(੩) ਤਤਿਯੋ ਕਣ੍ਡੋ (ਸਮਾਸੋ)
੧. ਸ੍ਯਾਦਿ ਸ੍ਯਾਦਿਨੇਕਤ੍ਥਂ.
ਸ੍ਯਾਦ੍ਯਨ੍ਤਂ ਸ੍ਯਾਦ੍ਯਨ੍ਤੇਨ ਸਹੇਕਤ੍ਥਂ ਹੋਤੀਤਿ ਇਦਮਧਿਕਤਂ ਵੇਦਿਤਬ੍ਬਂ, ਸੋ ਚ ਭਿਨ੍ਨਤ੍ਥਾਨਮੇਕਤ੍ਥੀਭਾਵੋ ਸਮਾਸੋਤਿ ਵੁਚ੍ਚਤੇ.
੨. ਅਸਙ੍ਖ੍ਯਂਵਿਭਤ੍ਤਿ ਸਮ੍ਪਤ੍ਤਿ ਸਮੀਪ ਸਾਕਲ੍ਯਾਭਾਵ ਯਥਾ ਪਚ੍ਛਾਯੁਗਪਦਤ੍ਥੇ.
ਅਸਙ੍ਖ੍ਯਂ, ਸ੍ਯਾਦ੍ਯਨ੍ਤਂ ਵਿਭਤ੍ਯਾਦੀਨਮਤ੍ਥੇ ਵਤ੍ਤਮਾਨਂ ਸ੍ਯਾਦ੍ਯਨ੍ਤੇਨ ਸਹੇਕਤ੍ਥਂ ਭਵਤਿ, ਤਤ੍ਥ ਵਿਭਤ੍ਯਤ੍ਥੇ ਤਾਵ ਇਤ੍ਥੀਸੁ ਕਥਾ ਪਵਤ੍ਤਾ ਅਧਿਤ੍ਥਿ. ਸਮ੍ਪਤ੍ਤਿ ਦ੍ਵਿਧਾ ਅਤ੍ਤਸਮ੍ਪਤ੍ਤਿ ਸਮਿਦ੍ਧਿ ਚ, ਸਮ੍ਪਨ੍ਨਂ ਬ੍ਰਹ੍ਮਂ ਸਬ੍ਰਹ੍ਮਂ ਲਿਚ੍ਛਵੀਨਂ, ਸਮਿਦ੍ਧਿ ਭਿਕ੍ਖਾਨਂ ਸੁਭਿਕ੍ਖਂ. ਸਮੀਪੇ ਕੁਮ੍ਭਸ੍ਸ ਸਮੀਪਮੁਪਕੁਮ੍ਭਂ. ਸਾਕਲ੍ਯੇਸਤਿਣਮਜ੍ਝੋਹਰਤਿ, ਸਾਗ੍ਯਧੀਤੇ. ਅਭਾਵੋ ਸਮ੍ਬਨ੍ਧਿਭੇਦਾ ਬਹੁਵਿਧੋ, ਤਤ੍ਰ ਇਦ੍ਧਾਭਾਵੇ-ਵਿਗਤਾ ਇਦ੍ਧਿ ਸਦ੍ਦਿਕਾਨਂ ਦੁਸ੍ਸਦ੍ਦਿਕਂ, ਅਤ੍ਥਾਭਾਵੇ-ਅਭਾਵੋ ਮਕ੍ਖਿਕਾਨਂ ਨਿਮ੍ਮਕ੍ਖਿਕਂ, ਅਹਿਕ੍ਕਮਾਭਾਵੇ-ਅਤਿਗਤਾਨਿ ਤਿਣਾਨਿ ਨਿਤ੍ਤਿਣਂ, ਸਮ੍ਪਤ੍ਯਾਭਾਵੇ-ਅਤਿਗਤਂ ਲਹੁਪਾਵੁਰਣਂ ਅਤਿਲਹੁਪਾਵੁਰਣਂ, ਲਹੁਪਾਵੁਰਣਸ੍ਸ ਨਾਯਮੁਪਭੋਗਕਾਲੋਤਿ ਅਤ੍ਥੋ. ਯਥਾ ਏਤ੍ਥਾ-ਨੇਕਵਿਧੋ, ਤਤ੍ਰ ਯੋਗ੍ਗਤਾਯਂ-ਅਨੁਰੂਪਂ ਸੁਰੂਪੋਵਹਤਿ, ਵਿਚ੍ਛਾਯਂ-ਅਨ੍ਵਦ੍ਧਮਾਸਂ, ਅਤ੍ਥਾਨਤਿਵਤ੍ਤਿਯਂ-ਯਥਾਸਤ੍ਤਿ, ਸਦਿਸਤ੍ਤੇ, ਸਦਿਸੋ ਕਿਖਿਯਾ ਸਕਿਖਿ, ਆਨੁਪੁਬ੍ਬਿਯੇ-ਅਨੁਜੇਟ੍ਠਂ, ਪਚ੍ਛਾਦਤ੍ਥੇਅਨੁਰਥਂ, ਯੁਗਪਦਤ੍ਥੇ-ਸਚਕ੍ਕਂ ਨਿਧੇਹਿ.
੩. ਯਥਾ ਨ ਤੁਲ੍ਯੇ.
ਯਥਾਸਦ੍ਦੋ ਤੁਲ੍ਯਤ੍ਥੇ ਵਤ੍ਤਮਾਨੋ ਸ੍ਯਾਦ੍ਯਨ੍ਤੇਨ ਸਹੇਕਤ੍ਥੋ ਨ ਭਵਤਿ, ਯਥਾ ਦੇਵਦਤ੍ਤੋ ਤਥਾ ਯਞ੍ਞਦਤ੍ਤੋ.
੪. ਯਾਵਾਵਧਾਰਣੇ.
ਯਾਵਸਦ੍ਦੋ-ਵਧਾਰਣੇ ਵਤ੍ਤਮਾਨੋ ਸ੍ਯਾਦ੍ਯਨ੍ਤੇਨ ਸਹੇਕਤ੍ਥੋ ਭਵਤਿ, ਅਵਧਾਰਣ ਮੇਤ੍ਤਕਤਾ ਪਰਿਚ੍ਛੇਦੋ, ਯਾਵਾਮਤ੍ਤਂ ਬ੍ਰਾਹ੍ਮਣੇ ਆਮਨ੍ਤਯ, ਯਾਵਜੀਵਂ, ਅਵਧਾਰਣੇਤਿ ਕਿਂ? ਯਾਵ ਦਿਨ੍ਨਂ ਤਾਵ ਭੁਤ੍ਤਂ, ਨਾਵਧਾਰਯਾਮਿ ਕਿਤ੍ਤਕਂ ਮਯਾ ਭੁਤ੍ਤਨ੍ਤਿ.
੫. ਪਯ੍ਯਪਾ ਬਹਿ ਤਿਰੋ ਪੁਰੇ ਪਚ੍ਛਾ ਵਾ ਪਞ੍ਚਮ੍ਯਾ.
ਪਰਿਆਦਯੋ ਪਞ੍ਚਮ੍ਯਨ੍ਤੇਨ ਸਹੇਕਤ੍ਥਾ ਹੋਨ੍ਤਿ ਵਾ, ਪਰਿਪਬ੍ਬਤਂ ਵਸ੍ਸਿ ਦੇਵੋ ਪਰਿਪਬ੍ਬਤਾ, ਅਪਪਬ੍ਬਤਂ ਵਸ੍ਸਿ ਦੇਵੋ ਅਪਪਬ੍ਬਤਾ, ਆਪਾਟਲਿਪੁਤ੍ਤਂ ਵਸ੍ਸਿ ਦੇਵੋ ਆਪਾਟਲਿਪੁਤ੍ਤਾ, ਬਹਿਗਾਮਂ ਬਹਿ ਗਾਮਾ, ਤਿਰੋਪਬ੍ਬਤਂ ਤਿਰੋਪਬ੍ਬਤਾ, ਪੁਰੇਭਤ੍ਤਂ ਪੁਰੇਭਤ੍ਤਾ, ਪਚ੍ਛਾਭਤ੍ਤਂ ਪਚ੍ਛਾਭਤ੍ਤਾ, ਵੇਤਾਧਿਕਾਰੋ.
੬. ਸਮੀਪਾਯਾਮੇਸ੍ਵਨੁ.
ਅਨੁਸਦ੍ਦੋ ਸਾਮੀਪ੍ਯੇ ਆਯਾਮੇ ਚ ਵਤ੍ਤਮਾਨੋ ਸ੍ਯਾਦ੍ਯਨ੍ਤੇਨ ਸਹੇਕਤ੍ਥੋ ਹੋਤਿ ਵਾ, ਅਨੁਵਨਮਸਨਿ ਗਤਾ, ਅਨੁਗਙ੍ਗਂ ਬਾਰਾਣਸੀ, ਸਮੀਪਾਯਾਮੇਸ੍ਵੀਤਿ ਕਿਂ? ਰਕ੍ਖਮਨੁਵਿਜ੍ਜੋਤਤੇ ਵਿਜ੍ਜੁ.
੭. ਤਿਟ੍ਠਗ੍ਵਾਦੀਨਿ.
ਤਿਟ੍ਠਗੁਪ੍ਪਭੁਤੀਨਿ ਏਕਤ੍ਥੀਭਾਵਵਿਸਯੇ ਨਿਪਾਤੀਯਨ੍ਤੇ, ਤਿਟ੍ਠਨ੍ਤੀ ਗਾਵੋ ਯਸ੍ਮਿਂ ਕਾਲੇ ਤਿਟ੍ਠਗੁ ਕਾਲੋ, ਵਹਗ੍ਗੁ ਕਾਲੋ. ਆਯਤੀਗਵਂ, ਖਲੇਯਵਂ, ਲੂਨਯਵਂ ਲੂਯਮਾਨਯਵਮਿਚ੍ਚਾਦਿ, ਚ੍ਯਨ੍ਤੋ ਪੇਤ੍ਥ ਕੇਸਾ ਕੇਸਿ, ਦਣ੍ਡਾ ਦਣ੍ਡਿ, ਤਥਾ ਵੇਲਾਪ੍ਪਭਾਵਨਤ੍ਥੋਪਿ, ਪਾਤੋ ਨਹਾਨਂ ਪਾਤਰਹਾਨਂ, ਸਾਯਂ ਨਯਾਨਂ ਸਾਯਨਹਾਨਂ, ਪਾਤਕਾਲਂ ਸਾਯਕਾਲਂ, ਪਾਤਮੇਘਂ ਸਾਯਮੇਘਂ, ਪਾਤਮਗ੍ਗਂ ਸਾਯਮਗ੍ਗਂ.
੮. ਓਰੇ ਪਰਿ ਪਟਿ ਪਾਰੇ ਮਜ੍ਝੇ ਹੇਟ੍ਠੁਦ੍ਧਾਧੋ-ਨ੍ਤੋਵਾਛਟ੍ਠਿਯਾ. ਓਰਾਦਯੋ ਸਦ੍ਦਾ ਛਟ੍ਠਿਯਨ੍ਤੇਨ ਸਹੇਕਤ੍ਥਾ ਵਾ ਹੋਨ੍ਤਿ, ਏਕਾਰਨ੍ਤਤ੍ਤਂ ਨਿਪਾਤਨਤੋ, ਓਰੇਗਙ੍ਗਂ, ਪਰਿਸਿਖਰਂ, ਪਟਿਸੋਤਂ, ਪਾਰੇਯਮੁਨਂ, ਮਜ੍ਝੇਗਙ੍ਗਂ, ਹੇਟ੍ਠਾਪਾਸਾਦਂ, ਉਦ੍ਧਗਙ੍ਗਂ, ਅਧੋਗਙ੍ਗਂ, ਅਨ੍ਥੋਪਾਸਾਦਂ, ਪੁਨ ਵਾਵਿਧਾਨਾ ‘ਗਙ੍ਗਾਓਰ’ ਮਿਚ੍ਚਾਦੀਪਿ ਹੋਨ੍ਤਿ.
੯. ਤਂ ਨਪੁਂਸਕਂ.
ਯਦੇਤਮਤਿਕ੍ਕਨ੍ਤਮੇਕਤ੍ਥਂ, ਤਂ ਨਪੁਂਸਕਲਿਙ੍ਗਂ ਵੇਦਿਤਬ੍ਬਂ, ਤਥਾ ਚੇਵੋਦਾਹਟਂ, ਵਾ ਕ੍ਵਚਿ ਬਹੁਲਾਧਿਕਾਰਾ, ਯਥਾਪਰਿਸਂ ਯਥਾਪਰਿਸਾਯ, ਸਕਾਯ ਸਕਾਯ ਪਰਿਸਾਯਾਤਿ ਅਤ੍ਥੋ.
੧੦. ਅਮਾਦਿ.
ਅਮਾਦਿ ਸ੍ਯਾਦ੍ਯਨ੍ਤਂ ਸ੍ਯਾਦ੍ਯਨ੍ਤੇਨ ਸਹ ਬਹੁਲਮੇਕਤ੍ਥਂ ਹੋਤਿ ਗਾਮਂ ਗਤੋ ਗਾਮਗਤੋ, ਮੁਹੁਤ੍ਤਂ ਸੁਖਂ ਮੁਹੁਤ੍ਤਸੁਖਂ, ਵੁਤ੍ਤਿਯੇਵੋਪਪਦਸਮਾਸੇ ਕੁਮ੍ਭਕਾਰੋ, ਸਪਾਕੋ, ਤਨ੍ਤਵਾਯੋ, ਵਰਾਹਰੋ. ਨ੍ਤਮਾਨਕ੍ਤਵਨ੍ਤੂਤਿ ਵਾਕ੍ਯਮੇਵ, ਧਮ੍ਮਂ ਸੁਣਨ੍ਤੋ, ਧਮ੍ਮਂ ਸੁਣਮਾਨੋ, ਓਦਨਂ ਭੁਤ੍ਤਵਾ.
ਰਞ੍ਞਾ ਹਤੋ ਰਾਜਹਤੋ, ਅਸਿਨਾ ਛਿਨ੍ਨੋ ਅਸਿਚ੍ਛਿਨ੍ਨੋ, ਪਿਤੁਸਦਿਸੋ, ਪਿਤੁਸਮੋ, ਸੁਖਸਹਗਤਂ, ਦਧਿਨਾ ਉਪਸਿਤ੍ਤਂ ਭੋਜਨਂ ਦਧਿਭੋਜਨਂ, ਗੁਲ਼ੇਨ ਮਿਸ੍ਸੋ ਓਦਨੋ ਗੁਲ਼ੋਦਨੋ, ਵੁਤ੍ਤਿਪਦੇਨੇਵੋਪਸਿਤ੍ਤਾਦਿਕਿਰਿਯਾਯਾਖ੍ਯਾਪਨਤੋ ਨਤ੍ਥਾਯੁਤ੍ਤਤ੍ਥਤਾ. ਕ੍ਵਚਿ ਵੁਤ੍ਤਿਯੇਵ ਉਰਗੋ, ਪਾਦਪੋ. ਕ੍ਵਚਿ ਵਾਕ੍ਯਮੇਵ ਫਰਸੁਨਾ ਛਿਨ੍ਨਵਾ, ਦਸ੍ਸਨੇਨ ਪਹਾਤਬ੍ਬਾ.
ਬੁਦ੍ਧਸ੍ਸ ਦੇਯ੍ਯਂ ਬੁਦ੍ਧਦੇਯ੍ਯਂ, ਯੂਪਾਯ ਦਾਰੁ ਯੂਪਾਦਾਰੁ, ਰਜਨਾਯ ਦੋਣਿ ਰਜਨਦੋਣਿ. ਇਧ ਨ ਹੋਤਿ ਸਙ੍ਘਸ੍ਸ ਦਾਤਬ੍ਬਂ. ਕਥਂ ‘ਏਤਦਤ੍ਥੋ ਏਤਦਤ੍ਥਾ ਏਤਦਤ੍ਥ’ਨ੍ਤਿ? ਅਞ੍ਞਪਦਤ੍ਥੇ ਭਵਿਸ੍ਸਤਿ.
ਸਵਰੇਹਿ ਭਯਂ ਸਵਰਭਯਂ, ਗਾਮਨਿਗ੍ਗਤੋ, ਮੇਥੁਨਾਪੇਤੋ, ਕ੍ਵਚਿ ਵੁਤ੍ਤਿਯੇਵ ਕਮ੍ਮਜਂ, ਚਿਤ੍ਤਜਂ, ਇਧ ਨ ਹੋਤਿ ਰੁਕ੍ਖਾ ਪਤਿਤੋ.
ਰਞ੍ਞੋ ਪੁਰਿਸੋ ਰਾਜਪੁਰਿਸੋ. ਬਹੁਲਾਧਿਕਾਰਾ ਨ੍ਤਮਾਨਨਿਦ੍ਧਾਰਿਯਪੂਰਣਭਾਵਤਿਤ੍ਤਤ੍ਥੇਹਿ ਨ ਹੋਤਿ-ਮਮਾਨੁਕੁਬ੍ਬਂ, ਮਮਾਨੁਕੁਰੁਮਾਨੋ, ਗੁਨ੍ਨਂ ਕਣ੍ਹਾ ਸਮ੍ਪਨ੍ਨਖੀਰਤਮਾ, ਸਿਸ੍ਸਾਨਂ ਪਞ੍ਚਮੋ, ਪਟਸ੍ਸ ਸੁਕ੍ਕਤਾ, ਕ੍ਵਚਿ ਹੋਤੇਵ-ਵਤ੍ਤਮਾਨਸਾਮੀਪ੍ਯਂ, ਕਥਂ ‘ਬ੍ਰਾਹ੍ਮਣਸ੍ਸ ਸੁਕ੍ਕਾ ਦਨ੍ਤਾ’ਤਿ? ਸਾਪੇਕ੍ਖਤਾਯ ਨ ਹੋਤਿ. ਇਧ ਪਨ ਹੋਤੇਵ ‘ਚਨ੍ਦਨਗਨ੍ਧੋ, ਨਦਿਘੋਸੋ, ਕਞ੍ਞਾਰੂਪਂ, ਕਾਯਸਮ੍ਫਸ੍ਸੋ, ਫਲਰਸੋ’ਤਿ, ਫਲਾਨਂ ਤਿਤ੍ਤੋ, ਫਲਾਨਮਾਸਿਤੋ, ਫਸਾਨਂ ਸੁਹਿਤੋ.
ਬ੍ਰਾਹ੍ਮਣਸ੍ਸ ਉਚ੍ਚਂ ਗੇਹਨ੍ਤਿ ਸਾਪੇਕ੍ਖਤਾਯ ਨ ਹੋਤਿ, ‘ਰਞ੍ਞੋ ਪਾਟਲਿਪੁਤ੍ਤਕਸ੍ਸ ਧਨ’ਨ੍ਤਿ ਧਨਸਮ੍ਬਨ੍ਧੇ ਛਟ੍ਠੀਤਿ ਪਾਟਲਿਪੁਤ੍ਤਕੇਨ ਸਮ੍ਬਨ੍ਧਾਭਾਵਾ ਨ ਹੇਸ੍ਸਤਿ, ‘ਰਞ੍ਞੋ ਗੋ ਚ ਅਸ੍ਸੋ ਚ ਪੁਰਿਸੋ ਚਾ’ਤਿ ਭਿਨ੍ਨਤ੍ਥਤਾਯ ਵਾਕ੍ਯਮੇਵ, ‘ਰਞ੍ਞੋ ਗਵਾਸ੍ਸਪੁਰਿਸਾ ਰਾਜਗਵਾਸ੍ਸਪੁਰਿਸਾ’ਤਿ ਵੁਤ੍ਤਿ ਹੋਤੇਵੇਕਤ੍ਤਿਭਾਵੇ.
ਦਾਨੇ ਸੋਣ੍ਡੋ ਦਾਨਸੋਣ੍ਡੋ, ਧਮ੍ਮਰਤੋ, ਦਾਨਾਭਿਰਤੋ. ਕ੍ਵਚਿ ਵੁਤ੍ਤਿਯੇਵ ਕੁਚ੍ਛਿਸਯੋ, ਥਲਟ੍ਠੋ, ਪਙ੍ਕਜਂ, ਸਰੋਰੁਹਂ. ਇਧ ਨ ਹੋਤਿ ਭੋਜਨੇ ਮਤ੍ਤਞ੍ਞੁਤਾ, ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਾ, ਆਸਨੇ ਨਿਸਿਨ੍ਨੋ, ਆਸਨੇ ਨਿਸੀਦਿਤਬ੍ਬਂ.
੧੧. ਵਿਸੇਸਨਮੇਕਤ੍ਥੇਨ.
ਵਿਸੇਸਨਂ ਸ੍ਯਾਨ੍ਤਂ ਵਿਸੇਸ੍ਸੇਨ ਸ੍ਯਾਦ੍ਯਨ੍ਤੇਨ ਸਮਾਨਾਧਿਕਰਣੇਨ ਸਹੇਕਤ੍ਥਂ ਹੋਤਿ, ਨੀਲਞ੍ਚ ਤਂ ਉਪ੍ਪਲਞ੍ਚੇਤਿ ਨੀਲੁਪ੍ਪਲਂ, ਛਿਨ੍ਨਞ੍ਚ ਤਂ ਪਰੁਲ਼੍ਹਞ੍ਚੇਤਿ ਛਿਨ੍ਨਪਰਲ਼੍ਹਂ, ਸਤ੍ਥੀਵ ਸਤ੍ਥੀ, ਸਤ੍ਥੀ ਚ ਸਾ ਸਾਮਾ ਚੇਤਿ ਸਤ੍ਥਿਸਾਮਾ, ਸੀਹੋਵ ਸੀਹੋ, ਮੁਨਿ ਚ ਸੋ ਸੀਹੋ ਚੇਤਿ ਮੁਨਿਸੀਹੋ, ਸੀਲਮੇਵ ਧਨਂ ਸੀਲਧਨਂ.
ਕ੍ਵਚਿ ਵਾਕ੍ਯਮੇਵ ਪੁਣ੍ਣੋ ਮਨ੍ਤਾਣਿਪੁਤ੍ਤੋ, ਚਿਤ੍ਤੋ ਗਹਪਤਿ. ਕ੍ਵਚਿ ਵੁਤ੍ਤਿਯੇਵ ਕਣ੍ਹਸਪ੍ਪੋ, ਲੋਹਿਤਸਾਲਿ, ਵਿਸੇਸਨਨ੍ਤਿ ਕਿਂ? ਤਚ੍ਛਕੋ ਸਪ੍ਪੋ, ਏਕਤ੍ਥੇਨੇਤਿ ਕਿਂ? ਕਾਲ਼ਮ੍ਹਾ ਅਞ੍ਞੋ. ਕਥਂ ‘ਪਤ੍ਤਜੀਵਿਕੋ, ਆਪਨ੍ਨਜੀਵਿਕੋ, ਮਾਸਜਾਤੋ’ਤਿ? ਅਞ੍ਞਪਦਤ੍ਥੇ ਭਵਿਸ੍ਸਤਿ.
੧੨. ਨਞ.
ਨਞਿਚ੍ਚੇਤਂ ਸ੍ਯਾਦ੍ਯਨ੍ਤਂ ਸ੍ਯਾਦ੍ਯਨ੍ਤੇਨ ਸਹੇਕਤ੍ਥਂ ਹੋਤਿ, ਨ ਬ੍ਰਾਹ੍ਮਣੋ ਅਬ੍ਰਾਹ੍ਮਣੋ, ਬਹੁਲਾਧਿਕਾਰਤੋ ਅਸਮਤ੍ਥਤ੍ਥੇਹਿ, ਕੇਹਿਚਿ ਹੋਤਿ ‘ਅਪੁਨਗੇਯ੍ਯਾ ਗਾਥਾ, ਅਨੋਕਾਸਂ ਕਾਰੇਤ੍ਵਾ, ਅਮੂਲਾ ਮੂਲਂ ਗਨ੍ਤ੍ਵਾ. ਈਸਂਕਲ਼ਾਰੋ, ਈਸਂਪਿਙ੍ਗਲੋਤਿ ‘ਸ੍ਯਾਦਿ ਸ੍ਯਾਦਿਨੇ’ਤਿ ਸਮਾਸੋ, ਵਾਕ੍ਯਮੇਵ ਵਾਤਿਪ੍ਪਸਙ੍ਗਾਭਾਵਾ.
੧੩. ਕੁਪਾਦਯੋ ਨਿਚ੍ਚਮਸ੍ਯਾਦਿਵਿਧਿਮ੍ਹਿ.
ਕੁਸਦ੍ਦੋ ਪਾਦਯੋ ਚ ਸ੍ਯਾਦ੍ਯਨ੍ਤੇਨ ਸਹੇਕਤ੍ਥਾ ਹੋਨ੍ਤਿ ਨਿਚ੍ਚਂ ਸ੍ਯਾਦਿਵਿਧਿਵਿਸਯਤੋ-ਞਤ੍ਥ, ਕੁਚ੍ਛਿਤੋ ਬ੍ਰਾਹ੍ਮਣੋ ਕੁਬ੍ਰਾਹ੍ਮਣੋ, ਈਸਕਂ ਉਣ੍ਹਂ ਕਦੁਣ੍ਹਂ, ਪਨਾਯਕੋ, ਅਭਿਸੇਕੋ, ਪਕਰਿਤ੍ਵਾ, ਪਕਤਂ, ਦੁਪ੍ਪੁਰਿਸੋ, ਦੁਕ੍ਕਟਂ, ਸੁਪੁਰਿਸੋ, ਸੁਕਤਂ, ਅਭਿਤ੍ਥੁਤਂ, ਅਤਿਤ੍ਥੁਤਂ, ਆਕਲ਼ਾਰੋ, ਆਬਦ੍ਧੋ.
(੯) ‘‘ਪਾਦਯੋ ਗਤਾਦ੍ਯਤ੍ਥੇ ਪਠਮਾਯ’’. ਪਗਤੋ ਆਚਰਿਯੋ ਪਾਚਰਿਯੋ, ਪਨ੍ਤੇਵਾਸੀ.
(੧੦) ‘‘ਅਚ੍ਚਾਦਯੋ ਕਨ੍ਤਾਦ੍ਯਤ੍ਥੇ ਦੁਤਿਯਾਯ’’. ਅਤਿਕ੍ਕਨ੍ਤੋ ਮਞ੍ਚਮਤਿਮਞ੍ਚੋ, ਅਤਿਮਾਲੋ.
(੧੧) ‘‘ਅਵਾਦਯੋ ਕੁਟ੍ਠਾਦ੍ਯਤ੍ਥੇ ਤਤਿਯਾਯ’’. ਅਵਕੁਟ੍ਠਂ ਕੋਕਿਲਾਯ ਵਨਂ ਅਵਕੋਕਿਲਂ, ਅਵਮਯੂਰਂ.
(੧੨) ‘‘ਪਰਿਯਾਦਯੋ ਗਿਲਾਨਾਦ੍ਯਤ੍ਥੇ ਚਤੁਤ੍ਥਿਯਾ’’. ਪਰਿਗਿਲਾਨੋ ਅਜ੍ਝੇਨਾਯ ਪਰਿਯਜ੍ਝੇਨੋ.
(੧੩) ‘‘ਨ੍ਯਾਦਯੋ ਕਨ੍ਤਾਦ੍ਯਤ੍ਥੇ ਪਞ੍ਚਮਿਯਾ’’.
ਨਿਕ੍ਖਨ੍ਤੋ ਕੋਸਮ੍ਬਿਯਾ ਨਿਕ੍ਕੋਸਮ੍ਪਿ, ਅਸ੍ਯਾਦਿਵਿਧਿਮ੍ਹੀਤਿ ਕਿਂ? ਰੁਕ੍ਖਂ ਪਤਿ ਵਿਜ੍ਜੋਤਤੇ.
੧੪. ਚੀ ਕ੍ਰਿਯਤ੍ਥੇਹਿ.
ਚੀਪ੍ਪਚ੍ਚਯਨ੍ਤੋ ਕਿਰਿਯਤ੍ਥੇਹਿ ਸ੍ਯਾਦ੍ਯਨ੍ਤੇਹਿ ਸਹੇਕਤ੍ਥੋ ਹੋਤਿ, ਮਲਿਨੀਕਰਿਯ.
੧੫. ਭੂਸਨਾਦਰਾਨਾਦਰੇਸ੍ਵਲਂਸਾਸਾ.
ਭੂਸਨਾਦਿਸ੍ਵਤ੍ਥੇ ਸ੍ਵਲਮਾਦਯੋ ਸਦ੍ਦਾ ਕਿਰਿਯਤ੍ਥੇਹਿ ਸ੍ਯਾਦ੍ਯਨ੍ਤੇਹਿ ਸਹੇਕਤ੍ਥਾ ਹੋਨ੍ਤਿ, ਅਲਂਕਰਿਯ, ਸਕ੍ਕਚ੍ਚ, ਅਸਕ੍ਕਚ੍ਚ. ਭੂਸਨਾਦੀਸੂਤਿ ਕਿਂ? ਅਲਂਭੁਤ੍ਵਾ ਗਤੋ, ਸਕ੍ਕਤ੍ਵਾ ਗਤੋ, ਅਸਕ੍ਕਤ੍ਵਾ ਗਤੋ, ਪਰਿਯਤ੍ਤਂ ਸੋਭਨਮਸੋਭਨਨ੍ਤਿ ਅਤ੍ਥੋ.
੧੬. ਅਞ੍ਞੇ ਚ.
ਅਞ੍ਞੇ ਚ ਸਦ੍ਦਾ ਕਿਰਿਯਤ੍ਥੇਹਿ ਸ੍ਯਾਦ੍ਯਨ੍ਤੇਹਿ ਸਹ ਬਹੁਲਮੇਕਤ੍ਥਾ ਭਵਨ੍ਤਿ, ਪੁਰੋਭੂਯ, ਤਿਰੋਭੂਯ, ਤਿਰੋਕਰਿਯ, ਉਰਸਿਕਰਿਯ, ਮਨਸਿਕਰਿਯ, ਮਜ੍ਝੇਕਰਿਯ, ਤੁਣ੍ਹੀਭੂਯ.
੧੭. ਵਾਨੇਕਞ੍ਞਤ੍ਥੇ.
ਅਨੇਕਂ ਸ੍ਯਾਦ੍ਯਨ੍ਤਮਞ੍ਞਸ੍ਸ ਪਦਸ੍ਸਤ੍ਥੇ ਏਕਤ੍ਥਂ ਵਾ ਹੋਤਿ, ਬਹੂਨਿ ਧਨਾਨਿ ਯਸ੍ਸ ਸੋ ਬਹੁਧਨੋ, ਲਮ੍ਬਾ ਕਣ੍ਣਾ ਯਸ੍ਸ ਸੋ ਲਮ੍ਬਕਣ੍ਣੋ, ਵਜਿਰਂ ਪਾਣਿਮ੍ਹਿ ਯਸ੍ਸ ਸੋਯਂ ਵਜਿਰਪਾਣਿ, ਮਤ੍ਤਾ ਬਹਵੋ ਮਾਤਙ੍ਗਾ ਏਤ੍ਥ ਮਤ੍ਤਬਹੁਮਾਤਙ੍ਗਂ ਵਨਂ, ਆਰੁਲ਼੍ਹੋ ਵਾਨਰੋ ਯਂ ਰੁਕ੍ਖਂ ਸੋ ਆਰੁਲ਼੍ਹਵਾਨਰੋ, ਜਿਤਾਨਿ ਇਨ੍ਦ੍ਰਿਯਾਨਿ ਯੇਨ ਸੋ ਜਿਤਿਨ੍ਦ੍ਰਿਯੋ, ਦਿਨ੍ਨਂ ਭੋਜਨਂ ਯਸ੍ਸ ਸੋ ਦਿਨ੍ਨਭੋਜਨੋ, ਅਪਗਤਂ ਕਾਲ਼ਕਂ ਯਸ੍ਮਾ ਪਟਾ ਸੋ-ਯਮਪਗਤਕਾਲ਼ਕੋ, ਉਪਗਤਾ ਦਸ ਯੇਸਂ ਤੇ ਉਪਦਸਾ, ਆਸਨ੍ਨਦਸਾ, ਅਦੂਰਦਸਾ, ਅਧਿਕਦਸਾ, ਤਯੋ ਦਸ ਪਰਿਮਾਣਮੇਸਂ ਤਿਦਸਾ, ਕਥਂ ਦਸਸਦ੍ਦੋ ਸਙ੍ਖ੍ਯਾਨੇ ਵਤ੍ਤਤੇ? ਪਰਿਮਾਣਸਦ੍ਦਸਨ੍ਨਿਧਾਨਾ, ਯਥਾ ਪਞ੍ਚ ਪਰਿਮਾਣਮੇਸਂ ਪਞ੍ਚਕਾ ਸਕੁਨਾਤਿ, ਦ੍ਵੇ ਵਾ ਤਯੋ ਵਾ ਪਰਿਮਾਣਮੇਸਂ ਦ੍ਵਤ੍ਤਯੋ ਵਾਸਦ੍ਦਤ੍ਥੇ ਵਾ ਦ੍ਵੇ ਵਾ ਤਯੋ ਵਾ ਦ੍ਵਤ੍ਤਯੋ.
ਦਕ੍ਖਿਣਸ੍ਸਾ ਚ ਪੁਬ੍ਬਸ੍ਸਾ ਚ ਦਿਸਾਯ ਯਦਨ੍ਤਰਾਲ਼ਂ ਦਕ੍ਖਿਣਪੁਬ੍ਬਾ ਦਿਸਾ, ਦਕ੍ਖਿਣਾ ਚ ਸਾ ਪੁਬ੍ਬਾ ਚਾਤਿ ਵਾ, ਸਹ ਪੁਤ੍ਤੇਨਾਗਤੋ ਸਪੁਤ੍ਤੋ, ਸਲੋਮਕੋ ਵਿਜ੍ਜਮਾਨਲੋਮਕੋਤਿ ਅਤ੍ਥੋ, ਏਵਂ ਸਪਕ੍ਖਕੋ, ਅਤ੍ਥੀ ਖੀਰਾ ਬ੍ਰਾਹ੍ਮਣੀਤਿ ਅਤ੍ਥਿਸਦ੍ਦੋ ਵਿਜ੍ਜਮਾਨਤ੍ਥੇ ਨਿਪਾਤੋ, ਕ੍ਵਚਿ ਗਤਤ੍ਥਤਾਯ ਪਦਨ੍ਤਰਾਨਮਪ੍ਪਯੋਗੋ, ਕਣ੍ਠਟ੍ਠਾ ਕਾਲ਼ਾ ਅਸ੍ਸ ਕਣ੍ਠੇਕਾਲ਼ੋ, ਓਟ੍ਠਸ੍ਸ ਮੁਖਮਿਵ ਮੁਖਮਸ੍ਸ ਓਟ੍ਠਮੁਖੋ, ਕੇਸਸਙ੍ਘਾਤੋ ਚੂਲ਼ਾ ਅਸ੍ਸ ਕੇਸਚੂਲ਼ੋ, ਸੁਵਣ੍ਣਵਿਕਾਰੋ ਅਲਙ੍ਕਾਰੋ ਅਸ੍ਸ ਸੁਵਣ੍ਣਾਲਙ੍ਕਾਰੋ, ਪਪਤਿਤਂ ਪਣ੍ਣਮਸ੍ਸ ਪਪਤਿਤਪਣ੍ਣੋ, ਪਪਣ੍ਣੋ, ਅਵਿਜ੍ਜਮਾਨਾ ਪੁਤ੍ਤਾ ਅਸ੍ਸ ਅਵਿਜ੍ਜਮਾਨਪੁਤ੍ਤੋ, ਨ ਸਨ੍ਤਿ ਪੁਤ੍ਤਾ ਅਸ੍ਸ ਅਪੁਤ੍ਤੇ, ਕ੍ਵਚਿ ਨ ਹੋਤਿ ਪਞ੍ਚ ਭੁਤ੍ਤਵਨ੍ਤੋ ਅਸ੍ਸ ਭਾਤੁਨੋ ਪੁਤ੍ਤੋ ਅਸ੍ਸ ਅਤ੍ਥੀਤਿ ਬਹੁਲਾਧਿਕਾਰਤੋ.
੧੮. ਤਤ੍ਥ ਗਹੇਤ੍ਵਾ ਤੇਨ ਪਹਰਿਤ੍ਵਾ ਯੁਦ੍ਧੇ ਸਰੂਪਂ.
ਸਤ੍ਤਮ੍ਯਨ੍ਤਂ ਤਤਿਯਨ੍ਤਞ੍ਚ ਸਰੂਪਮਨੇਕਂ ਤਤ੍ਥ ਗਹੇਤ੍ਵਾ ਤੇਨ ਪਹਰਿਤ੍ਵਾ ਯੁਦ੍ਧੇ-ਞ੍ਞਪਦਤ੍ਥੇ ਏਕਤ੍ਥਂ ਵਾ ਹੋਤਿ, ਕੇਸੇਸੁ ਚ ਕੇਸੇਸੁ ਚ ਗਹੇਤ੍ਵਾ ਯੁਦ੍ਧਂ ਪਵਤ੍ਤਂ ਕੇਸਾਕੇਸਿ, ਦਣ੍ਡੇਹਿ ਚ ਦਣ੍ਡੇਹਿ ਚ ਪਹਰਿਤ੍ਵਾ ਯੁਦ੍ਧਂ ਪਵਤ੍ਤਂ ਦਣ੍ਡਾਦਣ੍ਡਿ, ਮੁਟ੍ਠਾਮੁਟ੍ਠਿ, ‘‘ਚਿ ਵੀਤਿਯਾਰੇ’’ (੩-੫੧) ਤਿ ਚਿ ਸਮਾਸਨ੍ਤੋ, ‘‘ਚਿਸ੍ਮਿਂ’’ (੩.੬੬) ਤਿ ਅਕਾਰੋ. ਤਤ੍ਥ ਤੇਨੇਤਿ ਕਿਂ? ਕਾਯਞ੍ਚ ਕਾਯਞ੍ਚ ਗਹੇਤ੍ਵਾ ਯੁਦ੍ਧਂ ਪਵਤ੍ਤਂ. ਗਹੇਤ੍ਵਾ ਪਹਰਿਤ੍ਵਾਤਿ ਕਿਂ? ਰਥੇ ਚ ਰਥੇ ਚ ਠਤ੍ਵਾ ਯੁਦ੍ਧਂ ਪਵਤ੍ਤਿ. ਯੁਦ੍ਧੇਤਿ ਕਿਂ? ਹਤ੍ਥੇ ਚ ਹਤ੍ਥੇ ਚ ਗਹੇਤ੍ਵਾ ਸਖ੍ਯਂ ਪਵਤ੍ਤਂ. ਸਰੂਪਨ੍ਤਿ ਕਿਂ? ਦਣ੍ਡੇਹਿ ਚ ਮੁਸਲੇਹਿ ਚ ਪਹਰਿਤ੍ਵਾ ਯੁਦ੍ਧ ਪਵਤ੍ਤਂ.
੧੯. ਚਤ੍ਥੇ.
ਅਨੇਕਂ ਸ੍ਯਾਦ੍ਯਨ੍ਤਂ ਚਤ੍ਥੇ ਏਕਤ੍ਥਂ ਵਾ ਭਵਤਿ. ਸਮੁਚ੍ਚਯੋਨ੍ਵਾਚਯੋ ਇਤਰੀਤਰਯੋਗੋ ਸਮਾਹਾਰੋ ਚ ਚ ਸਦ੍ਦਤ੍ਥਾ, ਤਤ੍ਥ ਸਮੁਚ੍ਚਯਾਨ੍ਵਾਚਯੇਸੁ ਨੇਕਤ੍ਥੀਭਾਵੋ ਸਮ੍ਭਵਤਿ, ਤੇਸੁ ਹਿ ਸਮੁਚ੍ਚਯੋ ਅਞ੍ਞਮਞ੍ਞਨਿਰਪੇਕ੍ਖਾ ਨਮਤ੍ਤਪ੍ਪਧਾਨਾਨਂ ਕਤ੍ਥਚਿ ਕਿਰਿਯਾਵਿਸੇਸੇ ਚੀਯਮਾਨਤਾ, ਯਥਾ ‘ਧਵੇ ਚ ਖਦਿਰੇ ਚ ਪਲਾਸੇ ਚ ਛਿਨ੍ਦਾ’ਤਿ. ਅਨ੍ਵਾਚਯੋ ਚ ਯਤ੍ਥੇਕੋ ਪਧਾਨਭਾਵੇਨ ਵਿਧੀਯਤੇ ਅਪਰੋ ਚ ਗੁਣਭਾਵੇਨ, ਯਥਾ ‘ਭਿਕ੍ਖਞ੍ਚਰ ਗਾਵੋ ਚਾਨਯੇ’ਤਿ. ਇਤਰਦ੍ਵਯੇ ਤੁ ਸਮ੍ਭਵਤਿ, ਤੇਸੁ ਹਿ ਅਞ੍ਞਮਞ੍ਞਸਾਪੇਕ੍ਖਾਨਮਵਯਵਭਦਾਨੁਗਤੋ ਇਤਰੀਤਰਯੋਗੋ, ਯਥਾ ‘ਸਾਰਿਪੁਤ੍ਤਮੋਗ੍ਗਲ੍ਲਾਨਾ’ਤਿ, ਅਸ੍ਸਾਵਯਵਪ੍ਪਧਾਨਤ੍ਤਾ ਬਹੁਵਚਨਮੇਵ. ਅਞ੍ਞਮਞ੍ਞਸਾਪੇਕ੍ਖਾਨਮੇਵ ਤਿਰੋਹਿਤਾਵਯਵਭੇਦੋ ਸਮੁਦਾਯਪ੍ਪਧਾਨੋ ਸਮਾਹਾਰੋ, ਯਥਾ ‘ਛਤ੍ਤੁਪਾਹਨ’ਨ੍ਤਿ, ਅਸ੍ਸ ਪਨ ਸਮੁਦਾਯਪ੍ਪਧਾਨਤ੍ਤਾ ਏਕਵਚਨਮੇਵ.
ਤੇ ਚ ਸਮਾਹਾਰੀਤਰੀਤਰਯੋਗਾ ਬਹੁਲਂ ਵਿਧਾਨਾ ਨਿਯਤਵਿਸਯਾਯੇਵ ਹੋਨ੍ਤਿ, ਤਤ੍ਰਾਯਂ ਵਿਸਯਵਿਭਾਗੋ ਨਿਰੁਤ੍ਥਿਪਿਟਕਾਗਤੋ-ਪਾਣਿਤੂਰਿਯਯੋਗ੍ਗਸੇਨਙ੍ਗਾਨਂ, ਨਿਚ੍ਚਵੇਰੀਨਂ, ਸਙ੍ਖ੍ਯਾਪਰਿਮਾਣ-ਸਞ੍ਞਾਨਂ, ਖੁਦ੍ਦਜਨ੍ਤੁਕਾਨਂ, ਪਚਨਚਣ੍ਡਾਲਾਨਂ, ਚਰਣਸਾਧਾਰਣਾਨਂ, ਏਕਜ੍ਝਾਯਨਪਾਵਚਨਾਨਂ, ਲਿਙ੍ਗਵਿਸੇਸਾਨਂ, ਵਿਵਿਧਵਿਰੁਦ੍ਧਾਨਂ ਦਿਸਾਨਂ, ਨਦੀਨਞ੍ਚ ਨਿਚ੍ਚਂ ਸਮਾਹਾਰੇਕਤ੍ਤਂ ਭਵਤਿ, ਤਿਣਰੁਕ੍ਖਪਸੁਸਕੁਨਧਨਧਞ੍ਞਬ੍ਯਞ੍ਜਨਜਨਪ੍ਪਦਾਨਂ ਵਾ, ਅਞ੍ਞੇਸਮਿਤਰੀਤਰਯੋਗੋਵ.
ਪਾਣ੍ਯਙ੍ਗਾਨਂ-ਚਕ੍ਖੁਸੋਤਂ, ਮੁਖਨਾਸਿਕਂ, ਹਨੁਗੀਵਂ, ਛਵਿਮਂਸਲੋਹਿਤਂ, ਨਾਮਰੂਪਂ, ਜਰਾਮਰਣਂ. ਤੁਰਿਯਙ੍ਗਾਨਂ-ਅਲਸਤਾਲਮ੍ਬਰਂ, ਮੁਰਜਗੋਮੁਖਂ, ਸਙ੍ਖਦੇਣ੍ਡਿਮਂ, ਮਦ੍ਦਵਿਕਪਾਣਵਿਕਂ, ਗੀਤਵਾਦਿਤਂ, ਸਮ੍ਮਤਾਲਂ. ਯੋਗ੍ਗਙ੍ਗਾਨਂ ਫਾਲਪਾਚਨਂ, ਯੁਗਨਙ੍ਗਲਂ. ਸੇਨਙ੍ਗਾਨਂ-ਅਸਿਸਤ੍ਤਿਤੋਮਰਪਿਣ੍ਡਂ, ਅਸਿਚਮ੍ਮਂ, ਧਨੁਕਲਾਪਂ, ਪਹਰਣਾਵਰਣਂ. ਨਿਚ੍ਚਵੇਰੀਨਂ-ਅਹਿਨਕੁਲਂ, ਬੀਲ਼ਾਲਮੂਸਿਕਂ, ਕਾਕੋਲੂਕਂ, ਨਾਗਸੁਪਣ੍ਣਂ. ਸਙ੍ਖ੍ਯਾਪਰਿਮਾਣ ਸਞ੍ਞਾਨਂ-ਏਕਕਦੁਕਂ, ਦੁਕਤਿਕਂ, ਤਿਕਚਤੁਕ੍ਕਂ, ਚਤੁਕ੍ਕਪਞ੍ਚਕਂ, ਦਸੇਕਾਦਸਕਂ. ਖੁਦ੍ਦਜਨ੍ਤੁਕਾਨਂ ਕੀਟਪਟਙ੍ਗਂ, ਕੁਨ੍ਥਕਿਪਿਲ੍ਲਿਕਂ, ਡਂਸਮਕਸਂ, ਮਕ੍ਖਿਕਕਿਪਿਲ੍ਲਿਕਂ. ਪਚਨਚਣ੍ਡਾਲਾਨਂ-ਓਰਬ੍ਭਿਕਸੂਕਰਿਕਂ, ਸਾਕੁਨ੍ਤਿ ਕਮਾਗਵਿਕਂ, ਸਪਾਕਚਣ੍ਡਾਲਂ, ਵੇਨਰਥਕਾਰਂ, ਪੁਕ੍ਕੁਸ ਛਵਡਾਹਕਂ. ਚਰਣਸਾਧਾਰਣਾਨਂ-ਅਤਿਸਭਾਰਦ੍ਵਾਜਂ, ਕਠਕਲਾਪਂ, ਸੀਲਪਞ੍ਞਾਣਂ, ਸਮਥਵਿਪਸ੍ਸਨਂ, ਵਿਜ੍ਜਾਚਰਣਂ. ਏਕਜ੍ਝਾਯਨਪਾਵਚਨਾਨਂ ਦੀਘਮਜ੍ਝਿਮਂ, ਏਕੁਤ੍ਤਰਸਂਯੁਤ੍ਤਕਂ, ਖਨ੍ਧਕਵਿਭਙ੍ਗਂ. ਲਿਙ੍ਗਵਿਸੇਸਾਨਂ-ਇਤ੍ਥਿਪੁਖਂ, ਦਾਸਿਦਾਸਂ, ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਂ, ਤਿਣਕਟ੍ਠਸਾਖਾਪਲਾਸਂ, ‘ਲਾਭੀ ਹੋਤਿ ਚੀਵਰਪਿਣ੍ਡਪਾਤਸੇਨਾ- ਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾਨ’ਨ੍ਤਿਪਿ ਦਿਸ੍ਸਤਿ. ਵਿਵਿਧਵਿਰੁਦ੍ਧਾਨਂ ਕੁਸਲਾਕੁਸਲਂ, ਸਾਵਜ੍ਜਾਨਵਜ੍ਜਂ, ਹੀਨਪ੍ਪਣੀਤਂ, ਕਣ੍ਹਸੁਕ੍ਕਂ, ਛੇਕਪਾਪਕਂ. ਦਿਸਾਨਂ ਪੁਬ੍ਬਾਪਰਂ, ਦਕ੍ਖਿਣੁਤ੍ਤਰਂ, ਪੁਬ੍ਬਦਕ੍ਖਿਣਂ, ਪੁਬ੍ਬੁਤ੍ਤਰਂ, ਅਧਰੁਤ੍ਤਰਂ, ਅਪਰਦਕ੍ਖਿਣਂ, ਅਪਰੁਤ੍ਤਰਂ. ਨਦੀਨਂ-ਗਙ੍ਗਾਯਮੁਨਂ, ਮਹਿਸਰਭੁ.
ਤਿਣਵਿਸੇਸਾਨਂ-ਕਾਸਕੁਸਂ ਕਾਸਕੁਸਾ, ਉਸੀਰਬੀਰਣਂ ਉਸੀਰਬੀਰਣਾ, ਮੁਞ੍ਜਪਬ੍ਬਜਂ ਮੁਞ੍ਜਪਬ੍ਬਜਂ ਮੁਞ੍ਜਪਬ੍ਬਜਾ. ਰੁਕ੍ਖਵਿਸੇਸਾਨਂ ਖਦਿਰਪਲਾਸਂ ਖਦਿਰਪਲਾਸਾ, ਵੋਸ੍ਸਕਣ੍ਣਂ ਧਵਾਸ੍ਸਕਣ੍ਣਾ, ਪਿਲਕ੍ਖਨਿਗ੍ਰੋਧਂ ਪਿਲਕ੍ਖਨਿਗ੍ਰੋਧਾ, ਅਸ੍ਸਤ੍ਥਕਪਿਤ੍ਥਨਂ ਅਸ੍ਸਤ੍ਥਕਪਿਤ੍ਥਨਾ, ਸਾਕਸਾਲਂ ਸਾਕਸਾਲਾ. ਪਸੁਵਿਸੇਸਾਨਂ-ਗਜਗਵਜਂ ਗਜਗਵਜਾ, ਗੋਮਹਿਸਂ ਗੋਮਹਿਸਾ, ਏਣੇਯ੍ਯਗੋਮਹਿਸਂ ਏਣੇਯ੍ਯਗੋਮਹਿਸਾ, ਏਣੇਯ੍ਯਵਰਾਹਂ ਏਣੇਯ੍ਯਵਰਾਹਾ, ਅਜੇਲ਼ਕਂ ਅਜੇਲ਼ਕਾ, ਕੁਕ੍ਕੁਰਸੂਕਰਂ ਕੁਕ੍ਕੁਰਸੂਕਰਾ, ਹਤ੍ਥਿਗਵਾਸ੍ਸਵਲ਼ਵਂ ਹਤ੍ਥਿਗਵਾਸ੍ਸਵਲ਼ਵਾ. ਸਕੁਨਵਿਸੇਸਾਨਂ-ਹਂਸਬਲਾਵਂ ਹਂਸਬਲਾਵਾ, ਕਾਰਣ੍ਡਵਚਕ੍ਕਵਾਕਂ ਕਾਰਣ੍ਡਵਚਕ੍ਕਵਾਕਾ, ਬਕਬਲਾਕਂ ਬਕਬਲਾਕਾ. ਧਨਾਨਂ-ਹਿਰਞ੍ਞਸੁਵਣ੍ਣਂ ਹਿਰਞ੍ਞਸੁਵਣ੍ਣਾ, ਮਣਿਸਙ੍ਖਮੁਤ੍ਤਾਵੇਲ਼ੁਰਿਯਂ ਮਣਿਸਙ੍ਖਮੁਤ੍ਤਾਵੇਲ਼ੁਰਿਯਾ, ਜਾਤਰੂਪਰਜਤਂ ਜਾਤਰੂਪਰਜਤਾ. ਧਞ੍ਞਾਨਂ-ਸਾਲਿਯਵਕਂ ਸਾਲਿਯਵਕਾ, ਤਿਲਮੁਗ੍ਗਮਾਸਂ ਤਿਲਮੁਗ੍ਗਮਾਸਾ, ਨਿਪ੍ਫਾਵਕੁਲਤ੍ਥਂ ਨਿਪ੍ਫਾਵਕੁਲਤ੍ਥਾ. ਬ੍ਯਞ੍ਜਨਾਨਂ-ਸਾਕਸੁਵਂ ਸਾਕਸੁਵਾ, ਗਬ੍ਯਮਾਹਿਸਂ ਗਬ੍ਯਮਾਹਿਸਾ, ਏਣੇਯ੍ਯਵਾਰਾਹਂ ਏਣੇਯ੍ਯਵਾਰਾਹਾ, ਮਿਗਮਾਯੂਰਂ ਮਿਗਮਾਯੂਰਾ. ਜਨਪਦਾਨਂ-ਕਾਸਿਕੋਸਲਂ ਕਾਸਿਕੋਸਲਾ, ਵਜ੍ਜਿਮਲ੍ਲਂ ਵਜ੍ਜਿਮਲ੍ਲਾ, ਚੇਤਿਵਂਸਂ ਚੇਤਿਵਂਸਾ, ਮਚ੍ਛਸੂਰਸੇਨਂ ਮਚ੍ਛਸੂਰਸੇਨਾ, ਕੁਰੁਪਞ੍ਚਾਲਂ ਕੁਰੁਪਞ੍ਚਾਲਾ. ਇਤਰੀਤਰਯੋਗੋ ਯਥਾ-ਚਨ੍ਦਿਮਸੂਰਿਯਾ, ਸਮਣਬ੍ਰਾਹ੍ਮਣਾ ਮਾਤਾਪਿਤਰੋ ਇਚ੍ਚਾਦਿ.
ਏਤਸ੍ਮਿਂ ਏਕਤ੍ਥੀਭਾਵਕਣ੍ਡੇ ਯਂ ਵੁਤ੍ਤਂ ਪੁਬ੍ਬਂ, ਤਦੇਵ ਪੁਬ੍ਬਂ ਨਿਪਤਤਿ ਕਮਾਤਿਕ੍ਕਮੇ ਪਯੋਜਨਾਭਾਵਾ. ਕ੍ਵਚਿ ਵਿਪਲ੍ਲਾਸੋਪਿ ਹੋਤਿ ਬਹੁਲਾਧਿਕਾਰਤੋ, ਦਨ੍ਤਾਨਂ ਰਾਜਾ ਰਾਜਦਨ੍ਤੋ, ਕਤ੍ਥਚਿ ਕਮਂ ਪਚ੍ਚਾਨਾਦਰਾ ਪੁਬ੍ਬਕਾਲਸ੍ਸਾਪਿ ਪਰਨਿਪਾਤੋ, ਲਿਤ੍ਤਵਾਸਿਤੋ, ਨਗ੍ਗਮੁਸਿਤੋ, ਸਿਤ੍ਤਸਮ੍ਮਟ੍ਠੋ, ਭਟ੍ਠਲੁਞ੍ਚਿਤੋ. ਚਤ੍ਥੇ ਯਦੇਕਤ੍ਥਂ ਤਤ੍ਥ ਕੇਚਿ ਪੁਬ੍ਬਪਦਂ ਬਹੁਧਾ ਨਿਯਮੇਨ੍ਤਿ, ਤਦਿਹ ਬ੍ਯਭਿਚਾਰਦਸ੍ਸਾਨ ਨ ਵੁਤ੍ਤਨ੍ਤਿ ਦਟ੍ਠਬ੍ਬਂ.
੨੦. ਸਮਾਹਾਰੇ ਨਪੁਂਸਕਂ.
ਚਤ੍ਥੇ ਸਮਾਹਾਰੇ ਯਦੇਕਤ੍ਥਂ, ਤਂ ਨਪੁਂਸਕਲਿਙ੍ਗਂ ਭਵਤਿ, ਤਥਾਚੇਵੋਦਾਹਟਂ, ਕਤ੍ਥਚਿ ਨ ਹੋਤਿ ‘ਸਭਾਪਰਿਸਾਯਾ’ਤਿ ਞਾਪਕਾ, ਆਧਿਪਚ੍ਚਪਰਿਵਾਰੋ, ਛਨ੍ਦਪਾਰਿਸੁਦ੍ਧਿ, ਪਟਿਸਨ੍ਧਿਪਵਤ੍ਤਿਯਂ.
੨੧. ਸਙ੍ਖ੍ਯਾਦਿ.
ਏਕਤ੍ਥੇ ਸਮਾਹਾਰੇ ਸਙ੍ਖ੍ਯਾਦਿ ਨਪੁਂਸਕਲਿਙ੍ਗਂ ਭਵਤਿ, ਪਞ੍ਚਗਵਂ, ਚਤੁਪ੍ਪਥਂ, ਸਮਾਹਾਰਸ੍ਸੇਕਤ੍ਤਾ ਏਕਵਚਨਮੇਵ ਹੋਤਿ, ਸਮਾਹਾਰੇਤ੍ਵੇਵ ਪਞ੍ਚਕਾਪਾਲੋ ਪੂਵੋ, ਤਿਪੁਤ੍ਤੋ.
੨੨. ਕ੍ਵਚੇਕਤ੍ਤਞ੍ਚ ਛਟ੍ਠਿਯਾ.
ਛਟ੍ਠਿਯੇਕਤ੍ਥੇ ਕ੍ਵਚਿ ਨਪੁਂਸਕਤ੍ਤਂ ਹੋਤੇਕਤ੍ਥਞ੍ਚ, ਸਲਭਾਨਂ ਛਾਯਾ ਸਲਭਚ੍ਛਾਯਂ, ਏਵਂ ਸਕੁਨ੍ਤਾਨਂ ਛਾਯਾ ਸਕੁਨ੍ਤਚ੍ਛਾਯਂ, ਪਾਸਾਦਚ੍ਛਾਯਂ ਪਾਸਾਦਚ੍ਛਾਯਾ, ਘਰਚ੍ਛਾਯਂ ਘਰਚ੍ਛਾਯਾ, ਅਮਨੁਸ੍ਸਸਭਾਯ ਨਪੁਂਸਕੇਕਤ੍ਤਂ ਭਵਤਿ ਬ੍ਰਹ੍ਮਸਭਂ, ਦੇਵਸਭਂ, ਇਨ੍ਦਸਭਂ, ਯਕ੍ਖਸਭਂ, ਸਰਭਸਭਂ, ਮਨੁਸ੍ਸਸਭਾਯਂ ਪਨ ਖਤ੍ਤਿਯਸਭਾ, ਰਾਜਸਭਾ ਇਚ੍ਚੇਵਮਾਦਿ, ਕ੍ਵਚੀਤਿ ਕਿਂ ਰਾਜਪੁਰਿਸੋ.
੨੩. ਸ੍ਯਾਦੀਸੁ ਰਸ੍ਸੋ.
ਨਪੁਂਸਕੇ ਵਤ੍ਤਮਾਨਸ੍ਸ ਰਸ੍ਸੋ ਹੋਤਿ ਸ੍ਯਾਦੀਸੁ. ਸਲਭਚ੍ਛਾਯਂ, ਸ੍ਯਾਦੀਸੂਤਿ ਕਿਂ? ਸਲਭਚ੍ਛਾਯੇ.
੨੪. ਘਪਸ੍ਸਨ੍ਤਸ੍ਸਾਪ੍ਪਧਾਨਸ੍ਸ.
ਅਨ੍ਤਭੂਤਸ੍ਸ ਅਪ੍ਪਧਾਨਸ੍ਸ ਘਪਸ੍ਸ ਸ੍ਯਾਦੀਸੁ ਰਸ੍ਸੋ ਹੋਤਿ. ਬਹੁਮਾਲੋ ਪੋਸੋ, ਨਿਕ੍ਕੋਸਮ੍ਬਿ, ਅਤਿਵਾਮੋਰੁ, ਅਨ੍ਤਸ੍ਸਾਤਿ ਕਿਂ? ਰਾਜਾ ਕਞ੍ਞਾਪਿਯੋ, ਅਪ੍ਪਧਾਨਸ੍ਸਾਤਿ ਕਿਂ? ਰਾਜਕੁਮਾਰੀ ਬ੍ਰਹ੍ਮਬਨ੍ਧੂ.
੨੫. ਗੋਸ੍ਸੁ.
ਅਨ੍ਤਭੂਤਸ੍ਸ ਅਪ੍ਪਧਾਨਸ੍ਸ ਗੋਸ੍ਸ ਸ੍ਯਾਦੀਸੁ ਉ ਹੋਤਿ. ਚਿਤ੍ਤਗੁ, ਅਪ੍ਪਧਾਨਸ੍ਸਾਤ੍ਵੇਵ? ਸੁਗੋ, ਅਨ੍ਤਸ੍ਸਾਤ੍ਵੇਵ? ਗੋਕੁਲਂ.
੨੬. ਇਤ੍ਥਿਯਮਤ੍ਵਾ.
ਇਤ੍ਥਿਯਂ ਵਤ੍ਤਮਾਨਤੋ ਅਕਾਰਨ੍ਤਤੋ ਨਾਮਸ੍ਮਾ ਆਪਚ੍ਚਯੋ ਹੋਤਿ. ਧਮ੍ਮਦਿਨ੍ਨਾ.
੩੭. ਨਦਾਦਿਤੋ ਵੀ.
ਨਦਾਦੀਹਿ ਇਤ੍ਥਿਯਂ ਵੀਪ੍ਪਚ੍ਚਯੋ ਹੋਤਿ. ਨਦੀ, ਮਹੀ, ਕੁਮਾਰੀ, ਤਰੁਣੀ, ਵਾਰੁਣੀ, ਗੋਤਮੀ. (੧੪) ‘‘ਗੋਤੋਵਾ’’ ਗਾਵੀ ਗੋ, ਆਕਤਿਗਣੋ-ਯਂ, ਕੋਰੋ ‘‘ਨ੍ਤਨ੍ਤੂਨਂ ਵੀਮ੍ਹਿ ਤੋ ਵਾ’’ (੩-੩੬) ਤਿ ਵਿਸੇਸਨਤ੍ਥੋ.
੨੮. ਯਕ੍ਖਾਦਿਤਿਨੀ ਚ.
ਯਕ੍ਖਾਦਿਤੋ ਇਤ੍ਥਿਯਂ ਇਨੀ ਹੋਤਿ ਵੀਚ. ਯਕ੍ਖਿਨੀ ਯਕ੍ਖੀ, ਨਾਗਿਨੀ ਨਾਗੀ, ਸੀਹਿਨੀ ਸੀਹੀ.
੨੬. ਆਰਾਮਿਕਾਦੀਹਿ.
ਆਰਾਮਿਕਾਦਿਤੋ ਇਨੀ ਹੋਤਿਤ੍ਥਿਯਂ. ਆਰਾਮਿਕਿਨੀ, ਅਨਨ੍ਤਰਾਯਿਕਿਨੀ, ਰਾਜਿਨੀ (੧੫) ‘‘ਸਞ੍ਞਾਯਂ ਮਾਨੁਸੋ’’ ਮਾਨੁਸਿਨੀ, ਅਞ੍ਞਤ੍ਰ ਮਾਨੁਸੀ.
੩੦. ਯੁਵਣ੍ਣੇਹਿ ਨੀ.
ਇਤ੍ਥਿਯਮਿਵਣ੍ਣੁਵਣ੍ਣਨ੍ਤੇਹਿ ਨੀ ਹੋਤਿ ਬਹੁਲਂ. ਸਦਾਪਯਤਪਾਣਿਨੀ, ਦਣ੍ਡਿਨੀ, ਭਿਕ੍ਖੁਨੀ, ਖਤ੍ਤਬਨ੍ਧੁਨੀ, ਪਰਚਿਤ੍ਤਵਿਦੁਨੀ, ਮਾਤੁਆਦਿਤੋ ਕਸ੍ਮਾ ਨ ਹੋਤਿ? ਇਤ੍ਥਿਪ੍ਪਚ੍ਚਯਂ ਵਿਨਾਪਿ ਇਤ੍ਥਤ੍ਤਾਭਿਧਾਨਤੋ.
੩੧. ਕ੍ਤਿਮ੍ਹਾਞ੍ਞਤ੍ਥੇ.
ਕ੍ਤਿਮ੍ਹਾਞ੍ਞਤ੍ਥੇਯੇਵ ਇਤ੍ਥਿਯਂ ਨੀ ਹੋਤਿ ਬਹੁਲਂ. ਸਾਹਂ ਅਹਿਂ ਸਾਰਤਿਨੀ, ਤਸ੍ਸਾ ਮੁਟ੍ਠਸ੍ਸਤਿਨਿਯਾ, ਸਾ ਗਾਵੀ ਵਚ੍ਛਗਿਦ੍ਧਿਨੀ, ਅਞ੍ਞਤ੍ਥੇਤਿ ਕਿਂ? ਧਮ੍ਮਰਤਿ.
੩੨. ਘਰਣ੍ਯਾਦਯੋ.
ਘਰਣਿਪ੍ਪਭੁਤਯੋ ਨੀਪ੍ਪਚ੍ਚਨ੍ਤਾਸਾਧਵੋ ਭਵਨ੍ਤਿ. ਘਰਣੀ, ਪੋਕ੍ਖਰਣੀ, ਈਸ੍ਸ-ਤ੍ਤਂ ਨਿਪਾਤਨਾ, (੧੬) ‘‘ਆਚਰਿਯਾ ਵਾ ਯ-ਲੋਪੋ ਚ’’ ਆਚਰਿਨੀ, ਆਚਰਿਯਾ.
੩੩. ਮਾਤੁਲਾਦਿਤ੍ਵਾਨੀ ਭਰਿਯਾਯਂ.
ਮਾਤੁਲਾਦਿਤੋ ਭਰਿਯਾਯਮਾਨੀ ਹੋਤਿ. ਮਾਤੁਲਾਨੀ, ਵਾਰੁਣਾਨੀ, ਗਹਪਤਾਨੀ, ਆਚਰਿਯਾਨੀ, (੧੭) ‘‘ਅਭਰਿਯਾਯਂ ਖਤ੍ਤਿਯਾ ਵਾ’’ ਖਤ੍ਤਿਯਾਨੀ ਖਤ੍ਤਿਯਾ, ਨਦਾਦਿਪਾਠਾ ਭਰਿਯਾਯਨ੍ਤੁ ਖਤ੍ਤਿਯੀ.
੩੪. ਉਪਮਾਸਂਹਿਤ ਸਹਿਤ ਸਞ੍ਞਤ ਸਹ ਸਫਵਾਮ ਲਕ੍ਖਣਾਦਿਤੂਰੁਤੂ.
ਊਰੁਸਦ੍ਦਾ ਉਪਮਾਨਾਦਿਪੁਬ੍ਬਾ ਇਤ੍ਤਿਯਮੂ ਹੋਤਿ. ਕਰਭੋਰੂ, ਸਂਹਿਤੋਰੂ, ਸਹਿਤੋਰੂ, ਸਞ੍ਞਤੋਰੂ, ਸਹੋਰੂ, ਸਫੋਰੂ, ਵਾਮੋਰੂ, ਲਕ੍ਖਣੋਰੂ, ਊਤਿਯੋਗਵਿਭਾਗਾ ਊ ਬ੍ਰਹ੍ਮਬਨ੍ਧੂ.
੩੫. ਯੁਵਾ ਤਿ.
ਯੁਵਸਦ੍ਦਤੋ ਤਿ ਹੋਤਿਤ੍ਥਿਯਂ. ਯੁਵਤਿ.
੩੬. ਨ੍ਤਨ੍ਤੂਨਂ ਵੀਮ੍ਹਿਤੋ ਵਾ.
ਵੀਮ੍ਹਿ ਨ੍ਤਨ੍ਤੂਨਂ ਤੋ ਵਾ ਹੋਤਿ. ਗਚ੍ਛਤੀ ਗਚ੍ਛਨ੍ਤੀ, ਸੀਲਵਤੀ ਸੀਲਵਨ੍ਤੀ.
੩੭. ਭਵਤੋ ਭੋਤੋ.
ਵੀਮ੍ਹਿ ਭਵਤੋ ਭੋਤਾਦੇਸੋ ਹੋਤਿ ਵਾ. ਭੋਤੀ ਭਵਨ੍ਤੀ.
੩੮. ਗੋਸ੍ਸਾਵਙ.
ਗੋਸਦ੍ਦਸ੍ਸ ਵੀਮ੍ਹਾਵਙ ਹੋਤਿ. ਗਾਵੀ.
੩੯. ਪੁਥੁਸ੍ਸ ਪਥਵਪੁਥਵਾ.
ਵੀਮ੍ਹਿ ਪੁਥੁਸ੍ਸ ਪਥਵਪੁਥਵਾ ਹੋਨ੍ਤਿ. ਪਥਵੀ, ਪੁਥਵੀ, ਠੇ ਪਥਵੀ.
੪੦. ਸਮਾਸਨ੍ਤ੍ਵ.
ਸਮਾਸਨ੍ਤ੍ਵ ਇਤਿ ਚਾਧਿਕਰੀਯਤਿ.
੪੧. ਪਾਪਾਦੀਹਿ ਭੂਮਿਯਾ.
ਪਾਪਾਦੀਹੀ ਪਰਾ ਯਾ ਭੂਮਿ ਤਸ੍ਸਾ ਸਮਾਸਨ੍ਤੋ ਅ ਹੋਤਿ. ਪਾਪਭੂਮਂ, ਜਾਤਿਭੂਮਂ.
੪੨. ਸਙ੍ਖ੍ਯਾਹਿ.
ਸਙ੍ਖ੍ਯਾਹਿ ਪਰਾ ਯਾ ਭੂਮਿ ਤਸ੍ਸਾ ਸਮਾਸਨ੍ਤੋ ਅ ਹੋਤਿ. ਦ੍ਵਿਭੂਮਂ, ਤਿਭੂਮਂ.
੪੩. ਨਦੀਗੋਦਾਵਰੀਨਂ.
ਸਙ੍ਖ੍ਯਾਹਿ ਪਰਾਸਂ ਨਦੀਗੋਦਾਵਰੀਨਂ ਸਮਾਸਨ੍ਤੋ ਅ ਹੋਤਿ, ਪਞ੍ਚਨਦਂ, ਸਤ੍ਤਗੋਦਾਵਰਂ, ਸਙ੍ਖ੍ਯਾਹਿਤ੍ਵੇਵ? ਮਹਾਨਦੀ, ਨਦੀਗੋਦਾਵਰੀਨਨ੍ਤਿ ਕਿਂ? ਦਸਿਤ੍ਥਿ.
੪੪. ਅਸਙ੍ਖ੍ਯੇਹਿ ਚਾਙ੍ਗੁਲ੍ਯਾਨਞ੍ਞਾਸਙ੍ਖ੍ਯਤ੍ਥੇਸੁ.
ਅਸਙ੍ਖ੍ਯੇਹਿ ਸਙ੍ਖ੍ਯਾਹਿ ਚ ਪਰਾਯ ਅਙ੍ਗੁਲ੍ਯਾ ਸਮਾਸਨ੍ਤੋ ਅ ਹੋਤਿ ਨੋ ਚੇ ਅਞ੍ਞਪਦਤ੍ਥੇ ਅਸਙ੍ਖ੍ਯਤ੍ਥੇ ਚ ਸਮਾਸੋ ਵਤ੍ਤਤੇ. ਨਿਗ੍ਗਤਮਙ੍ਗੁਲੀਹਿ ਨਿਰਙ੍ਗੁਲਂ, ਅਚ੍ਚਙ੍ਗੁਲਂ, ਦ੍ਵੇ ਅਙ੍ਗੁਲਿਯੋ ਸਮਾਹਟਾ ਦ੍ਵਙ੍ਗੁਲਂ, ਅਨਞ੍ਞਾਸਙ੍ਖ੍ਯਤ੍ਥੇਸੂਤਿ ਕਿਂ? ਪਞ੍ਚਙ੍ਗੁਲਿ ਹਤ੍ਥੋ, ਉਪਙ੍ਗੁਲਿ, ਕਥਂ ‘ਦ੍ਵੇ ਅਙ੍ਗੁਲੀਮਾਨਮਸ੍ਸਾਤਿ ਦ੍ਵਙ੍ਗੁਲ’ਨ੍ਤਿ? ਨਾਤ੍ਰ ਸਮਾਸੋਞ੍ਞਪਦਤ੍ਥੇ ਵਿਹਿਤੋ ਮਤ੍ਤਾਦੀਨਂ ਲੋਪੇ ਕਤੇ ਤਤ੍ਥ ਵਤ੍ਤਤੇ. ਅਙ੍ਗੁਲਸਦ੍ਦੋ ਵਾ ਪਮਾਣਵਾਚਿ ਸਦ੍ਦਨ੍ਤਰਂ, ਯਥਾ ‘ਸੇਨਙ੍ਗੁਲਪ੍ਪਮਾਣੇਨ ਅਙ੍ਗੁਲਾਨਂ ਸਤਂ ਪੁਣ੍ਣਂ ਚਤੁਦ੍ਦਸ ਵਾ ਅਙ੍ਗੁਲਾਨੀ’ਤਿ.
੪੫. ਦੀਘਾਹੋਵਸ੍ਸੇਕਦੇਸੇਹਿ ਚ ਰਤ੍ਤ੍ਯਾ.
ਦੀਘਾਦੀਹਿ ਅਸਙ੍ਖ੍ਯੇਹਿ ਸਙ੍ਖ੍ਯਾਹਿ ਚ ਪਰਮਸ੍ਮਾ ਰਤ੍ਤਿਯਾ ਸਮਾਸਨ੍ਤੋ ਅ ਹੋਤਿ. ਦੀਘਰਤ੍ਤਂ, ਅਹੋਰਤ੍ਤਂ (ਤ੍ਤੋ), ਵਸ੍ਸਾਰਤ੍ਤਂ (ਤ੍ਤੋ), ਪੁਬ੍ਬਰਤ੍ਤਂ, ਅਪਰਰਤ੍ਤਂ, ਅਡ੍ਢੁਰਤ੍ਤਂ, ਅਤਿਕ੍ਕਨ੍ਤੋ ਰਤ੍ਤਿਂ ਅਤਿਰਤ੍ਤੋ, ਦ੍ਵੇਰਤ੍ਤੀ ਸਮਾਹਟਾ ਦਿਰਤ੍ਤਂ (ਤ੍ਤੋ), ਵਾ ਕ੍ਵਚਿ ਬਹੁਲਾਧਿਕਾਰਾ ਏਕਰਤ੍ਤਂ (ਤ੍ਤੋ), ਏਕਰਤ੍ਤਿ, ਅਨਞ੍ਞਾਸਙ੍ਖ੍ਯਤ੍ਥੇਸੁਤ੍ਵੇਵ? ਦੀਘਰਤ੍ਤਿਹੇਮਨ੍ਤੋ, ਉਪਰਤ੍ਤਿ, ਕ੍ਵਚਿ ਹੋਤੇਵ ਬਹੁਲਂ ਵਿਧਾਨਾਯਥਾਰਤ੍ਤਂ.
੪੬. ਗੋਤ੍ਵਚਤ੍ਥੇ ਚਾਲੋਪੇ.
ਗੋਸਦ੍ਦਾ ਅਲੋਪਵਿਸਯਾ ਸਮਾਸਨ੍ਤੋ ਅ ਹੋਤਿ ਨ ਚੇ ਚਤ੍ਥੇ ਸਮਾਸੋ ਅਞ੍ਞਪਦਤ੍ਥੇ ਅਸਙ੍ਖ੍ਯਤ੍ਥੇ ਚ, ਰਾਜਗਵੋ, ਪਰਮਗਵੋ, ਪਞ੍ਚਗਵਧਨੋ, ਦਸਗਵਂ, ਅਲੋਪੇਤਿ ਕਿਂ? ਪਞ੍ਚਹਿ ਗੋਹਿ ਕੀਤੋ ਪਞ੍ਚਗੁ, ਅਚਤ੍ਥੇਤਿ ਕਿ? ਅਜਸ੍ਸਗਾਵੋ, ਅਨਞ੍ਞਾਸਙ੍ਖ੍ਯਤ੍ਥੇਸੁਤ੍ਵੇਵ? ਚਿਤ੍ਤਗੁ, ਉਪਗੁ.
੪੭. ਰਤ੍ਤਿਨ੍ਦਿਵਦਾਰਗਵਚਤੁਰਸ੍ਸਾ.
ਏਤੇ ਸਦ੍ਦਾ ਅਅਨ੍ਤਾ ਨਿਪਚ੍ਚਨ੍ਤੇ. ਰਤ੍ਤੋ ਚ ਦਿਵਾ ਚ ਰਤ੍ਤਿਨ੍ਦਿਵਂ, ਰਤ੍ਤਿ ਚ ਦਿਵਾ ਚ ਰਤ੍ਤਿਨ੍ਦਿਵਂ, ਦਾਰਾ ਚ ਗਾਵੋ ਚ ਦਾਰਗਵਂ, ਚਤਸ੍ਸੋ ਅਸ੍ਸਿਯੋ ਅਸ੍ਸ ਚਤੁਰਸ੍ਸੋ.
੪੮. ਆਯਾਮੇਨੁਗਵਂ.
ਅਨੁਗਵਨ੍ਤਿ ਨਿਪਚ੍ਚਤੇ ਆਯਾਮੇ ਗਮ੍ਯਮਾਨੇ. ਅਨੁਗਵਂ ਸਕਟਂ, ਆਯਾਮੇਤਿ ਕਿਂ? ਗੁਨ੍ਨਂ ਪਞ੍ਛਾ ਅਨੁਗੁ.
੪੯. ਅਕ੍ਖਿਸ੍ਮਾਞ੍ਞਤ੍ਥੇ. ਅਕ੍ਖਿਸ੍ਮਾ ਸਮਾਸਨ੍ਤੋ ਅ ਹੋਤਿ ਅਞ੍ਞਤ੍ਥੇ ਚੇ ਸਮਾਧਸਾ. ਵਿਸਾਲਕ੍ਖੋ, ਵਿਸਾਲਕ੍ਖੀ.
੫੦. ਦਾਰੁਮ੍ਯਙ੍ਗੁਲ੍ਯਾ.
ਅਙ੍ਗੁਲਨ੍ਤਾ ਅਞ੍ਞਪਦਤ੍ਥੇ ਦਾਰੁਮ੍ਹਿ ਸਮਾਸਨ੍ਤੋ ਅ ਹੋਤਿ. ਦ੍ਵਙ੍ਗੁਲਂਦਾਰੁ, ਪਞ੍ਚਙ੍ਗੁਲਂ, ਅਙ੍ਗੁਲਿਸਦਿਸਾਵਯਵਂ ਧਞ੍ਞਾਦੀਨਂ ਵਿਕ੍ਖੇਪਕਂ ਦਾਰੁਂ ਵੁਚ੍ਚਤੇ, ਪਮਾਣੇ ਤੁ ਪੁਬ੍ਬੇ ਵਿਯ ਸਿਦ੍ਧਂ ਸਖਰਾਜਸਦ੍ਦਾ ਅਕਾਰਨ੍ਤਾਵ, ਸਿਸ੍ਸੋਪਿ ਨ ਦਿਸ੍ਸਤਿ, ਗਾਣ੍ਡੀ ਵਧਨ੍ਵਾਤਿ ਪਕਤਨ੍ਤਰੇਨ ਸਿਦ੍ਧਂ.
੫੧. ਚਿ ਵੀਤਿਹਾਰੇ.
ਓਘਾਬ੍ਯਤਿਹਾਰੇ ਗਮ੍ਯਮਾਨੇ ਅਞ੍ਞਪਦਤ੍ਥੇ ਵਤ੍ਤਮਾਨਤੋ ਚਿ ਹੋਤਿ. ਕੇਸਾਕੇਸਿ ਦਣ੍ਡਾਦਣ੍ਡਿ, ਚਕਾਰੋ ‘‘ਚਿਸ੍ਮਿ’’ਨ੍ਤਿ (੩.੬੬) ਵਿਸੇਸਨਤ੍ਥੋ, ਸੁਗਨ੍ਧਿ, ਦੁਗ੍ਗਨ੍ਤੀਤਿ ਪਯੋਗੋ ਨ ਦਿਸ੍ਸਤੇ.
੫੨. ਲ੍ਤ੍ਵਿਤ੍ਥਿਯੂਹਿ ਕੋ.
ਲ੍ਤੁਪ੍ਪਚ੍ਚਯਨ੍ਤੇਹਿ, ਇਤ੍ਥਿਯਮੀਕਾਰੂਕਾਰਨ੍ਤੇਹਿ ਚ ਬਹੁਲਂ ਕਪ੍ਪਚ੍ਚਯੋ ਹੋਤਿ ਅਞ੍ਞਪਦਤ੍ਥੇ. ਬਹੁਕਤ੍ਤੁਕੋ, ਬਹੁਕੁਮਾਰਿਕੋ, ਬਹੁਬ੍ਰਹ੍ਮਬਨ੍ਧੁਕੋ, ਬਹੁਲਂਤ੍ਵੇਵ? ਸੁਬ੍ਭੂ.
੫੩. ਵਾਞ੍ਞਤੋ.
ਅਞ੍ਞੇਹਿ ਅਞ੍ਞਪਦਤ੍ਥੇ ਕੋ ਵਾ ਬਹੁਲਂ ਹੋਤਿ. ਬਹੁਮਾਲਕੋ, ਬਹੁਮਾਲੋ.
੫੪. ਉਤ੍ਤਰਪਦੇ. ਏਤਮਧਿਕਤਂ ਵੇਦਿਤਬ੍ਬਂ.
੫੫. ਇਮਸ੍ਸਿਦਂ.
ਉਤ੍ਤਰਪਦੇ ਪਰਤੋ ਇਮਸ੍ਸ ਇਦਂ ਹੋਤਿ. ਇਦਮਟ੍ਠਿਤਾ, ਇਦਪ੍ਪਚ੍ਚਯਤਾ, ਨਿਗ੍ਗਹੀਤਲੋਪੋ ਪਸ੍ਸ ਚ ਦ੍ਵਿਭਾਵੋ.
੫੬. ਪੁਂ ਪੁਮਸ੍ਸ ਵਾ. ਪੁਮਸ੍ਸ ਪੁਂ ਹੋਤੁਤ੍ਤਰਪਦੇ ਵਿਭਾਸਾ. ਪੁਲ੍ਲਿਙ੍ਗਂ, ਪੁਮਲਿਙ੍ਗਂ.
੫੭. ਟਨ੍ਤਨ੍ਤੂਨਂ.
ਏਸਂ ਟ ਹੋਤੁਤ੍ਤਰਪਦੇ ਕ੍ਵਚਿ ਵਾ. ਭਵਮ੍ਪਤਿਟ੍ਠਾਮਯਂ, ਭਗਵਂਮੂਲਕਾ ਨੋ ਧਮ੍ਮਾ, ਬਹੁਲਾਧਿਕਾਰਾ ਤਰਾਦੀਸੁ ਚ ਪਗੇਵ ਮਹਤ੍ਤਰੀ, ਰਤ੍ਤਞ੍ਞੁਮਹਤ੍ਤਂ.
੫੮. ਅ. ਏਸਂ ਅ ਹੋਤੁਤ੍ਤਰਪਦੇ. ਗੁਣਵਨ੍ਤਪਤਿਟ੍ਠੋ-ਸ੍ਮਿ.
੫੯. ਮਨਾਦ੍ਯਾਪਾਦੀਨਮੋ ਮਯੇ ਚ. ਮਨਾਦੀਨਮਾਪਾਦੀਨਂ ਚ ਓ ਹੋਤੁਤ੍ਤਰਪਦੇ ਮਯੇ ਚ. ਮਨੋਸੇਟ੍ਠਾ, ਮਨੋਮਯਾ, ਰਜੋਜਲ੍ਲਂ, ਰਜੋਮਯਂ, ਆਪੋਗਤਂ, ਆਪੋਮਯਂ, ਅਨੁਯਨ੍ਤਿ ਦਿਸੋਦਿਸਂ.
੬੦. ਪਰਸ੍ਸ ਸਙ੍ਖ੍ਯਾਸੁ.
ਸਙ੍ਖ੍ਯਾਸੁਤ੍ਤਰਪਦੇਸੁ ਪਰਸ੍ਸ ਓ ਹੋਤਿ. ਪਰੋਸਤਂ, ਪਰੋਸਹਸ੍ਸਂ, ਸਙ੍ਖ੍ਯਾਸੂਤਿ ਕਿਂ? ਪਰਦਤ੍ਤੂਪਜੀਵਿਨੋ.
੬੧. ਜਨੇ ਪੁਥਸ੍ਸੁ.
ਜਨੇ ਉਤ੍ਤਰਪਦੇ ਪੁਥਸ੍ਸ ਉ ਹੋਤਿ. ਅਰਿਯੇਹਿ ਪੁਥਗੇਵਾਯਂ ਜਨੋਤਿ ਪੁਥੁਜ੍ਜਨੋ.
੬੨. ਸੋ ਛਸ੍ਸਾਹਾਯਤਨੇ ਵਾ.
ਅਹੇ ਆਯਤਨੇ ਚੁਤ੍ਤਰਪਦੇ ਛਸ੍ਸ ਸੋ ਵਾ ਹੋਤਿ. ਸਾਹਂ ਛਾਹਂ, ਸਲ਼ਾਯਤਨਂ, ਛਲ਼ਾਯਤਨਂ.
੬੩. ਲ੍ਤੁਪਿਤਾਦੀਨਮਾਰਙਰਙ.
ਲ੍ਤੁਪ੍ਪਚ੍ਚਯਨ੍ਤਾਨਂ ਪਿਤਾਦੀਨਞ੍ਚ ਯਥਾਕ੍ਕਮਮਾਰਙਰਙ ਵਾ ਹੋਨ੍ਤੁਤ੍ਤਰਪਦੇ, ਸਤ੍ਥਾਰਦਸ੍ਸਨਂ, ਕਤ੍ਤਾਰਨਿਦ੍ਦੇਸੋ, ਮਾਤਰਪਿਤਰੋ, ਵਾਤ੍ਵੇਵ? ਸਤ੍ਥੁਦਸ੍ਸਨਂ, ਮਾਤਾਪਿਤਰੋ.
੬੪. ਵਿਜ੍ਜਾਯੋਨਿਸਮ੍ਬਨ੍ਧਾਨਮਾ ਤਤ੍ਰ ਚਤ੍ਥੇ.
ਲ੍ਤੁਪਿਤਾਦੀਨਂ ਵਿਜ੍ਜਾਸਮ੍ਬਨ੍ਧੀਨਂ ਯੋਨਿਸਮ੍ਬਨ੍ਧੀਨਂ ਚ ਤੇਸ੍ਵੇਵ ਲ੍ਤੁਪਿਤਾਦੀਸੁ ਵਿਜ੍ਜਾਯੋਨਿਸਮ੍ਬਨ੍ਧਿਸੁਤ੍ਤਰਪਦੇਸੁ ਚਤ੍ਥਵਿਸਯੇ ਆ ਹੋਤਿ. ਹੋਤਾਪੋਤਰੋ ਮਾਤਾਪਿਤਰੋ, ਲ੍ਤੁਪਿਤਾਦੀਨਂ ਤ੍ਵੇਵ? ਪੁਤ੍ਤਭਾਤਰੋ, ਤਤ੍ਰੇਤਿ ਕਿਂ? ਪਿਤੁਪਿਤਾਮਹਾ, ਚਤ੍ਥੇਤਿ ਕਿਂ? ਮਾਤੁਭਾਤਾ, ਵਿਜ੍ਜਾਯੋਨਿਸਮ੍ਬਨ੍ਧਾਨਨ੍ਤਿ ਕਿਂ? ਦਾਤੁਭਤ੍ਤਾਰੋ.
੬੫. ਪੁਤ੍ਤੇ.
ਪੁਤ੍ਤੇ ਉਤ੍ਤਰਪਦੇ ਚਤ੍ਥਵਿਸਯੇ ਲ੍ਤੁਪਿਤਾਦੀਨਂ ਵਿਜ੍ਜਾਯੋਨਿ ਸਮ੍ਬਨ੍ਧਾਨਮਾ ਹੋਤਿ. ਪਿਤਾਪੁਤ੍ਤਾ, ਮਾਤਾਪੁਤ੍ਤਾ.
੬੬. ਚਿਸ੍ਮਿਂ.
ਚਿਪ੍ਪਚ੍ਚਯਨ੍ਤੇ ਉਤ੍ਤਰਪਦੇ ਆ ਹੋਤਿ. ਕੇਸਾਕੇਸਿ, ਮੁਟ੍ਠਾਮੁਟ੍ਠਿ.
੬੭. ਇਤ੍ਥਿਯਮ੍ਭਾਸਿਤਪੁਮਿਤ੍ਥੀ ਪੁਮੇਵੇਕਤ੍ਥੇ.
ਇਤ੍ਥਿਯਂ ਵਤ੍ਤਮਾਨੇ ਏਕਤ੍ਥੇ ਸਮਾਨਾਧਿਕਰਣੇ ਉਤ੍ਤਰਪਦੇ ਪਰੇ ਭਾਸਿਤਪੁਮਾ ਇਤ੍ਥੀ ਪੁਮੇਵ ਹੋਤਿ. ਕੁਮਾਰਭਰਿਯੋ, ਦੀਘਜਙ੍ਘੋ, ਯੁਵਜਾਯੋ, ਇਤ੍ਥਿਯਨ੍ਤਿ ਕਿਂ? ਕਲ੍ਯਾਣੀ ਪਧਾਨਮੇਸਂ ਕਲ੍ਯਾਣਿਪ੍ਪਧਾਨਾ, ਭਾਸਿਤਪੁਮੇਤਿ ਕਿਂ? ਕਞ੍ਞਾਭਰਿਯੋ, ਇਤ੍ਥੀਤਿ ਕਿਂ? ਗਾਮਣਿਕੁਲਂ ਦਿਟ੍ਠਿ ਅਸ੍ਸ ਗਾਮਣਿਦਿਟ੍ਠਿ, ਏਕਤ੍ਥੇਤਿ ਕਿਂ? ਕਲ੍ਯਾਣਿਯਾ ਮਾਤਾ ਕਲ੍ਯਾਣਿਮਾਤਾ.
੬੮. ਕ੍ਵਚਿ ਪਚ੍ਚਯੇ.
ਭਾਸਿਤਪੁਮਿਤ੍ਥੀ ਪਚ੍ਚਯੇ ਕ੍ਵਚਿ ਪੁਮੇਵ ਮੋਤਿ. ਬ੍ਯਤ੍ਤਤਰਾ, ਬ੍ਯਤ੍ਤਤਮਾ.
੬੯. ਸਬ੍ਬਾਦਯੋ ਵੁਤ੍ਤਿਮਤ੍ਤੇ.