੯. ਕਮ੍ਮਟ੍ਠਾਨਸਙ੍ਗਹਅਨੁਦੀਪਨਾ

੧੭੦. ਕਮ੍ਮਟ੍ਠਾਨਸਙ੍ਗਹੇ. ਵਿਦਿਤੋ ਵਿਞ੍ਞਾਤੋ ਨਾਮਰੂਪ ਵਿਭਾਗੋ ਯੇਨਾਤਿ ਵਿਗ੍ਗਹੋ. ਯੋਗੀ ਪੁਗ੍ਗਲੋ. ‘‘ਕਿਲੇਸੇ ਸਮੇਤੀ’’ਤਿ ਕਾਮਚ੍ਛਨ੍ਦਾਦਿਕੇ ਨੀਵਰਣਕਿਲੇਸੇ ਉਪਸਮੇਤਿ. ‘‘ਤਥਾ ਪਵਤ੍ਤੋ’’ਤਿ ਭਾਵਨਾਵਸੇਨ ਪਵਤ੍ਤੋ. ਵੂਪਸਮਨਵਸੇਨ ਵਾ ਪਵਤ੍ਤੋ. ‘‘ਤਾਯਾ’’ਤਿ ਤਾਯਭਾਵਨਾ ਪਞ੍ਞਾਯ, ਪਸ੍ਸਨ੍ਤੀਤਿ ਸਮ੍ਬਨ੍ਧੋ. ‘‘ਪਸ੍ਸਿਤਂ’’ਤਿ ਸਮਨੁਪਸ੍ਸਿਤਂ. ਕਥਂ ਕਸਿਣਭਾਵਨਾਦਿਕਂ ਯੋਗਕਮ੍ਮਂ ਅਤ੍ਤਾਵ ਅਤ੍ਤਨੋ ਠਾਨਂ ਹੋਤੀਤਿ ਵੁਤ੍ਤਂ ‘‘ਆਦਿਮਜ੍ਝਪਰਿਯੋਸਾਨਾਨਂਹੀ’’ਤਿਆਦਿ. ਵਿਭਾਵਨਿਪਾਠੇ. ‘‘ਪਦਟ੍ਠਾਨਤਾਯਾ’’ਤਿ ਏਤੇਨ ਤਿਟ੍ਠਤਿ ਅਨਿਵਤ੍ਤਮਾਨਂ ਪਵਤ੍ਤਤਿ ਏਤੇਨਾਤਿ ਠਾਨਨ੍ਤਿ ਅਤ੍ਥੇਨ ਪਦਟ੍ਠਾਨਮੇਵ ਠਾਨਨ੍ਤਿ ਵੁਚ੍ਚਤੀਤਿ ਦੀਪੇਤਿ. ‘‘ਸੁਖਵਿਸੇਸਾਨਂ’’ਤਿ ਝਾਨਸੁਖ ਮਗ੍ਗਸੁਖ ਫਲਸੁਖਾਨਂ. ‘‘ਦਸਕਸਿਣਾਨੀ’’ਤਿਆਦੀਸੁ ਮੁਖ੍ਯਤੋ ਵਾ ਉਪਚਾਰਤੋ ਵਾ ਦ੍ਵਿਧਾਪਿ ਅਤ੍ਥਂ ਦਸ੍ਸੇਤੁਂ ‘‘ਦਸਕਸਿਣਾਨੀ’’ਤਿਆਦਿ ਵੁਤ੍ਤਂ. ‘‘ਸੇਸਾਨਿਪੀ’’ਤਿ ਅਪ੍ਪਮਞ੍ਞਾਦੀਨਿ ਸੇਸਕਮ੍ਮਟ੍ਠਾਨਾਨਿਪਿ. ਯਂ ਯਂ ਅਨੁਰੂਪਂ ਯਥਾਨੁਰੂਪਂ. ‘‘ਸਮੁਦਾਚਰਣਂ’’ਤਿ ਪੁਨਪ੍ਪੁਨਂ ਭੁਸਂ ਪਵਤ੍ਤਨਂ. ‘‘ਸਂਸਗ੍ਗ ਭੇਦੋ’’ਤਿ ਏਕਮੇਕਸ੍ਸ ਪੁਗ੍ਗਲਸ੍ਸ ਕਸ੍ਸਚਿ ਦ੍ਵੇਚਰਿਯਾ, ਕਸ੍ਸਚਿ ਤਿਸ੍ਸੋਤਿਆਦਿਨਾ ਸਮ੍ਮਿਸ੍ਸ ਵਿਭਾਗੋ. ਅਟ੍ਠਕਥਾਯਂ’’ਤਿ ਵਿਸੁਦ੍ਧਿਮਗ੍ਗ ਅਟ੍ਠਕਥਾਯਂ. ‘‘ਸਬ੍ਬਾਯਪਿ ਅਪ੍ਪਨਾਯਾ’’ਤਿ ਝਾਨਪ੍ਪਨਾਯ ਚ ਮਗ੍ਗਪ੍ਪਨਾਯ ਚ ਫਲਪ੍ਪਨਾਯ ਚ. ‘‘ਯਾ ਆਸਨ੍ਨੇ ਪਵਤ੍ਤਾ ਦੂਰੇ ਪਵਤ੍ਤਾਤਿ ਅਧਿਕਾਰੋ. ‘‘ਇਤਰਾ ਪਨਾ’’ਤਿ ਦੂਰੇ ਪਵਤ੍ਤਾਪਨ. ‘‘ਤਾਸਂ ਪਨਾ’’ਤਿ ਤਿਸ੍ਸਨ੍ਨਂ ਭਾਵਨਾਨਂ ਪਨ. ‘‘ਤੇਸਂ ਪੀ’’ਤਿ ਦ੍ਵਿਨ੍ਨਂ ਨਿਮਿਤ੍ਤਾਨਂਪਿ. ‘‘ਵਿਦਤ੍ਥਿਚਤੁਰਙ੍ਗੁਲਂ’’ ਨਾਮ ਵਿਤ੍ਥਾਰਤੋ ਚਤੁਰਙ੍ਗੁਲਾਧਿਕਂ ਵਿਦਤ੍ਥਿਪ੍ਪਮਾਣਂ. ਵਿਦਤ੍ਥਿਪ੍ਪਮਾਣਂ ਵਾ ਚਤੁਰਙ੍ਗੁਲਪ੍ਪਮਾਣਂ ਵਾਤਿਪਿ ਯੁਜ੍ਜਤਿ. ਤਥਾਹਿ ਵਿਸੁਦ੍ਧਿਮਗ੍ਗੇ ਵਾਯੋਕਸਿਣ ਵਿਧਾਨੇ ਚਤੁਰਙ੍ਗੁਲਪ੍ਪਮਾਣਂ ਸੀਸਂ ਵਾਤੇਨ ਪਹਰਿਯਮਾਨਂ ਦਿਸ੍ਵਾਤਿ ਵੁਤ੍ਤਂ. ਖਲਮਣ੍ਡਲਂ ਨਾਮ ਕਸ੍ਸਕਾਨਂ ਕਸ੍ਸਮਦ੍ਦਨਭੂਮਿਭਾਗਮਣ੍ਡਲਂ. ‘‘ਕਤਂ ਵਾ’’ਤਿ ਨੀਲਾਦਿਵਣ੍ਣਵਿਸੇਸਰਹਿਤਂ ਅਰੁਣਵਣ੍ਣਂ ਮਤ੍ਤਿਕਕ੍ਖਣ੍ਡਂ ਉਦਕੇਨ ਮਦ੍ਦਿਤ੍ਵਾ ਚਕ੍ਕਮਣ੍ਡਲਂ ਵਿਯ ਪਰਿਮਣ੍ਡਲਂ ਸੁਮਟ੍ਠਤਲਂ ਪਥਵਿਮਣ੍ਡਲਂ ਕਰੋਨ੍ਤਿ. ਏਵਂ ਕਤਂ ਵਾ. ‘‘ਅਕਤਂ ਵਾ’’ਤਿ ਕਤ੍ਥਚਿ ਭੂਮਿਭਾਗੇ ਕੇਨਚਿ ਅਕਤਂ ਸਯਂ ਜਾਤਂ ਵਾ. ‘‘ਕਸਿਣੇਨ ਜਮ੍ਬੁਦੀਪਸ੍ਸਾ’’ਤਿ ਏਤ੍ਥ.

ਬੁਦ੍ਧੋਤਿ ਕਿਤ੍ਤਯਨ੍ਤਸ੍ਸ, ਕਾਯੇ ਭਵਤਿ ਯਾ ਪੀਤਿ;

ਵਰਮੇਵ ਹਿ ਸਾਪੀਤਿ, ਕਸਿਣੇਨਪਿ ਜਮ੍ਬੁਦੀਪਸ੍ਸਾਤਿ.

ਗਾਥਾਸੇਸੋ. ਤਤ੍ਥ ਜਮ੍ਬੁਦੀਪਸ੍ਸ ਕਸਿਣਤੋ ਸਾਪੀਤਿਵਰਾ ਏਵਾਤਿ ਯੋਜਨਾ. ‘‘ਕਸਿਣਤੋ’’ਤਿ ਚ ਸਕਲਮਣ੍ਡਲਤੋ. ਸਕਲਸ੍ਸ ਜਮ੍ਬੁਦੀਪਮਣ੍ਡਲਸ੍ਸ ਇਸ੍ਸਰਿਯਾਧਿਪਤਿਤੋ ਪੀਤਿ ਵੁਤ੍ਤਂ ਹੋਤਿ. ‘‘ਸਨ੍ਨਿਵਿਟ੍ਠਾ’’ਤਿ ਸਮਂ ਸਣ੍ਠਿਤਾ. ‘‘ਸਣ੍ਠਾਨ ਪਞ੍ਞਤ੍ਤੀ’’ਤਿ ਮਣ੍ਡਲਸਣ੍ਠਾਨੇਨ ਉਪਟ੍ਠਿਤਾ ਨਿਮਿਤ੍ਤਪਞ੍ਞਤ੍ਤਿ ਏਵ ਵੁਚ੍ਚਤਿ. ‘‘ਫੁਟ੍ਠਟ੍ਠਾਨੇ’’ਤਿ ਕਾਯੇਵਾ ਰੁਕ੍ਖਗ੍ਗਾਦੀਸੁਵਾ ਵਾਤੇਨ ਪਹਤਟ੍ਠਾਨੇ. ‘‘ਵਾਯੁ ਵਟ੍ਟੀ’’ਤਿ ਵਾਤਪਰਿਮਣ੍ਡਲਂ. ਚਨ੍ਦਸੂਰਿਯਾਨਂ ਅਗ੍ਗਿਸ੍ਸ ਚ ਓਭਾਸੇਨ ਵਿਸਿਟ੍ਠਾਤਿ ਸਮਾਸੋ. ‘‘ਵਿਸਿਟ੍ਠਾ’’ਤਿ ਵਿਸੇਸਿਤਾ.

‘‘ਧੂਮਾਤਂ’’ਤਿ ਧੂਮਾਯਿਤਂ. ਧੂਮਪੂਰਿਤਪਟਂ ਵਿਯਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਸੂਨਭਾਵਂ ਗਤਂ’’ਤਿ. ਅਨ੍ਤੇ ਕਕਾਰੋ ਨਿਨ੍ਦਤ੍ਥਜੋਤਕੋਤਿ ਵੁਤ੍ਤਂ ‘‘ਕੁਚ੍ਛਿਤਤ੍ਤਾ’’ਤਿ. ਜੇਗੁਚ੍ਛਿ ਤਬ੍ਬਤ੍ਤਾਤਿ ਅਤ੍ਥੋ. ‘‘ਛਵਸਰੀਰਸ੍ਸਾ’’ਤਿ ਲਾਮਕਸਰੀਰਸ੍ਸ. ‘‘ਤਦੇਵਾ’’ਤਿ ਛਵਸਰੀਰਮੇਵ. ਵਿਪੁਬ੍ਬਕਂ ਵਿਚ੍ਛਿਨ੍ਨਕਂ ਨਾਮਾਤਿ ਸਮ੍ਬਨ੍ਧੋ. ਤਤ੍ਥ ਵਿਸੇਸੇਨ ਨੀਲਨ੍ਤਿਵਿਨੀਲਂ. ਤਮੇਵ ਕੁਚ੍ਛਿਤਤ੍ਤਾ ਵਿਨੀਲਕਂ. ‘‘ਤਦੇਵ ਪੁਨ ਪਚ੍ਚਿਤ੍ਵਾ’’ਤਿ ਵਿਨੀਲਕਸਰੀਰਮੇਵ ਪੁਨ ਕਾਲਾਤਿਕ੍ਕਮੇ ਪਚ੍ਚਿਤ੍ਵਾ. ਪੂਤਿਲੋਹਿਤਾਨਂ ਪਰਿਪਕ੍ਕਭਾਵਂ ਪਤ੍ਵਾਤਿ ਅਤ੍ਥੋ. ਤਤੋ ਤਤੋ ਦ੍ਵਾਰਚ੍ਛਿਦ੍ਦਤੋ. ਯੁਤ੍ਤਂ ਤਦੇਵ ਸਰੀਰਨ੍ਤਿ ਸਮ੍ਬਨ੍ਧੋ. ਵਿਚ੍ਛਿਨ੍ਨਕਂ ਨਾਮ, ਵਿਚ੍ਛਿਦ੍ਦਕਨ੍ਤਿਪਿ ਪਠਨ੍ਤਿ. ‘‘ਅਪਕਡ੍ਢਿਤ੍ਵਾ’’ਤਿ ਖਣ੍ਡਾਨਿ ਸਰੀਰਤੋ ਮੋਚੇਤ੍ਵਾ ਤਂ ਤਂ ਪਦੇਸਂ ਕਡ੍ਢਿਤ੍ਵਾ. ‘‘ਪਗ੍ਘਰਿਤਲੋਹਿਤ ਸਰੀਰਂ’’ਤਿ ਛਿਨ੍ਨਵਿਦ੍ਧਟ੍ਠਾਨੇਸੁ ਵਣਮੁਖੇਹਿ ਪਗ੍ਘਰਿਤਲੋਹਿਤਸਰੀਰਂ.

‘‘ਬੁਦ੍ਧਾਨੁਸ੍ਸਤੀ’’ਤਿ ਏਤ੍ਥ ਬੁਦ੍ਧਸਦ੍ਦੋ ਗੁਣ੍ਯੂਪਚਾਰ ਵਚਨਂ ਹੋਤਿ. ਗੁਣਿਨੋ ਦਬ੍ਬਸ੍ਸ ਨਾਮੇਨ ਗੁਣਾਨਂ ਗਹੇਤਬ੍ਬਤ੍ਤਾਤਿ ਵੁਤ੍ਤਂ ‘‘ਬੁਦ੍ਧਗੁਣਸ੍ਸ ਅਨੁਸ੍ਸਤਿ ਬੁਦ੍ਧਾਨੁਸ੍ਸਤੀ’’ਤਿ. ਏਸਨਯੋ ਧਮ੍ਮਾਨੁਸ੍ਸਤਾਦੀਸੁ. ‘‘ਅਰਹਤਾਦੀ’’ਤਿ ਅਰਹਤਾਦਿਗੁਣੋ. ਵਿਗਤਾਨਿ ਦੁਸ੍ਸਿਲ੍ਯਾਦਿ ਮਲਾਨਿ ਚ ਮਚ੍ਛੇਰਞ੍ਚ ਯਸ੍ਸ ਤਂ ਵਿਗਤਮਲਮਚ੍ਛੇਰਂ. ਤਸ੍ਸ ਭਾਵੋਤਿ ਵਿਗ੍ਗਹੋ. ‘‘ਅਤ੍ਤਨਾ ਅਧਿਗਤਨਿਬ੍ਬਾਨਞ੍ਚਾ’’ਤਿ ਏਤੇਨ ਅਰਿਯਪੁਗ੍ਗਲਾਨਂ ਕਿਲੇਸਾਨਂ ਅਚ੍ਚਨ੍ਤਵੂਪਸਮੋ ਵੁਤ੍ਤੋ. ‘‘ਯਂ ਆਰਬ੍ਭਾ’’ਤਿ ਯਂ ਪੁਗ੍ਗਲਂ ਆਰਬ੍ਭ. ਹਿਤੂਪਸਂਹਾਰੋ ਨਾਮ ਅਯਂ ਪੁਗ੍ਗਲੋ ਅਵੇਰੋ ਹੋਤੁ, ਅਬ੍ਯਾਪਜ੍ਜੋ ਹੋਤੂਤਿਆਦਿਨਾ ਅਵੇਰਤਾਦੀਨਿ ਹਿਤਸੁਖਾਨਿ ਤਸ੍ਮਿਂ ਪੁਗ੍ਗਲੇ ਚਿਤ੍ਤੇਨ ਉਪਸਂਹਰਣਂ. ਕਰੁਣਾ, ਮੁਦਿਤਾ, ਹੇਟ੍ਠਾ ਚੇਤਸਿਕਸਙ੍ਗਹੇ ਵੁਤ੍ਤਤ੍ਥਾ ਏਵ. ਹਿਤੂਪਸਂਹਾਰੋ ਚ ਹਿਤਮੋਦਨਾ ਚ ਅਹਿਤਾਪਨਯਨਞ੍ਚਾਤਿ ਦ੍ਵਨ੍ਦੋ. ਤਤ੍ਥ ਹਿਤੂਪਸਂਹਾਰੋ ਮੇਤ੍ਤਾਯ ਕਿਚ੍ਚਂ. ਹਿਤਮੋਦਨਾ ਮੁਦਿਤਾਯ. ਅਹਿਤਾਪਨਯਨਂ ਕਰੁਣਾਯ ਕਿਚ੍ਚਂ. ਤਤ੍ਥ ਪਰਂ ਹਿਤਸੁਖਸਮ੍ਪਨ੍ਨਂ ਦਿਸ੍ਵਾ ਤੇਨ ਪਰਹਿਤੇਨ ਅਤ੍ਤਨਿ ਪੀਤਿਪਾਮੋਜ੍ਜਵਡ੍ਢਨਂ ਹਿਤਮੋਦਨਾ ਨਾਮ. ਪਰਂ ਦੁਕ੍ਖਿਤਂ ਦਿਸ੍ਵਾ ਅਯਂ ਇਮਮ੍ਹਾਦੁਕ੍ਖਾ ਮੁਚ੍ਚਤੁ, ਮਾਕਿਲਮਤੂਤਿ ਏਵਂ ਚਿਤ੍ਤੇਨ ਪਰਸ੍ਮਿਂ ਅਹਿਤਸ੍ਸ ਦੁਕ੍ਖਸ੍ਸ ਅਪਨਯਨਂ ਅਹਿਤਾਪਨਯਨਂ ਨਾਮ. ‘‘ਤੇਸਂ’’ਤਿ ਪਰਸਤ੍ਤਾਨਂ. ਸਸ੍ਸ ਅਤ੍ਤਨੋ ਇਦਨ੍ਤਿ ਸਕਂ. ‘‘ਇਦਂ’’ ਸੁਖਦੁਕ੍ਖਕਾਰਣਂ. ਅਤ੍ਤਨਾ ਕਤਕਮ੍ਮਂ ਏਵ ਸਕਂ ਯੇਸਂ ਤੇ ਕਮ੍ਮਸ੍ਸਕਾ. ਪਰਸਤ੍ਤਾ ਏਵ. ਤੇਸਂ ਭਾਵੋ. ਤਸ੍ਸ ਅਨੁਬ੍ਰੂਹਨਨ੍ਤਿ ਵਿਗ੍ਗਹੋ. ‘‘ਸੀਮਸਮ੍ਭੇਦੋ’’ਤਿ ਅਤ੍ਤਾ ਚ ਪਿਯਪੁਗ੍ਗਲੋ ਚ ਮਜ੍ਝਤ੍ਤਪੁਗ੍ਗਲੋ ਚ ਵੇਰਿਪੁਗ੍ਗਲੋ ਚਾਤਿ ਚਤਸ੍ਸੋ ਸੀਮਾ. ਸਮ੍ਭਿਨ੍ਦਨਂ ਸਮ੍ਭੇਦੋ. ਸਮ੍ਮਿਸ੍ਸਨਂ ਅਨਾਨਤ੍ਤਕਰਣਨ੍ਤਿ ਅਤ੍ਥੋ. ਸੀਮਾਨਂ ਸਮ੍ਭੇਦੋ ਸੀਮਸਮ੍ਭੇਦੋ. ਸਬ੍ਬਾ ਇਤ੍ਥਿਯੋ, ਸਬ੍ਬੇਪੁਰਿਸਾਤਿਆਦਿਨਾ ਓਧਿਸੋ ਪਰਿਚ੍ਛੇਦਤੋ ਫਰਣਂ ਓਧਿਸੋਫਰਣਂ ਨਾਮ. ਸਬ੍ਬੇਸਤ੍ਤਾ, ਸਬ੍ਬੇਪਾਣਾ, ਸਬ੍ਬੇਭੂਤਾਤਿਆਦਿਨਾ ਅਨੋਧਿਸੋ ਅਪਰਿਚ੍ਛੇਦਤੋ ਫਰਣਂ ਅਨੋਧਿਸੋਫਰਣਂ ਨਾਮ. ਪੁਰਤ੍ਥਿਮਾਯਦਿਸਾਯ ਸਬ੍ਬੇਸਤ੍ਤਾ ਅਵੇਰਾਹੋਨ੍ਤੂਤਿਆਦਿਨਾ ਦਿਸਾਵਿਭਾਗਵਸੇਨ ਫਰਣਂ ਦਿਸਾਫਰਣਂ ਨਾਮ. ‘‘ਤਂ ਸਮਙ੍ਗੀਨੋ ਚਾ’’ਤਿ ਤਾਹਿ ਅਪ੍ਪਮਞ੍ਞਾਹਿ ਸਮਙ੍ਗੀਨੋ ਪੁਗ੍ਗਲਾ. ‘‘ਨਿਚ੍ਚਂ ਸੋਮ੍ਮਹਦਯਭਾਵੇਨਾ’’ਤਿ ਸਬ੍ਬਕਾਲਂ ਸਨ੍ਤਸੀਤਲ ਹਦਯਭਾਵੇਨ. ਬ੍ਰਹ੍ਮਸਦ੍ਦੋ ਵਾ ਸੇਟ੍ਠਪਰਿਯਾਯੋ ‘ਬ੍ਰਹ੍ਮਂ ਪੁਞ੍ਞਂ ਪਸਵਤੀ’ਤਿਆਦੀਸੁ ਵਿਯ. ਅਸਿਤਬ੍ਬਂ ਭੁਞ੍ਜਿਤਬ੍ਬਨ੍ਤਿ ਅਸਿਤਂ. ਪਞ੍ਚਭੋਜਨਂ. ਪਾਤਬ੍ਬਨ੍ਤਿ ਪੀਤਂ. ਅਟ੍ਠਵਿਧਂ ਪਾਨਂ. ਦਨ੍ਤੇਨ ਖਾਯਿਤਬ੍ਬਂ ਖਾਦਿਤਬ੍ਬਨ੍ਤਿ ਖਾਯਿਤਂ. ਪੂਵਕ੍ਖਜ੍ਜਫਲਕ੍ਖਜ੍ਜਾਦਿਕਂ ਨਾਨਾਖਾਦਨੀਯਂ. ਅਙ੍ਗੁਲੀਹਿਪਿ ਗਹੇਤ੍ਵਾ ਸਾਯਿਤਬ੍ਬਂ ਲੇਹਿਤਬ੍ਬਨ੍ਤਿ ਸਾਯਿਤਂ. ਮਧੁਪ੍ਫਾਣਿਤਾਦਿਕਂ ਸਾਯਨੀਯਂ. ਸਰਸਪ੍ਪਟਿਕੂਲਤਾ ਨਾਮ ਅਤ੍ਤਨੋ ਸਭਾਵਤੋ ਪਟਿਕੂਲਤਾ. ਚਤੁਬ੍ਬਿਧੋਪਿ ਹਿ ਆਹਾਰੋ ਭਾਜਨੇਸੁ ਵਾ ਹਤ੍ਥਮੁਖਾਦੀਸੁ ਵਾ ਯਤ੍ਥ ਯਤ੍ਥ ਸਮ੍ਮਕ੍ਖੇਤਿ, ਲਗ੍ਗਤਿ, ਲਿਮ੍ਪਤਿ. ਤਂ ਉਦਕੇਨ ਧੋਵਿਤਬ੍ਬਂ ਹੋਤਿ. ਅਧੋਤਂ ਪਨ ਤਮ੍ਪਿ ਜੇਗੁਚ੍ਛਨੀਯਂ ਹੋਤਿ. ਆਸਯਤੋ ਪਟਿਕੂਲਤਾ ਨਾਮ ਤਸ੍ਸ ਅਜ੍ਝੋਹਰੀਯਮਾਨਸ੍ਸ ਕਣ੍ਠਾਦੀਸੁ ਠਿਤੇਹਿ ਪਿਤ੍ਤਸੇਮ੍ਹਾਦੀਹਿ ਆਸਯੇਹਿ ਸਮ੍ਮਿਸ੍ਸਨਵਸੇਨ ਪਟਿਕੂਲਤਾ. ਨਿਧਾਨਤੋ ਪਟਿਕੂਲਤਾ ਨਾਮ ਨਿਧਾਨਤੋ ਪਟਿਕੂਲਤਾ. ‘‘ਨਿਧਾਨਂ’’ਤਿ ਚ ਆਮਾਸਯੋ ਵੁਚ੍ਚਤਿ. ਪਕ੍ਕਤੋ ਪਟਿਕੂਲਤਾ ਨਾਮ ਤਸ੍ਸ ਨਿਧਾਨਗਤਸ੍ਸ ਪਰਿਪਕ੍ਕਕਾਲੇ ਗੂਥਮੁਤ੍ਤਾਦਿਭਾਵਪਤ੍ਤਿਤੋ ਪਟਿਕੂਲਤਾ. ਅਪਕ੍ਕਤੋ ਪਟਿਕੂਲਤਾ ਨਾਮ ਤਸ੍ਮਿਂ ਅਪਰਿਪਕ੍ਕੇ ਅਜਿਣ੍ਣੇ ਸਤਿ ਸਰੀਰੇ ਨਾਨਾਰੋਗੁਪ੍ਪਤ੍ਤਿਵਸੇਨ ਪਟਿਕੂਲਤਾ. ਫਲਤੋ ਪਟਿਕੂਲਤਾ ਨਾਮ ਤਸ੍ਸ ਪਰਿਪਕ੍ਕਕਾਲਤੋ ਪਟ੍ਠਾਯ ਸਰੀਰੇ ਕੇਸਲੋਮਾਦੀਨਂ ਪਟਿਕੂਲਰਾਸੀਨਂ ਵਡ੍ਢਨਵਸੇਨ ਪਟਿਕੂਲਤਾ. ਨਿਸ੍ਸਨ੍ਦਤੋ ਪਟਿਕੂਲਤਾ ਨਾਮ ਤਸ੍ਸ ਨ ਵਹਿਦ੍ਵਾਰੇਹਿ ਵਾ ਲੋਮਕੂਪੇਹਿਵਾ ਅਞ੍ਞੇਹਿ ਨਾਨਾਵਣਮੁਖੇਹਿ ਵਾ ਉਗ੍ਘਰਣ ਪਗ੍ਘਰਣਾਦਿਵਸੇਨ ਪਟਿਕੂਲਤਾ. ‘‘ਤਤ੍ਥਾ’’ਤਿ ਤਸ੍ਮਿਂ ਚਤੁਬ੍ਬਿਧੇ ਆਹਾਰੇ. ‘‘ਨਿਕਨ੍ਤਿਪ੍ਪਹਾਨਸਞ੍ਞਾ’’ਤਿ ਕਨ੍ਤਾਰਮਗ੍ਗੇ ਮਾਤਾਪਿਤੂਨਂ ਕਨ੍ਤਾਰਨਿਤ੍ਤਰਣਤ੍ਥਾਯ ਪੁਤ੍ਤ ਮਂਸਖਾਦਨੇ ਵਿਯ ਅਤਿ ਮਨੁਞ੍ਞੇਪਿ ਆਹਾਰੇ ਰਸਤਣ੍ਹਾ ਪਹਾਨਵਸੇਨ ਪਵਤ੍ਤਾ ਸਞ੍ਞਾ. ‘‘ਸਲਕ੍ਖਣਾਦਿਵਸੇਨਾ’’ਤਿ ਸਲਕ੍ਖਣਸਸਮ੍ਭਾਰਾਦਿਵਸੇਨ. ‘‘ਰਾਗੇਨ ਚਰਤੀ’’ਤਿ ਏਤ੍ਥ ‘‘ਰਾਗੇਨਾ’’ਤਿ ਕਰਣਤ੍ਥੇ, ਇਤ੍ਥਮ੍ਭੂਤਲਕ੍ਖਣੇਵਾ ਕਰਣ ਵਚਨਂ. ਤਤ੍ਥ ਕਰਣਤ੍ਥੇਤਾਵ ‘‘ਰਾਗੇਨ ਚਰਤੀ’’ਤਿ ਚਤੂਸੁ ਇਰਿਯਾਪਥੇਸੁ ਯੇਭੂਯ੍ਯੇਨ ਰਾਗਚਿਤ੍ਤੇਨ ਚਰਤਿ. ਰਾਗਚਿਤ੍ਤੇਨ ਨਿਯ੍ਯਮਾਨੋ ਵਿਚਰਤੀਤਿ ਵੁਤ੍ਤਂ ਹੋਤਿ. ਇਤ੍ਥਮ੍ਭੂਤ ਲਕ੍ਖਣੇ ਪਨ ‘‘ਰਾਗੇਨ ਚਰਤੀ’’ਤਿ ਤੇਸੁ ਰਾਗਕੇਤੁ ਰਾਗਧਜੋ ਹੁਤ੍ਵਾ ਵਿਚਰਤੀਤਿ ਵੁਤ੍ਤਂ ਹੋਤਿ. ‘‘ਅਸ੍ਸਾ’’ਤਿ ਤਸ੍ਸਪੁਗ੍ਗਲਸ੍ਸ. ‘‘ਉਸ੍ਸਨ੍ਨੋ’’ਤਿ ਉਗ੍ਗਤੋ ਪਾਕਟਤਰੋ. ਬਹੁਤਰੋਤਿਪਿ ਵਦਨ੍ਤਿ. ‘‘ਪਹਾਨਾਯਾ’’ਤਿ ਏਤ੍ਥ ਇਤਿਸਦ੍ਦੋ ਆਦਿ ਅਤ੍ਥੋ. ਤੇਨ ਕਰੁਣਾ ਭਾਵੇਤਬ੍ਬਾ ਵਿਹਿਂਸਾਯ ਪਹਾਨਾਯ. ਮੁਦਿਤਾ ਭਾਵੇਤਬ੍ਬਾ ਅਰਤਿਯਾ ਪਹਾਨਾਯਾਤਿ ਇਮਂ ਪਾਲ਼ਿਸੇਸਂ ਸਙ੍ਗਣ੍ਹਾਤਿ. ‘‘ਨਿਸ੍ਸਰਣਤਾਵਚਨਤੋ’’ਤਿ ਨਿਸ੍ਸਰਣਞ੍ਹੇਤਂ ਬ੍ਯਾਪਾਦਸ੍ਸ ਯਦਿਦਂ ਮੇਤ੍ਤਾਚੇਤੋ ਵਿਮੁਤ੍ਤਿ. ਨਿਸ੍ਸਰਣਞ੍ਹੇਤਂ ਵਿਹੇਸਾਯਯਦਿਦਂ ਕਰੁਣਾ ਚੇਤੋਵਿਮੁਤ੍ਤਿ. ਨਿਸ੍ਸਰਣਞ੍ਹੇਤਂ ਅਰਤਿਯਾ ਯਦਿਦਂ ਮੁਦਿਤਾ ਚੇਤੋ ਵਿਮੁਤ੍ਤੀਤਿ ਏਵਂ ਨਿਸ੍ਸਰਣ ਭਾਵਵਚਨਤੋ ਚ. ਚਤਸ੍ਸੋ ਅਪ੍ਪਮਞ੍ਞਾਯੋ. ਲ. ਦੋਸ ਚਰਿਤਸ੍ਸਾਤਿ ਵੁਤ੍ਤਂ. ‘‘ਦੋਸ ਵਤ੍ਥੁਤ੍ਤਾਭਾਵਤੋ ਚਾ’’ਤਿ ਦੋਸੁਪ੍ਪਤ੍ਤਿਯਾ ਵਤ੍ਥੁ ਭਾਵਸ੍ਸਕਰਣ ਭਾਵਸ੍ਸ ਅਭਾਵਤੋ ਚ. ਨੀਲਾਦੀਨਿ ਚਤ੍ਤਾਰਿ ਕਸਿਣਾਨਿ ਦੋਸ ਚਰਿਤਸ੍ਸਾਤਿ ਵੁਤ੍ਤਂ. ਕਸ੍ਮਾਪਨੇਤ੍ਥ ਦੋਸ ਚਰਿਤਸ੍ਸ ਉਪੇਕ੍ਖਾ ਸਪ੍ਪਾਯਕਾਰਣਂ ਵਿਸੁਂ ਨ ਵੁਤ੍ਤਨ੍ਤਿ. ਅਞ੍ਞਕਾਰਣਤ੍ਤਾ ਨ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਏਤ੍ਥ ਚਾ’’ਤਿਆਦਿਮਾਹ. ‘‘ਤਿਸ੍ਸੋ’’ਤਿ ਤਿਸ੍ਸੋ ਅਪ੍ਪਮਞ੍ਞਾਯੋ. ‘‘ਮਨਾਪਿਯਰੂਪਾਨੀ’’ਤਿ ਮਨਾਪਿਯਵਣ੍ਣਾਨਿ. ਵਿਕ੍ਖਿਤ੍ਤਚਿਤ੍ਤੋ ਚ ਹੋਤੀਤਿ ਅਧਿਕਾਰੋ. ‘‘ਤਸ੍ਸਾ’’ਤਿ ਪਮਾਦ ਬਹੁਲਸ੍ਸ ਵਿਕ੍ਖਿਤ੍ਤਚਿਤ੍ਤਸ੍ਸ ਚ ਪੁਗ੍ਗਲਸ੍ਸ. ਵੁਤ੍ਤਂ ਸਿਯਾ. ਵਿਸੁਦ੍ਧਿ ਮਗ੍ਗੇ ਪਨ ਏਵਂ ਵੁਤ੍ਤਂ ਨਤ੍ਥੀਤਿ ਅਧਿਪ੍ਪਾਯੋ. ਵਿਭਾਵਨਿਪਾਠੇ. ‘‘ਬੁਦ੍ਧਿਵਿਸਯ ਭਾਵੇਨਾ’’ਤਿ ਵੁਤ੍ਤਂ. ਯਦਿ ਬੁਦ੍ਧਿਵਿਸਯਤ੍ਤਾ ਮੋਹਚਰਿਤਸ੍ਸ ਸਪ੍ਪਾਯਂ. ਬੁਦ੍ਧਿਵਿਸਯਭੂਤਾਨਿ ਮਰਣ ਉਪਸਮਸਞ੍ਞਾ ਵਵਤ੍ਥਾਨਾਨਿਪਿ ਮੋਹਚਰਿਤਸ੍ਸ ਸਪ੍ਪਾਯਾਨਿ ਸਿਯੁਨ੍ਤਿ ਵੁਤ੍ਤਂ ‘‘ਏਵਞ੍ਹਿਸਤੀ’’ਤਿਆਦਿਂ. ‘‘ਭੂਤਕਸਿਣਾਨੀ’’ਤਿ ਪਥਵੀਕਸਿਣਾਦੀਨਿ ਮਹਾਭੂਤਕਸਿਣਾਨਿ. ‘‘ਤਤ੍ਥਾਪੀ’’ਤਿ ਵਾ ਤੇਸੁ ਚਤ੍ਤਾਲੀਸ ਕਮ੍ਮਟ੍ਠਾਨੇਸੁਪਿ. ਏਵਂਸਤਿ ਵਣ੍ਣਕਸਿਣਾਨਂ ਪੁਥੁਲਖੁਦ੍ਦਕਤਾਪਿ ਏਤ੍ਥ ਸਙ੍ਗਹਿਤਾ ਹੋਤੀਤਿ. ‘‘ਮਹਨ੍ਤਂ’’ਤਿ ਵਿਦਤ੍ਥਿ ਚਤੁਰਙ੍ਗੁਲਤੋ ਮਹਨ੍ਤਂ. ਯਦਿ ਏਵਸਦ੍ਦੋ ਯਥਾਰੁਤਮੇਵ ਯੁਜ੍ਜੇਯ੍ਯ. ਏਵਂਸਤਿ ਖੁਦ੍ਦਕਂ ਵਿਤਕ੍ਕਚਰਿਤਸ੍ਸੇਵ ਸਪ੍ਪਾਯਂ, ਨ ਬੁਦ੍ਧਿਚਰਿਤਾਦੀਨਨ੍ਤਿ ਏਵਮਤ੍ਥੋਪਿ ਗਣ੍ਹੇਯ੍ਯ. ਅਥ ਬੁਦ੍ਧਿਚਰਿਤਸ੍ਸ ਪਨ ਅਸਪ੍ਪਾਯਂ ਨਾਮ ਨਤ੍ਥੀਤਿ ਅਟ੍ਠਕਥਾਵਚਨੇਨ ਵਿਰੁਜ੍ਝੇਯ੍ਯਾਤਿ ਇਮਿਨਾ ਅਧਿਪ੍ਪਾਯੇਨ ‘‘ਖੁਦ੍ਦਕਨ੍ਤਿ ਪਦੇਯੁਜ੍ਜਤੀ’’ਤਿ ਵੁਤ੍ਤਂ. ਅਥਵਾ, ਪੁਥੁਲਂ ਮੋਹਚਰਿਤਸ੍ਸ, ਖੁਦ੍ਦਕਂ ਵਿਤਕ੍ਕਚਰਿਤਸ੍ਸੇਵ, ਨਮੋਹਚਰਿਤਸ੍ਸਾਤਿ ਅਤ੍ਥੇ ਸਤਿ, ਬੁਦ੍ਧਿਚਰਿਤਾਦੀਨਂ ਪਨ ਪੁਥੁਲਂਪਿ ਖੁਦ੍ਦਕਂਪਿ ਅਨੁਞ੍ਞਾਤਂ ਹੋਤੀਤਿ ਦਟ੍ਠਬ੍ਬਂ. ‘‘ਸਬ੍ਬਞ੍ਚੇਤਂ’’ਤਿ ਸਬ੍ਬਞ੍ਚ ਏਤਂਚਰਿਤਵਿਭਾਗਵਚਨਂ. ਉਜੁਵਿਪਚ੍ਚਨੀਕਵਸੇਨ ਤੀਸੁ ਅਕੁਸਲ ਚਰਿਤੇਸੁ ਪੁਗ੍ਗਲੇਸੁ. ਵਿਤਕ੍ਕ ਚਰਿਤੇ ਚ ਅਤਿਸਪ੍ਪਾਯਤਾਯ ਸਦ੍ਧਾਬੁਦ੍ਧਿ ਚਰਿਤੇਸੂਤਿ ਅਧਿਪ੍ਪਾਯੋ. ਤੇਨਾਹ ‘‘ਰਾਗਾਦੀਨਂ ਪਨ ਅਵਿਕ੍ਖਮ੍ਭਿਕਾ’’ਤਿਆਦਿਂ.

‘‘ਬੁਦ੍ਧਧਮ੍ਮ. ਲ. ਗੁਣਾਨਂ’’ਤਿ ਏਤ੍ਥ ਗੁਣਸਦ੍ਦੋ ਪੁਬ੍ਬਪਦੇਸੁ ਯੋਜੇਤਬ੍ਬੋ ਬੁਦ੍ਧਗੁਣਾਨਞ੍ਚ ਧਮ੍ਮਗੁਣਾਨਞ੍ਚਾਤਿਆਦਿਨਾ. ‘‘ਤਤ੍ਥਾ’’ਤਿ ਤਸ੍ਮਿਂ ਗੁਣਪਦੇ. ਨ ਤਪ੍ਪੇਤੀਤਿ ਅਤਪ੍ਪਨੀਯੋ. ਤਪ੍ਪਨਂ ਸਨ੍ਤੁਟ੍ਠਿਂ ਨ ਜਨੇਤੀਤਿ ਅਤ੍ਥੋ. ਸਂਵੇਜਨਂ ਸਂਵੇਗਂ ਜਨੇਤੀਤਿ ਸਂਵੇਜਨਿਯੋ. ‘‘ਧਮ੍ਮੋ’’ਤਿ ਸਭਾਵੋ. ਸਂਵੇਜਨਿਯੋ ਧਮ੍ਮੋ ਯਸ੍ਸਾਤਿ ਸਂਵੇਜਨਿਯ ਧਮ੍ਮਂ. ਮਰਣਂ. ‘‘ਪਞ੍ਚਮਜ੍ਝਾਨਸਮਾਧਿਸ੍ਸਾ’’ਤਿ ਰੂਪਾਵਚਰ ਪਞ੍ਚਮਜ੍ਝਾਨ ਸਮਾਧਿਸ੍ਸ. ‘‘ਉਦਯਮਤ੍ਤਾਨੀ’’ਤਿ ਵਡ੍ਢਿਤਮਤ੍ਤਾਨਿ. ‘‘ਤਤ੍ਥਾ’’ਤਿ ਪਟਿਕੂਲਾਰਮ੍ਮਣੇਸੁ. ‘‘ਪੁਬ੍ਬਚ੍ਛਟ੍ਟਕਸ੍ਸਾ’’ਤਿ ਪੁਰਾਣਚ੍ਛਟ੍ਟਕਸ੍ਸ. ਗੂਥਮੁਤ੍ਤਵਿਸ੍ਸਜ੍ਜਨ ਕਸ੍ਸਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਗੂਥਰਾਸਿ ਦਸ੍ਸਨੇ ਵਿਯਾ’’ਤਿ. ਨ ਤੇ ਕਦਾਚਿ ਸੋਮਨਸ੍ਸੇਨ ਵਿਨਾ ਅਪ੍ਪਨਂ ਪਾਪੁਣਨ੍ਤਿ. ਬ੍ਯਾਪਾਦਵਿਹਿਂਸਾ ਅਰਤੀਨਂ ਦੂਰਿਭਾਵੇਨ ਸੋਮਨਸ੍ਸੁਪ੍ਪਤ੍ਤਿਯਾ ਅਤਿਸੁਕਰਤ੍ਤਾ ਪਞ੍ਚਮਜ੍ਝਾਨੇ ਵਿਯ ਸੁਖਸੋਮਨਸ੍ਸਾਨਞ੍ਚ ਅਵਿਕ੍ਖਮ੍ਭਨਤੋ. ‘‘ਉਦਾਸਿਨਪਕ੍ਖੇ’’ਤਿ ਅਜ੍ਝੁਪੇਕ੍ਖਨਪਕ੍ਖੇ. ‘‘ਦਲ਼੍ਹਂ’’ਤਿ ਭੁਸਂ. ‘‘ਵਿਭੂਤਂ’’ਤਿ ਪਾਕਟਂ. ਨਿਮਿਤ੍ਤਂ ਦਲ਼੍ਹਵਿਭੂਤਂ ਕਤ੍ਵਾ ਗਹਣਂ ਦਲ਼੍ਹ ਵਿਭੂਤਗ੍ਗਹਣਂ. ‘‘ਕਸ੍ਸਚਿ ਆਰਮ੍ਮਣਸ੍ਸਾ’’ਤਿ ਬੁਦ੍ਧਗੁਣਾਦਿ ਆਰਮ੍ਮਣਸ੍ਸ. ‘‘ਪਟਿਭਾਗਨਿਮਿਤ੍ਤਂ’’ਤਿ ਏਤ੍ਥ ਪਟਿਭਾਗਸਦ੍ਦੋ ਤਸ੍ਸ ਦਿਸੇ ਪਵਤ੍ਤੋਤਿ ਆਹ ‘‘ਤਾਦਿਸੇ’’ਤਿਆਦਿਂ. ‘‘ਤਂਸਣ੍ਠਾਨੇ’’ਤਿ ਏਤੇਨ ਪਥਵਿਮਣ੍ਡਲਾਦੀਸੁ ਵਿਯ ਸਣ੍ਠਾਨਾਕਾਰੇਨ ਠਿਤੇਸੁ ਸਭਾਵ ਧਮ੍ਮ ਪੁਞ੍ਜੇਸੁ ਏਵ ਤਸ੍ਸਦਿਸਂ ਪਟਿਭਾਗਨਿਮਿਤ੍ਤਂ ਨਾਮ ਸਿਜ੍ਝਤੀਤਿ ਦਸ੍ਸੇਤਿ. ‘‘ਏਵ’’ਨ੍ਤਿ ਸਮਥਸਙ੍ਗਹੇ ਤਾਵ ਦਸਕਸਿਣਾਨਿ, ਦਸਅਸੁਭਾਤਿਆਦਿਨਾ ਵੁਤ੍ਤੇਨ ਵਚਨਕ੍ਕਮੇਨ. ‘‘ਉਗ੍ਗਹਕੋਸਲ੍ਲਂ’’ਤਿ ਭਾਵਨਾਕਮ੍ਮਂ ਆਰਭਿਤੁਕਾਮੇਨ ਭਿਕ੍ਖੁਨਾ ਆਚਰਿਯਸ੍ਸ ਸਨ੍ਤਿਕੇ ਸਬ੍ਬਸ੍ਸ ਕਮ੍ਮਟ੍ਠਾਨ ਵਿਧਾਨਸ੍ਸ ਉਗ੍ਗਹਣਂ ਉਗ੍ਗਹੋ. ਤਸ੍ਮਿਂ ਕੋਸਲ੍ਲਂ ਉਗ੍ਗਹਕੋਸਲ੍ਲਂ. ਅਪਿਚੇਤ੍ਥ. ਸਬ੍ਬਂ ਉਗ੍ਗਹਿਤੁਂ ਅਸਕ੍ਕੋਨ੍ਤੇਨ ਯਂ ਅਤ੍ਤਨਾ ਆਰਭਿਸ੍ਸਤਿ. ਤਸ੍ਸ ਏਕਸ੍ਸ ਵਿਧਾਨਂ ਪਰਿਪੁਣ੍ਣਂ ਉਗ੍ਗਹੇਤਬ੍ਬਂ. ‘‘ਉਗ੍ਗਣ੍ਹਨ੍ਤਸ੍ਸਾ’’ਤਿ ਏਤ੍ਥ ਉਕਾਰੋ ਉਪਰਿ ਅਤ੍ਥੋ. ‘‘ਗਹਣਂ’’ਤਿ ਚ ਯਥਾ ਚਿਤ੍ਤੇ ਅਵਿਨਸ੍ਸਮਾਨਂ ਹੁਤ੍ਵਾ ਲਬ੍ਭਤਿ, ਤਥਾ ਕਤ੍ਵਾ ਚਿਤ੍ਤੇਨ ਗਹਣਨ੍ਤਿ ਦਸ੍ਸੇਤੁਂ ‘‘ਉਪਰੂਪਰੀ’’ਤਿਆਦਿ ਵੁਤ੍ਤਂ. ‘‘ਸਮਨੁਪਸ੍ਸਨ੍ਤਸ੍ਸਾ’’ਤਿ ਸਮ੍ਮਾ ਪੁਨਪ੍ਪੁਨਂ ਚਕ੍ਖੁਨਾ ਦਸ੍ਸਨਸਦਿਸਂ ਕਰੋਨ੍ਤਸ੍ਸ. ਪਰਿਤੋ ਸਮਨ੍ਤਤੋ ਕਰਣਂ ਪਰਿਕਮ੍ਮਂ. ਤਸ੍ਮਿਂ ਨਿਮਿਤ੍ਤਗ੍ਗਹਣਕਮ੍ਮੇ ਯਂ ਯਂ ਕਤ੍ਤਬ੍ਬਵਿਧਾਨਂ ਅਤ੍ਥਿ, ਤਂ ਤਂ ਪਰਿਪੁਣ੍ਣਂ ਕਤ੍ਵਾ ਗਹਣਨ੍ਤਿ ਵੁਤ੍ਤਂ ਹੋਤਿ. ਭਾਵਨਾਤਿ ਵਡ੍ਢਨਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਪੁਨਪ੍ਪੁਨ’’ਨ੍ਤਿਆਦਿਮਾਹ. ‘‘ਨਿਰਨ੍ਤਰਂ ਪਦਹਨ੍ਤਸ੍ਸਾ’’ਤਿ ਰਤ੍ਤਿਦਿਵਂ ਨਿਰਨ੍ਤਰਂ ਆਰਭਨ੍ਤਸ੍ਸ. ਉਗ੍ਗਹ ਨਿਮਿਤ੍ਤੇ ਸਣ੍ਠਾਨਂ ਗਣ੍ਹਨ੍ਤੋਪਿ ਵਣ੍ਣਰੂਪਾਦਿਨਾ ਸਭਾਵ ਧਮ੍ਮੇਨ ਸਹੇਵ ਗਣ੍ਹਾਤਿ. ਪਟਿਭਾਗਨਿਮਿਤ੍ਤੇ ਪਨ ਸਭਾਵਧਮ੍ਮਂ ਮੁਞ੍ਚਿਤ੍ਵਾ ਤਸ੍ਸ ਦਿਸਂ ਨਿਮਿਤ੍ਤ ਪਞ੍ਞਤ੍ਤਿ ਸਙ੍ਖਾਤਂ ਸੁਦ੍ਧਸਣ੍ਠਾਨਮੇਵ ਗਣ੍ਹਾਤਿ. ਏਤ੍ਥ ਸਿਯਾ, ਪਟਿਭਾਗਨਿਮਿਤ੍ਤੇਪਿ ਵਣ੍ਣੋ ਨਾਮ ਸਨ੍ਦਿਸ੍ਸਤਿ ਯੇਵਾਤਿ. ਸਚ੍ਚਂ. ਸੋ ਪਨ ਪਟਿਭਾਗਮਤ੍ਤਂ ਹੋਤਿ. ਨ ਏਕਨ੍ਤਵਣ੍ਣੋ. ਤੇਨਾਹ ‘‘ਤਪ੍ਪਟਿਭਾਗਂ ਵਤ੍ਥੁ ਧਮ੍ਮਵਿਮੁਚ੍ਚਿਤਂ’’ਤਿ. ‘‘ਸਨ੍ਨਿਸਿਨ੍ਨਂ’’ਤਿ ਅਚਲਂ. ‘‘ਪਵੇਸਿਤਂ’’ਤਿ ਭਾਵਨਾਚਿਤ੍ਤਸ੍ਸ ਅਬ੍ਭਨ੍ਤਰੇ ਪਕ੍ਖਿਤ੍ਤਂ ਵਿਯ ਹੋਤੀਤਿ ਅਧਿਪ੍ਪਾਯੋ. ਓਭਾਸਤੀਤਿ ਓਭਾਸੋ. ਓਭਾਸੋ ਹੁਤ੍ਵਾ ਜਾਤਨ੍ਤਿ ਓਭਾਸਜਾਤਂ. ਓਭਾਸਨਂ ਵਾ ਓਭਾਸੋ. ਜਾਤੋ ਓਭਾਸੋ ਅਸ੍ਸਾਤਿ ਓਭਾਸਜਾਤਂ. ‘‘ਪਾਤੇਨ੍ਤੀ’’ਤਿ ਪਟਿਪਾਤੇਨ੍ਤਿ. ਪੁਨ ਉਪ੍ਪਜ੍ਜਨਵਸੇਨ ਉਟ੍ਠਾਤੁਂ ਨ ਦੇਨ੍ਤਿ. ‘‘ਏਤਾਯਾ’’ਤਿ ਕਤ੍ਤੁ ਅਤ੍ਥੇ ਕਰਣਵਚਨਂ. ‘‘ਨਿਮਿਤ੍ਤਰਕ੍ਖਣਵਿਧਾਨਂ’’ਤਿ ਸਮੁਪ੍ਪਨ੍ਨਸ੍ਸ ਨਿਮਿਤ੍ਤਸ੍ਸ ਅਨਸ੍ਸਨਤ੍ਥਾਯ ਸਤ੍ਤਵਿਧੇਹਿ ਪਲਿਬੋਧ ਧਮ੍ਮੇਹਿ ਰਕ੍ਖਣਤ੍ਥਂ. ਕਤਮੇ ਪਨ ਤੇਸਤ੍ਤਵਿਧਾ ਪਲਿਬੋਧਧਮ੍ਮਾ ਨਾਮਾਤਿ. ਇਧ ਅਮ੍ਹੇਹਿ ਵਤ੍ਤਬ੍ਬਂ ਨਤ੍ਥਿ. ਵਿਸੁਦ੍ਧਿ ਮਗ੍ਗੇ ਏਵ ਤੇ ਵੁਤ੍ਤਾਤਿ ਦਸ੍ਸੇਤੁਂ ਗਾਥਮਾਹ. ‘‘ਆਵਾਸੋ’’ਤਿ ਅਸਪ੍ਪਾਯਾਵਾਸੋ. ‘‘ਗੋਚਰੋ’’ਤਿ ਅਸਪ੍ਪਾਯਗੋਚਰਗਾਮੋ. ‘‘ਭਸ੍ਸਂ’’ਤਿ ਅਸਪ੍ਪਾਯਵਚਨਂ. ਏਵਂ ਪੁਗ੍ਗਲਾਦੀਸੁ. ‘‘ਸੇਵੇਥਾ’’ਤਿ ਸੇਵੇਯ੍ਯ. ‘‘ਏਵਞ੍ਹਿਪਟਿਪਜ੍ਜਤੋ’’ਤਿ ਏਵਂਹਿਵਜ੍ਜਿਤਬ੍ਬੇ ਵਜ੍ਜਨਵਸੇਨ ਸੇਵਿਤਬ੍ਬੇ ਸੇਵਨਵਸੇਨ ਪਟਿਪਜ੍ਜਨ੍ਤਸ੍ਸ. ‘‘ਕਾਮਤਣ੍ਹਾਯ ਵਿਸਯਭਾਵਂ ਅਤਿਕ੍ਕਮਿਤ੍ਵਾ’’ਤਿ ਏਤੇਨ ਕਾਮਭੂਮਿ ਕਾਮਭਵਸਮਤਿਕ੍ਕਮੋ, ਰੂਪਭੂਮਿਰੂਪਭਵ ਓਕ੍ਕਮੋ ਚ ਵੁਤ੍ਤੋ. ਵਸਨਂ ਵਸੀ. ਸਤ੍ਤਿ. ਸਾਮਤ੍ਥਿਯਨ੍ਤਿ ਅਤ੍ਥੋ. ਵਸਿਂ ਭੂਤਂ ਪਤ੍ਤਨ੍ਤਿ ਵਸਿਭੂਤਂ. ਵਸੀ ਏਵ ਵਸਿਤਾ. ਯਥਾ ਪਾਰਮਿਤਾਤਿ. ‘‘ਤਤੋ ਵਿਚਾਰਨ੍ਤਿ’’ ਏਤ੍ਥ ਇਤਿਸਦ੍ਦੋ ਆਦਿਅਤ੍ਥੋ. ਤੇਨ ਤਤੋ ਪੀਤਿਂਤਿਆਦਿਂ ਸਙ੍ਗਣ੍ਹਾਤਿ. ਇਚ੍ਛਨ੍ਤਾਨਂ ਤੇਸਂ ਸਬ੍ਬਞ੍ਞੁਬੁਦ੍ਧਾਨਂ. ‘‘ਯਤ੍ਥਾ’’ਤਿ ਯੇਸੁਦ੍ਵੀਸੁਭਵਙ੍ਗੇਸੁ. ‘‘ਭਵਙ੍ਗਚਾਰੇ’’ਤਿ ਭਵਙ੍ਗਪ੍ਪਵਤ੍ਤਿਯਂ. ‘‘ਦਨ੍ਧਾਯਿਤਤ੍ਤਂ’’ਤਿ ਦਨ੍ਧਂ ਹੁਤ੍ਵਾ ਅਯਤਿ ਪਵਤ੍ਤਤੀਤਿ ਦਨ੍ਧਾਯਿਤਂ. ਤਸ੍ਸ ਭਾਵੋ ਦਨ੍ਧਾਯਿਤਤ੍ਤਂ. ‘‘ਠਪੇਤੁਂ’’ਤਿ ਅਧਿਟ੍ਠਾਨਂ ਕਤ੍ਵਾ ਠਪੇਤੁਂ. ਤਤੋ ਅਨਤਿਕ੍ਕਮਿਤੁਂ. ‘‘ਯਤ੍ਥਿਚ੍ਛਕਂ’’ਤਿਆਦੀਨਿ ਕ੍ਰਿਯਾਵਿਸੇਸਨਪਦਾਨਿ. ‘‘ਯਤ੍ਥਿਚ੍ਛਕਂ’’ਤਿ ਯਤ੍ਥ ਯਤ੍ਥ ਠਾਨੇ ਇਚ੍ਛਾਨੁ ਰੂਪਂ. ਯਦਿਚ੍ਛਕਨ੍ਤਿਯਸ੍ਮਿਂ ਯਸ੍ਮਿਂ ਖਣੇ ਇਚ੍ਛਾਨੁ ਰੂਪਂ. ‘‘ਯਾਵਤਿਚ੍ਛਕਂ’’ਤਿ ਯਤ੍ਤਕੇਨ ਪਮਾਣੇਨ ਇਚ੍ਛਾਨੁ ਰੂਪਂ. ‘‘ਵਿਤਕ੍ਕਾਦਿਕਂ ਓਲ਼ਾਰਿਕਙ੍ਗਂ ਪਹਾਨਾਯਾ’’ਤਿ ਏਤ੍ਥ ਕਸ੍ਸ ਬਲੇਨ ਪਹਾਨਂ ਹੋਤਿ. ਤਂ ਤਂ ਵਿਰਾਗ ਭਾਵਨਾ ਬਲੇਨ ਪਹਾਨਂ ਹੋਤਿ. ਕਾਚ ਤਂ ਤਂ ਵਿਰਾਗਭਾਵਨਾ ਨਾਮ ਹੋਤਿ. ਅਜ੍ਝਾਸਯ ਵਿਸੇਸ ਪਰਿਗ੍ਗਹਿਤਾ ਉਪਚਾਰਭਾਵਨਾ ਏਵਾਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਪਥਮਜ੍ਝਾਨਂ ਤਾਵਾ’’ਤਿਆਦਿ ਵੁਤ੍ਤਂ. ‘‘ਆਤਾਪਵੀਰਿਯਂ’’ਤਿ ਯੇਨਵੀਰਿਯੇਨ ਯੋਗਿਨੋ ਅਤ੍ਤਾਨਂ ਵਾ ਕਿਲੇਸ ਧਮ੍ਮੇ ਵਾ ਆਤਾਪੇਨ੍ਤਿ ਪਰਿਤਾਪੇਨ੍ਤਿ. ਤਂ ਆਤਾਪਵੀਰਿਯਂ ਨਾਮ. ਉਗ੍ਘਾਟੀਯਮਾਨਮ੍ਪਿ ਆਕਾਸਮੇਵ ਹੋਤਿ. ਤਂ ਆਰਬ੍ਭ ਉਪਰਿਝਾਨਨ੍ਤਰੁਪ੍ਪਤ੍ਤਿਯਾ ਭਾਵਨਂ ਕਰੋਨ੍ਤਸ੍ਸਪਿ ਪੁਨਪ੍ਪੁਨਂ ਤਮੇਵ ਪਞ੍ਚਮਜ੍ਝਾਨਂ ਉਪ੍ਪਜ੍ਜਤਿ. ਆਰਮ੍ਮਣੇ ਚ ਅਨਤਿਕ੍ਕਨ੍ਤੇ ਝਾਨਂਪਿ ਅਨਤਿਕ੍ਕਨ੍ਤਮੇਵ ਹੋਤੀਤਿ. ‘‘ਤਤ੍ਥਾ’’ਤਿ ਤਸ੍ਮਿਂ ਆਕਾਸਕਸਿਣੇ. ‘‘ਤਦਤਿਕ੍ਕਮਨਸਮ੍ਭਵੋ’’ਤਿ ਕਸਿਣ ਨਿਮਿਤ੍ਤਾਤਿਕ੍ਕਮਨਸਮ੍ਭਵੋ. ‘‘ਯਥਾਦਿਟ੍ਠੇ’’ਤਿ ਝਾਨਚਕ੍ਖੁਨਾ ਦਿਟ੍ਠਪ੍ਪਕਾਰੇ. ‘‘ਸਮ੍ਭਾਵੇਤ੍ਵਾ’’ਤਿ ਥੋਮੇਤ੍ਵਾ. ਸਮ੍ਮਾ ਅਨੁਸ੍ਸਰਣਂ ਸਮਨੁਸ੍ਸਰਣਂ. ‘‘ਇਤਰੇਸਂਪਿ ਵਾ’’ਤਿ ਪੁਥੁਜ੍ਜਨ ਪਣ੍ਡਿਤਾਨਂਪਿ ਵਾ. ਮਰਣ ਸਞ੍ਞਾ ਵਵਤ੍ਥਾਨੇਸੁ ਪਰਿਕਮ੍ਮਞ੍ਚ ਸਮਾਧਿਯਤਿ, ਉਪਚਾਰੋ ਚ ਸਮ੍ਪਜ੍ਜਤੀਤਿ ਯੋਜਨਾ ਤਿਕ੍ਖਪਞ੍ਞਾਨਂ ਪਨ ਪੁਥੁਜ੍ਜਨਾਨਂਪਿ ਸਤਂ ਬੁਦ੍ਧਗੁਣਾਦੀਸੁਪਿ ਉਪਚਾਰ ਸਮ੍ਭਵੋ ਅਟ੍ਠਕਥਾਯਂ ਵੁਤ੍ਤੋਯੇਵ. ‘‘ਸਮਥਜ੍ਝਾਨੇਸੂ’’ਤਿ ਇਦਂ ਅਧਿਕਾਰਵਸੇਨ ਵੁਤ੍ਤਂ. ਵਿਪਸ੍ਸਨਾ ਕਮ੍ਮਂਪਿ ਗਹੇਤਬ੍ਬਮੇਵਾਤਿ ਦਟ੍ਠਬ੍ਬਂ. ਪੁਬ੍ਬੇਦਾਨਂ ਦਤ੍ਵਾ ਇਮਿਨਾ ਪੁਞ੍ਞੇਨ ਆਯਤਿਂ ਝਾਨਾਭਿਞ੍ਞਾਯੋ ਵਾ ਮਗ੍ਗਫਲਾਨਿ ਵਾ ਪਟਿਲਭਿਸ੍ਸਾਮੀਤਿ ਪਤ੍ਥਨਂ ਕਤ੍ਵਾ ਆਗਤੋਪਿ ਕਤਾਧਿਕਾਰੋ ਏਵਾਤਿਪਿ ਵਦਨ੍ਤਿ. ਕਤਮੋ ਪਨ ਕਤਾਧਿਕਾਰੋ ਨਾਮਾਤਿ ਆਹ ‘‘ਆਸਨ੍ਨਭਵੇ’’ਤਿਆਦਿਂ. ਅਟ੍ਠਵਿਧੇਸੁ ਚਤੁਕ੍ਕਨਯਵਸੇਨ, ਨਵਵਿਧੇਸੁ ਪਞ੍ਚਕਨਯਵਸੇਨ ਵੁਤ੍ਤੋਤਿ ਤੇਸਂ ਵਾਦੀਨਂ ਸਾਧਕਵਚਨਂ. ਵਿਚਾਰੇਤ੍ਵਾ ਪਨ ਗਹੇਤਬ੍ਬਂ. ਆਕਾਸ ਕਸਿਣੇਨ ਵਿਨਾ ਅਰੂਪਜ੍ਝਾਨਾਨਿ ਲਭਿਤ੍ਵਾ ਪੁਨ ਅਭਿਞ੍ਞਤ੍ਥਾਯ ਪਰਿਕਮ੍ਮੇਕਤੇ ਆਕਾਸਕਸਿਣੇਪਿ ਕਤ੍ਤਬ੍ਬਤ੍ਤਾ ਤਸ੍ਸ ਅਭਿਞ੍ਞਾਪਾਦਕਤਾ ਸਮ੍ਭਵੋ ਵੁਤ੍ਤੋਤਿ ਅਤ੍ਥਸ੍ਸ ਸਮ੍ਭਵਤੋ. ਪੁਬ੍ਬੇ ਅਭਾਵਿਤ ਭਾਵਨੋਤਿ ਚ ਅਕਤਾਧਿਕਾਰੋਤਿ ਚ ਅਤ੍ਥਤੋ ਏਕਂ. ‘‘ਆਦਿਕਮ੍ਮਿਕੋ’’ਤਿ ਅਭਿਞ੍ਞਾਕਮ੍ਮੇ ਆਦਿਕਮ੍ਮਿਕੋ. ‘‘ਤਾਦਿਸਾਨਂ’’ਤਿ ਪੁਬ੍ਬੇ ਅਕਤਾਧਿਕਾਰਾਨਂ ਅਭਾਵਿਤਭਾਵਨਾਨਂ ਇਦਾਨਿ ਇਦ੍ਧਿਵਿਕੁਬ੍ਬਨਂ ਕਰਿਸ੍ਸਾਮੀਤਿ ਆਰਭਨ੍ਤਾਨਂ ਅਭਿਞ੍ਞਾਕਮ੍ਮੇ ਆਦਿਕਮ੍ਮਿਕਕੁਲਪੁਤ੍ਤਾਨਨ੍ਤਿ ਸਮ੍ਬਨ੍ਧੋ. ‘‘ਇਦ੍ਧਿਵਿਕੁਬ੍ਬਨਂ’’ਤਿ ਚ ਉਪਲਕ੍ਖਣਵਚਨਂ. ਦਿਬ੍ਬਾਯ ਸੋਤਧਾਤੁਯਾ ਸਦ੍ਦਂ ਸਵਨਂ ਕਰਿਸ੍ਸਾਮੀਤਿਆਦਿਕਂਪਿ ਗਹੇਤਬ੍ਬਂ. ਇਦਞ੍ਚ ਆਦਿਕਮ੍ਮਿਕਵਿਧਾਨਾਧਿਕਾਰਤ੍ਤਾ ਵੁਤ੍ਤਂ. ਅਭਿਞ੍ਞਾਸੁ ਵਸਿਪਤ੍ਤਾਨਮ੍ਪਿ ਤਂ ਪਞ੍ਚਮਜ੍ਝਾਨਂ ਛਸੁਆਰਮ੍ਮਣੇਸੁ ਯਥਾਰਹਂ ਅਪ੍ਪੇਤਿਯੇਵ. ‘‘ਅਧਿਟ੍ਠਾਤਬ੍ਬਂ’’ਤਿ ਯਥਿਚ੍ਛਿਤ ਨਿਪ੍ਫਤ੍ਤਤ੍ਥਾਯ ਸਤਂ ਹੋਤੁ ਸਹਸ੍ਸਂ ਹੋਤੂਤਿਆਦਿਨਾ ਚਿਤ੍ਤੇਨ ਅਭਿਵਿਧਾਤਬ੍ਬਂ. ਅਭਿਨੀਹਰਿਤਬ੍ਬਨ੍ਤਿ ਵੁਤ੍ਤਂ ਹੋਤਿ. ‘‘ਸਤਂ ਹੋਮਿ, ਸਹਸ੍ਸਂ ਹੋਮੀਤਿ ਵਾ’’ਤਿ ਅਤ੍ਤਾਨਂ ਸਤਂ ਵਾ ਸਹਸ੍ਸਂ ਵਾ ਨਿਮ੍ਮਿਨਨਵਸੇਨ ਵੁਤ੍ਤਂ. ਸੇਸਂ ਪਨ ਅਞ੍ਞਥਾਨਿਮ੍ਮਿਨਨਵਸੇਨ. ਸੋਤੁਂ ਵਾ ਸਦ੍ਦਂ, ਪਸ੍ਸਿਤੁਂ ਵਾ ਰੂਪਂ, ਜਾਨਿਤੁਂ ਵਾ ਪਰਚਿਤ੍ਤਂ. ਅਨੁਸ੍ਸਰਿਤੁਂ ਵਾ ਪੁਬ੍ਬੇਨਿਵੁਤ੍ਥਂ. ਅਟ੍ਠਕਥਾਪਾਠੇ. ‘‘ਅਧਿਟ੍ਠਾਤੀ’’ਤਿ ਅਭਿਞ੍ਞਾਯ ਅਧਿਟ੍ਠਾਤਿ. ਅਭਿਵਿਧਾਤਿ ਨਿਬ੍ਬਤ੍ਤੇਤੀਤਿ ਵੁਤ੍ਤਂ ਹੋਤਿ. ਦੁਵਿਧਂਹਿ ਅਧਿਟ੍ਠਾਨਂ ਪਰਿਕਮ੍ਮੇਨ ਅਧਿਟ੍ਠਾਨਂ ਅਭਿਞ੍ਞਾਯ ਅਧਿਟ੍ਠਾਨਨ੍ਤਿ. ਇਧ ਪਨ ਅਭਿਞ੍ਞਾਯ ਅਧਿਟ੍ਠਾਨਂ ਵੁਤ੍ਤਂ. ‘‘ਅਧਿਟ੍ਠਾਨ ਚਿਤ੍ਤੇਨਾ’’ਤਿ ਅਭਿਞ੍ਞਾਚਿਤ੍ਤੇਨਾਤਿ ਵੁਤ੍ਤਂ ਹੋਤਿ. ‘‘ਪਰਿਕਮ੍ਮਚਿਤ੍ਤਸ੍ਸਾ’’ਤਿ ਪੁਬ੍ਬਭਾਗੇ ਆਵਜ੍ਜਨ ਪਰਿਕਮ੍ਮ ਅਧਿਟ੍ਠਾਨਪਰਿਕਮ੍ਮਚਿਤ੍ਤਸ੍ਸ. ਪਚ੍ਛਿਮਂ ਪਨ ਪਾਦਕਜ੍ਝਾਨ ਸਮਾਪਜ੍ਜਨਂ. ਪਰਿਕਮ੍ਮਚਿਤ੍ਤਸ੍ਸ ਸਮਾਧਾਨਤ੍ਥਾਯਾਤਿ ਵੁਤ੍ਤਂ. ਪਰਿਕਮ੍ਮਚਿਤ੍ਤੇ ਸਮਾਹਿਤੇ ਕਿਂ ਪਯੋਜਨਨ੍ਤਿ ਆਹ ‘‘ਤਥਾਹੀ’’ਤਿਆਦਿਂ. ‘‘ਸੇਸਾਭਿਞ੍ਞਾਸੁਪਿ ਯਥਾਰਹਂ ਵਤ੍ਤਬ੍ਬੋ’’ਤਿ ਦਿਬ੍ਬਸੋਤਪਰਿਕਮ੍ਮੇ ਤੇਨੇਵਪਰਿਕਮ੍ਮ ਸਮਾਧਿਞ੍ਞਾਣਸੋਤੇਨ ਆਸਨ੍ਨੇ ਦਿਬ੍ਬਵਿਸਯਂਪਿ ਸਦ੍ਦਂ ਸੁਣਾਤੀਤਿਆਦਿਨਾ ਵਤ੍ਤਬ੍ਬੋ. ‘‘ਇਤਿ ਕਤ੍ਵਾ’’ਤਿ ਇਤਿ ਮਨਸਿਕਤ੍ਵਾ. ‘‘ਤਂ’’ਤਿ ਪਚ੍ਛਿਮਂ ਪਾਦਕਜ੍ਝਾਨ ਸਮਾਪਜ੍ਜਨਂ. ‘‘ਇਧ ਨਗਹਿਤਨ੍ਤਿ ਦਟ੍ਠਬ੍ਬਂ’’ਤਿ ਥੇਰਸ੍ਸ ਮਤੇਨ ਦਟ੍ਠਬ੍ਬਨ੍ਤਿ ਅਧਿਪ੍ਪਾਯੋ. ਇਧ ਪਨ ਆਦਿਕਮ੍ਮਿਕਵਿਧਾਨਪ੍ਪਧਾਨਤ੍ਤਾ ਪਚ੍ਛਿਮਂਪਿ ਪਾਦਕਜ੍ਝਾਨ ਸਮਾਪਜ੍ਜਨਂ ਵਤ੍ਤਬ੍ਬਮੇਵਾਤਿ. ‘‘ਕਾਯਗਤਿਕਂ ਅਧਿਟ੍ਠਹਿਤ੍ਵਾ’’ਤਿ ਅਯਂ ਕਾਯੋ ਵਿਯ ਇਦਂ ਚਿਤ੍ਤਂਪਿ ਦਨ੍ਧਗਮਨਂ ਹੋਤੂਤਿ ਏਵਂ ਚਿਤ੍ਤਂ ਕਾਯਗਤਿਕਂ ਕਰਣੇਨ ਅਧਿਟ੍ਠਹਿਤ੍ਵਾ. ‘‘ਦਿਸ੍ਸਮਾਨੇਨ ਕਾਯੇਨਾ’’ਤਿ ਦਨ੍ਧਗਮਨੇਨ ਗਚ੍ਛਨ੍ਤਤ੍ਤਾ ਬਹੁਜਨਾਨਮ੍ਪਿ ਦਿਸ੍ਸਮਾਨੇਨ ਰੂਪਕਾਯੇਨ. ਤਬ੍ਬਿ ਪਰੀਤੇਨ ਸੀਘਗਮਨਂ ਵੇਦਿਤਬ੍ਬਂ. ‘‘ਆਰਮ੍ਮਣਮਤ੍ਤਂ ਹੋਤੀ’’ਤਿ ਅਨਿਪ੍ਫਨ੍ਨਰੂਪਂ ਸਨ੍ਧਾਯ ਵੁਤ੍ਤਂ. ‘‘ਆਰਮ੍ਮਣ ਪੁਰੇਜਾਤਂ’’ਤਿ ਨਿਪ੍ਫਨ੍ਨਰੂਪਂ. ਇਤਰਂ ਪਨ ਹਦਯ ਵਤ੍ਥੁਰੂਪਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਪਰਚਿਤ੍ਤ ਵਿਜਾਨਨਟ੍ਠਾਨੇ ਅਟ੍ਠਕਥਾਟੀਕਾਚਰਿਯਾਨਂ ਵਿਚਾਰਣਾ ਅਤ੍ਥੀਤਿ ਤਂ ਦਸ੍ਸੇਤੁਂ ‘‘ਏਤ੍ਥ ਚ ਅਟ੍ਠਕਥਾਯਂ ਤਾਵਾ’’ਤਿਆਦਿ ਵੁਤ੍ਤਂ. ‘‘ਅਟ੍ਠਕਥਾਯਂ’’ਤਿ ਧਮ੍ਮਸਙ੍ਗਣਿ ਅਟ੍ਠਕਥਾਯਂਪਿ ਵਿਸੁਦ੍ਧਿਮਗ੍ਗ ਅਟ੍ਠਕਥਾਯਂਪਿ. ‘‘ਖਣਿਕਵਸੇਨਾ’’ਤਿ ਖਣਿਕਪਚ੍ਚੁਪ੍ਪਨ੍ਨਵਸੇਨ. ਆਵਜ੍ਜਨੇ ਨਿਰੁਦ੍ਧੇਤਿ ਸਮ੍ਬਨ੍ਧੋ. ‘‘ਏਕਂ ਚਿਤ੍ਤਂ’’ਤਿ ਪਰਸ੍ਸ ਚਿਤ੍ਤਂ. ਤਦੇਵ ਅਤੀਤਂ ਚਿਤ੍ਤਂ ਗਣ੍ਹਨ੍ਤਿ. ‘‘ਤਾਨੀ’’ਤਿ ਜਵਨਾਨਿ. ‘‘ਤੇਸਂ’’ਤਿ ਜਵਨਾਨਂ. ‘‘ਤੇਨਾ’’ਤਿ ਆਵਜ੍ਜਨੇਨ. ‘‘ਇਤਰਥਾ’’ਤਿ ਅਞ੍ਞਥਾ ਸਨ੍ਤਤਿ ਅਦ੍ਧਾਵਸੇਨ ਵੁਤ੍ਤਨ੍ਤਿ ਗਹਿਤੇ ਸਤਿ. ਵੁਤ੍ਤੋ ਸਿਯਾ. ਕਸ੍ਮਾ, ਸਨ੍ਤਤਿ ਅਦ੍ਧਾਵਸੇਨ ਪਚ੍ਚੁਪ੍ਪਨ੍ਨੇ ਗਹਿਤੇ ਸਤਿ, ਸਬ੍ਬਾਯ ਏਕਜਵਨਵੀਥਿਯਾ ਏਕਪਚ੍ਚੁਪ੍ਪਨ੍ਨਤ੍ਤਾ. ‘‘ਸਬ੍ਬਾਨਿ ਚਿਤ੍ਤਾਨੀ’’ਤਿ ਜਵਨਚਿਤ੍ਤਾਨਿ. ‘‘ਸਹੁਪ੍ਪਨ੍ਨਾਨੀ’’ਤਿ ਇਦਂ ਸਹੁਪ੍ਪਨ੍ਨਾਨਂਪਿ ਅਤ੍ਥਿਤਾਯ ਵੁਤ੍ਤਂ. ਆਵਜ੍ਜਨਾਦੀਨਿ ਪਨ ਖਣਭੇਦਂ ਨਗਣ੍ਹਨ੍ਤਿ. ਸਬ੍ਬਂ ਪਰਸ੍ਸ ਚਿਤ੍ਤਂ ਏਕਚਿਤ੍ਤਮਿਵ ਗਣ੍ਹਨ੍ਤਿ. ਤਸ੍ਮਾ ਕਾਲਭੇਦੋਪਿ ਨਤ੍ਥੀਤਿ ਦਟ੍ਠਬ੍ਬਂ. ‘‘ਨਿਬ੍ਬਾਨਞ੍ਚਾ’’ਤਿ ਵੁਤ੍ਤਂ, ਕਥਂ ਨਿਬ੍ਬਾਨਂ ਪੁਬ੍ਬੇਨਿਵੁਤ੍ਥਂ ਨਾਮ ਸਿਯਾਤਿ. ਅਤੀਤੇ ਪਰਿਨਿਬ੍ਬੁਤਾਨਂ ਮਗ੍ਗਫਲਾਨਿ ਅਨੁਸ੍ਸਰਣਕਾਲੇ ਤੇਸਂ ਆਰਮ੍ਮਣਭੂਤਂ ਨਿਬ੍ਬਾਨਂਪਿ ਅਨੁਸ੍ਸਰਤਿਯੇਵ. ਤਤ੍ਥ ਤੇਸਂ ਮਗ੍ਗਫਲਾਨਂ ਅਤੀਤਤ੍ਤਾ ਨਿਬ੍ਬਾਨਂਪਿ ਪੁਬ੍ਬੇਨਿਵੁਤ੍ਥਂ ਨਾਮ ਹੋਤੀਤਿ.

‘‘ਯਂ ਯਂ ਅਧਿਟ੍ਠਾਤੀ’’ਤਿ ਯਂ ਯਂ ਸਤਾਦਿਕਂ ਸਂਵਿਧਾਤਿ. ‘‘ਯਥਾ ਯਥਾ ਅਧਿਟ੍ਠਾਤੀ’’ਤਿ ਯੇਨ ਯੇਨ ਆਵਿਭਾਵਾਦਿਕੇਨ ਪਕਾਰੇਨ ਸਂਵਿਧਾਤਿ. ‘‘ਪਕਤਿਵਣ੍ਣਂ’’ਤਿ ਪਕਤਿਸਣ੍ਠਾਨਂ. ‘‘ਤਸ੍ਸੇਵਾ’’ਤਿ ਪਕਤਿਵਣ੍ਣਸ੍ਸੇਵ. ਦੇਵਾਨਂ ਪਸਾਦਸੋਤਨ੍ਤਿ ਸਮ੍ਬਨ੍ਧੋ. ‘‘ਆਰਮ੍ਮਣ ਸਮ੍ਪਟਿਚ੍ਛਨ ਸਮਤ੍ਥਂ’’ਤਿ ਆਰਮ੍ਮਣਸ੍ਸ ਉਪਟ੍ਠਾਨਂ ਸਮ੍ਪਟਿਚ੍ਛਨ ਸਮਤ੍ਥਂ. ਤਦੇਵ ਚੇਤੋਪਰਿਯਞਾਣਨ੍ਤਿਪਿ ਵੁਚ੍ਚਤੀਤਿ ਸਮ੍ਬਨ੍ਧੋ. ‘‘ਚੇਤੋ’’ਤਿ ਚਿਤ੍ਤਂ. ‘‘ਪਰਿਚ੍ਛਿਜ੍ਜਾ’’ਤਿ ਇਦਂ ਸਰਾਗਚਿਤ੍ਤਂ, ਇਦਂ ਵਿਰਾਗਚਿਤ੍ਤਨ੍ਤਿਆਦਿਨਾ ਪਰਿਚ੍ਛਿਨ੍ਦਿਤ੍ਵਾ. ‘‘ਗੋਚਰ ਨਿਵਾਸਵਸੇਨਾ’’ਤਿ ਗੋਚਰਂ ਕਤ੍ਵਾ ਨਿਵਸਨਵਸੇਨ. ਸਬ੍ਬਞ੍ਞੁਤਞ੍ਞਾਣਗਤਿਕਂ ਸਬ੍ਬਞ੍ਞੁਬੁਦ੍ਧਾਨਂ ਅਨਾਗਤਂ ਸਞ੍ਞਾਣਨ੍ਤਿ ਅਧਿਪ੍ਪਾਯੋ. ਅਨਾਗਤੇ ਸਤ੍ਤਦਿਵਸਤੋ ਓਰਿਮਾ ਚਿਤ੍ਤਚੇਤਸਿਕ ਧਮ੍ਮਾ ਚੇਤੋਪਰਿਯਞ੍ਞਾਣਸ੍ਸ ਵਿਸਯੋਤਿ ਕਤ੍ਵਾ ਅਨਾਗਤੇ ਸਤ੍ਤਦਿਵਸਤੋਤਿ ਵੁਤ੍ਤਂ. ਪਟ੍ਠਾਯ ਪਵਤ੍ਤਮਾਨਾਤਿ ਪਾਠਸੇਸੋ. ਇਮਸ੍ਮਿਂ ਦਿਵਸੇ ਚ ਅਨਾਗਤਪਕ੍ਖੇ ਸਬ੍ਬਂਪਿ ਆਰਮ੍ਮਣਂ ਪਕਤਿਞਾਣਸ੍ਸ ਵਿਸਯੋਤਿ ਕਤ੍ਵਾ ‘‘ਦੁਤੀਯਦਿਵਸਤੋ ਪਟ੍ਠਾਯਾ’’ਤਿ ਵੁਤ੍ਤਂ. ‘‘ਏਤਂ’’ਤਿ ਏਤਂ ਅਨਾਗਤਂ ਸਞ੍ਞਾਣਂ. ‘‘ਯਥਾ ਚੇਤਂ’’ਤਿ ਯਥਾ ਚ ਏਤਂ ਇਮਸ੍ਮਿਂ ਭਵੇ ਅਨਾਗਤ ਧਮ੍ਮੇ ਜਾਨਾਤਿ. ‘‘ਅਸਾਧਾਰਣਕਾਲਵਸੇਨਾ’’ਤਿ ਅਞ੍ਞੇਨਞਾਣੇਨ ਅਸਾਧਾਰਣ ਕਾਲਵਸੇਨ. ਪਚ੍ਚੁਪ੍ਪਨ੍ਨਭਵੋਹਿ ਅਞ੍ਞਞ੍ਞਾਣਸਾਧਾਰਣੋਤਿ.

ਸਮਥਕਮ੍ਮਟ੍ਠਾਨਾਨੁਦੀਪਨਾ ਨਿਟ੍ਠਿਤਾ.

੧੭੧. ਵਿਪਸ੍ਸਨਾਕਮ੍ਮਟ੍ਠਾਨੇ. ‘‘ਯਥਾਦਿਟ੍ਠਂ’’ਤਿ ਸਕ੍ਕਾਯਦਿਟ੍ਠਿਯਾ ਯਥਾਦਿਟ੍ਠਂ. ਨਿਚ੍ਚਨਿਮਿਤ੍ਤਂ ਨਾਮ ਸਤ੍ਤਪੁਗ੍ਗਲਾਦਿਨਿਮਿਤ੍ਤਮੇਵ. ਸਤ੍ਤਨਿਮਿਤ੍ਤਞ੍ਹਿ ਪਞ੍ਞਤ੍ਤਿ ਧਮ੍ਮਤ੍ਤਾ ਖਣੇਖਣੇ ਖਯਵਯਭੇਦਾਭਾਵਤੋ ਸੋ ਏਵਗਚ੍ਛਤਿ ਸੋ ਏਵ ਤਿਟ੍ਠਤੀਤਿਆਦਿਨਾ ਨਿਚ੍ਚਾਕਾਰਸਣ੍ਠਿਤਂ ਹੋਤੀਤਿ. ‘‘ਧੁਵਨਿਮਿਤ੍ਤਂ’’ਤਿ ਥਿਰਨਿਮਿਤ੍ਤਂ. ਇਦਮ੍ਪਿ ਸੋ ਗਚ੍ਛਨ੍ਤੋਪਿ ਨਨਸ੍ਸਤਿ, ਤਿਟ੍ਠਨ੍ਤੋਪਿ ਨਨਸ੍ਸਤੀਤਿਆਦਿਨਾ ਥਿਰਾਕਾਰਸਣ੍ਠਿਤਂ ਸਤ੍ਤਨਿਮਿਤ੍ਤਮੇਵ. ‘‘ਸੁਖਨਿਮਿਤ੍ਤਂ’’ਤਿ ਖਣੇਖਣੇ ਖਯਵਯਭੇਦ ਦੁਕ੍ਖਾਨਂ ਅਭਾਵਤੋ ਸੁਖਿਤੋ ਨਿਦ੍ਦੁਕ੍ਖੋ ਨਿਬ੍ਭਯੋਤਿਆਦਿਨਾ ਸੁਖਾਕਾਰਸਣ੍ਠਿਤਂ ਸਤ੍ਤਨਿਮਿਤ੍ਤਮੇਵ. ‘‘ਅਤ੍ਤਨਿਮਿਤ੍ਤਂ’’ਤਿ ਗਨ੍ਤੁਂ ਇਚ੍ਛਨ੍ਤੋ ਗਚ੍ਛਤਿ, ਠਾਤੁਂ ਇਚ੍ਛਨ੍ਤੋ ਤਿਟ੍ਠਤੀਤਿਆਦਿਨਾ ਵਸਵਤ੍ਤਨਾਕਾਰ ਸਣ੍ਠਿਤਂ ਸਤ੍ਤਨਿਮਿਤ੍ਤਮੇਵ. ‘‘ਕਿਰਿਯਾ’’ਤਿ ਭਾਵਨਾਕਿਰਿਯਾ.

ਵਿਸੁਜ੍ਝਤੀਤਿ ਵਿਸੁਦ੍ਧਿ. ਵਿਸੋਧੇਤੀਤਿ ਵਾ ਵਿਸੁਦ੍ਧਿ. ਸੀਲਮੇਵ ਵਿਸੁਦ੍ਧਿ ਸੀਲਵਿਸੁਦ੍ਧੀਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਨਿਚ੍ਚਸੀਲਮੇਵਾ’’ਤਿਆਦਿਮਾਹ. ਤਤ੍ਥ ਨਿਚ੍ਚਸੀਲਮੇਵ ਉਪਰਿਝਾਨਾਦਿਵਿਸੇਸਾਨਂ ਅਧਿਟ੍ਠਾਨ ਕਿਚ੍ਚਸਾਧਕਤ੍ਤਾ ਇਧ ਅਧਿਪ੍ਪੇਤਨ੍ਤਿ ਵੁਤ੍ਤਂ ‘‘ਨਿਚ੍ਚਸੀਲਮੇਵਾ’’ਤਿ. ਸਮਾਧਿ ਅਧਿਪ੍ਪੇਤੋ. ਵਕ੍ਖਤਿਹਿ ‘‘ਦੁਵਿਧੋਪਿ ਸਮਾਧਿ ਚਿਤ੍ਤਵਿਸੁਦ੍ਧਿ ਨਾਮਾ’’ਤਿ. ਏਤੇਨ ਵਿਸੁਜ੍ਝਤਿ ਏਤਾਯਾਤਿ ਵਿਸੁਦ੍ਧਿ. ਚਿਤ੍ਤਸ੍ਸ ਵਿਸੁਦ੍ਧਿ ਚਿਤ੍ਤਵਿਸੁਦ੍ਧਿ. ਸਮਾਧਿ ਏਵਾਤਿਪਿ ਦੀਪੇਤਿ. ਵਿਸੁਜ੍ਝਨਂ ਵਾ ਵਿਸੁਦ੍ਧਿ. ਚਿਤ੍ਤਸ੍ਸ ਵਿਸੁਦ੍ਧਿ ਚਿਤ੍ਤਵਿਸੁਦ੍ਧਿ. ਅਤ੍ਥਤੋਪਨ ਵਿਸੁਦ੍ਧਚਿਤ੍ਤਮੇਵ ਵੁਚ੍ਚਤੀਤਿਪਿ ਯੁਜ੍ਜਤਿ. ਵਿਸੁਦ੍ਧਿਸਦ੍ਦ ਸਮ੍ਪਨ੍ਨੇ ਹਿ ਸਤਿ, ਚਿਤ੍ਤਵਿਸੁਦ੍ਧਿ ਇਚ੍ਚੇਵ ਵੁਚ੍ਚਤਿ. ਨ ਸਮਾਧਿਵਿਸੁਦ੍ਧੀਤਿ. ‘‘ਸੋਲ਼ਸਵਿਧਂ ਕਙ੍ਖਂ’’ਤਿ ਅਹੋਸਿਂ ਨੁ ਖੋ ਅਹ ਮਤੀਤਮਦ੍ਧਾਨਨ੍ਤਿਆਦਿਨਾ ਸੁਤ੍ਤਨ੍ਤੇਆਗਤਂ ਸੋਲ਼ਸਵਿਧਂ ਵਿਚਿਕਿਚ੍ਛਂ. ‘‘ਅਟ੍ਠਵਿਧਂ ਵਾ ਕਙ੍ਖਂ’’ਤਿ ਸਤ੍ਥਰਿਕਙ੍ਖਤੀਤਿਆਦਿਨਾ ਅਭਿਧਮ੍ਮੇ ਆਗਤਂ ਅਟ੍ਠਵਿਧਂ ਵਿਚਿਕਿਚ੍ਛਂ. ਵਿਸਮਹੇਤੁਦਿਟ੍ਠਿ ਨਾਮ ਸਤ੍ਤਾਨਂ ਉਪ੍ਪਤ੍ਤਿਯਾ ਅਕਾਰਣਮੇਵ ਕਾਰਣਂ ਕਤ੍ਵਾ ਗਹਣਦਿਟ੍ਠਿ. ‘‘ਮਨਸਿਕਾਰਵਿਧੀ’’ਤਿ ਅਨਿਚ੍ਚਲਕ੍ਖਣਾਦੀਸੁ ਮਨਸਿਕਾਰਵਿਧਿ. ਅਨੁਪਾਯਭੂਤੋ ਮਨਸਿਕਾਰੋ ਨਾਮ ਨਿਚ੍ਚਾਦਿਵਸੇਨ ਮਨਸਿਕਾਰੋ. ਅਧਿਮਾਨਵਤ੍ਥੁ ਨਾਮ ਓਭਾਸਾਦੀਨਿ. ‘‘ਮਗ੍ਗਤੋ’’ਤਿ ਮਗ੍ਗਭਾਵੇਨ. ‘‘ਅਮਗ੍ਗਤੋ’’ਤਿ ਅਮਗ੍ਗਭਾਵੇਨ. ‘‘ਦਸ੍ਸਨਞ੍ਚਾ’’ਤਿ ਤੇਸਂਅਧਿਮਾਨਵਤ੍ਥੂਨਂ ਅਨਿਚ੍ਚਤਾਦਿਦਸ੍ਸਨਞ੍ਚ. ਤਮੇਵ ਵਿਸੁਦ੍ਧਿਨਾਮਾਤਿ ਸਮ੍ਬਨ੍ਧੋ. ‘‘ਸਮ੍ਮੋਹਮਲਤੋ’’ਤਿ ਚਤੁਸਚ੍ਚਪ੍ਪਟਿਚ੍ਛਾਦਕ ਸਮ੍ਮੋਹਮਲਤੋ. ਨਨੁ ਦਸ੍ਸਨਨ੍ਤਿ ਞਾਣਮੇਵ. ਏਵਂਸਤਿ, ਞਾਣਨ੍ਤਿ ਵੁਤ੍ਤੇ ਸਿਦ੍ਧੇ ਕਤ੍ਵਾ ਦਸ੍ਸਨਸਦ੍ਦੇਨ ਸਹ ਞਾਣਦਸ੍ਸਨਨ੍ਤਿ ਵੁਤ੍ਤਨ੍ਤਿ ਆਹ ‘‘ਏਤ੍ਥਚਾ’’ਤਿਆਦਿਂ. ‘‘ਸੁਤਮਯਾਦਿਵਸੇਨਾ’’ਤਿ ਸੁਤਮਯ ਚਿਨ੍ਤਾਮਯਵਸੇਨ. ਤਤ੍ਥ ਯਥਾਸੁਤਸ੍ਸ ਪਾਲ਼ਿਧਮ੍ਮਸ੍ਸ ਅਤ੍ਥਮਤ੍ਤਜਾਨਨਂ ਸੁਤਮਯਞ੍ਞਾਣਂ ਨਾਮ. ਅਤ੍ਥਂ ਞਤ੍ਵਾ ਅਤ੍ਥਾਨੁਰੂਪਸ੍ਸ ਸਭਾਵਲਕ੍ਖਣਸ੍ਸ ਚਿਨ੍ਤਨਾਵਸੇਨ ਉਪ੍ਪਨ੍ਨਂ ਞਾਣਂ ਚਿਨ੍ਤਾਮਯਞ੍ਞਾਣਂ ਨਾਮ. ‘‘ਅਨੁਮਾਨਾਦਿਞਾਣਂਪੀ’’ਤਿ ਨਾਮਰੂਪ ਧਮ੍ਮੇਸੁ ਸਭਾਵਾਨੁਮਾਨਞ੍ਞਾਣ ਸਭਾਵਜਾਨਨਞ੍ਞਾਣਂਪਿ. ‘‘ਅਤ੍ਤਪਚ੍ਚਕ੍ਖਞ੍ਞਾਣਮੇਵਾ’’ਤਿ ਅਤ੍ਤਨਾ ਪਚ੍ਚਕ੍ਖਕਰਣਞ੍ਞਾਣਮੇਵ. ‘‘ਸਬ੍ਬਤ੍ਥਾ’’ਤਿ ਮਗ੍ਗਾਮਗ੍ਗਞ੍ਞਾਣਦਸ੍ਸਨਾਦੀਸੁ ਸਬ੍ਬੇਸੁ ਠਾਨੇਸੁ. ਏਤ੍ਥ ਚ ਦਸਸੁ ਵਿਪਸ੍ਸਨਾਞਾਣੇਸੁਪਿ ਵਿਪਸ੍ਸਨਾ ਵਚਨੇਨ ਪਚ੍ਚਕ੍ਖਦਸ੍ਸਨਮੇਵ ਅਧਿਪ੍ਪੇਤਨ੍ਤਿ ਕਤ੍ਵਾ ਸਬ੍ਬਤ੍ਥਗ੍ਗਹਣਂ ਕਤਨ੍ਤਿ ਦਟ੍ਠਬ੍ਬਂ. ਸਮ੍ਮਸਨਞ੍ਞਾਣਤੋ ਪਟ੍ਠਾਯ ਹਿ ਦਸ੍ਸਨਮੇਵ ਅਧਿਪ੍ਪੇਤਂ. ਨ ਸਭਾਵਜਾਨਨਮਤ੍ਤਂ. ਯਤੋ ਚਕ੍ਖੁਨਾ ਪਸ੍ਸਨ੍ਤਸ੍ਸੇਵ ਸੁਟ੍ਠੁ ਪਚ੍ਚਕ੍ਖਤੋ ਦਸ੍ਸਨਤ੍ਥਾਯ ਪੁਨਪ੍ਪੁਨਂ ਭਾਵਨਾ ਕਮ੍ਮਂ ਨਾਮ ਤਤ੍ਥ ਇਚ੍ਛਿਤਬ੍ਬਂ ਹੋਤਿ.

‘‘ਧਮ੍ਮਾ’’ਤਿ ਸਙ੍ਖਤ ਧਮ੍ਮਾ. ਅਨਿਚ੍ਚਤਾ ਏਵ ਲਕ੍ਖਣਨ੍ਤਿ ਅਨਿਚ੍ਚਲਕ੍ਖਣਂ. ਅਨਿਚ੍ਚਾਨਂ ਵਾ ਸਙ੍ਖਤ ਧਮ੍ਮਾਨਂ ਲਕ੍ਖਣਨ੍ਤਿ ਅਨਿਚ੍ਚਲਕ੍ਖਣਨ੍ਤਿਪਿ ਯੁਜ੍ਜਤਿ. ‘‘ਅਭਿਣ੍ਹਸਮ੍ਪਟਿਪ੍ਪੀਲ਼ਨਾਕਾਰੋ’’ਤਿ ਯਥਾ ਸੀਘਸੋਤਾਯਂ ਨਦਿਯਂ ਨਾਵਾਯ ਉਦ੍ਧਂ ਗਚ੍ਛਨ੍ਤਂ ਸਾਨਾਵਾ ਅਭਿਸਙ੍ਖਰਣਦੁਕ੍ਖੇਨ ਅਭਿਣ੍ਹਂ ਸੁਟ੍ਠੁ ਪਟਿਪ੍ਪੀਲ਼ੇਤਿ. ਕਸ੍ਮਾ, ਅਸਤਿ ਅਭਿਸਙ੍ਖਾਰੇ ਤਙ੍ਖਣੇ ਏਵ ਅਧੋਵੁਯ੍ਹਨਤੋ. ਅਧੋਵੁਯ੍ਹਨਞ੍ਹਿ ਨਾਵਾਯ ਪਕਤਿ ਕਿਚ੍ਚਂ. ਉਦ੍ਧਂ ਆਰੂਹਨਂ ਅਭਿਸਙ੍ਖਾਰ ਸਿਦ੍ਧਂ. ਏਵਮੇਵਂ ਸੀਘਸੋਤੇ ਸਂਸਾਰੇ ਅਤ੍ਤਭਾਵੇਨ ਉਦ੍ਧਂ ਖਣਤੋ ਖਣਂ ਦਿਵਸਤੋ ਦਿਵਸਂ ਗਚ੍ਛਨ੍ਤਂ ਪੁਗ੍ਗਲਂ ਅਯਂ ਅਤ੍ਤਭਾਵੋ ਅਭਿਸਙ੍ਖਰਣ ਦੁਕ੍ਖੇਨ ਅਭਿਣ੍ਹਂ ਸੁਟ੍ਠੁ ਪਟਿਪ੍ਪੀਲ਼ੇਤਿ. ਕਸ੍ਮਾ, ਅਸਤਿ ਅਭਿਸਙ੍ਖਾਰੇ, ਪਚ੍ਚਯਵੇਕਲ੍ਲੇ ਚ ਸਤਿ, ਤਙ੍ਖਣੇ ਏਵ ਵਿਪਰਿਣਮਨਤੋ. ਵਿਪਰਿਣਮਨਞ੍ਹਿ ਅਤ੍ਤਭਾਵਸ੍ਸ ਪਕਤਿ ਕਿਚ੍ਚਂ. ਉਦ੍ਧਂਗਮਨਂ ਅਭਿਸਙ੍ਖਾਰ ਸਿਦ੍ਧਂ. ਏਵਂ ਅਭਿਣ੍ਹ ਸਮ੍ਪਟਿਪ੍ਪੀਲ਼ਨਂ ਵੇਦਿਤਬ੍ਬਂ. ਏਤ੍ਥ ਚ ਸਂਸਾਰਸ੍ਸ ਸੀਘਸੋਤਤਾ ਨਾਮ ਅਤ੍ਤਭਾਵਪਰਿਯਾਪਨ੍ਨਾਨਂ ਨਾਮ ਰੂਪਧਮ੍ਮਾਨਂ ਪਵਤ੍ਤਿਨਿਵਤ੍ਤਿ ਸੀਘਤਾ ਵੁਚ੍ਚਤਿ. ਏਤ੍ਥ ਚ ਮਰਣਂ ਦੁਵਿਧਂ ਸਮ੍ਮੁਤਿ ਮਰਣਞ੍ਚ ਪਰਮਤ੍ਥ ਮਰਣਞ੍ਚ. ਤਤ੍ਥ ਸਮ੍ਮੁਤਿ ਮਰਣਂ ਨਾਮ ਸਮ੍ਮੁਤਿ ਸਚ੍ਚਭੂਤਸ੍ਸ ਸਤ੍ਤਸ੍ਸ ਮਰਣਂ. ਤਂ ਏਕਭਵਪਰਿਯਨ੍ਤੇ ਸਨ੍ਦਿਸ੍ਸਤਿ. ਪਰਮਤ੍ਥ ਮਰਣਂ ਨਾਮ ਪਰਮਤ੍ਥ ਸਚ੍ਚਭੂਤਾਨਂ ਨਾਮਰੂਪ ਧਮ੍ਮਾਨਂ ਮਰਣਂ. ਇਦਮੇਵ ਏਕਨ੍ਤਮਰਣਂ, ਸਚ੍ਚਮਰਣਂ, ਸਭਾਵਮਰਣਂ ਹੋਤਿ. ਇਮਸ੍ਮਿਂ ਵਿਪਸ੍ਸਨਾ ਕਮ੍ਮੇ ਇਦਂ ਪਰਮਤ੍ਥ ਮਰਣਂ ਏਵ ਅਨਿਚ੍ਚਤਾਤਿ ਚ ਵੁਚ੍ਚਤਿ. ਧਮ੍ਮਾਨਂ ਸੁਸਾਨਕ੍ਖੇਤ੍ਤਨ੍ਤਿ ਚ ਸੁਸਾਨਭੂਮੀਤਿ ਚ ਵੁਚ੍ਚਤੀਤਿ. ਸਾ ਚ ਸੁਸਾਨਭੂਮਿਨਾਮ ਸਤ੍ਤਾਨਂ ਪਟਿਸਨ੍ਧਿਤੋ ਪਟ੍ਠਾਯ ਸਨ੍ਤਾਨਂ ਅਨੁਬਨ੍ਧਤਿਯੇਵ. ਅਨੁਬਨ੍ਧਤ੍ਤਾ ਚ ਸਤ੍ਤਾਨਂ ਪਟਿਸਨ੍ਧਿਤੋ ਪਟ੍ਠਾਯ ਸੋ ਨਾਮ ਸਮਯੋ ਨਤ੍ਥਿ, ਯਤ੍ਥ ਸਤ੍ਤਾ ਨ ਮਰਨ੍ਤੀਤਿ. ਇਦਞ੍ਚ ਅਨੁਬਨ੍ਧਨਂ ਸਤ੍ਤਾਨਂ ਅਭਿਣ੍ਹਸਮ੍ਪਟਿਪ੍ਪੀਲ਼ਨਮੇਵ ਹੋਤਿ. ਤੇਸਂ ਸਬ੍ਬਿਰਿਯਾਪਥੇਸੁ ਜੀਵਿਤਸ੍ਸ ਚ ਅਙ੍ਗਪਚ੍ਚਙ੍ਗਾਨਞ੍ਚ ਕਾਯਵਚੀਮਨੋ ਕਮ੍ਮਾਨਞ੍ਚ ਸਮ੍ਬਾਧਪਤ੍ਤਿਤੋ. ਅਵਸਵਤ੍ਤਨਾਕਾਰੋ ਪਨ ਅਭਿਸਙ੍ਖਾਰ ਦੁਕ੍ਖਂ ਅਭਿਣ੍ਹਂ ਪਚ੍ਚਨੁਭਵਨ੍ਤਾਨਂ ਪਾਕਟੋਯੇਵ. ਵਸਵਤ੍ਤਨੇਹਿ ਸਤਿ, ਅਭਿਸਙ੍ਖਰਣ ਕਿਚ੍ਚਸ੍ਸ ਓਕਾਸੋ ਨਤ੍ਥਿ. ਵਸਵਤ੍ਤਨੇਨੇਵ ਯਥਿਚ੍ਛਿ ਤਸ੍ਸ ਕਿਚ੍ਚਸ੍ਸ ਸਮ੍ਪਜ੍ਜਨਤੋ. ਲੋਕਸ੍ਮਿਞ੍ਹਿ ਸਬ੍ਬਂਪਿ ਅਭਿਸਙ੍ਖਾਰ ਕਿਚ੍ਚਂ ਨਾਮ ਅਨ੍ਤਮਸੋ ਅਸ੍ਸਾਸਨਪਸ੍ਸਾਸਨ ਕਿਚ੍ਚਂ ਉਪਾਦਾਯ ਧਮ੍ਮਾਨਂ ਵਸਵਤ੍ਤਨਾਭਾਵਤੋ ਕਰੋਨ੍ਤੀਤਿ.

ਅਨਿਚ੍ਚਸ੍ਸ ਧਮ੍ਮਸ੍ਸ ਅਨੁਅਨੁਪਸ੍ਸਨਾਤਿ ਸਮ੍ਬਨ੍ਧੋ. ‘‘ਅਨੁਅਨੁਪਸ੍ਸਨਾ’’ਤਿ ਚ ਞਾਣਚਕ੍ਖੁਨਾ ਪੁਨਪ੍ਪੁਨਂ ਨਿਜ੍ਝਾਯਨਾ ਓਲੋਕਨਾ. ‘‘ਧਮ੍ਮਾਨਂ’’ਤਿ ਪਞ੍ਚਕ੍ਖਨ੍ਧ ਧਮ੍ਮਾਨਂ. ‘‘ਯਤ੍ਥ ਯਤ੍ਥਾ’’ਤਿ ਯਸ੍ਮਿਂ ਯਸ੍ਮਿਂ ਸਰੀਰਙ੍ਗੇ. ‘‘ਪੁਰਾਣ ਧਮ੍ਮਾਨਂ’’ਤਿ ਪੁਰਾਣਾਨਂ ਪਾਤੁਬ੍ਭੂਤਾਨਂ, ਵਡ੍ਢਿਤਾਨਞ੍ਚ ਧਮ੍ਮਕੋਟ੍ਠਾਸਾਨਂ ਅਨ੍ਤਰਧਾਨਂ ਵਯੋ ਵੁਚ੍ਚਤਿ. ਵਿਪਸ੍ਸਨਾ ਕਮ੍ਮਂ ਪਤ੍ਵਾ ਖਣਿਕਵਸੇਨ ਏਕੇਕਧਮ੍ਮਵਿਭਾਗਵਸੇਨ ਚ ਅਨੁਪਸ੍ਸਨਾ ਕਿਚ੍ਚਂ ਨਤ੍ਥੀਤਿ ਆਹ ‘‘ਸਮੂਹ ਸਨ੍ਤਤਿਵਸੇਨ ਪਨਾ’’ਤਿ. ਏਕੇਕਧਮ੍ਮਵਿਭਾਗਵਸੇਨ ਅਨੁਪਸ੍ਸਨਾਪਿ ਪਨ ਪਕਤਿਯਾ ਸੁਪਾਕਟੇਸੁ ਚਿਤ੍ਤਵੇਦਨਾਦੀਸੁ ਇਚ੍ਛਿਤਬ੍ਬਾਯੇਵ. ‘‘ਅਨਿਚ੍ਚਤਾਯ ਪਰਮਾਕੋਟੀ’’ਤਿ ਤਤੋ ਉਤ੍ਤਰਿ ਅਨਿਚ੍ਚਤਾ ਨਾਮ ਨਤ੍ਥੀਤਿ ਅਧਿਪ੍ਪਾਯੋ. ਧਮ੍ਮਾਨਂ ਤਥਾ ਤਥਾ ਭਾਯਿਤਬ੍ਬਪ੍ਪਕਾਰੋ ਨਾਮ ਪਞ੍ਚਕ੍ਖਨ੍ਧੇ ‘ਅਨਿਚ੍ਚਤੋ, ਦੁਕ੍ਖਤੋ, ਰੋਗਤੋ, ਗਣ੍ਡਤੋ, ਸਲ੍ਲਤੋ, ਅਘਤੋ, ਆਬਾਧਤੋ, ਤਿਆਦਿਨਾ ਵੁਤ੍ਤੋ ਭਾਯਿਤਬ੍ਬਪ੍ਪਕਾਰੋ. ਤਸ੍ਸ ਸਮਨੁਪਸ੍ਸਨਾਞਾਣਂ ਭਯਞਾਣਂ. ਏਤੇਨ ਅਪਾਯਦੁਕ੍ਖ ਸਂਸਾਰ ਦੁਕ੍ਖਭੀਰੁਕੇਹਿ ਜਨੇਹਿ ਭਾਯਿਤਬ੍ਬਨ੍ਤਿ ਭਯਂ. ਤੇ ਵਾ ਭਾਯਨ੍ਤਿ ਏਤਸ੍ਮਾਤਿ ਭਯਂ. ਭਯਸ੍ਸ ਸਮਨੁ ਪਸ੍ਸਨਾਞਾਣਂ ਭਯਞਾਣਨ੍ਤਿ ਇਮਮਤ੍ਥਂ ਦਸ੍ਸੇਤਿ. ‘‘ਕਿਞ੍ਚਿਭਯਵਤ੍ਥੁਂ’’ਤਿ ਸੀਹਬ੍ਯਗ੍ਘਾਦਿਕਂ ਭਯਵਤ੍ਥੁਂ. ‘‘ਪਟਿਸ੍ਸਰਣੇ’’ਤਿ ਗੁਹਾਲੇਣਾਦਿਕੇ ਪਟਿਸ੍ਸਰਣੇ. ‘‘ਤੇਸਂ’’ਤਿ ਭਿਜ੍ਜਨਸਭਾਵਾਨਂ ਧਮ੍ਮਾਨਂ. ‘‘ਤੇਹੀ’’ਤਿ ਭਿਜ੍ਜਨਸਭਾਵੇਹਿ. ਉਕ੍ਕਣ੍ਠਤਾ ਨਾਮ ਚਿਤ੍ਤਸ੍ਸ ਵਿਰੁਦ੍ਧਤਾ ਨਿਕ੍ਖਮਾਭਿਮੁਖਤਾ. ‘‘ਚਤ੍ਤਾਲੀਸਾਯ ਆਕਾਰੇਹੀ’’ਤਿ ਪਞ੍ਚਕ੍ਖਨ੍ਧੇ ‘ਅਨਿਚ੍ਚਤੋ, ਦੁਕ੍ਖਤੋ, ਰੋਗਤੋ, ਗਣ੍ਡਤੋ, ਸਲ੍ਲਤੋ, ਅਘਤੋ, ਆਬਾਧਤੋ, ਪਰਤੋ, ਪਲੋਕਤੋ, ਈਤਿਤੋ,. ਉਪਦ੍ਦਵਤੋ, ਭਯਤੋ, ਉਪਸਗ੍ਗਤੋ, ਚਲਤੋ, ਪਭਙ੍ਗੁਤੋ, ਅਦ੍ਧੁਵਤੋ, ਅਤਾਣਤੋ, ਅਲੇਣਤੋ, ਅਸ੍ਸਰਣਤੋ, ਰਿਤ੍ਤਤੋ,. ਤੁਚ੍ਛਤੋ, ਸੁਞ੍ਞਤੋ, ਅਨਤ੍ਤਤੋ, ਆਦੀਨਵਤੋ, ਵਿਪਰਿਣਾਮ ਧਮ੍ਮਤੋ, ਅਸਾਰਕਤੋ, ਅਘਮੂਲਤੋ, ਵਧਕਤੋ, ਵਿਭਵਤੋ, ਸਾਸਵਤੋ,. ਸਙ੍ਖਤਤੋ, ਮਾਰਾਮਿਸਤੋ, ਜਾਤਿਧਮ੍ਮਤੋ, ਜਰਾਧਮ੍ਮਤੋ, ਬ੍ਯਾਧਿਧਮ੍ਮਤੋ, ਮਰਣਧਮ੍ਮਤੋ, ਸੋਕਪਰਿਦੇਵਧਮ੍ਮਤੋ, ਦੁਕ੍ਖਦੋਮਨਸ੍ਸ ਧਮ੍ਮਤੋ, ਉਪਾਯਾਸ ਧਮ੍ਮਤੋ, ਸਂਕਿਲੇਸਿਕ ਧਮ੍ਮਤੋ, ਪਸ੍ਸਨ੍ਤੋ ਸੁਞ੍ਞਤੋ ਲੋਕਂ ਅਵੇਕ੍ਖਤੀਤਿ ਏਵਂ ਮਹਾਨਿਦ੍ਦੇਸੇ ਮੋਘਪਞ੍ਹਨਿਦ੍ਦੇਸੇ ਆਗਤੇਹਿ ਚਤ੍ਤਾਲੀਸਾਯ ਆਕਾਰੇਹਿ. ਤਤ੍ਥ ਪਞ੍ਚਕ੍ਖਨ੍ਧੇ ਅਨਿਚ੍ਚਤੋ ਪਸ੍ਸਨ੍ਤੋਤਿਆਦਿਨਾ ਯੋਜੇਤਬ੍ਬਂ. ‘‘ਅਨਿਚ੍ਚਤੋ’’ਤਿ ਚ ਅਨਿਚ੍ਚਭਾਵੇਨਾਤਿ ਅਤ੍ਥੋ. ਸਬ੍ਬੇਪਿ ਪਞ੍ਚਕ੍ਖਨ੍ਧਾ ਅਨਿਚ੍ਚਾ ਏਵਾਤਿ ਪਸ੍ਸਨ੍ਤੋਤਿ ਵੁਤ੍ਤਂ ਹੋਤਿ. ਕਥਂ ਪਨ ਅਨਿਚ੍ਚਤੋ ਪਸ੍ਸਨ੍ਤੋ ਸੁਞ੍ਞਤੋ ਲੋਕਂ ਅਵੇਕ੍ਖਤੀਤਿ. ਨਿਚ੍ਚਗੁਣ ਸੁਞ੍ਞਤਾਯ ਸੁਞ੍ਞਤੋ ਪਞ੍ਚਕ੍ਖਨ੍ਧਭੂਤਂ ਲੋਕਂ ਅਵੇਕ੍ਖਤਿ. ਸੇਸਪਦੇਸੁਪਿ ਏਸੇਵਨਯੋ. ਤਤ੍ਥ ‘‘ਅਨਿਚ੍ਚਾ ਏਵਾ’’ਤਿ ਪਟਿਸਨ੍ਧਿਕ੍ਖਣਤੋ ਪਟ੍ਠਾਯ ਯਦਾਕਦਾਚਿ ਮਰਣ ਧਮ੍ਮਤ੍ਤਾ ਅਨਿਚ੍ਚਾ ਏਵ. ‘‘ਦੁਕ੍ਖਾ ਏਵਾ’’ਤਿ ਅਨਿਚ੍ਚ ਧਮ੍ਮਤ੍ਤਾਯੇਵ ਦੁਕ੍ਖਾ ਏਵ. ਯਦਨਿਚ੍ਚਂ, ਤਂ ਦੁਕ੍ਖਂਤਿਹਿ ਵੁਤ੍ਤਂ. ਦੁਕ੍ਖ ਸਚ੍ਚਧਮ੍ਮਤ੍ਤਾ ਵਾ. ‘‘ਰੋਗਾ ਏਵਾ’’ਤਿ ਰੋਗਜਾਤਿਕਤ੍ਤਾ ਰੋਗਾ ਏਵ. ਯੇਹਿ ਕੇਚਿ ਲੋਕੇ ਚਕ੍ਖੁ ਰੋਗਾਦਿਕਾ ਅਨੇਕਸਹਸ੍ਸਾ ਰੋਗਾ ਨਾਮ ਸਨ੍ਦਿਸ੍ਸਨ੍ਤਿ. ਸਬ੍ਬੇਤੇ ਇਮੇਪਞ੍ਚਕ੍ਖਨ੍ਧਾ ਏਵ. ਇਤੋ ਅਞ੍ਞੋਕੋਚਿ ਰੋਗੋ ਨਾਮ ਨਤ੍ਥਿ. ਤਸ੍ਮਾ ਤੇ ਏਕਨ੍ਤੇਨ ਰੋਗਜਾਤਿਕਾ ਏਵਾਤਿ. ਅਪਿ ਚ, ਦੁਕ੍ਖਸਚ੍ਚ ਧਮ੍ਮਤ੍ਤਾਤੀਹਿ ਦੁਕ੍ਖਤਾਹਿ ਚਤੂਹਿ ਦੁਕ੍ਖਟ੍ਠੇਹਿ ਚ ਅਭਿਣ੍ਹਸਮ੍ਪਟਿਪ੍ਪੀਲ਼ਨਤੋ ਰੁਜ੍ਜਨਟ੍ਠੇਨ ਰੋਗਾ ਏਵ. ਤਤ੍ਥ ‘‘ਤੀਹਿ ਦੁਕ੍ਖਤਾਹੀ’’ਤਿ ਦੁਕ੍ਖਦੁਕ੍ਖਤਾ ਸਙ੍ਖਾਰ ਦੁਕ੍ਖਤਾ ਵਿਪਰਿਣਾਮ ਦੁਕ੍ਖਤਾਤਿ ਇਮਾਹਿ ਤੀਹਿਦੁਕ੍ਖਤਾਹਿ. ‘‘ਚਤੂਹਿ ਦੁਕ੍ਖਟ੍ਠੇਹੀ’’ਤਿ ਦੁਕ੍ਖਸ੍ਸ ਪੀਲ਼ਨਟ੍ਠੋ, ਸਙ੍ਖਤਟ੍ਠੋ, ਸਨ੍ਤਾਪਟ੍ਠੋ, ਵਿਪਰਿਣਾਮਟ੍ਠੋ,ਤਿ ਇਮੇਹਿ ਚਤੂਹਿ ਦੁਕ੍ਖਟ੍ਠੇਹਿ. ਦੁਕ੍ਖ ਕਿਚ੍ਚੇਹੀਤਿ ਅਤ੍ਥੋ. ਏਸਨਯੋ ਗਣ੍ਡਾਦੀਸੁ. ਤਤ੍ਥ ਗਣ੍ਡੋਨਾਮ ਪੀਲ਼ਕਾਬਾਧੋ. ਸਲ੍ਲਂ ਨਾਮ ਵਿਜ੍ਝਨਟ੍ਠੇਨ ਕਿਲੇਸ ਸਲ੍ਲਞ੍ਚ ਦੁਕ੍ਖਸਲ੍ਲਞ੍ਚ. ਅਘਨ੍ਤਿ ਨਿਰਤ੍ਥਕਂ. ਇਮੇ ਚ ਖਨ੍ਧਾ ਵਿਪਤ੍ਤਿਪਰਿਯੋਸਾਨਤ੍ਤਾ ਨਿਰਤ੍ਥਕਾ ਏਵ ਹੋਨ੍ਤਿ. ਸਬ੍ਬਾਸਮ੍ਪਤ੍ਤਿਯੋ ਵਿਪਤ੍ਤਿਪਰਿਯੋਸਾਨਾਤਿ ਹਿ ਵੁਤ੍ਤਂ. ਅਵਿਸ੍ਸਾਸਿਕਟ੍ਠੇਨ ਪਰੇ ਏਵ. ਨ ਹਿ ਤੇ ਏਤਂ ਮਮ, ਏਸੋ ਹਮਸ੍ਮਿ, ਏਸੋ ਮੇ ਅਤ੍ਤਾਤਿ ਏਵਂ ਵਿਸ੍ਸਾਸਂ ਅਰਹਨ੍ਤਿ. ਤਥਾ ਵਿਸ੍ਸਾਸਂ ਕਰੋਨ੍ਤਸ੍ਸ ਨਾਨਾਦੁਕ੍ਖੇਹਿ ਨਿਚ੍ਚਂ ਵਿਹਿਂਸਨਤੋ. ਪਟਿਸਨ੍ਧਿਤੋ ਪਟ੍ਠਾਯ ਯਦਾਕਦਾਚਿ ਪਲੁਜ੍ਜਨਧਮ੍ਮਤ੍ਤਾ ਪਲੋਕਧਮ੍ਮਾ ਏਵ. ‘‘ਈਤੀ’’ਤਿ ਅਨ੍ਤਰਾਯੋ ਵੁਚ੍ਚਤਿ. ਖਨ੍ਧਾ ਅਨ੍ਤਰਾਯ ਜਾਤਿਕਾ ਏਵਾਤਿ ਵੁਤ੍ਤਂ ਹੋਤਿ. ਅਜ੍ਝਤ੍ਤਭਾਵਂ ਉਪਗਨ੍ਤ੍ਵਾ ਦੁਤਤ੍ਤਾ ਵਿਬਾਧਕਤ੍ਤਾ ਉਪਦ੍ਦਵਾ ਏਵ. ਭਾਯਿਤਬ੍ਬਤ੍ਤਾ ਭਯਾ ਏਵ. ਅਨਤ੍ਤਾ ਏਵ ਸਮਾਨਾ ਅਜ੍ਝਤ੍ਤਭਾਵਂ ਉਪਗਨ੍ਤ੍ਵਾ ਸਜ੍ਜਨਤੋ ਲਗ੍ਗਨਤੋ ਦੁਮ੍ਮੋ ਚਯਤੋ ਉਪਸਗ੍ਗਾ ਏਵ. ਨਿਚ੍ਚਕਾਲਂ ਲੋਕਧਮ੍ਮੇਹਿ ਚਲਨਤ੍ਤਾ ਵਿਪ੍ਫਨ੍ਦਨਤ੍ਤਾ ਚਲਾਏਵ. ਨਾਨਪ੍ਪਕਾਰੇਨ ਭਞ੍ਜਨਧਮ੍ਮਤ੍ਤਾ ਪਭਙ੍ਗੁਨੋ ਏਵ. ਖਣਮਤ੍ਤਮ੍ਪਿ ਅਥਿਰਤ੍ਤਾ ਅਦ੍ਧੁਵਾ ਏਵ. ਜਰਾਮਰਣਾਦਿਤੋ ਅਪਾਯਵਿਨਿਪਤਨਾਦਿਤੋ ਭਯਤੋ ਤਾਯਤਿ ਰਕ੍ਖਤੀਤਿ ਤਾਣਂ. ਤੇ ਚ ਖਨ੍ਧਾ ਕਸ੍ਸਚਿਤਾਣਾ ਨ ਹੋਨ੍ਤਿ. ਤੇਸਞ੍ਚ ਕਿਞ੍ਚਿਤਾਣਂ ਨਾਮ ਨਤ੍ਥਿ. ਤਸ੍ਮਾ ਅਤਾਣਾ ਏਵ. ਭਯਤੋ ਭੀਰੁਕਾ ਜਨਾ ਲੀਯਨ੍ਤਿ ਨਿਲੀਯਨ੍ਤਿ ਏਤ੍ਥਾਤਿ ਲੇਣਂ. ਤੇ ਚ ਕਸ੍ਸਚਿਲੇਣਾ ਨ ਹੋਨ੍ਤਿ. ਤੇਸਞ੍ਚ ਕਿਞ੍ਚਿਲੇਣਂ ਨਾਮ ਨਤ੍ਥਿ. ਤਸ੍ਮਾ ਅਲੇਣਾ ਏਵ. ਭਯਂ ਸਰਤਿਹਿਂਸਤੀਤਿ ਸਰਣਂ. ਤੇ ਚ ਕਸ੍ਸਚਿਸਰਣਂ ਨ ਹੋਨ੍ਤਿ. ਤੇਸਞ੍ਚ ਕਿਞ੍ਚਿਸਰਣਂ ਨਾਮ ਨਤ੍ਥਿ. ਤਸ੍ਮਾ ਅਸ੍ਸਰਣਾ ਏਵ. ਨਿਚ੍ਚਤਾਦੀਹਿ ਸਬ੍ਬੇਹਿ ਸੋਭਣਗੁਣੇਹਿ ਸਬ੍ਬਸੋ ਰਹਿਤਤ੍ਤਾ ਤੁਚ੍ਛਤ੍ਤਾ ਸੁਞ੍ਞਤ੍ਤਾਰਿਤ੍ਤਾ ਏਵ. ਤੁਚ੍ਛਾ ਏਵ. ਸੁਞ੍ਞਾ ਏਵ. ਅਤ੍ਤਾ ਵੁਚ੍ਚਤਿ ਯਸ੍ਸਕਸ੍ਸਚਿ ਕੋਚਿ ਸਾਰਭੂਤੋ ਪਟਿਸ੍ਸਰਣੋ. ਤੇ ਸਯਞ੍ਚ ਕਸ੍ਸਚਿ ਅਤ੍ਤਾਨ ਹੋਨ੍ਤਿ. ਅਤ੍ਤਨੋ ਚ ਕੋਚਿ ਅਤ੍ਤਾਨਾਮ ਨਤ੍ਥਿ. ਤਸ੍ਮਾ ਅਨਤ੍ਤਾ ਏਵ. ਅਨਿਚ੍ਚਤਾਦੀਹਿ ਆਦੀਨਵੇਹਿ ਦੋਸੇਹਿ ਸਮ੍ਪੁਣ੍ਣਤ੍ਤਾ ਆਦੀਨਵਾ ਏਵ. ਵਿਪਰਿਣਾਮ ਸਭਾਵਤ੍ਤਾ ਵਿਪਰਿਣਾਮਾ ਏਵ. ਸਾਰਭੂਤਸ੍ਸ ਕਸ੍ਸਚਿ ਅਧਿਟ੍ਠਾਨਸ੍ਸ ਅਭਾਵਾ ਅਸਾਰਾਏਵ. ਅਘਸ੍ਸ ਸਬ੍ਬਨਿਰਤ੍ਥਕਸ੍ਸ ਪਤਿਟ੍ਠਾਨਤ੍ਤਾ ਅਘਮੂਲਾ ਏਵ. ਤੇ ਸਯਂ ਮਰਣ ਧਮ੍ਮਸਮਙ੍ਗੀਨੋ ਹੁਤ੍ਵਾ ਤੇਨ ਮਰਣਸਤ੍ਥੇਨ ਮਰਣਾਵੁਧੇਨ ਸਂਸਾਰੇ ਸਤ੍ਤਾਨਂ ਨਿਚ੍ਚਂ ਮਾਰਕਤ੍ਤਾ ਜੀਵਿਤਿਨ੍ਦ੍ਰਿਯੁਪਚ੍ਛੇਦਕਤ੍ਤਾ ਵਧਕਾ ਏਵ. ਨਿਚ੍ਚਸੁਖਹਿਤ ਵੁਡ੍ਢਿਵਿਗਤਤ੍ਤਾ ਵਿਭਵਾ ਏਵ. ਆਸਵੇਹਿ ਪਰਿਗ੍ਗਹਿਤਤ੍ਤਾ ਸਾਸਵਾ ਏਵ. ਨਿਚ੍ਚਕਾਲਂ ਪਚ੍ਚਯਾਯਤ੍ਤਵੁਤ੍ਤਿਕਤ੍ਤਾ ਸਙ੍ਖਤਾ ਏਵ. ਕਿਲੇਸਮਾਰਮਚ੍ਚੁਮਾਰਾਨਂ ਆਮਿਸਾਹਾਰਤ੍ਤਾ ਮਾਰਾਮਿਸਾ ਏਵ. ਅਨਿਚ੍ਛਨ੍ਤਸ੍ਸੇਵ ਸਤੋ ਚਕ੍ਖੁਰੋਗਾਦਿਭਾਵੇਨ ਅਪਾਯਭਵਾਦਿਭਾਵੇਨ ਜਾਤਸਭਾਵਤ੍ਤਾ ਜਾਤਿਧਮ੍ਮਾ ਏਵ. ਅਨਿਚ੍ਛਨ੍ਤਸ੍ਸੇਵ ਸਤੋ ਹਾਯਨਮਰਣਸਭਾਵਤ੍ਤਾ ਜਰਾਮਰਣ ਧਮ੍ਮਾ ਏਵ. ਸੋਕਾਦੀਨਂ ਵਤ੍ਥੁਭਾਵੇਨ ਧਾਰਣਤ੍ਤਾ ਸੋਕਾਦਿ ਧਮ੍ਮਾ ਏਵ. ਤਣ੍ਹਾ ਸਂਕਿਲੇਸ ਦਿਟ੍ਠਿਸਂਕਿਲੇਸ ਦੁਚ੍ਚਰਿਤ ਸਂਕਿਲੇਸੇਹਿ ਨਿਯੁਤ੍ਤਤ੍ਤਾ ਸਂਕਿਲੇਸਿਕ ਧਮ੍ਮਾ ਏਵਾਤਿ. ਤੇਨ ਵੁਤ੍ਤਂ ‘‘ਚਤ੍ਤਾਲੀਸਾਯ ਆਕਾਰੇਹੀ’’ਤਿ. ‘‘ਪਟਿਸਙ੍ਖਾਨਵਸੇਨਾ’’ਤਿ ਪਰਿਵੀਮਂਸਨਵਸੇਨ.‘‘ਨਿਕਨ੍ਤਿਯਾ’’ਤਿ ਨਿਕਨ੍ਤਿਤਣ੍ਹਾਯ. ‘‘ਪਰਿਯਾਦਿਨ੍ਨਾਯਾ’’ਤਿ ਸੁਕ੍ਖਭਾਵਪਤ੍ਤਾਯ. ‘‘ਭਯਞ੍ਚਾ’’ਤਿ ਭਯਞਾਣਵਸੇਨ ਉਪ੍ਪਨ੍ਨਂ ਓਤ੍ਤਪ੍ਪਭਯਞ੍ਚ.

ਲੋਕੇ ਅਤ੍ਤਜੀਵਾ ਨਾਮ ਸਤ੍ਤਾਨਂ ਅਜ੍ਝਤ੍ਤ ਧਮ੍ਮੇਸੁ ਸਾਰਧਮ੍ਮਾ ਹੋਨ੍ਤਿ. ਤੇਸੁ ਵਿਗਤੇਸੁ ਸੇਸਧਮ੍ਮਾ ਨਿਸ੍ਸਤ੍ਤ ਨਿਜ੍ਜੀਵਭਾਵਂ ਪਤ੍ਵਾ ਫੇਗ੍ਗੁਭੂਤਾ ਕਚਵਰਭੂਤਾਤਿ ਲੋਕਸ੍ਸ ਅਭਿਮਾਨੋ. ਤੇ ਚ ਅਤ੍ਤਜੀਵਾ ਨਾਮ ਸਬ੍ਬਸੋ ਨਤ੍ਥੀਤਿ ਦਿਟ੍ਠੇ ਖਨ੍ਧੇਸੁ ਕਚਵਰਭਾਵਦਸ੍ਸਨਂ ਅਤ੍ਤਜੀਵ ਸੁਞ੍ਞਤਾ ਦਸ੍ਸਨਂ ਨਾਮ. ‘‘ਵਿਮੁਚ੍ਚਮਾਨੋ’’ਤਿ ਏਤੇਨ ਵਿਮੁਚ੍ਚਤੀਤਿ ਵਿਮੋਕ੍ਖੋਤਿ ਅਤ੍ਥਂ ਦਸ੍ਸੇਤਿ. ਵਿਮੁਚ੍ਚਨ੍ਤਿ ਏਤੇਨਾਤਿ ਵਿਮੋਕ੍ਖੋਤਿਪਿ ਯੁਜ੍ਜਤਿ. ‘‘ਨਿਮਿਤ੍ਤਾਨੀ’’ਤਿ ਵਿਪਲ੍ਲਾਸਧਮ੍ਮੇਹਿ ਨਿਮ੍ਮਿਤਾਨਿ ਨਿਚ੍ਚਨਿਮਿਤ੍ਤ ਸੁਖਨਿਮਿਤ੍ਤ ਅਤ੍ਤਨਿਮਿਤ੍ਤ ਜੀਵਨਿਮਿਤ੍ਤਾਨਿ. ਸਤ੍ਤ ਪੁਗ੍ਗਲ ਇਤ੍ਥਿ ਪੁਰਿਸ ਹਤ੍ਥ ਪਾਦ ਸੀਸ ਗੀਵਾਦੀਨਿ ਨਿਮਿਤ੍ਤਾਨਿ ਚ. ਤਤ੍ਥ ਸਙ੍ਖਾਰਾਨਂ ਖਣਿਕ ਧਮ੍ਮਤ੍ਤਾ ਅਨਿਚ੍ਚਾਨਂਯੇਵ ਸਤਂ ਸਨ੍ਤਤਿ ਘਨੇਨ ਪਟਿਚ੍ਛਨ੍ਨਤ੍ਤਾ ਹਿਯ੍ਯੋਪਿ ਸੋ ਏਵ, ਅਜ੍ਜਪਿ ਸੋ ਏਵਾਤਿਆਦਿਨਾ ਨਿਚ੍ਚਾਕਾਰੇਨ ਉਪਟ੍ਠਾਨਂ ਨਿਚ੍ਚਨਿਮਿਤ੍ਤਂ ਨਾਮ. ਕਿਲੇਸਮਲੇਹਿ ਪਰਿਗ੍ਗਹਿਤਤ੍ਤਾ ਅਸੁਭਾਨਂਯੇਵ ਸਤਂ ਅਵਿਜ੍ਜਾਯ ਪਟਿਚ੍ਛਨ੍ਨਤ੍ਤਾ ਇਦਂ ਇਟ੍ਠਂ, ਕਨ੍ਤਂ, ਮਨਾਪਂ, ਪਿਯਰੂਪ, ਨ੍ਤਿਆਦਿਨਾ ਸੁਭਾਕਾਰੇਨ ਉਪਟ੍ਠਾਨਂ ਸੁਭਨਿਮਿਤ੍ਤਂ ਨਾਮ. ਭਯਟ੍ਠੇਨ ਅਖੇਮਟ੍ਠੇਨ ਦੁਕ੍ਖਾਨਂਪਿ ਸਤਂ ਤਾਯੇਵ ਪਟਿਚ੍ਛਨ੍ਨਤ੍ਤਾ ਇਦਂ ਸੁਖਂ, ਨਿਬ੍ਭਯਂ, ਖੇਮਂ, ਸਾਤਰੂਪ, ਨ੍ਤਿਆਦਿਨਾ ਸੁਖਾਕਾਰੇਨ ਉਪਟ੍ਠਾਨਂ ਸੁਖਨਿਮਿਤ੍ਤਂ ਨਾਮ. ਪਚ੍ਚਯਾ ਯਤ੍ਤਵੁਤ੍ਤਿਕਤ੍ਤਾ ਪਚ੍ਚਯੇਨ ਵਿਨਾ ਕੇਵਲਂ ਅਤ੍ਤਨੋ ਵਸਾਯਤ੍ਤਵੁਤ੍ਤਿਤਾ ਭਾਵਤੋ ਅਨਤ੍ਤਾਨਂਯੇਵ ਸਤਂ ਅਤ੍ਤਨੋ ਇਚ੍ਛਾਵਸੇਨ ਕਰੋਤਿ, ਕਥੇਤਿ, ਚਿਨ੍ਤੇਤਿ, ਗਨ੍ਤੁਂ ਇਚ੍ਛਨ੍ਤੋ ਗਚ੍ਛਤਿ, ਠਾਤੁਂ ਇਚ੍ਛਨ੍ਤੋ ਤਿਟ੍ਠਤੀ, ਤਿਆਦਿਨਾ ਵਸਵਤ੍ਤਨਾਕਾਰੇਨ ਉਪਟ੍ਠਾਨਂ ਅਤ੍ਤਨਿਮਿਤ੍ਤਂ ਨਾਮ. ਤਥਾ ਸਤ੍ਤੋਨਾਮ ਸਤ੍ਤਾਹਂਪਿ ਜੀਵਤਿ, ਮਾਸਂਪਿ ਜੀਵਤਿ, ਸਂਵਚ੍ਛਰਂਪਿ ਜੀਵਤੀਤਿਆਦਿਨਾ ਜੀਵਾਕਾਰੇਨ ਉਪਟ੍ਠਾਨਂ ਜੀਵਨਿਮਿਤ੍ਤਂ ਨਾਮ. ਨਨੁ ਚੇਤ੍ਥ ਅਤ੍ਤਨੋ ਇਚ੍ਛਾਵਸੇਨ ਕਰੋਤੀਤਿਆਦੀਸੁ ਇਚ੍ਛਾਨਾਮ ਤਣ੍ਹਾਵਾਛਨ੍ਦੋ ਵਾ. ਤਦੁਭਯਮ੍ਪਿ ਚਿਤ੍ਤਸਮ੍ਪਯੁਤ੍ਤਂ. ਕਰਣਞ੍ਚ ਨਾਮ ਕਾਯਿਕਕ੍ਰਿਯਾਭੂਤਾਨਂ ਚਿਤ੍ਤਜਰੂਪਕਲਾਪਾਨਂ ਪਵਤ੍ਤਿਵਿਸੇਸੋ. ਏਵਞ੍ਚਸਤਿ ਤੇਸਂ ਚਿਤ੍ਤਵਸੇਨ ਪਵਤ੍ਤਤ੍ਤਾ ਅਤ੍ਤਨੋ ਇਚ੍ਛਾਵਸੇਨ ਕਰੋਤੀਤਿ ਇਦਂ ਅਭਿਧਮ੍ਮਵਿਰੁਦ੍ਧਂ ਨ ਹੋਤੀਤਿ. ਨ ਨ ਹੋਤਿ. ਅਤ੍ਤਨੋਤਿ ਚ ਕਰੋਤੀਤਿ ਚ ਵੁਤ੍ਤਤ੍ਤਾ. ਨ ਹਿ ਅਤ੍ਤਾਨਾਮ ਅਤ੍ਥਿ, ਯੋ ਅਤ੍ਤਨੋਤਿ ਵੁਚ੍ਚੇਯ੍ਯ. ਨ ਚ ਕਤ੍ਤਾਨਾਮ ਅਤ੍ਥਿ, ਯੋ ਕਰੋਤੀਤਿ ਵੁਚ੍ਚੇਯ੍ਯ. ਇਧ ਪਨ ਤਸ੍ਮਿਂ ਸਮਯੇ ਪਵਤ੍ਤਂ ਖਨ੍ਧਪਞ੍ਚਕਮੇਵ ਅਤ੍ਤਾਤਿ ਚ ਕਤ੍ਤਾਤਿ ਚ ਗਹੇਤ੍ਵਾ ਅਤ੍ਤਨੋਤਿ ਚ ਕਰੋਤੀਤਿ ਚ ਵੁਤ੍ਤਂ. ‘‘ਅਵਸ੍ਸਯੋ ਹੋਤੀ’’ਤਿ ਪਤਿਟ੍ਠਾ ਹੋਤਿ. ‘‘ਵਿਧਮਿਤ੍ਵਾ’’ਤਿ ਞਾਣੇਨ ਅਨ੍ਤਰਧਾਪੇਤ੍ਵਾ. ਸਭਾਵਤੋ ਵਿਜ੍ਜਮਾਨਾਨਿ ਨ ਹੋਨ੍ਤੀਤਿ ਦਸ੍ਸਨਞਾਣੇਨ ਵਿਨਿਚ੍ਛਯਂ ਪਾਪੇਤ੍ਵਾਤਿ ਵੁਤ੍ਤਂ ਹੋਤਿ. ਭਾਵਦਸ੍ਸਨਂ ਨਾਮ ਸੋਕਦੁਕ੍ਖਾਦੀਨਂ ਅਭਾਵਦਸ੍ਸਨਂ.

‘‘ਤਂ ਤਂ ਘਨਵਿਨਿਬ੍ਭੁਜ੍ਜਨਵਸੇਨਾ’’ਤਿ ਸਮੂਹਸਨ੍ਤਤਿ ਘਨਾਦੀਨਂ ਭਿਨ੍ਦਨ ਛਿਨ੍ਦਨਵਸੇਨ. ਤਤ੍ਥ ਸਮੂਹਘਨਭਿਨ੍ਦਨਂ ਆਦਿਤੋ ਧਮ੍ਮਵਵਤ੍ਥਾਨਞਾਣਕਿਚ੍ਚਂ. ਤਦਾ ਅਤ੍ਤਦਿਟ੍ਠਿ ਵਿਕ੍ਖਮ੍ਭਿਤਾ ਹੋਤਿ. ਜੀਵਦਿਟ੍ਠਿ ਚ ਨਾਮ ਸੁਖੁਮਤਰਾ ਅਤ੍ਤਦਿਟ੍ਠਿ ਏਵ ਵੁਚ੍ਚਤਿ. ਮਗ੍ਗਕ੍ਖਣਂ ਪਤ੍ਵਾ ਏਵ ਤਦੁਭਯਂਪਿ ਸਬ੍ਬਸੋ ਸਮੁਚ੍ਛਿਨ੍ਦਤੀਤਿ ਦਟ੍ਠਬ੍ਬਂ. ‘‘ਪਣਿਹਿਤਗੁਣਸ੍ਸਾ’’ਤਿ ਪਤ੍ਥਿਤਗੁਣਸ੍ਸ.

‘‘ਪਾਤਿਮੋਕ੍ਖ’’ਨ੍ਤਿ ਏਤ੍ਥ ‘‘ਪਤੀ’’ਤਿ ਜੇਟ੍ਠਕੋ ਵੁਚ੍ਚਤਿ. ‘‘ਮੁਖਂ’’ਤਿ ਮੂਲਕਾਰਣਂ. ਪਤਿ ਚ ਸੋ ਮੁਖਞ੍ਚਾਤਿ ਪਤਿਮੁਖਂ. ਪਤਿਮੁਖਮੇਵ ਪਾਤਿਮੋਕ੍ਖਨ੍ਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਤਂ ਹੀ’’ਤਿਆਦਿਮਾਹ. ਸਬ੍ਬਲੋਕਿਯਸੀਲਾਨਿ ਨਾਮ ਚਤੁਪਾਰਿਸੁਦ੍ਧਿਸੀਲਾਨਿ. ਤੇਸਂ ਮਜ੍ਝੇ. ‘‘ਜੇਟ੍ਠਕਤ੍ਤਾ’’ਤਿ ਜੇਟ੍ਠਕਸੀਲਤ੍ਤਾ. ‘‘ਤਮੇਵਾ’’ਤਿ ਵਿਨਯਪਞ੍ਞਤ੍ਤਿਸੀਲਮੇਵ +. ‘‘ਯੇਸਂ ਧਮ੍ਮਾਨਂ’’ਤਿ ਉਦ੍ਧਚ੍ਚ ਮੁਟ੍ਠਸ੍ਸਚ੍ਚਾਦਿ ਧਮ੍ਮਾਨਂ. ‘‘ਵਿਪ੍ਫਨ੍ਦਿਤਾਨਿ ਨਾਮਾ’’ਤਿ ਵਿਪ੍ਪਕਿਣ੍ਣਾਨਿ ਨਾਮਾਤਿ ਅਧਿਪ੍ਪਾਯੋ. ਤੇਨਾਹ ‘‘ਲੋਲਾਨਿ ਨਾਮਾ’’ਤਿ. ‘‘ਤਦਨੁਬਨ੍ਧਾ’’ਤਿ ਤਾਨਿਵਿਪ੍ਫਨ੍ਦਿਤਾਨਿ ਇਨ੍ਦ੍ਰਿਯਾਨਿ ਅਨੁਗਤਾ. ‘‘ਬੁਦ੍ਧਪ੍ਪਟਿਕੁਟ੍ਠੇਹੀ’’ਤਿ ਬੁਦ੍ਧੇਨਭਗਵਤਾ ਪਟਿਕ੍ਕੋਸਿਤੇਹਿ ਨੀਵਾਰਿਤੇਹਿ. ‘‘ਮਿਚ੍ਛਾਪਯੋਗੇਹੀ’’ਤਿ ਅਟ੍ਠਕੁਲਦੂਸਨਕਮ੍ਮੇਹਿ ਚੇਵ ਏਕਵੀਸਤਿਅਨੇਸਨਕਮ੍ਮੇਹਿ ਚ. ‘‘ਤਿਵਿਧਕੁਹਨਵਤ੍ਥੂਹੀ’’ਤਿ ਪਚ੍ਚਯਪ੍ਪਟਿਸੇਵਨਞ੍ਚ, ਸਾਮਨ੍ਤਜਪ੍ਪਨਞ੍ਚ, ਇਰਿਯਾ ਪਥ ਸਨ੍ਨਿਸ੍ਸਿਤਞ੍ਚਾਤਿ ਇਮੇਹਿ ਤਿਵਿਧੇਹਿ ਕੁਹਨਵਤ੍ਥੂਹਿ. ਤਿਵਿਧੇਹਿ ਅਚ੍ਛਰਿਯ ਕਮ੍ਮਵਿਧਾਨੇਹੀਤਿ ਵੁਤ੍ਤਂ ਹੋਤਿ. ਪਰਿਸੁਜ੍ਝਤੀਤਿ ਪਰਿਸੁਦ੍ਧਿ. ਪਰਿਸੁਦ੍ਧਿ ਏਵ ਪਾਰਿਸੁਦ੍ਧਿ. ‘‘ਸਮ੍ਮੋਹਸ੍ਸਾ’’ਤਿ ਧਾਤੁਮਨਸਿਕਾਰਾਦੀਸੁ ਸਮ੍ਮੁਯ੍ਹਨਸ੍ਸ. ‘‘ਗੇਧਸ੍ਸਾ’’ਤਿ ਸਮ੍ਮੋਹਤ੍ਤਾਯੇਵ ਪਚ੍ਚਯੇਸੁ ਭਤ੍ਤਨਿਕ੍ਖਿਤ੍ਤਕਾ ਕਸ੍ਸਵਿਯ ਗੇਧਸ੍ਸ, ਅਭਿਕਙ੍ਖਸ੍ਸ. ‘‘ਮਦਸ੍ਸਾ’’ਤਿ ਲਾਭਸਕ੍ਕਾਰਾ ਦਿਮੂਲਕਸ੍ਸ ਮਾਨਮਦਸ੍ਸ. ‘‘ਪਮਾਦਸ੍ਸਾ’’ਤਿ ਕੁਸਲੇਸੁ ਧਮ੍ਮੇਸੁ ਪਮਾਦਸ੍ਸ ਮੁਟ੍ਠਸ੍ਸਚ੍ਚਸ੍ਸ. ਤਂ ਤਂ ਪਯੋਜਨ ਮਰਿਯਾਦੋ ਨਾਮ ਚੀਵਰਪਚ੍ਚਯੇ ਤਾਵ ਸੀਤਪ੍ਪਟਿਘਾਤਾਦਿਕੋ ਪਯੋਜਨਮਰਿਯਾਦੋ. ‘‘ਮਰਿਯਾਦੋ’’ਤਿ ਚ ਯਾਵਦੇਵਾਤਿ ਪਦੇਨ ਦਸ੍ਸਿਤੋ ਸੀਤਪ੍ਪਟਿਘਾਤਾਦਿਕੋ ਚੀਵਰਪ੍ਪਯੋਜਨ ਪਰਿਚ੍ਛੇਦੋ. ਸੋ ਚ ਚੀਵਰਪਚ੍ਚਯੇ ਸਮ੍ਮੋਹਾਦਿਕੇ ਸਾਵਜ੍ਜਪਕ੍ਖੇ ਅਪਤਨਤ੍ਥਾਯ ਠਪਿਤੋ. ਤੇਨ ਵੁਤ੍ਤਂ ‘‘ਸਮ੍ਮੋਹਸ੍ਸ ਗੇਧਸ੍ਸ ਮਦਸ੍ਸ ਪਮਾਦਸ੍ਸ ਪਹਾਨਤ੍ਥਂ’’ਤਿ. ਏਸਨਯੋ ਪਿਣ੍ਡਪਾਤਪਚ੍ਚਯਾਦੀਸੁਪਿ. ਏਤੇਨ ਪਚ੍ਚਵੇਕ੍ਖਨਾਪਾਠੇਸੁ ਅਯਮਤ੍ਥੋ ਦਸ੍ਸਿਤੋ. ਇਧ ਭਿਕ੍ਖੁ ਚੀਵਰਂ ਪਟਿਸੇਵਤਿ ਯਾਵਦੇਵ ਸੀਤਸ੍ਸ ਪਟਿਘਾਤਾਯ ਉਣ੍ਹਸ੍ਸ ਪਟਿਘਾਤਾਯਾਤਿਆਦੀਸੁ ਯਾਵਦੇਵ ਸੀਤਸ੍ਸ ਪਟਿਘਾਤਾਯ ਪਟਿਸੇਵਤਿ. ਨ ਤਤੋ ਉਤ੍ਤਰਿ ਸਮ੍ਮੋਹਤ੍ਥਾਯ ਗੇਧਤ੍ਥਾਯ ਮਦਤ੍ਥਾਯ ਪਮਾਦਤ੍ਥਾਯ ਪਟਿਸੇਵਤੀਤਿਆਦਿ. ਏਵਞ੍ਚਸਤਿ, ਯਂ ਚੀਵਰਂ ਪਟਿਸੇਵਨ੍ਤਸ੍ਸ ਸਮ੍ਮੋਹਗੇਧਮਦਪ੍ਪਮਾਦਾ ਉਪ੍ਪਜ੍ਜਨ੍ਤਿ. ਤਂ ਨ ਸੇਵਿਤਬ੍ਬਂ. ਇਤਰਂ ਸੇਵਿਤਬ੍ਬਨ੍ਤਿ ਦਸ੍ਸਿਤਂ ਹੋਤੀਤਿ.

‘‘ਪਚ੍ਚਤ੍ਤਸਭਾਵੋ’’ਤਿ ਪਚ੍ਚੇਕਸਭਾਵੋ. ‘‘ਕਾਰਿਯਸਙ੍ਖਾਤਂ’’ਤਿ ਕਾਤਬ੍ਬਂ ਅਭਿਨਿਪ੍ਫਾਦੇਤਬ੍ਬਨ੍ਤਿ ਕਾਰਿਯਂ. ਆਸਨ੍ਨਪ੍ਫਲਂ. ਤੇਨਾਹ ‘‘ਅਗ੍ਗਿਸ੍ਸਧੂਮੋਵਿਯਾ’’ਤਿ. ਆਸਨ੍ਨਕਾਰਣਂ ਪਦਟ੍ਠਾਨਂ ਨਾਮ ਅਗ੍ਗਿਕਾਰਕੋ ਵਿਯ. ਪਜ੍ਜਤਿ ਗਚ੍ਛਤਿ ਪਵਤ੍ਤਤਿ ਫਲਂ ਏਤੇਨਾਤਿ ਪਦਂ. ਤਿਟ੍ਠਤਿ ਫਲਂ ਏਤ੍ਥਾਤਿ ਠਾਨਂ. ਉਭਯਂਪਿ ਕਾਰਣ ਪਰਿਯਾਯੋ ਏਵ. ਤੇਨ ਅਤਿਸ੍ਸਯਤ੍ਥੋਪਿ ਸਿਜ੍ਝਤੀਤਿ ਆਹ ‘‘ਆਸਨ੍ਨਕਾਰਣਂ’’ਤਿ. ‘‘ਸਦ੍ਧਿਂ ਸਞ੍ਞਾ ਚਿਤ੍ਤ ਵਿਪਲ੍ਲਾਸੇਹੀ’’ਤਿ ਦਿਟ੍ਠਿਸਮ੍ਪਯੁਤ੍ਤੇਹੀਤਿ ਅਧਿਪ੍ਪਾਯੋ. ਦਿਟ੍ਠਿਵਿਪ੍ਪਯੁਤ੍ਤਾ ਪਨ ਸਞ੍ਞਾ ਚਿਤ੍ਤ ਵਿਪਲ੍ਲਾਸਾ ਵਿਕ੍ਖਮ੍ਭਿਤੁਂ ਸਕ੍ਕੋਤੀਤਿ ਨ ਵਤ੍ਤਬ੍ਬਾ. ‘‘ਸਾਸਨ ਧਮ੍ਮੇ’’ਤਿ ਅਨਤ੍ਤਲਕ੍ਖਣ ਸੁਤ੍ਤਨ੍ਤਾਦਿਕੇ ਸੁਞ੍ਞਤ ਧਮ੍ਮਪ੍ਪਟਿਸਂਯੁਤ੍ਤੇ ਦੇਸਨਾਧਮ੍ਮੇ. ‘‘ਦਿਟ੍ਠਿਵਿਪਲ੍ਲਾਸੋ ਵਿਕ੍ਖਮ੍ਭਿਤੋ’’ਤਿ ਤਾਦਿਸਂ ਧਮ੍ਮਦੇਸਨਂ ਸੁਤ੍ਵਾ ਦੇਸਕੇ ਸਤ੍ਥਰਿ ਚ ਦੇਸਿਤੇ ਧਮ੍ਮੇ ਚ ਸਦ੍ਧਂ ਪਟਿਲਭਿਤ੍ਵਾ ਸਚ੍ਚਮੇਵ ਭਗਵਾ ਆਹ, ਅਹਂ ਪਨ ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾ,ਤਿ ਗਣ੍ਹਾਮਿ, ਮਿਚ੍ਛਾਵਤਾਯਂ ਮਮਗਾਹੋਤਿ ਏਵਂ ਵਿਕ੍ਖਮ੍ਭਿਤੋ ਹੋਤਿ. ਤਤੋ ਪਟ੍ਠਾਯ ਏਸੋ ਮੇ ਅਤ੍ਤਾਤਿ ਵਦਨ੍ਤੋਪਿ ਦਿਟ੍ਠਿਸਮ੍ਪਯੁਤ੍ਤਚਿਤ੍ਤੇਨ ਨ ਵਦਤਿ. ਦਿਟ੍ਠਿਵਿਪ੍ਪਯੁਤ੍ਤਚਿਤ੍ਤੇਨ ਏਵ ਵਦਤੀਤਿ ਅਧਿਪ੍ਪਾਯੋ. ਇਦਮ੍ਪਨ ਦਲ਼੍ਹਗ੍ਗਾਹ ਵਿਕ੍ਖਮ੍ਭਨਮਤ੍ਤਂ ਏਵ. ਨ ਅਤ੍ਤਦਸ੍ਸਨ ਵਿਕ੍ਖਮ੍ਭਨਂ. ਤਂ ਪਨ ਧਮ੍ਮਵਵਤ੍ਥਾਨਞ੍ਞਾਣੇ ਸਿਦ੍ਧੇ ਏਵ ਸਿਜ੍ਝਤੀਤਿਪਿ ਵਦਨ੍ਤਿ. ਚਤੁਨ੍ਨਂ ਆਹਾਰਾਨਂ ਵਸੇਨ ਚਤੁਧਾ ਨਾਮਰੂਪਂ ਪਰਿਗ੍ਗਹੇਤਬ੍ਬਮੇਵ. ਕਸ੍ਮਾ, ਚਤ੍ਤਾਰੋ ਆਹਾਰੇ ਪਰਿਗ੍ਗਹੇਤ੍ਵਾ ਤੇਸ੍ਵੇਵ ਲਕ੍ਖਣਤ੍ਤਯਂ ਸਮਨੁਪਸ੍ਸਨ੍ਤਸ੍ਸ ਅਨ੍ਤੇ ਲੋਕੁਤ੍ਤਰਞ੍ਞਾਣਦਸ੍ਸਨਪ੍ਪਟਿਲਾਭਕਿਚ੍ਚਸ੍ਸ ਸਿਦ੍ਧਤ੍ਤਾਤਿ ਅਧਿਪ੍ਪਾਯੋ. ਪਞ੍ਚਧਾਤਿਆਦੀਸੁ ਏਸਨਯੋ. ਆਦਿਕਮ੍ਮਿਕਾਨਂ ਅਵਿਸਯੋ, ਵਿਸੁਂ ਵਿਸੁਂ ਲਕ੍ਖਣ ਰਸਾਦੀਹਿ ਪਰਿਗ੍ਗਹੇਤੁਂ ਅਸਕ੍ਕੁਣੇਯ੍ਯਤ੍ਤਾ. ਪਰਿਗ੍ਗਹਣੇ ਸਕ੍ਕੋਨ੍ਤਸ੍ਸਪਿ ਵਿਪਸ੍ਸਨਾ ਕਮ੍ਮੇ ਵਿਸੁਂ ਵਿਸੁਂ ਪਸ੍ਸਿਤੁਂ ਅਸਕ੍ਕੁਣੇਯ੍ਯਤ੍ਤਾ ਚ. ਤਥਾਹਿ ਵਕ੍ਖਤਿ ‘‘ਕਲਾਪਵਸੇਨ ਸਂਖਿਪਿਤ੍ਵਾ’’ਤਿ. ‘‘ਅਞ੍ਞਸ੍ਸ ਕਸ੍ਸਚੀ’’ਤਿ ਅਤ੍ਤਜੀਵਾਦਿਕਸ੍ਸ. ਸੋ ਕਰੋਤਿ ਕੁਸਲਾਕੁਸਲਂ ਕਮ੍ਮਂ. ਸੋ ਪਟਿਸਂਵੇਦੇਤਿ ਭਵਨ੍ਤਰਂ ਪਤ੍ਵਾ ਤਬ੍ਬਿਪਾਕਂ. ਸਂਸਰਤਿ ਭਵਤੋ ਭਵਂ. ਸਨ੍ਧਾਵਤਿ ਕਮ੍ਮਵੇਗੇਨ ਖਿਤ੍ਤੋ. ਸੁਦ੍ਧੇ ਨਾਮੇ ਏਵ ਵਾ ਰੂਪੇ ਏਵ ਵਾ ਈਹਾਬ੍ਯਾਪਾਰਾਨਂ ਅਭਾਵਦਸ੍ਸਨਤੋਤਿ ਯੋਜਨਾ. ਪੁਗ੍ਗਲਸਤ੍ਤਾਨਂ ਕ੍ਰਿਯਾਯੋਤਿ ਸਞ੍ਞਿਤਾਤਿ ਵਿਗ੍ਗਹੋ. ‘‘ਅਤ੍ਤਾਤਿ ਪਵਤ੍ਤਾ ਦਿਟ੍ਠੀ’’ਤਿ ਕਾਰਕ ਦਿਟ੍ਠਿ. ‘‘ਤਦਤ੍ਥਾ ਭਿਨਿਵੇਸਵਸੇਨਾ’’ਤਿ ਸਤ੍ਤੋ, ਪੁਗ੍ਗਲੋ, ਤਿਆਦਿ ਵੋਹਾਰਸ੍ਸ ਸਬ੍ਭਾਵਤੋ ਤਸ੍ਸ ਅਤ੍ਥਭੂਤੋ ਸਤ੍ਤਪੁਗ੍ਗਲਾਦਿਕੋਪਿ ਸਭਾਵਤੋ ਅਤ੍ਥਿਯੇਵ. ਨੋ ਨਤ੍ਥੀਤਿ ਏਵਂ ਦਲ਼੍ਹਂ ਹਦਯੇ ਸਨ੍ਨਿਧਾਨਕਰਣ ਵਸੇਨ. ‘‘ਅਤਿਧਾਵਨਞ੍ਚਾ’’ਤਿ ਵੋਹਾਰ ਪਞ੍ਞਤ੍ਤਿਮਤ੍ਤੇ ਅਟ੍ਠਤ੍ਵਾ ਤਂ ਅਤਿਕ੍ਕਮਿਤ੍ਵਾ ਪਞ੍ਚਕ੍ਖਨ੍ਧੇ ਸਤ੍ਤਾਦਿਭਾਵੇਨ ਗਹਣਞ੍ਚਾਤਿ ਅਧਿਪ੍ਪਾਯੋ.

‘‘ਕਮ੍ਮਚਿਤ੍ਤੋਤੁਕਾਹਾਰਵਸੇਨਾ’’ਤਿ ਏਤ੍ਥ ਕਕਾਰੋ ਸਨ੍ਧਿ ਵਸੇਨ ਆਗਮੋ. ਕਮ੍ਮਵਸੇਨ ਚਿਤ੍ਤਵਸੇਨ ਉਤੁਵਸੇਨ ਆਹਾਰਵਸੇਨਾਤਿ ਅਤ੍ਥੋ. ਅਨੁਰੂਪਾਨਂ ਪਚ੍ਚਯਾਨਂ ਸਾਮਗ੍ਗੀਤਿ ਵਿਗ੍ਗਹੋ. ‘‘ਅਞ੍ਞਥਾ ਪਵਤ੍ਤਿਯਾ’’ਤਿ ਅਞ੍ਞੇਨ ਪਕਾਰੇਨ ਪਵਤ੍ਤਨਸ੍ਸ. ‘‘ਹੇਤੁਸਮ੍ਭਾਰਪਚ੍ਚਯੇਹੀ’’ਤਿ ਹੇਤੁਪਚ੍ਚਯ ਸਮ੍ਭਾਰਪਚ੍ਚਯੇਹਿ. ਜਨਕ ਪਚ੍ਚਯਾ ਹੇਤੁਪਚ੍ਚਯਾ ਨਾਮ. ਪਰਿਵਾਰਪਚ੍ਚਯਾ ਸਮ੍ਭਾਰਪਚ੍ਚਯਾ ਨਾਮ. ‘‘ਕਮ੍ਮਪ੍ਪਵਤ੍ਤਿਯਾ’’ਤਿ ਕਮ੍ਮਪ੍ਪਵਤ੍ਤਿਤੋ. ‘‘ਵਿਪਾਕਪ੍ਪਵਤ੍ਤਿਯਾ’’ਤਿ ਵਿਪਾਕਪ੍ਪਵਤ੍ਤਿਤੋ. ਏਕਸ੍ਸ ਸਤ੍ਤਸ੍ਸ ਅਨਮਤਗ੍ਗੇ ਸਂਸਾਰੇ ਸਂਸਰਨ੍ਤਸ੍ਸ ਰੂਪਕਾਯੋਪਿ ਅਤ੍ਥਿ ਨਾਮਕਾਯੋਪਿ ਅਤ੍ਥਿ. ਤਤੋ ਅਞ੍ਞੋ ਕੋਚਿਸਭਾਵੋ ਨਾਮ ਨਤ੍ਥਿ. ਦ੍ਵੇ ਚ ਕਾਯਾ ਪਞ੍ਚਵੋਕਾਰੇ ਸਂਸਰਨ੍ਤਸ੍ਸ ਏਕਤੋ ਪਵਤ੍ਤਨ੍ਤਿ. ਅਸਞ੍ਞਸਤ੍ਤੇ ਸਂਸਰਨ੍ਤਸ੍ਸ ਰੂਪਕਾਯੋ ਏਵ ਪਵਤ੍ਤਤਿ. ਸੋ ਏਵ ਤਤ੍ਥ ਏਕੋਸਤ੍ਤੋਤਿ ਸਙ੍ਖ੍ਯਂ ਗਚ੍ਛਤਿ. ਅਰੂਪੇ ਸਂਸਰਨ੍ਤਸ੍ਸ ਨਾਮ ਕਾਯੋ ਏਵ ਪਵਤ੍ਤਤਿ. ਸੋ ਏਵ ਤਤ੍ਥ ਏਕੋ ਸਤ੍ਤੋਤਿ ਸਙ੍ਖ੍ਯਂ ਗਚ੍ਛਤਿ. ‘‘ਸਙ੍ਖ੍ਯਂ ਗਚ੍ਛਤੀ’’ਤਿ ਚ ਪਞ੍ਞਤ੍ਤਿਮਤ੍ਤਂ ਗਚ੍ਛਤੀਤਿ ਅਧਿਪ੍ਪਾਯੋ. ਤੇਸੁ ਚ ਕਾਯੇਸੁ ਰੂਪਕਾਯੇ ਚੁਤਿ ਪਟਿਸਨ੍ਧੀਨਂ ਅਞ੍ਞਮਞ੍ਞਂ ਅਨਨ੍ਤਰ ਪਚ੍ਚਯਤਾ ਨਾਮ ਨਤ੍ਥਿ. ਏਕਮੇਕਸ੍ਮਿਂ ਭਵੇ ਏਕਮੇਕੋ ਹੁਤ੍ਵਾ ਚੁਤਿਕਾਲੇ ਭਿਜ੍ਜਤਿ. ਰੂਪਸਨ੍ਤਤਿ ਛਿਜ੍ਜਤਿ. ਪਟਿਸਨ੍ਧਿਰੂਪੇਨ ਸਹ ਪਚ੍ਚਯ ਪਚ੍ਚਯੁਪ੍ਪਨ੍ਨਤਾ ਪਬਨ੍ਧੋ ਨਪ੍ਪਵਤ੍ਤਤਿ. ਨਾਮ ਕਾਯੇ ਪਨ ਚੁਤਿ ਪਟਿਸਨ੍ਧੀਨਂ ਅਞ੍ਞਮਞ੍ਞਂ ਅਨਨ੍ਤਰਪਚ੍ਚਯਤਾ ਅਤ੍ਥਿ. ਚੁਤਿਕਾਲੇਪਿ ਨਾਮਸਨ੍ਤਤਿ ਨ ਛਿਜ੍ਜਤਿ. ਪਟਿਸਨ੍ਧਿ ਨਾਮੇਨ ਸਹ ਪਚ੍ਚਯ ਪਚ੍ਚਯੁਪ੍ਪਨ੍ਨਤਾ ਪਬਨ੍ਧੋ ਪਵਤ੍ਤਤਿਯੇਵ. ਤਤ੍ਥ ਪਟਿਚ੍ਚਸਮੁਪ੍ਪਾਦ ਕੁਸਲੋ ਭਿਕ੍ਖੁ ਪਟਿਚ੍ਚਸਮੁਪ੍ਪਾਦਞ੍ਞਾਣੇ ਠਤ੍ਵਾ ਏਕਸ੍ਮਿਂਭਵੇ ਏਕਸ੍ਸ ਸਤ੍ਤਸ੍ਸ ਪਵਤ੍ਤਿਂ ਪਸ੍ਸਨ੍ਤੋ ਸਤ੍ਤਂ ਨਾਮ ਨ ਪਸ੍ਸਤਿ. ਪੁਗ੍ਗਲਂ ਨਾਮ ਨ ਪਸ੍ਸਤਿ. ਅਹਨ੍ਤਿਪਿ ਨ ਪਸ੍ਸਤਿ. ਪਰੋਤਿਪਿ ਨ ਪਸ੍ਸਤਿ. ਅਹਂ ਅਤੀਤੇਸੁ ਭਵੇਸੁ ਅਹੋਸਿਨ੍ਤਿਪਿ ਨ ਪਸ੍ਸਤਿ. ਇਮਸ੍ਮਿਂਭਵੇ ਅਸ੍ਮੀਤਿਪਿ ਨ ਪਸ੍ਸਤਿ. ਅਨਾਗਤੇਸੁ ਭਵਿਸ੍ਸਾਮੀਤਿਪਿ ਨ ਪਸ੍ਸਤਿ. ਅਥ ਖੋ ਅਵਿਜ੍ਜਾ ਪਚ੍ਚਯਾ ਸਙ੍ਖਾਰਾ ਪਵਤ੍ਤਨ੍ਤਿ. ਸਙ੍ਖਾਰ ਪਚ੍ਚਯਾ ਭਵਨ੍ਤਰੇ ਵਿਞ੍ਞਾਣਂ ਪਵਤ੍ਤਤੀਤਿਆਦਿਨਾ ਨਯੇਨ ਨਾਮਰੂਪ ਧਮ੍ਮਾਨਂ ਹੇਤੁਫਲ ਪਰਮ੍ਪਰਾਵਸੇਨ ਅਵਿਚ੍ਛੇਦਪ੍ਪਵਤ੍ਤਿਮੇਵ ਪਸ੍ਸਤਿ. ਏਕਸ੍ਮਿਂਭਵੇ ਪਵਤ੍ਤਿਂ ਪਸ੍ਸਨ੍ਤੇ ਸਤਿ, ਅਨਮਤਗ੍ਗੇਸਂਸਾਰੇ ਅਨਨ੍ਤੇਸੁ ਭਵੇਸੁ ਤਸ੍ਸ ਸਤ੍ਤਸ੍ਸ ਪਵਤ੍ਤਿ ਦਿਟ੍ਠਾ ਏਵ ਹੋਤਿ ਤਤ੍ਥਪਿ ਏਵਮੇਵ, ਤਤ੍ਥਪਿ ਏਵਮੇਵਾਤਿ. ਤਦਾ ਤਸ੍ਸ ਸੋਲ਼ਸਵਿਧਾ ਕਙ੍ਖਾ ਪਹੀਯਤੀਤਿ ਇਮਮਤ੍ਥਂ ‘‘ਦਸ੍ਸੇਨ੍ਤੋ ਅਨਮਤਗ੍ਗੇ ਸਂਸਾਰੇ’’ਤਿਆਦਿਮਾਹ. ਤਤ੍ਥ ਕਤਮਾ ਸੋਲ਼ਸਵਿਧਾ ਕਙ੍ਖਾਤਿ. ਅਹੋਸਿਂ ਨੁ ਖੋ ਅਹਂ ਅਤੀਤਮਦ੍ਧਾਨਂ. ਨ ਨੁ ਖੋ ਅਹੋਸਿਂ. ਕਿਂ ਨੁ ਖੋ ਅਹੋਸਿਂ. ਕਥਂ ਨੁ ਖੋ ਅਹੋਸਿਂ. ਕਿਂ ਹੁਤ੍ਵਾ ਕਿਂ ਅਹੋਸਿਂ ਨੁ ਖੋ ਅਹਂ ਅਤੀਤਮਦ੍ਧਾਨਨ੍ਤਿ ਏਵਂ ਪੁਬ੍ਬਨ੍ਤੇ ਪਞ੍ਚਵਿਧਾ ਕਙ੍ਖਾਵੁਤ੍ਤਾ. ਭਵਿਸ੍ਸਾਮਿ ਨੁ ਖੋ ਅਹਂ ਅਨਾਗਤਮਦ੍ਧਾਨਂ. ਨ ਨੁ ਖੋ ਭਵਿਸ੍ਸਾਮਿ. ਕਿਂ ਨੁ ਖੋ ਭਵਿਸ੍ਸਾਮਿ. ਕਥਂ ਨੁ ਖੋ ਭਵਿਸ੍ਸਾਮਿ. ਕਿਂ ਹੁਤ੍ਵਾ ਕਿਂ ਭਵਿਸ੍ਸਾਮਿ ਨੁ ਖੋ ਅਹਂ ਅਨਾਗਤਮਦ੍ਧਾਨਨ੍ਤਿ ਏਵਂ ਅਪਰਨ੍ਤੇ ਪਞ੍ਚਵਿਧਾ ਕਙ੍ਖਾ ਵੁਤ੍ਤਾ. ਅਹਂ ਨੁ ਖੋ ਸ੍ਮਿ. ਨੋ ਨੁ ਖੋ ਸ੍ਮਿ. ਕਿਨ੍ਨੁ ਖੋ ਸ੍ਮਿ. ਕਥਂ ਨੁ ਖੋ ਸ੍ਮਿ. ਅਹਂ ਨੁ ਖੋ ਸਤ੍ਤੋ ਕੁਤੋ ਆਗਤੋ. ਸੋ ਕੁਹਿਂ ਗਾਮੀ ਭਵਿਸ੍ਸਾਮੀਤਿ ਏਵਂ ਪਚ੍ਚੁਪ੍ਪਨ੍ਨੇ ਛਬ੍ਬਿਧਾ ਕਙ੍ਖਾ ਵੁਤ੍ਤਾ. ਇਮਾ ਸੋਲ਼ਸਵਿਧਾ ਕਙ੍ਖਾਤਿ. ਤਤ੍ਥ ਅਹੋਸਿਂ ਨੁ ਖੋ, ਨ ਨੁ ਖੋ ਅਹੋਸਿਨ੍ਤਿ ਇਮਿਨਾ ਪਦਦ੍ਵਯੇਨ ਅਤੀਤਕਾਲੇ ਅਤ੍ਤਨੋ ਅਤ੍ਥਿ ਨਤ੍ਥਿਭਾਵੇ ਕਙ੍ਖਤਿ. ਸਚੇ ਅਤ੍ਥਿ, ਕਿਂ ਨੁ ਖੋ ਅਹੋਸਿਨ੍ਤਿ ਕਙ੍ਖਤਿ. ਕੇਨਚਿ ਹੇਤੁਨਾ ਪਚ੍ਚਯੇਨ ਵਾ ਅਹੋਸਿਂ. ਕੇਨਚਿ ਇਦ੍ਧਿਮਨ੍ਤੇਨ ਵਾ ਨਿਮ੍ਮਿਤੋ ਅਹੋਸਿਂ. ਅਹੇਤੁ ਅਪਚ੍ਚਯਾ ਵਾ ਅਨਿਮ੍ਮਿਤੋ ਵਾ ਸਯਂਜਾਤੋ ਅਹੋਸਿਨ੍ਤਿ ਅਤ੍ਥੋ. ਯਦਿ ਤੇਸੁਪਕਾਰੇਸੁ ਅਞ੍ਞਤਰੇਨ ਅਹੋਸਿਂ. ਕਥਂ ਨੁ ਖੋ ਅਹੋਸਿਂ. ਅਪਾਦਕੋਵਾ ਅਹੋਸਿਂ. ਦ੍ਵਿਪਾਦਕੋ ਵਾ. ਚਤੁਪ੍ਪਾਦਕੋਵਾ. ਬਹੁਪ੍ਪਾਦਕੋਵਾ. ਰੂਪੀਵਾ. ਅਰੂਪੀਵਾ. ਸਞ੍ਞੀਵਾ. ਅਸਞ੍ਞੀਵਾ ਇਚ੍ਚਾਦਿ. ਅਥ ਤੇਸੁ ਅਪਾਦਕਾਦੀਸੁ ਅਞ੍ਞਤਰੋ ਅਹਂ ਅਹੋਸਿਂ. ਕਿਂ ਹੁਤ੍ਵਾ ਕਿਂ ਅਹੋਸਿਂ. ਪਥਮਭਵੇ ਕਿਂ ਹੁਤ੍ਵਾ ਦੁਤੀਯ ਭਵਾਦੀਸੁ ਕਿਂ ਅਹੋਸਿਨ੍ਤਿ ਇਦਂ ਭਵਪਰਮ੍ਪਰਾਵਸੇਨ ਵੁਤ੍ਤਂ. ਏਸਨਯੋ ਅਪਰਨ੍ਤੇਪਿ. ਪਚ੍ਚੁਪ੍ਪਨ੍ਨੇ ‘‘ਅਹਂ ਨੁ ਖੋ ਸ੍ਮਿ, ਨੋ ਨੁ ਖੋ ਸ੍ਮੀ’’ਤਿ ਯਥਾ ਖੁਦ੍ਦਕਵਤ੍ਥੁ ਵਿਭਙ੍ਗੇ ਅਟ੍ਠਸਤਤਣ੍ਹਾਵਿਚਰਿਤੇਸੁ. ਸਤਸ੍ਮੀਤਿ ਹੋਤਿ. ਸੀਤਸ੍ਮੀਤਿ ਹੋਤੀਤਿ ਵੁਤ੍ਤਂ. ਤਤ੍ਥ ‘‘ਸਤਸ੍ਮੀ’’ਤਿ ਅਹਂ ਸਸ੍ਸਤੋ ਵਾ ਭਵਾਮਿ. ‘‘ਸੀਤਸ੍ਮੀ’’ਤਿ ਅਹਂ ਉਚ੍ਛਿਨ੍ਨੋਵਾ ਭਵਾਮੀਤਿ ਅਤ੍ਥੋ. ਯਥਾ ਚ. ਅਤ੍ਥੀਤਿ ਖੋ ਏਕੋ ਅਨ੍ਤੋ. ਨਤ੍ਥੀਤਿ ਖੋ ਦੁਤੀਯੋ ਅਨ੍ਤੋਤਿ ਵੁਤ੍ਤਂ. ਤਤ੍ਥ ‘‘ਅਤ੍ਥੀ’’ਤਿ ਅਤ੍ਤਾਨਾਮ ਭਵਾਭਵੇਸੁ ਨਿਚ੍ਚਕਾਲਂ ਅਤ੍ਥਿ. ‘‘ਨਤ੍ਥੀ’’ਤਿ ਤਥਾ ਨਤ੍ਥਿ, ਉਚ੍ਛਿਜ੍ਜਤਿ. ਨ ਹੋਤਿ ਪਰਮ੍ਮਰਣਾਤਿ ਅਤ੍ਥੋ. ਤਥਾ ਇਧਾਪਿ ਅਹਂ ਨੁ ਖੋ ਸ੍ਮਿ. ਨੋ ਨੁ ਖੋ ਸ੍ਮੀਤਿ ਕਙ੍ਖਤਿ. ਤਤ੍ਥ ‘‘ਅਹਂ ਨੁ ਖੋਸ੍ਮੀ’’ਤਿ ਅਯਂ ਅਹਂ ਨਾਮ ਭਵਾਭਵੇਸੁ ਨਿਚ੍ਚਕਾਲਂ ਅਸ੍ਮਿ ਨੁ ਖੋ, ਮਮ ਅਤ੍ਤਾਨਾਮ ਸਸ੍ਸਤੋ ਹੁਤ੍ਵਾ ਸਬ੍ਬਕਾਲਂ ਅਤ੍ਥਿ ਨੁ ਖੋਤਿ ਵੁਤ੍ਤਂ ਹੋਤਿ. ‘‘ਨੋ ਨੁ ਖੋ ਸ੍ਮੀ’’ਤਿ ਤਥਾ ਨੋ ਅਸ੍ਮਿ ਨੁ ਖੋ. ਮਮ ਅਤ੍ਤਾ ਤਥਾ ਨਤ੍ਥਿ ਨੁ ਖੋਤਿ ਅਤ੍ਥੋ. ਏਤ੍ਥ ਚ ‘‘ਭਵਾਭਵੇਸੂ’’ਤਿ ਪਵਤ੍ਤੇਪਿ ਪਚ੍ਚੁਪ੍ਪਨ੍ਨੇ ਵਤ੍ਤਮਾਨਂ ਅਤ੍ਤਾਨਂ ਗਹੇਤ੍ਵਾ ਪਵਤ੍ਤਾ ਪਚ੍ਚੁਪ੍ਪਨ੍ਨੇ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ‘‘ਕਿਂ ਨੁ ਖੋ ਸ੍ਮੀ’’ਤਿ ਅਹਂ ਨਾਮ ਸਨ੍ਤੋ ਜਾਤੋ ਕਿਂ ਨੁ ਖੋ ਅਸ੍ਮਿ. ਕੇਨਚਿ ਹੇਤੁਨਾ ਪਚ੍ਚਯੇਨ ਵਾ ਅਸ੍ਮਿ ਨੁ ਖੋ. ਕੇਨਚਿ ਇਦ੍ਧਿਮਨ੍ਤੇਨ ਵਾ ਨਿਮ੍ਮਿਤੋ ਭਵਾਮਿ ਨੁ ਖੋ. ਉਦਾਹੁ ਅਹੇਤੁ ਅਪਚ੍ਚਯਾ ਵਾ ਕੇਨਚਿ ਅਨਿਮ੍ਮਿਤੋ ਵਾ ਸਯਂ ਨੁ ਖੋ ਭਵਾਮਿ ਨੁ ਖੋਤਿ ਅਤ੍ਥੋ. ‘‘ਕਥਂ ਨੁ ਖੋ ਸ੍ਮੀ’’ਤਿ ਏਤ੍ਥ ਪਨ ਅਪਦਾਦੀਹਿ ਅਯੋਜੇਤ੍ਵਾ ਅਹਂ ਨੁ ਖੋ ਕਿਂ ਗੋਤ੍ਤੋ ਭਵਾਮਿ. ਗੋਤਮਗੋਤ੍ਤੋ ਵਾ ਵਾਸੇਟ੍ਠ ਗੋਤ੍ਤੋ ਵਾ ਤਿਆਦਿਨਾ ਯੋਜੇਤਬ੍ਬਂ. ਆਦਿ ਕਪ੍ਪਕਾਲੇ ਤਾਨਿ ਗੋਤ੍ਤਾਨਿ ਏਤਰਹਿ ਸਮ੍ਭੇਦਂ ਗਚ੍ਛਨ੍ਤਿ. ਤਸ੍ਮਾ ਤੇਸੁ ਕਙ੍ਖਨ੍ਤੋ ਕਙ੍ਖਤਿਯੇਵ. ‘‘ਅਹਂ ਕੁਤੋ ਆਗਤੋ’’ਤਿ ਅਹਂ ਅਤੀਤੇ ਕੁਤੋਭਵਤੋ ਆਗਤੋ ਅਸ੍ਮਿ. ‘‘ਸੋਕੁਹਿਂਗਾਮੀ ਭਵਿਸ੍ਸਾਮੀ’’ਤਿ ਸੋ ਅਹਂ ਆਯਤਿਂ ਭਵੇ ਕੁਹਿਂ ਗਾਮਿਕੋ ਭਵਿਸ੍ਸਾਮੀਤਿ ਕਙ੍ਖਤਿ. ‘‘ਕਙ੍ਖਾਯ ਅਤਿਕ੍ਕਮੋ’’ਤਿ ਸੋ ਭਿਕ੍ਖੁ ਪਟਿਚ੍ਚਸਮੁਪ੍ਪਾਦੇ ਅਵਿਜ੍ਜਾਦਿਕਂ ਅਤੀਤਹੇਤੁ ਪਞ੍ਚਕਂ ਪਸ੍ਸਨ੍ਤੋ ਤਸ੍ਮਿਂਭਵੇ ਸਬ੍ਬਂਪਿ ਪਟਿਚ੍ਚਸਮੁਪ੍ਪਾਦਂ ਪਸ੍ਸਤਿਯੇਵ. ਏਵਂ ਪਸ੍ਸਨ੍ਤੋ ਨ ਤਤ੍ਥ ਅਹਂ ਨਾਮ ਕੋਚਿ ਅਤ੍ਥਿ, ਯਂ ਪਟਿਚ੍ਚ ਅਤੀਤ ਵਿਸਯਾ ਪਞ੍ਚਵਿਧਾ ਕਙ੍ਖਾ ਉਪ੍ਪਜ੍ਜਤਿ. ਧਮ੍ਮ ਮਤ੍ਤਮੇਵ ਤਤ੍ਥ ਅਤ੍ਥੀਤਿ ਏਵਂ ਅਤੀਤੇ ਕਙ੍ਖਾ ਵਤ੍ਥੁਸ੍ਸ ਅਭਾਵਦਸ੍ਸਨੇਨ ਪਞ੍ਚਵਿਧਾਯ ਕਙ੍ਖਾਯ ਅਤਿਕ੍ਕਮੋ ਹੋਤਿ. ਨਨੁ ਤਥਾ ਪਸ੍ਸਨ੍ਤਸ੍ਸਪਿ ਕਥਂ ਨੁ ਖੋ ਸ੍ਮਿ, ਕਿਂ ਹੁਤ੍ਵਾ ਕਿਂ ਅਹੋਸਿਂ ਨੁ ਖੋਤਿ ਅਯਂ ਕਙ੍ਖਾ ਅਤ੍ਥਿਯੇਵ. ਤਥਾ ਪਸ੍ਸਨ੍ਤੋਪਿ ਹਿ ਵਿਨਾ ਪੁਬ੍ਬੇਨਿਵਾਸਞ੍ਞਾਣੇਨ ਅਤੀਤੇ ਭਵੇ ਅਹਂ ਦ੍ਵਿਪਾਦਕੋ ਅਹੋਸਿਨ੍ਤਿਵਾ ਚਤੁਪ੍ਪਾਦਕੋ ਅਹੋਸਿਨ੍ਤਿ ਵਾ ਤਤੋ ਚੁਤੋ ਅਸੁਕਭਵੇ ਉਪ੍ਪਨ੍ਨੋਤਿ ਵਾ ਨ ਜਾਨਾਤਿ ਨ ਪਸ੍ਸਤੀਤਿ. ਵੁਚ੍ਚਤੇ. ਸਾ ਪਨ ਕਙ੍ਖਾ ਧਮ੍ਮ ਮਤ੍ਤਪ੍ਪਵਤ੍ਤਿ ਦਸ੍ਸਨਤੋ ਪਟ੍ਠਾਯ ਅਨ੍ਤਰਾਯਿਕ ਕਙ੍ਖਾ ਨ ਹੋਤਿ. ਵਿਚਿਕਿਚ੍ਛਾ ਪਟਿਰੂਪਿਕਾ ਏਵ. ਸਾ ਹਿ ਅਰਿਯਾਨਂਪਿ ਲਬ੍ਭਤਿ ਯੇਵਾਤਿ. ਤਥਾ ਅਨਾਗਤੇ ਫਲਪਞ੍ਚਕਂ ਪਸ੍ਸਨ੍ਤੋ ਅਪਰਨ੍ਤੇ ਪਞ੍ਚਵਿਧਂ ਕਙ੍ਖਂ ਅਤਿਕ੍ਕਮਤਿ. ਪਚ੍ਚੁਪ੍ਪਨ੍ਨੇ ਫਲਪਞ੍ਚਕਞ੍ਚ ਹੇਤੁਪਞ੍ਚਕਞ੍ਚ ਪਸ੍ਸਨ੍ਤੋ ਪਚ੍ਚੁਪ੍ਪਨ੍ਨੇ ਕਙ੍ਖਾ ਛਕ੍ਕਂ ਅਤਿਕ੍ਕਮਤਿ. ਸੇਸਂ ਸਬ੍ਬਂ ਪੁਬ੍ਬਨ੍ਤੇ ਵੁਤ੍ਤਨਯਮੇਵਾਤਿ. ਅਟ੍ਠਵਿਧਾਯ ਕਙ੍ਖਾਯ ਅਤਿਕ੍ਕਮਨੇ ਪਨ ਪਟਿਚ੍ਚਸਮੁਪ੍ਪਾਦਂ ਅਨੁਲੋਮਪ੍ਪਟਿਲੋਮਂ ਪਸ੍ਸਨ੍ਤੋ ਦੇਸਨਾ ਧਮ੍ਮੇ ਚ ਲੋਕੁਤ੍ਤਰ ਧਮ੍ਮੇਸੁ ਚ ਕਙ੍ਖਂ ਅਤਿਕ੍ਕਮਤਿ. ਧਮ੍ਮੇ ਕਙ੍ਖਾਤਿਕ੍ਕਮਨੇਨ ਸਹੇਵ ਦੇਸੇਨ੍ਤੇ ਸਤ੍ਥਰਿ ਚ, ਯਥਾਨੁਸਿਟ੍ਠਂ ਪਟਿਪਨ੍ਨੇ ਸਙ੍ਘੇ ਚ, ਤੀਸੁ ਸਿਕ੍ਖਾਸੁ ਚ, ਯਥਾਵੁਤ੍ਤੇ ਪੁਬ੍ਬਨ੍ਤੇ ਚ, ਅਪਰਨ੍ਤੇ ਚ, ਪੁਬ੍ਬਨ੍ਤਾ ਪਰਨ੍ਤੇਸੁ ਚ, ਪਟਿਚ੍ਚਸਮੁਪ੍ਪਾਦੇਨ ਸਹ ਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਚ ਸਬ੍ਬਂ ਕਙ੍ਖਂ ਅਤਿਕ੍ਕਮਤਿਯੇਵ. ਤੇਨਾਹ ‘‘ਸਭਾਵ ਧਮ੍ਮਪ੍ਪਵਤ੍ਤਿਯਾ’’ਤਿਆਦਿਂ. ਤਤ੍ਥ ‘‘ਸਭਾਵਧਮ੍ਮਪ੍ਪਵਤ੍ਤਿਯਾ ਚਾ’’ਤਿ ਪਚ੍ਚਯਪਰਮ੍ਪਰਾਵਸੇਨ ਸਭਾਵਧਮ੍ਮਾਨਂ ਪਰਮ੍ਪਰਪ੍ਪਵਤ੍ਤਿਯਾ ਚ. ਧਮ੍ਮਸੁ ਧਮ੍ਮਤਾ ਨਾਮ ਦੇਸਨਾ ਧਮ੍ਮਸ੍ਸ ਸ੍ਵਾਕ੍ਖਾਤਤਾਦਿਭਾਵੇਨ ਸੁਨ੍ਦਰ ਧਮ੍ਮਤਾ. ਅਨਵਜ੍ਜਧਮ੍ਮਤਾ. ਬੁਦ੍ਧਸੁਬੁਦ੍ਧਤਾ ਨਾਮ ਤਂ ਧਮ੍ਮਂ ਦੇਸੇਨ੍ਤਸ੍ਸ ਬੁਦ੍ਧਸ੍ਸ ਸਬ੍ਬਞ੍ਞੁਬੁਦ੍ਧਤਾ.

ਪਰਿਯੁਟ੍ਠਿਤਾਨਂ ਦਿਟ੍ਠਿਵਿਚਿਕਿਚ੍ਛਾਨਂ ਵਿਕ੍ਖਮ੍ਭਨਂ ਨਾਮ ਹੇਟ੍ਠਾ ਧਮ੍ਮਵਵਤ੍ਥਾਨ ਵਸੇਨ ਪਚ੍ਚਯਪਰਿਗ੍ਗਹਵਸੇਨ ਚ ਸਿਜ੍ਝਤਿ. ਵਿਪਸ੍ਸਨਾ ਕਮ੍ਮਂ ਪਨ ਅਨੁਸਯਭੂਤਾਨਂ ਦਿਟ੍ਠਿਵਿਚਿਕਿਚ੍ਛਾਨਂ ਸਲ੍ਲਿਖਨਤ੍ਥਾਯ ਕਰੀਯਤੀਤਿ ਵੁਤ੍ਤਂ ‘‘ਅਨੁਸਯ ਸਮੂਹਨਨਤ੍ਥਞ੍ਚਾ’’ਤਿਆਦਿ. ‘‘ਤਤ੍ਥ ਪਨਾ’’ਤਿ ਤਸ੍ਮਿਂ ਪਟਿਸਮ੍ਭਿਦਾ ਮਗ੍ਗੇ ਪਨ. ਵਿਭਤ੍ਤੇਸੂਤਿ ਪਾਠਸੇਸੋ. ‘‘ਯਸ੍ਸਾ’’ਤਿ ਯੋਗੀ ਪੁਗ੍ਗਲਸ੍ਸ. ‘‘ਯਂ ਦੂਰੇ ਸਨ੍ਤਿਕੇਵਾ’’ਤਿ ਯਂ ਦੂਰੇ ਪਵਤ੍ਤਂ ਰੂਪਂ ਵਾ, ਸਨ੍ਤਿਕੇ ਪਵਤ੍ਤਂ ਰੂਪਂਵਾਤਿ ਪਾਠਸੇਸੋ. ‘‘ਤਦਤ੍ਥਸ੍ਸ ਪਨਾ’’ਤਿ ਸਮ੍ਮਸਿਤਧਮ੍ਮੁਦ੍ਧਾਰਤ੍ਥਸ੍ਸ. ‘‘ਞਾਣੇਨ ਦਲ਼੍ਹਂ ਗਹੇਤ੍ਵਾ’’ਤਿ ਧਮ੍ਮਵਵਤ੍ਥਾਨਞ੍ਞਾਣੇਨ ਸੁਟ੍ਠੁਵਿਭੂਤਂ ਕਤ੍ਵਾਤਿ ਅਧਿਪ੍ਪਾਯੋ. ਇਦਾਨਿ ਯਂ ਯਂ ਦਲ਼੍ਹਂ ਗਹੇਤਬ੍ਬਂ. ਤਂ ਤਂ ਸਰੂਪਤੋ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿਮਾਹ. ਪੁਨ ਦਲ਼੍ਹਂ ਗਹਿਤਸ੍ਸ ਰੂਪਸ੍ਸ ਅਨਿਚ੍ਚਲਕ੍ਖਣਂ ਦਸ੍ਸੇਤੁਂ ‘‘ਸਾ ਚ ਕ੍ਰਿਯਾ’’ਤਿਆਦਿ ਵੁਤ੍ਤਂ. ‘‘ਨਸ੍ਸਨ੍ਤੀ’’ਤਿ ਭਿਜ੍ਜਨ੍ਤਿ. ਅਨਿਚ੍ਚਤਂ ਗਚ੍ਛਨ੍ਤਿ. ‘‘ਵਿਤ੍ਥਮ੍ਭਨ ਕ੍ਰਿਯਾ’’ਤਿ ਏਤ੍ਥ ਵਿਵਿਧੇਨ ਥਮ੍ਭਨਂ ਵਿਤ੍ਥਮ੍ਭਨਂ. ਨਾਨਾਦਿਸਾਭਿਮੁਖਵਸੇਨ ਥਮ੍ਭਨਂ ਵਹਨਨ੍ਤਿ ਅਤ੍ਥੋ. ‘‘ਇਮਾਸਞ੍ਚਾ’’ਤਿ ਚਤੁਨ੍ਨਂ ਮਹਾਭੂਤਾਨਞ੍ਚ. ਵਿਸੁਂ ਵਿਸੁਨ੍ਤਿ ਵੁਤ੍ਤਤ੍ਤਾ ਤਾਸਂ ਅਞ੍ਞਮਞ੍ਞਞ੍ਚ ਸਹਜਾਤੇਸੁ ਗਹਣਂ ਸਮ੍ਭਵਤੀਤਿ ਵੁਤ੍ਤਂ ‘‘ਆਪਾਦੀਨਂ’’ਤਿ. ਆਪਾਦੀਨਂ ਸੇਸਮਹਾਭੂਤਾਨਞ੍ਚਾਤਿ ਅਤ੍ਥੋ. ਸਨ੍ਤਤਿਯਾ ਸਰੀਰਾਨਿ ਸਨ੍ਤਤਿ ਸਰੀਰਾਨਿ. ‘‘ਤਥਾ ਤਥਾ ਕਪ੍ਪੇਤ੍ਵਾ’’ਤਿ ਰੂਪਧਮ੍ਮਾਨਂ ਸਨ੍ਤਤਿ ਪਰਿਵਤ੍ਤਿ ਨਾਮ ਅਭਿਕ੍ਕਮਨ੍ਤਸ੍ਸ ਏਵਂ ਭਵੇਯ੍ਯ, ਪਟਿਕ੍ਕਮਨ੍ਤਸ੍ਸ ਏਵਂ ਭਵੇਯ੍ਯ, ਤਥਾ ਸਮਿਞ੍ਜਨ੍ਤਸ੍ਸ ਪਸਾਰੇਨ੍ਤਸ੍ਸਾਤਿਆਦਿਨਾ ਪਰਿਕਪ੍ਪੇਤ੍ਵਾ. ‘‘ਸੇਸਖਨ੍ਧੇਸੁਪਿ ਤਂ ਤਂ ਸਨ੍ਤਤਿ ਨਾਨਤ੍ਤਂ’’ਤਿ ਵੇਦਨਾਕ੍ਖਨ੍ਧੇ ਤਾਵ ਕਾਯੇ ਕਾਯਿਕਸੁਖਸਨ੍ਤਤਿ ਦੁਕ੍ਖਸਨ੍ਤਤੀਨਂ ਨਾਨਤ੍ਤਂ. ਚਿਤ੍ਤੇ ਸੋਮਨਸ੍ਸ ਦੋਮਨਸ੍ਸ ਸਨ੍ਤਤੀਨਂ. ਉਪੇਕ੍ਖਾ ਸਨ੍ਤਤਿ ਪਨ ਅਵਿਭੂਤਾ ਹੋਤਿ. ਕਪ੍ਪੇਤ੍ਵਾ ਗਹੇਤਬ੍ਬਾ. ਯਦਾ ਚਿਤ੍ਤੇ ਸੋਮਨਸ੍ਸ ਦੋਮਨਸ੍ਸਾਨਿ ਨ ਸਨ੍ਦਿਸ੍ਸਨ੍ਤਿ, ਤਦਾ ਇਦਾਨਿ ਉਪੇਕ੍ਖਾ ਮੇ ਵੇਦਨਾ ਪਵਤ੍ਤਤੀਤਿ ਵਾ, ਯਦਾ ਤਾਨਿ ਸਨ੍ਦਿਸ੍ਸਨ੍ਤਿ, ਤਦਾ ਸਾ ਨਿਰੁਜ੍ਝਤੀਤਿ ਵਾ ਏਵਂ ਤਕ੍ਕੇਤ੍ਵਾ ਸਮ੍ਮਸਿਤਬ੍ਬਾਤਿ ਵੁਤ੍ਤਂ ਹੋਤਿ. ਸਞ੍ਞਾਕ੍ਖਨ੍ਧੇ ਰੂਪਸਞ੍ਞਾਸਦ੍ਦਸਞ੍ਞਾਦੀਨਂ ਵਸੇਨ. ਸਙ੍ਖਾਰਕ੍ਖਨ੍ਧੇ ਰੂਪਸਞ੍ਚੇਤਨਾ ਸਦ੍ਦਸਞ੍ਚੇਤਨਾਦੀਨਂ ਵਸੇਨ, ਨਾਨਾਵਿਤਕ੍ਕ ਵਿਚਾਰਾਦੀਨਂ ਵਸੇਨ, ਲੋਭਾਲੋਭ ਦੋਸਾਦੋਸ ਮੋਹਾਮੋਹਾਦੀਨਂ ਵਸੇਨ ਚ. ਵਿਞ੍ਞਾਣਕ੍ਖਨ੍ਧੇ ਚਕ੍ਖੁਵਿਞ੍ਞਾਣਾਦੀਨਂ, ਕੁਸਲਾ ਕੁਸਲਵਿਞ੍ਞਾਣਾਦੀਨਞ੍ਚ ਵਸੇਨ ਸਨ੍ਤਤਿ ਨਾਨਤ੍ਤਂ ਵੇਦਿਤਬ੍ਬਂ. ਵਿਸ੍ਸਾਸਂ ਕਰੋਤੀਤਿ ਵਤ੍ਵਾ ਤਦਤ੍ਥਂ ਵਿਵਰਤਿ ‘‘ਏਤਂ ਮੇ’’ਤਿਆਦਿਨਾ. ਤਤ੍ਥ ਤਯੋਵਿਸ੍ਸਾਸਾ ਤਣ੍ਹਾਵਿਸ੍ਸਾਸੋ, ਮਾਨਵਿਸ੍ਸਾਸੋ, ਦਿਟ੍ਠਿਵਿਸ੍ਸਾਸੋ. ਤਤ੍ਥ ਏਤਂ ਮਮਾਤਿ ਤਣ੍ਹਾਵਿਸ੍ਸਾਸੋ. ਏਸੋਹਮਸ੍ਮੀਤਿ ਮਾਨਵਿਸ੍ਸਾਸੋ. ਏਸੋ ਮੇ ਅਤ੍ਤਾਤਿ ਦਿਟ੍ਠਿਵਿਸ੍ਸਾਸੋ. ‘‘ਪਰਿਹਰਤੀ’’ਤਿ ਭਵਾਭਵੇਸੁ ਪਰਿਗ੍ਗਹੇਤ੍ਵਾ ਹਰਤਿ ਵਹਤਿ. ‘‘ਪਰਮਜ੍ਝਤ੍ਤਭਾਵੇਨਾ’’ਤਿ ਪਧਾਨਅਜ੍ਝਤ੍ਤਭਾਵੇਨ. ਅਜ੍ਝਤ੍ਤਸਾਰਭਾਵੇਨਾਤਿ ਵੁਤ੍ਤਂ ਹੋਤਿ. ‘‘ਪਰਿਗ੍ਗਹਿਤੋ’’ਤਿ ਏਸੋ ਮੇ ਅਤ੍ਤਾਤਿ ਦਿਟ੍ਠਿਪਰਿਗ੍ਗਹੇਨ ਪਰਿਗ੍ਗਹਿਤੋ. ਤਯੋ ਹਿ ਪਰਿਗ੍ਗਹਾ ਤਣ੍ਹਾ ਪਰਿਗ੍ਗਹੋ, ਮਾਨਪਰਿਗ੍ਗਹੋ, ਦਿਟ੍ਠਿਪਰਿਗ੍ਗਹੋਤਿ. ਵਸੇ ਸਬ੍ਬਸੋ ਵਤ੍ਤਨ੍ਤੋ ਨਾਮ ਕੇਵਲਂ ਵਸਾਯਤ੍ਤਵੁਤ੍ਤਿਕੋ ਏਵ ਸਿਯਾ, ਨ ਪਚ੍ਚਯਾਯਤ੍ਤਵੁਤ੍ਤਿਕੋਤਿ ਦਸ੍ਸੇਨ੍ਤੋ ‘‘ਯਥਾਵੁਤ੍ਤੇਹੀ’’ਤਿਆਦਿਮਾਹ. ਤਤ੍ਥ ‘‘ਯਥਾਵੁਤ੍ਤੇਹੀ’’ਤਿ ਸਬ੍ਬਸਙ੍ਗਹੇ ਵੁਤ੍ਤਪ੍ਪਕਾਰੇਹਿ ਕਮ੍ਮਾਭਿਸਙ੍ਖਰਣਾਦੀਹਿ. ‘‘ਤਥਾਪਰਿਗ੍ਗਹੇਤਬ੍ਬੋ’’ਤਿ ਏਸੋ ਮੇ ਅਤ੍ਤਾਤਿ ਏਵਂ ਪਰਮਜ੍ਝਤ੍ਤਭਾਵੇਨ ਪਰਿਗ੍ਗਹੇਤਬ੍ਬੋ. ਤਥਾ ਹਿ ਯੋ ਅਤ੍ਤਨੋ ਵਸੇਨ ਵਤ੍ਤਤਿ, ਤਸ੍ਮਿਂ ਅਤ੍ਤਨੋ ਸਾਮਿਭਾਵੋ ਨਤ੍ਥਿ. ਯਸ੍ਮਿਞ੍ਚ ਸਾਮਿਭਾਵੋ ਨਤ੍ਥਿ, ਤਸ੍ਮਿਂ ਰੂਪਾਦਿਕੇ ਧਮ੍ਮੇ ਅਤ੍ਤਾਨਂ ਸਾਮਿਕਂ ਕਤ੍ਵਾ ਏਸੋ ਮਮ ਅਤ੍ਤਾਤਿ ਪਰਿਗ੍ਗਹੋ ਨਾਮ ਮਿਚ੍ਛਾ ਏਵ. ਤਥਾ ਯੋ ਚ ਖਣਿਕ ਧਮ੍ਮੋ ਹੋਤਿ, ਖਣੇ ਖਣੇ ਭਿਜ੍ਜਤਿ, ਤਂ ਰੂਪਾਦਿਕਂ ਖਨ੍ਧਪਞ੍ਚਕਂ ਅਤ੍ਤਨੋ ਸਾਰਂ ਕਤ੍ਵਾ ਤਥਾ ਪਰਿਗ੍ਗਹੋਪਿ ਮਿਚ੍ਛਾ ਏਵ. ਏਤ੍ਥ ਚ ‘‘ਮਿਚ੍ਛਾ ਏਵਾ’’ਤਿ ਪਰਮਤ੍ਥ ਸਚ੍ਚਂ ਪਤ੍ਵਾ ਮਿਚ੍ਛਾ ਏਵ. ਵਿਪਲ੍ਲਾਸੋ ਏਵਾਤਿ ਵੁਤ੍ਤਂ ਹੋਤਿ. ‘‘ਸੁਖਂ ਵਿਦ੍ਧਂਸੇਤੀ’’ਤਿ ਕਾਯਿਕਸੁਖਞ੍ਚ ਚੇਤਸਿਕ ਸੁਖਞ੍ਚ ਵਿਦ੍ਧਂਸੇਤਿ. ਵਿਨਾਸੇਤਿ. ‘‘ਨਾਨਾਦੁਕ੍ਖਂ ਜਨੇਤੀ’’ਤਿ ਕਾਯਿਕਦੁਕ੍ਖਞ੍ਚ ਚੇਤਸਿਕ ਦੁਕ੍ਖਞ੍ਚ ਜਨੇਤਿ ਉਪ੍ਪਾਦੇਤਿ. ‘‘ਇਦਞ੍ਚ ਰੂਪਂ ਏਦਿਸਮੇਵ ਹੋਤੀ’’ਤਿ ਕਥਂ ਹੋਤਿ. ਮਨੁਸ੍ਸਤ੍ਤਭਾਵੇ ਠਿਤਾਨਂ ਸਤ੍ਤਾਨਂ ਯਥਾਪਵਤ੍ਤਂ ਮਨੁਸ੍ਸ ਸੁਖਂ ਵਿਦ੍ਧਂਸੇਤਿ, ਜਿਣ੍ਣਭਿਨ੍ਨਭਾਵਂ ਪਾਪੇਤਿ, ਨਾਨਾਦੁਕ੍ਖਂ ਜਨੇਤਿ. ਸਯਂ ਅਪਾਯਤ੍ਤਭਾਵਂ ਗਹੇਤ੍ਵਾ ਤੇਸਂ ਨਾਨਾਅਪਾਯ ਦੁਕ੍ਖਂ ਜਨੇਤਿ. ਤਥਾ ਦੇਵਤ੍ਤਭਾਵੇ ਸਕ੍ਕਤ੍ਤਭਾਵੇ ਬ੍ਰਹ੍ਮਤ੍ਤਭਾਵੇ ਠਿਤਾਨਨ੍ਤਿਆਦਿਨਾ ਵਤ੍ਤਬ੍ਬਂ. ਤਥਾ ਮਨੁਸ੍ਸਤ੍ਤਭਾਵੇ ਠਿਤਾਨਂ ਨਾਨਾਵਿਪਰਿਣਾਮ ਕਿਚ੍ਚੇਹਿ ਯਥਾਪਵਤ੍ਤਂ ਸੁਖਂ ਵਿਦ੍ਧਂਸੇਤਿ, ਨਾਨਾਪਚ੍ਚਯਾਭਿਸਙ੍ਖਰਣਕਿਚ੍ਚੇਹਿ ਨਾਨਾਦੁਕ੍ਖਂ ਜਨੇਤਿ. ਤੇਨ ਵੁਤ੍ਤਂ ‘‘ਇਦਞ੍ਚ ਰੂਪਂ ਏਦਿਸਮੇਵਾ’’ਤਿ. ‘‘ਸਾਰੋਨਾਮ ਥਾਮਬਲਵਿਸੇਸੋ ਵੁਚ੍ਚਤੀ’’ਤਿ ਏਤੇਨ ਥਾਮਬਲਵਿਸੇਸੇਨ ਸਮ੍ਪਨ੍ਨਂ ਵਤ੍ਥੁਂਪਿ ਸਙ੍ਗਣ੍ਹਾਤਿ. ‘‘ਅਸਾਰਕਟ੍ਠੇਨਾ’’ਤਿ ਏਤ੍ਥ ਸਾਰੋ ਏਵ ਸਾਰਕਂ, ਨ ਸਾਰਕਂ ਅਸਾਰਕਨ੍ਤਿ ਇਮਮਤ੍ਥਂ ਸਨ੍ਧਾਯ ‘‘ਰੂਪਂ ਪਨ ਸਯਂਪਿ ਏਵਰੂਪੋ ਸਾਰੋ ਨ ਹੋਤੀ’’ਤਿ ਵੁਤ੍ਤਂ. ਸਤ੍ਤਾਨਂ ਅਤ੍ਤਸਾਰੋ ਜੀਵਸਾਰੋ ਨ ਹੋਤੀਤਿ ਅਤ੍ਥੋ. ਨਤ੍ਥਿ ਸਾਰੋ ਏਤਸ੍ਸਾਤਿ ਅਸਾਰਕਨ੍ਤਿ ਇਮਮਤ੍ਥਂ ਸਨ੍ਧਾਯ ‘‘ਨ ਚ ਏਵਰੂਪੇਨ ਸਾਰੇਨ ਯੁਤ੍ਤਂ’’ਤਿ ਵੁਤ੍ਤਂ. ਅਤ੍ਤਸਾਰੇਨ ਜੀਵਸਾਰੇਨ ਸਂਯੁਤ੍ਤਂ ਹੋਤੀਤਿ ਅਤ੍ਥੋ. ਤਤ੍ਥ ਪੁਰਿਮੋ ਅਤ੍ਥੋ ਰੂਪਂ ਅਤ੍ਤਤੋ ਸਮਨੁਪਸ੍ਸਤੀਤਿ ਇਦਂ ਸਨ੍ਧਾਯ ਵੁਤ੍ਤੋ. ਪਚ੍ਛਿਮੋ ਰੂਪਵਨ੍ਤਂ ਵਾ ਅਤ੍ਤਾਨਂ, ਅਤ੍ਤਨਿ ਵਾ ਰੂਪਂ, ਰੂਪਸ੍ਮਿਂ ਵਾ ਅਤ੍ਤਾਨਂਤਿ ਇਮਾਨਿ ਸਨ੍ਧਾਯ ਵੁਤ੍ਤੋ. ਏਤੇਨ ਅਸਾਰਕਟ੍ਠੇਨਾਤਿ ਅਸਾਰਭਾਵੇਨ, ਅਸਾਰਯੁਤ੍ਤਭਾਵੇਨ ਵਾਤਿ ਚ. ਅਨਤ੍ਤਾਤਿ ਏਤ੍ਥਪਿ ਨ ਅਤ੍ਤਾ ਅਨਤ੍ਤਾ, ਨਤ੍ਥਿ ਅਤ੍ਤਾ ਏਤਸ੍ਸਾਤਿ ਵਾ ਅਨਤ੍ਤਾਤਿ ਚ ਦ੍ਵਿਧਾ ਅਤ੍ਥੋ ਸਿਜ੍ਝਤਿ. ‘‘ਯਞ੍ਚਾ’’ਤਿ ਯਞ੍ਚ ਰੂਪਂ. ‘‘ਪੀਲ਼ੇਤੀ’’ਤਿ ਤਂ ਸਮਙ੍ਗੀ ਪੁਗ੍ਗਲਂ ਪੀਲ਼ੇਤਿ. ਏਤੇਨ ਅਨਤ੍ਤਭਾਵੇ ਸਿਦ੍ਧੇ ਦੁਕ੍ਖਭਾਵੋਪਿ ਸਿਦ੍ਧੋਤਿ ਦਸ੍ਸੇਤਿ. ‘‘ਤਿਣ੍ਣਂ ਵਯਾਨਂ ਵਸੇਨ ਅਦ੍ਧਾਭੇਦੋ ਯੋਜੇਤਬ੍ਬੋ’’ਤਿ ਪਥਮਵਯੇ ਪਵਤ੍ਤਂ ਰੂਪਂ ਦੁਤੀਯਵਯਂ ਨ ਪਾਪੁਣਾਤਿ, ਪਥਮਵਯੇ ਏਵ ਨਿਰੁਜ੍ਝਤੀਤਿਆਦਿਨਾ ਅਦ੍ਧਾਪਚ੍ਚੁਪ੍ਪਨ੍ਨੇ ਅਨ੍ਤੋਗਧਭੇਦੋ ਯੋਜੇਤਬ੍ਬੋ. ‘‘ਸਭਾਗੇਕਸਨ੍ਤਾਨਵਸੇਨਾ’’ਤਿ ਸਭਾਗਾਨਂ ਧਮ੍ਮਾਨਂ ਸਭਾਗਟ੍ਠੇਨ ਏਕੀਭੂਤਾ ਸਨ੍ਤਤਿ ਸਭਾਗੇਕਸਨ੍ਤਤਿ. ‘‘ਸਭਾਗਾਨਂ ਧਮ੍ਮਾਨਂ’’ਤਿ ਚ ਚਿਤ੍ਤਜੇਸੁਤਾਵ ਨਿਰਨ੍ਤਰਪ੍ਪਵਤ੍ਤੇਨ ਲੋਭਸਮ੍ਪਯੁਤ੍ਤਚਿਤ੍ਤੇਨ ਸਹਜਾਤਾ ਰੂਪਧਮ੍ਮਾ ਸਭਾਗਰੂਪਧਮ੍ਮਾ ਨਾਮ. ਤਥਾ ਨਾਮ ਧਮ੍ਮਾ ਚ. ਏਵਂ ਦੋਸਸਮ੍ਪਯੁਤ੍ਤਾਦੀਸੁਪਿ. ਉਤੁਜੇਸੁ ਨਿਰਨ੍ਤਰਪ੍ਪਵਤ੍ਤੇਨ ਸੀਤਉਤੁਨਾ ਸਮੁਟ੍ਠਿਤਾ ਰੂਪਧਮ੍ਮਾ ਸਭਾਗਰੂਪ ਧਮ੍ਮਾ ਨਾਮ. ਤਥਾ ਉਣ੍ਹਉਤੁਨਾ ਸਮੁਟ੍ਠਿਤਾ. ਏਸਨਯੋ ਆਹਾਰਜੇਸੁਪੀਤਿ ਏਵਂ ਸਭਾਗੇਕਸਨ੍ਤਤਿਵਸੇਨ. ‘‘ਸਮ੍ਪਾਪੁਣਿਤੁਂ’’ਤਿ ਞਾਣੇਨ ਸਮ੍ਪਾਪੁਣਿਤੁਂ. ‘‘ਅਦ੍ਧਾਸਨ੍ਤਤਿਵਸੇਨਾ’’ਤਿ ਏਤ੍ਥ ਸਨ੍ਤਤਿਵਸੇਨ ਸਮ੍ਮਸਨਂ ਵਿਸੇਸਤੋ ਅਧਿਪ੍ਪੇਤਂ. ਏਵਞ੍ਚ ਕਤ੍ਵਾ ਹੇਟ੍ਠਾ ਅਨਿਚ੍ਚਂ ਖਯਟ੍ਠੇਨਾਤਿ ਪਦੇ ਚਤੁਨ੍ਨਂ ਮਹਾਭੂਤਾਨਂ ਸਨ੍ਤਤਿ ਵਿਭਾਗਨਯੋ ਸੁਟ੍ਠੁ ਦਸ੍ਸਿਤੋਤਿ. ‘‘ਅਨਿਚ੍ਚਲਕ੍ਖਣ ਦਸ੍ਸਨਮੇਵ ਪਧਾਨਂ’’ਤਿ ਇਮਸ੍ਮਿਂ ਞਾਣੇਪਿ ਉਦਯਬ੍ਬਯਞ੍ਞਾਣੇਪਿ ਭਙ੍ਗਞ੍ਞਾਣੇਪਿ ਅਨਿਚ੍ਚਲਕ੍ਖਣ ਦਸ੍ਸਨਮੇਵ ਪਧਾਨਂ. ਭਯਞ੍ਞਾਣੇ ਚ ਆਦੀਨਵਞ੍ਞਾਣੇ ਚ ਨਿਬ੍ਬਿਦਾਞਾਣੇ ਚ ਦੁਕ੍ਖਲਕ੍ਖਣ ਦਸ੍ਸਨਂ ਪਧਾਨਂ. ਉਪਰਿ ਚਤੂਸੁ ਞਾਣੇਸੁ ਅਨਤ੍ਤਲਕ੍ਖਣ ਦਸ੍ਸਨਂ ਪਧਾਨਨ੍ਤਿ. ‘‘ਸਮੁਦਿਤੇਸੂ’’ਤਿ ਅਞ੍ਞਮਞ੍ਞਂ ਅਵਿਨਾਭਾਵਸਹਾਯਭਾਵੇਨ ਸਮੁਪ੍ਪਨ੍ਨੇਸੁ. ਇਦਞ੍ਚ ਅਵਿਜ੍ਜਾਸਮੁਦਯਾ ਰੂਪਸਮੁਦਯੋ. ਤਣ੍ਹਾਸਮੁਦਯਾ ਉਪਾਦਾਨ ਸਮੁਦਯੋ. ਆਹਾਰ ਸਮੁਦਯਾ ਰੂਪਸਮੁਦਯੋਤਿ ਪਾਲ਼ਿਵਸੇਨ ਵੁਤ੍ਤਂ. ਅਪ੍ਪਹੀਨ ਵਸੇਨਾਤਿ ਪਾਲ਼ਿਪਦੇ ਪਨ ਅਵਿਜ੍ਜਾ ਤਣ੍ਹਾ ਦਿਟ੍ਠਾਨੁਸਯਾਨਂ ਅਪ੍ਪਹੀਨਟ੍ਠੇਨ ਸਨ੍ਤਾਨੇ ਵਿਜ੍ਜਮਾਨਤਾ ਏਵ ਪਮਾਣਨ੍ਤਿ ਦਟ੍ਠਬ੍ਬਂ. ‘‘ਸਮੁਦੇਨ੍ਤੀ’’ਤਿ ਪਟਿਸਨ੍ਧਿਤੋ ਪਟ੍ਠਾਯ ਏਕਤੋ ਉਦੇਨ੍ਤਿ. ਉਪਰੂਪਰਿ ਏਨ੍ਤਿ. ਆਗਚ੍ਛਨ੍ਤੀਤਿ ਅਤ੍ਥੋ. ਏਕਭਵਭਾਵੇਨ ਪਾਤੁਬ੍ਭਵਨ੍ਤੀਤਿ ਅਧਿਪ੍ਪਾਯੋ. ਤੇਨਾਹ ‘‘ਯਾਵਮਰਣਕਾਲਾ’’ਤਿਆਦਿਂ. ‘‘ਪਸਵਨ੍ਤੀ’’ਤਿ ਪਵਡ੍ਢਮਾਨਾ ਸਵਨ੍ਤਿ, ਪਵਤ੍ਤਨ੍ਤਿ, ਸਨ੍ਦਨ੍ਤਿ. ‘‘ਤੇਸੁ ਪਨਾ’’ਤਿ ਅਵਿਜ੍ਜਾ ਤਣ੍ਹੁਪਾਦਾਨ ਕਮ੍ਮੇਸੁ. ‘‘ਨਿਰੁਜ੍ਝਨ੍ਤੀ’’ਤਿ ਤਸ੍ਮਿਂਭਵੇ ਏਵ ਨਿਰੁਜ੍ਝਨ੍ਤਿ. ਤਸ੍ਮਿਂ ਭਵੇ ਨਿਰੋਧੋ ਨਾਮ ਭਵਨ੍ਤਰੇ ਪੁਨ ਅਨੁਪ੍ਪਾਦੋ ਯੇਵਾਤਿ ਵੁਤ੍ਤਂ ‘‘ਭਵਨ੍ਤਰੇ’’ਤਿਆਦਿ. ‘‘ਤਂ ਸਨ੍ਤਤਿਯਂ’’ਤਿ ਤਸ੍ਮਿਂ ਪਚ੍ਚੁਪ੍ਪਨ੍ਨ ਭਵੇਤਿ ਵੁਤ੍ਤਂ ਹੋਤਿ. ‘‘ਪੁਨ ਅਨੁਪ੍ਪਾਦਸਙ੍ਖਾਤਂ ਨਿਰੋਧਂ’’ਤਿ ਸਨ੍ਤਤਿ ਨਿਰੋਧੋ ਨਾਮ ਵੁਤ੍ਤੋ. ਨ ਨਿਬ੍ਬਾਨ ਨਿਰੋਧੋ. ਏਤਾਹਿ ਪਚ੍ਚਯੇ ਸਤਿ, ਭਵਨ੍ਤਰੇ ਉਪ੍ਪਜ੍ਜੀਸ੍ਸਨ੍ਤਿ ਯੇਵਾਤਿ. ਇਦਾਨਿ ਯਥਾਪਵਤ੍ਤ ਸਨ੍ਤਤੀਸੁ ਪਰਿਯਾਪਨ੍ਨਾਨਂ ਸਬ੍ਬਪਚ੍ਛਿਮਾਨਂ ਨਾਮਰੂਪਾਨਂ ਖਣਿਕਨਿਰੋਧਵਸੇਨ ਅਤ੍ਥਂ ਵਦਨ੍ਤੋ ‘‘ਯਥਾਪਵਤ੍ਤ ਸਨ੍ਤਤਿਯੋ ਵਾ ਛਿਜ੍ਜਨ੍ਤਿ ਭਿਜ੍ਜਨ੍ਤੀ’’ਤਿ ਵੁਤ੍ਤਂ. ‘‘ਉਦਯਬ੍ਬਯਂ ਸਮਨੁਪਸ੍ਸਨ੍ਤਸ੍ਸ ਚਾ’’ਤਿ ਏਤ੍ਥ ਕਤਮੋ ਉਦਯੋ ਨਾਮ, ਕਤਮੋ ਵਯੋ ਨਾਮ, ਕਥਞ੍ਚ ਤਦੁਭਯਂ ਸਮਨੁਪਸ੍ਸਤੀਤਿ ਆਹ ‘‘ਉਦਯਬ੍ਬਯਂ ਪਸ੍ਸਨ੍ਤਸ੍ਸਾਤਿ ਏਤ੍ਥ ਯਥਾ ਨਾਮਾ’’ਤਿਆਦਿਂ. ਤਤ੍ਥ ‘‘ਤਮੋ ਖਨ੍ਧੋ’’ਤਿ ਤਮੋਰਾਸਿ. ‘‘ਵੇਤੀ’’ਤਿ ਵਿਗਚ੍ਛਤਿ. ਅਨ੍ਤਰ ਧਾਯਤਿ.‘‘ਉਦਯੋ’’ਤਿ ਉਪ੍ਪਾਦੋ ਚੇਵ ਵਡ੍ਢਿ ਚ. ‘‘ਵਯੋ’’ਤਿ ਵਿਗਮਨਂ, ਅਨ੍ਤਰਧਾਨਂ. ‘‘ਨਾਨਾਪਯੋਗਵਸੇਨਵਾ’’ਤਿ ਸਮਿਞ੍ਜਨਪ੍ਪਸਾਰਣਾਦਿ ਨਾਨਾਪਯੋਗਵਸੇਨ ਵਾ. ਉਦਯਪਕ੍ਖਾਨਂ ਨਾਨਾਸਨ੍ਤਤੀਨਂ ਉਦਯਞ੍ਚ ਉਦਯਤੋ. ਵਯਪਕ੍ਖਾਨਂ ਨਾਨਾਸਨ੍ਤਤੀਨਂ ਵਯਞ੍ਚ ਵਯਤੋਤਿ ਯੋਜਨਾ.

ਬੋਜ੍ਝਙ੍ਗ ਧਮ੍ਮੇਹਿ ਸਮ੍ਪਨ੍ਨਤ੍ਤਾ ਆਰਾਧੇਤਿ ਅਤ੍ਤਨੋ ਚਿਤ੍ਤਂਤਿ ਆਰਦ੍ਧੋ. ਤੁਟ੍ਠਚਿਤ੍ਤੋਤਿ ਅਤ੍ਥੋ. ਵਿਪਸ੍ਸਤੀਤਿ ਵਿਪਸ੍ਸਕੋ. ਆਰਦ੍ਧੋ ਹੁਤ੍ਵਾ ਵਿਪਸ੍ਸਕੋ ਆਰਦ੍ਧਵਿਪਸ੍ਸਕੋ. ਦੁਵਿਧੋਹਿ ਵਿਪਸ੍ਸਕੋ ਤਰੁਣ ਵਿਪਸ੍ਸਕੋ ਚ ਆਰਦ੍ਧ ਵਿਪਸ੍ਸਕੋ ਚ. ਤਤ੍ਥ ਖਨ੍ਧਾਨਂ ਉਦਯਬ੍ਬਯਂ ਸੁਟ੍ਠੁ ਅਪਸ੍ਸਨ੍ਤੋ ਦੁਬ੍ਬਲਵਿਪਸ੍ਸਕੋ ਤਰੁਣ ਵਿਪਸ੍ਸਕੋ ਨਾਮ. ਖਨ੍ਧਾਨਂ ਉਦਯਬ੍ਬਯਂ ਸੁਟ੍ਠੁ ਪਸ੍ਸਨ੍ਤੋ ਵਿਪਸ੍ਸਨਾ ਕਮ੍ਮੇ ਆਰਾਧਿਤ ਚਿਤ੍ਤੋ ਬਲਵਵਿਪਸ੍ਸਕੋ ਆਰਦ੍ਧਵਿਪਸ੍ਸਕੋ ਨਾਮ. ਯਂ ਸਨ੍ਧਾਯ ਵੁਤ੍ਤਂ.

[ਕ]

‘ਸੁਞ੍ਞਾਗਾਰੇ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;

ਅਮਾਨੁਸੀ ਰਤੀ ਹੋਤਿ, ਸਮ੍ਮ ਧਮ੍ਮਂ ਵਿਪਸ੍ਸਤੋ,ਤਿ ਚ.

[ਖ]

‘ਯੋ ਚ ਵਸ੍ਸਸਤਂ ਜੀਵੇ, ਅਪਸ੍ਸਂ ਉਦਯਬ੍ਬਯਂ;

ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਉਦਯਬ੍ਬਯਂ,ਤਿ ਚ.

ਅਯਮਿਧ ਅਧਿਪ੍ਪੇਤੋ. ਵਿਪਸ੍ਸਨਂ ਉਪੇਚ੍ਚ ਕਿਲੇਸੇਨ੍ਤਿ, ਮਲੀਨਭਾਵਂ ਗਮੇਨ੍ਤੀਤਿ ਵਿਪਸ੍ਸਨੁਪਕ੍ਕਿਲੇਸਾ. ਪਰਿਬਨ੍ਧਨ੍ਤਿ ਨੀਵਾਰੇਨ੍ਤੀਤਿ ਪਰਿਬਨ੍ਧਕਾਤਿ ਹੇਟ੍ਠਾ ਵੁਤ੍ਤਮੇਵ ਅਨ੍ਤਰਾਯਿਕ ਧਮ੍ਮਾਨਂ ਨਾਮਂ. ‘‘ਸਰੀਰੋਭਾਸੋ’’ਤਿ ਸਕਲਸਰੀਰਤੋ ਨਿਕ੍ਖਨ੍ਤੋ ਓਭਾਸੋ. ‘‘ਪਞ੍ਚਵਿਧਾ ਪੀਤੀ’’ਤਿ ਖੁਦ੍ਦਿਕਾ ਪੀਤਿ, ਖਣਿਕਾ ਪੀਤਿ, ਓਕ੍ਕਨ੍ਤਿਕਾ ਪੀਤਿ, ਉਬ੍ਬੇਗਾ ਪੀਤਿ, ਫਰਣਾ ਪੀਤੀਤਿ. ‘‘ਦੁਵਿਧਾ ਪਸ੍ਸਦ੍ਧੀ’’ਤਿ ਅਤਿਬਲਵਨ੍ਤੀ ਕਾਯਪਸ੍ਸਦ੍ਧਿਚੇਵ ਚਿਤ੍ਤਪਸ੍ਸਦ੍ਧਿ ਚ. ਵਿਪਸ੍ਸਨਾ ਕਮ੍ਮੇ ਓਕਪ੍ਪਨਾਕਾਰਪ੍ਪਵਤ੍ਤਾ ਸਦ੍ਧਾਏਵ ਅਧਿਮੁਚ੍ਚਨਟ੍ਠੇਨ ਅਧਿਮੋਕ੍ਖੋ ਸਦ੍ਧਾਧਿਮੋਕ੍ਖੋ. ‘‘ਵੀਰਿਯਂ’’ਤਿ ਤਸ੍ਮਿਂ ਕਮ੍ਮੇ ਅਨਿਕ੍ਖਿਤ੍ਤਧੁਰਂ ਪਗ੍ਗਹਿਤਸੀਸਂ ਵੀਰਿਯਂ. ‘‘ਸੁਖਂ’’ਤਿ ਚਿਤ੍ਤਸੁਖਂ. ਤੇਨਾਹ ‘‘ਸੋਮਨਸ੍ਸਂ’’ਤਿ. ‘‘ਵਿਪਸ੍ਸਨਾਞਾਣਂ’’ਤਿ ਇਨ੍ਦਵਿਸ੍ਸਟ੍ਠਵਜਿਰਸਦਿਸਂ ਬਲਵਵਿਪਸ੍ਸਨਾਞਾਣਂ. ‘‘ਸਤੀ’’ਤਿ ਤਸ੍ਮਿਂ ਕਮ੍ਮੇ ਅਪ੍ਪਮੁਟ੍ਠਾ ਸਤਿ. ‘‘ਤਤ੍ਰਮਜ੍ਝਤ੍ਤੁਪੇਕ੍ਖਾ’’ਤਿ ਚਿਤ੍ਤਸ੍ਸ ਲੀਨੁਦ੍ਧਚ੍ਚਾਦੀਹਿ ਵਿਸਮਨ੍ਤੇਹਿ ਵਿਮੁਤ੍ਤਾ ਤਤ੍ਰਮਜ੍ਝਤ੍ਤਤਾਸਙ੍ਖਾਤਾ ਉਪੇਕ੍ਖਾ. ‘‘ਆਵਜ੍ਜਨੁਪੇਕ੍ਖਾ’’ਤਿ ਵਸਿਭਾਵਪਤ੍ਤਾ ਆਵਜ੍ਜਨਸਙ੍ਖਾਤਾ ਉਪੇਕ੍ਖਾ. ‘‘ਆਲਯਂ’’ਤਿ ਤਣ੍ਹਾਲਯਂ. ‘‘ਕੁਰੁਮਾਨਾ’’ਤਿ ਕਰੋਨ੍ਤੀ. ‘‘ਸੁਖੁਮਾ ਤਣ੍ਹਾ’’ਤਿ ਕੁਸਲੇਹਿ ਮਿਸ੍ਸਕਤ੍ਤਾ ਇਦਂ ਅਕੁਸਲਨ੍ਤਿਪਿ ਜਾਨਿਤੁਂ ਅਸਕ੍ਕੁਣੇਯ੍ਯਾ ਸੁਖੁਮਤਣ੍ਹਾ. ‘‘ਨ ਵਤਮੇ’’ਤਿ ਮਮ ਨ ਉਪ੍ਪਨ੍ਨਪੁਬ੍ਬੋਵਤਾਤਿ ਯੋਜਨਾ. ‘‘ਅਸ੍ਸਾਦਸਹਿਤਾ’’ਤਿ ਓਭਾਸਾਦੀਸੁ ਅਸ੍ਸਾਦਤਣ੍ਹਾ ਸਹਿਤਾ. ‘‘ਅਧਿਮਾਨ ਵਸੇਨਾ’’ਤਿ ਅਧਿਕਤਰਂ ਮਞ੍ਞਨਾਵਸੇਨ. ‘‘ਤਾਵਦੇਵਾ’’ਤਿ ਨਿਕਨ੍ਤਿਯਾ ਉਪ੍ਪਤ੍ਤਿਕ੍ਖਣੇਯੇਵ. ‘‘ਨਿਕਾਮਨਾਕਾਰੋ’’ਤਿ ਇਚ੍ਛਨਾਕਾਰੋ. ਅਸ੍ਸਾਦਨਾਕਾਰੋ. ‘‘ਨਿਕਾਮਨਸ੍ਸਵਤ੍ਥੂ’’ਤਿ ਨਿਕਨ੍ਤਿਯਾ ਵਤ੍ਥੁ. ‘‘ਅਦ੍ਧਾ’’ਤਿ ਏਕਨ੍ਤੇਨ. ‘‘ਹਨ੍ਦਾ’’ਤਿ ਚਿਤ੍ਤਵਿਸ੍ਸਟ੍ਠਕਰਣੇ ਨਿਪਾਤਪਦਂ. ਇਦਾਨੇਵ ਨਂ ਵਿਸੋਧੇਮਿ, ਨ ਚਿਰਂ ਪਵਤ੍ਤਿਤੁਂ ਦਸ੍ਸਾਮੀਤਿ ਇਮਮਤ੍ਥਂ ਦੀਪੇਤਿ. ‘‘ਤੇਸ੍ਵੇਵਾ’’ਤਿ ਤੇਸੁਓਭਾਸਾਦੀਸੁ ਏਵ. ਅਟ੍ਠਕਥਾਯ ਨ ਸਮੇਤਿ. ਅਟ੍ਠਕਥਾਯਂ ਨਿਕਨ੍ਤਿ ਵਿਕ੍ਖਮ੍ਭਨਸ੍ਸ ਵਿਸੁਂ ਵੁਤ੍ਤਤ੍ਤਾਤਿ ਅਧਿਪ੍ਪਾਯੋ. ਵਿਪਸ੍ਸਨਾਪਰਿਪਾਕੋ ਨਾਮ ਵਿਸੇਸਨ੍ਤਰਪ੍ਪਵਤ੍ਤੇਨ ਪਾਕਟੋਤਿ ਦਸ੍ਸੇਤੁਂ ‘‘ਸਙ੍ਖਾਰੁਪੇਕ੍ਖਾਭਾਵਂ ਪਤ੍ਤਾ’’ਤਿਆਦਿਮਾਹ. ਵੁਟ੍ਠਾਨਗਾਮਿਨਿ ਵਿਪਸ੍ਸਨਾਭਾਵਪਤ੍ਤੇਨਾਤਿ ਵੁਤ੍ਤਂ ਹੋਤਿ. ‘‘ਦ੍ਵੇ ਵਿਪਸ੍ਸਨਾ ਚਿਤ੍ਤਾਨੀ’’ਤਿ ਉਪਚਾਰਾਨੁਲੋਮਚਿਤ੍ਤਾਨਿ. ਸੋ ਹਿ ਵੁਟ੍ਠਾਨਨ੍ਤਿ ਵੁਚ੍ਚਤੀਤਿ ਸਮ੍ਬਨ੍ਧੋ. ਸਙ੍ਖਾਰ ਨਿਮਿਤ੍ਤਤੋ ਵਾ ਵੁਟ੍ਠਾਤਿ. ਨਿਬ੍ਬਾਨਂ ਆਰਬ੍ਭ ਪਵਤ੍ਤਿਤੋ. ਯਦਿ ਏਵਂ ਗੋਤ੍ਰਭੁਪਿ ਵੁਟ੍ਠਾਨਂ ਨਾਮ ਸਿਯਾਤਿ. ਨ ਸਿਯਾ. ਮਗ੍ਗਸ੍ਸ ਆਵਜ੍ਜਨਮਤ੍ਤੇ ਠਿਤਤ੍ਤਾ. ਪਟਿਵੇਧਕਿਚ੍ਚਸ੍ਸਚ ਸਮ੍ਮੋਹ ਸਮੁਚ੍ਛੇਦਕਿਚ੍ਚਸ੍ਸ ਅਭਾਵਤੋ. ‘‘ਸਯਂ’’ਤਿ ਮਗ੍ਗਸਙ੍ਖਾਤੋ ਸਯਂ. ‘‘ਤਂ ਸਮਙ੍ਗੀਪੁਗ੍ਗਲਂ ਵਾ’’ਤਿ ਤੇਨ ਮਗ੍ਗੇਨ ਸਮਙ੍ਗੀਪੁਗ੍ਗਲਂ ਵਾ. ‘‘ਵਟ੍ਟਪ੍ਪਵਤ੍ਤਤੋ ਚਾ’’ਤਿ ਆਯਤਿਂ ਭਵੇਸੁ ਅਪਾਯਵਟ੍ਟਪ੍ਪਵਤ੍ਤਤੋ ਵਾ, ਅਟ੍ਠਮ ਭਵਤੋ ਪਟ੍ਠਾਯ ਕਾਮਸੁਗਤਿ ਵਟ੍ਟਪ੍ਪਵਤ੍ਤਤੋ ਵਾ. ਅਵਸ੍ਸਂ ਵੁਟ੍ਠਾਨਂ ਗਮੇਤਿ ਸਮ੍ਪਾਪੇਤੀਤਿ ਵੁਟ੍ਠਾਨਗਾਮਿਨੀਤਿ ਵਚਨਤ੍ਥੋ. ‘‘ਅਵਸ੍ਸਂ ਵੁਟ੍ਠਾਨਂ ਗਚ੍ਛਨ੍ਤੀ’’ਤਿ ਇਧ ਠਿਤਾਨਂ ਵੁਟ੍ਠਾਨਤੋ ਨਿਵਤ੍ਤਿ ਨਾਮ ਨਤ੍ਥੀਤਿ ਅਧਿਪ੍ਪਾਯੋ. ਇਦਞ੍ਚ ਪਚ੍ਚੇਕਬੁਦ੍ਧਾਨਂ ਬੁਦ੍ਧਸਾਵਕਾਨਞ੍ਚ ਵਸੇਨ ਦਟ੍ਠਬ੍ਬਂ. ਸਬ੍ਬਞ੍ਞੁ ਬੋਧਿਸਤ੍ਤਾ ਪਨ ਪੁਬ੍ਬਬੁਦ੍ਧਾਨਂ ਸਾਸਨੇ ਪਬ੍ਬਜਿਤ੍ਵਾ ਵਿਪਸ੍ਸਨਾ ਕਮ੍ਮਂ ਆਰਭਨ੍ਤਾ ਅਨੁਲੋਮਞ੍ਞਾਣਂ ਆਹਚ੍ਚ ਠਪੇਨ੍ਤੀਤਿ ਅਟ੍ਠਕ ਥਾਸੁ ਵੁਤ੍ਤਂ. ਤਤ੍ਥ ‘‘ਆਹਚ੍ਚਾ’’ਤਿ ਇਦਂ ਸਙ੍ਖਾਰੁਪੇਕ੍ਖਾਞਾਣਸ੍ਸ ਮਤ੍ਥਕਪਤ੍ਤਿਦਸ੍ਸਨਤ੍ਥਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ‘‘ਆਵਜ੍ਜਨਟ੍ਠਾਨਿਯਂ’’ਤਿ ਤਤੋ ਪੁਬ੍ਬਭਾਗੇ ਕੇਨਚਿ ਚਿਤ੍ਤੇਨ ਅਗ੍ਗਹਿਤੇ ਨਿਬ੍ਬਾਨਾ ਰਮ੍ਮਣੇ ਆਵਜ੍ਜਨਟ੍ਠਾਨਿਯਂ. ‘‘ਤਂ’’ਤਿ ਗੋਤ੍ਰਭੁਞ੍ਞਾਣਂ. ਗੋਤ੍ਤਂ ਭਵਤਿ ਅਭਿਭਵਤਿ ਛਿਨ੍ਦਤੀਤਿ ਗੋਤ੍ਰਭੁ. ਗੋਤ੍ਤਂ ਵਾ ਅਭਿਸਮ੍ਭੁਣਾਤਿ ਪਾਪੁਣਾਤੀਤਿ ਗੋਤ੍ਰਭੂਤਿ ਵਚਨਤ੍ਥੋ. ਕਥਂ ਪਨ ਗੋਤ੍ਰਭੁ ਚਿਤ੍ਤਂ ਗੋਤ੍ਰਭੁਞ੍ਞਾਣਂ ਪੁਥੁਜ੍ਜਨਗੋਤ੍ਤਂ ਛਿਨ੍ਦਤਿ, ਅਰਿਯਗੋਤ੍ਤਂ ਪਾਪੁਣਾਤੀਤਿ ਯੁਜ੍ਜੇਯ੍ਯ, ਸੋਹਿ ਪੁਗ੍ਗਲੋ ਤਸ੍ਮਿਂਖਣੇ ਪੁਥੁਜ੍ਜਨਗੋਤ੍ਤਪਰਿਯਾਪਨ੍ਨੋਏਵਾਤਿ. ਸਚ੍ਚਂ. ਅਤ੍ਤਨਿ ਪਨ ਛਿਨ੍ਨਤ੍ਤਾ ਸਯਂ ਛਿਨ੍ਦਤਿ ਨਾਮ. ਨਿਬ੍ਬਾਨਸ੍ਸ ਚ ਅਰਿਯਗੋਚਰਤ੍ਤਾ ਤਂ ਆਰਮ੍ਮਣ ਕਰਣਵਸੇਨ ਅਰਿਯਗੋਤ੍ਤਂ ਪਾਪੁਣਾਤਿ ਨਾਮਾਤਿ ਦਟ੍ਠਬ੍ਬਂ. ਪਚ੍ਚਯਸਤ੍ਤਿਵਿਸੇਸੇਨ ਅਤ੍ਤਨੋ ਅਨਨ੍ਤਰੇ ਅਰਿਯਗੋਤ੍ਤਂ ਭਾਵੇਤਿ, ਪਾਤੁਭਾਵੇਤੀਤਿ ਗੋਤ੍ਰਭੂਤਿਪਿ ਯੁਜ੍ਜਤਿ. ‘‘ਪਰਿਚ੍ਛਿਜ੍ਜਾ’’ਤਿ ਪਰਿਚ੍ਛਿਨ੍ਦਿਤ੍ਵਾ. ਦਿਟ੍ਠਿਵਿਚਿਕਿਚ੍ਛਾਦੀਹਿ ਸਬ੍ਬਵਿਪ੍ਫਨ੍ਦਨੇਹਿ ਮੁਞ੍ਚਿਤ੍ਵਾਤਿ ਵੁਤ੍ਤਂ ਹੋਤਿ. ਸਮ੍ਮੋਹਸ੍ਸ ਪਹਾਨਮੇਵ ਦਟ੍ਠਬ੍ਬਂ. ਨ ਤੇ ਧਮ੍ਮੇ ਆਰਮ੍ਮਣ ਕਰਣ ਵਸੇਨ ਜਾਨਨਂ. ਕਥਂ ਤੇ ਧਮ੍ਮੇ ਆਰਮ੍ਮਣਂ ਅਕਰੋਨ੍ਤੋ ਮਗ੍ਗੋ ਤੇ ਧਮ੍ਮੇ ਪਰਿਜਾਨਾਤਿ ਨਾਮਾਤਿ. ਕਿਚ੍ਚਸਿਦ੍ਧਿ ਵਸੇਨ. ਸੋ ਹਿ ਸਮ੍ਮੋਹਂ ਪਜਹਨ੍ਤੋ ਆਰਮ੍ਮਣਂ ਕਰੋਨ੍ਤਾਨਿਪਿ ਹਿ ਪੁਬ੍ਬਭਾਗਞ੍ਞਾਣਾਨਿ ਤਪ੍ਪਹਾਨਕਿਚ੍ਚਸ੍ਸ ਅਸਾਧਕਤ੍ਤਾ ਦੁਕ੍ਖ ਸਚ੍ਚਂ ਪਰਿਜਾਨਨ੍ਤਾਨੀਤਿ ਨ ਵੁਚ੍ਚਨ੍ਤਿ. ਮਗ੍ਗੋ ਪਨ ਆਰਮ੍ਮਣਂ ਅਕਰੋਨ੍ਤੋਪਿ ਤਪ੍ਪਹਾਨਕਿਚ੍ਚਸ੍ਸ ਸਾਧਕਤ੍ਤਾਤਂ ਸਚ੍ਚਂ ਪਰਿਜਾਨਾਤੀਤਿ ਵੁਚ੍ਚਤਿ. ਕਸ੍ਮਾ. ਤਤੋ ਪਟ੍ਠਾਯ ਤਸ੍ਸਪੁਗ੍ਗਲਸ੍ਸ ਸਬ੍ਬਕਾਲਂ ਤਸ੍ਮਿਂਸਚ੍ਚੇ ਪਰਿਜਾਨਨ ਕਿਚ੍ਚਸ੍ਸ ਸਿਦ੍ਧਤ੍ਤਾ. ਯਥਾਹਿ ਏਕੋ ਪੁਰਿਸੋ ਚਕ੍ਖੁਮ੍ਹਿ ਪਿਤ੍ਤਸੇਮ੍ਹਾਦਿਦੋਸੇਹਿ ਪਲਿਬੁਦ੍ਧਤ੍ਤਾ ਅਨ੍ਧੋ ਹੋਤਿ. ਨ ਕਿਞ੍ਚਿ ਪਸ੍ਸਤਿ. ਯਦਾ ਪਨ ਸੋ ਏਕਂ ਤੇਜਵਨ੍ਤਂ ਅਞ੍ਜਨਂ ਲਭਿਤ੍ਵਾ ਚਕ੍ਖੁਂ ਅਞ੍ਜਯਨ੍ਤੋ ਸਬ੍ਬਰਤ੍ਤਿਂ ਨਿਦ੍ਦਾਯਤਿ. ਤਸ੍ਸ ਨਿਦ੍ਦਾਯਨ੍ਤਸ੍ਸੇਵ ਚਕ੍ਖੁਮ੍ਹਿ ਸਬ੍ਬਦੋਸਾ ਨਸ੍ਸਨ੍ਤਿ. ਚਕ੍ਖੁ ਵਿਪ੍ਪਸਨ੍ਨਂ ਹੋਤਿ. ਤਙ੍ਖਣਤੋ ਪਟ੍ਠਾਯ ਸੋ ਨਿਦ੍ਦਾਯਨ੍ਤੋਪਿ ਰੂਪਾਨਿ ਪਸ੍ਸਤੀਤਿ ਵੁਚ੍ਚਤਿ. ਕਸ੍ਮਾ, ਅਨ੍ਧਭਾਵਵਿਗਮੇਨ ਦਸ੍ਸਨਕਿਚ੍ਚਸ੍ਸ ਸਿਦ੍ਧਤ੍ਤਾ. ਏਵਮੇਵਮਿਦਂ ਦਟ੍ਠਬ੍ਬਨ੍ਤਿ. ਏਕਦੇਸੇਨ ਵਾ ਹੇਟ੍ਠਿਮਮਗ੍ਗੇਸੁ, ਅਨਵਸੇਸੇਨ ਵਾ ਅਰਹਤ੍ਤਮਗ੍ਗੇ. ‘‘ਅਪਚ੍ਛਾਵਤ੍ਤਿਕਂ’’ਤਿ ਏਤ੍ਥ ਪਚ੍ਛਤੋ ਆਵਤ੍ਤਨਂ ਪਚ੍ਛਾਵਤ੍ਤਂ. ਨਤ੍ਥਿ ਪਚ੍ਛਾਵਤ੍ਤਂ ਅਸ੍ਸਾਤਿ ਅਪਚ੍ਛਾਵਤ੍ਤਿਕਨ੍ਤਿ ਵਿਗ੍ਗਹੋ. ‘‘ਪੁਨ ਅਨੁਪ੍ਪਾਦਧਮ੍ਮਤਾਪਤ੍ਤਿਵਸੇਨ ਨਿਰੋਧਸਙ੍ਖਾਤਂ’’ਤਿ ਮਗ੍ਗਕ੍ਖਣੇ ਏਵ ਤਾਨਿਵਟ੍ਟਾਨਿ ਪੁਨ ਅਨੁਪ੍ਪਾਦਸਭਾਵਂ ਆਪਜ੍ਜਨ੍ਤਿ, ਨਿਰੁਜ੍ਝਨ੍ਤਿ. ਤਥਾ ਨਿਰੋਧਸਙ੍ਖਾਤਂ. ‘‘ਉਪ੍ਪਾਦਨਸਙ੍ਖਾਤਾਯ ਭਾਵਨਾਯਾ’’ਤਿ ਏਤੇਨ ਮਗ੍ਗਸ੍ਸ ਏਕਚਿਤ੍ਤਕ੍ਖਣਿਕਤ੍ਤਾ ਵਡ੍ਢਨਸਙ੍ਖਾਤਾਯ ਭਾਵਨਾਯ ਓਕਾਸੋ ਨਤ੍ਥੀਤਿ ਕਤ੍ਵਾ ਵੁਤ੍ਤਂ. ਅਰਿਯਮਗ੍ਗਂ ਪਟਿਲਾਭਤ੍ਥਾਯ ਪਨ ਪਵਤ੍ਤਿਤਾ ਪੁਬ੍ਬਭਾਗਭਾਵਨਾਪਿ ਮਗ੍ਗਭਾਵਨਾ ਏਵ. ਸਾ ਚ ਅਰਿਯਮਗ੍ਗਂ ਪਤ੍ਵਾ ਮਤ੍ਥਕਪਤ੍ਤਾ ਹੋਤਿ. ਤਸ੍ਮਾ ਅਰਿਯਮਗ੍ਗੋ ਏਵ ਮਤ੍ਥਕਪਤ੍ਤੋ ਭਾਵਨਾਨੁਤ੍ਤਰੋ ਹੋਤੀਤਿ ਇਮਿਨਾਪਰਿਯਾਯੇਨ ਵਡ੍ਢਨ ਸਙ੍ਖਾਤਾਯ ਭਾਵਨਾਯਾਤਿਪਿ ਯੁਜ੍ਜਤਿਯੇਵ. ਅਤ੍ਤਨੋ ਅਨਨ੍ਤਰੇ ਪਵਤ੍ਤਂ ਆਨਨ੍ਤਰਿਕਂ. ਆਨਨ੍ਤਰਿਕਂ ਫਲਂ ਏਤਸ੍ਸਾਤਿ ਵਿਗ੍ਗਹੋ. ਤਸ੍ਸ ਚ ਤਤੋਪਰਂ ਦ੍ਵੇ ਵਾ ਤੀਣਿ ਵਾ ਫਲਚਿਤ੍ਤਾਨਿ ਪਵਤ੍ਤਨ੍ਤੀਤਿ ਇਮਿਨਾ ਸਮ੍ਬਨ੍ਧੋ. ਅਪਨੀਤੋ ਅਗ੍ਗਿ ਏਤਸ੍ਮਾਤਿ ਅਪਨੀਤਗ੍ਗਿਕੋ. ‘‘ਨਿਬ੍ਬਾਪੇਨ੍ਤੋ ਵਿਯਾ’’ਤਿ ਏਤੇਨ ਪਟਿਪ੍ਪਸ੍ਸਮ੍ਭਨਪ੍ਪਹਾਨਕਿਚ੍ਚੇਨ ਮਗ੍ਗਾਨੁਕੁਲਪ੍ਪਵਤ੍ਤਿਂ ਦਸ੍ਸੇਤਿ. ‘‘ਤੇਸਂ’’ਤਿ ਤੇਸਂ ਚਕ੍ਖੂਨਂ. ਤਂ ਰੂਪਂ ਤਸ੍ਸ ਪਾਕਟਂ ਨ ਤਾਵ ਹੋਤੀਤਿ ਸਮ੍ਬਨ੍ਧੋ. ‘‘ਤਸ੍ਸਾ’’ਤਿ ਤਸ੍ਸ ਪੁਗ੍ਗਲਸ੍ਸ. ‘‘ਪਚ੍ਚਵੇਕ੍ਖਨਵਾਰੇਸੂ’’ਤਿ ਏਤ੍ਥ ਪਸਾਦਚਕ੍ਖੁਨਾ ਦਿਟ੍ਠੇ ਪਵਤ੍ਤਾ ਅਨੁਬਨ੍ਧਕ ਵੀਥਿਯੋਪਿ ਸਙ੍ਗਯ੍ਹਨ੍ਤਿ.

ਉਪਰਿਮਗ੍ਗੇਹਿ ਵਧਿਤਬ੍ਬਾ ਮਾਰੇਤਬ੍ਬਾਤਿ ਉਪਰਿਮਗ੍ਗਵਜ੍ਝਾ. ‘‘ਕਿਲੇਸਵਿਭਾਗੇਸੂ’’ਤਿ ਅਸੁਕਮਗ੍ਗੇਨ ਅਸੁਕਾਕਿਲੇਸਾ ਪਹੀਯਨ੍ਤੀਤਿ ਏਵਂ ਕਿਲੇਸਵਿਭਾਗੇਸੁ. ‘‘ਪਾਲ਼ਿਯਂ’’ਤਿ ਪਟਿਸਮ੍ਭਿਦਾ ਮਗ੍ਗਪਾਲ਼ਿਯਂ. ਵੁਚ੍ਚਮਾਨੇ ਪਨ ਵਤ੍ਤਬ੍ਬਨ੍ਤਿ ਸਮ੍ਬਨ੍ਧੋ. ਮਗ੍ਗਙ੍ਗਬੋਜ੍ਝਙ੍ਗਾਦੀਨਂ ਪਚ੍ਚਵੇਕ੍ਖਨਂ ਨਾਮ ਮਗ੍ਗਪਚ੍ਚਵੇਕ੍ਖਨਮੇਵ. ਤਥਾ ਪਚ੍ਛਾ ਵਾ ਪਵਤ੍ਤਤੀਤਿ ਸਿਦ੍ਧਂ. ‘‘ਅਵਿਰੁਦ੍ਧਾ ਹੋਤੀ’’ਤਿ ਵਿਸੁਦ੍ਧਿਮਗ੍ਗੇਨ ਅਸਮੇਨ੍ਤਾਪਿ ਪਚ੍ਚਵੇਕ੍ਖਨ੍ਤਾਨਂ ਇਚ੍ਛਾਨੁਰੂਪਸਮ੍ਭਵਤੋਤਿ ਅਧਿਪ੍ਪਾਯੋ. ‘‘ਅਧਿਮਾਨਨਿਦ੍ਦੇਸ ਅਟ੍ਠਕਥਾਸੂ’’ਤਿ ਵਿਨਯੇ ਚਤੁਤ੍ਥਪਾਰਾਜਿਕੇ ਅਧਿਮਾਨਪਦਨਿਦ੍ਦੇਸ ਅਟ੍ਠਕਥਾਸੁ. ‘‘ਸੋ’’ਤਿ ਅਰਿਯਭੂਤੋ ਭਿਕ੍ਖੁ. ‘‘ਨੋ ਲਦ੍ਧੁਂ ਨ ਵਟ੍ਟਤੀ’’ਤਿ ਅਲਦ੍ਧੁਂ ਨ ਵਟ੍ਟਤੀਤਿ ਅਤ੍ਥੋ. ਲਦ੍ਧੁਂ ਨੋ ਨ ਵਟ੍ਟਤੀਤਿ ਵਾ ਯੋਜਨਾ. ਚਤੁਬ੍ਬਿਧਂ ਮਗ੍ਗਞ੍ਞਾਣਂ ਗਹਿਤਂ. ਞਾਣਦਸ੍ਸਨਵਿਸੁਦ੍ਧਿ ਨਾਮਾਤਿ ਵੁਤ੍ਤਤ੍ਤਾ.

‘‘ਅਭਿਨਿਵਿਸਨਂ’’ਤਿ ਅਜ੍ਝਤ੍ਤਂ ਦਲ਼੍ਹਤਰਂ ਪਤਿਟ੍ਠਾਨਂ. ‘‘ਨਿਖਾਤਸਿਨੇਰੁਪਾ ਦਸ੍ਸਵਿਯਾ’’ਤਿ ਤਸ੍ਸ ਪਵਤ੍ਤਨਂ ਵਿਯ. ‘‘ਕੇਵਲਂ ਪਚ੍ਚਯਾਯਤ੍ਤ ਵੁਤ੍ਤਿਤਾਯ ਅਦਿਟ੍ਠਤ੍ਤਾ’’ਤਿ ਏਤੇਨ ਏਸੋ ਮੇ ਅਤ੍ਤਾ, ਨ ਪਰਸ੍ਸ ਅਤ੍ਤਾਤਿ ਏਵਂ ਅਤ੍ਤਾਨਂ ਅਤ੍ਤਸ੍ਸ ਸਾਮਿਕਂ ਕਤ੍ਵਾ ਗਹਣਕਾਰਣਂ ਵਦਤਿ. ਤਤ੍ਥ ਕੇਵਲਸਦ੍ਦੇਨ ਪਰਮਤ੍ਥ ਸਚ੍ਚਂ ਪਤ੍ਵਾ ਅਤ੍ਤਸ੍ਸੇਵ ਅਭਾਵਤੋ ਖਨ੍ਧਪਞ੍ਚਕਸ੍ਸ ਅਤ੍ਤਨੋਵਸਾਯਤ੍ਤ ਵੁਤ੍ਤਿਤਂ ਨਿਵਤ੍ਤੇਤਿ. ਸਮ੍ਮੁਤਿ ਸਚ੍ਚਂ ਪਨ ਪਤ੍ਵਾ ਅਤ੍ਤਸ੍ਸ ਵਿਜ੍ਜਮਾਨਤ੍ਤਾ ਮਹਾਜਨੋ ਅਤ੍ਤਨੋ ਖਨ੍ਧਪਞ੍ਚਕਂ ਅਤ੍ਤਨੋ ਵਸਾਯਤ੍ਤ ਵੁਤ੍ਤਿਂ ਮਞ੍ਞਮਾਨੋ ਏਸੋ ਮੇ ਅਤ੍ਤਾਤਿ ਗਣ੍ਹਾਤਿ. ‘‘ਖਣਭਙ੍ਗਸ੍ਸ ਚ ਅਦਿਟ੍ਠਤ੍ਤਾ’’ਤਿ ਏਤੇਨ ਏਸੋ ਮੇ ਸਾਰਟ੍ਠੇਨ ਅਤ੍ਤਾ. ਏਸੋ ਮਮ ਸਾਰੋ. ਏਤਂ ਮਮ ਸਰੀਰਂ. ਯਾਵ ਵਸ੍ਸਸਤਂਪਿ ਵਸ੍ਸਸਹਸ੍ਸਮ੍ਪਿ ਏਤਂ ਖਨ੍ਧਪਞ੍ਚਕਂ ਨ ਭਿਜ੍ਜਤਿ, ਨ ਵਿਨਸ੍ਸਤਿ. ਤਾਵ ਅਹਂ ਨ ਮਰਾਮਿ. ਯਦਾ ਏਤਂ ਭਿਜ੍ਜਤਿ, ਵਿਨਸ੍ਸਤਿ. ਤਦਾ ਅਹਂ ਮਰਾਮਿ. ਅਹਞ੍ਚ ਮਮ ਖਨ੍ਧਪਞ੍ਚਕਞ੍ਚ ਅਦ੍ਵਯਂ ਅਨਾਨਤ੍ਤਨ੍ਤਿ ਏਵਂ ਗਹਣਕਾਰਣਂ ਵਦਤਿ. ਤਤ੍ਥ ‘‘ਖਣਭਙ੍ਗਸ੍ਸਾ’’ਤਿ ਨਾਮਰੂਪਧਮ੍ਮਾਨਂ ਖਣੇ ਖਣੇ ਭਞ੍ਜਨਸ੍ਸ ਭਿਜ੍ਜਨਸ੍ਸ ਮਰਣਸ੍ਸ. ਇਦਮ੍ਪਨਮਰਣਂ ਸਮ੍ਮੁਤਿ ਸਚ੍ਚੇ ਨਤ੍ਥਿ. ਪਰਮਤ੍ਥ ਸਚ੍ਚੇ ਏਵ ਅਤ੍ਥਿ. ਤਸ੍ਮਾ ਤਂ ਅਪਸ੍ਸਨ੍ਤੋ ਮਹਾਜਨੋ ਅਤ੍ਤਨੋ ਖਨ੍ਧਪਞ੍ਚਕਂ ਅਤ੍ਤਨੋਸਾਰਂ ਮਞ੍ਞਮਾਨੋ ਏਸੋ ਮੇ ਅਤ੍ਤਾਤਿ ਗਣ੍ਹਾਤੀਤਿ. ‘‘ਤਂ ਦ੍ਵਯਂ ਸੁਦਿਟ੍ਠਂ ਕਤ੍ਵਾ’’ਤਿ ਖਨ੍ਧਪਞ੍ਚਕਸ੍ਸ ਕੇਵਲਂ ਪਚ੍ਚਯਾਯਤ੍ਤ ਵੁਤ੍ਤਿਤਞ੍ਚ ਖਣਭਙ੍ਗਞ੍ਚ ਞਾਣ ਚਕ੍ਖੁਨਾ ਸੁਟ੍ਠੁਦਿਟ੍ਠਂ ਕਤ੍ਵਾ. ਤਤ੍ਥ ਪਞ੍ਚਨ੍ਨਂ ਖਨ੍ਧਾਨਂ ਪਟਿਚ੍ਚਸਮੁਪ੍ਪਾਦਂ ਸੁਟ੍ਠੁਪਸ੍ਸਨ੍ਤੋ ਕੇਵਲਂ ਪਚ੍ਚਯਾਯਤ੍ਤ ਵੁਤ੍ਤਿਤਞ੍ਚ ਅਵਸਾਯਤ੍ਤ ਵੁਤ੍ਤਿਤਞ੍ਚ ਸੁਟ੍ਠੁ ਪਸ੍ਸਤਿ. ਯੋ ਚ ਅਤ੍ਤਨੋ ਵਸਾਯਤ੍ਤਵੁਤ੍ਤਿ ਨ ਹੋਤਿ. ਸੋ ਪਰਮਤ੍ਥਸਚ੍ਚਂ ਪਤ੍ਵਾ ਏਸੋ ਮਮ ਸਨ੍ਤਕਨ੍ਤਿਪਿ ਵਤ੍ਤੁਂ ਨਾਰਹਤਿ. ਕੁਤੋ ਮਮ ਅਤ੍ਤਾਤਿ. ਅਪਿ ਚ, ਸਤ੍ਤੋ ਨਾਮ ਸਭਾਵਤੋ ਨਤ੍ਥਿ. ਪਞ੍ਞਤ੍ਤਿਮਤ੍ਤਂ ਹੋਤਿ. ਯੋ ‘ਅਹਨ੍ਤਿ ਵਾ, ਮੇਤਿ ਵਾ, ਮਮਾਤਿ ਵਾ, ਗਯ੍ਹੇਯ੍ਯ. ਅਸਨ੍ਤੇ ਚ ਅਤ੍ਤਸ੍ਮਿਂ ਕੋ ਮਮ ਅਤ੍ਤਾ ਨਾਮ ਭਵੇਯ੍ਯਾਤਿ. ਖਣਭਙ੍ਗੋ ਹੋਤਿ. ਖਣੇ ਖਣੇ ਭਿਜ੍ਜਤਿ. ਸਤ੍ਤੋ ਚ ਨਾਮ ਏਕਸ੍ਮਿਂਭਵੇ ਆਦਿਮ੍ਹਿ ਸਕਿਂ ਏਵ ਜਾਯਤਿ. ਅਨ੍ਤੇ ਸਕਿਂ ਏਵ ਮਰਤਿ. ਅਨ੍ਤਰਾ ਵਸ੍ਸਸਤਂਪਿ ਵਸ੍ਸਸਹਸ੍ਸਂਪਿ ਮਰਣਂ ਨਾਮ ਨਤ੍ਥਿ. ਅਞ੍ਞਾਹਿ ਖਣਿਕਧਮ੍ਮਾਨਂ ਗਤਿ. ਅਞ੍ਞਾ ਸਤ੍ਤਸ੍ਸ. ਏਵਂਸਨ੍ਤੇ ਕਥਂ ਖਣਿਕਧਮ੍ਮਾ ਸਤ੍ਤਸ੍ਸ ਸਾਰਟ੍ਠੇਨ ਅਤ੍ਤਾਨਾਮ ਭਵੇਯ੍ਯੁਨ੍ਤਿ. ਤਸ੍ਮਾ ਤੇ ਅਵਸਵਤ੍ਤਨਟ੍ਠੇਨ ਅਸਾਰਕਟ੍ਠੇਨ ਚ ਅਨਤ੍ਤਾ ਏਵ. ਅਪਿਚ ‘‘ਅਵਸਵਤ੍ਤਨਟ੍ਠੇਨਾ’’ਤਿ ਏਤ੍ਥ ਵਸੋ ਨਾਮ ਸਤ੍ਤਸਨ੍ਤਾਨੇ ਏਕੋ ਪਧਾਨਧਮ੍ਮੋ. ਸਚੇ ਅਤ੍ਤਾਨਾਮ ਅਤ੍ਥਿ. ਸੋ ਏਵ ਪਧਾਨਭੂਤਸ੍ਸ ਵਸਸ੍ਸਪਿ ਅਤ੍ਤਾ ਭਵੇਯ੍ਯ. ਏਵਂਸਤਿ, ਯੋ ਵਸੋ, ਸੋ ਅਤ੍ਤਾ. ਯੋ ਅਤ੍ਤਾ, ਸੋ ਵਸੋਤਿ ਭਵੇਯ੍ਯ. ਤਥਾ ਚ ਸਤਿ, ਰੂਪਂ ਅਤ੍ਤਾਤਿ ਗਣ੍ਹਨ੍ਤੋ ਰੂਪਞ੍ਚ ਵਸਞ੍ਚ ਅਤ੍ਤਾਨਞ੍ਚ ਏਕਤ੍ਤਂ ਕਤ੍ਵਾ ਗਣ੍ਹਾਤਿ ਨਾਮ. ਤਥਾ ਵੇਦਨਂ ਅਤ੍ਤਾਤਿ. ਸਞ੍ਞਂ, ਸਙ੍ਖਾਰੇ, ਵਿਞ੍ਞਾਣਂ ਅਤ੍ਤਾਤਿ ਗਣ੍ਹਨ੍ਤੇਪਿ. ਏਵਞ੍ਚਸਤਿ, ਸਤ੍ਤੋ ਚ ਖਨ੍ਧਪਞ੍ਚਕਞ੍ਚ ਵਸੋ ਚ ਅਤ੍ਤਾ ਚ ਸਬ੍ਬਮੇਤਂ ਏਕਤ੍ਤਂ ਗਚ੍ਛਤਿ, ਏਕੋ ਸਤ੍ਤੋਤਿ ਸਙ੍ਖ੍ਯਂ ਗਚ੍ਛਤਿ. ਨ ਹਿ ਇਮਸ੍ਮਿਂ ਵਸਵਤ੍ਤਨਟ੍ਠੇ ਏਕਸ੍ਸਸਤ੍ਤਸ੍ਸ ਦ੍ਵੇ ਅਤ੍ਤਾ ਤਯੋ ਅਤ੍ਤਾ ਬਹੂਅਤ੍ਤਾਤਿ ਸਕ੍ਕਾ ਭਵਿਤੁਂ. ਅਥ ਯਥਾ ਯਥਾ ਸਤ੍ਤਸ੍ਸ ਵਸੋ ਵਤ੍ਤਤਿ, ਇਚ੍ਛਾ ਪਵਤ੍ਤਤਿ. ਤਥਾ ਤਥਾ ਖਨ੍ਧਪਞ੍ਚਕਮ੍ਪਿ ਨਿਚ੍ਚਕਾਲਂ ਸਤ੍ਤਸ੍ਸਵਸਂ ਅਨੁਗਚ੍ਛੇਯ੍ਯ. ਕਸ੍ਮਾ, ਸਤ੍ਤਸ੍ਸ ਚ ਖਨ੍ਧਪਞ੍ਚਕਸ੍ਸ ਚ ਵਸਸ੍ਸ ਚ ਨਾਨਤ੍ਤਾਭਾਵਤੋ. ਏਵਂ ਅਨੁਗਚ੍ਛਨ੍ਤੇ ਸਤਿ. ਰੂਪਂ ਮੇ ਅਤ੍ਤਾ, ਵੇਦਨਾ ਮੇ ਅਤ੍ਤਾਤਿਆਦਿਗ੍ਗਹਣਂ ਵਟ੍ਟੇਯ੍ਯ. ਸਭਾਵਤੋ ਅਵਿਰੁਦ੍ਧਂ ਭਵੇਯ੍ਯ. ਨ ਪਨ ਤਥਾ ਅਨੁਗਚ੍ਛਤਿ. ਨ ਹਿ ਦੁਬ੍ਬਣ੍ਣੋ ਦੁਰੂਪੋ ਪੁਰਿਸੋ ਅਤ੍ਤਨੋ ਰੂਪਕਾਯਂ ਅਤ੍ਤਨੋ ਵਸੇਨੇਵ ਸੁਵਣ੍ਣਂ ਸੁਰੂਪਂ ਕਾਤੁਂ ਸਕ੍ਕੋਤਿ. ਤਥਾ ਦੁਸ੍ਸਦ੍ਦੋਵਾ ਸੁਸਦ੍ਦਂ, ਦੁਗ੍ਗਨ੍ਧੋਵਾ ਸੁਗਨ੍ਧਂ. ਨ ਚ ਅਨ੍ਧੋਵਾ ਅਨਨ੍ਧਂ. ਬਧਿਰੋਵਾ ਅਬਧਿਰਂ. ਰੋਗੀਵਾ ਅਰੋਗਂ. ਕੁਟ੍ਠੀਵਾ ਅਕੁਟ੍ਠਂ. ਗਣ੍ਡੀਵਾ ਅਗਣ੍ਡਂ. ਜਿਣ੍ਣੋਵਾ ਤਰੁਣਂ. ਅਜਰਂ ਵਾ ਅਮਰਣਂ ਵਾ ਕਾਤੁਂ ਸਕ੍ਕੋਤਿ. ਨਾਪਿ ਅਪਾਯੇਸੁ ਚ ਅਪਤਨ੍ਤਂ. ਪਤਿਤ੍ਵਾ ਵਾ ਤਤੋ ਵਿਮੁਤ੍ਤਂ ਕਾਤੁਂ ਸਕ੍ਕੋਤਿ. ਤਥਾ ਦੇਵੋ ਵਾ ਦੇਵਤ੍ਤਾ ਅਚਾਵੇਤੁਂ. ਸਕ੍ਕੋਵਾ ਸਕ੍ਕਤ੍ਤਾ, ਮਾਰੋ ਵਾ ਮਾਰਤ੍ਤਾ, ਬ੍ਰਹ੍ਮਾ ਵਾ ਬ੍ਰਹ੍ਮਤ੍ਤਾਤਿ. ਏਸਨਯੋ ਸੇਸਖਨ੍ਧੇਸੁਪਿ. ਤਥਾ ਪਨ ਅਵਸਾਨੁਗਮਨਤੋ ਪਰਮਤ੍ਥ ਸਚ੍ਚਂ ਪਤ੍ਵਾ ਖਨ੍ਧਪਞ੍ਚਕੇ ਅਤ੍ਤਨੋ ਸਾਮਿਕਿਚ੍ਚਂ ਇਸ੍ਸਰਕਿਚ੍ਚਂ ਨਾਮ ਨਤ੍ਥਿ. ਅਸਾਮਿਕਮੇਵ ਤਂ ਹੋਤਿ, ਅਨਿਸ੍ਸਰਂ. ਤਥਾ ਚ ਸਤਿ, ਅਤ੍ਤਾਨਂ ਤਸ੍ਸ ਸਾਮਿਂ ਇਸ੍ਸਰਂ ਕਤ੍ਵਾ ਰੂਪਂ ਮੇ ਅਤ੍ਤਾਤਿ ਗਹਣਂ ਮਿਚ੍ਛਾਗਹਣਂ ਨਾਮ ਹੋਤੀਤਿ. ਲੋਕੇ ਪਨ ਮਹਾਜਨੋ ਧਮ੍ਮਾਨਂ ਪਟਿਚ੍ਚਸਮੁਪ੍ਪਾਦਂ ਨ ਜਾਨਨ੍ਤਿ, ਨ ਪਸ੍ਸਨ੍ਤਿ, ਨ ਪਟਿਵਿਜ੍ਝਨ੍ਤਿ. ਤੇਸਂ ਪਰਮ੍ਪਰ ਪਚ੍ਚਯਵਸੇਨ ਪਵਤ੍ਤਮਾਨੇ ਖਨ੍ਧਸਨ੍ਤਾਨੇ ਸਮ੍ਮੁਤਿ ਸਚ੍ਚਵਸੇਨ ਨਾਨਾਵਸਵਤ੍ਤਨਾਕਾਰਾ ਨਾਮ ਸਨ੍ਤਿ. ਨਾਨਾਸਾਮਿ ਇਸ੍ਸਰਾਧਿਪਤਿਵੋਹਾਰਾ ਚ ਲੋਕੇ ਸਨ੍ਦਿਸ੍ਸਨ੍ਤਿ. ਤੇ ਸਮ੍ਮੁਤਿ ਸਚ੍ਚਵਸੇਨ ਉਪ੍ਪਨ੍ਨੇਸੁ ਤੇਸੁ ਸਾਮਿਇਸ੍ਸਰਾਧਿਪਤਿ ਵੋਹਾਰੇਸੁ ਵੋਹਾਰਮਤ੍ਤੇ ਅਠਤ੍ਵਾ ਸਭਾਵਸਚ੍ਚਂ ਮਞ੍ਞਨ੍ਤਾ ਮਿਚ੍ਛਾਗਹਣਂ ਗਣ੍ਹਨ੍ਤਿ. ਏਤ੍ਥ ਸਿਯਾ. ਨ ਨੁ ਵਸੋਨਾਮ ਇਚ੍ਛਾ. ਸਤ੍ਤੋ ਚ ਗਨ੍ਤੁਂ ਇਚ੍ਛਨ੍ਤੋ ਗਚ੍ਛਤਿ. ਠਾਤੁਂ ਇਚ੍ਛਨ੍ਤੋ ਤਿਟ੍ਠਤਿ. ਏਵਂਸਤਿ. ਤਸ੍ਸ ਖਨ੍ਧਪਞ੍ਚਕਂ ਤਸ੍ਸ ਵਸਾਯਤ੍ਤ ਵੁਤ੍ਤਿ ਏਵ ਹੋਤੀਤਿ. ਨ ਹੋਤਿ. ਕਸ੍ਮਾ, ਪਚ੍ਚਯਾਯਤ੍ਤ ਵੁਤ੍ਤਿਤ੍ਤਾ ਏਵ. ਤਥਾਹਿ ਗਨ੍ਤੁਂ ਇਚ੍ਛਾਨਾਮ ਬਹਿਦ੍ਧਾ ਧਨਹੇਤੁਵਾ ਉਪ੍ਪਜ੍ਜੇਯ੍ਯ. ਨਾਨਾਭੋਗਹੇਤੁ ਵਾ. ਅਞ੍ਞੇਨ ਵਾ ਨਾਨਾਕਾਰਣੇਨ. ਤਤ੍ਥ ਯੇਸਂ ਧਨੇ ਅਸਤਿ, ਯਂ ਯਂ ਦੁਕ੍ਖਂ ਆਗਚ੍ਛੇਯ੍ਯ ਕਾਯਿਕਂ ਵਾ ਚੇਤਸਿਕਂ ਵਾ. ਤੇਸਂ ਤਂ ਤਂ ਦੁਕ੍ਖਪਚ੍ਚਯਾ ਧਨਿਚ੍ਛਾ ਨਾਮ ਉਪ੍ਪਜ੍ਜਤਿ. ਧਨਿਚ੍ਛਾ ਪਚ੍ਚਯਾ ਗਨ੍ਤਿਚ੍ਛਾਦਯੋ ਉਪ੍ਪਜ੍ਜਨ੍ਤਿ. ਤਥਾ ਨਾਨਾਭੋਗਿਚ੍ਛਾ ਨਾਨਾਕਮ੍ਮਿਚ੍ਛਾਸੁ ਚਾਤਿ. ਨਾਨਾਦੁਕ੍ਖਭਯੁਪਦ੍ਦਵਮੂਲਿਕਾਸੁ ਇਚ੍ਛਾਸੁ ਵਤ੍ਤਬ੍ਬ ਮੇਵ ਨਤ੍ਥਿ. ਤਥਾ ਨਾਨਾਰਮ੍ਮਣਾਨਂ ਪਲੋਭਨ ਦੁਕ੍ਖਮੂਲਿਕਾਸੁ ਚ ਨਾਨਾਵਿਤਕ੍ਕਾਨਂ ਵਿਪ੍ਫਨ੍ਦਨਮੂਲਿਕਾਸੁ ਚ ਇਚ੍ਛਾਸੁ. ਏਵਂ ਵਸੋਪਿ ਪਚ੍ਚਯਾਯਤ੍ਤ ਵੁਤ੍ਤਿਕੋ ਏਵ ਹੋਤਿ. ‘‘ਗਮਨਂ’’ਤਿ ਗਮਨਾਕਾਰੇਨ ਪਵਤ੍ਤਂ ਖਨ੍ਧਪਞ੍ਚਕਂ. ਯੇਨਯੇਨਧਨਾਦਿਹੇਤੁਨਾ ਸੋ ਸੋ ਵਸੋ ਉਪ੍ਪਜ੍ਜਤਿ. ਗਮਨਮ੍ਪਿ ਤੇਨ ਤੇਨੇਵ ਉਪ੍ਪਜ੍ਜਤਿ ਆਹਾਰੁਪਤ੍ਥਮ੍ਭਨਾਦਿਪਚ੍ਚਯੇਨ ਚ. ਵਸੋ ਪਨ ਗਮਨਸ੍ਸ ਪਚ੍ਚਯੇਕ ਦੇਸਮਤ੍ਤਂ ਹੋਤਿ. ਸੋ ਹਿ ਤਦਞ੍ਞਪਚ੍ਚਯੇਹਿ ਵਿਨਾ ਸਯਂ ਉਪ੍ਪਜ੍ਜਿਤੁਂ ਨ ਸਕ੍ਕੋਤਿ. ਕੁਤੋ ਗਮਨਂ ਉਪ੍ਪਾਦੇਤੁਂ. ਏਵਂ ਠਾਨਾਦੀਸੁ. ਏਵਞ੍ਚ ਸਤਿ, ਇਦਂ ਖਨ੍ਧਪਞ੍ਚਕਂ ਪਚ੍ਚਯਾਯਤ੍ਤ ਵੁਤ੍ਤਿਕਨ੍ਤਿਚ੍ਚੇਵ ਵਤ੍ਤੁਂ ਅਰਹਤਿ. ਨੋ ਵਸਾਯਤ੍ਤ ਵੁਤ੍ਤਿਕਨ੍ਤਿ. ਅਪਿ ਚ ਗਨ੍ਤੁਂ ਇਚ੍ਛਨ੍ਤੋ ਗਚ੍ਛਤੀਤਿ ਪਞ੍ਞਤ੍ਤਿ ਮਤ੍ਤਭੂਤੋ ਸਤ੍ਤੋ ਗਚ੍ਛਤਿ. ਖਨ੍ਧਪਞ੍ਚਕਂ ਪਨ ਖਣਿਕ ਧਮ੍ਮਤ੍ਤਾ ਨ ਗਚ੍ਛਤਿ. ਉਪ੍ਪਨ੍ਨੁਪ੍ਪਨ੍ਨਂ ਤਤ੍ਥ ਤਤ੍ਥੇਵ ਭਿਜ੍ਜਤਿ. ਸਨ੍ਤਤਿ ਵਸੇਨ ਗਮਨਾਕਾਰ ਨਿਮਿਤ੍ਤਂ ਪਞ੍ਞਾਯਤਿ. ਏਵਂ ਅਵਸਵਤ੍ਤਨਂ ਹੋਤੀਤਿ. ਹੋਤੁ ਤਤ੍ਥ ਤਤ੍ਥੇਵ ਭਿਜ੍ਜਨਂ. ਅਵਿਚ੍ਛੇਦਪ੍ਪਵਤ੍ਤਿਯਾ ਸਤਿ, ਗਮਨਂ ਸਮ੍ਪਜ੍ਜਤਿਯੇਵ. ਗਮਨੇ ਚ ਸਮ੍ਪਜ੍ਜਮਾਨੇ ਖਣਿਕਭਿਜ੍ਜਨੇਨ ਦੋਸੋ ਨਤ੍ਥੀਤਿ ਚੇ. ਅਤ੍ਥਿ. ਖਣਿਕਮਰਣਞ੍ਹਿ ਸਤ੍ਤਸ੍ਸ ਸੁਸਾਨਭੂਮਿ ਨਾਮ ਹੋਤਿ. ਅਨ੍ਤਰਾਯੇਵਾ ਆਗਤੇ ਪਕ੍ਖਲਨ੍ਤੇ ਵਾ ਸਤਿ, ਗਚ੍ਛਨ੍ਤੋ ਸਤ੍ਤੋ ਯਦਾ ਕਦਾਚਿ ਮਰਣਂ ਵਾ ਨਿਗਚ੍ਛਤਿ ਮਰਣ ਮਤ੍ਤਂ ਵਾ ਦੁਕ੍ਖਨ੍ਤਿ. ਕਿਲੇਸੇ ਨਿਮਿਨਾਤਿ ਪਵਤ੍ਤੇਤੀਤਿ ਨਿਮਿਤ੍ਤਨ੍ਤਿ ਵਚਨਤ੍ਥੋ. ‘‘ਵਿਪਲ੍ਲਾਸਨਿਮਿਤ੍ਤਂ’’ਤਿ ਚ ਵਿਪਲ੍ਲਾਸ ਧਮ੍ਮਾਨਂ ਵਸੇਨ ਉਪਟ੍ਠਿਤਂ ਕਿਚ੍ਚ ਨਿਮਿਤ੍ਤਂ. ਤਣ੍ਹਾ ਏਵ ਪਣਿਧੀਤਿ ਸਮ੍ਬਨ੍ਧੋ. ਮਹਨ੍ਤਾਨਂ ਆਦੀਨਵਾਨਂ ਰਾਸਿ ਮਹਾਆਦੀਨਵਰਾਸਿ. ਖਨ੍ਧੇਸੁ ਸੁਞ੍ਞਤਲਕ੍ਖਣਂ ਨਾਮ ਅਤਿ ਗਮ੍ਭੀਰਂ ਹੋਤਿ. ਞਾਣਸ੍ਸੇਵ ਵਿਸਯਭੂਤਂ. ਸੁਞ੍ਞਤ ਦਸ੍ਸਨਞ੍ਚ ਦਿਟ੍ਠਿਯਾ ਉਜੁਪ੍ਪਟਿਪਕ੍ਖਨ੍ਤਿ ਆਹ ‘‘ਸਙ੍ਖਾਰੇਸੁ ਸੁਞ੍ਞਤਦਸ੍ਸਨਵਸੇਨਾ’’ਤਿਆਦਿਂ. ਤਤ੍ਥ ‘‘ਅਤ੍ਥ ਸਿਦ੍ਧਿ ਨਾਮਾ’’ਤਿ ਮਗ੍ਗਫਲਪ੍ਪਟਿਲਾਭਸਙ੍ਖਾਤਸ੍ਸ ਅਤ੍ਥਸ੍ਸ ਸਿਦ੍ਧਿ ਨਾਮ. ਅਤ੍ਤਾਤਿ ਅਭਿਨਿਵੇਸੋ ਅਤ੍ਤਾਭਿਨਿਵੇਸੋ. ਗਣ੍ਹਾਤੀਤਿ ਗਾਹੋ. ਉਪਾਦੀਯਤੀਤਿ ਅਤ੍ਥੋ. ਦਿਟ੍ਠਿਸਙ੍ਖਾਤੋ ਗਾਹੋ ਦਿਟ੍ਠਿਗ੍ਗਾਹੋ. ਅਤ੍ਥਾਭਿਨਿਵੇਸੋ ਚ ਸੋ ਦਿਟ੍ਠਿਗ੍ਗਾਹੋ ਚਾਤਿ ਵਿਗ੍ਗਹੋ. ਤਸ੍ਸ ਪਟਿਪਕ੍ਖਂ ਅਨਤ੍ਤਾਨੁਪਸ੍ਸਨਾਞਾਣਂ. ਅਨੁ ਅਨੁ ਭਵਨਂ ਆਨੁਭਾਵੋ. ਪਰਮ੍ਪਰਤੋ ਵਡ੍ਢਨਨ੍ਤਿ ਅਤ੍ਥੋ. ‘‘ਤਥਾ ਸਮਨੁਪਸ੍ਸਿਤ੍ਵਾ’’ਤਿ ਸੁਞ੍ਞਤਾ ਕਾਰੇਨ ਸਮਨੁਪਸ੍ਸਿਤ੍ਵਾ. ਵਿਮੁਞ੍ਚਨ੍ਤਸ੍ਸ ਅਰਿਯਪੁਗ੍ਗਲਸ੍ਸ. ‘‘ਅਨਿਚ੍ਚਲਕ੍ਖਣਂ ਨਾਮ ਨਾਤਿ ਗਮ੍ਭੀਰਂ ਹੋਤਿ. ਸਦ੍ਧਾਯਪਿ ਵਿਸਯਭੂਤਂ. ਉਨ੍ਨਤਿਲਕ੍ਖਣੋ ਚ ਅਹਂ ਮਾਨੋ ਖਨ੍ਧੇਸੁ ਨਿਚ੍ਚਧੁਵਵਿਪਲ੍ਲਾਸਮੂਲਕੋ ਸਦ੍ਧਾਯ ਚ ਪਟਿਪਕ੍ਖੋਤਿ ਆਹ ‘‘ਅਨਿਚ੍ਚਦਸ੍ਸਨਵਸੇਨਾ’’ਤਿਆਦਿਂ. ‘‘ਨਿਮਿਤ੍ਤਾਭਿਨਿਵੇਸਭੂਤਸ੍ਸਾ’’ਤਿ ਨਿਚ੍ਚਧੁਵਨਿਮਿਤ੍ਤਾਭਿਨਿਵੇਸਭੂਤਸ੍ਸ. ‘‘ਮਾਨਗ੍ਗਾਹਸ੍ਸਾ’’ਤਿ ਮਾਨਸਙ੍ਖਾਤਸ੍ਸ ਗਾਹਸ੍ਸ. ‘‘ਸਦ੍ਧਾਯ ਪੀ’’ਤਿਪਿਸਦ੍ਦੇਨ ਞਾਣਂ ਸਮ੍ਪਿਣ੍ਡੇਤਿ. ਦੁਕ੍ਖਲਕ੍ਖਣਂ ਨਾਮ ਭਯਸਂਵੇਗ ਜਨਕਂ ਹੋਤਿ. ਆਰਮ੍ਮਣੇਸੁ ਤਣ੍ਹਾਲੋਲਸ੍ਸ ਤਣ੍ਹਾਵਿਪ੍ਫਨ੍ਦਨਸ੍ਸ ਪਟਿਪਕ੍ਖਂ. ਵਿਸੇਸਤੋ ਸਮਾਧਿਸ੍ਸ ਅਨੁਰੂਪਨ੍ਤਿ ਆਹ ‘‘ਦੁਕ੍ਖਦਸ੍ਸਨ ਵਸੇਨਾ’’ਤਿਆਦਿਂ. ‘‘ਤਿਣ੍ਣਂ ਧਮ੍ਮਾਨਂ’’ਤਿ ਪਞ੍ਞਿਨ੍ਦ੍ਰਿਯ ਸਦ੍ਧਿਨ੍ਦ੍ਰਿਯ ਸਮਾਧਿਨ੍ਦ੍ਰਿਯ ਸਙ੍ਖਾਤਾਨਂ ਤਿਣ੍ਣਂ ਇਨ੍ਦ੍ਰਿਯ ਧਮ੍ਮਾਨਂ. ‘‘ਵਿਪਸ੍ਸਨਾ ਗਮਨਵਸੇਨੇ ਵਾ’’ਤਿ ਵੁਟ੍ਠਾਨਗਾਮਿਨਿ ਵਿਪਸ੍ਸਨਾ ਸਙ੍ਖਾਤਸ੍ਸ ਆਗਮਨ ਕਾਰਣਸ੍ਸ ਵਸੇਨੇਵ.

ਇਦਾਨਿ ਪੁਬ੍ਬੇ ਯਂ ਵੁਤ੍ਤਂ ‘ਸਤ੍ਤਅਰਿਯ ਪੁਗ੍ਗਲਵਿਭਾਗਸ੍ਸ ਪਚ੍ਚਯਭਾਵਪਤ੍ਤਿਯਾ ਚਾ’ਤਿ. ਤਤ੍ਥ ਸਤ੍ਤ ਅਰਿਯਪੁਗ੍ਗਲਵਿਭਾਗਂ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਧਮ੍ਮਾਨੁਸਾਰੀ ਨਾਮਾਤਿ ਏਤ੍ਥ ‘‘ਧਮ੍ਮੋ’’ਤਿ ਪਞ੍ਞਾ ਵੁਚ੍ਚਤਿ ‘ਸਚ੍ਚਂ, ਧਮ੍ਮੋ, ਧੀਤਿ, ਚਾਗੋ,ਤਿ ਏਤ੍ਥ ਵਿਯ. ਤਿਕ੍ਖਤਰਂ ਧਮ੍ਮਂ ਅਨੁਸ੍ਸਰਤੀਤਿ ਧਮ੍ਮਾਨੁਸਾਰੀ. ਪਞ੍ਞਾਬਲਾਨੁਸਾਰੇਨ ਆਦਿਮ੍ਹਿ ਮਗ੍ਗਂ ਲਭਤੀਤਿ ਵੁਤ੍ਤਂ ਹੋਤਿ. ਅਥਵਾ. ‘‘ਧਮ੍ਮੋ’’ਤਿ ਨਿਸ੍ਸਤ੍ਤਨਿਜ੍ਜੀਵਟ੍ਠੇਨ ਸਙ੍ਖਾਰ ਧਮ੍ਮੋ ਵੁਚ੍ਚਤਿ. ਸੁਞ੍ਞਤਦਸ੍ਸਨਞ੍ਚ ਨਾਮ ਵਿਸੇਸਤੋ ਸੁਦ੍ਧਧਮ੍ਮ ਦਸ੍ਸਨਂ ਨਾਮ. ਇਤਿ ਸੁਦ੍ਧਧਮ੍ਮਂ ਅਨੁਸ੍ਸਰਤਿ, ਞਾਣਗਤਿਯਾ ਅਨੁਗਚ੍ਛਤੀਤਿ ਧਮ੍ਮਾਨੁਸਾਰੀ. ਦਿਟ੍ਠਿਪਤ੍ਤੋਤਿ ਏਤ੍ਥ ਦਿਟ੍ਠਿਨਾਮ ਦਸ੍ਸਨਞ੍ਞਾਣਂ ਵੁਚ੍ਚਤਿ. ਆਦਿਤੋ ਪਟ੍ਠਾਯ ਪਰਿਸੁਦ੍ਧ ਦਸ੍ਸਨਸਮ੍ਪਨ੍ਨਤ੍ਤਾ ਦਿਟ੍ਠਿਬਲੇਨੇਵ ਸੁਖੇਨ ਤਂ ਤਂ ਮਗ੍ਗਫਲਂ ਪਤ੍ਤੋਤਿ ਦਿਟ੍ਠਿਪਤ੍ਤੋ. ਤੇਨੇਵ ਦਸ੍ਸਨ ਪਞ੍ਞਾਬਲੇਨ ਕਿਲੇਸਬਨ੍ਧਨਤੋ ਵਿਮੁਤ੍ਤੋਤਿ ਪਞ੍ਞਾਵਿਮੁਤ੍ਤੋ. ਸਙ੍ਖਾਰ ਧਮ੍ਮਾਨਂ ਖਣਿਕ ਧਮ੍ਮਭਾਵੇ ਸੁਟ੍ਠੁ ਸਦ੍ਦਹਨਂ ਅਵੇਚ੍ਚਪ੍ਪਸਾਦੋ ਸਦ੍ਧਾ ਨਾਮ. ਤਤ੍ਥ ‘‘ਅਵੇਚ੍ਚਪ੍ਪਸਾਦੋ’’ਤਿ ਞਾਣਸਮ੍ਪਯੁਤ੍ਤਪ੍ਪਸਾਦੋ. ‘‘ਞਾਣਂ’’ਤਿ ਚ ਸਙ੍ਖਾਰ ਧਮ੍ਮਾਨਂ ਖਣਿਕਭਾਵਨਿਮਿਤ੍ਤਾਨਂ ਦਸ੍ਸਨਞ੍ਞਾਣਂ. ਤਾਦਿਸੇ ਹਿ ਞਾਣੇ ਸਤਿ, ਤਤ੍ਥ ਅਵੇਚ੍ਚਪ੍ਪਸਾਦੋ ਨਾਮ ਜਾਯਤਿ, ਨੋ ਅਞ੍ਞਥਾਤਿ. ਸਦ੍ਧਂ ਅਨੁਸ੍ਸਰਤੀਤਿ ਸਦ੍ਧਾਨੁਸਾਰੀ. ਸਦ੍ਧਾਬਲੇਨੇਵ ਆਦਿਮ੍ਹਿ ਅਰਿਯਮਗ੍ਗਂ ਪਾਪੁਣਾਤੀਤਿ ਵੁਤ੍ਤਂ ਹੋਤਿ. ਸਦ੍ਧਾਬਲੇਨ ਵਿਮੁਤ੍ਤੋਤਿ ਸਦ੍ਧਾਵਿਮੁਤ੍ਤੋ. ‘‘ਕਾਯਸਕ੍ਖਿ ਨਾਮਾ’’ਤਿ ਏਤ੍ਥ ਸਕ੍ਖਂਤਿ ਸਨ੍ਦਿਟ੍ਠਂ. ਯਂ ਸਾਧਕਨ੍ਤਿਪਿ ਵੁਚ੍ਚਤਿ. ਅਤ੍ਤਨੋ ਕਾਯੇ ਏਵ ਲਦ੍ਧਂ ਸਕ੍ਖਂ ਯਸ੍ਸਾਤਿ ਕਾਯਸਕ੍ਖੀ. ਦੁਕ੍ਖਾਨੁ ਪਸ੍ਸੀ ਪੁਗ੍ਗਲੋ ਹਿ ਸਂਵੇਗ ਬਹੁਲੋ ਹੋਤਿ. ਸਂਵੇਗੋ ਚ ਪਧਾਨ ਵੀਰਿਯਸ੍ਸ ਪਦਟ੍ਠਾਨਂ. ਸਂਵਿਗ੍ਗੋ ਯੋਨਿਸੋ ਪਦਹਤੀਤਿ ਹਿ ਵੁਤ੍ਤਂ. ਤਸ੍ਮਾ ਸੋ ਸਂਵੇਗਵਸੇਨ ਭਾਵਨਂ ਅਨੁਯੁਞ੍ਜਨ੍ਤੋ ਯਂ ਯਂ ਪੁਰਿਸਥਾਮੇਨ ਪਤ੍ਤਬ੍ਬਂ ਹੋਤਿ. ਤਂ ਤਂ ਪਾਪੁਣਾਤਿ. ਪਾਪੁਣਨ੍ਤੋ ਚ ਅਤ੍ਤਨੋ ਕਾਯੇ ਏਵ ਸਕ੍ਖਂ ਲਭਤਿ. ਸਨ੍ਦਿਟ੍ਠਂ ਝਾਨਸੁਖਂ ਵਾ ਮਗ੍ਗਫਲਸੁਖਂ ਵਾ ਲਭਤੀਤਿ ਵੁਤ੍ਤਂ ਹੋਤਿ. ‘‘ਉਭਤੋਭਾਗ ਵਿਮੁਤ੍ਤੋ’’ਤਿ ਅਰੂਪਜ੍ਝਾਨੇਹਿ ਰੂਪਕਾਯਤੋ ਅਰਹਤ੍ਤਮਗ੍ਗਫਲੇਹਿ ਨਾਮਕਾਯਤੋਤਿ ਏਵਂ ਉਭੋਹਿ ਕਾਯਭਾਗੇਹਿ ਵਿਮੁਤ੍ਤੋ. ਏਤ੍ਥ ਚ ਤਯੋ ਅਰਿਯਪੁਗ੍ਗਲਾ ਪਞ੍ਞਾਧਿਕੋ ਚ ਸਦ੍ਧਾਧਿਕੋ ਚ ਵੀਰਿਯਾਧਿਕੋ ਚ. ਤਤ੍ਥ ਧਮ੍ਮਾਨੁਸਾਰੀ ਚ ਦਿਟ੍ਠਿਪਤ੍ਤੋ ਚ ਪਞ੍ਞਾਵਿਮੁਤ੍ਤੋ ਚ ਪਞ੍ਞਾਧਿਕੋ ਨਾਮ. ਸਦ੍ਧਾਨੁਸਾਰੀ ਚ ਸਦ੍ਧਾਵਿਮੁਤ੍ਤੋ ਚ ਸਦ੍ਧਾਧਿਕੋ ਨਾਮ. ਕਾਯਸਕ੍ਖੀ ਚ ਉਭਤੋਭਾਗਵਿਮੁਤ੍ਤੋ ਚ ਵੀਰਿਯਾਧਿਕੋ ਨਾਮਾਤਿ ਦਟ੍ਠਬ੍ਬਂ. ਅਯਞ੍ਚ ਪੁਗ੍ਗਲਵਿਭਾਗਨਯੋ ਪਟਿਸਮ੍ਭਿਦਾਮਗ੍ਗਨਯੇਨ ਵੁਤ੍ਤੋ. ਅਭਿਧਮ੍ਮੇ ਪਨ ਪੁਗ੍ਗਲ ਪਞ੍ਞਤ੍ਤਿਯਂ ਸਦ੍ਧਾਵਿਮੁਤ੍ਤੋ ਚ ਕਾਯਸਕ੍ਖੀ ਚ ਦ੍ਵੇਪੁਗ੍ਗਲਾ ਸੇਕ੍ਖੇਸੁ ਏਵ ਵੁਤ੍ਤਾ. ਅਰਹਤ੍ਤਂ ਪਤ੍ਤਾ ਪਨ ਏਤੇ ਦ੍ਵੇਪਿ ਪਞ੍ਞਾਵਿਮੁਤ੍ਤਾ ਏਵਾਤਿ ਦਟ੍ਠਬ੍ਬਾ. ਏਤ੍ਥ ਸਿਯਾ, ਸਙ੍ਖਾਰ ਧਮ੍ਮਾਨਂ ਖਣਿਕ ਧਮ੍ਮਭਾਵੇ ਸੁਟ੍ਠੁ ਸਦ੍ਦਹਨਂ ਅਵੇਚ੍ਚਪ੍ਪਸਾਦੋ ਸਦ੍ਧਾ ਨਾਮਾਤਿ ਵੁਤ੍ਤਂ. ਕਿਂ ਪਨ ਤਾਦਿਸੇਨ ਸਦ੍ਧਾਮਤ੍ਤੇਨ ਸੋਤਾਪਤ੍ਤਿ ਮਗ੍ਗਂ ਪਾਪੁਣਾਤੀਤਿ. ਏਤ੍ਥ ਅਮ੍ਹੇਹਿ ਵਤ੍ਤਬ੍ਬਂ ਨਤ੍ਥਿ. ਭਗਵਤਾ ਏਵ ਵੁਤ੍ਤਂ. ਯਥਾਹ ਮਹਾਵਗ੍ਗੇ ਓਕ੍ਕਨ੍ਤ ਸਂਯੁਤ੍ਤੇ ਚਕ੍ਖੁ ਭਿਕ੍ਖਵੇ ਅਨਿਚ੍ਚਂ ਵਿਪਰਿਣਾਮੀ ਅਞ੍ਞਥਾਭਾਵੀ, ਯੋ ਏਵਂ ਸਦ੍ਦਹਤਿ, ਏਵਂ ਅਧਿਮੁਚ੍ਚਤਿ. ਅਯਂ ਵੁਚ੍ਚਤਿ ਸਦ੍ਧਾਨੁਸਾਰੀ. ਓਕ੍ਕਨ੍ਤੋ ਅਰਿਯਭੂਮਿਂ. ਅਤਿਕ੍ਕਨ੍ਤੋ ਪੁਥੁਜ੍ਜਨਭੂਮਿਂ. ਸੋ ਯੇਨਕਮ੍ਮੇਨ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਉਪ੍ਪਜ੍ਜੇਯ੍ਯ. ਨ ਤਂ ਕਮ੍ਮਂ ਕਰੋਤੀਤਿ. ਸੋਤਂ ਭਿਕ੍ਖਵੇ ਅਨਿਚ੍ਚਂ. ਵਿਪਰਿਣਾਮੀ ਅਞ੍ਞਥਾਭਾਵੀਤਿਆਦਿਨਾ ਦ੍ਵਾਦਸਾਯਤਨਾਨਿ ਵਿਤ੍ਥਾਰੇ ਤਬ੍ਬਾਨਿ. ਤਤ੍ਥ ‘‘ਵਿਪਰਿਣਾਮੀ’’ਤਿ ਵਿਪਰਿਣਾਮੋ ਯਸ੍ਸ ਅਤ੍ਥੀਤਿ ਵਿਪਰਿਣਾਮੀ. ਵਿਪਰਿਣਾਮੋਤਿ ਚ ਖਣੇ ਖਣੇ ਜੀਰਣਤਾ ਭਿਜ੍ਜਨਤਾ ਵੁਚ੍ਚਤਿ. ‘‘ਅਞ੍ਞਥਾਭਾਵੀ’’ਤਿ ਤਸ੍ਸੇਵ ਵੇਵਚਨਂ. ‘‘ਏਵਂ ਅਧਿਮੁਚ੍ਚਤੀ’’ਤਿ ਏਤੇਨ ਞਾਣਸਮ੍ਪਯੁਤ੍ਤਸਦ੍ਧਂ ਦੀਪੇਤਿ. ਸਾ ਏਵ ਸੋਤਾਪਤ੍ਤਿਯਙ੍ਗੇਸੁ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ, ਧਮ੍ਮੇ, ਸਙ੍ਘੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋਤਿ ਵੁਤ੍ਤਾ. ਤਤ੍ਥ ਞਾਣਸਮ੍ਪਯੁਤ੍ਤਸਦ੍ਧਾ ਨਾਮ ਚਕ੍ਖਾਦੀਨਂ ਅਨਿਚ੍ਚਨਿਮਿਤ੍ਤ ਦਸ੍ਸਨਞ੍ਞਾਣੇਨ ਸਮ੍ਪਯੁਤ੍ਤਾ ਓਕਪ੍ਪਨਸਦ੍ਧਾ. ਅਨਿਚ੍ਚਨਿਮਿਤ੍ਤਞ੍ਚ ਨਾਮ ਰੂਪਂ ਅਨਿਚ੍ਚਂ ਖਯਟ੍ਠੇਨਾਤਿਪਦੇ ਵੁਤ੍ਤਨਯੇਨ ਚਕ੍ਖਾਦਿਨਿਸ੍ਸਯਾਨਂ ਮਹਾਭੂਤਾਨਂ ਸਨ੍ਤਤਿ ਪਰਿਵਤ੍ਤਨਾਦਿਕਂ ਵੁਚ੍ਚਤਿ. ਤਞ੍ਹਿ ਪਸ੍ਸਨ੍ਤੋ ਚਕ੍ਖਾਦੀਨਂ ਅਨਿਚ੍ਚਭਾਵੇ ਸਦ੍ਦਹਤਿ, ਅਧਿਮੁਚ੍ਚਤਿ. ਤਾਨਿਪਿ ਖਣੇ ਖਣੇ ਏਕਨ੍ਤੇਨ ਭਿਜ੍ਜਤਿ ਯੇਵਾਤਿ ਸਦ੍ਧਾਧਿਮੋਕ੍ਖਂ ਸਦ੍ਧਾਵਿਨਿਚ੍ਛਯਂ ਪਟਿਲਭਤੀਤਿ ਅਤ੍ਥੋ. ‘‘ਬੁਦ੍ਧੇ ਅਵੇਚ੍ਚਪ੍ਪਸਾਦੇਨਾ’’ਤਿ ਏਤ੍ਥ ਪਨ ਅਰਹਤਾ ਸਮ੍ਮਾਸਮ੍ਬੁਦ੍ਧਤਾਦੀਨਂ ਬੁਦ੍ਧਗੁਣਾਦੀਨਂ ਦਸ੍ਸਨਞ੍ਞਾਣੇਨ ਸਮ੍ਪਯੁਤ੍ਤੋ ਪਸਾਦੋ ਅਵੇਚ੍ਚਪ੍ਪਸਾਦੋ ਨਾਮ. ਅਰਿਯਭੂਮਿ ਨਾਮ ਦਿਟ੍ਠਾਨੁਸਯ ਵਿਚਿਕਿਚ੍ਛਾਨੁਸਯੇਹਿ ਪਰਿਸੁਦ੍ਧਾ ਅਵਤ੍ਥਾਭੂਮਿ ਵੁਚ੍ਚਤਿ. ਤੇਹਿ ਸਹਿਤਾ ਅਵਤ੍ਥਾਭੂਮਿ ਪੁਥੁਜ੍ਜਨਭੂਮਿ ਨਾਮ. ਕਥਂ ਪਨ ਤਸ੍ਸ ਪੁਗ੍ਗਲਸ੍ਸ ਪੁਥੁਜ੍ਜਨਭੂਮਿਂ ਅਤਿਕ੍ਕਨ੍ਤਤਾ ਅਰਿਯਭੂਮਿਂ ਓਕ੍ਕਨ੍ਤਤਾ ਚ ਵਿਞ੍ਞਾਯਤੀਤਿ ਆਹ ‘‘ਸੋ ਯੇਨਾ’’ਤਿਆਦਿਂ. ਯੋ ਅਤ੍ਤਨੋ ਜੀਵਿਤਹੇਤੁਪਿ ਕਿਞ੍ਚਿ ਕਮ੍ਮਪਥਪਤ੍ਤਂ ਅਪਾਯਗਾਮਿ ਕਮ੍ਮਂ ਨ ਕਰੋਤਿ. ਸੋ ਏਕਨ੍ਤੇਨ ਪੁਥੁਜ੍ਜਨਭੂਮਿਂ ਅਤਿਕ੍ਕਨ੍ਤੋ, ਅਰਿਯਭੂਮਿਂ ਓਕ੍ਕਨ੍ਤੋਤਿ ਵਿਞ੍ਞਾਯਤੀਤਿ ਵੁਤ੍ਤਂ ਹੋਤਿ. ਇਦਂ ਸਦ੍ਧਾਨੁਸਾਰਿਸੁਤ੍ਤਂ. ਅਪਰਂਪਿ ਵੁਤ੍ਤਂ ਚਕ੍ਖੁ ਭਿਕ੍ਖਵੇ ਵਿਪਰਿਣਾਮੀ ਅਞ੍ਞਥਾਭਾਵੀ. ਯਸ੍ਸ ਏਵਂ ਮਤ੍ਤਸੋ ਨਿਜ੍ਝਾਨਂ ਖਮਤਿ. ਅਯਂ ਵੁਚ੍ਚਤਿ ਧਮ੍ਮਾਨੁਸਾਰੀ ਤਿਆਦਿ. ਤਤ੍ਥ ‘‘ਮਤ੍ਤਸੋ ਨਿਜ੍ਝਾਨਂ ਖਮਤੀ’’ਤਿ ਸਦ੍ਧਾਨੁਸਾਰੀਵਿਯ ਸਦ੍ਦਹਨਮਤ੍ਤੇ ਅਟ੍ਠਤ੍ਵਾ ਚਕ੍ਖਾਦੀਨਂ ਤਾਦਿਸਂ ਅਨਿਚ੍ਚਤਂ ਸਮਨੁਪਸ੍ਸਨ੍ਤੋ ਥੋਕਂ ਥੋਕਂ ਦਸ੍ਸਨਂ ਲਭਤਿਯੇਵ. ਏਵਂਸਤਿ, ਚਕ੍ਖਾਦੀਨਿ ਤਸ੍ਸ ਪੁਗ੍ਗਲਸ੍ਸ ਨਿਜ੍ਝਾਨਂ ਓਲੋਕਨਂ ਮਤ੍ਤਸੋ ਖਮਨ੍ਤਿ ਨਾਮ. ਇਦਂ ਧਮ੍ਮਾਨੁਸਾਰਿਸੁਤ੍ਤਂ. ਅਪਰਂਪਿ ਵੁਤ੍ਤਂ ਚਕ੍ਖੁ ਭਿਕ੍ਖਵੇ ਅਨਿਚ੍ਚਂ ਵਿਪਰਿਣਾਮੀ ਅਞ੍ਞਥਾਭਾਵੀ. ਯੋ ਏਵਂ ਪਜਾਨਾਤਿ ਪਸ੍ਸਤਿ. ਅਯਂ ਵੁਚ੍ਚਤਿ ਸੋਤਾਪਨ੍ਨੋ ਤਿਆਦਿ. ਤਤ੍ਥ ‘‘ਪਜਾਨਾਤਿ ਪਸ੍ਸਤੀ’’ਤਿ ਧਮ੍ਮਾਨੁਸਾਰੀਵਿਯ ਮਤ੍ਤਸੋ ਨਿਜ੍ਝਾਨਕ੍ਖਮਮਤ੍ਤੇ ਅਟ੍ਠਤ੍ਵਾ ਪਞ੍ਞਾਯ ਪਜਾਨਾਤਿ, ਞਾਣਚਕ੍ਖੁਨੋ ਪਚ੍ਚਕ੍ਖਤੋ ਪਸ੍ਸਤੀਤਿ ਅਤ੍ਥੋ. ਇਦਂ ਦਿਟ੍ਠਿਪਤ੍ਤਾਦੀਨਂ ਸੁਤ੍ਤਂ.

‘‘ਯਥਾ ਸਕਂ ਫਲਂ’’ਤਿ ਏਤ੍ਥ ਸਸ੍ਸ ਅਤ੍ਤਨੋ ਇਦਂ ਸਕਂ. ਯਂ ਯਂ ਸਕਂ ਯਥਾਸਕਨ੍ਤਿ ਅਤ੍ਥਂ ਦਸ੍ਸੇਤਿ ਸੋਤਾਪਨ੍ਨਸ੍ਸਾਤਿਆਦਿਨਾ. ਫਲਸਮਾਪਤ੍ਤਿ ਵੀਥਿਯਂ ਪਨ ਅਨੁਲੋਮਜਵਨਾਨਿ ਏਵ ਫਲਾਨਂ ਆਸਨ੍ਨਕਾਰਣਾਨਿ, ਨ ਮਗ੍ਗਜਵਨਾਨੀਤਿ ਆਹ ‘‘ਨ ਮਗ੍ਗਾਗਮਨਵਸੇਨਾ’’ਤਿ. ‘‘ਸੋ’’ਤਿ ਮਗ੍ਗੋ. ਸਨ੍ਤੋ ਸਂਵਿਜ੍ਜਮਾਨੋ ਸਬ੍ਭਾਵੋ. ‘‘ਅਸ੍ਸਾ’’ਤਿ ਮਗ੍ਗਸ੍ਸ.

ਅਨਿਚ੍ਚਾਨੁਪਸ੍ਸਨਾ ਕਿਚ੍ਚਤੋ ਅਨਿਮਿਤ੍ਤਾ ਹੋਤਿ. ਸਭਾਵਤੋ ਸਨਿਮਿਤ੍ਤਾਏਵ. ਨਿਚ੍ਚਨਿਮਿਤ੍ਤਸਹਿਤਾਏਵ. ਯਤੋ ਸਾ ਏਸੋਹਮਸ੍ਮੀਤਿਗ੍ਗਹਣਂ ਲਭਤਿ. ਇਦਂਪਿ ਵਿਪਸ੍ਸਨਾਞਾਣਂ ਅਨਿਚ੍ਚਂ ਖਯਟ੍ਠੇਨਾਤਿ ਸਮਨੁਪਸ੍ਸਿਤਬ੍ਬਾ ਚ ਹੋਤੀਤਿ. ਤਤ੍ਥ ਚ ਅਭਿਧਮ੍ਮਂ ਪਤ੍ਵਾ ਸਭਾਵਪ੍ਪਧਾਨਂ ਹੋਤਿ, ਨ ਕਿਚ੍ਚਪ੍ਪਧਾਨਂ. ਤਸ੍ਮਾ ਅਭਿਧਮ੍ਮ ਨਯੇਨ ਵਿਪਸ੍ਸਨਾ ਅਤ੍ਤਨੋ ਨਿਮਿਤ੍ਤ ਨਾਮਂ ਮਗ੍ਗਸ੍ਸ ਦਾਤੁਂ ਨ ਸਕ੍ਕੋਤਿ. ਅਯਂ ਅਟ੍ਠਕਥਾਯ ਅਧਿਪ੍ਪਾਯੋ. ਕਿਲੇਸ ਧਮ੍ਮਾ ਨਾਮ ਯਸ੍ਸ ਉਪ੍ਪਜ੍ਜਨ੍ਤਿ, ਤਂ ਪੁਗ੍ਗਲਂ ਪਲਿਬੁਨ੍ਧਨ੍ਤਿ. ਸਮ੍ਬਾਧਂ ਕਰੋਨ੍ਤਿ. ਤਸ੍ਮਾ ਪਲਿਬੋਧਕਰਾਨਾਮ. ਤਂ ਪੁਗ੍ਗਲਂ ਨਿਚ੍ਚਨਿਮਿਤ੍ਤ ਸੁਭਨਿਮਿਤ੍ਤ ਸੁਖਨਿਮਿਤ੍ਤ ਅਤ੍ਤਨਿਮਿਤ੍ਤਾਨਿ ਗਾਹੇਨ੍ਤਿ. ਤਸ੍ਮਾ ਨਿਮਿਤ੍ਤਕਰਾਨਾਮ. ਤਂ ਪੁਗ੍ਗਲਂ ਆਰਮ੍ਮਣੇਸੁ ਭੁਸਂ ਨਿਹਿਤਂ ਨਿਵਿਟ੍ਠਂ ਕਰੋਨ੍ਤਿ. ਤਸ੍ਮਾ ਪਣਿਧਿਕਰਾਨਾਮ. ਤੇ ਚ ਮਗ੍ਗਫਲਾਨਿ ਆਰਮ੍ਮਣਂ ਨ ਕਰੋਨ੍ਤਿ. ਮਗ੍ਗਫਲੇਹਿ ਚ ਸਮ੍ਪਯੋਗਂ ਨ ਗਚ੍ਛਨ੍ਤਿ. ਏਵਂ ਆਰਮ੍ਮਣਕਰਣਾ ਦਿਵਸੇਨ ਮਗ੍ਗਫਲੇਸੁ ਤੇਸਂ ਅਭਾਵੋ. ਅਭਾਵਤ੍ਤਾਏਵ ਚ ਤਾਨਿ ਮਗ੍ਗਫਲਾਨਿ ਅਤ੍ਤਨੋ ਧਮ੍ਮਤਾਯ ਤੀਣਿਨਾਮਾਨਿ ਲਭਨ੍ਤੀਤਿ ਦਸ੍ਸੇਤੁਂ ‘‘ਆਰਮ੍ਮਣ ਕਰਣਵਸੇਨਵਾ’’ਤਿਆਦਿ ਵੁਤ੍ਤਂ. ‘‘ਅਤ੍ਤਨੋ ਸਭਾਵੇਨਾ’’ਤਿ ਅਤ੍ਤਨੋ ਧਮ੍ਮਤਾਯ.

‘‘ਅਤ੍ਤਦਿਟ੍ਠਿਯਾ ਉਪ੍ਪਨ੍ਨਾਯ ਉਪ੍ਪਜ੍ਜਨ੍ਤੀ’’ਤਿ ਇਦਂ ਤਾਸਂ ਦਿਟ੍ਠਿਵਿਚਿਕਿਚ੍ਛਾਨਂ ਅਤ੍ਤਦਿਟ੍ਠਿਯਾ ਅਵਿਨਾਭਾਵਂ ਦੀਪੇਤਿ. ਨ ਪਨ ਅਤ੍ਤਦਿਟ੍ਠਿਯਾ ਤਾਹਿ ਅਵਿਨਾਭਾਵਨ੍ਤਿ ਦਟ੍ਠਬ੍ਬਂ. ਵਿਪਚ੍ਚਨ੍ਤੀਤਿ ਅਪਾਯੇਸੁ ਵਿਪਚ੍ਚਨ੍ਤਿ. ਅਪਾਯਪਟਿਸਨ੍ਧਿਂ ਜਨੇਨ੍ਤਿ. ਦਿਟ੍ਠਸਚ੍ਚਾਨਞ੍ਚ ਅਰਿਯਪੁਗ੍ਗਲਾਨਂ. ਦਿਟ੍ਠਿਵਿਚਿਕਿਚ੍ਛਾਸਮ੍ਪਯੁਤ੍ਤਾ ਅਕੁਸਲਧਮ੍ਮਾ ਦਿਟ੍ਠਿਵਿਚਿਕਿਚ੍ਛਾਗ੍ਗਹਣੇਨ ਗਹਿਤਾਤਿ ਆਹ ‘‘ਦਿਟ੍ਠਿਵਿਚਿਕਿਚ੍ਛਾ ਵਿਪ੍ਪਯੁਤ੍ਤਾ’’ਤਿ. ‘‘ਅਕੁਸਲਧਮ੍ਮਾਚੇ ਵਾ’’ਤਿ ਪਚ੍ਚੁਪ੍ਪਨ੍ਨਭੂਤਾ ਦਸਾਕੁਸਲਕਮ੍ਮਪਥ ਧਮ੍ਮਾ ਚੇਵ. ‘‘ਸਤ੍ਤਹਿ ਭਵੇਹੀ’’ਤਿ ਕ੍ਰਿਯਾਪਵਗ੍ਗੇ ਕਰਣਵਚਨਂ. ਯਥਾ ਸਤ੍ਤਹਿ ਮਾਸੇਹਿ ਵਿਹਾਰਂ ਨਿਟ੍ਠਾਪੇਤੀਤਿ. ਕ੍ਰਿਯਾਪਵਗ੍ਗੋਤਿਚ ਕ੍ਰਿਯਾਯਸੀਘਤਰਂ ਨਿਟ੍ਠਾਪਨਂ ਵੁਚ੍ਚਤਿ. ‘‘ਸਤ੍ਤਕ੍ਖਤ੍ਤੁਂ’’ਤਿ ਸਤ੍ਤਵਾਰਾ. ਤੀਣਿ ਸਂਯੋਜਨਾਨਿਨਾਮ ‘ਸਕ੍ਕਾਯਦਿਟ੍ਠਿ, ਵਿਚਿਕਿਚ੍ਛਾ, ਸੀਲਬ੍ਬਤਪਰਾਮਾਸਸਂਯੋਜਨਾਨਿ,. ‘‘ਅਵਿਨਿਪਾਤ ਧਮ੍ਮੋ’’ਤਿ ਵਿਰੂਪਂ ਹੁਤ੍ਵਾ ਪਤਨਂ ਵਿਨਿਪਾਤੋ. ਅਪਾਯਨਿਪਾਤੋਤਿ ਵੁਤ੍ਤਂ ਹੋਤਿ. ‘‘ਧਮ੍ਮੋ’’ਤਿ ਸਭਾਵੋ. ਨਤ੍ਥਿ ਵਿਨਿਪਾਤੋ ਧਮ੍ਮੋ ਯਸ੍ਸਾਤਿ ਵਿਗ੍ਗਹੋ. ‘‘ਨਿਯਤੋ’’ਤਿ ਸੁਗਤਿਭਵੇਸੁ ਨਿਯਤ ਗਤਿਕੋ. ਸਮ੍ਮਾ ਬੁਜ੍ਝਤੀਤਿ ਸਮ੍ਬੋਧਿ. ਮਗ੍ਗਞ੍ਞਾਣਂ. ‘‘ਪਰਾਯਨਂ’’ਤਿ ਪਰਭਾਗੇ ਗਨ੍ਤਬ੍ਬਟ੍ਠਾਨਂ ਵੁਚ੍ਚਤਿ. ਸਮ੍ਬੋਧਿਸਙ੍ਖਾਤਂ ਪਰਾਯਨਂ ਅਸ੍ਸਾਤਿ ਸਮ੍ਬੋਧਿਪਰਾਯਨੋ. ‘‘ਅਨਿਯਮਤ੍ਥੋ’’ਤਿ ਵਾਸਦ੍ਦਤ੍ਥੋਤਿ ਵੁਤ੍ਤਂ ਹੋਤਿ. ਵਾ ਸਦ੍ਦਤ੍ਥੇਸੁ ਚ ਅਨਿਯਮਤ੍ਥੋ. ਨ ਵਿਕਪ੍ਪਤ੍ਥੋ. ਵਿਕਪ੍ਪਤ੍ਥੇਹਿ ਸਤਿ ਦ੍ਵੇ ਏਵ ਸਤ੍ਤਕ੍ਖਤ੍ਤੁਪਰਮਾ ਲਬ੍ਭਨ੍ਤਿ. ਮਿਸ੍ਸਕਭਵੋਨ ਲਬ੍ਭਤਿ. ਅਨਿਯਮਤ੍ਥੇ ਤਯੋਪਿ ਲਬ੍ਭਨ੍ਤਿ. ਅਟ੍ਠਕਥਾਯਂ ਪਨ ਸਮੁਚ੍ਚਯਤ੍ਥਸ੍ਸ ਗਹਿਤਤ੍ਤਾ ਏਕੋ ਮਿਸ੍ਸਕਭਵੋ ਏਵ ਲਬ੍ਭਤਿ. ਨਨੁ ਚ ਸਦ੍ਦੋ ਨਾਮ ਸਮੁਚ੍ਚਯਤ੍ਥੇ ਪਾਕਟੋ, ਨ ਅਨਿਯਮਤ੍ਥੇ. ਤਸ੍ਮਾ ਸਮੁਚ੍ਚਯਤ੍ਥੋਵ ਇਧ ਯੁਤ੍ਤੋਤਿ ਚੇ. ਨ ਯੁਤ੍ਤੋ. ਕਸ੍ਮਾ. ਦ੍ਵਿਨ੍ਨਂ ਅਸਙ੍ਗਹਿਤਤ੍ਤਾ. ਅਟ੍ਠਕਥਾਯਂ ਪਨ ਸਮੁਚ੍ਚਯਤ੍ਥਂ ਗਹੇਤ੍ਵਾ ਤੇ ਦ੍ਵੇ ਪੁਗ੍ਗਲਾ ਇਮਸ੍ਮਿਂ ਪਾਠੇ ਅਸਙ੍ਗਹਿਤਾਤਿ ਵੁਤ੍ਤਂ. ਯਦਿ ਤੇ ਇਮਸ੍ਮਿਂ ਪਾਠੇ ਅਸਙ੍ਗਹਿਤਾ. ਕਤ੍ਥਤੇ ਸਙ੍ਗਹਿਤਾ ਭਵੇਯ੍ਯੁਂ. ਨ ਹਿ ਕੋਚਿ ਸਤ੍ਤਕ੍ਖਤ੍ਤੁ ਪਰਮੋ ਨਾਮ ਇਧ ਅਸਙ੍ਗਹਿਤੋਤਿ ਯੁਤ੍ਤੋਤਿ. ‘‘ਅਸ੍ਸਾ’’ਤਿ ਤਸ੍ਸਪਾਲ਼ਿਪਾਠਸ੍ਸ. ‘‘ਏਤ੍ਥ ਚ ਯਸ੍ਮਾ. ਲ. ਪਰਮੋ ਨਾਮ ਵੁਤ੍ਤੋ’’ਤਿ ਇਦਂ ਉਪਰਿ ‘ਯੇ ਕਾਮਭਵੇ ਯੇਵਾ’ਤਿਆਦਿਨਾ ‘ਯੇਦਿਟ੍ਠ ਧਮ੍ਮੇ ਵਾ’ਤਿਆਦਿਨਾ ਚ ਯੋਜੇਤਬ੍ਬਂ. ਸੋ ਚ ਸੁਕ੍ਖਵਿਪਸ੍ਸਕੋ ਵਾ ਪਰਿਹੀਨਜ੍ਝਾਨੋ ਵਾ ਦਟ੍ਠਬ੍ਬੋਤਿ ਸਮ੍ਬਨ੍ਧੋ. ‘‘ਪਾਲ਼ਿਯਂ’’ਤਿ ਪੁਗ੍ਗਲਪਞ੍ਞਤ੍ਤਿ ਪਾਲ਼ਿਯਂ. ‘‘ਇਧ ਨਿਟ੍ਠਾ’’ਤਿ ਇਮਸ੍ਮਿਂ ਕਾਮਲੋਕੇ ਆਸਵਕ੍ਖਯਂ ਪਤ੍ਵਾ ਖਨ੍ਧਪਰਿਨਿਬ੍ਬਾਨਪਤ੍ਤਿ ਵਸੇਨ ਨਿਟ੍ਠਾ. ਨਿਟ੍ਠਾਨਂ ਪਰਿਯੋਸਾਨਨ੍ਤਿ ਅਤ੍ਥੋ. ਕੁਲਤੋ ਕੁਲਂ ਗਚ੍ਛਤੀਤਿ ਕੋਲਂਕੋਲੋ. ਭਵਤੋ ਭਵਂ ਗਚ੍ਛਤੀਤਿ ਅਤ੍ਥੋ. ਏਕਮੇਵ ਪਟਿਸਨ੍ਧਿਸਙ੍ਖਾਤਂ ਭਵਬੀਜਂ ਅਸ੍ਸ ਅਤ੍ਥੀਤਿ ਏਕਬੀਜੀ. ਯੋ ਚ ਦਿਟ੍ਠੇਵ ਧਮ੍ਮੇ ਅਰਹਾ. ਤਸ੍ਸ ਚ ਇਧ ਨਿਟ੍ਠਾਤਿ ਯੋਜਨਾ. ਕੇਨ ਪਨ ਤਿਣ੍ਣਂ ਸੋਤਾਪਨ੍ਨਾਨਂ ਵਿਸੇਸੋ ਕਤੋਤਿ. ਸਤ੍ਤਕ੍ਖਤ੍ਤੁ ਪਰਮੋ ਤਾਵ ਕੇਵਲਂ ਪਥਮਮਗ੍ਗ ਸਮ੍ਪਯੁਤ੍ਤੇਹਿ ਇਨ੍ਦ੍ਰਿਯੇਹਿ ਕਤੋ. ਇਤਰੇ ਦ੍ਵੇ ਉਪਰਿਮਗ੍ਗਤ੍ਥਾਯ ਪਵਤ੍ਤਿਤੇਹਿ ਵਿਪਸ੍ਸਨਿਨ੍ਦ੍ਰਿਯੇਹਿ ਕਤੋਤਿ. ਤਤ੍ਥ ਸਤ੍ਤਕ੍ਖਤ੍ਤੁ ਪਰਮੋ ਸਬ੍ਬਮੁਦੁਕੋ ਹੋਤਿ. ਤਤੋ ਕੋਲਂਕੋਲੋ ਤਿਕ੍ਖੋ. ਸੋ ਪਨ ਛ ਭਵਿਕੋ, ਪਞ੍ਚਭਵਿਕੋ, ਚਤੁਭਵਿਕੋ, ਤਿਭਵਿਕੋ, ਦ੍ਵਿਭਵਿਕੋਤਿ ਪਞ੍ਚਵਿਧੋ. ਤਤ੍ਥ ਪਞ੍ਚਭਵਿਕੋ ਤਿਕ੍ਖੋ. ਸੇਸਾ ਅਨੁਕ੍ਕਮੇਨ ਤਿਕ੍ਖਤਰਾਤਿ ਦਟ੍ਠਬ੍ਬਾ. ਏਕਬੀਜੀ ਪਨ ਏਕਭਵਿਕੋ ਸਬ੍ਬਤਿਕ੍ਖੋ. ਤਤ੍ਥ ਸਤ੍ਤਕ੍ਖਤ੍ਤੁ ਪਰਮੋ ਕੇਵਲੇਨ ਪਥਮਮਗ੍ਗਾਨੁਭਾਵੇਨ ਸਿਦ੍ਧਤ੍ਤਾ ਸਬ੍ਬਮੁਦੁਕੋ ਹੋਤਿ. ਇਤਰੇ ਦ੍ਵੇਪਕਤਿਯਾ ਸਤ੍ਤਕ੍ਖਤ੍ਤੁ ਪਰਮਭਾਵੇ ਠਤ੍ਵਾ ਉਪਰਿਮਗ੍ਗਤ੍ਥਾਯ ਵਿਪਸ੍ਸਨਾ ਕਮ੍ਮਂ ਪਟ੍ਠਪੇਨ੍ਤਿ. ਤਦਾ ਤੇਸਂ ਇਨ੍ਦ੍ਰਿਯਾਨਿ ਪੁਨ ਵਿਸੇਸ ਪਤ੍ਤਾਨਿ ਹੋਨ੍ਤਿ, ਤਿਕ੍ਖਾਨਿ. ਤਸ੍ਮਾ ਤੇ ਸਤ੍ਤਕ੍ਖਤ੍ਤੁ ਪਰਮਤੋ ਤਿਕ੍ਖਾਨਾਮ ਹੋਨ੍ਤੀਤਿ. ‘‘ਸਤ੍ਤਵਾਰਤੋ ਓਰਂ ਵਾ’’ਤਿ ਇਦਂ ਕੋਲਂਕੋਲ ਏਕਬੀਜਿਨੋ ਸਨ੍ਧਾਯ ਵੁਤ੍ਤਂ. ‘‘ਉਪਰਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਨਿਯਾਮੇਤੀ’’ਤਿ ਇਦਂ ਉਪਰਿਮੇ ਦ੍ਵੇਸੋਤਾਪਨ੍ਨੇ ਸਨ੍ਧਾਯ ਵੁਤ੍ਤਂ. ਸਤ੍ਤਕ੍ਖਤ੍ਤੁ ਪਰਮੋਪਨ ਪਥਮਮਗ੍ਗੇਨੇਵ ਨਿਯਮਿਤੋਤਿ ਦਟ੍ਠਬ੍ਬਂ. ਤਥਾਹਿ ਸੋਯੇਵ ਸਙ੍ਗਹਪਾਠੇ ਸਰੂਪਤੋ ਆਗਤੋ ਸੋਤਾਪਤ੍ਤਿ ਮਗ੍ਗਂ ਭਾਵੇਤ੍ਵਾ ਦਿਟ੍ਠਿਵਿਚਿਕਿਚ੍ਛਾਪਹਾਨੇਨ ਪਹੀਨਾਪਾਯਗਮਨੋ ਸਤ੍ਤਕ੍ਖਤ੍ਤੁ ਪਰਮੋ ਸੋਤਾਪਨ੍ਨੋ ਨਾਮ ਹੋਤੀਤਿ. ਇਤਰੇ ਪਨ ਦ੍ਵੇ ਪਾਲ਼ਿਯਂ ਸੋਤਾਪਨ੍ਨ ਪੁਗ੍ਗਲਵਿਭਾਗਟ੍ਠਾਨੇਸ੍ਵੇਵ ਆਗਤਾਤਿ. ‘‘ਯੇ ਪਨਾ’’ਤਿ ਯੇ ਸੋਤਾਪਨ੍ਨ ਪੁਗ੍ਗਲਾਪਨ. ਗਾਥਾਯਂ ‘‘ਇਤੋਸਤ੍ਤਾ’’ਤਿ ਇਮਸ੍ਮਿਂ ਮਨੁਸ੍ਸਲੋਕੇ ਸਤ੍ਤ ਸਂਸਰਾਨਿ. ‘‘ਤਤੋਸਤ੍ਤਾ’’ਤਿ ਤਸ੍ਮਿਂ ਦੇਵਲੋਕੇ ਸਤ੍ਤਾਤਿ ਅਤ੍ਥੋ. ਅਙ੍ਗੁਤ੍ਤਰਪਾਠੇ ‘‘ਤੇਨਚਿਤ੍ਤਪ੍ਪਸਾਦੇਨਾ’’ਤਿ ਮਹਾਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਤੁਂ ਸਮਤ੍ਥਸ੍ਸ ਸਤ੍ਥੁਗੁਣੇ ਚਿਤ੍ਤਪ੍ਪਸਾਦੋ ਜਾਯਤਿ. ਤੇਨ ਚਿਤ੍ਤਪ੍ਪਸਾਦੇਨ. ‘‘ਤੇਨ ਪਰਿਯਾਯੇਨਾ’’ਤਿ ਸਚੇ ਸੋ ਦੇਵੇਸੁ ਏਵ ਸਂਸਰਤਿ. ਸਤ੍ਤਕ੍ਖਤ੍ਤੁਂ ਓਪਪਾਤਿਕ ਪਟਿਸਨ੍ਧਿਯੋ ਗਣ੍ਹਿਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਿਸ੍ਸਤਿ. ਯਦਿ ਮਨੁਸ੍ਸੇਸੁ ਏਵ ਸਂਸਰਤਿ. ਸਤ੍ਤਗਬ੍ਭਸੇਯ੍ਯਕ ਪਟਿਸਨ੍ਧਿਯੋ ਗਣ੍ਹਿਤ੍ਵਾ ਏਤ੍ਥੇਵ ਪਰਿਨਿਬ੍ਬਾਯਿਸ੍ਸਤਿ. ਏਵਂ ਦੇਸਨਾ ਵਾਰੇਨ ਚੁਦ੍ਦਸ ਕਤ੍ਵਾ ਦੇਸਿਤੇਨ ਪਰਿਯਾਯੇਨਾਤਿ ਅਤ੍ਥੋ. ‘‘ਤਂ ਵੀਮਂਸਿਤਬ੍ਬਂ’’ਤਿ ਵਦਨ੍ਤੇਨ ਟੀਕਾਚਰਿਯੇਨ ਸਯਂ ਚੁਦ੍ਦਸਪਟਿਸਨ੍ਧਿਯੋਵ ਇਚ੍ਛਤੀਤਿ ਦੀਪੇਤਿ. ਇਦਾਨਿ ਤਂ ਚੁਦ੍ਦਸਪਟਿਸਨ੍ਧਿਵਾਦਂ ਪਟਿਕ੍ਖਿਪਨ੍ਤੋ ‘‘ਵਿਭਙ੍ਗੇ ਪਨਾ’’ਤਿਆਦਿਮਾਹ. ‘‘ਵਿਭਙ੍ਗੇ’’ਤਿ ਅਭਿਧਮ੍ਮੇ ਞਾਣਵਿਭਙ੍ਗੇ. ਨਤ੍ਥਿ ਠਾਨਮਸ੍ਸਾਤਿ ਅਟ੍ਠਾਨਂ. ‘‘ਠਾਨਂ’’ਤਿ ਮੂਲਕਾਰਣਂ. ਨਤ੍ਥਿ ਅਵਕਾਸੋ ਅਸ੍ਸਾਤਿ ਅਨਵਕਾਸੋ. ‘‘ਅਵਕਾਸੋ’’ਤਿ ਪਚ੍ਚਯਕਾਰਣਂ. ‘‘ਯਂ’’ਤਿ ਕ੍ਰਿਯਾਪਰਾਮਸਨਂ. ਯਂ ਨਿਬ੍ਬਤ੍ਤੇਯ੍ਯ, ਤਂ ਨਿਬ੍ਬਤ੍ਤਨਂ ਅਟ੍ਠਾਨਂ. ਸੋ ਨਿਬ੍ਬਤ੍ਤਨ ਧਮ੍ਮੋ ਅਨਵਕਾਸੋਤਿ ਯੋਜਨਾ. ‘‘ਅਭਿਸਙ੍ਖਾਰ ਵਿਞ੍ਞਾਣਸ੍ਸਾ’’ਤਿ ਸਤ੍ਤਭਵਤੋ ਉਦ੍ਧਂ ਕਾਮਭਵੇ ਪਟਿਸਨ੍ਧਿਜਨਕਸ੍ਸ ਕੁਸਲਾ ਕੁਸਲਕਮ੍ਮ ਵਿਞ੍ਞਾਣਸ੍ਸ. ‘‘ਨਿਰੋਧੇਨਾ’’ਤਿ ਸੋਤਾਪਤ੍ਤਿ ਮਗ੍ਗਕ੍ਖਣੇ ਏਵ ਨਿਰੋਧਨੇਨ. ਨਿਰੁਜ੍ਝਨ੍ਤੀਤਿ ਸਮ੍ਬਨ੍ਧੋ. ‘‘ਨਾਮਞ੍ਚ ਰੂਪਞ੍ਚਾ’’ਤਿ ਯੇ ਨਾਮ ਰੂਪਧਮ੍ਮਾ ਉਪ੍ਪਜ੍ਜੇਯ੍ਯੁਂ. ਏਤੇ ਨਾਮ ਰੂਪਧਮ੍ਮਾ ਏਤ੍ਥ ਏਤਸ੍ਮਿਂ ਅਭਿਸਙ੍ਖਾਰ ਵਿਞ੍ਞਾਣ ਨਿਰੋਧਕ੍ਖਣੇ ਨਿਰੁਜ੍ਝਨ੍ਤੀਤਿ ਯੋਜਨਾ. ‘‘ਯਥਾਵੁਤ੍ਤਨਯੇਨੇਵਾ’’ਤਿ ਤੇਨ ਪਰਿਯਾਯੇਨਾਤਿ ਵੁਤ੍ਤਪ੍ਪਕਾਰਨਯੇਨੇਵ. ‘‘ਤਦੇਕਟ੍ਠਮੋਹਸ੍ਸਾ’’ਤਿ ਤੇਨ ਰਾਗੇਨ ਤੇਨ ਦੋਸੇਨ ਏਕਸ੍ਮਿਂ ਚਿਤ੍ਤੇ ਏਕਤੋ ਠਿਤਸ੍ਸ ਮੋਹਸ੍ਸ. ਨ ਦਿਟ੍ਠਿਵਿਚਿਕਿਚ੍ਛਾ ਸਮ੍ਪਯੁਤ੍ਤਸ੍ਸ ਮੋਹਸ੍ਸ. ਤਸ੍ਸ ਪਥਮਮਗ੍ਗੇ ਏਵ ਪਹੀਨਤ੍ਤਾ. ਨਾਪਿ ਉਦ੍ਧਚ੍ਚਚਿਤ੍ਤਸਮ੍ਪਯੁਤ੍ਤਸ੍ਸ ਮੋਹਸ੍ਸ. ਤਸ੍ਸ ਚਤੁਤ੍ਥਮਗ੍ਗੇ ਏਵ ਪਹਾਤਬ੍ਬਤ੍ਤਾ. ਉਪ੍ਪਜ੍ਜਨ੍ਤਾ ਰਾਗਦੋਸਮੋਹਾ. ‘‘ਧਮ੍ਮਿਕੇਸੂ’’ਤਿ ਧਮ੍ਮੇਨ ਸਮੇਨ ਉਪ੍ਪਨ੍ਨੇਸੁ. ‘‘ਯਤੋ’’ਤਿ ਯਂਕਾਰਣਾ. ਬਲਵਨ੍ਤਕਾਰਣਾਤਿ ਅਤ੍ਥੋ. ‘‘ਤੇਸਂ’’ਤਿ ਸੋਤਾਪਨ੍ਨਾਨਂ. ‘‘ਸਲ੍ਲਿਖਨ ਵਸੇਨਾ’’ਤਿ ਬਹਲਪਕ੍ਖਂ ਥੂਲਭਾਗਂ ਸੁਟ੍ਠੁਲਿਖਨਵਸੇਨ. ਅਧਿਚ੍ਚੁਪ੍ਪਤ੍ਤਿ ਨਾਮ ਪੁਬ੍ਬੇ ਯਥਾਪਵਤ੍ਤਂ ਕਾਲਂ ਅਧਿਚ੍ਚ ਅਤਿਕ੍ਕਮ੍ਮ ਉਪ੍ਪਤ੍ਤਿ. ਉਪ੍ਪਜ੍ਜਨ੍ਤਾਨਮ੍ਪਿ ਰਾਗਦੋਸਮੋਹਾਨਂ. ‘‘ਤੇਸਂ ਪੀ’’ਤਿ ਸਕਦਾਗਾਮੀਨਮ੍ਪਿ. ‘‘ਮੇਥੁਨਵਤ੍ਥੁ ਸਮਾਯੋਗੋ ਇਚ੍ਛਿਤੋ’’ਤਿ ਜਾਯਮ੍ਪਤੀਨਂ ਮੇਥੁਨਕਮ੍ਮਸਮਾਯੋਗੋ ਨਾਮ ਸਕਦਾਗਾਮੀਨਂ ਅਤ੍ਥੀਤਿ ਇਚ੍ਛਿਤੋ. ਥੇਰੋਹਿ ਅਧਿਚ੍ਚੁਪ੍ਪਤ੍ਤਿਮਤ੍ਤਂ ਇਚ੍ਛਤਿ. ਪਰਿਯੁਟ੍ਠਾਨਮਨ੍ਦਤਂ ਨ ਇਚ੍ਛਤਿ. ਸਕਦਾਗਾਮੀਨਂ ਪੁਤ੍ਤਧੀਤਰੋਪਿ ਸਨ੍ਦਿਸ੍ਸਨ੍ਤੀਤਿ ਵਦਤਿ. ‘‘ਮਹਾਅਟ੍ਠਕਥਾਯਂ ਪਟਿਕ੍ਖਿਤ੍ਤੋ’’ਤਿ ਥੇਰਸ੍ਸ ਮਨੋਰਥਮਤ੍ਤਂਤਿ ਵਤ੍ਵਾ ਪਟਿਕ੍ਖਿਤ੍ਤੋ. ਇਦਂ ਸਬ੍ਬਂ ਅਟ੍ਠਸਾਲਿਨਿਯਂ ਵੁਤ੍ਤਂ. ‘‘ਛਕ੍ਕਨਿਪਾਤੇ’’ਤਿ ਅਙ੍ਗੁਤ੍ਤਰੇ ਛਕ੍ਕਨਿਪਾਤੇ. ‘‘ਮਿਗਾਸਾਲ਼ਵਤ੍ਥੁਮ੍ਹੀ’’ਤਿ ਮਿਗਾਸਾਲ਼ਨਾਮਿਕਾਯ ਉਪਾਸਿਕਾਯ ਵਤ੍ਥੁਮ੍ਹਿ. ਕੇਚਿ ਇਮਂ ਵਤ੍ਥੁਂ ਦਿਸ੍ਵਾ ਮਹਾਅਟ੍ਠਕਥਾਵਾਦਂ ਨ ਰੋਚੇਨ੍ਤਿ. ਮਹਾਸਿਵਤ੍ਥੇਰਵਾਦਂ ਰੋਚੇਨ੍ਤਿ. ‘‘ਅਬ੍ਰਹ੍ਮਚਾਰਿਨੋ’’ਤਿ ਮੇਥੁਨ ਧਮ੍ਮਾ ਅਪ੍ਪਟਿਵਿਰਤਸ੍ਸ. ‘‘ਸਕਦਾਗਾਮਿਤ੍ਤਂ ਬ੍ਯਾਕਤਂ’’ਤਿ ਤਸ੍ਮਿਂ ਕਾਲਙ੍ਕਤੇ ਸੋ ਬ੍ਰਾਹ੍ਮਣੋ ਇਧ ਸਕਦਾਗਾਮਿਭਾਵਂ ਪਤ੍ਵਾ ਤੁਸਿਤਾਕਾਯਂ ਉਪਪਨ੍ਨੋਤਿ ਏਵਂ ਤਸ੍ਸ ਯਂ ਸਕਦਾਗਾਮਿਤ੍ਤਂ ਭਗਵਤਾ ਬ੍ਯਾਕਤਂ. ‘‘ਅਧਿਗਮਵਸੇਨਾ’’ਤਿ ਸਕਦਾਗਾਮਿਭਾਵਂ ਪਟਿਲਾਭਵਸੇਨ. ਨ ਪਨ ਅਬ੍ਰਹ੍ਮਚਾਰਿਨੋ ਸਤੋ ਅਧਿਗਮਵਸੇਨਾਤਿ ਅਧਿਪ੍ਪਾਯੋ. ਮਰਣਾਸਨ੍ਨਕਾਲੇਪਿ ਹਿ ਸਿਕ੍ਖਾਪਦਾਧਿਟ੍ਠਾਨੇਨ ਸਹ ਉਪਰਿਮਗ੍ਗਫਲਾਧਿਗਮਨਂ ਨਾਮ ਤਿਕ੍ਖਪਞ੍ਞਸ੍ਸ ਅਰਿਯਸਾਵਕਸ੍ਸ ਨ ਦੁਕ੍ਕਰਨ੍ਤਿ. ਏਤੇਨ ਕੇਸਞ੍ਚਿ ਥੇਰਵਾਦਰੋਚਨਂ ਪਟਿਕ੍ਖਿਤ੍ਤਂ ਹੋਤਿ. ‘‘ਸਕਿਂਦੇਵ ਇਮਂਲੋਕਂ ਆਗਨ੍ਤ੍ਵਾ’’ਤਿ ਏਤੇਨ ਇਤੋ ਪਰਲੋਕਂ ਗਮਨਸ੍ਸ ਚ ਤਤੋ ਪੁਨ ਇਧਾਗਮਨਸ੍ਸ ਚ ਸਿਦ੍ਧਤ੍ਤਾ ਅਯਂ ਪੁਗ੍ਗਲੋ ਸੁਦ੍ਧੇਨ ਮਗ੍ਗਨਿਯਾਮੇਨ ਕਾਮਭਵੇ ਦ੍ਵਿਕ੍ਖਤ੍ਤੁ ਪਰਮੋਨਾਮ ਹੋਤੀਤਿ ਸਿਦ੍ਧੋ. ਕਥਂ. ਇਧ ਪਤ੍ਵਾ ਤਤ੍ਥ ਨਿਬ੍ਬਤ੍ਤਿਤ੍ਵਾ ਇਧ ਪਰਿਨਿਬ੍ਬਾਯੀ, ਤਤ੍ਥ ਪਤ੍ਵਾ ਇਧ ਨਿਬ੍ਬਤ੍ਤਿਤ੍ਵਾ ਤਤ੍ਥ ਪਰਿਨਿਬ੍ਬਾਯੀਤਿ. ਸੇਸਾਪਨ ਚਤ੍ਤਾਰੋ ਵਿਪਸ੍ਸਨਾਨਿਯਾਮੇਨ ਸਿਦ੍ਧਾ ਹੋਨ੍ਤੀਤਿ ਵਿਞ੍ਞਾਯਤਿ. ਕਤਮੇ ਚਤ੍ਤਾਰੋ. ਇਧ ਪਤ੍ਵਾ ਇਧ ਪਰਿਨਿਬ੍ਬਾਯੀ. ਤਤ੍ਥ ਪਤ੍ਵਾ ਤਤ੍ਥ ਪਰਿਨਿਬ੍ਬਾਯੀ. ਇਧ ਪਤ੍ਵਾ ਤਤ੍ਥ ਪਰਿਨਿਬ੍ਬਾਯੀ. ਤਤ੍ਥ ਪਤ੍ਵਾ ਇਧ ਪਰਿਨਿਬ੍ਬਾਯੀਤਿ. ਏਤ੍ਥ ਚ ਤੀਸੁ ਸੋਤਾਪਨ੍ਨੇਸੁ ਏਕੋਸਤ੍ਤਕ੍ਖਤ੍ਤੁ ਪਰਮੋ ਏਵ ਮਗ੍ਗਨਿਯਾਮੇਨ ਸਿਦ੍ਧੋ. ਸੇਸਾ ਪਨ ਦ੍ਵੇ ਸੋਤਾਪਨ੍ਨਾ ਵਿਪਸ੍ਸਨਾਨਿਯਾਮੇਨ ਸਿਦ੍ਧਾ. ਛ ਸਕਦਾਗਾਮੀਸੁ ਦ੍ਵੇ ਏਵ ਮਗ੍ਗਨਿਯਾਮੇਨ ਸਿਦ੍ਧਾ. ਸੇਸਾ ਪਨ ਚਤ੍ਤਾਰੋ ਵਿਪਸ੍ਸਨਾਨਿਯਾਮੇਨ ਸਿਦ੍ਧਾ. ਤਤ੍ਥ ਮਗ੍ਗਸਿਦ੍ਧੇਸੁ ਸੋਤਾਪਨ੍ਨ ਸਕਦਾਗਾਮੀਸੁ ਸਙ੍ਕਰੋ ਨਤ੍ਥਿ. ਵਿਪਸ੍ਸਨਾਸਿਦ੍ਧੇਸੁ ਪਨ ਸਙ੍ਕਰੋ ਅਤ੍ਥਿ. ਅਤ੍ਥਤੋ ਅਵਿਰੁਦ੍ਧੇ ਸਤਿ, ਵੋਹਾਰਮਤ੍ਤੇਨ ਸਙ੍ਕਰੇ ਦੋਸੋ ਨਤ੍ਥੀਤਿ ਦਟ੍ਠਬ੍ਬਂ. ਆਗਨ੍ਤ੍ਵਾਤਿ ਪਾਠਵਸੇਨ ਆਗਮਨਤੋਤਿ ਵੁਤ੍ਤਂ. ਆਗਨ੍ਤਾਤਿ ਪਨ ਪਾਠੋ ਯੁਤ੍ਤੋ. ਆਗਮਨਸੀਲੋ ਆਗਮਨ ਧਮ੍ਮੋ ਹੁਤ੍ਵਾ ਸਕਦਾਗਾਮੀ ਨਾਮਾਤਿ ਅਤ੍ਥੋ. ਅਨਾਗਨ੍ਤ੍ਵਾ ਇਤ੍ਥਤ੍ਤਨ੍ਤਿ ਏਤ੍ਥਪਿ ਏਸੇਵਨਯੋ. ਅਰਹਤੋ ਭਾਵੋ ਅਰਹਤ੍ਤਂ. ਅਰਹਤ੍ਤ ਮਗ੍ਗਂ. ਦਕ੍ਖਿਣਾਯ ਵਿਪਤ੍ਤਿਕਰਾਨਾਮ ਅਪ੍ਪਪ੍ਫਲ ਅਪ੍ਪਾਨਿਸਂਸਕਰਾ. ਸਮ੍ਪਤ੍ਤਿਕਰਾ ਨਾਮ ਮਹਪ੍ਫਲ ਮਹਾਨਿਸਂਸਕਰਾ. ਸੀਲਕ੍ਖਨ੍ਧਾਦਿਗੁਣਾ ਨਾਮ ਸੀਲਕ੍ਖਨ੍ਧ ਸਮਾਧਿਕ੍ਖਨ੍ਧ ਪਞ੍ਞਾਕ੍ਖਨ੍ਧ ਵਿਮੁਤ੍ਤਿਕ੍ਖਨ੍ਧ ਵਿਮੁਤ੍ਤਿਞ੍ਞਾਣ ਦਸ੍ਸਨਕ੍ਖਨ੍ਧਗੁਣਾ. ‘‘ਦਕ੍ਖਿਣੇਯ੍ਯੇਸੂ’’ਤਿ ਦਕ੍ਖਿਣਾਰਹ ਪੁਗ੍ਗਲੇਸੁ. ‘‘ਧੁਰਂ’’ਤਿ ਪਧਾਨਸੀਸਟ੍ਠਾਨਿਯਂ ਵੁਚ੍ਚਤਿ. ਸਦ੍ਧਾ ਏਵ ਧੁਰਂ ਅਸ੍ਸਾਤਿ ਸਦ੍ਧਾਧੁਰੋ. ਏਵਂ ਪਞ੍ਞਾਧੁਰੋ. ਕਸ੍ਮਾ ਪਨੇਤ੍ਥ ਵੀਰਿਯਧੁਰੋ ਨ ਗਹਿਤੋਤਿ. ਪਾਲ਼ਿਯਂ ਸਦ੍ਧਾਵਾਹੀ ਮਗ੍ਗਂ ਭਾਵੇਤਿ, ਪਞ੍ਞਾਵਾਹੀ ਮਗ੍ਗਂ ਭਾਵੇਤੀਤਿ ਵੁਤ੍ਤਂ. ਨ ਪਨ ਵੁਤ੍ਤਂ ਵੀਰਿਯਵਾਹੀ ਮਗ੍ਗਂ ਭਾਵੇਤੀਤਿ. ਤਸ੍ਮਾ ਨ ਗਹਿਤੋਤਿ. ਕਸ੍ਮਾ ਪਨ ਵੀਰਿਯਵਾਹੀ ਮਗ੍ਗਂ ਭਾਵੇਤੀਤਿ ਨ ਵੁਤ੍ਤਨ੍ਤਿ. ਵੁਚ੍ਚਤੇ. ਮਗ੍ਗਂ ਭਾਵੇਨ੍ਤਸ੍ਸ ਨਾਮ ਆਦਿਮ੍ਹਿ ਦਿਟ੍ਠਿਵਿਚਿਕਿਚ੍ਛਾਨਂ ਪਹਾਨਾਯ ਕਮ੍ਮਂ ਮਹਨ੍ਤਂ ਹੋਤਿ. ਕਸ੍ਮਾ, ਅਪਾਯਮੂਲਕਤ੍ਤਾ. ਤਤ੍ਥ ਸਦ੍ਧਾ ਚ ਵਿਚਿਕਿਚ੍ਛਾ ਚ ਦ੍ਵੇ ਉਜੁਪ੍ਪਟਿਪਕ੍ਖਾ ਹੋਨ੍ਤਿ. ਯਸ੍ਮਿਂ ਆਰਮ੍ਮਣੇ ਸਦ੍ਧਾ ਨਿਵਿਸਤਿ, ਤਸ੍ਮਿਂ ਵਿਚਿਕਿਚ੍ਛਾ ਨਤ੍ਥਿ. ਯਸ੍ਮਿਂ ਵਿਚਿਕਿਚ੍ਛਾ ਨਿਵਿਸਤਿ, ਤਸ੍ਮਿਂ ਸਦ੍ਧਾ ਨਤ੍ਥਿ. ਤਥਾ ਪਞ੍ਞਾਦਿਟ੍ਠਿਯੋ ਚ ਉਜੁਪ੍ਪਟਿਪਕ੍ਖਾ. ਯਤ੍ਥ ਪਞ੍ਞਾ, ਨ ਤਤ੍ਥ ਦਿਟ੍ਠਿ. ਯਤ੍ਥ ਦਿਟ੍ਠਿ, ਨ ਤਤ੍ਥ ਪਞ੍ਞਾਤਿ. ਅਪਿ ਚ ਸਦ੍ਧਾ ਅਤ੍ਤਨੋ ਵਿਸਯੇ ਦਿਟ੍ਠਿਂ ਵਿਧਮਤਿਯੇਵ. ਪਞ੍ਞਾਯ ਵਿਚਿਕਿਚ੍ਛਾਵਿਧਮਨੇ ਵਤ੍ਤਬ੍ਬਮੇਵ ਨਤ੍ਥਿ. ਤਸ੍ਮਾ ਆਰਦ੍ਧ ਵਿਪਸ੍ਸਕੋ ਅਨਿਚ੍ਚਾਦੀਸੁ ਅਵੇਚ੍ਚਪ੍ਪਸਾਦਮਤ੍ਤੇਨਪਿ ਦਿਟ੍ਠਿਵਿਚਿਕਿਚ੍ਛਾਯੋ ਪਜਹਿਤ੍ਵਾ ਸਦ੍ਧਾਨੁਸਾਰਿਭਾਵਞ੍ਚ ਸੁਟ੍ਠੁਤਰਂ ਪਸੀਦਿਤ੍ਵਾ ਸਦ੍ਧਾਵਿਮੁਤ੍ਤਭਾਵਞ੍ਚ ਪਾਪੁਣਾਤਿ. ਪਞ੍ਞਾਯ ਅਨਿਚ੍ਚਾਦੀਨਿ ਨਿਜ੍ਝਾਨਕ੍ਖਮਂ ਕਤ੍ਵਾ ਧਮ੍ਮਾਨੁਸਾਰਿਭਾਵਞ੍ਚ ਸੁਟ੍ਠੁਤਰਂ ਪਸ੍ਸਿਤ੍ਵਾ ਦਿਟ੍ਠਿਪਤ੍ਤਪਞ੍ਞਾ ਵਿਮੁਤ੍ਤਭਾਵਞ੍ਚ ਪਾਪੁਣਾਤਿ. ਵੀਰਿਯਂ ਪਨ ਦਿਟ੍ਠਿਵਿਚਿਕਿਚ੍ਛਾਨਂ ਪਟਿਪਕ੍ਖਮਤ੍ਤਮ੍ਪਿ ਨ ਹੋਤਿ. ਅਥ ਖੋ ਤਾਸਂ ਸਹਾਯੋਪਿ ਹੋਤਿ, ਧੁਰਭੂਤਞ੍ਚ. ਪਗ੍ਗਹਲਕ੍ਖਣਞ੍ਹਿ ਵੀਰਿਯਂ. ਤਂ ਸਦ੍ਧਂਪਿ ਪਗ੍ਗਣ੍ਹਾਤਿ, ਪਞ੍ਞਂਪਿ ਪਗ੍ਗਣ੍ਹਾਤਿ, ਦਿਟ੍ਠਿਂਪਿ ਪਗ੍ਗਣ੍ਹਾਤਿ, ਵਿਚਿਕਿਚ੍ਛਮ੍ਪਿ ਪਗ੍ਗਣ੍ਹਾਤਿਯੇਵ. ਕੁਤੋਪਨ ਅਤ੍ਤਨੋ ਸਭਾਵੇਨ ਦਿਟ੍ਠਿਵਿਚਿਕਿਚ੍ਛਾਯੋ ਪਜਹਿਤੁਂ ਸਕ੍ਖਿਸ੍ਸਤਿ. ਤਸ੍ਮਾ ਇਮਸ੍ਮਿਂ ਠਾਨੇ ਵੀਰਿਯਵਾਹੀਤਿ ਚ ਵੀਰਿਯਧੁਰੋਤਿ ਚ ਨ ਵੁਤ੍ਤੋਤਿ. ਕਾਯਸਕ੍ਖਿਮ੍ਹਿ ਪਨ ਸਦ੍ਧਾ ਚ ਪਞ੍ਞਾ ਚ ਸਮਬਲਾ ਹੋਨ੍ਤਿ. ਵੀਰਿਯਞ੍ਚ ਸਯਂ ਸਮ੍ਮਪ੍ਪਧਾਨਟ੍ਠਾਨੇ ਠਤ੍ਵਾ ਤਦੁਭਯਂ ਉਪਬ੍ਰੂਹੇਤਿ. ਸੋ ਚ ਪੁਗ੍ਗਲੋ ਤਦੁਭਯਬਲੇਨ ਦਿਟ੍ਠਿਵਿਚਿਕਿਚ੍ਛਾਦਯੋ ਪਜਹਿਤ੍ਵਾ ਕਾਯਸਕ੍ਖਿਭਾਵਂ ਪਾਪੁਣਾਤਿ. ਅਟ੍ਠਵਿਮੋਕ੍ਖੇ ਵਾ ਉਪ੍ਪਾਦੇਤ੍ਵਾ ਉਭਤੋਭਾਗ ਵਿਮੁਤ੍ਤਭਾਵਂ ਪਾਪੁਣਾਤਿ. ਇਮੇਸੁ ਪਨ ਦ੍ਵੀਸੁ ਪੁਗ੍ਗਲੇਸੁ ਵੀਰਿਯਸ੍ਸ ਥਾਮੋ ਸੁਟ੍ਠੁ ਪਾਕਟੋ. ਤਸ੍ਮਾ ਇਮੇ ਦ੍ਵੇ ਵੀਰਿਯਾਧਿਕਾਤ੍ਵੇਵ ਵਤ੍ਤਬ੍ਬਾ. ਨ ਵੀਰਿਯਧੁਰੋਤਿ. ਚਤੁਪ੍ਪਟਿਪਦਾ ਨਾਮ ਦੁਕ੍ਖਾਪਟਿਪਦਾ ਦਨ੍ਧਾਭਿਞ੍ਞਾ. ਦੁਕ੍ਖਾਪਟਿਪਦਾ ਖਿਪ੍ਪਾਭਿਞ੍ਞਾ. ਸੁਖਾਪਟਿਪਦਾ ਦਨ੍ਧਾਭਿਞ੍ਞਾ. ਸੁਖਾਪਟਿਪਦਾ ਖਿਪ੍ਪਾਭਿਞ੍ਞਾ. ਤਿਵਿਧਵਿਮੋਕ੍ਖੋ ਨਾਮ ਸੁਞ੍ਞਤੋ ਵਿਮੋਕ੍ਖੋ. ਅਨਿਮਿਤ੍ਤੋ ਵਿਮੋਕ੍ਖੋ. ਅਪ੍ਪਣਿਹਿਤੋ ਵਿਮੋਕ੍ਖੋ. ‘‘ਤਯੋ ਅਨ੍ਤਰਾ ਪਰਿਨਿਬ੍ਬਾਯਿਨੋ’’ਤਿ ਏਤ੍ਥ ਆਯੁਕਪ੍ਪਸ੍ਸ ਪਰਿਯਨ੍ਤਂ ਅਪਤ੍ਵਾ ਅਨ੍ਤਰਾ ਏਵ ਕਿਲੇਸਪਰਿਨਿਬ੍ਬਾਨਪਤ੍ਤਾ ਅਨ੍ਤਰਾਪਰਿਨਿਬ੍ਬਾਯੀ ਨਾਮ. ਸੋ ਤਿਵਿਧੋ. ਆਯੁਕਪ੍ਪਸ੍ਸ ਪਥਮਭਾਗੇ ਪਰਿਨਿਬ੍ਬਾਯੀ, ਦੁਤੀਯਭਾਗੇ, ਤਤੀਯਭਾਗੇਤਿ. ਇਮੇ ਤਯੋ ਅਨ੍ਤਰਾ ਪਰਿਨਿਬ੍ਬਾਯਿਨੋ ਨਾਮ. ਉਪਹਚ੍ਚਪਰਿਨਿਬ੍ਬਾਯੀ ਨਾਮ ਆਯੁਕਪ੍ਪ ਪਰਿਯਨ੍ਤੇ ਪਰਿਨਿਬ੍ਬਾਯੀ. ਉਦ੍ਧਂ ਮੁਖੋ ਵਟ੍ਟਸੋਤੋ ਏਤਸ੍ਸਾਤਿ ਉਦ੍ਧਂਸੋਤੋ. ਅਕਨਿਟ੍ਠਂ ਅਵਸ੍ਸਂ ਗਮਿਸ੍ਸਤੀਤਿ ਅਕਨਿਟ੍ਠਗਾਮੀ. ਵਿਪਸ੍ਸਨਾ ਕਮ੍ਮਂ ਸਸਙ੍ਖਾਰਂ ਸਪ੍ਪਯੋਗਂ ਕਤ੍ਵਾ ਪਰਿਨਿਬ੍ਬਾਯੀ ਸਸਙ੍ਖਾਰ ਪਰਿਨਿਬ੍ਬਾਯੀ. ਸਙ੍ਖਾਰਰਹਿਤੇਨ ਸੁਖੇਨ ਵਿਪਸ੍ਸਨਾ ਕਮ੍ਮੇਨ ਪਰਿਨਿਬ੍ਬਾਯੀ ਅਸਙ੍ਖਾਰ ਪਰਿਨਿਬ੍ਬਾਯੀ. ‘‘ਦ੍ਵਾਦਸ ਸੋਤਾਪਨ੍ਨਾ’’ਤਿ ਏਕਬੀਜਿਕਾ ਤਯੋ. ਤੇ ਏਵ ਚਤੂਹਿ ਪਟਿਪਦਾਹਿ ਗੁਣਿਤਾ ਦ੍ਵਾਦਸ. ਦ੍ਵਾਦਸ ਸਕਦਾਗਾਮਿਨੋ ਪੁਬ੍ਬੇ ਵੁਤ੍ਤਨਯਾ ਏਵ.

ਏਕਚ੍ਚਾਨਂ ਏਵ ਅਨਾਗਾਮਿ ਅਰਹਨ੍ਤਾਨਂ ਏਵ. ‘‘ਅਜ੍ਝੋਸਿਤਸ੍ਸਾ’’ਤਿ ਅਧਿਓਸਿਤਸ੍ਸ. ਮਮੇਵਿਦਨ੍ਤਿ ਨਿਟ੍ਠਾਨਂ ਕਤ੍ਵਾ ਠਪਿਤਸ੍ਸ. ਗਿਲਿਤ੍ਵਾ ਠਪਿਤਸ੍ਸਾਤਿ ਵੁਤ੍ਤਂ ਹੋਤਿ. ਬਹਲੇਨ ਥੂਲੇਨ ਕਾਮਰਾਗੇਨ ਵਿਮੁਤ੍ਤਾ ਬਹਲਰਾਗਵਿਮੁਤ੍ਤਾ. ਆਰੁਪ੍ਪੇਸੁ ਚ ਤਸ੍ਸੋ ਅਰੂਪਸਮਾਪਤ੍ਤਿਯੋ ਏਵ ਅਤ੍ਥਿ. ਨ ਚਤਸ੍ਸੋ ਰੂਪਸਮਾਪਤ੍ਤਿਯੋ. ਤਸ੍ਮਾ ਤਤ੍ਥ ਅਨੁਪੁਬ੍ਬਨਿਰੋਧੋ ਨ ਲਬ੍ਭਤਿ. ‘‘ਆਦਿਤੋ ਪਟ੍ਠਾਯਾ’’ਤਿ ਅਟ੍ਠਸੁ ਸਮਾਪਤ੍ਤੀਸੁ ਪਥਮਜ੍ਝਾਨ ਸਮਾਪਤ੍ਤਿਆਦਿ. ਤਤੋ ਪਟ੍ਠਾਯ. ਅਨੁਪੁਬ੍ਬਨਿਰੋਧੋ ਨਾਮ ਪਥਮਜ੍ਝਾਨੇ ਪਟਿਘਸਞ੍ਞਾਨਾਨਤ੍ਤਸਞ੍ਞਾਨਂ ਨਿਰੋਧੋ. ਪਟਿਘਸਞ੍ਞਾ ਨਾਮ ਪਞ੍ਚਵਿਞ੍ਞਾਣਸਞ੍ਞਾ. ਨਾਨਤ੍ਤਸਞ੍ਞਾ ਨਾਮ ਕਸਿਣ ਨਿਮਿਤ੍ਤਤੋ ਅਞ੍ਞੇਸੁ ਨਾਨਾਰਮ੍ਮਣੇਸੁ ਪਵਤ੍ਤਮਨੋਵਿਞ੍ਞਾਣ ਸਞ੍ਞਾ. ਦੁਤੀਯਜ੍ਝਾਨੇ ਵਿਤਕ੍ਕ ਵਿਚਾਰਾਨਂ ਨਿਰੋਧੋਤਿਆਦਿਨਾ ਅਨੁਪੁਬ੍ਬ ਨਿਰੋਧੋ. ‘‘ਤਤੋ ਪਞ੍ਚਮਜ੍ਝਾਨਂ’’ਤਿ ਪਞ੍ਚਕਨਯੇਨ ਵੁਤ੍ਤਂ. ਅਟ੍ਠਸਮਾਪਤ੍ਤਿ ਵਚਨਂ ਪਨ ਚਤੁਕ੍ਕਨਯੇਨ ਵੁਤ੍ਤਂ. ਤਦੁਭਯਂਪਿ ਪੁਗ੍ਗਲਾਨੁਰੂਪਂ ਲਬ੍ਭਤਿਯੇਵ. ਯੁਗਨਨ੍ਧਂ ਨਾਮ ਦ੍ਵਨ੍ਦਬਨ੍ਧਨਂ, ਸਮਥਵਿਪਸ੍ਸਨਾਨਂ ਯੁਗਨਨ੍ਧਨ੍ਤਿ ਵਿਗ੍ਗਹੋ. ‘‘ਸਮਾਪਜ੍ਜਨ ਵੁਟ੍ਠਾਨ ਵਿਪਸ੍ਸਨਾਵਸੇਨਾ’’ਤਿ ਏਤ੍ਥ ਵਸਿਭਾਵਪਤ੍ਤਂ ਸਮਾਪਜ੍ਜਨਞ੍ਚ ਵੁਟ੍ਠਾਨਞ੍ਚ ਗਹੇਤਬ੍ਬਂ. ਅਤ੍ਤਨੋ ਸਰੀਰਾ ਬਦ੍ਧੇਸੁ ਪਰਿਕ੍ਖਾਰੇਸੁ ਸਮਾਪਤ੍ਤਿਬਲੇਨੇਵ ਅਨ੍ਤਰਾਯਾਭਾਵਤੋ ਵਿਸੁਂ ਅਧਿਟ੍ਠਾਤਬ੍ਬ ਕਿਚ੍ਚਂ ਨਤ੍ਥੀਤਿ ਵੁਤ੍ਤਂ ‘‘ਅਤ੍ਤਨੋ ਸਰੀਰਾਬਦ੍ਧੇ ਪਰਿਕ੍ਖਾਰੇ ਠਪੇਤ੍ਵਾ’’ਤਿ. ‘‘ਨਾਨਾਬਦ੍ਧਾਨੀ’’ਤਿ ਨਾਨਾਠਾਨੇਹਿ ਆਬਦ੍ਧਾਨਿ. ਨਾਨਾਠਾਨੇਸੁ ਠਪਿਤਾਨੀਤਿ ਵੁਤ੍ਤਂ ਹੋਤਿ. ‘‘ਪਰਿਸ੍ਸਯੇਨਾ’’ਤਿ ਅਨ੍ਤਰਾਯੇਨ. ਮਾਵਿਨਸ੍ਸਨ੍ਤੂਤਿ ਵਾ ਨਾਨਾਬਦ੍ਧ ਅਵਿਕੋਪਨਂ ਅਧਿਟ੍ਠਾਤਬ੍ਬਂ. ਤਦਾ ਵੁਟ੍ਠਹਾਮੀਤਿਵਾ ਸਙ੍ਘਪ੍ਪਤਿਮਾਨਨਂ ਅਧਿਟ੍ਠਾਤਬ੍ਬਂ. ਏਵਂ ਸਤ੍ਥੁਪਕ੍ਕੋਸਨਂਪਿ. ‘‘ਅਦ੍ਧਾਨਪਰਿਚ੍ਛੇਦੋ’’ਤਿ ਅਤ੍ਤਨੋ ਜੀਵਿਤਕਾਲਸ੍ਸ ਉਪਪਰਿਕ੍ਖਣਂ. ਮਰਣਞ੍ਹਿ ਨਾਮ ਸਮਾਪਤ੍ਤਿਬਲੇਨਪਿ ਪਟਿਬਾਹਿਤੁਂ ਨ ਸਕ੍ਕਾਹੋਤਿ. ਅਨ੍ਤੋ ਸਮਾਪਤ੍ਤਿਯਞ੍ਚ ਮਰਣੇ ਸਤਿ ਸਬ੍ਰਹ੍ਮਚਾਰੀਸੁ ਕਤ੍ਤਬ੍ਬਵਤ੍ਤਂ ਨ ਕਰੇਯ੍ਯ. ਏਤਞ੍ਹਿ ਵਤ੍ਤਂ ਯਂ ਅਰਿਯਸਾਵਕਾਨਂ ਮਰਣਾਸਨ੍ਨੇ ਸਬ੍ਰਹ੍ਮਚਾਰੀਨਂ ਵਾ ਉਪਟ੍ਠਾਕਾਨਂ ਵਾ ਅਪ੍ਪਮਾਦਕਥਾਨੁ ਸਾਸਨਿਕਮ੍ਮਂ. ਸਮਾਪਤ੍ਤਿਯਂ ਵਾ ਅਞ੍ਞਤਿਤ੍ਥਿਯਾਨਂ ਗਰਹਾ ਵਿਵਜ੍ਜਨਤ੍ਥਂ. ਏਵਞ੍ਹਿ ਤੇ ਗਰਹੇਯ੍ਯੁਂ. ਗੋਤਮਸਾਵਕਾਨਂ ਨਿਰੋਧਸਮਾਪਤ੍ਤਿ ਨਾਮ ਏਕਂ ਮਰਣਮੁਖਂ. ਯਂ ਸਮਾਪਜ੍ਜਨ੍ਤੋ ਅਸੁਕੋ ਭਿਕ੍ਖੁ ਮਰਣਂ ਗਚ੍ਛਤਿ. ਅਨਰਿਯ ਕਮ੍ਮਂ ਹੇਤਨ੍ਤਿ.

‘‘ਯਦਤ੍ਥਂ’’ਤਿ ਪਟਿਪਤ੍ਤਿ ਰਸਸ੍ਸਾਦਤ੍ਥਂ. ‘‘ਤਦਤ੍ਥੇ’’ਤਿ ਤਸ੍ਮਿਂ ਅਤ੍ਥੇ. ਨਿਰਾਮਿਸ ਸੁਖਂ ਨਾਮ ਆਮਿਸਰਹਿਤ ਸੁਖਂ. ਦੁਵਿਧਞ੍ਹਿ ਸੁਖਂ ਸਾਮਿਸਸੁਖਞ੍ਚ ਨਿਰਾਮਿਸਸੁਖਞ੍ਚ. ਤਤ੍ਥ ਯੇ ਲੋਕੇ ਇਟ੍ਠ ਕਨ੍ਤ ਮਨਾਪਿਯਾ ਪਞ੍ਚਕਾਮਗੁਣਾ ਨਾਮ ਅਤ੍ਥਿ. ਤੇ ਕਿਲੇਸੇਹਿ ਆਮਸਿਤਬ੍ਬਤ੍ਤਾ ਆਮਿਸਾ ਨਾਮ. ਯਞ੍ਚਸੁਖਂ ਤੇ ਆਮਿਸੇ ਪਟਿਚ੍ਚ ਉਪ੍ਪਜ੍ਜਤਿ, ਤਂ ਸਾਮਿਸਸੁਖਂ ਨਾਮ. ਯਂ ਲੋਕੇ ਦਿਬ੍ਬਂ ਸੁਖਂ ਮਾਨੁਸਕਂ ਸੁਖਨ੍ਤਿ ਮਮਾਯਨ੍ਤਿ. ਯਞ੍ਚ ਅਨੁਭਵਨ੍ਤਂ ਮਹਾਜਨਂ ਸਬ੍ਬਾਨਿ ਅਪਾਯਭਯ ਵਟ੍ਟਭਯਾਨਿ ਸਮ੍ਪਰਿਵਾਰੇਨ੍ਤਿ. ਝਾਨਸੁਖ ਮਗ੍ਗਸੁਖ ਫਲਸੁਖ ਨਿਬ੍ਬਾਨਸੁਖਂ ਪਨ ਨਿਰਾਮਿਸਸੁਖਂ ਨਾਮ. ਯਂ ਨੇਕ੍ਖਮ੍ਮਸੁਖਨ੍ਤਿ ਚ ਪਵਿਵੇਕਸੁਖਨ੍ਤਿ ਚ ਉਪਸਮਸੁਖਨ੍ਤਿ ਚ ਸਮ੍ਬੋਧਿਸੁਖਨ੍ਤਿ ਚ ਵਿਮੁਤ੍ਤਿਸੁਖਨ੍ਤਿ ਚ ਅਰਿਯਸੁਖਨ੍ਤਿ ਚ ਅਨਵਜ੍ਜਸੁਖਨ੍ਤਿ ਚ ਵੁਚ੍ਚਤਿ. ਯਞ੍ਚ ਅਨੁਭਵਨ੍ਤਂ ਅਰਿਯਜਨਂ ਸਬ੍ਬਾਨਿ ਅਪਾਯਭਯ ਵਟ੍ਟਭਯਾਨਿ ਸਮ੍ਪਰਿਵਜ੍ਜਨ੍ਤਿ. ‘‘ਅਸ੍ਸਾਦਿਤਬ੍ਬਟ੍ਠੇਨਾ’’ਤਿ ਕਿਲੇਸਪਲਿਬੋਧੇਹਿ ਵਿਮੁਤ੍ਤਤ੍ਤਾ ਵਿਪੁਲ ਗਮ੍ਭੀਰ ਸਨ੍ਤ ਪਣੀਤਰਸਤ੍ਤਾ ਚ ਅਹੋਸੁਖਂ ਅਹੋਸੁਖਨ੍ਤਿ ਉਦਾਹਰਨ੍ਤੇਨਪਿ ਅਸ੍ਸਾਦਿਤਬ੍ਬਟ੍ਠੇਨਾਤਿ.

ਕਮ੍ਮਟ੍ਠਾਨਸਙ੍ਗਹਾਨੁਦੀਪਨਾ ਨਿਟ੍ਠਿਤਾ.

ਨਿਗਮਗਾਥਾਸੁ.

੨੬੨. ਚਰਿਤਬ੍ਬਨ੍ਤਿ ਚਾਰਿਤ੍ਤਂ. ਦਸਕੁਸਲਕਮ੍ਮਪਥਧਮ੍ਮਜਾਤਂ. ‘‘ਕੁਲਾਚਾਰੇਨਾ’’ਤਿ ਕੁਲਪਰਮ੍ਪਰਤੋ ਆਗਤੇਨ ਆਚਾਰੇਨ. ‘‘ਞਾਤਿ ਮਿਤ੍ਤ ਧਨ ਭੋਗਸਮ੍ਪਤ੍ਤਿਯਾ’’ਤਿ ਹੇਤੁਅਤ੍ਥੇ ਕਰਣਵਚਨਂ. ‘‘ਵਿਸਾਲੇ’’ਤਿ ਵਿਪੁਲੇ. ‘‘ਤੇਨਾ’’ਤਿ ਤਸ੍ਸਪਦਸ੍ਸ ਵਿਭਤ੍ਯਨ੍ਤ ਦਸ੍ਸਨਂ. ‘‘ਸਦ੍ਧਾਯਾ’’ਤਿ ਰਤਨਤ੍ਤਯੇ ਅਵੇਚ੍ਚਪ੍ਪਸਾਦਸਦ੍ਧਾਵਸੇਨ. ‘‘ਅਭਿਵੁਡ੍ਢਾਨਂ’’ਤਿ ਹਾਨਭਾਗਿਯ ਠਿਤਿਭਾਗਿਯਭਾਵਂ ਅਤਿਕ੍ਕਮ੍ਮਵਿਸੇਸਭਾਗਿਯ ਨਿਬ੍ਬੇਧਭਾਗਿਯ ਭਾਵਪਤ੍ਤਿਵਸੇਨ ਅਤਿਸ੍ਸਯ ਵੁਡ੍ਢਾਨਂ. ‘‘ਪਰਿਸੁਦ੍ਧਾਨਞ੍ਚਾ’’ਤਿ ਅਤ੍ਤੁਕ੍ਕਂਸਨ ਪਰਵਮ੍ਭਨਾਦਿ ਦੋਸੇਹਿ ਪਰਿਸੁਦ੍ਧਾਨਞ੍ਚ. ਨਂ ਨਂ ਜਨਂ ਪਾਤਿਰਕ੍ਖਤੀਤਿ ਨਮ੍ਪੋ. ਦਿਟ੍ਠਦਿਟ੍ਠੇਸੁ ਮੇਤ੍ਤਾਵਿਹਾਰੀਤਿ ਵੁਤ੍ਤਂ ਹੋਤਿ. ਆਵ੍ਹਾਤਬ੍ਬੋਤਿ ਅਵ੍ਹਯੋ. ਨਾਮਂ. ਨਮ੍ਪੋ ਇਤਿ ਅਵ੍ਹਯੋ ਅਸ੍ਸਾਤਿ ਨਮ੍ਪਵ੍ਹਯੋਤਿ ਵਚਨਤ੍ਥੋ. ‘‘ਪਣਿਧਾਯਾ’’ਤਿ ਪਤ੍ਥੇਤ੍ਵਾਤਿ ਅਤ੍ਥਂ ਨਿਵਤ੍ਤੇਤਿ ‘‘ਭੁਸਂ ਨਿਧਾਯਾ’’ਤਿਆਦਿਨਾ. ‘‘ਉਪਾਦਾਯ ਪਟਿਚ੍ਚਾ’’ਤਿ ਤਸ੍ਸ ਪਦਸ੍ਸ ਪਰਿਯਾਯਦਸ੍ਸਨਮੇਤਂ. ‘‘ਅਤ੍ਤਨੋ ਮਨ੍ਦਬੁਦ੍ਧੀਨਂ’’ਤਿ ਪਚ੍ਚਕ੍ਖੇ ਧਰਮਾਨਾਨਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਪਚ੍ਛਿਮ ਜਨਾਨਂ ਵਾ’’ਤਿ. ਅਨੁਕਮ੍ਪਨਂ ਅਨੁਕਮ੍ਪੋ. ਕਥਂ ਨੁ ਖੋ ਇਮੇ ਜਨਾ ਅਭਿਧਮ੍ਮਤ੍ਥੇਸੁ ਸੁਖੇਨ ਆਜਾਨੇਯ੍ਯੁਨ੍ਤਿ ਏਵਂ ਪਵਤ੍ਤੋ ਚਿਤ੍ਤਬ੍ਯਾਪਾਰੋ. ਅਤ੍ਥਤੋ ਅਨੁਦਯਸਙ੍ਖਾਤਾ ਕਰੁਣਾਯੇਵ. ਤੇਨਾਹ ‘‘ਅਨੁਦਯਂ ਕਾਰੁਞ੍ਞਂ’’ਤਿ. ‘‘ਪਤ੍ਥਿਤਂ’’ਤਿ ਵਾ ਸਾਧੁਵਤਸ੍ਸ ਯਂ ਥੇਰੋ ਏਵਰੂਪਂ ਪਕਰਣਂ ਕਰੇਯ੍ਯਾਤਿ ਏਵਂ ਚਿਰਕਾਲਂ ਪਤ੍ਥਿਤਂ ਆਸਿਂਸਿਤਨ੍ਤਿ ਅਤ੍ਥੋ. ‘‘ਖੁਦ੍ਦਸਿਕ੍ਖਾਟੀਕਾਯਂ’’ਤਿ ਪੋਰਾਣਟੀਕਂ ਸਨ੍ਧਾਯ ਵੁਤ੍ਤਂ. ਸੋਮਵਿਹਾਰੋਤ੍ਵੇਵ ਪਞ੍ਞਾਯਿਤ੍ਥ ਤਸ੍ਮਿਂ ਦੀਪੇਤਿ ਅਧਿਪ੍ਪਾਯੋ. ਗਾਥਾਯਂ ‘‘ਅਥਾ’’ਤਿ ਤਸ੍ਮਿਂਕਾਲੇ. ‘‘ਏਤ੍ਥਾ’’ਤਿ ਏਤਸ੍ਮਿਂ ਨਗਰੇ. ‘‘ਸਦ੍ਦੋ’’ਤਿ ਕਸ੍ਮਾ ਰਾਜਾ ਏਵਰੂਪਂ ਮਙ੍ਗਲਹਤ੍ਥਿਂ ਬ੍ਰਾਹ੍ਮਣਾਨਂ ਅਦਾਸਿ. ਨੇਤਂ ਪਤਿਰੂਪਂ ਯਂ ਰਞ੍ਞਾ ਕਤਨ੍ਤਿ ਏਵਂ ਪਵਤ੍ਤੋ ਅਮਨਾਪਸਦ੍ਦੋ. ‘‘ਭੇਰਵੋ’’ਤਿ ਭੀਰੁਤਾਜਨਕੋ ਭਯਾਨਕੋ. ‘‘ਸਿਵੀਨਂ’’ਤਿ ਸਿਵਿਰਟ੍ਠਵਾਸੀਨਂ. ‘‘ਰਟ੍ਠਵਡ੍ਢਨੇ’’ਤਿ ਰਟ੍ਠਂ ਵਡ੍ਢੇਤੀਤਿ ਰਟ੍ਠਵਡ੍ਢਨੋ. ਹਤ੍ਥਿਨਾਗੋ. ਸੋ ਹਿ ਲਕ੍ਖਣਸਮ੍ਪਨ੍ਨੋ ਆਜਾਨਿਯੋ ਹੋਤਿ. ਯਸ੍ਮਿਂ ਰਟ੍ਠੇ ਤਂ ਅਭਿਮਙ੍ਗਲਂ ਕਰੋਨ੍ਤਿ, ਤਸ੍ਮਿਂ ਰਟ੍ਠੇ ਦੇਵੋ ਸਮ੍ਮਾ ਵਸ੍ਸਤਿ, ਨਾਨਾਭਯੁਪਦ੍ਦਵਾ ਤਸ੍ਮਿਂ ਨੁਪ੍ਪਜ੍ਜਨ੍ਤੀਤਿ ਲੋਕਸਮ੍ਮਤੋ ਮਙ੍ਗਲਹਤ੍ਥੀ ਹੋਤਿ. ਤੇਨ ਵੁਤ੍ਤਂ ‘‘ਸਿਵੀਨਂ ਰਟ੍ਠਵਡ੍ਢਨੇ’’ਤਿ. ‘‘ਵਿਤ੍ਥਿਣ੍ਣੋ’’ਤਿ ਵਿਤ੍ਥਾਰਿਤੋ. ਅਤਿਵਿਤ੍ਥਾਰੋਤਿ ਵੁਤ੍ਤਂ ਹੋਤਿ. ਧਨੀਯਨ੍ਤਿ ਮਹਾਜਨੇਹਿ ਦਟ੍ਠੁਂ ਪਤ੍ਥੀਯਨ੍ਤੀਤਿ ਧਞ੍ਞਾ. ਮਹਿਦ੍ਧਿਕਾ. ਅਧਿਵਸਨ੍ਤਿ ਏਤ੍ਥਾਤਿ ਅਧਿਵਾਸੋ. ਧਞ੍ਞਾਨਂ ਅਧਿਵਾਸੋਤਿ ਸਮਾਸੋ. ਅਜ੍ਝਾਵਸਿਂਸੁ ਏਤ੍ਥਾਤਿ ਅਜ੍ਝਾਵੁਤ੍ਥਂ. ਕਿਤ੍ਤਿਗੁਣਵਸੇਨ ਉਦੇਨ੍ਤਿ ਉਗ੍ਗਚ੍ਛਨ੍ਤੀਤਿ ਉਦਿਤਾ. ਉਦਿਤਾਨਂਪਿ ਉਦਿਤੋਤਿ ਵਿਗ੍ਗਹੋ. ਤੇਨਾਹ ‘‘ਨਭਮਜ੍ਝੇ’’ਤਿਆਦਿਂ. ਸਾਰਜ੍ਜਨਂ ਸਾਰਦੋ. ਵਿਗਤੋ ਸਾਰਦੋ ਯਸ੍ਸਾਤਿ ਵਿਸਾਰਦੋ. ਵਿਸਾਰਦਸ੍ਸ ਭਾਵੋ ਵੇਸਾਰਜ੍ਜਂ. ਪਰਿਯਤ੍ਤਿਯਂ ਵੇਸਾਰਜ੍ਜਂ ਪਰਿਯਤ੍ਤਿਵੇਸਾਰਜ੍ਜਂ. ਤੇਪਿਟਕਪਰਿਯਤ੍ਤਿਯਂ ਵੇਯ੍ਯਤ੍ਤਿਯਞ੍ਞਾਣਂ. ਤਂ ਆਦਿ ਏਤਿਸ੍ਸਾ ਪਞ੍ਞਾਯਾਤਿ ਪਰਿਯਤ੍ਤਿਵੇਸਾਰਜ੍ਜਾਦਿ ਪਞ੍ਞਾ. ਪਾਪਤੋ ਲਜ੍ਜਨਸੀਲਾਤਿ ਲਜ੍ਜਿਨੋਤਿ ਆਹ ‘‘ਪਾਪਗਰਹਿਨੋ’’ਤਿ. ਪਾਪਂ ਧਮ੍ਮਂ ਗਰਹਨ੍ਤਿਆਦੀਨਵਂ ਕਥਯਨ੍ਤਿ ਸੀਲੇਨਾਤਿ ਪਾਪਗਰਹਿਨੋ. ‘‘ਅਨੁਸ੍ਸਰਨ੍ਤੂ’’ਤਿ ਪੁਨਪ੍ਪੁਨਂ ਸਰਨ੍ਤੁ. ਵਿਸੇਸੇਨ ਭਵਨ੍ਤਿ ਵੇਪੁਲ੍ਲਂ ਗਚ੍ਛਨ੍ਤੀਤਿ ਵਿਭਵਾ. ਪੁਞ੍ਞਾਨਿ ਚ ਤਾਨਿ ਵਿਭਵਾਚਾਤਿ ਪੁਞ੍ਞਵਿਭਵਾ. ਵਿਪੁਲਪੁਞ੍ਞਾਨੀਤਿ ਦਸ੍ਸੇਤੁਂ ‘‘ਵਿਪੁਲਾਨਂ’’ਤਿਆਦਿਮਾਹ. ਅਨੁਤ੍ਤਰਿਯ ਧਮ੍ਮਾ ਨਾਮ ਦਸ੍ਸਨਾਨੁਤ੍ਤਰਿਯ ਸਵਨਾਨੁਤ੍ਤਰਿਯਾਦਯੋ. ਲੋਕੇ ਬਹੂਸੁ ਦਸ੍ਸਨੇਸੁ ਇਤੋ ਉਤ੍ਤਰਂ ਅਞ੍ਞਂ ਦਸ੍ਸਨਂ ਨਾਮ ਨਤ੍ਥੀਤਿ ਦਸ੍ਸਨਾਨੁਤ੍ਤਰਿਯਂ. ਰਤਨਤ੍ਤਯਦਸ੍ਸਨਂ. ਚਤੁਸਚ੍ਚਦਸ੍ਸਨਞ੍ਚ. ਰਤਨਤ੍ਤਯਗੁਣਕਥਾਸਵਨਂ, ਖਨ੍ਧਾਯਤਨ ਧਾਤੁ ਸਚ੍ਚਪਟਿਚ੍ਚਸਮੁਪ੍ਪਾਦਕਥਾਸਵਨਞ੍ਚ ਸਵਨਾਨੁਤ੍ਤਰਿਯਂ ਨਾਮ. ਤੇਸੁ ਰਤਨਤ੍ਤਯਾਦੀਸੁ ਸਦ੍ਧਾ ਪਟਿਲਾਭੋ ਲਾਭਾਨੁਤ੍ਤਰਿਯਂ ਨਾਮ. ਤੇਸਮੇਵ ਪੁਨਪ੍ਪੁਨਂ ਸਰਣਂ ਅਨੁਸ੍ਸਤਾਨੁਤ੍ਤਰਿਯਂ ਨਾਮ. ਰਤਨਤ੍ਤਯੇ ਚਤੂਹਿ ਪਚ੍ਚਯੇਹਿ ਵਾ ਵਤ੍ਤਪ੍ਪਟਿਵਤ੍ਤਕਰਣੇਨ ਵਾ ਪਰਿਚਰਣਂ ਪਾਰਿਚਰਿਯਾਨੁਤ੍ਤਰਿਯਂ ਨਾਮ. ਬੁਦ੍ਧਪਞ੍ਞਤ੍ਤਾਸੁ ਤੀਸੁ ਸਿਕ੍ਖਾਸੁ ਸਮਾਦਾਯ ਸਿਕ੍ਖਨਂ ਸਿਕ੍ਖਾਨੁਤ੍ਤਰਿਯਂ ਨਾਮ. ਤਾਦਿਸੇ ਪਞ੍ਞਾਵਦਾਤਗੁਣਸੋਭਾਦਿਕੇ ਗੁਣੇ ਅਵਸ੍ਸਂ ਭਜਨ੍ਤਿ ਪਾਪੁਣਨ੍ਤੀਤਿ ਤਾਦਿਸਗੁਣਭਾਗਿਨੋ. ‘‘ਭਵਿਸ੍ਸਾਮਾ’’ਤਿ ਭਵਿਤੁਂ ਉਸ੍ਸਾਹਂ ਕਰਿਸ੍ਸਾਮਾਤਿ ਵੁਤ੍ਤਂ ਹੋਤਿ.

ਦੀਪਨਿਯਾ ਨਿਗਮਗਾਥਾਸੁ.

‘‘ਬਸ੍ਹ੍ਯੁਸੁਞ੍ਞਚਮ੍ਮੇਕਮ੍ਹੀ’’ਤਿ ਏਤ੍ਥ ‘‘ਬਸ੍ਹ੍ਯੂ’’ਤਿ ਅਟ੍ਠਸਙ੍ਖ੍ਯਾਯ ਸਙ੍ਕੇਤ ਵਚਨਂ. ‘‘ਚਮ੍ਮਂ’’ਤਿ ਦ੍ਵਿਸਙ੍ਖ੍ਯਾਯ. ਏਕਞ੍ਚ ਦੁਕਞ੍ਚ ਸੁਞ੍ਞਞ੍ਚ ਅਟ੍ਠਚਾਤਿ ਗਣਨਕ੍ਕਮੋ. ਸਹਸ੍ਸ ਦ੍ਵਿਸਤ ਅਟ੍ਠਸਙ੍ਖਾਤੇ ਸਾਕੇਤਿ ਅਤ੍ਥੋ. ਏਸਨਯੋ ਪਰਤੋ ‘‘ਨਵਪਞ੍ਚ ਚਮ੍ਮੇਕਮ੍ਹੀ’’ਤਿ ਪਦੇਪਿ. ਗਾਥਾਵਣ੍ਣਨਾਸੁ. ਨਗਰਤਿ ਨ ਚਵਤੀਤਿ ਨਗਰਂ. ਥਾਵਰਿਯਨ੍ਤਿ ਵੁਤ੍ਤਂ ਹੋਤਿ. ‘‘ਰਞ੍ਜੇਤੀ’’ਤਿ ਰਮੇਤਿ. ਖੇਮਸੁਭਿਕ੍ਖਤਾਦਿਗੁਣੇਹਿ ਅਨਾਗਤੇ ਜਨੇ ਗਮਾਪੇਤਿ, ਆਗਤੇ ਅਞ੍ਞਤ੍ਥ ਗਨ੍ਤੁਂ ਨ ਦੇਤੀਤਿ ਵੁਤ੍ਤਂ ਹੋਤਿ. ਰੋਹਿਤਮਿਗਾ ਨਾਮ ਸੁਵਣ੍ਣਵਣ੍ਣਮਿਗਾ. ‘‘ਸਾਕੇ’’ਤਿ ਸਾਕਨਾਮੇਨ ਰਞ੍ਞਾ ਪੁਨ ਸਙ੍ਖਤਤ੍ਤਾ ਇਮਂ ਕਲਿਯੁਗਂ ਸਾਕਨ੍ਤਿ ਵੁਚ੍ਚਤਿ. ਯਂ ਏਤਰਹਿ ਸਾਕ੍ਰਰਾਜਨ੍ਤਿਪਿ ਵੋਹਰਨ੍ਤਿ. ਸਾਕਰਾਜਾ ਚ ਨਾਮ ਉਤ੍ਤਰਾਪਥੇਸੁ ਏਕੋ ਗਨ੍ਧਾਰਰਾਜਾ. ਯਂ ਜੇਟ੍ਠਕਂ ਕਤ੍ਵਾ ਭਿਨ੍ਨਲਦ੍ਧਿਕਾ ਵਜ੍ਜੀਭਿਕ੍ਖੂ ਇਮਂ ਧਮ੍ਮ ਵਿਨਯਂ ਮਹਾਸਙ੍ਘੀਕਂ ਨਾਮ ਸਙ੍ਗਹਂ ਆਰੋਪੇਨ੍ਤਿ. ਸੋ ਚ ਧਮ੍ਮਵਿਨਯਸਙ੍ਗਹੋ ਉਤ੍ਤਰਾਪਥੇਸੁ ਵਤ੍ਤਤਿ. ਵੇਸਾਲਿਯਂ ਯਸਤ੍ਥੇਰ ਸਙ੍ਗਹੋ ਪਨ ਦਕ੍ਖਿਣਾਪਥੇਸੂਤਿ. ਚਤ੍ਤਾਰਿਯੁਗਾਨਿ ਨਾਮ ਲੋਕੇ ਪਞ੍ਞਪੇਨ੍ਤਿ ਸਤ੍ਯਯੁਗਂ, ਦ੍ਵਾਪਰਯੁਗਂ, ਤੇਤ੍ਰਯੁਗਂ, ਕਲਿਯੁਗ,ਨ੍ਤਿ. ਯੁਗਨ੍ਤਿ ਚ ਆਯੁਪਰਿਮਾਣਂ ਵੁਚ੍ਚਤਿ. ਇਦਾਨਿਪਨ ਕਲਿਯੁਗਂ ਵਤ੍ਤਤਿ. ਤੇਨ ਵੁਤ੍ਤਂ ‘‘ਸਾਕੇਤਿ ਕਲਿਯੁਗੇ’’ਤਿ. ਪਾਪਯੁਗੇਤਿ ਅਤ੍ਥੋ. ‘‘ਲ ਤੀ’’ਤਿ ਸਾਲਿਕ੍ਖੇਤ੍ਤਾਨਂ ਸੋਧਨਟ੍ਠਾਨਤ੍ਤਾ ਏਵਂ ਮ੍ਰਮ੍ਮਦੇਸਵੋਹਾਰੇਨ ਲਦ੍ਧਨਾਮਂ ਅਰਞ੍ਞਂ. ਤਂ ਪਨ ਮੁਂਰ੍ਵਾਨਗਰਸ੍ਸ ਏਸਨ੍ਨੇ ਪਞ੍ਚਧਨੁਸਤਿਕੇ ਪਦੇਸੇ ਜਾਤਂ. ‘‘ਵਿਸ੍ਸੁਤੇ’’ਤਿ ਵਿਸੇਸੇਨ ਕਿਤ੍ਤਿਤੇ. ਸਾਰਞ੍ਚ ਅਸਾਰਞ੍ਚ ਵਿਵੇਚੇਨ੍ਤਿ ਵਿਚਾਰੇਤ੍ਵਾ ਜਾਨਨ੍ਤਿਸੀਲੇਨਾਤਿ ਸਾਰਾਸਾਰ ਵਿਵੇਕਿਨੋਤਿ ਵਚਨਤ੍ਥੋਤਿ.

ਇਤਿ ਪਰਮਤ੍ਥਦੀਪਨਿਯਾ ਅਨੁਦੀਪਨਾ ਨਿਟ੍ਠਿਤਾ.

੧. ਪਰਮਤ੍ਥਦੀਪਨੀ ਨਾਮ, ਯੇਨ ਥੇਰੇਨ ਸਾ ਕਤਾ.

ਤੇਨੇਵੇ ਸਾ ਕਤਾ ਹੋਤਿ, ਅਯਂ ਤਸ੍ਸਾਨੁ ਦੀਪਨੀ.

੨. ਅਟ੍ਠਸਤ੍ਤਦ੍ਵਯੇਕਮ੍ਹਿ, ਸਾਕੇ ਸਾ ਜੇਟ੍ਠਮਾਸਕੇ.

ਕਾਲ਼ੇ ਨਵਮਿਯਂ ਦਿਵਾ, ਮਜ੍ਝਨ੍ਹਿਕੇ ਨਿਟ੍ਠਂ ਗਤਾ.

ਅਨੁਦੀਪਨੀ ਨਿਟ੍ਠਿਤਾ.