੮. ਪਚ੍ਚਯਸਙ੍ਗਹਅਨੁਦੀਪਨਾ

੧੬੬. ਯੇਹਿਪਕਾਰੇਹਿ ਯਥਾ. ਤੇਸਂ ਵਿਭਾਗੋ ਤਂ ਵਿਭਾਗੋ. ਅਯਞ੍ਚਨਿਦ੍ਦੇਸੋ ਏਕਸੇਸਨਿਦ੍ਦੇਸੋ, ਵਿਚ੍ਛਾਲੋਪਨਿਦ੍ਦੇਸੋਵਾਤਿ ਦਸ੍ਸੇਤੁਂ ‘‘ਤੇਸਂ’’ਤਿਆਦਿਮਾਹ. ਨ ਸਮੇਤਿ. ਗਾਥਾਯਂ ‘ਯੇਸਂ’ਤਿਆਦਿਨਾ ਤੀਹਿ-ਯ-ਸਦ੍ਦੇਹਿ ਦਸ੍ਸਿਤਾਨਂ ਤਿਣ੍ਣਂ ਅਤ੍ਥਾਨਂ-ਤ-ਸਦ੍ਦਤ੍ਥ ਸਮ੍ਭਵਤੋ. ਤ-ਸਦ੍ਦਤ੍ਥਾਨਞ੍ਚ ਅਨੁਸਨ੍ਧਿਯਂ ਪਰਿਪੁਣ੍ਣਂ ਕਤ੍ਵਾ ਵਤ੍ਤਬ੍ਬਤੋ. ‘‘ਸਮੁਪ੍ਪਜ੍ਜਤੀ’’ਤਿ ਸੁਟ੍ਠੁ ਪਰਿਪੁਣ੍ਣਂ ਕਤ੍ਵਾ ਉਪ੍ਪਜ੍ਜਤਿ, ਪਾਤੁਭਵਤਿ. ‘‘ਅਵਿਨਾ’’ਤਿ ਅਵਿਨਾ ਹੁਤ੍ਵਾ. ‘‘ਸਹਜਾਤ ਧਮ੍ਮੇਹੀ’’ਤਿ ਅਵਿਜ੍ਜਾ ਪਚ੍ਚਯਾ ਸਙ੍ਖਾਰਾਤਿਆਦੀਸੁ ਸਙ੍ਖਾਰਾਦੀਨਂ ਸਹਜਾਤ ਧਮ੍ਮੇਹਿ ਸਹੇਵ ਉਪ੍ਪਜ੍ਜਨਂ. ‘‘ਕਲਾਪਵਸੇਨਾ’’ਤਿ ਸੁਦ੍ਧ ਧਮ੍ਮ ਕਲਾਪਵਸੇਨ. ‘‘ਸਾਮਞ੍ਞ ਲਕ੍ਖਣਂ’’ਤਿ ਸਾਧਾਰਣ ਲਕ੍ਖਣਂ. ‘‘ਅਤ੍ਥੋ’’ਤਿ ਇਦਪ੍ਪਚ੍ਚਯਤਾ ਸਦ੍ਦਸ੍ਸ ਅਤ੍ਥੋ. ‘‘ਅਯਮਤ੍ਥੋ ਪਟਿਕ੍ਖਿਤ੍ਤੋ’’ਤਿ ‘ਸਮੁਪ੍ਪਜ੍ਜਨਂ ਸਮੁਪ੍ਪਾਦੋ’ਤਿ ਅਯਂਭਾਵਸਾਧਨਤ੍ਥੋ ਪਟਿਕ੍ਖਿਤ੍ਤੋ. ‘‘ਅਯਮੇਵਾ’’ਤਿ ਅਯਂ ਭਾਵਸਾਧਨਤ੍ਥੋ ਏਵ. ਜਰਾਮਰਣਂ ਸਮ੍ਭਵਤੀਤਿ ਯੋਜਨਾ. ‘‘ਉਪ੍ਪਾਦਾਵਾ ਤਥਾਗਤਾਨਂ’’ਤਿ ਸਮ੍ਮਾਸਮ੍ਬੁਦ੍ਧਾਨਂ ਉਪ੍ਪਾਦੇਵਾ ਸਤਿ. ‘‘ਅਨੁਪ੍ਪਾਦਾਵਾ’’ਤਿ ਅਨੁਪ੍ਪਾਦੇਵਾ ਸਤਿ. ‘‘ਠਿਤਾਵ ਸਾਧਾਤੂ’’ਤਿ ਜਾਤਿਯਾ ਸਤਿ ਜਰਾਮਰਣਸ੍ਸ ਪਵਤ੍ਤਿਸਭਾਵੋ ਲੋਕੇ ਠਿਤੋਯੇਵ. ਕਤਮਾ ਪਨ ਸਾਧਾਤੂਤਿ ਆਹ ‘‘ਧਮ੍ਮਟ੍ਠਿਤਤਾ’’ਤਿਆਦਿਂ. ਤਤ੍ਥ ‘‘ਧਮ੍ਮਟ੍ਠਿਤਤਾ’’ਤਿ ਕੇਨਚਿ ਅਕਤਾ ਸਭਾਵਟ੍ਠਿਤਤਾ. ‘‘ਧਮ੍ਮਨਿਯਾਮਤਾ’’ਤਿ ਸਭਾਵਨਿਯਾਮਤਾ. ‘‘ਤਤ੍ਰ ਤਥਤਾ’’ਤਿ ਤਸ੍ਮਿਂ ਸਾਮਞ੍ਞਲਕ੍ਖਣੇ ਸਙ੍ਖਤ ਧਮ੍ਮਾਨਂ ਤਥਤਾ. ਸਾਮਞ੍ਞ ਲਕ੍ਖਣਮੇਵ ਪਟਿਚ੍ਚਸਮੁਪ੍ਪਾਦੋ ਨਾਮਾਤਿ ਦਸ੍ਸੇਤਿ, ਨ ਅਵਿਜ੍ਜਾਦਿਕੋ ਪਚ੍ਚਯ ਧਮ੍ਮੋ. ਕਸ੍ਮਾ, ਤੇਹਿ ਵਚਨੇਹਿ ਧਮ੍ਮਨਿਯਾਮਤਾ ਮਤ੍ਤਸ੍ਸ ਦਸ੍ਸਿਤਤ੍ਤਾ. ਅਵਿਜ੍ਜਾਦੀਨਂ ਧਮ੍ਮ ਸਰੂਪਾਨਂ ਅਦਸ੍ਸਿਤਤ੍ਤਾ. ‘‘ਧਮ੍ਮਨਿਯਾਮਤਾਮਤ੍ਤਂ’’ਤਿ ਚ ਯਥਾ ਵੁਤ੍ਤਸਾਮਞ੍ਞ ਲਕ੍ਖਣਮੇਵ ਵੁਚ੍ਚਤਿ. ਯਦਿ ਭਾਵਸਾਧਨਂ ਇਚ੍ਛੇਯ੍ਯ, ਭਾਵਸਾਧਨਂ ਨਾਮ ਕਤ੍ਤੁਰਹਿਤਂ ਭਵੇਯ੍ਯ. ਕਤ੍ਤੁਰਹਿਤੇ ਚ ਸਤਿ, ਕਥਂ ਪਟਿਚ੍ਚ ਕ੍ਰਿਯਾਯ ਸਮਾਨਕਤ੍ਤੁਕਤਾ ਲਬ੍ਭਤਿ. ਅਲਦ੍ਧੇ ਚ ਸਮਾਨਕਤ੍ਤੁਕਤ੍ਤੇ ਕਥਞ੍ਚ ਪੁਬ੍ਬਕਾਲੇਤ੍ਵਾ ਪਚ੍ਚਯਸਮ੍ਭਵੋਤਿ. ਅਯਂ ਭਾਵਸਾਧਨਂ ਇਚ੍ਛਨ੍ਤਸ੍ਸ ਬ੍ਯਞ੍ਜਨਯੁਤ੍ਤਿਵਿਰੋਧੋ. ਤਂ ਪਰਿਹਰਨ੍ਤੋ ਨ ਚੇਤ੍ਥਾਤਿਆਦਿਮਾਹ. ਗਮ੍ਭੀਰੋਚਾਨਨ੍ਦ ਪਟਿਚ੍ਚਸਮੁਪ੍ਪਾਦੋ ਗਮ੍ਭੀਰਾਵ ਭਾਸੋਚਾਤਿ ਭਗਵਤਾ ਵੁਤ੍ਤਂ. ਭਾਵਸਾਧਨੇ ਚ ਕਤੇ ਉਪ੍ਪਜ੍ਜਨ ਕ੍ਰਿਯਾਮਤ੍ਤਂ ਨਾਮ ਵਿਸੁਂ ਏਕੋ ਧਮ੍ਮੋ ਨ ਹੋਤੀਤਿ ਕਥਂ ਤਂ ਗਮ੍ਭੀਰਂ ਸਿਯਾਤਿ. ਅਯਂ ਭਾਵਸਾਧਨਂ ਇਚ੍ਛਨ੍ਤਸ੍ਸ ਗਮ੍ਭੀਰਵਚਨ ਵਿਰੋਧੋ. ਤਂ ਪਰਿਹਰਨ੍ਤੋ ‘‘ਸਙ੍ਖਤ ਧਮ੍ਮੇਸੁ ਚਾ’’ਤਿਆਦਿਮਾਹ. ਅਪਿ ਚ ਸਙ੍ਖਤ ਲਕ੍ਖਣਂ ਨਾਮ ਸਙ੍ਖਤ ਧਮ੍ਮਤੋਪਿ ਗਮ੍ਭੀਰਂ ਹੋਤਿ. ਤਥਾਹਿ ਚਿਤ੍ਤਂ ਨਾਮ ਸਙ੍ਖਤ ਧਮ੍ਮੋ. ਤਞ੍ਚ ਅਤ੍ਥਿ ਮੇਚਿਤ੍ਤਂ ਨਾਮਾਤਿ ਸਤ੍ਤਾਨਂ ਪਾਕਟਂ ਹੋਤਿ. ਤਸ੍ਸ ਪਨ ਅਨਿਚ੍ਚਤਾ ਸਙ੍ਖਾਤਂ ਸਙ੍ਖਤ ਲਕ੍ਖਣਂ ਅਪਾਕਟਂ ਹੋਤਿ ਸੁਟ੍ਠੁ ਸਨ੍ਤਤਿਯਾ ਪਟਿਚ੍ਛਨ੍ਨਂ. ਤਥਾ ਵੇਦਨਾ ਨਾਮ ਸੁਖਾਵਾ ਦੁਕ੍ਖਾਵਾ ਸਙ੍ਖਤ ਧਮ੍ਮੋ. ਸਾ ਚ ਅਤ੍ਥਿ ਮੇਵੇਦਨਾਤਿ ਸਤ੍ਤਾਨਂ ਪਾਕਟਾ ਹੋਤਿ. ਤਸ੍ਸਾ ਪਨ ਅਨਿਚ੍ਚਤਾ ਸਙ੍ਖਾਤਂ ਸਙ੍ਖਤ ਲਕ੍ਖਣਂ ਅਪਾਕਟਂ ਹੋਤਿ ਸੁਟ੍ਠੁ ਸਨ੍ਤਤਿਯਾ ਪਟਿਚ੍ਛਨ੍ਨਂ. ਏਵਂ ਸੇਸੇਸੁ ਨਾਮਧਮ੍ਮੇਸੁ ਚ ਰੂਪਧਮ੍ਮੇਸੁ ਚ. ਯਤੋ ਸਤ੍ਤਸੁ ਵਿਸੁਦ੍ਧੀਸੁ ਸਙ੍ਖਤ ਧਮ੍ਮ ਵਵਤ੍ਥਾਨ ਸਙ੍ਖਾਤਂ ਦਿਟ੍ਠਿਵਿਸੁਦ੍ਧਿਞਾਣਞ੍ਚ ਅਵਿਜ੍ਜਾਦਿਪਚ੍ਚਯ ਪਰਿਗ੍ਗਹ ਸਙ੍ਖਾਤਂ ਕਙ੍ਖਾਵਿਤਰਣ ਵਿਸੁਦ੍ਧਿਞਾਣਞ੍ਚ ਪਥਮਂ ਸਮ੍ਪਾਦੇਤ੍ਵਾ ਪਚ੍ਛਾ ਦਸਵਿਧਾਨਿ ਸਙ੍ਖਤ ਲਕ੍ਖਣਾਨੁਪਸ੍ਸਨਾ ਞਾਣਾਨਿ ਸਮ੍ਪਾਦੇਤਬ੍ਬਾਨਿ ਹੋਨ੍ਤੀਤਿ. ਯਥਾ ਚ ਅਨਿਚ੍ਚਤਾ ਸਙ੍ਖਾਤਂ ਸਙ੍ਖਤ ਲਕ੍ਖਣਂ ਸਙ੍ਖਤ ਧਮ੍ਮਤੋ ਗਮ੍ਭੀਰਂ ਹੋਤਿ. ਤਥਾ ਇਦਮ੍ਪਿ ਪਟਿਚ੍ਚਸਮੁਪ੍ਪਾਦ ਸਙ੍ਖਾਤਂ ਸਙ੍ਖਤ ਲਕ੍ਖਣਂ ਸਙ੍ਖਤ ਧਮ੍ਮਤੋ ਗਮ੍ਭੀਰਂ ਹੋਤੀਤਿ ਦਟ੍ਠਬ੍ਬਂ.

‘‘ਤਬ੍ਭਾਵਭਾਵੀਭਾਵੋ’’ਤਿ ਏਤ੍ਥ ਭਵਤਿ ਸਂਵਿਜ੍ਜਤੀਤਿ ਭਾਵੋ. ਸੋ ਸੋ ਅਵਿਜ੍ਜਾਦਿਕੋ ਭਾਵੋ ਤਬ੍ਭਾਵੋ. ਤਬ੍ਭਾਵੇ ਭਵਨ੍ਤਿ ਸਮ੍ਭਵਨ੍ਤਿ ਸੀਲੇਨਾਤਿ ਤਬ੍ਭਾਵਭਾਵਿਨੋ. ਸਙ੍ਖਾਰਾਦਯੋ. ‘‘ਭਾਵੋ’’ਤਿ ਉਪ੍ਪਤ੍ਤਿਕਾਰਣਂ. ਤਬ੍ਭਾਵਭਾਵੀਨਂ ਭਾਵੋਤਿ ਤਬ੍ਭਾਵਭਾਵਿ ਭਾਵੋਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਤਸ੍ਮਿਂ ਤਸ੍ਮਿਂ’’ਤਿਆਦਿਮਾਹ. ਅਪਿ ਚ ‘‘ਭਾਵੋ’’ਤਿ ਵਿਜ੍ਜਮਾਨਤਾ ਵੁਚ੍ਚਤਿ. ਤਸ੍ਸ ਤਸ੍ਸ ਪਚ੍ਚਯ ਧਮ੍ਮਸ੍ਸ ਭਾਵੋਤਿ ਤਬ੍ਭਾਵੋ. ਤਬ੍ਭਾਵੇ ਸਤਿ ਭਵਨ੍ਤਿ ਸਮ੍ਭਵਨ੍ਤਿ ਧਮ੍ਮਤਾਯਾਤਿ ਤਬ੍ਭਾਵਭਾਵਿਨੋ. ਤੇਸਂ ਭਾਵੋਤਿਪਿ ਯੁਜ੍ਜਤਿਯੇਵ. ‘‘ਹੇਤ੍ਵਾਦਿ ਪਚ੍ਚਯ ਸਤ੍ਤਿਨਿਯਾਮਂ’’ਤਿ ਹੇਤੁਪਚ੍ਚਯੋ, ਆਰਮ੍ਮਣ ਪਚ੍ਚਯੋ, ਤਿਆਦੀਸੁ ਹੇਤੁਸਦ੍ਦ ਆਰਮ੍ਮਣ ਸਦ੍ਦਾਦਯੋ ਲੋਭਾਦੀਨਂ ਰੂਪਾਰਮ੍ਮਣਾਦੀਨਞ੍ਚ ਧਮ੍ਮਾਨਂ ਤਂ ਤਂ ਪਚ੍ਚਯ ਸਤ੍ਤਿਵਿਸੇਸਂ ਦੀਪੇਨ੍ਤਿ. ਤੇਸਞ੍ਚ ਸੋ ਸੋ ਪਚ੍ਚਯ ਸਤ੍ਤਿਵਿਸੇਸੋ ਵਿਸੁਂ ਧਮ੍ਮਨਿਯਾਮੋ ਹੋਤਿ, ਏਵਂ ਹੇਤ੍ਵਾਦਿ ਪਚ੍ਚਯਸਤ੍ਤਿਨਿਯਾਮਂ ਨਿਵਤ੍ਤੇਤਿ. ‘‘ਤਥਾ ਤਥਾ’’ਤਿ ਮੂਲਟ੍ਠਗੋਚਰਵਿਸਯਟ੍ਠਾਦਿਕੇਨ ਤੇਨ ਤੇਨ ਪਚ੍ਚਯਾਕਾਰੇਨ. ਸੋ ਹਿ ਵੁਚ੍ਚਤੀਤਿ ਸਮ੍ਬਨ੍ਧੋ. ‘‘ਪਚ੍ਚਯ ਧਮ੍ਮੁਦ੍ਧਾਰ ਮਤ੍ਤੇ ਅਠਤ੍ਵਾ’’ਤਿ ਪਚ੍ਚਯ ਧਮ੍ਮਾਨਂ ਨਾਮ ਸਞ੍ਞਾਵਸੇਨ ਉਦ੍ਧਰਣਮਤ੍ਤਂ ਅਕਤ੍ਵਾਤਿ ਅਧਿਪ੍ਪਾਯੋ. ‘‘ਆਹਚ੍ਚਾ’’ਤਿ ਆਹਨਿਤ੍ਵਾ ਤਂ ਤਂ ਪਚ੍ਚਯਸਤ੍ਤਿ ਵਿਸੇਸਂ ਪਾਪੇਤ੍ਵਾਤਿ ਅਤ੍ਥੋ. ਤੇਨਾਹ ‘‘ਮਤ੍ਥਕਂ ਪਾਪੇਤ੍ਵਾ’’ਤਿ. ਪਚ੍ਚਯਸਤ੍ਤਿ ਵਿਸੇਸੋ ਹਿ ਹੇਤੁਫਲਦੀਪਨੇ ਤਤੋ ਉਤ੍ਤਰਿ ਵਤ੍ਤਬ੍ਬ ਕਿਚ੍ਚਾਭਾਵਤੋ ਮਤ੍ਥਕਂ ਨਾਮ ਹੋਤੀਤਿ. ‘‘ਅਨੋਸਕ੍ਕਮਾਨਾ’’ਤਿ ਅਨਿਵਤ੍ਤਮਾਨਾ. ‘‘ਏਤਾਯਾ’’ਤਿ ਪਚ੍ਚਯ ਸਤ੍ਤਿਯਾ. ਪਪਞ੍ਚੇਨ੍ਤੇ ਆਚਰਿਯੇ.

ਏਤਸ੍ਮਾ ਕਾਰਣਾ ਫਲਂ ਏਤਦੇਵ ਪਟਿਚ੍ਚ ਅਨਾਗਤਪਕ੍ਖਤੋ ਪਚ੍ਚੁਪ੍ਪਨ੍ਨਪਕ੍ਖਂ ਆਗਚ੍ਛਤਿ ਪਾਤੁਬ੍ਭਵਤੀਤਿ ਪਚ੍ਚਯੋ. ਉਪ੍ਪਤ੍ਤਿਕਾਰਣਂ ਪਵਤ੍ਤਿਕਾਰਣਞ੍ਚ. ਤਤ੍ਥ ਉਪ੍ਪਤ੍ਤਿਕਾਰਣਂ ਜਨਕਪਚ੍ਚਯੋ. ਪਵਤ੍ਤਿਕਾਰਣਂ ਉਪਤ੍ਥਮ੍ਭਕ ਪਚ੍ਚਯੋ. ‘‘ਏਤੇਨਾ’’ਤਿ ਹੇਤੁਨਾ. ‘‘ਕਾਯਵਚੀ ਮਨੋਕਮ੍ਮਂ’’ਤਿ ਏਤ੍ਥ ‘‘ਕਮ੍ਮਂ’’ਤਿ ਕ੍ਰਿਯਾਵੁਚ੍ਚਤਿ, ਗਮਨ ਠਾਨ ਨਿਸਜ੍ਜਸਯਨਾਦਿਕਂ ਕਾਯਿਕ ਕ੍ਰਿਯਞ੍ਚ. ਆਲਾਪ ਸਲ੍ਲਾਪ ਕਥਨ ਸਜ੍ਝਾਯਨ ਗਾਯਨਾਦਿਕਂ ਵਾਚਸਿਕ ਕ੍ਰਿਯਞ੍ਚ. ਵਿਜਾਨਨ ਚਿਨ੍ਤਨ ਵੀਮਂਸਨਾਦਿਕਂ ਮਾਨਸਿਕ ਕ੍ਰਿਯਞ੍ਚ. ‘‘ਅਭਿਸਙ੍ਖਰੋਨ੍ਤੀ’’ਤਿ ਅਭਿਨਿਪ੍ਫਾਦੇਨ੍ਤਿ. ‘‘ਏਤੇਹੀ’’ਤਿ ਏਤੇਹਿ ਲੋਕਿਯਕੁਸਲਾ ਕੁਸਲ ਚੇਤਨਾ ਧਮ੍ਮੇਹਿ. ਅਪਿ ਚ ਸਙ੍ਖਰੋਨ੍ਤਿ ਸਤ੍ਤਾ ਏਤੇਹੀਤਿ ਸਙ੍ਖਾਰਾ. ‘‘ਸਙ੍ਖਰੋਨ੍ਤੀ’’ਤਿ ਕਿਂ ਸਙ੍ਖਰੋਨ੍ਤਿ. ਅਤ੍ਤਭਾਵਂ ਸਙ੍ਖਰੋਨ੍ਤਿ. ਭਵਾਭਵਂ ਸਙ੍ਖਰੋਨ੍ਤਿ. ਦਿਟ੍ਠਧਮ੍ਮਿਕਮ੍ਪਿ ਅਤ੍ਥਂ ਵਾ ਅਨਤ੍ਥਂ ਵਾ ਸਙ੍ਖਰੋਨ੍ਤਿ. ਸਮ੍ਪਰਾਯਿਕਮ੍ਪਿ ਅਤ੍ਥਂ ਵਾ ਅਨਤ੍ਥਂ ਵਾ ਸਙ੍ਖਰੋਨ੍ਤੀਤਿਆਦਿਨਾ. ਚਕ੍ਖੁਮ੍ਪਿ ਸਙ੍ਖਰੋਨ੍ਤਿ, ਸੋਤਂਪਿ ਸਙ੍ਖਰੋਨ੍ਤੀਤਿਆਦਿਨਾ. ਦਸ੍ਸਨਮ੍ਪਿ ਸਙ੍ਖਰੋਨ੍ਤਿ, ਸਵਨਮ੍ਪਿ ਸਙ੍ਖਰੋਨ੍ਤੀਤਿਆਦਿਨਾ ਚ ਵਤ੍ਤੁਂ ਵਟ੍ਟਤਿਯੇਵ. ‘‘ਵਿਜਾਨਾਤੀ’’ਤਿ ਵਿਵਿਧੇਨ ਜਾਨਾਤਿ. ਭੂਤੇਨਪਿ ਜਾਨਾਤਿ, ਅਭੂਤੇਨਪਿ ਜਾਨਾਤਿ. ‘‘ਨਮਤੀ’’ਤਿ ਗੋਚਰ ਵਿਸਯਤ੍ਥਾਯ ਨਮਤਿ. ‘‘ਰੁਪ੍ਪਤੀ’’ਤਿ ਕੁਪ੍ਪਤਿ, ਖੋਭਤਿ. ‘‘ਫੁਸਤੀ’’ਤਿ ਸਂਹਨਤਿ. ‘‘ਵੇਦਯਤੀ’’ਤਿ ਵਿਦਿਤਂ ਕਰੋਤਿ. ਤਂ ਤਂ ਆਰਮ੍ਮਣਂ ਲਗ੍ਗਨਵਸੇਨ ਭੁਸਂ ਨਹਤਿ ਬਨ੍ਧਤਿ, ਮੁਞ੍ਚਿਤੁਂ ਨ ਦੇਤੀਤਿ ਤਣ੍ਹਾਤਿਪਿ ਯੁਜ੍ਜਤਿ. ‘‘ਉਪਾਦਿਯਤੀ’’ਤਿ ਦਲ਼੍ਹਂ ਗਣ੍ਹਾਤਿ. ਤੇਨਾਹ ‘‘ਅਮੁਞ੍ਚਗ੍ਗਾਹਂ ਗਣ੍ਹਾਤੀ’’ਤਿ. ਭਵਤੀਤਿ ਭਵੋ. ਉਪਪਤ੍ਤਿਭਵੋ. ਭਵਨ੍ਤਿ ਏਤੇਨਾਤਿ ਭਵੋ. ਕਮ੍ਮਭਵੋ. ‘‘ਜਨਨਂ’’ਤਿ ਅਭਿਨਵਸ੍ਸ ਪਾਤੁਬ੍ਭਵਨਂ. ‘‘ਜੀਰਣਂ’’ਤਿ ਅਭਿਨਵਭਾਵਤੋ ਹਾਯਨਂ. ‘‘ਸੋਚਨਂ’’ਤਿ ਚਿਤ੍ਤਸਨ੍ਤਾਪਨਂ. ‘‘ਪਰਿਦੇਵਨਂ’’ਤਿ ਰੋਦਨਂ. ‘‘ਦੁਕ੍ਖਂ’’ਤਿ ਕਾਯਰੁਜ੍ਜਨਂ. ‘‘ਦੋਮਨਸ੍ਸਂ’’ਤਿ ਚਿਤ੍ਤਰੁਜ੍ਜਨਂ. ‘‘ਵਿਸੀਦਨਂ’’ਤਿ ਬਾਲ਼੍ਹਂ ਚਿਤ੍ਤਕਿਲਮਥਭਾਵੇਨ ਵਿਰੂਪਂ ਹੁਤ੍ਵਾ ਚਿਤ੍ਤਸ੍ਸਸੀਦਨਂ. ਥਾਮਬਲਖਿਯ੍ਯਨਂ. ਯਤੋ ਅਸ੍ਸਾਸਪਸ੍ਸਾਸਾਨਂ ਵਿਰੂਪਪ੍ਪਵਤ੍ਤਿਵਾ ਤਙ੍ਖਣੇ ਸਬ੍ਬਸੋ ਉਪਰੁਜ੍ਝਨਂ ਵਾ ਹੋਤੀਤਿ. ‘‘ਕੇਨਚਿ ਸੁਖੇਨਾ’’ਤਿ ਦੁਕ੍ਖਸਚ੍ਚਤੋ ਵਿਮੁਤ੍ਤੇਨ ਕੇਨਚਿ ਸਨ੍ਤਿਸੁਖੇਨ.

‘‘ਦੁਕ੍ਖਪ੍ਪਟਿਚ੍ਛਾਦਿਕਾ’’ਤਿ ਭਯਟ੍ਠੇਨ ਦੁਕ੍ਖਭੂਤਾਨਂ ਤੇਭੂਮਿਕ ਧਮ੍ਮਾਨਂ ਦੁਕ੍ਖਭਾਵਪ੍ਪਟਿਚ੍ਛਾਦਿਕਾ. ‘‘ਸਮੁਦਯਪ੍ਪਟਿਚ੍ਛਾਦਿਕਾ’’ਤਿ ਤਣ੍ਹਾਯ ਦੁਕ੍ਖ ਸਮੁਦਯ ਭਾਵਪ੍ਪਟਿਚ੍ਛਾਦਿਕਾ. ‘‘ਨਿਰੋਧਪ੍ਪਟਿਚ੍ਛਾਦਿਕਾ’’ਤਿ ਤਣ੍ਹਾਨਿਰੋਧਸ੍ਸੇਵ ਦੁਕ੍ਖਨਿਰੋਧ ਭਾਵਪ੍ਪਟਿਚ੍ਛਾਦਿਕਾ. ‘‘ਮਗ੍ਗਪ੍ਪਟਿਚ੍ਛਾਦਿਕਾ’’ਤਿ ਅਟ੍ਠਙ੍ਗੀਕ ਮਗ੍ਗਸ੍ਸੇਵ ਦੁਕ੍ਖਨਿਰੋਧ ਮਗ੍ਗਭਾਵਪ੍ਪਟਿਚ੍ਛਾਦਿਕਾ. ਪੁਬ੍ਬਨ੍ਤੋ ਵੁਚ੍ਚਤਿ ਅਤੀਤੇਕਾਲੇ ਭਵਪਰਮ੍ਪਰਾ. ਅਪਰਨ੍ਤੋ ਵੁਚ੍ਚਤਿ ਅਨਾਗਤੇ ਭਵਪਰਮ੍ਪਰਾ. ਪੁਬ੍ਬਨ੍ਤਾ ਪਰਨ੍ਤੋ ਵੁਚ੍ਚਤਿ ਤਦੁਭਯਂ. ‘‘ਪਟਿਚ੍ਚਸਮੁਪ੍ਪਾਦਪ੍ਪਟਿਚ੍ਛਾਦਿਕਾ’’ਤਿ ਪਚ੍ਚੁਪ੍ਪਨ੍ਨਭਵੇ ਖਨ੍ਧਾਨਂ ਪਟਿਚ੍ਚਸਮੁਪ੍ਪਾਦਪ੍ਪਟਿਚ੍ਛਾਦਿਕਾ. ‘‘ਸੁਤ੍ਤਨ੍ਤਿਕਨਯੇਨਾ’’ਤਿ ਅਭਿਧਮ੍ਮੇਪਿ ਵਿਭਙ੍ਗੇ ਸੁਤ੍ਤਨ੍ਤ ਭਾਜਨੀਯਂ ਨਾਮ ਆਗਤਂ. ਤੇਨ ਸੁਤ੍ਤਨ੍ਤ ਭਾਜਨੀਯਨਯੇਨ. ਸਾਸਵਾ ਕੁਸਲਾ ਕੁਸਲ ਚੇਤਨਾ ਸਙ੍ਖਾਰਾ ਨਾਮਾਤਿ ਯੋਜਨਾ. ‘‘ਅਭਿਧਮ੍ਮਨਯੇਨਾ’’ਤਿ ਵਿਭਙ੍ਗੇ ਅਭਿਧਮ੍ਮਭਾਜਨੀਯਨਯੇਨ. ਅਟ੍ਠਕਥਾਪਾਠੇ. ਅਵਿਜ੍ਜਾ ਕਿਰਿਯ ਧਮ੍ਮਾਨਂ ਨੇਵ ਉਪਨਿਸ੍ਸਯ ਪਚ੍ਚਯਤ੍ਤਂ ਲਭਤਿ. ਕੁਸਲਾ ਕੁਸਲਮੂਲਾਨਿ ਕਿਰਿਯ ਧਮ੍ਮਾਨਂ ਨ ਉਪਨਿਸ੍ਸਯ ਪਚ੍ਚਯਤ੍ਤਂ ਲਭਨ੍ਤੀਤਿ ਯੋਜਨਾ. ਕਿਰਿਯ ਧਮ੍ਮਾ ਅਵਿਜ੍ਜਾਤੋ ਚ ਕੁਸਲਾ ਕੁਸਲ ਮੂਲੇਹਿ ਚ ਉਪਨਿਸ੍ਸਯ ਪਚ੍ਚਯਂ ਨ ਲਭਨ੍ਤੀਤਿ ਵੁਤ੍ਤਂ ਹੋਤਿ. ‘‘ਪਚ੍ਚਯਾਕਾਰੋ’’ਤਿ ਪਟਿਚ੍ਚ ਸਮੁਪ੍ਪਾਦੋ. ‘‘ਅਵਿਜ੍ਜਾਵਿਰਾਗਾ’’ਤਿ ਅਵਿਜ੍ਜਾ ਵਿਗਮਨਤੋ. ਤੇਸਂਪਿਕਿਰਿਯ ਧਮ੍ਮਾਨਂ. ਵਿਞ੍ਞਾਣਾਦੀਸੁਪਿ ਕਿਰਿਯ ਵਿਞ੍ਞਾਣਂ, ਕਿਰਿਯ ਨਾਮਂ, ਕਿਰਿਯ ਮਨਾਯਤਨਂ, ਕਿਰਿਯਫਸ੍ਸੋ, ਕਿਰਿਯ ਵੇਦਨਾਤਿ ਅਤ੍ਥਿਤਾਯ ‘‘ਏਸਨਯੋ ਵਿਞ੍ਞਾਣਾਦੀਸੁਪੀ’’ਤਿ ਵੁਤ੍ਤਂ. ‘‘ਕੁਸਲਾ ਕੁਸਲ ਵਿਪਾਕਸਮ੍ਪਯੁਤ੍ਤਂ’’ਤਿ ਕੁਸਲ ਵਿਞ੍ਞਾਣ ਸਮ੍ਪਯੁਤ੍ਤਂ, ਅਕੁਸਲਵਿਞ੍ਞਾਣਸਮ੍ਪਯੁਤ੍ਤਂ, ਵਿਪਾਕ ਵਿਞ੍ਞਾਣ ਸਮ੍ਪਯੁਤ੍ਤਂ. ‘‘ਤਂ ਅਨੁਪਪਨ੍ਨਂ’’ਤਿ ਪਵਤ੍ਤਿਵਿਪਾਕਵਿਞ੍ਞਾਣ ਸਹਗਤਸ੍ਸ ਖਨ੍ਧਤ੍ਤਯਸ੍ਸ ਤਂ ਸਹਜਾਤਸ੍ਸ ਚਿਤ੍ਤਜਰੂਪਸ੍ਸ ਚ ਅਵਸਿਟ੍ਠਤ੍ਤਾ ਤਂ ਨ ਸਮ੍ਪਨ੍ਨਂਤਿ ਅਤ੍ਥੋ. ਤਤ੍ਥ ਹਿ ਵਿਞ੍ਞਾਣਪਦੇ ਪਵਤ੍ਤਿਵਸੇਨ ਦ੍ਵਤ੍ਤਿਂਸਵਿਧਂ ਵਿਪਾਕਚਿਤ੍ਤਂ ਵਿਞ੍ਞਾਣਂ ਨਾਮਾਤਿ ਵੁਤ੍ਤਂ. ਏਵਞ੍ਚਸਤਿ, ਨਾਮ ਰੂਪਪਦੇਪਿ ਪਵਤ੍ਤਿਵਸੇਨ ਤਦੁਭਯਂ ਪਵਤ੍ਤਿਵਿਞ੍ਞਾਣਸਹਗਤਂਪਿ ਗਹੇਤਬ੍ਬਮੇਵਾਤਿ. ‘‘ਤਂ ਤਂ ਵਿਞ੍ਞਾਣ ਸਮ੍ਪਯੁਤ੍ਤਾ’’ਤਿ ਪਟਿਸਨ੍ਧਿਵਿਞ੍ਞਾਣ ਪਵਤ੍ਤਿ ਵਿਞ੍ਞਾਣਸਮ੍ਪਯੁਤ੍ਤਾ. ‘‘ਤਣ੍ਹੁਪਾਦਾਨਾਨਿਪਾਕਟਾਨੀ’’ਤਿ ਛ ਤਣ੍ਹਾ ਰੂਪਤਣ੍ਹਾ ਸਦ੍ਦਤਣ੍ਹਾਦਿਵਸੇਨ. ਚਤ੍ਤਾਰਿ ਉਪਾਦਾਨਾਨਿ ਕਾਮੁਪਾਦਾਨਾਦਿਵਸੇਨਾਤਿ ਏਵਂ ਪਾਕਟਾਨਿਯੇਵ. ‘‘ਲਕ੍ਖਣਮਤ੍ਤਾਨੀ’’ਤਿ ਸਙ੍ਖਤ ਧਮ੍ਮਾਨਂ ਸਙ੍ਖਤਭਾਵਸਲ੍ਲਕ੍ਖਣ ਨਿਮਿਤ੍ਤਮਤ੍ਤਾਨਿ. ‘‘ਞਾਤਿਬ੍ਯਸਨਾਦੀਹੀ’’ਤਿ ਞਾਤਿਵਿਨਾਸਨਾਦੀਹਿ. ‘‘ਞਾਤਿਬ੍ਯਸਨਾਦਿਨਿਮਿਤ੍ਤਂ’’ਤਿ ਞਾਤਿਵਿਨਾਸਨਾਦਿਕਾਰਣਾ.

‘‘ਖਨ੍ਧਦੁਕ੍ਖੇ’’ਤਿ ਪਚ੍ਚਕ੍ਖਨ੍ਧਸਙ੍ਖਾਤੇ ਦੁਕ੍ਖਸਚ੍ਚੇ. ਖਨ੍ਧਪ੍ਪਵਤ੍ਤਿ ਮਗ੍ਗੋ ਨਾਮ ਤਣ੍ਹਾਸਮੁਦਯੋ ਏਵ. ਖਨ੍ਧਨਿਰੋਧ ਮਗ੍ਗੋ ਨਾਮ ਅਰਿਯਮਗ੍ਗੋ. ‘‘ਖਨ੍ਧ ਸਮੁਦਯਭੂਤਾ’’ਤਿ ਖਨ੍ਧਪ੍ਪਵਤ੍ਤਿਯਾ ਕਾਰਣਭੂਤਾ. ‘‘ਅਵਿਜ੍ਜਾਨਿ ਵੁਟਾਨਂ’’ਤਿ ਅਵਿਜ੍ਜਾਯਨੀਵਾਰਿਤਾਨਂ ਪਿਹਿਤਾਨਂ. ‘‘ਅਪ੍ਪਹੀਨ ਭਵਾਭਿਲਾਸਾਨਂ’’ਤਿ ਮਗ੍ਗੇਨ ਅਪ੍ਪਹੀਨ ਭਵਪਤ੍ਥਨਾਨਂ. ਅਪ੍ਪਹੀਨਭਵਤਣ੍ਹਾਨਨ੍ਤਿ ਵੁਤ੍ਤਂ ਹੋਤਿ. ‘‘ਵਿਬਨ੍ਧੋ’’ਤਿ ਅਨ੍ਤਰਾਯੋ. ‘‘ਉਦਯਭੂਤਾਨਂ’’ਤਿ ਵਡ੍ਢਿਭੂਤਾਨਂ. ‘‘ਅਵਸ੍ਸਯੋ’’ਤਿ ਨਿਸ੍ਸਯੋ. ਸੁਖਵੇਦਨਾ ਵਿਸੇਸਤੋ ਤਣ੍ਹਾਯ ਪਚ੍ਚਯੋ ਹੋਤੀਤਿ ਵੁਤ੍ਤਂ ‘‘ਸੁਖਵੇਦਨਾਸਦਿਸੋ’’ਤਿਆਦਿ. ਦੋਮਨਸ੍ਸਾਨਂ ਪਨ ਤਸ੍ਸਾ ਪਚ੍ਚਯਭਾਵੋ ਪਰਤੋ ਪਰਿਯੇਟ੍ਠਿਤਣ੍ਹਾਯਂ ਪਾਕਟੋ ਭਵਿਸ੍ਸਤਿ. ਉਪੇਕ੍ਖਾ ਵੇਦਨਾਪਿ ਦੁਕ੍ਖੇਨ ਪੀਲ਼ਿਤਸ੍ਸ ਸੁਖਠਾਨੇ ਤਿਟ੍ਠਤਿ. ਸੁਖਂ ਵਿਯ ਤਂ ਪਤ੍ਥੇਤੀਤਿ. ਸਮੁਦਾ ਚਰਿਤ੍ਵਾ ਪਰਿਚਯਿਤ੍ਵਾ. ‘‘ਤਣ੍ਹਾ ਏਵਾ’’ਤਿ ਕਾਮਤਣ੍ਹਾ ਏਵ. ‘‘ਅਤ੍ਤਨਿ ਚਾ’’ਤਿ ਦਿਟ੍ਠਿਯਞ੍ਚਾਤਿ ਅਧਿਪ੍ਪਾਯੋ. ‘‘ਅਤ੍ਤਨੋ ਆਰਮ੍ਮਣੇਸੂ’’ਤਿ ਅਤ੍ਤ ਜੀਵ ਲੋਕਾਦੀਸੁ ਦਿਟ੍ਠਿਯਾਗਹਿਤਾ ਰਮ੍ਮਣੇਸੁ. ‘‘ਅਸ੍ਸਾਦਨ ਖਮਨਰੋਚਨਭੂਤਾਯਾ’’ਤਿ ਸਾਧੁਵਤਾਯਂ ਮਮਦਸ੍ਸਨਨ੍ਤਿ ਏਵਂ ਰਜ੍ਜਨ ਤੁਸ੍ਸਨ ਕਨ੍ਤਿਭੂਤਾਯ. ‘‘ਉਪਾਦਾਨੀਯਸ੍ਸਾ’’ਤਿ ਦਲ਼੍ਹਂ ਗਹੇਤਬ੍ਬਸ੍ਸ. ‘‘ਅਤ੍ਥਸ੍ਸਾ’’ਤਿ ਅਤ੍ਤਨੋ ਅਤ੍ਤਾਦਿਕਸ੍ਸ ਅਤ੍ਥਸ੍ਸ. ਗਾਥਾਯਂ.‘‘ਭਵਂ ਹੋਤੀ’’ਤਿ ਭਵਨ੍ਤੋ ਵਡ੍ਢਨ੍ਤੋ ਹੋਤਿ. ‘‘ਪਰਾਭਵੋ’’ਤਿ ਵਿਨਾਸਨ੍ਤੋ.

‘‘ਅਦ੍ਧਾਨਵਨ੍ਤੇ ਧਮ੍ਮੇ’’ਤਿ ਤੇਕਾਲਿਕਸਙ੍ਖਤ ਧਮ੍ਮੇ. ਅਪਤਮਾਨੇ ਕਤ੍ਵਾਤਿ ਪਾਠਸੇਸੋ. ਯਥਾ ਉਪਾਦਾਨਂਤਿ ਦਿਸ੍ਵਾ ਉਪਾਦਾਰੂਪਂਤਿ ਪਦੇ ਆਦਾਸਦ੍ਦੋ ਵਿਞ੍ਞਾਯਤਿ. ਨ ਉਪੁਬ੍ਬ ਪਦਸਦ੍ਦੋ. ਇਤਰਥਾ ਉਪਾਦਾਨਨ੍ਤਿ ਨਸਿਜ੍ਝਤਿ. ਏਵਂ ਅਦ੍ਧਾ, ਅਦ੍ਧਾਨ, ਪਦੇਸੁਪਿ. ਤੇਨਾਹ ‘‘ਅਦ੍ਧਾਨਂ’’ਤਿ ਨਸਿਜ੍ਝਤੀਤਿ. ਸਂਖਿਪਨ੍ਤਿ ਵੀਸਤਾਕਾਰਾ ਏਤੇਸੂਤਿ ਸਙ੍ਖੇਪਾ. ਸਙ੍ਗਹਾ. ‘‘ਵਟ੍ਟਧਮ੍ਮਾ’’ਤਿ ਸਙ੍ਖਾਰਾਦਯੋ ਧਮ੍ਮਾ. ‘‘ਏਤ੍ਥਾ’’ਤਿ ਏਤਾਸੁ ਅਵਿਜ੍ਜਾਤਣ੍ਹਾਸੁ. ਕਥਂ ਤਿਟ੍ਠਨ੍ਤੀਤਿ ਆਹ ‘‘ਤਦਾਯਤ੍ਤਵੁਤ੍ਤਿਤਾਯਾ’’ਤਿ. ‘‘ਪਤਿਟ੍ਠਾ’’ਤਿ ਸੁਪ੍ਪਤਿਟ੍ਠਿਤਟ੍ਠਾਨਾਨਿ. ‘‘ਪਭਵਾ’’ਤਿ ਵਟ੍ਟਧਮ੍ਮਪਰਮ੍ਪਰਪ੍ਪਵਤ੍ਤਿਯਾ ਮੂਲ ਪਧਾਨ ਕਾਰਣਾਨਿ. ਤਤ੍ਥ ਹੇਤੁ ਚ ਦੇਸੇਤਬ੍ਬੋ ਹੋਤਿ. ਇਤਰਥਾ ਇਸ੍ਸਰਨਿਮ੍ਮਾਨਦਿਟ੍ਠਿ ਅਹੇਤੁਕ ਦਿਟ੍ਠੀਨਂ ਓਕਾਸੋ ਸਿਯਾਤਿ. ਫਲਞ੍ਚ ਦੇਸੇਤਬ੍ਬਂ ਹੋਤਿ. ਇਤਰਥਾ ਉਚ੍ਛੇਦਦਿਟ੍ਠਿਯਾ ਓਕਾਸੋ ਸਿਯਾਤਿ. ‘‘ਅਦ੍ਧੁਨੋ’’ਤਿ ਦੀਘਕਾਲਸ੍ਸ. ‘‘ਨਿਵਤ੍ਤੇਤੀ’’ਤਿ ਸਮੁਚ੍ਛਿਨ੍ਦਤਿ. ‘‘ਅਹੇਤੂ ਅਪਚ੍ਚਯਾ ਸਤ੍ਤਾ ਪਵਤ੍ਤਨ੍ਤੀ’’ਤਿ ਪੁਬ੍ਬਹੇਤੁਰਹਿਤਾ ਪੁਬ੍ਬਪਚ੍ਚਯਰਹਿਤਾ ਹੁਤ੍ਵਾ ਇਮੇਸਤ੍ਤਾ ਪਵਤ੍ਤਨ੍ਤਿ. ‘‘ਅਵਿਜ੍ਜਾਦੀਹਿ ਸਾਧੇਤਬ੍ਬੋ ਨ ਹੋਤੀ’’ਤਿ ਭਵਪਰਮ੍ਪਰਾਸੁ ਨਿਚ੍ਚੋ ਹੁਤ੍ਵਾ ਸਨ੍ਧਾਵਨ੍ਤਸ੍ਸ ਅਵਿਜ੍ਜਾਦੀਹਿ ਕਤ੍ਤਬ੍ਬ ਕਿਚ੍ਚਂ ਨ ਹੋਤੀਤਿ ਅਧਿਪ੍ਪਾਯੋ. ‘‘ਕੇਸਞ੍ਚਿ ਨ ਸਮ੍ਭਵਨ੍ਤਿਯੇਵਾ’’ਤਿ ਅਨਾਗਾਮੀਨਂ ਅਰਹਨ੍ਤਾਨਞ੍ਚ ਨ ਸਮ੍ਭਵਨ੍ਤਿਯੇਵ. ਮਹਾਆਦੀਨਵਰਾਸਿਦਸ੍ਸਨਤ੍ਥਂ ਸੋਕਾਦਿਵਚਨਂ ਹੋਤੀਤਿ ਯੋਜਨਾ. ‘‘ਤੇਸਂ’’ਤਿ ਅਞ੍ਞੇਸਂ ਪਚ੍ਚਯਾਨਂ. ‘‘ਲਦ੍ਧਾ’’ਤਿ ਅਤ੍ਥਤੋ ਲਦ੍ਧਾ. ‘‘ਤਦਵਿਨਾਭਾਵਿਭਾਵਲਕ੍ਖਣੇਨਾ’’ਤਿ ਏਤ੍ਥ ਤੇਨ ਤੇਨ ਪਚ੍ਚਯੇਨ ਅਵਿਨਾਭਾਵੀਨਂ ਭਾਵੋ, ਸੋ ਏਵ ਲਕ੍ਖਣਨ੍ਤਿ ਵਿਗ੍ਗਹੋ. ‘‘ਪਰਤ੍ਥ ਪੀ’’ਤਿ ਇਤੋ ਪਰੇਸੁ ਤਣ੍ਹੁਪਾਦਾਨ ਭਵਗ੍ਗਹਣੇਨਾਤਿਆਦੀਸੁਪਿ. ‘‘ਆਦਿਤੋ’’ਤਿਆਦਿਮ੍ਹਿ. ਵਿਭਾਵਨਿਪਾਠੇ. ‘‘ਕਿਲੇਸਭਾਵਸਾਮਞ੍ਞਤੋ’’ਤਿ ਕਿਲੇਸਭਾਵੇਨ ਸਮਾਨਤ੍ਤਾ ਸਦਿਸਤ੍ਤਾ. ‘‘ਲਕ੍ਖਿਤਬ੍ਬ ਧਮ੍ਮੇਹੀ’’ਤਿ ਵਿਞ੍ਞਾਣਾਦੀਹਿ. ‘‘ਪਥਮੇਨ ਦੁਤੀਯਸ੍ਸਾ’’ਤਿ ਪਥਮਸਙ੍ਖੇਪੇਨ ਸਦ੍ਧਿਂ ਦੁਤੀਯਸ੍ਸ ਸਙ੍ਖੇਪਸ੍ਸ ਏਕਾ ਸਨ੍ਧੀਤਿਆਦਿਨਾ ਯੋਜੇਤਬ੍ਬਂ. ‘‘ਲੋਕਸ੍ਸ ਪਾਕਟ ਵੋਹਾਰੇਨਾ’’ਤਿ ਕਿਲੇਸਧਮ੍ਮਾ ਕਮ੍ਮਧਮ੍ਮਾ ਚ ਲੋਕੇ ਹੇਤੂਤਿ ਪਾਕਟਾ ਹੋਨ੍ਤਿ. ਵਿਪਾਕਧਮ੍ਮਾ ਪਨ ਫਲਨ੍ਤਿ ਪਾਕਟਾ. ਏਵਂ ਲੋਕੇ ਪਾਕਟ ਵੋਹਾਰੇਨ. ਇਧ ਪਨ ਕਿਲੇਸਧਮ੍ਮਕਮ੍ਮਧਮ੍ਮਾ ਵਾ ਹੋਨ੍ਤੁ, ਵਿਪਾਕਧਮ੍ਮਾ ਵਾ, ਯੋ ਯੋ ਪਚ੍ਚਯਪਕ੍ਖੇ ਠਿਤੋ, ਸੋ ਸੋ ਹੇਤੂਤਿਪਿ ਵਤ੍ਤਬ੍ਬੋਯੇਵ. ਯੋ ਯੋ ਪਚ੍ਚਯੁਪ੍ਪਨ੍ਨ ਪਕ੍ਖੇ ਠਿਤੋ, ਸੋ ਸੋ ਫਲਨ੍ਤਿਦਸ੍ਸੇਨ੍ਤੋ ‘‘ਹੇਤੁਫਲਸਦ੍ਦਾਪਨਾ’’ਤਿਆਦਿਮਾਹ. ਅਟ੍ਠਕਥਾ ਪਾਠੇ. ‘‘ਸਜ੍ਜਨ੍ਤਸ੍ਸਾ’’ਤਿ ਸਂਵਿਦਹਨ੍ਤਸ੍ਸ. ‘‘ਆਯੂਹਨ ਸਙ੍ਖਾਰਾ ਨਾਮਾ’’ਤਿਆਦਿਤੋ ਪਟ੍ਠਾਯ ਸਮੁਚ੍ਚਯਨਸਙ੍ਖਾਰਾ ਨਾਮ. ‘‘ਦਕ੍ਖਿਣਂ’’ਤਿ ਦਾਨਵਤ੍ਥੁਂ. ਦਕ੍ਖਿਣੋਦਕਂ ਵਾ. ‘‘ਏਤ੍ਥ ਚਾ’’ਤਿ ਇਮਸ੍ਮਿਂ ਤਤੀਯਪਞ੍ਚਕੇ ਚ. ‘‘ਵੁਤ੍ਤਨਯੇਨੇ ਵਾ’’ਤਿ ਪਥਮਪਞ੍ਚਕੇ ਵੁਤ੍ਤਨਯੇਨੇਵ. ਵਿਭਾਵਨਿਪਾਠੇ. ‘‘ਆਯਤਿਂ ਪਟਿਸਨ੍ਧਿਯਾ ਪਚ੍ਚਯਚੇਤਨਾ ਭਵੋ ਨਾਮਾ’’ਤਿ ਇਦਂ ਉਦ੍ਦੇਸਪਾਲ਼ਿਯਂ ਯਥਾਦਿਟ੍ਠਪਾਠਵਸੇਨੇਵ ਵੁਤ੍ਤਂ. ਤਥਾ ਪੁਰਿਮਕਮ੍ਮਭਵਸ੍ਮਿਂ ਇਧ ਪਟਿਸਨ੍ਧਿਯਾ ਪਚ੍ਚਯਚੇਤਨਾ ਸਙ੍ਖਾਰਾ ਨਾਮਾਤਿ ਇਦਞ੍ਚ. ਇਧ ਪਨ ਪੁਬ੍ਬੇਯੇਵ ਦ੍ਵੀਸੁਹੇਤੁਪਞ੍ਚਕੇਸੁ ਦ੍ਵਿਨ੍ਨਂ ਸਙ੍ਖਾਰ ਕਮ੍ਮਭਵਾਨਂ ਸਙ੍ਗਹਿਤਤ੍ਤਾ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਦ੍ਵਿਨ੍ਨਂ ਸਙ੍ਖਾਰ ਕਮ੍ਮਭਵਾਨਂ ਵਿਸੇਸੋ ਯੁਤ੍ਤੋ. ਤੇਨਾਹ ‘‘ਤਂ ਇਧ ਨ ਯੁਜ੍ਜਤੀ’’ਤਿ. ‘‘ਸਙ੍ਗਹਿਤਤ੍ਤਾ’’ਤਿ ਪੁਬ੍ਬੇਯੇਵ ਸਙ੍ਗਹਿਤਤ੍ਤਾ. ‘‘ਏਤਂ’’ਤਿ ਵਿਭਾਵਨਿ ਵਚਨਂ. ‘‘ਧਮ੍ਮਵਿਭਾਗਰਕ੍ਖਣਤ੍ਥਂ’’ਤਿ ਵਿਭਙ੍ਗੇ ਭਵਪਦੇ ਉਪਪਤ੍ਤਿਭਵਸ੍ਸਪਿ ਵਿਭਤ੍ਤਤ੍ਤਾ ਏਵਂ ਵਿਭਤ੍ਤਸ੍ਸ ਧਮ੍ਮਵਿਭਾਗਸ੍ਸ ਰਕ੍ਖਣਤ੍ਥਂ. ਫਲਪਞ੍ਚਕਤੋ ਅਨਞ੍ਞਂਪਿ ਉਪਪਤ੍ਤਿਭਵਂ ਅਞ੍ਞਂਵਿਯ ਕਤ੍ਵਾ ‘ਉਪਪਤ੍ਤਿਭਵਸਙ੍ਖਾਤੋ ਭਵੇਕਦੇਸੋ’ਤਿ ਵੁਤ੍ਤਂ. ਸੋ ਚ ਉਪਪਤ੍ਤਿਭਵੋ ਨਾਮ ਪਚ੍ਚੁਪ੍ਪਨ੍ਨਹੇਤੂਹਿ ਨਿਬ੍ਬਤ੍ਤਤ੍ਤਾ ਚਤੁਤ੍ਥੇ ਫਲਪਞ੍ਚਕੇ ਏਵ ਸਙ੍ਗਹਿਤੋ. ਤਸ੍ਮਾ ਤੇਨ ਉਪਪਤ੍ਤਿਭਵਸਦ੍ਦੇਨ ਚਤੁਤ੍ਥ ਪਞ੍ਚਕਮੇਵ ਗਹਿਤਨ੍ਤਿ ਯੁਤ੍ਤਂ. ਇਤਰਥਾ ਦ੍ਵੇ ਫਲਪਞ੍ਚਕਾਨਿ ਵਿਪਾਕਵਟ੍ਟਨ੍ਤਿ ਵੁਤ੍ਤੇ ਸਿਦ੍ਧਮੇਵ ਹੋਤਿ. ਏਵਞ੍ਚਸਤਿ ਅਵਸੇਸਾ ਚਾਤਿ ਏਤ੍ਥ ਦੁਤੀਯਫਲਪਞ੍ਚਕਮੇਵ ਅਵਸਿਟ੍ਠਂ ਹੋਤੀਤਿ ਦਟ੍ਠਬ੍ਬਂ. ‘‘ਅਵਿਜ੍ਜਾ ਨਾਮ ਮੋਹੋ, ਸੋ ਚ ਅਕੁਸਲ ਮੂਲ’’ਨ੍ਤਿਆਦਿ ਅਭਿਧਮ੍ਮੇ ਮੂਲਯਮਕੇ ਮੂਲਨਾਮੇਨ ਆਗਤਤ੍ਤਾ ਵੁਤ੍ਤਂ. ਦ੍ਵੀਸੁਪਨਭਵ ਚਕ੍ਕੇਸੁ ਪੁਰਿਮਚਕ੍ਕੇ ਅਵਿਜ੍ਜਾ ਆਦਿ ਹੋਤਿ. ਪਚ੍ਛਿਮਚਕ੍ਕੇ ਤਣ੍ਹਾ. ਆਦਿ ਚ ਨਾਮ ਮੂਲਨ੍ਤਿ ਚ ਸੀਸਨ੍ਤਿ ਚ ਵਤ੍ਤੁਂ ਵਟ੍ਟਤੀਤਿ ਪਰਿਯਾਯਂ ਦਸ੍ਸੇਤੁਂ ‘‘ਅਥਵਾ’’ਤਿਆਦਿ ਵੁਤ੍ਤਂ.‘‘ਆਗਮਨਸਮ੍ਭਾਰੇਸੂ’’ਤਿ ਅਤੀਤਭਵਤੋ ਇਮਂਭਵਂ ਆਗਮਨਸਮ੍ਭਾਰੇਸੁ. ਤਣ੍ਹਾ ਏਵ ਸੀਸਂ ਕਤ੍ਵਾ ਵੁਤ੍ਤਾਤਿ ਯੋਜਨਾ. ‘‘ਤੇਸਂ ਅਨ੍ਤਰੇ’’ਤਿ ਅਵਿਜ੍ਜਾਸਙ੍ਖਾਰਾਨਂ ਅਨ੍ਤਰੇ. ਤਣ੍ਹਾਯ ਓਕਾਸੋ ਨਤ੍ਥੀਤਿ ਕਸ੍ਮਾ ਵੁਤ੍ਤਂ. ਨਨੁ ਅਵਿਜ੍ਜਾਯ ਸਤਿ, ਤਣ੍ਹਾ ਨਾਮ ਏਕਨ੍ਤੇਨ ਸਮ੍ਭਵਤਿਯੇਵ. ਸਾ ਚ ਸਙ੍ਖਾਰਾਨਂ ਬਲਵਪਚ੍ਚਯੋ ਹੋਤਿ. ਤਸ੍ਮਾ ਸਾ ਅਵਿਜ੍ਜਾ ਪਚ੍ਚਯਾ ਤਣ੍ਹਾ, ਤਣ੍ਹਾ ਪਚ੍ਚਯਾ ਸਙ੍ਖਾਰਾਤਿ ਵਤ੍ਤਬ੍ਬਾ ਸਿਯਾਤਿ. ਤਂ ਪਰਿਹਰਿਤੁਂ ‘‘ਅਯਞ੍ਹੀ’’ਤਿਆਦਿਵੁਤ੍ਤਂ. ਪਟਿਲੋਮਪਟਿਚ੍ਚਸਮੁਪ੍ਪਾਦੋ ਨਾਮ ਅਵਿਜ੍ਜਾਨਿਰੋਧਾ ਸਙ੍ਖਾਰਨਿਰੋਧੋਤਿ ਏਵਂ ਪਵਤ੍ਤੋ ਪਟਿਚ੍ਚਸਮੁਪ੍ਪਾਦੋ. ‘‘ਜਰਾਮਰਣਮੁਚ੍ਛਯਾਤਿਆਦਿ ਨਵਤ੍ਤਬ੍ਬਂ ਸਿਯਾ’’ਤਿ ਜਰਾਮਰਣਮੁਚ੍ਛਾਯਾਤਿਆਦਿਵਚਨਂ ਅਨੁਲੋਮਪਟਿਚ੍ਚਸਮੁਪ੍ਪਾਦ ਸਮ੍ਬਨ੍ਧ ਵਚਨਨ੍ਤਿ ਕਤ੍ਵਾ ਵੁਤ੍ਤਂ. ‘‘ਉਪਰਿਵਟ੍ਟਮੂਲ ਧਮ੍ਮਪ੍ਪਟਿਪਾਦਕਾਨਂ’’ਤਿ ਉਪਰਿ ਦੁਤਿਯਾਨਾਗਤਭਾਵਾਦੀਸੁ ਅਵਿਜ੍ਜਾਤਣ੍ਹਾ ਸਙ੍ਖਾਤਾਨਂ ਵਟ੍ਟਮੂਲਧਮ੍ਮਾਨਂ ਨਿਯੋਜਕਾਨਂ. ‘‘ਤੇ ਪੀ’’ਤਿ ਸੋਕਾਦਯੋ ਦੁਕ੍ਖਧਮ੍ਮਾਪਿ. ‘‘ਆਸਵਸਮ੍ਭੂਤਾ’’ਤਿ ਆਸਵੇਹਿ ਸਮ੍ਭੂਤਾ ਸਞ੍ਜਾਤਾ. ‘‘ਤੇਸਂ’’ਤਿ ਸੋਕਾਦੀਨਂ ਦੁਕ੍ਖਧਮ੍ਮਾਨਂ. ‘‘ਜਰਾਮਰਣਙ੍ਗੇ ਗਹਣਂ’’ਤਿ ਦ੍ਵਾਦਸਸੁ ਅਙ੍ਗੇਸੁ ਜਰਾਮਰਣਙ੍ਗੇ ਸਙ੍ਗਹਣਂ. ‘‘ਪਵਡ੍ਢਤੀ’’ਤਿ ਭੁਸਂ ਵਡ੍ਢਤਿ. ‘‘ਆਸਵਸਮੁਦਯਾ’’ਤਿ ਆਸਵਸਮੁਪ੍ਪਾਦਾ. ‘‘ਅਵਿਜ੍ਜਾਸਮੁਦਯੋ’’ਤਿ ਅਵਿਜ੍ਜਾਸਮੁਪ੍ਪਾਦੋ. ‘‘ਅਵਿਜ੍ਜਾਪਚ੍ਚਯਾਸਙ੍ਖਾਰਾਤੀ’’ਤਿ ਏਤ੍ਥ ਇਤਿਸਦ੍ਦੋ ਆਦਿਅਤ੍ਥੋ. ‘‘ਨਾਨਾਬ੍ਯਸਨ ਫੁਟ੍ਠਸ੍ਸਾ’’ਤਿ ਞਾਤਿਬ੍ਯਸਨਾਦੀਹਿ ਨਾਨਾਬ੍ਯਸਨੇਹਿ ਫੁਟ੍ਠਸ੍ਸ, ਵਿਹਿਂਸਿਤਸ੍ਸ. ‘‘ਯਤੋ’’ਤਿ ਯਂ ਕਾਰਣਾ, ਅਵਿਜ੍ਜਾਤਣ੍ਹਾਨਂ ਵਡ੍ਢਨਕਾਰਣਾ. ‘‘ਵਟ੍ਟਂ’’ਤਿ ਸਙ੍ਖਾਰਾਦਿਕਂ ਭਵਚਕ੍ਕਂ. ਸਂਮੁਯ੍ਹਨਂ ਸਮ੍ਮੋਹੋ. ਪਰਿਯੇਸਨਂ ਪਰਿਯੇਟ੍ਠਿ. ਵਿਪਚ੍ਚਤੀਤਿ ਵਿਪਾਕੋ. ਵਿਪਾਕੋ ਏਵ ਵੇਪਕ੍ਕਂ. ਸਮ੍ਮੋਹੋ ਵੇਪਕ੍ਕਂ ਅਸ੍ਸਾਤਿ ਸਮ੍ਮੋਹਵੇਪਕ੍ਕਂ. ਤਥਾ ਪਰਿਯੇਟ੍ਠਿਵੇ ਪਕ੍ਕਞ੍ਚਾਤਿ ਇਮਮਤ੍ਥਂ ਦਸ੍ਸੇਤਿ ‘‘ਤਦੁਭਯਂ’’ਤਿਆਦਿਨਾ. ਤਦੁਭਯਂ ਵਿਪਾਕਂ ਏਤਸ੍ਸਾਤਿ ਕਤ੍ਵਾ ਦੁਕ੍ਖਂ ਸਮ੍ਮੋਹਵੇਪਕ੍ਕਨ੍ਤਿ ਚ ਪਰਿਯੇਟ੍ਠਿਵੇਪਕ੍ਕਨ੍ਤਿ ਚ ਵੁਚ੍ਚਤੀਤਿ ਯੋਜਨਾ. ਅਪਿ ਚ, ਸਮ੍ਮੋਹਂ ਵਿਪਾਚੇਤਿ ਸਞ੍ਜਨੇਤੀਤਿ ਸਮ੍ਮੋਹ ਵੇਪਕ੍ਕਂ. ਏਵਂ ਪਰਿਯੇਟ੍ਠਿਵੇਪਕ੍ਕਨ੍ਤਿਪਿ ਯੁਜ੍ਜਤਿ. ‘‘ਕਿਚ੍ਛਂ’’ਤਿ ਕਸਿਰਂ ਦੁਕ੍ਖਂ ਆਪਨ੍ਨੋ. ‘‘ਮਿਯ੍ਯਤੀ’’ਤਿ ਮਰਤਿ. ‘‘ਚ ਵਤੀ’’ਤਿ ਸਙ੍ਕਮਤਿ. ‘‘ਉਪਪਜ੍ਜਤੀ’’ਤਿ ਭਵਨ੍ਤਰਂ ਉਪੇਤਿ. ‘‘ਅਥ ਚ ਪਨਾ’’ਤਿ ਏਵਂਭੂਤਸ੍ਸ ਸਤੋ. ‘‘ਜਰਾਮਰਣਸ੍ਸਾ’’ਤਿ ਜਰਾਮਰਣ ਸਙ੍ਖਾਤਸ੍ਸ ਇਮਸ੍ਸ ਦੁਕ੍ਖਸ੍ਸਾਤਿ ਸਮ੍ਬਨ੍ਧੋ. ‘‘ਨਿਸ੍ਸਰਣਂ’’ਤਿ ਨਿਗ੍ਗਮਨਂ. ‘‘ਨਪ੍ਪਜਾਨਾਤੀ’’ਤਿ ਅਯਂ ਲੋਕੋ ਨਪ੍ਪਜਾਨਾਤਿ. ‘‘ਆਗਤਿਯਾ’’ਤਿ ਇਮਸ੍ਮਿਂ ਭਵੇ ਪਟਿਸਨ੍ਧਿਵਿਞ੍ਞਾਣੁਪ੍ਪਤ੍ਤਿਵਸੇਨ ਆਗਮਨੇਨ. ‘‘ਗਤਿਯਾ ਚਾ’’ਤਿ ਅਨਾਗਤਭਵੇ ਜਾਤਿਪਾਤੁਬ੍ਭਾਵਵਸੇਨ ਗਮਨੇਨ ਚ. ਆਦਿਸਙ੍ਖਾਤੋ ਪੁਬ੍ਬਪਰਿਯਨ੍ਤੋ ਯਸ੍ਸ ਅਤ੍ਥੀਤਿਆਦਿਮਨ੍ਤਂ. ਨ ਆਦਿਮਨ੍ਤਂ ਅਨਾਦਿਮਨ੍ਤਂ. ‘‘ਵਟ੍ਟਪ੍ਪਵਤ੍ਤਸ੍ਸਾ’’ਤਿ ਤਿਵਿਧਵਟ੍ਟਸਙ੍ਖਾਤਸ੍ਸ ਪਬਨ੍ਧਪ੍ਪਵਤ੍ਤਸ੍ਸ. ਜਾਤਿਯਾ ਵੁਤ੍ਤਾਯ ਸਬ੍ਬਾਨਿ ਤਸ੍ਸਾ ਨਿਦਾਨਾਨਿ ਵੁਤ੍ਤਾਨਿ ਏਵ ਹੋਨ੍ਤੀਤਿ ਕਤ੍ਵਾ ‘‘ਜਾਤਿਯਾ ਏਵ ਵਾ’’ਤਿ ਵੁਤ੍ਤਂ. ‘‘ਇਚ੍ਚੇਵਂ’’ਤਿ ਇਤਿ ਏਵਂ. ਤਤ੍ਥ ਅਵਿਜ੍ਜਾਪਚ੍ਚਯਾ ਸਙ੍ਖਾਰਾਤਿਆਦਿਨਾ ਨਯੇਨ ਪਟ੍ਠਪੇਸਿ ਮਹਾਮੁਨੀਤਿ ਸਮ੍ਬਨ੍ਧੋ. ਆਚਰਿਯ ਵਾਦੇਪਨ ‘‘ਇਚ੍ਚੇਵਂ’’ਤਿ ਜਰਾਮਰਣ ਮੁਚ੍ਛਾਯਾਤਿਆਦਿਨਾਨਯੇਨ. ਆਬਨ੍ਧਂ ਅਨਾਦਿਕਨ੍ਤਿ ਸਮ੍ਬਨ੍ਧੋ. ਇਧਪਿ ਤਮੇਵ ਸਮ੍ਬਨ੍ਧਂ ਗਹੇਤ੍ਵਾ ਯੋਜੇਤਿ ‘‘ਇਚ੍ਚੇਵਂ ਆਬਨ੍ਧਨ੍ਤਿ. ਲ. ਪੁਨਪ੍ਪੁਨਂ ਆਬਨ੍ਧਂ’’ਤਿ. ਅਵਿਜ੍ਜਾ ਆਦਿਮ੍ਹਿ ਵੁਤ੍ਤਾ. ਤਸ੍ਮਾ ਸਾ ਸਯਂ ਅਹੇਤੁ ਅਪਚ੍ਚਯਾ ਹੁਤ੍ਵਾ ਵਟ੍ਟਸ੍ਸ ਆਦਿਪਚ੍ਚਯਭੂਤਾ ਹੋਤੀਤਿ ਚੋਦਨਾ. ਤਂ ਪਰਿਹਰਤਿ ‘‘ਵਟ੍ਟਸ੍ਸਾ’’ਤਿਆਦਿਨਾ. ‘‘ਵਟ੍ਟਕਥਾਯ ਸੀਸਭੂਤਤ੍ਤਾ’’ਤਿ ਵਟ੍ਟਸ੍ਸ ਆਦਿਨਾਮ ਨਤ੍ਥਿ. ਤਸ੍ਸ ਪਨ ਪਵਤ੍ਤਿ ਨਿਵਤ੍ਤਿਯੋ ਅਤ੍ਥਿ. ਜਾਨਨ੍ਤੇਹਿ ਤਾਸਂ ਪਕਾਸਨਤ੍ਥਾਯ ਪਟਿਚ੍ਚਸਮੁਪ੍ਪਾਦਕਥਾਨਾਮ ਵਟ੍ਟਕਥਾ ਏਕਨ੍ਤੇਨ ਕਥੇਤਬ੍ਬਾ ਹੋਤਿ. ਕਥੇਨ੍ਤੇਹਿ ਚ ਵਟ੍ਟਧਮ੍ਮਾਨਂ ਮਜ੍ਝੇ ਕਤਮਸ੍ਸ ਧਮ੍ਮਸ੍ਸ ਕਿਚ੍ਚਂ ਵਟ੍ਟਪ੍ਪਵਤ੍ਤਤ੍ਥਾਯ ਪਧਾਨਤਰਂ ਹੋਤੀਤਿ ਜਾਨਿਤਬ੍ਬਂ ਹੋਤਿ. ਤਦਾ ਕਿਚ੍ਚਵਸੇਨ ਪਧਾਨਤਰਂ ਏਕਂ ਧਮ੍ਮਂ ਮੂਲਂ ਸੀਸਂ ਕਤ੍ਵਾ ਵਟ੍ਟਕਥਾ ਕਥੇਤਬ੍ਬਾਤਿ. ਇਦਂ ਵਟ੍ਟਕਥਾਯ ਸੀਸਂ ਨਾਮ. ਤਤ੍ਥ ਅਵਿਜ੍ਜਾ ਨਾਮ ਮੋਹੋ. ਸੋ ਚ ਮੁਯ੍ਹਨਕਿਰਿਯਾ. ਅਨ੍ਧਭਾਵਕਰਣਞ੍ਚਸ੍ਸ ਕਿਚ੍ਚਂ. ਨ ਚ ਪਞ੍ਞਾ ਚਕ੍ਖੁਸ੍ਸ ਅਨ੍ਧਭਾਵਕਰਣ ਸਦਿਸਂ ਅਞ੍ਞਂ ਵਟ੍ਟਸ੍ਸ ਪਵਤ੍ਤਤ੍ਥਾਯ ਪਧਾਨਕਿਚ੍ਚਂ ਨਾਮ ਅਤ੍ਥਿ. ਤਸ੍ਮਾ ਅਵਿਜ੍ਜਾ ਏਵੇਤ੍ਥ ਸਬ੍ਬਪ੍ਪਧਾਨ ਕਿਚ੍ਚਤ੍ਤਾ ਵਟ੍ਟਕਥਾਯ ਸੀਸਭੂਤਾ ਹੋਤਿ. ਏਵਂ ਵਟ੍ਟਕਥਾਯ ਸੀਸਭੂਤਤ੍ਤਾ ਸਾ ਆਦਿਮ੍ਹਿ ਵੁਤ੍ਤਾਤਿ. ‘‘ਅਨਾਦਿਕਭਾਵੋ ਏਵ ਦਸ੍ਸਿਤੋ’’ਤਿ ਅਨਾਦਿਕਭਾਵੋ ਦਸ੍ਸਿਤੋ ਏਵ. ਨੋ ਨ ਦਸ੍ਸਿਤੋਤਿ ਅਤ੍ਥੋ. ਇਤਿ ਏਤਂ ਅਤ੍ਥਜਾਤਂ ਪਚ੍ਚਕ੍ਖਤੋ ਸਿਦ੍ਧਂ. ‘‘ਇਧਾ’’ਤਿ ਇਮਸ੍ਮਿਂਭਵੇ. ‘‘ਤਸ੍ਸਾ’’ਤਿ ਅਤੀਤ ਭਵਪਰਿਯਾਪਨ੍ਨਾਯ ਅਵਿਜ੍ਜਾਯ. ‘‘ਅਞ੍ਞਾਯ ਅਵਿਜ੍ਜਾਯ ਏਵਾ’’ਤਿ ਅਤੀਤਭਵਤੋਪਿ ਪੁਰਿਮਭਵੇ ਸਿਦ੍ਧਾਯ ਅਞ੍ਞਾਯ ਅਵਿਜ੍ਜਾਯ ਏਵ. ‘‘ਤਸ੍ਸਾਪੀ’’ਤਿ ਪੁਰਿਮਤਰਭਵੇ ਅਵਿਜ੍ਜਾਯਪਿ. ‘‘ਅਤ੍ਤਭਾਵੋ’’ਤਿ ਪੁਰਿਮਤਰੋ ਅਤ੍ਤਭਾਵੋ. ‘‘ਪਧਾਨ ਪਚ੍ਚਯਭੂਤਤ੍ਤਾ’’ਤਿ ਪੁਬ੍ਬੇ ਵੁਤ੍ਤਨਯੇਨ ਅਨ੍ਧਭਾਵਕਰਣ ਕਿਚ੍ਚਤ੍ਤਾ ਵਟ੍ਟਪ੍ਪਵਤ੍ਤਿਯਾ ਪਧਾਨ ਪਚ੍ਚਯਭੂਤਾ ਹੋਤਿ. ਏਵਂ ਪਧਾਨਪਚ੍ਚਯਭੂਤਤ੍ਤਾ. ‘‘ਤਸ੍ਸ ਤਸ੍ਸਾਤਿ ਨਿਟ੍ਠਾਨਮੇਵ ਨ ਪਞ੍ਞਾਯੇਯ੍ਯਾ’’ਤਿ ਤਸ੍ਸ ਪਚ੍ਚਯਸ੍ਸ ਪਚ੍ਚਯੋ ਵਤ੍ਤਬ੍ਬੋ. ਤਸ੍ਸਪਿ ਪਚ੍ਚਯਸ੍ਸ ਪਚ੍ਚਯੋ ਵਤ੍ਤਬ੍ਬੋਤਿ ਏਵਂ ਵਸ੍ਸਸਤਮ੍ਪਿ ਵਸ੍ਸਸਹਸ੍ਸਂਪਿ ਨਿਟ੍ਠਾਨਮੇਵ ਨ ਪਞ੍ਞਾਯੇਯ੍ਯ. ‘‘ਵੁਤ੍ਤੋਯੇਵਾ’’ਤਿ ਅਵਿਜ੍ਜਾਯ ਪਚ੍ਚਯੋ ਵੁਤ੍ਤੋਯੇਵ. ‘‘ਪਞ੍ਚਨੀਵਰਣਾਤਿਸ੍ਸਵਚਨੀਯਂ’’ਤਿ ਪਞ੍ਚਨੀਵਰਣ ਧਮ੍ਮਾ ਅਵਿਜ੍ਜਾਯ ਆਹਾਰੋਤਿ ਵਚਨੀਯਂ ਭਵੇਯ੍ਯ. ਤਤ੍ਥ ‘‘ਆਹਾਰੋ’’ਤਿ ਬਲਵਪਚ੍ਚਯੋ ਵੁਚ੍ਚਤੀਤਿ.

ਪਟਿਚ੍ਚਸਮੁਪ੍ਪਾਦਨਯਾਨੁਦੀਪਨਾ ਨਿਟ੍ਠਿਤਾ.

੧੬੭. ਪਟ੍ਠਾਨਨਯੇ. ‘‘ਹੇਤੁ ਚ ਸੋ ਪਚ੍ਚਯੋ ਚਾ’’ਤਿ ਏਤ੍ਥ ਲੋਭੋ ਹੇਤੁਜਾਤਿਕਤ੍ਤਾ ਹੇਤੁ ਚ ਹੋਤਿ. ਆਰਮ੍ਮਣਾਨਨ੍ਤਰਾਦਿ ਪਚ੍ਚਯੇਨ ਅਞ੍ਞਧਮ੍ਮਸ੍ਸ ਪਚ੍ਚਯੋ ਚ ਹੋਤੀਤਿ ਅਤ੍ਥਸ੍ਸ ਸਮ੍ਭਵਤੋ ‘‘ਹੇਤੁ ਹੁਤ੍ਵਾ ਪਚ੍ਚਯੋ’’ਤਿ ਵਣ੍ਣੇਤਿ. ਏਵਂ ਵਣ੍ਣਿਤੇਪਿ ‘‘ਹੇਤੁ ਹੁਤ੍ਵਾ ਪਚ੍ਚਯੋ’’ਤਿ ਹੇਤੁ ਹੋਨ੍ਤੋ ਪਚ੍ਚਯੋਤਿ ਅਤ੍ਥੇ ਸਤਿ, ਸੋ ਯੇਵਤ੍ਥੋ ਸਮ੍ਭਵਤੀਤਿ ‘‘ਪੁਨ ਹੇਤੁਭਾਵੇਨ ਪਚ੍ਚਯੋ’’ਤਿ ਵਣ੍ਣੇਤਿ. ਏਤ੍ਥ ਸਿਯਾ, ਹੇਤੁ ਚ ਸੋ ਪਚ੍ਚਯੋ ਚਾਤਿ ਏਤ੍ਥ ਪਦ ਦ੍ਵਯਂ ਏਕਧਮ੍ਮਾਧਿਕਰਣਤ੍ਤਾ ਤੁਲ੍ਯਾਧਿਕਰਣਂ ਹੋਤਿ. ਹੇਤੁਭਾਵੇਨ ਪਚ੍ਚਯੋਤਿ ਏਤ੍ਥ ਪਨ ਪਦਦ੍ਵਯਂ ਤੁਲ੍ਯਾਧਿਕਰਣਂ ਨ ਹੋਤਿ. ਪੁਰਿਮ ਪਦਞ੍ਹਿ ਧਮ੍ਮ ਭਾਵਪ੍ਪਧਾਨਂ, ਪਚ੍ਛਿਮਂ ਧਮ੍ਮਪ੍ਪਧਾਨਨ੍ਤਿ. ਏਵਂ ਸਨ੍ਤੇ ਤੁਲ੍ਯਾਧਿਕਰਣਂ ਵਾਕ੍ਯਂ ਭਿਨ੍ਨਾਧਿਕਰਣਂ ਕਤ੍ਵਾ ਵਣ੍ਣੇਤੀਤਿ ਨ ਯੁਤ੍ਤਮੇਤਨ੍ਤਿ. ਨੋ ਨ ਯੁਤ੍ਤਂ. ਮੁਖ੍ਯੋਪਚਾਰਮਤ੍ਤੇਨ ਨਾਨਤ੍ਥਤ੍ਤਾ. ਪਚ੍ਛਿਮਵਾਕ੍ਯਂਹਿ ਮੁਖ੍ਯਵਚਨਂ. ਪੁਰਿਮਵਾਕ੍ਯਂ ਉਪਚਾਰ ਵਚਨਂ. ਉਪਚਾਰਵਚਨੇ ਚ ਉਪਚਾਰਤ੍ਥੋ ਯੁਜ੍ਜਤਿ. ਮੁਖ੍ਯਵਚਨੇ ਮੁਖ੍ਯਤ੍ਥੋਤਿ. ‘‘ਹੇਟ੍ਠਾਵੁਤ੍ਤਮੇਵਾ’’ਤਿ ਪਕਿਣ੍ਣਕਸਙ੍ਗਹੇ ਵੁਤ੍ਤਮੇਵ. ਹਿਨੋਨ੍ਤਿ ਏਤ੍ਥਾਤਿ ਹੇਤੁ. ਹਿਨੋਨ੍ਤਿ ਏਤੇਨਾਤਿ ਹੇਤੁ. ਤਤ੍ਥ ‘‘ਹਿਨੋਨ੍ਤੀ’’ਤਿ ਸੁਟ੍ਠੁਪਤਿਟ੍ਠਹਨ੍ਤਿ. ਕੇ ਪਤਿਟ੍ਠਹਨ੍ਤੀਤਿ ਆਹ ‘‘ਸਹਜਾਤ ਧਮ੍ਮਾ’’ਤਿ. ਕਥਞ੍ਚ ਸੁਟ੍ਠੁਪਤਿਟ੍ਠਹਨ੍ਤੀਤਿ ਆਹ ‘‘ਵੁਦ੍ਧਿ ਵਿਰੁਲ਼੍ਹਿ ਵੇਪੁਲ੍ਲਪਤ੍ਤਵਸੇਨਾ’’ਤਿ. ਕਸ੍ਮਾ ਤੇ ਸੁਟ੍ਠੁ ਪਤਿਟ੍ਠਹਨ੍ਤੀਤਿ. ਪਤਿਟ੍ਠਿਤਟ੍ਠਾਨਸ੍ਸ ਪਤਿਟ੍ਠਿਤਕਾਰਣਸ੍ਸ ਵਾ ਥਾਮਬਲਸਮ੍ਪਨ੍ਨਤ੍ਤਾਤਿ ਦਸ੍ਸੇਤੁਂ ‘‘ਆਰਮ੍ਮਣੇ ਦਲ਼੍ਹਨਿਪਾਤਿਨਾ ਥਾਮਬਲਸਮ੍ਪਨ੍ਨੇਨਾ’’ਤਿ ਵੁਤ੍ਤਂ. ਹੇਤੁਵਿਸੇਸਨਞ੍ਚੇਤਂ. ਆਰਮ੍ਮਣੇ ਦਲ਼੍ਹਨਿਪਾਤਿਮ੍ਹਿ ਥਾਮਬਲਸਮ੍ਪਨ੍ਨੇ ਏਤ੍ਥ ਧਮ੍ਮੇਤਿਪਿ ਯੋਜੇਤਬ੍ਬਂ. ਉਪਕਾਰਕੋਤਿ ਚ ਉਪਲਦ੍ਧਿਯੇਵਾਤਿ ਸਮ੍ਬਨ੍ਧੋ. ‘‘ਯਾਦਿਸੇਨਸਭਾਵੇਨਾ’’ਤਿ ਹੇਤੁਭਾਵਾਦਿਸਭਾਵੇਨ. ‘‘ਉਪਲਦ੍ਧਿਯੇਵਾ’’ਤਿ ਕਸ੍ਮਾ ਵੁਤ੍ਤਂ. ਨਨੁ ਉਪਕਾਰਕ ਸਦ੍ਦੋ ਕਤ੍ਤਾਰਂ ਵਾ ਕਾਰੇਤਾਰਂ ਵਾ ਵਦਤੀਤਿ. ਵੋਹਾਰਮਤ੍ਤੇਨ ਵਦਤਿ. ਧਮ੍ਮਤੋ ਪਨ ਕਤ੍ਤਾ ਵਾ ਕਾਰੇਤਾ ਵਾ ਨਤ੍ਥੀਤਿ ਦਸ੍ਸੇਤੁਂ ‘‘ਨ ਹਿ ਸਭਾਵ ਧਮ੍ਮੇਸੂ’’ਤਿਆਦਿਮਾਹ. ਯਦਿ ਧਮ੍ਮਤੋ ਕਤ੍ਤਾਵਾ ਕਾਰੇਤਾਵਾ ਨਤ੍ਥਿ. ਕਸ੍ਮਾ ਉਪਕਾਰਕੋਤਿ ਵੁਚ੍ਚਤੀਤਿ ਆਹ ‘‘ਤਥਾ ਉਪਲਦ੍ਧਿਯਂ ਪਨਾ’’ਤਿਆਦਿਂ.

ਆਰਮ੍ਮਣਪਚ੍ਚਯੇ. ‘‘ਅਜ੍ਝੋਲਮ੍ਬਮਾਨਾ’’ਤਿ ਆਰਮ੍ਮਣ ਕਰਣਵਸੇਨ ਅਧਿਓਲਮ੍ਬਮਾਨਾ. ‘‘ਆਰਮ੍ਮਣਭਾਵੇਨਾ’’ਤਿ ਗੋਚਰਵਿਸਯਭਾਵੇਨ.

ਅਧਿਪਤਿਪਚ੍ਚਯੇ. ‘‘ਗਰੁਕਤਾ’’ਤਿ ਅਸ੍ਸਾਦਨਾਭਿਨਨ੍ਦਨਾਦਿਵਸੇਨ ਵਾ ਸਦ੍ਧਾਪਸਾਦਾਦਿਵਸੇਨ ਵਾ ਗਰੁਕਤਾ. ‘‘ਸਾਮਿਨੋ ਵਿਯ ਦਾਸੇ’’ਤਿ ਸਾਮਿਨੋ ਅਤ੍ਤਨੋਦਾਸੇ ਅਤ੍ਤਨੋਵਸੇ ਵਤ੍ਤਯਮਾਨਾ ਵਿਯ. ਸਹਜਾਤਾਧਿਪਤਿ ਪਨ ਹੇਟ੍ਠਾ ਸਮੁਚ੍ਚਯ ਸਙ੍ਗਹੇ ਵੁਤ੍ਤੋਤਿ ਇਧ ਨ ਵੁਤ੍ਤੋ.

ਅਨਨ੍ਤਰਪਚ੍ਚਯਦ੍ਵਯੇ. ‘‘ਅਨ੍ਤਰਂ’’ਤਿ ਛਿਦ੍ਦਂ ਵਿਵਰਂ. ‘‘ਸਨ੍ਤਾਨਂ’’ਤਿ ਚਿਤ੍ਤਸਨ੍ਤਾਨਂ. ‘‘ਸਨ੍ਤਾਨਾਨੁਬਨ੍ਧਵਸੇਨਾ’’ਤਿ ਚਿਤ੍ਤਸਨ੍ਤਾਨਂ ਪੁਨਪ੍ਪੁਨਂ ਬਨ੍ਧਨਵਸੇਨ. ਉਪ੍ਪਾਦਨਨ੍ਤਿ ਸਮ੍ਬਨ੍ਧੋ. ‘‘ਧਮ੍ਮਨ੍ਤਰਸ੍ਸਾ’’ਤਿ ਨਾਮਕ੍ਖਨ੍ਧ ਧਮ੍ਮਨ੍ਤਰਸ੍ਸ. ‘‘ਅਨਨ੍ਤਰ ਪਚ੍ਚਯਤਾ’’ਤਿ ਅਨਨ੍ਤਰਪਚ੍ਚਯ ਕਿਚ੍ਚਨ੍ਤਿ ਵੁਤ੍ਤਂ ਹੋਤਿ. ਯਂ ਕਿਞ੍ਚਿ ਧਮ੍ਮਨ੍ਤਰਂ. ‘‘ਪੁਰਿਮਪਚ੍ਛਿਮਭਾਗਪ੍ਪਵਤ੍ਤਾਨਂ’’ਤਿ ਨਿਰੋਧਸ੍ਸ ਅਸਞ੍ਞੀਭਵਸ੍ਸ ਚ ਪੁਰਿਮਭਾਗੇ ਚ ਪਚ੍ਛਿਮਭਾਗੇ ਚ ਪਵਤ੍ਤਾਨਂ. ‘‘ਚਿਤ੍ਤੁਪ੍ਪਾਦਾਨਂ ਪੀ’’ਤਿ ਨਿਰੋਧਸ੍ਸ ਪੁਬ੍ਬਭਾਗੇ ਨੇਵਸਞ੍ਞਾਨਾਸਞ੍ਞਾਯਤਨ ਕੁਸਲ ਕ੍ਰਿਯ ਚਿਤ੍ਤੁਪ੍ਪਾਦਾਨਂ. ਪਚ੍ਛਾਭਾਗੇ ਅਨਾਗਾਮਿਫਲ ਅਰਹਤ੍ਤਫਲਚਿਤ੍ਤੁਪ੍ਪਾਦਾਨਂ. ਅਸਞ੍ਞੀਭਵਸ੍ਸ ਪੁਬ੍ਬਭਾਗੇ ਕਾਮਭਵੇ ਚੁਤਿ ਚਿਤ੍ਤੁਪ੍ਪਾਦਾਨਂ. ਪਚ੍ਛਾਭਾਗੇ ਕਾਮਭਵੇ ਏਵ ਪਟਿਸਨ੍ਧਿ ਚਿਤ੍ਤੁਪ੍ਪਾਦਾਨਂ. ਤੇਸੁ ਪਨ ਕਥਂ ਅਨਨ੍ਤਰਂ ਨਾਮ ਸਿਯਾ. ਦ੍ਵਿਨ੍ਨਂ ਦ੍ਵਿਨ੍ਨਂ ਪੁਰਿਮਭਾਗ ਪਚ੍ਛਿਮ ਭਾਗਾਨਂ ਮਜ੍ਝੇ ਅਚਿਤ੍ਤਕਸ੍ਸ ਕਾਲਸ੍ਸ ਅਚਿਤ੍ਤਕਸ੍ਸ ਰੂਪਸਨ੍ਤਾਨਸ੍ਸ ਚ ਅਨ੍ਤਰਿਕਤ੍ਤਾਤਿ ਚੋਦਨਾ. ਤਂ ਪਰਿਹਰਿਤੁਂ ‘‘ਨ ਹਿ ਅਭਾਵਭੂਤੋ’’ਤਿਆਦਿ ਵੁਤ੍ਤਂ. ‘‘ਤੇਸਂ’’ਤਿ ਦ੍ਵਿਨ੍ਨਂ ਦ੍ਵਿਨ੍ਨਂ ਚਿਤ੍ਤੁਪ੍ਪਾਦਾਨਂ. ਰੂਪਧਮ੍ਮੋ ਅਨ੍ਤਰਂ ਨ ਚ ਕਰੋਤਿ ਨਾਮ. ਅਰੂਪਧਮ੍ਮਾਨਂ ਅਨਨ੍ਤਰਤਾ ਨਾਮਾਤਿਆਦਿਨਾ ਯੋਜਨਾ ਹੋਤਿ. ‘‘ਤਥਾਪਵਤ੍ਤਨ ਸਮਤ੍ਥਤਾ’’ਤਿ ਏਕੀਭੂਤਾਨਂ ਵਿਯ ਅਤ੍ਤਨੋ ਅਨਨ੍ਤਰੇ ਧਮ੍ਮਨ੍ਤਰਂ ਉਪ੍ਪਾਦਨੇ ਸਮਤ੍ਥਤਾ.

ਸਹਜਾਤਪਚ੍ਚਯੇ. ‘‘ਯੇ ਪਨ ਧਮ੍ਮਾ’’ਤਿ ਪਚ੍ਚਯੁਪ੍ਪਨ੍ਨ ਧਮ੍ਮਾ. ‘‘ਅਤ੍ਤਨੀ’’ਤਿ ਪਚ੍ਚਯ ਧਮ੍ਮੋ ਵੁਚ੍ਚਤਿ.

‘‘ਅਞ੍ਞਮਞ੍ਞਂ ਉਪਤ੍ਥਮ੍ਭਨ੍ਤਂ ਤਿਦਣ੍ਡਂ ਵਿਯਾ’’ਤਿ ਭੂਮਿਯਂ ਅਞ੍ਞਮਞ੍ਞਂ ਨਿਸ੍ਸਾਯ ਉਸ੍ਸਿਤਾ ਤਯੋਦਣ੍ਡਾ ਅਞ੍ਞਮਞ੍ਞਂ ਉਪਤ੍ਥਮ੍ਭਨ੍ਤਾ ਵਿਯ. ‘‘ਪੁਰਿਮੇਨਾ’’ਤਿ ਪੁਰਿਮੇਨ ਸਹਜਾਤ ਪਚ੍ਚਯੇਨ. ‘‘ਇਤਰੀਤਰੋ ਪਤ੍ਥਮ੍ਭਨਂ’’ਤਿ ਅਞ੍ਞਮਞ੍ਞੋ ਪਤ੍ਥਮ੍ਭਨਂ.

‘‘ਸੂਦੋ’’ਤਿ ਭਤ੍ਤਕਾਰਕੋ. ‘‘ਉਕ੍ਖਲੀ’’ਤਿ ਭਤ੍ਤਪਚਨਕੁਮ੍ਭੀ. ‘‘ਵੁਟ੍ਠਿਧਾਰਾ’’ਤਿ ਮੇਘਵੁਟ੍ਠਿਧਾਰਾ. ‘‘ਉਪਨਿਸ੍ਸਯੋ’’ਤਿ ਭਤ੍ਤੁਪ੍ਪਤ੍ਤਿਯਾ ਉਪਨਿਸ੍ਸਯੋ. ‘‘ਤਾਸੁ ਅਸਤੀ’’ਤਿ ਸਾਲਿਕ੍ਖੇਤ੍ਤ ਵੁਟ੍ਠਿਧਾਰਾਸੁ ਅਸਤਿ. ‘‘ਬਲਵਤਰਟ੍ਠੇਨਾ’’ਤਿ ਬਲਵਤਰਨਿਸ੍ਸਯਟ੍ਠੇਨ. ‘‘ਪਕਤੂਪਨਿਸ੍ਸਯੋ’’ਤਿ ਏਤ੍ਥ ‘‘ਪਕਤੋ’’ਤਿ ਭੁਸਂ ਕਤੋ. ਤੇਨਾਹ ‘‘ਸੁਟ੍ਠੁਕਤੋ’’ਤਿ. ਕਰਣਞ੍ਚ ਅਤ੍ਤਨੋ ਸਨ੍ਤਾਨੇ ਸੁਟ੍ਠੁਉਪ੍ਪਾਦਨਞ੍ਚ ਸੁਟ੍ਠੁਉਪਸੇਵਨਞ੍ਚ ਦਟ੍ਠਬ੍ਬਨ੍ਤਿ ਸਮ੍ਬਨ੍ਧੋ. ‘‘ਵੁਤ੍ਤਪ੍ਪਕਾਰੇਨਾ’’ਤਿ ‘ਯਥਾ ਕਤੇ ਸਤੀ’ਤਿਆਦਿਨਾ ਵੁਤ੍ਤਪ੍ਪਕਾਰੇਨ.

‘‘ਨਿਸ੍ਸਯਾਰਮ੍ਮਣ ਧਮ੍ਮਾ ਏਵਾ’’ਤਿ ਨਿਸ੍ਸਯ ਪਚ੍ਚਯ ਧਮ੍ਮ ਆਰਮ੍ਮਣ ਪਚ੍ਚਯ ਧਮ੍ਮਾ ਏਵ. ‘‘ਪੁਰੇਜਾਤਤਾਮਤ੍ਤਵਿਸਿਟ੍ਠਾ’’ਤਿ ਏਤ੍ਥ ਮਤ੍ਤਸਦ੍ਦੇਨ ਨਿਸ੍ਸਯਾਰਮ੍ਮਣਸਤ੍ਤਿਤੋ ਵਿਸੁਂ ਪੁਰੇਜਾਤਸਤ੍ਤਿ ਨਾਮ ਨਤ੍ਥੀਤਿ ਦਸ੍ਸੇਤਿ. ਵਿਸੁਂ ਪੁਰੇਜਾਤਸਤ੍ਤਿ ਨਾਮ ਅਤ੍ਥੀਤਿਪਿ ਵਦਨ੍ਤਿ. ਤਂ ਵਾਦਂ ਦਸ੍ਸੇਤੁਂ ‘‘ਆਚਰਿਯਾਨਨ੍ਦਤ੍ਥੇਰੇਨਾ’’ਤਿਆਦਿਮਾਹ. ਏਤ੍ਥ ਪਞ੍ਚਵਤ੍ਥੂਨਿ ਚ ਪਞ੍ਚਾਰਮ੍ਮਣਾਨਿ ਚ ਪੁਰੇਜਾਤਤ੍ਤਾ ਏਵ ਸੁਟ੍ਠੁਬਲਵਤਾਯ ਪਞ੍ਚਵਿਞ੍ਞਾਣਾਨਂ ਵਤ੍ਥੁ ਕਿਚ੍ਚ ਆਰਮ੍ਮਣ ਕਿਚ੍ਚਾਨਿ ਸਾਧੇਨ੍ਤਿ. ਤਥਾ ਹਦਯਵਤ੍ਥੁ ਚ ਮਨੋਧਾਤੁ ਮਨੋਵਿਞ੍ਞਾਣਧਾਤੂ ਨਨ੍ਤਿ. ਅਯਂ ਵਿਸੁਂ ਪੁਰੇਜਾਤਸਤ੍ਤਿ ਵਿਸੇਸੋਤਿ ਵਦੇਯ੍ਯ. ਸਚ੍ਚਂ. ਸੁਦ੍ਧਮਨੋ ਦ੍ਵਾਰੇਪਨ ਇਧ ਠਤ੍ਵਾ ਨਿਰਯੇਸੁ ਏਵਰੂਪਾਨਿ ਨਿਰਯਗ੍ਗਿਰੂਪਾਨਿ ਅਤ੍ਥਿ. ਇਦਾਨਿ ਦੇਵੇਸੁ ਚ ਏਵਰੂਪਾਨਿ ਦਿਬ੍ਬਰੂਪਾਨਿ ਅਤ੍ਥੀਤਿ ਚਿਨ੍ਤਯਨ੍ਤਾਨਮ੍ਪਿ, ਤੇਸੁ ਪੁਰੇ ਏਵਰੂਪਾਨਿ ਉਪ੍ਪਜ੍ਜਿਂਸੂਤਿ ਵਾ, ਤੇਸੁ ਅਨਾਗਤੇ ਏਵਰੂਪਾਨਿ ਉਪ੍ਪਜ੍ਜਿਸ੍ਸਨ੍ਤੀਤਿ ਵਾ ਚਿਨ੍ਤਯਨ੍ਤਾਨਂਪਿਤਾਨਿ ਰੂਪਾਨਿ ਨਿਬ੍ਬਿਸੇਸਾਨਿ ਹੁਤ੍ਵਾ ਮਨੋਵਿਞ੍ਞਾਣਾਨਂ ਆਰਮ੍ਮਣ ਪਚ੍ਚਯਤ੍ਤਂ ਗਚ੍ਛਨ੍ਤਿ. ਤਤ੍ਥ ਪੁਰੇ ਜਾਤਾਨਿ ਹੁਤ੍ਵਾ ਤਦਾ ਵਿਜ੍ਜਮਾਨਾਨਿ ਪਚ੍ਚੁਪ੍ਪਨ੍ਨਰੂਪਾਨਿ ਆਰਮ੍ਮਣ ਪੁਰੇਜਾਤਪਚ੍ਚਯੋ. ਇਤਰਾਨਿ ਆਰਮ੍ਮਣ ਪਚ੍ਚਯੋ ਏਵ. ਨ ਚੇਤ੍ਥ ਪੁਰੇਜਾਤਾਨਂ ਪਚ੍ਚੁਪ੍ਪਨ੍ਨਰੂਪਾਨਂ ਪੁਰੇਜਾਤਤ੍ਤੇਨ ਵਿਸੇਸੋ ਅਤ੍ਥਿ. ਨ ਚ ਤਾਨਿ ਪੁਰੇਜਾਤਪਚ੍ਚਯੋ ਨ ਹੋਨ੍ਤਿ. ਯਦਿ ਵਿਸੁਂ ਪੁਰੇਜਾਤਸਤ੍ਤਿਵਿਸੇਸੋ ਪੁਰੇਜਾਤਪਚ੍ਚਯੋਤਿ ਵਦੇਯ੍ਯ. ਤਾਨਿ ਪੁਰੇਜਾਤਪਚ੍ਚਯੋ ਨਾਮ ਨ ਭਵੇਯ੍ਯੁਂ. ਕਸ੍ਮਾ, ਤਾਦਿਸਸ੍ਸ ਵਿਸੇਸਸ੍ਸ ਨਤ੍ਥਿਤਾਯ. ਨ ਚ ਨਭਵਨ੍ਤਿ. ਕਸ੍ਮਾ, ਪੁਰੇਜਾਤਮਤ੍ਤਵਿਸੇਸਸ੍ਸ ਅਤ੍ਥਿਤਾਯ. ਏਤ੍ਥ ਵਦੇਯ੍ਯੁਂ, ਪਞ੍ਚਦ੍ਵਾਰੇਸੁ ਪਨ ਪੁਬ੍ਬੇ ਵੁਤ੍ਤਨਯੇਨ ਵਿਸੁਂ ਪੁਰੇਜਾਤਸਤ੍ਤਿਵਿਸੇਸੋ ਦਿਸ੍ਸਤੀਤਿ. ਕਿਞ੍ਚਾਪਿਦਿਸ੍ਸਤਿ. ਸੋ ਪਨ ਬਹੁਵਿਧਾਨਂ ਨਿਸ੍ਸਯ ਪਚ੍ਚਯ ਆਰਮ੍ਮਣਪਚ੍ਚਯਾਨਂ ਮਜ੍ਝੇ ਨਿਸ੍ਸਯ ਸਤ੍ਤਿਵਿਸੇਸੋ ਏਵ, ਆਰਮ੍ਮਣ ਸਤ੍ਤਿਵਿਸੇਸੋ ਏਵ ਚਾਤਿ. ਅਪਿ ਚ ਵਿਸੁਂ ਪੁਰੇਜਾਤ ਸਤ੍ਤਿਵਿਸੇਸੋ ਨਾਮ ਨਤ੍ਥੀਤਿ ਇਦਂ ਯਥਾਵੁਤ੍ਤੇ ਸੁਦ੍ਧਮਨੋਦ੍ਵਾਰੇ ਤਬ੍ਬਿਸੇਸਾਭਾਵਂ ਸਨ੍ਧਾਯ ਵੁਤ੍ਤਂ. ਵਿਸੁਂ ਪੁਰੇਜਾਤ ਸਤ੍ਤਿਵਿਸੇਸੋ ਨਾਮ ਅਤ੍ਥੀਤਿ ਇਦਂ ਪਞ੍ਚਦ੍ਵਾਰੇਸੁ ਤਬ੍ਬਿਸੇਸਸ੍ਸ ਅਤ੍ਥਿਭਾਵਂ ਸਨ੍ਧਾਯ ਵੁਤ੍ਤਨ੍ਤਿ. ਯਂ ਰੁਚ੍ਚਤਿ, ਤਂ ਗਹੇਤਬ੍ਬਂ.

ਪਚ੍ਛਾਜਾਤਪਚ੍ਚਯੇ. ‘‘ਰੁਕ੍ਖਪੋਤਕਾਨਂ ਵਿਯਾ’’ਤਿ ਪਚ੍ਛਾ ਆਸਿਞ੍ਚਿਯਮਾਨਂ ਉਦਕਂ ਰੁਕ੍ਖਪੋਤਕਾਨਂ ਵੁਦ੍ਧਵਿਰੁਲ਼੍ਹਭਾਵਂ ਪਾਪੇਤ੍ਵਾ ਉਪਤ੍ਥਮ੍ਭਨਵਸੇਨ ਉਪਕਾਰਕੋ ਵਿਯਾਤਿ ਯੋਜਨਾ. ਆਹਾਰਂ ਆਸਿਂ ਸਤੀਤਿ ਆਹਾਰਾਸਾ. ਜਿਘਚ੍ਛਾ, ਪਿਪਾਸਾ, ਤਣ੍ਹਾ. ਤਾਯ ਸਮ੍ਪਯੁਤ੍ਤਾ ਚੇਤਨਾਤਿ ਵਿਗ੍ਗਹੋ. ਸਾ ਪਨ ਆਹਾਰਾਸਾ ਚੇਤਨਾ ਉਪਤ੍ਥਮ੍ਭਤਿ ਯੇਵਾਤਿ ਸਮ੍ਬਨ੍ਧੋ. ‘‘ਅਯਮਤ੍ਥੋ’’ਤਿ ‘ਸੁਪਾਕਟੇਨਾ’ਤਿਆਦਿਨਾ ਵੁਤ੍ਤੋ ਅਯਮਤ੍ਥੋ. ਸਬ੍ਬਾਚੇਸਾਵਿਚਾਰਣਾ ਗਿਜ੍ਝੋਪਮਾਯ ਉਪਮਾਮਤ੍ਤਭਾਵਂ ਨੀਵਾਰੇਤਾ ਹੋਤੀਤਿ.

ਆਸੇਵਨ੍ਤਿ ਤਂ ਪਚ੍ਚਯ ਧਮ੍ਮਂ ਪਚ੍ਚਯੁਪ੍ਪਨ੍ਨਾ ਧਮ੍ਮਾਤਿ ਆਸੇਵਨਂ. ਏਤੇਨ ਭੁਸੋ ਪਚ੍ਚਯੁਪ੍ਪਨ੍ਨ ਧਮ੍ਮੇਹਿ ਆਸੇਵਿਤਬ੍ਬਤ੍ਤਾ ਆਸੇਵਨਨ੍ਤਿ ਵੁਚ੍ਚਤੀਤਿ ਦਸ੍ਸੇਤੀਤਿ. ‘‘ਤਂ’’ਤਿ ਤਂ ਪੁਰਿਮਂ ਪੁਰਿਮਂ ਪਚ੍ਚਯ ਧਮ੍ਮਂ. ‘‘ਭਜਨ੍ਤੀ’’ਤਿ ਉਪੇਨ੍ਤਿ. ਕੇ ਭਜਨ੍ਤੀਤਿ ਆਹ ‘‘ਅਪਰਾਪਰਂ ਉਪ੍ਪਜ੍ਜਮਾਨਾ ਧਮ੍ਮਾ’’ਤਿ. ‘‘ਧਮ੍ਮਾ’’ਤਿ ਚ ਅਨਨ੍ਤਰੁਪ੍ਪਨ੍ਨਾ ਚਿਤ੍ਤਚੇਤਸਿਕਾ ਧਮ੍ਮਾ. ਕਥਞ੍ਚ ਤਂ ਤੇਭਜਨ੍ਤੀਤਿ ਆਹ ‘‘ਸੁਟ੍ਠੁਸੇਵਮਾਨਾ ਵਿਯ ਭਜਮਾਨਾ ਵਿਯ ਪਵਤ੍ਤਨ੍ਤੀ’’ਤਿ. ਵਿਯ ਸਦ੍ਦੇਨ ਲੋਕੇ ਕਿਞ੍ਚਿਜਨਂ ਕੇਚਿਜਨਾ ਕੇਨਚਿ ਅਤ੍ਥੇਨ ਸੁਟ੍ਠੁਸੇਵਨ੍ਤਾ ਵਿਯਾਤਿ ਦਸ੍ਸੇਤਿ. ਕਥਂ ਸੁਟ੍ਠੁਸੇਵਿਯਮਾਨਾ ਵਿਯ ਹੋਨ੍ਤੀਤਿ ਆਹ ‘‘ਤਸ੍ਸ ਪੁਰਿਮਸ੍ਸਾ’’ਤਿਆਦਿਂ. ਪੁਰਿਮਸ੍ਸ ਅਨਨ੍ਤਰਸ੍ਸ ਚਿਤ੍ਤੁਪ੍ਪਾਦਸ੍ਸਾਤਿ ਅਤ੍ਥੋ. ‘‘ਸਬ੍ਬਪਰਿਪੂਰਂ ਆਕਾਰਂ’’ਤਿ ਜਵਵੇਗਸਹਿਤੇਹਿ ਵਿਜਾਨਨ ਫੁਸਨਾਦੀਹਿ ਸਾਵਜ੍ਜਾਨ ਵਜ੍ਜਾਦੀਹਿ ਚ ਸਬ੍ਬੇਹਿ ਜਵਨਗੁਣੇਹਿ ਪਰਿਪੂਰਂ ਆਕਾਰਂ. ‘‘ਆਸੇਵੇਤੀ’’ਤਿ ਮਂ ਸੁਟ੍ਠੁ ਸੇਵਥਾਤਿ ਨਿਯੋਜੇਨ੍ਤਂ ਵਿਯ ਹੋਤਿ. ਤੇਨਾਹ ‘‘ਅਤ੍ਤਨੋ ਵਾਸਂ’’ਤਿਆਦਿਂ. ਤਤ੍ਥ ‘‘ਵਾਸਂ’’ਤਿ ਵਾਸਨਂ. ‘‘ਸੁਟ੍ਠੁ ਗਾਹਾਪੇਤੀ’’ਤਿ ਪਰਿਪੁਣ੍ਣਂ ਦੇਤੀਤਿ ਵੁਤ੍ਤਂ ਹੋਤਿ. ਏਤੇਨ ਯਥਾ ਲੋਕੇ ਏਕੋ ਪਰੇਸਂ ਯਥਿਚ੍ਛਿਤਂ ਦੇਤਿ. ਏਵਂ ਦੇਨ੍ਤਂ ਪਨ ਪਰੇ ਭਜਨ੍ਤਿਯੇਵ. ਮਂ ਭਜਥਾਤਿ ਨਿਯੋਜਨਕਿਚ੍ਚਂ ਨਤ੍ਥਿ. ਏਵਮੇਵ ਇਧਪਿ ਸੁਟ੍ਠੁਵਾਸਦਾਨਮੇਵ ਭਜਾਪਨਂ ਨਾਮਾਤਿ ਦਸ੍ਸੇਤਿ. ‘‘ਵਡ੍ਢੇਤਿ ਵਾ’’ਤਿ ਏਤੇਨ ਆਸੇਵਨਾ ਭਾਵਨਾ ਵਡ੍ਢਨਾਤਿ ਇਮਂਪਰਿਯਾਯਤ੍ਥਂ ਵਦਤਿ. ਪੁਰਿਮਾਭਿਯੋਗੋ ਨਾਮ ਆਦਿਤੋ ਪਟ੍ਠਾਯ ਸਜ੍ਝਾਯਨਾਦਿਕਮ੍ਮੇਸੁ ਯਥਾਸਤ੍ਤਿ ਯਥਾਬਲਂ ਵਾ ਯਾਮਕਰਣਂ. ਤਥਾ ਕਰੋਨ੍ਤਸ੍ਸ ਤਂ ਉਗ੍ਗਹਣ ਕਮ੍ਮਂ ਉਪਰੂਪਰਿ ਪਗੁਣਭਾਵਂ ਗਚ੍ਛਤੀਤਿ. ‘‘ਆਸੇਵਨਟ੍ਠੇਨਾ’’ਤਿ ਵਡ੍ਢਾਪਨਟ੍ਠੇਨ, ਉਪਕਾਰਕੋਤਿ ਸਮ੍ਬਨ੍ਧੋ. ‘‘ਸਜਾਤਿਯਾਨਂ’’ਤਿ ਕੁਸਲਾਦਿਭਾਵੇਨ ਸਮਾਨਜਾਤਿਕਾਨਂ.

ਕਾਯਙ੍ਗਾਭਿਸਙ੍ਖਰਣਂ ਨਾਮ ਕਾਯਸਞ੍ਚੇਤਨਾਕਿਚ੍ਚਂ. ਵਾਚਙ੍ਗਾਭਿਸਙ੍ਖਰਣਂ ਵਚੀਸਞ੍ਚੇਤਨਾਕਿਚ੍ਚਂ. ਚਿਤ੍ਤਙ੍ਗਾਭਿਸਙ੍ਖਰਣਂ ਮਨੋਸਞ੍ਚੇਤਨਾਕਿਚ੍ਚਂ. ‘‘ਕਿਰਿਯਾਭਾਵੇਨਾ’’ਤਿ ਦਸ੍ਸਨਸਵਨਾਦਿਕਿਚ੍ਚੇਸੁ ਗਮਨਠਾਨ ਨਿਸਜ੍ਜਾਦਿਕਿਚ੍ਚੇਸੁ ਸਂਵਿਧਾਨਕਿਰਿਯਾਭਾਵੇਨ. ‘‘ਵਤ੍ਥੁਮ੍ਹੀ’’ਤਿ ਗਬ੍ਭਵਤ੍ਥੁਮ੍ਹਿ. ਯਥਾਵੁਤ੍ਤਾਭਿਸਙ੍ਖਰਣਕਿਚ੍ਚਂ ਨਾਮ ਕਾਯਙ੍ਗਵਾਚਙ੍ਗ ਚਿਤ੍ਤਙ੍ਗਾਭਿਸਙ੍ਖਰਣ ਕਿਚ੍ਚਂ. ‘‘ਤਦਭਿਸਙ੍ਖਰਣਵੇਗਜਨਿਤਂ’’ਤਿ ਤਸ੍ਸ ਕਾਯਙ੍ਗਾਦਿਕਸ੍ਸ ਅਭਿਸਙ੍ਖਰਣਵੇਗੇਨ ਜਨਿਤਂ ਕਿਰਿਯਾਵਿਸੇਸ ਨਿਧਾਨਕਿਚ੍ਚਨ੍ਤਿ ਸਮ੍ਬਨ੍ਧੋ. ‘‘ਸਨ੍ਤਾਨੇ’’ਤਿ ਚਿਤ੍ਤਸਨ੍ਤਾਨੇ.

ਵਿਪਚ੍ਚਨਭਾਵੋ ਚ ਨਾਮ ਪਾਤੁਭਾਵੋਤਿ ਸਮ੍ਬਨ੍ਧੋ. ਨਿਰੁਸ੍ਸਾਹ ਸਨ੍ਤਭਾਵੋ ਨਾਮ ਕੁਸਲਾ ਕੁਸਲਾਨਂ ਵਿਯ ਕਾਯਙ੍ਗਵਾਚਙ੍ਗਾਭਿਸਙ੍ਖਰਣ ਕਿਚ੍ਚੇਸੁ ਚ ਆਯਤਿਂ ਵਿਪਚ੍ਚਨ ਕਿਚ੍ਚੇਸੁ ਚ ਨਿਰੁਸ੍ਸਾਹਭਾਵੇਨ ਸਨ੍ਤਭਾਵੋ. ਨ ਕਿਲੇਸੁ ਪਸਨ੍ਤਭਾਵੇਨ. ਚਿਤ੍ਤਾਭਿਸਙ੍ਖਰਣ ਕਿਚ੍ਚੇਸੁਪਨ ਸਮ੍ਪਯੁਤ੍ਤਚੇਤਨਾਵਸੇਨ ਯਥੋਪਟ੍ਠਿਤੇਸੁ ਆਰਮ੍ਮਣੇਸੁ ਸਮ੍ਪਯੁਤ੍ਤਧਮ੍ਮਾਨਂ ਏਕਤੋ ਸਨ੍ਨਿਪਾਤਗਮਨੁਸ੍ਸਾਹਮਤ੍ਤਂ ਅਤ੍ਥਿ. ਤਤੋਪਰਂ ਪਨ ਸੁਪਿਨ ਦਸ੍ਸਨ ਕਿਚ੍ਚਂਪਿ ਨਤ੍ਥੀਤਿ. ‘‘ਮਨ੍ਦਮਨ੍ਦਾਕਾਰੇਨਾ’’ਤਿ ਮਨ੍ਦਤੋ ਅਤਿਮਨ੍ਦਾਕਾਰੇਨ. ਕਿਞ੍ਚਿਜਾਨਨ ਚਿਤ੍ਤਂ ਨਾਮ ਕਮ੍ਮਾਦਿ ਆਰਮ੍ਮਣਂ ਅਪ੍ਪਮਤ੍ਤਕਂਪਿ ਜਾਨਨਂ ਵੀਥਿਚਿਤ੍ਤਂ. ਤਸ੍ਸ ਪਵਤ੍ਤਿਯਾ.

‘‘ਅਰੂਪਿਨੋ’’ਤਿ ਅਰੂਪਲਕ੍ਖਣ ਸਮਙ੍ਗਿਨੋ. ਨਾਮਲਕ੍ਖਣ ਸਮਙ੍ਗੀਨੋਤਿ ਵੁਤ੍ਤਂ ਹੋਤਿ. ‘‘ਜਨਯਨ੍ਤਾਪੀ’’ਤਿ ਸਹਜਾਤ ਧਮ੍ਮੇ ਜਨੇਨ੍ਤਾਪਿ. ‘‘ਸਨ੍ਤਾਨਟ੍ਠਿਤਿਯਾ’’ਤਿ ਪਬਨ੍ਧਪ੍ਪਤਿਟ੍ਠਾਨਸ੍ਸ.

‘‘ਕਸ੍ਮਾਪਨੇਤ੍ਥਾ’’ਤਿਆਦੀਸੁ. ‘‘ਭਾਵਿਨ੍ਦ੍ਰਿਯ ਦ੍ਵਯਂ’’ਤਿ ਇਤ੍ਥਿਨ੍ਦ੍ਰਿਯ ਪੁਰਿਸਿਨ੍ਦ੍ਰਿਯ ਦ੍ਵਯਂ. ‘‘ਇਧਾ’’ਤਿ ਇਮਸ੍ਮਿਂ ਇਨ੍ਦ੍ਰਿਯਪਚ੍ਚਯੇ. ਕਸ੍ਮਾ ਨ ਗਹਿਤਂ. ਨਨੁ ਇਤ੍ਥਿਲਿਙ੍ਗਾਦੀਨਂ ਪਵਤ੍ਤਿਕਾਰਣਤ੍ਤਾ ਇਧ ਗਹੇਤਬ੍ਬਮੇਵਾਤਿ ਅਧਿਪ੍ਪਾਯੋ. ਜਨਕਤ੍ਤਂ ਨਾਮ ਜਨਕ ਕਿਚ੍ਚਂ. ਏਵਂ ਸੇਸੇਸੁਪਿ. ‘‘ਏਤਂਤਯਂਪਿ ਨਤ੍ਥੀ’’ਤਿ ਜਨਕਤ੍ਤਾਦਿਕਿਚ੍ਚਤ੍ਤਯਂਪਿ ਨਤ੍ਥਿ. ਏਵਂਸਨ੍ਤੇਕਥਂ ਲਿਙ੍ਗਾਦੀਨਂ ਪਵਤ੍ਤਿਕਾਰਣਂ ਹੋਤੀਤਿਆਹ ‘‘ਕੇਵਲਂ ਪਨਾ’’ਤਿਆਦਿਂ. ‘‘ਦ੍ਵਯਂ’’ਤਿ ਇਤ੍ਥਿਭਾਵਪੁਮ੍ਭਾਵ ਦ੍ਵਯਂ. ਨ ਇਨ੍ਦ੍ਰਿਯ ਪਚ੍ਚਯਤ੍ਤੇਨ ਇਨ੍ਦ੍ਰਿਯਂ ਨਾਮ ਹੋਤਿ. ਯਥਾਹਿ ਏਕੋ ਰਾਜਾ ਅਤ੍ਤਨੋ ਵਿਜਿਤੇ ਗੇਹਾਨਿ ਕਰੋਨ੍ਤਿ. ਏਵਂ ਕਰੋਨ੍ਤੂਤਿ ਗੇਹਸਣ੍ਠਾਨਂ ਪਟ੍ਠਪੇਤਿ. ਸਬ੍ਬੇਜਨਾ ਤਥੇਵ ਕਰੋਨ੍ਤਿ, ਨੋ ਅਞ੍ਞਥਾ. ਤਤ੍ਥ ਰਾਜਾ ਗੇਹੁਪ੍ਪਤ੍ਤਿਯਾ ਚ ਗੇਹਟ੍ਠਿਤਿਯਾ ਚ ਕਿਞ੍ਚਿ ਕਿਚ੍ਚਂ ਨ ਕਰੋਤਿ. ਗੇਹਸਾਮਿਕਾਵਾ ਗੇਹਵਡ੍ਢਕਿਨੋ ਵਾ ਕਰੋਨ੍ਤਿ. ਕਰੋਨ੍ਤਾ ਪਨ ਰਞ੍ਞਾ ਪਟ੍ਠਪਿਤਂ ਸਣ੍ਠਾਨਂ ਅਨਤਿਕ੍ਕਮਿਤ੍ਵਾਵ ਕਰੋਨ੍ਤਿ. ਏਵਮੇਵ ਮਿਦਂ ਦਟ੍ਠਬ੍ਬਂ. ਉਪਗਨ੍ਤ੍ਵਾ ਝਾਯਨਟ੍ਠੇਨਾਤਿ ਸਮ੍ਬਨ੍ਧੋ. ਉਪਸਦ੍ਦੋ ਉਪਨਿਸ੍ਸਯ ਪਦੇਵਿਯ ਉਪਰਿ ਅਤ੍ਥੋ. ‘‘ਉਪਰੀ’’ਤਿ ਚ ਥਾਮਬਲਵੁਦ੍ਧਿਵਸੇਨਾਤਿ ਆਹ ‘‘ਤਸ੍ਮਿਂ ਵਾ’’ਤਿਆਦਿਂ. ‘‘ਤਸ੍ਮਿਂ’’ਤਿ ਆਰਮ੍ਮਣੇ.

‘‘ਸੁਗਤਿ ਦੁਗ੍ਗਤਿ ਨਿਬ੍ਬਾਨ ਸਮ੍ਪਾਪਕਟ੍ਠੇਨਾ’’ਤਿ ਵੁਤ੍ਤਂ. ਸੋ ਅਤ੍ਥੋ ਅਬ੍ਯਾਕਤਮਗ੍ਗਙ੍ਗੇਸੁ ਨਤ੍ਥਿ. ਏਵਞ੍ਚਸਤਿ ਤਾਨਿ ਕਥਂ ਮਗ੍ਗਪਚ੍ਚਯਤ੍ਤਂ ਗਚ੍ਛਨ੍ਤੀਤਿ ਆਹ ‘‘ਏਤ੍ਥ ਚਾ’’ਤਿਆਦਿਂ. ‘‘ਸਮ੍ਮਾਦਸ੍ਸਨਾਦਿਨਾ’’ਤਿ ਸਮ੍ਮਾਦਸ੍ਸਨ ਸਙ੍ਕਪ੍ਪਨਾਦਿਨਾ. ‘‘ਤੇਸਂ’’ਤਿ ਸਮ੍ਮਾਦਿਟ੍ਠੀਨਂ. ‘‘ਤੇਸਂ ਪੀ’’ਤਿ ਅਬ੍ਯਾਕਤ ਭੂਤਾਨਂ ਸਮ੍ਮਾਦਿਟ੍ਠੀਨਮ੍ਪਿ. ‘‘ਤੇਨੇਵਟ੍ਠੇਨਾ’’ਤਿ ਸਮ੍ਮਾਦਸ੍ਸਨਾਦਿਨਾ ਲਕ੍ਖਣਟ੍ਠੇਨ. ਅਥਵਾ. ‘‘ਤੇਨੇਵਟ੍ਠੇਨਾ’’ਤਿ ਸੁਗਤਿ ਨਿਬ੍ਬਾਨ ਸਮ੍ਪਾਪਕਟ੍ਠੇਨੇ ਵਾਤਿ ਅਤ੍ਥੋ. ਏਵਞ੍ਚਸਤਿ ਸਹੇਤੁਕਾ ਵਿਪਾਕ ਕ੍ਰਿਯਾ ਬ੍ਯਾਕਤਧਮ੍ਮਾਪਿ ਤੇਨੇਵਟ੍ਠੇਨ ਸਬ੍ਬਸੋ ਕੁਸਲਸਦਿਸਾ ਸਿਯੁਨ੍ਤਿ. ਨ ਸਿਯੁਂ, ਪਚ੍ਚਯ ਵੇਕਲ੍ਲਤ੍ਤਾ. ਵਿਪਾਕਾਬ੍ਯਾਕਤਾਹਿ ਕਮ੍ਮਵੇਗੇਨ ਸਨ੍ਤਾਨੇ ਪਤਿਤਮਤ੍ਤਤ੍ਤਾ ਨਿਰੁਸ੍ਸਾਹਸਨ੍ਤਸਭਾਵਤੋ ਤਂ ਸਮ੍ਪਯੁਤ੍ਤਾ ਚੇਤਨਾ ਨਾਨਕ੍ਖਣਿਕ ਕਮ੍ਮਪਚ੍ਚਯਤ੍ਤਂ ਨ ਗਚ੍ਛਤਿ. ਕਿਰਿਯਾਬ੍ਯਾਕਤਾ ਚ ਨਿਰਨੁਸਯਸਨ੍ਤਾਨੇ ਉਪ੍ਪਨ੍ਨਤ੍ਤਾ ਤਂ ਸਮ੍ਪਯੁਤ੍ਤਚੇਤਨਾਪਿ ਤਪ੍ਪਚ੍ਚਯਤ੍ਤਂ ਨ ਗਚ੍ਛਤਿਯੇਵ. ਤਸ੍ਮਾ ਤੇਸੁ ਵਿਪਾਕ ਕ੍ਰਿਯਾਬ੍ਯਾਕਤੇਸੁ ਸਮ੍ਮਾਦਿਟ੍ਠਾਦੀਨਿਪਿ ਸੁਗਤਿ ਸਮ੍ਪਾਪਕਟ੍ਠਂ ਨ ਸਾਧੇਨ੍ਤਿ. ਕਿਲੇਸਪ੍ਪਹਾਨ ਕਿਚ੍ਚਸ੍ਸ ਅਭਾਵਤੋ ਨਿਬ੍ਬਾਨ ਸਮ੍ਪਾਪਕਟ੍ਠਮ੍ਪਿ ਨਸਾਧੇਨ੍ਤਿ. ਸਭਾਵ ਲਕ੍ਖਣਵੇਕਲ੍ਲਤਾਪਨ ਤੇਸਂ ਸਮ੍ਮਾਦਿਟ੍ਠਾਦੀਨਂ ਨਤ੍ਥਿਯੇਵ. ਤਸ੍ਮਾ ਤਾਨਿ ਮਗ੍ਗਪਚ੍ਚਯੇ ਸਙ੍ਗਹਿਤਾਨੀਤਿ. ਇਨ੍ਦ੍ਰਿਯ ਧਮ੍ਮੇਸੁ ਅਰੂਪਿਨ੍ਦ੍ਰਿਯਾਨਂ ਆਧਿਪ੍ਪਚ੍ਚ ਕਿਚ੍ਚਂ ਅਰੂਪਧਮ੍ਮੇ ਸ੍ਵੇਵ ਫਰਤਿ. ਰੂਪਧਮ੍ਮਾ ਪਨ ਤਂ ਸਮੁਟ੍ਠਿਤਤ੍ਤਾ ਏਵ ਤਪ੍ਪਚ੍ਚਯੁਪ੍ਪਨ੍ਨੇਸੁ ਵੁਤ੍ਤਾ. ਤਥਾ ਹੇਤੁ ਕਮ੍ਮ ਮਗ੍ਗ ਝਾਨੇਸੁ. ਤੇਨ ਵੁਤ੍ਤਂ ‘‘ਏਸਨਯੋ ਕਮ੍ਮਿਨ੍ਦ੍ਰਿਯਝਾਨਪਚ੍ਚਯੇਸੁਪੀ’’ਤਿ. ਤਤ੍ਥ ਕਮ੍ਮਸਦ੍ਦੇਨ ਨਾਨਕ੍ਖਣਿਕ ਪਚ੍ਚਯੋ ਗਹੇਤਬ੍ਬੋ.

‘‘ਸਮ੍ਪਯੁਤ੍ਤਾਸਙ੍ਕਾ ਸਮ੍ਭਵਤੀ’’ਤਿ ਸਹਜਾਤਾ ਨਾਮਧਮ੍ਮਾ ਤਂ ਸਮੁਟ੍ਠਾਨ ਰੂਪੇਹਿ, ਪਚ੍ਛਾਜਾਤਾ ਚ ਅਤ੍ਤਨੋ ਅਤ੍ਤਨੋ ਪਚ੍ਚਯੁਪ੍ਪਨ੍ਨਰੂਪੇਹਿ, ਵਤ੍ਥੁ ਧਮ੍ਮਾ ਚ ਤਨ੍ਨਿਸ੍ਸਿਤਨਾਮਧਮ੍ਮੇਹਿ ਕਾਲਤੋ ਚ ਠਾਨਤੋ ਚ ਏਕ ਸਮ੍ਬਨ੍ਧਤ੍ਤਾ ਤੇਸੁ ਸਮ੍ਪਯੁਤ੍ਤਾਸਙ੍ਕਾ ਸਮ੍ਭਵਤਿ. ‘‘ਵਿਪ੍ਪਯੁਤ੍ਤਪਚ੍ਚਯਪ੍ਪਸਙ੍ਗੋ ਨਤ੍ਥੀ’’ਤਿ ਆਰਮ੍ਮਣਾਨਨ੍ਤਰਾਦਿਪਚ੍ਚਯਾਪਿ ਅਤ੍ਤਨੋ ਪਚ੍ਚਯੁਪ੍ਪਨ੍ਨੇਹਿ ਸਮ੍ਪਯੁਤ੍ਤਾ ਨ ਹੋਨ੍ਤਿ. ਤਸ੍ਮਾ ਤੇਪਿ ਵਿਪ੍ਪਯੁਤ੍ਤਪਚ੍ਚਯ ਭਾਵੇਨ ਵਤ੍ਤਬ੍ਬਾਤਿ ਏਵਰੂਪੋ ਵਿਪ੍ਪਯੁਤ੍ਤਪਚ੍ਚਯਪ੍ਪਸਙ੍ਗੋ ਤੇਸੁ ਆਰਮ੍ਮਣ ਪਚ੍ਚਯਾਦੀਸੁ ਨਤ੍ਥੀਤਿ ਅਧਿਪ੍ਪਾਯੋ.

‘‘ਹੇਟ੍ਠਾਵੁਤ੍ਤਪ੍ਪਕਾਰੇਸੁ ਏਵਾ’’ਤਿ ਏਤ੍ਥ ਏਵਸਦ੍ਦੇਨ ਪਚ੍ਚਯਨ੍ਤਰਂ ਨ ਹੋਤੀਤਿ ਦਸ੍ਸੇਤਿ. ਯਦਿ ਪਚ੍ਚਯਨ੍ਤਰਂ ਨ ਹੋਤਿ, ਨ ਵਤ੍ਤਬ੍ਬੋਯੇਵ. ਕਸ੍ਮਾ, ਦੇਸਕਸ੍ਸ ਪੁਨਰੁਤ੍ਤਿਨਿਰਤ੍ਥਕਵਾਦਿਤਾ ਪਤ੍ਤਿਤੋਤਿ. ਨੋ ਨ ਵਤ੍ਤਬ੍ਬੋ. ਕਸ੍ਮਾ, ਲੋਕੇ ਯੋ ਸਯਂ ਨਤ੍ਥਿ, ਵਿਗਤੋ ਹੋਤਿ. ਸੋ ਕਸ੍ਸ ਪਚ੍ਚਯੋ ਭਵਿਤੁਂ ਅਰਹਤੀਤਿ ਏਵਰੂਪਸ੍ਸ ਮਿਚ੍ਛਾਭਿਨਿਵੇਸਸ੍ਸ ਪਹਾਨਤੋ. ਤੇਨ ਇਮਮਤ੍ਥਂ ਞਾਪੇਤਿ, ਲੋਕੇ ਕੇਚਿਧਮ੍ਮਾ ਸਯਂ ਅਤ੍ਥਿਕਾਲੇ ਏਵ ਅਞ੍ਞੇਸਂ ਪਚ੍ਚਯਾ ਹੋਨ੍ਤਿ, ਨੋ ਨਤ੍ਥਿਕਾਲੇ. ਕੇਚਿ ਧਮ੍ਮਾ ਸਯਂ ਨਤ੍ਥਿਕਾਲੇ ਏਵ ਅਞ੍ਞੇਸਂ ਪਚ੍ਚਯਾ ਹੋਨ੍ਤਿ, ਨੋ ਅਤ੍ਥਿਕਾਲੇਤਿ ਅਯਞ੍ਚਵਿਭਾਗੋ ਅਵਸ੍ਸਂ ਇਚ੍ਛਿਤਬ੍ਬੋ ਯੇਵਾਤਿ. ‘‘ਓਕਾਸਦਾਨਸਙ੍ਖਾਤੇਨਾ’’ਤਿ ਤਸ੍ਸ ਅਞ੍ਞਸ੍ਸ ਚਿਤ੍ਤੁਪ੍ਪਾਦਸ੍ਸ ਉਪ੍ਪਤ੍ਤਿਯਾ ਓਕਾਸਦਾਨਸਙ੍ਖਾਤੇਨ.

ਸੁਤ੍ਤਨ੍ਤੇ, ਅਤ੍ਥੀਤਿ ਅਯ ਮੇਕੋ ਅਨ੍ਤੋਤਿ ਸਤ੍ਤਾਨਂ ਸੇਟ੍ਠਸਾਰਭੂਤੋ ਅਤ੍ਤਾਨਾਮ ਅਨਮਤਗ੍ਗੇ ਸਂਸਾਰੇ ਨਿਚ੍ਚਕਾਲਂ ਅਤ੍ਥਿ. ਉਚ੍ਛੇਦੋ ਵਾ ਵਿਮੋਕ੍ਖੋ ਵਾ ਸਬ੍ਬਸੋ ਨਤ੍ਥਿ. ਅਯਂ ਸਸ੍ਸਤਵਾਦੋ ਨਾਮ ਏਕੋਵਿਸਮਨ੍ਤੋ ਏਕਾਵਿਸਮਾਕੋਟਿ. ਨਤ੍ਥੀਤਿ ਸਤ੍ਤੋਨਾਮ ਏਕਭਵਪਰਮੋ ਹੋਤਿ, ਮਰਣਤੋ ਪਰਂ ਨਤ੍ਥਿ. ਏਕਨ੍ਤੇਨ ਉਚ੍ਛਿਜ੍ਜਤਿ. ਅਯਂ ਉਚ੍ਛੇਦਵਾਦੋ ਨਾਮ ਦੁਤੀਯੋ ਵਿਸਮਨ੍ਤੋ ਦੁਤੀਯਾਵਿਸਮਕੋਟਿ. ਇਮੇ ਪਟਿਚ੍ਚ ਸਮੁਪ੍ਪਾਦਂ ਅਜਾਨਨ੍ਤਾਨਂ ਉਭੋਵਿਸਮਨ੍ਤਾ ਨਾਮ. ਜਾਨਨ੍ਤਾਨਂ ਪਨ ਤਾਦਿਸੋ ਅਤ੍ਤਾਨਾਮ ਨਤ੍ਥਿ, ਯੋ ਅਤ੍ਥੀਤਿ ਵਾ ਨਤ੍ਥੀਤਿ ਵਾ ਵਤ੍ਤਬ੍ਬੋ ਭਵੇਯ੍ਯ. ਸੁਦ੍ਧਧਮ੍ਮਪ੍ਪਬਨ੍ਧੋ ਏਵ ਅਤ੍ਥਿ. ਤਸ੍ਸ ਚ ਯਾਵ ਅਵਿਜ੍ਜਾ ਅਪ੍ਪਹੀਨਾ ਹੋਤਿ, ਤਾਵ ਉਚ੍ਛੇਦੋ ਨਾਮ ਨਤ੍ਥਿ. ਅਵਿਜ੍ਜਾਯ ਪਨ ਪਹੀਨਾਯ ਤਤੋਪਰਂ ਨ ਪਵਤ੍ਤਤਿ. ਅਤ੍ਥਿ ਨਾਮ ਨ ਹੋਤਿ. ਅਯਂ ਅਨ੍ਤਦ੍ਵਯਮੁਤ੍ਤੋ ਮਜ੍ਝਿਮਞਾਯੋ ਨਾਮ. ਬਹੁਂ ਨਾਨਤ੍ਥ ਸਮ੍ਭਵਂ ਵਣ੍ਣੇਨ੍ਤਿਯੇਵ. ਵਣ੍ਣੇਨ੍ਤਾਨਂਪਿ ਤੇਸਂ ਬਹੁ ਪਯੋਜਨਂ ਨਤ੍ਥਿ ਯੇਵਾਤਿ ਅਧਿਪ੍ਪਾਯੋ.

ਪਚ੍ਚਯੁਦ੍ਦੇਸਾਨੁਦੀਪਨਾ ਨਿਟ੍ਠਿਤਾ.

੧੬੮. ਪਚ੍ਚਯਨਿਦ੍ਦੇਸੇ. ‘‘ਪਞ੍ਚਧਾ’’ਤਿ ਪਞ੍ਚਵਿਧੇਹਿ ਪਚ੍ਚਯੇਹਿ. ‘‘ਏਕਧਾ’’ਤਿ ਏਕਵਿਧੇਨ ਪਚ੍ਚਯੇਨ. ਏਵਂ ਸੇਸੇਸੁਪਿ. ‘‘ਅਵਿਚ੍ਛੇਦਾਯਾ’’ਤਿ ਅਵਿਚ੍ਛੇਦਤ੍ਥਾਯ. ‘‘ਪਟਿਪਾਦਨਾਯਾ’’ਤਿ ਯੋਜਨਤ੍ਥਾਯ. ਯੋ ਕੋਚਿ ਚਿਤ੍ਤੁਪ੍ਪਾਦੋ ਅਵਿਰੁਦ੍ਧਸ੍ਸ ਯਸ੍ਸ ਕਸ੍ਸਚਿ ਚਿਤ੍ਤੁਪ੍ਪਾਦਸ੍ਸ ਪਚ੍ਚਯੋ ਨ ਨ ਹੋਤੀਤਿ ਯੋਜਨਾ. ‘‘ਪੁਨੁਪ੍ਪਨ੍ਨਾਨਂ’’ਤਿ ਨਿਰੁਜ੍ਝਿਤ੍ਵਾ ਪੁਨ ਉਪ੍ਪਨ੍ਨਾਨਂ. ‘‘ਪੁਰਿਮਾਨਿ ਜਵਨਾਨੀ’’ਤਿ ਏਤ੍ਥ ਮਗ੍ਗੋ ਗੋਤ੍ਰਭੁਤੋ ਆਸੇਵਨ ਪਚ੍ਚਯਂ ਲਭਤਿ. ਫਲਸ੍ਸ ਪਨ ਸੋ ਭਿਨ੍ਨਜਾਤਿਕਤ੍ਤਾ ਆਸੇਵਨ ਪਚ੍ਚਯੋ ਨ ਹੋਤਿ. ਫਲਂ ਪਨ ਸਬ੍ਬਸੋ ਆਸੇਵਨ ਮੁਤ੍ਤਂ ਹੋਤਿ. ਤਸ੍ਮਾ ਤਦੁਭਯਂ ਇਧ ਪੁਰਿਮਜਵਨਸਙ੍ਖ੍ਯਂ ਨ ਗਚ੍ਛਤੀਤਿ ਵੁਤ੍ਤਂ ‘‘ਮਗ੍ਗ ਫਲਜਵਨਵਜ੍ਜਾਨੀ’’ਤਿ. ਫਲਜਵਨਵਜ੍ਜਾਨਂ ਪਚ੍ਛਿਮਾਨਂ ਜਵਨਾਨਂ. ‘‘ਸਬ੍ਬਾਕਾਰਪਾਰਿਪੂਰਂ’’ਤਿ ਏਤ੍ਥ ਕੁਸਲਾਦਿਜਾਤਿਪਿ ਸਙ੍ਗਹਿਤਾਤਿ ਵੁਤ੍ਤਂ ‘‘ਜਾਤਿਮਤ੍ਤੇਨਪੀ’’ਤਿ. ਅਭਿਨ੍ਨਾ ਏਵ ਸਿਯੁਂ. ਨ ਪਨ ਭਿਨ੍ਨਾ ਹੋਨ੍ਤਿ. ਕਦਾਚਿ ਕੇਚਿਭਿਨ੍ਨਾ ਏਵ ਹੋਨ੍ਤਿ. ਤਸ੍ਮਾ ਭਿਨ੍ਨਜਾਤਿਕਾ ਧਮ੍ਮਾ. ਲ. ਨ ਸਕ੍ਕੋਨ੍ਤੀਤਿ ਯੋਜਨਾ. ‘‘ਕਾਮਾਵਚਰਭਾਵਤੋ ਮਹਗ੍ਗਤਾਨੁਤ੍ਤਰਭਾਵਪਤ੍ਤਿ ਨਾਮਾ’’ਤਿ ਚਿਤ੍ਤਸਨ੍ਤਾਨਸ੍ਸਾਤਿ ਅਧਿਪ੍ਪਾਯੋ. ਗੋਤ੍ਰ ਭੁਚਿਤ੍ਤਂ ਕਾਮਭੂਮਿ. ਝਾਨਚਿਤ੍ਤਂ ਮਹਗ੍ਗਤਭੂਮਿ. ਮਗ੍ਗਚਿਤ੍ਤਂ ਲੋਕੁਤ੍ਤਰ ਭੂਮਿ. ਕਮ੍ਮਚੇਤਨਾਯ ਨਿਰੁਦ੍ਧਾਯਪਿ ਤਸ੍ਸਾ ਪਵਤ੍ਤਾਕਾਰੋ ਨਨਿਰੁਜ੍ਝਤਿ. ਚਿਤ੍ਤਸਨ੍ਤਾਨਂ ਅਨੁਗਚ੍ਛਤਿ. ਸੋ ਏਵ ਆਯਤਿਂ ਵਿਪਾਕਧਮ੍ਮਰਾਸਿ ਹੁਤ੍ਵਾ ਪਾਤੁਬ੍ਭਵਤਿ. ਤਸ੍ਮਾ ਸੋ ਵਿਪਾਕਸ੍ਸ ਬੀਜਸਙ੍ਖ੍ਯਂ ਗਚ੍ਛਤਿ. ਸੋ ਚ ਯਾਵ ਨ ਵਿਪਚ੍ਚਤਿ. ਤਾਵ ਸਂਸਾਰਪ੍ਪਵਤ੍ਤਿਯਾ ਸਤਿ, ਅਨ੍ਤਰਾ ਵਿਨਟ੍ਠੋ ਨਾਮ ਨ ਹੋਤਿ. ਤਸ੍ਮਾ ਕਮ੍ਮਚੇਤਨਾ ਉਪ੍ਪਜ੍ਜਮਾਨਾ ਚਿਤ੍ਤਸਨ੍ਤਾਨੇ ਤਸ੍ਸ ਬੀਜਸ੍ਸ ਨਿਧਾਨਤ੍ਥਾਯ ਉਪ੍ਪਜ੍ਜਤਿ, ਨਿਰੁਜ੍ਝਮਾਨਾ ਚ ਨਿਦਹਿਤ੍ਵਾ ਏਵ ਨਿਰੁਜ੍ਝਤੀਤਿ ਵੁਤ੍ਤਂ ‘‘ਅਤ੍ਤਨੋ ਪਵਤ੍ਤਾਕਾਰਸਙ੍ਖਾਤ ਬੀਜਨਿਧਾਨਞ੍ਚਾ’’ਤਿ. ‘‘ਚੇਤਨਾਯ ਹੋਤੀ’’ਤਿ ਚੇਤਨਾਯ ਸਾਧਾਰਣਂ ਹੋਤਿ. ਪੁਰੇਜਾਤਾ ਸਾਲਰੁਕ੍ਖਪੋਤਕਾ ਪਚ੍ਚਯਾ ਹੋਨ੍ਤੀਤਿ ਸਮ੍ਬਨ੍ਧੋ. ਪੁਰਿਮਚਿਤ੍ਤਕ੍ਖਣੇਸੁ ਉਪ੍ਪਨ੍ਨਾ ਚਤੁਸਮੁਟ੍ਠਾਨਿਕਰੂਪਧਮ੍ਮਾਤਿ ਸਮ੍ਬਨ੍ਧਿਤਬ੍ਬਂ. ‘‘ਆਹਾਰਜਕਾਯੋ’’ਤਿ ਏਵਂ ਵੁਤ੍ਤਾਤਿ ਪਾਠਸੇਸੋ. ‘‘ਪਚ੍ਛਾ ਜਾਤੇਨਾ’’ਤਿ ਪਚ੍ਛਾਜਾਤਪਚ੍ਚਯੇਨ ਪਯੋਜਨਂ ਨਤ੍ਥਿ. ਜਿਣ੍ਣਪਤਰੁਕ੍ਖਸ੍ਸ ਉਦਕਾਸਿਞ੍ਚਨਂ ਵਿਯ ਹੋਤੀਤਿ ਅਧਿਪ੍ਪਾਯੋ. ‘‘ਯਦਗ੍ਗੇਨਾ’’ਤਿ ਯੇਨਕਾਰਣ ਕੋਟ੍ਠਾਸੇਨ. ‘‘ਵਤ੍ਥੁ ਰੂਪਂ’’ਤਿ ਨਿਰੋਧਾਸਨ੍ਨਂ ਹਦਯਵਤ੍ਥੁ ਰੂਪਂ. ‘‘ਏਵਮਯਂ ਪੀ’’ਤਿ ਏਵਂ ਅਯਂ ਪਚ੍ਛਾਜਾਤਪਚ੍ਚਯੋਪਿ. ਵਿਵਿਧੇਨ ਆਕਾਰੇਨ ਫਰਣਂ ਕਾਲਨ੍ਤਰ ਦੇਸਨ੍ਤਰ ਗਮਨਂ ਵਿਪ੍ਫਾਰੋ. ਮਹਨ੍ਤੋ ਵਿਪ੍ਫਾਰੋ ਯਸ੍ਸਾਤਿ ਸਮਾਸੋ. ‘‘ਵਤ੍ਥੁਮ੍ਹੀ’’ਤਿ ਹਦਯਵਤ੍ਥੁਮ੍ਹਿ. ਪਞ੍ਚਹਿ ਖਨ੍ਧੇਹਿ ਵੋਕਿਣ੍ਣੋ ਸਮ੍ਮਿਸ੍ਸੋਤਿ ਪਞ੍ਚਵੋਕਾਰੋ. ਕਾਮ ਰੂਪਭਵੋ. ਵਿਨਾ ਉਪ੍ਪਜ੍ਜਿਤੁਂ ਨ ਸਕ੍ਕੋਤਿ. ਰੂਪਵਿਰਾਗਭਾਵਨਾਬਲੇਨ ਰੂਪਸ੍ਸ ਅਵਿਕ੍ਖਮ੍ਭਿਤਤ੍ਤਾਤਿ ਅਧਿਪ੍ਪਾਯੋ. ‘‘ਪੁਰੇਜਾਤਂ ਵਾ’’ਤਿ ਏਕਚਿਤ੍ਤਕ੍ਖਣਾਤੀਤੇ ਪੁਰੇਜਾਤਂ ਵਾ. ‘‘ਵਡ੍ਢਨਪਕ੍ਖੇ ਠਿਤਂ ਵਾ’’ਤਿ ਤਤੋ ਪਚ੍ਛਾ ਯਾਵ ਅਟ੍ਠਮ ਚਿਤ੍ਤਕ੍ਖਣਾ ਵਡ੍ਢਨਪਕ੍ਖੇ ਠਿਤਂ ਵਾ. ‘‘ਉਪ੍ਪਨ੍ਨਂ ਵਤ੍ਥੂ’’ਤਿ ਉਪ੍ਪਨ੍ਨਂ ਵਤ੍ਥੁਰੂਪਂ. ‘‘ਏਤ੍ਥਾ’’ਤਿ ਇਮਸ੍ਮਿਂ ਪੁਰੇਜਾਤ ਪਚ੍ਚਯੇ. ਕਿਞ੍ਚਾਪਿ ਦਿਸ੍ਸਤੀਤਿ ਸਮ੍ਬਨ੍ਧੋ. ‘‘ਪਚ੍ਚਨੀਯੇ’’ਤਿ ਪਚ੍ਚਨੀਯ ਵਾਰੇ. ‘‘ਤਂ’’ਤਿ ਆਰਮ੍ਮਣਪੁਰੇਜਾਤਂ. ਤਸ੍ਸ ਆਰਮ੍ਮਣਸ੍ਸ ਅਪਰਿਬ੍ਯਤ੍ਤਤ੍ਤਾਵਾਤਿ ਸਮ੍ਬਨ੍ਧੋ. ਕਾਰਣਂ ਵਦਨ੍ਤਿ ਪਟ੍ਠਾਨਟੀਕਾਚਰਿਯਾ. ਅਰੂਪਭਵੇ ਮਰਣਾਸਨ੍ਨਕਾਲੇ ਕਸ੍ਸਚਿ ਗਤਿਨਿਮਿਤ੍ਤੁ ਪਟ੍ਠਾਨਂ ਅਟ੍ਠਕਥਾਸੁ ਵੁਤ੍ਤਮੇਵ. ਏਵਞ੍ਚਸਤਿ, ਤਤ੍ਥ ਆਰਮ੍ਮਣ ਪੁਰੇਜਾਤਂ ਲਦ੍ਧਬ੍ਬਮੇਵ. ਪਟ੍ਠਾਨੇਪਨ ਤਸ੍ਮਿਂਭਵੇ ਸਬ੍ਬਂ ਪੁਰੇਜਾਤਪਚ੍ਚਯਂ ਪਟਿਕ੍ਖਿਪਤਿ. ਕਸ੍ਮਾ ਇਤਿ ਚੇ, ਵਤ੍ਥੁ ਪੁਰੇਜਾਤਪਚ੍ਚਯਸ੍ਸ ਤਤ੍ਥ ਅਲਦ੍ਧਬ੍ਬਤ੍ਤਾਤਿ ਇਮਿਨਾ ਅਧਿਪ੍ਪਾਯੇਨ ‘‘ਆਰੁਪ੍ਪੇਵਿਯਾ’’ਤਿ ਵੁਤ੍ਤਂ. ਏਤ੍ਥ ਚ ਪਟ੍ਠਾਨੇ ਅਰੂਪਭਵੇ ਦ੍ਵੇਪਿ ਪੁਰੇਜਾਤਪਚ੍ਚਯਾ ਪਟਿਕ੍ਖਿਤ੍ਤਾ, ਤਸ੍ਮਾ ਸਬ੍ਬੇਪਿ ਅਰੂਪ ਪੁਗ੍ਗਲਾ ਸਬ੍ਬਂਪਿ ਰੂਪਧਮ੍ਮਂ ਆਰਮ੍ਮਣਂ ਨ ਕਰੋਨ੍ਤੀਤਿਪਿ ਵਦਨ੍ਤਿ. ਏਵਞ੍ਚ ਕਤ੍ਵਾ ਆਰਮ੍ਮਣ ਸਙ੍ਗਹਦੀਪਨਿਯਂ ‘ਅਸਞ੍ਞੀਭਵਤੋ ਚੁਤਾਨਂ ਵਿਯ ਅਰੂਪਭਵਤੋ ਚੁਤਾਨਂਪਿ ਗਤਿਨਿਮਿਤ੍ਤਭੂਤਂ ਕਾਮਪਟਿਸਨ੍ਧਿਯਾ ਆਰਮ੍ਮਣਂ ਭਵਨ੍ਤਰੇ ਕੇਨਚਿਦ੍ਵਾਰੇਨ ਅਗ੍ਗਹਿਤਂ, ਕੇਵਲਂ ਕਮ੍ਮਬਲੇਨੇਵ ਉਪਟ੍ਠਾਪਿਤ’ਨ੍ਤਿ ਵੁਤ੍ਤਂ. ‘‘ਗੂਥਕੁਣਪਾਦੀਨੀ’’ਤਿ ਗੂਥਞ੍ਚ ਮਤਪੂਤਿਸਰੀਰਾਨਿ ਚ. ‘‘ਏਵਂ ਵੁਤ੍ਤੇਹੀ’’ਤਿ ਪਟ੍ਠਾਨੇ ਵੁਤ੍ਤੇਹਿ. ਤੇ ਪਨ ਅਕੁਸਲਾ ਧਮ੍ਮਾ ਕਥਂ ਚਤੁਭੂਮਿਕ ਕੁਸਲਾਨਂ ਉਪਨਿਸ੍ਸਯ ਪਚ੍ਚਯਾ ਹੋਨ੍ਤੀਤਿ ਆਹ ‘‘ਤਤ੍ਥ ਆਨਨ੍ਤਰਿਯ ਵਜ੍ਜਾਨੀ’’ਤਿਆਦਿਂ. ਤਤ੍ਥ ਆਨਨ੍ਤਰਿਯ ਕਮ੍ਮਕਤਾਨਂ ਕਿਲੇਸਾਵਰਣ ਕਮ੍ਮਾਵਰਣੇਹਿ ਸਮਨ੍ਨਾਗਤਤ੍ਤਾ ਝਾਨਮਗ੍ਗਪ੍ਪਟਿਲਾਭੋ ਨਾਮ ਨਤ੍ਥੀਤਿ ਵੁਤ੍ਤਂ ‘‘ਆਨਨ੍ਤਰਿਯ ਵਜ੍ਜਾਨੀ’’ਤਿ. ‘‘ਤਾਨੀ’’ਤਿ ਰਾਗਾਦੀਨਿ ਅਕੁਸਲਾਨਿ ਚਤੁਭੂਮਿਕ ਕੁਸਲਾਨਂ ਉਪ੍ਪਤ੍ਤਿਯਾ ਬਲਵਨਿਸ੍ਸਯਾ ਹੋਨ੍ਤੀਤਿ ਯੋਜਨਾ. ‘‘ਸਮਤਿਕ੍ਕਮਮੁਖੇਨਾ’’ਤਿ ਪਟ੍ਠਾਨੇ ਅਕੁਸਲੋ ਧਮ੍ਮੋ ਕੁਸਲਸ੍ਸ ਧਮ੍ਮਸ੍ਸ ਉਪਨਿਸ੍ਸਯ ਪਚ੍ਚਯੇਨ ਪਚ੍ਚਯੋਤਿ ਏਤਸ੍ਸ ਪਞ੍ਹਸ੍ਸ ਵਿਭਙ੍ਗੇ ਪਾਣਂ ਹਨ੍ਤ੍ਵਾ ਤਸ੍ਸ ਪਟਿਘਾ ਤਤ੍ਥਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ, ਉਪੋਸਥਕਮ੍ਮਂ ਕਰੋਤਿ, ਝਾਨਂ ਉਪ੍ਪਾਦੇਤਿ, ਮਗ੍ਗਂ ਉਪ੍ਪਾਦੇਤਿ, ਅਭਿਞ੍ਞਂ ਉਪ੍ਪਾਦੇਤੀਤਿ ਵੁਤ੍ਤਂ. ਤਤ੍ਥ ‘‘ਤਸ੍ਸ ਪਟਿਘਾਤਤ੍ਥਾਯਾ’’ਤਿ ਤਸ੍ਸ ਪਾਣਾਤਿਪਾਤਕਮ੍ਮਸ੍ਸ ਪਟਿਹਨਨਤ੍ਥਾਯ ਪਹਾਨਤ੍ਥਾਯ ਸਮਤਿਕ੍ਕਮਨਤ੍ਥਾਯਾਤਿ ਵੁਤ੍ਤਂ ਹੋਤਿ. ਸੋ ਚੇ ਪਾਣਾਤਿਪਾਤੀ ਪੁਗ੍ਗਲੋ ਪੁਨ ਸਂਵੇਗਂ ਆਪਜ੍ਜਿਤ੍ਵਾ ਤਸ੍ਸ ਕਮ੍ਮਸ੍ਸ ਸਮਤਿਕ੍ਕਮਨਤ੍ਥਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ, ਉਪੋਸਥ ਕਮ੍ਮਂ ਕਰੋਤਿ. ਤਦਾ ਤਂ ਪਾਣਾਤਿ ਪਾਤਕਮ੍ਮਂ ਤਂ ਪੁਗ੍ਗਲਂ ਦਾਨਕਮ੍ਮੇਨਿਯੋਜੇਤਿ ਨਾਮ. ਤਥਾ ਸੀਲਕਮ੍ਮੇ ਉਪੋਸਥ ਕਮ੍ਮੇਤਿ. ਯਥਾਹਿ ਰਾਜਾ ਏਵਂ ਵਦੇਯ੍ਯ ਇਮਸ੍ਮਿਂ ਦਿਵਸੇ ਯੋ ਉਪੋਸਥਂ ਨੁਪਵਸਤਿ, ਤਂ ਘਾਤੇਸ੍ਸਾਮੀਤਿ. ਤਦਾ ਸਬ੍ਬੇਪਿ ਨਾਗਰਾ ਉਪੋਸਥਂ ਉਪਵਸੇਯ੍ਯੁਂ. ਏਵਮਿਦਂ ਦਟ੍ਠਬ੍ਬਂ. ਰਾਜਾਵਿਯ ਹਿ ਤਸ੍ਸ ਪਾਣਾਤਿਪਾਤਕਮ੍ਮਂ. ਨਾਗਰਾ ਵਿਯ ਸੋ ਪਾਣਘਾਤਕੋ. ਉਪੋਸਥ ਕਮ੍ਮ ਕੁਸਲਾਨਿ ਵਿਯ ਤਸ੍ਸ ਦਾਨਸੀਲ ਉਪੋਸਥ ਕਮ੍ਮ ਕੁਸਲਾਨੀਤਿ. ‘‘ਝਾਨਂ ਉਪ੍ਪਾਦੇਤਿ, ਮਗ੍ਗਂ ਉਪ੍ਪਾਦੇਤਿ, ਅਭਿਞ੍ਞਂ ਉਪ੍ਪਾਦੇਤੀ’’ਤਿ ਪਦੇਸੁਪਿ ਏਸੇਵਨਯੋ. ਏਵਂ ਸਮਤਿਕ੍ਕਮਮੁਖੇਨ ਏਕਂਪਿ ਅਕੁਸਲਂ ਸਬ੍ਬਾਨਿ ਚਤੁਭੂਮਿਕ ਕੁਸਲਾਨਿ ਉਪਨਿਸ੍ਸਯ ਸਤ੍ਤਿਯਾ ਜਨੇਤਿ ਪਵਤ੍ਤੇਤੀਤਿ ਵੇਦਿਤਬ੍ਬਂ. ‘‘ਤਾਨਿਯੇਵ ਸਬ੍ਬਾਨੀ’’ਤਿ ਆਨਨ੍ਤਰਿਯ ਕਮ੍ਮਸਹਿਤਾਨਿਸਬ੍ਬਾਨਿ ਅਕੁਸਲਾਨਿਯੇਵ ਸਬ੍ਬੇਸਂ ਅਕੁਸਲਾਨਂ ਅਬ੍ਯਾਕਤ ਧਮ੍ਮਾਨਂ ਉਪ੍ਪਤ੍ਤਿਯਾ ਬਲਵਨਿਸ੍ਸਯਾ ਹੋਨ੍ਤੀਤਿ ਯੋਜਨਾ. ਦਾਨਸੀਲਾਦਯੋ ਕੁਸਲਾ ਧਮ੍ਮਾ. ਸੁਟ੍ਠੁ ਬਲਵਂ ਕਮ੍ਮਂ ਅਧਿਪ੍ਪੇਤਂ, ਨ ਦੁਬ੍ਬਲਂ. ਉਪਨਿਸ੍ਸਯਟ੍ਠਾਨਤ੍ਤਾ. ਤੇਸਂਪਿ ਰੂਪਧਮ੍ਮਾਨਂ ਬਲਵਨਿਸ੍ਸਯਾ ਨਨੁਹੋਨ੍ਤੀਤਿ ਸਮ੍ਬਨ੍ਧੋ. ਕਥਂ ਹੋਨ੍ਤੀਤਿ ਆਹ ‘‘ਬਹਿਦ੍ਧਾਰੁਕ੍ਖਤਿਣਾਦੀਨਂ’’ਤਿਆਦਿਂ. ਤਤ੍ਥ ਪਥਵੀਰਸ ਆਪੋਰਸਵਸ੍ਸੋਦਕ ਬੀਜਾਨਿ ਰੁਕ੍ਖਤਿਣਾਦੀਨਂ ਬਲਵਨਿਸ੍ਸਯਾ ਹੋਨ੍ਤਿ. ਮੂਲਭੇਸਜ੍ਜਾਦੀਨਿ ਅਜ੍ਝਤ੍ਤਂ ਸਨ੍ਤਾਨਂ ਬਲਵਨਿਸ੍ਸਯਾ ਹੋਨ੍ਤੀਤਿ ਯੋਜਨਾ. ‘‘ਪਕਤਸ੍ਸੇਵਾ’’ਤਿ ਪਥਮਤਰਂ ਕਤਸ੍ਸ ਉਪ੍ਪਾਦਨਾਦਿਕਮ੍ਮਸ੍ਸੇਵ. ‘‘ਨ ਏਵਂ ਰੂਪਸਨ੍ਤਾਨੇਨਾ’’ਤਿ ਏਵਂ ਰੂਪਸਨ੍ਤਾਨੇਨ ਉਪ੍ਪਾਦਿਤਾ ਉਪਸੇਵਿਤਾ ਧਮ੍ਮਾ ਨਤ੍ਥਿ. ‘‘ਤਂ’’ਤਿ ਉਤੁਬੀਜਾਦਿਕਂ. ਕਮ੍ਮਾਦਿਕਞ੍ਚ. ‘‘ਪਕਤਂ’’ਤਿ ਪੁਰੇਤਰਂ ਉਪ੍ਪਾਦਿਤਞ੍ਚ ਉਪਸੇਵਿਤਞ੍ਚ. ਸਚੇਤਨਸ੍ਸੇਵ ਚੇਤਨਂ ਪਕਪ੍ਪਨਂ ਪਕਰਣਨ੍ਤਿ ਸਮ੍ਬਨ੍ਧੋ. ਚੇਤਨਂ ਪਕਪ੍ਪਨਂ ਪਕਰਣਂ ਨਾਮਾਤਿ ਅਤ੍ਥੋ. ‘‘ਪਕਪ੍ਪਨਂ’’ਤਿ ਚ ਸਂਵਿਧਾਨਂ. ‘‘ਕਿਞ੍ਚੀ’’ਤਿ ਕਿਞ੍ਚਿਕਮ੍ਮਾਦਿਕਂ ਉਤੁਭੋਜਨਾਦਿਕਞ੍ਚ. ਅਤ੍ਤਨੋ ਚ ਉਪ੍ਪਨ੍ਨਾ ਰਾਗਾਦਯੋ ਪਰਸ੍ਸ ਚ ਸਨ੍ਤਾਨੇ ਪਰਸ੍ਸ ਚ ਉਪ੍ਪਨ੍ਨਾ ਰਾਗਾਦਯੋ ਅਤ੍ਤਨੋ ਚ ਸਨ੍ਤਾਨੇਤਿ ਯੋਜਨਾ. ‘‘ਨਿਦਸ੍ਸਨਂ’’ਤਿ ਉਦਾਹਰਣਂ ਹੋਤਿ. ਮਨੋਪਦੋਸਿਕਦੇਵਾ ਅਞ੍ਞਮਞ੍ਞਂ ਦਿਸ੍ਵਾ ਅਤ੍ਤਨੋ ਮਨਂ ਪਦੂਸੇਨ੍ਤਿ. ਬਾਲ਼੍ਹਂ ਇਸ੍ਸਾਧਮ੍ਮਂ ਉਪ੍ਪਾਦੇਨ੍ਤਿ. ਤਸ੍ਮਿਂਯੇਵ ਖਣੇ ਚਵਨ੍ਤਿ. ਤੇਸਂ ਦ੍ਵੇ ਇਸ੍ਸਾਧਮ੍ਮਾ ਅਞ੍ਞਮਞ੍ਞਸ੍ਸ ਬਲਵਨਿਸ੍ਸਯਾ ਹੋਨ੍ਤੀਤਿ. ਕਾਮਾਵਚਰ ਕੁਸਲਸ੍ਸ ਬਲਵਨਿਸ੍ਸਯਾ ਹੋਨ੍ਤੀਤਿਆਦਿਨਾ ਯੋਜੇਤਬ੍ਬਂ. ਵਿਭਾਵਨਿਪਾਠੇ. ਝਾਨ ਮਗ੍ਗ ਫਲ ਵਿਪਸ੍ਸਨਾਦਿਭੇਦਂ ਆਲਮ੍ਬਣਂ ਪਚ੍ਚਵੇਕ੍ਖਨ ਅਸ੍ਸਾਦਨਾਦਿ ਧਮ੍ਮੇ ਅਤ੍ਤਾਧੀਨੇ ਕਰੋਤੀਤਿ ਯੋਜਨਾ. ‘‘ਅਤ੍ਤਾਧੀਨੇ’’ਤਿ ਅਤ੍ਤਾਯਤ੍ਤੇ ਅਤ੍ਤਾਬਦ੍ਧੇ. ਪਟ੍ਠਾਨੇ ਪਞ੍ਹਵਾਰੇ ਦਾਨਂ ਦਤ੍ਵਾ ਸੀਲਂਸਮਾਦਿਯਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਤਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ. ਪੁਬ੍ਬੇ ਸੁਚਿਣ੍ਣਾਨਿ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤੀਤਿਆਦਿਨਾ ਆਗਤਤ੍ਤਾਦਾਨ ਸੀਲ. ਲ. ਨਿਬ੍ਬਾਨਾਨਿ ਚੇਵਾਤਿ ਵੁਤ੍ਤਂ. ਰਾਗਂ ਗਰੁਂਕਤ੍ਵਾ ਅਸ੍ਸਾਦੇਨ੍ਤਿ, ਅਭਿਨਨ੍ਦਤੀਤਿਆਦਿਨਾ, ਚਕ੍ਖੁਂ ਗਰੁਂ ਕਤ੍ਵਾ ਅਸ੍ਸਾਦੇਨ੍ਤੀਤਿਆਦਿਨਾ ਚ ਆਗਤਤ੍ਤਾ ‘‘ਰਾਗ ਦਿਟ੍ਠਿ ਚਕ੍ਖੁ ਸੋਤਾਦੀਨਿਚਾ’’ਤਿ ਵੁਤ੍ਤਂ. ‘‘ਪਰਤ੍ਥ ਪੀ’’ਤਿ ਪਰਤੋ ਨਿਸ੍ਸਯ ਪਚ੍ਚਯਾਦੀਸੁਪਿ. ‘‘ਸੋ ਏਵਾ’’ਤਿ ਪਚ੍ਚੁਪਤ੍ਥਮ੍ਭਕੋ ਏਵ. ‘‘ਕਿਞ੍ਚੀ’’ਤਿ ਕਿਞ੍ਚਿਮਤ੍ਤਂਪਿ. ਮਹਾਭੂਤੇ ਕਿਞ੍ਚਿ ਉਪਤ੍ਥਮ੍ਭੇਤੁਂ ਨ ਸਕ੍ਕੋਨ੍ਤੀਤਿ ਯੋਜਨਾ. ਨਨੁ ਆਹਾਰ ਰੂਪਂ ਮਹਾਭੂਤੇ ਉਪਤ੍ਥਮ੍ਭੇਤੁਂ ਸਕ੍ਕੋਤਿ. ਜੀਵਿਤਰੂਪਞ੍ਚ ਕਮ੍ਮਜਮਹਾਭੂਤੇ ਅਨੁਪਾਲੇਤੁਨ੍ਤਿ. ਸਚ੍ਚਂ. ਇਧ ਪਨ ਸਹਜਾਤਪਚ੍ਚਯ ਕਿਚ੍ਚਂ ਅਧਿਪ੍ਪੇਤਂ. ਤੇਸਞ੍ਚ ਦ੍ਵਿਨ੍ਨਂ ਸਹਜਾਤਪਚ੍ਚਯ ਕਿਚ੍ਚਂ ਨਤ੍ਥਿ. ਤਂ ਪਰਤੋ ਆਵੀ ਭਵਿਸ੍ਸਤੀਤਿ. ‘‘ਵਤ੍ਥੁ ਵਿਪਾਕਾਨਂ’’ਤਿ ਵਤ੍ਥੁਰੂਪਂ ਵਿਪਾਕਾਨਂ. ਪਟ੍ਠਾਨਪਾਠੇ. ਆਰਮ੍ਮਣਞ੍ਚ, ਨਿਸ੍ਸਯੋ ਚ, ਪੁਰੇਜਾਤਞ੍ਚ, ਵਿਪ੍ਪਯੁਤ੍ਤੋ ਚ, ਅਤ੍ਥਿ ਚ, ਅਵਿਗਤੋ ਚਾ,ਤਿ ਛਸੁਪਚ੍ਚਯੇਸੁ ਘਟਿਤੇਸੁ ਤੀਣਿ ਵਿਸਜ੍ਜਨਾਨਿ ਲਬ੍ਭਨ੍ਤੀਤਿ ਯੋਜਨਾ. ਤੀਣਿ ਵਿਸਜ੍ਜਨਾਨਿ ਨਾਮ ਵਤ੍ਥੁ ਕੁਸਲਾਨਂ ਖਨ੍ਧਾਨਂ ਛ ਹਿ ਪਚ੍ਚਯੇਹਿ ਪਚ੍ਚਯੋ. ਵਤ੍ਥੁ ਅਕੁਸਲਾਨਂ, ਵਤ੍ਥੁ ਅਬ੍ਯਾਕਤਾਨਨ੍ਤਿ. ਏਤ੍ਥ ਚ ਅਤ੍ਤਨੋ ਅਜ੍ਝਤ੍ਤਂ ਵਤ੍ਥੁਂ ਆਰਬ੍ਭ ਵਤ੍ਥੁ ਮੇ ਅਨਿਚ੍ਚਨ੍ਤਿਆਦਿਨਾ ਸਮ੍ਮਸਨ੍ਤਸ੍ਸ ਵਤ੍ਥੁਰੂਪਂ ਕੁਸਲਾਨਂ ਖਨ੍ਧਾਨਂ ਛਹਿ ਪਚ੍ਚਯੇਹਿ ਪਚ੍ਚਯੋ. ਏਤਂ ਮਮ, ਏਸੋ ਹਮਸ੍ਮਿ, ਏਸੋ ਮੇ ਅਤ੍ਤਾ,ਤਿ ਉਪਾਦਿਯਨ੍ਤਸ੍ਸ ਵਤ੍ਥੁ ਰੂਪਂ ਅਕੁਸਲਾਨਂ. ਉਭਯਤ੍ਥਪਿ ਆਵਜ੍ਜਨਕ੍ਖਣੇ ਅਬ੍ਯਾਕਤਾਨਂ. ਅਰਹਤੋ ਪਨ ਤਂ ਅਨਿਚ੍ਚਨ੍ਤਿਆਦਿਨਾ ਸਮ੍ਮਸਨ੍ਤਸ੍ਸ ਕ੍ਰਿਯਾਬ੍ਯਾਕਤਾਨਂ ਖਨ੍ਧਾਨਨ੍ਤਿ. ਤੇਨਾਹ ‘‘ਪਚ੍ਚੁਪ੍ਪਨ੍ਨਂ ਵਤ੍ਥੁਂ’’ਤਿਆਦਿਂ. ਤਤ੍ਥ ‘‘ਪਚ੍ਚੁਪ੍ਪਨ੍ਨਂ ਵਤ੍ਥੁਂ’’ਤਿ ਅਤ੍ਤਨੋ ਪਚ੍ਚੁਪ੍ਪਨ੍ਨਂ ਵਤ੍ਥੁਂ. ਅਧਿਟ੍ਠਾਨਵਿਧਾਨੇ ਪਨ ਆਕਾਸ ਗਮਨੇ ਰੂਪਕਾਯਂ ਆਰਬ੍ਭਚਿਤ੍ਤਂ ਵਿਯ ਕਾਯਂ ਲਹੁਕਂ ਅਧਿਟ੍ਠਹਨ੍ਤਸ੍ਸ ਤਪ੍ਪਰਿਯਾਪਨ੍ਨਂ ਵਤ੍ਥੁ ਅਭਿਞ੍ਞਾਚਿਤ੍ਤ ਦ੍ਵਯਸ੍ਸਾਤਿ ਯੋਜੇਤਬ੍ਬਂ. ‘‘ਅਨਿਟ੍ਠੇਠਾਨੇ’’ਤਿ ਜਵਨਚਿਤ੍ਤਸ੍ਸ ਆਵਜ੍ਜਨੇਨ ਵਿਨਾ ਉਪ੍ਪਜ੍ਜਨਂ ਨਾਮ ਕਤ੍ਥਚਿ ਇਚ੍ਛਿਤਬ੍ਬਂ ਹੋਤਿ. ਕਤ੍ਥਚਿ ਅਨਿਚ੍ਛਿਤਬ੍ਬਂ. ਤਤ੍ਥ ਨਿਰੋਧਸਮਾਪਤ੍ਤਿਤੋ ਵੁਟ੍ਠਾਨੇ, ਮਗ੍ਗਵੀਥੀਸੁ ਗੋਤ੍ਰਭੁਵੋਦਾਨਟ੍ਠਾਨੇ, ਆਗਨ੍ਤੁਕ ਭਵਙ੍ਗਟ੍ਠਾਨੇਤਿ ਇਦਂ ਇਚ੍ਛਿਤਬ੍ਬਟ੍ਠਾਨਂ ਨਾਮ. ਇਤੋ ਅਞ੍ਞਂ ਅਨਿਚ੍ਛਿਤਟ੍ਠਾਨਂ ਨਾਮ. ਏਵਂ ਅਨਿਚ੍ਛਿਤਬ੍ਬੇ ਠਾਨੇਤਿ ਅਤ੍ਥੋ. ‘‘ਪਕਤਿਕਾਲੇ’’ਤਿ ਮਰਣਾਸਨ੍ਨਕਾਲਤੋ ਅਞ੍ਞਸ੍ਮਿਂਕਾਲੇ. ‘‘ਤਾਨਿਵਾ’’ਤਿ ਅਤ੍ਤਨੋ ਅਤ੍ਤਨੋ ਨਿਸ੍ਸਯਵਤ੍ਥੂਨਿਵਾ. ‘‘ਅਞ੍ਞਂ ਵਾ’’ਤਿ ਵਤ੍ਥੁਤੋ ਅਞ੍ਞਂ ਰੂਪਾਦਿਕਂ ਵਾ. ‘‘ਭਿਨ੍ਨਾਰਮ੍ਮਣਾਨਿ ਨਾਮਾ’’ਤਿ ਅਞ੍ਞਂ ਆਵਜ੍ਜਨਸ੍ਸ ਆਰਮ੍ਮਣਂ, ਅਞ੍ਞਂ ਜਵਨਾਨਨ੍ਤਿ ਏਵਂ ਜਵਨਾਨਿ ਆਵਜ੍ਜਨੇਨ ਭਿਨ੍ਨਾਰਮ੍ਮਣਾਨਿ ਵਾ. ਤੇਨ ਵੁਤ੍ਤਂ ‘‘ਪਚ੍ਛਾਉਪ੍ਪਨ੍ਨਾਨੀ’’ਤਿਆਦਿ. ‘‘ਤੇਸਂ’’ਤਿ ਵੀਥਿਚਿਤ੍ਤਾਨਂ. ‘‘ਤਦੇਵਾ’’ਤਿ ਤਂ ਏਵਵਤ੍ਥੁ ਰੂਪਂ. ‘‘ਵਤ੍ਥੁ ਚਾ’’ਤਿ ਨਿਸ੍ਸਯੋ ਚ. ‘‘ਤੇਸਂ’’ਤਿ ਅਟ੍ਠਕਥਾਚਰਿਯਾਨਂ. ਨ ਹਿ ਗਹੇਤੁਂ ਸਕ੍ਕੋਨ੍ਤੀਤਿ ਸਮ੍ਬਨ੍ਧੋ. ਸੇਸਮੇਤ੍ਥ ਸੁਬੋਧਂ. ‘‘ਕਸ੍ਮਾ ਵੁਤ੍ਤਂ’’ਤਿਆਦੀਸੁ. ‘‘ਤਸ੍ਸ ਯਕ੍ਖਸ੍ਸਾ’’ਤਿ ਇਨ੍ਦਕਨਾਮਸ੍ਸ ਤਸ੍ਸਯਕ੍ਖਸ੍ਸ. ‘‘ਇਤਰੇਸਂਪੀ’’ਤਿ ਸਂਸੇਦਜੋਪਪਾਤਿਕਾਨਂਪਿ. ‘‘ਦੁਵਿਧੇਨਾ’’ਤਿ ਰੂਪਜਨਨ ਕਿਚ੍ਚਂ ਰੂਪੂਪਤ੍ਥਮ੍ਭਨ ਕਿਚ੍ਚਨ੍ਤਿ ਏਵਂ ਦੁਵਿਧੇਨ. ਅਥਵਾ ‘‘ਦੁਵਿਧੇਨਾ’’ਤਿ ਅਜ੍ਝਤ੍ਤਾਹਾਰਸ੍ਸ ਉਪਤ੍ਥਮ੍ਭਨਂ ਬਹਿਦ੍ਧਾਹਾਰਸ੍ਸ ਉਪਤ੍ਥਮ੍ਭਨਨ੍ਤਿ ਏਵਂ ਦੁਵਿਧੇਨ. ‘‘ਤਥਾਰੂਪਾਨਞ੍ਚਾ’’ਤਿ ਅਪ੍ਪਨਾਪਤ੍ਤਕਮ੍ਮਵਿਸੇਸੇਨ ਸਿਦ੍ਧਾਨਞ੍ਚ. ‘‘ਅਜ੍ਝਤ੍ਤਾਹਾਰੋਪੀ’’ਤਿ ਪਿਸਦ੍ਦੇਨ ਯਥਾਵੁਤ੍ਤਜੀਵਿਤਿਨ੍ਦ੍ਰਿਯਞ੍ਚ ਅਰੂਪਾਹਾਰੇ ਚ ਸਮ੍ਪਿਣ੍ਡੇਤਿ. ‘‘ਵਤ੍ਥੁਵਿਪਾਕਾਨਂ’’ਤਿ ਵਤ੍ਥੁਰੂਪਂ ਵਿਪਾਕਾਨਂ. ‘‘ਸਬ੍ਬਥਾ’’ਤਿ ਅਬ੍ਯਾਯਪਦਂ. ਤਞ੍ਚ ਸਬ੍ਬਵਿਭਤ੍ਤਿਯੁਤ੍ਤਂ. ਇਧ ਪਨ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਸਬ੍ਬਥਾ’’ਤਿ ਸਬ੍ਬਪ੍ਪਕਾਰਨ੍ਤਿ. ਪਕਾਰੋ ਚ ਵੇਦਿਤਬ੍ਬੋਤਿ ਸਮ੍ਬਨ੍ਧੋ. ਕਥਂ ਵੇਦਿਤਬ੍ਬੋਤਿ ਆਹ ‘‘ਤਿਵਿਧੋ’’ਤਿਆਦਿਂ. ‘‘ਸਹਜਾਤੇ ਸਙ੍ਗਹੇਤਬ੍ਬਂ’’ਤਿ ਪਚ੍ਚਯਭਾਵੇਨ ਸਙ੍ਗਹੇਤਬ੍ਬਂ. ਸਹਜਨਨਂ ਨਾਮ ਅਤ੍ਤਨਾ ਸਹ ਜਨੇਨ੍ਤਸ੍ਸ ਸਹਜਨਨਂ. ਤਞ੍ਚ ਕਮ੍ਮਚਿਤ੍ਤਾਦੀਨਂ ਵਿਯ ਵਿਸੁਂ ਜਨਨਕਿਚ੍ਚਂ ਨ ਹੋਤਿ. ਅਤ੍ਤਨਿ ਉਪ੍ਪਜ੍ਜਨ੍ਤੇ ਏਵ ਇਤਰਾਨਿ ਰੂਪਾਨਿ ਉਪ੍ਪਜ੍ਜਨ੍ਤਿ. ਅਨੁਪ੍ਪਜ੍ਜਨ੍ਤੇ ਨ ਉਪ੍ਪਜ੍ਜਨ੍ਤੀਤਿ ਏਵਰੂਪਂ ਜਨਨਕਿਚ੍ਚਂ ਵੇਦਿਤਬ੍ਬਂ.‘‘ਵਿਨਾਵ ਸਹੁਪ੍ਪਾਦਨਕਿਚ੍ਚੇਨਾ’’ਤਿ ਅਤ੍ਤਨਾ ਸਹੁਪ੍ਪਾਦਨਕਿਚ੍ਚੇ ਆਹਾਰਸ੍ਸ ਬ੍ਯਾਪਾਰੋ ਨਤ੍ਥੀਤਿ ਅਧਿਪ੍ਪਾਯੋ. ਤੇਨੇਵ ਸਹਜਾਤਾਨਿ ਉਪਤ੍ਥਮ੍ਭਨ੍ਤੋਪਿ ਸਹਜਾਤਪਚ੍ਚਯਤ੍ਤਂ ਨ ਗਚ੍ਛਤੀਤਿ. ਏਸਨਯੋ ਰੂਪਜੀਵਿਤਿਨ੍ਦ੍ਰਿਯੇਪਿ. ਤੇਨ ਵੁਤ੍ਤਂ ‘‘ਜੀਵਿਤਂਪੀ’’ਤਿਆਦਿ. ‘‘ਤੀਸੂ’’ਤਿ ਆਰਮ੍ਮਣਞ੍ਚ ਉਪਨਿਸ੍ਸਯੋ ਚ ਅਤ੍ਥਿਚਾਤਿ ਇਮੇਸੁ ਤੀਸੁ. ਆਰਮ੍ਮਣਾਧਿਪਤਿਮ੍ਹਿ ਪੁਰੇਜਾਤਾ ਰਮ੍ਮਣਾਧਿਪਤਿਪਿ ਅਤ੍ਥਿ. ਸੋ ਪੁਰੇਜਾਤਤ੍ਥਿ ਪਚ੍ਚਯੋ ਏਵਾਤਿ ਅਤ੍ਥਿਪਚ੍ਚਯੇ ਸਙ੍ਗਹਿਤੋ. ‘‘ਤਸ੍ਮਿਂ ਕਤੇ ਪਵਤ੍ਤਮਾਨਾਨਂ’’ਤਿ ਤਸ੍ਮਿਂ ਕਮ੍ਮੇ ਕਤੇ ਤਸ੍ਸ ਕਤਤ੍ਤਾ ਏਵ ਪਵਤ੍ਤਮਾਨਾਨਂ. ਆਰਮ੍ਮਣਾਕਾਰੋ ਗੋਚਰਵਿਸਯਾਕਾਰੋ. ‘‘ਸਨ੍ਤਾਨਵਿਸੇਸਂ ਕਤ੍ਵਾ’’ਤਿ ਬੀਜਨਿਧਾਨਂ ਕਤ੍ਵਾਤਿ ਅਧਿਪ੍ਪਾਯੋ. ‘‘ਤੇ’’ਤਿ ਆਰਮ੍ਮਣਪਚ੍ਚਯ ਕਮ੍ਮ ਪਚ੍ਚਯਾ. ‘‘ਅਕਾਲਿਕੋ’’ਤਿ ਮਗ੍ਗਚੇਤਨਾਵਸੇਨ ਅਕਾਲਿਕੋ. ਸੋਹਿ ਅਤ੍ਤਨੋ ਅਨਨ੍ਤਰੇਫਲਂ ਜਨੇਤਿ. ਤਸ੍ਮਾ ਆਗਮੇਤਬ੍ਬਸ੍ਸ ਆਯਤਿਕਾਲਸ੍ਸ ਅਭਾਵਾ ਅਕਾਲਿਕੋਤਿ ਵੁਚ੍ਚਤਿ. ਅਵਸੇਸੋ ਨਾਨਕ੍ਖਣਿਕਪਚ੍ਚਯੋ ਕਾਲਿਕੋ. ‘‘ਪਚ੍ਚਯਟ੍ਠੇਨਾ’’ਤਿ ਪਚ੍ਚਯਕਿਚ੍ਚੇਨ. ਲੋਕਪ੍ਪਵਤ੍ਤਿਯਾ ਕਮ੍ਮਹੇਤੁਕਤ੍ਤਾਤਿ ਸਮ੍ਬਨ੍ਧੋ. ‘‘ਫਲਹੇਤੂ ਪਚਾਰੇਨਾ’’ਤਿ ਫਲਭੂਤਾਯ ਸਬ੍ਬਲੋਕਪ੍ਪਵਤ੍ਤਿਯਾ ਹੇਤੁਭੂਤਸ੍ਸ ਕਮ੍ਮਸ੍ਸ ਨਾਮਂ ਫਲਮ੍ਹਿ ਆਰੋਪੇਤ੍ਵਾ ਵੋਹਾਰੇਨ ਸਬ੍ਬੇਪਿ ਤੇਵੀਸਤਿਪਚ੍ਚਯਾ ਕਮ੍ਮਸਭਾਵਂ ਨਾਤਿਵਤ੍ਤਨ੍ਤੀਤਿ ਯੋਜਨਾ. ਕਮ੍ਮਪਚ੍ਚਯ ਸਙ੍ਖ੍ਯਂ ਗਚ੍ਛਨ੍ਤੀਤਿ ਵੁਤ੍ਤਂ ਹੋਤਿ. ‘‘ਵਿਜ੍ਜਮਾਨਾ ਯੇਵਾ’’ਤਿ ਅਤ੍ਥਿਪਚ੍ਚਯਾ ਏਵਾਤਿ ਵੁਤ੍ਤਂ ਹੋਤਿ. ‘‘ਸਾਸਨਯੁਤ੍ਤਿਯਾ ਵਿਰੁਦ੍ਧਮੇਵਾ’’ਤਿ ਏਤ੍ਥ ਸਾਸਨਯੁਤ੍ਤਿ ਨਾਮ ਤੀਣਿਪਿਟਕਾਨਿ. ‘‘ਵਿਰੁਦ੍ਧਮੇਵਾ’’ਤਿ ਆਰਮ੍ਮਣ ਪਚ੍ਚਯਭੂਤਾ ਸਬ੍ਬੇ ਪਥਵੀ ਪਬ੍ਬਤ ਨਦੀਸਮੁਦ੍ਦ ਅਜਟਾਕਾਸਾਦਯੋ ਚ ਸਬ੍ਬਾਪਞ੍ਞਤ੍ਤਿਯੋ ਚ ਨਿਬ੍ਬਾਨਞ੍ਚ ਕਮ੍ਮਸਙ੍ਖ੍ਯਂ ਗਚ੍ਛਨ੍ਤੀਤਿ ਵਦਨ੍ਤੋ ਚ, ਸਬ੍ਬੇ ਅਤੀਤਾਨਾਗਤ ਧਮ੍ਮਾ ਅਤ੍ਥਿਪਚ੍ਚਯਾ ਏਵਾਤਿ ਵਦਨ੍ਤੋ ਚ, ਤੀਹਿ ਪਿਟਕੇਹਿਪਿ ਵਿਰੁਜ੍ਝਤਿਯੇਵ. ਪਟ੍ਠਾਨਪਾਲ਼ਿਯਾ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਅਤ੍ਥਿ ਸਦ੍ਦੋਹਿ ਪਟ੍ਠਾਨੇ ਪਚ੍ਚੁਪ੍ਪਨ੍ਨਭਾਵੇਨ ਵਿਜ੍ਜਮਾਨਤ੍ਥੋ. ਨ ਪਰਮਤ੍ਥ ਧਮ੍ਮ ਭਾਵੇਨ. ਨਾਪਿਲੋਕ ਸਮ੍ਮੁਤਿਵਸੇਨ. ਨ ਹਿ ਪਰਮਤ੍ਥ ਧਮ੍ਮ ਭੂਤਾਪਿ ਅਤੀਤਾਨਾਗਤਧਮ੍ਮਾ ਇਧ ਅਤ੍ਥਿ ਸਙ੍ਖ੍ਯਂ ਗਚ੍ਛਨ੍ਤਿ. ਨਾਪਿਪਞ੍ਞਤ੍ਤਿ ਹੋਤਿ. ‘‘ਅਞ੍ਞਮਞ੍ਞਪ੍ਪਟਿਬਦ੍ਧਓਕਾਸੇ’’ਤਿ ਅਞ੍ਞਮਞ੍ਞਂ ਨਿਸ੍ਸਯਨਿਸ੍ਸਿਤਭਾਵੇ ਨ ਪਟਿਬਦ੍ਧੇ ਕਾਮਰੂਪਭਵੋਕਾਸੇ. ‘‘ਯਤੋ’’ਤਿ ਯਮ੍ਹਾਪਟਿਸਨ੍ਧਿ ਵਿਞ੍ਞਾਣਤੋ. ‘‘ਯਤੋ’’ਤਿ ਵਾ ਯਮ੍ਹਾਸੀਸਤੋ, ਯਮ੍ਹਾਬੀਜਤੋ ਨਿਬ੍ਬਤ੍ਤੀਤਿ ਯੋਜਨਾ. ‘‘ਬੀਜਤੋ ਵਿਯ ਮਹਾਰੁਕ੍ਖਸ੍ਸਾ’’ਤਿ ਬੀਜਪਚ੍ਚਯਾ ਕਲ਼ੀਰਙ੍ਕੁਰਾਦਿਕਸ੍ਸ ਮਹਾਰੁਕ੍ਖਸਨ੍ਤਾਨਸ੍ਸ ਨਿਬ੍ਬਤ੍ਤਿਵਿਯ. ਪਾਲ਼ਿਪਾਠੇ. ‘‘ਨ ਓਕ੍ਕਮਿਸ੍ਸਥਾ’’ਤਿ ਸਚੇ ਨ ਓਕ੍ਕਮੇਯ੍ਯ. ‘‘ਸਮੁਚ੍ਚਿਸ੍ਸਥਾ’’ਤਿ ਅਪਿਨੁਖੋ ਸਮੁਚ੍ਚੇਯ੍ਯ, ਵਡ੍ਢੇਯ੍ਯ. ‘‘ਵੋਕ੍ਕਮਿਸ੍ਸਥਾ’’ਤਿ ਸਚੇ ਵਿਗਮੇਯ੍ਯ, ਵਿਨਾਸੇਯ੍ਯ. ‘‘ਅਭਿਨਿਬ੍ਬਤ੍ਤਿਸ੍ਸਥਾ’’ਤਿ ਅਪਿਨੁਖੋ ਅਭਿਨਿਬ੍ਬਤ੍ਤੇਯ੍ਯ, ਪਾਤੁਭਵੇਯ੍ਯ. ‘‘ਵੋਚ੍ਛਿਜ੍ਜਿਸ੍ਸਥਾ’’ਤਿ ਸਚੇਉਚ੍ਛਿਜ੍ਜੇਯ੍ਯ. ‘‘ਆਪਜ੍ਜਿਸ੍ਸਥਾ’’ਤਿ ਅਪਿਨੁਖੋ ਆਪਜ੍ਜੇਯ੍ਯ. ‘‘ਯਦਿਦਂ’’ਤਿ ਯਂ ਇਦਂ. ‘‘ਇਦਂ’’ਤਿ ਨਿਪਾਤਮਤ੍ਤਂ. ‘‘ਵਿਞ੍ਞਾਣਂ’’ਤਿ ਪਟਿਸਨ੍ਧਿਵਿਞ੍ਞਾਣਂ. ਯਂ ਵਿਞ੍ਞਾਣਂ ਅਤ੍ਥਿ. ਏਸੇਵ ਵਿਞ੍ਞਾਣ ਧਮ੍ਮੋਤਿ ਯੋਜਨਾ. ‘‘ਰੂਪੁਪ੍ਪਤ੍ਤਿਯਾ’’ਤਿ ਰੂਪੁਪ੍ਪਾਦਸ੍ਸ. ਵਿਞ੍ਞਾਣਂ ਪਚ੍ਚਯੋ ਏਤਸ੍ਸਾਤਿ ਵਿਞ੍ਞਾਣ ਪਚ੍ਚਯਾ. ਰੂਪੁਪ੍ਪਤ੍ਤਿ. ‘‘ਰੂਪਪ੍ਪਵੇਣਿਯਾ’’ਤਿ ਕਮ੍ਮਜਰੂਪਸਨ੍ਤਤਿਯਾ. ‘‘ਉਤੁਆਹਾਰਾਪੀ’’ਤਿ ਅਜ੍ਝਤ੍ਤ ਉਤੁਅਜ੍ਝਤ੍ਤ ਆਹਾਰਾਪਿ. ਇਦਞ੍ਚ ਸਮ੍ਭਵਯੁਤ੍ਤਿ ਵਸੇਨ ਵੁਤ੍ਤਂ. ਅਤ੍ਥਤੋ ਪਨ ਪੁਰਿਮੁਪ੍ਪਨ੍ਨਾਯ ਰੂਪਪ੍ਪਵੇਣਿਯਾ ਅਸਤਿ, ਅਜ੍ਝਤ੍ਤਂ ਤੇ ਉਤੁਆਹਾਰਾਪਿ ਨਤ੍ਥਿਯੇਵ. ਬਹਿਦ੍ਧਾ ਉਤੁਪਨ ਅਸਤਿਪਿ ਪੁਰਿਮੁਪ੍ਪਨ੍ਨਾਯ ਰੂਪਪ੍ਪਵੇਣਿਯਾ ਰੂਪਂ ਨ ਜਨੇਤੀਤਿ ਨ ਵਤ੍ਤਬ੍ਬਂ. ਟੀਕਾਪਾਠੇ. ‘‘ਅਰੂਪਂ ਪਨਾ’’ਤਿ ਅਰੂਪਭੂਮਿਪਨ. ‘‘ਯਸ੍ਮਿਂਰੂਪੇ’’ਤਿ ਕਮ੍ਮਜਰੂਪੇ. ‘‘ਪਚ੍ਚਯਭਾਵੋ ਅਤ੍ਥੀ’’ਤਿ ਪਚ੍ਛਿਮਰੂਪੁਪ੍ਪਤ੍ਤਿਯਾ ਪਚ੍ਚਯਸਤ੍ਤਿ ਅਤ੍ਥਿ. ਕਸ੍ਮਾ ਵਿਞ੍ਞਾਯਤੀਤਿ ਚੇ. ‘‘ਪੁਤ੍ਤਸ੍ਸਾ’’ਤਿਆਦਿਮਾਹ. ‘‘ਬੀਜਭਾਵਸਙ੍ਖਾਤਂ’’ਤਿ ਅਮ੍ਬਬੀਜਾਦੀਨਂ ਬੀਜਭਾਵਸਙ੍ਖਾਤਂ. ‘‘ਨਿਯਾਮਰੂਪਂ ਨਾਮਾ’’ਤਿ ਉਤੁਵਿਸੇਸਮਾਹ. ‘‘ਯਥਾ ਵਾ ਤਥਾ ਵਾ’’ਤਿ ਅਨਿਯਮਤੋਤਿ ਵੁਤ੍ਤਂ ਹੋਤਿ. ‘‘ਯੋਨਿਭਾਵਸਙ੍ਖਾਤਂ’’ਤਿ ਤਂ ਤਂ ਗੋਤ੍ਤਕੁਲਜਾਤੀਨਂ ਜਾਤਿਭਾਵਸਙ੍ਖਾਤਂ. ‘‘ਨਿਯਾਮਰੂਪਂ’’ਤਿ ਉਤੁਵਿਸੇਸ ਸਙ੍ਖਾਤਂ ਨਿਯਾਮਰੂਪਂ. ਸਦਿਸਾਨਿ ਰੂਪਸਣ੍ਠਾਨਾਨਿ ਯੇਸਨ੍ਤਿ ਵਿਗ੍ਗਹੋ. ‘‘ਪਟਿਸਨ੍ਧਿਰੂਪਸ੍ਸੇਵ ਆਨੁਭਾਵੋ’’ਤਿ ਕਲਲਕਾਲਾਦੀਸੁ ਉਪ੍ਪਨ੍ਨਸ੍ਸ ਪਟਿਸਨ੍ਧਿਰੂਪਸ੍ਸੇਵ ਆਨੁਭਾਵੋ. ਪੁਨ ਤਮੇਵਤ੍ਥਂ ਵਿਸੇਸੇਤ੍ਵਾ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿਮਾਹ. ‘‘ਸਮੁਦਾਗਤਂ’’ਤਿ ਸੁਟ੍ਠੁ ਉਪਰੂਪਰਿਆਗਤਂ. ਇਤ੍ਥਿਭਾਵਾਦਿਰੂਪਂ ਬੀਜਰੂਪਞ੍ਚ ਨਿਯਾਮੇਤੀਤਿ ਸਮ੍ਬਨ੍ਧੋ. ‘‘ਨਿਯਾਮਕਂ’’ਤਿ ਨਾਨਾਵਣ੍ਣਸਣ੍ਠਾਨਾਦੀਨਂ ਨਿਯਾਮਕਂ. ‘‘ਤਤ੍ਥ ਇਮਸ੍ਮਿਂ ਭਵੇ’’ਤਿਆਦੀਸੁ. ਧਨਞ੍ਚ ਧਞ੍ਞਞ੍ਚ ਤਤੋ ਅਵਸੇਸਾ ਸਬ੍ਬੇਉਪਭੋਗਪਰਿਭੋਗਾਚਾਤਿ ਵਿਗ੍ਗਹੋ. ਵਿਜ੍ਜਾ ਚ ਸਿਪ੍ਪਞ੍ਚ ਨਾਨਾਬਹੁਸ੍ਸੁਤਞ੍ਚ ਪਰਿਯਤ੍ਤਿ ਚਾਤਿ ਦ੍ਵਨ੍ਦੋ. ‘‘ਅਨਾਗਤਾਨਂ ਤਾਸਂ’’ਤਿ ਤਾਸਂ ਅਭਿਨਵਧਨਧਞ੍ਞਾਦਿਸਮ੍ਪਤ੍ਤੀਨਂ. ‘‘ਉਪਨਿਸ੍ਸਯ ਪਚ੍ਚਯਤਾ’’ਤਿ ਪੁਬ੍ਬਯੋਗਕਮ੍ਮਸ੍ਸ ਉਪਨਿਸ੍ਸਯ ਪਚ੍ਚਯਤਾ. ਤਤ੍ਥ ਧਨਧਞ੍ਞਭੋਗਾਨਂ ਪਟਿਲਾਭਤ੍ਥਾਯ ਪੁਬ੍ਬਯੋਗਕਰਣਂ ਨਾਮ ਕਸਿਕਮ੍ਮ ਵਾਣਿਜ੍ਜਕਮ੍ਮਾਦੀਨਂ ਕਰਣਂ. ਤਤ੍ਥ ਕਸਿਕਮ੍ਮੇ ਤਾਵ ਧਨਧਞ੍ਞਭੋਗਾਨਂ ਪਟਿਲਾਭਤ੍ਥਾਯ ਕਸਿਕਮ੍ਮਕਰਣੇ ਧਨਧਞ੍ਞਭੋਗਾ ਅਨਾਗਤੂਪਨਿਸ੍ਸਯ ਪਚ੍ਚਯੋ. ਇਦਾਨਿ ਕਸਿਕਮ੍ਮਕਰਣਂ ਤਸ੍ਸ ਪਚ੍ਚਯੁਪ੍ਪਨ੍ਨਂ. ਧਨਧਞ੍ਞ ਭੋਗਾਨਂ ਪਟਿਲਾਭਪਰਿਭੋਗਕਾਲੇਸੁ ਕਸਿਕਮ੍ਮਕਰਣਂ ਅਤੀਤੂਪਨਿਸ੍ਸਯ ਪਚ੍ਚਯੋ. ਤੇਸਂ ਪਟਿਲਾਭੋ ਚ ਪਰਿਭੋਗੋ ਚ ਤਸ੍ਸ ਪਚ੍ਚਯੁਪ੍ਪਨ੍ਨੋ. ਕਸਿਕਮ੍ਮਕਰਣਕ੍ਖਣੇ ਪਨ ਖੇਤ੍ਤ, ਵਤ੍ਥੁ, ਬੀਜ, ਮੇਘਵੁਟ੍ਠਿਯੋ ਚ ਨਙ੍ਗਲਾਦੀਨਿ ਕਸਿਭਣ੍ਡਾਨਿ ਚ ਗੋਮਹਿਂਸਾ ਚ ਕਮ੍ਮਕਾਰਕ ਪੁਰਿਸਾ ਚ ਪਚ੍ਚੁਪ੍ਪਨ੍ਨੂਪਨਿਸ੍ਸਯੋ. ਕਸਿਕਮ੍ਮਕਰਣਂ ਤਸ੍ਸ ਪਚ੍ਚਯੁਪ੍ਪਨ੍ਨਂ. ਕਮ੍ਮਸਾਧਿਕਸ੍ਸ ਮਾਤਾਪਿਤਾਦਯੋ ਪੁਬ੍ਬਪੁਰਿਸਾ ਤਸ੍ਸ ਕਮ੍ਮਸ੍ਸ ਅਤੀਤੂਪਨਿਸ੍ਸਯ ਪਚ੍ਚਯੋ. ਤਂ ਕਮ੍ਮਂ ਤਸ੍ਸ ਪਚ੍ਚਯੁਪ੍ਪਨ੍ਨਨ੍ਤਿ. ਏਵਂ ਸੇਸੇਸੁਪਿ. ਸੇਸਂ ਸੁਵਿਞ੍ਞੇਯ੍ਯਂ.

‘‘ਪਞ੍ਚਵਿਧ’’ਨ੍ਤਿਆਦੀਸੁ. ‘‘ਸਣ੍ਠਾਨਤ੍ਤਂ’’ਤਿ ਅਣੁ, ਤਜ੍ਜਾਰੀ, ਰਥਰੇਣੁ, ਲਿਕ੍ਖਾਦੀਨਿ ਉਪਾਦਾਯ ਸਬ੍ਬੇਸਂ ਰੂਪਸਣ੍ਠਾਨਾਨਂ ਭਾਵੋ ਸਣ੍ਠਾਨਤ੍ਤਂ. ‘‘ਭਾਵੋ’’ਤਿ ਚ ਤੇਸਂ ਪਵਤ੍ਤਿ ਵੁਚ੍ਚਤਿ. ‘‘ਪਵਤ੍ਤਿ ਹੇਤੂ’’ਤਿ ਚ ਪਰਮਤ੍ਥ ਰੂਪ ਧਮ੍ਮਾ ਏਵ. ‘‘ਅਨੁਪਗਮਨਤੋ’’ਤਿ ਏਤ੍ਥ ਸਭਾਵਤੋ ਅਤਿਸੁਖੁਮਤ੍ਤਾ ਅਨੁਪਗਮਨਂ ਵੇਦਿਤਬ੍ਬਂ. ਅਧਿਵਚਨਸਙ੍ਖਾਤਂ ਨਾਮਾਭਿਧਾਨਨ੍ਤਿ ਵਿਗ੍ਗਹੋ. ‘‘ਅਧਿਵਚਨਂ’’ਤਿ ਚ ਅਤ੍ਥਪ੍ਪਕਾਸਕਤ੍ਤਾ ਅਧਿਕਂ ਵਚਨਂ ਅਧਿਵਚਨਂ. ‘‘ਨਾਮਾਭਿਧਾਨ’’ਨ੍ਤਿ ਚ ਨਾਮਪਞ੍ਞਤ੍ਤਿ ਵੁਚ੍ਚਤਿ. ‘‘ਗਹੇਤਬ੍ਬ ਭਾਵੋ’’ਤਿ ਇਦਂ ਚਿਤ੍ਤਂ ਨਾਮ, ਅਯਂ ਫਸ੍ਸੋਨਾਮਾਤਿਆਦਿਨਾ ਕਥੇਨ੍ਤਾਨਂ ਸਨ੍ਤਿਕਾ ਨਾਮਾਭਿਧਾਨਂ ਸੁਤ੍ਵਾ ਤਦਨੁਰੂਪਸ੍ਸ ਸਭਾਵਤ੍ਥਸ੍ਸ ਜਾਨਨਵਸੇਨ ਞਾਣੇਨ ਗਹੇਤਬ੍ਬਭਾਵੋ. ਨਾਮ ਪਞ੍ਞਤ੍ਤਾਨੁਸਾਰੇਨ ਜਾਨਿਤਬ੍ਬਤ੍ਤਾ ਨਾਮਨ੍ਤਿ ਵੁਚ੍ਚਤੀਤਿ ਵੁਤ੍ਤਂ ਹੋਤਿ. ਆਰਮ੍ਮਣੇ ਨਮਤੀਤਿ ਨਾਮਂ. ਆਰਮ੍ਮਣਿਕ ਧਮ੍ਮਾ ਵਾ ਏਤ੍ਥ ਨਮਨ੍ਤੀਤਿ ਨਾਮਨ੍ਤਿਪਿ ਯੁਜ੍ਜਤਿ.

ਇਮਸ੍ਮਿਂ ਪਚ੍ਚਯਸਙ੍ਗਹੇ ਪਚ੍ਚਯਧਮ੍ਮੇਸੁ ਪਞ੍ਞਤ੍ਤੀਨਂਪਿ ਸਙ੍ਗਹਿਤਤ੍ਤਾ ਪਞ੍ਞਤ੍ਤਿ ਸਙ੍ਗਹੋਪਿ ਥੇਰੇਨ ਇਧ ਨਿਕ੍ਖਿਤ੍ਤੋ. ਤਤ੍ਥ ‘‘ਪਞ੍ਞਾਵੀਯਤੀ’’ਤਿ ਏਤ੍ਥ ਪਞ੍ਞਾਪਨਂ ਨਾਮ ਵੋਹਾਰਟ੍ਠਪਨਂ. ਤਞ੍ਚਠਪਨਂ ਦ੍ਵੀਹਿਕਾਰਣੇਹਿ ਸਿਜ੍ਝਤਿ ਵਦਨ੍ਤਾਨਂ ਵੋਹਾਰੇਨ ਚ, ਸੁਣਨ੍ਤਾਨਂ ਸਮ੍ਪਟਿਚ੍ਛਨੇਨ ਚਾਤਿ ਦਸ੍ਸੇਤੁਂ ‘‘ਅਯਂ ਪੀ’’ਤਿਆਦਿਮਾਹ. ‘‘ਸਮ੍ਪਟਿਚ੍ਛੀਯਤੀ’’ਤਿ ਯਥਾ ਪੁਬ੍ਬਪੁਰਿਸੇਹਿ ਵੋਹਰੀਯਤਿ, ਤਥਾ ਪਚ੍ਛਿਮ ਜਨਪਰਮ੍ਪਰਾਹਿ ਵੋਹਰੀਯਤੀਤਿ ਵੁਤ੍ਤਂ ਹੋਤਿ. ਪਕਾਰੇਨ ਞਾਪੀਯਤੀਤਿ ਪਞ੍ਞਤ੍ਤੀਤਿਪਿ ਯੁਜ੍ਜਤਿ. ‘‘ਬ੍ਯਞ੍ਜਨਤ੍ਥੋ’’ਤਿ ਮਨੁਸ੍ਸ, ਦੇਵ, ਪਥਵੀ, ਪਬ੍ਬਤਾਦਿਕੋ ਸਦ੍ਦਤ੍ਥੋ. ‘‘ਪਞ੍ਞਾ ਪੀਯਨ੍ਤੀ’’ਤਿ ਪਕਾਰੇਨ ਠਪੀਯਨ੍ਤਿ. ਸਦ੍ਦਪਞ੍ਞਤ੍ਤਿਂ ਆਹਾਤਿ ਅਧਿਕਾਰੋ. ਅਧਿਮਤ੍ਤਭਾਵਪ੍ਪਕਾਰੋ ਨਾਮ ਪਥਵੀਪਬ੍ਬਤਾਦੀਸੁ ਪਥਵੀਧਾਤੁਯਾ ਅਧਿਮਤ੍ਤ ਭਾਵਵਿਸੇਸੋ. ਨਦੀ ਸਮੁਦ੍ਦੋਦਕਾਦੀਸੁ ਆਪੋਧਾਤੁਯਾ. ਅਗ੍ਗਿਕ੍ਖਨ੍ਧੇਸੁ ਤੇਜੋਧਾਤੁਯਾ. ਵਾਤਕ੍ਖਨ੍ਧੇਸੁ ਵਾਯੋਧਾਤੁਯਾਤਿ ਏਵਂ ਅਧਿਮਤ੍ਤ ਭਾਵਵਿਸੇਸੋ. ਵਿਵਿਧੇਨ ਪਕਾਰੇਨ ਪਰਿਣਮਨਂ ਵਿਪਰਿਣਾਮੋਤਿ ਆਹ ਤਥਾ ਤਥਾ ਵਿਪਰਿਣਾਮਾਕਾਰਨ੍ਤਿ. ਪਥਵੀਪਬ੍ਬਤਾਦਿਵੋਹਾਰੋ ਸਣ੍ਠਿਤਾਕਾਰਂ ਨਿਸ੍ਸਾਯ ਪਵਤ੍ਤੋ ਨ ਹੋਤਿ. ਪਥਵੀ ਨਾਮ ਏਵਂ ਸਣ੍ਠਾਨਾ, ਪਬ੍ਬਤੋ ਨਾਮ ਏਵਂ ਸਣ੍ਠਾਨੋਤਿ ਸਣ੍ਠਾਨਨਿਯਮੋ ਨਤ੍ਥਿ. ਪਂਸੁਸਿਲਾਨਂ ਰਾਸਿਪੁਞ੍ਜਪ੍ਪਵਤ੍ਤਿਮਤ੍ਤੇਨ ਵੋਹਾਰੋ ਸਿਦ੍ਧੋਤਿ ਵੁਤ੍ਤਂ ‘‘ਨ ਹਿ ਇਧ ਸਣ੍ਠਾਨਂ ਪਧਾਨਂ’’ਤਿ. ‘‘ਕਟ੍ਠਾਦਯੋ ਏਵ ਵੁਚ੍ਚਨ੍ਤੀ’’ਤਿ ਤੇ ਏਵਸਣ੍ਠਾਨਨਾਨਤ੍ਤਂ ਪਟਿਚ੍ਚ ਨਾਨਾਵੋਹਾਰੇਨ ਵੁਚ੍ਚਨ੍ਤਿ. ਪਥਵੀ ਪਬ੍ਬਤ ਨਦੀ ਸਮੁਦ੍ਦਾਦੀਸੁ ਵਿਯ ਭੂਤਾਨਂ ਪਵਤ੍ਤਿਵਿਸੇਸਾਕਾਰੇਨਾਤਿ ਵੁਤ੍ਤਂ ‘‘ਨ ਹਿ ਇਧ ਸਮੂਹੋ ਪਧਾਨਂ’’ਤਿ. ‘‘ਉਪਾਦਾਪਞ੍ਞਤ੍ਤੀ’’ਤਿ ਪਞ੍ਚਕ੍ਖਨ੍ਧ ਧਮ੍ਮੇ ਉਪਾਦਾਯ ਤੇਹਿ ਅਨਞ੍ਞਂ ਏਕੀਭੂਤਂ ਕਤ੍ਵਾ ਪਞ੍ਞਤ੍ਤਿ. ਨ ਆਕਾਸ ਪਞ੍ਞਤ੍ਤਿ ਦਿਸਾਦੇਸਪਞ੍ਞਤ੍ਤਿਯੋ ਵਿਯ ਤੇਹਿ ਖਨ੍ਧੇਹਿ ਮੁਞ੍ਚਿਤ੍ਵਾ ਪਞ੍ਞਤ੍ਤਿ. ‘‘ਯਤੋ’’ਤਿ ਯਮ੍ਹਾਦਿਸਤੋ. ‘‘ਲਦ੍ਧਪ੍ਪਕਾਸਤ੍ਤਾ’’ਤਿ ਲਦ੍ਧਪ੍ਪਭਾਸਤ੍ਤਾ. ‘‘ਅਹਸ੍ਸਾ’’ਤਿ ਦਿਵਸਸ੍ਸ. ਉਦ੍ਧੁਮਾਤਕਾਦੀਨਿ ‘ਉਦ੍ਧੁਮਾਤਕਂ ਪਟਿਕੂਲਂ’ਤਿਆਦਿਨਾ ਪਟਿਕੂਲਵਸੇਨ ਮਨਸਿਕਰੋਨ੍ਤਸ੍ਸਪਿ ਨਿਮਿਤ੍ਤਂ ਉਪਟ੍ਠਹਨ੍ਤਂ ਭੂਤਵਿਕਾਰਪ੍ਪਕਾਰੇਨ ਉਪਟ੍ਠਹਤੀਤਿ ਕਤ੍ਵਾ ਭੂਤਨਿਮਿਤ੍ਤੇ ਸਙ੍ਗਣ੍ਹਾਤਿ. ‘‘ਅਟ੍ਠਕਥਾਯਂ’’ਤਿ ਪੁਗ੍ਗਲਪਞ੍ਞਤ੍ਤਿ ਅਟ੍ਠਕਥਾਯਂ. ‘‘ਤਾਸਂ’’ਤਿ ਭੂਮਿਪਬ੍ਬਤਾਦਿਕਾਨਂ ਅਤ੍ਥ ਪਞ੍ਞਤ੍ਤੀਨਂ. ‘‘ਤਥਾ ਤਥਾ’’ਤਿ ਅਯਂ ਭੂਮਿ, ਅਯਂ ਪਬ੍ਬਤੋ, ਤਿਆਦਿਨਾ ਤੇਨ ਤੇਨ ਵੋਹਾਰੇਨ. ਅਤ੍ਥਾਨਂ ਪਰਮਤ੍ਥਾਨਂ ਛਾਯਾਤਿ ਅਤ੍ਥਚ੍ਛਾਯਾ. ‘‘ਛਾਯਾ’’ਤਿ ਚ ਨਿਮਿਤ੍ਤਚ੍ਛਾਯਾਯੋ ਵੁਚ੍ਚਨ੍ਤਿ. ਅਤ੍ਥਚ੍ਛਾਯਾਨਂ ਆਕਾਰੋ ਅਤ੍ਥਚ੍ਛਾਯਾਕਾਰੋ. ‘‘ਆਕਾਰੋ’’ਤਿ ਚ ਨਾਨਾਸਮੂਹ ਨਾਨਾਸਣ੍ਠਾਨਾਦਿਕੋ ਆਕਾਰੋ. ਅਤ੍ਥੋਤਿ ਵਾ ਸਦ੍ਦਾਭਿਧੇਯ੍ਯੋ ਵਚਨਤ੍ਥੋ. ਸੋਯੇਵ ਸਮੂਹਾਕਾਰਾਦਿ ਨਿਮਿਤ੍ਤ ਮਤ੍ਤਤ੍ਤਾ ਅਤ੍ਥਚ੍ਛਾਯਾਕਾਰੋਤਿ ਵੁਚ੍ਚਤੀਤਿ ਇਮਮਤ੍ਥਂ ਦਸ੍ਸੇਤਿ ‘‘ਸਦ੍ਦਾਭਿਧੇਯ੍ਯ ਸਙ੍ਖਾਤੇਨਾ’’ਤਿਆਦਿਨਾ. ‘‘ਦਬ੍ਬਪ੍ਪਟਿਬਿਮ੍ਬਾਕਾਰੇਨਾ’’ਤਿ ਦਬ੍ਬਸਙ੍ਖਾਤੇਨ ਪਟਿਬਿਮ੍ਬਾਕਾਰੇਨ. ‘‘ਓਲਮ੍ਬਿਯਾ’’ਤਿ ਅਵਲਮ੍ਬਿਤ੍ਵਾ. ‘‘ਗਣਨੂਪਗਂ ਕਤ੍ਵਾ’’ਤਿ ਅਯ ਮੇਕੋ ਅਤ੍ਥੋ, ਇਦਮੇਕਂ ਵਤ੍ਥੂਤਿ ਏਵਂ ਗਣਨੂਪਗਂ ਕਤ੍ਵਾ. ‘‘ਇਮੇਛਾ’’ਤਿ ਇਮੇ ਛਸਦ੍ਦਪਞ੍ਞਤ੍ਤਿ ਵੋਹਾਰਾ ਨਾਮ ਨਾਮਕਮ੍ਮਾਦਿ ਨਾਮ. ‘‘ਅਤ੍ਤਨੀ’’ਤਿ ਨਾਮਪਦ ਸਙ੍ਖਾਤੇ ਅਤ੍ਤਨਿ. ਅਤ੍ਥ ਵਿਸਯਂ ਏਵ ਹੁਤ੍ਵਾ ਪਵਤ੍ਤਤਿ ਭਾਸਞ੍ਞੂਨਨ੍ਤਿ ਅਧਿਪ੍ਪਾਯੋ. ‘‘ਨਾਮੇ ਸਤੀ’’ਤਿ ਅਕ੍ਖਰਸਮੂਹੋ ਪਦਂ, ਪਦਸਮੂਹੋ ਵਾਕ੍ਯਨ੍ਤਿ ਏਵਂ ਵੁਤ੍ਤੇ ਨਾਮਪਦੇ ਵਿਜ੍ਜਮਾਨੇ ਸਤਿ. ‘‘ਤਦੁਗ੍ਗਣ੍ਹਨ੍ਤਾਨਂ’’ਤਿ ਤਂ ਤਂ ਨਾਮਪਦਂ ਵਾਚੁਗ੍ਗਤਕਰਣ ਵਸੇਨ ਉਗ੍ਗਣ੍ਹਨ੍ਤਾਨਂ ਜਨਾਨਂ. ‘‘ਤਦਤ੍ਥਾ’’ਤਿ ਤਸ੍ਸ ਤਸ੍ਸ ਨਾਮ ਪਦਸ੍ਸ ਅਤ੍ਥਾ. ‘‘ਆਗਚ੍ਛਨ੍ਤਿ ਯੇਵਾ’’ਤਿ ਭਾਸਞ੍ਞੂਨਂ ਞਾਣਾਭਿਮੁਖਂ ਆਗਚ੍ਛਨ੍ਤਿਯੇਵ. ਏਤੇਨ ਅਤ੍ਤਨਿ ਅਤ੍ਥਸ੍ਸ ਨਾਮਨਂ ਨਾਮ ਅਤ੍ਥਜੋਤਨ ਕਿਚ੍ਚਮੇਵਾਤਿ ਦੀਪੇਤਿ. ‘‘ਸੁਣਨ੍ਤਾਨਂ ਞਾਣਂ’’ਤਿ ਏਤ੍ਥ ‘‘ਞਾਣਂ’’ਤਿ ਉਪਲਕ੍ਖਣ ਵਚਨਂ, ਅਕੁਸਲ ਵਿਞ੍ਞਾਣਸ੍ਸਪਿ ਅਧਿਪ੍ਪੇਤਤ੍ਤਾ. ‘‘ਤਂ ਤਂ ਅਤ੍ਥਾਭਿਮੁਖਂ ਨਾਮੇਤੀ’’ਤਿ ਆਰਮ੍ਮਣ ਕਰਣਵਸੇਨ ਨਾਮੇਤਿ. ‘‘ਨਾਮਗ੍ਗਹਣ ਵਸੇਨਾ’’ਤਿ ਅਯਂ ਅਸੁਕੋਨਾਮ ਹੋਤੂਤਿ ਏਵਂ ਨਾਮਗ੍ਗਹਣਵਸੇਨ. ‘‘ਧਾਰੀਯਤੀ’’ਤਿ ਯਾਵਜੀਵਂਪਿ ਅਪ੍ਪਮੁਸ੍ਸਮਾਨਂ ਕਤ੍ਵਾ ਧਾਰੀਯਤਿ. ਨੀਹਰਿਤ੍ਵਾ ਵੁਚ੍ਚਤਿ ਅਤ੍ਥੋ ਏਤਾਯਾਤਿ ਨਿਰੁਤ੍ਤਿ. ‘‘ਏਤਾਯਾ’’ਤਿ ਕਰਣਭੂਤਾਯ ਏਤਾਯਨਾਮਜਾਤਿਯਾ. ‘‘ਅਵਿਦਿਤਪਕ੍ਖੇ’’ਤਿ ਨਾਮਪਦਂ ਅਸ੍ਸੁਤਕਾਲੇ ਅਵਿਞ੍ਞਾਤਪਕ੍ਖੇ. ‘‘ਤਤੋ ਨੀਹਰਿਤ੍ਵਾ’’ਤਿ ਅਵਿਦਿਤਪਕ੍ਖਤੋ ਞਾਣੇਨ ਨੀਹਰਿਤ੍ਵਾ. ‘‘ਕਥੀਯਤੀ’’ਤਿ ਤਂ ਸੁਤਕਾਲੇ ਵਦਨ੍ਤੇਨ ਸੁਣਨ੍ਤਸ੍ਸ ਆਚਿਕ੍ਖੀਯਤਿ ਜਾਨਾਪੀਯਤਿ. ‘‘ਅਤ੍ਥਸ੍ਸਾ’’ਤਿ ਅਵਿਦਿਤਪਕ੍ਖੇ ਠਿਤਸ੍ਸ ਅਤ੍ਥਸ੍ਸ. ‘‘ਏਤਸ੍ਸੇ ਵਾ’’ਤਿ ਨਾਮਪਦਸ੍ਸੇਵ. ਨਾਮਪਦਨ੍ਤਿ ਚ ਕ੍ਰਿਯ ਪਦਂਪਿ, ਉਪਸਗ੍ਗਪਦਮ੍ਪਿ, ਨਿਪਾਤਪਦਮ੍ਪਿ, ਪਾਟਿਪਦਿਕਪਦਂਪਿ, ਇਧ ਨਾਮਪਦਨ੍ਤ੍ਵੇਵ ਵੁਚ੍ਚਤਿ. ‘‘ਵਿਸੇਸਨਭੂਤਾਨਂ’’ਤਿ ਅਞ੍ਞਪਦਤ੍ਥਸਮਾਸੇ ਸਮਾਸਪਦਾਨਂ ਅਤ੍ਥਾ ਵਿਸੇਸਨਾ ਨਾਮ. ਏਵਂ ਵਿਸੇਸਨਭੂਤਾਨਂ. ‘‘ਪੁਗ੍ਗਲਸ੍ਸਾ’’ਤਿ ਅਞ੍ਞਪਦਤ੍ਥਭੂਤਸ੍ਸ ਅਭਿਞ੍ਞਾਲਾਭੀ ਪੁਗ੍ਗਲਸ੍ਸ. ‘‘ਵਦਨ੍ਤੀ’’ਤਿ ਆਨਨ੍ਦਾਚਰਿਯਂ ਸਨ੍ਧਾਯ ਵੁਤ੍ਤਂ. ਸੋ ਹਿ ਧਮ੍ਮਸਙ੍ਗਣਿਯਂ ਪਞ੍ਞਤ੍ਤਿਦੁਕਨਿਦ੍ਦੇਸੇ ਮੂਲਟੀਕਾਯਂ ਤਥਾ ਵਦਤਿ. ‘‘ਤਬ੍ਭਾਵਂ’’ਤਿ ਅਕ੍ਖਰ ਪਦਬ੍ਯਞ੍ਜਨਭਾਵਂ. ‘‘ਅਸ੍ਸਾ’’ਤਿ ਨਾਮਪਞ੍ਞਤ੍ਤਿਯਾ. ਅਕ੍ਖਰਪਦਬ੍ਯਞ੍ਜਨਂ ਗੋਚਰੋ ਆਰਮ੍ਮਣਂ ਅਸ੍ਸਾਤਿ ਵਿਗ੍ਗਹੋ. ‘‘ਅਨੁਸਾਰੇਨਾ’’ਤਿ ਅਨੁਗਮਨੇਨ. ‘‘ਲੋਕਸਙ੍ਕੇਤ ਨਿਮ੍ਮਿਤਾ’’ਤਿ ਲੋਕਸਙ੍ਕੇਤਞ੍ਞਾਣੇਨ ਪਵਤ੍ਤਿਤਾ. ‘‘ਲੋਕਸਙ੍ਕੇਤਞ੍ਞਾਣਂ’’ਤਿ ਚ ਇਦਂ ਨਾਮਂ ਇਮਸ੍ਸਤ੍ਥਸ੍ਸ ਨਾਮਂ, ਅਯਮਤ੍ਥੋ ਇਮਸ੍ਸ ਨਾਮਸ੍ਸ ਅਤ੍ਥੋਤਿ ਏਵਂ ਪੁਰੇਤਰਂ ਲੋਕਸਞ੍ਞਾਣ ਜਾਨਨਕਞ੍ਞਾਣਂ. ‘‘ਅਤੀਤ ਸਦ੍ਦਮਤ੍ਤਾਰਮ੍ਮਣਾ’’ਤਿ ਸੋਤਵਿਞ੍ਞਾਣ ਵੀਥਿਯਾ ਆਰਮ੍ਮਣਂ ਹੁਤ੍ਵਾ ਨਿਰੁਦ੍ਧਂ ਅਤੀਤ ਸਦ੍ਦਮਤ੍ਤਂ ਕੁਰੁਮਾਨਾ. ‘‘ਤੇਨ ਵੁਤ੍ਤਵਚਨੇ’’ਤਿ ਤੇਨ ਸਿਕ੍ਖਂ ਪਚ੍ਚਕ੍ਖਨ੍ਤੇਨ ਭਿਕ੍ਖੁਨਾ ਸਿਕ੍ਖਂ ਪਚ੍ਚਕ੍ਖਾਮੀਤਿ ਵੁਤ੍ਤਵਚਨੇ. ਪਚ੍ਚੁਪ੍ਪਨ੍ਨਂ ਸਦ੍ਦਂ ਸੋਤਵਿਞ੍ਞਾਣ ਵੀਥਿਯਾ, ਅਤੀਤਞ੍ਚ ਸਦ੍ਦਂ ਮਨੋਵਿਞ੍ਞਾਣ ਵੀਥਿਯਾਤਿ ਯੋਜਨਾ. ‘‘ਤਾਨਿ ਅਕ੍ਖਰਾਨੀ’’ਤਿ ਸਿਕ੍ਖਂ ਪਚ੍ਚਕ੍ਖਾਮੀਤਿ ਵਾਕ੍ਯੇ ਅਵਯਵਕ੍ਖਰਾਨਿ. ‘‘ਅਯਂ ਅਕ੍ਖਰ ਸਮੂਹੋ’’ਤਿ ਇਦਂ ਨਾਮਪਦਨ੍ਤਿ ਵੁਤ੍ਤਂ ਹੋਤਿ. ਏਤਸ੍ਸ ਅਤ੍ਥਸ੍ਸ. ‘‘ਵਿਨਿਚ੍ਛਯਵੀਥਿਂ’’ਤਿ ਅਕ੍ਖਰ ਪਦਸਲ੍ਲਕ੍ਖਣਵੀਥਿਞ੍ਚ. ‘‘ਏਕਕ੍ਖਰੇ ਸਦ੍ਦੇ’’ਤਿ ‘ਗੋ’ ਇਚ੍ਚਾਦਿਕੇ ਏਕਕ੍ਖਰੇ ਪਞ੍ਞਤ੍ਤਿ ਸਦ੍ਦੇ. ‘‘ਯਾ’’ਤਿ ਨਾਮ ਪਞ੍ਞਤ੍ਤਿ. ‘‘ਵਦਨ੍ਤਸ੍ਸ ਮਨਸਾ’’ਤਿ ਸਮ੍ਬਨ੍ਧੋ. ‘‘ਪੁਬ੍ਬਭਾਗੇ’’ਤਿ ਯਂ ਕਿਞ੍ਚਿ ਅਤ੍ਥਂ ਪਰੇਸਂ ਵਤ੍ਤੁਕਾਮੋ ਵਦਨ੍ਤੋ ਤਸ੍ਸ ਤਸ੍ਸ ਅਤ੍ਥਸ੍ਸ ਨਾਮਂ ਪਥਮਂ ਮਨੋਦ੍ਵਾਰਵੀਥਿਯਾ ਨਿਯਮੇਤ੍ਵਾ ਏਵ ਵਦਤਿ, ਤਂ ਨਾਮਂ ਪੁਬ੍ਬਭਾਗੇ ਵਦਨ੍ਤੇਨ ਮਨਸਾ ਵਵਤ੍ਥਾਪਿਤਾ ਨਾਮਪਞ੍ਞਤ੍ਤੀਤਿ ਵੁਚ੍ਚਤਿ. ਪਟਿਪਾਟਿਕਥਨਂ ਪਵਤ੍ਤਿਕ੍ਕਮਕਥਨਂ. ‘‘ਵੁਤ੍ਤਂ’’ਤਿ ਅਟ੍ਠਕਥਾਸੁ ਵੁਤ੍ਤਂ. ਤਥਾ ਅਦ੍ਧਮਤ੍ਤਿਕਨ੍ਤਿ ਚ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਵੁਤ੍ਤਂ’’ਤਿ ਚ ਸਦ੍ਦਸਤ੍ਥੇਸੁ ਵੁਤ੍ਤਂ.

ਗਾਥਾਯਂ. ‘‘ਮਤ੍ਤਾ’’ਤਿ ਏਕਵਿਜ੍ਜੁਪ੍ਪਾਦਕ੍ਖਣਂ ਵੁਚ੍ਚਤਿ. ਏਕਾ ਮਤ੍ਤਾਯਸ੍ਸਾਤਿ ਏਕਮਤ੍ਤੋ. ‘‘ਦੀਘਮੁਚ੍ਚਤੇ’’ਤਿ ਦੀਘੋ ਨਾਮ ਵੁਚ੍ਚਤੇ. ‘‘ਪ੍ਲੁਤੋ’’ਤਿ ਨਾਨਪ੍ਪਕਾਰੇਨ ਰੁਤੋ ਗਾਯਿਤੋਤਿ ਪਰੁਤੋ. ਸੋ ਏਵ ਰਕਾਰਸ੍ਸ ਲਕਾਰਂ ਕਤ੍ਵਾ ਪਕਾਰੇ ਚ ਸਰਲੋਪਂ ਕਤ੍ਵਾ ਪ੍ਲੁਤੋਤਿ ਵੁਚ੍ਚਤਿ. ਗੀਤਨ੍ਤਿ ਵੁਤ੍ਤਂ ਹੋਤਿ. ‘‘ਪਰਮਤ੍ਥ ਸਦ੍ਦਸਙ੍ਘਾਟਾਨਂ’’ਤਿ ਪਰਮ੍ਪਰਾ ਪਵਤ੍ਤਾਨਂ ਪਰਮਤ੍ਥ ਸਦ੍ਦਰਾਸੀਨਂ. ‘‘ਅਨੇਕਕੋਟਿਸਤਸਹਸ੍ਸਾਨਿ ਚਿਤ੍ਤਾਨੀ’’ਤਿ ਜਵਨਵੀਥੀਨਂ ਅਨ੍ਤਰਨ੍ਤਰਾ ਭਵਙ੍ਗਚਿਤ੍ਤੇਹਿ ਸਦ੍ਧਿਂ ਅਨੇਕਕੋਟਿਸਤਸਹਸ੍ਸਾਨਿ ਚਿਤ੍ਤਾਨਿ.

ਪਟ੍ਠਾਨਨਯਾਨੁਦੀਪਨਾ ਨਿਟ੍ਠਿਤਾ.

ਪਚ੍ਚਯਸਙ੍ਗਹਾਨੁਦੀਪਨਾ ਨਿਟ੍ਠਿਤਾ.