੨. ਭੂਕਣ੍ਡ
੧. ਭੂਮਿਵਗ੍ਗਵਣ੍ਣਨਾ
੧੮੦. ਇਧ ਭੂਕਣ੍ਡੇ ਸਾਙ੍ਗੋਪਾਙ੍ਗੇਹਿ ਭੂਮ੍ਯਾਦੀਹਿ ਦਸਹਿ, ਪਾਤਾਲੇਨ ਚਾਤਿ ਏਕਾਦਸਹਿ ਕੋਟ੍ਠਾਸੇਹਿ ਕਮਤੋ ਵਗ੍ਗਾ ਭੂਮਿਵਗ੍ਗਾਦਿਨਾਮਕਾ ਵਗ੍ਗਾ ਵੁਚ੍ਚਨ੍ਤੇ. ਸਪ੍ਪਧਾਨੋਪਕਾਰਕਾਨਿ ਅਙ੍ਗਾਨਿ ਖਾਰਾਦੀਨਿ, ਅਙ੍ਗਾਨਂ ਉਪਕਾਰਕਾਨਿ ਚ ਉਪਙ੍ਗਾਨਿ ਅਦ੍ਧਾਦੀਨਿ.
੧੮੧. ਸਾਦ੍ਧਪਜ੍ਜੇਨ ਭੂਮਿਯਾ ਨਾਮਾਨਿ. ਵਸੂਨਿ ਰਤਨਾਨਿ ਧਾਰਯਤੀਤਿ ਵਸੁਨ੍ਧਰਾ. ਖਮੁ ਸਹਨੇ, ਖਸ੍ਸ ਛੋ, ਛਮਾ, ਅਥ ਵਾ ਛਿ ਛੇਦਨੇ, ਸਤ੍ਤਾਨਮਧੋਪਤਨਂ ਛਿਨ੍ਦਤੀਤਿ ਛਮਾ, ਮੋ, ਇਤ੍ਥਿਯਮਾ ਚ. ਭਵਨ੍ਤ੍ਯਸ੍ਸਂ ਭੂਤਾਨੀਤਿ ਭੂਮਿ. ਭੂ ਸਤ੍ਤਾਯਂ, ਮਿ. ਪੁਥਇਤਿ ਪਾਟਿਪਦਿਕੇ ਠਿਤੇ ਨਦਾਦਿ, ਈ, ਪੁਥਸ੍ਸ ਪੁਥੁਆਦੇਸੇ, ਵੁਦ੍ਧਿਮ੍ਹਿ ਚ ਕਤੇ ਪੁਥਵੀ. ਉਸ੍ਸੁਵਾਦੇਸੇ ਪੁਥੁਵੀ. ਪਥਾਦੇਸੇ ਤੁ ਪਥਵੀ, ਇਮਸ੍ਮਿਂ ਪਕ੍ਖੇ ਅਵਾਗਮੋ, ਅਥ ਵਾ ਥਵ ਗਤਿਯਂ, ਪਥਵਤਿ ਏਤ੍ਥਾਤਿ ਪਥਵੀ, ਨਦਾਦਿ, ਸਬ੍ਬਤ੍ਥ ਪਤ੍ਥਰਤੀਤਿ ਵਾ ਪਥਵੀ, ਥਰ ਸਨ੍ਥਰਣੇ ਪਪੁਬ੍ਬੋ, ਰਸ੍ਸ ਵੋ, ਨਦਾਦਿ, ਪੁਥਵੀ, ਅਸ੍ਸੁ.
‘‘ਮਧੁਨੋ ਕੇਟਭਸ੍ਸਾਪਿ, ਮੇਦਮਂਸਪਰਿਪ੍ਲੁਤਾ;
ਤੇਨਾਯਂ ਮੇਦਿਨੀ ਦੇਵੀ, ਵੁਚ੍ਚਤੇ ਬ੍ਰਹ੍ਮਵਾਦਿਭੀ’’ਤਿ [ਚਿਨ੍ਤਾਮਣਿਟੀਕਾ ੧੧.੩]. –
ਵਚਨਤੋ ਮੇਦਯੋਗਾ ਮੇਦਿਨੀ, ਈ, ਇਨੀ ਚ. ਮਿਦ ਸ੍ਨੇਹਨੇ ਵਾ, ਯੁ, ਨਦਾਦਿ, ਇਸ੍ਸੇਤ੍ਤਞ੍ਚ. ਮਹ ਪੂਜਾਯਂ, ਨਦਾਦਿ. ਵਿਤ੍ਥਿਣ੍ਣਤ੍ਤਾ ਉਬ੍ਬੀ, ਨਦਾਦਿ, ਅਵਤਿ ਭੂਤਾਨੀਤਿ ਵਾ ਉਬ੍ਬੀ, ਅਸ੍ਸੁ. ਵਸੂਨਿ ਸਨ੍ਤ੍ਯਸ੍ਸਂ ਵਸੁਮਤੀ. ਗਚ੍ਛਨ੍ਤਿ ਯਸ੍ਸਂ ਲੋਕਾ, ਸਾ ਗੋ, ਪੁਮਿਤ੍ਥਿਯਂ. ਕਾ ਸਦ੍ਦੇ, ਕਾਯਤਿ ਏਤ੍ਥ, ਕਾਯਤਿ ਮਾਰਵਿਜਯਕਾਲੇਤਿ ਵਾ ਕੁ, ਉ. ਵਸੂਨਿ ਧਾਰਯਤੀਤਿ ਵਸੁਧਾ. ਸਬ੍ਬਂ ਲੋਕਂ ਧਰਯਤੀਤਿ ਧਰਣੀ, ਯੁ, ਨਦਾਦਿ. ਧਰਤੀਤਿ ਧਰਾ, ਇਤ੍ਥਿਯਂ ਆ. ਗਮੁ ਗਮਨੇ, ਗਚ੍ਛਨ੍ਤ੍ਯਸ੍ਸਂ ਜਗਤੀ, ਅਨ੍ਤਪਚ੍ਚਯੋ, ਗਸ੍ਸ ਦ੍ਵਿਤ੍ਤਂ, ਜਤ੍ਤਞ੍ਚ, ਨਲੋਪੋ, ਨਦਾਦਿ. ਭੂ ਸਤ੍ਤਾਯਂ, ਰਿ, ਨਦਾਦਿ, ਕ੍ਵਿਮ੍ਹਿ ਭੂ. ਭੂਤੇ ਸਤ੍ਤੇ ਧਰਤੀਤਿ ਭੂਤਰੋ. ਅਵ ਰਕ੍ਖਣੇ, ਯੁ, ਨਦਾਦਿ, ਅਵਨੀ.
੧੮੨. ਖਾਰਾ ਲਵਣਰਸਾ ਮਤ੍ਤਿਕਾ ਊਸੋਤ੍ਯੁਚ੍ਚਤੇ. ਖਾਦਤੀਤਿ ਖਾਰਾ, ਦਸ੍ਸ ਰੋ. ਪਦੇਸਕਤ੍ਤਾ ਮਤ੍ਤੇਨ ਪਮਾਣੇਨ ਯੁਤ੍ਤਾ ਮਤ੍ਤਿਕਾ. ਊਸ ਰੁਜਾਯਂ, ਊਸੋ. ਊਸਯੋਗਾ ਊਸਵਾ, ਵਨ੍ਤੁ. ਰਪਚ੍ਚਯੇ ਊਸਰੋ. ਦ੍ਵੇਪਿ ਤੀਸੁ ਵਤ੍ਤਨ੍ਤੇ.
ਥਲ ਠਾਨੇ, ਅਧਿਕਰਣੇ ਅ. ਕਿਤ੍ਤਿਮਂ ਥਲਂ, ਅਕਿਤ੍ਤਿਮਾ ਥਲੀ, ਨਦਾਦਿ. ਥਦ੍ਧਲੂਖਮ੍ਹਿ ਭੂਭਾਗੇ ਭੂਮਿਪ੍ਪਦੇਸੇ ਜਙ੍ਗਲਸਦ੍ਦੋ ਵਤ੍ਤਤਿ. ਤਤ੍ਥ ਨਿਜ੍ਜਲਤ੍ਤਾ ਕਕ੍ਖਲ਼ਤ੍ਤਾ ਥਦ੍ਧੋ. ਤਿਕ੍ਖਸਕ੍ਖਰਾਦਿਵਿਦਾਰਗਵਾਦਿਖੁਰਗਣ੍ਡੁਪ੍ਪਾਦਵਚ੍ਚਾਦਿਸਹਿਤਤ੍ਤਾ ਲੂਖੋ ਵੇਦਿਤਬ੍ਬੋ. ਗਲ ਚਵਨਾਧੋਪਤਨਾਦਨੇਸੁ. ਜਲਂ ਗਲਤਿ ਏਤ੍ਥ, ਜਲੇਨ ਵਾ ਗਲਨ੍ਤਿ ਏਤ੍ਥਾਤਿ ਜਙ੍ਗਲੋ, ਨਿਜ੍ਜਲੋ ਦੇਸੋ, ‘‘ਜਙ੍ਗਲੋ ਨਿਜ੍ਜਲੇ ਦੇਸੇ, ਤਿਲਿਙ੍ਗੋ ਪਿਸਿਤੇ ਥਿਯ’’ਨ੍ਤਿ [ਤਿਕਣ੍ਡਸੇਸ ੩.੩.੩੯੩] ਹਿ ਤਿਕਣ੍ਡਸੇਸੋ, ਲਸ੍ਸ ਲੋਪੋ, ਨਿਗ੍ਗਹੀਤਾਗਮੋ ਚ.
੧੮੩. ਵੇਦੇਨ ਪਞ੍ਞਾਯ ਈਹਨ੍ਤਿ ਏਤ੍ਥਾਤਿ ਵੇਦੇਹੋ. ਸੋ ਏਵ ਵਿਦੇਹੋ, ਇਮਂ ਦੀਪਮੁਪਾਦਾਯ ਸਿਨੇਰੁਨੋ ਪੁਬ੍ਬਦਿਸਾਭਾਗਤ੍ਤਾ ਪੁਬ੍ਬੋ ਚ ਸੋ ਵਿਦੇਹੋ ਚੇਤਿ ਪੁਬ੍ਬਵਿਦੇਹੋ. ਏਵਮਪਰੁਤ੍ਤਰੇਸੁ. ਗਵੇਨ ਯਨ੍ਤ੍ਯੇਤ੍ਥਾਤਿ ਗੋਯਾਨੋ. ਅਪਰੋ ਚ ਸੋ ਗੋਯਾਨੋ ਚੇਤਿ ਅਪਰਗੋਯਾਨੋ. ਜਮ੍ਬੁਯਾ ਲਕ੍ਖਿਤੋ, ਕਪ੍ਪਟ੍ਠਾਯਿਤਾਦਿਪ੍ਪਭਾਵੇਨ ਵਾ ਤਪ੍ਪਧਾਨੋਦੀਪੋਤਿ ਜਮ੍ਬੁਦੀਪੋ. ਧਮ੍ਮਤਾਸਿਦ੍ਧਸ੍ਸ ਪਞ੍ਚਸੀਲਸ੍ਸ ਆਨੁਭਾਵੇਨ ਕਂ ਸੁਖਂ ਉਰੁ ਮਹਨ੍ਤਮੇਤ੍ਥਾਤਿ ਕੁਰੁ, ਕੁਂ ਪਾਪਂ ਰੁਨ੍ਧਨ੍ਤਿ ਏਤ੍ਥਾਤਿ ਵਾ ਕੁਰੁ, ਕ੍ਵਿ. ਦੀਪ ਦਿਤ੍ਤਿਪ੍ਪਕਾਸਨੇਸੁ, ਜਲਮਜ੍ਝੇ ਦਿਪ੍ਪਨ੍ਤੀਤਿ ਦੀਪਾ, ਦਿਪ੍ਪਨ੍ਤਿ ਏਤ੍ਥ ਸਦ੍ਧਮ੍ਮਾਤਿ ਵਾ ਦੀਪਾ, ਪਮਾਣਤੋ ਮਹਨ੍ਤਾ ਦੀਪਾ ਮਹਾਦੀਪਾ.
੧੮੪. ਕੁਰੁਆਦਯੋ ਏਕਵੀਸਤਿ ਜਨਪਦਨ੍ਤਰਾ ਜਨਪਦਵਿਸੇਸਾ, ਆਦਿਨਾ ਸੁਰਮਹਪਚ੍ਚੁਗ੍ਗਤਾ ਤਲਕੁਟਾ ਅਸ੍ਮਾਕਾਦਯੋ ਚ ਪੁਮ੍ਬਹੁਤ੍ਤੇ ਪੁਲ੍ਲਿਙ੍ਗੇ ਬਹੁਤ੍ਤੇ ਚ ਸਿਯੁਂ. ਕੁਰੁ ਨਾਮ ਜਾਨਪਦਿਨੋ ਰਾਜਕੁਮਾਰਾ, ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੂਲ਼੍ਹੀਸਦ੍ਦੇਨ ‘‘ਕੁਰੂ’’ਤਿ ਬਹੁਵਚਨੇਨ ਵੁਚ੍ਚਤਿ, ਏਵਂ ਸਬ੍ਬਤ੍ਰ. ਕੁਂ ਪਾਪਂ ਰੁਨ੍ਧਤੀਤਿ ਕੁਰੁ, ਖਤ੍ਤਿਯਕੁਮਾਰਾ, ਤੇਸਂ ਨਿਵਾਸੋ ਕੁਰੂ, ਪਚ੍ਚਯਲੋਪਤੋ ਨ ਵੁਦ੍ਧਿ, ਸਬ੍ਬਤ੍ਰੇਵਂ [ਪਾਣਿਨਿ ੧.੨.੫੨ ੪.੨.੮੧ ਸੁਤ੍ਤੇਸੁ ਪਸ੍ਸਿਤਬ੍ਬਂ]. ਅਰਿਵਿਜਯਲੋਕਮਰਿਯਾਦਾਤਿਕ੍ਕਮਾਦੀਸੁ ਸਕ੍ਕੋਨ੍ਤੀਤਿ ਸਕ੍ਕਾ. ਕੋਸਂ ਲਨ੍ਤਿ ਗਣ੍ਹਨ੍ਤਿ, ਕੁਸਲਂ ਪੁਚ੍ਛਨ੍ਤੀਤਿ ਵਾ ਕੋਸਲਾ. ਮਗੇਨ ਸਦ੍ਧਿਂ ਧਾਵਨ੍ਤੀਤਿ ਮਗਧਾ, ਕ੍ਵਿ, ਮਂਸੇਸੁ ਗਿਜ੍ਝਨ੍ਤੀਤਿ ਵਾ ਮਗਧਾ. ਗਿਧ ਅਭਿਕਙ੍ਖਾਯਂ. ਸੇਵਨ੍ਤਿ ਯੇਨਾਤਿ ਸਿਵਿ, ਸਿ ਸੇਵਾਯਂ, ਵਿ. ਸਿਵਂ ਕਰੋਨ੍ਤੀਤਿ ਵਾ ਸਿਵੀ, ਅਞ੍ਞਤ੍ਥੇ ਇ. ਕਲ ਸਦ੍ਦੇ, ਇਙ੍ਗਪਚ੍ਚਯੋ, ਕਲਿਙ੍ਗਾ, ਤੇਸਂ ਨਿਵਾਸੋ ਕਲਿਙ੍ਗਾ, ਉਤ੍ਤਰਾਪਥੋ [‘‘ਜਗਨ੍ਨਾਥਾ ਪੁਬ੍ਬਭਾਗੇ ਕਣ੍ਹਾਤੀਰਨ੍ਤਰਂ ਸਿਵੇ ਕਲਿਙ੍ਗਦੇਸੋ ਸਂਵੁਤ੍ਤੋ’’ ਇਤ੍ਯੁਤ੍ਤਦੇਸੇ (ਥੋਮਨਿਧਿ)], ਕਲਿਂ ਗਣ੍ਹਨ੍ਤੀਤਿ ਵਾ ਕਲਿਙ੍ਗਾ, ਕ੍ਵਿ, ਕਲਂ ਮਧੁਰਸਦ੍ਦਂ ਗਾਯਨ੍ਤੀਤਿਵਾ ਕਲਿਙ੍ਗਾ, ਅਸ੍ਸਿਤ੍ਤਂ, ਕੇਨ ਸੁਖੇਨ ਲਿਙ੍ਗਨ੍ਤੀਤਿ ਵਾ ਕਲਿਙ੍ਗਾ, ਲਿਙ੍ਗ ਗਮਨਤ੍ਥੋ ਦਣ੍ਡਕੋ ਧਾਤੁ. ਅਤ੍ਤਨਾ ਖਾਦਿਤਂ ਲਞ੍ਜਂ ਪਰਾਜਿਤੇਹਿ ਯਾਚਿਤੇਪਿ ਪੁਨ ਨ ਵਮਨ੍ਤੀਤਿ ਅਵਨ੍ਤੀ. ਪਞ੍ਚਾਲਸ੍ਸ ਪੁਤ੍ਤਾ ਪਞ੍ਚਾਲਾ. ਵਜ੍ਜੇਤਬ੍ਬਾਤਿ ਵਜ੍ਜੀ, ‘‘ਵਜ੍ਜੇਤਬ੍ਬਾ ਇਮੇ’’ਤ੍ਯਾਦਿਨਾ ਪਵਤ੍ਤਵਚਨਮੁਪਾਦਾਯ ਵਜ੍ਜੀਤਿ ਲਦ੍ਧਨਾਮਾ ਰਾਜਾਨੋ. ਵਜ੍ਜੀਰਟ੍ਠਸ੍ਸ ਵਾ ਰਾਜਾਨੋ ਵਜ੍ਜੀ. ਰਟ੍ਠਸ੍ਸ ਵਾ ਪਨ ਤਂਸਮਞ੍ਞਾ ਤਂਨਿਵਾਸਿਰਾਜਕੁਮਾਰਵਸੇਨ ਵੇਦਿਤਬ੍ਬਾ. ਗਂ ਪਥਵਿਂ ਧਾਰੇਨ੍ਤੀਤਿ ਗਨ੍ਧਾਰਾ, ਕਿਤ੍ਤਿਗਨ੍ਧੇਨ ਅਰਨ੍ਤੀਤਿ ਵਾ ਗਨ੍ਧਾਰਾ. ਚਿਤ ਉਸ੍ਸਾਹਨੇ, ਚੇਤਨ੍ਤਿ ਉਸ੍ਸਹਨ੍ਤਿ ਯੁਦ੍ਧਕਮ੍ਮਾਦੀਸੂਤਿ ਚੇਤਯੋ.
੧੮੫. ਵਙ੍ਗ ਗਮਨਤ੍ਥੋ ਦਣ੍ਡਕੋ ਧਾਤੁ. ਵਿਸਿਟ੍ਠਾਨਿ ਦੇਹਾਨਿ ਯੇਸਂ ਵਿਦੇਹਾ, ਪੁਬ੍ਬਵਿਦੇਹਦੀਪਤੋ ਆਗਤਤ੍ਤਾ ਵਾ ਵਿਦੇਹਾ. ਓਜ ਦਿਤ੍ਤਿਯਂ, ਕਮ੍ਬੁਨਾ ਸਮ੍ਬੁਕੇਨ ਓਜਨ੍ਤਿ ਤਸ੍ਸਂ ਵੋਹਾਰਕਰਣਤੋਤਿ ਕਮ੍ਬੋਜਾ, ਕਮ੍ਬੁਕਜੋ ਓਜੋ ਬਲਮੇਤੇਸਨ੍ਤਿ ਵਾ ਕਮ੍ਬੋਜਾ. ਮਦ ਮਦ੍ਦਨੇ, ਮਦ੍ਦਨ੍ਤੀਤਿ ਵਾ ਮਦ੍ਦਾ, ਮਂ ਸਿਵਂ ਦਦਨ੍ਤੀਤਿ ਵਾ ਮਦ੍ਦਾ, ਪਞ੍ਚਕਾਮਗੁਣਾਦੀਹਿ ਮੋਦਨ੍ਤੀਤਿ ਵਾ ਮਦ੍ਦਾ, ਮਦ ਹਾਸੇ. ਭਞ੍ਜ ਅਵਮਦ੍ਦਨੇ, ਭਗ੍ਗਾ. ਅਙ੍ਗ ਗਮਨਤ੍ਥੋ ਦਣ੍ਡਕੋ ਧਾਤੁ. ਸੀਹਂ ਲਨ੍ਤੀਤਿ ਸੀਹਲ਼ਾ. ਕਾਸ ਦਿਤ੍ਤਿਯਂ, ਸਮ੍ਪਤ੍ਤਿਯਾ ਕਾਸਨ੍ਤੀਤਿ ਕਸ੍ਮੀਰਾ, ਮੀਰੋ. ਕਾਸ ਦਿਤ੍ਤਿਯਂ, ਇ, ਕਾਸੀ. ਪਡਿ ਗਤਿਯਂ, ਪਣ੍ਡੁ, ਉ. ਅਥ ਵਾ ਕੁਂ ਪਾਪਂ ਰੁਨ੍ਧਤਿ ਏਤ੍ਥਾਤਿ ਕੁਰੁ, ਇਤਿ ਏਕੋਪਿ ਜਨਪਦੋ ਨਿਸ੍ਸਿਤਾਨਂ ਬਹੁਤ੍ਤਾ ਬਹੁਵਚਨੇਨ ਵੁਚ੍ਚਤਿ. ਏਵਂ ਸਬ੍ਬਤ੍ਥ.
੧੮੬. ਦ੍ਵਯਂ ਭੁਵਨੇ. ਲੁਜ ਅਦਸ੍ਸਨੇ, ਲੁਜ੍ਜਤੀਤਿ ਲੋਕੋ, ਗਸ੍ਸ ਕੋ, ਜਸ੍ਸ ਵੋ. ਭਵਨ੍ਤਿ ਏਤ੍ਥਾਤਿ ਭੁਵਨਂ, ਯੁ. ਜਗਤਿ, ਵਿਟ੍ਠਪਾਦੀਨਿਪਿ ਭੁਵਨਪਰਿਯਾਯਾਨਿ. ਦ੍ਵਯਂ ਦੇਸਸਾਮਞ੍ਞੇ. ਦਿਸ ਅਤਿਸਜ੍ਜਨੇ, ਅਤਿਸਜ੍ਜਨਂ ਪਬੋਧਨਂ, ‘‘ਅਯਂ ਇਤ੍ਥਨ੍ਨਾਮੋ’’ਤਿ ਦਿਸਤਿ ਅਪਦਿਸਤੀਤਿ ਦੇਸੋ. ਸਿ ਸੇਵਾਯਂ, ਸਞ੍ਞਾਯਂ ਅ, ਵਿਸਯੋ.
ਸਿਟ੍ਠਾਚਾਰਰਹਿਤੋ ਮਿਲਕ੍ਖਦੇਸੋ ਕਾਮਰੂਪਾਦਿ ਪਚ੍ਚਨ੍ਤੋ ਨਾਮ. ਮਿਲਕ੍ਖ ਅਬ੍ਯਤ੍ਤਿਯਂ ਵਾਚਾਯਂ, ਮਿਲਕ੍ਖਨ੍ਤਿ ਅਬ੍ਯਤ੍ਤਵਾਚਂ ਭਾਸਨ੍ਤੀਤਿ ਮਿਲਕ੍ਖਾ. ਸਿਟ੍ਠਾਚਾਰਮਗ੍ਗਦਸ੍ਸਨਤ੍ਥਾਯ ਪਞ੍ਞਾਚਕ੍ਖੁਨੋ ਅਭਾਵਾ ਰਾਗਾਦਿਮਲਂ ਅਕ੍ਖਿਮ੍ਹਿ ਯੇਸਨ੍ਤਿ ਵਾ ਮਿਲਕ੍ਖਾ, ਅਸ੍ਸਿਤ੍ਤਂ, ਤੇਸਂ ਨਿਵਾਸਟ੍ਠਾਨਂ ਮਿਲਕ੍ਖਦੇਸੋ. ਪਚ੍ਚਨ੍ਤੇ ਮਜ੍ਝਿਮਦੇਸਸ੍ਸ ਬਹਿਦ੍ਧਾਭਾਗੇ ਜਾਤੋ ਪਚ੍ਚਨ੍ਤੋ.
ਬ੍ਯਵਤ੍ਥਾ ਚਤੁਵਣ੍ਣਾਨਂ, ਯਸ੍ਮਿਂ ਦੇਸੇ ਨ ਵਿਜ੍ਜਤੇ;
ਮਿਲਕ੍ਖਦੇਸੋ ਸੋ ਵੁਤ੍ਤੋ, ਮਜ੍ਝਭੂਮਿ ਤਤੋ ਪਰਂ [ਚਿਨ੍ਤਾਮਣਿਟੀਕਾ ੧੧.੭].
ਅਰਿਯਾਚਾਰਭੂਮਿਤ੍ਤਾ ਮਜ੍ਝੋ ਚ ਸੋ ਦੇਸੋ ਚੇਤਿ ਮਜ੍ਝਦੇਸੋ, ਨਵਯੋਜਨਸਤਪਰਿਕ੍ਖੇਪੋ ਮਜ੍ਝਿਮਦੇਸੋ.
੧੮੭. ਸਲਿਲਪ੍ਪਾਯੋ ਬਹੂਦਕੋ ਦੇਸੋ ਅਨੂਪੋ ਨਾਮ, ਅਨੁਗਤਾ ਆਪਾ ਅਤ੍ਰਾਤਿ ਅਨੂਪੋ, ਆਪਸ੍ਸ ਆਦਿਨੋ ਉਤ੍ਤਂ, ਪਰਲੋਪੋ ਵਾ. ਕਚ ਬਨ੍ਧਨੇ, ਛੋ, ਕਚ੍ਛਂ. ਅਨੂਪਦੇਸੋ ਚ. ਅਭਿਨਵੋਗ੍ਗਮਨੇਨ ਤਿਣੇਨ ਲਕ੍ਖਿਤੇ ਹਰਿਤੇ ਦੇਸੇ ਸਦ੍ਦਲੋ, ਦਲ ਦਿਤ੍ਤਿਯਂ, ਭਾਵੇ ਅ. ਵਿਜ੍ਜਤਿ ਦਲੋ ਯਤ੍ਥ ਸਦ੍ਦਲੋ.
੧੮੮. ਨਦਿਯਾ ਆਭਤੇਨ ਅਮ੍ਬੁਨਾ ਉਦਕੇਨ ਜੀਵਨ੍ਤਿ ਏਤ੍ਥਾਤਿ ਨਦ੍ਯਮ੍ਬੁਜੀਵਨੋ ਦੇਸੋ ਨਦੀ ਮਾਤਾ ਅਸ੍ਸਾਤਿ ਨਦੀਮਾਤਿਕੋਤਿ ਵੁਚ੍ਚਤਿ, ਬਹੁਬ੍ਬੀਹਿਮ੍ਹਿ ਕੋ. ਵੁਟ੍ਠਿਯਾ ਵਸ੍ਸੇਨ ਨਿਪ੍ਫਜ੍ਜਤਿ ਸਸ੍ਸਮੇਤ੍ਥਾਤਿ ਵੁਟ੍ਠਿਨਿਪ੍ਫਜ੍ਜਸਸ੍ਸਕੋ ਦੇਸੋ ਦੇਵੋ ਮਾਤਾ ਅਸ੍ਸਾਤਿ ਦੇਵਮਾਤਿਕੋਤਿ ਵੁਚ੍ਚਤਿ, ਬਹੁਬ੍ਬੀਹਿਮ੍ਹਿਯੇਵ ਕੋ, ਦੇਵਸਦ੍ਦੋ ਚੇਤ੍ਥ ਵੁਟ੍ਠਿਮਾਹ.
੧੮੯. ਅਨੂਪਾਦਯੋ ਦੇਵਮਾਤਿਕਾਨ੍ਤਾ ਤੀਸੁ ਲਿਙ੍ਗੇਸੁ. ਚਨ੍ਦਸੂਰਾਦੋ ਚਨ੍ਦਸੂਰਿਯਸਿਨੇਰੁਪਬ੍ਬਤਾਦਿਮ੍ਹਿ ਸਸ੍ਸਤਿਸਦ੍ਦੋ ਈਰਿਤੋ ਕਥਿਤੋ. ਸਬ੍ਬਦਾ ਸਰਨ੍ਤਿ ਗਚ੍ਛਨ੍ਤੀਤਿ ਸਸ੍ਸਤਿਯੋ, ਸਰ ਗਤਿਯਂ, ਸਰਸਦ੍ਦਸ੍ਸ ਸੋ,ਤਿ.
ਰਠ ਗਤਿਯਂ, ਰਠਨ੍ਤਿ ਏਤ੍ਥ ਨਗਰਾਦਯੋਤਿ ਰਟ੍ਠਂ, ਤੋ. ਨਾਗਰੇਹਿ ਵਿਜਿਨਿਤਬ੍ਬਨ੍ਤਿ ਵਿਜਿਤਂ. ਆਲ਼ਿਯਂ ਪਵਤ੍ਤਮਾਨੋ ਯੋ ਸੇਤੁ, ਸੋ ਪੁਰਿਸੇ ਪੁਲ੍ਲਿਙ੍ਗੇ ਵਤ੍ਤਤਿ. ਸਿ ਬਨ੍ਧਨੇ, ਤੁ. ਅਲ ਭੂਸਨੇ, ਇ, ਆਲ਼ਿ, ਤਸ੍ਸਂ ਆਲ਼ਿਯਂ.
ਨਗਰਪਬ੍ਬਤਾਦਿਨੋ ਉਪਾਨ੍ਤਭੂ ਸਮੀਪਭੂਮਿ ਪਰਿਸਰੋ ਪਰਿਤੋ ਸਰਨ੍ਤ੍ਯਤ੍ਰਾਤਿ, ਣੋ.
ਤਿਕਂ ਵਜੇ. ਗਾਵੋ ਤਿਟ੍ਠਨ੍ਤ੍ਯਤ੍ਰਾਤਿ ਗੋਟ੍ਠਂ. ਕੁਲ ਸਙ੍ਖ੍ਯਾਨੇ, ਗਾਵੋ ਕੁਲਨ੍ਤ੍ਯੇਤ੍ਥਾਤਿ ਗੋਕੁਲਂ, ਗੁਨ੍ਨਂ ਕੁਲਂ ਘਰਨ੍ਤਿ ਵਾ ਗੋਕੁਲਂ. ਵਜ ਗਤਿਯਂ, ਵਜਨ੍ਤਿ ਯਂ ਗਾਵੋ ਨਿਵਾਸਨਤ੍ਥਾਯਾਤਿ ਵਜੋ. ਗੋਟ੍ਠਾਨਕਂ, ਗੋਟ੍ਠਾਨਨ੍ਤਿਪਿ ਵਜਸ੍ਸ ਨਾਮਾਨਿ.
੧੯੦. ਸਿਲੋਕੇਨ ਮਗ੍ਗਸ੍ਸ ਨਾਮਾਨਿ. ਪਥਿਕੇਹਿ ਮਜ੍ਜਤੇ ਨਿਤ੍ਤਿਣਂ ਕਰੀਯਤੇਤਿ ਮਗ੍ਗੋ, ਮਜ੍ਜ ਸੁਦ੍ਧਿਯਂ, ਣੋ, ਜਸ੍ਸ ਗਤ੍ਤਂ, ਪਥਿਕੇਹਿ ਮਗ੍ਗੀਯਤੇਤਿ ਵਾ ਮਗ੍ਗੋ, ਮਗ੍ਗ ਅਨ੍ਵੇਸਨੇ, ਮਂ ਸਿਵਂ ਗਚ੍ਛਤਿ ਏਤ੍ਥ, ਏਤੇਨਾਤਿ ਵਾ ਮਗ੍ਗੋ, ‘‘ਮੋ ਸਿਵੇ ਪਰਿਸਾਯਞ੍ਚੇ’’ਤਿ ਹਿ ਨਾਨਤ੍ਥਸਙ੍ਗਹੇ, ਸਿਵਂ ਗਮਨਂ ਕਰੋਤੀਤ੍ਯਤ੍ਥੋ, ਕ੍ਰਿਯਾਵਿਸੇਸਨਮੇਤਂ. ਪਥਿ ਗਤਿਯਂ, ਚੁਰਾਦਿ, ਨਾਗਮੋ. ਪਨ੍ਥਯਨ੍ਤਿ ਯਨ੍ਤ੍ਯਨੇਨਾਤਿ ਪਨ੍ਥੋ, ਅ, ਕਾਰਿਤਲੋਪੋ. ਪਥਤਿ ਯਾਤ੍ਯਨੇਨਾਤਿ ਪਥੋ. ਅਦ ਗਮਨੇ, ਅਦਤਿ ਯਤ੍ਥ ਸਾ ਅਦ੍ਧਾ, ਧੋ, ਅਦ੍ਧਾ ਮਗ੍ਗੋ, ਅਦ੍ਧਾਸਦ੍ਦੋਯਂ ਕਾਲੇਪਿ, ਸਮਭਾਗਤ੍ਥਵਚਨੇ ਤੁ ਅਦ੍ਧਂ, ਤਸ੍ਮਾ ਅਦ੍ਧਸਦ੍ਦੋ ਪੁਮਨਪੁਂਸਕਵਸੇਨ ਦ੍ਵਿਲਿਙ੍ਗੋ, ਰਾਜਾਦਿਤ੍ਤੇ ਅਦ੍ਧਾ, ਅਰਾਜਾਦਿਤ੍ਤੇ ਅਦ੍ਧਂ. ਅਞ੍ਜ ਗਤਿਯਂ, ਅਸੋ. ਵਜ ਗਤਿਯਂ, ਉਮੋ, ਜਸ੍ਸ ਟੋ. ਪਦ ਗਤਿਯਂ, ਅ, ਦਸ੍ਸ ਜੋ, ਦ੍ਵਿਤ੍ਤਂ, ਪਜ੍ਜੋ. ਅਯ ਗਤਿਯਂ, ਯੁ, ਪਦ ਗਤਿਯਂ, ਅਵੋ, ਨਦਾਦਿ. ਵਤ੍ਤ ਵਤ੍ਤਨੇ, ਵਤ੍ਤਨਂ ਗਮਨਾਦਿ, ਅਨਿ, ਨਦਾਦਿ, ਵਤ੍ਤਨੀ. ਕਨ੍ਤਨਦਣ੍ਡੇ ਪੁਨ੍ਨਪੁਂਸਕਂ. ਪਥਿਕੇਹਿ ਪਾਦੇਹਿ ਹਞ੍ਞਤੇਤਿ ਪਦ੍ਧਤਿ. ਪਾਦਸਦ੍ਦਸਮਾਨਤ੍ਥੇਨ ਪਦਸਦ੍ਦੇਨ ਨਿਯਤਪ੍ਪਯੋਗਤੋ ਵੁਤ੍ਤਿਨਾ ਸਿਦ੍ਧੋ, ਪਦਸਦ੍ਦੂਪਪਦੋ ਹਨਧਾਤੁ,ਤਿ, ਹਨਸ੍ਸ ਧੋ, ਅਲੋਪੋ. ਪਦ੍ਧਤਿਸਹਚਰਣਤੋ ਵਤ੍ਤਨੀ, ਤਂਸਹਚਰਣਤੋ ਪਦਵੀ ਚ ਇਤ੍ਥਿਯਂ.
੧੯੧-੧੯੨. ਤਬ੍ਭੇਦਾ ਤਸ੍ਸ ਮਗ੍ਗਸ੍ਸ ਵਿਸੇਸਾ ਜਙ੍ਘਮਗ੍ਗਾਦਯੋ ਅਪਥਨ੍ਤਾ. ਜਙ੍ਘਾਹਿ ਗਤੋ ਮਗ੍ਗੋ ਜਙ੍ਘਮਗ੍ਗੋ. ਸਕਟੇਹਿ ਗਤੋ ਮਗ੍ਗੋ ਸਕਟਮਗ੍ਗੋ. ਤੇ ਜਙ੍ਘਮਗ੍ਗਸਕਟਮਗ੍ਗਾ ਮਹਾਮਗ੍ਗੇ ਵਤ੍ਤਨ੍ਤਿ.
ਏਤ੍ਥ ਚ ‘‘ਤੇਥਾ’’ਤਿ ਅਥਸਦ੍ਦੋ ਨ ਵਤ੍ਤਬ੍ਬੋ, ‘‘ਤੇ ਚਾ’’ਤਿ ਪਨ ਵਤ੍ਤਬ੍ਬੋ. ‘‘ਮਤਾਦ੍ਧਨੀ’’ਤਿ ਪਾਠੇ ਪਨ ਸਤਿ ‘‘ਤੇਥਾ’’ਤਿ ਵਤ੍ਤਬ੍ਬੋਯੇਵ, ਤਦਾ ਏਕਪਦਿਕੇ ਅਦ੍ਧਨਿ ਮਗ੍ਗੇ ਏਕਪਦੀ ਮਤਾਤਿ ਯੋਜਨਾ ਕਾਤਬ੍ਬਾ. ਗਚ੍ਛਤਂ ਏਕੋ ਅਸਹਾਯੋ ਪਾਦੋ ਯਸ੍ਸਂ, ਨ ਨਿਸਿਨ੍ਨਸ੍ਸੇਵ ਯਮਕੋਤਿ ਏਕਪਦੀ, ਸਮਾਸਨ੍ਤੇ ਨਿਚ੍ਚਮੀਪਚ੍ਚਯੋ, ਕਪਚ੍ਚਯੇ ਏਕਪਦਿਕੋ, ਈਸ੍ਸ ਰਸ੍ਸਤ੍ਤਂ.
ਚੋਰਕਣ੍ਟਕਾਦਿਦੋਸੇ ਦੁਗ੍ਗਮੇ ਪਥੇ ਕਨ੍ਤਾਰੋ, ਪੁਨ੍ਨਪੁਂਸਕੇ, ਕੇਨ ਪਾਨੀਯੇਨ ਤਰਨ੍ਤਿ ਅਤਿਕ੍ਕਮਨ੍ਤਿ ਯਨ੍ਤਿ ਕਨ੍ਤਾਰੋ, ਤਰ ਤਰਣੇ, ਚੋਰਕਨ੍ਤਾਰਾਦੀਸੁ ਪਨਾਯਂ ਰੂਲ਼੍ਹਿਵਸੇਨ ਵੁਤ੍ਤੋ, ਅਥ ਵਾ ਕਤਿ ਛੇਦਨੇ, ਸਪ੍ਪਟਿਭਯਤ੍ਤਾ ਕਨ੍ਤਤਿ ਨਿਚ੍ਚਗਮਨਾਗਮਨਮੇਤ੍ਥਾਤਿ ਕਨ੍ਤਾਰੋ, ਆਰੋ, ਨਾਗਮੋ ਚ. ਦੁਕ੍ਖੇਨ ਗਚ੍ਛਨ੍ਤ੍ਯੇਤ੍ਥਾਤਿ ਦੁਗ੍ਗਮੋ.
੧੯੩. ਦ੍ਵਯਂ ਪਟਿਮਗ੍ਗੇ. ਪਟਿ ਅਭਿਮੁਖੇਨ ਗਨ੍ਤਬ੍ਬੋ ਮਗ੍ਗੋ, ਪਥੋ ਚ ਪਟਿਮਗ੍ਗੋ, ਪਟਿਪਥੋ ਚ. ਦੀਘਮਞ੍ਜਸਂ ਅਤਿਦੂਰੋ ਮਗ੍ਗੋ ਅਦ੍ਧਾਨਨ੍ਤਿ ਵੁਚ੍ਚਤੇ. ਅਦ੍ਧਾਨਂ ਅਯਨਂ ਅਦ੍ਧਾਨਂ, ਅਚ੍ਚਾਯਤੋ ਮਗ੍ਗੋ, ਯਥਾ ‘‘ਪਦਟ੍ਠਾਨ’’ਨ੍ਤਿ, ਯਲੋਪੋ.
ਦ੍ਵਯਂ ਪਸਤ੍ਥੇਦ੍ਧਨਿ. ਸੋਭਨੋ ਪਥੋ, ਪਨ੍ਥੋ ਚਾਤਿ ਵਿਗ੍ਗਹੋ. ਗਨ੍ਤਬ੍ਬਪਥਭਾਵਤੋ ਅਪੇਤਂ ਉਪ੍ਪਥਂ, ਅਪਥਞ੍ਚ, ਅਬ੍ਯਯੀਭਾਵਸਮਾਸੋ, ਅਸਦ੍ਦੋ ਅਤ੍ਰ ਨਿਪਾਤੋ.
੧੯੪-੧੯੬. ਪਰਮਾਣੂਨਂ ਛਤ੍ਤਿਂਸ ਏਕੋ ਅਣੁ ਨਾਮ, ਅਣੁਤੋਪਿ ਅਣੁਤਰਤ੍ਤਾ ਪਰਮੋ ਅਣੁ, ਅਣੁਤੋ ਵਾ ਪਰਮੋਤਿ ਪਰਮਾਣੁ, ਅਣ ਸਦ੍ਦਤ੍ਥੋ ਦਣ੍ਡਕੋ ਧਾਤੁ, ਉ. ਤੇ ਅਣਵੋ ਛਤ੍ਤਿਂਸ ਤਜ੍ਜਾਰੀ ਨਾਮ, ਤਂ ਤਂ ਅਤ੍ਤਨੋ ਨਿਸ੍ਸਯਂ ਮਲੀਨਕਰਣਵਸੇਨ ਜਰਾਪੇਤੀਤਿ ਤਜ੍ਜਾਰੀ, ਜਰ ਜੀਰਣੇ, ਜਰ ਵਯੋਹਾਨਿਮ੍ਹਿ ਵਾ, ਅ, ਨਦਾਦਿ. ਤਾਪਿ ਤਜ੍ਜਾਰਿਯੋ ਛਤ੍ਤਿਂਸ ਰਥਰੇਣੁ ਨਾਮ, ਰਥਾਨਂ ਸਞ੍ਚਰਣਵਸੇਨ ਪਵਤ੍ਤੋ ਰੇਣੁ ਰਥਰੇਣੁ. ਤੇ ਰਥਰੇਣਵੋ ਛਤ੍ਤਿਂਸ ਲਿਕ੍ਖਾ ਨਾਮ. ਲਕ੍ਖ ਦਸ੍ਸਨੇ, ਪਕਤਿਚਕ੍ਖੁਨਾਪਿ ਲਕ੍ਖ੍ਯਤੇਤਿ ਲਿਕ੍ਖਾ, ਅਸ੍ਸਿਤ੍ਤਂ.
ਤਾ ਲਿਕ੍ਖਾ ਸਤ੍ਤ ਊਕਾ ਨਾਮ, ਊਕਾਤਿ ਵੁਚ੍ਚਤਿ ਸਿਰੋਵਤ੍ਤਕਿਮਿ, ਤਪ੍ਪਮਾਣਤ੍ਤਾ ਊਕਾ. ਤਾ ਸਤ੍ਤ ਊਕਾ ਧਞ੍ਞਮਾਸੋ ਨਾਮ, ਧਞ੍ਞੋ ਵੀਹਿਯੇਵ ਪਰਿਮਾਣਿਤਬ੍ਬਤ੍ਤਾ ਮਾਸੋ ਚਾਤਿ ਧਞ੍ਞਮਾਸੋ, ਮਸਿ ਪਰਿਮਾਣੇ. ਤੇ ਸਤ੍ਤ ਧਞ੍ਞਮਾਸਾ ਅਙ੍ਗੁਲਂ ਨਾਮ, ਅਙ੍ਗ ਗਮਨਤ੍ਥੋ, ਉਲੋ, ਅਙ੍ਗੁਲਂ, ਪਮਾਣਂ, ਉਲਿਪਚ੍ਚਯੇ ਅਙ੍ਗੁਲਿ, ਕਰਸਾਖਾ. ਅਮੁਦ੍ਵਿਚ੍ਛੇਤਿ ਅਦੁਂ ਦ੍ਵਾਦਸਙ੍ਗੁਲਂ ਵਿਦਤ੍ਥਿ ਨਾਮ, ਕਣਿਟ੍ਠਸਹਿਤੇਨਙ੍ਗੁਟ੍ਠੇਨ ਵਿਤ੍ਥਾਰੀਯਤੇ, ਵਿਧੀਯਤੇਤਿ ਵਾ ਵਿਦਤ੍ਥਿ, ਵਿਪੁਬ੍ਬੋ ਤਨੁ ਵਿਤ੍ਥਾਰੇ. ਧਾ ਧਾਰਣੇ, ਉਭਯਤ੍ਰਾਪਿਤਿ, ਪੁਬ੍ਬਪਕ੍ਖੇ ਤਸ੍ਸ ਥੋ, ਨਸ੍ਸ ਤੋ, ਤਸ੍ਸ ਦੋ. ਪਚ੍ਛਿਮੇ ਧਸ੍ਸ ਦੋ, ਤਸ੍ਸ ਥੋ, ਅਸਰੂਪਦ੍ਵਿਭਾਵੋ ਚ. ਤਾ ਦੁਵੇ ਵਿਦਤ੍ਥੀ ਰਤਨਂ ਸਿਯੁਂ, ਰਮੁ ਕੀਲ਼ਾਯਂ, ਤਨੋ, ਮਲੋਪੋ. ਤਾਨਿ ਸਤ੍ਤੇਵ ਰਤਨਾਨਿ ਯਟ੍ਠਿ ਨਾਮ, ਯਤ ਪਯਤਨੇ,ਤਿ, ਤਸ੍ਸ ਠੋ, ਤਸ੍ਸ ਟੋ. ਤਾ ਵੀਸਤਿ ਯਟ੍ਠਿਯੋ ਉਸਭਂ ਨਾਮ, ਉਸ ਦਾਹੇ, ਅਭੋ. ਏਤ੍ਥ ਪਨ ਉਸਭਨਦਨ੍ਤਰਂ ਉਸਭਂ. ਉਸਭਾਨਂ ਅਸੀਤਿਪ੍ਪਮਾਣਂ ਗਾਵੁਤਂ ਨਾਮ, ਗਵਂ, ਗਵੇਹਿ ਵਾ ਯੁਤਂ ਗਾਵੁਤਂ. ਯੁਜ ਸਮਾਧਿਮ੍ਹਿ, ਗੋਨਦਨ੍ਤਰੇਹਿ ਗਹਿਤਪ੍ਪਮਾਣਸਮਾਧਾਨਨ੍ਤ੍ਯਤ੍ਥੋ, ਤਂ ਚਤੁਗਾਵੁਤਂ ਯੋਜਨਂ ਨਾਮ, ਯੁਜ ਸਮਾਧਿਮ੍ਹਿ, ਯੁ, ‘‘ਏਤ੍ਤਕਂ ਯੋਜਨਂ ਨਾਮ ਹੋਤੂ’’ਤਿ ਚਤੁਗਾਵੁਤੇਹਿ ਸਮਾਧਾਨਨ੍ਤ੍ਯਤ੍ਥੋ.
੧੯੭. ਆਰੋਪਿਤਾਨਂ ਆਚਰਿਯਧਨੂਨਂ ਪਞ੍ਚਸਤਂ ਕੋਸੋ ਨਾਮ, ਅਨਾਰੋਪਿਤਾਨਨ੍ਤ੍ਯਪਰੇ. ਕੁਸ ਅਵ੍ਹਾਨੇ, ਣੋ, ਕੁਸਨਂ ਅਵ੍ਹਾਨਂ ਕੋਸੋ, ਇਧ ਪਨ ਕੋਸਪ੍ਪਮਾਣਤ੍ਤਾ ਕੋਸੋ, ਦ੍ਵਿਸਹਸ੍ਸਕਰਪ੍ਪਮਾਣੋ. ਅਞ੍ਞਤ੍ਥ ਪਨ –
‘‘ਚਤੁਕ੍ਕਾਧਿਵੀਸਤਿਯਾ, ਅਙ੍ਗੁਲੇਹਿ ਕਰੋ ਭਵੇ;
ਖ੍ਯਾਤਮਟ੍ਠਸਹਸ੍ਸੇਹਿ, ਕੋਸਮਾਨਂ ਵਿਭਾਵਿਨਾ’’ਤ੍ਯੁਤ੍ਤਂ.
ਚਤੁਰਮ੍ਬਣਨ੍ਤਿ ਚਤੁਰਮ੍ਬਣਵੀਹਿਬੀਜਜਾਤਰੋਪਨਯੋਗ੍ਯੋ ਭੂਮਿਪ੍ਪਦੇਸੋ ਕਰੀਸਂ ਨਾਮ, ਕਰੋਨ੍ਤਿ ਏਤ੍ਥ ਕਸਨਰੋਪਨਾਦਿਕਨ੍ਤਿ ਕਰੀਸਂ, ਈਸੋ. ਚਤੁਰਮ੍ਬਣਬੀਜਜਾਤਾਨਿ ਰੋਪੇਨ੍ਤ੍ਯੇਤ੍ਥਾਤਿ ਚਤੁਰਮ੍ਬਣਂ, ਅਮ੍ਬਣਂ ਏਕਾਦਸਦੋਣਮਤ੍ਤਂ, ਅਞ੍ਞੇ ਪਨ ‘‘ਚਤੁਰਮ੍ਬਣਂ ਚਤੁਯਟ੍ਠਿਕਂ ਠਾਨਂ ਕਰੀਸਂ ਨਾਮਾ’’ਤਿ ਵਦਨ੍ਤਿ, ਤਂ ਕਰੀਸਬ੍ਭਨ੍ਤਰਾਨਂ ਪਰਿਯਾਯਭਾਵਪ੍ਪਸਙ੍ਗਾ ਨ ਗਹੇਤਬ੍ਬਂ.
ਪਮਾਣਤੋ ਹਤ੍ਥਾਨਮਟ੍ਠਵੀਸਪ੍ਪਮਾਣਂ ਠਾਨਂ ਅਬ੍ਭਨ੍ਤਰਂ ਨਾਮ, ਅਬ੍ਭਨ੍ਤਰੇ ਅਨ੍ਤੋਕੋਟ੍ਠਾਸੇ ਜਾਤਂ, ਨ ਬਹਿਕੋਟ੍ਠਾਸੇਤਿ ਅਬ੍ਭਨ੍ਤਰਂ. ਯਤ੍ਥ ਯਤ੍ਥ ਹਿ ਯੋ ਯੋ ਠਿਤੋ, ਨਿਸਿਨ੍ਨੋ ਵਾ, ਤਤ੍ਥ ਤਤ੍ਥ ਸਮਨ੍ਤਾ ਅਟ੍ਠਵੀਸਤਿਹਤ੍ਥਪ੍ਪਮਾਣਂ ਠਾਨਂ ਤਸ੍ਸ ਤਸ੍ਸ ਅਬ੍ਭਨ੍ਤਰਂ ਠਾਨਂ ਨਾਮ. ਭੂਮ੍ਯਾਦਿਤ੍ਤਾ ਭੂਮਿਵਗ੍ਗੋ, ਅਥ ਵਾ ਅਙ੍ਗਾਪੇਕ੍ਖਾਯ ਭੂਮਿਯੇਵ ਪਧਾਨਂ, ਪਧਾਨੇਨ ਚ ਬ੍ਯਪ੍ਪਦੇਸੋ ਭਵਤੀਤਿ ਭੂਮਿਵਗ੍ਗਬ੍ਯਪ੍ਪਦੇਸੋ.
ਭੂਮਿਵਗ੍ਗਵਣ੍ਣਨਾ ਨਿਟ੍ਠਿਤਾ.
੨. ਪੁਰਵਗ੍ਗਵਣ੍ਣਨਾ
੧੯੮. ਛਕ੍ਕਂ ਨਗਰੇ.
‘‘ਪਟ੍ਟਨਞ੍ਚ ਅਧਿਟ੍ਠਾਨਂ, ਨਗਰਂ ਪੁਟਭੇਦਨਂ;
ਥਿਯੋ ਪੂ ਨਗਰੀ ਪੂਰਿਯੋ, ਠਾਨੀਯਂ ਕਬ੍ਬਟਂ ਪੁਟ’’ਨ੍ਤਿ.
ਹਿ ਸਿਲੋਕਪਰਿਯਾਯੇਸੁ ਵੋਪਾਲਿਤੋ.
‘‘ਵਿਚਿਤ੍ਤਦੇਵਾਯਤਨਂ, ਪਾਸਾਦਾਪਣਮਨ੍ਦਿਰਂ;
ਨਗਰਂ ਦਸ੍ਸਯੇ ਵਿਦ੍ਵਾ, ਰਾਜਮਗ੍ਗੋਪਸੋਭਿਤ’’ਨ੍ਤਿ [ਚਿਨ੍ਤਾਮਣਿਟੀਕਾ ੧.੨.੧]. –
ਨਗਰਲਕ੍ਖਣਂ. ਪੁ ਪਾਲਨੇ, ਪੁਰ ਪਾਲਨੇਤਿ ਚ, ਪੁਨਾਤਿ ਪੁਰੇਤਿ ਚ ਰਕ੍ਖਤਿ ਪਰਚਕ੍ਕਾ ਦੁਗ੍ਗਤਾਯਾਤਿ ਪੁਰਂ, ਰੋ, ਅ ਚ, ਪੁਰ ਅਗ੍ਗਗਮਨੇਤਿਪਿ ਧਾਤ੍ਵਤ੍ਥੋ. ਨਗਾ ਪਾਸਾਦਾਦਯੋ ਅਸ੍ਸ ਸਨ੍ਤਿ ਨਗਰਂ, ਰੋ. ਵਾਕਾਰੇਨ ਨਗਰਸਦ੍ਦਸ੍ਸ ਪੁਲ੍ਲਿਙ੍ਗਤ੍ਤਂ ਸਮੁਚ੍ਚਿਨੋਤਿ [ਨਗਰਿਯੋ ਵਾ ਪਤ੍ਤਨਂ (ਅਮਰ ੧.੨.੧) ਪਕ੍ਖੇ ਪਤ੍ਤਨਸਾਹਚਰਿਯਾ ਨਪੁਂਸਕਤ੍ਤਂ. (ਚਿਨ੍ਤਾਮਣਿਟੀਕਾ ੧.੨.੧)], ਪੁਰਸਦ੍ਦਸ੍ਸਾਪੀਤ੍ਯਾਚਰਿਯਾ. ਅਕੁਤੋਭਯਤ੍ਤਾ ਠਾਨਾਯ ਹਿਤਂ ਠਾਨੀਯਂ, ਈਯੋ. ਪਣਿਕਾਨਂ ਪੁਟਾ ਭਿਜ੍ਜਨ੍ਤੇ ਅਤ੍ਰਾਤਿ ਪੁਟਭੇਦਨਂ.
ਨਿਚ੍ਚਨਿਵਾਸਨਟ੍ਠਾਨਂ ਦਸ੍ਸੇਤ੍ਵਾ ਇਤਰਂ ਦਸ੍ਸੇਤੁਮਾਹ ‘‘ਥਿਯ’’ਮਿਚ੍ਚਾਦਿ. ਰਾਜਾ ਤਿਟ੍ਠਤਿ ਏਤ੍ਥਾਤਿ ਰਾਜਠਾਨੀ, ਯੁ, ਨਦਾਦਿ, ਨਿਚ੍ਚਨਿਵਾਸਨਟ੍ਠਾਨੇਪਿ ‘‘ਚਤੁਰਾਸੀਤਿਨਗਰਸਹਸ੍ਸਾਨਿ ਕੁਸਵਤੀਰਾਜਠਾਨੀਪਮੁਖਾਨੀ’’ਤ੍ਯਾਦੀਸੁ [ਦੀ. ਨਿ. ੨.੨੬੩]. ਦਾਰੁਕ੍ਖਨ੍ਧਾਦੀਹਿ ਆ ਸਮਨ੍ਤਤੋ ਵਰਨ੍ਤਿ ਪਰਿਕ੍ਖਿਪੀਯਨ੍ਤਿ ਏਤ੍ਥਾਤਿ ਖਨ੍ਧਾਵਾਰੋ, ਪਤ੍ਥਨਤ੍ਥੋ ਵਰਧਾਤੁ ਆਪੁਬ੍ਬਤ੍ਤਾ ਪਰਿਕ੍ਖਿਪਨਤ੍ਥੋ ਹੋਤਿ. ਪਞ੍ਚਕਂ ਨਗਰੇ, ‘‘ਖਨ੍ਧਾਵਾਰੋ’’ਤਿ ਪਨ ਏਕਮੇਵ ਅਚਿਰਨਿਵਾਸਨਟ੍ਠਾਨਸ੍ਸ ਨਾਮਂ.
੧੯੯. ਮੂਲਪੁਰਾ ਅਞ੍ਞਤ੍ਰ ਮੂਲਪੁਰਂ ਵਜ੍ਜੇਤ੍ਵਾ ਯਂ ਪੁਰਮਤ੍ਥਿ ਯੋਜਨਵਿਤ੍ਥਿਣ੍ਣਪਾਕਾਰਾਦਿਪਰਿਕ੍ਖਿਤ੍ਤਂ, ਤਂ ਮੂਲਪੁਰਸ੍ਸ ਤਰੁਟ੍ਠਾਨਿਯਸ੍ਸ ਸਾਖਾਸਦਿਸਤ੍ਤਾ ਸਾਖਾਨਗਰਂ ਨਾਮ.
੨੦੦-੨੦੧. ਸਾਦ੍ਧਪਜ੍ਜਦ੍ਵਯੇਨ ਮੂਲਪੁਰਸ੍ਸ ਨਾਮਾਨਿ. ਵਾਨਰਸੀਸਂ, ਤਂਸਣ੍ਠਾਨੋ ਵਾ ਪਾਸਾਣੋ ਏਤ੍ਥ ਅਤ੍ਥੀਤਿ ‘‘ਵਾਨਰਸੀਸ’’ਨ੍ਤਿ ਵਤ੍ਤਬ੍ਬੇ ਵਸ੍ਸ ਬਤ੍ਤਂ, ਵਣ੍ਣਵਿਪਰਿਯਯਂ, ਦੀਘਂ, ਣਤ੍ਤਂ, ਸਸ੍ਸ ਲੋਪਞ੍ਚ ਕਤ੍ਵਾ ‘‘ਬਾਰਾਣਸੀ’’ਤਿ ਵੁਤ੍ਤਂ. ਸਵਤ੍ਥਸ੍ਸ ਇਸਿਨੋ ਨਿਵਾਸਨਟ੍ਠਾਨਤ੍ਤਾ ਸਾਵਤ੍ਥਿ, ਸਬ੍ਬਂ ਧਨਮੇਤ੍ਥ ਅਤ੍ਥੀਤਿ ਵਾ ਸਾਵਤ੍ਥਿ [ਮ. ਨਿ. ਅਟ੍ਠ. ੧.੧੪], ਸਬ੍ਬਸ੍ਸ ਸਾਵੋ, ਧਨਵਾਚਕੋ ਅਤ੍ਥਸਦ੍ਦੋ, ਇ. ਤਿਕ੍ਖਤ੍ਤੁਂ ਵਿਸਾਲੀਭੂਤਤ੍ਤਾ ਵੇਸਾਲੀ, ਅਸ੍ਸਤ੍ਥੁਤ੍ਥੇ ਈ. ਮਥਿ ਹਿਂਸਾਯਂ, ਇਲੋ, ਅਸ੍ਸਿਤ੍ਤਂ, ਮਿਥਿਲਾ. ਅਲਂ ਭੂਸਨਮੇਤ੍ਥਾਤਿ ਆਲ਼ਵੀ, ਵੀ, ਲ਼ਤ੍ਤਞ੍ਚ. ਕੁਸ ਅਵ੍ਹਾਨੇ, ‘‘ਖਾਦਥ ਪਿਵਥਾ’’ਤ੍ਯਾਦੀਹਿ ਦਸਹਿ ਸਦ੍ਦੇਹਿ ਕੋਸਨ੍ਤਿ ਏਤ੍ਥਾਤਿ ਕੋਸਮ੍ਬੀ, ਬੋ, ਨਦਾਦਿ, ਕੁਸਮ੍ਬਰੁਕ੍ਖਵਨ੍ਤਤਾਯ ਵਾ ਕੋਸਮ੍ਬੀ, ਕੁਸਮ੍ਬਸ੍ਸ ਇਸਿਨੋ ਅਸ੍ਸਮਤੋ ਅਵਿਦੂਰੇ ਮਾਪਿਤਤ੍ਤਾਤਿ ਏਕੇ [ਉਦਾ. ਅਟ੍ਠ. ੩੫; ਮ. ਨਿ. ਟੀ. ੧.੧੪; ੨.੨੮੪]. ਉਗ੍ਗਂ ਰਿਪੁਂ ਜਯਤਿ ਯਤ੍ਥ, ਸਾ ਉਜ੍ਜੇਨੀ, ਯੁ, ਨਦਾਦਿ. ਤਕ੍ਕ ਊਹੇ, ਊਹੋ ਊਨਪੂਰਣਂ, ਤਕ੍ਕਨਂ ਤਕ੍ਕੋ, ਸੋ ਸੀਲਂ ਸਭਾਵੋ ਯਤ੍ਥ ਸਾ ਤਕ੍ਕਸੀਲਾ, ਯੋ ਹਿ ਪੁਰਿਸਕਾਰੇਨ ਊਨੋ, ਸੋ ਤਤ੍ਥ ਗਨ੍ਤ੍ਵਾ ਤਮੂਨਂ ਪੂਰੇਤੀਤਿ. ਚਮ ਅਦਨੇ, ਪੋ, ਚਮ੍ਪਾ. ਸਾਨਂ ਧਨਾਨਂ ਆਕਰਂ ਉਪ੍ਪਤ੍ਤਿਟ੍ਠਾਨਂ ਸਾਕਰੋ, ਸੋ ਏਵ ਸਾਗਲਂ. ਸਂਸੁਮਾਰਸਣ੍ਠਾਨੋ ਗਿਰਿ ਏਤ੍ਥਾਤਿ ਸਂਸੁਮਾਰਗਿਰਂ, ਸਂਸੁਮਾਰੋ ਗਾਯਤਿ ਏਤਸ੍ਸ ਮਾਪਿਤਕਾਲੇਤਿ ਵਾ ਸਂਸੁਮਾਰਗਿਰਂ, ਗੇ ਸਦ੍ਦੇ, ਇਰੋ. ਰਾਜੂਨਮੇਵ ਆਧਿਪਚ੍ਚਵਸੇਨ ਪਰਿਗ੍ਗਹਿਤਬ੍ਬਤ੍ਤਾ ਰਾਜਗਹਂ. ਆਦਿਕਾਲੇ ਕਪਿਲਨਾਮਸ੍ਸ ਇਸਿਨੋ ਨਿਵਾਸਨਟ੍ਠਾਨਤ੍ਤਾ ਕਪਿਲਵਤ੍ਥੁ, ਪੁਮਨਪੁਂਸਕੇ.
ਸਾਕੋ ਰਾਜੂਨਂ ਯੁਦ੍ਧਾਦੀਸੁ ਸਤ੍ਤਿ ਸਞ੍ਜਾਤਾ ਏਤ੍ਥਾਤਿ ਸਾਕੇਤਂ, ‘‘ਸਾਕੋ ਸਤ੍ਤਿਮ੍ਹਿ ਭੂਪਾਲੇ, ਦੁਮਦੀਪਨ੍ਤਰੇਸੁ ਚੇ’’ਤਿ ਨਾਨਤ੍ਥਸਙ੍ਗਹੇ. ਸਞ੍ਜਾਤਤ੍ਥੇ ਇਤੋ, ਸਾਕੋ ਨਾਮ ਰਾਜਾ, ਦੁਮੋ ਵਾ ਏਤ੍ਥ ਆਦਿਕਾਲੇ ਸਞ੍ਜਾਤੋਤਿ ਵਾ ਸਾਕੇਤਂ. ਇਨ੍ਦਂ ਪਰਮਿਸ੍ਸਰਿਯਭਾਵਂ ਪਾਪੁਣਨ੍ਤਿ ਏਤ੍ਥਾਤਿ ਇਨ੍ਦਪਤ੍ਤਂ, ਇਨ੍ਦੋ ਵਾ ਸਕ੍ਕੋ ਦੇਵਰਾਜਾ, ਸੋ ਪਤ੍ਤੋ ਏਤ੍ਥਾਤਿ ਇਨ੍ਦਪਤ੍ਤਂ. ਉਕ੍ਕਂ ਧਾਰਯਤਿ ਏਤਸ੍ਸ ਮਾਪਿਤਕਾਲੇਤਿ ਉਕ੍ਕਟ੍ਠਾ, ਵਣ੍ਣਵਿਕਾਰੋ. ਯਸ੍ਸ ਮਾਪਿਤਟ੍ਠਾਨੇ ਪਾਟਲੀਨਾਮਕੋ ਏਕੋ ਤਰੁਣਰੁਕ੍ਖੋ ਅਤ੍ਥੀਤਿ ਤਂ ਪਾਟਲਿਪੁਤ੍ਤਕਂ, ਅਥ ਵਾ ਪਟਲਿ ਨਾਮ ਏਕੋ ਗਾਮਣੀ, ਤਸ੍ਸ ਪੁਤ੍ਤੋ ਏਤ੍ਥ ਵਸਤਿਆਦਿਕਾਲੇਤਿ ਪਾਟਲਿਪੁਤ੍ਤਕਂ. ਚੇਤਿਯਰਟ੍ਠੇ ਉਤ੍ਤਮਤ੍ਤਾ ਚੇਤੁਤ੍ਤਰਂ, ‘‘ਜੇਤੁਤ੍ਤਰ’’ਨ੍ਤਿ ਪਾਠੇ ਪਨ ਵਣ੍ਣਵਿਕਾਰੋ, ਵੇਰਿਜਯਟ੍ਠਾਨਤ੍ਤਾ ਜੇਤਞ੍ਚ ਤਂ ਉਤ੍ਤਮਤ੍ਤਾ ਉਤ੍ਤਰਞ੍ਚੇਤਿ ਵਾ ਜੇਤੁਤ੍ਤਰਂ. ਯਸ੍ਸ ਮਾਪਿਤਕਾਲੇ ਦੀਪੋ ਦਿਪ੍ਪਤਿ, ਤਂ ਸਙ੍ਕਸ੍ਸਂ, ਕਾਸ ਦਿਤ੍ਤਿਯਂ, ਦ੍ਵਿਤ੍ਤਂ, ਸਮ੍ਮਾ ਕਸਨ੍ਤਿ ਏਤ੍ਥਾਤਿ ਵਾ ਸਙ੍ਕਸ੍ਸਂ, ਕਸ ਵਿਲੇਖਨੇ, ਯਸ੍ਸ ਮਾਪਿਤਕਾਲੇ ਨਿਮਿਤ੍ਤਮੋਲੋਕੇਨ੍ਤਾ ਬ੍ਰਾਹ੍ਮਣਾ ਕੁਸਹਤ੍ਥਂ ਨਰਂ ਪਸ੍ਸਿਤ੍ਵਾ ਮਾਪੇਨ੍ਤਿ, ਤਂ ਕੁਸਿਨਾਰਂ. ਆਦਿਨਾ ਮਥੁਰ [ਮਧੁਰ, ਮਾਧੁਰ (ਕ.)] ਪਾਸਾਣਪੁਰਸੋਣਿਕਾਦਯੋਪ੍ਯਨੇਕਪੁਰਵਿਸੇਸਾ ਸਙ੍ਗਹਿਤਾ.
੨੦੨. ਚਤੁਕ੍ਕਂ ਅਬ੍ਭਨ੍ਤਰਗਾਮਮਗ੍ਗੇ. ਰਥਸ੍ਸ ਹਿਤਾ ਰਚ੍ਛਾ, ਪਬ੍ਬਜ੍ਜਾਦਿ. ਵਿਸਯਨ੍ਤੇ ਪਕਾਸਯਨ੍ਤੇ ਵਿਕ੍ਕਯੇਨ ਦਬ੍ਬਾਨਿ ਯਸ੍ਸਂ, ਸਾ ਵਿਸਿਖਾ, ਵਿਪੁਬ੍ਬੋ ਸਿ ਸੇਵਾਯਂ, ਖੋ, ਵਿਸਨ੍ਤਿ ਏਤ੍ਥਾਤਿ ਵਾ ਵਿਸਿਖਾ, ਵਿਸ ਪਵੇਸਨੇ, ਖੋ. ਰਥਸ੍ਸ ਹਿਤਾ ਰਥਿਕਾ, ਇਕੋ. ਵੀ ਗਮਨੇ, ਥਿ, ਵੀਥਿ.
ਅਨਿਬ੍ਬਿਦ੍ਧਾ ਰਚ੍ਛਨ੍ਤਰੇਨ ਮਜ੍ਝੇ ਅਨਿਬ੍ਬਿਦ੍ਧਾ ਰਚ੍ਛਾ ਬ੍ਯੂਹੋ ਨਾਮ. ਬ੍ਯੂਹੇਤਿ ਸਮ੍ਪਿਣ੍ਡੇਤਿ ਜਨੇ ਅਞ੍ਞਤ੍ਰ ਗਨ੍ਤੁਮਪ੍ਪਦਾਨਵਸੇਨਾਤਿ ਬ੍ਯੂਹੋ, ਊਹ ਸਮ੍ਪਿਣ੍ਡਨੇ ਵਿਪੁਬ੍ਬਤ੍ਤਾ. ਨ ਨਿਬ੍ਬਿਜ੍ਝਤੇ ਰਚ੍ਛਨ੍ਤਰੇਨਾਤਿ ਅਨਿਬ੍ਬਿਦ੍ਧੋ, ਵਿਧ ਸਮ੍ਪਹਾਰੇ, ਅ. ਨਿਬ੍ਬਿਦ੍ਧਾ ਰਚ੍ਛਨ੍ਤਰੇਨ ਰਚ੍ਛਾ ਪਥੋ, ਅਦ੍ਧੀਤਿ ਚ ਵੁਚ੍ਚਤਿ. ਪਥ ਗਮਨੇ, ਪਥੋ. ਅਦ ਗਮਨੇ,ਤਿ, ਅਦ੍ਧਿ.
੨੦੩. ਚਤੁਕ੍ਕਂ ਚਚ੍ਚਰੇ. ਚਤੁਨ੍ਨਂ ਪਥਾਨਂ ਸਮਾਹਾਰੋ ਚਤੁਕ੍ਕਂ, ਚਰ ਗਤਿਭਕ੍ਖਨੇਸੁ, ਚਰੋ, ਰਸ੍ਸ ਚੋ, ਚਚ੍ਚਰਂ, ਅਙ੍ਗਣਵਾਚਕੋ ਚਾਯਂ. ਦ੍ਵਿਨ੍ਨਂ, ਚਤੁਨ੍ਨਂ ਵਾ ਮਗ੍ਗਾਨਂ ਸਨ੍ਧਿ ਮਗ੍ਗਸਨ੍ਧਿ. ਸਿਙ੍ਘ ਘਾਯਨੇ, ਆਟਕੋ.
ਦ੍ਵਯਂ ਵਪ੍ਪਸ੍ਸੋਪਰਿ ਇਟ੍ਠਕਾਦਿਰਚਿਤੇ ਵੇਠਨੇ. ਵਪ੍ਪਂ ਨਾਮ ਦੁਗ੍ਗਨਗਰੇ ਪਰਿਖਾਮਤ੍ਤਿਕਂ ਕੂਟਂ [ਕੁਟਿਂ (ਕ.)] ਕਤ੍ਵਾ ਗੋਹਿ, ਹਤ੍ਥੀਹਿ ਚ ਵਿਮਦ੍ਦਾਪੇਤ੍ਵਾ ਤਿਂਸਹਤ੍ਥਪ੍ਪਮਾਣਂ ਪਾਕਾਰਸ੍ਸ ਹੇਟ੍ਠਿਮਤਲਂ, ਤਥਾ ਹਤ੍ਥਸਤਂ ਤਤੋ ਉਦ੍ਧਰਿਤ੍ਵਾ ਪਂਸੁਨਾ ਵਪ੍ਪਂ ਕਾਰਯੇ, ਤਸ੍ਸੋਪਰਿ ਪਾਕਾਰਨ੍ਤਿ, ਪਕੁਬ੍ਬਨ੍ਤਿ ਤਨ੍ਤਿ ਪਾਕਾਰੋ, ਸਮਨ੍ਤਤੋ ਕਰੀਯਤੇਤਿ ਵਾ ਪਾਕਾਰੋ, ਅਕਤ੍ਤਰਿ ਚ ਕਾਰਕੇ ਸਞ੍ਞਾਯਂ ਣੋ, ਰਸ੍ਸਸ੍ਸ ਦੀਘਤਾ. ਵੁ ਸਂਵਰਣੇ, ਵੁਣੋਤੀਤਿ ਵਰਣੋ, ਯੁ, ਰਾਗਮੋ ਚ. ‘‘ਸਾਲੋ’’ਤਿਪਿ ਪਾਕਾਰਸ੍ਸ ਨਾਮਂ.
ਦ੍ਵਯਂ ਰਾਜਭਵਨਸਾਮਞ੍ਞੇ. ਸਬ੍ਬਗੇਹਾਨਂ ਵਿਸੇਸੇਨ ਪਕਾਸਨਤੋ ਉਦ੍ਦਾਪੋ, ਦੀਪ ਪਕਾਸਨੇ, ਈਸ੍ਸਾਕਾਰੋ. ਸਙ੍ਗਮ੍ਮ ਕਰੋਨ੍ਤਿ ਤਨ੍ਤਿ ਉਪਕਾਰਿਕਾ, ਣ੍ਵੁ. ਕੇ ਪਚ੍ਚਯੇ ਥੀਕਤਾਕਾਰਪਰੇ ਪੁਬ੍ਬੋ ਅਕਾਰੋ ਦੀਘਂ [ਕਾਤਨ੍ਤ ੨.੨.੬੫], ਅਕਾਦੇਸੋਪਿ ਹਿ ‘‘ਕੋ’’ਤਿ ਵੁਚ੍ਚਤਿ, ਯਥਾ ਦੇਵਦਤ੍ਤੋ ‘‘ਦਤ੍ਤੋ’’ਤਿ. ਕਪਚ੍ਚਯੋ ਵਾ.
੨੦੪. ਦ੍ਵਯਂ ਗੇਹਾਦਿਨੋ ਮਤ੍ਤਿਕੇਟ੍ਠਕਾਦਿਮਯਭਿਤ੍ਤਿਯਂ. ਕੁਟ ਛੇਦਨੇ, ਕੁਟਤਿ ਛਿਨ੍ਦਤਿ ਮਗ੍ਗਨ੍ਤਿ ਕੁਟ੍ਟਂ. ਭਿਦਿ ਦ੍ਵਿਧਾਕਰਣੇ,ਤਿ, ਭਿਤ੍ਤਿ. ਗੁਨ੍ਨਂ ਵਾਚਾਨਂ ਪੁਰਂ ਗੋਪੁਰਂ. ਦ੍ਵਾਰਸਮੀਪੇ ਕਤੋ ਕੋਟ੍ਠਕੋ ਦ੍ਵਾਰਕੋਟ੍ਠਕੋ, ਕੁਸ ਅਕ੍ਕੋਸੇ, ਠਕੋ, ਕੋਟ੍ਠਕੋਤਿ ਗੇਹਵਿਸੇਸੋ.
ਦ੍ਵਯਂ ਇਨ੍ਦਖੀਲੇ. ਇਸ ਇਚ੍ਛਾਯਂ, ਏਸ ਗਵੇਸਨੇ ਵਾ, ਇਕੋ. ਇਨ੍ਦਸ੍ਸ ਸਕ੍ਕਸ੍ਸ ਖੀਲੋ ਕਣ੍ਟਕੋ ਇਨ੍ਦਖੀਲੋ. ਦ੍ਵਯਂ ਦ੍ਵਾਰਪਸ੍ਸੋਪਸਾਲਾਯਂ’ਹਮ੍ਯਾਦਿਪਿਟ੍ਠੇ ਚ ਵਾਤਕੁਟਿਕਾਯਂ. ਅਡ੍ਡ ਅਤਿਕ੍ਕਮਹਿਂਸਾਸੁ, ਅ. ਆਲਕਪਚ੍ਚਯੇ ਅਟ੍ਟਾਲਕੋ.
੨੦੫. ਉਪਰਿ ਮਾਲਾਦਿਯੁਤ੍ਤਂ ਸੋਭਨਥਮ੍ਭਦ੍ਵਯਮੁਭਯਤੋ ਨਿਖਨਿਤ੍ਵਾ ਯਂ ਬਹਿਦ੍ਵਾਰਂ ਕਪ੍ਪੀਯਤੇ, ਤਂ ਤੋਰਣਂ. ਤੁਰ ਵਾਰਣੇ, ਯੁ, ਥਵਨ੍ਤਾ ਵਾ ਰਣਨ੍ਤ੍ਯਤ੍ਰਾਤਿ ਤੋਰਣਂ, ਤੁ ਅਭਿਤ੍ਥਵੇ. ਰਣ ਸਦ੍ਦਤ੍ਥੋ, ਵਣ੍ਣਵਿਕਾਰੋ. ਦ੍ਵਾਰਸ੍ਸ ਬਹਿ ਬਹਿਦ੍ਵਾਰਂ. ਪਰਿ ਸਮਨ੍ਤਤੋ ਖਞ੍ਞਤੇਤਿ ਪਰਿਖਾ. ਦੀਘਭਾਵੇਨ ਯੁਤ੍ਤਾ ਦੀਘਿਕਾ.
੨੦੬-੨੦੭. ਸਦੁਮਨ੍ਤਂ ਗੇਹੇ. ਮਨ੍ਦ ਮੋਦਨਥੁਤਿਜਲ਼ਤ੍ਤੇਸੁ, ਮਨ੍ਦਨ੍ਤੇ ਯਤ੍ਥਾਤਿ ਮਨ੍ਦਿਰਂ, ਇਰੋ. ਸੀਦਨ੍ਤਿ ਤਤ੍ਥਾਤਿ ਸਦਨਂ, ਯੁ. ਸਦ ਵਿਸਰਣਗਤ੍ਯਾਵਸਾਨੇਸੁ. ਨ ਗਚ੍ਛਨ੍ਤੀਤਿ ਅਗਾ, ਥਮ੍ਭਾਦਯੋ, ਤੇ ਰਾਤਿ ਗਣ੍ਹਾਤੀਤਿ ਅਗਾਰਂ. ਰਸ੍ਸਸ੍ਸ ਦੀਘਤ੍ਤੇ ਆਗਾਰਂ. ਚਿ ਚਯੇ, ਨਿਚੀਯਤੇ ਛਾਦੀਯਤੇਤਿ ਨਿਕਾਯੋ, ਯਮ੍ਹਿ ਚਿਸ੍ਸ ਕਾਦੇਸੋ ਨਿਪਾਤਨਾ. ਲੀ ਸਿਲੇਸਨੇ, ਣੋ, ਨਿਲਯੋ, ਆਲਯੋ ਚ. ਵਸ ਨਿਵਾਸੇ, ਆਵਸਨ੍ਤ੍ਯਤ੍ਰਾਤਿ ਆਵਾਸੋ, ਣੋ. ਭੂ ਸਤ੍ਤਾਯਂ, ਭਵਨ੍ਤ੍ਯਤ੍ਰਾਤਿ ਭਵਨਂ. ਵਿਸਨ੍ਤਿ ਤਨ੍ਤਿ ਵੇਸ੍ਮਂ, ਮੋ. ਕਿਤ ਨਿਵਾਸੇ, ਅਧਿਕਰਣੇ ਯੁ, ਨਿਕੇਤਨਂ. ਨਿਵਿਸਨ੍ਤਿ, ਨਿਵਸਨ੍ਤਿ ਵਾ ਯਤ੍ਰ, ਤਂ ਨਿਵੇਸਨਂ. ਘਰ ਸੇਚਨੇ, ਘਰਤਿ ਕਿਲੇਸਮੇਤ੍ਥਾਤਿ ਘਰਂ, ਗਯ੍ਹਤੀਤਿ ਵਾ ਘਰਂ, ਣੋ. ਗਹਸ੍ਸ ਘਰਾਦੇਸੋ. ਗਣ੍ਹਾਤਿ ਪੁਰਿਸੇਨ ਆਨੀਤਂ ਧਨਨ੍ਤਿ ਗਹਂ. ਅਧਿਕਰਣੇ ਥੋ, ਆਵਸਥੋ. ਸਰ ਗਤਿਚਿਨ੍ਤਾਹਿਂਸਾਸੁ, ਸਰਨ੍ਤਿ ਚਿਨ੍ਤੇਨ੍ਤਿ ਏਤ੍ਥ ਸੁਭਾਸੁਭਕਮ੍ਮਾਨਿ, ਸਰਤਿ ਵਾ ਸੂਰਿਯਸਨ੍ਤਾਪਾਦਿਕਨ੍ਤਿ ਸਰਣਂ. ਸਿ ਸੇਵਾਯਂ, ਣੋ, ਪਤਿਸ੍ਸਯੋ. ਉਚ ਸਮਵਾਯੇ, ਓਕਂ. ਸਲ ਗਮਨੇ, ‘‘ਇਤ੍ਥਿਯਮਤਿਯਵੋ ਵਾ’’ਤਿ ਅ, ਸਾਲਾ, ਸਰਧਾਤੁਮ੍ਹਿ ਸਤਿ ਲਤ੍ਤਮੇਵ ਵਿਸੇਸੋ. ਚਿ ਚਯੇ, ਕਮ੍ਮਨਿ ਣੋ, ਚਯੋ. ਕੁਟ ਛੇਦਨੇ, ਇ. ਵਸ ਨਿਵਾਸੇ,ਤਿ. ਉਪਧਸ੍ਸ ਏਤ੍ਤੇ ਗੇਹਂ. ਸਦਧਾਤੁਮ੍ਹਾ ਉਮੋ, ਸਦੁਮਂ.
ਦ੍ਵਯਂ ਮੁਖਰਹਿਤਦੇਵਕੁਲਸਦਿਸੇ ਯਞ੍ਞਾਯਤਨੇ. ਚਿਤ ਪੂਜਾਯਂ, ਕਮ੍ਮਨਿ ਇਯੋ. ਯਤ ਯਤਨੇ, ਆਯਤਨ੍ਤਿ ਵਾਯਮਨ੍ਤਿ ਏਤ੍ਥ ਫਲਕਾਮਾਤਿ ਆਯਤਨਂ, ਅਥ ਵਾ ਆਯਨ੍ਤੀਤਿ ਆਯਾਨਿ, ਤਾਨਿ ਤਨੋਤੀਤਿ ਆਯਤਨਂ, ਫਲਕਾਰਕਨ੍ਤ੍ਯਤ੍ਥੋ. ਏਤ੍ਥ ਤੁਸਦ੍ਦੋ ਸਮਾਗਤਾਨਂ ਦ੍ਵਿਨ੍ਨਂ ਪੁਬ੍ਬਾਪਰਗਮਨਤ੍ਥੋ. ‘‘ਚੇਤਿਯਾਯਤਨਾਨਿ ਚਾ’’ਤਿਪਿ ਪਾਠੋ.
੨੦੮. ਦ੍ਵਯਂ ਦੇਵਾਨਂ, ਨਰਪਤੀਨਞ੍ਚ ਇਟ੍ਠਕਾਦਿਮਯੇ ਭਵਨੇ. ਅਞ੍ਞਸ੍ਸਾਪਿ ਸਾਦਿਸ੍ਯਾ. ਪਸੀਦਨ੍ਤਿ ਨਯਨਮਨਾਨ੍ਯਤ੍ਰਾਤਿ ਪਾਸਾਦੋ. ਯੁ ਮਿਸ੍ਸਨੇ, ਪੋ, ਦੀਘੋ ਚ, ਦੀਘਵਿਧਾਨਸਾਮਤ੍ਥਿਯਾ ਓਤ੍ਤਾਭਾਵੋ.
ਦ੍ਵਯਂ ਰਾਜਤੋ ਅਞ੍ਞੇਸਂ ਧਨੀਨਂ ਬ੍ਯਵਹਾਰਕਾਦੀਨਂ ਭਵਨੇ. ਮੁਣ੍ਡੋ ਛਦਨਮੇਤਸ੍ਸ, ਨ ਪਾਸਾਦਸ੍ਸ ਵਿਯਾਤਿ ਮੁਣ੍ਡਚ੍ਛਦੋ, ਦ੍ਵਿਤ੍ਤਂ. ਹਰ ਹਰਣੇ, ਯੋ, ਯਮ੍ਹਿ ਮਿਆਗਮੋ ਚ.
ਦੁਗ੍ਗਪੁਰਦ੍ਵਾਰੇ ਵਾ, ਯਤ੍ਥ ਕਤ੍ਥਚਿ ਵਾ ਮਤ੍ਤਿਕਾਦਿਮਯੇ ਗਜਕੁਮ੍ਭਮ੍ਹਿ ਯੋ ਯੂਪੋ ਪਾਸਾਦੋ ਪਤਿਟ੍ਠਿਤੋ, ਸੋ ਹਤ੍ਥਿਨਖੋ ਨਾਮ, ਹਤ੍ਥਿਸ੍ਸੇਵ ਨਖੋ ਯਸ੍ਸਾਤਿ ਹਤ੍ਥਿਨਖੋ, ਨਖਸਦ੍ਦੇਨ ਵਾ ਨਖਸਹਿਤੋ ਪਾਸਾਦੋ ਗਯ੍ਹਤੇ.
੨੦੯. ਸੁਪਣ੍ਣਸ੍ਸ ਗਰੁਲ਼ਸ੍ਸ ਵਙ੍ਕੇਨ ਪਕ੍ਖੇਨ ਸਦਿਸਛਦਨਂ ਗੇਹਂ ਸੁਵਣ੍ਣਵਙ੍ਕਚ੍ਛਦਨਂ. ਵਙ੍ਕ ਗਮਨੇ. ਏਕਪਸ੍ਸੇਯੇਵ ਛਦਨਤੋ ਅਡ੍ਢਯੋਗੋ.
ਏਕੇਨੇਵ ਕੂਟੇਨ ਯੁਤ੍ਤੋ ਅਨੇਕਕੋਣੋ ਪਤਿਸ੍ਸਯਵਿਸੇਸੋ ਮਾਲ਼ੋ ਨਾਮ, ਵਟ੍ਟਾਕਾਰੇਨ ਕਤਸੇਨਾਸਨਨ੍ਤਿ ਕੇਚਿ. ਮਾ ਮਾਨੇ, ਲ਼ੋ, ਮਾਲ਼ੋ.
ਚਤੁਰਸ੍ਸੋ ਪਤਿਸ੍ਸਯਵਿਸੇਸੋ ਪਾਸਾਦੋ ਨਾਮ, ਆਯਤਚਤੁਰਸ੍ਸਪਾਸਾਦੋਤਿ ਕੇਚਿ.
੨੧੦. ਸਨ੍ਤੇਹਿ ਭਾਤਿ ਦਿਬ੍ਬਤੀਤਿ ਸਭਾਯਂ, ਸਭਾ ਚ, ਪੁਰਿਮੇ ਯਪਚ੍ਚਯੋ, ਸਨ੍ਤਸ੍ਸ ਸਾਦੇਸੋ ਤੂਭਯਤ੍ਰ. ਮਣ੍ਡਾ ਰਵਿਰਂਸਯੋ, ਤੇ ਪਿਵਤਿ ਨਾਸਯਤੀਤਿ ਮਣ੍ਡਪੋ, ਵਾਸਦ੍ਦੇਨ ਮਣ੍ਡਪਪਦਸ੍ਸ ਪੁਲ੍ਲਿਙ੍ਗਤ੍ਤਂ ਸਮੁਚ੍ਚਿਨੋਤਿ, ਜਨਾਨਂ ਆਲਯੋ ਸਨ੍ਨਿਪਾਤਟ੍ਠਾਨਂ ਜਨਾਲਯੋ. ਆਸਨਤ੍ਥਾਯ ਕਤਾ ਸਾਲਾ ਆਸਨਸਾਲਾ. ਪਟਿਕ੍ਕਮਨ੍ਤਿ ਏਤ੍ਥਾਤਿ ਪਟਿਕ੍ਕਮਨਂ, ਕਮੁ ਪਦਵਿਕ੍ਖੇਪੇ, ਅਧਿਕਰਣੇ ਯੁ.
੨੧੧. ਜਿਨਸ੍ਸ ਵਾਸਭੂਤਂ ਭਵਨਂ ਗਨ੍ਧਕੁਟਿ ਨਾਮ, ਦਿਬ੍ਬਗਨ੍ਧੇਹਿ ਪਰਿਭਾਵਿਤਾ ਕੁਟਿ ਗਨ੍ਧਕੁਟਿ.
ਤਿਕਂ ਪਾਕਟ੍ਠਾਨੇ. ਰਸਾਨਿ ਸਨ੍ਤ੍ਯਸ੍ਸਂ ਰਸਵਤੀ, ਪਚਨਂ ਪਾਕੋ, ਤਸ੍ਸ ਠਾਨਂ ਪਾਕਟ੍ਠਾਨਂ. ਮਹਨ੍ਤਾਨਿ ਬਹੂਨਿ ਅਸਿਤਬ੍ਬਾਨਿ ਸਨ੍ਤੇਤ੍ਥ ਮਹਾਨਸਂ, ਅਸ ਭਕ੍ਖਨੇ, ਯੁ, ਵਣ੍ਣਵਿਪਰਿਯਯੋ.
੨੧੨. ਸੁਵਣ੍ਣਕਾਰਾਦਿਸਿਪ੍ਪੀਨਂ ਕਮ੍ਮਸਾਲਾ ਆਵੇਸਨਂ. ਆਵਿਸਨ੍ਤ੍ਯਸ੍ਮਿਂ ਆਵੇਸਨਂ, ਯੁ. ਪਾਨਮਨ੍ਦਿਰਂ ਸੁਰਾਪਾਨਤ੍ਥਂ ਕਤਮਨ੍ਦਿਰਂ ਸੋਣ੍ਡਾ ਨਾਮ, ਕਤ੍ਤਬ੍ਬਾਕਤ੍ਤਬ੍ਬਂ ਵਿਚਾਰੇਤ੍ਵਾ ਅਤ੍ਤਨਾ ਇਚ੍ਛਿਤਵਤ੍ਥੁਕਾਰਣਾ ਸਬ੍ਬਂ ਦੇਯ੍ਯਧਮ੍ਮਂ ਸਨੋਨ੍ਤੀਤਿ ਸੋਣ੍ਡਾ, ਸਨ ਦਾਨੇ, ਤਨਾਦਿ. ਡੋ, ਅਸ੍ਸੋਤ੍ਤਂ, ਵਣ੍ਣਵਿਕਾਰੋ ਚ, ਤੇਸਂ ਏਸਾ ਵਸਤਿ ਸੋਣ੍ਡਾ. ਪਾਨਸਦ੍ਦਸਨ੍ਨਿਧਾਨਾ ਸੁਰਾਸੋਣ੍ਡਾਯੇਵਿਧ ਗਹਿਤਾ. ਵਚ੍ਚਸ੍ਸ ਗੂਥਸ੍ਸ ਵਿਸਜ੍ਜਨਟ੍ਠਾਨਂ ਵਚ੍ਚਟ੍ਠਾਨਂ. ਵਚ੍ਚਸ੍ਸ ਵਿਸਜ੍ਜਨਟ੍ਠਾਨਾ ਕੁਟਿ ਵਚ੍ਚਕੁਟਿ. ਮੁਨੀਨਂ ਇਸੀਨਂ ਵਸਨਟ੍ਠਾਨਂ ਅਸ੍ਸਮੋ ਨਾਮ, ਆ ਕੋਧਂ ਸਮੇਨ੍ਤਿ ਏਤ੍ਥਾਤਿ ਅਸ੍ਸਮੋ, ਆ ਭੁਸੋ ਸਮੇਨ੍ਤਿ ਏਤ੍ਥ ਰਾਗਾਦਯੋਤਿ ਵਾ ਅਸ੍ਸਮੋ.
੨੧੩. ਤਿਕਂ ਪਣ੍ਯਵਿਕ੍ਕਯਸਾਲਾਯਂ. ਪਣ ਬ੍ਯਵਹਾਰੇ, ਪਣਿਤਬ੍ਬਾਤਿ ਪਣ੍ਯਾ, ਵਤ੍ਥਾਦਯੋ, ਤੇ ਏਤ੍ਥ ਵਿਕ੍ਕਿਣਨ੍ਤੀਤਿ ਪਣ੍ਯਵਿਕ੍ਕਯੋ, ਕੀ ਦਬ੍ਬਵਿਨਿਮਯੇ, ਸੋ ਏਵ ਸਾਲਾ ਗੇਹਨ੍ਤਿ ਪਣ੍ਯਵਿਕ੍ਕਯਸਾਲਾ. ਆਪਣਯਨ੍ਤੇ ਬ੍ਯਵਹਰਨ੍ਤੇ ਅਸ੍ਮਿਨ੍ਤਿ ਆਪਣੋ, ਣੋ. ਪਣ੍ਯਾਨਂ ਵਿਕ੍ਕਯਾਯ ਨੀਯਮਾਨਾਨਂ ਵੀਥਿ ਪਨ੍ਥੋ ਪਣ੍ਯਵੀਥਿਕਾ. ਵਸ ਅਚ੍ਛਾਦਨੇ, ਤੋ, ਉਦਕਂ ਵਸਿਤਂ ਅਚ੍ਛਾਦਨਂ ਕਤਮਨੇਨਾਤਿ ਉਦੋਸਿਤੋ, ਵਸ੍ਸੋਤ੍ਤਂ, ਭਣ੍ਡਟ੍ਠਪਨਸ੍ਸ ਸਾਲਾ ਭਣ੍ਡਸਾਲਾ. ਕਮੁ ਪਦਵਿਕ੍ਖੇਪੇ, ਚਙ੍ਕਮਤ੍ਯਤ੍ਰਾਤਿ ਚਙ੍ਕਮਨਂ, ਚਙ੍ਕਮੋ ਚ, ਦ੍ਵਿਤ੍ਤਾਦਿ.
੨੧੪. ਜਲਨ੍ਤਿ ਏਤ੍ਥਾਤਿ ਜਨ੍ਤਾ, ਜਲ ਦਿਤ੍ਤਿਯਂ, ਅਨ੍ਤੋ, ‘‘ਇਤ੍ਥਿਯਮਤਿਯਵੋ ਵਾ’’ਤਿ ਅ, ਆ, ਲਲੋਪੋ, ਜਨੇਤ੍ਯਤ੍ਰ ਅਗ੍ਗਿਨ੍ਤਿ ਵਾ ਜਨ੍ਤਾ, ਜਨ ਜਨਨੇ, ਅਨ੍ਤੋ, ਸਾ ਏਵ ਘਰਂ ਜਨ੍ਤਾਘਰਂ. ਅਗ੍ਗਿਨੋ ਸਾਲਾ ਅਗ੍ਗਿਸਾਲਾ. ਪਾ ਪਿਵਨੇ, ਪਪਿਵਨ੍ਤ੍ਯਸ੍ਸਨ੍ਤਿ ਪਪਾ, ਅ. ਪਾਨੀਯਟ੍ਠਾ ਸਾਲਾ ਪਾਨੀਯਸਾਲਾ, ਸਾ ਏਵ ਪਾਨੀਯਸਾਲਿਕਾ.
ਗਸ ਗਮਨੇ, ਭੋ, ਸਸ੍ਸ ਬੋ. ਅਵਤਿ ਰਕ੍ਖਤੀਤਿ ਓਵਰਕੋ, ਅਰੋ, ਸਕਤ੍ਥੇ ਕੋ, ਅਸ੍ਸੋਤ੍ਤਞ੍ਚ. ਵਸਨਂ ਵਾਸੋ, ਤਦਤ੍ਥਂ ਅਗਾਰਂ ਵਾਸਾਗਾਰਂ. ਸਯਤਿ ਏਤ੍ਥਾਤਿ ਸਯਨੀ, ਯੁ, ਨਦਾਦਿ, ਸਾ ਏਵ ਗਹਂ ਸਯਨਿਗ੍ਗਹਂ.
੨੧੫. ਚਤੁਕ੍ਕਂ ਰਾਜਿਤ੍ਥਾਗਾਰੇ, ਤਦਤ੍ਥਿਯਤੋ [ਤਦਟ੍ਠਿਯਤੋ (ਕ.)] ਉਪਚਾਰੇਨ ਰਾਜਿਤ੍ਥੀਸੁਪਿ. ਰਾਜਿਤ੍ਥੀਨਮਗਾਰਂ ਇਤ੍ਥਾਗਾਰਂ. ਅਵਰੁਨ੍ਧੀਯਨ੍ਤੇ ਰਾਜਿਤ੍ਥਿਯੋ ਅਨੇਨਾਤਿ ਓਰੋਧੋ, ਰੁਧ ਆਵਰਣੇ. ਸੁਦ੍ਧਾ ਕਾਮਾਪਗਮਤ੍ਤਾ ਪਰਿਸੁਦ੍ਧਾ ਰਕ੍ਖਕਾ ਅਨ੍ਤੇ ਸਮੀਪੇ ਯਸ੍ਸਾਤਿ ਸੁਦ੍ਧਨ੍ਤੋ. ਅਨ੍ਤੇ ਅਬ੍ਭਨ੍ਤਰੇ ਪੁਰਂ ਗੇਹਂ ਅਨ੍ਤੇਪੁਰਂ, ਪੁਰਸ੍ਸ ਅਨ੍ਤੇਤਿ ਵਾ ਅਨ੍ਤੇਪੁਰਂ. ‘‘ਅਨ੍ਤੋਪੁਰ’’ਨ੍ਤਿਪਿ ਪਾਠੋ.
ਰਞ੍ਞਂ ਰਾਜੂਨਂ ਅਸਬ੍ਬਵਿਸਯਟ੍ਠਾਨਂ ਸਬ੍ਬੇਹ੍ਯਸਾਧਾਰਣਟ੍ਠਾਨਂ ‘‘ਕਚ੍ਛਨ੍ਤਰ’’ਨ੍ਤਿ ਮਤਂ ਕਥਿਤਂ, ਯਂ ‘‘ਪਮਦਵਨ’’ਨ੍ਤਿ ਵੁਚ੍ਚਤਿ, ਪਮਦਵਨਂ ਨਾਮ ਉਪਕਾਰਿਕਾਸਨ੍ਨਿਹਿਤਂ ਵਾ ਪੁਰਸਨ੍ਨਿਹਿਤਂ ਵਾ ਅਨ੍ਤੇਪੁਰੋਚਿਤਂ, ਯਤ੍ਰ ਅਨ੍ਤੇਪੁਰਸਹਿਤੋ ਏਵ ਰਾਜਾ ਵਿਹਰਤਿ, ਨਾਞ੍ਞਜਨਪ੍ਪਵੇਸੋ [ਅਮਰ ੧੪.੩]. ਪਮਦਾਨਂ ਵਨਂ ਪਮਦਵਨਂ. ਨਿਪਾਤਨਾ ਯਾਕਾਰਾਨਂ [ਈਕਾਰ ਆਕਾਰਾਨਨ੍ਤਿ ਅਤ੍ਥੋ] ਇਤ੍ਥਿਗਤਾਨਂ ਰਸ੍ਸੋ ਕ੍ਵਚੀਤਿਰਸ੍ਸੋ. ਕਚ੍ਛਸ੍ਸ ਪਕੋਟ੍ਠਸ੍ਸ ਅਨ੍ਤਰਂ ਅਬ੍ਭਨ੍ਤਰਂ ਕਚ੍ਛਨ੍ਤਰਂ. ਪਕੋਟ੍ਠਂ ਨਾਮ ਅਬ੍ਭਨ੍ਤਰਦ੍ਵਾਰਂ.
੨੧੬. ਦ੍ਵਯਂ ਇਟ੍ਠਕਾਦਿਰਚਿਤੇ ਆਰੋਹਨੇ. ਉਪਾਨੇਨ ਸਹ ਵਤ੍ਤਤੇਤਿ ਸੋਪਾਨੋ, ਸੋਪਾਨਂ ਵਾ ਨਪੁਂਸਕੇਪਿ. ਆਰੂਯ੍ਹਤੇ ਯੇਨ ਤਂ ਆਰੋਹਨਂ, ਯੁ, ਰੁਹ ਜਨਨੇ.
ਦ੍ਵਯਂ ਕਟ੍ਠਾਦਿਰਚਿਤਾਯਂ. ਨਿਚ੍ਛਯੇਨ ਸਯਨ੍ਤਿ ਪਾਕਾਰਾਦਿਕਮੇਤਾਯਾਤਿ ਨਿਸ੍ਸੇਣੀ, ਸਿ ਸੇਵਾਯਂ, ਣੀ, ਨਦਾਦਿ. ਉਦ੍ਧਮਾਰੋਹਤੇ ਏਤਾਯਾਤਿ ਅਧਿਰੋਹਿਣੀ, ਸਾਸਦ੍ਦੋ ਦ੍ਵਿਨ੍ਨਮ੍ਪਿ ਇਤ੍ਥਿਲਿਙ੍ਗਤ੍ਤਂ ਜੋਤੇਤਿ.
੨੧੭. ਪਞ੍ਚਕਂ ਜਾਲਕੇ. ਵਾਤਂ ਪਿਵਤੀਤਿ ਵਾਤਪਾਨਂ. ਗਵਂ ਅਕ੍ਖਿ ਗਵਕ੍ਖੋ, ਸਮਾਸਨ੍ਤਤ੍ਤਾ ਅ, ਸਞ੍ਞਾਸਦ੍ਦਤੋ ਪੁਲ੍ਲਿਙ੍ਗਤ੍ਤਂ, ਅਕ੍ਖਿ ਸਦ੍ਦੇ ਵਾ, ਗਵਂ ਅਕ੍ਖਿ ਗਵਕ੍ਖੀਤਿ ਵਿਗ੍ਗਹੋ. ਜਲ ਦਿਤ੍ਤਿਯਂ, ਜਾਲਂ. ਸੀਹਰੂਪਯੁਤ੍ਤਂ ਪਞ੍ਜਰਂ ਸੀਹਪਞ੍ਜਰਂ. ਆਲੋਕਾਨਂ ਆਤਪਾਨਂ ਪਵਿਸਨਟ੍ਠਾਨਂ ਸਨ੍ਧਿ ਛਿਦ੍ਦਨ੍ਤਿ ਆਲੋਕਸਨ੍ਧਿ, ਆਲੋਕੀਯਨ੍ਤਿ ਏਤੇਨਾਤਿ ਆਲੋਕੋ, ਸੋ ਏਵ ਸਨ੍ਧੀਤਿ ਵਾ ਆਲੋਕਸਨ੍ਧਿ.
ਦ੍ਵਯਂ ਲਙ੍ਗਿਯਂ. ਲਗਿ ਗਤ੍ਯਤ੍ਥੋ, ਅ, ਨਦਾਦਿ. ਪਰਿ ਪੁਨਪ੍ਪੁਨਂ ਗਮਨਾਗਮਨਵਸੇਨ ਹਨ੍ਤੀਤਿ ਪਲਿਘੋ, ਣੋ. ਕਪਿਰੂਪਮਤ੍ਥਕਤ੍ਤਾ ਕਪਿਸੀਸੋ. ਅਗ੍ਗਲ਼ਂ ਨਾਮ ਕਵਾਟਕੋ [ਕਵਾਟਫਲਵਿਧਾਰਣੋ (ਕ.)], ਤਸ੍ਸ ਥਮ੍ਭੋ ਅਗ੍ਗਲ਼ਤ੍ਥਮ੍ਭੋ, ‘‘ਅਗ੍ਗਲ਼ਂ ਤੀਸੁ ਕਲ੍ਲੋਲੇ, ਦਣ੍ਡੇ ਚਾਨ੍ਤਕਵਾਟੇਸੂ’’ਤਿ ਰਭਸੋ, ਇਤ੍ਥਿਯਮਤੋ ਆਪਚ੍ਚਯੋ, ਅਗ੍ਗਲ਼ਾ. ਨਿਸ੍ਸੇਸਤੋ ਅਬ੍ਬਤਿ ਵਸ੍ਸੋਦਕਮਨੇਨਾਤਿ ਨਿਬ੍ਬਂ, ਅਬ੍ਬ ਗਤਿਹਿਂਸਾਸੁ. ਛਦ੍ਦਸ੍ਸ ਛਦਨਸ੍ਸ ਕੋਟਿ ਹੇਟ੍ਠਿਮਾਵਸਾਨਂ ਛਦ੍ਦਕੋਟਿ, ਤਸ੍ਸਂ.
੨੧੮. ਤਿਕਂ ਗੇਹਚ੍ਛਦਨੇ. ਛਾਦੇਤਿ ਏਤੇਨਾਤਿ ਛਦਨਂ, ਛਦ ਸਂਵਰਣੇ, ਚੁਰਾਦਿ. ਪਟਗਮਨੇ, ‘‘ਪਟ੍ਯਾਦੀਹ੍ਯਲ’’ਨ੍ਤਿ ਅਲੋ. ਛਾਦੇਤਿ ਏਤੇਨਾਤਿ ਛਦ੍ਦਂ, ਦ੍ਵਿਤ੍ਤਾਦਿ.
ਤਿਕਂ ਗੇਹਙ੍ਗਣੇ. ਅਜ ਗਤਿਮ੍ਹਿ, ਇਰੋ, ਅਜਿਰਂ. ਚਰ ਗਤਿਭਕ੍ਖਨੇਸੁ, ਚਰੋ. ਅਙ੍ਗ ਗਮਨੇ, ਕਰਣਾਧਿਕਰਣੇਸੁ ਯੁ, ਵਣ੍ਣਵਿਕਾਰੋ, ਣਤ੍ਤਂ.
ਪਞ੍ਚਕਂ ਗੇਹਦ੍ਵਾਰਤੋ ਬਹਿਪਕੋਟ੍ਠਕੇ, ਵੀਥਿਯਂ ਦ੍ਵਾਰਪਿਣ੍ਡਕੇ ਚ. ਅਲਿਨ੍ਦੋ ਤ੍ਵਞ੍ਞਪਿਣ੍ਡਕੇਪਿਚ੍ਛਤੇ. ਪਠਮਂ ਹਨਨ੍ਤਿ ਗਚ੍ਛਨ੍ਤਿ ਏਤ੍ਥਾਤਿ ਪਘਾਣੋ, ਪਘਣੋ ਚ, ਹਨਸ੍ਸ ਘਣਾਦੇਸੋ. ਅਲਿ ਸਖਾ ਇਨ੍ਦੋ ਏਤ੍ਥਾਤਿ ਅਲਿਨ੍ਦੋ, ‘‘ਗੇਹੇਕਦੇਸੇ ਅਲਿਨ੍ਦੋ, ਪਘਾਣੋ ਪਘਣੋਭਵੇ’’ਤਿ [ਚਿਨ੍ਤਾਮਣਿਟੀਕਾ ੧੨.੧੨] ਅਮਰਮਾਲਾਯਂ. ਆਲਿਨ੍ਦੋ, ਦੀਘਾਦਿ. ਪਧਾਨਂ ਮੁਖਂ ਪਮੁਖਂ, ਗੇਹਸ੍ਸ ਹਿ ਚਤੂਸੁ ਮੁਖੇਸੁ ਤਦੇਵ ਪਧਾਨਂ, ਯਤ੍ਥ ਸਾਧੁਜਨਾਪਿ ਆਗਨ੍ਤੁਕਾਪਿ ਨਿਸੀਦਨ੍ਤਿ. ਦ੍ਵਾਰਂ ਬਨ੍ਧਤਿ ਪਿਦਹਤਿ ਏਤ੍ਥਾਤਿ ਦ੍ਵਾਰਬਨ੍ਧਨਂ.
੨੧੯. ਦ੍ਵਯਂ ਦ੍ਵਾਰਬਾਹਾਯਂ. ਪੀਠਾਨਿ ਲੋਹਵਿਕਤਿਆਦੀਹਿ ਸਙ੍ਘਟੀਯਨ੍ਤਿ ਏਤ੍ਥਾਤਿ ਪੀਠਸਙ੍ਘਾਟਕਂ, ਪੀਠੇਹਿ ਸਙ੍ਘਟੀਯਤੀਤਿ ਵਾ ਪੀਠਸਙ੍ਘਾਟਕਂ, ਘਟ ਘਟਨੇ. ਦ੍ਵਿਭਾਗੇਨ ਬਾਹਾਸਦਿਸਤ੍ਤਾ ਬਾਹਾ, ਦ੍ਵਾਰਸ੍ਸ ਬਾਹਾ ਦ੍ਵਾਰਬਾਹਾ. ‘‘ਕਪਾਟਂ, ਕਵਾਟ’’ਨ੍ਤਿਪਿ ਦ੍ਵਾਰਬਾਹਾਯ ਨਾਮਾਨਿ, ਕਂ ਵਾਤਂ ਪਾਟਯਤਿ, ਵਾਟਯਤਿ ਚੇਤਿ ਕਮ੍ਮਨਿ ਣੋ, ਇਤ੍ਥਿਯਂ ਕਪਾਟੀ.
ਦ੍ਵਯਂ ਗੇਹਾਦੀਨਂ ਕੂਟੇ. ਕੁਟ ਛੇਦਨੇ, ਕਮ੍ਮਨਿ ਣੋ. ਨਯ ਗਮਨਤ੍ਥੋ, ਕੇ ਸੀਸੇ ਨਯਤੀਤਿ ਕਣ੍ਣੀਕਾ, ਣ੍ਵੁ, ਇਤ੍ਤਂ, ਣਤ੍ਤਞ੍ਚ.
੨੨੦. ਦ੍ਵਯਂ ਦ੍ਵਾਰੇ. ਦ੍ਵੇ ਅਰਨ੍ਤ੍ਯਤ੍ਰਾਤਿ ਦ੍ਵਾਰਂ, ਦੁਜ੍ਜਨੇ ਵਾਰਯਨ੍ਤ੍ਯਸ੍ਮਾ ਰਕ੍ਖਕਾਤਿ ਵਾ ਦ੍ਵਾਰਂ, ਉਲੋਪੋ. ਪਟਿਹਰਨ੍ਤਿ ਅਪਨੇਨ੍ਤਿ ਏਤਸ੍ਮਾ ਰਕ੍ਖਕਾ ਅਞ੍ਞਾਤਨ੍ਤਿ ਪਟਿਹਰੋ, ਪਟਿਪਕ੍ਖੇ ਹਰਤਿ ਏਤਸ੍ਮਾਤਿ ਵਾ ਪਟਿਹਰੋ, ਰਸ੍ਸਸ੍ਸ ਦੀਘਤ੍ਤੇ ਪਟਿਹਾਰੋ.
ਚਤੁਕ੍ਕਂ ਉਮ੍ਮਾਰੇ, ਯਂ ‘‘ਦ੍ਵਾਰਪਿਣ੍ਡਿਕਾ’’ਤਿ ਵੁਚ੍ਚਤਿ. ਉਰ ਗਤਿਮ੍ਹਿ, ਮਾਰੋ ਕਰਣੇ. ਦੇਹਂ ਨੇਤਿ ਪਵੇਸੇਨਾਤਿ ਦੇਹਨੀ, ‘‘ਦੇਹਲੀ’’ਤਿਪਿ ਪਾਠੋ, ਦੇਹਂ ਲਾਤਿ ਪਵੇਸੇਨਾਤਿ ਦੇਹਲੀ. ਇਲ ਗਤਿਮ੍ਹਿ, ਣ੍ਵੁ. ਇਨ੍ਦੋ ਏਵ ਪਾਦਂ ਖਿਪਤਿ ਏਤ੍ਥਾਤਿ ਇਨ੍ਦਖੀਲੋ, ਖਿਪ ਪੇਰਣੇ. ਪਸ੍ਸ ਲੋਪੋ, ਅਥ ਵਾ ਇਂ ਗਮਨਂ ਦਦਾਤੀਤਿ ਇਨ੍ਦੋ, ਦ੍ਵਾਰਂ, ਤਤ੍ਥ ਠਪਿਤੋ ਖੀਲੋ ਕਣ੍ਟਕੋਤਿ ਇਨ੍ਦਖੀਲੋ, ਵੇਗਗਭਿਘਾਤਨਤੋ ਹਿ ਸੋ ਖੀਲੋ ਵਿਯ ਹੋਤਿ.
ਥਮ੍ਭ ਪਟਿਬਨ੍ਧਨੇ, ਥਮ੍ਭੋ, ਧਾਰੇਤੀਤਿ ਵਾ ਥਮ੍ਭੋ, ਧਰ ਧਰਣੇ, ਰਮ੍ਭਪਚ੍ਚਯੋ, ਵਣ੍ਣਵਿਕਾਰੋ ਚ. ਥੁ ਅਭਿਤ੍ਥਵੇ, ਉਣੋ, ਯੁ ਵਾ, ਧਾਰੇਤੀਤਿ ਵਾ ਥੂਣੋ, ਯੁ, ਰਲੋਪੋ, ਅਸ੍ਸੂ.
ਅਡ੍ਢੇਨ੍ਦੁਪਾਸਾਣੇ ਅਦ੍ਧਚਨ੍ਦਾਕਾਰੇ ਪਾਸਾਣੇ ਪਟਿਕਾਸਦ੍ਦੋ ਵਤ੍ਤਤਿ. ਪਟ ਗਤਿਯਂ, ਣ੍ਵੁ. ਇਤ੍ਥਿਕਤਾਕਾਰਪਰੇ ਕੇ ਅਸ੍ਸਿਤ੍ਤਂ. ਗਜਿ ਸਦ੍ਦੇ, ਣ੍ਵੁ, ਅਸ੍ਸਿਤ੍ਤਂ, ਬਿਨ੍ਦਾਗਮੋ ਚ. ਇਸ ਇਚ੍ਛਾਯਂ, ਠਕੋ.
੨੨੧. ਵਲਭੀਤਿ ਚੂਲ਼ਾ, ‘‘ਸਿਖਾਯਂ ਵਲਭੀ ਚੂਲ਼ੇ’’ਤਿ ਰੁਦ੍ਦੋ [ਰਸ੍ਸਨ੍ਤਾ ਚ, ਸਿਖਾਯਂ ਵਲ਼ਭਿਯਂ ਚੂਲ਼ੇਤਿ ਰੁਦ੍ਦੋ (ਚਿਨ੍ਤਾਮਣਿਟੀਕਾ ੧੨.੧੫)]. ਤਚ੍ਛਾਦਨੇ ਦਾਰੁਮ੍ਹਿ ਕਟ੍ਠੇ ਗੋਪਾਨਸੀ ਮਤਾ. ਵਙ੍ਕੇਤਿ ਦਾਰੁਵਿਸੇਸਨਂ. ਗਂ ਵਸ੍ਸੋਦਕਂ, ਸੂਰਿਯਾਦਿਕਿਰਣਞ੍ਚ ਪਿਵਨ੍ਤਿ ਵਿਨਾਸਯਨ੍ਤਿ ਅਬ੍ਭਨ੍ਤਰਮਪ੍ਪਵੇਸਨਵਸੇਨਾਤਿ ਗੋਪਾਨਾ, ਇਟ੍ਠਕਾਦਯੋ, ਤਾਨਿ ਸਿਨੋਨ੍ਤਿ ਬਨ੍ਧਨ੍ਤਿ ਏਤ੍ਥਾਤਿ ਗੋਪਾਨਸੀ.
ਸੋਧਾਦਿਗੇਹੇਸੁ ਛੇਕਪਕ੍ਖਾਵਾਸਤ੍ਥਂ ਯੋ ਬਹਿ ਕਰਿਯ ਕਟ੍ਠੇਕਦੇਸੋ ਠਪੀਯਤੇ, ਸੋ ਵਿਟਙ੍ਕੋ. ਕਪੋਤੇ ਪਾਲਯਤੀਤਿ ਕਪੋਤਪਾਲਿਕਾ, ਕਮ੍ਮਨਿ ਣ੍ਵੁ. ਟਕਿ ਨਿਵਾਸਗਤੀਸੁ. ਵਿਨੋ ਪਕ੍ਖਿਨੋ ਟਙ੍ਕਨ੍ਤਿ ਏਤ੍ਥਾਤਿ ਵਿਟਙ੍ਕੋ. ਣੋ.
੨੨੨. ਦ੍ਵਯਂ ਕੁਞ੍ਚਿਕਾਛਿਦ੍ਦੇ. ਕੁਞ੍ਚਿਕਾਯ ਵਿਵਰਂ ਛਿਦ੍ਦਂ ਕੁਞ੍ਚਿਕਾਵਿਵਰਂ. ਤਾਲ਼ਸ੍ਸ ਪਵੇਸਨਟ੍ਠਾਨਭੂਤੋ ਛਿਗ੍ਗਲ਼ੋ ਛਿਦ੍ਦਂ ਤਾਲ਼ਚ੍ਛਿਗ੍ਗਲ਼ੋ.
ਤਿਕਂ ਕੁਞ੍ਚਿਕਾਯਂ. ਕੁਞ੍ਚ ਕੋਟਿਲ੍ਯੇ, ਣ੍ਵੁ. ਤਾਯਤਿ ਰਕ੍ਖਤੀਤਿ ਤਾਲੋ. ਅਲੋ, ਤਲਤਿ ਤਿਟ੍ਠਤਿ ਏਤੇਨਾਤਿ ਵਾ ਤਾਲੋ, ਤਲ ਪਤਿਟ੍ਠਾਯਂ. ਅਵਾਪੁਰਤਿ ਵਿਵਰਤਿ ਯੇਨਾਤਿ ਅਵਾਪੁਰਣਂ, ਵਰ ਸਂਵਰਣੇ, ਯੁ, ਵਸ੍ਸ ਪੋ, ਉਤ੍ਤਂ, ਉਪਸਗ੍ਗਸ੍ਸ ਦੀਘਤਾ ਚ, ‘‘ਅਪਾਰੁਤਾ ਤੇਸਂ ਅਮਤਸ੍ਸ ਦ੍ਵਾਰਾ’’ਤਿ [ਦੀ. ਨਿ. ੨.੭੧; ਮ. ਨਿ. ੧.੨੮੩] ਵਚਨਤੋ ਪੁਰ, ਪਾਰ ਸਂਵਰਣੇਤਿਪਿ ਧਾਤ੍ਵਤ੍ਥਂ ਪਠਨ੍ਤਿ. ਅਵਪੁਬ੍ਬੋ ਵੁ ਸਂਵਰਣੇਤਿਪਿ ਧਾਤ੍ਵਤ੍ਥੇ ਪਨ ਸਤਿ ਵਸ੍ਸ ਰਤ੍ਤਂ, ਉਪਸਗ੍ਗਸ੍ਸ ਦੀਘਤਾ ਚ, ‘‘ਅਪਾਰੁਤਾ, ਸਙ੍ਘਾਟਿਂ ਪਾਰੁਪਿਤ੍ਵਾ’’ਤ੍ਯਾਦੀਸੁ ਪਨ ਪਕਾਰਵਣ੍ਣਾਗਮੇਨ ਸਿਦ੍ਧੋ. ਵਿਦ ਲਾਭੇ, ਇਮ੍ਹਿ ਵੇਦਿਕਾ, ਸਕਤ੍ਥੇ ਕੋ. ਇਤਰਤ੍ਥ ਇਯੇਵ.
੨੨੩. ਸਙ੍ਘਾਟਾਦਯੋ ਮਨ੍ਦਿਰਙ੍ਗਾ ਗੇਹਙ੍ਗਵਿਸੇਸਾ. ਸਮ੍ਮਾ ਘਟੇਨ੍ਤਿ ਏਤ੍ਥ ਗੋਪਾਨਸ੍ਯਾਦਯੋਤਿ ਸਙ੍ਘਾਟੋ, ਪੁਬ੍ਬਪਚ੍ਛਿਮਦਕ੍ਖਿਣੁਤ੍ਤਰਾਯਾਮਵਸੇਨ ਥਮ੍ਭਾਨਮੁਪਰਿ ਠਿਤੋ ਕਟ੍ਠਵਿਸੇਸੋ, ਤੇ ਪਨ ਪੁਬ੍ਬਪਚ੍ਛਿਮਯਾਮਾ ਤਯੋ ਕਟ੍ਠਾ, ਦਕ੍ਖਿਣੁਤ੍ਤਰਯਾਮਾ ਪਨ ਹੇਟ੍ਠਿਮਪਰਿਚ੍ਛੇਦਤੋ ਤਯੋ ਕਟ੍ਠਾ, ਉਕ੍ਕਟ੍ਠਪਰਿਚ੍ਛੇਦੇਨ ਪਨ ਪਞ੍ਚਸਤ੍ਤਨਵਾਦਯੋਪਿ. ਦ੍ਵਿਨ੍ਨਂ ਪਕ੍ਖਾਨਂ ਅਪਤਨਤ੍ਥਂ ਬਨ੍ਧਨਤੋ ਪਾਸੋ ਵਿਯਾਤਿ ਪਕ੍ਖਪਾਸੋ. ਤੁਲਤਿ ਸਙ੍ਘਾਟੇਸੁ ਪਤਿਟ੍ਠਤੀਤਿ ਤੁਲਾ, ਤਲ ਪਤਿਟ੍ਠਾਯਂ, ਅਸ੍ਸੁਤ੍ਤਂ, ਪਕ੍ਖਾਨਂ ਵਾ ਸਮਵਾਹਿਤਭਾਵਕਰਣਤੋ ਤੁਲਯਤਿ ਮਿਨਾਤਿ ਏਤਾਯਾਤਿ ਤੁਲਾ, ਤੁਲ ਉਮ੍ਮਾਨੇ.
ਤਿਕਂ ਸਮ੍ਮਜ੍ਜਨਿਯਂ. ਮੁਜਿ ਸੋਧਨੇ, ਯੁ. ਮਜ੍ਜ ਸਂਸੁਦ੍ਧਿਯਂ, ਯੁ. ਸੁਧ ਸੁਦ੍ਧਿਯਂ, ਸਬ੍ਬਤ੍ਰ ਕਰਣੇ ਯੁ.
੨੨੪. ਤਿਕਂ ਸਙ੍ਕਾਰਛਡ੍ਡਨਪ੍ਪਦੇਸੇ. ਕਟ ਛਡ੍ਡਨਮਦ੍ਦਨੇਸੁ, ਸਙ੍ਕਟਨ੍ਤਿ ਏਤ੍ਥਾਤਿ ਸਙ੍ਕਟੀਰਂ, ਈਰੋ, ‘‘ਸਙ੍ਕਟੋ’’ਤਿ ਵਾ ਸਙ੍ਕਾਰੋ ਵੁਚ੍ਚਤਿ, ਤਂ ਈਰਯਨ੍ਤਿ ਖਿਪਨ੍ਤਿ ਏਤ੍ਥਾਤਿ ਸਙ੍ਕਟੀਰਂ, ਈਰ ਖੇਪੇ. ਸਙ੍ਕਾਰਸ੍ਸ ਠਾਨਂ ਸਙ੍ਕਾਰਟ੍ਠਾਨਂ. ਸਙ੍ਕਾਰਂ ਕਟਤਿ ਛਡ੍ਡੇਤਿ ਏਤ੍ਥਾਤਿ ਸਙ੍ਕਾਰਕੂਟਂ, ਅਸ੍ਸੂ, ਸਕਤ੍ਥੇ ਕੋ.
ਚਤੁਕ੍ਕਂ ਸਮ੍ਮਜ੍ਜਨਿਯਾ ਨਿਰਾਕਤੇ [ਨਿਰਸ੍ਸਤੇ (ਕ.)] ਥੁਸਾਦਿਮ੍ਹਿ. ਨਾਨਾਵਿਧੇ ਸਙ੍ਕਾਰੇ ਰਾਸੀਕਰਣਵਸੇਨ ਕਚਤਿ ਬਨ੍ਧਤਿ ਏਤੇਨਾਤਿ ਕਚੋ, ਸੋ ਏਤ੍ਥ ਇਚ੍ਛਿਤਬ੍ਬੋਤਿ ਕਚਵਰੋ, ਵਰ ਇਚ੍ਛਾਯਂ. ਉਚ੍ਛਿਟ੍ਠੋ ਕਲਾਪੋ ਸਮੂਹੋ ਉਕ੍ਲਾਪੋ, ਕਸ੍ਸਾਕਾਰਲੋਪੋ. ਨਾਨਾਵਿਧੇਹਿ ਤਿਣਾਦੀਹਿ ਸਙ੍ਕਰੀਯਤੇ ਮਿਸ੍ਸੀਕਰੀਯਤੇਤਿ ਸਙ੍ਕਾਰੋ, ਣੋ. ਅਵਕਰੋਤਿਪ੍ਯਤ੍ਰ. ਅਵਕਰੀਯਤੇ ਨਿਰਸ੍ਸਤੇਤਿ, ਅ. ‘‘ਸਮ੍ਮਜ੍ਜੋ ਮਜ੍ਜਨੀ ਚੇਵ, ਸਙ੍ਕਾਰੋ’ਵਕਰੋ ਮਤੋ’’ਤਿ ਹਲਾਯੁਧੋ. ਕਸ ਵਿਲੇਖਨੇ, ਅਮ੍ਬੁ.
੨੨੫. ਘਰਾਦਿਭੂਮਿ ਘਰਖੇਤ੍ਤਵਿਹਾਰਾਦੀਨਂ ਯੋ ਭੂਮਿਪ੍ਪਦੇਸੋ ਵਤ੍ਥੁ ਨਾਮ, ਤਂ ਨਪੁਂਸਕੇ, ਵਸਨ੍ਤਿ ਏਤ੍ਥਾਤਿ ਵਤ੍ਥੁ, ਰਤ੍ਥੁ. ਗਸ ਮਦਨੇ, ਗਸਨ੍ਤਿ ਏਤ੍ਥਾਤਿ ਗਾਮੋ, ਮੋ. ਸਂਵਸਨ੍ਤ੍ਯਤ੍ਰਾਤਿ ਸਂਵਸਥੋ, ਅਥੋ.
ਪਾਕਟੋ ਖ੍ਯਾਤੋ ਗਾਮੋ, ਸੋ ਨਿਗਮੋ ਨਾਮ, ਅਤਿਰੇਕੋ ਗਾਮੋ ਨਿਗਮੋ, ਭੁਸਤ੍ਥੋ ਨਿ, ਸਞ੍ਞਾਸਦ੍ਦਤ੍ਤਾ ਰਸ੍ਸੋ.
ਉਪਭੁਞ੍ਜਿਤਬ੍ਬਭੋਗਮਨੁਸ੍ਸਾਦੀਹਿ ( ) [(ਇਭ੍ਯੋ) (?)] ਵਡ੍ਢਿਤੋ ਅਧਿਕੋ ਗਾਮੋ ਨਿਗਮਤੋਪਿ ਅਧਿਕਤਰਤ੍ਤਾ ‘‘ਅਧਿਭੂ’’ਤਿ ਈਰਿਤੋ ਕਥਿਤੋ, ਅਧਿਕੋ ਭਵਤੀਤਿ ਅਧਿਭੂ.
੨੨੬. ਦ੍ਵਯਂ ਗਾਮਾਦਿਪਰਿਯਨ੍ਤਭਾਗੇ. ਸਿ ਬਨ੍ਧਨੇ, ਮੋ. ਪਰਿਚ੍ਛਿਨ੍ਦਿਤ੍ਵਾ ਆਦੀਯਤੇਤਿ ਮਰਿਯਾਦਾ, ਪਸ੍ਸ ਮੋ.
ਦ੍ਵਯਂ ਆਭੀਰਕੁਟਿਯਂ [ਘੋਸੋ ਆਭੀਰਪਲ੍ਲੀ ਸਿਯਾ (ਅਮਰ ੧੨.੨੦)]. ਘੁ ਸਦ੍ਦੇ, ਘੋਸਨ੍ਤ੍ਯਤ੍ਰਾਤਿ ਘੋਸੋ. ਗੋਪਾਲਾਨਂ ਗਾਮੋ ਗੋਪਾਲਗਾਮਕੋ, ਸਕਤ੍ਥੇ ਕੋ.
ਪੁਰਵਗ੍ਗਵਣ੍ਣਨਾ ਨਿਟ੍ਠਿਤਾ.
੩. ਨਰਵਗ੍ਗਵਣ੍ਣਨਾ
੨੨੭-੨੨੮. ਪੋਰਿਸਨ੍ਤਾਨਿ ਮਨੁਸ੍ਸਜਾਤਿਯਾ ਨਾਮਾਨਿ. ਮਨੋ ਉਸ੍ਸਨ੍ਨਮਸ੍ਸਾਤਿ ਮਨੁਸ੍ਸੋ, ਸਤਿਸੂਰਭਾਵਬ੍ਰਹ੍ਮਚਰਿਯਯੋਗ੍ਯਤਾਦਿਗੁਣਵਸੇਨ ਉਪਚਿਤਮਾਨਸਾ ਉਕ੍ਕਟ੍ਠਗੁਣਚਿਤ੍ਤਾ, ਕੇ ਪਨ ਤੇ? ਜਮ੍ਬੁਦੀਪਵਾਸਿਨੋ ਸਤ੍ਤਵਿਸੇਸਾ. ਤੇਨਾਹ ਭਗਵਾ – ‘‘ਤੀਹਿ, ਭਿਕ੍ਖਵੇ, ਠਾਨੇਹਿ ਜਮ੍ਬੁਦੀਪਕਾ ਮਨੁਸ੍ਸਾ ਉਤ੍ਤਰਕੁਰੁਕੇ ਮਨੁਸ੍ਸੇ ਅਧਿਗ੍ਗਣ੍ਹਨ੍ਤਿ ਦੇਵੇ ਚ ਤਾਵਤਿਂਸੇ. ਕਤਮੇਹਿ ਤੀਹਿ, ਸੂਰਾ ਸਤਿਮਨ੍ਤੋ ਇਧ ਬ੍ਰਹ੍ਮਚਰਿਯਵਾਸੋ’’ਤਿ [ਅ. ਨਿ. ੯.੨੧]. ਤਥਾ ਹਿ ਬੁਦ੍ਧਾ ਭਗਵਨ੍ਤੋ ਪਚ੍ਚੇਕਬੁਦ੍ਧਾ ਅਗ੍ਗਸਾਵਕਮਹਾਸਾਵਕਚਕ੍ਕਵਤ੍ਤਿਨੋ ਚ ਅਞ੍ਞੇ ਚ ਮਹਾਨੁਭਾਵਾ ਸਤ੍ਤਾ ਤਤ੍ਥੇਵ ਉਪ੍ਪਜ੍ਜਨ੍ਤਿ. ਸਮਾਨਰੂਪਾਦਿਤਾਯ ਪਨ ਸਦ੍ਧਿਂ ਪਰਿਤ੍ਤਦੀਪਵਾਸੀਹਿ ਇਤਰਮਹਾਦੀਪਵਾਸਿਨੋਪਿ ਮਨੁਸ੍ਸਾਤ੍ਵੇਵ ਪਞ੍ਞਾਯਿਂਸੂਤਿ ਏਕੇ, ਅਪਰੇ ਪਨ ਭਣਨ੍ਤਿ ‘‘ਲੋਭਾਦੀਹਿ, ਅਲੋਭਾਦੀਹਿ ਚ ਸਹਿਤਸ੍ਸ ਮਨਸ੍ਸ ਉਸ੍ਸਦਤਾਯ ਮਨੁਸ੍ਸਾ, ਯੇ ਹਿ ਸਤ੍ਤਾ ਮਨੁਸ੍ਸਜਾਤਿਕਾ, ਤੇਸੁ ਵਿਸੇਸਤੋ ਲੋਭਾਦਯੋ, ਅਲੋਭਾਦਯੋ ਚ ਉਸ੍ਸਦਾ, ਤੇ ਲੋਭਾਦੀਹਿ ਉਸ੍ਸਦਤਾਯ ਅਪਾਯਮਗ੍ਗਂ, ਅਲੋਭਾਦੀਹਿ ਉਸ੍ਸਦਤਾਯ ਸੁਗਤਿਮਗ੍ਗਂ, ਨਿਬ੍ਬਾਨਗਾਮਿਮਗ੍ਗਞ੍ਚ ਪੂਰੇਨ੍ਤਿ, ਤਸ੍ਮਾ ਲੋਭਾਦੀਹਿ, ਅਲੋਭਾਦੀਹਿ ਚ ਸਹਿਤਸ੍ਸ ਮਨਸ੍ਸ ਉਸ੍ਸਦਤਾਯ ਪਰਿਤ੍ਤਦੀਪਵਾਸੀਹਿ ਸਦ੍ਧਿਂ ਚਤੁਮਹਾਦੀਪਵਾਸਿਨੋ ਸਤ੍ਤਵਿਸੇਸਾ ਮਨੁਸ੍ਸਾਤਿ ਵੁਚ੍ਚਨ੍ਤੀ’’ਤਿ. ਲੋਕਿਯਾ ਪਨ ਮਨੁਨੋ ਅਪਚ੍ਚਭਾਵੇਨ ਮਨੁਸ੍ਸਾਤਿ ਵਦਨ੍ਤਿ, ਮਨੁ ਨਾਮ ਪਠਮਕਪ੍ਪਿਕੋ ਲੋਕਮਰਿਯਾਦਾਯ ਆਦਿਭੂਤੋ ਹਿਤਾਹਿਤਵਿਧਾਯਕੋ ਸਤ੍ਤਾਨਂ ਪਿਤੁਟ੍ਠਾਨਿਯੋ, ਯੋ ਸਾਸਨੇ ‘‘ਮਹਾਸਮ੍ਮਤੋ’’ਤਿ ਵੁਚ੍ਚਤਿ, ਪਚ੍ਚਕ੍ਖਤੋ, ਪਰਮ੍ਪਰਤਾਯ ਚ ਤਸ੍ਸ ਓਵਾਦਾਨੁਸਾਸਨਿਯਂ ਠਿਤਾ ਤਸ੍ਸ ਪੁਤ੍ਤਸਦਿਸਤਾਯ ਮਨੁਸ੍ਸਾਤਿ ਵੁਚ੍ਚਨ੍ਤਿ, ਤਤੋ ਏਵ ਹਿ ਤੇ ‘‘ਮਾਨਵਾ, ਮਨੁਜਾ’’ਤਿ ਚ ਵੋਹਰੀਯਨ੍ਤਿ, ਉਸ੍ਸਪਚ੍ਚਯੋ. ਮਨੁਨੋ ਅਪਚ੍ਚਂ ਮਾਨੁਸੋ, ਉਸੋ. ਮਰ ਪਾਣਚਾਗੇ, ਚੋ, ਮਚ੍ਚੋ, ਪਬ੍ਬਜ੍ਜਾਦਿਨਾ ਵਾ ਤ੍ਯਪਚ੍ਚਯੋ, ਧਾਤ੍ਵਨ੍ਤਸ੍ਸ ਲੋਪੋ ਚ. ਤਤੋ ‘‘ਯਵਤ’’ਮਿਚ੍ਚਾਦਿਨਾ ਚੋ, ਦ੍ਵਿਤ੍ਤਂ. ਮਨੁਨੋ ਅਪਚ੍ਚਂ ਮਾਨਵੋ. ਮਾਣਵੋਪ੍ਯਤ੍ਰ, ਣਵੋ. ਮਨੁਮ੍ਹਾ ਜਾਤੋ ਮਨੁਜੋ. ਨੀ ਨਯੇ, ਨੇਤੀਤਿ ਨਰੋ, ਅਰੋ. ਪੁਸ ਪੋਸਨੇ, ਣੋ, ਪੁਰੇਤੀਤਿ ਵਾ ਪੋਸੋ. ਪੁਰ ਪੂਰਣੇ, ਸੋ, ਉਸ੍ਸੋਤ੍ਤਂ, ਰਲੋਪੋ. ਪੁਨਾਤੀਤਿ ਪੁਮਾ,ਪੁ ਪਵਨੇ, ਮੋ, ਸਿਸ੍ਸਾ. ਪੁਰੇਤੀਤਿ ਪੁਰਿਸੋ, ਪੋਰਿਸੋ ਚ, ਇਸੋ, ਰਸ੍ਸਸ੍ਸ ਦੀਘਤਾਯ ਪੂਰਿਸੋ ਚ. ਏਤ੍ਥ ਚ ਮਨੁਸ੍ਸਾਦਿਪਞ੍ਚਕਂ ਇਤ੍ਥਿਯਮ੍ਪਿ ਵਤ੍ਤਤੇ, ਨਰਾਦਯੋ ਤੁ ਪੁਮੇਯੇਵ ਵਿਸਿਟ੍ਠਲਿਙ੍ਗਤ੍ਤਾ. ਤਤ੍ਰ ਮਨੁਸ੍ਸ ਮਾਨੁਸ ਮਨੁਜ ਮਾਣਵੇਹਿ ਨਦਾਦਿਤ੍ਤਾ ਈਪਚ੍ਚਯੋ, ਏਕਸਕਾਰਲੋਪੋ, ਮਨੁਸੀ, ਮਾਨੁਸੀ, ਮਨੁਜੀ, ਮਾਣਵੀ. ਮਚ੍ਚਾ, ਇਤ੍ਥਿਯਮਤੋ ਆਪਚ੍ਚਯੋ.
ਵਿਦ੍ਦਸੁਪਰਿਯਨ੍ਤਂ ਪਣ੍ਡਿਤੇ. ਪਣ੍ਡਾ ਬੁਦ੍ਧਿ ਸਞ੍ਜਾਤਾ ਅਸ੍ਸਾਤਿ ਪਣ੍ਡਿਤੋ, ਤਰਤ੍ਯਾਦਿ. ਪਡਿ ਗਤਿਯਂ ਵਾ, ਤੋ. ਬੁਜ੍ਝਤੀਤਿ ਬੁਧੋ. ਵਿਦਤਿ ਜਾਨਾਤੀਤਿ ਵਿਦ੍ਵਾ, ਵਿਦ ਞਾਣੇ, ਵੋ, ਸਿਸ੍ਸਾ. ਭੂ ਸਤ੍ਤਾਯਂ, ਅਤ੍ਥੇ ਵਿਭਾਵੇਤਿ ਪਕਾਸੇਤਿ ਸੀਲੇਨਾਤਿ ਵਿਭਾਵੀ, ਣੀ. ਰਾਗਾਦਯੋ ਸਮੇਤੀਤਿ ਸਨ੍ਤੋ, ਤੋ, ਸੁਨ੍ਦਰੋ ਅਨ੍ਤੋ ਅਵਸਾਨਮੇਤਸ੍ਸਾਤਿ ਵਾ ਸਨ੍ਤੋ. ਸੁਨ੍ਦਰਾ ਪਞ੍ਞਾ ਯਸ੍ਸ ਸਪ੍ਪਞ੍ਞੋ. ਕਿਨ੍ਨਾਮ ਨ ਵਿਨ੍ਦਤੀਤਿ ਕੋਵਿਦੋ, ਨੇਰੁਤ੍ਤੋ, ਕੁਂ ਪਾਪਂ ਵਿਨ੍ਦਤੀਤਿ ਵਾ ਕੋਵਿਦੋ. ਧੀ ਪਞ੍ਞਾ ਯਸ੍ਸਤ੍ਥੀਤਿ ਸੋ ਧੀਮਾ, ਸੋਭਨਂ ਝਾਯਤੀਤਿ ਸੁਧੀ, ਝੇ ਚਿਨ੍ਤਾਯਂ. ਝਸ੍ਸ ਧੋ, ਈ, ਸੁਨ੍ਦਰਾ ਧੀ ਯਸ੍ਸਾਤਿ ਵਾ ਸੁਧੀ. ਕਵਿ ਵਣ੍ਣੇ, ਇ, ਇਤ੍ਥਿਯਂ ਕਵੀ ਚ, ਕੁ ਸਦ੍ਦੇ ਵਾ, ਇ, ਕਵਿ. ਬ੍ਯਞ੍ਜਯਤੀਤਿ ਬ੍ਯਤ੍ਤੋ, ਅਞ੍ਜ ਗਤਿਯਂ, ਤੋ. ਭੁਜਾਦੀਨਮਨ੍ਤੋ ਨੋ ਦ੍ਵਿ ਚ. ਵਿਸਿਟ੍ਠੋ ਅਤ੍ਤਾ ਯਸ੍ਸਾਤਿ ਵਾ ਬ੍ਯਤ੍ਤੋ. ਚਕ੍ਖ ਦਸ੍ਸਨੇ, ਯੁ, ਵਿਚਕ੍ਖਣੋ, ਵਿਚਾਰੇਤੀਤਿ ਵਾ ਵਿਚਕ੍ਖਣੋ, ਨੇਰੁਤ੍ਤੋ. ਵਿਗਤੋ ਸਾਰਦੋ ਏਤਸ੍ਮਾਤਿ ਵਿਸਾਰਦੋ.
੨੨੯. ਮੇਧਾ ਧਾਰਣਾ ਮਤਿ ਪਞ੍ਞਾ ਯਸ੍ਸਾਤਿ ਮੇਧਾਵੀ, ਵੀ. ਅਤਿਸਯਮਤਿਯੁਤ੍ਤਤਾਯ ਮਤਿਮਾ. ਪਞ੍ਞਾਯ ਯੋਗਤੋ ਪਞ੍ਞੋ. ਵਿਸੇਸਂ ਜਾਨਾਤਿ ਸੀਲੇਨਾਤਿ ਵਿਞ੍ਞੂ, ਰੂ. ਵਿਦ ਞਾਣੇ, ਉਰੋ, ਵਿਦੁਰੋ [ਵਿਦੂਰੋ (ਕ.)]. ਰੂਪਚ੍ਚਯੇ ਵਿਦੂ. ਧੀਯੋਗਾ ਧੀਰੋ, ਰੋ. ਵਿਸਿਟ੍ਠਦਸ੍ਸਨਸੀਲਤਾਯ ਵਿਪਸ੍ਸੀ, ਣੀ. ਦੋਸਂ ਜਾਨਾਤੀਤਿ ਦੋਸਞ੍ਞੂ, ਰੂ. ਬੁਜ੍ਝਤੀਤਿ ਬੁਦ੍ਧੋ, ਤੋ. ਦੁ ਗਤਿਯਂ, ਅ, ਉਸ੍ਸਾਵੋ [ਦੁ ਗਤਿਯਂ ਅਬ੍ਬੋ (ਸੂਚਿ)], ਦਬ੍ਬੋ. ਵਿਦ ਞਾਣੇ, ਦਸੁ.
੨੩੦-੨੩੧. ਮਹਿਲਾਨ੍ਤਂ ਇਤ੍ਥਿਸਾਮਞ੍ਞੇ. ਇਸੁ ਇਚ੍ਛਾਯਂ, ਤੋ, ਨਦਾਦਿ. ਸੀਮਸ੍ਸ ਅਨ੍ਤੋ ਸੀਮਨ੍ਤੋ, ਕੇਸਵੇਸੋ, ਤਂਯੋਗਾ ਸੀਮਨ੍ਤਿਨੀ, ਇਨੀ. ਨਰਸ੍ਸਾਯਂ ਨਾਰੀ, ਇਦਮਤ੍ਥੇ ਣੋ. ਤਿਟ੍ਠਤਿ ਗਬ੍ਭੋ ਯਸ੍ਸਂ, ਸਾ ਥੀ. ਧਾ ਧਾਰਣੇ ਵਾ, ਵਣ੍ਣਵਿਕਾਰੋ, ਈ. ਬਨ੍ਧ ਬਨ੍ਧਨੇ, ਊ, ਬਨ੍ਧਸ੍ਸ ਵਧਾਦੇਸੋ ਚ [ਣ੍ਵਾਦਿ ੩], ਵਧੂਸਦ੍ਦੋ ਸੁਣਿਸਾਭਰਿਯਾਨਮ੍ਪਿ ਵਾਚਕੋ. ਵਨ ਸਮ੍ਭਤ੍ਤਿਯਂ, ਤੋ, ਇਕਾਰਾਗਮੋ ਚ. ਅਙ੍ਗ ਗਮਨਤ੍ਥੋ, ਯੁ, ਅਙ੍ਗਨਾ, ਵਿਸਿਟ੍ਠਨਾਰਿਯਮ੍ਪਿ ਅਙ੍ਗਨਾ, ਤਦਾ ਕਲ੍ਯਾਣਙ੍ਗਨਾਰੀਲਕ੍ਖਣੋਪੇਤਂ ਪਸਤ੍ਥਂ ਹਤ੍ਥਪਾਦਾਦਿਕਮਙ੍ਗਮਸ੍ਸਤ੍ਥੀਤਿ ਅਸ੍ਸਤ੍ਥ੍ਯਤ੍ਥੇ ਅਙ੍ਗਾ ਕਲ੍ਯਾਣੇ ਨਪਚ੍ਚਯੋ [ਮੋਗ੍ਗਲ੍ਲਾਨ ੪.੯੨]. ਵਿਰੂਪੇਸੁਪਿ ਮਦੋ ਰਾਗਮਦੋ ਯਸ੍ਸਾ ਸਾ ਪਮਦਾ, ਵਿਸਿਟ੍ਠਨਾਰਿਯਂਪ੍ਯਤ੍ਰ ਪਮਦਾ, ਤਦਾ ਪਕਟ੍ਠੋ ਮਦੋ ਰੂਪਸੋਭਗ੍ਗਜਨਿਤੋ ਚੇਤੋਵਿਕਾਰੋ ਯਸ੍ਸਾ ਸਾ ਪਮਦਾ. ਰੂਪਲਾਵਣ੍ਯਸਮ੍ਪਨ੍ਨਤਾਯ ਸੁਨ੍ਦਰੀ, ਵਿਸਿਟ੍ਠਾਯਮ੍ਪਿ. ਕਮਨੀਯਵੁਤ੍ਤਿਤਾਯ ਕਨ੍ਤਾ, ਕਮੁ ਕਨ੍ਤਿਯਂ, ਤੋ. ਕਨ੍ਤਿਯੋਗਾ ਵਾ ਕਨ੍ਤਾ, ਵਿਸਿਟ੍ਠਾਯਮ੍ਪਿ. ਰਮਯਤਿ ਵਿਨੋਦਯਤਿ ਨਾਯਕਂ, ਸਾ ਰਮਣੀ, ਨਨ੍ਦਾਦੀਹਿ ਯੁ, ਨਦਾਦਿ, ਵਿਸਿਟ੍ਠਾਯਮ੍ਪਿ. ਦਯ ਰਕ੍ਖਣੇ, ਕਮ੍ਮਨਿ ਤੋ. ਅਪ੍ਪਂ ਬਲਂ ਯਸ੍ਸਾ ਸਾ ਅਬਲਾ, ਅਪ੍ਪਤ੍ਥੋਯਂ ਅਕਾਰੋ. ਮਾਤੁਯਾ ਗਾਮੋ ਵਿਯ ਗਾਮੋ ਯਸ੍ਸਾ ਸਾ ਮਾਤੁਗਾਮੋ, ਮਾਤਾ ਵਿਯ ਗਚ੍ਛਤੀਤਿ ਵਾ ਮਾਤੁਗਾਮੋ, ਗਮੁ ਗਮਨੇ, ਣੋ, ਮਾਤਾ ਵਿਯ ਗਸਤੀਤਿ ਵਾ ਮਾਤੁਗਾਮੋ, ਗਸ ਅਦਨੇ, ਮੋ, ਮਾਤਾ ਵਿਯ ਗਾਯਤੀਤਿ ਵਾ ਮਾਤੁਗਾਮੋ, ਗਾ ਸਦ੍ਦੇ, ਮੋ. ਮਹੀ ਵਿਯ ਸੁਚਿਂ ਅਸੁਚਿਮ੍ਪਿ ਲਾਤੀਤਿ ਮਹਿਲਾ, ਮਹਨ੍ਤੇਸੁ ਬਹੂਸੁਪਿ ਰਤ੍ਤਚਿਤ੍ਤੇਸੁ ਇਲਤਿ ਗਚ੍ਛਤੀਤਿ ਵਾ ਮਹਿਲਾ, ਇਲ ਗਮਨੇ, ਮਹ ਪੂਜਾਯਂ ਵਾ, ਇਰੋ, ਲਤ੍ਤਂ, ਆ, ਮਹਿਲਾ. ਮਹੇਲਾਪ੍ਯਤ੍ਰ.
ਤਿਕਂ ਵਿਸਿਟ੍ਠਨਾਰਿਯਮੇਵ. ਲਲ ਵਿਲਾਸੇ, ਨਨ੍ਦਾਦੀਹਿ ਯੁ. ਲਲ ਇਚ੍ਛਾਯਨ੍ਤਿ ਚੁਰਾਦਿਗਣਤੋ ਵਾ ਯੁ. ਭਯਪਕਤਿ ਭੀਰੁ, ਭੀ ਭਯੇ, ਰੁ, ‘‘ਭੀਰੁ ਅਤ੍ਤੇ ਜਨੇ’ਤ੍ਥਿਯ’’ਨ੍ਤਿ ਰਭਸੋ. ਅਤਿਸਯਿਤਕਾਮਾ ਕਾਮਿਨੀ, ਕਾਮੋ ਸਿਙ੍ਗਾਰਰੂਪੋ ਮਦੋ ਯਸ੍ਸਾਤ੍ਥੀਤਿ ਇਨੀ, ਸਬ੍ਬਤ੍ਰੇਵਂ. ਵਾਮਲੋਚਨਾ, ਭਾਵਿਨੀ, ਨਿਤਮ੍ਬਿਨੀ, ਰਾਮਾਇਚ੍ਚਾਦੀਨਿਪਿ ਵਿਸਿਟ੍ਠਨਾਰੀਨਾਮਾਨਿ.
ਦ੍ਵਯਂ ਪਠਮਵਯਸਿ ਵਤ੍ਤਮਾਨਾਯਂ.
ਅਟ੍ਠਵਸ੍ਸਾ ਭਵੇ ਗੋਰੀ, ਦਸਵਸ੍ਸਾ ਤੁ ਕਞ੍ਞਕਾ;
ਸਮ੍ਪਤ੍ਤੇ ਦ੍ਵਾਦਸੇ ਵਸ੍ਸੇ, ਕੁਮਾਰੀਤ੍ਯ’ਭਿਧੀਯਤੇ [ਚਿਨ੍ਤਾਮਣਿਟੀਕਾ ੧੬.੮].
ਇਹ ਤ੍ਵਭੇਦੋਪਚਾਰੇਨੇਕਤ੍ਤਂ. ਅਞ੍ਞੇ ਪਨਾਹੁ ‘‘ਕਞ੍ਞਾਸਦ੍ਦੋਯਂ ਪੁਮੁਨਾਭਿਸਮ੍ਬਨ੍ਧਪੁਬ੍ਬਕੇ ਸਮ੍ਪਯੋਗੇ ਨਿਵਤ੍ਤੇਤੀ’’ਤਿ. ਕੁਮਾਰ ਕੀਲ਼ਾਯਂ, ਚੁਰਾਦਿ, ਕੁਮਾਰਯਤੀਤਿ ਕੁਮਾਰੀ, ਅ, ਨਦਾਦਿ, ਸਕਤ੍ਥੇ ਕੋ, ਣ੍ਵੁਨਾ ਵਾ ਸਿਦ੍ਧੋ. ਕਮਨੀਯਤੇਤਿ ਕਞ੍ਞਾ, ਕਨ ਦਿਤ੍ਤਿਕਨ੍ਤਿਗਤੀਸੁ, ਯੋ, ਨ੍ਯਸ੍ਸ ਞਤ੍ਤਂ, ਅ, ਆ.
ਯੁਵਸਦ੍ਦਤੋ ਪਾਟਿਪਦਿਕਤੋਤਿ, ਯੁਵਤਿ. ਵਰਿਤ੍ਥਿਪਰਿਯਾਯਸਾਮਞ੍ਞੇਪਿ ਯੁਵਤਿਸਦ੍ਦੋ ਪਕਤ੍ਯਨ੍ਤਰਮਤ੍ਥੀਤਿ. ਤਰ ਤਰਣੇ, ਯੁ, ਉਤ੍ਤਂ, ਈ ਚ.
੨੩੨. ਸਾਭਿਸੇਕਾ ਲਦ੍ਧਾਭਿਸੇਕਾ ਰਾਜਿਤ੍ਥੀ ਮਹੇਸੀ ਨਾਮ, ਮਹ ਪੂਜਾਯਂ, ਕਮ੍ਮਨਿ ਇਸੋ, ਇਸ੍ਸੇ, ਤਤੋ ਈ, ਮਹਤਿਯੋ ਰਾਜਿਤ੍ਥਿਯੋ ਈਸਤਿ ਅਭਿਭਵਤੀਤਿ ਵਾ ਮਹੇਸੀ, ਈਸ ਇਸ੍ਸਰਿਯੇ, ਈ. ਮਹੇਸਿਤੋ ਅਞ੍ਞਾ ਰਾਜਨਾਰਿਯੋ ਭੋਗਿਨਿਯੋ ਭੋਗਯੋਗਾ, ਈ, ਇਨੀ ਚ. ਯਾਨਾਰੀ ਪੁਰਿਸਸ੍ਸ ਸਙ੍ਕੇਤਂ ਯਾਤਿ, ਸਾ ‘‘ਧਵਤ੍ਥਿਨੀ, ਅਭਿਸਾਰਿਕਾ’’ਤਿ ਚੋਚ੍ਚਤੇ. ਧਵਂ ਪਤਿਂ ਅਤ੍ਥਯਤਿ ਇਚ੍ਛਤੀਤਿ ਧਵਤ੍ਥਿਨੀ, ਅਤ੍ਥ ਯਾਚਨਿਚ੍ਛਾਸੁ, ਇਨੀ, ਅਸਤੀਵਿਸੇਸੋ. ਸਰ ਗਤਿਯਂ, ਅਭਿਸਰਤਿ ਸਙ੍ਕੇਤਨ੍ਤਿ, ਣ੍ਵੁ.
੨੩੩. ਛਕ੍ਕਂ ਵੇਸਿਯਂ. ਚਤੁਸਟ੍ਠਿਕਲਾਕੁਸਲਤਾਯ, ਸੀਲਰੂਪਾਦਿਮਤ੍ਤਾਯ ਚ ਗਣ੍ਯਤੇ ਆਦੀਯਤੇ ਗਣਿਕਾ, ਗਣ ਸਙ੍ਖ੍ਯਾਨੇ, ਣ੍ਵੁ. ਵੇਸੋ ਆਕਪ੍ਪੋ, ਤੇਨਾਤਿਸੋਭਤੇ, ਕਮ੍ਮਵੇਸੇਹਿ ਵਾ ਇਚ੍ਛੀਯਤੇਤਿ. ਅਤਿਸੋਭਨੇ, ਇਚ੍ਛਤ੍ਥੇ ਵਾ ਯਪਚ੍ਚਯੋ. ਵਣ੍ਣਸਮ੍ਪਨ੍ਨਾ ਦਾਸੀ ਵਣ੍ਣਦਾਸੀ, ਦਾਸਿਮ੍ਪਿ ਹਿ ਵਣ੍ਣਸਮ੍ਪਨ੍ਨਂ ਕੇਚਿ ਸਾਮਿਕਾ ਧਨਲੋਭੇਨ ਗਣਿਕਂ ਕਰੋਨ੍ਤਿ. ਨਗਰਂ ਸੋਭੇਤੀਤਿ ਨਗਰਸੋਭਿਨੀ. ਰੂਪੇਨ ਉਪਜੀਵਤੀਤਿ ਰੂਪੂਪਜੀਵਿਨੀ. ਅਤਿਸਯਵੇਸਯੁਤ੍ਤਤਾਯ ਵੇਸੀ.
ਦ੍ਵਯਂ ਅਸਤੀਸਾਮਞ੍ਞੇ. ਕੁਲਾਨਿ ਅਟਤਿ ਨਾਸਯਤੀਤਿ ਕੁਲਟਾ. ਬਨ੍ਧਮਨੁਬਨ੍ਧਂ ਕਾਯਤੀਤਿ ਬਨ੍ਧਕੀ, ਨਦਾਦਿ.
੨੩੪. ਚਤੁਕ੍ਕਂ ਉਤ੍ਤਮਨਾਰਿਯਂ. ਵਰੋ ਆਰੋਹੋ ਸੋਣਿ ਯਸ੍ਸਾ ਸਾ ਵਰਾਰੋਹਾ. ਉਤ੍ਤਮਗੁਣਯੋਗਾ ਉਤ੍ਤਮਾ. ਸੋਣਿਗਾਰਵੇਨ ਮਤ੍ਤਗਜੋ ਵਿਯ ਬਨ੍ਧਨਗਾਮਿਨੀ ਮਤ੍ਤਕਾਸਿਨੀ, ਕਸ ਗਤਿਯਂ. ਵਰਵਣ੍ਣਯੋਗਾ ਵਰਵਣ੍ਣਿਨੀ, ਇਨੀ.
‘‘ਸੀਤੇ ਸੁਖੋਣ੍ਹਸਬ੍ਬਙ੍ਗੀ, ਗਿਮ੍ਹੇ ਯਾ ਸੁਖਸੀਤਲਾ;
ਭਤ੍ਤੁ ਭਤ੍ਤਾ ਚ ਯਾ ਨਾਰੀ, ਸਾ ਭਵੇ ਵਰਵਣ੍ਣਿਨੀ’’ਤਿ. ਰੁਦ੍ਦੋ;
ਦ੍ਵਯਂ ਅਖਣ੍ਡਿਤਚਰਿਤ੍ਰਾਯਂ. ਪਤਿ ਸਾਮਿਕੋਵ ਕਮਨੀਯੋ ਯਸ੍ਸਾ ਪਤਿਬ੍ਬਤਾ, ਪਤਿਮ੍ਹਿ ਵਤਮਸ੍ਸਾਤਿ ਵਾ ਪਤਿਬ੍ਬਤਾ. ਅਸ ਭੁਵਿ, ਅਨ੍ਤੋ, ਈ, ਆਦਿਲੋਪੋ. ਸਮੇਤੀਤਿ ਵਾ ਸਤੀ, ਸਮੁ ਉਪਸਮੇ, ਅਨ੍ਤੋ, ਈ.
ਦ੍ਵਯਂ ਕਾਮਰਤ੍ਤਰਾਜਪੁਤ੍ਤਾਦਿਨੋ ਕੁਲਸ੍ਸ ਨਿਯਤਪਤਿਯਂ. ਕੁਲਾਨੁਰੂਪਾ ਇਤ੍ਥੀ ਕੁਲਿਤ੍ਥੀ, ਕੁਲਂ ਪਾਲੇਤਿ ਰਕ੍ਖਤੀਤਿ ਕੁਲਪਾਲਿਕਾ, ਣ੍ਵੁ.
੨੩੫. ਦ੍ਵਯਂ ਮਤਭਤ੍ਤਿਕਾਯਂ. ਵਿਗਤੋ ਧਵੋ ਭਤ੍ਤਾ ਯਸ੍ਸਾ ਵਿਧਵਾ. ਪਤਿ ਸੁਞ੍ਞੋ ਨਟ੍ਠੋ ਯਸ੍ਸਾਤਿ ਪਤਿਸੁਞ੍ਞਾ.
ਦ੍ਵਯਂ ਅਤ੍ਤਿਚ੍ਛਾਯ ਪਤ੍ਯਨ੍ਵੇਸਿਨਿਯਂ ਕਞ੍ਞਾਯਂ. ਪਤਿਂ ਵਰਤਿ ਗਵੇਸਤੀਤਿ ਪਤਿਮ੍ਬਰਾ, ਦੁਤਿਯਾਯਾਲੋਪੋ. ਸਯਮੇਵ ਪਤਿਂ ਵਰਤੀਤਿ ਸਯਮ੍ਬਰਾ, ਪਠਮਾਯਾਲੋਪੋ, ਵਰ ਪਤ੍ਥਨਾਯਂ.
ਚਤੁਕ੍ਕਂ ਵਿਜਾਤਾਯਂ. ਵਿਜਨੀ ਗਬ੍ਭਵਿਮੋਕ੍ਖਨੇ, ਤੋ, ਵਿਜਾਯਿਤ੍ਥਾਤਿ ਵਿਜਾਤਾ. ਸੂ ਅਭਿਸਵੇ, ਤੋ. ਜਾਤਂ ਅਪਚ੍ਚਂ ਪੁਤ੍ਤੋ ਏਤਿਸ੍ਸਾਤਿ ਜਾਤਾਪਚ੍ਚਾ. ਪਸੂਤਾਵ ਪਸੂਤਿਕਾ, ਕਪਚ੍ਚਯੋ, ਇਤ੍ਤਞ੍ਚ.
੨੩੬. ਦ੍ਵਯਂ ਦੂਤਿਯਂ. ਯਾ ਪੇਸੀਯਤੇ, ਸਾ ਦੂਤੀ, ਦੁ ਗਮਨੇ,ਤਿ, ਈਮ੍ਹਿ ਦੂਤੀ. ਸਞ੍ਚਾਰਯਤਿ ਯਥਾਭਿਮਤਨ੍ਤਿ, ਣ੍ਵੁ.
ਤਿਕਂ ਦਾਸਿਯਂ. ਦੁ ਕੁਚ੍ਛਿਤਂ ਅਸਤਿ ਭਕ੍ਖਤੀਤਿ ਦਾਸੀ, ਈ, ਦੀਯਨ੍ਤੇ ਤਾਯਾਤਿ ਵਾ ਦਾਸੀ, ਦਾ ਦਾਨੇ, ਸੋ, ਈ ਚ. ਚਿਟ ਪੇਸਨੇ, ਕਮ੍ਮਨਿ ਣੋ, ਈ. ਕੁਟਂ ਉਦਕਕੁਮ੍ਭਂ ਧਾਰੇਤੀਤਿ ਕੁਟਧਾਰਿਕਾ, ਣ੍ਵੁ.
ਦ੍ਵਯਂ ਸੁਭਾਸੁਭਨਿਰੂਪਿਨਿਯਂ ਸਂਵਰਿਕਾਦਿਮ੍ਹਿ. ਵਰ ਗਤਿਯਂ, ਕਤ੍ਤਰਿ ਇਨੀ. ਸੁਭਾਸੁਭਸ੍ਸ ਇਕ੍ਖਣਂ ਨਿਰੂਪਨਂ ਯਸ੍ਸਾਤ੍ਥੀਤਿ, ਇ, ਸਕਤ੍ਥੇ ਕੋ. ਇਮੇ ਦ੍ਵੇ ਸਦ੍ਦਾ ਤੁਲ੍ਯਤ੍ਥਾ.
ਯਾ ਸਯਂ ਖਤ੍ਤਿਯਜਾਤਿ ਯਸ੍ਸ ਕਸ੍ਸਚਿ ਭਰਿਯਾ, ਸਾ ਖਤ੍ਤਿਯਾਨੀ, ਖਤ੍ਤਿਯਾ ਚ. ਖਤ੍ਤਿਯਸ੍ਸਾਪਚ੍ਚਂ ਖਤ੍ਤਿਯਾਨੀ, ਆਨੋ, ਈ. ਣਮ੍ਹਿ ਖਤ੍ਤਿਯਾ.
੨੩੭. ਪਜ੍ਜਂ ਅਗ੍ਗਿਸਕ੍ਖਿਪੁਬ੍ਬਕਤਪਾਣਿਗਹਿਤਾਯਂ ਭਰਿਯਾਯਂ, ਅਞ੍ਞਤ੍ਰ ਤੂਪਚਾਰਾ. ਦਾਰਯਨ੍ਤੇ ਯੇਨਾਤਿ ਦਾਰੋ, ਦਰ ਵਿਦਾਰਣੇ, ਅਕਤ੍ਤਰਿ ਚ ਕਾਰਕੇ ਸਞ੍ਞਾਯਂ ਣੋ. ਜਾਯਤਿ ਪੁਤ੍ਤੋ ਯਾਯਾਤਿ ਜਾਯਾ, ਜਨ ਜਨਨੇ, ਯੋ, ਜਨਿਸ੍ਸ ਜਾ ਚ, ਆ, ਜਯਤੀਤਿ ਵਾ ਜਾਯਾ, ਜਿ ਜਯੇ, ਯੋ, ਜਿਸ੍ਸ ਜਾ, ਆ, ਜਾਯਾ. ਕਲ ਸਙ੍ਖ੍ਯਾਨੇ, ਅਤ੍ਤੋ. ਘਰਂ ਨੇਤੀਤਿ ਘਰਣੀ, ਣਤ੍ਤਂ. ਭਰਿਤਬ੍ਬਤੋ ਭਰਿਯਾ, ਭਰ ਭਰਣੇ, ਯੋ. ਪਿਯਾਯਿਤਬ੍ਬਤੋ ਪਿਯਾ,ਪੀ ਤਪ੍ਪਨਕਨ੍ਤੀਸੁ, ਯੋ. ਪਜਂ ਪੁਤ੍ਤਂ ਪਾਲੇਤੀਤਿ ਪਜਾਪਤਿ, ਪਾ ਪਾਲਨੇ,ਤਿ, ਆਤ੍ਤਂ, ਰਸ੍ਸਤ੍ਤਞ੍ਚ. ਦ੍ਵਿਨ੍ਨਂ ਪੂਰਣੀ ਦੁਤਿਯਾ. ਪਠਮੋ ਭਤ੍ਤਾ, ਭਰਿਯਾ ਦੁਤਿਯਾ. ਸਾਮਿਕਸ੍ਸ ਪਾਦੇ ਪਰਿਚਰਤੀਤਿ ਪਾਦਪਰਿਚਾਰਿਕਾ, ਣ੍ਵੁ. ਪਤਿਨੀ, ਪਾਣਿਗਹਿਤਾ, ਸਹਧਮ੍ਮਿਨੀਤਿਪਿ ਤਸ੍ਸਾਯੇਵ ਨਾਮਾਨਿ.
੨੩੮. ਤਿਕਂ ਸਖਿਯਂ. ਤੇਸੁ ਤੇਸੁ ਕਿਚ੍ਚੇਸੁ ਸਹ ਖਾਯਤਿ ਪਕਾਸਤੀਤਿ ਸਖੀ, ਸਹਪੁਬ੍ਬੋ ਖਾ ਪਕਾਸਨਕਥਨੇਸੁ, ਈ. ਅਲ ਭੂਸਨੇ ਆਪੁਬ੍ਬੋ, ਇ. ਵਯਸਾ ਤੁਲ੍ਯਾ ਵਯਸਾ, ਤੁਲ੍ਯੇ ਸਞ੍ਞਾਯਂ ਸੋ [ਪਾਣਿਨਿ ੪.੪.੯੧ ਸੁਤ੍ਤੇ ਯਪਚ੍ਚਯੋ ਦਿਸ੍ਸਤਿ].
ਜਰੋਵੁਚ੍ਚਤਿ ਚੋਰਸ੍ਸਾਮਿਕੋ, ਤਸ੍ਸਾਯਂ ਜਾਰੀ, ਣੋ, ਈ. ਸਾਮਿਕਂ ਅਤਿਕ੍ਕਮ੍ਮ ਅਞ੍ਞਤ੍ਰ ਚਰਤੀਤਿ, ਇਨੀ.
੨੩੯. ਪੁਮੇ ਤੂਤਿ ਲਿਙ੍ਗਨ੍ਤੋ ਤੁਸਦ੍ਦੋ ਨ ਪੁਬ੍ਬਂ ਭਜਤੇ. ਅਰ ਗਮਨੇ, ਤੁ, ਅਰਸ੍ਸੁਤ੍ਤਂ. ਰਤਿਯਾ ਜਾਯਤੀਤਿ ਰਜੋ, ਤਿਲੋਪੋ. ਪੁਪ੍ਫ ਵਿਕਸਨੇ, ਪੁਪ੍ਫਂ.
ਤਿਕਂ ਰਜਸ੍ਸਲਾਯਂ. ਉਤੁਯੋਗਾਉਤੁਨੀ, ਇਨੀ. ਰਜਯੋਗਾ ਰਜਸ੍ਸਲਾ, ਸਲੋ. ਪੁਪ੍ਫਵਨ੍ਤਤਾਯ ਪੁਪ੍ਫਵਤੀ. ਥੀਧਮ੍ਮਿਨੀ, ਅਵੀ, ਅਤ੍ਤੇਯੀ, ਮਲਿਨੀ, ਉਤੁਮਤੀ, ਉਦਕੀਇਚ੍ਚਾਦੀਨਿਪਿ ਤਸ੍ਸਾ ਨਾਮਾਨਿ.
ਤਿਕਂ ਗਬ੍ਭਿਨਿਯਂ. ਗਰੁ ਅਲਹੁਕੋ ਗਬ੍ਭੋ ਕੁਚ੍ਛਿ ਏਤਿਸ੍ਸਾਤਿ ਗਰੁਗਬ੍ਭਾ. ਆਪਨ੍ਨੋ ਪਤ੍ਤੋ ਗਬ੍ਭਟ੍ਠੋ ਸਤ੍ਤੋ ਏਤਾਯਾਤਿ ਆਪਨ੍ਨਸਤ੍ਤਾ. ਗਬ੍ਭਯੋਗਾ ਗਬ੍ਭਿਨੀ.
ਤਿਕਂ ਯੇਨ ਵੇਠਿਤੋ ਗਬ੍ਭੋ ਕੁਚ੍ਛਿਯਂ ਤਿਟ੍ਠਤਿ, ਤਤ੍ਰਾਸਯੇਤਿ ਖ੍ਯਾਤੇ. ਗਬ੍ਭੋ ਆਸਯਤੇ ਤਿਟ੍ਠਤ੍ਯਤ੍ਰਾਤਿ, ਣੋ. ਜਰਂ ਏਤੀਤਿ ਜਲਾਬੁ. ਉ, ਰਸ੍ਸ ਲੋ, ਯਸ੍ਸ ਬੋ, ਜਰਾਪੁਬ੍ਬੋ ਇ ਗਤਿਯਂ. ਕਲਂ ਜਰਤਂ ਲਾਤੀਤਿ ਕਲਲੋ, ਕਲ ਸਙ੍ਖ੍ਯਾਨੇ ਵਾ, ਅਲੋ.
੨੪੦-੨੪੧. ਸਤ੍ਤਕਂ ਭਤ੍ਤਰਿ. ਧੂ ਕਮ੍ਪਨੇ, ਸਨ੍ਤਾਸਂ ਧੁਨੋਤੀਤਿ ਧਵੋ, ਅ. ਸਂ ਏਤਸ੍ਸਤ੍ਥੀਤਿ ਸਾਮਿਕੋ, ਆਮਿਪਚ੍ਚਯੋ, ਸਕਤ੍ਥੇ ਕੋ, ਇਪਚ੍ਚਯੋ ਵਾ, ਨਿਗ੍ਗਹੀਤਸ੍ਸ ਮੋ, ਅਸ੍ਸ ਚ ਦੀਘੋ, ਸਾਮਿਕੋ. ਭਰ ਭਰਣੇ, ਭਰਤੀਤਿ ਭਤ੍ਤਾ, ਰਿਤੁ. ਕਮੁ ਇਚ੍ਛਾਯਂ, ਤੋ, ‘‘ਪਕ੍ਕਮਾਦੀਹਿ ਨ੍ਤੋ ਚਾ’’ਤਿ ਨ੍ਤਤ੍ਤਂ. ਪਾ ਰਕ੍ਖਣੇ, ਅਤਿ, ਪਤਿ. ਵਰ ਇਚ੍ਛਾਯਂ, ਅ, ਵਰੋ. ਪੀ ਤਪ੍ਪਨਕਨ੍ਤੀਸੁ, ਯੋ.
ਰਤਿਕਾਰਣਤ੍ਤਾ ਪਤਿਨੋ ਉਪ ਉਪਪਤਿ, ਸਮਾਸੇ ਕਤੇ ਅਭਿਧਾਨਤੋ ਪੁਬ੍ਬਨਿਪਾਤੋ, ਅਪ੍ਪਧਾਨਭੂਤੋ ਵਾ ਪਤਿ ਉਪਪਤਿ. ਜਰ ਵਯੋਹਾਨਿਮ੍ਹਿ, ਜੀਯਨ੍ਤੇ ਅਨੇਨਾਤਿ ਜਾਰੋ, ਦਾਰੋ ਚ.
ਸਤ੍ਤਕਂ ਪੁਤ੍ਤੇ. ਨਰਕੇ ਨ ਪਤਨ੍ਤ੍ਯਨੇਨ ਜਾਤੇਨਾਤਿ ਅਪਚ੍ਚਂ, ਪਤ ਗਤਿਯਂ, ਯੋ, ਤ੍ਯਸ੍ਸ ਚੋ, ਨ ਪਤਤਿ ਨ ਵਿਚ੍ਛਿਨ੍ਦਤਿ ਵਂਸੋ ਏਤੇਨਾਤਿ ਵਾ ਅਪਚ੍ਚਂ, ਪੁਤ੍ਤੇ, ਧੀਤਰਿ ਚ ਨਿਚ੍ਚਨਪੁਂਸਕੋਯਂ. ਪੂ ਪਵਨੇ. ਪੁਨਾਤਿ ਪਿਤਰੋ ਤੇਨਾਤਿ ਪੁਤ੍ਤੋ. ‘‘ਛਦਾਦੀਹਿ ਤਤ੍ਰਣ’’ਤਿ ਤੋ. ਪੂਰੇਤੀਤਿ ਵਾ ਪੁਤ੍ਤੋ. ਅਤ੍ਤਤੋ ਜਾਤੋ ਅਤ੍ਰਜੋ, ‘‘ਅਤ੍ਤਜੋ’’ਤਿਪਿ ਪਾਠੋ. ਸੁਯਤੇਤਿ ਸੁਤੋ. ਸੁ ਅਭਿਸਵੇ, ਸੁਣਾਤੀਤਿ ਵਾ ਸੁਤੋ, ਤੋ, ਸੁ ਸਵਨੇ. ਤਨੁਮ੍ਹਾ ਜਾਤੋ ਤਨੁਜੋ, ਤਨਯੋ ਚ, ਯੋ, ਤਨੋਤਿ ਮੁਦਨ੍ਤਿ ਵਾ ਤਨਯੋ, ਅਯੋ. ਸੂਯਤੇਤਿ ਸੂਨੁ, ਕਮ੍ਮਨਿ ਨੁ, ਸੂ ਪਸਵੇ.
ਪੁਤ੍ਤਾਦਯੋ ਸੂਨੁਪਰਿਯਨ੍ਤਾ ਧੀਤਰਿ ਵਤ੍ਤਮਾਨਾ ਇਤ੍ਥਿਯਂ ਵਤ੍ਤਨ੍ਤਿ. ਦੁਹਿਤਾ, ਧੀਤਾ ਚ ਸਦਾ ਨਾਰਿਯਮੇਵ. ਦੁਹ ਪਪੂਰਣੇ, ਰਾਤੁ, ਓਤ੍ਤਾਭਾਵੋ, ਇਕਾਰਾਗਮੋ ਚ. ਧਾ ਧਾਰਣੇ, ਰਾਤੁ, ਆਸ੍ਸੀ. ਪੁਤ੍ਤਾਦਯੋ ਚ ਤੇ ਸਾਮਞ੍ਞੇਨੇਵ ਕੁਣ੍ਡਗੋਲਕਾਦੀਨਂ ਵਾਚਕਾ. ਸਵਣ੍ਣਾਯਂ ਤੁ ਊਢਾਯਂ ਸਜਾਤੋ ਸਯਂ ਜਨਿਤੋ ਸੁਤੋ ਓਰਸੋ ਨਾਮ. ਸਜਾਤਸਦ੍ਦੇਨ ਕੁਣ੍ਡਕਗੋਲਕਖਤ੍ਤਾਦਿਬ੍ਯਵਚ੍ਛੇਦੋ. ਜੀਵਤਿ ਭਤ੍ਤਰਿ ਜਾਰਜੋ ਸੁਤੋ ਕੁਣ੍ਡਾਖ੍ਯੋ. ਮਤੇ ਭਤ੍ਤਰਿ ਜਾਰਜੋ ਗੋਲਕਾਖ੍ਯੋ. ਅਰਿਯਾਸੁਦ੍ਦਜੋ ਸੁਤੋ ਖਤ੍ਤਾ ਨਾਮ [ਖਤ੍ਤਾ ਅਰਿਯਾਸੁਦ੍ਦਾਨਂ (ਅਮਰ ੨੦.੩)]. ਆਦਿਨਾ ਮਾਗਧਾਦੀਨਂ ਗਹਣਂ. ਵੁਤ੍ਤਞ੍ਹਿ –
‘‘ਅਮਤੇ ਜਾਰਜੋ ਕੁਣ੍ਡੋ,
ਮਤੇ ਭਤ੍ਤਰਿ ਗੋਲਕੋ’’ਤਿ [ਅਮਰ ੧੬.੩੬].
‘‘ਮਾਗਧੋ ਸੁਦ੍ਦਖਤ੍ਤਾਜੋ’’ਤਿ [ਅਭਿਧਾਨੁ ੫੦੩ ਗਾਥਾ] ਚ.
ਉਰਸਾ ਮਨਸਾ ਨਿਮ੍ਮਿਤੋ, ਉਰਸਦ੍ਦਾ ਤਤਿਯਨ੍ਤਾ ਨਿਮ੍ਮਿਤਤ੍ਥੇ ਣੋ, ਨਿਵਿਟ੍ਠਤ੍ਤਾ ਤੇਨ ਨਿਮ੍ਮਿਤੋਤਿ ਵੁਚ੍ਚਤਿ. ਉਰਸਿ ਭਵੋਤਿ ਵਾ ਓਰਸੋ.
੨੪੨. ਚਤੁਕ੍ਕਂਪਤਿਪਤਿਨੀਨਂ ਯੁਗੇ, ‘‘ਦਾਰਾ ਪੁਮੇ ਬਹੁਤ੍ਤੇ ਚ, ਦਂ ਕਲਤ੍ਰੇ ਨਪੁਂਸਕੇ’’ਤਿ [ਚਿਨ੍ਤਾਮਣਿਟੀਕਾ ੧੬.੩੮] ਅਮਰਮਾਲਾ, ਜਂਸਦ੍ਦੋ ਤ੍ਵਬ੍ਯਯੋ ਦਾਰਵਚਨੋ. ਤਸ੍ਮਾ ‘‘ਜਮ੍ਪਤਿ, ਦਮ੍ਪਤੀ’’ਤਿਪਿ ਭਵਿਤਬ੍ਬਂ, ਇਧ ਪਨ ਕਚ੍ਚਾਯਨਮਤੇਨੋਦਾਹਟਾ. ਜਾਯਾ ਚ ਪਤਿ ਚ ਜਾਯਾਪਤਿ. ਇਤਰੀਤਰਯੋਗਦ੍ਵਨ੍ਦੋ. ਜਾਯਾ ਚ ਪਤਿ ਚ ਜਾਨਿਪਤਿ, ਤਥਾ ਜਾਯਮ੍ਪਤਿਆਦਯੋ, ਜਾਯਾਸਦ੍ਦਸ੍ਸ ਪਤਿਮ੍ਹਿ ਪਰੇ ਜਾਨਿ, ਤੁਦਞ੍ਚ, ਜਾਯਞ੍ਚ ਯਦਾਦਿਨਾ.
ਤਿਕਂ ਨਪੁਂਸਕੇ. ਵਿਗਤੋ ਰਾਗਸ੍ਸਵੋ ਯਸ੍ਮਾ ਵਸ੍ਸਵਰੋ. ਸੁ ਸਵਨੇ, ਅਰੋ. ਪਣ ਬ੍ਯਵਹਾਰੇ, ਡੋ, ਪਡਿ ਲਿਙ੍ਗਵੇਕਲ੍ਯੇ ਵਾ, ਭੂਵਾਦਿ. ਨ ਇਤ੍ਥੀ ਨ ਪੁਮਾ ਨਪੁਂਸਕਂ, ਨਿਰੁਤ੍ਤਿਨਯੇਨ ਇਤ੍ਥਿਪੁਮਾਨਂ ਪੁਂਸਕਭਾਵੋ, ਨਸ੍ਸ ਚ ਪਕਤਿ. ਤਤਿਯਾਪਕਤਿ, ਸਣ੍ਡੋ, ਕਲੀਬਨ੍ਤਿਪਿ ਤਸ੍ਸ ਨਾਮਾਨਿ. ਤਤਿਯਾ ਪਕਤਿ ਤਤਿਯਪ੍ਪਕਾਰੋ, ਸਮਜਾਤਿਕੇ ਇਤ੍ਥਿਪੁਰਿਸੇ ਅਪੇਕ੍ਖਿਤ੍ਵਾ ਤਤਿਯਤ੍ਤਂ ਪਕਾਰਸ੍ਸ. ਪਠਮਾ ਹਿ ਪਕਤਿ ਇਤ੍ਥੀ, ਦੁਤਿਯਾ ਪਕਤਿ ਪੁਰਿਸੋ, ਇਤਰਪਕਤਿ ਤਤਿਯਾ ਪਕਤਿ.
੨੪੩. ਛਕ੍ਕਂ ਞਾਤਿਮਤ੍ਤੇ, ਬਨ੍ਧੁਯੇਵ ਬਨ੍ਧਵੋ, ਅ, ਉਸ੍ਸਾਵੋ. ਬਨ੍ਧਤੀਤਿ ਬਨ੍ਧੁ, ਉ. ਸਸ੍ਸ ਅਤ੍ਤਨੋ ਜਨੋ ਸਜਨੋ. ਸਮਾਨਂ ਗੋਤ੍ਤਂ ਕੁਲਂ ਅਸ੍ਸਾਤਿ ਸਗੋਤ੍ਤੋ, ਸਮਾਨਸ੍ਸ ਸਭਾਵੋ. ਞਾ ਅਵਬੋਧਨੇ, ਕਮ੍ਮੇਤਿ, ਞਾਤਿਯੇਵ ਞਾਤਕੋ, ਅਤ੍ਤਂ, ਸਕਤ੍ਥੇ ਕੋ ਚ. ਸੁਸਦ੍ਦੋਪ੍ਯਤ੍ਰ [ਸ੍ਵ (ਅਮਰ ੧੬.੩੬)].
ਦ੍ਵਯਂ ਸਤ੍ਤਪੁਰਿਸਾਵਧਿਕੇਸੁ ਨਿਕਟਞਾਤੀਸੁ. ਲੋਹਿਤੇਨ ਸਮ੍ਬਨ੍ਧੋ ਸਾਲੋਹਿਤੋ, ਸਮ੍ਬਨ੍ਧਸ੍ਸ ਸਾਦੇਸੋ, ਪੁਬ੍ਬਨਿਪਾਤੋ ਚ, ਸਮਾਨਂ ਪਿਣ੍ਡਦਾਨਂ ਯਸ੍ਸ ਸਪਿਣ੍ਡੋ, ਸਨਾਭਯੋਪ੍ਯਤ੍ਰ [ਨਾਭਿ ਸਤ੍ਤਪੁਰਿਸਾਵਧਿਕਕੁਲੇ (ਚਿਨ੍ਤਾਮਣਿਟੀਕਾ ੧੬.੩੩)]. ਤਿਕਂ ਪਿਤਰਿ. ਤਾ ਪਾਲਨੇ, ਤੋ ਕਤ੍ਤਰਿ. ਜਨਯਤੀਤਿ ਜਨਕੋ, ਣ੍ਵੁ. ਪਾ ਰਕ੍ਖਣੇ, ਰਿਤੁ, ਅਸ੍ਸਿਤ੍ਤਂ.
੨੪੪. ਛਕ੍ਕਂ ਮਾਤਰਿ. ਅਮ ਪੂਜਾਯਂ, ਕਮ੍ਮਨਿ ਮੋ, ਬੋ ਚ, ਅਮ੍ਮਾ, ਅਮ੍ਬਾ. ਜਨਯਤੀਤਿ ਜਨਨੀ, ਯੁ, ਨਦਾਦਿ. ਮਾਨ ਪੂਜਾਯਂ, ਪੁਤ੍ਤਂ ਮਾਨੇਤੀਤਿ ਮਾਤਾ, ਰਾਤੁ, ਪਾਤੀਤਿ ਵਾ ਮਾਤਾ, ਪਾਤਿਸ੍ਸ ਮੋ. ਜਨੇਤੀਤਿ ਜਨੇਤ੍ਤਿ,ਤਿ. ਜਨੇਤੀਤਿ ਜਨਿਕਾ, ਣ੍ਵੁ, ਇਤ੍ਤਂ.
ਅਪ੍ਪਧਾਨਭੂਤਾ ਮਾਤਾ ਉਪਮਾਤਾ, ਕੁਮਾਰੇ ਧਾਰੇਤੀਤਿ ਧਾਤਿ. ਧਾ ਧਾਰਣੇ,ਤਿ. ਜਾਯਾਯ ਭਰਿਯਾਯ ਭਾਤਿਕੋ ਕਨਿਟ੍ਠੋ ਚ ਜੇਟ੍ਠੋ ਚ ਸਾਲੋ ਨਾਮ, ਸਸ੍ਸ ਅਤ੍ਤਨੋ ਏਸਾ ਸਾ, ਭਰਿਯਾ, ਤਸ੍ਸਾ ਭਾਤਾ ਸਾਲੋ, ਜਾਯਾਯ ਭਾਤਰਿ ਅਲੋ. ਸਰ ਗਤਿਚਿਨ੍ਤਾਹਿਂਸਾਸੁ ਵਾ, ਣੋ, ਲਤ੍ਤਂ, ਸਾਲ ਵਿਤਕ੍ਕੇ ਵਾ, ਚੁਰਾਦਿ.
੨੪੫. ਸਾਮਿਨੋ ਭਤ੍ਤੁ ਭਗਿਨੀ ਨਨਨ੍ਦਾ ਨਾਮ, ਨ ਨਨ੍ਦਤੀਤਿ ਨਨਨ੍ਦਾ, ਅਤ੍ਤਾਭਾਵੋ ਨਸ੍ਸ ਵਿਭਾਸਾਧਿਕਾਰਾ. ਨਨ੍ਦ ਸਮਿਦ੍ਧਿਯਂ, ਭੂਵਾਦਿ.
ਦ੍ਵਯਂ ਅਯ੍ਯਿਕਾਯਂ. ਮਾਤੁਯਾ ਮਾਤਾ ਮਾਤਾਮਹੀ. ਪਿਤੂਨਂ ਪਿਤਰਿ ਚ ਮਾਤਰਿ ਚ ਆਮਹਂ ਯਦਾਦਿਨਾ, ਨਦਾਦਿ. ਅਰਹ ਪੂਜਾਯਂ, ਣ੍ਵੁ, ਰਹਸ੍ਸ ਯੋ, ਅਯ ਗਤਿਮ੍ਹਿ ਵਾ, ਣ੍ਵੁ, ਅਯ੍ਯਿਕਾ.