੬. ਅਰਞ੍ਞਾਦਿਵਗ੍ਗਵਣ੍ਣਨਾ

੬੦੫. ਨਵ ਪਬ੍ਬਤਸ੍ਸ ਨਾਮਾਨਿ. ਪਬ੍ਬ ਪੂਰਣੇ, ਤੋ. ਗਿਰ ਨਿਗ੍ਗਿਰਣੇ, ਓਸਧਾਦਯੋ ਨਿਗ੍ਗਿਰਤੀਤਿ ਗਿਰਿ, ਇ. ਸਿਲਾਨਂ ਰਾਸਿ ਸੇਲੋ, ਸਿਲਾ ਪਚੁਰਾ ਸਨ੍ਤ੍ਯਸ੍ਮਿਂ ਵਾ ਸੇਲੋ, ਸੇਲ ਗਤਿਯਂ ਵਾ, ਅ. ਅਦ੍ਦ ਗਤਿਮ੍ਹਿ ਯਾਚਨੇ ਚ, ਭੂਵਾਦਿ, ਇ, ਅਦ੍ਦ ਹਿਂਸਾਯਂ ਵਾ, ਚੁਰਾਦਿ. ਨ ਗਚ੍ਛਤੀਤਿ ਨਗੋ. ਨ ਚਲਤੀਤਿ ਅਚਲੋ. ਸਿਲਾਨਮੁਚ੍ਚਯੋ ਉਬ੍ਬੇਧੋ, ਥੂਪੋ ਵਾ ਸਿਲੁਚ੍ਚਯੋ. ਸਿਖਰਯੋਗਾ ਸਿਖਰੀ, ਈ, ਤਿਲਕੀਭੂਤੋ. ਭੁਂ ਭੂਮਿਂ ਧਰਤੀਤਿ ਭੂਧਰੋ, ਭੁਯਾ ਧਰੀਯਤੀਤਿ ਵਾ ਭੂਧਰੋ, ਬਾਹੁਲ੍ਯੇਨ ਅ, ਭੂਧਰੋ. ਅਹਾਰਿਯੋ, ਗੋਤ੍ਤੋਪਿ, ਦੇਸਨ੍ਤਰਂ ਨੇਤੁਮਸਕ੍ਯਤ੍ਤਾ ਅਹਾਰਿਯੋ, ਗਵਂ ਭੂਮਿਂ ਧਾਰਣੇਨ ਤਾਯਤੇ ਗੋਤ੍ਤੋ.

ਪਞ੍ਚਕਂ ਸਿਲਾਯਂ. ਅਮ ਗਤਿਯਂ, ਭੋ. ਵਨ, ਸਨ ਸਮ੍ਭਤ੍ਤਿਯਂ, ਪਸਨਤਿ ਬ੍ਯਾਪੇਤੀਤਿ ਪਾਸਾਣੋ, ਨਿਪਾਤਨਾ, ਪਸ ਬਨ੍ਧਨੇ ਵਾ, ਯੁ. ਅਸੁ ਖੇਪਨੇ, ਮੋ, ਅਸ੍ਮਾ, ਰਾਜਾਦਿ, ਅਸੁ ਬ੍ਯਾਪਨੇ ਵਾ. ਪਲ ਰਕ੍ਖਣੇ, ਉਪਲੋ, ਉਪ ਦੇਹੇ ਵਾ, ਅਲਪਚ੍ਚਯੋ ਨਿਪਾਤੋ. ਸਿਲ ਉਚ੍ਚੇ, ਅ. ਸਿਲਾ, ਨਾਰੀ.

੬੦੬. ਗਿਜ੍ਝਕੂਟਾਦਯੋ ਤਿਕੂਟਨ੍ਤਾ ‘‘ਵਙ੍ਕਾਦੀ’’ਤਿ ਏਤ੍ਥ ਆਦਿਨਾ ਮਲਯਦਦ੍ਦੁਰਾਦਯੋ ਚ ਨਗਾ ਨਗਵਿਸੇਸਾ. ਗਿਜ੍ਝਾ ਸਕੁਣਵਿਸੇਸਾ ਅਸ੍ਸ ਕੂਟੇ ਵਸਨ੍ਤਿ, ਗਿਜ੍ਝਸਦਿਸਕੂਟਯੁਤ੍ਤਤਾਯ ਵਾ ਗਿਜ੍ਝਕੂਟੋ. ਵਿਸੇਸੇਨ ਭਾਤੀਤਿ ਵੇਭਾਰੋ, ਅਰੋ. ਪੁਲ ਮਹਤ੍ਤੇ, ਵਿਸੇਸੇਨ ਪੁਲਤੀਤਿ ਵੇਪੁਲ੍ਲੋ. ਇਸਯੋ ਗਿਲਤੀਤਿ ਇਸਿਗਿਲਿ, ਇ. ਆਦਿਚ੍ਚਗਮਨਵਿਰੋਧੇਨ ਵਿਰੁਦ੍ਧਂ ਝਾਯਤੀਤਿ ਵਿਞ੍ਝੋ. ਪਣ੍ਡੁਵਣ੍ਣਤਾਯ ਪਣ੍ਡਵੋ, ਪਣ੍ਡ ਗਤਿਯਂ ਵਾ, ਅਵੋ. ਕੁਟਿਲਤਾਯ ਵਙ੍ਕੋ. ਦ੍ਵਯਂ ਉਦਯਗਿਰਿਮ੍ਹਿ. ਅਪਰਸੇਲਾਪੇਕ੍ਖਾਯ ਪੁਬ੍ਬਸੇਲੋ. ਉਦਯਨ੍ਤ੍ਯਸ੍ਮਾ ਸੂਰਿਯਾਦਯੋਤਿ ਉਦਯੋ, ਸੂਰਿਯਾਦੀਨਮੁਦਯਯੋਗਤੋ ਵਾ ਉਦਯੋ.

ਤਿਕਂ ਅਤ੍ਥਗਿਰਿਮ੍ਹਿ. ਮਨ੍ਦਯਤਿ ਸੂਰਿਯੋ ਯਸ੍ਮਿਂ ਮਨ੍ਦਰੋ. ਮਨ੍ਦਪ੍ਪਭੋ ਵਾ ਅਰਤਿ ਯਸ੍ਮਿਂ ਸੂਰਿਯੋਤਿ ਮਨ੍ਦਰੋ, ਅਤ੍ਥਂ ਅਨੁਪਲਦ੍ਧਿਂ ਗਹਨਕ੍ਖਤ੍ਤਾਨਂ ਕਰੋਤੀਤ੍ਯਤ੍ਥੋ, ਨਾਮਧਾਤੁਕਾਰਿਤਨ੍ਤਾ ਅ. ਦ੍ਵਯਂ ਹਿਮਵਤਿ ਪਬ੍ਬਤੇ. ਹਿਮਪ੍ਪਚੁਰਤਾਯ ਹਿਮਵਾ, ਹਿਮਂ ਵਾ ਵਮਤੀਤਿ ਹਿਮਵਾ, ਕ੍ਵਿ, ਰਾਜਾਦਿਪਕ੍ਖੇਪਤ੍ਤਾ ਸਿਸ੍ਸਾ. ਹਿਮਯੁਤ੍ਤੋ ਅਚਲੋ ਹਿਮਾਚਲੋ.

੬੦੭. ਅਤ੍ਤਨਿ ਸਞ੍ਜਾਤਗਨ੍ਧਦਬ੍ਬਾਨਂ ਗਨ੍ਧੇਹਿ ਲੋਕੇ ਮਦਯਤਿ, ਮੋਦਯਤੀਤਿ ਵਾ ਗਨ੍ਧਮਾਦਨੋ, ਯੁ. ਕੇਲਾਸੋ ਵੁਤ੍ਤੋ. ਵਿਚਿਤ੍ਤਕੂਟਯੁਤ੍ਤਤਾਯ ਚਿਤ੍ਤਕੂਟੋ. ਸੁਖਂ ਦਸ੍ਸਨਂ ਯਸ੍ਸ, ਯਸ੍ਮਿਂ ਵਾ ਸੁਦਸ੍ਸਨੋ, ਕਾਲ਼ਵਣ੍ਣਕੂਟਤਾਯ ਕਾਲ਼ਕੂਟੋ. ਤੀਣਿ ਕੂਟਾਨ੍ਯਸ੍ਸ ਤਿਕੂਟੋ, ਛਲ਼ੇਤੇਪਿ ਪਬ੍ਬਤਵਿਸੇਸਾ. ਅਸ੍ਸ ਯਥਾਵੁਤ੍ਤਸ੍ਸ ਪਬ੍ਬਤਸ੍ਸ ਪਤ੍ਥੋ ਸਮੋ ਭੂਮਿਭਾਗੋ ਸਾਨੁ ਨਾਮ, ਅਸ੍ਸ ਵਾ ਪਬ੍ਬਤਸ੍ਸ ਸਮਾਯ ਭੂਮਿਯਂ ਪਤ੍ਥੋ ਸਾਨੁ ਚ ਭਵਨ੍ਤੀਤਿ ਅਜ੍ਝਾਹਰਿਤਬ੍ਬਂ. ਪਤਿਟ੍ਠਤੇ ਅਸ੍ਮਿਨ੍ਤਿ ਪਤ੍ਥੋ, ਠਸ੍ਸ ਥੋ. ਸਨ ਸਮ੍ਭਤ੍ਤਿਯਂ, ਣੁ, ਸਮ੍ਭਜੀਯਤੇ ਸੇਵੀਯਤੇਤਿ ਸਾਨੁ, ਦ੍ਵੇਪ੍ਯਨਿਤ੍ਥਿਯਂ.

੬੦੮. ਤਿਕਂ ਸਿਙ੍ਗਸ੍ਸ ਨਾਮਂ. ਕੁਟ ਦਾਹੇ, ਕਮ੍ਮਨਿ ਣੋ, ਵਾਕਾਰੇਨ ਕੂਟਮ੍ਪਿ. ਸਿਖਂ ਰੁਹਤੀਤਿ ਸਿਖਰਂ. ਨੇਰੁਤ੍ਤੋ. ਸਿਖਂ ਗਚ੍ਛਤੀਤਿ ਸਿਙ੍ਗਂ, ਇਙ੍ਗ ਗਮਨਤ੍ਥੋ, ਖਲੋਪੋ. ਦ੍ਵਯਂ ਪਬ੍ਬਤਾਦੀਨਂ ਪਪਤਨਟ੍ਠਾਨਸ੍ਸ ਨਾਮਂ. ਪਪਤਨ੍ਤ੍ਯਸ੍ਮਾ, ਣੋ. ਪਤ ਅਧੋਗਮਨੇ, ਪਪਾਤੋ. ਤਟ ਸਮੁਸ੍ਸਯੇ, ਤਟੋ.

ਦ੍ਵਯਂ ਪਬ੍ਬਤਨਿਤਮ੍ਬੇ. ਨਿਤਮ੍ਬੋ ਜਘਨੇਪਿ, ਕਟ ਵਸ੍ਸਾਵਰਣੇਸੁ, ਣ੍ਵੁ. ਪਬ੍ਬਤੇ ਪਾਸਾਣਾਦੀਸੁ ਅਮ੍ਬੁਨੋ ਜਲਸ੍ਸ ਪਸਵੋ ਪਸਵਨਂ ਨਿਜ੍ਝਰੋ ਨਾਮ, ਨਿਸ੍ਸਰਣਂ ਨਿਜ੍ਝਰੋ, ਸਸ੍ਸ ਝੋ, ਅਸਰੂਪਦ੍ਵਿਤ੍ਤਂ. ਝਰੋਪਿ.

੬੦੯. ਦ੍ਵਯਂ ਕਿਤ੍ਤਿਮੇ ਅਕਿਤ੍ਤਿਮੇ, ਸਜਲੇ ਨਿਜ੍ਜਲੇ ਵਾ ਕਨ੍ਦਰੇ. ਦਰ ਵਿਦਾਰਣੇ, ਅ, ਈ, ਦਰੀ. ਕਂ ਜਲਵਾਚਕਮਬ੍ਯਯਂ, ਕੇਨ ਦਰੀਯਤੇ ਕਨ੍ਦਰੋ, ਆ, ਕਨ੍ਦਰਾ. ਤਿਕਂ ਦੇਵਖਾਤਬਿਲੇ. ਨਿਲੀਯਨ੍ਤ੍ਯਸ੍ਮਿਂ ਲੇਣਂ, ਲੀ ਸਿਲੇਸਨੇ, ਯੁ. ਗਤਿਂ ਹ੍ਵਯਤਿ ਕੁਟਿਲਯਤੀਤਿ ਗਬ੍ਭਰਂ, ਨਿਪਾਤਨਾ. ਗਬ੍ਭ ਧਾਰਣੇ ਵਾ, ਅਰੋ. ਗੁਹੂ ਸਂਵਰਣੇ, ਅ, ਗੁਹਾ.

ਦ੍ਵਯਂ ਸਿਲਾਮਯਪੋਕ੍ਖਰਣਿਯਂ. ਸੋਡਿ ਗਬ੍ਭੇ, ਈ. ਸੋਣ ਵਣ੍ਣਗਤਿਸਙ੍ਘਾਤੇਸੁ ਵਾ, ਡੋ, ਈ. ਦ੍ਵਯਂ ਪਬ੍ਬਤਾਦੀਨਂ ਗਬ੍ਭਰਦੇਸੇ ਲਤਾਪਲ੍ਲਵਤਿਣਾਦੀਹਿ ਪਿਹਿਤੋਦਰੇ ਗਬ੍ਭਰੇ. ਕੁਞ੍ਜ ਅਬ੍ਯਤ੍ਤਸਦ੍ਦੇ, ਕਰਣੇ, ਣੋ, ਨਿਕੁਞ੍ਜਂ ਨਿਪੁਬ੍ਬੋ. ਦ੍ਵਯਂਪ੍ਯਨਿਤ੍ਥਿਯਂ. ਨਿਕੁਞ੍ਜਵਚਨਂ ਪਕੁਞ੍ਜਾਦਿਨਿਵਤ੍ਤਨਤ੍ਥਂ.

੬੧੦. ਸੇਲਸ੍ਸ ਪਬ੍ਬਤਸ੍ਸ ਉਦ੍ਧਂਭੂਮਿ ਅਧਿਚ੍ਚਕਾ ਨਾਮ. ਸੇਲਸ੍ਸਾਧੋਭਾਗਾਸਨ੍ਨਭੂਮਿ ਉਪਚ੍ਚਕਾ ਨਾਮ. ਅਤ੍ਰ ਤੇਹਿ ਉਪਾਦਿਸਦ੍ਦੇਹਿ ਚ੍ਚਕੋ ਯਦਾਦਿਨਾ [ਪਾਣਿਨਿ ੫.੨.੩੪].

ਮੂਲਪਬ੍ਬਤਸ੍ਸਨ੍ਤੇ ਪਰਿਵਾਰੇਤ੍ਵਾ ਠਿਤਾ ਖੁਦ੍ਦਪਬ੍ਬਤਾ ਪਾਦਾ ਨਾਮ. ਤਤ੍ਰ ਪਾਦਾਦਿਦ੍ਵਯਂ. ਪਜ੍ਜਤੇ ਗਮ੍ਯਤੇਤਿ, ਣੋ. ਸੇਲਸ੍ਸ ਉਪਨ੍ਤੋ ਸਮੀਪੇ ਪਬ੍ਬਤੋ ਉਪਨ੍ਤਸੇਲੋ.

ਗੇਰਿਕਮਨੋਸਿਲਾਹਰਿਤਾਲਕਟ੍ਠਿਨ੍ਯਾਦਿਕੋਸਬ੍ਬੋ ਏਵ ਸਿਲਾਵਿਕਾਰੋ ‘‘ਧਾਤੂ’’ਤ੍ਯੁਤ੍ਤੋ, ਧਰ ਧਾਰਣੇ, ਤੁ, ਧਾਤੁ.

ਸੇਲਵਗ੍ਗਵਣ੍ਣਨਾ ਨਿਟ੍ਠਿਤਾ.

੬੧੧. ਤਿਕਂ ਸੀਹੇ. ਕੇਸਰੋ ਜਟਾ, ਤਂਯੋਗਾ, ਈ, ਕੇਸਰੀ. ਮਿਗੇ ਹਿਂਸਤੀਤਿ ਸੀਹੋ, ਨਿਪਾਤਨਾ ਵਣ੍ਣਵਿਪਰਿਯਯੋ, ਮਿਗੇ ਹਨ੍ਤੁਂ ਸਂਵਿਜ੍ਜਮਾਨਾ ਈਹਾ ਅਸ੍ਸਾਤਿ ਵਾ ਸੀਹੋ, ਸਹਤੀਤਿ ਵਾ ਸੀਹੋ. ਪਞ੍ਚਸ੍ਸੋ, ਹਰਿਪਿ. ਮੁਖਮਿਵ ਚਰਣਾਪ੍ਯਸ੍ਸ ਕਰਿਕੁਮ੍ਭਦਾਰਣਸਮਤ੍ਥਾਤਿ ਤੇਹਿ ਸਹ ਪਞ੍ਚਸ੍ਸਾਨਿ ਯਸ੍ਸ. ਹਰਤਿ ਮਿਗੇਤਿ ਹਰਿ, ਇ. ਮਹਾਕੁਕ੍ਕੁਰਪ੍ਪਮਾਣੋ ਕੁਕ੍ਕੁਰਾਕਤਿ ਕਣ੍ਹਲੇਖਾਚਿਤ੍ਤਸਰੀਰੋ ਗੋਮਨੁਸ੍ਸਾਦਿਹਿਂਸਕ੍ਖਮੋ ਰਸ੍ਸਮੁਖੋ ਤਰਚ੍ਛੋ ਨਾਮ, ਸੋ ‘‘ਸੁਨਖਬ੍ਯਗ੍ਘੋ’’ਤਿ ਵੁਚ੍ਚਤਿ. ਤਰ ਤਰਣੇ, ਛੋ, ਮਿਗੇ ਅਦਤੀਤਿ ਮਿਗਾਦਨੋ, ਨਨ੍ਦਾਦੀਹਿ ਯੁ.

ਦ੍ਵਯਂ ਬ੍ਯਗ੍ਘੇ. ਵਿਨਿਹਨ੍ਤ੍ਵਾ ਆਘਾਯਤੀਤਿ ਬ੍ਯਗ੍ਘੋ, ਘਾ ਗਨ੍ਧੋਪਾਦਾਨੇ, ਬ੍ਯਗ੍ਘੋ ਦੀਪਿਨਿਪਿ. ਪੁਂ ਪੁਮਾਨੋ ਦਾਲੇਤੀਤਿ ਪੁਣ੍ਡਰੀਕੋ, ਦਲ ਵਿਦਾਰਣੇ, ਣ੍ਵੁ. ਦਸ੍ਸ ਡੋ, ਲਸ੍ਸ ਰੋ, ਅਸ੍ਸੀ, ਪੁਣ੍ਡਰੀਕੋ.

‘‘ਪੁਣ੍ਡਰੀਕਂ ਸਿਤਮ੍ਬੋਜੇ,

ਸਿਤਚ੍ਛਤ੍ਰੇ ਚ ਭੇਸਜ੍ਜੇ;

ਕੋਸਕਾਰਨ੍ਤਰੇ ਬ੍ਯਗ੍ਘੇ,

ਸੋ ਦਿਸਾਵਾਰਣਗ੍ਗਿਸੂ’’ਤਿ. –

ਨਾਨਤ੍ਥਸਙ੍ਗਹੇ. ਵਗ੍ਘੋਪਿ. ਦੀਪਿਨਿਵਿਸਯੇ ਸਦ੍ਦੂਲੋ ਈਰਿਤੋ, ਸਰਤੀਤਿ ਸਦ੍ਦੂਲੋ, ਊਲੋ, ਦੋ ਚਨ੍ਤੋ, ਸਦ੍ਦੇਨ ਉਲਤਿ ਗਚ੍ਛਤੀਤਿ ਵਾ ਸਦ੍ਦੂਲੋ. ਦੀਪਂ ਤਚ੍ਚਮ੍ਮਂ, ਤਂਯੋਗਾ ਦੀਪੀ, ਤਸ੍ਮਿਂ ਦੀਪਿਨਿ.

੬੧੨. ਪਞ੍ਚਕਂ ਅਚ੍ਛੇ. ਅਸੁ ਖੇਪਨੇ, ਛੋ. ਇਚ ਥੁਤਿਯਂ, ਅ, ਇਕ੍ਕੋ. ਭਲ੍ਲੁਕੋਪਿ, ਭਲ, ਭਲ੍ਲ ਪਰਿਭਾਸਨਹਿਂਸਾਦਾਨੇਸੁ, ਣ੍ਵੁ, ਅਸ੍ਸੁ, ਈਸ ਗਤਿਹਿਂਸਾਦਾਨੇਸੁ, ਸੋ, ਰਸ੍ਸਾਦਿ. ਅਪਚ੍ਚਯੇ ਇਸੋ.

ਦ੍ਵਯਂ ਰੋਹਿਤੇ. ਲੋਹਿਤਵਣ੍ਣਤਾਯ ਰੋਹਿਸੋ, ਲੋਹਿਤੋ ਚ, ਪੁਬ੍ਬਤ੍ਰ ਤਸ੍ਸ ਸੋ. ਤਿਕਂ ਗੋਕਣ੍ਣੇ. ਗਵਸ੍ਸ ਕਣ੍ਣੋ ਵਿਯ ਯਸ੍ਸ ਕਣ੍ਣੋਤਿ ਗੋਕਣ੍ਣੋ. ਗਣਯੁਤ੍ਤਤਾਯ ਗਣੀ ਚ ਸੋ ਕਣ੍ਟਕਸਦਿਸਸਿਙ੍ਗਤਾਯ ਕਣ੍ਟਕੋ ਚੇਤਿ ਗਣਿਕਣ੍ਟਕੋ, ਸਮੁਦਿਤਨਾਮਮ੍ਪਿ ਵਦਨ੍ਤਿ. ਗਣਿ ਚ ਕਣ੍ਟਕੋ ਚ ਗਣਿਕਣ੍ਟਕਾਤਿ ਦ੍ਵੇ ਨਾਮਾਨਿਪਿ ਦਟ੍ਠਬ੍ਬਾਨਿ, ਤੇਨੇਵ ਹਿ ‘‘ਗਣਿਕਣ੍ਟਕਾ’’ਤਿ ਬਹੁਵਚਨਨਿਦ੍ਦੇਸੋ ਕਤੋ.

੬੧੩-੬੧੪. ਚਤੁਕ੍ਕਂ ਖਗ੍ਗੇ. ਸਿਙ੍ਗਞ੍ਚ ਖਗ੍ਗਾਖ੍ਯਂ, ਤਂਯੋਗਾ ਖਗ੍ਗੋ. ‘‘ਖਗ੍ਗੋ ਗਣ੍ਡਕਸਿਙ੍ਗਾਸਿ-ਵੁਦ੍ਧਭੇਦੇਸੁ ਗਣ੍ਡਕੇ’’ਤਿ [ਬ੍ਯਾਖ੍ਯਾਸੁਧਾ ੨.੫.੪] ਹਿ ਨਾਨਤ੍ਥਸਙ੍ਗਹੇ. ਖਗ੍ਗਸਦਿਸਂ ਵਿਸਾਣਮਸ੍ਸ ਸਣ੍ਠਾਨਤੋਤਿ ਖਗ੍ਗਵਿਸਾਣੋ, ਣੋ. ਏਤ੍ਥ ਖਗ੍ਗਸਦ੍ਦੋ ਅਸਿਪਰਿਯਾਯੋ. ਪਲਾਸਮਦਤੀਤਿ ਪਲਾਸਾਦੋ. ਗਣ੍ਡ ਵਦਨੇਕਦੇਸੇ, ਣ੍ਵੁ, ਗਣ੍ਡਕੋ.

ਬ੍ਯਗ੍ਘਾਦਿਕੋ ਸਬ੍ਬੋਪਿ ਮਿਗਭੇਦੋ ‘‘ਵਾਲ਼ਮਿਗੋ, ਸਾਪਦੋ’’ਤਿ ਚੋਚ੍ਚਤੇ. ਬ੍ਯਗ੍ਘਸ੍ਸਾਤਿਸਯੇਨ ਮਨੁਸ੍ਸਾਦੀਨਂ ਹਿਂਸਨਤੋ ਦੁਟ੍ਠਤਾ ਪਾਕਟਾਤਿ ਤਪ੍ਪਮੁਖਤਾ ਵੁਤ੍ਤਾ. ਵਲ ਸਂਵਰਣੇ, ਵਲਨ੍ਤ੍ਯਤ੍ਤਾਨਮਸ੍ਮਾਤਿ ਵਾਲ਼ੋ, ਣੋ, ਵਾਲ਼ੋ ਚ ਸੋ ਮਿਗੋ ਚੇਤਿ ਵਾਲ਼ਮਿਗੋ, ਦੁਟ੍ਠਮਿਗੋਤ੍ਯਤ੍ਥੋ. ‘‘ਬ੍ਯਗ੍ਘੋ ਤਂ ਖਾਦਤੂ’’ਤ੍ਯਾਦਿਨਾ ਸਪਨ੍ਤਿ ਯੇਨਾਤਿ ਸਾਪਦੋ, ਸਪ ਅਕ੍ਕੋਸੇ, ਦੋ, ਦੀਘਾਦਿ.

ਪ੍ਲਵਙ੍ਗਨ੍ਤਂ ਮਕ੍ਕਟੇ. ਪ੍ਲਵੋ ਗਤਿਭੇਦੋ, ਤੇਨ ਗਚ੍ਛਤੀਤਿ ਪ੍ਲਵਙ੍ਗਮੋ, ਪ੍ਲਵਙ੍ਗੋ ਚ. ਮਰ ਪਾਣਚਾਗੇ, ਅਟੋ, ਕੋ ਚਨ੍ਤੋ, ਮਕ੍ਕਟੋ. ਨਰੋ ਇਵ ਵਾਨਰੋ, ਵਾਸਦ੍ਦੋ ਇਵਤ੍ਥੇ, ਨਾਮਾਨਂ ਯੁਤ੍ਤਤ੍ਥਤ੍ਤਾ ਸਮਾਸੋ. ਸਾਖਾਯਂ ਪਸੁਤੋ ਮਿਗੋ ਸਾਖਾਮਿਗੋ. ਗਤ੍ਯਤ੍ਥਤਾਯ ਕ੍ਰਿਯਾਯ ਪਯੋਗਾ. ਕਪਿ ਚਲਨੇ, ਇ, ਕਪਿ. ਵਲੀ ਸਿਥਿਲਂ ਚਮ੍ਮਂ ਮੁਖੇ ਅਸ੍ਸ ਵਲੀਮੁਖੋ. ਕਿਸੋ, ਵਨੋਕੋਪਿ, ਕੁਚ੍ਛਿਤੇਨਾਕਾਰੇਨ ਸੇਤੀਤਿ ਕਿਸੋ, ਉਸ੍ਸਿ. ਵਨਮੋਕਮਾਸਯੋ ਅਸ੍ਸ ਵਨੋਕੋ. ਸੋ ਮਕ੍ਕਟੋ ਚੇ ਕਣ੍ਹਤੁਣ੍ਡੋ ਕਾਲ਼ਮੁਖੋ ਸਿਯਾ, ਤਦਾ ‘‘ਗੋਨਙ੍ਗਲੋ’’ਤਿ ਮਤੋ, ਗੁਨ੍ਨਂ ਨਙ੍ਗਲਸਦਿਸਤਾਯ ਗੋਨਙ੍ਗਲੋ.

੬੧੫. ਪਜ੍ਜਦ੍ਧਂ ਸਿਙ੍ਗਾਲਸ੍ਸ ਨਾਮਂ. ਸਰ ਗਤਿਹਿਂਸਾਚਿਨ੍ਤਾਸੁ, ਅਲੋ. ਸਰਤਿਸ੍ਸ ਸਿਙ੍ਗੋ. ਜਮੁ ਅਦਨੇ, ਣ੍ਵੁ, ਬੋ ਚਨ੍ਤੋ, ਅਸ੍ਸੁ. ਕੁਸ ਅਕ੍ਕੋਸੇ, ਤੁ, ਥੁ ਵਾ. ਭੇਰਵਯੁਤ੍ਤਤਾਯ ਭੇਰਵੋ, ‘‘ਭੇ’’ਇਤਿ ਰਵਤੀਤਿ ਵਾ ਭੇਰਵੋ. ਸਮੁ ਉਪਸਮੇ, ਇਵੋ, ਸਿਵਾ, ਨਾਰੀ, ਸਿ ਸੇਵਾਯਂ ਵਾ, ਵੋ. ਮਿਗਧੁਤ੍ਤੋ, ਵਞ੍ਚਕੋਪਿ, ਮਿਗੇਸੁ ਵਨਪਸੂਸੁ ਧੁਤ੍ਤੋ. ਬ੍ਰਾਹ੍ਮਣਂ ਵਞ੍ਚੇਤੀਤਿ ਵਞ੍ਚਕੋ.

ਤਿਕਂ ਬਿਲ਼ਾਰੇ. ਬਿਲ ਭੇਦਨੇ, ਅਰੋ, ਲ਼ਤ੍ਤਂ. ਬਬ੍ਬ ਗਤਿਯਂ, ਉ. ਮਜ ਸੁਦ੍ਧਿਯਂ, ਆਰੋ, ਨਿਗ੍ਗਹੀਤਾਗਮੋ. ਓਤੁ, ਆਖੁਭੁਜੋਪਿ. ਦ੍ਵਯਂ ਕੋਕੇ, ਅਯਂ ਕੁਕ੍ਕੁਰਪ੍ਪਮਾਣੋ ਕਪਿਲੋ ਹਰਿਣੋ. ਕੁਕ, ਵਕ ਆਦਾਨੇ. ਈਹਾਮਿਗੋਪਿ, ਮਿਗੇ ਈਹਤਿ ਕਙ੍ਖਤੀਤਿ, ਕਮ੍ਮਨਿ ਣੋ.

੬੧੬. ਦ੍ਵਯਂ ਮਹਿਂਸੇ. ਮਹਿਯਂ ਸੇਤੀਤਿ ਮਹਿਂਸੋ, ਰਸ੍ਸੋ, ਨਿਗ੍ਗਹੀਤਾਗਮੋ ਚ. ਲਲ ਇਚ੍ਛਾਯਂ, ਉਦਕਂ ਲਲਤੀਤਿ ਲੁਲਾਯੋ, ਨਿਪਾਤਨਾ, ਅਯੋ, ਅਸ੍ਸੁ ਚ. ਗੋ ਵਿਯ ਵਜਤਿ ਜਾਯਤੀਤਿ ਗਵਜੋ. ਗੋ ਵਿਯ ਅਯਤੀਤਿ ਗਵਯੋ, ਸਮਾ ਦ੍ਵੇ ਤੁਲ੍ਯਤ੍ਥਾ.

ਦ੍ਵਯਂ ਸਲ੍ਲੇ. ਸਲ੍ਲ ਆਸੁਗਤਿਯਂ, ਅ, ਸਲ੍ਲੋ, ਸਕਤ੍ਥੇ ਕੋ, ਸਲ੍ਲਕੋ ਅਤ੍ਤਨੋ ਸਰੀਰਜਾਤੇਨ ਸਲ੍ਲੇਨ ਸੁਨਖਂ ਸਲਤਿ ਹਿਂਸਤੀਤਿ ਵਾ ਸਲ੍ਲੋ, ਸਲ੍ਲਕੋ ਚ, ਅਯਂ ਸੂਕਰਸਣ੍ਠਾਨੋ, ਸਲਾਕਾਪਾਯੋ ਚ. ਅਸ੍ਸ ਸਲ੍ਲਸ੍ਸ ਲੋਮਮ੍ਹਿ ਸਲਲਂ, ਸਲਞ੍ਚ ਭਵੇ. ਪਲ, ਸਲ, ਪਥ ਗਤਿਯਂ, ਅਲੋ, ਨਦਾਦਿਤ੍ਤੇ ਸਲਲੀ, ਥਿਤ੍ਤਾਭਾਵੇ ਸਲਲਂ, ਅਮ੍ਹਿ ਸਲਂ.

੬੧੭. ਪਞ੍ਚਕਂ ਮਿਗੇ, ਹਰਨ੍ਤ੍ਯਨੇਨ ਹਰਿਣੋ, ਹਰ ਹਰਣੇ ਯੁ. ਣਤ੍ਤਮਿਤ੍ਤਞ੍ਚ. ਮਰ ਪਾਣਚਾਗੇ, ਅ, ਰਸ੍ਸ ਗੋ, ਇਤ੍ਤਞ੍ਚ. ਸੇਨ ਸੁਨਖੇਨ ਰਙ੍ਗਤਿ ਗਚ੍ਛਤਿ ਪਲਾਯਤੀਤਿ ਸਾਰਙ੍ਗੋ. ਦੀਘਾਦਿ, ਮਗੋ, ਮਿਗੋ ਚ ਏਤੇ ਦ੍ਵੇ ਮਿਗਮਤ੍ਤੇਪਿ. ਅਜਿਨਸ੍ਸੋਪਯੁਜ੍ਜਮਾਨਸ੍ਸ ਯੋਨਿ, ਤੇਨ ਭੂਤਸ੍ਸਾਜਿਨਸ੍ਸੁਪ੍ਪਤ੍ਤਿਕਾਰਣਤ੍ਤਾ ਵਾ ਅਜਿਨਯੋਨਿ. ਅਯਮ੍ਪਿ ਮਿਗਮਤ੍ਤੇਪਿ. ਕੁਰਙ੍ਗੋ, ਵਾਤਾਯੁਪਿ. ਕੁਯਂ ਪਥਵਿਯਂ ਰਙ੍ਗਤੀਤਿ ਕੁਰਙ੍ਗੋ. ਵਾਤਮਯਤੀਤਿ ਵਾਤਾਯੁ, ਉ.

ਦ੍ਵਯਂ ਸੂਕਰੇ. ਸੁਨ੍ਦਰਂ ਫਲਂ ਕਰੋਤੀਤਿ ਸੂਕਰੋ. ਵੁਤ੍ਤਞ੍ਚ ਦਬ੍ਬਗੁਣੇ –

‘‘ਸ੍ਨੇਹਨਂ ਬ੍ਰੂਹਨਂ ਵਸ੍ਸਂ, ਤਥਾ ਵਾਤਸਮਾਪਹਂ;

ਵਾਰਾਹਂ ਪਿਸਿਤਂ ਬਾਲ੍ਯਂ, ਰੋਚਨਂ ਸੇਦਨਂ ਗਰੂ’’ਤਿ [ਦਬ੍ਬਗੁਣਸਙ੍ਗਹ ੨.੧੧-੨].

ਸੁਖਂ ਕਰੋਤੀਤਿ ਵਾ ਸੂਕਰੋ. ਸੁਨ੍ਦਰੋ ਕਰੋ ਯਸ੍ਸ ਵਾ ਸੂਕਰੋ. ਵਰੇ ਆਹਨ੍ਤੀਤਿ ਵਰਾਹੋ, ਵਰੇ ਸਤਿ ਆਹਨ੍ਤਬ੍ਬੋਤਿ ਵਾ ਵਰਾਹੋ, ਕੋਲੋ, ਥਦ੍ਧਲੋਮੋ, ਭੂਦਾਰੋਪਿ. ਦ੍ਵਯਂ ਸਸੇ. ਪੇਲ ਗਤਿਯਂ, ਣ੍ਵੁ. ਸਸ ਪ੍ਲੁਤਗਤਿਯਂ, ਅ.

੬੧੮. ਦ੍ਵਯਂ ਏਣੀਮਿਗੇ. ਏਣਿਯਾ ਮਿਗਿਯਾ, ਏਣਸ੍ਸ ਵਾ ਅਪਚ੍ਚਂ ਏਣੇਯ੍ਯੋ, ਅਯਂ ਚਮ੍ਮਾਦੀਸੁਪਿ ‘‘ਏਣਸ੍ਸ, ਏਣਿਯਾ ਵਾ ਚਮ੍ਮਾਦਿਕੋ ਏਣੇਯ੍ਯੋ’’ਤਿ ਵਚਨਤ੍ਥਂ ਕਤ੍ਵਾ. ਏਣਿਯਾ ਇਤ੍ਥਿਯਾ ਪੁਤ੍ਤੋ ਮਿਗੋ ਏਣੀਮਿਗੋ, ਇ ਗਤਿਯਂ, ਯੁ, ਨਦਾਦਿ, ਅਨਦਾਦਿਤ੍ਤੇ ਏਣੋ, ਏਵਮੇਤੇਪ੍ਯੁਪ੍ਪਾਦਿਤਾ. ਦ੍ਵਯਂ ਪਮ੍ਪਟਕੇ. ਪਟ ਗਮਨੇ, ਣ੍ਵੁ, ਉਪਸਗ੍ਗਨ੍ਤੇ ਬਿਨ੍ਦਾਗਮੋ ਚ. ਪਬ੍ਬ ਗਤਿਯਂ, ਣ੍ਵੁ, ਬਿਨ੍ਦਾਗਮੋ, ਬਲੋਪੋ ਚ.

ਦ੍ਵਯਂ ਵਾਤਮਿਗੇ. ਗਮਨੇਨ ਵਾਤਸਮੋ ਮਿਗੋ ਵਾਤਮਿਗੋ. ਚਲਤਿਸ੍ਮਾ ਯੁ, ਨਦਾਦਿ. ਤਿਕਂ ਮੂਸਿਕੇ. ਮੁਸ ਥੇਯ੍ਯੇ, ਣ੍ਵੁ, ਇਤ੍ਤਞ੍ਚ. ਆਪੁਬ੍ਬੋ ਖਨੁ ਅਵਦਾਰਣੇ, ਉ, ਨਲੋਪੋ. ਉਨ੍ਦ ਪਸਵਨਕ੍ਲੇਦਨੇਸੁ, ਊਰੋ.

੬੧੯. ਚਮਰਾਦਯੋ, ਸਰਭਾਦਯੋ ਚ ਮਿਗਨ੍ਤਰਾ ਮਿਗਵਿਸੇਸਾ. ਚਮਰੋ ਉਤ੍ਤਰਾਪਥੇ ਖ੍ਯਾਤੋ, ਯਸ੍ਸ ਪੁਚ੍ਛਂ ਚਾਮਰਂ, ਚਮੁ ਅਦਨੇ, ਅਰੋ, ਚਮਰੋ, ਥਿਯਂ ਚਮਰੀ. ਪਸਦੋ ਚਿਤ੍ਤਲੋਮੀ, ਪਸ ਬਨ੍ਧਨੇ, ਅਦੋ. ਕੁਯਂ ਰਙ੍ਗਤੀਤਿ ਕੁਰੁਙ੍ਗੋ, ਅਸ੍ਸੁ, ਉਤ੍ਤਾਭਾਵੇ ਕੁਰਙ੍ਗੋ. ਸਬ੍ਬੇਸਮ੍ਪਿ ਮਿਗਾਨਂ ਮਾਤੁਟ੍ਠਾਨੇ ਤਿਟ੍ਠਤੀਤਿ ਮਿਗਮਾਤੁਕਾ, ਉਪਮਾਨੇ ਕੋ. ਰੁ ਸਦ੍ਦੇ, ਰੁ. ਰੁਣਂ ਕਰੋਤੀਤਿ ਰਙ੍ਕੁ, ਉ, ਣਸ੍ਸ ਲੋਪੋ ਰਕਾਰਸ੍ਸ, ਉਸ੍ਸ ਚ. ਅਤ੍ਤਾਨਂ ਨੀਚਂ ਕਰੋਤੀਤਿ ਨੀਕੋ. ਸਰਤਿਸ੍ਮਾ ਅਭੋ, ਸਰਭੋ. ਅਟ੍ਠਾਪਦੋ ਉਦ੍ਧਂਨਯਨੋ ਸੀਹਸ੍ਸਾਪਿ ਹਨ੍ਤਾ, ਤਸ੍ਸ ਚ ਪਾਦਚਤੁਕ੍ਕਂ ਉਦ੍ਧਂ ਭਵਤੀਤਿ.

੬੨੦. ਪਿਯਕਾਦਯੋ ਤਯੋ, ਆਦਿਨਾ ਕਨ੍ਦਲੀਚੀਨਸਮੂਰੁਆਦਯੋ ਚ ਚਮ੍ਮਯੋਨਯੋ, ਤੇਨ ਭੂਤਸ੍ਸ ਚਮ੍ਮਸ੍ਸ ਉਪ੍ਪਤ੍ਤਿਕਾਰਣਤ੍ਤਾ, ਏਤੇ ਚ ਚਿਤ੍ਰਤਨੁਰੁਹਾਦਯੋ ਕਮ੍ਬੋਜਾਦਿਮ੍ਹਿ, ਉਤ੍ਤਰਾਪਥੇ ਚ ਜਾਯਨ੍ਤਿ, ਤਤ੍ਰੇਵ ਸਨਾਮਖ੍ਯਾਤਾ. ਯਥਾ ਮਿਗਸਦ੍ਦੋ ਵਨ੍ਯਪਸੁਸਾਮਞ੍ਞੇ, ਵਿਸੇਸੇ ਚ ਕੁਰਙ੍ਗਾਖ੍ਯੇ ਵਤ੍ਤਤਿ, ਯਥਾ ਚ ਲੋਹਸਦ੍ਦੋ ਸੁਵਣ੍ਣਾਦਿਕੇ ਤੇਜਸਸਾਮਞ੍ਞੇ, ਵਿਸੇਸੇ ਚ, ਤਥਾ ਚਮ੍ਮਯੋਨਿਅਜਿਨਯੋਨਿਸਦ੍ਦਾਪਿ ਮਿਗਸਾਮਞ੍ਞੇ, ਮਿਗਵਿਸੇਸੇ ਚੇਤਿ ਤਥਾ ਵੁਤ੍ਤਾ.

ਪੀ ਤਪ੍ਪਨਕਨ੍ਤੀਸੁ, ਣ੍ਵੁ, ਇਯਾਦੇਸੋ. ਊਰੁਮ੍ਹਿ ਅਤਿਸਯਚਮ੍ਮਯੁਤ੍ਤਤਾਯ ਚਮੂਰੁ, ਏਕਸ੍ਸ ਮਸ੍ਸ ਲੋਪੋ. ਕਦਿ ਅਵ੍ਹਾਨੇ, ਅਲੋ, ਈ, ਕਦਲੀ ਚ ਸੋ ਮਿਗੋ ਚੇਤਿ ਕਦਲੀਮਿਗੋ.

ਸੀਹਾਦਯੋ ਯਥਾਵੁਤ੍ਤਾ, ਅਵੁਤ੍ਤਾ ਚ ਸਬ੍ਬੇ ਚਤੁਪ੍ਪਦਾ ਸਤ੍ਤਾ ‘‘ਮਿਗਾ, ਪਸਵੋ’’ਤਿ ਚੋਚ੍ਚਨ੍ਤੇ. ਪਸਵਨ੍ਤੀਤਿ ਪਸਵੋ, ਸੁ ਅਭਿਸਵੇ, ਪਸ ਬਨ੍ਧਨੇ ਵਾ, ਉ.

੬੨੧. ਚਤੁਕ੍ਕਂ ਲੂਤਾਯਂ. ਲੂ ਛੇਦਨੇ, ਤੋ, ਲੂਤਾ, ਸਕਤ੍ਥੇ ਇਕੋ, ਲੂਤਿਕਾ, ਦ੍ਵੇ ਨਾਰਿਯਂ. ਉਣ੍ਣਾਪਾਯੋ ਤਨ੍ਤੁ ਉਣ੍ਣਾ, ਸਾ ਨਾਭਿਯਂ ਅਸ੍ਸ ਉਣ੍ਣਨਾਭਿ, ਰਸ੍ਸੋ. ਮਕ੍ਕਟੋ ਵਿਯ ਸਾਖਾਯਂ ਅਤ੍ਤਨੋ ਤਨ੍ਤੁਮ੍ਹਿ ਗਚ੍ਛਤੀਤਿ ਮਕ੍ਕਟਕੋ.

ਦ੍ਵਯਂ ਗੋਮਯਜਵਿਚ੍ਛਿਕੇ. ਵਿਚ੍ਛ ਗਮਨੇ, ਣ੍ਵੁ, ਵਿਚ੍ਛਿਕੋ, ਸਤਪਦਿਯਮ੍ਪਿ, ਆਲ਼ਂ ਵਿਚ੍ਛਿਕਨਙ੍ਗੁਲਂ, ਤਂਯੋਗਾ ਆਲ਼ਿ. ਦ੍ਵਯਂ ਘਰਗੋਧਾਯਂ. ਸਰਤਿਸ੍ਮਾ ਊ, ਅਵੋ ਚਨ੍ਤੋ. ਘਰਂ ਨਿਸ੍ਸਿਤਾ ਗੋਧਾ ਘਰਗੋਲ਼ਿਕਾ, ਧਸ੍ਸ ਲ਼ੋ, ਸਕਤ੍ਥੇ ਕੋ.

੬੨੨. ਦ੍ਵਯਂ ਗੋਧਾਯਂ. ਗੁਧ ਰੋਸੇ, ਅ, ਗੋਧਾ, ਨਾਰੀ. ਕੁਣ੍ਡ ਦਾਹੇ, ਅ, ਕੁਣ੍ਡੋ. ਦ੍ਵਯਂ ਰਤ੍ਤਪਾਯਂ. ਕਣ੍ਣਸ੍ਸ ਜਲੂਕਾ ਰਤ੍ਤਪਾ ਕਣ੍ਣਜਲੂਕਾ. ਸਤਂ ਪਦਾ ਯਸ੍ਸਾ ਸਤਪਦੀ, ਪਦਸਦ੍ਦੋ ਪਾਦਤ੍ਥੋ.

ਦ੍ਵਯਂ ਕਲਨ੍ਦਕੇ. ਕਨ੍ਦ ਅਵ੍ਹਾਨੇ, ਰੋਦਨੇ ਚ, ਕਨ੍ਦਤੀਤਿ ਕਲਨ੍ਦਕੋ, ਲਮਜ੍ਝੋ, ਣ੍ਵੁ. ਕਾਲ਼ਵਣ੍ਣਤਾਯ ਕਾਲ਼ਕਾ, ਨਾਰਿਯਂ. ਦ੍ਵਯਂ ਨਕੁਲੇ, ਨਤ੍ਥਿ ਕੁਲਂ ਏਤਸ੍ਸ ਸਪ੍ਪੇਸੁ ਨਕੁਲੋ, ਅਰਿਸਪ੍ਪੋਪਿ. ਨਕ੍ਕ ਨਾਸਨੇ ਵਾ, ਉਲੋ, ਕਲੋਪੋ, ਸਪ੍ਪੇ ਨਾਸੇਤੀਤਿ ਨਕੁਲੋ. ਮਙ੍ਗ ਗਤ੍ਯਤ੍ਥੋ ਦਣ੍ਡਕੋ ਧਾਤੁ, ਉਸੋ.

੬੨੩. ਦ੍ਵਯਂ ਕਕਣ੍ਟਕੇ. ਕੁਚ੍ਛਿਤੋ ਕਣ੍ਟਕੋ ਅਸ੍ਸ, ਉਸ੍ਸਤ੍ਤਂ. ਸਰਤਿ ਧਾਵਤੀਤਿ ਸਰਟੋ, ਅਟੋ.

ਚਤੁਕ੍ਕਂ ਕੀਟੇ. ਕੀਟ ਬਨ੍ਧਨੇ, ਅ, ਕੀਟ ਗਮਨੇ ਵਾ, ਦੀਘਾਦਿ. ਪੁਲ ਮਹਤ੍ਥੇ, ਅਵੋ, ਲ਼ਤ੍ਤਂ. ਕੁਚ੍ਛਿਤਂ ਅਮਤਿ ਗਚ੍ਛਤੀਤਿ ਕਿਮਿ, ਇ, ਅਸ੍ਸਿਤ੍ਤਂ. ਪਕਾਰੇਨ ਅਨਤੀਤਿ ਪਾਣਕੋ, ਣ੍ਵੁ, ਣਤ੍ਤਂ.

ਦ੍ਵਯਂ ਕਣ੍ਟਲੋਮਕੀਟੇ. ਉਚ੍ਚਂ ਠਾਨਂ ਆਲਿਙ੍ਗਤੀਤਿ ਉਚ੍ਚਾਲਿਙ੍ਗੋ. ਬਹੁਲੋਮਯੁਤ੍ਤੋ ਪਾਣਕੋ ਲੋਮਸਪਾਣਕੋ.

੬੨੪-੬੨੫. ਸਾਦ੍ਧਪਜ੍ਜੇਨ ਸਕੁਣਸ੍ਸ ਨਾਮਾਨਿ. ਵਿਹੇ ਆਕਾਸੇ ਗਚ੍ਛਤੀਤਿ ਵਿਹਙ੍ਗੋ, ਵਿਹਙ੍ਗਮੋ ਚ, ਆਕਾਸਪਰਿਯਾਯੋ ਚੇਤ੍ਥ ਵਿਹਸਦ੍ਦੋ, ਵੇਹਾਸਸ੍ਸ ਵਾ ਵਿਹਾਦੇਸੋ. ਪਕ੍ਖਯੁਤ੍ਤਤਾਯ ਪਕ੍ਖੀ. ਖੇਨ, ਖਸ੍ਮਿਂ ਵਾ ਗਚ੍ਛਤੀਤਿ ਖਗੋ. ਅਣ੍ਡਤੋ ਜਾਤੋ. ਸਕ੍ਕੋਤਿ ਉਦ੍ਧਂ ਗਨ੍ਤੁਨ੍ਤਿ ਸਕੁਣੋ, ਸਕੁਨ੍ਤੋ, ਸਕੁਣੀ ਚ, ਸਕ ਸਤ੍ਤਿਯਂ, ਉਣੋ, ਉਨ੍ਤੋ, ਉਣੀ ਚ. ਪਤਨ੍ਤੋ ਡੇਨ੍ਤੋ, ਪਤ੍ਤੇਨ ਵਾ ਗਚ੍ਛਤੀਤਿ ਪਤਙ੍ਗੋ, ਅਪਰਤ੍ਰ ਤਲੋਪੋ. ਮਾਤੁਕੁਚ੍ਛਿਤੋ, ਅਣ੍ਡਤੋ ਚਾਤਿ ਦ੍ਵਿਕ੍ਖਤ੍ਤੁਂ ਜਾਯਤੀਤਿ ਦ੍ਵਿਜੋ. ਉਡ੍ਡਨਾਦੀਸੁ ਵਕ੍ਕਂ ਕੁਟਿਲਂ ਅਙ੍ਗਂ ਗੀਵਾਦਿਕਂ ਏਤਸ੍ਸ, ਵਕ੍ਕੇਨ ਗਮਨੇਨ ਅਙ੍ਗਤੀਤਿ ਵਾ ਵਕ੍ਕਙ੍ਗੋ. ਪਤ੍ਤੇਨ ਯਾਤਿ, ਤਂ ਵਾ ਯਾਨਂ ਏਤਸ੍ਸ. ਪਤਤਿ ਪਤਨ੍ਤੋ ਵਿਯ ਆਕਾਸਤੋ ਹੋਤੀਤਿ ਪਤਨ੍ਤੋ. ਨੀਲ਼ੇ ਕੁਲਾਵਕੇ ਜਾਯਤੀਤਿ ਨੀਲ਼ਜੋ.

ਵਟ੍ਟਕਾਦਯੋ, ਪੋਕ੍ਖਰਸਾਤਕਾਦਯੋ ਚ ਤਬ੍ਭੇਦਾ ਤੇਸਂ ਸਕੁਣਾਨਂ ਵਿਸੇਸਾ. ਵਟ੍ਟ ਵਟ੍ਟਨੇ, ਣ੍ਵੁ, ਵਟ੍ਟਕਾ ਨਾਰੀ. ਮਯੂਰਪ੍ਪਮਾਣੋ ਤਦਾਕਤਿਚਿਤ੍ਤਪਕ੍ਖੋ ਜੀਵਞ੍ਜੀਵੋ ਦਕ੍ਖਿਣਪਥਾਦੀਸੁ ਜਾਯਤੇ, ‘‘ਜੀਵਜੀਵਾ’’ਤਿ ਸਦ੍ਦਂ ਕਰੋਤੀਤਿ ਜੀਵਞ੍ਜੀਵੋ. ‘‘ਜੀਵਜੀਵੋ’’ਤਿ ਨਿਰਾਨੁਨਾਸਿਕਾਪਿ. ਚਨ੍ਦਿਕਾਯੁਤ੍ਤਰਤ੍ਤਿਪ੍ਪਿਯੋ ਪਕ੍ਖੀ ਚਕੋਰੋ, ਚਕ ਪਰਿਤਕ੍ਕਨੇ, ਉਰੋ, ਉਸ੍ਸੋ, ਚਙ੍ਕੋਰੋਪਿ. ਤਰਤਿਸ੍ਮਾ ਇਰੋ, ਦ੍ਵਿਤ੍ਤਮਿਤ੍ਤਞ੍ਚ, ਤਿਤ੍ਤਿਰੋ.

੬੨੬. ਸਲ ਗਤਿਯਂ, ਣਿਕੋ, ਲ਼ਤ੍ਤਂ, ਸਾਲ਼ਿਕਾ, ਨਾਰੀ. ਕਲਂ ਰਵਤੀਤਿ ਕਰਵੀਕੋ, ਈਕੋ, ਲਲੋਪੋ. ਕਰਵੀਕੋ, ਯਸ੍ਸ ਸਰੋ ਭਗਵਤੋ ਸਰੇਨ ਉਪਮੀਯਤੇ, ਸੋ ਵੁਚ੍ਚਤਿ ‘‘ਕਰਵੀਕੋ’’ਤਿ. ਜਵੇਨ ਰਵਿਨਾ ਸਦਿਸੋ ਹਂਸੋ ਰਵਿਹਂਸੋ. ਕੁਸ ਸਦ੍ਦੇ, ਥਕੋ, ਦ੍ਵਿਤ੍ਤਂ, ਕੁਸਸ੍ਸ ਸਸ੍ਸ ਤੋ,ਕੁਕੁਤ੍ਥਕੋ. ਕਰਣ੍ਡ ਭਾਜਨਤ੍ਥੇ, ਅਵੋ, ਕਰਣ੍ਡਵੋ, ਜਲਚਰੋ ਪਕ੍ਖੀ. ਬਿਲੁ ਪਤਿਤ੍ਥਮ੍ਭੇ, ਅ, ਅਵਾਦੇਸੋ, ਬਿਲਵੋ, ‘‘ਗਣ੍ਡਪ੍ਲਵੋ’’ਤਿ ਖ੍ਯਾਤੋ ਰਤ੍ਤਪਕ੍ਖੋ ਮਹਾਪਕ੍ਖੀ ਪੋਕ੍ਖਰਸਾਤਕੋ, ਪੋਕ੍ਖਰਸ੍ਸ ਸਞ੍ਞਾ ਯਸ੍ਸ ਪੋਕ੍ਖਰਸਾਤਕੋ, ਞ੍ਞਸ੍ਸ ਤੋ, ਦੀਘੋ ਚ, ਸਮੁਦਿਤਨਾਮਮੇਵ ਵਾ ਤਸ੍ਸ, ਤਦਾ ਸਾਦ ਅਸ੍ਸਾਦਨੇ, ਣ੍ਵੁ, ਦਸ੍ਸ ਤੋ, ਪੋਕ੍ਖਰਸਾਤਕੋ.

੬੨੭. ਸਤ੍ਤਕਂ ਪਕ੍ਖੇ. ਪਤਨ੍ਤਿ ਅਨੇਨਾਤਿ ਪਤਤ੍ਤਂ, ਯਦਾਦਿਨਾ ਤੋ, ਦ੍ਵਿਤ੍ਤਂ. ਉਖ ਗਤਿਯਂ, ਯੁ, ਉਸ੍ਸੇ, ਅਸ੍ਸੁ, ਪੇਖੁਣਂ, ਣਤ੍ਤਂ. ਪਤ ਗਮਨੇ, ਤੋ, ਪਾਤਤੋ ਤਾਯਤੀਤਿ ਵਾ ਪਤ੍ਤਂ. ਪਤ ਗਮਨੇ, ਖੋ, ਤਸ੍ਸ ਕੋ, ਪਕ੍ਖੋ. ਪਤਿਤੁਂ ਇਚ੍ਛਤਿ ਯੇਨ ਪਿਞ੍ਛਂ, ਨੇਰੁਤ੍ਤੋ, ਪਤ ਗਮਨੇ ਵਾ, ਛੋ, ਤਲੋਪੋ, ਬਿਨ੍ਦਾਗਮੋ, ਅਸ੍ਸਿ. ਛਾਦ੍ਯਤੇ ਅਨੇਨ ਛਦੋ. ਗਿਰ ਨਿਗ੍ਗਿਰਣੇ, ਉ, ਇਸ੍ਸਤ੍ਤਂ, ਗਮੁ ਗਮਨੇ ਵਾ, ਉ, ਮਸ੍ਸ ਰੋ.

ਪਕ੍ਖੀਨਂ ਬੀਜੇ ‘‘ਅਉ’’ਇਤਿ ਖ੍ਯਾਤੇ ਅਣ੍ਡਂ, ਕਚ੍ਛਪਾਦੀਨਂ ਬੀਜੇਪਿ, ‘‘ਅਣ੍ਡਂ ਖਗਾਦਿਕੋਸੇ ਚਾ’’ਤਿ ਨਾਨਤ੍ਥਸਙ੍ਗਹੇ. ਅਡਿ ਅਣ੍ਡਤ੍ਥੇ, ਣੋ, ਪੇਸਿ, ਕੋਸੋਪਿ, ਪਿਸ ਅਵਯਵੇ, ਇ, ਪੇਸਿ, ‘‘ਪੇਸਿਯਂ ਪਤ੍ਤਭੇਦੇ ਚ, ਕੋਸੋ ਪੁਮੇਵ ਇਚ੍ਛਿਤੋ’’ਤਿ [ਚਿਨ੍ਤਾਮਣਿਟੀਕਾ ੧੫.੩੭] ਰੁਦ੍ਦੋ. ਦ੍ਵਯਂ ਪਕ੍ਖਿਗੇਹੇ. ਨੀਲ ਵਣ੍ਣੇ, ਅ, ਲ਼ਤ੍ਤਂ, ਨੀ ਨਯੇ ਵਾ, ਇਲੋ. ਕੁਚ੍ਛਿਤਂ ਅਣ੍ਡਵਿਨਾਸਨਾਦਿਕਂ ਲੁਨਾਤੀਤਿ ਕੁਲਾਵਕਂ, ਣ੍ਵੁ.

੬੨੮. ਦ੍ਵਯਂ ਗਰੁਲ਼ਾਨਂ ਮਾਤਰਿ. ਵਿਨੋ ਪਕ੍ਖਿਨੋ ਨਮਨ੍ਤਿ ਯਂ ਵਿਨਤਾ. ਥੀਪੁਮਦ੍ਵਯਂ ਇਤ੍ਥਿਪੁਰਿਸਾਨਂ ਦ੍ਵਯਂ ਮਿਥੁਨਂ ਨਾਮ, ਸਙ੍ਖ੍ਯਾਨਸ੍ਸ ਸਙ੍ਖ੍ਯੇਯ੍ਯਨਿਸ੍ਸਿਤਤਾਯ ਇਤ੍ਥਿਪੁਰਿਸਾਯੇਵ ਮਿਥੁਨਂ, ਮਿਥ ਸਙ੍ਗਮੇ, ਉਨੋ.

ਛਕ੍ਕਂ ਯੁਗਲ਼ਮਤ੍ਤੇ. ਯੁਜ ਯੋਗੇ, ਅ, ਯੁਗਂ, ਅਲਪਚ੍ਚਯੇ ਯੁਗਲ਼ਂ, ਲ਼ਤ੍ਤਂ, ਯੁਗਲਮ੍ਪਿ. ਉਭ ਪੂਰਣੇ, ਣੋ, ਦ੍ਵਨ੍ਦਾਦੇਸੋ ਚ, ਦ੍ਵਨ੍ਦਂ, ਯਮੁ ਉਪਰਮੇ, ਣ੍ਵੁ, ਅਲੋ ਚ, ਯਮਕਂ, ਯਮਲਞ੍ਚ, ਅਪਚ੍ਚਯੇ ਯਮਂ.

੬੨੯-੬੩੧. ਮਣ੍ਡਲਨ੍ਤਂ ਸਮੂਹੇ. ਸਮ੍ਮਾ, ਵਿਸੇਸੇਨ ਚ ਊਹਤੇ ਪੁਞ੍ਜੀਭੂਤਤ੍ਤਾਤਿ ਸਮੂਹੋ, ਣੋ, ਸਮਂ ਸਹ ਅਵਯਵੇਨ ਊਹਤਿ ਤਿਟ੍ਠਤੀਤਿ ਵਾ ਸਮੂਹੋ. ਗਣ ਸਙ੍ਖ੍ਯਾਨੇ, ਗਣੀਯਤਿ ਅਵਯਵੇਨ ਸਹਾਤਿ ਗਣੋ. ਸਹ ਅਵਯਵੇਨ ਗਚ੍ਛਤੀਤਿ ਸਙ੍ਘਾਤੋ, ਹਨ ਗਮਨੇ, ਣੋ, ਸਹ ਅਵਯਵੇਨ ਉਦਯਤੀਤਿ ਸਮੁਦਾਯੋ, ਦਾਗਮੋ, ਮਜ੍ਝੇ ਦੀਘੋ. ਸਞ੍ਚਿਨੋਤਿ ਅਵਯਵਨ੍ਤਿ ਸਞ੍ਚਯੋ, ਚਿ ਚਯੇ. ਸਹ ਅਵਯਵੇਨ ਦੁਹਯਤੀਤਿ ਸਨ੍ਦੋਹੋ, ਦੁਹ ਪਪੂਰਣੇ. ਨਿਸ੍ਸੇਸਤੋ ਵਹਤਿ ਅਵਯਵਨ੍ਤਿ ਨਿਵਹੋ. ਅਵਯਵਂ ਕਤ੍ਵਾ ਬ੍ਯਪਿਯਤਿ ਗਚ੍ਛਤੀਤਿ ਓਘੋ [ਉਚ੍ਯਤੇ ਓਘੋ ਉਚ ਸਮਵਾਯੇ ਘਉ ਨਿਪਾਤਨਾ ਚਸ੍ਸ ਘੋ (ਚਿਨ੍ਤਾਮਣਿਟੀਕਾ ੧੫.੩੯)]. ਵਿਸਨ੍ਤਿ ਅਵਯਵਾ ਯਸ੍ਮਿਨ੍ਤਿ ਵਿਸਰੋ, ਅਰੋ. ਅਵਯਵਂ ਸਮੀਪੇ ਕਰੋਤੀਤਿ ਨਿਕਰੋ. ਏਕੇਕਾਪੇਕ੍ਖਾਯ ਅਪ੍ਪਤ੍ਥੇਨ ਕਸਙ੍ਖਾਤਾ ਅਵਯਵਾ ਆਯਨ੍ਤਿ ਯਸ੍ਮਿਂ ਕਾਯੋ, ਅਥ ਵਾ ਕੁਚ੍ਛਿਤਾਨਂ ਕੇਸਾਦੀਨਂ ਆਯੋਤਿ ਕਾਯੋ, ਸੋ ਵਿਯ ਅਵਯਵਾਨਂ ਉਪ੍ਪਤ੍ਤਿਟ੍ਠਾਨਂ ਕਾਯੋਤਿ ਇਧ ਸਮੂਹੋ ਵੁਤ੍ਤੋ. ਅਨ੍ਤਤ੍ਥੇਨ ਖਂਸਙ੍ਖਾਤਂ ਅਵਯਵਂ ਧਾਰੇਤੀਤਿ ਖਨ੍ਧੋ, ਖਾਦਤਿ ਅਵਯਵੇਤਿ ਵਾ ਖਨ੍ਧੋ, ਅਮਜ੍ਝਦੀਘੇ ਸਮੁਦਯੋ. ਘਟ ਘਟਨੇ. ਘਟਨਂ ਰਾਸਿਭਵਨਂ, ਘਟੇਨ੍ਤਿ ਅਸ੍ਸਂ ਅਵਯਵਾਤਿ ਘਟਾ. ਸਹ ਅਵਯਵੇਨ ਏਤੀਤਿ ਸਮਿਤਿ,ਤਿ. ਸਹ ਅਵਯਵੇਨ ਗਚ੍ਛਤੀਤਿ ਸਂਹਤਿ, ਹਨ ਗਤਿਯਂ,ਤਿ, ਨਲੋਪੋ. ਰਸ ਅਸ੍ਸਾਦਨੇ, ਇਣ. ਪੁਞ੍ਜ ਕੁਚ੍ਛਾਯਂ. ਸਹ ਅਵਯਵੇਨ ਬ੍ਯਾਪੇਤ੍ਵਾ ਅਯਤੀਤਿ ਸਮਵਾਯੋ. ਪੂਗੋ ਤਮ੍ਬੂਲੇਪਿ. ਜਨੇਤਿ ਅਵਯਵੇਤਿ ਜਾਤਂ, ਤੋ. ਕਂ ਅਤ੍ਤਾਨਂ ਦੇਤੀਤਿ ਕਦੋ, ਚਕ੍ਖਾਦਿਕੋ ਸਰੀਰਾਵਯਵੋ. ਕਦੋ ਵਿਯ ਕਦੋ, ਅਵਯਵੋ, ਤਂ ਵਕਤਿ ਆਦਦਾਤੀਤਿ ਕਦਮ੍ਬਕਂ. ਵਿਸੇਸੇਨ ਊਹਨ੍ਤ੍ਯਸ੍ਮਿਂ ਅਵਯਵਾ ਬ੍ਯੂਹੋ. ਵਿਤਨੋਤਿ ਅਵਯਵੇਤਿ ਵਿਤਾਨਂ, ਣੋ. ਗੁਪ ਰਕ੍ਖਣੇ, ਬੋ, ਪਸ੍ਸ ਮੋ, ਗੁਮ੍ਬੋ, ਗੁਮ੍ਬਮ੍ਪਿ. ਕਲਂ ਅਵਯਵਭਾਵਂ ਪਾਤਿ ਰਕ੍ਖਤੀਤਿ ਕਲਾਪੋ, ‘‘ਕਲਾ ਸੋਲ਼ਸਮੋ ਭਾਗੋ’’ਤਿ ਹਿ ਵੁਤ੍ਤਤ੍ਤਾ ਕਲਾਸਦ੍ਦੋ ਭਾਗਤ੍ਥੋਪ੍ਯਤ੍ਥੀਤਿ ਞਾਯਤਿ. ਜਲ ਦਿਤ੍ਤਿਯਂ. ਜਲਤਿ ਅਵਯਵੇਨਾਤਿ ਜਾਲਂ. ਅਵਯਵੇਨ ਮਣ੍ਡਤੀਤਿ ਮਣ੍ਡਲਂ, ਮਣ੍ਡ ਵਿਭੂਸਾਯਂ, ਅਲੋ.

੬੩੨. ਸਾਦ੍ਧਪਜ੍ਜੇਨ ਗਣਭੇਦਾ ਵੁਚ੍ਚਨ੍ਤੇ. ਤਤ੍ਰ ਜਾਤ੍ਯਾਦੀਹਿ ਸਮਾਨਾਨਂ ਪਾਣੀਨਂ, ਅਪਾਣੀਨਞ੍ਚ ਗਣੋ ਵਗ੍ਗੋ ਨਾਮ, ਯਥਾ ‘‘ਬਨ੍ਧੁਵਗ੍ਗੋ, ਕਵਗ੍ਗੋ’’ਚ੍ਚਾਦਯੋ, ਵਜ੍ਜ ਵਜ੍ਜਨੇ, ਵਜ੍ਜੇਤਿ ਅਸਮਾਨਜਾਤ੍ਯਾਦਯੋਤਿ ਵਗ੍ਗੋ, ਣੋ, ਜ੍ਜਸ੍ਸ ਗ੍ਗੋ. ਜਨ੍ਤੂਨਂ ਸਮਾਨਜਾਤਿਯਾਨਂ, ਵਿਜਾਤਿਯਾਨਞ੍ਚ ਗਣੋ ‘‘ਸਙ੍ਘੋ, ਸਤ੍ਥੋ’’ਤਿ ਚੋਚ੍ਚਤੇ, ਯਥਾ ‘‘ਭਿਕ੍ਖੁਸਙ੍ਘੋ, ਵਾਣਿਜਸਤ੍ਥੋ’’ਚ੍ਚਾਦਯੋ. ਸਂਹਞ੍ਞਨ੍ਤੇ ਨਿਬ੍ਬਿਸੇਸੇਨ ਞਾਯਨ੍ਤੇ ਅਵਯਵਾ ਤਸ੍ਮਿਨ੍ਤਿ ਸਙ੍ਘੋ, ਰੋ. ਸਰਨ੍ਤਿ ਵਤ੍ਤਨ੍ਤਿ ਅਵਯਵਾ ਯਸ੍ਮਿਨ੍ਤਿ ਸਤ੍ਥੋ, ਥੋ, ਰਸ੍ਸ ਤੋ.

ਸਜਾਤਿਕਾਨਂ ਸਮਾਨਜਾਤਿਕਾਨਂ ਜਨ੍ਤੂਨਮੇਵ ਗਣੋ ਕੁਲਂ ਨਾਮ, ਯਥਾ ‘‘ਖਤ੍ਤਿਯਕੁਲਂ, ਗੋਕੁਲ’’ਮਿਚ੍ਚਾਦਯੋ. ਕੁਲ ਸਙ੍ਖ੍ਯਾਨੇ, ਬਨ੍ਧੁਮ੍ਹਿ ਚ, ਅ, ਕੁਲਂ. ਸਧਮ੍ਮੀਨਂ ਸਮਾਨਧਮ੍ਮਾਨਮੇਵ ਜਨ੍ਤੂਨਂ ਗਣੋ ਨਿਕਾਯੋ ਨਾਮ, ਯਥਾ ‘‘ਭਿਕ੍ਖੁਨਿਕਾਯੋ’’ਤਿ. ਚਿ ਚਯੇ, ਣੋ, ਨਿਬ੍ਬਿਸੇਸੇਨ ਚਿਨੋਤਿ ਅਵਯਵੇਤਿ ਨਿਕਾਯੋ.

ਸਜਾਤਿਯਤਿਰਚ੍ਛਾਨਾਨਂਯੇਵ ਗਣੋ ‘‘ਯੂਥੋ’’ਤ੍ਯੁਚ੍ਚਤੇ, ਸੋ ਚਾਨਿਤ੍ਥੀ, ਯਥਾ ‘‘ਹਤ੍ਥਿਯੂਥੋ, ਮਿਗਯੂਥ’’ਮਿਚ੍ਚਾਦਯੋ, ਯੁ ਮਿਸ੍ਸਨੇ, ਥੋ, ਦੀਘਾਦਿ, ਯੂਥੋ, ‘‘ਗਣੋ ਪਸੂਨਂ ਸਮਜੋ, ਸਮਾਜੋਞ੍ਞੇਸ’ਮੁਚ੍ਚਤੇ’’ਤਿ [ਅਮਰ ੧੫.੪੨ ਗਾਥਾਯਂ ਪਸ੍ਸਿਤਬ੍ਬਂ] ਇਧਾਨਾਗਤਵਚਨਮ੍ਪਿ ਞਾਤਬ੍ਬਂ.

੬੩੩. ਚਤੁਕ੍ਕਂ ਗਰੁਲ਼ੇ. ਕਨਕਰੁਚਿਰਤ੍ਤਾ ਸੋਭਨੋ ਪਣ੍ਣੋ ਪਕ੍ਖੋ ਯਸ੍ਸ ਸੁਪਣ੍ਣੋ. ਵਿਨਭਾਯ ਨਾਮ ਮਾਤੁਯਾ ਅਪਚ੍ਚਂ ਵੇਨਤੇਯ੍ਯੋ, ਣੇਯ੍ਯੋ. ਗਰਂ ਵਿਸਧਰਂ ਹਨ੍ਤੀਤਿ ਗਰੁਲ਼ੋ, ਣੋ, ਰਨ੍ਤਸ੍ਸੁ, ਹਸ੍ਸ ਚ ਲ਼ਤ੍ਤਂ, ਵਣ੍ਣਵਿਕਾਰੋ, ਗਰੁਡੋ. ਪਕ੍ਖਿਸੀਹੋ, ਉਲ਼ੂਤੀਸੋ, ਵਜਿਰਤੁਣ੍ਡੋ, ਸੁਧਾਹਰੋ, ਸੁਵਣ੍ਣਪਕ੍ਖੋ, ਭੁਜਗਾਸਨੋਪਿ [ਤਿਕਣ੍ਡਸੇਸ ੧.੧.੪੨].

ਪਿਕਨ੍ਤਂ ਕੋਕਿਲੇ. ਪਰੇਨ ਵਿਜਾਤਿਯੇਨ ਕਾਕੇਨ ਪੋਸਿਤੋਤਿ ਪਰਪੁਟ੍ਠੋ, ਪੁਸ ਪੋਸਨੇ, ਤੋ. ਪਰੇਨ ਭਤੋ ਪੁਟ੍ਠੋ ਪਰਭਤੋ, ਭਰ ਧਾਰਣਪੋਸਨੇਸੁ, ਤੋ. ਕੁਣ ਸਦ੍ਦੋਪਕਰਣੇਸੁ, ਅਲੋ. ਕੁਕ, ਵਕ ਆਦਾਨੇ, ਇਲੋ, ਕੋਕਿਲੋ. ਅਪਿਹਿਤੋ ਕਾਯਤੀਤਿ ਪਿਕੋ, ਅਪਿ ਅਨ੍ਤਰਧਾਨੇ, ਵਣ੍ਣਨਾਸੋ, ਅਪਿਸ੍ਸਾਕਾਰਲੋਪੋ.

੬੩੪. ਅਟ੍ਠਕਂ ਮੋਰੇ. ਮੁਰ ਸਂਵਰਣੇ, ਣੋ. ਮਯ ਗਤਿਯਂ, ਊਰੋ, ਮਹਿਯਂ ਰਵਤੀਤਿ ਵਾ ਮਯੂਰੋ, ਧਾਤੁਸ੍ਸ ਅਤ੍ਥਾਤਿਸਯੇਨ ਯੋਗੋਤਿ ਨੇਰੁਤ੍ਤੋ. ਵਰਹਂ ਸਿਖਣ੍ਡੋ, ਤਂਯੋਗਾ ਵਰਹੀ. ਨੀਲਾ ਗੀਵਾ ਕਣ੍ਠੋ ਯਸ੍ਸ, ਭੁਜਙ੍ਗਭੁਜੋਪਿ.

ਦ੍ਵਯਂ ਮਯੂਰਮਤ੍ਥਕਸਿਖਾਯਂ. ਸਿਖਾ ਅਗ੍ਗਿਜਾਲਾਯਞ੍ਚ, ਪੁਬ੍ਬੇ ਵੁਤ੍ਤਾ.

੬੩੫-੬੩੬. ਚਤੁਕ੍ਕਂ ਮਯੂਰਕਲਾਪੇ. ਸਿਖਣ੍ਡਿਨੋ ਅਯਂ ਸਿਖਣ੍ਡੋ, ਵਰਹ ਪਾਧਾਨ੍ਯੇ, ਪਰਿਭਾਸਨਹਿਂਸਾਦਾਨੇਸੁ ਚ, ਕਰਣੇ ਅ. ਕੋ ਮਯੂਰੋ ਲਸਤਿ ਯੇਨ ਕਲਾਪੋ, ਣੋ, ਸਸ੍ਸ ਪੋ. ਪੀ ਤਪ੍ਪਨਕਨ੍ਤੀਸੁ, ਛੋ, ਨਿਗ੍ਗਹੀਤਾਗਮੋ, ਰਸ੍ਸੋ ਚ. ਦ੍ਵਯਂ ਮੋਰਸ੍ਸ ਪਿਞ੍ਛਟ੍ਠੇ ਅਕ੍ਖਿਸਣ੍ਠਾਨੇ. ਚਦਿ ਹਿਲਾਦਨੇ, ਦਿਤ੍ਤਿਯਞ੍ਚ, ਣ੍ਵੁ. ਮੇਚਕੋ ਕਣ੍ਹਵਣ੍ਣੇਪਿ ਵੁਤ੍ਤੋ.

ਅਲ਼੍ਯਨ੍ਤਂ ਭਮਰੇ, ਛ ਪਦਾਨਿ ਅਸ੍ਸ. ਮਧੁਂ ਵਤਯਤਿ ਭੁਞ੍ਜਤੇ ਮਧੁਬ੍ਬਤੋ, ਵਤ ਭੋਜਨੇ. ਭਮ ਅਨਵਟ੍ਠਾਨੇ, ਪੁਪ੍ਫਮਤ੍ਥਕੇ ਭਮਤੀਤਿ ਭਮਰੋ, ਅਰੋ. ਅਰ ਗਮਨੇ, ਇ, ਲ਼ਤ੍ਤਂ.

ਚਤੁਕ੍ਕਂ ਗੇਹਵਨਕਪੋਤੇਸੁ. ਪਾਰੇਨ ਸਬਲੇਨ ਆਪਤਤੀਤਿ ਪਾਰਾਪਤੋ, ਪਾਰਵਤੋਪਿ. ਕਪ ਅਚ੍ਛਾਦਨੇ, ਕਮ੍ਪ ਚਲਨੇ ਵਾ. ਓਤੋ, ਪਰਪਕ੍ਖੇ ਮਲੋਪੋ. ਕੁਕ ਆਦਾਨੇ, ਅਟੋ, ਉਸ੍ਸਤ੍ਤਮਸ੍ਸੁਤ੍ਤਞ੍ਚ. ਪਕਾਰੇਨ ਰਵਤੀਤਿ ਪਾਰੇਵਟੋ, ਰੁ ਸਦ੍ਦੇ, ਅਟੋ, ਉਪਸਗ੍ਗਸ੍ਸ ਦੀਘੋ, ਅਸ੍ਸੇ, ਪਾਰੇਵਟੋ, ਪਰੇਵਟੋਪਿ.

‘‘ਪਾਰਾਵਤੋ ਚ ਛੇਜ੍ਜੋ ਚ,

ਕਪੋਤੋ ਰਤ੍ਤਲੋਚਨੋ;

ਪਾਰਾਪਤੋ ਕਲਰਵੋ,

ਪਤ੍ਤੀ ਸੇਨੋ ਸਸਾਦਨੋ’’ਤਿ [ਚਿਨ੍ਤਾਮਣਿਟੀਕਾ ੧੫.੧੪]. –

ਰਭਸੋ.

੬੩੭. ਦ੍ਵਯਂ ਗਿਜ੍ਝੇ. ਗਿਧ ਅਭਿਕਙ੍ਖਾਯਂ, ਯੋ, ਝਸ੍ਸ ਝੋ, ਅਸਰੂਪਦ੍ਵਿਤ੍ਤਂ, ਝਪਚ੍ਚਯੇਨ ਵਾ ਸਿਦ੍ਧਂ, ਤਥਾ ਧਸ੍ਸ ਜੋ. ਗਿਧਤਿਸ੍ਮਾ ਅ, ਨਿਗ੍ਗਹੀਤਾਗਮੋ, ਇਸ੍ਸਤ੍ਤਂ, ਗਨ੍ਧੋ. ਤਿਕਂ ਸੇਨਸਾਮਞ੍ਞੇ. ਕੁਕ੍ਕੁਟਾਦੀਨਂ ਕੁਲਂ ਲੁਨਾਤਿ ਛਿਨ੍ਦਤੀਤਿ ਕੁਲਲੋ, ਕੁਲ ਸਨ੍ਤਾਨੇ ਵਾ, ਅਲੋ. ਸੇ ਗਮਨੇ, ਨੋ. ਸਤ੍ਤਾਨਂ ਹਿਂਸਨਤੋ ਬ੍ਯਗ੍ਘੋ ਵਿਯ ਬ੍ਯਗ੍ਘਿ, ਸਤ੍ਤੇ ਨਾਸੇਤੀਤਿ ਨਾਸੋ. ਬ੍ਯਗ੍ਘਿ ਏਵ ਨਾਸੋਤਿ ਸਮੁਦਿਤਨਾਮਂ.

ਸਕੁਣਗ੍ਘਾਦਯੋ ਤਯੋ ਤਬ੍ਭੇਦਾ ਤਸ੍ਸ ਸੇਨਸ੍ਸ ਵਿਸੇਸਾ. ਸਕੁਣਂ ਹਨ੍ਤੀਤਿ ਸਕੁਣਗ੍ਘਿ, ਸਿਨ?. ਅਟ ਗਮਨੇ, ਣੋ. ਆਟੋ. ਦਬ੍ਬਿਸਦਿਸਂ ਤੁਣ੍ਡਂ ਯਸ੍ਸ ਦ੍ਵਿਜਸ੍ਸ ਸੋ ਦਬ੍ਬਿਮੁਖਦ੍ਵਿਜੋ. ‘‘ਦਬ੍ਬਿਮੁਖਦ੍ਵਿਜੋ ਆਟੋ ਨਾਮਾ’’ਤਿਪ੍ਯੇਕੋ ਅਤ੍ਥੋ, ਤਦਾ ਦ੍ਵੇਯੇਵ ਸੇਨਭੇਦਾ.

੬੩੮. ਚਤੁਕ੍ਕਂ ਉਲੂਕੇ. ‘‘ਉਹੁ’’ਨ੍ਤਿ ਸਦ੍ਦਂ ਕਰੋਤੀਤਿ ਉਹੁਙ੍ਕਾਰੋ. ‘‘ਉਦ੍ਧਂ ਕਣ੍ਣਾ ਯਸ੍ਸ ਉਦ੍ਧਂਕਣ੍ਣੋ’’ਤਿ ਸਮ੍ਪਤ੍ਤੇ ਨਿਰੁਤ੍ਤਿਨਯੇਨ ਉਲੂਕੋ [ਉਲਭਿਨੇਤ੍ਤੇਥਿ ਦਹਤ੍ਯੁਲੂਕੋ, ਉਦ੍ਧੋਲੋਕਨਾ ਇਤਿ ਨਿਰੁਤ੍ਤਮ (ਅਮਰਕੋਸੁਗ੍ਘਾਟਨਟੀਕਾ ੧੫.੧੫)], ਉਚਤਿ ਸਮਵੇਤਿ ਕੋਟਰਨ੍ਤਿ ਵਾ ਨਿਪਾਤਨਾ. ਕੁਸ ਅਕ੍ਕੋਸੇ, ਯਸ੍ਸ ਅਮਨਾਪਤਾਯ ਸਦ੍ਦੇਨ ਲੋਕਾ ਕੋਸਨ੍ਤਿ, ਸੋ ਕੋਸਿਯੋ, ਕੋਸਿਤਬ੍ਬੋਤਿ ਕਤ੍ਵਾ, ਕੋਟਰੇ ਵਸਤੀਤਿ ਵਾ ਕੋਸਿਯੋ, ਨੇਰੁਤ੍ਤੋ, ਵਾਯਸਾਨਂ ਕਾਕਾਨਂ ਅਰਿ ਸਤ੍ਤੁ, ਸਕ੍ਕਹ੍ਵਯੋ, ਦਿਵਾਨ੍ਧੋ ਵਕ੍ਕਨਾਸਿਕੋ, ਹਰਿਨੇਤ੍ਤੋ, ਦਿਵਾਭੀਤੋ, ਕਾਕਭੀਰੂ, ਰਤ੍ਤਿਚਾਰੀਪਿ.

ਵਾਯਸਨ੍ਤਂ ਕਾਕੇ. ‘‘ਕਾ’’ਇਤਿ ਸਦ੍ਦਂ ਕਾਯਤੀਤਿ ਕਾਕੋ. ਰਿਟ੍ਠਂ ਮਰਣਲਕ੍ਖਣਂ, ਤਦਸ੍ਸ ਨਤ੍ਥਿ ਅਰਿਟ੍ਠੋ. ਧਙ੍ਕ ਘੋਰਵਾਸਿਤੇ, ਅ. ਬਲਿਨਾ ਪੁਟ੍ਠੋ ਭਤੋ. ਵਯ ਗਮਨੇ, ਵਯੋ ਏਵ ਵਾਯਸੋ, ਸਕਤ੍ਥੇ ਸੋ, ਸਕਿਂਪਜੋ, ਅਤ੍ਤਘੋਸੋ, ਪਰਭਰੋ, ਬਲਿਭੁਜੋ, ਗੁਲ਼੍ਹਮੇਥੁਨੋਪਿ. ਸਕਿਂ ਏਕਵਾਰਂਪਜਾ ਪਸੂਤਿ ਯਸ੍ਸ. ‘‘ਕਾਕ’’ਇਚ੍ਚਤ੍ਤਾਨਂ ਘੋਸਯਤਿ. ਵਿਜਾਤਿਯਂ ਕੋਕਿਲਂ ਭਰਤਿ.

੬੩੯. ਕਾਕੋ ਵਿਯ ਉਲਤਿ ਗਚ੍ਛਤੀਤਿ ਕਾਕੋਲ਼ੋ, ਲ਼ਤ੍ਤਂ. ਦੋਣਕਾਕੋ, ਦਦ੍ਧਕਾਕੋਪਿ. ਦ੍ਵਯਂ ‘‘ਬੀ-ਲ੍ौਂ’’ਇਤਿ ਖ੍ਯਾਤੇ ਸਕੁਣੇ. ਲੂ ਛੇਦਨੇ, ਣੋ, ਵਸ੍ਸ ਪੋ, ਲਾਪੋ, ਲਾਵੋਪਿ. ਲੇਡ੍ਡੁ ਵਿਯ ਅਕਤੀਤਿ ਲਟੁਕਿਕਾ [ਲੇਡ੍ਡੁਕਿਕਾ (ਕ.)], ਣ੍ਵੁ.

ਤਿਕਂ ਹਤ੍ਥਿਲਿਙ੍ਗਸਕੁਣੇ. ਵਾਰਣਸਦਿਸਤ੍ਤਾ ਵਾਰਣੋ. ਹਤ੍ਥਿਨੋ ਲਿਙ੍ਗਂ ਞਾਪਕਂ ਸੋਣ੍ਡਂ ਯਸ੍ਮਿਂ ਵਿਜ੍ਜਤੀਤਿ ਹਤ੍ਥਿਲਿਙ੍ਗੋ. ਹਤ੍ਥਿਸੋਣ੍ਡਂ ਯਸ੍ਮਿਂ ਵਿਜ੍ਜਤਿ, ਸੋ ਹਤ੍ਥਿਸੋਣ੍ਡੋ ਚ ਵਿਹਙ੍ਗਮੋ ਚੇਤਿ ਹਤ੍ਥਿਸੋਣ੍ਡਵਿਹਙ੍ਗਮੋ.

੬੪੦. ਦ੍ਵਯਂ ਉਕ੍ਕੁਸੇ. ਉਚ੍ਚਂ ਕੋਸਤੀਤਿ ਉਕ੍ਕੁਸੋ, ਕੁਸ ਸਦ੍ਦੇ, ਅ. ਕੁਰ ਸਦ੍ਦੇ, ਅਰੋ, ਥਿਯਂ ਕੁਰਰੀ. ਕੋਲਟ੍ਠਿਪਕ੍ਖਿਮ੍ਹਿ ‘‘ਉਭੁਤ’’ਇਤਿ ਖ੍ਯਾਤੇ ਪਕ੍ਖਿਮ੍ਹਿ ਕੁਕ੍ਕੁਹੋ. ਕੋਲਟ੍ਠਿਅਜ੍ਝੋਹਾਰਕੋ ਪਕ੍ਖੀ ਕੋਲਟ੍ਠਿਪਕ੍ਖੀ. ‘‘ਕੁਕ੍ਕੁ’’ਇਤਿ ਸਦ੍ਦਾਯਤੀਤਿ ਕੁਕ੍ਕੁਹੋ, ਹੋ, ਕੁਕ ਅਵ੍ਹਾਨੇ ਵਾ, ਉਹੋ.

ਤਿਕਂ ਸੁਵੇ. ਸੁ ਸਵਨੇ. ਮਨੁਸ੍ਸਸਦ੍ਦਮ੍ਪਿ ਸੁਣਾਤੀਤਿ ਸੁਵੋ, ਅ, ਉਵਾਦੇਸੋ. ‘‘ਕੀ’’ਇਤਿ ਸਦ੍ਦਂ ਕਰੋਤੀਤਿ ਕੀਰੋ. ਕਰੋਤਿ ਮਨੁਸ੍ਸਸਦ੍ਦਨ੍ਤਿ ਵਾ ਕੀਰੋ. ਅ, ਅਸ੍ਸੀ. ਸੁਕ ਗਤਿਯਂ, ਸੁਨ੍ਦਰਂ, ਸੁਟ੍ਠੁ ਵਾ ਮਨੁਸ੍ਸਸਦ੍ਦਂ ਕਾਯਤੀਤਿ ਸੁਕੋ. ਦ੍ਵਯਂ ਕੁਕ੍ਕੁਟਮਤ੍ਤੇ. ਤਮ੍ਬਾ ਚੂਲ਼ਾ ਯਸ੍ਸ. ਕੁਕ੍ਕੁਟਤੀਤਿ ਕੁਕ੍ਕੁਟੋ, ਕੁਕ, ਵਕ ਆਦਾਨੇ ਵਾ, ਅਟੋ.

੬੪੧. ਦ੍ਵਯਂ ਨਿਜ੍ਜਿਵ੍ਹੇ. ਨਤ੍ਥਿ ਜਿਵ੍ਹਾ ਯਸ੍ਸ ਨਿਜ੍ਜਿਵ੍ਹੋ. ਦ੍ਵਯਂ ਕੋਞ੍ਚਾਸਕੁਣੇ. ਇਤ੍ਥਿਲਿਙ੍ਗੇਨ ਮਿਥੁਨਾਨਂ ਨਾਮਾਨਿ. ਕੋਞ੍ਚ ਕੋਟਿਲ੍ਯਪ੍ਪੀਭਾਵੇਸੁ, ਅ, ਕੋਞ੍ਚਾ. ਕਨ੍ਤ ਛੇਦਨੇ, ਯੁ, ਨਦਾਦਿ, ਅਸ੍ਸੁ. ਕੁਣ੍ਡਨੀਪਿ, ਕੁਣ੍ਡ ਦਾਹੇ.

ਦ੍ਵਯਂ ਚਕ੍ਕਵਾਕੇ. ਚਕ੍ਕੇਨ ਚਕ੍ਕਸਦ੍ਦੇਨ ਉਚ੍ਚਤੇ ਚਕ੍ਕਵਾਕੋ, ਣੋ. ਵਚ ਵਿਯਤ੍ਤਿਯਂ ਵਾਚਾਯਂ, ਚਕ੍ਕਮਿਚ੍ਚਾਵ੍ਹਾ ਯਸ੍ਸ, ਰਥਙ੍ਗਾਵ੍ਹਯਨਾਮਕੋਪਿ, ਰਥਙ੍ਗਂ ਚਕ੍ਕਂ, ਤਸ੍ਸ ਅਵ੍ਹਯੋ ਰਥਙ੍ਗਾਵ੍ਹਯੋ, ਸੋ ਨਾਮਂ ਅਸ੍ਸ ਰਥਙ੍ਗਾਵ੍ਹਯਨਾਮਕੋ, ਤੇਨ ਰਥਙ੍ਗਨਾਮੋ ਰਥਚਰਣਸਮਾਨੋ ਅਵ੍ਹਯੋ ਚੋਚ੍ਚਤੇ.

ਲਕ੍ਖਿਤਲਕ੍ਖਣਾ ਚਾਤ੍ਰ, ਲਕ੍ਖਣੋਪਚਰਿਤਵੁਤ੍ਤਿਯਾ, ਗੋਣਮੁਖ੍ਯਾਯ ਵਾ ਵੁਤ੍ਤਿਯਾ ਲਕ੍ਖਿਤੇਨ ਅਤ੍ਥੇਨ ਯਤ੍ਰ ਅਤ੍ਥਨ੍ਤਰਂ ਲਕ੍ਖ੍ਯਤੇ, ਸਾ ਲਕ੍ਖਿਤਲਕ੍ਖਣਾ. ਯਥਾ ‘‘ਰਥਾਵਯਵਾਯੁਧੋ’’ ਇਚ੍ਚਤ੍ਰ ਰਥਾਵਯਵਸਦ੍ਦੇਨ ਚਕ੍ਕਂ ਲਕ੍ਖ੍ਯਤੇ, ਨ ਤਦਾਕਤਿ ਤਨ੍ਨਾਮੋ ਚਾਯੁਧਵਿਸੇਸੋ. ‘‘ਪਨ੍ਤਿਰਥੋ’’ਇਚ੍ਚਤ੍ਰ ਪਨ੍ਤਿਸਦ੍ਦੇਨ ਦਸਕ੍ਖਰਂ ਛਨ੍ਦੋ ਲਕ੍ਖ੍ਯਤੇ, ਨ ਦਸਸਦ੍ਦੋ, ਤੇਹਿ ਤੁ ਆਯੁਧਰਥਸਦ੍ਦਸਨ੍ਨਿਵੇਸੋ ‘‘ਚਕ੍ਕਾਵਯਵਾਯੁਧੋ, ਦਸਰਥੋ’’ ਇਤਿ ਦੇਵਵਿਸੇਸੋ, ਰਾਜਵਿਸੇਸੋ ਚ ਲਕ੍ਖ੍ਯਤੇ, ਤਥਾਤ੍ਰਾਪਿ ‘‘ਰਥਙ੍ਗ’’ਨ੍ਤ੍ਯਨੇਨ ਰਥੇਕਦੇਸੋ ਲਕ੍ਖੀਯਤੇ, ‘‘ਅਵ੍ਹਾਯਤੇ’’ਇਚ੍ਚਨੇਨ ਚ ਪਰਿਭਾਸਨਂ, ਨ ਤੇਨਾਪਿ ਵਾਕਸਦ੍ਦੋ. ਤੇਹਿ ਚ ਅਞ੍ਞਮਞ੍ਞਸਨ੍ਨਿਵੇਸੋ ਚਕ੍ਕਵਾਕੋਤਿ ਪਕ੍ਖਿਵਿਸੇਸੋ ਲਕ੍ਖੀਯਤੇਤਿ ਗੁਣਤੋ ਸੁਕ੍ਕਾਦੀਹਿ ਏਵਂਗਤਾ ਗੋਣੀ ਵੁਤ੍ਤਿ.

ਦ੍ਵਯਂ ਚਾਤਕੇ. ਅਯਂ ਮੇਘਜਲਪਾਯੀ, ਸਰ ਹਿਂਸਾਯਂ, ਸਰਣਂ ਸਾਰੋ, ਤਂ ਗਚ੍ਛਤੀਤਿ ਸਾਰਙ੍ਗੋ. ‘‘ਚਾਤਕੇ ਹਰਿਣੇ ਪੁਮੇ, ਸਾਰਙ੍ਗੋ ਸਬਲੇ ਤਿਸੂ’’ਤਿ [ਚਿਨ੍ਤਾਮਣਿਟੀਕਾ ੨੩.੨੩] ਰਭਸੋ. ਚਤ ਯਾਚਨੇ, ਣ੍ਵੁ, ਥੋਕਕੋਪਿ, ਥੋਕਂ ਕਂ ਜਲਂ ਈਹਨੀਯਟ੍ਠੇਨ ਅਸ੍ਸਤ੍ਥਿ ਥੋਕਕੋ.

੬੪੨. ਦ੍ਵਯਂ ਪਕ੍ਖਿਬਿਲ਼ਾਲੇ. ਤੁਲ ਉਮ੍ਮਾਨੇ, ਇਯੋ. ਪਕ੍ਖਯੁਤ੍ਤੋ ਬਿਲ਼ਾਲੋ, ‘‘ਸੂ’’.

ਦ੍ਵਯਂ ਰੁਕ੍ਖਕੀਟਖਾਦਕੇ. ਸਤਂ ਪਤ੍ਤਾਨਿ ਅਸ੍ਸ. ਸਰਤਿ ਕੀਟੇਤਿ ਸਾਰਸੋ, ਸੋ, ‘‘ਖਾਵ ਸਾ’’.

ਦ੍ਵਯਂ ਕਾਕੇਹਿ ਸਦ੍ਧਿਂ ਨੀਲ਼ਂ ਕਤ੍ਵਾ ਵਸਨਕੇ ਸੁਕ੍ਕਸਕੁਣੇ. ਵਕ ਆਦਾਨੇ, ਅ. ਸੇਤਵਣ੍ਣਤਾਯ ਸੁਕ੍ਕੋ ਚ ਸੋ ਕਾਕੇਹਿ ਸਦ੍ਧਿਂ ਨਿਵਾਸਨਤੋ, ਕਾਕਸਣ੍ਠਾਨਤ੍ਤਾ ਵਾ ਕਾਕੋ ਚੇਤਿ ਸੁਕ੍ਕਕਾਕੋ.

ਦ੍ਵਯਂ ਵਿਸਕਣ੍ਠਿਕਾਯਂ. ਬਲ ਪਾਣਨੇ, ਣ੍ਵੁ, ਦੀਘੋ, ਆਕੋ ਵਾ. ਵਿਸਸਦਿਸੋ ਕਾਲ਼ਵਣ੍ਣੋ ਕਣ੍ਠੋ ਯਸ੍ਸਾ ਸਾ ਵਿਸਕਣ੍ਠਿਕਾ, ਏਤਿਸ੍ਸਾ ਪੁਮੋ ਨਾਮ ਨ ਵਿਜ੍ਜਤਿ. ਵੁਤ੍ਤਞ੍ਚ ਅਪਦਾਨੇ –

‘‘ਯਥਾ ਬਲਾਕਯੋਨਿਮ੍ਹਿ, ਨ ਵਿਜ੍ਜਤਿ ਪੁਮੋ ਸਦਾ;

ਮੇਘੇਸੁ ਗਜ੍ਜਮਾਨੇਸੁ, ਗਬ੍ਭਂ ਗਣ੍ਹਨ੍ਤਿ ਤਾ ਤਦਾ’’ਤਿ [ਅਪ. ਥੇਰ. ੧.੧.੫੧੧].

੬੪੩. ਦ੍ਵਯਂ ਕਙ੍ਕੇ. ਲੋਹਸਦਿਸੋ ਪਿਟ੍ਠਿ ਯਸ੍ਸ ਲੋਹਪਿਟ੍ਠੋ. ਕਙ੍ਕ ਲੋਲ੍ਯੇ, ਅ, ਕਙ੍ਕੋ.

ਦ੍ਵਯਂ ਪਤ੍ਤਕਣ੍ਠੇ. ਖਞ੍ਜੋ ਵਿਯ ਚਰਤੀਤਿ ਖਞ੍ਜਰੀਟੋ, ਈਟੋ. ਪਸ੍ਸਨ੍ਤਾਨਂ ਖਂ ਸੁਖਂ ਜਨੇਤੀਤਿ ਖਞ੍ਜਨੋ. ਖਞ੍ਜ ਗਤਿਵੇਕਲ੍ਯੇ ਵਾ, ਯੁ.

ਦ੍ਵਯਂ ਗਾਮਚਾਟਕੇ, ਚਾਟਕਮਤ੍ਤੇ ਵਾ. ਕਲਹਂ ਰਵਤੀਤਿ ਕਲਵਿਙ੍ਕੋ, ਯਦਾਦਿ. ਕਂ ਸੁਖਂ ਲੁਨਾਤੀਤਿ ਵਾ ਕਲਵਿਙ੍ਕੋ, ਇਕੋ, ਨਿਗ੍ਗਹੀਤਾਗਮੋ ਚ. ਚਟ ਭੇਦੇ, ਣ੍ਵੁ, ਚਾਟਕੋ.

ਦ੍ਵਯਂ ਵੇਲ਼ੁਰਿਯਚ੍ਛਵਿਲੋਮੇ ਚਿਤ੍ਰਪਕ੍ਖੇ ‘‘ਸੁਵਣ੍ਣਚੂਲ਼ੇ’’ਤਿ ਖ੍ਯਾਤੇ. ਦਿਭ ਸਨ੍ਥਮ੍ਭੇ, ਦ੍ਵਿਤ੍ਤਂ, ਬਿਨ੍ਦਾਗਮੋ ਚ. ‘‘ਕਿ’’ਇਤਿ ਸਦ੍ਦਂ ਕਰੋਤੀਤਿ ਕਿਕੀ, ਣੀ, ਚਾਸੋ, ਦਿਵਿਪਿ [ਚਾਸੋ ਕਿਕੀਦਿਵਿ (ਅਮਰ ੧੫.੧੬)].

੬੪੪. ਦ੍ਵਯਂ ਮੇਘਸਾਮੇ ‘‘ਟੀ-ਟ੍ौ’’ਇਤਿ ਖ੍ਯਾਤੇ. ਕਦਮ੍ਬਯੋਗਾ ਕਾਦਮ੍ਬੋ. ਕਾਲ਼ਵਣ੍ਣੋ ਹਂਸੋ ਕਾਲ਼ਹਂਸੋ, ਕਾਲਹਂਸੋਪਿ.

ਦ੍ਵਯਂ ‘‘ਙਹੇ-ਡੋ’’ਇਤਿ ਖ੍ਯਾਤੇ ਸਕੁਣੇ. ਸਕੁਨ੍ਤੋ ਵੁਤ੍ਤੋ, ‘‘ਸਕੁਨ੍ਤੋ ਪਕ੍ਖਿਭੇਦਸ੍ਮਿਂ, ਭਾਸਪਕ੍ਖੀਖਗੇਸੁ ਚੇ’’ਤਿ ਨਾਨਤ੍ਥਸਙ੍ਗਹੇ. ਸੁਨ੍ਦਰਾਕਾਰੇਨ ਪਕ੍ਖੇਨ ਯੁਤ੍ਤੋ ਸਕੁਣੋ ਭਾਸਪਕ੍ਖੀ, ‘‘ਭਾਸਨ੍ਤੋ ਸੁਨ੍ਦਰਾਕਾਰੇ, ਭਾਸਨ੍ਤੋ ਭਾਸਪਕ੍ਖਿਨੀ’’ਤਿ ਹਿ ਨਾਨਤ੍ਥਸਙ੍ਗਹੇ.

ਦ੍ਵਯਂ ‘‘ਨ੍ਵਾ-ਮੀ-ਸ੍ਵੇ’’ਇਤਿ ਖ੍ਯਾਤੇ ਨੀਲਪਕ੍ਖਿਨਿ. ਧੂਮ੍ਯਂ ਧੂਮਂ ਅਟਤਿ ਸਹਤੀਤਿ ਧੂਮ੍ਯਾਟੋ, ਣੋ. ਕਾਲ਼ਵਣ੍ਣਤਾਯ ਕੁਚ੍ਛਿਤਂ ਲਿਙ੍ਗਂ ਯਸ੍ਸ. ਭਿਙ੍ਗੋਪਿ.

ਦ੍ਵਯਂ ਜਲਕੁਕ੍ਕੁਟੇ. ਦਾ ਲਵਨੇ,ਤਿ, ਦਾਤਿ ਊਹਤਿ ਉਸ੍ਸਹਤੀਤਿ ਦਾਤ੍ਯੂਹੋ, ਖਣ੍ਡਿਤਦ੍ਧਨਿਇਚ੍ਚਤ੍ਥੋ. ਕਾਲੇ ਸਸ੍ਸਮੁਤੁਮ੍ਹਿ ਕਣ੍ਠੋ ਕਣ੍ਡਦ੍ਧਨਿ ਯਸ੍ਸ ਕਾਲ਼ਕਣ੍ਠਕੋ, ਸਮਾਸਨ੍ਤੇ ਕੋ.

੬੪੫. ਖੁਦ੍ਦਾਦਿ ਮਧੁਚ੍ਛਿਟ੍ਠਕਰਾਦਿਕੋ ਕਮ੍ਮਭੂਤੋ ‘‘ਮਕ੍ਖਿਕਾਭੇਦੋ’’ਤ੍ਯੁਚ੍ਚਤੇ, ਮਕ੍ਖਿ ਸਙ੍ਘਾਤੇ, ਣ੍ਵੁ, ਮਕ੍ਖਿਕਾ, ਤਾਸਂ ਭੇਦੋ ਮਕ੍ਖਿਕਾਭੇਦੋ. ਪਿਙ੍ਗਲਮਕ੍ਖਿਕਾਯਂ ‘‘ਮ੍ਹਣ’’ਇਤਿ ਖ੍ਯਾਤਾਯਂ ਦ੍ਵਯਂ. ਡਂਸ ਡਂਸਨੇ, ਡਂਸੋ. ਦਂਸੋਪਿ, ਡਂਸ ਖਾਦਨੇ ਵਾ, ਪਿਙ੍ਗਲਮਕ੍ਖਿਕਾਤਿਵਣ੍ਣਨਾਮਂ.

ਮਕ੍ਖਿਕਾਯ ਅਣ੍ਡਂ ਆਸਾਟਿਕਾ ਨਾਮ, ਸਟ ਅਵਯਵੇ, ਣ੍ਵੁ. ਦ੍ਵਯਂ ‘‘ਨ੍ਹਂ’’ਇਤਿ ਖ੍ਯਾਤੇ. ਪਟਂ ਗਚ੍ਛਤੀਤਿ ਪਟਙ੍ਗੋ, ਪਤਙ੍ਗੋਪਿ, ਸਰਤਿ ਹਿਂਸਤੀਤਿ ਸਲਭੋ, ਅਭੋ, ਲਤ੍ਤਂ, ਸਲ ਗਮਨੇ ਵਾ.

੬੪੬. ਦ੍ਵਯਂ ‘‘ਛੇਂ’’ਇਤਿ ਖ੍ਯਾਤੇ, ਮਕ ਪਾਣੇ, ਅਸੋ, ਮਕਸੋ. ਦ੍ਵਯਂ ਨਿਦਾਘੇ ਨੁਹਾਦੀਸੁ ਵਰਣਕਮਕ੍ਖਿਕਾਯਂ. ‘‘ਚੀਰੀ’’ਤਿ ਸਦ੍ਦਾਯਤੀਤਿ ਚੀਰੀ, ਚਿਰਿ ਹਿਂਸਾਯਂ ਵਾ, ਨਦਾਦਿ, ਦੀਘਾਦਿ. ਝਲ੍ਲ ਸਦ੍ਦੇ, ਣ੍ਵੁ, ਝਲ੍ਲਿਕਾ.

ਦ੍ਵਯਂ ਤਾਲਪਤ੍ਤਾਦ੍ਯਨ੍ਤਰੇਸੁ ਨਿਲੀਨਾਯਂ ਚਮ੍ਮਪਤ੍ਤਾਯਂ. ਜਤੁ ਵਿਯ ਜਤੁਕਾ, ਉਪਮਾਨੇ ਕੋ, ‘‘ਰਾਮਠੇ ਜਤੁਕਂ ਚਮ੍ਮ-ਪਤ੍ਤਜਤੁਕਰੇਸੁ ਥੀ’’ਤਿ [ਚਿਨ੍ਤਾਮਣਿਟੀਕਾ ੧੯.੪੦] ਹਿ ਰਭਸੋ. ਅਜਿਨਂ ਚਮ੍ਮਂ ਪਤ੍ਤਂ ਯਸ੍ਸਾ ਅਜਿਨਪਤ੍ਤਾ. ਦ੍ਵਯਂ ਹਂਸਸਾਮਞ੍ਞੇ. ਹਨ੍ਤਿ ਅਦ੍ਧਾਨਂ ਹਂਸੋ. ਸੇਤੋ ਛਦੋ ਪਤ੍ਤਂ ਯਸ੍ਸ. ਯਥਾਕਥਞ੍ਚਿ ਬ੍ਯੁਪ੍ਪਤ੍ਤੀਤਿ ਵੁਤ੍ਤਤ੍ਤਾ ਅਸੇਤਚ੍ਛਦੇਪਿ, ਚਕ੍ਕਙ੍ਗੋ, ਮਾਨਸੋਕੋਪਿ, ਚਕ੍ਕਸ੍ਸ ਚਕ੍ਕਵਾਕਸ੍ਸੇਵ ਅਙ੍ਗਾਨਿ ਯਸ੍ਸ. ਮਾਨਸਂ ਸਰੋ ਓਕੋ ਯਸ੍ਸ.

੬੪੭. ਯੇ ਰਤ੍ਤੇਹਿ ਲੋਹਿਤੇਹਿ ਪਾਦਤੁਣ੍ਡੇਹਿ ਚਰਣਚਞ੍ਚੂਹਿ ਵਿਸਿਟ੍ਠਾ ਸਿਤਾ ਚ ਸਰੀਰੇ, ਤੇ ਰਾਜਹਂਸਾ ਨਾਮ, ਹਂਸਾਨਂ ਰਾਜਾਨੋ ਰਾਜਹਂਸਾ.

ਮਲੀਨੇਹਿ ਪਾਦਤੁਣ੍ਡੇਹਿ ਵਿਸਿਟ੍ਠਾ ਯੇ ਤੇ ਮਲ੍ਲਿਕਾਖ੍ਯਾ, ਮਲ, ਮਲ੍ਲ ਧਾਰਣੇ, ਇ, ਸਞ੍ਞਾਯਂ ਕੋ, ‘‘ਮਲ੍ਲਿਕੋ ਹਂਸਭੇਦੇ ਚ, ਤਿਣਸੂਲੇ ਚ ਮਲ੍ਲਿਕੇ’’ਤਿ [ਚਿਨ੍ਤਾਮਣਿਟੀਕਾ ੧੫.੨੪] ਰੁਦ੍ਦੋ. ਆਖ੍ਯਾਸਦ੍ਦੇਨ ਬਹੁਬ੍ਬੀਹਿ. ਅਸਿਤੇਹਿ ਕਣ੍ਹੇਹਿ ਪਾਦਤੁਣ੍ਡੇਹਿ ਵਿਸਿਟ੍ਠਾ ਯੇ, ਤੇ ਧਤਰਟ੍ਠਾ, ਧਤਰਟ੍ਠਾਨਂ ਅਪਚ੍ਚਾਨਿ ਧਤਰਟ੍ਠਾਤਿ, ਣੋ.

੬੪੮. ਤਿਕਂ ਤਿਰਚ੍ਛਾਨੇ. ਤਿਰਿਯਂ ਅਞ੍ਚਯਤੀਤਿ ਤਿਰਚ੍ਛੋ, ਤਿਰਿਯਸ੍ਸ ਤਿਰੋ, ਅਞ੍ਚਤਿਸ੍ਸ ਚ੍ਛੋ. ਯੁਮ੍ਹਿ ਤਿਰਚ੍ਛਾਨੋ, ਤਿਰਚ੍ਛਾਨੋਯੇਵ ਤਿਰਚ੍ਛਾਨਗਤਂ, ਤਬ੍ਭਾਵਂ ਵਾ ਗਤਂ ਪਤ੍ਤਂ, ਤੇਸੁ ਵਾ ਗਤਂ ਅਨ੍ਤੋਗਧਨ੍ਤਿ ਤਿਰਚ੍ਛਾਨਗਤਂ, ਸਿਯਾਤਿ ਪਕਤ੍ਯਾਨਪੇਕ੍ਖਕ੍ਰਿਯਾਪਦਂ, ਭਵਤ੍ਯਤ੍ਥੋ ਵਾ ਹਿ ਕਰੋਤ੍ਯਤ੍ਥੋ ਵਾ ਕਦਾਚਿ ਪਕਤ੍ਯਾਨਪੇਕ੍ਖੋ ਭਵਤਿ, ਨ ਪਨ ਵਿਕਤ੍ਯਾਨਪੇਕ੍ਖੋ. ਤਥਾ ਕਦਾਚਿ ਉਭਯਾਪੇਕ੍ਖੋਪਿ ਭਵਤਿ, ਨ ਪਨੁਭਯਾਨਪੇਕ੍ਖੋਤਿ ਸਬ੍ਬਤ੍ਰੇਵਂ. ਸੀਹਾਦਿਵਗ੍ਗੋ.

ਅਰਞ੍ਞਾਦਿਵਗ੍ਗਵਣ੍ਣਨਾ ਨਿਟ੍ਠਿਤਾ.