੭. ਪਾਤਾਲਵਗ੍ਗਵਣ੍ਣਨਾ
੬੪੯-੬੫੦. ਚਤੁਕ੍ਕਂ ਪਾਤਾਲੇ. ਅਧਰਂ ਭੁਵਨਂ ਅਧੋਭੁਵਨਂ. ਪਤਨ੍ਤਿ ਅਸ੍ਮਿਂ ਪਾਤਾਲਂ, ਅਲੋ, ਮਜ੍ਝੇ ਦੀਘੋ. ਨਾਗਾਨਂ ਲੋਕੋ. ਰਸਾਯ ਤਲਂ ਰਸਾਤਲਂ.
ਸੋਬ੍ਭਨ੍ਤਂ ਛਿਦ੍ਦਮਤ੍ਤੇ. ਰਣ ਸਦ੍ਦੇ, ਧੋ, ਨਤ੍ਤਂ, ਯਦਾਦਿ. ਵਰ ਦਿਤ੍ਤਿਯਂ. ਵਿਗਤੋ ਵਰੋ ਵਾਰਣਂ ਅਸ੍ਸ ਵਿਵਰਂ, ਛਿਦਿ ਦ੍ਵਿਧਾਕਰਣੇ, ਦੋ. ਕੁਹ ਵਿਮ੍ਹਯਨੇ, ਅਰੋ. ਸੁਸ ਸੋਸਨੇ, ਇਰੋ. ਬਿਲ ਭੇਦਨੇ, ਅ. ਸੁਸਤੋ ਇ, ਸੁਸਿ. ਛਿਨ੍ਦਿਤ੍ਵਾ ਗਚ੍ਛਤੀਤਿ ਛਿਗ੍ਗਲਂ, ਯਦਾਦਿ. ਸੁਟ੍ਠੁ ਅਬ੍ਭਂ ਆਕਾਸਂ ਅਸ੍ਮਿਂ ਸੋਬ੍ਭਂ.
‘‘ਸੁਸਿਰ’’ਨ੍ਤਿ ਛਿਦ੍ਦਸਾਮਞ੍ਞੇ ਯਂ ਨਪੁਂਸਕਵਚਨਂ, ਤਂ ਸਚ੍ਛਿਦ੍ਦੇ ਛਿਦ੍ਦਵਤਿ ਦਬ੍ਬੇ ਤੀਸੁ, ਯਥਾ ‘‘ਸੁਸਿਰੋ ਰੁਕ੍ਖੋ, ਸੁਸਿਰਾ ਚਿਞ੍ਚਾ, ਸੁਸਿਰਂ ਕਟ੍ਠ’’ਨ੍ਤਿ.
ਦ੍ਵਯਂ ਭੂਮਿਛਿਦ੍ਦੇ. ਕਾਸ ਦਿਤ੍ਤਿਯਂ, ਉ. ਅਵ ਰਕ੍ਖਣੇ, ਅਟੋ, ਆਵਾਟੋ, ਅਵਾਟੋਪਿ. ਦ੍ਵਯਂ ਸਪ੍ਪਾਨਂ ਰਾਜਿਨਿ. ਵਸੁ ਰਤਨਂ ਯਸ੍ਸਤ੍ਥੀਤਿ ਵਾਸੁਕੀ.
੬੫੧. ਦ੍ਵਯਂ ਨਾਗਾਨਂ ਰਾਜਿਨਿ. ਦੇਵੇਹਿਪ੍ਯਸ੍ਸਨ੍ਤੋ ਨੋਪਲਦ੍ਧੋਤਿ ਅਨਨ੍ਤੋ, ਸੇਸੋਪਿ, ਸਿਸ ਹਿਂਸਾਯਂ, ਸਿਸਤਿ ਕਪ੍ਪਨ੍ਤੇਤਿ ਸੇਸੋ, ਅ.
ਦ੍ਵਯਂ ਅਜਗਰੇ. ਵਹਤਿਸ੍ਮਾ ਅਸੋ, ਵਾਹਸੋ. ਅਜਂ ਛਾਗਂ ਗਿਲਤੀਤਿ ਅਜਗਰੋ, ਅ, ਇਸ੍ਸਤ੍ਤਂ, ਲਸ੍ਸ ਰਤ੍ਤਞ੍ਚ. ਸਯੀਪਿ, ਸਯਨਸੀਲੋ ਸਯੀ.
ਦ੍ਵਯਂ ਗੋਨਸਸਪ੍ਪੇ ‘‘ਙਾ-ਚ੍ਵੇ’’ਇਤਿ ਖ੍ਯਾਤੇ. ਗਵਸ੍ਸੇਵ ਨਾਸਾ ਅਸ੍ਸਾਤਿ ਗੋਨਸੋ, ਸਞ੍ਞਾਯਂ ਨਾਸਸਦ੍ਦਸ੍ਸ ਨਸੋ ਕਤੋ [ਪਾਣਿਨਿ ੫.੪.੧੧੯]. ਤਿਲਂ ਇਚ੍ਛਤੀਤਿ ਤਿਲਿਚ੍ਛੋ, ਤਿਰਿਯਂ ਅਞ੍ਚਤੀਤਿ ਵਾ ਤਿਲਿਚ੍ਛੋ, ਯਦਾਦਿ.
ਦ੍ਵਯਂ ਦੇਡ੍ਡੁਭੇ, ਯੋ ‘‘ਜਲਸਪ੍ਪੋ’’ਤਿ ਵੁਚ੍ਚਤਿ. ਦੇਡ੍ਡੁਨਾ ਰਾਜਿਯਾ ਉਭਤੀਤਿ ਦੇਡ੍ਡੁਭੋ. ਪਿਟ੍ਠੇ ਰਾਜਿਯੋਗਾ ਰਾਜੁਲੋ, ਉਲੋ, ਬਧਿਰਸਪ੍ਪੇਪ੍ਯੇਤੇ.
੬੫੨. ਕਮ੍ਬਲੋ ਚ ਅਸ੍ਸਤਰੋ ਚਾਤਿ ਇਮੇ ਦ੍ਵੇ ਨਾਗਕੁਲਾ ਮੇਰੁਪਾਦੇ ਵਸਨ੍ਤਿ.
ਦ੍ਵਯਂ ਵੇਸ੍ਮਨਿਵੁਟ੍ਠਸਪ੍ਪੇ. ‘‘ਵਮ੍ਮਨੀ’’ਤਿਪਿ ਪਾਠੋ. ‘‘ਅਸੁਦ੍ਦੋ ਘਰਸਪ੍ਪੋ’’ਤਿ ਵੁਤ੍ਤਤ੍ਤਾ ਨਿਬ੍ਬਿਸਤਾਯ ਅਮਾਰਿਤਤ੍ਤਾ ਸੀਲਯੁਤ੍ਤਂ ਅਤ੍ਤਾ ਮਨੋ ਯਸ੍ਮਿਂ ਸਿਲੁਤ੍ਤੋ, ਅਸ੍ਸੁ, ਰਸ੍ਸਾਦਿ.
ਦ੍ਵਯਂ ਰੁਕ੍ਖਗ੍ਗਾਦੀਸੁ ਨਿਵੁਟ੍ਠਸਪ੍ਪੇ. ਨੀਲੋ ਹਰਿਤੋ ਸਪ੍ਪੋਤਿ ਨੀਲਸਪ੍ਪੋ. ‘‘ਨੀਲੋ ਕਣ੍ਹਮ੍ਹਿ ਹਰਿਤੇ’’ਤਿ ਹਿ ਤਾਰਪਾਲੋ. ਪਠਮਕਾਲੇ ਸਿਲਾਯਂ ਭਵਤੀਤਿ ਸਿਲਾਭੁ.
੬੫੩-੬੫੪. ਵਿਸਧਰਨ੍ਤਂ ਸਪ੍ਪਮਤ੍ਤੇ. ਆਸਿਯਂ ਵਿਸਂ ਏਤਸ੍ਸ ਆਸੀਵਿਸੋ, ਆਸੀ ਸਪ੍ਪਦਾਠਾ. ਭੁਜ ਕੋਟਿਲ੍ਯੇ, ਕੁਟਿਲਾਯਮਾਨੋ ਗਚ੍ਛਤੀਤਿ ਭੁਜਙ੍ਗੋ, ਏਵਂ ਭੁਜਗੋ, ਭੁਜਙ੍ਗਮੋ ਚ. ਅਹਿ ਗਮਨੇ, ਇ. ਸਰਨ੍ਤੋ ਸਪ੍ਪਤਿ ਗਚ੍ਛਤੀਤਿ ਸਰੀਸਪੋ, ਅਸ੍ਸੀ, ਸਂਯੋਗਲੋਪੋ, ਅਲੁਤ੍ਤਸਮਾਸੋਯਂ, ਭੁਜਙ੍ਗਭੁਜਙ੍ਗਮਾਪਿ, ਸਬ੍ਬਧਰਕਤੇ ਪਨ ‘‘ਭੁਸਂ, ਪੁਨਪ੍ਪੁਨਂ ਵਾ ਕੁਟਿਲਂ ਸਪ੍ਪਤੀਤਿ ਸਰੀਸਪੋ’’ਤਿ ਵੁਤ੍ਤਂ. ਫਣਯੋਗਾ, ਈ, ਫਣੀ. ਸਪ੍ਪਤਿਸ੍ਮਾ ਅ, ਭੂਮਿਫੁਟ੍ਠੇਨ ਗਤ੍ਤੇਨ ਗਤਿ ਸਪ੍ਪਨਂ. ਅਰਂ ਸੀਘਂ ਗਚ੍ਛਤੀਤਿ ਅਲਗਦ੍ਦੋ, ਮਸ੍ਸ ਦੋ, ਰਸ੍ਸ ਲਤ੍ਤਞ੍ਚ, ਅਲਗਦ੍ਦੋ, ਜਲਸਪ੍ਪੇਪ੍ਯਯਂ, ‘‘ਅਲਗਦ੍ਦੋ ਜਲਵਾਲ਼ੋ’’ਤਿ [ਅਮਰ ੮.੫] ਹਿ ਅਮਰਸੀਹੋ. ਭੋਗੋ ਫਣਿਕਾਯੋ, ਤਂਯੋਗਾ ਭੋਗੀ. ਪਨ੍ਨਂ ਗਚ੍ਛਤੀਤਿ ਪਨ੍ਨਗੋ, ਪਾਦੇਹਿ ਵਾ ਨ ਗਚ੍ਛਤੀਤਿ ਪਨ੍ਨਗੋ. ਦ੍ਵੇ ਜਿਵ੍ਹਾ ਅਸ੍ਸ. ਉਰਸਾ ਗਚ੍ਛਤੀਤਿ ਉਰਗੋ. ਵਿਸੇਸੇਨ ਆਲਾਤਿ ਗਣ੍ਹਾਤਿ ਆਯੁਨ੍ਤਿ ਵਾਲ਼ੋ, ਲਸ੍ਸ ਲ਼ਤ੍ਤਂ, ਵਾ ਗਮਨੇ ਵਾ, ਅਲੋ. ਦੀਘਸਰੀਰਤਾਯ ਦੀਘੋ. ਦੀਘਾ ਪਿਟ੍ਠਿ ਯਸ੍ਸ, ਸਮਾਸੇ ਕੋ. ਉਦਰਮੇਵ ਪਾਦੋ ਯਸ੍ਸ. ਵਿਸਂ ਧਰਤਿ. ਚਕ੍ਕੀ, ਕੁਣ੍ਡਲੀ, ਗੂਲ਼੍ਹਪਾਦੋ, ਚਕ੍ਖੁਸ੍ਸਵੋ, ਕਾਕੋਦਰੋ, ਦਬ੍ਬੀਕਰੋ, ਬਿਲੇਸਯੋ, ਜਿਮ੍ਹਗੋ, ਪਵਨਾਸਨੋਪਿ. ਸਿਰਸਿ ਚਕ੍ਕਯੋਗਾ ਚਕ੍ਕੀ. ਕੁਣ੍ਡਲਮਿਵ ਵਪੁ ਅਸ੍ਸਤ੍ਥੀਤਿ ਤਂਯੋਗਾ ਕੁਣ੍ਡਲੀ. ਚਕ੍ਖੁਨਾ ਸੁਣੋਤੀਤਿ ਚਕ੍ਖੁਸ੍ਸਵੋ. ਕਾਕੋਦਰਮਿਵ ਉਦਰਂ ਅਸ੍ਸ. ਦਬ੍ਬਿਗਤਿਕਤ੍ਤਾ ਫਣਾ ਦਬ੍ਬੀ, ਤਂ ਕਰੋਤਿ ਬਨ੍ਧਤੀਤਿ ਦਬ੍ਬੀਕਰੋ. ਸਾਮਞ੍ਞਨਿਦ੍ਦੇਸੇਪਿ ਕਣ੍ਹਸਪ੍ਪਾਦਿਯੇਵ ਦਬ੍ਬੀਕਰੋ. ਜਿਮ੍ਹਂ ਕੁਟਿਲਂ ਗਚ੍ਛਤੀਤਿ. ਪਵਨਾਸਨੋ ਵਾਤਭੋਜੀ.
ਫਣਿਨੋ ਸਪ੍ਪਸ੍ਸ ਤਨੁ ਕਾਯੋ ਭੋਗੋ ਨਾਮ. ਭੁਜਤੀਤਿ ਭੋਗੋ, ਭੁਜ ਕੋਟਿਲ੍ਯੇ, ਣੋ.
੬੫੫-੬੫੬. ਦ੍ਵਯਂ ਸਪ੍ਪਸ੍ਸ ਦਾਠਾਯਂ. ਅਸਤਿ ਯੇਨ ਅਸਂ, ਮੁਖਂ, ਤਸ੍ਮਿਂ ਭਵਾ ਆਸੀ, ਸਪ੍ਪਸ੍ਸ ਦਾਠਾ ਦਨ੍ਤੁਤ੍ਤਮਾ. ਦ੍ਵਯਂ ਸਪ੍ਪਸ੍ਸ ਜਿਣ੍ਣਤਚੇ, ਨਿਮੁਚ੍ਚਤੇ ਯਸ੍ਮਾ ਸਪ੍ਪੋਤਿ, ਣੋ. ਕਞ੍ਚੁਕਸਦਿਸਤ੍ਤਾ ਕਞ੍ਚੁਕੋ. ਸਮਾ ਤੁਲ੍ਯਤ੍ਥਾ.
ਦ੍ਵਯਂ ਵਿਸਮਤ੍ਤੇ. ਸੋਣਿਪਥਗਤਂ ਵਿਸਤਿ ਦੇਹਨ੍ਤਿ ਵਿਸਂ, ਵਿਸ ਪਵੇਸਨੇ. ਗਿਰਤੀਤਿ ਗਰਲ਼ਂ, ਅਲ਼ੋ.
ਹਲਾਹਲੋ, ਕਾਲ਼ਕੂਟੋ, ਆਦਿਨਾ ਕਾਕੋਲਾਦਯੋ ਚ ਸਤ੍ਤਾਤਿ ਇਮੇ ਨਵ ਤਬ੍ਭੇਦਾ ਤਸ੍ਸ ਵਿਸਸ੍ਸ ਭੇਦਾ. ਵੁਤ੍ਤਞ੍ਚ –
‘‘ਪੁਮੇ ਪਣ੍ਡੇ ਚ ਕਾਕੋਲ-ਕਾਲ਼ਕੂਟਹਲਾਹਲਾ;
ਸੋਰਟ੍ਠਿਕੋ ਸੁਕ੍ਕਿਕੇਯ੍ਯੋ, ਬ੍ਰਹ੍ਮਪੁਤ੍ਤੋ ਪਦੀਪਨੋ;
ਦਾਰਦੋ ਵਚ੍ਛਨਾਭੋ ਚ, ਵਿਸਭੇਦਾ ਇਮੇ ਨਵਾ’’ਤਿ [ਅਮਰ ੮.੧੦-੧੧].
ਤਤ੍ਰ ਹਲਾਹਲੋ ਪੁਮੇ, ਵਾਕਾਰੇਨ ਨਪੁਂਸਕੇਪਿ, ‘‘ਹਾਲਾਹਲ’’ਨ੍ਤਿ ਹਿ ਤਿਕਣ੍ਡਸੇਸੇ [ਤਿਕਣ੍ਡਸੇਸ ੧.੮.੫] ਦੀਘਾਦਿਪਿ. ਤਾਲਪਤ੍ਰਸਣ੍ਠਾਨੋ ਨੀਲਪਤ੍ਰੋ ਗੋਥਨਾਕਤਿਫਲੋ ਗਚ੍ਛੋ ਹਲਾਹਲੋ. ਅਸ੍ਸ ਚ ਸਮੀਪੇ ਰੁਕ੍ਖਾਦਯੋ ਡਯ੍ਹਨ੍ਤੇ. ਹਿਮਵਤਿ, ਕਿਕ੍ਕਿਨ੍ਦਾਯਂ, ਕੋਙ੍ਕਣੇਸੁ, ਦਕ੍ਖਿਣਸਮੁਦ੍ਦੇ ਚ ਜਾਯਤੇ, ਹਨਤੀਤਿ ਹਲੋ, ਅ, ਨਸ੍ਸ ਲੋ, ਹਲਾਨਮ੍ਪਿ ਹਲੋ ਹਲਾਹਲੋ, ਮਜ੍ਝਦੀਘੋ. ਤਿਰਿਯਲੇਖਾਯ ਚਿਤਂ ਦ੍ਵਿਜਪਦੇਹਿ ਯੁਤ੍ਤਂ, ਤਥਾ ਗਣ੍ਠਿਭਿ ਬ੍ਯਾਪਿਤਂ ਬਿਨ੍ਦੁਭਿਦੇਵ ਯਂ ਘਨਤਰੇਹਿ, ਤਂ ਕਾਲ਼ਕੂਟਂ. ਇਦਞ੍ਚ ਪੁਥੁਮਾਲਿਨਾਮਸ੍ਸਾਸੁਰਸ੍ਸ ਸੋਣਿਤਮ੍ਹਾ ਏਵ ਅਸੁਰਸਮਯੇ [ਦੇਵਾਸੁਰਰਣੇ (?)] ਸਮੁਪ੍ਪਨ੍ਨਸ੍ਸ ਅਸ੍ਸਤ੍ਥਰੁਕ੍ਖਸਦਿਸਸ੍ਸ ਰੁਕ੍ਖਸ੍ਸ ਨਿਯ੍ਯਾਸੋ, ਅਹਿਚ੍ਛਤ੍ਤਮਲਯਕੋਙ੍ਕਣਸਿਙ੍ਗਵੇਰਪਬ੍ਬਤਾਦੀਸੁ ਚੋਪ੍ਪਜ੍ਜਤੇ. ਵਣ੍ਣੇਨ ਕਾਲ਼ਞ੍ਚ ਤਂ ਸਤ੍ਤਾਨਂ ਜੀਵਿਤਹਰਣਤੋ ਲੋਹਮੁਗ੍ਗਰਸਦਿਸਤਾਯ ਕੂਟਞ੍ਚੇਤਿ ਕਾਲ਼ਕੂਟਂ.
ਬ੍ਰਹ੍ਮਪੁਤ੍ਤੋ ਤੁ ਕਪਿਲੋ, ਮਲਯਦ੍ਦਿਭਵੋ ਖਰੋ;
ਪਦੀਪਨੋ ਤੁ ਦਹਨੋ, ਰਤ੍ਤਵਣ੍ਣੋ’ਞ੍ਜਨਦ੍ਦਿਜੋ [ਚਿਨ੍ਤਾਮਣਿਟੀਕਾ ੮.੧੦-੧੧].
ਦਰਦੇ ਭਵੋ ਦਾਰਦੋ, ਸੁਪ੍ਪਭਨਾਮਕੋ ਤਂਦੇਸਪਸਿਦ੍ਧੋ ਚ. ਵਚ੍ਛਨਾਭੋ ਸਿਨ੍ਦੁਵਾਰਪਤ੍ਤਸਦਿਸੋ ਚ ਤਂਸਮੀਪੇ ਰੁਕ੍ਖੋ ਨ ਵਦ੍ਧਤੇ, ਤਂਸਮ੍ਫਸ੍ਸਵਾਯੁ ਚ ਜਰਯਤਿ, ਵਿਞ੍ਝਾਯਂ, ਕਿਕ੍ਕਿਨ੍ਦਾਯਞ੍ਚ ਜਾਯਤੇ, ਏਵਂ ਵਿਸਨ੍ਤਰਾਨਮ੍ਪਿ ਸਰੂਪਂ ਆਗਮਤੋ ਵਿਞ੍ਞੇਯ੍ਯਂ.
ਦ੍ਵਯਂ ਧਨਤ੍ਥਂ ਸਪ੍ਪਗ੍ਗਾਹੇ. ਵਾਲ਼ਂ ਸਪ੍ਪਂ ਗਣ੍ਹਨਸੀਲਤਾਯ ਵਾਲ਼ਗਾਹੀ. ਅਹਿਨੋ ਤੁਣ੍ਡੇਨ ਮੁਖੇਨ ਦਿਬ੍ਬਤੀਤਿ ਅਹਿਤੁਣ੍ਡਿਕੋ, ਣਿਕੋ, ‘‘ਵਾਲ਼ਗ੍ਗਾਹੋ’ਹਿਤੁਣ੍ਡਿਕੋ’’ਤਿ [ਅਮਰਕੋਸੇ ੮.੧੧-ਗਾਥਾਯਮ੍ਪਿ] ਅਮਰਮਾਲਾ.
੬੫੭. ਤਿਕਂ ਨਿਰਯੇ. ਅਯੋ ਇਟ੍ਠਫਲਂ, ਸੋ ਨਿਗ੍ਗਤੋ ਅਸ੍ਮਾਤਿ ਨਿਰਯੋ, ਨਿਨ੍ਦਿਤੋ ਰਯੋ ਗਮਨਂ ਏਤ੍ਥਾਤਿ ਵਾ ਨਿਰਯੋ. ਦੁਟ੍ਠਾ ਗਤਿ ਦੁਗ੍ਗਤਿ. ਅਪੁਞ੍ਞੇ ਨੇਤੀਤਿ ਨਰਕੋ, ਣ੍ਵੁ, ਰਨ੍ਤੋ ਚ, ਨਰਕੋ.
ਤੇਸੁ ਨਿਰਯੇਸੁ ਯੋ ‘‘ਮਹਾਨਿਰਯੋ’’ਤਿ ਵੁਤ੍ਤੋ, ਸੋ ਅਟ੍ਠਧਾ ਹੋਤੀਤਿ ਤਂ ਦਸ੍ਸੇਤਿ ‘‘ਸਞ੍ਜੀਵੋ’’ਚ੍ਚਾਦਿਨਾ ਸਿਲੋਕੇਨ. ਮਰਨ੍ਤਾਪਿ ਕਮ੍ਮਫਲਾਨੁਭਵਨਤ੍ਥਂ ਪੁਨਪ੍ਪੁਨਂ ਜੀਵਨ੍ਤਿ ਅਸ੍ਮਿਂ ਸਞ੍ਜੀਵੋ. ਯਤ੍ਥ ਨਿਰਯੇ ਨੇਰਯਿਕਾਨਂ ਸਰੀਰਾਨਿ ਵਡ੍ਢਕੀਨਂ ਕਾਲ਼ਸੁਤ੍ਤੇਨ ਸਞ੍ਞਾਣਂ ਕਤ੍ਵਾ ਵਾਸਿਯਾ ਤਚ੍ਛਨ੍ਤਿ, ਸੋ ਕਾਲ਼ਸੁਤ੍ਤੋ. ਭੁਸਂ, ਪੁਨਪ੍ਪੁਨਂ ਵਾ ਦੁਕ੍ਖਿਤਸਦ੍ਦੇਨ ਰਵਨ੍ਤਿ ਅਸ੍ਮਿਂ ਰੋਰੁਵੋ, ਮਹਨ੍ਤੋ ਚ ਸੋ ਰੋਰੁਵੋ ਚਾਤਿ ਮਹਾਰੋਰੁਵੋ. ਪੁਨ ‘‘ਰੋਰੁਵੋ’’ਤਿ ਚੂਲ਼ਰੋਰੁਵੋ ਵੁਤ੍ਤੋ. ਭੁਸਂ ਪਤਨ੍ਤਿ ਅਸ੍ਮਿਂ ਪਤਾਪਨੋ, ‘‘ਵੀਚਿ ਤਰਙ੍ਗੇ ਅਪ੍ਪੇ ਚਾ’’ਤਿ ਰੁਦ੍ਦੋ, ਨਤ੍ਥਿ ਸੁਖਸ੍ਸ ਵੀਚਿ ਲੇਸੋਪਿ ਅਤ੍ਰਾਤਿ ਅਵੀਚਿ, ‘‘ਵੀਚਿ ਸੁਖਤਰਙ੍ਗੇਸੂ’’ਤਿ ਤਿਕਣ੍ਡਸੇਸੋ [ਤਿਕਣ੍ਡਸੇਸ ੩.੩.੭੮], ਤਸ੍ਮਾ ਨਤ੍ਥਿ ਵੀਚਿ ਸੁਖਂ ਏਤ੍ਥਾਤਿ ਅਵੀਚਿ. ਸਮਨ੍ਤਤੋ ਆਗਤੇਹਿ ਪਬ੍ਬਤੇਹਿ ਹਞ੍ਞਨ੍ਤਿ ਅਤ੍ਰਾਤਿ ਸਙ੍ਘਾਤੋ. ਤਪਨ੍ਤਿ ਅਤ੍ਰ ਤਾਪਨੋ, ਇਤਿਸਦ੍ਦੋ ਅਟ੍ਠਨ੍ਨਂ ਪਰਿਸਮਾਪਨਤ੍ਥੋ.
੬੫੮. ਤਤ੍ਥ ਨਿਰਯੇਸੁ ਵੇਤਰਣੀ ਚ ਲੋਹਕੁਮ੍ਭੀ ਚਾਤਿ ਇਮੇ ਦ੍ਵੇ ਨਿਰਯਾ ਜਲਾਸਯਾ ਜਲਾਧਾਰਾ, ਤੇ ਚ ਥਿਯਂ, ਤਰਣੀ ਨਾਵਾ, ਸਾ ਨਤ੍ਥਿ ਯਸ੍ਸਂ ਵੇਤਰਣੀ. ਲੋਹਮਯਾ ਕੁਮ੍ਭੀ ਲੋਹਕੁਮ੍ਭੀ.
ਦ੍ਵਯਂ ਨਿਰਯਪਾਲੇ. ਕਾਰਣਾ ਯਾਤਨਾ, ਸਾ ਚ ਤਿਬ੍ਬਵੇਦਨਾ, ਤਂ ਕਰੋਤੀਤਿ ਕਾਰਣਿਕੋ. ਨਿਰਯਗਤਸਤ੍ਤੇ ਪਾਤੀਤਿ ਨਿਰਯਪੋ.
ਦ੍ਵਯਂ ਨਿਰਯਗਤਸਤ੍ਤੇ. ਨਿਰਯਂ ਗਚ੍ਛਤੀਤਿ ਨੇਰਯਿਕੋ. ਨਰਕਂ ਗਚ੍ਛਤੀਤਿ ਨਾਰਕੋ.
੬੫੯. ਉਦਧਿ ਪਰਿਯਨ੍ਤਂ ਸਮੁਦ੍ਦਸ੍ਸ ਨਾਮਂ. ਅਣ੍ਣੋ ਜਲਂ, ਸੋ ਵਾਤਿ ਗਚ੍ਛਤਿ ਯਸ੍ਮਿਂ ਅਣ੍ਣਵੋ, ਅਣ੍ਣੋ ਯਸ੍ਮਿਂ ਵਿਜ੍ਜਤੀਤਿ ਵਾ ਅਣ੍ਣਵੋ, ਅਸ੍ਸਤ੍ਥ੍ਯਤ੍ਥੇ ਵੋ. ਸਗਰੇਹਿ ਰਾਜਕੁਮਾਰੇਹਿ ਖਤੋ ਸਾਗਰੋ, ਸਾਨਂ ਧਨਾਨਂ ਆਕਰੋਤਿ ਵਾ ਸਾਗਰੋ, ਕਸ੍ਸ ਗੋ, ਸਾਗ ਸਂਵਰਣੇ ਵਾ, ਅਰੋ. ਸਨ੍ਦਤੇਤਿ ਸਿਨ੍ਧੁ, ਸਨ੍ਦ ਸਵਨੇ, ਯਦਾਦਿ. ਉਦਿ ਕ੍ਲੇਦਨੇ, ਸਮ੍ਮਾ ਕ੍ਲਿਦਨ੍ਤਿ ਚਨ੍ਦੋਦਯੇ ਅਸ੍ਮਾ ਆਪਾਨੀਤਿ ਸਮੁਦ੍ਦੋ. ਜਲਾਨਿ, ਉਦਕਾਨਿ ਚ ਨਿਧੀਯਨ੍ਤੇ, ਧੀਯਨ੍ਤੇ ਚਾਤ੍ਰਾਤਿ ਜਲਨਿਧਿ, ਉਦਧਿ ਚ, ਉਦਕਸ੍ਸ ਉਦਾਦੇਸੋ.
ਤਸ੍ਸ ਸਮੁਦ੍ਦਸ੍ਸ ਖੀਰਣ੍ਣਵੋ, ਆਦਿਨਾ ਲਵਣੋਦੋ, ਦਧ੍ਯੁਦੋ, ਘਤੋਦੋ, ਉਚ੍ਛੁਰਸੋਦੋ, ਮਦਿਰੋਦੋ, ਸਾਦੁਦਕੋ ਚਾਤਿ ਇਮੇ ਸਤ੍ਤ ਮਹਣ੍ਣਵਵਿਸੇਸਾ ਭਵਨ੍ਤਿ [ਬ੍ਯਾਖ੍ਯਾਸੁਧਾ ੧.੧੦.੨]. ਖੀਰਵਣ੍ਣੋ ਅਣ੍ਣਵੋ ਖੀਰਣ੍ਣਵੋ.
੬੬੦. ਅਸ੍ਸ ਸਮੁਦ੍ਦਸ੍ਸ ਕੂਲਦੇਸੋ ਤੀਰਦੇਸੋ ਵੇਲਾ ਨਾਮ, ਵਿਗਚ੍ਛਨ੍ਤਿ ਇਰਾ ਯਸ੍ਸਂ ਵੇਲਾ, ਲਤ੍ਤਂ. ਚਕ੍ਕਮਿਵ ਸਲਿਲਾਨਂ ਜਲਾਨਂ ਭਮੋ ਭਮਨਂ ਆਵਟ੍ਟੋ ਨਾਮ, ਆਵਟ੍ਟਨ੍ਤਿ ਜਲਾਨਿ ਅਤ੍ਰਾਤਿ ਆਵਟ੍ਟੋ.
ਤਿਕਂ ਬਿਨ੍ਦੁਮ੍ਹਿ. ਥੁ ਅਭਿਤ੍ਥਵੇ, ਵੋ, ਉਸ੍ਸੇ. ਵਿਦਿ ਅਵਯਵੇ, ਉ, ਬਿਨ੍ਦੁ. ਫੁਸ ਫੁਸਨੇ, ਤੋ, ਫੁਸਿਤਂ. ਪਾਕਾਰੇ, ਗੇਹਾਦਿਤਿਤ੍ਤਿਯਞ੍ਚ ਜਲਨਿਗ੍ਗਮੋ ਭਮੋ ਨਾਮ, ਭਮੁ ਅਨਵਟ੍ਠਾਨੇ.
੬੬੧. ਸਿਲੋਕੋ ਉਦਕੇ. ਆਪ ਬ੍ਯਾਪਨੇ, ਅਪ੍ਪੋਤਿ ਸਬ੍ਬਤ੍ਰਾਤਿ ਆਪੋ. ਪਾਤਬ੍ਬਨ੍ਤਿ ਪਯੋ, ਪਾ ਪਾਨੇ, ਣ੍ਯੋ. ਰਸ੍ਸੋ, ਪਯੋ. ਜਲ ਧਞ੍ਞੇ, ਅ. ਵਾਰਯਤਿ ਨਿਨ੍ਨੋਨਤਨ੍ਤਿ ਵਾਰਿ, ਵਰ ਨਿਸੇਧੇ, ਣਿ, ਵਾਰਯਤਿ ਪਿਪਾਸਨ੍ਤਿ ਵਾ ਵਾਰਿ. ਪੀਯਤੇਤਿ ਪਾਨੀਯਂ, ਅਨੀਯੋ. ਸਲਤੀਤਿ ਸਲਿਲਂ, ਸਲ ਗਤਿਯਂ, ਇਲੋ. ਉਦਿ ਕ੍ਲੇਦਨੇ, ਣ੍ਵੁ, ਉਲੋਪੋ, ਦਕਂ ਪਿਪਾਸਚ੍ਛੇਦਂ ਕਰੋਤੀਤਿ ਵਾ ਦਕਂ, ‘‘ਦਾ ਦਾਨਚ੍ਛੇਦਧਾਤੂ’’ਤਿ [ਏਕਕ੍ਖਰਕੋਸ ੨੦ ਗਾਥਾ] ਹਿ ਏਕਕ੍ਖਰਕੋਸੇ, ਰਸ੍ਸੋ. ਅਨ ਸਦ੍ਦੇ, ਅ, ਦ੍ਵਿਤ੍ਤਂ, ਅਰ ਗਮਨੇ ਵਾ, ਤੋ, ਅਨ੍ਨਾਦੇਸੋ, ਣਤ੍ਤਂ. ਨੀ ਨਯੇ, ਈਰੋ. ਵਨ ਸਮ੍ਭਤ੍ਤਿਯਂ. ਵਨੀਯਤੇ ਪਿਪਾਸੇਹੀਤਿ ਵਨਂ. ਵਾ ਗਮਨੇ, ਅਲੋ. ਤਾਯਤੇ ਪਾਲਯਤੇਤਿ ਤੋਯਂ, ਤਾ ਪਾਲਨੇ, ਚੁਰਾਦਿ, ਯੋ, ਆਕਾਰਸ੍ਸੋਤ੍ਤਂ. ਅਮ੍ਬ ਸਦ੍ਦੇ, ਉ, ਅਮ੍ਬੁ. ਉਦਿ ਪਸਵਨਕ੍ਲੇਦਨੇਸੁ, ਣ੍ਵੁ, ਉਦਕਂ. ਕਰ ਕਰਣੇ, ਕ੍ਵਿ, ਕਂ. ਕਮਲਂ, ਖੀਰਮ੍ਪਿ, ਕਮੁ ਇਚ੍ਛਾਕਨ੍ਤੀਸੁ, ਅਲੋ. ਖਨੁ ਹਿਂਸਾਯਂ, ਈਰੋ, ਨਲੋਪੋ, ਖੀ ਖਯੇ ਵਾ, ਖੀਰਂ.
੬੬੨. ਚਤੁਕ੍ਕਂ ਤਰਙ੍ਗੇ. ਤਰਨ੍ਤੋ ਗਚ੍ਛਤਿ, ਤੀਰਂ ਵਾ ਗਚ੍ਛਤੀਤਿ ਤਰਙ੍ਗੋ, ਅਲੁਤ੍ਤਸਮਾਸੋ, ਪਰਤ੍ਰ ਈਸ੍ਸਤ੍ਤਂ. ਸਯਮੇਵ ਭਿਜ੍ਜਤੇਤਿ ਭਙ੍ਗੋ, ਅ. ਊਹ ਵਿਤਕ੍ਕੇ, ਮਿ, ਹਲੋਪੋ, ਊਮਿ, ਅਰ ਗਮਨੇ ਵਾ, ਮਿ, ਅਸ੍ਸੂ, ਰਲੋਪੋ. ਵਿਮ੍ਹਯਂ ਵਿਚਿਤ੍ਤਂ ਚਿਨੋਤੀਤਿ ਵੀਚਿ, ਇ, ਉਪਸਗ੍ਗਸ੍ਸ ਦੀਘੋ, ਏਤੇ ਦ੍ਵੇ ਪੁਮਿਤ੍ਥਿਯਂ.
ਉਲ੍ਲੋਲੋ, ਕਲ੍ਲੋਲੋ ਚਾਤਿ ਇਦਂ ਦ੍ਵਯਂ ਮਹਾਵੀਚੀਸੁ ਕਥ੍ਯਤੇ, ਲੋਲ ਉਮ੍ਮਾਦਨੇ, ਉਲ੍ਲੋਲਯਤੀਤਿ ਉਲ੍ਲੋਲੋ, ਣੋ, ਉਲ ਗਮਨੇ ਵਾ, ਓਲੋ, ਦ੍ਵਿਤ੍ਤਂ. ਕਲ੍ਲ ਸਦ੍ਦੇ, ਓਲੋ, ਕਲ੍ਲੋਲੋ.
੬੬੩. ਸਿਲੋਕਦ੍ਧਂ ਕਦ੍ਦਮੇ. ਜਲਂ ਬਲਤੇ ਜਮ੍ਬਾਲੋ, ਕਮ੍ਮਨਿ ਣੋ, ਮਕਾਰੋ ਵਣ੍ਣਵਿਕਾਰੋ. ਕਲ ਸਙ੍ਖ੍ਯਾਨੇ, ਅਲੋ. ਪਚ ਵਿਤ੍ਥਾਰਵਚਨੇ, ਕਮ੍ਮਨਿ ਣੋ. ਚਿਕ੍ਖ ਵਚਨੇ, ਅਲੋ, ਦ੍ਵਿਤ੍ਤਂ. ਕਦ ਮਦ੍ਦੇ, ਅਮੋ, ਦ੍ਵਿਤ੍ਤਂ.
ਛਕ੍ਕਂ ਵਾਲੁਕਾਯਂ. ਪੁਲ ਮਹਤ੍ਥੇ, ਇਨੋ, ਲ਼ਤ੍ਤਂ. ਵਲ ਸਂਵਰਣੇ, ਣ੍ਵੁ, ਅਸ੍ਸੁ, ਵਾਲੁਕਾ, ਥੀ. ਵਣ੍ਣ ਸਦ੍ਦੇ, ਵਣ੍ਣੋ. ਮਰ ਪਾਣਚਾਗੇ, ਉ, ਮਰੁ, ਦੇਵੇਪਿ. ਅਰ ਗਮਨੇ, ਉ, ਅਸ੍ਸੁ, ਉਰੁ, ਮਹਨ੍ਤੇਪਿ, ਵਣ੍ਣੋ ਚ ਮਰੁ ਚ ਉਰੁ ਚ ਵਣ੍ਣਮਰੂਰੁ. ਸਿਚ ਪਗ੍ਘਰਣੇ, ਤੋ, ਸਿਕਤਾ, ਥੀ.
੬੬੪. ਜਲਮਜ੍ਝਗਤਂ ਤਲਂ ਕਮ੍ਮਭੂਤਂ ‘‘ਅਨ੍ਤਰੀਪਂ, ਦੀਪੋ’’ਤਿ ਚੋਚ੍ਚਤੇ. ਦ੍ਵਿਧਾਗਤਾਨਂ ਆਪਾਨਂ ਅਨ੍ਤਰਗਤਂ ਅਨ੍ਤਰੀਪਂ, ਆਕਾਰਸ੍ਸੀ. ‘‘ਅਨ੍ਤਰੀਯ’’ਨ੍ਤਿ ਵਾ ਪਾਠੋ, ਤਦਾ ਦ੍ਵਿਧਾਗਤਾਨਂ ਆਪਾਨਂ ਅਨ੍ਤਰੇ ਭਵਂ ਅਨ੍ਤਰੀਯਨ੍ਤਿ ਵਿਗ੍ਗਹੋ, ਅਕਾਰਸ੍ਸੀ. ਦ੍ਵਿਧਾਗਤਾਨਿ ਆਪਾਨਿ ਅਸ੍ਮਿਂ ਹੇਤੁਭੂਤੇਤਿ ਦੀਪੋ. ਵਕਾਰਆਕਾਰਾਨਂ ਲੋਪੋ, ਇਸ੍ਸੀ ਚ, ਦੀਪੋ, ਵਾਕਾਰੇਨ ਦੀਪਮ੍ਪਿ.
ਪਞ੍ਚਕਂ ਤੀਰਸ੍ਸ ਨਾਮਂ. ਪਾਰ ਤੀਰ ਕਮ੍ਮਸਮ੍ਪਤ੍ਤਿਯਂ, ਚੁਰਾਦਿ, ਅ. ਕੂਲ ਆਵਰਣੇ, ਣੋ. ਰੁਧ ਆਵਰਣੇ, ਰੋਧਂ. ਅਞ੍ਞਪਾਰਾਦਿਨਿਵਤ੍ਤਨਤ੍ਥਂ ‘‘ਪਤੀਰ’’ਨ੍ਤਿ ਵੁਤ੍ਤਂ. ਤਟ ਉਸ੍ਸਯੇ, ਅ, ਥਿਯਂ, ਤਟੀ.
੬੬੫. ਪਰਮ੍ਹਿ ਤੀਰਸ੍ਮਿਂ ਪਾਰਸਦ੍ਦੋ, ਸੋ ਚ ਨਪੁਂਸਕੇ, ਪਾਰ ਤੀਰ ਕਮ੍ਮਸਮ੍ਪਤ੍ਤਿਯਂ, ਪਾਰ ਸਾਮਤ੍ਥਿਯੇ ਵਾ, ਪਾਰਯਤਿ ਤਰਙ੍ਗਾਦਯੋ ਵਾਰੇਤੁਨ੍ਤਿ ਪਾਰਂ. ਓਰਨ੍ਤੁਤੀਰਂ ‘‘ਅਪਾਰ’’ਨ੍ਤ੍ਯੁਚ੍ਚਤੇ, ਅਵਰੇ ਤੀਰਦੇਸੇ ਭਵਂ ਓਰਂ, ਣੋ. ਪਾਰਤੋ ਅਞ੍ਞਂ ਤੀਰਂ ਅਪਾਰਂ.
ਪਞ੍ਚਕਂ ਉਲ਼ੁਮ੍ਪੇ. ਉਲ਼ੁਤੋ ਦਕਤੋ ਪਾਤਿ ਰਕ੍ਖਤਿ ਉਲ਼ੁਪੋ, ਸੋਯੇਵ ਨਿਗ੍ਗਹੀਤਾਗਮਵਸੇਨ ਉਲ਼ੁਮ੍ਪੋ. ਪ੍ਲਵਤਿ, ਪ੍ਲਵਨ੍ਤਿ ਅਨੇਨਾਤਿ ਵਾ ਪ੍ਲਵੋ, ਪ੍ਲਵ ਗਮਨੇ, ਗਮਨਂ ਅਤ੍ਰ ਜਲਗਮਨਂ. ਕੁਲ ਸਨ੍ਤਾਨੇ, ਅ, ਕੇ ਉਲਤਿ ਗਚ੍ਛਤੀਤਿ ਵਾ ਕੁਲ੍ਲੋ, ਅ, ਦ੍ਵਿਤ੍ਤਂ. ਤਰਨ੍ਤਿ ਅਨੇਨ ਤਰੋ, ਤਰ ਪ੍ਲਵਤਰਣੇਸੁ. ਗਮਨਾਗਮਨਵਸੇਨ ਪੁਨਪ੍ਪੁਨਂ ਜਲੇ ਅਰਨ੍ਤਿ ਯਾਯ, ਸਾ ਪਚ੍ਚਰੀ, ਅ, ਨਦਾਦਿ.
੬੬੬. ਤਿਕਂ ਨਾਵਾਯਂ. ਤਰਨ੍ਤਿ ਯਾਯ ਤਰਣੀ, ਯੁ, ਨਦਾਦਿ, ਇਪਚ੍ਚਯੇ ਤਰਿ, ਈਮ੍ਹਿ ਤੁ ਤਰੀ. ਨੁ ਥੁਤਿਯਂ, ਅ, ਵੁਡ੍ਢਾਵਾਦੇਸਾ, ਨਾਵਾ. ਦ੍ਵਯਂ ਲਙ੍ਕਾਰਥਮ੍ਭੇ. ਕੂਪ ਗਮਨੇ, ਣ੍ਵੁ, ਕੂਪਕੋ, ਅਪਚ੍ਚਯੋ ਵਾ, ਤਦਾ ਸਕਤ੍ਥੇ ਕੋ. ਕਮੁ ਇਚ੍ਛਾਯਂ, ਭੋ, ਸਕਤ੍ਥੇ ਕੋ, ਅਸ੍ਸੁ ਚ, ਕੁਮ੍ਭਕਂ.
ਦ੍ਵਯਂ ‘‘ਪੇ ਸੇਂ’’ਇਤਿ ਖ੍ਯਾਤੇ. ਤਰਸ੍ਸ ਪਚ੍ਛਾਭਾਗੇ ਬਨ੍ਧਿਤਬ੍ਬੋਤਿ ਪਚ੍ਛਾਬਨ੍ਧੋ. ਗ’ਮਿਚ੍ਛਿਤਦਿਸਂ ਅਟਤਿ ਯੇਨ ਗੋਟਵਿਸੋ, ਇਸੋ, ਅਵਨ੍ਤੋ ਚ ਅਸ੍ਸੋਤ੍ਤਞ੍ਚ, ਗੋਟਵਿਸੋ. ਦ੍ਵਯਂ ‘‘ਪੇ ਤਮਾ’’ਇਤਿ ਖ੍ਯਾਤੇ. ਨਾਵਾਯ ਕਣ੍ਣੋ ਵਿਯ ਕਣ੍ਣੋ, ਮਹਨ੍ਤੋ ਕੇਨਿਪਾਤੋ, ਤੇਨ ਪਵਹਣਪਤਿਸਵਨਤੋ, ਤਂ ਧਰਤੀਤਿ, ਕਮ੍ਮਨਿ ਣੋ. ਨਾਵਾਯ ਯੁਤ੍ਤੋ ਨਾਵਿਕੋ.
੬੬੭. ਦ੍ਵਯਂ ਨਾਵਾਯ ਗਮਨੋਪਾਯੇ. ਅਰਤਿ ਯੇਨਾਤਿ ਅਰਿਤ੍ਤਂ, ਛਦਾਦੀਹਿ ਤਤ੍ਰਣ, ਇਕਾਰਾਗਮੋ, ਦ੍ਵਿਤ੍ਤਞ੍ਚ. ਕੇ ਜਲੇ ਨਿਪਾਤਿਯਤੇ ਕੇਨਿਪਾਤੋ, ਅਲੁਤ੍ਤਸਮਾਸੋਯਂ.
ਦ੍ਵਯਂ ਨਿਯਾਮਕੇ. ਪੋਤੋ ਪਵਹਨਂ, ਤਂ ਵਾਹਯਤੀਤਿ ਪੋਤਵਾਹੋ. ਨਿਯਚ੍ਛਤਿ ਪੋਤਨ੍ਤਿ ਨਿਯਾਮਕੋ, ਯਮੁ ਉਪਰਮੇ, ਨਿਪੁਬ੍ਬੋ ਗਮਨੇ, ਣ੍ਵੁ, ਨਿਯਾਮਕੋ, ਚੁਰਾਦਿ. ਨਿਯਾਮਕੇਪਿ.
ਯੇ ਵਾਣਿਜਾ ਨਾਵਾਯ ਵਾਣਿਜਕਮ੍ਮਂ ਆਚਰਨ੍ਤਿ, ਤੇ ਸਂਯਤ੍ਤਿਕਾ ਨਾਮ, ਸਂਯਾਨਂ ਸਂਯਾਤ੍ਰਾ, ਦੀਪਨ੍ਤਰਗਮਨਂ, ਤ੍ਰਣ, ਸਾ ਪਯੋਜਨਮੇਤੇਸਂ ਸਂਯਤ੍ਤਿਕਾ, ਣਿਕੋ, ਰਲੋਪੋ, ਰਸ੍ਸੋ ਚ. ਤਪਚ੍ਚਯੇਨ ਵਾ ਸਿਦ੍ਧਂ. ਪੋਤਵਾਣਿਜਾਪਿ, ਪੋਤੋ ਪਵਹਨਂ, ਤਸ੍ਸ ਵਾਣਿਜਾ.
੬੬੮. ਲਙ੍ਕਾਰਾਦਯੋ, ਫਿਯਾਦਯੋ ਚ ਨਾਵਾਯ ਅਙ੍ਗਾ ਅਵਯਵਾ. ਲੋ ਇਨ੍ਦੋ, ਤਸ੍ਸ ਕਾਰਣਂ ਲਙ੍ਕਾਰੋ. ਵਟੋ ਵੁਚ੍ਚਤਿ ਸਿਵਟੋ, ਤਦਾਕਾਰਤਾਯ ਵਟਾਕਾਰੋ. ‘‘ਵਟੋ ਕਮਦ੍ਦੇ ਨਿਗ੍ਰੋਧੇ’’ਤਿ ਹਿ ਨਾਨਤ੍ਥਸਙ੍ਗਹੋ. ਫਾ ਵੁਡ੍ਢਿਯਂ, ਇਯੋ, ਫਿਯੋ.
ਦ੍ਵਯਂ ‘‘ਤਲਕ’’ਇਤਿ ਖ੍ਯਾਤੇ. ਪੂ ਪਵਨੇ, ਤੋ, ਵੁਡ੍ਢਿ, ਪਵਹਤਿ ਨਿਯਾਮਕੇਤਿ ਪਵਹਨਂ. ਵੁਤ੍ਤਨ੍ਤਿ ਕ੍ਰਿਯਾਪਦਂ. ਦ੍ਵਯਂ ਕਟ੍ਠਮ੍ਬੁਵਾਹਿਨਿਯਂ, ਦੁਣ ਗਤਿਹਿਂਸਾਸੁ, ਅ, ਨਦਾਦਿ, ਵੁਡ੍ਢਿ, ਦੋਣੀ. ਅਮ੍ਬੁਂ ਨੇਤਿ ਯੇਨ ਅਮ੍ਬਣਂ, ਉਸ੍ਸਤ੍ਤਂ, ਣਤ੍ਤਞ੍ਚ, ਅਮ੍ਬ ਸਦ੍ਦੇ ਵਾ, ਯੁ.
੬੬੯. ਤਿਕਂ ਗਮ੍ਭੀਰੇ. ਗਮੁ ਗਮਨੇ, ਈਰੋ, ਭੋਨ੍ਤੋ ਚ ਮਲੋਪੋ ਚ, ਗਭੀਰੋ. ਮਾਲੋਪੇ ਤੁ ਗਮ੍ਭੀਰੋ, ਗਚ੍ਛਨ੍ਤਾ ਭਾਯਨ੍ਤਿ ਅਸ੍ਮਿਨ੍ਤਿ ਵਾ ਗਭੀਰੋ, ਗਮ੍ਭੀਰੋ ਚ. ਨਿਪੁਬ੍ਬੋ ਮਨ ਅਭ੍ਯਾਸੇ, ਣੋ, ਮਸ੍ਸ ਨੋ. ਤਬ੍ਬਿਪਕ੍ਖਤੋ ਗਮ੍ਭੀਰਵਿਪਰੀਤਤੋ ਉਤ੍ਤਾਨਂ ਨਾਮ, ਉਗ੍ਗਤਂ ਤਾਨਂ ਪਮਾਣਂ ਅਸ੍ਸ ਉਤ੍ਤਾਨਂ, ਅਗਮ੍ਭੀਰਂ.
ਦ੍ਵਯਂ ਅਗਾਧੇ. ਗਾਧ ਪਤਿਟ੍ਠਾਕਙ੍ਖਾਸੁ, ਗਨ੍ਥੇ ਚ, ਨਤ੍ਥਿ ਗਾਧਂ ਯਤ੍ਰ ਅਗਾਧਂ. ਨ ਹੇਟ੍ਠਿਮਤਲਂ ਫੁਸਤਿ ਯਤ੍ਰ ਅਤਲਮ੍ਫਸ੍ਸਂ.
ਤਿਕਂ ਅਪ੍ਪਸਨ੍ਨੇ. ਨਤ੍ਥਿ ਅਚ੍ਛਭਾਵੋ ਅਤ੍ਰ ਅਨਚ੍ਛੋ. ਕਲੁਸਂ ਪਾਪੇਪਿ ਵੁਤ੍ਤਂ. ਵਿਲ ਭੇਦਨੇ, ਣੋ, ਆਵਿਲੋ. ਅਵ ਰਕ੍ਖਣੇ ਵਾ, ਇਲੋ.
੬੭੦. ਤਿਕਂ ਨਿਮ੍ਮਲੇ. ਛੋ ਛੇਦਨੇ, ਨ ਛਿਨ੍ਦਤਿ ਦਸ੍ਸਨਨ੍ਤਿ ਅਚ੍ਛੋ, ਣੋ, ਸਚ੍ਛੋਪਿ, ਸਰ ਵਿਸਰਣੇ, ਤੋ, ਅਨ੍ਨਾਦੇਸੋ. ਨਤ੍ਥਿ ਮਲਂ ਏਤਸ੍ਮਿਂ ਵਿਮਲੋ. ਗਭੀਰਪ੍ਪਭੁਤੀ ਗਭੀਰਾਦਯੋ ਵਿਮਲਨ੍ਤਾ ਤੀਸੁ ਲਿਙ੍ਗੇਸੁ.
ਪਞ੍ਚਕਂ ਕੇਵਟ੍ਟੇ. ਧਾ ਧਾਰਣੇ, ਈਵਰੋ. ਮਚ੍ਛੇ ਹਨ੍ਤ੍ਵਾ ਜੀਵਤੀਤਿ ਮਚ੍ਛਿਕੋ, ਇਕੋ. ਮਚ੍ਛੇ ਬਨ੍ਧਤਿ ਜਾਲੇਨਾਤਿ ਮਚ੍ਛਬਨ੍ਧੋ, ਮਚ੍ਛੇ ਵਧਤੀਤਿ ਵਾ ਮਚ੍ਛਬਨ੍ਧੋ, ਨਿਗ੍ਗਹੀਤਾਗਮੋ, ਕਂ ਜਲਂ, ਤਸ੍ਸ ਈਲਕ੍ਖੀ, ਤਾਯ ਵਟ੍ਟੋ ਵਟ੍ਟਨਂ ਅਸ੍ਸਤ੍ਥੀਤਿ ਕੇਵਟ੍ਟੋ. ਕੇਵਤ੍ਤੋਪਿ, ਣੋ. ਜਾਲੇ ਨਿਯੁਤ੍ਤੋ, ਜਾਲੇਨ ਹਨ੍ਤੀਤਿ ਵਾ ਜਾਲਿਕੋ, ਦਾਸੋਪ੍ਯਤ੍ਰ, ਦਾਸ ਦਾਨੇ, ਅ, ‘‘ਦਾਸੋ ਕੇਵਟ੍ਟਭਚ੍ਚੇਸੂ’’ਤਿ [ਚਿਨ੍ਤਾਮਣਿਟੀਕਾ ੧੦.੧੫] ਰੁਦ੍ਦੋ.
੬੭੧-੬੭੨. ਝਸਾਨ੍ਤਂ ਮਚ੍ਛੇ. ਮਸ ਆਮਸਨੇ, ਛੋ, ਮਰਧਾਤੁਵਸੇਨ ਵਾ ਸਿਦ੍ਧੋ, ਮਰ ਪਾਣਚਾਗੇ, ਇਨੋ, ਰਲੋਪੋ. ਮੁਖਪ੍ਪਦੇਸੇ ਪੁਥੂਨਿ ਲੋਮਾਨਿ ਅਸ੍ਸ ਪੁਥੁਲੋਮੋ. ਪਾਠੀਨਾਦੀਨਂ ਮਚ੍ਛਤ੍ਤਾ ਵਿਸੇਸਤੋ ਅਲੋਮਕੇਪ੍ਯਸ੍ਸ ਵੁਤ੍ਤਿ. ਝਸ ਹਿਂਸਤ੍ਥੋ ਦਣ੍ਡਕੋ ਧਾਤੁ, ਅ, ਝਸੋ. ਅਣ੍ਡਜੋ, ਵਿਸਾਰੋ, ਸਕਲੀਪਿ, ਵਿਚਿਤ੍ਰਂ ਸਰਤਿ ਅਨੇਨ ਵਿਸਾਰੋ, ਣੋ. ਰੋਹਿਤਾਦੀਨਂ ਵਕ੍ਕਲਪ੍ਪਾਯੋ [ਬਤ੍ਤਲਪ੍ਪਾਯੋ (ਕ.)] ਤਚੋ ਸਕਲਂ. ਤਂਯੋਗਾ, ਈ, ਸਕਲੀ.
ਰੋਹਿਤਾਦਯੋ, ਮਕਰਾਦਯੋ ਚ ਮਚ੍ਛਪ੍ਪਭੇਦਾ. ਰੁਹ ਜਨਨੇ, ਤੋ, ਰੋਹਿਤੋ. ਵਿਪਾਕੇ ਮਧੁਰਸਤ੍ਤਾ ਮਗ੍ਗੁਰੋ, ਵਣ੍ਣਵਿਕਾਰੋ, ਮਜ੍ਜਤੀਤਿ ਵਾ ਮਗ੍ਗੁਰੋ, ਊਰੋ, ਮਜ੍ਜ ਸੁਦ੍ਧਿਯਂ, ਜ੍ਜਸ੍ਸ ਗ੍ਗਤ੍ਤਂ, ਰਸ੍ਸੋ ਚ, ਮਗ੍ਗੁਰੋ, ‘‘ਙਾ ਖੂ’’. ਸਿਙ੍ਗਯੁਤ੍ਤਤਾਯ ਸਿਙ੍ਗੀ, ਣੋ, ਨਦਾਦਿ, ਸਙ੍ਗੁਪਿ, ਸਰਤਿ ਵਾਤਨ੍ਤਿ ਵਾ ਸਿਙ੍ਗੀ, ਸਰ ਹਿਂਸਾਯਂ, ਅ, ਰਸ੍ਸ ਗੋ, ਅਸ੍ਸਿ, ਨਿਗ੍ਗਹੀਤਾਗਮੋ, ਨਦਾਦਿ, ਸਿਙ੍ਗੀ, ‘‘ਙ ਚ੍ਵੇ’’. ਬਲ ਸਂਵਰਣੇ, ਅਲੋ, ਲਸ੍ਸ ਜੋ, ਬਲਜੋ,’’ਙ ਪਾ’’. ਮੁਞ੍ਜ ਸਦ੍ਦਤ੍ਥੋ, ਮੁਞ੍ਜੋ. ਪੂ ਪਵਨੇ, ਉਸੋ, ਵੁਦ੍ਧ੍ਯਾਵਾਦੇਸਾ, ਪਾਵੁਸੋ, ਮਹਾਮੁਖਮਚ੍ਛੋ, ‘‘ਙ ਟਾ’’.
ਸਤ੍ਤਕ੍ਖਤ੍ਤੁਂ ਵਙ੍ਕਤੀਤਿ ਸਤ੍ਤਵਙ੍ਕੋ, ‘‘ਙ ਸੇ’’. ਸਹ ਵਙ੍ਕੇਨ, ਸਂਵਿਜ੍ਜਮਾਨੋ ਵਾ ਵਙ੍ਕੋ ਯਸ੍ਸ ਸਵਙ੍ਕੋ, ‘‘ਙ ਮ੍ਵੇ’’. ਨਲ਼ਸਣ੍ਠਾਨੋ ਮੀਨੋ ਨਲ਼ਮੀਨੋ, ‘‘ਙ ਫ੍ौ-ਯੋ’’. ਕਡਿ ਸਨ੍ਨਿਚਯਵਦਨੇਕਦੇਸੇਸੁ, ਣ੍ਵੁ, ਗਣ੍ਡਕੋ, ‘‘ਙ ਮਾ’’. ਸਸੁ ਹਿਂਸਾਯਂ, ਉ, ਅਸ੍ਸੁ, ਸੁਸੁਕਾ, ਸਕਤ੍ਥੇਕੋ, ‘‘ਙ-ਪ੍ौ-ਟਯੇ’’. ਸਯਨਤੋ ਪਸ੍ਸੇਨ ਫਰਤੀਤਿ ਸਫਰੀ, ਨਦਾਦਿ, ਫਰ ਫਰਣੇ, ਸਫਰੀ ਦ੍ਵੀਸੁ, ‘‘ਙ ਖੂ-ਮਾ’’. ਪਾਣਿਗ੍ਗਹਣੇ ਮੁਖਂ ਕਿਰਤੀਤਿ ਮਕਰੋ, ਯਦਾਦਿ.
੬੭੩. ਤਿਮਿਆਦਯੋ ਸਤ੍ਤ ਮਹਾਮਚ੍ਛਾ ਨਾਮ. ਤਿਮ ਅਦ੍ਦਭਾਵੇ, ਤਿਮਤੀਤਿ ਤਿਮਿ, ਇ, ਤਿਮਿ ਮਚ੍ਛਮਤ੍ਤੇਪਿ. ਗਿਰ ਨਿਗ੍ਗਿਰਣੇ, ਣੋ, ਲਤ੍ਤਂ, ਇਸ੍ਸਤ੍ਤਂ. ਤਿਮਿਨੋ ਗਲੋ ਤਿਮਿਙ੍ਗਲੋ, ਨਿਗ੍ਗਹੀਤਾਗਮੋ. ਵਣ੍ਣੇਨ ਪਿਙ੍ਗਲਤਿਮਿਰਸਦਿਸਤਾਯ ਤਿਮਿਰਪਿਙ੍ਗਲੋ. ਆ ਭੁਸੋ ਨਨ੍ਦਤੀਤਿ ਆਨਨ੍ਦੋ, ਨਨ੍ਦ ਸਮਿਦ੍ਧਿਯਂ. ਤਿਮਿਨੋ ਮਚ੍ਛੇ ਨਨ੍ਦਯਤੀਤਿ ਤਿਮਿਨਨ੍ਦੋ. ‘‘ਤਿਮਿਨ੍ਦੋ’’ਤਿਪਿ ਪਾਠੋ, ਤਿਮੀਨਂ ਮਚ੍ਛਾਨਂ ਇਨ੍ਦੋ ਤਿਮਿਨ੍ਦੋ. ਅਧਿਕੋ ਆਰੋਹੋ ਯਸ੍ਸ ਅਜ੍ਝਾਰੋਹੋ. ਮਹਨ੍ਤੋ ਤਿਮਿ ਮਚ੍ਛੋ ਮਹਾਤਿਮਿ.
੬੭੪. ਦ੍ਵਯਂ ‘‘ਙ ਫੇ’’ਇਤਿ ਖ੍ਯਾਤੇ. ਪਾਸਾਣਸਦਿਸਸਣ੍ਠਾਨੋ ਮਚ੍ਛੋ ਪਾਸਾਣਮਚ੍ਛੋ. ਪਠ ਵਿਯਤ੍ਤਿਯਂ ਵਾਚਾਯਂ, ਇਨੋ, ਉਭਯਤ੍ਰ ਦੀਘੋ, ਪਾਠੀਨੋ, ‘‘ਙ-ਪ੍ौ’’ਤਿ ਚ ਵਦਨ੍ਤਿ. ਦ੍ਵਯਂ ਬਲ਼ਿਸੇ. ਵਙ੍ਕਤੀਤਿ ਵਙ੍ਕੋ, ਵਙ੍ਕ ਕੋਟਿਲ੍ਯੇ. ਬਲ ਸਂਵਰਣੇ, ਇਸੋ, ਲ਼ਤ੍ਤਂ. ਮਚ੍ਛਵੇਧਨਮ੍ਪਿ, ਵਿਧ ਵਿਧਾਨੇ, ਭੇਦਨੇ ਚ, ਅਨੇਕਤ੍ਥਤ੍ਤਾ, ਯੁ.
ਤਿਕਂ ਕੁਮ੍ਭੀਲੇ. ‘‘ਸੁਂਸੁਮਾਰੋ’’ਤਿ ਸਮੁਦਿਤਨਾਮਂ, ਸਸਤੀਤਿ ਸੁਸੁ. ਸੁਸੁ ਏਵ ਸੁਂਸੁ, ਮਾਰੇਤੀਤਿ ਮਾਰੋ, ਸੁਂਸੁ ਏਵ ਮਾਰੋ ਸੁਂਸੁਮਾਰੋ. ਕੇਨ ਉਭਤਿ ਪੂਰੇਤੀਤਿ ਕੁਮ੍ਭੋ, ਜਲਾਸਯੋ, ਤਤ੍ਰ ਉਲਤਿ ਗਚ੍ਛਤੀਤਿ ਕੁਮ੍ਭੀਲੋ, ਕੁਮ੍ਭੀ ਵਾ ਘਟੋ, ਤਂ ਲਾਤੀਤਿ ਕੁਮ੍ਭੀਲੋ. ਨ ਕਮਤੀਤਿ ਨਕ੍ਕੋ, ਕ੍ਵਿ, ਸਞ੍ਞਾਸਦ੍ਦਤ੍ਤਾ ਨਸ੍ਸ ਪਕਤਿ, ਨਕ੍ਕ ਨਾਸਨੇ ਵਾ, ਚੁਰਾਦਿ.
ਦ੍ਵਯਂ ਕਚ੍ਛਪੇ. ਕੁਚ੍ਛਿਤੋ ਊਮਿ ਵੇਗੋ ਅਸ੍ਸ ਕੁਮ੍ਮੋ, ‘‘ਪਕਾਸੇ ਵੇਗਭਙ੍ਗੇਸੁ, ਤਰਙ੍ਗੇ ਊਮਿ ਪੁਂਥਿਯ’’ਨ੍ਤਿ [ਚਿਨ੍ਤਾਮਣਿਟੀਕਾ ੧੦.੨੧] ਰਭਸੋ, ‘‘ਵੇਗੇ ਭਙ੍ਗਪ੍ਪਕਾਸੇਸੁ, ਬਿਲਾਯਂ ਊਮਿ ਵੀਚਿਯ’’ਨ੍ਤਿ ਨਾਨਤ੍ਥਸਙ੍ਗਹੋ. ਕਚ੍ਛੇਨ ਪਿਵਤੀਤਿ ਕਚ੍ਛਪੋ, ਣੋ, ਕਮਠੋਪ੍ਯਤ੍ਰ, ਕਮੁ ਇਚ੍ਛਾਯਂ, ਅਠੋ.
੬੭੫. ਦ੍ਵਯਂ ਕਕ੍ਕਟੇ. ਕਕਤੀਤਿ ਕਕ੍ਕਟਕੋ. ਸਕਤ੍ਥੇ ਕੋ, ਕੁਕ ਆਦਾਨੇ ਵਾ, ਅਟੋ, ਉਸ੍ਸਤ੍ਤਂ. ਕੁਲ ਸਨ੍ਤਾਨੇ, ਬਨ੍ਧੁਮ੍ਹਿ ਚ, ਈਰੋ, ਕੁਂ ਵਾ ਪਥਵਿਂ ਲੁਨਾਤੀਤਿ ਕੁਲ਼ੀਰੋ, ਈਰੋ. ਦ੍ਵਯਂ ਰਤ੍ਤਪੇ. ਜਲਸ੍ਸ ਊਕਾ ਕਿਮਿਵਿਸੇਸੋ ਜਲੂਕਾ, ਜਲਂ ਓਕਂ ਗੇਹਂ ਏਤਿਸ੍ਸਾਤਿ ਵਾ ਜਲੂਕਾ, ਓਸ੍ਸੂ, ਉਚ ਸਮਵਾਯੇ, ਣੋ, ਓਕਂ. ਰਤ੍ਤਂ ਰੁਧਿਰਂ ਪਿਵਤੀਤਿ ਰਤ੍ਤਪਾ.
ਤਿਕਂ ਮਣ੍ਡੂਕੇ. ਮਣ੍ਡ ਭੂਸਨੇ, ਉਕੋ, ਦੀਘੋ. ਦਦ ਦਾਨੇ, ਉਰੋ, ਦ੍ਵਿਤ੍ਤਂ. ਭੀ ਭਯੇ, ਸਪ੍ਪਤੋ ਭਾਯਤੀਤਿ ਭੇਕੋ, ਇਕੋ, ਈਸ੍ਸੇ. ਵਸ੍ਸਾਭੂ, ਸਾਲੁਰੋ, ਪ੍ਲਵੋਪਿ. ਦ੍ਵਯਂ ‘‘ਤੀ’’ਇਤਿ ਖ੍ਯਾਤੇ. ਗਣ੍ਡਂ ਵਚ੍ਚਸਨ੍ਨਿਚਯਂ ਉਪ੍ਪਾਦੇਤੀਤਿ ਗਣ੍ਡੁਪ੍ਪਾਦੋ. ਮਹਿਯਾ ਲਤਾ ਮਹੀਲਤਾ, ਕਿਞ੍ਚੁਲੁਕੋਪਿ. ਕਿਞ੍ਚ ਚੁਲਤੀਤਿ ਕਿਞ੍ਚੁਲੁਕੋ, ਉਕੋ.
੬੭੬. ਦ੍ਵਯਂ ਮੁਤ੍ਤਾਫੋਟੇ. ਸਪ੍ਪ ਗਮਨੇ, ਇ, ਅਸ੍ਸਿ, ਸਿਪ੍ਪਿ, ਥੀ. ਸੁ ਅਭਿਸਵੇ, ਤ੍ਤਿ, ਸੁਤ੍ਤਿ. ਦ੍ਵਯਂ ਸਙ੍ਖੇ. ਖਨੁ ਅਵਦਾਰਣੇ, ਕ੍ਵਿ, ਸਙ੍ਖੋ. ਸਮੁ ਉਪਸਮੇ ਵਾ, ਖੋ, ਸਙ੍ਖੋ. ਕਂ ਵਾਤਿ ਗਚ੍ਛਤੀਤਿ ਕੁਮ੍ਬੁ, ਉ, ਦ੍ਵੇਪ੍ਯਨਿਤ੍ਥਿਯਂ.
ਦ੍ਵਯਂ ਖੁਦ੍ਦਸਙ੍ਖਜਾਤਿਯਂ. ਸਙ੍ਖਸ੍ਸ ਨਖੋ ਇਵ ਸਙ੍ਖਨਖੋ. ਦ੍ਵਯਂ ‘‘ਖਰੁ’’ਇਤਿ ਖ੍ਯਾਤੇ. ਜਲੇ ਸਵਤੀਤਿ ਜਲਸੁਤ੍ਤਿ, ਸੁ ਪਸਵੇ, ਤ੍ਤਿ. ਸਮਤੀਤਿ ਸਮ੍ਬੁਕੋ, ਉਕੋ, ਬੋਨ੍ਤੋ ਚ, ‘‘ਸਮ੍ਬੁਕੋ ਜਲਸੁਤ੍ਤਿ’ਤ੍ਥੀ’’ਤਿ [ਚਿਨ੍ਤਾਮਣਿਟੀਕਾ ੧੦.੨੩] ਪੁਂਕਣ੍ਡੇ ਵੋਪਾਲਿਤੋ.
੬੭੭. ਦ੍ਵਯਂ ਜਲਾਸਯੇ. ਜਲਾਨਂ ਆਸਯੋ ਪਤਿਟ੍ਠਿਤਟ੍ਠਾਨਂ ਜਲਾਸਯੋ. ਤੇਸੁ ਜਲਾਸਯੇਸੁ ਮਜ੍ਝੇ ਯੋ ਗਮ੍ਭੀਰੋ ਅਗਾਧੋ, ਸੋ ਰਹਦਾਖ੍ਯੋ, ਹਰ ਹਰਣੇ, ਭੂਵਾਦਿ, ਦੋ, ਵਣ੍ਣਵਿਪਰਿਯਯੋ, ਰਹਦੋ.
ਦ੍ਵਯਂ ਉਦਪਾਨੇ. ਉਦਕਂ ਪਿਵਨ੍ਤਿ ਅਸ੍ਮਿਂ, ਯੁ, ਕਲੋਪੋ. ਪਿਵਨ੍ਤਿ ਅਸ੍ਮਿਂ ਪਾਨੋ, ਸੋ ਏਵ ਕੂਪੋ ਪਾਨਕੂਪੋ, ਕੁ ਸਦ੍ਦੇ, ਪੋ, ਦੀਘਾਦਿ, ਕੂਪੋ, ਕੇਨ ਉਭਤੀਤਿ ਵਾ ਕੂਪੋ, ਭਸ੍ਸ ਪੋ. ਅਨ੍ਧੁਪਿ, ਅਨ੍ਧ ਦਸ੍ਸਨੁਪਸਙ੍ਘਾਤੇ, ਚੁਰਾਦਿ, ਉ. ਦ੍ਵਯਂ ਸਮਚਤੁਰਸ੍ਸਪੋਕ੍ਖਰਣਿਯਂ. ਖਨੁ ਅਵਦਾਰਣੇ, ਕਮ੍ਮੇ ਤੋ, ਨਲੋਪੋ, ਦੀਘਾਦਿ. ਪੋਕ੍ਖਰਂ ਜਲਂ, ਤਂਯੋਗਾ ਅਨੋ, ਨਦਾਦਿ, ਪੋਕ੍ਖਰਣੀ.
੬੭੮. ਤਿਪਾਦੇਨ ਮਹਤੋ ਸਦਾ ਅਗਾਧਜਲਸ੍ਸ ਪਦ੍ਮਟ੍ਠਾਨਸ੍ਸ ਚ ਪਦ੍ਮਸੁਞ੍ਞਸ੍ਸ ਚ ਯੋਗ੍ਯਤਾਯ ਨਾਮਂ [ਅਮਰ ੧੦.੨੮ ਗਾਥਾਯਂ ਪਸ੍ਸਿਤਬ੍ਬਂ]. ਤਲ਼ ਆਘਾਤੇ, ਤਲ ਪਤਿਟ੍ਠਾਯਂ ਵਾ, ਆਕੋ, ਅਪਰਪਕ੍ਖੇ ਲ਼ਤ੍ਤਂ. ਸਰ ਗਮਨੇ, ਅ, ਸਰੋ. ਵਪ ਬੀਜਨਿਕ੍ਖੇਪੇ, ਵਪਨ੍ਤਿ ਯਾਯ ਵਾਪੀ, ਆਯਤਚਤੁਰਸ੍ਸਾਯਮ੍ਪਿ. ਸਰਤਿਸ੍ਮਾ ਅਸੋ, ਨਦਾਦਿ, ਸਰਸੀ. ਦਹ ਭਸ੍ਮੀਕਰਣੇ, ਅ, ਦਧ ਧਾਰਣੇ ਵਾ, ਧਸ੍ਸ ਹੋ. ਅਮ੍ਬੁਜਾਨਂ ਪਦ੍ਧਾਨਂ ਆਕਰੋ ਉਪ੍ਪਤ੍ਤਿਟ੍ਠਾਨਂ.
ਖੁਦ੍ਦਕੋ ਸਰੋ ‘‘ਪਲ੍ਲਲ’’ਨ੍ਤ੍ਯੁਚ੍ਚਤੇ. ਯਤ੍ਰ ਵਸ੍ਸਾਸੁ ਅਧਿਕਂ ਜਲਂ, ਗਿਮ੍ਹੇਸੁ ਜਾਣੁਮਤ੍ਤਂ, ਸੁਕ੍ਖਤ੍ਯੇਵ ਵਾ, ਪਲ੍ਲ ਰਕ੍ਖਣੇ, ਚੁਰਾਦਿ, ਅਲੋ, ਪਲ੍ਲਲਂ.
੬੭੯-੬੮੦. ਅਨੋਤਤ੍ਤਾਦਯੋ ਏਤੇ ਸਤ੍ਤ ਮਹਾਸਰਾ ਨਾਮ. ਤਤ੍ਰ ਸੂਰਿਯਰਂਸਿਸਮ੍ਫੁਟ੍ਠਾਭਾਵੇਨ ਨ ਅਵਤਪਤਿ ਉਦਕਮੇਤ੍ਥਾਤਿ ਅਨੋਤਤ੍ਤੋ. ਕਣ੍ਣਮੁਣ੍ਡਪਬ੍ਬਤਸਮੀਪਤ੍ਤਾ ਕਣ੍ਣਮੁਣ੍ਡੋ. ਰਥਂ ਕਰੋਤੀਤਿ ਰਥਕਾਰਕੋ, ਯਥਾਕਥਞ੍ਚਿ ਅਯਂ ਬ੍ਯੁਪ੍ਪਤ੍ਤਿ ਨਾਮ, ਸਞ੍ਞਾ ਪਨ ਲੋਕਤੋਯੇਵਾਵਗਨ੍ਤਬ੍ਬਾ. ਛਬ੍ਬਣ੍ਣਦਨ੍ਤਵਨ੍ਤਤਾਯ ਛਦ੍ਦਨ੍ਤੋ, ਨਾਗਰਾਜਾ, ਤਸ੍ਸ ਨਿਵਾਸਨਟ੍ਠਾਨਸਮੀਪਤ੍ਤਾ ਛਦ੍ਦਨ੍ਤੋ, ਸਰੋ. ਕੁਣਾਲਸਕੁਣਾ ਬਹਵੋ ਯਤ੍ਥ ਸਨ੍ਤਿ ਕੁਣਾਲੋ. ਮਨ੍ਦਾਕਿਨੀ ਆਕਾਸਗਙ੍ਗਾਯਮ੍ਪਿ ਵੁਤ੍ਤਾ. ਬਹਵੋ ਸੀਹਾ ਪਪਤਨ੍ਤਿ ਅਸ੍ਮਿਂ ਸੀਹਪ੍ਪਪਾਤੋ.
ਦ੍ਵਯਂ ਜਲਪ੍ਪਾਯੇ ਦੇਸੇ ਕੂਪਨਿਕਟੇ ਪਸੁਪਾਨਤ੍ਥਂ ਪਤ੍ਥਾਰਾਦਿਰਚਿਤੇ ਜਲਾਸਯੇ. ਆਹੂਯਨ੍ਤੇ ਪਸਵੋ ਅਤ੍ਰ ਪਾਨਾਯਾਤਿ ਆਹਾਵੋ, ਣੋ, ਵੁਡ੍ਢਾਵਾਦੇਸੋ. ਨਿਪਿਵਨ੍ਤਿ ਅਸ੍ਮਿਂ ਨਿਪਾਨਂ, ਯੁ. ਦ੍ਵਯਂ ਸੁਰਖਾਤੇ, ਅਪੋਰਿਸੇ ਦੇਵਨਿਮ੍ਮਿਤੇਤਿ ਭਾਵੋ, ਸੋਣ੍ਡੇਇਚ੍ਚਞ੍ਞੇ. ‘‘ਅਖਾਤੋ ਦੇਵਖਾਤਕੋ’’ਤਿ [ਅਮਰ ੧੦.੨੭] ਹਿ ਅਮਰਮਾਲਾਯਂ ਪੁਂਸਕਣ੍ਡਂ.
੬੮੧. ਨਦ੍ਯਨ੍ਤਂ ਨਦੀਯਂ. ਸਵਤੀਤਿ, ਅਨ੍ਤੋ, ਨਦਾਦਿ, ਸਵਨ੍ਤੀ. ਨਿਨ੍ਨਟ੍ਠਾਨਂ ਗਚ੍ਛਤੀਤਿ ਨਿਨ੍ਨਗਾ, ਕ੍ਵਿ. ਸਨ੍ਦ ਪਸਵਨੇ, ਉ, ਅਸ੍ਸਿਤ੍ਤਂ, ਵਣ੍ਣਵਿਕਾਰੋ, ਸਿਨ੍ਧੁ. ਸਰ ਗਮਨੇ, ਤੋ, ਇਕਾਰਾਗਮੋ, ਸਰਿਤਾ. ਆਪਾਨਂ ਨਿਵਾਸੋ ਆਪੋ, ਸਮੁਦ੍ਦੋ, ਣੋ, ਤਂ ਗਚ੍ਛਤੀਤਿ ਆਪਗਾ. ਨਦ ਅਬ੍ਯਤ੍ਤਸਦ੍ਦੇ, ਨਦਤੀਤਿ ਨਦੀ, ਨਦਾਦਿ, ਤਰਙ੍ਗਨੀਪ੍ਯਤ੍ਰ.
ਦ੍ਵਯਂ ਗਙ੍ਗਾਯਂ. ਭਗੀਰਥੇਨ ਰਞ੍ਞਾ ਨਿਬ੍ਬਤ੍ਤਿਤਾ ਭਾਗੀਰਥੀਤਿ ਲੋਕਿਯਾ, ਅਸ੍ਮਾਕਨ੍ਤੁ ਮਤੇਨ ਨਾਮਮਤ੍ਤਮੇਵੇਤਂ ਤਸ੍ਸਾਤਿ ਸਨ੍ਨਿਟ੍ਠਾਨਂ, ਏਵਂ ਸਬ੍ਬਤ੍ਰ. ਗਚ੍ਛਤੀਤਿ ਗਙ੍ਗਾ, ਗਮਿਤੋ ਗੋ, ਤਿਪਥਗਤਾਪਿ, ਤਯੋ ਸਗ੍ਗਮਚ੍ਚਪਾਤਾਲਪਥੇ ਗਤਾ ਤਿਪਥਗਤਾ. ਸਿਨ੍ਧੂਨਂ ਨਦੀਨਂ ਸਙ੍ਗਮੋ ਮੇਲਕੋ ਸਮ੍ਭੇਦੋ. ਸਮ੍ਮਾ ਭਿਜ੍ਜਨ੍ਤਿ ਅਸ੍ਮਿਂ ਸਮ੍ਭੇਦੋ, ਸਂਪੁਬ੍ਬੋ ਭਿਦਿ ਮੇਲਨੇ, ਣੋ.
੬੮੨. ਗਙ੍ਗਾਦਿਕਾ ਇਮਾ ਪਞ੍ਚ ਨਦਿਯੋ ਮਹਾਨਦੀ ਨਾਮ. ਅਚਿਰਂ ਸੀਘਗਮਨਂ ਏਤਿਸ੍ਸਮਤ੍ਥੀਤਿ ਅਚਿਰਵਤੀ. ਯਮੁ ਉਪਰਮੇ, ਉਨੋ, ਯਮਸ੍ਸ ਭਗਿਨੀ ਵਾ ਯਮੁਨਾ, ਭਗਿਨ੍ਯਤ੍ਥੇ ਉਨੋ. ਸਰਾਨਿ ਭਵਨ੍ਤਿ ਯਾਯ ਅਵਧਿਭੂਤਾਯਾਤਿ ਸਰਭੂ, ਸਰ ਗਤਿਹਿਂਸਾਚਿਨ੍ਤਾਸੁ ਵਾ, ਊ, ਅਭੋਨ੍ਤੋ ਚ, ਸਰਭੂ. ਮਹ ਪੂਜਾਯਂ, ਅ, ਨਦਾਦਿ.
ਚਨ੍ਦਭਾਗਾਦਿਕਾ ਨਿਨ੍ਨਗਾ ਪਞ੍ਚ ਮਹਾਨਦਿਤੋ ਅਞ੍ਞਾਸਂ ਨਦੀਨਂ ਭੇਦਾ. ਚਨ੍ਦਭਾਗੋ ਨਾਮ ਪਬ੍ਬਤੋ, ਤਤੋ ਪਭਵਤੀਤਿ ਚਨ੍ਦਭਾਗਾ. ਸਰਯੋਗਾ ਵਨ੍ਤੁ, ਮਜ੍ਝੇ ਸਕਾਰਾਗਮੋ, ਨਦਾਦਿ, ਸਰਸ੍ਵਤੀ. ਵਨ੍ਤੁਰਤ੍ਰਾਤਿਸਯੇ.
੬੮੩. ਨਿਦ੍ਦੋਸਂ ਜਲਂ ਅਸ੍ਸਂ ਨੇਰਞ੍ਜਰਾ, ਯਦਾਦਿ, ਅਥ ਵਾ ਨੇਰਞ੍ਜਰਾ ਨਾਮ ਤੂਰਿਯਵਿਸੇਸੋ, ਤਂਸਮਾਨਸਦ੍ਦਤਾਯ ਅਯਂ ਨਦੀ ਨੇਰਞ੍ਜਰਾ ਨਾਮ. ਨਾਨਾਗਾਹਾਕੁਲੀਭੂਤਤਾਯ ਕੁਚ੍ਛਿਤਂ ਵੇਰਂ ਅਸ੍ਸਾ ਕਾਵੇਰੀ, ਨਦਾਦਿ. ਨਮ੍ਮਂ ਸੁਖਂ ਦਦਾਤੀਤਿ ਨਮ੍ਮਦਾ, ਣੋ. ਆਦਿਨਾ ਸਰਾਵਤੀ ਵੇਤ੍ਤਵਤੀ ਕਣ੍ਟਕੀ ਕੋਸਿਕੀਆਦਿਕਾ ਅਨੇਕਾ ਨਦੀਭੇਦਾ ਸਙ੍ਗਹਿਤਾ.
ਦ੍ਵਯਂ ਹਮ੍ਮਿਯਦੇਵਾਲਯਾਦੀਸੁ ਜਲਮਗ੍ਗੇ. ਵਾਰਿਨੋ ਨਿਕ੍ਖਮਨਮਗ੍ਗੋ ਵਾਰਿਮਗ੍ਗੋ. ਨਲ ਗਨ੍ਧੇ, ਅ, ਨਦਾਦਿ, ਲ਼ਤ੍ਤਂ, ਪਨਾਲ਼ਿ, ਅਯਂ ਇਤ੍ਥਿਯਂ, ਪੁਮੇ ਚ.
ਤਿਕਂ ਗਾਮਦ੍ਵਾਰਮ੍ਹਿ ਅਸੁਚਿਪੂਤਿਪਙ੍ਕਸਮ੍ਪੁਣ੍ਣਾਯਂ ਕਾਸੁਯਂ. ਚਿਤ੍ਤਂ ਦੁਨੋਤੀਤਿ ਚਨ੍ਦਨਿਕਾ, ਯਦਾਦਿ.
੬੮੪-੬੮੫. ਜਮੁ ਅਦਨੇ, ਅਲੋ, ਨਦਾਦਿ, ਬੋਨ੍ਤੋ ਚ, ਲ਼ਤ੍ਤਂ, ਜਮ੍ਬਾਲ਼ੀ. ਅਵਲਗ੍ਗਨ੍ਤਿ ਅਸ੍ਮਿਂ ਓਲ਼ਿਗਲ੍ਲੋ, ਲਗ੍ਗ ਸਙ੍ਗੇ, ਅਲੋ, ਲ਼ਤ੍ਤਂ, ਅਸ੍ਸਿ, ਗਲੋਪੋ, ਦ੍ਵਿਤ੍ਤਞ੍ਚ. ਸਾਦ੍ਧਪਜ੍ਜੇਨ ਪਦੁਮਸ੍ਸ ਨਾਮਂ. ਸਰਸਿ ਰੁਹਤੀਤਿ ਸਰੋਰੁਹਂ, ਰੋ. ਸਤਂ ਪਤ੍ਤਾਨਿ ਅਸ੍ਸ, ਪਦ੍ਮਵਿਸੇਸਤ੍ਥੇਪ੍ਯਸ੍ਸ ਪਦ੍ਮਤ੍ਤਾ ਵਿਸੇਸਤੋ ਅਭੇਦੋ. ਅਰਂ ਵਿਨ੍ਦਤੀਤਿ ਅਰਵਿਨ੍ਦਂ. ਪਦ ਗਮਨੇ, ਉਮੋ. ਪਦੁਮਂ, ਅਨਿਤ੍ਥੀ. ਪਙ੍ਕੇ ਕਦ੍ਦਮੇ ਰੁਹਤੀਤਿ ਪਙ੍ਕੇਰੁਹਂ, ਅਲੁਤ੍ਤਸਮਾਸੋਯਂ. ਨਲ ਗਨ੍ਧੇ, ਇਨੋ, ਲ਼ਤ੍ਤਂ. ਪੁਸ ਵੁਡ੍ਢਿਮ੍ਹਿ, ਖਰੋ, ਵੁਡ੍ਢਿ, ਸਸ੍ਸ ਕੋ, ਪੋਕ੍ਖਰੇ ਜਲੇ ਜਾਤਨ੍ਤਿ ਵਾ ਪੋਕ੍ਖਰਂ. ਮੁਲ਼ਾਲਤੋਪਿ ਉਗ੍ਗਨ੍ਤ੍ਵਾ ਪੁਪ੍ਫਤਿ ਮੁਲ਼ਾਲਪੁਪ੍ਫਂ. ਕਂ ਜਲਂ ਅਲਯਤਿ ਭੂਸਯਤੀਤਿ ਕਮਲਂ, ਅਲ ਭੂਸਨੇ. ਭਿਸਤੋਪਿ ਉਗ੍ਗਨ੍ਤ੍ਵਾ ਪੁਪ੍ਫਤੀਤਿ ਭਿਸਪੁਪ੍ਫਂ. ਕੁਸੇ ਜਲੇ ਸੇਤਿ ਤਿਟ੍ਠਤੀਤਿ ਕੁਸੇਸਯਂ, ਰੋ, ਅਲੁਤ੍ਤਸਮਾਸੋ. ਤਾਮਰਸਮ੍ਪਿ, ਤਾਮਰਂ ਜਲਂ, ‘‘ਤਾਮਰਂ ਘਤਮਣ੍ਣੋ ਚੇ’’ਤਿ ਤਨ੍ਤਤਨ੍ਤਰਂ, ਤਤ੍ਰ ਸੇਤਿ ਤਿਟ੍ਠਤੀਤਿ ਤਾਮਰਸਂ, ਰੋ.
੬੮੬. ਸਿਤਂ ਸੇਤਂ ਕਮਲਂ ‘‘ਪੁਣ੍ਡਰੀਕ’’ਨ੍ਤ੍ਯੁਚ੍ਚਤੇ, ਪੁਡਿ ਖਣ੍ਡਨੇ, ਮੁਡਿਰਿਤ੍ਯੇਕੇ, ਇਕੋ, ਅਰਾਗਮੋ ਚ, ਮਸ੍ਸ ਪੋ, ਇਸ੍ਸੀਕਾਰੋ ਚ, ਪੁਣ੍ਡਰੀਕਂ. ਰਤ੍ਤਂ ਤੁ ਕਮਲਂ ‘‘ਕੋਕਨਦਂ, ਕੋਕਾਸਕੋ’’ਤਿ ਚੋਚ੍ਚਤੇ. ਕੋਕੇ ਨਾਦਯਤੀਤਿ ਕੋਕਨਾਦਂ, ਣੋ. ਰਤ੍ਤੁਪ੍ਪਲੇ ਚ, ‘‘ਕੋਕਨਦਂ, ਕੋਕਨੁਦ’’ਨ੍ਤਿਪਿ ਪਾਠੋ, ਕੇ ਕਨਤਿ ਦਿਬ੍ਬਤੀਤਿ ਵਾ ਕੋਕਨਦਂ, ਭੂਵਾਦਿ, ਦੋ, ਅਸ੍ਸੋ. ਕਨ ਦਿਤ੍ਤਿਕਨ੍ਤਿਗਤੀਸੁ, ਕੇ ਕਾਸਤੀਤਿ ਕੋਕਾਸਕੋ, ਣ੍ਵੁ, ਕਾਸ ਦਿਤ੍ਤਿਯਂ.
ਦ੍ਵਯਂ ਕੇਸਰੇ, ਕੇ ਜਾਯਤੀਤਿ ਕਿ, ਕਮਲਾਦਿ, ਤਸ੍ਮਿਂ ਜਾਯਤਿ, ਜਲਤੀਤਿ ਵਾ ਕਿਞ੍ਜਕ੍ਖੋ, ਖੋ, ਨਸ੍ਸ, ਲਸ੍ਸ ਵਾ ਕੋ, ਨਿਗ੍ਗਹੀਤਾਗਮੋ, ਕੇ ਸਰਤੀਤਿ, ਅ, ਸਤ੍ਤਮਿਯਾ ਅਲੋਪੋ, ਦ੍ਵਯਮਨਿਤ੍ਥੀ. ਦ੍ਵਯਂ ਪਦ੍ਮਾਦਿਦਣ੍ਡੇ. ਦਣ੍ਡਸਦਿਸਤਾਯ ਦਣ੍ਡੋ. ਨਲ ਗਨ੍ਧੇ, ਣੋ.
੬੮੭. ਦ੍ਵਯਂ ਮੁਲ਼ਾਲੇ. ਵਿਸ ਪੇਰਣੇ, ਵਸ੍ਸ ਭੋ, ਭਿਸਂ, ਭਾਸ ਦਿਤ੍ਤਿਯਂ ਵਾ, ਆਕਾਰਸ੍ਸਿ. ਮੂਲੇ ਜਾਯਤੀਤਿ ਮੁਲ਼ਾਲੋ, ਅਞ੍ਞਤ੍ਥੇ ਅਲੋ, ਰਸ੍ਸਾਦਿ, ਲ਼ਤ੍ਤਞ੍ਚ, ਮੂਲ ਪਤਿਟ੍ਠਾਯਂ ਵਾ, ਅਲੋ, ਸੇਸਂ ਪੁਬ੍ਬਸਦਿਸਂ, ਦ੍ਵਯਂਪ੍ਯਨਿਤ੍ਥੀ.
ਦ੍ਵਯਂ ਕਣ੍ਣਿਕਾਯਂ. ਬੀਜਸ੍ਸ ਕੋਸੋ ਆਕਰੋ ਬੀਜਕੋਸੋ. ਕਣ੍ਣੇ ਕਰੀਯਤੀਤਿ ਕਣ੍ਣਿਕਾ, ਕਣ੍ਣਾਲਙ੍ਕਾਰੋ, ਤਂਸਦਿਸਸਣ੍ਠਾਨਤਾਯ ਕਣ੍ਣਿਕਾ, ਪਦੁਮਾਦੀਨਂ ਸਮੂਹੇ ਗਹਨੇ ਵਨੇਤ੍ਯਤ੍ਥੋ. ਸਣ ਦਾਨੇ, ਡੋ, ਸਣ੍ਡਂ, ‘‘ਸਣ੍ਡਂ ਪਦ੍ਧਾਦਿਸਙ੍ਘਾਤੇ, ਗੋਪਤਿਮ੍ਹਿ ਪੁਮੇ ਭਵੇ’’ਤਿ ਨਾਨਤ੍ਥਸਙ੍ਗਹੋ.
੬੮੮. ਦ੍ਵਯਂ ਪਦ੍ਮਕੁਮੁਦਾਦਿਸਾਮਞ੍ਞੇ, ਤਥਾ ਹਿ ਪਦ੍ਮਂ ਮਹੋਪ੍ਪਲਂ ਸਿਤੋਪ੍ਪਲਮੁਚ੍ਚਤੇ, ‘‘ਕੁਵਲਯਂ ਉਪ੍ਪਲਞ੍ਚ, ਨੀਲਮਿਨ੍ਦੀਵਰਨ੍ਤਿ ਹਿ’’ਇਤਿ ਬ੍ਯਾਡਿ, ‘‘ਉਪ੍ਪਲਞ੍ਚ ਕੁਵਲਯਂ, ਨੀਲਮਿਨ੍ਦੀਵਰਂ ਮਤ’’ਨ੍ਤਿ ਭਾਗੁਰਿ ਚ, ‘‘ਰੋਮੋ ਸਿਤਿ ਚ ਨੀਲੋ, ਕੁਵਲਯਮਿਨ੍ਦੀਵਰਞ੍ਚ ਨੀਲਮ੍ਬੁਜ’’ਨ੍ਤਿ ਤੁ ਵਰਰੁਚਿ. ‘‘ਕੁਵਲਯਦਲਸਾਮੋਪ੍ਯਙ੍ਗਦਧਿਤਿ ਪਰਿਧੂ ਸਰ’’ਨ੍ਤਿ ਮਾਲਧਿ, ਮਾਧਵੋ ਚ, ਤਤ੍ਰ ਪੁਬ੍ਬਕਮਤਮਿਹ ਨਿਸ੍ਸੀਯਤੇ. ਯਦ੍ਯੇਵਂ ਕਥਮੁਪ੍ਪਲਸਦ੍ਦੇਨ ਨੀਲੁਪ੍ਪਲਾਦੀਸ੍ਵੇਵ ਬੁਦ੍ਧਿ, ਨ ਪਨ ਮਹੋਪ੍ਪਲਾਦਿਮ੍ਹੀਤਿ? ਵੁਚ੍ਚਤੇ – ਸਾਮਞ੍ਞੇਪਿ ਧਞ੍ਞਤ੍ਤੇ ਯਥਾ ਧਞ੍ਞਸਦ੍ਦੇਨ ਕਲਮਾਦੀਸ੍ਵੇਵ ਬੁਦ੍ਧਿ, ਨ ਪਨ ਮੁਗ੍ਗਾਦੀਸੁ, ਏਵਮਿਹਾਪਿ. ਉਪੁਬ੍ਬੋ ਪਾ ਪਾਨੇ, ਅਲੋ, ਦ੍ਵਿਤ੍ਤਂ, ਉਦਕੇ ਪ੍ਲਵਤੀਤਿ ਵਾ ਉਪ੍ਪਲਂ, ਯਦਾਦਿ. ਕੁਯਾ ਪਥਵਿਯਾ ਵਲਯਂ ਇਵ ਸੋਭਾਕਰਤ੍ਤਾ ਕੁਵਲਯਂ.
ਦ੍ਵਯਂ ਨੀਲੁਪ੍ਪਲੇ. ਨੀਲਵਣ੍ਣੇ, ਅ, ਨੀਲਂ, ਇਨ੍ਦਤੀਤਿ ਇਨ੍ਦੀ, ਨਦਾਦਿ, ਇਨ੍ਦੀ ਲਕ੍ਖੀ, ਤਸ੍ਸਾ ਵਰਂ ਇਨ੍ਦੀਵਰਂ, ਇਨ੍ਦ ਪਰਮਿਸ੍ਸਰਿਯੇ ਵਾ, ਈਰੋ.
ਅਸ੍ਮਿਂ ਨੀਲੁਪ੍ਪਲੇ ਸੇਤੇ ਕੁਮੁਦਂ ਨਾਮ. ਕੁਯਂ ਮੋਦਤੇ ਕੁਮੁਦਂ, ਣੋ. ਅਸ੍ਸ ਪਦੁਮਾਦਿਨੋ ਕਨ੍ਦੋ ਸਾਲੂਕਮੁਚ੍ਚਤੇ. ਕਂ ਸੁਖਂ ਦਦਾਤੀਤਿ ਕਨ੍ਦੋ, ਕਨ੍ਦ ਅਵ੍ਹਾਨੇ ਵਾ ਰੋਦਨੇ ਚ. ਸਲ ਗਮਨਤ੍ਥੋ ਦਣ੍ਡਕੋ ਧਾਤੁ, ਉਕੋ, ਦੀਘੋ, ਸਾਲੂਕਂ.
੬੮੯. ਤਿਕਂ ਰਤ੍ਤਾਰਤ੍ਤਸਾਮਞ੍ਞੇ. ਕਮਲਤੋ ਅਞ੍ਞਤਰਸ੍ਮਿਂ ਜਲਕੁਸੁਮੇ, ਨ ਤੁ ਰਤ੍ਤੇਯੇਵ, ਸੁਗਨ੍ਧੇਨ ਯੁਤ੍ਤਂ ਸੋਗਨ੍ਧਿਕਂ. ਕਸ੍ਸ ਹਾਰਂ ਇਵ ਸੋਭਾਕਰਤ੍ਤਾ ਕਲ੍ਲਹਾਰਂ, ਲਾਗਮੋ, ਦ੍ਵਿਤ੍ਤਞ੍ਚ. ਦਕਂ ਸੀਤਲਂ ਕਰੋਤੀਤਿ ਦਕਸੀਤਲਿਕਂ.
ਦ੍ਵਯਂ ਸੇਵਾਲੇ. ਉਦਕਂ ਸੇਵਤੀਤਿ ਸੇਵਾਲੋ, ਅਲੋ, ਵਕਾਰਾਗਮੋ, ਇਸ੍ਸੇ ਚ. ਨੀਲਤੀਤਿ ਨੀਲਿਕਾ, ਨੀਲ ਵਣ੍ਣੇ, ਇਕੋ, ਨੀਲਵਣ੍ਣਯੋਗਤੋ ਵਾ ਨੀਲਿਕਾ, ਸੇਵਲੋਪਿ, ਦ੍ਵਯਂ ਪਦ੍ਮਯੁਤ੍ਤੇ ਦੇਸੇ, ਪਦ੍ਮਸਮੂਹੇ ਚ. ਨਲ਼ਿਨੀ ਚ ਪਙ੍ਕਜਿਨੀ ਵਿਸਿਨੀ ਚ ਸਰੋਜਿਨੀ ਪਦ੍ਮਿਨੀਤਿ ਪਰਿਯਾਯਾ. ‘‘ਪਦ੍ਮਸਣ੍ਡਂ ਤਦਾਕਰੇ’’ਤਿ ਹਿ ਪਰਿਯਾਯਂ ਰਤਨਮਾਲਾਯਂ ਮਾਧਵੋ, ਵਿਸਂ ਸਮਂ, ਤਬ੍ਬਨ੍ਤਤਾਯ ਵਿਸਿਨੀ, ਇਨੋ, ਨਦਾਦਿ. ਅਮ੍ਬੁਜਯੋਗਤੋ, ਅਮ੍ਬੁਜਾਨਂ ਸਮੂਹਤੋ ਵਾ ਅਮ੍ਬੁਜਿਨੀ.
੬੯੦. ਤਿਲਬੀਜਾਦਯੋ ਸੇਵਾਲੋ ਨਾਮ. ਤਤ੍ਰ ਤਿਲਬੀਜਪ੍ਪਮਾਣਂ ਜਲਸਣ੍ਠਿਤਂ ਨੀਲਾਦਿਵਣ੍ਣਯੁਤ੍ਤਂ ਤਿਲਬੀਜਂ ਨਾਮ. ਸਙ੍ਖੋ ਨਾਮ ਸਪਤ੍ਤੋ ਅਪ੍ਪਕਣ੍ਡੋ ਉਖਾਪਿਧਾਨਾਦਿਪ੍ਪਮਾਣੋ ਸਮੂਲੋ ਏਕੋ ਸੇਵਾਲਵਿਸੇਸੋ. ਪਣਕੋ ਨਾਮ ਭਮਰਸਣ੍ਠਾਨੋ ਨੀਲਵਣ੍ਣੋ ਏਕੋ ਸੇਵਾਲਵਿਸੇਸੋ, ਪਣ ਸਙ੍ਖਾਤੇ, ਣ੍ਵੁ, ਪਣਕੋ.
ਪਾਤਾਲਵਗ੍ਗਵਣ੍ਣਨਾ ਨਿਟ੍ਠਿਤਾ.
ਇਤਿ ਸਕਲਬ੍ਯਾਕਰਣਮਹਾਵਨਾਸਙ੍ਗਞਾਣਚਾਰਿਨਾ ਕਵਿਕੁਞ੍ਜਰਕੇਸਰਿਨਾ ਧੀਮਤਾ ਸਿਰਿਮਹਾਚਤੁਰਙ੍ਗਬਲੇਨ ਮਹਾਮਚ੍ਚੇਨ ਵਿਰਚਿਤਾਯਂ ਅਭਿਧਾਨਪ੍ਪਦੀਪਿਕਾਵਣ੍ਣਨਾਯਂ ਭੂਕਣ੍ਡਵਣ੍ਣਨਾ ਸਮਤ੍ਤਾ.