੫. ਅਰਞ੍ਞਵਗ੍ਗਵਣ੍ਣਨਾ
੫੩੬. ਸਤ੍ਤਕਂ ਵਨੇ. ਅਰ ਗਮਨੇ, ਅਞ੍ਞੋ, ਅਰਞ੍ਞਂ. ਕੇਨ ਜਲੇਨ ਅਨਨਂ ਪਾਣਮਨਸ੍ਸ ਕਾਨਨਂ, ਦਾ ਅਵਖਣ੍ਡਨੇ, ਦਾ ਛੇਦਨੇ ਵਾ. ਅਧਿਕਰਣੇ ਣੋ, ‘‘ਆਕਾਰਨ੍ਤਾਨਮਾਯੋ’’ਤਿ ਆਯੋ. ਦਯ ਦਾਨਗਤਿਹਿਂ ਸਾਦਾਨੇਸੁ ਵਾ, ਣੋ, ਗਹ ਉਪਾਦਾਨੇ [ਗਾਹੂ ਵਿਲੋਲ਼ਨੇ (?)], ਅਧਿਕਰਣੇ ਯੁ. ਵਪ ਬੀਜਨਿਕ੍ਖੇਪੇ, ਇਨੋ, ਅਸ੍ਸਿਤ੍ਤਂ. ਵਨ ਸਮ੍ਭਤ੍ਤਿਸਦ੍ਦੇਸੁ, ਕਤ੍ਤਰਿ ਅ, ਵਨਂ. ਅਟਾ ਅਵਯਵੋ ਸੇਲਾ ਅਤ੍ਰੇਤਿ ਅਟਵਿ, ਇ, ਈਮ੍ਹਿ ਅਟਵੀ.
ਮਹਾਪਦੁਮਲਤਾਵਨਂ ਮਹਾਰਞ੍ਞਂ, ਨਦਾਦਿ, ਅਨਨ੍ਤੋ ਚ, ਅਰਞ੍ਞਾਨੀ.
੫੩੭. ਨਗਰਤੋ ਨਾਤਿਦੂਰਸ੍ਮਿਂ ਠਾਨੇ ਸਨ੍ਤੇਹਿ ਅਭਿਰੋਪਿਤੋ ਤਰੁਸਣ੍ਡੋ ਪੂਗਪਨਸਾਦਿਤਰੁਸਮੂਹੋ ਅਤ੍ਥਿ, ਸੋ ‘‘ਉਪਵਨ’’ਨ੍ਤਿ ਚੋਚ੍ਚਤੇ, ਕਿਤ੍ਤਿਮਵਨਮੇਤਂ. ਆਰਮਨ੍ਤ੍ਯਸ੍ਮਿਨ੍ਤਿ ਆਰਾਮੋ, ਣੋ. ਉਪਗਤਂ, ਉਪਰੋਪਿਤਂ ਵਾ ਵਨਂ ਉਪਵਨਂ.
੫੩੮. ਸਬ੍ਬਸਾਧਾਰਣਂ ਸਬ੍ਬਲੋਕੇਹਿ ਸਾਧਾਰਣੋਪਭੋਗਂ ਰਞ੍ਞਂ ਰਾਜੂਨਂ ਅਰਞ੍ਞਂ ‘‘ਉਪਵਨਂ, ਉਯ੍ਯਾਨ’’ਮਿਤ੍ਯੁਚ੍ਚਤੇ, ਉਲ੍ਲੋਕੇਨ੍ਤਾ ਯਨ੍ਤਿ ਜਨਾ ਏਤਸ੍ਮਿਨ੍ਤਿ ਉਯ੍ਯਾਨਂ, ਯੁ. ਆਕੀਲ਼ੋਪ੍ਯਤ੍ਰ.
ਤਦੇਵ ਰਾਜੋਪਵਨਮੇਵ ਉਪਕਾਰਿਕਾਸਨ੍ਨਿਹਿਤਂ, ਪੁਰਸਨ੍ਨਿਹਿਤਂ ਵਾ ਅਨ੍ਤੇਪੁਰਾਚਿਤਂ ਪਮਦਵਨਾਖ੍ਯਂ. ਯਤ੍ਰ ਅਨ੍ਤੇਪੁਰਸਹਿਤੋ ਏਵ ਰਾਜਾ ਵਿਹਰਤਿ, ਨਾਞ੍ਞਜਨਪ੍ਪਵੇਸੋ. ਪਮਦਾਨਂ ਇਤ੍ਥੀਨਂ ਵਨਂ ਪਮਦਵਨਂ, ਰਸ੍ਸੋ.
੫੩੯-੫੪੦. ਸਾਨ੍ਤਰਾਲ਼ਾ ਪਨ੍ਤਿ, ਯਥਾ – ਤਰੁਪਨ੍ਤਿ, ਪਾਸਾਦਪਨ੍ਤਿ, ਨਿਰਨ੍ਤਰਾਲ਼ਾ ਤੁ ਰਾਜੀਤਿ. ਤਤ੍ਰ ਪਞ੍ਚਕਂ ਪਨ੍ਤਿਯਂ. ਪਨ ਬ੍ਯਵਹਾਰੇ, ਥੁਤਿਮ੍ਹਿ ਚ, ਪਨ੍ਤਿ. ਵੀ ਗਮਨੇ, ਥਿ, ਵੀਥਿ. ਵਲ ਸਂਵਰਣੇ, ਇ, ਆਵਲਿ. ਆਲਿਪਿ, ਅਲਧਾਤੁਮ੍ਹਾ ਇ. ਸਿ ਸੇਵਾਯਂ, ਣਿ, ਸੇਣਿ. ਪਾ ਰਕ੍ਖਣੇ, ਲ਼ਿ, ਪਾਲ਼ਿ, ਸੋਗਤੇਪਿ. ਦ੍ਵੇ ਸਮਾ. ਲਿਖ ਲੇਖਨੇ, ਅ. ਰਾਜ ਦਿਤ੍ਤਿਯਂ, ਇ.
ਤਿਪਾਦਂ ਰੁਕ੍ਖਮਤ੍ਤੇ. ਪਾਦੇਨ ਮੂਲੇਨ ਪਿਵਤੀਤਿ ਪਾਦਪੋ, ਣੋ. ਵਿਟਪਯੋਗਾ ਵਿਟਪੀ. ਰੁਕ੍ਖ ਵਰਣੇ, ਅ, ਰੁਹ ਜਨਨੇ ਵਾ, ਖੋ, ਹਸ੍ਸ ਕੋ. ਨ ਗਚ੍ਛਤੀਤਿ ਅਗੋ. ਸਲ ਗਮਨੇ, ਣੋ, ਸਾਰਵਨ੍ਤਤਾਯ ਵਾ ਸਾਰੋ, ਸੋ ਏਵ ਸਾਲੋ, ਅਞ੍ਞਤ੍ਰੋਪਚਾਰਾ. ਮਹਿਯਂ ਰੁਹਤੀਤਿ, ਅ. ਦੁ ਗਤਿਯਂ, ਮੋ. ਤਰ ਤਰਣੇ, ਉ. ਕੁਤੋ ਭੂਮਿਤੋ ਜਾਯਤੀਤਿ ਕੁਜੋ, ਅਙ੍ਗਾਰੇਪਿ. ਸਾਖਾਯੋਗਤੋ ਸਾਖੀ.
ਗਮੁ ਗਮਨੇ, ਣੋ, ‘‘ਗਮਿਸ੍ਸਨ੍ਤੋ ਚ੍ਛੋ ਵਾ ਸਬ੍ਬਾਸੂ’’ਤਿ ਚ੍ਛੋ. ਖੁਦ੍ਦੋ ਅਵੁਡ੍ਢਿਪ੍ਪਤ੍ਤੋ ਪਾਦਪੋ ਖੁਦ੍ਦਪਾਦਪੋ. ਯੇ ਰੁਕ੍ਖਾ ਪੁਪ੍ਫਂ ਵਿਨਾ ਅਪੁਪ੍ਫਕਾ ਫਲਨ੍ਤਿ, ਤੇ ਅਸ੍ਸਤ੍ਥੋਦੁਮ੍ਬਰਪਨਸਾਦਯੋ ‘‘ਵਨਪ੍ਪਤੀ’’ਤਿ ਵੁਚ੍ਚਨ੍ਤਿ, ਵਨਾਨਂ ਪਤਿ ਵਨਪ੍ਪਤਿ. ਪੁਪ੍ਫਤੋ ਜਾਤਫਲਾ ਪਨ ਅਮ੍ਬਖਜ੍ਜੂਰਾਦਯੋ ਵਾਨਪ੍ਪਤਯੋ. ਵਨਪ੍ਪਤਿਮ੍ਹਿ ਭਵਾ ਵਾਨਪ੍ਪਤਯੋ.
੫੪੧. ਯੋ ਫਲਪਾਕਾਵਸਾਨੇ ਮਰਤਿ, ਸੋ ਕਦਲੀਧਞ੍ਞਾਦਿਕੋ ਓਸਧਿ ਨਾਮ ਭਵੇ, ਓਸੋ ਧੀਯਤੇ ਯਸ੍ਸਂ [ਓਸੋ ਗ੍ਲੋਸੋ ਦਿਤ੍ਤਿਬ੍ਬਾ ਧੀਯਤੇ’ਤ੍ਰ ਬ੍ਯਾਖ੍ਯਾਸੁਧਾ ੨.੪.੬], ਸਾ ਓਸਧਿ, ਇ. ਸਾਸਦ੍ਦੋ ਓਸਧਿਸਦ੍ਦਸ੍ਸ ਇਤ੍ਥਿਲਿਙ੍ਗਤ੍ਤਦੀਪਕੋ.
ਦ੍ਵਯਂ ਉਤੁਪ੍ਪਤ੍ਤੇਪਿ ਫਲਹੀਨੇ. ਵਨ ਯਾਚਨੇ, ਝੋ, ਵਞ੍ਝਾ, ਵਧਤਿ ਫਲਨ੍ਤਿ ਵਾ ਵਞ੍ਝਾ, ਵਜਾਦਿਨਾ ਯੋ, ਝਸ੍ਸ ਝੋ, ਨਿਗ੍ਗਹੀਤਾਗਮੋ ਚ. ਨ ਵਿਜ੍ਜਤਿ ਫਲਮੇਤਿਸ੍ਸਾਤਿ ਅਫਲਾ, ਦ੍ਵੇ ਤੀਸੁ. ਤਿਕਂ ਵਤ੍ਤਮਾਨਫਲੇ ਰੁਕ੍ਖਾਦੋ. ਫਲਯੋਗਾ, ਇਨੋ, ਵਨ੍ਤੁ, ਈ ਚ.
੫੪੨. ਚਤੁਕ੍ਕਂ ਵਿਕਸਿਤੇ. ਫੁਲ੍ਲ ਵਿਕਸਨੇ, ਕਤ੍ਤਰਿ ਤੋ, ਸਞ੍ਜਾਤਤ੍ਥੇ ਵਾ ਇਤੋ, ਫਲ ਵਿਸਰਣੇ ਵਾ, ਵਿਸਰਣਂ ਵਿਕਾਸੋ, ਅਸ੍ਸੁ. ਕਚ ਬਨ੍ਧਨੇ, ਵਿਪੁਬ੍ਬੋ ਵਿਕਸਨੇ, ਕਤ੍ਤਰਿ ਅ. ਵਿਕਚਤੇ ਵਿਦਲਤਿ ਵਿਸਿਲਿਟ੍ਠਦਲੋ ਭਵਤੀਤਿ ਵਾ ਵਿਕਚੋ, ਅ, ਵਿਸਦ੍ਦੋ ਵਿਸਿਲੇਸਜੋਤਕੋ. ਕਸ ਗਮਨੇ, ਤੋ. ਦਲਾਨਂ ਅਞ੍ਞਮਞ੍ਞਂ ਵਿਸਿਲੇਸਤੋ ਸਮੁਦਾਯੋ ‘‘ਵਿਕਸਿਤੋ’’ਤ੍ਯੁਚ੍ਚਤੇ. ਫੁਟੋਪ੍ਯਤ੍ਰ. ਫੁਟ ਵਿਕਸਨੇ.
ਪਾਦੋ ਰੁਕ੍ਖਗ੍ਗੇ. ‘‘ਨ ਨਾ’ਗ੍ਗਂ ਸਿਖਰਂ ਸਿਰੋ’’ਤਿ ਵੋਪਾਲਿਤਵਚਨਤੋ ‘‘ਸਿਰਸੋ ਅਗ੍ਗ’’ਨ੍ਤਿ ਨ ਛਟ੍ਠੀਸਮਾਸੋ. ਸਿਰੋ ਵੁਤ੍ਤੋ. ਅਜ ਗਮਨੇ, ਗੋ, ਅਗ੍ਗਂ, ਸੇਟ੍ਠੇ ਤੀਸੁ. ਸੀ ਸਯੇ, ਖਰੋ, ਸਿਖਾ ਵਾ ਚੂਲ਼ਾ, ਸਾ ਵਿਯ ਜਾਯਤੀਤਿ ਸਿਖਰੋ. ਦ੍ਵਯਂ ਸਾਖਾਯਂ. ਸਾਖ ਬ੍ਯਾਪਨੇ, ਅ. ‘‘ਲਤਾ ਵਲ੍ਲੀ ਸਮਾਖ੍ਯਾਤਾ, ਲਤਾ ਸਾਖਾ ਚ ਸਾਖਿਨ’’ਨ੍ਤਿ ਲਤਾ ਨਾਨਤ੍ਥਾ. ਲਾ ਆਦਾਨੇ, ਤੋ, ਰਸ੍ਸੋ.
੫੪੩. ਛਕ੍ਕਂ ਪਤ੍ਤੇ. ਦਲਤਿ ਵਿਕਸਤੀਤਿ ਦਲਂ, ਅ. ਲਸ ਕਨ੍ਤਿਯਂ, ਪਕਾਰੇਨ ਲਸਤੀਤਿ ਪਲਾਸੋ, ਣੋ. ਛਦ ਸਂਵਰਣੇ, ਛਾਦੀਯਤੇ ਯੇਨ ਛਦਨਂ, ਯੁ. ਪੂਰਯਤੀਤਿ ਪਣ੍ਣਂ, ਨਿਪਾਤਨਾ, ਪਤ ਅਧੋਗਮਨੇ ਵਾ, ਪਤਤ੍ਯਚਿਰੇਨ ਪਣ੍ਣਂ, ਪਤ੍ਤਞ੍ਚ, ਤੋ, ਪੁਮੇ. ਸਞ੍ਞਾਯਂ ਣਮ੍ਹਿ ਛਦੋ.
ਦ੍ਵਯਂ ਪਤ੍ਤਾਦਿਸਙ੍ਘਾਤਵਤਿ ਸਾਖਾਯ ਪਬ੍ਬੇ. ਪਲ੍ਲ ਗਮਨੇ, ਅਵੋ. ਕਿਸ ਗਮਨੇ, ਯੋ, ਲਾਗਮੋ ਮਜ੍ਝੇ. ਦ੍ਵਯਂ ਅਙ੍ਕੁਰੇ. ਨਵੋ ਏਵ ਉਬ੍ਭਿਤੋ ਉਗ੍ਗਤੋ ਨਵੁਬ੍ਭਿਨ੍ਨੋ. ਅਙ੍ਕ ਲਕ੍ਖਣੇ, ਉਰੋ.
੫੪੪. ਪਕ੍ਕਂ ਯਾਵ ਪਾਦੇਨ ਨਾਮਂ. ਵਿਕਾਸੋ ਮੁਖਪਬੁਦ੍ਧਕਲਿਕਾਯਂ ਮਕੁਲ਼ਾਦਿਦ੍ਵਯਂ. ਮੁਚ ਮੋਚਨੇ, ਉਲੋ, ਉਸ੍ਸਤ੍ਤਂ, ਚਸ੍ਸ ਕੋ, ਮਕੁਲ਼ਂ, ਮਕੁਲ਼ੋ ਵਾ. ਕੁਟ ਛੇਦਨੇ, ਮਲੋ, ਅਸ੍ਸੁ, ਕੁਟੁਮਲੋ, ਕੁਤੁਮਲੋਪਿ. ਪੁਪ੍ਫਸ੍ਸ ਚ ਫਲਸ੍ਸ ਚ ਪਕਤਿਭੂਤੇ ਜਾਲਪਤ੍ਤੇ ਖਾਰਕਾਦਿਦ੍ਵਯਂ. ਖੁਰ ਵਿਨਾਸੇ. ਣ੍ਵੁ. ਜਲ ਧਞ੍ਞੇ, ਸਕਤ੍ਥੇ ਕੋ. ਜਾਲਕਂ ਨਪੁਂਸਕੇ. ਦ੍ਵਯਂ ਜਾਲਕਤੋ ਪਵੁਦ੍ਧੇ ਪੁਪ੍ਫੇ, ਫਲੇ ਚ. ਕਲ ਸਙ੍ਖ੍ਯਾਨੇ, ਣ੍ਵੁ, ਕੁਰ ਸਦ੍ਦੇ, ਣ੍ਵੁ.
ਪੁਪ੍ਫਾਦਿਬਨ੍ਧਨਂ ਪੁਪ੍ਫਫਲਾਨਂ ਬਨ੍ਧਨਂ ਵਣ੍ਟਂ ਨਾਮ. ਬਨ੍ਧੀਯਤੇ ਯੇਨ ਵਣ੍ਟਂ, ਵਜਾਦਿ.
੫੪੫. ਤਿਕਂ ਪੁਪ੍ਫੇ. ਪਸੁ ਪਾਣਿਗਬ੍ਭਵਿਮੋਚਨੇ, ਣੋ. ਖਪਣਕਭਾਸਾਯ ਰੁਕ੍ਖੋਪਿ ਪਾਣਿ, ਵੁਦ੍ਧਾਦਿ, ਪਸਵੋ. ਕੁਸ ਅਕ੍ਕੋਸੇ, ਉਮੋ, ਕਸ ਗਮਨੇ ਵਾ, ਕਾਸ ਦਿਤ੍ਤਿਯਂ ਵਾ, ਉਮੋ, ਰਸ੍ਸੋ. ਪੁਪ੍ਫ ਵਿਕਸਨੇ, ਪੁਪ੍ਫਤੀਤਿ, ਅ. ਪੁਪ੍ਫਜੋ ਰਜੋ ਪੁਪ੍ਫਧੂਲੀ ਪਰਾਗੋ ਨਾਮ, ਰਨ੍ਜ ਰਙ੍ਗੇ, ਣੋ.
ਮਧੁਰਪੁਪ੍ਫਰਸੋ ਮਕਰਨ੍ਦੋ ਨਾਮਾਤਿ ਮਤਂ. ਮਕ੍ਖਿਕਾ ਰਮਨ੍ਤਿ ਯਸ੍ਮਿਂ ਮਕਰਨ੍ਦੋ, ਵਜਾਦਿ. ਦ੍ਵਯਂ ਕਲਿਕਾਭਿ ਆਕਿਣ੍ਣੇ ਪਰਿਣਾਯਵਤਿ. ਥੁ ਅਭਿਤ੍ਥਵੇ, ਣ੍ਵੁ, ਥਵਕੋ. ਗੁਧ ਪਰਿਵੇਧਨੇ, ਣ੍ਵੁ, ਧਸ੍ਸ ਛੋ, ਗੋਚ੍ਛਕੋ.
੫੪੬-੫੪੭. ਆਮੇ ਅਪਕ੍ਕੇ ਫਲੇ ਸਲਾਟੁ ਉਤ੍ਤੋ, ਸਲਾਟ ਬਾਲ੍ਯਪਰਿਭਾਸਨੇਸੁ, ਉ, ਵਿਜ੍ਜਮਾਨਬਾਲ੍ਯਤਾਯ ਸਲਾਟੁ. ਪਕ੍ਕਨ੍ਤੁ ਫਲਂ ਨਿਪ੍ਪਰਿਯਾਯੇਨ ‘‘ਫਲ’’ਮਿਤ੍ਯੁਚ੍ਚਤੇ, ਤੇਨ ‘‘ਆਮਸ੍ਮਿਂ ਫਲਵੋਹਾਰੋ ਰੂਲ਼੍ਹਿਯਾ ਪਵਤ੍ਤਤੀ’’ਤਿ ਞਾਤਬ੍ਬੋ, ਫਲ ਨਿਪ੍ਫਤ੍ਤਿਯਂ, ਨਿਪ੍ਫਤ੍ਤਿ ਚਾਤ੍ਰ ਸੁਪਕ੍ਕਤ੍ਤਂ, ਸੁਕ੍ਖੇ ਤੁ ਫਲੇ ਵਾਨੋ. ਤਤ੍ਰ ਸਲਾਟੁ ਵਾਨਾ ਤੀਸੁ, ਯਥਾ ਸਲਾਟੁ ਜਮ੍ਬੂ, ਸਲਾਟਵੋ ਮਾਸਾ, ਸਲਾਟੂਨਿ ਕੁਮ੍ਭਣ੍ਡਾਨਿ, ਵਾਨਾ ਹਰੀਟਕੀ, ਵਾਨੋ ਮੁਗ੍ਗੋ, ਵਾਨਮਮ੍ਬਂ.
ਚਮ੍ਪਕਾਦਿ ਚਮ੍ਪਕਂ ਕਰਵੀਰਂ ਕਦਮ੍ਬਕਂ ਅਸੋਕਂ ਕਣ੍ਣਿਕਾਰਂ ਚਮ੍ਪਕਾਦੀਨਂ ਪੁਪ੍ਫਂ ਵਿਕਾਰੋ, ਅਵਯਵੋ ਚੇਤਿ ਅਞ੍ਞਤ੍ਥੇ ਣੋ ਨ ਭਵਤਿ, ਤਦਨ੍ਤਤੋ ਪੁਪ੍ਫਸ੍ਸੁਪ੍ਪਤਿਤਤੋ, ਏਵਂ ਚਮ੍ਪਕਾਦੀਨਿ ਕੁਸੁਮਨਾਮਾਨਿ ਨਪੁਂਸਕੇ ਵਤ੍ਤਨ੍ਤਿ, ਅਮ੍ਬਾਦਿ ਦਾਲ਼ਿਮਂ ਨਾਰਙ੍ਗਂ ਆਮਲਕਂ ਕੁਵਲਂ ਬਦਰਨ੍ਤਿ ਪਕਤ੍ਯਨ੍ਤਰਮੇਵ ਫਲੇ ਵਤ੍ਤਤੇ, ਆਮਲਕਿਯਾ ਕੁਵਲਿਯਾ ਬਦਰਿਯਾ ਫਲਂ ਵਿਕਾਰੋ, ਅਵਯਵੋ ਚੇਤਿ ਅਞ੍ਞਤ੍ਥੇ ਤਦ੍ਧਿਤੋਪਿ ਨੋਪ੍ਪਜ੍ਜਤੇ, ਤਦਨ੍ਤਤੋ ਫਲਸ੍ਸੁਪ੍ਪਤਿਤਤੋ, ਏਵਂ ਅਮ੍ਬਾਦੀਨਿ ਫਲਨਾਮਾਨਿ ਨਪੁਂਸਕੇ ਵਤ੍ਤਨ੍ਤਿ. ਮਲ੍ਲਿਕਾਦਯੋ ਕੁਸੁਮੇਪਿ ਵਤ੍ਤਮਾਨਾ ਸਲਿਙ੍ਗਾ ਪਕਤਿਲਿਙ੍ਗਾਅਭੇਦੋਪਚਾਰੇਨ ਪਵਤ੍ਤਿਯਾ, ਯਥਾ – ਮਲ੍ਲਿਕਾ ਜਾਤਿ, ਵਨਮਲ੍ਲਿਕਾ ਇਚ੍ਚਾਦਿ. ਵੀਹਯੋਪ੍ਯਭੇਦੋਪਚਾਰੇਨ ਫਲੇਪਿ ਸਲਿਙ੍ਗਾ, ਯਥਾ ਮਾਸਸ੍ਸ ਫਲਂ ਮਾਸੋ, ਮੁਗ੍ਗਸ੍ਸ ਫਲਂ ਮੁਗ੍ਗੋ, ਏਵਂ ਯਵੋ, ਤਿਲੋ, ਅਤਸੀ, ਕਙ੍ਗੁ, ਧਞ੍ਞਂ.
ਤਿਕਂ ਜਮ੍ਬੁਯਾ ਫਲੇ. ਤਤ੍ਰ ਯਦਾ ਲੋਕਤੋ ਫਲੇ ਵੁਤ੍ਤਿ, ਤਦਾ ਜਮ੍ਬੁਸਦ੍ਦੋ ਪਕਤ੍ਯਨ੍ਤਰਮੇਵ ਫਲੇ ਵਤ੍ਤਤੇ, ਯਦਾ ਨ ਫਲਵੁਤ੍ਤਿ, ਤਦਾ ਵਿਕਾਰੇ ਅਵਯਵੇ ਵਾਨੋ, ਜਮ ਅਦਨੇ, ਬੂ, ਜਮ੍ਬੂ, ਪਕਤ੍ਯਨ੍ਤਰਾਫਲੇ ਵੁਤ੍ਤਿ. ਜਮ੍ਬੁਯਾ ਫਲਂ ਜਮ੍ਬੁਵਂ. ਜਮ੍ਬੁ ਚ. ਲੋਕਤੋ ਏਵ ਫਲੇਪਿ ਵਤ੍ਤਮਾਨਾ ਹਰੀਟਕ੍ਯਾਦਯੋ ਸਭਾਵਤੋ ਇਤ੍ਥਿਯਂ ਭਵਨ੍ਤਿ [ਅਮਰ ੧੪.੧੮-੨੦]. ਹਰੀਟਕਿਯਾ ਫਲਂ ਹਰੀਟਕੀ, ਏਵਂ ਕੋਸਾਤਕੀ, ਸਲ੍ਲਕੀ, ਦਕ੍ਖਾ, ਕਣ੍ਡਕਾਰਿਕਾ, ਸੇਫਾਲਿਕਾ ਇਚ੍ਚਾਦਿ, ਪੁਬ੍ਬੇ ਵਿਯ ਵਿਕਾਰਾਵਯਵਤ੍ਥੇਸੁ ਪਚ੍ਚਯਾਭਾਵੋ, ਅਸ੍ਸਤ੍ਥਾਦਿਕਂ ਛਕ੍ਕਮੇਵ ਤਦ੍ਧਿਤਨ੍ਤਂ ਅਸ੍ਸਤ੍ਥਾਦੀਨਂ ਫਲੇ ਵਤ੍ਤਮਾਨਾਨਂ ਨਪੁਂਸਕਂ ਸਿਯਾ ਰੂਪਭੇਦੋ, ਯਥਾ – ਅਸ੍ਸਤ੍ਥਸ੍ਸ ਫਲਂ ਅਸ੍ਸਤ੍ਥਂ, ਵੇਣੁਨੋ ਫਲਂ ਵੇਣਵਂ, ਪਿਲਕ੍ਖਸ੍ਸ ਫਲਂ ਪਿਲਕ੍ਖਂ, ਨਿਗ੍ਰੋਧਸ੍ਸ ਫਲਂ ਨਿਗ੍ਰੋਧਂ, ਇਙ੍ਗੁਦਿਯਾ ਫਲਂ ਇਙ੍ਗੁਦਂ, ਬ੍ਰਹਤਿਯਾ ਫਲਂ ਬ੍ਰਾਹਤਂ, ਵਿਦਾਰੀ ਅਂਸੁਮਤੀ ਗਮ੍ਭਰਿਯਾਦਯੋ ਮੂਲੇ, ਪੁਪ੍ਫੇਪਿ ਸਲਿਙ੍ਗਾ [ਅਮਰ ੧੪.੧੮-੨੦]. ਪਾਟਲਾਸਦ੍ਦੋ ਪਨ ਅਭੇਦਵਤ੍ਤਿਚ੍ਛਾਯਂ ਮੂਲੇ ਪੁਪ੍ਫੇਪਿ ਵਤ੍ਤਮਾਨੋ ਸਭਾਵਤੋ ਇਤ੍ਥਿਲਿਙ੍ਗੋ, ਭੇਦਵਤ੍ਤਿਚ੍ਛਾਯਂ ਵਿਕਾਰੇ ਅਵਯਵੇ ਵਾ ਣਮ੍ਹਿ ਪਾਟਲਂ [ਅਮਰ ੧੪.੧੮-੨੦]. ਦ੍ਵਯਂ ਸਾਖਾਪਲ੍ਲਵਾਦਿਸਮੁਦਾਯਲਕ੍ਖਣੇ ਆਭੋਗੇ, ਵਿਟ ਵੇਧਨੇ, ਵਿਟ ਅਕ੍ਕੋਸੇ ਵਾ, ਅਪੋ, ਪਸ੍ਸ ਭਤ੍ਤੇ ਵਿਟਭੀ, ਨਦਾਦਿ.
੫੪੮. ਮੂਲਮਾਰਬ੍ਭ ਮੂਲਤੋ ਪਟ੍ਠਾਯ ਸਾਖਨ੍ਤੋ ਸਾਖਾਵਧਿ ਤਰੁਸ੍ਸ ਭਾਗੋ ਖਨ੍ਧੋ ਨਾਮ, ਯੋ ‘‘ਪਕਣ੍ਡੋ’’ਤਿਪਿ ਵੁਚ੍ਚਤਿ, ਖਨੁ ਅਵਦਾਰਣੇ, ਧੋ, ਖਨ੍ਧੋ, ਖਾਦ ਭਕ੍ਖਨੇ ਵਾ, ਕੋ, ‘‘ਖਾਦਾਮਗਮਾਨਂ ਖਨ੍ਧਨ੍ਧਗਨ੍ਧਾ’’ਤਿ ਖਨ੍ਧਾਦੇਸੋ, ਕਲੋਪੋ.
ਰੁਕ੍ਖਚ੍ਛਿਦ੍ਦੇ ਰੁਕ੍ਖਾਦੀਨਂ ਵਿਵਰੇ ਕੋਟਰੋ. ਕੁਟ ਛੇਦਨੇ, ਅਰੋ, ਕੋਟਰੋ, ਨਿਕ੍ਕੁਹੋਪਿ. ਦ੍ਵੇ ਸਮਾ. ਕਾਸ ਦਿਤ੍ਤਿਯਂ, ਕਾਸਤੇ ਅਗ੍ਗਿਨਾ ਦਿਪ੍ਪਤੇਤਿ ਕਟ੍ਠਂ, ਤੋ, ਤਸ੍ਸ ਟ੍ਠੋ, ਰਸ੍ਸੋ ਚ, ਕਸ ਗਮਨੇ ਵਾ, ਤੋ, ਕਟ੍ਠਂ. ਦਰ ਵਿਦਾਰਣੇ, ਣੁ.
੫੪੯. ਤਿਕਂ ਮੂਲੇ. ਵੁ ਸਂਵਰਣੇ, ਦੋ, ਨਿਗ੍ਗਹੀਤਾਗਮੋ, ਬੁਧ ਗਮਨੇ ਵਾ, ਅ, ਧਸ੍ਸ ਦੋ. ਮੂਲ ਪਤਿਟ੍ਠਾਯਂ, ਣੋ, ਪਾਦਸਦ੍ਦੇਨ ਤਪ੍ਪਰਿਯਾਯਾ ਚਰਣਤ੍ਥਾ ਸਬ੍ਬੇ ਸਙ੍ਗਹਿਤਾ, ਪਾਦਸਦਿਸਤ੍ਤਾ ਪਾਦੋ, ਦ੍ਵਯਂ ਛਿਨ੍ਨਸ੍ਸ ਤਰੁਕ੍ਖਨ੍ਧਸ੍ਸ ਭੂਮਿਟ੍ਠਭਾਗੇ. ਸਙ੍ਕ ਸਙ੍ਕਾਯਂ, ਉ, ਸਕ ਸਤ੍ਤਿਯਂ ਵਾ, ਨਿਗ੍ਗਹੀਤਾਗਮੋ. ਖਨੁ ਅਵਦਾਰਣੇ, ਣੁ, ਖਾਣੁ. ਧੁਵੋਪਿ, ਧੁਵਤਿ ਥਿਰਾਯਤੇਤਿ ਧੁਵੋ, ਧੁ ਗਤਿਥੇਰਿਯੇਸੁ, ਅ, ਉਵਾਦੇਸੋ.
ਦ੍ਵਯਂ ਵਿਦਾਰਿਯਾਦੀਨਂ ਕਨ੍ਦੇ. ਕੁਯਂ ਪਥਵਿਯਂ ਰੁਹਤੀਤਿ ਕੁਰੁਹਾਟਂ, ਅਟੋ, ਕਨ੍ਦ ਅਵ੍ਹਾਨੇ, ਰੋਦਨੇ ਚ, ‘‘ਕਰਹਾਟੋ’ਮ੍ਬੁਜਕਨ੍ਦੇ, ਪੁਪ੍ਫਰੁਕ੍ਖਭੀਤੇਸੁ ਚੇ’’ਤਿ ਨਾਨਤ੍ਥਸਙ੍ਗਹੇ. ਦ੍ਵਯਂ ਹਲਾਦੀਨਂ ਕਲੀਰੇ. ਕਲ ਸਙ੍ਖ੍ਯਾਨੇ, ਈਰੋ. ਮਸ ਆਮਸਨੇ, ਥਕੋ, ਮਤ੍ਥਕੇ ਸੀਸੇ ਵਾ ਜਾਤੋ ਮਤ੍ਥਕੋ.
੫੫੦. ਦ੍ਵੇ ਸਮਾ. ਅਭਿਨਵਨਿਗ੍ਗਤਾ ਆਯਤਾ ਸਕੁਸੁਮਾ, ਕੁਸੁਮਸੁਞ੍ਞਾ ਚ ਮਞ੍ਜਰੀ, ਵਲ੍ਲਰੀ ਤੁ ਤਦਞ੍ਞਾਪਿ, ਯਥਾ ਤਾਲਵਲ੍ਲਰੀ, ਵਲ, ਵਲ੍ਲ ਸਂਵਰਣੇ, ਅਰੋ, ਨਦਾਦਿ. ਮੁਞ੍ਜਯੋਗਤੋ ਮਞ੍ਜਰੀ, ਰੋ, ਨਦਾਦਿ, ਉਸ੍ਸਤ੍ਤਞ੍ਚ, ਦ੍ਵੇਪਿ ਨਾਰੀ. ਦ੍ਵਯਂ ਲਤਾਯਂ. ਵਲ੍ਲ ਸਂਵਰਣੇ, ਨਦਾਦਿ. ਲਤਾ ਵੁਤ੍ਤਾ, ‘‘ਲਤਾ ਪਤਾਨਿਨੀ ਵਲ੍ਲੀ ਮਤਕੀਥਾ’’ਤਿ ਹਲਾਯੁਧੋ.
ਅਕ੍ਖਨ੍ਧੋ ਅਪ੍ਪਕ੍ਖਣ੍ਡੋ, ਬਹੁਪਤ੍ਤਤਚਦਣ੍ਡਿਕਾਦਿ. ਯੋ ਵਾ ਤਨੁਪਕਣ੍ਡੋ ਵਂਸਨਲ਼ਾਦਿ, ਸੋ ‘‘ਥਮ੍ਬੋ, ਗੁਮ੍ਬੋ’’ਤਿ ਚੋਚ੍ਚਤੇ, ਥਕ ਸਂਵਰਣੇ, ਬੋ, ਕਸ੍ਸ ਮੋ. ਗੁਪ ਰਕ੍ਖਣੇ, ਬੋ, ਪਸ੍ਸ ਮੋ. ਪਤਾਨੋ ਸਾਖਾਪਤ੍ਤਚਯੋ, ਤੇਨ ਯੁਤ੍ਤਾ ਗੋਰਕ੍ਖਾ ਤਮ੍ਬੂਲਿ ਧਿਵੁਸਜੀਮੂਤ ਗਲ਼ੋਝਾਦਿਕਾ ਲਤਾ, ਸਾ ਵੀਰੁ ਨਾਮ, ਵਿਵਿਧੇਹਿ ਰੁਹਤੀਤਿ ਕਤ੍ਵਾ, ਕ੍ਵਿ, ਵੀਰੁ, ਦੀਘਾਦਿ, ਗੁਮ੍ਬਿਨੀਪਿ.
੫੫੧. ਪਜ੍ਜੇ ਪਾਦੇਨ ਨਾਮਂ. ਯਤ੍ਰ ਦ੍ਵਯਂ ‘‘ਬੋਧਿਰੁਕ੍ਖੋ’’ਤਿ ਸਞ੍ਞਿਤੇ ਬੁਦ੍ਧਸ੍ਸ ਭਗਵਤੋ ਸਬ੍ਬਞ੍ਞੁਤਞ੍ਞਾਣਪ੍ਪਟਿਲਾਭਟ੍ਠਾਨਭੂਤੇ ਦੁਮਰਾਜੇ, ਅਞ੍ਞਤ੍ਰ ਤੂਪਚਾਰਾ. ਅਸ੍ਸਂ ਸਬ੍ਬਞ੍ਞੁਤਞ੍ਞਾਣਂ ਤਿਟ੍ਠਤਿ ਏਤ੍ਥਾਤਿ ਅਸ੍ਸਤ੍ਥੋ, ਠਸ੍ਸ ਥੋ, ਦ੍ਵਿਤ੍ਤਂ, ਮਾਰਵਿਜਯਸਬ੍ਬਞ੍ਞੁਤਞ੍ਞਾਣਪ੍ਪਟਿਲਾਭਾਦਿਕੇਹਿ ਭਗਵਨ੍ਤਂ ਅਸ੍ਸਾਸੇਤੀਤਿ ਵਾ ਅਸ੍ਸਤ੍ਥੋ, ਆਪੁਬ੍ਬੋ ਸਾਸ ਅਨੁਸਿਟ੍ਠਿਯਂ, ਤੋਸਨੇ ਚ ਵਤ੍ਤਤਿ, ਤੋ, ਰਸ੍ਸੋ. ਸਬ੍ਬਞ੍ਞੁਤਞ੍ਞਾਣਂ ਬੁਜ੍ਝਤਿ ਏਤ੍ਥਾਤਿ ਬੋਧਿ, ਬੁਧ ਅਵਗਮਨੇ, ਇ, ਬੋਧਿ, ਦ੍ਵੀਸੁ. ਚਲਦਲੋ, ਪਿਪ੍ਪਲੋ, ਕੁਞ੍ਜਰਾਸਨੋਪਿ. ਦ੍ਵਯਂ ਬਹੁਪਾਦੇ. ਅਧੋਭਾਗਂ ਰੁਨ੍ਧਤੀਤਿ ਨਿਗ੍ਰੋਧੋ, ਉਸ੍ਸੋ, ਗਾਗਮੋ ਚ. ਵਟ ਵੇਧਨੇ, ਵਟਤੀਤਿ, ਅ.
ਦ੍ਵਯਂ ਕਬਿਟ੍ਠੇ. ਕਵਿਮ੍ਹਿ ਵਾਨਰੇ ਤਿਟ੍ਠਤੀਤਿ ਕਬਿਟ੍ਠੋ [ਪਾਯੇਨ ਕਪਯੋ ਤਿਟ੍ਠਨ੍ਤਿ ਅਤ੍ਰ ਕਪਿਤ੍ਥੋ (ਚਿਨ੍ਤਾਮਣਿਟੀਕਾ ੧੪.੨੧)] ‘‘ਵਾਨਰੇ ਪਣ੍ਡਿਤੇ ਕਵੀ’’ਤਿ ਵੋਪਾਲਿਤੋ, ਤਥਾ ਕਪਿਤ੍ਥੋ, ਤੋ, ਠਸ੍ਸ ਥੋ ਚ. ਦਧਿਤ੍ਥੋ, ਅਮ੍ਬਿਲਫਲੋਪਿ. ਦ੍ਵਯਂ ਉਦੁਮ੍ਬਰੇ. ਯਞ੍ਞਕਮ੍ਮਾਨਮਙ੍ਗੋ ਏਕਙ੍ਗਤ੍ਤਾ ਯਞ੍ਞਙ੍ਗੋ, ਦੁਬ੍ਬੀ ਹਿਂਸਾਯਂ, ਅਰੋ, ਨਿਗ੍ਗਹੀਤਾਗਮੋ, ਏਕਸ੍ਸ ਬਸ੍ਸ ਲੋਪੋ ਚ. ਜਨ੍ਤੁਫਲੋ ਹੇਮਦੁਦ੍ਧੋਪਿ.
੫੫੨. ਦ੍ਵਯਂ ਕੋਵਿਲ਼ਾਰੇ.
‘‘ਸੁਕਪਦਾਚ੍ਛਰੋ ਚਮ੍ਪੋ,
ਕੋਵਿਲ਼ਾਰੋ ਤੁ ਕਞ੍ਚਨੋ;
ਪੁਬ੍ਬੋ ਸਿਤੋ ਪਰੋ ਰਤ੍ਤੋ,
ਯੁਗਪਤ੍ਤਾ ਉਭੋਪਿਤੇ’’ਤਿ [ਚਿਨ੍ਤਾਮਣਿਟੀਕਾ ੧੪.੨੨].
ਹਿ ਰਤਨਕੋਸੋ, ਕਞ੍ਜਨਾਲਕੋਪ੍ਯਤ੍ਰ. ਯੁਗਂ ਯਮਕਂ ਪਤ੍ਤਮਸ੍ਸ.
ਤਿਪਾਦਂ ਉਦ੍ਦਾਲੇ. ਵਾਤਂ ਉਦ੍ਦਾਲਤੀਤਿ ਉਦ੍ਦਾਲੋ. ਸਿਙ੍ਗਾਰਾਦੀਨਂ ਸਞ੍ਞਾਵਸੇਨ ਰੁਕ੍ਖਾਨਂ ਰਾਜਾ ਰਾਜਰੁਕ੍ਖੋ, ਵਾਤਰੋਗਹਨਨੇ ਰਾਜਭੂਤੋ ਰੁਕ੍ਖੋ ਵਾ ਰਾਜਰੁਕ੍ਖੋ. ਕਤਾ ਮਾਲਾ ਅਸ੍ਸ ਪੁਪ੍ਫੇਹੀਤਿ ਕਤਮਾਲੋ, ਸਿਙ੍ਗਾਰਪ੍ਪਕਾਸੋ. ਇਨ੍ਦਤਿ ਪਰਮਿਸ੍ਸਰਿਯਂ ਕਰੋਤਿ ਵਾਤਹਨਨੇਤਿ ਇਨ੍ਦੀਵਰੋ, ਈਵਰੋ, ਇਨ੍ਦਿਯਾ ਸਕ੍ਕਸ੍ਸ ਭਰਿਯਾਯ ਇਚ੍ਛਿਤਬ੍ਬਤ੍ਤਾ ਵਾ ਇਨ੍ਦੀਵਰੋ. ਚਤੁਰਙ੍ਗੁਲੋ, ਆਰੇਵਤੋ, ਸੁਵਣ੍ਣਕੋਪਿ.
੫੫੩. ਦ੍ਵਯਂ ਜਮ੍ਭੀਰੇ, ਯਸ੍ਸ ਫਲਮਮ੍ਬਿਲਂ ਹੋਤਿ. ਅਮ੍ਬਿਲਤ੍ਤਾ ਦਨ੍ਤਸ੍ਸ ਸਠੋ ਦਨ੍ਤਸਠੋ. ਸਠ ਕੇਤਵਹਿਂਸਾਸਂਕਿਲੇਸੇਸੁ, ਅ. ਜਮੁ ਅਦਨੇ, ਈਰੋ, ਭਨ੍ਤੋ ਚ, ਜਮ੍ਭ ਗਤ੍ਤਵਿਨਾਮੇ ਵਾ, ਜਮ੍ਭੋ, ਜਮ੍ਭਲੋ, ਜਮ੍ਬੀਰੋਪਿ. ਦ੍ਵਯਂ ਵਰਣੇ. ਵਰ ਇਚ੍ਛਾਯਂ, ਯੁ. ਕਲ ਸਙ੍ਖ੍ਯਾਨੇ, ਇਰੋ, ਨਦਾਦਿ, ਰਸ੍ਸਨ੍ਤੋ. ਵਰੁਣੋ, ਤਿਤ੍ਤਸਾਕੋਪਿ.
ਦ੍ਵਯਂ ਫਲਹਰੇ. ‘‘ਕੋ ਅਯਂ, ਸੁਕੋ’’ਤਿ ਵਿਮਤੁਪ੍ਪਤ੍ਤਿਕਰਪਤ੍ਤਕੁਸੁਮਤਾਯ ਕਿਂਸੁਕੋ. ਪਾਰਿ ਸਮੁਦ੍ਦੋ, ਤਤ੍ਰ ਭਦ੍ਦੋ ਪਾਰਿਭਦ੍ਦੋ, ਸੋ ਏਵ ਪਾਲ਼ਿਭਦ੍ਦੋ, ਕੋਵਿਲ਼ਾਰੋ, ਤਂਸਣ੍ਠਾਨਪਤ੍ਤਕੁਸੁਮਤਾਯ ਪਾਲ਼ਿਭਦ੍ਦੋ. ਦ੍ਵਯਂ ਵਿਦੁਲੇ, ਯੋ ਅਬ੍ਭਸਮਯੇ ਪੁਪ੍ਫਤਿ. ਵਜ ਗਮਨੇ, ਉਲੋ. ਵੀ ਪਜਨੇ, ਅਸੋ, ਤੋਨ੍ਤੋ ਚ, ਵਿਪੁਬ੍ਬੋ ਅਤ ਸਾਤਚ੍ਚਗਮਨੇ ਵਾ, ਅਸੋ. ਵਾਨੀਰੋਪਿ.
੫੫੪. ਦ੍ਵਯਂ ਪੀਤਨੇ, ਯਸ੍ਸ ਪਤ੍ਤਫਲਾਨਿ ਅਮ੍ਬਿਲਾਨਿ, ਪੂਗਫਲਪ੍ਪਮਾਣਞ੍ਚ ਫਲਂ, ਸਲ੍ਲਕੀਰੁਕ੍ਖਸਣ੍ਠਾਨੋ ਚ, ਸੋ ਰੁਕ੍ਖੋ. ਅਮ੍ਬ ਸਦ੍ਦੇ, ਅਟੋ, ਸਕਤ੍ਥੇ ਕੋ. ਪੀ ਤਪ੍ਪਨਕਨ੍ਤੀਸੁ, ਤਨੋ, ਪੀਤਿਂ ਵਾ ਤਨੋਤੀਤਿ ਪੀਤਨੋ, ਸਕਤ੍ਥੇ ਕੋ. ਦ੍ਵਯਂ ਗੁਲ਼ਪੁਪ੍ਫੇ. ਮਨ ਞਾਣੇ, ਕੋ, ਮਧ੍ਵਾਦੇਸੋ ਚ. ਮਧੁਨਾਮੋ ਦੁਮੋ ਮਧੁਦ੍ਦੁਮੋ. ਦ੍ਵਯਂ ‘‘ਲਮ੍ਬੂ’’ਤਿ ਖ੍ਯਾਤੇ. ਗੁਲ਼ੋ ਵਿਯ ਸਾਤੇਨ ਫਲਮਸ੍ਸ ਗੁਲ਼ਫਲੋ. ਪੀਲ ਪਤਿਤ੍ਥਮ੍ਭੇ, ਉ. ਦ੍ਵਯਂ ਤਿਕ੍ਖਗਨ੍ਧੇ. ਸੋਭਂ ਜਨੇਤੀਤਿ ਸੋਭਞ੍ਜਨੋ, ਸੋਭਂ ਵਿਸਞ੍ਜਨਮੇਤੇਨ ਹੇਤੁਭੂਤੇਨਾਤਿ ਵਾ ਸੋਭਞ੍ਜਨੋ. ਵੁਤ੍ਤਞ੍ਚ –
‘‘ਸਿਰੀਸਪੁਪ੍ਫਸ੍ਸ ਰਸੇਨ ਭਾਵਿਤਂ,
ਸਹਸ੍ਸਵਾਰਂ ਮਰੀਚਂ ਸਿਤਵ੍ਹਯਂ;
ਏਤੇਨ ਸਮਨ੍ਤਿ ਵਿਸਾਹਿ ਸਮ੍ਭਵਾ,
ਕਤਞ੍ਜਨਸ੍ਨੇਹਨਪਾਦਨਤ੍ਥੁਤੋ’’ਤਿ.
ਸਿ ਸੇਵਾਯਂ, ਵਿਦ੍ਧਵਿਨਾਸਨਤ੍ਥਂ ਸੇਵੀਤੇਤਿ ਸਿਗ੍ਗੁ, ਗੁ, ਥੀ. ਚਿਤ੍ਤਹਾਰੀ, ਪਭਞ੍ਜਨੋ, ਵਿਦ੍ਧਵਿਨਾਸਨੋਪਿ.
੫੫੫. ਦ੍ਵਯਂ ਵਿਸਾਲਤਚੇ, ਯੋ ਸਰਦੇ ਪੁਪ੍ਫਤਿ ਪੁਪ੍ਫਂ. ਸਤ੍ਤਪਣ੍ਣਾਨ੍ਯਸ੍ਸ ਸਤ੍ਤਪਣ੍ਣੀ ਪੁਮੇ. ਛਤ੍ਤਮਿਵ ਪਣ੍ਣਮਸ੍ਸ ਛਤ੍ਤਪਣ੍ਣੋ. ਵਿਸਮਚ੍ਛਦੋਪਿ, ਸਤ੍ਤਪਣ੍ਣਤ੍ਤਾ ਵਿਸਮਚ੍ਛਦੋ. ਦ੍ਵਯਂ ਰਥਦ੍ਦੁਮੇ. ਰਥਂ ਤਨੋਤਿ ਯੇਨ ਤਿਨਿਸੋ, ਇਸੋ. ਅਤਿਪਮੁਚ੍ਚਤਿ ਦਾਹਪਿਤ੍ਤਮਨੇਨੇਤਿ ਅਤਿਮੁਤ੍ਤਕੋ. ਚਿਤ੍ਤਕਿਪਿ.
ਦ੍ਵਯਂ ਵਾਤਪੋਥੇ, ਪਂ ਵਾਤਂ ਲੁਨਾਤੀਤਿ ਪਲਾਸੋ, ਅਸੋ. ‘‘ਪਤ੍ਤੇ ਪਲਾਸਂ ਸੋ ਰੁਕ੍ਖੇ, ਪੀਤਹਰਿਤਕਿਂ ਸੁਕੇ’’ਤਿ ਹਿ ਰੁਦ੍ਦੋ. ਵਾਤਪੋਥੋਪਿ, ਵਾਤਸ੍ਸ ਪੋਥੋ ਵਾਤਪੋਥੋ, ਪੁਥ ਹਿਂਸਾਯਂ.
ਦ੍ਵਯਂ ‘‘ਪੁਤੀਤਿ’’ ਖ੍ਯਾਤੇ. ਹਤਜਨ੍ਤੁਪਮੋਹਸਙ੍ਖਾਤਾਰਿਫਲਤਾਯ ਅਰਿਟ੍ਠੋ, ਨਿਪਾਤਨਾ ਹਨ੍ਤਿਸ੍ਸ ਟ੍ਠੋ, ਤਂਰੋਗਾਰਿਵਨ੍ਤਜਨੇਹਿ ਇਚ੍ਛਿਤਬ੍ਬਫਲਤ੍ਤਾ ਵਾ ਅਰਿਟ੍ਠੋ, ਇਸੁ ਇਚ੍ਛਾਯਂ. ਫਣ ਗਤਿਯਂ, ਇਲੋ, ਅਸ੍ਸੇ.
੫੫੬. ਤਿਕਂ ਸਿਰਿਫਲੇ. ਮਲ ਧਾਰਣੇ, ਊਰੋ. ਬਿਲ ਭੇਦਨੇ, ਣੁਵੋ, ਬੇਲੁਵੋ. ਲਪਚ੍ਚਯੇ ਬਿਲ੍ਲੋ. ਸਣ੍ਡਿਲ੍ਯੋ, ਸੇਲੁਸੋਪਿ. ‘‘ਮੁਨਿਪ੍ਪਭੇਦੇ ਮਾਲੂਰੇ, ਸਣ੍ਡਿਲ੍ਯੋ ਪਾਦਪਨ੍ਤਰੇ, ਨਟੇ ਬਿਲ੍ਲੇ ਚ ਸੇਲੁਸੋ’’ਤਿ [ਚਿਨ੍ਤਾਮਣਿਟੀਕਾ ੧੪.੩੨] ਰਭਸੋ.
ਦ੍ਵਯਂ ਤੁਙ੍ਗੇ. ਪੁਮਨਾਮੋ ਨਾਗੋ ਰੁਕ੍ਖੋ ਪੁਨ੍ਨਾਗੋ. ‘‘ਪੁਨ੍ਨਾਗੇ ਪੁਰਿਸੋ ਤੁਙ੍ਗੋ, ਕੇਸਰੋ ਦੇਵਵਲ੍ਲਭੋ’’ਤਿ [ਅਮਰ ੧੪.੨੫] ਹ੍ਯਮਰਸੀਹੋ, ਦੀਘੋ, ‘‘ਪੁਮਸ੍ਸ ਲਿਙ੍ਗਾਦੀਸੁ ਸਮਾਸੇਸੂ’’ਤਿ ਅਕਾਰਲੋਪੋ ਚ. ਅਤਿਸਯਪੁਪ੍ਫਕੇਸਰਵਨ੍ਤਤਾਯ ਕੇਸਰੋ, ਕਿਸ ਤਨੁਕਰਣੇ ਵਾ, ਅਰੋ, ਪੁਪ੍ਫਕੇਸਯੁਤ੍ਤਤਾਯ ਵਾ ਕੇਸਰੋ, ਰੋ.
ਦ੍ਵਯਂ ਲੋਦ੍ਦਮਤ੍ਤੇ. ਸਲ ਗਮਨਤ੍ਥੋ, ਅਵੋ. ਰਤ੍ਤਕਫਪਿਤ੍ਤਸੋਤੇ ਲੁਨਾਤੀਤਿ ਲੋਦ੍ਦੋ, ਦ੍ਦੋ. ਤਿਰਿਟੋ, ਸਾਵਰੋਪਿ. ‘‘ਸਾਵਰੋ ਅਪਰਾਧੇ ਚ, ਲੋਦ੍ਦੇ ਪਾਪੇ ਚ ਕਥ੍ਯਤੇ’’ [ਚਿਨ੍ਤਾਮਣਿਟੀਕਾ ੧੪.੩੩] ਤ੍ਯਜਯੋ. ਦ੍ਵਯਂ ਧਨੁਪਟ੍ਟੇ ਫਲਿਨਿ. ਪੀ ਪਾਨੇ, ਅਲੋ, ਈਸ੍ਸ ਇਯਾਦੇਸੋ. ਸਨ੍ਨਕਾ ਤਾਪਸਾ, ਤੇਸਂ ਦੁ ਦੁਮੋ ਸਨ੍ਨਕਦ੍ਦੁ, ‘‘ਸਨ੍ਨਕਦ੍ਦੁ ਚਾਪਪਟਾ, ਵਰਣੋ ਤਾਪਸਪ੍ਪਿਯੋ’’ਤਿ [ਚਿਨ੍ਤਾਮਣਿਟੀਕਾ ੧੪.੩੫] ਹਿ ਕੋਸਨ੍ਤਰੇ.
੫੫੭. ਦ੍ਵਯਂ ‘‘ਮ੍ਹਨਕੂ’’ਇਤਿ ਖ੍ਯਾਤੇ. ਲਿਕੁਚੋ ਨਾਮ ਡਹੁਰੁਕ੍ਖੋ, ਤਗ੍ਗੁਣਤ੍ਤਾ ਲਿਕੋਚਕੋ, ਸਞ੍ਞਾਯਂ ਕੋ. ਅਙ੍ਕ ਲਕ੍ਖਣੇ, ਓਲੋ, ਅਙ੍ਕੋਲੋ. ਦ੍ਵਯਂ ਕੁਮ੍ਭੇ. ਰੋਗਹਰਣੇ ਗਰੁਨੋਪਿ ਵੇਜ੍ਜਸ੍ਸ ਗਰੁ ਗੁਗ੍ਗੁਲੁ, ਨਿਪਾਤਨਾ. ਕੁਸ ਛੇਦਨੇ, ਣ੍ਵੁ. ਕੁਮ੍ਭੋ, ਪੁਰੋਪਿ.
‘‘ਰਾਸਿਭੇਦੇ ਗਜਮੁਦ੍ਧਂਸੇ,
ਕੁਮ੍ਭਕਣ੍ਣਸੁਕੇ ਘਟੇ;
ਕਾਮੁਕੇ ਵਾਰਨਾਰਿਯਞ੍ਚ,
ਕੁਮ੍ਭੋ ਕ੍ਲੀਵਨ੍ਤੁ ਵਗ੍ਗੁਲੁਮ੍ਹੀ’’ਤਿ [ਚਿਨ੍ਤਾਮਣਿਟੀਕਾ ੧੪.੩੪].
ਰਭਸੋ. ਪੁਰ ਅਗ੍ਗਗਮਨੇ, ਣੋ, ਪੁਰੋ.
ਦ੍ਵਯਂ ਅਮ੍ਬੇ. ਅਮ ਗਤਿਯਂ, ਬੋ, ਅਮ੍ਬ ਸਦ੍ਦੇ ਵਾ, ਅ. ਚੁਤਿ ਆਸੇਚਨੇ, ਰਕ੍ਖਣੇ ਚ, ਅ, ਚੁ ਚਵਨੇ ਵਾ, ਤੋ, ਦੀਘਾਦਿ. ਰਸਾਲੋਪਿ, ਰਸਂ ਲਾਤੀਤਿ ਰਸਾਲੋ, ਦੀਘੋ. ਏਸੋ ਅਮ੍ਬੋ ਸੁਗਨ੍ਧਵਾ ਅਤਿਸਯਗਨ੍ਧਯੁਤ੍ਤੋ ਸਮਾਨੋ ‘‘ਸਹੋ, ਸਹਕਾਰੋ’’ਤਿ ਚੋਚ੍ਚਤੇ. ਸਹ ਸਤ੍ਤਿਯਂ, ਸੁਗਨ੍ਧਂ ਕਤ੍ਤੁਂ ਸਹਤੀਤਿ ਸਹੋ, ਅ. ਸਹਨਂ ਸਹੋ, ਤਂ ਕਰੋਤੀਤਿ ਸਹਕਾਰੋ, ਹਾ ਵਾ ਪਮੁਦਾ, ਤਾਯ ਸਹ ਵਤ੍ਤਤੀਤਿ ਸਹੋ, ਸਹਂ ਸਮੁਦਂ ਕਰੋਤੀਤਿ ਸਹਕਾਰੋ.
੫੫੮. ਦ੍ਵਯਂ ਸੇਤਮ੍ਬੇ. ਪੁਣ੍ਡ ਪੁਣ੍ਡਨੇ. ਪੁਣ੍ਡ ਖਣ੍ਡਨੇਤ੍ਯੇਕੇ, ਣ੍ਵੁ, ਅਸ੍ਸੀ, ਅਰਾਗਮੋ ਚ. ਸੇਤਵਣ੍ਣੋ ਅਮ੍ਬੋ ਸੇਤਮ੍ਬੋ. ਦ੍ਵਯਂ ਬਹੁਵਾਰਕੇ, ਯਸ੍ਸ ਫਲਾਨਿ ਅਤਿਪਿਚ੍ਛਿਲਾਨਿ. ਸਿ ਬਨ੍ਧਨੇ, ਲੁ, ਸਲ ਗਮਨਤ੍ਥੋ ਵਾ, ਉ, ਅਸ੍ਸੇ. ਪਿਚ੍ਛਿਲਤ੍ਤਾ ਬਹੂਨਿ ਵਾਰੀਨਿ ਯਸ੍ਮਿਂ ਬਹੁਵਾਰਕੋ, ਸਞ੍ਞਾਯਂ ਕੋ. ਸੀਤੋ, ਉਦ੍ਦਾਲੋ, ਕਫਲੋਪਿ.
ਦ੍ਵਯਂ ਕਾਸ੍ਮਰਿਯਂ. ਸਿਰਿਮਨ੍ਤਾਨਿ ਪਣ੍ਣਾਨਿ ਯਸ੍ਸਾ ਸੇਪਣ੍ਣੀ, ਨਦਾਦਿ, ਸਿਰੀਸਦ੍ਦਸ੍ਸ ਸੇ. ਕਸ੍ਮੀਰਦੇਸਜਤ੍ਤਾ ਕਾਸ੍ਮਰੀ, ਕਾਸ ਦਿਤ੍ਤਿਯਂ ਵਾ, ਮਰੋ, ਨਦਾਦਿ. ਮਧੁਪਣ੍ਣੀ, ਭਦ੍ਦਪਣ੍ਣੀਪਿ. ਦ੍ਵਯਂ ਸਕਣ੍ਟਕਮ੍ਬਿਲਫਲਰੁਕ੍ਖੇ. ਸਕਣ੍ਟਕਤ੍ਤਾ ਕੁਚ੍ਛਿਤਂ ਲਾਤੀਤਿ ਕੋਲੀ, ਨਦਾਦਿ. ਵਦ ਥੇਰਿਯੇ, ਅਰੋ, ਨਦਾਦਿ. ਕੁਵਲੀ, ਕਕ੍ਕਨ੍ਧੂਪਿ.
੫੫੯. ਦ੍ਵਯਂ ਤਸ੍ਸਾ ਕੋਲਿਯਾ ਫਲੇ. ਕੋਲਿਯਾ ਫਲਂ ਕੋਲਂ. ਬਦਰਿਯਾ ਅਯਂ ਅਵਯਵੋ ਬਦਰੋ. ਕੁਵਲਂ, ਫੇਨਿਲਂ, ਸੋਵੀਰਮ੍ਪਿ. ‘‘ਸੋਤਞ੍ਜਨੇ ਤੁ ਸੋਵੀਰਂ, ਕਞ੍ਜਿਕੇ ਬਦਰੇਪਿ ਚੇ’’ਤਿ [ਚਿਨ੍ਤਾਮਣਿਟੀਕਾ ੧੪.੩੬] ਰਭਸੋ. ਦ੍ਵਯਂ ਅਸ੍ਸਤ੍ਥਕੁਲਸਮ੍ਭੂਤੇ ਰੁਕ੍ਖਪਾਸਾਣਾਦੀਸੁ ਸਞ੍ਜਾਤਰੁਕ੍ਖੇ. ਪਿਲਂ ਪਰਂ ਨਿਸ੍ਸਯਭੂਤਂ ਕਸਤੀਤਿ ਪਿਲਕ੍ਖੋ, ਕਸ ਵਿਲੇਖਨੇ, ਸਸ੍ਸ ਖਤ੍ਤਾਦਿ ਨਿਪਾਤਨਾ. ਅਖਾਦਨੀਯਫਲਤਾਯ ਵਿਰੂਪਂ ਫਲਮਸ੍ਸਤ੍ਥੀਤਿ ਪਿਪ੍ਫਲੀ, ਈ, ਨਦਾਦਿ, ਵਿਸ੍ਸਪਿ ਚ.
ਦ੍ਵਯਂ ਤੋਯਾਦਿਵਾਪਿਨਿਯਂ, ਯਸ੍ਸਾ ਮੂਲਂ ਮਹਾਪਞ੍ਚਮੂਲੇ ਪਵਿਟ੍ਠਂ. ਪਟ ਗਮਨੇ, ਅਲੋ, ਨਦਾਦਿ, ਪਾਟਲੀ, ਪਾਟਲਾਪਿ. ਕਣ੍ਹਂ ਪੁਪ੍ਫਵਣ੍ਟਂ ਯਸ੍ਸਾ ਸਾ ਕਣ੍ਹਵਣ੍ਟਾ, ਕਾਸ੍ਮਰਿਯਮ੍ਪਿ. ਅਲਿਪ੍ਪਿਯਂ, ਤਮ੍ਬਪੁਪ੍ਫਿਪ੍ਯਤ੍ਰ. ਦ੍ਵਯਂ ਗਨ੍ਧਿਲੇ. ਸਾਦੁਫਲਤਾਯ ਸਾਦੁ ਚ ਸੋ ਕਣ੍ਟਸਹਿਤਤਾਯ ਕਣ੍ਟੋ ਚੇਤਿ ਸਾਦੁਕਣ੍ਟੋ. ਸਕਣ੍ਟਕਤਾਯ ਅਤ੍ਤਾਨਂ ਵਿਰੂਪਂ ਕਰੋਤੀਤਿ ਵਿਕਙ੍ਕਤੋ, ਦ੍ਵਿਤ੍ਤਂ, ਨਿਗ੍ਗਹੀਤਾਗਮੋ ਚ.
੫੬੦. ਚਤੁਕ੍ਕਂ ਤਿਨ੍ਦੁਕੇ. ਤਨੁ ਵਿਤ੍ਥਾਰੇ, ਉਕੋ, ਦਨ੍ਤੋ ਚ. ਤਿਦਿ ਹਿਂਸਾਯਂ ਵਾ, ਉ, ਸਞ੍ਞਾਯਂ ਕੋ. ਕਾਲ਼ੋ ਖਨ੍ਧੋ ਪਕਣ੍ਡੋ ਯਸ੍ਸਾਤਿ. ਤਿਮ ਅਦ੍ਦਭਾਵੇ, ਊਸੋ, ਸਕਤ੍ਥੇ ਕੋ, ਵਰਨ੍ਤੋ ਚ. ਉਪਚ੍ਚਯੇ ਤਿਮ੍ਬਰੁ.
ਦ੍ਵਯਂ ਤਮ੍ਬਫਲੇ. ਇਰਾਵਤੀ ਨਦੀ, ਪਠਮਕਾਲੇ ਤਸ੍ਸਾ ਤੀਰੇ ਜਾਤੋ ਏਰਾਵਤੋ. ਨਾਰਂ ਵੁਚ੍ਚਤਿ ਨੀਰਂ, ਤਂ ਗਚ੍ਛਤੀਤਿ ਨਾਰਙ੍ਗੋ. ਦ੍ਵਯਂ ਮਕ੍ਕਟਤਿਨ੍ਦੁਕੇ. ਕੁਲ ਸਙ੍ਖ੍ਯਾਨੇ, ਣ੍ਵੁ. ਕਾਕੇਨ੍ਦੁ, ਕਾਕਲੁਕੋਪਿ.
੫੬੧. ਤਿਕਂ ਕਦਮ੍ਬੇ. ਕਂ ਵਾਤਂ ਦਮੇਤੀਤਿ ਕਦਮ੍ਬੋ, ਬੋ. ਪਿਨੇਤੀਤਿ ਪਿਯਕੋ, ਣ੍ਵੁ, ਇਯਾਦੇਸੋ. ਨਯਤਿ ਮੁਦਂ ਨੀਪੋ, ਪੋ. ਦ੍ਵਯਂ, ਵਿਦਰੁਕ੍ਖੇ, ਯਸ੍ਸ ਨਿਯ੍ਯਾਸੇਨ ਪੇਲ਼ਾਦਯੋ ਲਿਮ੍ਪਨ੍ਤਿ. ਭਲ, ਭਲ੍ਲ ਪਰਿਭਾਸਨਹਿਂਸਾਦਾਨੇਸੁ, ਨਦਾਦਿ, ਅਞ੍ਞਤ੍ਰ ਤੋ, ਕਨ੍ਤੋ ਚ, ਭਲ੍ਲਾਤਕੋ, ਤੀਸ੍ਵਯਂ. ਅਰੁਕਰੋ, ਅਗ੍ਗਿਮੁਖੋਪਿ.
ਦ੍ਵਯਂ ‘‘ਪਾਵੁਸਾ’’ਇਤਿ ਖ੍ਯਾਤੇ. ਝਪ ਦਾਹੇ, ਣ੍ਵੁ. ਪਸ੍ਸ ਵੋ. ਪਚ ਪਾਕੇ, ਉਲੋ. ਦ੍ਵਯਂ ਸਿਰਿਮਤਿ, ਯਸ੍ਸ ਫਲਾਨਿ ਮਰੀਚਪ੍ਪਮਾਣਾਨਿ, ਅਮ੍ਬਿਲਾਨਿ ਚ. ਤਿਲ ਗਮਨੇ, ਣ੍ਵੁ. ਖੁਰ ਛੇਦਨੇ, ਣ੍ਵੁ.
੫੬੨. ਦ੍ਵਯਂ ਅਮ੍ਬਿਲਿਕਾਯਂ. ਚਿ ਚਯਨੇ, ਚੋ, ਚਿਚ ਆਦਾਨਸਂਵਰਣੇਸੁ ਵਾ. ਤਨੁ ਵਿਤ੍ਥਾਰੇ, ਅਮ੍ਬਿਲਰਸਂ ਤਨੋਤੀਤਿ ਤਿਨ੍ਤਿਣੀ, ਦ੍ਵਿਤ੍ਤਮਿਤ੍ਤਂ, ਣਤ੍ਤਞ੍ਚ, ਨਦਾਦਿ. ਦ੍ਵਯਂ ਅਮ੍ਬਿਲਙ੍ਕੁਰਫਲੇ ਸੇਤਰੁਕ੍ਖੇ. ਗਦ੍ਰਭਣ੍ਡਪ੍ਪਮਾਣਫਲਤ੍ਤਾ ਗਦ੍ਦਭਣ੍ਡੋ, ਰਲੋਪੋ. ਕਪਿ ਚਲਨੇ, ਤਨੋ, ਦੀਘੋ ਆਗਮਸ੍ਸ. ਕਨ੍ਦਰਾਲੋ, ਪਿਲਕ੍ਖੋਪਿ.
ਤਿਕਂ ਸਾਲਰੁਕ੍ਖੇ. ਸਲ ਗਮਨੇ, ਣੋ, ਸਾਰਵਨ੍ਤਤਾਯ ਵਾ ਸਾਲੋ. ਅਸ੍ਸਕਣ੍ਣਸਦਿਸਪਣ੍ਣਤਾਯ ਅਸ੍ਸਕਣ੍ਣੋ. ਸਨ੍ਜ ਸਙ੍ਗੇ, ਅ, ਸਜ੍ਜ ਅਦਨੇ ਵਾ, ਅ. ਦ੍ਵਯਂ ਨਦੀਸਜ੍ਜੇ. ਅਜ੍ਜ ਅਜ੍ਜਨੇ, ਉਨੋ. ਕਕ ਲੋਲ੍ਯੇ, ਉਧੋ. ਵੀਰਤਰੁ, ਇਨ੍ਦਦੁਮੋਪਿ.
੫੬੩. ਤਿਕਂ ਮੁਚਲਿਨ੍ਦੇ. ਚੁਲ ਨਿਮੁਜ੍ਜਨੇ. ਮੁਚਲ ਸਙ੍ਗਾਤੇ, ਇਨ੍ਦੋ. ਨੀਪੋ ਕਦਮ੍ਬੇਪਿ. ਤਿਕਂ ਪੀਤਸਾਲੇ. ਪਿਯਕੋ ਕਦਮ੍ਬੇਪਿ. ਅਸ ਭਕ੍ਖਨੇ, ਯੁ, ਪੀਤਪੁਪ੍ਫੋ ਸਾਲੋ ਰੁਕ੍ਖੋ ਪੀਤਸਾਲੋ. ਬਨ੍ਧੂਕਪੁਪ੍ਫੋ, ਜੀਵਕੋਪਿ.
ਦ੍ਵਯਂ ਝਾਟਲਿਯਂ. ਗਾਵੋ ਲਿਹਨ੍ਤੀਤਿ ਗੋਲੀਸੋ, ਹਸ੍ਸ ਸੋ. ਝਟ ਸਙ੍ਘਾਤੇ, ਅਲੋ. ਝਾਟਲੋ, ਪਾਟਲਿਪੁਪ੍ਫਾਕਾਰੋ ਦੀਘਫਲੋ ਰੁਕ੍ਖੋ. ਪਮੋਕ੍ਖੋਪਿ.
੫੬੪. ਦ੍ਵਯਂ ਰਾਜਾਯਤਨੇ, ਖੀਰਵਨ੍ਤਤਾਯ ਖੀਰਿਕਾ. ਦੇਵਰਾਜਸ੍ਸ ਨਿਵਾਸਨਟ੍ਠਾਨਭੂਤਤ੍ਤਾ ਰਾਜਾਯਤਨਂ, ਪਿਯਾਲੇਪਿ. ਦ੍ਵਯਂ ਕਪ੍ਫਲੇ. ਕੁਚ੍ਛਿਤੇਨ ਫਲੇਨ ਉਮ੍ਭਤਿ ਪੂਰਤੀਤਿ ਕੁਮ੍ਭੋ. ਕੁਚ੍ਛਿਤੇਨ ਮੋਦਤੀਤਿ ਕੁਮੁਦਿਕਾ, ਣ੍ਵੁ.
ਦ੍ਵਯਂ ਗੁਵਾਕਰੁਕ੍ਖੇ, ਯਸ੍ਸ ਫਲੇਨ ਤਮ੍ਬੂਲਨਾਮਂ ਜਾਯਤਿ. ਪੂਜ ਪੂਜਾਯਂ, ਣੋ, ਜਸ੍ਸ ਗੋ. ਕਮੁ ਇਚ੍ਛਾਯਂ, ਹੇਤੁਕਤ੍ਤਰਿ ਣ੍ਵੁ. ਖਪੁਰੋਪਿ. ਦ੍ਵਯਂ ਲੋਹਿਤਲੋਦ੍ਦੇ. ਪਟ੍ਟਿਇਤ੍ਯਾਖ੍ਯਾ ਯਸ੍ਸ ਪਟ੍ਟਿ. ‘‘ਪਦ੍ਧੀ’’ਤਿਪਿ ਪਾਠੋ. ਅਸ੍ਮਿਂ ਪਕ੍ਖਿਤ੍ਤੇ ਲਾਖਾ ਰਤ੍ਤਾ ਭਵਤੀਤਿ ਲਾਖਾਪਸਾਦਨੋ. ਕਮੁਕੋਪਿ.
੫੬੫. ਦ੍ਵਯਂ ਇਙ੍ਗੁਦਿਯਂ, ਅਯਞ੍ਚ ਕਣ੍ਟਕੀ ਬਾਹੁਲ੍ਯੇਨ ਮਜ੍ਝਿਮਦੇਸੇ ਜਾਯਤੇ. ਇਙ੍ਗ ਗਮਨਤ੍ਥੋ, ਇਦੋ, ਇਸ੍ਸੁ, ਨਦਾਦਿ. ਤਾਪਸੋ ਪਯੁਜ੍ਜਮਾਨਫਲਕਤਾਯ ਤਾਪਸਤਰੁ. ਦ੍ਵਯਂ ‘‘ਭੁਜਪਤ੍ਤੋ’’ਇਤਿਖ੍ਯਾਤੇ ਸੁਨ੍ਦਰਤਚੇ ਰੁਕ੍ਖੇ, ਯਸ੍ਸ ਤਚੇ ਮਨ੍ਤਕ੍ਖਰਾਨਿ ਲਿਖਨ੍ਤਿ. ਭੁਜੋ ਪਾਣਿ, ਤਂਸਦਿਸਪਤ੍ਤਤਾਯ ਭੁਜਪਤ੍ਤੋ. ਮਨ੍ਤਲੇਖਕੇਹਿ ਆਭੁਜਿਤਤਚਵਨ੍ਤਤਾਯ ਆਭੁਜੀ. ਭੂਜੋ, ਚਮ੍ਮੀ, ਮੁਦੁਤ੍ਤਚੋਪਿ.
ਦ੍ਵਯਂ ਸਿਮ੍ਬਲਿਯਂ. ਪਿਚ੍ਛਾਯੋਗਾ ਪਿਚ੍ਛਿਲਾ, ਇਲੋ. ਸਮ੍ਬ ਮਣ੍ਡਲੇ, ਅਲਿ, ਅਸ੍ਸਿ. ‘‘ਪਿਚ੍ਛਿਲਾ ਪੂਰਣੀ ਮੋਚਾ, ਥਿਰਾਯੁ ਸਿਮ੍ਬਲੀ ਦ੍ਵਿਸੂ’’ਤਿ [ਅਮਰ ੧੪.੪੬] ਅਮਰਕੋਸੋ. ਦ੍ਵਯਂ ਪਿਚ੍ਛਿਲਾਕਾਰੇ ਕਣ੍ਟਕਸਹਿਤੇ ਰੁਕ੍ਖੇ. ਰੁਚ ਦਿਤ੍ਤਿਯਂ, ਹੇਤੁਕਤ੍ਤਰਿ ਯੁ, ਕੁਟ ਕੋਟਿਲ੍ਯੇ, ਕਤ੍ਤਰਿ ਣੋ, ਕੋਟੋ ਅਸਿਮ੍ਬਲਿ ਸਮਾਨੋਪਿ ਸਿਮ੍ਬਲਿਸਦਿਸਾਕਾਰਦਸ੍ਸਨਤੋ ਕੋਟਸਿਮ੍ਬਲਿ, ਪੁਮੇ. ਕਸਮ੍ਬਲੋਪਿ.
੫੬੬. ਦ੍ਵਯਂ ‘‘ਕਣ੍ਟਕਰਞ੍ਜ’’ਇਤਿ ਖ੍ਯਾਤੇ ਕਣ੍ਟਕਿਨਿ ਕਰਞ੍ਜਗੁਮ੍ਬੇ, ਯਂ ਲੋਕੇ ‘‘ਕਲਿਨੋ’’ਤਿ ਵੁਚ੍ਚਤਿ. ਕਰ ਹਿਂਸਾਯਂ, ਕਰਤੋ ਰਿਰਿਯਾ. ਪੂ ਪਵਨੇ, ਇਕੋ, ਤੋਨ੍ਤੋ ਚ. ਪੂਤਿਕਰਜੋ, ਕਲਿਮਾਰਕੋਪਿ, ਕਲਿਨੋ. ਦ੍ਵਯਂ ਦਾਲਿਮਪੁਪ੍ਫਾਕਾਰੇ ਪੀਤਨਾਸਕਰੁਕ੍ਖੇ. ਰੁਹ ਜਨਨੇ, ਣੀ. ਲੋਹਿਤਪੁਪ੍ਫਤਾਯ ਰੋਹਿਤਕੋ.
ਦ੍ਵਯਂ ਏਰਣ੍ਡੇ. ਏਰਡਿ ਹਿਂਸਾਯਂ. ਵਾਤਂ ਏਰਣ੍ਡਤੀਤਿ ਏਰਣ੍ਡੋ, ਣੋ. ਮਣ੍ਡ ਭੂਸਨੇ, ਈਸਂਪਸਨ੍ਨਤੇਲਤਾਯ ਵਾ ਆਮਣ੍ਡੋ, ਆਮਂ ਵਾ ਵਾਤਂ, ਤਂ ਦਾਯਤੀਤਿ ਆਮਣ੍ਡੋ. ਦਾ ਅਵਖਣ੍ਡਨੇ, ਦਾਸ੍ਸ ਡੋ. ਚਿਤ੍ਤਕੋ, ਚਞ੍ਚੁਪਿ.
‘‘ਅਗ੍ਗਿਸਞ੍ਞੇਪਿ ਚਿਤ੍ਤਕੋ, ਪੁਮੇ ਏਰਣ੍ਡਕੇ ਚਞ੍ਚੁ.
ਪਕ੍ਖਿਤੁਣ੍ਡੇ ਥਿਯਂ ਮਤੋ’’.
ਦ੍ਵਯਂ ਸਿਵਾਰੁਕ੍ਖੇ. ਸਤ੍ਤੁਯੁਤ੍ਤਫਲਤਾਯ ਸਤ੍ਤੁਫਲਾ. ਗਣ੍ਡਂ ਸਮੇਤੀਤਿ ਸਮੀ, ਅ, ਨਦਾਦਿ, ਪਾਰਿਭਦ੍ਦਕੇਪਿ. ਗਰੁਦਾਰੁ, ਪੂਤਿਕਟ੍ਠਮ੍ਪਿ.
੫੬੭. ਦ੍ਵਯਂ ਕਰਞ੍ਜੇ. ਨਤ੍ਤਂ ਰਤ੍ਤਾ ਮਾਲਾ ਯਸ੍ਸ. ਕਂ ਰਞ੍ਜਯਤੀਤਿ ਕਰਞ੍ਜੋ, ਣੋ. ਚਿਲ੍ਲਵਿਲ੍ਲੋ, ਕਰਜੋਪਿ. ਦ੍ਵਯਂ ਖਦਿਰੇ. ਖਦ ਹਿਂਸਾਯਂ, ਥੇਰਿਯੇ ਚ. ਖਦਨ੍ਤਿ ਦਨ੍ਤਾ ਯੇਨਾਤਿ ਖਦਿਰੋ, ਇਰੋ. ਦਨ੍ਤਾ ਧਾਵਨ੍ਤਿ ਯੇਨ ਨਿਰੋਗਤ੍ਤਾਤਿ ਦਨ੍ਤਧਾਵਨੋ, ਯੁ, ਧਾਵ ਗਤਿਸੁਦ੍ਧਿਯਂ. ਗਾਯਤ੍ਤੀ, ਬਾਲਤਨਯੋਪਿ. ‘‘ਗਾਯਤ੍ਤੀ ਖਦਿਰੇ ਇਤ੍ਥੀ, ਛਨ੍ਦਸਿਪਿ ਛਲ਼ਕ੍ਖਰੇ’’ਤਿ [ਚਿਨ੍ਤਾਮਣਿਟੀਕਾ ੧੪.੪੯ ਬ੍ਯਾਖ੍ਯਾਸੁਧਾ ੨.੪.੫੦] ਰਭਸੋ. ਬਾਲੋ ਸੁਖੁਮੋ ਪਤ੍ਤਸਞ੍ਞਿਤੋ ਤਨਯੋ ਯਸ੍ਸ ਬਾਲਤਨਯੋ. ਦ੍ਵਯਂ ਪੀਤਸਾਰੇ ਖਦਿਰੇ. ਖਦਿਰਾਦਿਕਨ੍ਤੁ ਪੀਤਸਾਰੇ. ਸੇਤਵਣ੍ਣਤਾਯ ਸੋਮੋ ਕਪ੍ਪੂਰਸਦਿਸੋ ਵਕ੍ਕੋ ਵਕ੍ਕਲਮੇਤਸ੍ਸ ਸੋਮਵਕ੍ਕੋ. ‘‘ਸੋਮੋ ਕੁਵੇਰੇ ਪਿਤੁਦੇਵਤਾਯਂ, ਵਸੁਪ੍ਪਭੇਦੇ ਵਸੁਧਾਕਰੇ ਚ. ਦਿਬ੍ਬੋਸਧੀ ਸੋਮਲਤਾ ਸਮੀਰਣੇ, ਕਪ੍ਪੂਰਨੀਰੇਸੁ ਚ ਵਾਨਰੇ ਚਾ’’ਤਿ ਨਾਨਤ੍ਥਸਙ੍ਗਹੋ. ਈਸਂ ਖੁਦ੍ਦਕਂ ਦਲਮੇਤਸ੍ਸ ਕਦਰੋ, ਲਸ੍ਸ ਰੋ. ਦ੍ਵਯਂ ਪਿਣ੍ਡੀਤਕੇ. ਸਲ ਗਮਨੇ, ਲੋ. ਮਦ ਉਮ੍ਮਾਦੇ, ਯੁ. ‘‘ਪਿਣ੍ਡੀਤਕੋ ਮਰਵਕੋ, ਸਸਨੋ ਕਰਹਾਟਕੋ’’ਤ੍ਯਮਰਕੋਸੇ [ਅਮਰ ੧੪.੫੨].
੫੬੮. ਤਿਕਂ ਇਨ੍ਦਸਾਲੇ. ਸਾਲਾਨਂ ਰੁਕ੍ਖਾਨਂ ਇਨ੍ਦੋ ਰਾਜਾ ਇਨ੍ਦਸਾਲੋ, ਦਾਸਾਦੀਸੁ ਸਿਰਿਵਡ੍ਢਕਾਦਿਸਦ੍ਦੋ ਵਿਯ ਅਧਿਵਚਨਮਤ੍ਤਮਿਦਂ. ਇਨ੍ਦਸ੍ਸ ਸਕ੍ਕਸ੍ਸ ਸਾਲੋਤਿਪਿ ਇਨ੍ਦਸਾਲੋ. ਸਲ੍ਲਤੋ ਣ੍ਵੁ, ਨਦਾਦਿ, ਸਲ੍ਲਕੀ. ਖਰ ਛੇਦਨਵਿਨਾਸਨੇਸੁ, ਣ੍ਵੁ.
ਦ੍ਵਯਂ ਦੇਵਦਾਰੁਮ੍ਹਿ. ਦੇਵਾਨਂ ਦਾਰੁ. ਭਦ੍ਦਤ੍ਤਾ ਭਦ੍ਦਦਾਰੁ. ਸਕ੍ਕਪਾਦਪੋ, ਪਾਰਿਭਦ੍ਦਕੋ, ਪੀਤਦਾਰੁ, ਦਾਰੁ, ਪੂਤਿਕਟ੍ਠਮ੍ਪਿ. ਦ੍ਵਯਂ ਹੇਮਪੁਪ੍ਫਕੇ. ਪਠਮਕਾਲੇ ਚਮ੍ਪਾਨਗਰੇ ਜਾਤੋ ਚਮ੍ਪੇਯ੍ਯੋ, ਣੇਯ੍ਯੋ. ਕਪਚ੍ਚਯੇ ਚਮ੍ਪਕੋ.
੫੬੯. ਦ੍ਵਯਂ ਪਨਸੇ. ਪਨ ਬ੍ਯਵਹਾਰੇ, ਥੁਤਿਮ੍ਹਿ ਚ, ਅਸੋ. ਕਣ੍ਟਕਯੁਤ੍ਤਂ ਫਲਮਸ੍ਸ ਕਣ੍ਟਕਿਫਲੋ. ਦ੍ਵਯਂ ਸਿਵਾਯਂ. ਨ ਵਿਜ੍ਜਤੇ ਰੋਗਭਯਂ, ਰੋਗਬ੍ਯਥੋ ਚੋਪਯੁਜ੍ਜਮਾਨਾਯਮਸ੍ਸਨ੍ਤਿ ਅਭਯਾ. ਰੋਗਭਯਂ ਹਰਤਿ ਅਪਨੇਤੀਤਿ ਹਰੀਤਕੀ, ਤੋ, ਸਕਤ੍ਥੇ ਕੋ, ਨਦਾਦਿ. ਹਰਿਤ੍ਤਕੀਪਿ. ਅਬ੍ਯਥਾ, ਪੁਤਨਾ, ਅਮਤਾ, ਹੇਮਵਤੀ, ਚੇਤਕੀ, ਸਿਵਾਪਿ.
ਦ੍ਵਯਂ ਕਰਿਸਫਲੇ. ਰੋਗਂ ਅਸਤਿ ਭਕ੍ਖਤੀਤਿ ਅਕ੍ਖੋ, ਖੋ, ਸਸ੍ਸ ਕੋ. ਰੋਗਂ ਵਿਭੂਤਂ ਕਰੋਤੀਤਿ ਵਿਭੀਤਕੋ, ਵਿਭੀਟਕੋਪਿ. ਭੂਤਾਵਾਸੋ, ਕਲਿਦ੍ਦੁਮੋਪਿ, ਕਲਿਸ੍ਸ ਆਸਯਭੂਤੋ ਦੁਮੋ ਕਲਿਦ੍ਦੁਮੋ. ਦ੍ਵਯਂ ਪੁਸ੍ਸਫਲੇ. ਨਤ੍ਥਿ ਮਤਮੇਤਿਸ੍ਸਂ ਹੇਤੁਭੂਤਾਯਂ ਅਮਤਾ. ਮਲ ਧਾਰਣੇ, ਣ੍ਵੁ, ਨਦਾਦਿ, ਆਮਲਕੀ. ਵਯਟ੍ਠਾਪਿ. ਵਯੋ ਤਿਟ੍ਠਤਿ ਥਿਰੀਭਵਤ੍ਯੇਤਾਯਾਤਿ ਵਯਟ੍ਠਾ.
੫੭੦. ਦ੍ਵਯਂ ਡਹੁਰੁਕ੍ਖੇ. ਲਬੁਨਾਮਕੇ ਪਬ੍ਬਤੇ ਜਾਯਤੀਤਿ ਲਬੁਜੋ. ਖੁਦ੍ਦਕਤ੍ਤਾ ਲੀਨਂ ਅਪਾਕਟਂ ਕੁਚਸਙ੍ਖਾਤਂ ਫਲਮੇਤਸ੍ਸ ਲਿਕੁਚੋ, ਨਿਪਾਤਨਾ. ਦ੍ਵਯਂ ਪੀਤਪੁਪ੍ਫੇ. ਅਗਨ੍ਧਪੁਪ੍ਫਤਾਯ ਅਤ੍ਤਾਨਂ ਕਣਿਟ੍ਠਂ ਕਰੋਤੀਤਿ ਕਣਿਕਾਰੋ, ਟ੍ਠਲੋਪੋ, ਪਦੁਮਪ੍ਪਮਾਣਪੁਪ੍ਫਦੁਮਤਾਯ ਦੁਮੁਪ੍ਪਲੋ.
ਤਿਕਂ ਹਿਙ੍ਗੁਨਿਯ੍ਯਾਸੇ. ਨੀ ਨਯੇ, ਬੋ, ਮੋਨ੍ਤੋ ਚ. ਤਿਤ੍ਤਰਸਤ੍ਤਾ ਅਰਿਭਾਵੇ ਤਿਟ੍ਠਤੀਤਿ ਅਰਿਟ੍ਠੋ. ਪੁਚਿਂ ਕੁਟ੍ਠਂ ਮਦ੍ਦਤੀਤਿ ਪੁਚਿਮਨ੍ਦੋ, ਇਤ੍ਤਂ, ਬਿਨ੍ਦਾਗਮੋ. ਧਮ੍ਮਸੇਨੋ, ਮਾਲਕੋਪਿ. ਮਲਤੇ ਰੋਗਂ ਮਾਲਕੋ, ਣ੍ਵੁ. ਦ੍ਵਯਂ ਰਤ੍ਤਪੁਪ੍ਫੇ. ਕਰੋਤਿਸ੍ਮਾ ਣ੍ਵੁ. ਦਲ ਵਿਦਾਰਣੇ, ਮੋ, ਇਕਾਰਾਗਮੋ. ਦਾਲ਼ਿਮੋਪਿ.
੫੭੧. ਦ੍ਵਯਂ ਪੀਤਦ੍ਦੁਮੇ. ਸਰਤਿ ਕਾਲਨ੍ਤਰਂ ਸਰਲੋ, ਅਲੋ. ਪੂਤਿਯੇਵ ਕਟ੍ਠਂ ਪੂਤਿਕਟ੍ਠਂ, ਪੂਤਿਮੁਤ੍ਤਨ੍ਤਿ ਯਥਾ. ਦ੍ਵਯਂ ਪਿਚ੍ਛਿਲਾਯਂ. ਕਪਿ ਚਲਨੇ, ਇਲੋ. ਸਾਸ ਅਨੁਸਿਟ੍ਠਿਯਂ, ਸਿਸ ਇਚ੍ਛਾਯਂ ਵਾ, ਅਪੋ, ਨਿਗ੍ਗਹੀਤਾਗਮੋ, ਸਿਂਸਪਾ. ਅਗੁਰੁਪਿ.
ਤਿਕਂ ਫਲਿਨਿਯਂ. ਸਾ ਤਨੁਕਰਣੇ, ਮੋ. ਪਿਯਭਾਵਂ ਗਚ੍ਛਤੀਤਿ ਪਿਯਙ੍ਗੁ, ਉ. ਕਮਨੀਯਭਾਵਂ ਗਚ੍ਛਤੀਤਿ ਕਙ੍ਗੁ, ਉ, ਨਿਪਾਤਨਾ. ਮਹਿਲਾਵ੍ਹਯਾ, ਲਤਾ, ਗੁਨ੍ਦਾ, ਗਨ੍ਧਫਲੀ, ਕਾਰਮ੍ਭਾਪਿ. ਦ੍ਵਯਂ ਸਿਰੀਸੇ. ਸਰਤਿ ਰੋਗਂ ਹਿਂਸਤੀਤਿ ਸਿਰੀਸੋ. ਈਸੋ, ਅਸ੍ਸਿ. ਭਣ੍ਡ ਪਰਿਭਾਸਨੇ, ਇਲੋ. ਕਪੀਤਨੋਪਿ. ਅਮ੍ਬਾਟਕੇ, ਗਦ੍ਦਭਣ੍ਡੇ ਚ ਕਪੀਤਨੋ.
੫੭੨. ਦ੍ਵਯਂ ਮਣ੍ਡੂਕਪਣ੍ਣੇ. ਸੁਣ ਗਤਿਯਂ, ਣ੍ਵੁ, ਦੀਘਂ ਫਲਵਣ੍ਟਂ ਯਸ੍ਸ. ਨਟੋ ਕੁਟਨ੍ਨਟਾਪਿ. ਦ੍ਵਯਂ ਬਕੁਲੇ. ਵਕ ਆਦਾਨੇ, ਉਲੋ. ਕੇਸਰਯੁਤ੍ਤਪੁਪ੍ਫਤਾਯ ਕੇਸਰੋ.
ਦ੍ਵਯਂ ਮਲਪੁਪ੍ਫਸ੍ਮਿਂ. ਕਾਕਾਨਂ ਉਦੁਮ੍ਬਰੋ ਕਾਕੋਦੁਮ੍ਬਰੋ, ਸੋ ਏਵ ਕਾਕੋਦੁਮ੍ਬਰਿਕਾ, ਸਕਤ੍ਥੇ ਇਕੋ. ਫਲ ਨਿਪ੍ਫਤ੍ਤਿਯਂ, ਗੁ, ਲਸ੍ਸ ਗੋ. ਦ੍ਵਯਂ ਨਾਗਰੁਕ੍ਖੇ. ਨ ਗਚ੍ਛਤੀਤਿ ਨਾਗੋ, ਦੀਘਾਦਿ. ਨਾਗਾਨਂ ਮਾਲਾ, ਸਾ ਸਞ੍ਜਾਤਾ ਯਤ੍ਰ ਨਾਗਮਾਲਿਕਾ.
੫੭੩. ਦ੍ਵਯਂ ਅਸੋਕੇ. ਨਤ੍ਥਿ ਸੋਕੋ ਯੇਨ. ਵਜ ਗਮਨੇ, ਉਲੋ. ਦ੍ਵਯਂ ਜਯਾਯਂ. ਤਂਤਂਰੋਗਜਯਾਦਿਕਂ ਕਰੋਤੀਤਿ ਤਕ੍ਕਾਰੀ, ਣੀ. ਵਿਸੇਸੇਨ ਜਯਤੀਤਿ ਵੇਜਯਨ੍ਤਿਕਾ, ਅਨ੍ਤੋ, ਨਦਾਦਿ, ਸਕਤ੍ਥੇ ਕੋ. ‘‘ਜਯਾ ਜਯਨ੍ਤੀ ਤਕ੍ਕਾਰੀ, ਨਾਦੇਯੀ ਵੇਜਯਨ੍ਤਿਕਾ’’ਤ੍ਯਮਰਕੋਸੋ [ਅਮਰ ੧੪.੬੫].
ਦ੍ਵਯਂ ਸਮੁਦ੍ਦਸਮੀਪਦੇਸਜੇ ਸਾਮਦਲੇ ਤਮਾਲਨਾਮੇ ਤਰੁਮ੍ਹਿ. ਤਾਪਿਯਂ ਜਾਯਤੀਤਿ ਤਾਪਿਞ੍ਛੋ, ਅਞ੍ਞਤ੍ਥੇ ਛੋ, ਬਿਨ੍ਦਾਗਮੋ, ‘‘ਤਾਪੀ ਤੁ ਸਰਿਤਾਨ੍ਤਰੇ’’ਤਿ ਹਿ ਨਾਨਤ੍ਥਸਙ੍ਗਹੋ. ਤਮੁ ਕਙ੍ਖਾਯਂ, ਅਲੋ. ਦ੍ਵਯਂ ਕੁਟਜੇ. ਰੋਗਂ ਛਿਨ੍ਦਤੀਤਿ ਕੁਟਜੋ, ਜੋ. ਗਿਰਿਮ੍ਹਿ ਜਾਤਾ ਮਲ੍ਲਿਕਾ ਗਿਰਿਮਲ੍ਲਿਕਾ, ਸਕ੍ਕਪਰਿਯਾਯੋਪ੍ਯਤ੍ਰ.
੫੭੪. ਤਸ੍ਸ ਕੁਟਜਸ੍ਸ ਫਲੇ ਇਨ੍ਦਯਵੋ. ਇਨ੍ਦਸ੍ਸ ਸਕ੍ਕਸ੍ਸ ਯਵੋ ਧਞ੍ਞਵਿਸੇਸੋ ਇਨ੍ਦਯਵੋ. ਕਲਿਙ੍ਗਂ, ਕਦ੍ਦਯਵਮ੍ਪਿ.
‘‘ਪੂਤਿਕਰਞ੍ਜ ਧੂਮ੍ਯਾਟੇ, ਦੇਸਭੇਦੇ ਪੁਮਾ ਭਵੇ;
ਕੁਟਜਸ੍ਸ ਫਲੇ ਕ੍ਲੀਵਂ, ਕਲਿਙ੍ਗਂ ਥੀ ਤੁ ਨਾਰਿਯ’’ਨ੍ਤਿ [ਚਿਨ੍ਤਾਮਣਿਟੀਕਾ ੧੪.੬੭]. –
ਰਭਸੋ. ਅਮਰਮਾਲਾਯਨ੍ਤੁ ‘‘ਕਲਿਙ੍ਗੇ’ਨ੍ਦਯਵੋ ਪੁਮਾ’’ਤਿ ਇਤ੍ਥਿਕਣ੍ਡੇ ਪਾਠੋ. ਤਸ੍ਸਤ੍ਥੋ ਕਲਿਙ੍ਗਾ ਇਤ੍ਥੀ, ਇਨ੍ਦਯਵੋ ਪੁਮਾ. ਦ੍ਵਯਂ ਕਣਿਕਾਰਿਕਾਯਂ. ਅਗ੍ਗਿ ਅਨੇਨ ਮਨ੍ਥ੍ਯਤੇ ਅਗ੍ਗਿਮਨ੍ਥੋ, ਣੋ. ਤਂ ਕਟ੍ਠੇਹਿ ਘਂਸਿਯਮਾਨੇ ਅਗ੍ਗਿ ਉਟ੍ਠਹਤਿ. ਕਣ ਗਤਿਯਂ, ਣ੍ਵੁ. ਜਯਾਪ੍ਯਤ੍ਰ. ‘‘ਵਿਜਯੇ ਸੋ ਜਯਾ ਦੁਗ੍ਗਾ, ਜਯਨ੍ਤੀ ਗਣਿਕਾਰਿਕੇ’’ਤਿ ਜਯਾ ਨਾਨਾਤ੍ਥਾ.
ਦ੍ਵਯਂ ਨਿਗ੍ਗੁਣ੍ਡਿਯਂ. ਨਤ੍ਥਿ ਗੁਣ੍ਡਂ ਗਬ੍ਭਬਨ੍ਧਨਮੇਤਾਯਾਤਿ ਨਿਗ੍ਗੁਣ੍ਡੀ. ਸਿ ਬਨ੍ਧਨੇ, ਦੁ, ਸਿਨ੍ਦੁਂ ਗਬ੍ਭਬਨ੍ਧਨਂ ਵਾਰੇਤੀਤਿ ਸਿਨ੍ਦੁਵਾਰੋ. ਇਨ੍ਦਾਨੀਪ੍ਯਤ੍ਰ. ਇਨ੍ਦਾਨੀਕਰਣੇ ਥੀਨਂ, ਸਿਨ੍ਦੁਵਾਰੇਨ੍ਦਨਾਰਿਸੁ. ਦ੍ਵਯਂ ਮਲ੍ਲਿਕਾਯਂ. ਤਿਣਾਨਿ ਸੂਲਨ੍ਤਿ ਯਸ੍ਮਿਨ੍ਤਿ ਤਿਣਸੂਲਂ, ਸੂਲ ਰੁਜਾਯਂ. ਯਤ੍ਰ ਤਂ ਜਾਯਤਿ, ਤਤ੍ਰ ਤਿਣਾਨਿ ਰੋਗੀਨਿ ਭਵਨ੍ਤੀਤ੍ਯਤ੍ਥੋ. ‘‘ਤਿਣਸੂਲਂ ਮਲ੍ਲਿਕਾਯਂ, ਪਣ੍ਡਕਂ ਕੇਤਕੀਫਲੇ’’. ਮਲ੍ਲਤੇ ਧਾਰੀਯਤੇ ਸਬ੍ਬੇਹੀਤਿ ਮਲ੍ਲਿਕਾ, ਮਲ੍ਲ ਧਾਰਣੇ, ਇ, ਸਕਤ੍ਥੇ ਕੋ. ਭੂਪਦੀ, ਸੀਤਭੀਰੁ ਚ.
੫੭੫. ਦ੍ਵਯਂ ਕਣ੍ਹਪੁਪ੍ਫਸੇਫਾਲਿਕਾਯਂ. ਸਿਫਾ ਜਟਾ ਯਸ੍ਸਤ੍ਥਿ ਸੇਫਾਲਿਕਾ, ਇਕੋ, ਲਮਜ੍ਝੋ. ਨੀਲਪੁਪ੍ਫਤਾਯ ਨੀਲਿਕਾ. ਸੁਵਹਾ, ਨਿਗ੍ਗੁਣ੍ਡੀਪਿ. ‘‘ਸਿਨ੍ਦੁਵਾਰੇਪਿ ਨਿਗ੍ਗੁਣ੍ਡੀ, ਨੀਲਸੇਫਾਲਿਕਾਯ ਚੇ’’ਤਿ ਰੁਦ੍ਦੋ. ਦ੍ਵਯਂ ਵਨਮਲ੍ਲਿਕਾਯਂ. ਫੁਟ ਵਿਕਸਨੇ, ਆ ਭੁਸੋ ਫੁਟਤੀਤਿ ਅਪ੍ਫੋਟਾ, ਰਸ੍ਸਾਦਿ.
ਚਤੁਕ੍ਕਂ ਰਤ੍ਤਪੁਪ੍ਫੇ. ਬਨ੍ਧ ਬਨ੍ਧਨੇ, ਉ, ਸਕਤ੍ਥੇ ਕੋ. ਜਯਤ੍ਥਂ ਸੁਮਨਂ ਜਯਸੁਮਨਂ. ਭਣ੍ਡਤਿਸ੍ਮਾ ਇਕੋ, ਭਣ੍ਡਿਕੋ. ਜੀਵਤੀਤਿ ਜੀਵਕੋ, ਜੀਵ ਪਾਣਧਾਰਣੇ, ਣ੍ਵੁ. ਜੀਵਕਸਦ੍ਦਸ੍ਸ ਪੀਤਸਾਲਾਦੀਸ੍ਵਪਿ ਪਵਤ੍ਤਨਤੋ ਬਨ੍ਧੁ ਏਵ ਜੀਵਕੋ ਬਨ੍ਧੁਜੀਵਕੋਤਿ ਬਨ੍ਧੁਸਦ੍ਦੇਨ ਵਿਸੇਸੇਤ੍ਵਾ ਵੁਤ੍ਤਂ, ਸਮੁਦਿਤੇਨ ਵਾ ਨਾਮਮਿਦਮੇਕਸ੍ਸ. ‘‘ਬਨ੍ਧੁ ਬਨ੍ਧੁਕਪੁਪ੍ਫੇ ਚ, ਬਨ੍ਧੁਭਾਤਰਿ ਬਨ੍ਧਵੇ’’ਤਿ ਵਚਨਤੋ,
‘‘ਜੀਵਕੋ ਪੀਤਸਾਲੇ ਚ, ਖੇਪਨੇ ਵੁਦ੍ਧਿਜੀਵਿਨਿ;
ਸੇਵਿਨਿ ਪਾਣਕੇ ਫਾਤਿ-ਕੁਣ੍ਡਿਕੇ ਪਾਦਪਨ੍ਤਰੇ’’ਤਿ. –
ਵਚਨਤੋ ਚ ‘‘ਬਨ੍ਧੁਜੀਵਕੋ’’ਤਿ ਏਤ੍ਥ ਦ੍ਵੇ ਨਾਮਾਨਿਪਿ ਦਟ੍ਠਬ੍ਬਾਨਿ.
੫੭੬. ਪਞ੍ਚਕਂ ਸੁਮਨਾਯਂ. ਸੁਨ੍ਦਰਂ ਮਨੋ ਯਸ੍ਸਂ. ਸੁਗਨ੍ਧਤ੍ਤਾ ਜਾਤਿਸੁਮਨਾਤਿ ਸਮੁਦਿਤਨਾਮਂ. ਮਲ ਧਾਰਣੇ, ਤੋ, ਨਦਾਦਿ. ਜਨ ਜਨਨੇ,ਤਿ. ਵਸ੍ਸਕਾਲਸਞ੍ਜਾਤਪੁਪ੍ਫਤਾਯ ਵਸ੍ਸਿਕੀ. ਇਕੋ, ਨਦਾਦਿ.
ਦ੍ਵਯਂ ‘‘ਚਮ੍ਪੇਯ੍ਯ’’ਇਤਿ ਖ੍ਯਾਤੇ. ਯੁਥ ਹਿਂਸਾਯਂ, ਇ, ਸਕਤ੍ਥੇ ਕੋ, ਦੀਘਾਦਿ. ਮਗਧੇ ਭਵਾ ਮਾਗਧੀ. ਗਣਿਕਾ, ਅਮ੍ਬਟ੍ਠਾਪਿ. ਦ੍ਵਯਂ ‘‘ਦੇਵਾਲਿ’’ਇਤਿ ਖ੍ਯਾਤਾਯਂ. ਸੁਨ੍ਦਰਂ ਦਲਮੇਤਿਸ੍ਸਾ ਸਤ੍ਤਲਾ, ਦਸ੍ਸ ਤੋ, ਸਤ੍ਤ ਦਲਾਨਿ ਯਸ੍ਸਾ ਵਾ ਸਤ੍ਤਲਾ. ਨਵਾ ਨੂਤਨਾ ਮਲ੍ਲਿਕਾ ਨਵਮਲ੍ਲਿਕਾ. ਨਵਮਾਲਿਕਾਪਿ.
੫੭੭. ਦ੍ਵਯਂ ਪੁਣ੍ਡਕੇ ‘‘ਲਂਸ੍ਵਣ’’ਇਤਿ ਖ੍ਯਾਤੇ. ਵਸਨ੍ਤੇ ਪੁਪ੍ਫਤਿ ਵਾਸਨ੍ਤੀ. ਅਤਿਮੁਦਂ ਤਨੋਤੀਤਿ ਅਤਿਮੁਤ੍ਤੋ, ਨਿਪਾਤਨਾ. ਮਾਧਵੀ, ਲਤਾਪਿ. ਮਧੁਮ੍ਹਿ ਚਿਤ੍ਤੇ, ਵੇਸਾਖੇ ਵਾ ਪੁਪ੍ਫਤੀਤਿ ਮਾਧਵੀ.
‘‘ਲਤਾ ਜੋਤਿਮਤੀਪਕ੍ਕ-ਸਾਖਾਵਲ੍ਲੀਪਿਯਙ੍ਗੁਸੁ;
ਲਤਾ ਕਤ੍ਥੂਰਿਕਾਯਞ੍ਚ, ਸਾ ਦੁਬ੍ਬਾਮਾਧਵੀਸੁ ਚਾ’’ਤਿ.
ਲਤਾ ਅਨੇਕਤ੍ਥਾ. ਦ੍ਵਯਂ ਕਰਵੀਰੇ. ਕੁਚ੍ਛਿਤਂ ਰਵਨ੍ਤਿ ਅਸ੍ਸਾ ਯੇਨ ਕਰਵੀਰੋ, ਈਰੋ. ਅਸ੍ਸੇ ਮਾਰੇਤੀਤਿ ਅਸ੍ਸਮਾਰਕੋ. ਪਟਿਹਾਸੋਪਿ.
ਦ੍ਵਯਂ ਮਾਤੁਲੁਙ੍ਗੇ. ਮਤ੍ਤੋ ਲੁਜ੍ਜਤਿ ਯੇਨ ਮਾਤੁਲੁਙ੍ਗੋ, ਲੁਜ ਵਿਨਾਸੇ. ਪਰਿਪੁਣ੍ਣਬੀਜਤਾਯ ਬੀਜਪੂਰੋ. ਰੁਚਕੋਪਿ, ਰੁਚ ਦਿਤ੍ਤਿਯਂ, ਣ੍ਵੁ. ਦ੍ਵਯਂ ਧੁਤ੍ਤੁਰੇ. ਉਗ੍ਗਂ ਮਜ੍ਜਤਿ ਯੇਨ ਉਮ੍ਮਤ੍ਤੋ, ਮਦ ਉਮ੍ਮਾਦੇ. ਮਾਰੇਤੀਤਿ ਮਾਤੁਲੋ, ਉਲੋ, ਰਸ੍ਸ ਤੋ. ‘‘ਉਮ੍ਮਤ੍ਤੋ ਕਿਤਵੋ ਧੁਤ੍ਤੋ, ਧਤ੍ਤੂਰੋ ਕਨਕਾਵ੍ਹਯੋ, ਮਾਤੁਲੋ ਮਦਨੋ’’ਤ੍ਯਮਰਕੋਸੋ [ਅਮਰ ੧੪.੭੭].
੫੭੮. ਦ੍ਵਯਂ ਕਣ੍ਹਪਾਕਫਲੇ. ਕਰਂ ਹਤ੍ਥਂ ਮਦ੍ਦਤਿ ਕਣ੍ਟਕੇਨ ਕਰਮਨ੍ਦੋ. ਕਰਮਦ੍ਦੋਪਿ. ਸੁਟ੍ਠੁ ਸਿਨੋਤੀਤਿ ਸੁਸੇਨੋ, ਸਿ ਬਨ੍ਧਨੇ, ਯੁ. ਦ੍ਵਯਂ ਕੁਨ੍ਦੇ. ਕੁਣ ਸਙ੍ਕੋਚਨੇ, ਦੋ, ਨਤ੍ਤਂ, ਕੁਣ ਸਦ੍ਦੋਪਕਰਣੇਸੁ ਵਾ. ਮਾਘੇ ਭਵਂ ਮਾਘ੍ਯਂ, ਯੋ, ਤਸ੍ਮਿਂ ਕਾਲੇ ਹਿ ਪੁਪ੍ਫਾਦਿਸਮਿਦ੍ਧਿ ਭਵਤੀਤਿ ਤਬ੍ਭਵਤ੍ਤੇਨ ਬ੍ਯਪਦੇਸੋ.
ਦ੍ਵਯਂ ਦੇਵਤਾਸੇ. ਦੇਵਤਾ ਆਸਨ੍ਤਿ ਯਂ ਦੇਵਤਾਸੋ. ਜੀਮੂਤਕਾਲੇ ਸਞ੍ਜਾਤਤ੍ਤਾ ਜੀਮੂਤੋ, ਮ੍ਹਨਲਾ. ਦ੍ਵਯਂ ਸਨਾਮਪਸਿਦ੍ਧੇ ਪੁਪ੍ਫਵਿਟਪੇ. ਪੁਪ੍ਫਮਾਸੁਂ ਨ ਮਿਲਾਤਮਸ੍ਸ ਭਵਤੀਤਿ ਅਮਿਲਾਤੋ. ਮਹਨ੍ਤਮ੍ਪਿ ਕਾਲਂ ਸਹਤੀਤਿ ਮਹਾਸਹਾ.
੫੭੯. ਚਤੁਕ੍ਕਂ ਝਿਣ੍ਡਿਸਾਮਞ੍ਞੇ. ਸਿਰੀ ਵਤ੍ਤਤਿ ਯੇਨ ਸੇਰੇਯ੍ਯਕੋ, ਣੇਯ੍ਯਕੋ. ਦਾਸਨਾਮਕਤ੍ਤਾ ਦਾਸੀ. ਕਿਰ ਵਿਕ੍ਕਿਰਣੇ, ਆਤੋ, ਦ੍ਵਿਤ੍ਤਂ. ਕੁਰ ਸਦ੍ਦੇ, ਡੋ, ਸਕਤ੍ਥੇ ਕੋ.
ਦ੍ਵਯਂ ਕਣ੍ਟੇਨ, ਪਤ੍ਰੇਨ ਚ ਸਿਤੇ ਪਣ੍ਣਾਸੇ. ਅਜ ਗਮਨੇ, ਉਕੋ. ਸਿਤੋ ਸੁਕ੍ਕੋ ਪਣ੍ਣਾਸੋ ਸਿਤਪਣ੍ਣਾਸੋ. ਦ੍ਵਯਂ ਅਪ੍ਪਪਤ੍ਤੇ ਪਣ੍ਣਾਸੇ. ਈਰ ਕਮ੍ਪਨੇ, ਯੁ. ਫਣਿਂ ਜਯਤਿ ਫਣਿਜ੍ਜਕੋ, ਯਸ੍ਸ ਕੋ.
੫੮੦. ਦ੍ਵਯਂ ਜਪਾਕੁਸੁਮੇ. ਜਪਤਿ ਯਾਯ ਜਪਾ, ਜੁ ਜਵਨੇ ਵਾ, ਪੋ, ਉਸ੍ਸਤ੍ਤਂ. ਮਰੁਦੇਸਜੇ ਕਣ੍ਟਕਿਨਿ ਕਰਭਪ੍ਪਿਯੇ ਤਰੁਵਿਸੇਸੇ ਕਰੀਰਾਦਿਦ੍ਵਯਂ. ਕਰੋਤਿਸ੍ਮਾ ਈਰੋ. ਕਚ ਬਨ੍ਧਨੇ, ਦ੍ਵਿਤ੍ਤਂ, ਕਕਚੋ, ਗਨ੍ਥਿਲੋਪਿ.
ਦ੍ਵਯਂ ਰੁਕ੍ਖੋਪਰਿਜਾਤੇ ਵਿਜਾਤਿਯੇ ਪਲ੍ਲਵੇ. ਰੁਕ੍ਖੇ ਜਾਯਮਾਨਾ ਤਂ ਅਦ੍ਦਤਿ ਹਿਂਸਤੀਤਿ ਰੁਕ੍ਖਾਦਨੀ, ਅਦ੍ਦ ਹਿਂਸਾਯਂ, ਯੁ, ਨਦਾਦਿ, ਦਲੋਪੋ. ਵਨ੍ਦ ਅਭਿਵਾਦਨਥੁਤੀਸੁ, ਅ, ਇਤ੍ਥਿਯਂ, ਸਕਤ੍ਥੇ ਕੋ, ਅਸ੍ਸ ਦੀਘੋ. ਰੁਕ੍ਖਰੁਹਾ, ਜੀਵਨ੍ਤਿਕਾਪਿ. ਦ੍ਵਯਂ ਚਿਤ੍ਤਕੇ. ਚਿਤਿ ਹਿਂਸਾਯਂ, ਗਨ੍ਧੇ ਚ, ਣ੍ਵੁ. ਅਗ੍ਗਿਸਞ੍ਞਿਤੋਤਿ ਅਗ੍ਗਿਪਰਿਯਾਯਨਾਮਕੋ. ਪਾਠੀਪਿ, ਪੁਮੇ’ਯਂ.
੫੮੧. ਦ੍ਵਯਂ ਗਣਰੂਪੇ. ਅਕ੍ਕੋ ਸੂਰਿਯੋ, ਤਪ੍ਪਰਿਯਾਯਨਾਮਕਤ੍ਤਾ ਅਕ੍ਕੋ. ਵਿਕਰੋਤੀਤਿ ਵਿਕਿਰਣੋ, ਯੁ. ਅਸ੍ਸਿ. ਅਕ੍ਕਵ੍ਹੋ, ਵਸੁਕੋ, ਅਪ੍ਫੋਟੋ, ਮਨ੍ਦਾਰੋ, ਅਕ੍ਕਪਣ੍ਣੋਪਿ. ‘‘ਪੁਮੇ ਅਕ੍ਕਵ੍ਹੋ ਅਪ੍ਫੋਟੋ, ਵਨਮਾਲ੍ਯਪਰਾਜਿਤੇ’’ਤਿ [ਚਿਨ੍ਤਾਮਣਿਟੀਕਾ ੧੪.੮੦] ਰੁਦ੍ਦੋ. ਮਨ੍ਦਾਰੋ ਦੇਵਦੁਮਮ੍ਹਿ ਪਾਰਿਭਦ੍ਦਕੇਪਿ. ਤਸ੍ਮਿਂ ਅਕ੍ਕੇ ਯੋ ਸੇਤਪੁਪ੍ਫਕੋ, ਤਸ੍ਮਿਂ ਅਲ਼ਕ੍ਕੋ. ਸੇਤਪੁਪ੍ਫਤਾਯ ਅਲਂਭੂਤੋ ਅਕ੍ਕੋ ਅਲ਼ਕ੍ਕੋ, ਅਲ ਭੂਸਨੇ, ਲ਼ਤ੍ਤਂ. ਪਤਾਪਸੋਪਿ. ਦ੍ਵਯਂ ਛਿਨ੍ਨਰੁਹਾਯਂ. ਤਿਤ੍ਤਰਸਤ੍ਤਾ ਪੂਤਿਭੂਤਾ ਲਤਾ ਪੂਤਿਲਤਾ, ਪੂ ਪਵਨੇ ਵਾ,ਤਿ. ਰੋਗਮਲਂ ਪੁਨਾਤੀਤਿ ਪੂਤਿ, ਸਾ ਏਵ ਲਤਾ ਪੂਤਿਲਤਾ. ਗੁਲ਼ ਰਕ੍ਖਣੇ, ਚੋ, ਨਦਾਦਿ. ਗਰ ਸੇਚਨੇ ਵਾ. ਅਮਤਾ, ਮਧੁਪਣ੍ਣੀਪਿ. ਮਧੁ ਇਵ ਪਣ੍ਣਮਸ੍ਸਾ ਮਧੁਪਣ੍ਣੀ. ਦ੍ਵਯਂ ਧਨੁਸੇਨਿਯਂ, ਯਾ ਪਤ੍ਤੇਹਿ ਵਚਾਸਦਿਸੀ, ਤਤ੍ਤਚੋ ਤਨ੍ਤਧਨੁਗੁਣੋਪਯੁਤ੍ਤੋ. ਮੁਬ੍ਬਾਵਿਕਾਰਤਾਯੇਵ ਧਨੁਜਿਯਾ ‘‘ਮੁਬ੍ਬੀ’’ਤ੍ਯੁਚ੍ਚਤੇ, ਮੁਬ੍ਬ ਬਨ੍ਧਨੇ, ਅ, ਮੁਬ੍ਬਾ. ਮਧੁਰਸਤ੍ਤਾ ਮਧੁਰਸਾ. ਦੇਵੀ, ਮੋਰਟਾਪਿ. ਮੁਰ ਪਵੇਧਨੇ, ਅਟੋ, ਮੋਰਟਾ.
੫੮੨. ਦ੍ਵਯਂ ਮਕ੍ਕਟਿਯਂ. ਕਪੀਨਂ ਵਾਨਰਾਨਂ ਕਚ੍ਛੁਂ ਜਨੇਤੀਤਿ ਕਪਿਕਚ੍ਛੁ. ਕਪਿਕਚ੍ਚੁਪਿ. ਦੁਕ੍ਖਸਮ੍ਫਸ੍ਸਤਾਯ ਦੁਫਸ੍ਸੋ. ਅਤ੍ਤਗੁਤ੍ਤਾ, ਜਡਾ, ਅਬ੍ਯਣ੍ਡਾ, ਕਣ੍ਡੂਰਾ, ਪਾਵੁਸਾਯਿਨੀ, ਸੂਕਸਿਮ੍ਬਿਪਿ. ‘‘ਅਯਂ ਫਸ੍ਸੇਨ ਕਣ੍ਡੁਂ ਜਨਯਤੀ’’ਤਿ ਯਾ ਲੋਕੇਹਿ ਪਰਿਹਰੀਯਤੇ, ਤਤੋ ਅਯਂ ਅਤ੍ਤਨਾ ਗੁਤ੍ਤਾ ਰਕ੍ਖਿਤਾ ਅਤ੍ਤਗੁਤ੍ਤਾ. ਪਾਵੁਸਾਯਂ ਉਤੁਯਂ ਏਤਿ ਜਾਯਤੇ, ਣੋ, ਇਨੀ. ਸੂਕਸਹਿਤਾ ਸਿਮ੍ਬਿ ਅਸ੍ਸਾ ਸੂਕਸਿਮ੍ਬਿ, ਰਸ੍ਸਨ੍ਤੋ. ਦ੍ਵਯਂ ਮਣ੍ਡੂਕਪਣ੍ਣਿਯਂ. ਮਜ ਸੁਦ੍ਧਿਯਂ, ਠੋ. ਕਾਸ ਦਿਤ੍ਤਿਯਂ, ਕਰਣੇ ਅ, ਰਸ੍ਸੋ. ਸਮਙ੍ਗਾ, ਯੋਜਨਵਲ੍ਲੀਪਿ. ਸਮਙ੍ਗਤੀਤਿ ਸਮਙ੍ਗਾ, ਅ. ਯੋਜਨਂ ਵਲ੍ਲੀ ਯਸ੍ਸਾ ਯੋਜਨਵਲ੍ਲੀ.
ਦ੍ਵਯਂ ਵਨਤਿਤ੍ਤਿਕਾਯਂ. ਅਮ੍ਬ ਸਦ੍ਦੇ, ਠੋ, ਅਵ ਰਕ੍ਖਣੇ ਵਾ, ਨਿਗ੍ਗਹੀਤਾਗਮੋ. ਪਾ ਰਕ੍ਖਣੇ, ਠੋ. ਸੇਤਾ, ਪਾਪਚੇਲੀਪਿ. ਸੇਤਰਸੇਨ ਯੁਜ੍ਜਤੇਤਿ, ਅ. ਦ੍ਵਯਂ ਕਟੁਕਰੋਹਿਣਿਯਂ. ਕਟ ਵਸ੍ਸਾਵਰਣਗਤੀਸੁ. ਉ, ਕਟੁ, ਨਾਰੀ. ਕਟੁਕਰਸਾ ਹੁਤ੍ਵਾ ਰੁਹਤੀਤਿ ਕਟੁਕਰੋਹਿਣੀ, ਰੁਹ ਜਨਨੇ, ਯੁ, ਨਦਾਦਿ. ‘‘ਕਟੁਕਰੋਹਿਣੀ’’ਤਿ ਸਮੁਦਿਤੇਨ ਨਾਮਮਿਦਂ. ਕਟੁਰੋਹਿਣੀਪਿ.
੫੮੩. ਦ੍ਵਯਂ ਖਰਮਞ੍ਜਰਿਯਂ ‘‘ਚਚਸਿਮ’’ਇਤਿ ਖ੍ਯਾਤਾਯਂ. ਅਪਮਜ੍ਜਨ੍ਤਿ ਵਤ੍ਥਾਦਿਕ’ਮਨੇਨੇਤਿ ਅਪਾਮਗ੍ਗੋ, ਦੀਘੋ ਉਪਸਗ੍ਗਸ੍ਸ. ਸਿਖਰਮਸ੍ਸਾਤਿ ਸੇਖਰਿਕੋ. ਧਾਮਗ੍ਗਵੋ, ਵਿਮੁਖਪੁਪ੍ਫੀਪਿ. ‘‘ਘੋਸਕੇ ਖਰਮਞ੍ਜਰਿਯਂ, ਧਾਮਗ੍ਗਵੋ ਪੁਮੇ ਮਤੋ’’. ਵਿਮੁਖਂ ਪੁਪ੍ਫਮਸ੍ਸਾ. ਦ੍ਵਯਂ ਕਣਾਯਂ. ਪਿਤ੍ਤਂ ਫਲਤਿ ਕੁਪ੍ਪਤਿ ਯਾਯ ਪਿਪ੍ਫਲੀ, ਨਦਾਦਿ. ਮਗਧੇ ਭਵਾ ਮਾਗਧੀ, ਮਗਧਾਨਂ ਅਯਂ ਵਾ ਮਾਗਧੀ, ਤਤ੍ਰ ਪਠਮੁਪ੍ਪਨ੍ਨਤ੍ਤਾ, ਬਾਹੁਲ੍ਯੇਨ ਵਾ ਤਤ੍ਰ ਜਾਯਮਾਨਤ੍ਤਾ ਤਂਸਮਞ੍ਞਾਯ ਬ੍ਯਪਦਿਸ੍ਸਤੇ. ਵੇਦੇਹੀ, ਕਣਾ, ਕੋਲਾਪਿ. ਵੇਦੇਹਾਨਮਯਂ ਵੇਦੇਹੀ. ਕਣਾ ਨਾਨਤ੍ਥਾ, ਵੁਤ੍ਤਞ੍ਚ ‘‘ਕਣਾ ਪਿਪ੍ਫਲਿ’ਜਾਜੀ ਚੇ’’ਤਿ.
ਦ੍ਵਯਂ ਤਿਕਣ੍ਟਕੇ. ਗਵਂ ਕਣ੍ਟਕੋ ਗੋਕਣ੍ਟਕੋ, ਪਥਵਿਯਂ ਵਾ ਲਗ੍ਗੋ ਕਣ੍ਟਕੋ ਗੋਕਣ੍ਟਕੋ. ਸਿਙ੍ਘ ਘਾਯਨੇ, ਆਟੋ. ਪਲਙ੍ਕਸਾ, ਸਾਦੁਕਣ੍ਟੋਪਿ. ਯੁਤ੍ਤਰਾਸ੍ਨਾਯਂ ਪਲਾਸੇ ਚ ਪਲਙ੍ਕਸਾ ਥਿਯਂ. ਸਾਦੁਕਣ੍ਟੋ ਵਿਕਙ੍ਕਤੇਪਿ. ਦ੍ਵਯਂ ਹਤ੍ਥਿਪਿਪ੍ਫਲਿਯਂ. ਕੋਲਾਕਾਰਾ, ਤਂਨਾਮਿਕਾ ਵਾ ਵਲ੍ਲੀ ਕੋਲਵਲ੍ਲਿ, ਰਸ੍ਸੋ. ਇਭਾਨਂ ਹਤ੍ਥੀਨਂ ਪਿਪ੍ਫਲੀ ਇਭਪਿਪ੍ਫਲੀ. ਕਪਿਵਲ੍ਲੀ, ਵਸਿਰੋਪਿ. ਵਸਿਰੋ ਨਾਨਤ੍ਥੋ. ਵਸਿਰੋ ਅਪਾਮਗ੍ਗੋ ਸਾਮੁਦ੍ਦਲਵਣਂ ਹਤ੍ਥਿਪਿਪ੍ਫਲਿ ਚੇਤਿ. ਪੁਮੇ’ਯਂ.
੫੮੪. ਦ੍ਵਯਂ ਛਗਨ੍ਥਾਯਂ, ਯਾ ‘‘ਉਗ੍ਗਗਨ੍ਧਾ’’ਤਿਪ੍ਯੁਚ੍ਚਤੇ. ਗੁਨ੍ਨਂ ਲੋਮਸਮ੍ਪਾਤਨਟ੍ਠਾਨੇ ਜਾਤਾ ਗੋਲੋਮੀ, ਵਚ ਵਿਯਤ੍ਤਿਯਂ ਵਾਚਾਯਂ, ਕਰਣੇ ਅ, ਸਤਪਬ੍ਬਿਕਾਪਿ. ਵਚਾ ਸੁਕ੍ਕਲੋਹਿਤਮੂਲਭੇਦੇਨ ਦੁਵਿਧਾ, ਤਤ੍ਰਸੁਕ੍ਕਾ ‘‘ਹੇਮਵਤੀ’’ਤ੍ਯੁਚ੍ਚਤੇ ਅਮਰਕੋਸੇ [ਅਮਰ ੧੪.੧੦੨-੩]. ਦ੍ਵਯਂ ਅਪ੍ਫੋਟਾਯਂ. ਕਣ੍ਣਸਣ੍ਠਾਨਪੁਪ੍ਫਤਾਯ ਕਣ੍ਣੀ. ਗਿਰਿਮ੍ਹਿ ਜਾਤਾ ਕਣ੍ਣੀ ਗਿਰਿਕਣ੍ਣੀ. ਰੋਗਾਦਿਜਿਤਤ੍ਤਾ ਅਪਰਾਜਿਤਾ.
ਦ੍ਵਯਂ ਕਲਸਿਯਂ. ਸੀਹਪੁਚ੍ਛਾਕਾਰਕੁਸੁਮਮਞ੍ਜਰਿਤਾਯ ਸੀਹਪੁਚ੍ਛਿ. ਪਞ੍ਹਿ ਅਪ੍ਪਤਨੁ ਵੁਚ੍ਚਤੇ. ਪਞ੍ਹਿ ਪਣ੍ਣਂ ਯਸ੍ਸਾ ਪਞ੍ਹਿਪਣ੍ਣੀ. ਪੁਥੁਪਣ੍ਣੀ, ਗੁਹਾਪਿ, ਪੁਥੁ ਅਸਿਲਿਟ੍ਠਂ ਪਣ੍ਣਮਸ੍ਸਾ ਪੁਥੁਪਣ੍ਣੀ. ਗਹ੍ਵਰੇ ਸੀਹਪੁਚ੍ਛਞ੍ਚ, ਥਿਯਂ ਛਮਾਤੁਕੇ ਗੁਹੋ [ਚਿਨ੍ਤਾਮਣਿਟੀਕਾ ੧੪.੯੩]. ਦ੍ਵਯਂ ਸਾਲਪਣ੍ਣਿਯਂ. ਸਾਲਪਣ੍ਣਸਦਿਸਵਿਟਤਾਯ ਸਾਲਪਣ੍ਣੀ. ਸਾਲਂ ਸੋਭਨਯੁਤ੍ਤਂ ਪਣ੍ਣਮਸ੍ਸਾ ਵਾ ਸਾਲਪਣ੍ਣੀ. ਥੁ ਗਤਿਥੇਰਿਯੇਸੁ, ਇਰੋ, ਥਿਰੋ.
੫੮੫. ਦ੍ਵਯਂ ਕਣ੍ਟਕਾਰਿਕਾਯਂ. ਨਿਦ੍ਦਹਤਿ ਕਣ੍ਟਕਮੁਟ੍ਠੇਤਿ ਨਿਦਿਦ੍ਧਿਕਾ, ਣ੍ਵੁ. ਭਯਕਰਣਵਸੇਨ ਬ੍ਯਗ੍ਘਸਦਿਸਤਾਯ ਬ੍ਯਗ੍ਘੀ, ਬ੍ਰਹਤੀ, ਖੁਦ੍ਦਾਪਿ. ਦ੍ਵਯਂ ਨੀਲਿਰੁਕ੍ਖੇ. ਨੀਲ ਵਣ੍ਣੇ. ਨੀਲਵਣ੍ਣਤਾਯ ਨੀਲੀ, ਨਦਾਦਿ, ਇਨੀ, ਨੀਲਿਨੀ, ਕਾਲ਼ਾ, ਤੁਤ੍ਥਾਪਿ.
ਕਾਲ਼ਾ ਕਣ੍ਹਤਿਵੁਤਾਯਂ, ਨੀਲੀ ਯੋਜਨਵਲ੍ਲਿਸੁ;
ਪਣ੍ਡੇ ਰਸਞ੍ਜਨੇ ਤੁਤ੍ਥਾ, ਸੁਖੁਮੇਲਾਯ ਨੀਲਿਯਂ [ਚਿਨ੍ਤਾਮਣਿਟੀਕਾ ੧੪.੯੪-੫].
ਦ੍ਵਯਂ ਗੁਞ੍ਜਾਯਂ. ਜਞ੍ਜ ਯੁਦ੍ਧੇ, ਉਕੋ, ਅਸ੍ਸਿ, ਗੁਜ ਸਦ੍ਦੇ, ਅ, ਬਿਨ੍ਦਾਗਮੋ. ਨਾਮਨ੍ਤਰਾਨਿ ਚਸ੍ਸ –
ਦੁਮੇ ਸਾ ਰਤ੍ਤਿਕਾ ਰਤ੍ਤ-ਦਲਾ ਚੂਲ਼ਾਮਣੀ ਚ ਸਾ;
ਕਾਕਚਿਞ੍ਚੀ ਤੁਲਾਬੀਜਂ, ਕਣ੍ਹਲਾ ਚ ਸਿਖਣ੍ਡਿਨੀ.
ਦ੍ਵਯ’ਮਹੇਰੁਯਂ. ਅਯਮਹੇਰੁਇਚ੍ਚੇਵ ਖ੍ਯਾਤਕਣ੍ਟਕਵਤੀ ਭਵਤਿ. ਸਤਂ ਮੂਲਾਨਿ ਯਸ੍ਸ ਸਤਮੂਲੀ. ਸਤਂ ਰੋਗੇ ਆਵਰਤੀਤਿ ਸਤਾਵਰੀ, ਵਰ ਆਵਰਣਿਚ੍ਛਾਸੁ, ਅਥ ਵਾ ‘‘ਸਤਾ’’ਤਿ ਚ ‘‘ਆਵਰੀ’’ਤਿ ਚ ਦ੍ਵੇ ਨਾਮਾਨਿ ਤਸ੍ਸਾ. ‘‘ਸਤਮੂਲੀ ਬਹੁਸੁਤਾ-ਭੀਰੁ ਇਨ੍ਦੀਵਰੀ ਵਰੀ’’ਤਿ [ਅਮਰ ੧੪.੧੦੦] ਹਿ ਵੁਤ੍ਤਂ.
੫੮੬. ਦ੍ਵਯਂ ਅਤਿਵਿਸਾਯਂ. ਮਹਾਵੀਰਿਯਂ ਓਸਧਂ ਮਹੋਸਧਂ. ‘‘ਲਸੁਣੇ ਤਿਵਿਸਾਯਞ੍ਚ, ਸੁਣ੍ਠਿਯਮ੍ਪਿ ਮਹੋਸਧ’’ਨ੍ਤਿ ਰੁਦ੍ਦੋ. ਅਤੀਵ ਵਿਸਤਿ ਭੇਸਜ੍ਜਪਯੋਗੇਸੂਤਿ ਅਤਿਵਿਸਾ, ਵਿਸਾ, ਅਰੁਣਾ, ਸਿਙ੍ਗੀਪਿ.
‘‘ਅਰੁਣੋ ਕਿਞ੍ਚਿਰਤ੍ਤਕ੍ਕੇ, ਸਞ੍ਝਾਰਾਗੇ ਅਨੂਰੁਕੇ;
ਨਿਸਦ੍ਦੇ ਕਪਿਲੇ ਕੁਟ੍ਠੇ, ਦਬ੍ਬੇਵ ਵਾਚ੍ਚਲਿਙ੍ਗਿਕੋ’’.
‘‘ਅਰੁਣਾਤਿਵਿਸਾਸਾਮਾ, ਮਞ੍ਜਟ੍ਠਾਤਿਵੁਤਾਸੁ ਚ;
ਉਸੀਰੇਤਿਵਿਸਾਯਞ੍ਚ, ਸਿਙ੍ਗਿਮਗ੍ਗੁਰਵਲ੍ਲਭਾ’’ਤਿ.
ਦ੍ਵਯਂ ਸੋਮਰਾਜਿਯਂ. ਵਕ ਆਦਾਨੇ, ਅਚੋ, ਸੋਮਸਮਤਾਯ ਕਾਰਿਤਾ ਵਲ੍ਲਿਕਾ ਸੋਮਵਲ੍ਲਿਕਾ, ਸਕਤ੍ਥੇ ਕੋ, ਕਣ੍ਹਫਲਾ, ਪੂਤਿਫਲਾਪਿ.
ਦ੍ਵਯਂ ਦਾਰੁਹਲਿਦ੍ਦਾਰੁਕ੍ਖੇ. ਦਰ ਵਿਦਾਰਣੇ, ਬੋ, ਰਸ੍ਸ ਬੋ, ਦਾਬ੍ਬੀ, ਦੀਘਾਦਿ, ਨਦਾਦਿ. ਹਲਿਦ੍ਦਵਣ੍ਣਦਾਰੁਤਾਯ ਦਾਰੁਹਲਿਦ੍ਦਾ, ਹਲਿਦ੍ਦਾਪਿ. ਦ੍ਵਯਂ ਬਿਲ਼ਙ੍ਗੇ. ਅਙ੍ਗ, ਰਙ੍ਗ, ਲਙ੍ਗ, ਗਤ੍ਯਤ੍ਥਾ ਦਣ੍ਡਕਾ ਧਾਤੂ, ਅ, ਲ਼ਤ੍ਤਂ, ਬਿਲ਼ਙ੍ਗਂ. ਚਿਤ੍ਰਾਨਿ ਤਣ੍ਡੁਲਾਨਿ ਯਸ੍ਸਾ, ਤਣ੍ਡੁਲੋ, ਕਿਮਿਸਤ੍ਤੁਪਿ.
੫੮੭. ਦ੍ਵਯਂ ਸਮਨ੍ਤਦੁਦ੍ਧਾਯਂ, ਨੁਹ ਉਗ੍ਗਿਰਣੇ, ਨਦਾਦਿ, ਮਹਨ੍ਤਂ ਨਾਮਮਸ੍ਸ. ਸੀਹੁਣ੍ਡੋ, ਵਜਿਰਦੁਮੋ, ਗੁਲ਼ਾਪਿ. ਦ੍ਵਯਂ ਦਕ੍ਖਾਯਂ. ਮੁਦੁਗੁਣਯੋਗਾ ਮੁਦ੍ਦਿਕਾ, ਮਧੁਰਸੋ ਸਾਦੁ, ਤੇਨ ਵੁਤ੍ਤਂ ਵੇਜ੍ਜਗਨ੍ਥੇ ‘‘ਸਾਦੁ ਲਵਣਤਿਤ੍ਤਮ੍ਬਿਲਕਟੁਕਸਾਯਕਾ’’ਇਤਿ, ਤਂਯੋਗਾ ਮਧੁਰਸਾ. ਗੋਤ੍ਥਨੀ, ਦਕ੍ਖਾਪਿ. ਤਿਕਂ ਯਟ੍ਠਿਮਧੁਕਾਯਂ. ਮਧੁਰਸਤਾਯ ਮਧੁਕਂ, ਉਪਮਾਨੇ ਕੋ. ਦਣ੍ਡਾਕਾਰਤ੍ਤਾ ਯਟ੍ਠਿ ਚ ਸਾ ਮਧੁਰਸਤ੍ਤਾ ਮਧੁਕਾ ਚੇਤਿ ਯਟ੍ਠਿਮਧੁਕਾ. ਮਧੁਰਸਭਾਵੇ ਤਿਟ੍ਠਤੀਤਿ ਮਧੁਲਟ੍ਠਿਕਾ, ਰਸ੍ਸ ਲੋ, ਸਕਤ੍ਥੇ ਕੋ ਚ. ‘‘ਮਧੁਯਟ੍ਠਿਕਾ’’ਤਿਪਿ ਪਾਠੋ, ਵੁਤ੍ਤਞ੍ਚ ‘‘ਮਧੁਕਂ ਕ੍ਲੀਤਕਂ ਯਟ੍ਠਿ-ਮਧੁਕਂ ਮਧੁਯਟ੍ਠਿਕਾ’’ਤਿ [ਅਮਰ ੧੪.੧੦੯].
੫੮੮. ਦ੍ਵਯਂ ਵਾਤਿਙ੍ਗਣੇ. ਵਾਤਹਰਤ੍ਤੇਨ ਗਣੀਯਤੇਤਿ ਵਾਤਿਙ੍ਗਣੋ, ਭਣ੍ਡ ਪਰਿਭਾਸਨੇ, ਣ੍ਵੁ, ਨਦਾਦਿ. ਟਕਾਰਕਰਣੇ ਭਣ੍ਟਾਕੀਪਿ, ਬ੍ਰਹਤਿਯਮ੍ਪਿ ਅਯਂ.
‘‘ਵਾਤਿਙ੍ਗਣੋ ਤੁ ਵਾਤ੍ਤਾਕੁ,
ਵਾਤ੍ਤਾਕੋ ਸਾਕਵੇਲ਼ੁ ਚ;
ਭਣ੍ਡਾਕੀ ਰਾਜਕੁਮ੍ਭਣ੍ਡੋ,
ਵਾਤ੍ਤਾਕੀ ਦੁਪ੍ਪਹਾਸਿਨੀ’’ਤਿ [ਚਿਨ੍ਤਾਮਣਿਟੀਕਾ ੧੪.੧੧੪].
ਰਭਸੋ. ਦ੍ਵਯਂ ਬ੍ਰਹਤਿਯਂ. ਵਾਤ੍ਤਂ ਨਿਰਾਮਯਂ ਕਰੋਤੀਤਿ ਵਾਤ੍ਤਾਕੀ, ਵਾਤਿਙ੍ਗਣੇਪਿ. ਬ੍ਰਹ ਵੁਤ੍ਤਿਯਂ, ਤੋ, ਨਦਾਦਿ.
ਦ੍ਵਯਂ ਗੋਰਕ੍ਖਤਣ੍ਡੁਲੇ, ਵੁਤ੍ਤਞ੍ਚ ਤਨ੍ਤਨ੍ਤਰੇ ‘‘ਗਙ੍ਗੇਰੁਕੀ ਨਾਗਬਲਾ, ਤਥਾ ਗੋਰਕ੍ਖਤਣ੍ਡੁਲਾ’’ਤਿ. ਨਾਗਸ੍ਸ ਬਲਮਿਵ ਬਲਮੇਤਿਸ੍ਸਾ ਰੋਗਹਰਣਤ੍ਤਾ ਨਾਗਬਲਾ, ਝਸ ਹਿਂਸਤ੍ਥੋ, ਅ. ਦ੍ਵਯਂ ਅਗ੍ਗਿਸਿਖਾਯਂ. ਨਙ੍ਗਲਸਦਿਸਮੂਲਤਾਯ ਲਾਙ੍ਗਲੀ, ਨਸ੍ਸ ਲੋ, ਦੀਘੋ ਚ. ‘‘ਨਙ੍ਗਲੀ’’ਤਿਪਿ ਪਾਠੋ, ਸਰਦਕਾਲੇ ਸਞ੍ਜਾਤਤ੍ਤਾ ਸਾਰਦੀ.
੫੮੯. ਤਿਕਂ ਕਦਲਿਯਂ. ਰਮਨ੍ਤਿ ਯਸ੍ਸਂ ਰਮ੍ਭਾ, ਭੋ. ਕਦ ਮਾਰਣੇ, ਅਲੋ, ਨਦਾਦਿ. ਮੁਚ ਮੋਚਨੇ, ਣੋ. ਦ੍ਵਯਂ ਕਪ੍ਪਾਸਿਯਂ, ਯਸ੍ਸਾ ਫਲਂ ਕਪ੍ਪਾਸਂ ਕਰੋਤਿ ਲੋਕਾਨਮੁਪਕਾਰਨ੍ਤਿ ਕਪ੍ਪਾਸੀ, ਕਰੋਤਿਸ੍ਮਾ ਪਾਸੋ, ਨਦਾਦਿ. ਵਦ ਥੇਰਿਯੇ, ਅਰੋ, ਸਮੁਦ੍ਦਨ੍ਤਾਪਿ.
ਸਮੁਦ੍ਦਨ੍ਤਾ ਤੁ ਕਪ੍ਪਾਸੀ, ਸਿਕ੍ਕਾਦੁਰਾਲਭਾਸੁ ਚ;
ਕਪ੍ਪਾਸੀ ਵਨਸਮ੍ਭਵਾ ਚੇ, ਭਾਰਦ੍ਵਾਜੀਤਿ ਵੁਚ੍ਚਤਿ.
ਦ੍ਵਯਂ ਪਣ੍ਣਲਤਾਯਂ. ਨਾਗਲੋਕੇ ਜਾਤਾ ਲਤਾ ਨਾਗਲਤਾ. ਤਮ੍ਬਵਣ੍ਣਂ ਲਾਤੀਤਿ ਤਮ੍ਬੂਲੀ, ਅਸ੍ਸੂ, ਨਦਾਦਿ. ਤਮ੍ਬੂਲਸ੍ਸ ਅਯਂ ਵਾ ਤਮ੍ਬੂਲੀ. ਤਮ੍ਬੂਲਵਲ੍ਲੀ, ਨਾਗਵਲ੍ਲੀਪਿ, ਤਮ੍ਬੂਲਂ ਨਾਮ ਫਲਪਤ੍ਤਚੁਣ੍ਣਾਦਿਯੋਗਸਮੂਹਾਨਂ ਨਾਮਂ, ਤਦਤ੍ਥਾ ਵਲ੍ਲੀ ਤਮ੍ਬੂਲਵਲ੍ਲੀ, ਨਾਗਲੋਕਸ੍ਸ ਵਲ੍ਲੀ. ਦ੍ਵਯਂ ਧਾਤਕਿਯਂ, ਅਯਂ ਤਮ੍ਬਪੁਪ੍ਫੀ, ਮਜ੍ਜੋਪਯੁਤ੍ਤਾ. ਪੁਪ੍ਫਾ ਸੁਗਨ੍ਧਿਕਾ ਧਾਤਕਿਚ੍ਚੇਵ ਖ੍ਯਾਤਾ. ਅਗ੍ਗਿਜਾਲਸਮਾਨਪੁਪ੍ਫਤਾਯ ਅਗ੍ਗਿਜਾਲਾ. ਅਤਿਸਯਂ ਠਿਤਿਂ ਕਰੋਤੀਤਿ ਧਾਤਕੀ, ਨਦਾਦਿ.
੫੯੦. ਦ੍ਵਯਂ ਸੁਕ੍ਕਤਿਵੁਤਾਯਂ. ਤਿਸ੍ਸੋ ਵੁਤਾ ਤਚਰਾਜਿਯੋ ਯਸ੍ਸਾ ਤਿਵੁਤਾ. ਤਿਸ੍ਸੋ ਪੁਟਾ ਤਚਰਾਜਿਯੋ ਯਸ੍ਸਾ ਤਿਪੁਟਾ. ਸਰਲਾ, ਤਿਭਣ੍ਡੀ, ਰੋਚਨੀਪਿ [ਦੇਵਨੀਪਿ (ਕ.)]. ਦ੍ਵਯਂ ਕਣ੍ਹਤਿਵੁਤਾਯਂ. ਸਾ ਤਨੁਕਰਣੇ, ਵਿਰੇਚਨਕਰਣੇਨ ਕਾਯਂ, ਰੋਗਞ੍ਚ ਸਾਯਤੀਤਿ ਸਾਮਾ.
‘‘ਸਾਮਾ ਤੁ ਮੇਚਕੇ ਵੁਦ੍ਧ-ਦਾਰਕੇ ਹਰਿਤੇ ਨਦਿ;