀਯਨ੍ਤੇ ਏਤੇਹੀਤਿ ਦਾਰਾ, ਜੀਰਯਤਿ ਏਤੇਨਾਤਿ ਜਾਰੋ, ਅਸਞ੍ਞਾਯਮ੍ਪਿ ਦਾਯੋ ਦਤ੍ਤੋ, ਲਾਭੋ ਲਦ੍ਧੋ, ਘ-ਵਕੋ, ਨਿਪਕੋ, ਕ-ਪਿਯੋ, ਖਿਪੋ, ਭੁਜੋ, ਆਯੁਧਂ.
੪੫. ਦਾਧਾਤ੍ਵਿ.
ਦਾਧਾਹਿ ਬਹੁਲਮਿ ਹੋਤਿ ਭਾਵਕਾਰਕੇਸੁ. ਆਦਿ, ਨਿਧਿ, ਵਾਲਮਿ.
੪੬. ਵਮਾਦੀਯ੍ਯਥੁ.
ਵਮਾਦੀਹਿ ਭਾਵਕਾਰਕੇਸ੍ਵਥੁ ਹੋਤਿ. ਵਮਥੁ, ਵੇਪਥੁ, (ਅਵਥੁ, ਸਯਥੁ).
੪੭. ਕ੍ਵਿ.
ਕ੍ਰਿਯਤ੍ਥਾ ਕ੍ਵਿ ਹੋਤਿ ਬਹੁਲਂ ਭਾਵਕਾਰਕੇਸੁ. ਕਕਾਰੋ ਕਾਨੁਬਨ੍ਧਕਾਰਿਯਤ੍ਥੋ, ਅਭਿਭੂ, ਸਯਮ੍ਭੂ, ਭਤ੍ਤਗ੍ਗਂ, (ਦਾਨਗ੍ਗਂ) ਸਲਾਕਗ੍ਗਂ, ਸਭਾ, ਪਭਾ.
੪੮. ਅਨੋ.
ਕ੍ਰਿਯਤ੍ਤਾ ਭਾਵਕਾਰਕੇਸ੍ਵਨੋ ਹੋਤਿ. ਗਮਨਂ, ਦਾਨਂ, ਸਮ੍ਪਦਾਨਂ, ਅਪਾਦਾਨਂ, ਅਧਿਕਰਣਂ, ਚਲਨੋ, ਜਲਨੋ, ਕੋਧਨੋ, ਕੋਪਨੋ, ਮਣ੍ਡਨੋ, ਭੂਸਨੋ.
੪੯. ਇਤ੍ਥਿਯਮਣ ਤ੍ਤਿ ਕ ਯਕ ਯਾ ਚ.
ਇਤ੍ਥਿਲਿਙ੍ਗੇ ਭਾਵੇ ਕਾਰਕੇ ਚ ਕ੍ਰਿਯਤ੍ਥਾ ਅਆਦਯੋ ਹੋਨ੍ਤਿ ਅਨੋ ਚ ਬਹੁਲਂ. ਅ ਤਿਤਿਕ੍ਖਾ, ਵੀਮਂਸਾ, ਜਿਗੁਚ੍ਛਾ, ਪਿਪਾਸਾ, ਪੁਤ੍ਤਿਯਾ ਈਹਾ ਭਿਕ੍ਖਾ, ਆਪਦਾ, ਮੇਧਾ, ਗੋਧਾ, ਣਕਾਰਾ, ਹਾਰਾ, ਤਾਰਾ, ਧਾਰਾ, ਆਰਾ, ਕ੍ਤਿ-ਇਟ੍ਠਿ, ਸਿਟ੍ਠਿ, ਭਿਤ੍ਤਿ, ਭਤ੍ਤਿ, ਤਨ੍ਤਿ ਭੂਤਿ, ਕ-ਗੁਹਾ, ਰੁਜਾ, ਮੁਦਾ, ਯਕ-ਵਿਜ੍ਜਾ, ਇਜ੍ਜਾ, ਯ-ਸੇਯ੍ਯਾ, ਸਮਜ੍ਜਾ, ਪਬ੍ਬਜ੍ਜਾ, ਪਰਿਚਰਿਯਾ, ਜਾਗਰਿਯਾ, ਅਨਕਾਰਣਾ, ਹਾਰਣਾ, ਵੇਦਨਾ, ਵਨ੍ਦਨਾ, ਉਪਾਸਨਾ.
੫੦. ਜਾਹਾਹਿ ਨਿ.
ਜਾਹਾਇਚ੍ਚੇਤੇਹਿ ਨਿ ਹੋਤਿਤ੍ਥਿਯਂ. ਜਾਨਿ, ਹਾਨਿ.
੫੧. ਕਰਾ ਰਿਰਿਯੋ.
ਕਰਤੋ ਰਿਰਿਯੋ ਹੋਤਿਤ੍ਥਿਯਂ. ਕਰਣਂ ਕਿਰਿਯਾ. ਕਥਂ ‘ਕ੍ਰਿਯਾ’ਤਿ? ‘‘ਕ੍ਰਿਯਾਯਂ’’ਤਿ ਨਿਪਾਤਨਾ.
੫੨. ਇਕਿਤੀ ਸਰੂਪੇ.
ਕ੍ਰਿਯਤ੍ਥਸ੍ਸ ਸਰੂਪੇ-ਭਿਧੇਯ੍ਯੇ ਕ੍ਰਿਯਤ੍ਥਾ ਪਰੇ ਇਕਿਤੀ ਹੋਨ੍ਤਿ, ਵਚਿ, ਯੁਧਿ, ਪਚਤਿ, ‘ਅਕਾਰੋ ਕਕਾਰੋ’ਤਿ ਆਦੀਸੁ ਕਾਰਸਦ੍ਦੇਨ ਸਮਾਸੋ, ਯਥਾ ਏਵਕਾਰੋਤਿ.
੫੩. ਸੀਲਾਭਿਕ੍ਖਞ੍ਞਾ-ਵਸ੍ਸਕੇਸੁ ਣੀ.
ਕ੍ਰਿਯਤ੍ਥਾ ਣੀ ਹੋਤਿ ਸੀਲਾਦੀਸੁ ਪਤੀਯਮਾਨੇਸੁ, ਉਣ੍ਹਭੋਜੀ, ਖੀਰਪਾਯੀ, ਅਵਸ੍ਸਕਾਰੀ, ਸਤਨ੍ਦਾਯੀ.
੫੪. ਥਾਵਰਿਤ੍ਤਰ ਭਙ੍ਗੁਰ ਭਿਦੁਰ ਭਾਸੁਰ ਭਸ੍ਸਰਾ.
ਏਤੇ ਸਦ੍ਦਾ ਨਿਪਚ੍ਚਨ੍ਤੇ ਸੀਲੇ ਗਮ੍ਯਮਾਨੇ.
੫੫. ਕਤ੍ਤਰਿ ਭੂਤੇ ਕ੍ਤਵਨ੍ਤੁ ਕ੍ਤਾਵੀ.
ਭੂਤੇ-ਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਥਾ ਕ੍ਤਵਨ੍ਤੁਤ੍ਤਾਵੀ ਹੋਨ੍ਤਿ ਕਤ੍ਤਰਿ. ਵਿਜਿਤਵਾ, ਵਿਜਿਤਾਵੀ, ਭੂਤੇਤਿ ਅਧਿਕਾਰੋ ਯਾਵ ‘‘ਆਹਾਰਤ੍ਥਾ’’ਤਿ (੫-੬੦).
੫੬. ਕ੍ਤੋਭਾਵਕਮ੍ਮੇਸੁ.
ਭਾਵੇ ਕਮ੍ਮੇ ਚ ਭੂਤੇ ਕ੍ਤੋ ਹੋਤਿ. ਆਸਿਤਂ ਭਵਤਾ. ਕਤੋ ਕਟੋ ਭਵਤਾ.
੫੭. ਕਤ੍ਤਰਿ ਚਾਰਮ੍ਭੇ.
ਕ੍ਰਿਯਾਰਮ੍ਭੇ ਕਤ੍ਤਰਿ ਕ੍ਤੋ ਹੋਤਿ ਯਥਾਪਤ੍ਤਞ੍ਚ. ਪਕਤੋ ਭਵਂ ਕਟਂ, ਪਕਤੋ ਕਟੋ ਭਵਤਾ, ਪਸੁਤ੍ਤੋ ਭਵਂ, ਪਸੁਤ੍ਤਂ ਭਵਤਾ.
੫੮. ਠਾ-ਸ ਵਸ ਸਿਲਿਸ ਸੀ ਰੁਹ ਜਰ ਜਨੀਹਿ.
ਠਾਦੀਹਿ ਕਤ੍ਤਰਿ ਕ੍ਤੋ ਹੋਤਿ ਯਥਾਪਤ੍ਤਞ੍ਚ. ਉਪਟ੍ਠਿਤੋ ਗੁਰੁਂ ਭਵਂ, ਉਪਟ੍ਠਿਤੋ ਗੁਰੁ ਭੋਤਾ, ਉਪਾਸਿਤੋ ਗੁਰੁਂ ਭਵਂ, ਉਪਾਸਿਤੋ ਗੁਰੁ ਭੋਤਾ, ਅਨੁਵੁਸਿਤੋ ਗੁਰੁਂ ਭਵਂ, ਅਨੁਵੁਸਿਤੋ ਗੁਰੁ ਭੋਤਾ, ਆਸਿਲਿਟ੍ਠੋ ਗੁਰੁਂ ਭਵਂ, ਆਸਿਲਿਟ੍ਠੋ ਗੁਰੁ ਭੋਤਾ, ਅਧਿਸ੍ਸਿਤੋ ਖਟੋਪਿਕਂ ਭਵਂ, ਅਧਿਸ੍ਸਿਤਾ ਖਟੋਪਿਕਾ ਭੋਤਾ, ਆਰਲ਼੍ਹੋ ਰੁਕ੍ਖਂ ਭਵਂ, ਆਰੁਲ਼੍ਹੋ ਰੁਕ੍ਖੋ ਭੋਤਾ, ਅਨੁਜਿਣ੍ਣੋ ਵਸਲਿਂ ਦੇਵਦਤ੍ਤੋ, ਅਨੁਜਿਣ੍ਣਾ ਵਸਲੀ ਦੇਵਦਤ੍ਤੇਨ, ਅਨੁਜਾਤੋ ਮਾਣਵਕੋ ਮਾਣਵਿਕਂ, ਅਨੁਜਾਤਾ ਮਾਣਵਿਕਾ ਮਾਣਵਕੇਨ.
੫੯. ਗਮਨਤ੍ਥਾਕਮ੍ਮਕਾਧਾਰੇ ਚ.
ਗਮਨਤ੍ਥਤੋ ਅਕਮ੍ਮਕਤੋ ਚ ਕ੍ਰਿਯਤ੍ਥਾ ਆਧਾਰੇ ਕ੍ਤੋ ਹੋਤਿ ਕਤ੍ਤਰਿ ਚ ਯਥਾਪਤ੍ਤਞ੍ਚ, ਇਦਮੇਸਂ ਯਾਤਂ, ਇਹ ਤੇ ਯਾਤਾ, ਇਹ ਤੇਹਿ ਯਾਤਂ, ਅਯਂ ਤੇਹਿ ਯਾਤੋ ਪਥੋ, ਇਦਮੇਸਮਾਸਿਤਂ, ਇਹ ਤੇ ਆਸਿਤਾ, ਇਹਤੇਹਿ ਆਸਿਤਂ, ‘ਦੇਵੋ ਚੇ ਵੁਟ੍ਠੋ ਸਮ੍ਪਨ੍ਨਾ ਸਾਲਯੋ’ਤਿ ਕਾਰਣਸਾਮਗ੍ਗੀਸਮ੍ਪਤ੍ਤਿ ਏਤ੍ਥਾਭਿਮਤਾ.
੬੦. ਆਹਾਰਤ੍ਥਾ.
ਅਜ੍ਝੋਹਾਰਤ੍ਥਾ ਆਧਾਰੇ ਕ੍ਤੋ ਹੋਤਿ ਯਥਾਪਤ੍ਤਞ੍ਚ, ਇਦਮੇਸਂ ਭੁਤ੍ਤਂ, ਇਦਮੇਸਂ ਪੀਤਂ, ਇਹ ਤੇਹਿ ਭੁਤ੍ਤਂ, ਇਹ ਤੇਹਿ ਪੀਤਂ, ਓਦਨੋ ਤੇਹਿ ਭੁਤ੍ਤੋ ਪੀਤਮੁਦਕਂ, ਅਕਤ੍ਤਤ੍ਥੋ ਯੋਗਵਿਭਾਗੋ, ਕਥਂ ‘ਪੀਤਾ ਗਾਵੋ’ਤਿ? ਪੀਤਮੇਸਂ ਵਿਜ੍ਜਤੀਤਿ ਪੀਤਾ, ਬਾਹੁਲਕਾ ਵਾ, ‘ਪਸ੍ਸਿਨ੍ਨੋ’ਤਿ ਯਾ ਏਤ੍ਥ ਭੂਤਕਾਲਤਾ, ਤਤ੍ਰ ਤ੍ਤੋ, ਏਵਂ ਰਞ੍ਞਂ ਮਤੋ ਰਞ੍ਞਂ ਇਟ੍ਠੋ, ਰਞ੍ਞਂ ਬੁਦ੍ਧੋ, ਰਞ੍ਞਂ ਪੂਜਿਤੋ, ਏਵਂ ਸੀਲਿਤੋ, ਰਕ੍ਖਿਤੋ, ਖਨ੍ਤੋ, ਆਕੁਟ੍ਠੋ, ਰੁਟ੍ਠੋ, ਰੁਸਿਤੋ, ਅਭਿਬ੍ਯਾਹਟੋ, ਦਯਿਯੋ, ਹਟ੍ਠੋ, ਕਨ੍ਤਾ, ਸਂਯਤੋ, ਅਮਤੋ, ‘ਕਟ੍ਠ’ਨ੍ਤਿ ਭੂਤਤਾਯਮੇਵ ਹੇਤੁਨੋ, ਫਲਂ ਤ੍ਵਤ੍ਰ ਭਾਵਿ.
੬੧. ਤੁਂ ਤਾਯੇ ਤਵੇ ਭਾਵੇ ਭਵਿਸ੍ਸਤਿ ਕ੍ਰਿਯਾਯਂ ਤਦਤ੍ਥਾਯ.
ਭਵਿਸ੍ਸਤਿ ਅਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਥਾ ਭਾਵੇ ਤੁਂ ਤਾਯੇ ਤਵੇ ਹੋਨ੍ਤਿ ਕ੍ਰਿਯਾਯਂ ਤਦਤ੍ਥਾਯਂ ਪਤੀਯਮਾਨਾਯਂ. ਕਾਤੁਂ ਗਚ੍ਛਤਿ, ਕਤ੍ਤਾਯੇ ਗਚ੍ਛਤਿ, ਕਾਤਵੇ ਗਚ੍ਛਤਿ, ਇਚ੍ਛਤਿ ਭੋਤ੍ਤੁਂ ਕਾਮੇਤਿ ਭੋਤ੍ਤੁਨ੍ਤਿ ਇਮੀਨਾਵ ਸਿਦ੍ਧਂ, ਪੁਨਬ੍ਬਿਧਾਨੇ ਤ੍ਵਿਹਾਪਿ ਸਿਯਾ ‘ਇਚ੍ਛਨ੍ਤੋ ਕਰੋਤੀ’ਤਿ, ਏਵਂ ਸਕ੍ਕੋਤਿ ਭੋਤ੍ਤੁਂ, ਜਾਨਾਤਿ ਭੋਤ੍ਤੁਂ, ਗਿਲਾਯਤਿ ਭੋਤ੍ਤੁਂ, ਘਟਤੇ ਭੋਤ੍ਤੁਂ, ਆਰਭਤੇ ਭੋਤ੍ਤੁਂ, ਲਭਤੇ ਭੋਤ੍ਤੁਂ, ਪਕ੍ਕਮਤਿ ਭੋਤ੍ਤੁਂ, ਉਸ੍ਸਹਤਿ ਭੋਤ੍ਤੁਂ, ਅਰਹਤਿ ਭੋਤ੍ਤੁਂ, ਅਤ੍ਥਿ ਭੋਤ੍ਤੁਂ, ਵਿਜ੍ਜਤਿ ਭੋਤ੍ਤੁਂ, ਵਟ੍ਟ ਤਿਭੋਤ੍ਤੁਂ, ਕਪ੍ਪਤਿ ਭੋਤ੍ਤੁਨ੍ਤਿ. ਤਥਾ ਪਾਰਯਤਿ ਭੋਤ੍ਤੁਂ, ਪਹੁ ਭੋਤ੍ਤੁਂ, ਸਮਤ੍ਥੋ ਭੋਤ੍ਤੁਂ, ਪਰਿਯਤ੍ਤੋ ਭੋਤ੍ਤੁਂ, ਅਲਂ ਭੋਤ੍ਤੁਨ੍ਤਿ ਭਵਤਿਸ੍ਸ ਸਬ੍ਬਤ੍ਥ ਸਮ੍ਭਵਾ. ਤਥਾ ਕਾਲੋ ਭੋਤ੍ਤੁਂ. ਸਮਯੋ ਭੋਤੁਂ, ਵੇਲਾ ਭੋਤੁਨ੍ਤਿ, ਯਥਾ ਭੋਤ੍ਤੁਂਮਨੋ, ਸੋਤ੍ਤੁਂ ਸੋਤੋ, ਦਟ੍ਠੁਂ ਚਕ੍ਖੁ, ਯੁਜ੍ਝਿਤੁਂ ਧਨੁ, ਵਤ੍ਤੁਂ ਜਲ਼ੋ, ਗਨ੍ਤੁਮਨੋ, ਕਤ੍ਤੁਮਲਸੋਤਿ, ਉਚ੍ਚਾਰਣਨ੍ਤੁ ਵਤ੍ਤਾਯਤ੍ਤਂ. ਭਾਵੇਤਿ ਕਿਂ? ਕਰਿਸ੍ਸਾਮੀਤਿ ਗਚ੍ਛਤਿ, ਕ੍ਰਿਯਾਯਨ੍ਤਿ ਕਿਂ? ਭਿਕ੍ਖਿਸ੍ਸਂ ਇਚ੍ਚਸ੍ਸ ਜਟਾ, ਤਦਤ੍ਥਾਯਨ੍ਤਿ ਕਿਂ? ਗਚ੍ਛਿਸ੍ਸਤੋ ਤੇ ਭਵਿਸ੍ਸਤਿ ਭਤ੍ਤਂ ਭੋਜਨਾਯ.
੬੨. ਪਟਿਸੇਧੇ-ਲਂਖਲੂਨਂ ਤੁਨ ਤ੍ਵਾਨ ਤ੍ਵਾ ਵਾ.
ਅਲਂ ਖਲੁਸਦ੍ਦਾਨਂ ਪਟਿਸੇਧਤ੍ਥਾਨਂ ਪਯੋਗੇ ਤੁਨਾਦਯੋ ਵਾ ਹੋਨ੍ਤਿ ਭਾਵੇ. ਅਲਂ ਸੋਤੁਨ, ਖਲੁ ਸੋਤੁਨ, ਅਲਂ ਸੁਤ੍ਵਾਨ, ਧਲੁ ਸੁਤ੍ਵਾਨ, ਅਲਂ ਸੁਤ੍ਵਾ, ਖਲੁ ਸੁਤ੍ਵਾ, ਅਲਂ ਸੁਤੇਨ, ਖਲੁ ਸੋਤੇਨ, ਅਲਂ ਖਲੂਨਨ੍ਤਿ ਕਿਂ? ਮਾ ਹੋਤੁ, ਪਟਿਸੇਧੇਤਿ ਕਿਂ? ਅਲਙ੍ਕਾਰੋ.
੬੩. ਪੁਬ੍ਬੇਕਕਤ੍ਥੁਕਾਨਂ.
ਏਕੋ ਕਤ੍ਤਾ ਯੇਸਂ ਬ੍ਯਾਪਾਰਾਨਂ, ਤੇਸੁ ਯੋ ਪੁਬ੍ਬੋ, ਤਦਤ੍ਥਤੋ ਕ੍ਰਿਯਤ੍ਥਾ ਤੁਨਾਦਯੋ ਹੋਨ੍ਤਿ ਭਾਵੇ, ਸੋਤੁਨ ਯਾਤਿ, ਸੁਤ੍ਵਾਨ, ਸੁਤ੍ਵਾ ਵਾ, ਏਕਕਤ੍ਤੁਕਾਨਨ੍ਤਿਕਿਂ? ਭੁਤ੍ਤਸ੍ਮਿਂ ਦੇਵਦਤ੍ਤੇ ਯਞ੍ਞਦਤ੍ਤੋ ਵਜਤਿ, ਪੁਬ੍ਬਾਤਿ ਕਿਂ? ਭੁਞ੍ਜਭਿ ਚ ਪਚਤਿ ਚ. ‘ਅਪ੍ਪਤ੍ਵਾ ਨਦਿਂ ਪਬ੍ਬਤੋ ਅਤਿਕ੍ਕਮ੍ਮ ਪਬ੍ਬਤਂ ਨਦੀ’ਤਿ ਭੂਧਾਤੁਸ੍ਸ ਸਬ੍ਬਤ੍ਥ ਸਮ੍ਭਵਾ ਏਕਕਤ੍ਤੁਕਤਾ ਪੁਬ੍ਬਕਾਲਤਾ ਚ ਗਮ੍ਯਤੇ. ‘ਭੁਤ੍ਵਾ ਭੁਤ੍ਵਾ ਗਚ੍ਛਤੀਤਿ’ ਇਮਿਨਾਵ ਸਿਦ੍ਧਂ ਆਭਿਕ੍ਖਞ੍ਞਨ੍ਤੁ ਦ੍ਵਿਬ੍ਬਚਨਾਵਗਮ੍ਯਤੇ. ਕਥਂ ‘ਜੀਵਗ੍ਗਾਹਂ ਅਗਾਹਯਿ, ਕਾਯਪ੍ਪਚਾਲਕਂ ਗਚ੍ਛਨ੍ਤੀ’ਤਿ ਆਦਿ? ਘਣਨ੍ਤੇਨ ਕ੍ਰਿਯਾਵਿਸੇਸਨੇਨ ਸਿਦ੍ਧਂ ਯਥਾ ‘ਓਦਨਪਾਕਂ ਸਯਤੀ’ਤਿ.
੬੪. ਨ੍ਤੋ ਕਤ੍ਥਰਿ ਵਤ੍ਤਮਾਨੇ.
ਵਤ੍ਤਮਾਨਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਤਾ ਨ੍ਤੋ ਹੋ ਤਿ ਕਤ੍ਤਰਿ, ਤਿਟ੍ਠਨ੍ਤੋ.
੬੫. ਮਾਨੋ.
ਵਤ੍ਤਮਾਨਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਥਾ ਮਾਨੋ ਹੋਤਿ, ਕਤ੍ਤਰਿ. ਤਿਟ੍ਠਮਾਨੋ.
੬੬. ਭਾਵਕਮ੍ਮੇਸੁ.
ਵਤ੍ਤਮਾਨਤ੍ਥੇ ਵਤ੍ਤਮਾਨਤੋ ਕ੍ਰਿਂਯਤ੍ਥਾ ਭਾਵੇ ਕਮ੍ਮੇਚ ਮਾਨੋ ਹੋਤਿ. ਠੀਯਮਾਨਂ, ਪਚ੍ਚਮਾਨੋ ਓਦਨੋ.
੬੭. ਤੇ ਸ੍ਸਪੁਬ੍ਬਾਨਾਗਤੇ.
ਅਨਾਗਤਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਥਾ ਤੇਨ੍ਤਮਾਨਾ ਸ੍ਸਪੁਬ੍ਬਾ ਹੋਨ੍ਤਿ. ਠਸ੍ਸਨ੍ਤੋ, ਠਸ੍ਸਮਾਨੋ, ਠੀਯਿਸ੍ਸਮਾਨਂ, ਪਚ੍ਚਿਸ੍ਸਮਾਨੋ ਓਦਨੋ.
੬੮. ਣ੍ਵਾਦਯੋ.
ਕ੍ਰਿਯਤ੍ਥਾ ਪਰੇ ਬਹੁਲਂ ਣ੍ਵਾਦਯੋ ਹੋਨ੍ਤਿ. ਚਾਰੁ, ਦਾਰੁ.
੬੯. ਖਛਸਾਨ ਮੇਕਸ੍ਸਰੋਦਿ ਦ੍ਵੇ.
ਖਛਸਪ੍ਪਚ੍ਚਯਨ੍ਤਾਨਂ ਕ੍ਰਿਯਤ੍ਥਾਨਂ ਪਠਮੇਕਸ੍ਸਰਂ ਸਦ੍ਦਰੂਪਂ ਦ੍ਵੇ ਭਵਤਿ. ਤਿਤਿਕ੍ਖਾ, ਜਿਗੁਚ੍ਛਾ, ਵੀਮਂਸਾ.
੭੦. ਪਰੋਕ੍ਖਾਯਞ੍ਚ.
ਪਰੋਕ੍ਖਾਯਂ ਪਠਮੇਕਸ੍ਸਰਂ ਸਦ੍ਦਰੂਪਂ ਦ੍ਵੇ ਭਵਤਿ. ਜਗਾਮ, ਚਕਾਰੋ ਅਨੁਤ੍ਤਸਮੁਚ੍ਚਯਤ੍ਥੋ, ਤੇਨਞ੍ਞਤ੍ਰਾਪਿ ਯਥਾਗਮਂ, ਜਹਾਤਿ, ਜਹਿਤਬ੍ਬਂ, ਜਹਿਤੁਂ, ਦਦ੍ਦਲ੍ਲਤਿ, ਚਙ੍ਕਮਤਿ. ‘ਲੋਲੁਪੋ, ਮੋਮੂਹੋਤਿ ਓਤ੍ਤਂ ਤਦਮਿਨਾਦਿਪਾਠਾ.
੭੧. ਆਦਿਸ੍ਮਾ ਸਰਾ.
ਆਦਿਭੂਤਾ ਸਰਾ ਪਰਮੇਕਸ੍ਸਰਂ ਦ੍ਵੇ ਹੋਤਿ, ਅਸਿਸਿਸਤਿ, ਆਦਿਸ੍ਮਾਤਿ ਕਿਂ? ਜਜਗਾਰ, ਸਰਾਤਿ ਕਿਂ? ਪਪਾਚ.
੭੨. ਨ ਪੁਨ.
ਯਂ ਦ੍ਵਿਭੂਤਂ, ਨ ਤਂ ਪੁਨ ਦ੍ਵਿਤ੍ਤਮਾਪਜ੍ਜਤੇ, ਤਿਤਿਕ੍ਖਿਸਤਿ, ਜਿਗੁਚ੍ਛਿਸਤਿ.
੭੩. ਯਥਿਟ੍ਠਂ ਸ੍ਯਾਦਿਨੋ.
ਸ੍ਯਾਦ੍ਯਨ੍ਤਸ੍ਸ ਯਥਿਟ੍ਠਮੇਕਸ੍ਸਰਮਾਦਿਭੂਤਮਞ੍ਞਂ ਵਾ ਯਥਾਗਮਂ ਦ੍ਵਿਤ੍ਤਪਜ੍ਜਤੇ, ਪੁਪੁਤ੍ਤੀਯਿਸਤਿ, ਪੁਤਿਤ੍ਤੀਯਿਸਤਿ, ਪੁਤ੍ਤੀਯਿਯਿਸਤਿ.
੭੪. ਰਸ੍ਸੋ ਪੁਬ੍ਬਸ੍ਸ.
ਦ੍ਵਿਤ੍ਤੇ ਪੁਬ੍ਬਸ੍ਸ ਸਰੋ ਰਸ੍ਸੋ ਹੋਤਿ. ਦਦਾਤਿ.
੭੫. ਲੋਪੋ-ਨਾਦਿਬ੍ਯਞ੍ਜਨਸ੍ਸ.
ਦ੍ਵਿਤ੍ਤੇ ਪੁਬ੍ਬਸ੍ਸਾਦਿਤੋ-ਞ੍ਞਸ੍ਸ ਬ੍ਯਞ੍ਜਨਸ੍ਸ ਲੋਪੋ ਹੋਤਿ. ਅਸਿਸਿਸਤਿ.