੪. ਚਤੁਤ੍ਥੋ ਕਣ੍ਡੋ (ਣਾਦਿ)
੧. ਣੋ ਵਾ ਪਚ੍ਚੇ.
ਛਟ੍ਠਿਯਨ੍ਤਾ ਨਾਮਸ੍ਮਾ ਵਾ ਣਪ੍ਪਚ੍ਚਯੋ ਹੋਤਿ ਅਪਚ੍ਚੇ-ਭਿਧੇਯ੍ਯੇ, ਣਕਾਰੋ ਵੁਦ੍ਧ੍ਯਤ੍ਥੋ, ਏਵਮਞ੍ਞਤ੍ਤਾਪਿ, ਵਸਿਟ੍ਠਸ੍ਸਾਪਚ੍ਚਂ ਵਾਸਿਟ੍ਠੋ, ਵਾਸਿਟ੍ਠੀ ਵਾ, ਓਪਗਵੋ, ਓਪਗਵੀ ਵਾ, ਵੇਤਿ ਵਾਕ੍ਯਸਮਾਸਵਿਕਪ੍ਪਨਤ੍ਥਂ, ਤਸ੍ਸਾਧਿਕਾਰੋ ਸਕਤ੍ਥਾਵਧਿ.
੨. ਵਚ੍ਛਾਦਿਤੋ ਣਾਨਣਾਯਨਾ.
ਵਚ੍ਛਾਦੀਹਿ ਅਪਚ੍ਚਪ੍ਪਚ੍ਚਯਨ੍ਤੇਹਿ ਗੋਤ੍ਤਾਦੀਹਿ ਚ ਸਦ੍ਦੇਹਿ ਣਾਨਣਾਯਨਪ੍ਪਚ੍ਚਯਾ ਵਾ ਹੋਨ੍ਤਿ ਅਪਚ੍ਚੇ, ਵਚ੍ਛਾਨੋ ਵਚ੍ਛਾਯਨੋ, ਕਚ੍ਚਾਨੋ ਕਚ੍ਚਾਯਨੋ, ਯਾਗਮੇ ਕਾਤਿਯਾਨੋ, ਮੋਗ੍ਗਲ੍ਲਾਨੋ ਮੋਗ੍ਗਲ੍ਲਾਯਨੋ, ਸਾਕਟਾਨੋ ਸਾਕਟਾਯਨੋ, ਕਣ੍ਹਾਨੋ ਕਣ੍ਹਾਯਨੋ ਇਚ੍ਚਾਦਿ.
੩. ਕਤ੍ਤਿਕਾਵਿਧਵਾਦੀਹਿ ਣੇਯ੍ਯਣੇਰਾ.
ਕਤ੍ਤਿਕਾਦੀਹਿ ਵਿਧਵਾਦੀਹਿ ਚ ਣੇਯ੍ਯਣੇਰਾ ਵਾ ਯਥਾਕ੍ਕਮਂ ਹੋਨ੍ਤਿ ਅਪਚ੍ਚੇ, ਕਤ੍ਤਿਕੇਯ੍ਯੋ, ਵੇਨਤੇਯ੍ਯੋ, ਭਾਗਿਨੇਯ੍ਯੋ ਇਚ੍ਚਾਦਿ, ਵੇਧਵੇਰੋ, ਬਨ੍ਧਕੇਰੋ, ਨਾਲਿਕੇਰੋ, ਸਾਮਣੇਰੋ ਇਚ੍ਚਾਦਿ.
੪. ਣ੍ਯਦਿਚ੍ਚਾਦੀਹਿ.
ਦਿਤਿਪ੍ਪਭੁਤਿਹਿ ਣ੍ਯੋ ਵਾ ਹੋਤਿ ਅਪਚ੍ਚੇ, ਦੇਚ੍ਚੋ, ਆਦਿਚ੍ਚੋ, ਕੋਣ੍ਡਞ੍ਞੋ, ਗਗ੍ਗ੍ਯੋ, ਭਾਤਬ੍ਬੋ ਇਚ੍ਚਾਦਿ.
੫. ਆ ਣਿ.
ਅਕਾਰਨ੍ਤਤੋ ਣਿ ਵਾ ਹੋਤਿ ਅਪਚ੍ਚੇ, ਦਕ੍ਖਿ, ਦਤ੍ਥਿ, ਦੋਣਿ. ਵਾਸਵਿ, ਵਾਰੁਣਿ ਇਚ੍ਚਾਦਿ.
੬. ਰਾਜਤੋ ਞ੍ਞੋ ਜਾਤਿਯਂ.
ਰਾਜਸਦ੍ਦਤੋ ਞ੍ਞੋ ਵਾ ਹੋਤਿ ਅਪਚ੍ਚੇ ਜਾਤਿਯਂ ਗਮ੍ਯਮਾਨਾਯਂ, ਰਾਜਞ੍ਞੋ, ਜਾਤਿਯਨ੍ਤਿ ਕਿਂ? ਰਾਜਾਪਚ੍ਚਂ.
੭. ਖਤ੍ਤਾ ਯਿਯਾ.
ਖਤ੍ਤਸਦ੍ਦਾ ਯਇਯਾ ਹੋਨ੍ਤਿ ਅਪਚ੍ਚੇ ਜਾਤਿਯਂ, ਖਤ੍ਯੋ, ਖਤ੍ਤਿਯੋ, ਜਾਤਿਯਂਤ੍ਵੇਵ? ਖਤ੍ਤਿ.
੮. ਮਨੁਤੋ ਸ੍ਸਸਣ.
ਮਨੁਸਦ੍ਦਤੋ ਜਾਤਿਯਂ ਸ੍ਸਸਣ ਹੋਨ੍ਤਿ ਅਪਚ੍ਚੇ, ਮਨੁਸ੍ਸੋ, ਮਾਨੁਸੋ, ਇਤ੍ਥਿਯਂ ਮਨੁਸ੍ਸਾ, ਮਾਨੁਸੀ, ਜਾਤਿਯਂਤ੍ਵੇਵ? ਮਾਨਵੋ.
੯. ਜਨਪਦਨਾਮਸ੍ਮਾ ਖਤ੍ਤਿਯਾ ਰਞ੍ਞੇ ਚ ਣੋ.
ਜਨਪਦਸ੍ਸ ਯਂ ਨਾਮਂ, ਤਨ੍ਨਾਮਸ੍ਮਾ ਖਤ੍ਤਿਯਾ ਅਪਚ੍ਚੇ ਰਞ੍ਞੇ ਚ ਣੋ ਹੋਤਿ, ਪਞ੍ਚਾਲੋ, ਕੋਸਲੋ, ਮਾਗਧੋ, ਓਕ੍ਕਾਕੋ, ਜਨਪਦਨਾਮਸ੍ਮਾਤਿ ਕਿਂ? ਦਾਸਰਥਿ, ਖਤ੍ਤਿਯਾਤਿ ਕਿਂ? ਪਞ੍ਚਾਲਸ੍ਸ ਬ੍ਰਾਹ੍ਮਣਸ੍ਸ ਅਪਚ੍ਚਂ ਪਞ੍ਚਾਲਿ.
੧੦. ਣ੍ਯ ਕੁਰੁਸਿਵੀਹਿ.
ਕੁਰੁਸਿਵੀਹਿ ਅਪਚ੍ਚੇ ਰਞ੍ਞੇ ਚ ਣ੍ਯੋ ਹੋਤਿ. ਕੋਰਬ੍ਯੋ, ਸੇਬ੍ਯੋ.
੧੧. ਣ ਰਾਗਾ ਤੇਨ ਰਤ੍ਤਂ.
ਰਾਗਵਾਚਿਤਤਿਯਨ੍ਤਤੋ ਰਤ੍ਤਮਿਚ੍ਛੇਤਸ੍ਮਿਂ ਅਤ੍ਥੇ ਣੋ ਹੋਤਿ, ਕਸਾਵੇਨ ਰਤ੍ਤਂ ਕਾਸਾਵਂ, ਕੋਸੁਮ੍ਭਂ, ਯਾਲਿਦ੍ਦਂ, ਰਾਗਾਤਿ ਕਿਂ? ਦੇਵਦਤ੍ਤੇਨ ਰਤ੍ਤਂ ਵਤ੍ਥਂ, ਇਧ ਕਸ੍ਮਾ ਨ ਹੋਤਿ? ‘ਨੀਲਂ ਪੀਤ’ਨ੍ਤਿ, ਗੁਣਵਚਨਤ੍ਤਾ ਵਿਨਾਪਿ ਣੇਨ ਣਤ੍ਥਸ੍ਸਾਭਿਧਾਨਤੋ.
੧੨. ਨਕ੍ਖਤ੍ਤੇਨਿਨ੍ਦੁਯੁਤ੍ਤੇਨ ਕਾਲੇ.
ਤਤਿਯਨ੍ਤਤੋ ਨਕ੍ਖਤ੍ਤਾ ਤੇਨ ਲਕ੍ਖਿਤੇ ਕਾਲੇ ਣੋ ਹੋਤਿ, ਤਞ੍ਚੇ ਨਕ੍ਖਤ੍ਤਮਿਨ੍ਦੁਯੁਤ੍ਤਂ ਹੋਤਿ, ਫੁਸ੍ਸੀ ਰਤ੍ਤਿ, ਫੁਸ੍ਸਂ ਅਹਂ, ਨਕ੍ਖਤ੍ਤੇਨੇਤਿ ਕਿਂ? ਗੁਰੁਨਾ ਲਕ੍ਖਿਤਾ ਰਤ੍ਤਿ. ਇਨ੍ਦੁਯੁਤ੍ਤੇਨੇਤਿ ਕਿਂ? ਕਤ੍ਥਿਕਾਯ ਲਕ੍ਖਿਤੋ ਮੁਹੁਤ੍ਤੋ, ਕਾਲੇਤਿ ਕਿਂ? ਫੁਸ੍ਸੇਨ ਲਕ੍ਖਿਤਾ ਅਤ੍ਥਸਿਦ੍ਧਿ, ਅਜ੍ਜਕਤ੍ਤਿਕਾਤਿ ਕਤ੍ਤਿਕਾਯੁਤ੍ਤੇ ਚਨ੍ਦੇ ਕਤ੍ਤਿਕਾਸਦ੍ਦੋ ਵਤ੍ਤਤੇ.
੧੩. ਸਾ-ਸ੍ਸ ਦੇਵਤਾ ਪੁਣ੍ਣਮਾਸੀ.
ਸੇਤਿ ਪਠਮਨ੍ਤਾ ਅਸ੍ਸਾਤਿ ਛਟ੍ਠ੍ਯਤ੍ਥੇ ਣੋ ਭਵਤਿ, ਯਂ ਪਠਮਨ੍ਤਂ, ਸਾ ਚੇ ਦੇਵਤਾ ਪੁਣ੍ਣਮਾਸੀਵਾ, ਸੁਗਤੋ ਦੇਵਤਾ ਅਸ੍ਸਾਭਿ ਸੋਗਤੋ, ਮਾਹਿਨ੍ਦੋ, ਯਾਮੋ, ਵਾਰੁਣੋ, ਫੁਸ੍ਸੀ ਪੁਣ੍ਣਮਾਸੀ ਅਸ੍ਸ ਸਮ੍ਬਨ੍ਧਿਨੀਤਿ ਫੁਸ੍ਸੋ, ਮਾਸੋ, ਮਾਯੋ, ਫਗ੍ਗੁਨੋ, ਚਿਤ੍ਤੋ, ਵੇਸਾਖੋ. ਜੇਟ੍ਠਮੂਲੋ, ਆਸਲ਼੍ਹੋ, ਸਾਵਣੋ, ਪੋਟ੍ਠਪਾਦੋ, ਅਸ੍ਸਯੁਜੋ, ਕਤ੍ਤਿਕੋ, ਮਾਗਸਿਰੋ, ਪੁਣ੍ਣਮਾਸੀਤਿ ਕਿਂ? ਫੁਸ੍ਸੀ ਪਞ੍ਚਮੀ ਅਸ੍ਸ, ਪੁਣ੍ਣਮਾਸੀ ਚ ਭਤਕਮਾਸਸਮ੍ਬਨ੍ਧਿਨੀ ਨ ਹੋਤਿ… ਪੁਣ੍ਣੋ ਮਾ ਅਸ੍ਸਨ੍ਤਿ ਨਿਬ੍ਬਚਨਾ, ਅਤੋ ਏਵ ਨਿਪਾਤਨਾ ਣੋ ਸਾਗਮੋ ਚ, ਮਾਸਸੁਤਿਯਾਵ ਨ ਪਞ੍ਚਦਸ ਰਤ੍ਤਾਦੋ ਵਿਧਿ.
੧੪. ਤਮਧੀਤੇ ਤਂ ਜਾਨਾਤਿ ਕਣਿਕਾ ਚ.
ਦੁਤਿਯਨ੍ਤਤੋ ਤਮਧੀਤੇ ਤਂ ਜਾਨਾਤੀਤਿ ਏਤੇਸ੍ਵਤ੍ਥੇਸੁ ਣੋ ਹੋਤਿ ਣੋ ਣਿਕੋ ਚ, ਬ੍ਯਾਕਰਣਮਧੀਤੇ ਜਾਨਾਤਿ ਵਾ ਵੇਯ੍ਯਾਕਰਣੋ, ਛਨ੍ਦਸੋ, ਕਮਕੋ, ਪਦਕੋ, ਵੇਨਯਿਕੋ, ਸੁਤ੍ਤਨ੍ਤਿਕੋ, ਦ੍ਵਿਤਗ੍ਗਹਣਂ ਪੁਥਗੇਵ ਵਿਧਾਨਤ੍ਥਂ ਜਾਨਨਸ੍ਸ ਚ ਅਜ੍ਝੇਨਵਿਸਯਭਾਵਦਸ੍ਸਨਤ੍ਥਂ ਪਸਿਦ੍ਧੂਪਸਙ੍ਗਹਤ੍ਥਂ ਚ.
੧੫. ਤਸ੍ਸ ਵਿਸਯੇ ਦੇਸੇ.
ਛਟ੍ਠਿਯਨ੍ਤਾ ਵਿਸਯੇ ਦੇਸਰੂਪੇ ਣੋ ਹੋਤਿ, ਵਸਾਤੀਨਂ ਵਿਸਯੋ ਦੇਸੋ ਵਾਸਾਤੋ, ਦੇਸੇਤਿ ਕਿਂ? ਚਕ੍ਖੁਸ੍ਸ ਵਿਸਯੋ ਰੂਪਂ, ਦੇਵਦਤ੍ਤਸ੍ਸ ਵਿਸਯੋ-ਨੁਵਾਕੋ.
੧੬. ਨਿਵਾਸੇ ਤਨ੍ਨਾਮੇ.
ਛਟ੍ਠਿਯਨ੍ਤਾ ਨਿਵਾਸੇ ਦੇਸੇ ਤਨ੍ਨਾਮੇ ਣੋ ਹੋਤਿ, ਸਿਵੀਨਂ ਨਿਵਾਸੋ ਦੇਸੋ ਸੇਬ੍ਯੋ, ਵਾਸਾਤੋ.
੧੭. ਅਦੂਰਭਵੇ.
ਛਟ੍ਠਿਯਨ੍ਤਾ ਅਦੂਰਭਵੇ ਦੇਸੇ ਤਨ੍ਨਾਮੇ ਣੋ ਹੋਤਿ, ਵਿਦਿਸਾਯ ਅਦੂਰਭਵਂ ਵੇਦਿਸਂ.
੧੮. ਤੇਨ ਨਿਬ੍ਬਤ੍ਤੇ.
ਤਤਿਯਨ੍ਤਾ ਨਿਬ੍ਬਤ੍ਤੇ ਦੇਸੇ ਤਨ੍ਨਾਮੇ ਣੋ ਹੋਤਿ, ਕੁਸਮ੍ਬੇਨ ਨਿਬ੍ਬਤ੍ਤਾ ਕੋਸਮ੍ਭੀ ਨਗਰੀ, ਕਾਕਨ੍ਦੀ, ਮਾਕਨ੍ਦੀ, ਸਹਸ੍ਸੇਨ ਨਿਬ੍ਬਤ੍ਤਾ ਸਾਹਸ੍ਸੀ ਪਰੀਖਾ, ਹੋਤੁਮ੍ਹਿ ਕਤ੍ਤਰਿ ਕਰਣੇ ਚ ਯਥਾਯੋਗਂ ਤਤਿਯਾ.
੧੯. ਤਮੀਧਤ੍ਥਿ.
ਤਨ੍ਤਿ ਪਠਮਨ੍ਤਾ ਇਧਾਤਿ ਸਤ੍ਤਮ੍ਯਤ੍ਥੇ ਦੇਸੇ ਤਨ੍ਨਾਮੇ ਣੋ ਹੋਤਿ, ਯਨ੍ਤਂ ਪਠਮਨ੍ਤਮਤ੍ਥਿ ਚੇ, ਉਦੁਮ੍ਬਰਾ ਅਸ੍ਮਿਂ ਦੇਸੇ ਸਨ੍ਤੀਤਿ ਓਦੁਮ੍ਬਰੋ, ਬਾਦਰੋ, ਬਬ੍ਬਜੋ.
੨੦. ਤਤ੍ਰ ਭਵੇ.
ਸਤ੍ਤਮ੍ਯਨ੍ਤਾ ਭਵਤ੍ਥੇ ਣੋ ਹੋਤਿ, ਉਦਕੇ ਭਵੋ ਓਦਕੋ, ਓਰਸੋ, ਜਾਨਪਦੋ, ਮਾਗਧੋ, ਕਾਪਿਲਵਤ੍ਥਵੋ, ਕੋਸਮ੍ਬੋ.
੨੧. ਅਜ੍ਜਾਦੀਹਿ ਤਨੋ.
ਭਵਤ੍ਥੇ ਅਜ੍ਜਾਦੀਹਿ ਤਨੋ ਹੋਤਿ, ਅਜ੍ਜ ਭਵੋ ਅਜ੍ਜਤਨੋ, ਸ੍ਵਾਤਨੋ, ਹਿਯ੍ਯਤ੍ਤਨੋ.
੨੨. ਪੁਰਾਤੋ ਣੋ ਚ.
ਪੁਰਾਇਚ੍ਚਸ੍ਮਾ ਭਵਤ੍ਥੇ ਣੋ ਹੋਤਿ ਤਨੋ ਚ, ਪੁਰਾਣੋ, ਪੁਰਾਤਨੋ.
੨੩. ਅਮਾਤ੍ਵਚ੍ਚੋ.
ਅਮਾਸਦ੍ਦਤੋ ਅਚ੍ਚੋ ਹੋਤਿ ਭਵਤ੍ਥੇ, ਅਮਚ੍ਚੋ.
੨੪. ਮਜ੍ਝਾਦਿਤ੍ਵਿਮੋ.
ਮਜ੍ਝਾਦੀਹਿ ਸਤ੍ਤਮ੍ਯਨ੍ਤੇਹਿ ਭਵਤ੍ਤੇ ਇਮੋ ਹੋਤਿ, ਮਜ੍ਝਿਮੋ, ਅਨ੍ਤਿਮੋ. ਮਜ੍ਝ, ਅਨ੍ਤ, ਹੇਟ੍ਠਾ, ਉਪਰਿ, ਓਰ, ਪਾਰ, ਪਚ੍ਛਾ, ਅਬ੍ਭਨ੍ਤਰ, ਪਚ੍ਚਨ੍ਤ (ਪੁਰਤ੍ਥਾ, ਬਾਹਿਰ).
੨੫. ਕਣਣੇਯ੍ਯਣੇਯ੍ਯਕਯਿਯਾ.
ਸਤ੍ਤਮ੍ਯਨ੍ਤਾ ਏਤੇ ਪਚ੍ਚਯਾ ਹੋਨ੍ਤਿ ਭਵਤ੍ਥੇ, ਕਣ-ਕੁਸਿਨਾ ਰਾਯਂ ਭਵੋ ਕੋਸਿਨਾਰਕੋ, ਮਾਗਧਕੋ, ਆਰਞ੍ਞਕੋ ਵਿਹਾਰੋ. ਣੇਯ੍ਯ-ਗਙ੍ਗੇਯ੍ਯੋ, ਪਬ੍ਬਤੇਯ੍ਯੋ, ਵਾਨੇਯ੍ਯੋ. ਣੇਯ੍ਯਕ-ਕੋਲੇਯ੍ਯਕੋ, ਬਾਰਾਣਸੇਯ੍ਯਕੋ, ਚਮ੍ਪੇਯ੍ਯਕੋ, ਮਿਥਿਲੇਯ੍ਯਕੋਤਿ ਏਯ੍ਯਕੋ. ਯ-ਗਮ੍ਮੋ, ਦਿਬ੍ਬੋ. ਇਯਗਾਮਿਯੋ, ਉਦਰਿ-ਯੋ, ਦਿਵਿਯੋ, ਪਞ੍ਚਾਲਿਯੋ, ਬੋਧਿਪਕ੍ਖਿਯੋ, ਲੋਕਿਯੋ.
੨੬. ਣਿਕੋ.
ਸਤ੍ਤਮ੍ਯਨ੍ਤਾ ਭਵਤ੍ਥੇ ਣਿਕੋ ਹੋਤਿ, ਸਾਰਦਿਕੋ ਦਿਵਸੋ, ਸਾਰਦਿਕਾ ਰਤ੍ਤਿ.
੨੭. ਤਮਸ੍ਸ ਸਿਪ੍ਪਂ ਸੀਲਂ ਪਣ੍ਯਂ ਪਹਰਣਂ ਪਯੋਜਨਂ.
ਪਠਮਨ੍ਤਾ ਸਿਪ੍ਪਾਦਿਵਾਚਕਾ ਅਸ੍ਸੇਤਿਛਟ੍ਠਿਯਤ੍ਥੇਣਿਕੋ ਹੋਤਿ, ਵੀਣਾਵਾਦਨਂ ਸਿਪ੍ਪਮਸ੍ਸ ਵੇਣਿਕੋ, ਮੋਦਙ੍ਗਿਕੋ, ਵਂਸਿਕੋ, ਪਂਸੁਕੂ- ਲਧਾਰਣਂ ਸੀਲਮਸ੍ਸ ਪਂਸੁਕੂਲਿਕੋ, ਤੇਚੀਵਰਿਕੇਵ, ਗਨ੍ਧੋਪਣ੍ਯਮਸ੍ਸ ਗਨ੍ਧਿਕੋ, ਤੇਲਿਕੋ, ਗੋਲ਼ਿਕੋ, ਚਾਪੋ ਪਹਰਣਮਸ੍ਸ ਚਾਪਿਕੋ, ਤੋਮਰਿਕੋ, ਮੁਗ੍ਗਰਿਕੋ, ਉਪਧਿਪ੍ਪਯੋਜਨਮਸ੍ਸ ਓਪਧਿਕਂ, ਸਾਤਿਕਂ, ਸਾਹਸ੍ਸਿਕਂ.
੨੮. ਤਂ ਹਨ੍ਤਰਹਤਿ ਗਚ੍ਛਤੁਞ੍ਛਤਿ ਚਰਤਿ.
ਦੁਤਿਯਨ੍ਤਾ ਹਨ੍ਤੀਤਿ ਏਵਮਾਦੀਸ੍ਵਤ੍ਥੇਸੁ ਣੀਕੋ ਹੋਤਿ. ਪਕ੍ਖੀਹਿਪਕ੍ਖਿਨੋ ਹਨ੍ਤੀਤਿ ਪਕ੍ਖਿਕੋ, ਸਾਕੁਨਿਕੋ, ਮਾਯੂਰਿਕੋ. ਮਚ੍ਛੇਹਿ-ਮਚ੍ਛਿਕੋ, ਮੇਨਿਕੋ. ਮਿਗੇਹਿ-ਮਾਗਵਿਕੋ ਹਾਰਿਣਿਕੋ, ‘ਸੂਕਰਿਕੋ’ਤਿ ਇਕੋ. ਸਤਮਰਹਤੀਤਿ ਸਾਤਿਕਂ, ਸਨ੍ਦਿਟ੍ਠਿਕੋ, ਏਹਿਪਸ੍ਸਵਿਧਿਂ ਅਰਹਤੀਤਿ ਏਹਿਪਸ੍ਸਿਕੋ, ਸਾਹਸ੍ਸਿਕੋ, ‘ਸਹਸ੍ਸਿਯੋ’ਤਿ ਇਯੋ. ਪਰਦਾਰਂ ਗਚ੍ਛਤੀਤਿ ਪਾਰਦਾਰਿਕੋ, ਮਗ੍ਗਿਕੋ, ਪਞ੍ਞਾਸਯੋਜਨਿਕੋ. ਬਦਰੇ ਉਞ੍ਛਤੀਤਿ ਬਾਦਰਿਕੋ, ਸਾਮਾਕਿਕੋ. ਧਮ੍ਮਂ ਚਰਤੀਤਿ ਧਮ੍ਮਿਕੋ, ਅਧਮ੍ਮਿਕੋ.
੨੯. ਤੇਨ ਕਤਂ ਕੀਤਂ ਬਦ੍ਧਮਭਿਸਙ੍ਖਤਂ ਸਂਸਟ੍ਠਂ ਹਤਂ ਹਨ੍ਤਿ ਜਿਤਂ ਜਯਤਿ ਦਿਬ੍ਬਤਿ ਖਣਤਿ ਤਰਤਿ ਚਰਤਿ ਵਹਤਿ ਜੀਵਤਿ.
ਤਤਿਯਨ੍ਤਾ ਕਤਾਦਿਸ੍ਵਤ੍ਥੇਸੁ ਣਿਕੋ ਹੋਤਿ. ਕਾਯੇਨ ਕਤਂ ਕਾਯਿਕਂ, ਵਾਚਸਿਕਂ, ਮਾਨਸਿਕਂ, ਵਾਤੇਨ ਕਤੋ ਆਬਾਧੋ ਵਾਤਿਕੋ. ਸਤੇਨ ਕੀਤਂ ਸਾਤਿਕਂ, ਸਾਹਸ੍ਸਿਕਂ, ਮੂਲਤੋਵ, ਦੇਵਦਤੇਨ ਕੀਤਨ੍ਤਿ ਨ ਹੋਤਿ ਤਦਤ੍ਥਾਪ੍ਪਤੀਤਿਯਾ. ਵਰਤ੍ਤਾਯ ਬਦ੍ਧੋ ਵਾਰਤ੍ਤਿਕੋ, ਆਯਸਿਕੋ, ਪਾਸਿਕੋ. ਘਤੇਨ ਅਭਿਸਙ੍ਖਤਂ ਸਂਸਟ੍ਠਂ ਵਾ ਘਾਤਿਕਂ, ਗੋਲ਼ਿਕਂ, ਦਾਧਿਕਂ, ਮਾਰਿਚਿਕਂ. ਜਾਲੇਨ ਹਤੋ ਹਨ੍ਤੀਤਿ ਵਾ ਜਾਲਿਕੋ, ਬਾਲੀਸਿਕੋ. ਅਕ੍ਖੇਹਿ ਜਿਤਮਕ੍ਖਿਕਂ, ਸਾਲਾਕਿਕਂ. ਅਕ੍ਖੇਹਿ ਜਯਤਿ ਦਿਬ੍ਬਤੀਤਿ ਵਾ ਅਕ੍ਖਿਕੋ. ਖਣਿਤ੍ਤਿਯਾ ਖਣਤੀਤਿ ਖਾਣਿਤ੍ਤਿਕੋ, ਕੁਦ੍ਦਾਲਿਕੋ, ਦੇਵਦਤ੍ਤੇਨ ਜਿਤਂ, ਅਙ੍ਗੁਲ੍ਯਾ ਖਣਤੀਤਿ ਨ ਹੋਤਿ ਤਦਤ੍ਥਾਨਵਗਮਾ. ਉਲ਼ੁਮ੍ਪੇਨ ਤਰਤੀਤਿ ਓਲ਼ੁਮ੍ਪਿਕੋ, ‘ਉਲ਼ੁਮ੍ਪਿਕੋ’ਤਿ ਇਕੋ ਗੋਪੁਚ੍ਛਿਕੋ, ਨਾਵਿਕੋ. ਸਕਟੇਨ ਚਰਤੀਤਿ ਸਾਕਟਿਕੋ, ‘ਰਥਿਕੋ, ਪਰਪ੍ਪਿਕੋ’ਤਿ ਇਕੋ. ਖਨ੍ਧੇਨ ਵਹਤੀਤਿ ਖਨ੍ਧਿਕੋ, ਅਂਸਿਕੋ, ‘ਸੀਸਿਕੋ’ਤਿ ਇਕੋ. ਵੇਤਨੇਨ ਜੀਵਤੀਤਿ ਵੇਤਨਿਕੋ, ‘ਭਤਿਕੋ, ਕਯਿਕੋ, ਵਿਕ੍ਕਯਿਕੋ, ਕਯਵਿਕ੍ਕਯਿਕੋ’ਤਿ ਇਕੋ.
੩੦. ਤਸ੍ਸ ਸਂਵਤ੍ਤਤਿ.
ਚਤੁਤ੍ਥਿਯਨ੍ਤਾ ਸਂਵਤ੍ਤਤੀਤਿ ਅਸ੍ਮਿਂ ਅਤ੍ਥੇ ਣਿਕੋ ਹੋਤਿ, ਪੁਨਬ੍ਭਵਾਯ ਸਂਵਤ੍ਤਤੀਤਿ ਪੋਨੋਭਵਿਕੋ, ਇਤ੍ਥਿਯਂ ਪੋਨੋ ਭਵਿਕਾ, ਲੋਕਾਯ ਸਂਵਤ੍ਤਤੀਤਿ ਲੋਕਿਕੋ ਸੁਟ੍ਠੁ ਅਗ੍ਗੋਤਿ ਸਗ੍ਗੋ, ਸਗ੍ਗਾਯ ਸਂਵਤ੍ਤਤੀਤਿ ਸੋਵਗ੍ਗਿਕੋ, ਸਸ੍ਸੋਵਕ ਤਦਮਿਨਾਦਿਪਾਠਾ, ਧਨਾਯ ਸਂਵਤ੍ਤਤੀਤਿ ਧਞ੍ਞਂ, ਯੋ.
੩੧. ਤਤੋ ਸਮ੍ਭੂਤਮਾਗਤਂ.
ਪਞ੍ਚਮ੍ਯਨ੍ਤਾ ਸਮ੍ਭੂਤਮਾਗਤਨ੍ਤਿ ਏਤੇਸ੍ਵਤ੍ਥੇਸੁ ਣਿਕੋ ਹੋਤਿ, ਮਾਤਿਕੋ ਸਮ੍ਭੂਤਮਾਗਤਂ ਵਾ ਮਤ੍ਤਿਕਂ, ਪੇਤ੍ਤਿਕਂ, ਣ੍ਯਰਿਯਣ -ਯਾਪਿ ਦਿਸ੍ਸਨ੍ਤਿ, ਸੁਰਭਿਤੋ ਸਮ੍ਭੂਤਂ ਸੋਰਭ੍ਯਂ, ਥਨਤੋ ਸਮ੍ਭੂਤਂ ਥਞ੍ਞਂ, ਪਿਤਿਤੋ ਸਮ੍ਭੂਤੋ ਪੇਤ੍ਤਿਯੋ, ਮਾਤਿਯੋ, ਮਤ੍ਤਿਯੋ, ਮਚ੍ਚੋ ਵਾ.
੩੨. ਤਤ੍ਥ ਵਸਤਿ ਵਿਦਿਤੋ ਭਤ੍ਤੋ ਨਿਯੁਤ੍ਤੋ.
ਸਤ੍ਤਮ੍ਯਨ੍ਤਾ ਤਤ੍ਥ ਵਸਤੀਤ੍ਵੇਵਮਾਦੀਸ੍ਵਤ੍ਥੇਸੁ ਣਿਕੋ ਹੋਤਿ. ਰੁਕ੍ਖਮੂਲੇ ਵਸਤੀਤਿ ਰੁਕ੍ਖਮੂਲਿਕੋ, ਆਰਞ੍ਞਿਕੋ, ਸੋਸਾਨਿਕੋ. ਲੋਕੇ ਵਿਦਿਤੋ ਲੋਕਿਕੋ. ਚਤੁਮਹਾਰਾਜੇਸੁ ਭਤ੍ਤਾ ਚਾਤੁਮ੍ਮਹਾਰਾਜਿਕਾ. ਦ੍ਵਾਰੇ ਨਿਯੁਤ੍ਤੋ ਦੋਵਾਰਿਕੋ ਦਸ੍ਸੋਕ ਤਦਮਿਨਾਦਿਪਾਠਾ, ਭਣ੍ਡਾਗਾਰਿਕੋ, ਇਕੋ-ਨਵਕਮ੍ਮਿਕੋ, ਕਿਯੋਜਾਤਿਕਿਯੋ, ਅਨ੍ਧਕਿਯੋ.
੩੩. ਤਸ੍ਸਿਦਂ.
ਛਟ੍ਠਿਯਨ੍ਤਾ ਇਦਮਿਚ੍ਚਸ੍ਮਿਂ ਅਤ੍ਥੇ ਣਿਕੋ ਹੋਤਿ, ਸਙ੍ਘਸ੍ਸ ਇਦਂ ਸਙ੍ਘਿਕਂ, ਪੁਗ੍ਗਲਿਕਂ, ਸਕ੍ਯਪੁਤ੍ਤਿਕੋ, ਨਾਤਿਪੁਤ੍ਤਿਕੋ, ਜੇਨਦਤ੍ਤਿਕੋ, ਕਿਯੇ-ਸਕਿਯੋ, ਪਰਕਿਯੋ, ਨਿਯੇ-ਅਤ੍ਤਨਿਯਂ, ਕੇ- ਸਕੋ ਰਾਜਕਂ ਭਣ੍ਡਂ.
੩੪. ਣੋ.
ਛਟ੍ਠਿਯਨ੍ਤਾ ਇਦਮਿਚ੍ਚਸ੍ਮਿਂ ਅਤ੍ਥੇ ਣੋ ਹੋਤਿ, ਕਚ੍ਚਾਯਨਸ੍ਸ ਇਦਂ ਕਚ੍ਚਾਯਨਂ ਬ੍ਯਾਕਰਣਂ, ਸੋਗਤਂ ਸਾਸਨਂ, ਮਾਹਿਸਂ ਮਂਸਾਦਿ.
੩੫. ਗਵਾਦੀਹਿ ਯੋ.
ਗਵਾਦੀਹਿ ਛਟ੍ਠਿਯਨ੍ਤੇਹਿ ਇਦਮਿਚ੍ਚਸ੍ਮਿਂ ਅਤ੍ਥੇ ਯੋ ਹੋਤਿ, ਗੁਨ੍ਨਂ ਇਦਂ ਗਬ੍ਯਂ ਮਂਸਾਦਿ, ਕਬ੍ਯਂ, ਦਬ੍ਬਂ.
੩੬. ਪਿਤਿਤੋ ਭਾਤਰਿ ਰੇਯ੍ਯਣ.
ਪਿਤੁਸਦ੍ਦਾ ਤਸ੍ਸ ਭਾਤਰਿ ਰੇਯ੍ਯਣ ਹੋਤਿ, ਪਿਤੁ ਭਾਤਾ ਪੇਤ੍ਤੇਯ੍ਯੋ.
੩੭. ਮਾਤਿਤੋ ਚ ਭਗਿਨਿਯਂ ਛੋ.
ਮਾਤਿਤੋ ਪਿਤਿਤੋ ਚ ਤੇਸਂ ਭਗਿਨਿਯਂ ਛੋ ਹੋਤਿ, ਮਾਤੁ ਭਗਿਨੀ ਮਾਤੁਚ੍ਛਾ, ਪਿਤੁ ਭਗਿਨੀ ਪਿਤੁਚ੍ਛਾ, ਕਥਂ ‘ਮਾਤੁਲੋ’ਤਿ ‘‘ਮਾਤੁਲਾਦਿਤ੍ਵਾਨੀ’’ਤਿ ਨਿਪਾਤਨਾ.
੩੮. ਮਾਤਾਪਿਤੂਸ੍ਵਾਮਹੋ.
ਮਾਤਾਪਿਤੂਹਿ ਤੇਸਂ ਮਾਤਾਪਿਤੂਸੁ ਆਮਹੋ ਹੋਤਿ, ਮਾਤੁ ਮਾਤਾ ਮਾਤਾਮਹੀ, ਮਾਤੁ ਪਿਤਾ ਮਾਤਾਮਹੋ, ਪਿਤੁ ਮਾਤਾ ਪਿਤਾਮਹੀ, ਪਿਤੁ ਪਿਤਾ ਪਿਤਾਮਹੋ, ਨ ਯਥਾਸਙ੍ਖ੍ਯਂ, ਪਚ੍ਚੇਕਾਭਿ ਸਮ੍ਬਨ੍ਧਾ.
੩੯. ਹਿਤੇ ਰੇਯ੍ਯਣ.
ਮਾਤਾਪਿਤੂਹਿ ਹਿਤੇ ਰੇਯ੍ਯਣ ਹੋਤਿ, ਮਤ੍ਤੇਯ੍ਯੋ, ਪੇਤ੍ਤੇਯ੍ਯੋ.
੪੦. ਨਿਨ੍ਦਾਞ੍ਞਾਤਪ੍ਪਪਟਿਭਾਗਰਸ੍ਸਦਯਾਸਞ੍ਞਾਸੁ ਕੋ.
ਨਿਨ੍ਦਾਦੀਸ੍ਵਤ੍ਥੇਯੁ ਨਾਮਸ੍ਮਾ ਕੋ ਹੋਤਿ, ਨਿਨ੍ਦਾਯਂ-ਮੁਣ੍ਡਕੋ, ਸਮਣਕੋ. ਅਞ੍ਞਾਤੇ-ਕਸ੍ਸਾਯਂ ਅਸ੍ਸੋਤਿ ਅਸ੍ਸਕੋ, ਪਯੋਗਸਾਮਤ੍ਥਿਯਾ ਸਮ੍ਬਨ੍ਧਿਵਿਸੇਸਾਨਵਗਮੋਵਗਮ੍ਯਤੇ. ਅਪ੍ਪਤ੍ਥੇਤੇਲਕਂ, ਘਤਕਂ. ਪਟਿਭਾਗਤ੍ਥੇ-ਹਤ੍ਥੀ ਵਿਯ ਹਤ੍ਥਿਕੋ, ਅਸ੍ਸਕੋ, ਬਲੀਬਦ੍ਦਕੋ. ਰਸ੍ਸੇ-ਮਾਨੁਸਕੋ, ਰੁਕ੍ਖਕੋ, ਪਿਲਕ੍ਖਕੋ. ਦਯਾਯਂ-ਪੁਤ੍ਤਕੋ, ਵਚ੍ਛਕੋ. ਸਞ੍ਞਾਯਂ-ਮੋਰੋ ਵਿਯ ਮੋਰਕੋ.
੪੧. ਤਮਸ੍ਸਪਰਿਮਾਣਂ ਣਿਕੋ ਚ.
ਪਠਮਨ੍ਤਾ ਅਸ੍ਸੇਤਿ ਅਸ੍ਮਿਂ ਅਤ੍ਥੇ ਣਿਕੋ ਹੋਤਿ ਕੋ ਚ ਤਞ੍ਚੇ ਪਠਮਨ੍ਤਂ ਪਰਿਮਾਣਂ ਭਵਤਿ, ਪਰਿਮੀਯਤੇ ਨੇਨੇਤਿ ਪਰਿਮਾਣਂ, ਦੋਣੋ ਪਰਿਮਾਣਮਸ੍ਸ ਦੋਣਿਕੋ ਵੀਹਿ, ਖਾਰਸਤਿਕੋ, ਖਾਰਸਹਸ੍ਸਿਕੋ ਆਸੀਤਿਕੋ ਵਯੋ, ਉਪਡ੍ਢਕਾਯਿਕਂ ਬਿਮ੍ਬੋਹਨਂ, ਪਞ੍ਚਕਂ, ਛਕ੍ਕਂ.
੪੨. ਯਤੇਤੇਹਿ ਤ੍ਤਕੋ.
ਯਾਦੀਹਿ ਪਠਮਨ੍ਤੇਹੀ ਅਸ੍ਸੇਤਿ ਛਟ੍ਠਿਯਤ੍ਥੇ ਤ੍ਤਕੋ ਹੋਤਿ, ਤਞ੍ਚੇ ਪਠਮਨ੍ਤਂ ਪਰਿਮਾਣਂ ਭਵਤਿ, ਯਂ ਪਰਿਮਾਣਮਸ੍ਸ ਯਤ੍ਤਕਂ, ਤਤ੍ਤਕਂ, ਏਤ੍ਤਕਂ, ਆਵਤਕੇ ਯਾਵਤਕੋ, ਤਾਵਤਕੋ (ਏਤਾਵਤਕੋ).
੪੩. ਸਬ੍ਬਾ ਚਾਵਨ੍ਤੁ.
ਸਬ੍ਬਤੋ ਪਠਮਨ੍ਤੇਹਿ ਯਾਦੀਹਿ ਚ ਅਸ੍ਸੇਤਿ ਛਟ੍ਠਿਯਤ੍ਥੇ ਆਵਨ੍ਤੁ ਹੋਤਿ, ਤਞ੍ਚੇ ਪਠਮਨ੍ਤਂ ਪਰਿਮਾਣਂ ਭਵਤਿ. ਸਬ੍ਬਂ ਪਰਿਮਾਣਮਸ੍ਸ ਸਬ੍ਬਾਵਨ੍ਤਂ, ਯਾਵਨ੍ਤਂ, ਤਾਵਨ੍ਤਂ, ਏਤਾਵਨ੍ਤਂ.
੪੪. ਕਿਮ੍ਹਾ ਰਤਿਰੀਵਰੀਵਤਕਰਿਤ੍ਤਕਾ.
ਕਿਮ੍ਹਾ ਪਠਮਨ੍ਤਾ ਅਸ੍ਸੇਤਿ ਛਟ੍ਠਿਯਤ੍ਥੇ ਰਤਿਰੀਵਰੀਵਤਕਰਿਤ੍ਤਕਾ ਹੋਨ੍ਤਿ, ਤਞ੍ਚੇ ਪਠਮਨ੍ਤਂ ਪਰਿਮਾਣਂ ਭਵਤਿ, ਕਿਂ ਸਙ੍ਖ੍ਯਾਨਂ ਪਰਿਮਾਣਮੇਸਂ ਕਤਿ ਏਤੇ, ਕੀਵ, ਕੀਵਤਕਂ, ਕਿਤ੍ਤਕਂ. ਰੀਵਨ੍ਤੋ ਸਭਾਵਤੋ ਅਸਙ੍ਖ੍ਯੋ.
੪੫. ਸਞ੍ਜਾਤਂ ਤਾਰਕਾਦਿਤ੍ਵਿਤੋ.
ਤਾਰਕਾਦੀਹਿ ਪਠਮਨ੍ਤੇਹਿ ਅਸ੍ਸੇਤਿ ਛਟ੍ਠਿਯਤ੍ਥੇ ਇਤੋ ਹੋਤਿ, ਤੇ ਚੇ ਸਞ੍ਜਾਤਾ ਹੋਨ੍ਤਿ, ਤਾਰਕਾ ਸਞ੍ਜਾਤਾ ਅਸ੍ਸ ਤਾਰਕਿਤਂ ਗਗਨਂ, ਪੁਪ੍ਫਿਤੋ ਰੁਕ੍ਖੋ, ਪਲ੍ਲਵਿਤਾ ਲਤਾ.
੪੬. ਮਾਨੇ ਮਤ੍ਤੋ.
ਪਠਮਨ੍ਤਾ ਮਾਨਵੁਤ੍ਤਿਤੋ ਅਸ੍ਸੇਤਿ ਅਸ੍ਮਿਂਅਤ੍ਥੇ ਮਤ੍ਤੋ ਹੋਤਿ, ਪਲਂ ਉਮ੍ਮਾਨਮਸ੍ਸ ਪਲਮਤ੍ਤਂ, ਹਤ੍ਥੋ ਪਮਾਣਮਸ੍ਸ ਹਤ੍ਥਮਤ੍ਤਂ ਸਤਂ ਮਾਨਮਸ੍ਸ ਸਤਮਤ੍ਤਂ, ਦੋਣੋ ਪਰਿਮਾਣਮਸ੍ਸ ਦੋਣਮਤ੍ਤਂ, ਅਭੇਦੋਪਚਾਰਾ ਦੋਣੋਤਿਪਿ ਹੋਤਿ.
੪੭. ਤਗ੍ਘੋ ਚੁਦ੍ਧਂ.
ਉਦ੍ਧਮਾਨਵੁਤ੍ਤਿਹੋ ਅਸ੍ਸੇਤਿ ਛਟ੍ਠਿਯਤ੍ਥੇ ਤਗ੍ਘੋ ਹੋਤਿ ਮਤ੍ਤੋ ਚ, ਜਣ੍ਣੁਤਗ੍ਘਂ, ਜਣ੍ਣੁਮਤ੍ਤਂ.
੪੮. ਣੋ ਚ ਪੁਰਿਸਾ.
ਪੁਰਿਸਾ ਪਠਮਨ੍ਤਾ ਉਦ੍ਧਮਾਨਵੁਤ੍ਤਿਤੋ ਣੋ ਹੋਤਿ ਮਤ੍ਤਾਦਯੋ ਚ, ਪੋਰਿਸਂ, ਪੁਰਿਸਮਤ੍ਤਂ, ਪੁਰਿਸਤਗ੍ਘਂ.
੪੯. ਅਯੂਭਦ੍ਵਿਤੀਹਂਸੇ.
ਉਭਦ੍ਵਿਤੀਹਿ ਅਵਯਵਵੁਤ੍ਤੀਤਿ ਪਠਮਨ੍ਤੇਹਿ ਅਸ੍ਸੇਤਿ ਛਟ੍ਠਿਯਤ੍ਥੇ ਅਯੋ ਹੋਤਿ. ਉਭੋ ਅਂਸਾ ਅਸ੍ਸ ਉਭਯਂ, ਦ੍ਵਯਂ, ਤਯਂ.
੫੦. ਸਙ੍ਖ੍ਯਾਯ ਸਚ੍ਚੁਤੀਸਾਸਦਸਨ੍ਤਾਯਾਧਿਕਾਸ੍ਮਿਂ ਸਵਸਹਸ੍ਸੇ ਡੋ.
ਸਤ੍ਯਨ੍ਤਾਯ ਉਤ੍ਯਨ੍ਤਾਯ ਈਸਨ੍ਤਾਯ ਆਸਨ੍ਤਾਯ ਦਸਨ੍ਤਾਯ ਚ ਸਙ੍ਖ੍ਯਾਯ ਪਠਮਨ੍ਤਾਯ ਅਸ੍ਮਿਨ੍ਤਿ ਸਤ੍ਤਮ੍ਯਤ੍ਥੇ ਡੋ ਹੋਤਿ, ਸਾ ਚੇ ਸਙ੍ਖ੍ਯਾ ਅਧਿਕਾ ਹੋਤਿ, ਯਦਸ੍ਮਿਨ੍ਤਿ ਤਞ੍ਚੇ ਸਤਂ ਸਹਸ੍ਸਂ ਸਤਸਹਸ੍ਸਂ ਵਾ ਹੋਤਿ, ਵੀਸਤਿ ਅਧਿਕਾ ਅਸ੍ਮਿਂ ਸਤੇਤਿ ਵੀਸਂ ਸਤਂ, ਏਕਵੀਸਂ ਸਤਂ, ਸਹਸ੍ਸਂ, ਸਤਸਹਸ੍ਸਂ ਵਾ, ਤਿਂਸਂ ਸਤਂ, ਏਕਤਿਂਸਂ ਸਤਂ. ਉਤ੍ਯਨ੍ਤਾਯ-ਨਵੁਤਂ ਸਤਂ ਸਹਸ੍ਸਂ ਸਤਸਹਸ੍ਸਂ ਵਾ. ਈਸਨ੍ਤਾਯ ਚਤ੍ਤਾਲੀਸਂ ਸਤਂ, ਸਹਸ੍ਸਂ, ਸਤਸਹਸ੍ਸਂ ਵਾ. ਆਸਨ੍ਤਾਯ ਪਞ੍ਞਾਸਂ ਸਤਂ, ਸਹਸ੍ਸਂ, ਸਤਸਹਸ੍ਸਂ ਵਾ. ਦਸਨ੍ਤਾਯਏਕਾਦਸਂ ਸਤਂ, ਸਹਸ੍ਸਂ, ਸਤਸਹਸ੍ਸਂ ਵਾ. ਸਚ੍ਚੁਤੀਸਾਸਦਸਨ੍ਤਾਯਾਤਿ ਕਿਂ? ਛਾਧਿਕਾ ਅਸ੍ਮਿਂਸਤੇ. ਅਧਿਕੇਤਿ ਕਿਂ? ਪਞ੍ਚਦਸਹੀਨਾ ਅਸ੍ਮਿਂਸਤੇ, ਅਸ੍ਮਿਨ੍ਤਿ ਕਿਂ? ਵੀਸਤ੍ਯਧਿਕਾ ਏਤਸ੍ਮਾ ਸਤਾ, ਸਤਸਹਸ੍ਸੇਤਿ ਕਿਂ? ਏਕਾਦਸ ਅਧਿਕਾ ਅਸ੍ਸਂ ਵੀਸਤਿਯਂ.
੫੧. ਤਸ੍ਸ ਪੂਰਣੇਕਾਦਸਾਦਿਤੋ ਵਾ.
ਛਟ੍ਠਿਯਨ੍ਥਾਯੇਕਾਦਸਾਦਿਕਾਯ ਸਙ੍ਖ੍ਯਾਯ ਡੋ ਹੋਤਿ (ਤਸ੍ਸ) ਪੂਰਣਤ੍ਥੇ ਵਿਭਾਸਾ, ਸਾ ਸਙ੍ਖ੍ਯਾ ਪੂਰੀਯਤੇ ਯੇਨ ਤਂ ਪੂਰਣਂ, ਏਕਾਦਸਨ੍ਨਂ ਪੂਰਣੋ ਏਕਾਦਸੋ. ਏਕਾਦਸਮੋ, ਵੀਸੋ, ਵੀਸਤਿਮੋ, ਤਿਂਸੋ, ਤਿਂਸਤਿਮੋ, ਚਤ੍ਤਾਲੀਸੋ, ਪਞ੍ਞਾਸੋ.
੫੨. ਮ ਪਞ੍ਚਾਦਿਕਤਿਹਿ.
ਛਟ੍ਠਿਯਨ੍ਤਾਯ ਪਞ੍ਚਾਦਿਕਾਯ ਸਙ੍ਖ੍ਯਾਯ ਕਤਿਸ੍ਮਾ ਚ ਮੋ ਹੋਤਿ (ਤਸ੍ਸ) ਪੂਰਣਤ੍ਥੇ, ਪਞ੍ਚਮੋ, ਸਤ੍ਤਮੋ, ਅਟ੍ਠਮੋ, ਕਤਿਮੋ, ਕਤਿਮੀ.
੫੩. ਸਤਾਦੀਨਮਿਚ. ਸਤਾਦਿਕਾਯ ਸਙ੍ਖ੍ਯਾਯ ਛਟ੍ਠਿਯਨ੍ਤਾਯ (ਤਸ੍ਸ) ਪੂਰਣਤ੍ਥੇ ਮੋਹੋਤਿ ਸਤਾਦੀਨਮਿਚਾਨ੍ਤਾਦੇਸੋ, ਸਤਿਮੋ, ਸਹਸ੍ਸਿਮੋ.
੫੪. ਛਾ ਟ੍ਠਟ੍ਠਮਾ.
ਛਸਦ੍ਦਾ ਟ੍ਠਟ੍ਠਮਾ ਹੋਨ੍ਤਿ ਤਸ੍ਸ ਪੂਰਣਤ੍ਥੇ, ਛਟ੍ਠੋ, ਛਟ੍ਠਮੋ, ਇਤ੍ਥਿਯਂ ਛਟ੍ਠੀ, ਛਟ੍ਠਮੀ, ਕਥਂ ‘ਦੁਤਿਯਂ ਚਤੁਤ੍ਥ’ਨ੍ਤਿ? ‘‘ਦੁਤਿਯਸ੍ਸ, ਚਤੁਤ੍ਥ ਤਤਿਯਾਨ’’ਨ੍ਤਿ ਨਿਪਾਤਨਾ.
੫੫. ਏਕਾ ਕਾਕ੍ਯਸਹਾਯੇ.
ਏਕਸ੍ਮਾ ਅਸਹਾਯਤ੍ਥੇ ਕਆਕੀ ਹੋਨ੍ਤਿ ਵਾ, ਏਕਕੋ, ਏਕਾਕੀ, ਏਕੋ.
੫੬. ਵਚ੍ਛਾਦੀਹਿ ਤਨੁਤ੍ਤੇ ਤਰੋ.
ਵਚ੍ਛਾਦੀਨਂ ਸਭਾਵਸ੍ਸ ਤਨੁਤ੍ਤੇ ਗਮ੍ਯਮਾਨੇ ਤਰੋ ਹੋਤਿ, ਸੁਸੁਤ੍ਤਸ੍ਸ ਤਨੁਤ੍ਤੇ ਵਚ੍ਛਤਰੋ, ਇਤ੍ਥਿਯਂ ਵਚ੍ਛਤਰੀ, ਯੋਬ੍ਬਨਸ੍ਸ ਤਨੁਤ੍ਤੇ ਓਕ੍ਖਤਰੋ, ਅਸ੍ਸਭਾਵਸ੍ਸ ਤਨੁਤ੍ਤੇ ਅਸ੍ਸਤਰੋ, ਸਾਮਤ੍ਥਿਯਸ੍ਸ ਤਨੁਤ੍ਤੇ ਉਸਭਤਰੋ.
੫੭. ਕਿਮ੍ਹਾ ਨਿਦ੍ਧਾਰਣੇ ਰਤਰ ਰਤਮਾ. ਕਿਂਸਦ੍ਦਾ ਨਿਦ੍ਧਾਰਣੇ ਰਤਰ ਰਤਮਾ ਹੋਨ੍ਤਿ, ਕਤਰੋ ਭਵਤਂ ਦੇਵਦਤ੍ਤੋ, ਕਤਰੋ ਭਵਤਂ ਕਠੋ, ਕਤਮੋ ਭਵਤਂ ਦੇਵਦਤ੍ਤੋ, ਕਤਮੋ ਭਵਤਂ ਕਠੋ, ਭਾਰਦ੍ਵਾਜਾਨਂ ਕਤਮੋਸਿ ਬ੍ਰਹ੍ਮੇ.
੫੮. ਤੇਨ ਦਤ੍ਤੇ ਲਿਯਾ.
ਤਤਿਯਨ੍ਤਾ ਦਤ੍ਤੇ-ਭਿਧੇਯ੍ਯੇ ਲਇਯਾ ਹੋਨ੍ਤਿ, ਦੇਵੇਨ ਦਤ੍ਤੋ ਦੇਵਲੋ, ਦੇਵਿਯੋ, ਬ੍ਰਹ੍ਮਲੋ, ਬ੍ਰਹ੍ਮਿਯੋ, ਸਿਵਾ ਸੀਵਲੋ, ਸੀਵਿਯੋ, ਸਿਸ੍ਸ ਦੀਘੋ.
੫੯. ਤਸ੍ਸ ਭਾਵਕਮ੍ਮੇਸੁ ਤ੍ਤਤਾਤ੍ਤਨਣ੍ਯਣੇਯ੍ਯਣਿਯਣਿਯਾ.
ਛਟ੍ਠਿਯਨ੍ਤਾ ਭਾਵੇ ਕਮ੍ਮੇ ਚ ਤ੍ਤਾਦਯੋ ਹੋਨ੍ਤਿ ਬਹੁਲਂ, ਨ ਚ ਸਬ੍ਬੇ ਸਬ੍ਬਤੋ ਹੋਨ੍ਤਿ ਅਞ੍ਞਤ੍ਰ ਤ੍ਤਤਾਹਿ, ਭਵਨ੍ਤਿ ਏਤਸ੍ਮਾ ਬੁਦ੍ਧਿਸਦ੍ਦਾਭਿ ਭਾਵੋ ਸਦ੍ਦਸ੍ਸ ਪਵਤ੍ਤਿਨਿਮਿਤ੍ਤਂ, ਨੀਲਸ੍ਸ ਪਟਸ੍ਸ ਭਾਵੋ ਨੀਲਤ੍ਤਂ ਨੀਲਤਾਭਿ ਗੁਣੋ ਭਾਵੋ, ਨੀਲਸ੍ਸ ਗੁਣਸ੍ਸ ਭਾਵੋ ਨੀਲਤ੍ਤਂ ਨੀਲਤਾਭਿ ਨੀਲਗੁਣਜਾਤਿ, ਗੋਤ੍ਤਂ ਗੋਤਾਤਿ ਗੋਜਾਤਿ, ਪਾਚਕਤ੍ਤਂ, ਦਣ੍ਡਿਤ੍ਤਂ, ਵਿਸਾਣਿਤ੍ਤਂ, ਰਾਜਪੁਰਿਸਤ੍ਤਨ੍ਤਿ ਕ੍ਰਿਯਾਦਿਸਮ੍ਬਨ੍ਧਿਤ੍ਤਂ, ਦੇਵਦਤ੍ਤਤ੍ਤਂ, ਚਨ੍ਦਤ੍ਤਂ, ਸੂਰਿਯਤ੍ਤਨ੍ਤਿ ਤਦਵਤ੍ਥਾਵਿਸੇਸਸਾਮਞ੍ਞਂ, ਆਕਾਸਤ੍ਤਂ, ਅਭਾਵਤ੍ਤਨ੍ਤਿ ਉਪਚਰਿਤਭੇਦਸਾਮਞ੍ਞਂ. ਤ੍ਤਨ-ਪੁਥੁਜ੍ਜਨਤ੍ਤਨਂ, ਵੇਦਨਤ੍ਤਨਂ, ਜਾਯਤ੍ਤਨਂ, ਜਾਰਤ੍ਤਨਂ. ਣ੍ਯ-ਆਲਸ੍ਯਂ, ਬ੍ਰਹ੍ਮਞ੍ਞਂ, ਚਾਪਲ੍ਯਂ, ਨੇਪੁਞ੍ਞਂ, ਪੇਸੁਞ੍ਞਂ, ਰਜ੍ਜਂ, ਆਧਿਪਚ੍ਚਂ, ਦਾਯਜ੍ਜਂ, ਵੇਸਮ੍ਮਂ ‘ਵੇਸਮ’ਨ੍ਤਿ, ਕੇਚਿ, ਸਖ੍ਯਂ, ਵਾਣਿਜ੍ਜਂ. ਣੇਯ੍ਯ-ਸੋਚੇਯ੍ਯਂ, ਆਧਿਪਤੇਯ੍ਯਂ. ਣਗਾਰਵਂ, ਪਾਟਵਂ, ਅਜ੍ਜਵਂ, ਮਦ੍ਦਵਂ. ਇਯ-ਅਧਿਪਤਿਯਂ, ਪਣ੍ਡਿਤਿਯਂ, ਬਹੁਸ੍ਸੁਤਿਯਂ, ਨਗ੍ਗਿਯਂ, ਸੂਰਿਯਂ. ਣਿਯ-ਆਲਸਿਯਂ, ਕਾਲ਼ੁਸਿਯਂ, ਮਨ੍ਦਿਯਂਦਕ੍ਖਿਯਂ, ਪੋਰੋਹਿਤਿਯਂ, ਵੇਯ੍ਯਤ੍ਤਿਯਂ. ਕਥਂ ‘ਰਾਮਣੀਯਕ’ਨ੍ਤਿ? ਸਕਤ੍ਥੇ ਕਨ੍ਤਾ ਣੇਨ ਸਿਦ੍ਧਂ. ਕਮ੍ਮਂ ਕਿਰਿਯਾ, ਤਤ੍ਥ ਅਲਸਸ੍ਸ ਕਮ੍ਮਂ ਅਲਸਤ੍ਤਂ’ ਅਲਸਤਾ, ਅਲਸਤ੍ਤਨਂ, ਆਲਸ੍ਯਂ, ਆਲਸਿਯਂ ਵਾ, ‘‘ਸਕਤ੍ਥੇ’ (੪.੧੨੨) ਤਿ ਸਕਤ੍ਥੇਪਿ, ਯਥਾਭੁਚ੍ਚਂ, ਕਾਰੁਞ੍ਞਂ, ਪਤ੍ਤਕਲ੍ਲਂ, ਆਕਾਸਾਨਞ੍ਚਂ, ਕਾਯਪਾਗੁਞ੍ਞਤਾ.
੬੦. ਬ੍ਯ ਵਦ੍ਧਦਾਸਾ ਵਾ.
ਛਟ੍ਠਿਯਨ੍ਤਾ ਵਦ੍ਧਾ ਦਾਸਾ ਚ ਬ੍ਯੋ ਵਾ ਹੋਤਿ ਭਾਵਕਮ੍ਮੇਸੁ, ਵਦ੍ਧਬ੍ਯਂ ਵਦ੍ਧਤਾ, ਦਾਸਬ੍ਯਂ ਦਾਸਤਾ, ਕਥਂ ‘ਵਦ੍ਧਵ’ਨ੍ਤਿ? ਣੇ ਵਾਗਮੋ.
੬੧. ਨਣ ਯੁਵਾ ਬੋ ਚ ਵਸ੍ਸ.
ਛਟ੍ਠਿਯਨ੍ਤਾ ਯੁਵਸਦ੍ਦਾ ਭਾਵਕਮ੍ਮੇਸੁ ਨਣ ਵਾ ਹੋਤਿ ਤਸ੍ਸ ਬੋ ਚ, ਯੋਬ੍ਬਨਂ, ਵਾਤ੍ਵੇਵ? ਯੁਵਤ੍ਤਂ, ਯੁਵਤਾ.
੬੨. ਅਣ੍ਵਾਦਿਤ੍ਵਿਮੋ.
ਅਣੁਆਦੀਹਿ ਛਟ੍ਠਿਯਨ੍ਤੇਹਿ ਭਾਵੇ ਵਾ ਇਮੋ ਹੋਤਿ, ਅਣਿਮਾ, ਲਘਿਮਾ, ਮਹਿਮਾ, (ਗਰਿਮਾ), ਕਸਿਮਾ, ਵਾਤ੍ਵੇਵ? ਅਣੁਤ੍ਤਂ ਅਣੁਤਾ.
੬੩. ਭਾਵਾ ਤੇਨ ਨਿਬ੍ਬਤ੍ਤੇ.
ਭਾਵਵਾਚਕਾ ਸਦ੍ਦਾ ਤੇਨ ਨਿਬ੍ਬਤ੍ਤੇ-ਭਿਧੇਯ੍ਯੇ ਇਮੋ ਹੋਤਿ, ਪਾਕੇਨ ਨਿਬ੍ਬਤ੍ਤ ਪਾਣਿਮਂ, ਸੇਕਿਮਂ.
੬੪. ਤਰਤਮਿਸ੍ਸਿਕਿਯਿਟ੍ਠਾਤਿਸਯੇ.
ਅਤਿਸਯੇ ਵਤ੍ਤਮਾਨਤੋ ਹੋਨ੍ਤੇਤੇ ਪਚ੍ਚਯਾ, ਅਤਿਸਯੇਨ ਪਾਪੋ ਪਾਪਤਰੋ, ਪਾਪਤਮੋ, ਪਾਪਿਸ੍ਸਿਕੋ, ਪਾਪਿਯੋ, ਪਾਪਿਟ੍ਠੋ, ਇਤ੍ਥਿਯਂ ਪਾਪਤਰਾ. ਅਤਿਸਯਨ੍ਤਾਪਿ ਅਤਿਸਯਪ੍ਪਚ੍ਚਯੋ, ਅਤਿਸਯੇਨ ਪਾਪਿਟ੍ਠੋ ਪਾਪਿਟ੍ਠਤਰੋ.
੬੫. ਤਨ੍ਨਿਸ੍ਸਿਤੇ ਲ੍ਲੋ.
ਦੁਤਿਯਨ੍ਤਾ ਲ੍ਲਪ੍ਪਚ੍ਚਯੋ ਹੋਤਿ ਨਿਸ੍ਸਿਤਤ੍ਥੇ, ਵੇਦਂ ਨਿਸ੍ਸਿਤਂ ਵੇਦਲ੍ਲਂ, ਦੁਟ੍ਠੁ ਨਿਸ੍ਸਿਤਂ ਦੁਟ੍ਠੁਲ੍ਲਂ. ਇਲ੍ਲੇ-ਸਙ੍ਖਾਰਿਲ੍ਲਂ.
੬੬. ਤਸ੍ਸ ਵਿਕਾਰਾਵਯਵੇਸੁ ਣ ਣਿਕ ਣੇਯ੍ਯਮਯਾ.
ਪਕਤਿਯਾ ਉਤ੍ਤਰਮਵਤ੍ਥਨ੍ਤਰਂ ਵਿਕਾਰੋ, ਛਟ੍ਠਿਯਨ੍ਤਾ ਨਾਮਸ੍ਮਾ ਵਿਕਾਰੇ-ਵਯਵੇ ਚ ਣਾਦਯੋ ਹੋਨ੍ਤਿ ਬਹੁਲਂ, ਣ-ਆਯਸਂ ਬਨ੍ਧਨਂ, ਓਦੁਮ੍ਬਰਂ, ਪਣ੍ਣਂ, ਓਦੁਮ੍ਬਰਂ ਭਸ੍ਮਂ, ਕਾਪੋਤਂ ਮਂਸਂ, ਕਾਪੋਤਂ ਸਤ੍ਥਿ. ਣਿਕ-ਕਪ੍ਪਾਸਿਕਂ ਵਤ੍ਥਂ. ਣੇਯ੍ਯ-ਏਣੇਯ੍ਯਂ ਮਂਸਂ, ਏਣੇਯ੍ਯਂ ਸਤ੍ਥਿ. ਕੋਸੇਯ੍ਯਂ ਵਤ੍ਥਂ. ਮਯ-ਤਿਣਮਯਂ, ਦਾਰੁਮਯਂ, ਨਲ਼ਮਯਂ, ਮਤ੍ਤਿਕਾਮਯਂ. ‘‘ਅਞ੍ਞਸ੍ਮਿ’’ਨ੍ਤਿ (੪.੧੨੧) ਗੁਨ੍ਨਂ ਕਰੀਸੇਪਿ ਮਯੋ, ਗੋਮਯਂ.
੬੭. ਜਤੁਤੋ ਸਣ ਵਾ.
ਛਟ੍ਠਿਯਨ੍ਤਾ ਨਾਮਸ੍ਮਾ ਜਤੁਤੋ ਵਿਕਾਰਾਵਯਵੇਸੁ ਸਣ ਵਾ ਹੋਤਿ. ਜਤੁਨੋ ਵਿਕਾਰੋ ਜਾਤੁਸਂ ਜਤੁਮਯਂ. ‘‘ਲੋਪੋ’’ਤਿ (੪.੧੨੩) ਬਹੁਲਂ ਪਚ੍ਚਯਲੋਪੋਪਿ ਫਲਪੁਪ੍ਫਮੂਲੇਸੁ ਵਿਕਾਰਾਵਯਵੇਸੁ, ਪਿਯਾਲਸ੍ਸ ਫਲਾਨਿ ਪਿਯਾਲਾਨਿ, ਮਲ੍ਲਿਕਾਯ ਪੁਪ੍ਫਾਨਿ ਮਲ੍ਲਿਕਾ, ਉਸਿਰਸ੍ਸ ਮੂਲਂ ਉਸੀਰਂ, ਤਂ ਸਦ੍ਦੇਨ ਵਾ ਤਦਭਿਧਾਨਂ.
੬੮. ਸਮੂਹੇ ਕਣ ਣ ਣਿਕਾ.
ਛਟ੍ਠਿਯਨ੍ਤਾ ਸਮੂਹੇ ਕਣ ਣ ਣਿਕਾ ਹੋਨ੍ਤਿ ਗੋਤ੍ਤਪ੍ਪਚ੍ਚਯਨ੍ਤਾ. ਕਣ-ਰਾਜਞ੍ਞਕਂ, ਮਾਨੁਸ੍ਸਕਂ, ਉਕ੍ਖਾਦੀਹਿ-ਓਕ੍ਖਕਂ, ਓਟ੍ਠਕਂ, ਓਰਬ੍ਭਕਂ, ਰਾਜਕਂ, ਰਾਜਪੁਤ੍ਤਕਂ, ਹਤ੍ਥਿਕਂ, ਧੇਨੁਕਂ. ਣ-ਕਾਕਂ, ਭਿਕ੍ਖਂ. ਅਚਿਤ੍ਤਾ ਣਿਕ-ਆਪੂਪਿਕਂ, ਸਂਕੁਲਿਕਂ.
੬੯. ਜਨਾਦੀਹਿ ਤਾ.
ਜਨਾਦੀਹਿ ਛਟ੍ਠਿਯਨ੍ਤੇਹਿ ਸਮੂਹੇ ਤਾ ਹੋਤਿ. ਜਨਤਾ, ਗਜਤਾ, ਬਨ੍ਧੁਤਾ, ਗਾਮਤਾ, ਸਹਾਯਤਾ, ਨਾਗਰਤਾ. ਤਾਨ੍ਤਾ ਸਭਾਵਤੋ ਇਤ੍ਥਿਲਿਙ੍ਗਾ, ‘ਮਦਨੀਯ’ਨ੍ਤਿ ਕਰਣੇ-ਧਿਕਰਣੇ ਵਾ ਅਨੀਯੇਨ ਸਿਦ੍ਧਂ. ‘ਧੂਮਾਯਿਤਤ੍ਤ’ਨ੍ਤਿ ਕ੍ਤਾਨ੍ਤਾ ਨਾਮਧਾਤੁਤੋ ਕ੍ਤੇਨ ਸਿਦ੍ਧਂ.
੭੦. ਇਯੋ ਹਿਤੇ.
ਛਟ੍ਠਿਯਨ੍ਤਾ ਹਿਤੇ ਇਯੋ ਹੋਤਿ. ਉਪਾਦਾਨਿਯਂ, ਅਞ੍ਞਤ੍ਰਾਪਿ ਸਮਾਨੋਦਰੇ ਸਯਿਤੋ ਸੋਦਰਿਯੋ.
੭੧. ਚਕ੍ਖ੍ਵਾਦਿਤੋ ਸ੍ਸੋ.
ਛਟ੍ਠਿਯਨ੍ਤੇਹਿ ਚਕ੍ਖੁਆਦੀਹਿ ਹਿਤੇ ਸ੍ਸੋ ਹੋਤਿ, ਚਕ੍ਖੁਸ੍ਸਂ, ਆਯੁਸ੍ਸਂ.
੭੨. ਣ੍ਯੋ ਤਤ੍ਥ ਸਾਧੁ.
ਸਤ੍ਤਮ੍ਯਨ੍ਤਾ ਤਤ੍ਥ ਸਾਧੂਤਿ ਅਸ੍ਮਿਂ ਅਤ੍ਥੇ ਣ੍ਯੋ ਹੋਤਿ. ਸਬ੍ਭੋ, ਪਾਰਿਸਜ੍ਜੋ. ਸਾਧੂਤਿ ਕੁਸਲੋ ਯੋਗ੍ਗੋ ਹਿਤੋ ਵਾ. ਅਞ੍ਞਤ੍ਰਾਪਿ ਰਥਂ ਵਹਤੀਤਿ ਰਚ੍ਛਾ.
੭੩. ਕਮ੍ਮਾ ਨਿਯ ਞ੍ਞਾ.
ਸਤ੍ਤਮ੍ਯਨ੍ਤਾ ਕਮ੍ਮਸਦ੍ਦਾ ਤਤ੍ਥ ਸਾਧੂਭਿ ਅਸ੍ਮਿਂ ਅਤ੍ਥੇ ਨਿਯ ਞ੍ਞਾ ਹੋਨ੍ਤਿ. ਕਮ੍ਮੇ ਸਾਧੁ ਕਮ੍ਮਨਿਯਂ, ਕਮ੍ਮਞ੍ਞਂ.
੭੪. ਕਥਾਦਿਤ੍ਵਿਕੋ.
ਕਥਾਦੀਹਿ ਸਤ੍ਤਮ੍ਯਨ੍ਤੇਹਿ ਤਤ੍ਥ ਸਾਧੂਤਿ ਅਸ੍ਮਿਂ ਅਤ੍ਥੇ ਇਕੋ ਹੋਤਿ. ਕਥਿਕੋ, ਧਮ੍ਮਕਥਿਕੋ, ਸਙ੍ਗਾਮਿਕੋ ਪਵਾਸਿਕੋ, ਉਪਵਾਸਿਕੋ.
੭੫. ਪਥਾਦੀਹਿ ਣੇਯ੍ਯੋ.
ਪਥਾਦੀਹਿ ਸਤ੍ਤਮ੍ਯਨ੍ਤੇਹਿ ਤਤ੍ਥ ਸਾਧੂਤਿ ਅਸ੍ਮਿਂ ਅਤ੍ਥੇ ਣੇ-ਯ੍ਯੋ ਹੋਤਿ, ਪਾਥੇਯ੍ਯਂ ਸਾਪਤੇਯ੍ਯਂ (ਆਤਿਥੇਯ੍ਯਂ).
੭੬. ਦਕ੍ਖਿਣਾਯਾਰਹੇ.