੪. ਚਤੁਬ੍ਬਣ੍ਣਵਗ੍ਗਵਣ੍ਣਨਾ

੩੩੨. ਸਨ੍ਤਤਿਪਰਿਯਨ੍ਤਂ ਵਂਸੇ. ਕੁਲ ਸਨ੍ਤਾਨਬਨ੍ਧੂਸੁ, ਭੂਵਾਦਿ, ਣੋ, ਕੁਲਂ, ਵਨ ਸਮ੍ਭਤ੍ਤਿਯਂ, ਸੋ. ਸਂਤਨੁ ਵਿਤ੍ਥਾਰੇ, ਣੋ. ਅਭਿਮੁਖਂ ਜਨੇਤੀਤਿ ਅਭਿਜਨੋ, ਣੋ. ਗੋ ਵੁਚ੍ਚਤਿ ਅਭਿਧਾਨਂ, ਬੁਦ੍ਧਿ ਚ, ਤੇ ਤਾਯਤੀਤਿ ਗੋਤ੍ਤਂ. ਗੋਤ੍ਰਮ੍ਪਿ. ਗਵਂ ਸਦ੍ਦਂ ਤਾਯਤੀਤਿ ਵਾ ਗੋਤ੍ਤਂ, ਤਾ ਪਾਲਨੇ. ਅਨੁਪੁਬ੍ਬੋ ਇ ਗਤਿਯਂ, ਕਰਣੇ ਅ. ਤਨੋਤਿਸ੍ਮਾਤਿ, ਸਨ੍ਤਤਿ, ਨਲੋਪੋ, ਇਤ੍ਥਿਯਂ.

ਸਨ੍ਤਤਿ ਪਨ੍ਤਿਵਿਤ੍ਥਾਰ-ਗੋਤ੍ਤੇਸੁ ਕਵਿਭੀ ਮਤਾ;

ਪਰਮ੍ਪਰਾ ਭਵੇ ਚਾਪਿ, ਪੁਤ੍ਤਕਞ੍ਞਾਸੁ ਸਨ੍ਤਤਿ.

ਖਤ੍ਤਿਯਾਦਯੋ ਖਤ੍ਤਿਯਬ੍ਰਾਹ੍ਮਣਵੇਸ੍ਸਸੁਦ੍ਦਾ ਚਤ੍ਤਾਰੋ ਵਣ੍ਣਾ ਕੁਲਾਨਿ ਭਵਨ੍ਤਿ, ਏਤੇ ਹਿ ਅਞ੍ਞਮਞ੍ਞਮਸਙ੍ਕਰਤੋ ਵਣ੍ਣੇਤਬ੍ਬਤੋ ਠਪੇਤਬ੍ਬਤੋ ਵਣ੍ਣਾਤਿ ਵੁਚ੍ਚਨ੍ਤੇ. ਵਣ੍ਣ ਠਪਨੇ.

੩੩੩-੩੩੪. ਛਕ੍ਕਂ ਕੁਲੀਨੇ. ਕੁਲਸ੍ਸਾਪਚ੍ਚਂ ਕੁਲਿਨੋ, ਇਨੋ ਅਪਚ੍ਚੇ. ਸੋਭਨੋ ਜਨੋ ਸਜ੍ਜਨੋ. ਸਪਰਤ੍ਥਂ ਸਾਧੇਤੀਤਿ ਸਾਧੁ, ਸਾਧ ਸਂਸਿਦ੍ਧਿਮ੍ਹਿ, ਉ. ਸਭਾਯਂ ਸਾਧੁ ਸਭ੍ਯੋ. ਸਾਧ੍ਵਤ੍ਥੇ ਯੋ. ਅਯ ਗਤਿਯਂ. ਅਯਿਤਬ੍ਬੋ ਉਪਗਨ੍ਤਬ੍ਬੋਤਿ ਅਯ੍ਯੋ, ਕਮ੍ਮਨਿ ਯੋ. ਮਹਾਕੁਲਸ੍ਸਾਪਚ੍ਚਂ ਮਹਾਕੁਲੋ, ਣੋ.

ਭੂਭੁਜਨ੍ਤਂ ਰਾਜਸਾਮਞ੍ਞੇ. ਅਤਿਤੇਜਵਨ੍ਤਤਾਯ ਵਿਸੇਸੇਨ ਰਾਜਤੇ ਦਿਬ੍ਬਤੇਤਿ ਰਾਜਾ, ਰਾਜ ਦਿਤ੍ਤਿਯਂ. ਭੁਯਾ ਭੂਮਿਯਾ ਪਤਿ ਭੂਪਤਿ, ਭੁਂ ਪਾਲੇਤੀਤਿ ਵਾ ਭੂਪਤਿ, ਪਾ ਰਕ੍ਖਣੇ,ਤਿ, ਰਸ੍ਸੋ. ਪਥਵਿਯਾ ਇਸ੍ਸਰੋ ਪਤ੍ਥਿਵੋ, ਣੋ, ਦ੍ਵਿਤ੍ਤਂ, ਇਤ੍ਤਞ੍ਚ. ਜਗਤਿਂ ਭੂਮਿਂ ਪਾਲੇਤੀਤਿ ਜਗਤਿਪਾਲੋ, ਕਮ੍ਮਨਿ ਣੋ. ਦਿਸਾਨਂ ਪਤਿ ਦਿਸਮ੍ਪਤਿ, ਦਿਸਾ, ਦਿਸਟ੍ਠੇ ਵਾ ਪਾਲੇਤੀਤਿ ਦਿਸਮ੍ਪਤਿ, ਰਸ੍ਸਤ੍ਤਂ, ਨਿਗ੍ਗਹੀਤਾਗਮੋ ਚ. ਭੁਂ ਭੂਮਿਂ ਭੁਞ੍ਜਤੀਤਿ ਭੂਭੁਜੋ, ਭੁਜ ਪਾਲਨਜ੍ਝੋਹਰਣੇਸੁ, ਇਧ ਪਾਲਨੇ, ਰੁਧਾਦਿ. ਮਹਿਖਿਤੋਪ੍ਯਤ੍ਰ. ਖਿ ਨਿਵਾਸਗਤੀਸੁ, ਮਹਿਂ ਅਖਿ ਗਤਵਾ ਮਹੀਖਿਤੋ.

੩੩੫. ਪਜ੍ਜਦ੍ਧਂ ਮੁਦ੍ਧਾਭਿਸਿਤ੍ਤੇ ਜਾਤਿਖਤ੍ਤਿਯੇ, ‘‘ਰਾਜਜਚ੍ਚੇ ਚ ਖਤ੍ਤਿਯੇ’’ਤਿ ਵਚਨਤੋ. ਰਞ੍ਞੋ ਖਤ੍ਤਿਯਸ੍ਸਾਪਚ੍ਚਂ ਰਾਜਞ੍ਞੋ, ਞ੍ਞੋ ਅਪਚ੍ਚੇ. ‘‘ਖਤ੍ਤਿਯੋ ਤੁ ਵਿਰਾ ਖਤ੍ਤਂ, ਰਾਜਞ੍ਞਦ੍ਵਿਜਲਿਙ੍ਗਨੋ’’ਤਿ ਰਭਸ, ਰਤਨਕੋਸੇਸੁ ਪਰਿਯਾਯਾ. ਖਤ੍ਤਸ੍ਸਾਪਚ੍ਚਂ ਖਤ੍ਤਿਯੋ, ਅਪਚ੍ਚੇ ਇਯਪਚ੍ਚਯੋ ਦਿਸ੍ਸਤੇ, ਖੇਤ੍ਤਾਨਂ ਅਧਿਪਤਿਭੂਤਤ੍ਤਾ ਵਾ ਖਤ੍ਤਿਯੋਤਿਆਦਿਕਪ੍ਪਿਕਰਾਜਾ ਵੁਚ੍ਚਤਿ, ਤਪ੍ਪਭਵਤ੍ਤਾ ਪਨ ਮੁਦ੍ਧਾਭਿਸਿਤ੍ਤੇਸ੍ਵਪਿ ਤਂਸਮਞ੍ਞਾ, ਏਸ੍ਸਤ੍ਤਂ. ਖਤ੍ਤਸ੍ਸਾਪਚ੍ਚਂ ਖਤ੍ਤਂ, ਣੋ. ਰਜ੍ਜਾਰੋਪਨਸਮਯੇ ਦਕ੍ਖਿਣਾਵਟ੍ਟਸਙ੍ਖੋਦਕੇਨ ਗਙ੍ਗਾਨੀਤੇਨ ਮੁਦ੍ਧਨਿ ਖਤ੍ਤਿਯਕਞ੍ਞਾਦੀਹਿ ਅਭਿਸਿਤ੍ਤਤ੍ਤਾ ਮੁਦ੍ਧਾਭਿਸਿਤ੍ਤੋ, ਪਠਮਖਤ੍ਤਿਯੋ. ਤਪ੍ਪਭਵਤਾਯ ਪਨ ਅਨਭਿਸਿਤ੍ਤਾ ਚ ਮੁਦ੍ਧਾਭਿਸਿਤ੍ਤਾਖ੍ਯਾ, ਯਥਾ – ਬ੍ਰਹ੍ਮਬਾਹੁਜਸ੍ਸ ਵਂਸੇ ਜਾਤਸ੍ਸਾਪਿ ਬ੍ਰਹ੍ਮਬਾਹੁਜੋ. ਬ੍ਰਹ੍ਮਬਾਹੁਤੋ ਜਾਤਤ੍ਤਾ ਬਾਹੁਜੋਤਿ ਹਿ ਨਿਕਾਯਨ੍ਤਰਿਕਾਨਂ ਲਦ੍ਧਿ. ਯਸ੍ਮਿਂ ਪਨ ਰਾਜਿਨਿ ਅਸੇਸਾ ਸਾਮਨ੍ਤਾ ਪਣਮਨ੍ਤਿ, ਸੋ ਅਧਿਸ੍ਸਰਾਖ੍ਯੋ [ਅਮਰ ੧੮.੨]. ਸਂ ਸਤ੍ਤੋ ਲਗ੍ਗੋ ਅਨ੍ਤੋ ਯਸ੍ਸਾ ਸਾ ਸਮਨ੍ਤਾ, ਸਵਿਸਯਾਨਨ੍ਤਰਾ ਭੂਮਿ, ਸਮਨ੍ਤਾਯ ਇਮੇ ਸਾਮਨ੍ਤਾ, ਅਨਨ੍ਤਰਰਾਜਾਨੋ.

ਦ੍ਵਯਂ ਚਕ੍ਕਵਤ੍ਤਿਨਿ. ਸਬ੍ਬਭੂਮਿਯਾ ਇਸ੍ਸਰੋ ਸਬ੍ਬਭੁਮ੍ਮੋ, ਣ੍ਯੋ. ਪੁਞ੍ਞੋਪਨੀਤੇਨ ਚਕ੍ਕਰਤਨੇਨ ਵਤ੍ਤਤੇ ਅਸਾਧੁਦਮਨਿਕਾਦਿਰਾਜਵਤ੍ਤਂ ਅਨੁਤਿਟ੍ਠਤੀਤਿ ਚਕ੍ਕਵਤ੍ਤੀ, ਣੀ, ਚਕ੍ਕਰਤਨਂ ਵਤ੍ਤੇਤਿ ਆਕਾਸੇ ਅਤ੍ਤਨੋ ਪੁਰਤੋ ਗਮਯਤੀਤਿ ਵਾ ਚਕ੍ਕਵਤ੍ਤੀ, ਪੁਞ੍ਞਚਕ੍ਕਂ, ਚਤੁਚਕ੍ਕਂ ਵਾ ਸਤ੍ਤੇਸੁ ਵਤ੍ਤੇਤਿ, ਤੇ ਵਾ ਅਸ੍ਮਿਂ ਵਤ੍ਤੇਤੀਤਿ ਚਕ੍ਕਵਤ੍ਤੀ, ਚਕ੍ਕਰਤਨੁਪ੍ਪਾਦਨਤ੍ਥਂ ਦ੍ਵਾਦਸਵਸ੍ਸਚਰਿਤਂ ਦਸਰਾਜਧਮ੍ਮਂ ਵਤ੍ਤਮੇਤਸ੍ਸਤ੍ਥੀਤਿ ਵਾ ਚਕ੍ਕਵਤ੍ਤੀ. ਤਤ੍ਥ ਅਨ੍ਤੋਜਨਸ੍ਮਿਂ ਬਲਕਾਯੇ ਧਮ੍ਮਿਕਾਰਕ੍ਖਾਵਰਣਗੁਤ੍ਤਿਯਾ ਸਂਵਿਧਾਨਂ, ਖਤ੍ਤਿਯੇਸੁ, ਅਨੁਯੁਤ੍ਤੇਸੁ, ਬ੍ਰਾਹ੍ਮਣਗਹਪਤਿਕੇਸੁ, ਨੇਗਮਜਾਨਪਦੇਸੁ, ਸਮਣਬ੍ਰਾਹ੍ਮਣੇਸੁ, ਮਿਗਪਕ੍ਖੀਸੁ, ਅਧਮ੍ਮਕਾਰਪਟਿਕ੍ਖੇਪੋ, ਅਧਨਾਨਂ ਧਨੁਪ੍ਪਾਦਨਂ, ਸਮਣਬ੍ਰਾਹ੍ਮਣੇ ਉਪਸਙ੍ਕਮਿਤ੍ਵਾ ਪਞ੍ਹਪੁਚ੍ਛਨਨ੍ਤਿ ਇਦਂ ਦਸਵਿਧਂ ਚਕ੍ਕਵਤ੍ਤਿਵਤ੍ਤਂ, ਇਦਮੇਵ ਚ ਗਹਪਤਿਕੇ, ਪਕ੍ਖਿਜਾਤੇ ਚ ਵਿਸੁਂ ਕਤ੍ਵਾ ਗਹਣਵਸੇਨ ਦ੍ਵਾਦਸਵਿਧਮ੍ਪਿ ਦੀਪੇਸੁ. ਚਤੂਸ੍ਵਪਿ ਦੀਪੇਸੁ ਆਣਾਧਮ੍ਮਚਕ੍ਕਾਨਿ ਸਤ੍ਤੇਸੁ ਪਵਤ੍ਤੇਤੀਤਿ ਵਾ ਚਕ੍ਕਵਤ੍ਤੀ. ਅਞ੍ਞੋ ਅਸਬ੍ਬਭੁਮ੍ਮੋ ਅਨਵਕਾਸੋ ਸਾਮਨ੍ਤੋ ਭੂਪੋ ਮਣ੍ਡਲਿਸ੍ਸਰੋ ਨਾਮ. ਸਯਮਾਣਾਪਵਤ੍ਤਿਟ੍ਠਾਨਵਸੇਨ ਪਰਿਚ੍ਛਿਨ੍ਨਸ੍ਸੇਵ ਮਣ੍ਡਲਸ੍ਸ ਇਸ੍ਸਰੋ, ਨ ਸਬ੍ਬਮਣ੍ਡਲਸ੍ਸਾਤਿ ਮਣ੍ਡਲਿਸ੍ਸਰੋਤਿਪਿ. ਏਤ੍ਥ ਚ ‘‘ਸਬ੍ਬਭੁਮ੍ਮੋ, ਚਕ੍ਕਵਤ੍ਤੀ’’ਤਿ ਦ੍ਵੀਹਿ ਨਾਮੇਹਿ ਚਤੁਦੀਪਿਸ੍ਸਰੋ ਰਾਜਾ ਦੀਪਿਤੋ, ਇਧਾਨਾਗਤੇਪਿ ਸਙ੍ਗਹੇਤ੍ਵਾ ਕਥਿਤੇਨ ਅਧਿਸ੍ਸਰਪਦੇਨ ਏਕਦੀਪਿਸ੍ਸਰੋ ਰਾਜਾ, ਮਣ੍ਡਲਿਸ੍ਸਰਪਦੇਨ ਪਦੇਸਿਸ੍ਸਰੋ ਰਾਜਾ ਦੀਪਿਤੋ. ਅਥ ਵਾ ਮਣ੍ਡਲਿਸ੍ਸਰਪਦੇਨ ਏਕਦੀਪਿਸ੍ਸਰੋ ਰਾਜਾ, ਸੇਸੇਹਿ ਰਾਜਰਾਜਞ੍ਞਾਦੀਹਿ ਬਾਹੁਜਪਰਿਯਨ੍ਤੇਹਿ ਪਦੇਸਿਸ੍ਸਰੋ ਦੀਪਿਤੋ.

੩੩੬. ਦ੍ਵਯਂ ਰਾਜਭੇਦੇ. ਸੁਖੁਮਤਾਯ ਲੀਨਾ ਅਪਾਕਟਾ ਛਵਿਯੋ ਯੇਸਂ ਤੇ ਲਿਚ੍ਛਵਿਨੋ. ਲਿਚ੍ਛਵੀ ਚ ਵਜ੍ਜੀ ਚਾਤਿ ਦ੍ਵਨ੍ਦੋ. ਦ੍ਵਯਂ ਸਮ੍ਮਾਸਮ੍ਬੁਦ੍ਧਕੁਲੇ ਰਾਜਿਨਿ. ਪੁਰਿਮਤਰਸਮ੍ਭੂਤੇ ਸਕ੍ਯਕੁਲੇ ਸਞ੍ਜਾਤਤ੍ਤਾ ਸਕ੍ਯੋ, ਣੋ. ਸਕ੍ਕੋਪਿ. ਸਕ੍ਯੇ ਭਵੋ ਸਾਕਿਯੋ, ਇਯੋ, ਯਲੋਪੋ, ਦੀਘੋ ਚ.

ਪਞ੍ਚਕਂ ਬੁਦ੍ਧਪੁਤ੍ਤਸ੍ਸਾਯਸ੍ਮਤੋ ਰਾਹੁਲਸ੍ਸ ਮਾਤਰਿ. ਭਦ੍ਦ ਕਲ੍ਯਾਣੇ, ਸੋਖ੍ਯੇ ਚ. ਕੁਲਾਚਾਰਰੂਪਾਦਿਵਸੇਨ ਕਲ੍ਯਾਣਤ੍ਤਾ ਭਦ੍ਦਾ. ਕਚ੍ਚਸ੍ਸਾਪਚ੍ਚਂ ਕਚ੍ਚਾਨਾ, ਅਪਚ੍ਚਸਦ੍ਦੋਯਂ ਨਿਚ੍ਚਂ ਨਪੁਂਸਕੇ ਪੁਤ੍ਤੇ, ਪੁਤ੍ਤਿਯਞ੍ਚ ਭਵਤੀਤਿ. ‘‘ਰਾਹੁ ਵਿਯ ਚਨ੍ਦਂ ਮਮ ਨਿਕ੍ਖਮਨਂ ਲਾਤੁਕਾਮੋ ਚਾਯਂ ਮੇ ਪੁਤ੍ਤੋਤਿ ਰਾਹੁਲੋਤਿ ਨਾਮੇਨ ਭਵਿਤਬ੍ਬ’’ਨ੍ਤਿ ਮਨਸਿ ਕਤ੍ਵਾ ‘‘ਰਾਹੁ ਜਾਤੋ, ਬਨ੍ਧਨਂ ਜਾਤ’’ਨ੍ਤਿ ਪਿਤਰਾ ਵੁਤ੍ਤੋ ਸਿਕ੍ਖਾਕਾਮੋ ਆਯਸ੍ਮਾ ਰਾਹੁਲੋਯੇਵੇਤ੍ਥ ਰਾਹੁਲੋ, ਤਸ੍ਸ ਮਾਤਾ ਰਾਹੁਲਮਾਤਾ, ਬਿਮ੍ਬਂ ਵੁਚ੍ਚਤਿ ਸਰੀਰਂ, ਅਤਿਸਯਵਣ੍ਣਸਰੀਰਯੁਤ੍ਤਤਾਯ ਬਿਮ੍ਬਾ, ਵਮਿਧਾਤੁਮ੍ਹਾ ਵਾ ਬੋ, ਵਸ੍ਸ ਬਤ੍ਤਂ. ਯਸੋ ਵੁਚ੍ਚਤਿ ਪਰਿਵਾਰੋ, ਕਿਤ੍ਤਿ ਚ, ਤੇ ਧਾਰੇਤੀਤਿ ਯਸੋਧਰਾ, ਮਨਾਦਿਤ੍ਤਾ ਅਸ੍ਸੋ.

੩੩੭-੩੩੯. ਯੇਸਂ ਖਤ੍ਤਿਯਾਨਂ ਧਨਂ ਸਤਂ ਹੋਤਿ, ਕੀਦਿਸਂ ਤਂ ਧਨਂ? ਨਿਧਾਨਗਂ ਪਥਵਾਦੀਸੁ ਨਿਧਾਨਵਸੇਨ ਗਤਂ ਪਵਤ੍ਤਂ, ਤੇਸਂ ਧਨਾਨਂ ਸਤਂ ਕਹਾਪਣਾਨਂ, ਕਿਤ੍ਤਕਪ੍ਪਮਾਣਾਨਂ? ਕੋਟੀਨਂ ਸਤਂ. ਕੇਨ ਪਰਿਚ੍ਛੇਦੇਨ? ਹੇਟ੍ਠਿਮਨ੍ਤੇਨ ਹੇਟ੍ਠਿਮਕੋਟ੍ਠਾਸੇਨ, ਹੇਟ੍ਠਿਮਪਰਿਚ੍ਛੇਦੇਨ ਵਾ ਕੋਟੀਨਂ ਸਤਂ ਹੋਤਿ. ਦਿਵਸਵਲ਼ਞ੍ਜੋ ਦਿਵਸੇ ਦਿਵਸੇ ਵਲ਼ਞ੍ਜਿਤਬ੍ਬੋ ਪਨ ਕਹਾਪਣੋ ਵੀਸਤਮ੍ਬਣਮਤ੍ਤਂ ਹੋਤਿ, ਤੇ ਖਤ੍ਤਿਯਾ ‘‘ਖਤ੍ਤਿਯਮਹਾਸਾਲਾ’’ਤ੍ਯੁਚ੍ਚਨ੍ਤੇ. ਮਹਨ੍ਤੋ ਧਨਸਾਰੋ ਯੇਸਨ੍ਤੇ ਮਹਾਸਾਲਾ, ਲਤ੍ਤਂ, ਅਮ੍ਬਣਮਤ੍ਰ ਏਕਾਦਸਦੋਣਮਤ੍ਤਂ.

ਯੇਸਂ ਦ੍ਵਿਜਾਨਂ ਬ੍ਰਾਹ੍ਮਣਾਨਂ ਨਿਧਾਨਗਾਨਿ ਨਿਧਾਨਵਸੇਨ ਪਵਤ੍ਤਾਨਿ ਅਸੀਤਿਕੋਟਿਧਨਾਨਿ ਹੋਨ੍ਤਿ, ਦਿਵਸਵਲ਼ਞ੍ਜੋ ਪਨ ਕਹਾਪਣੋ ਦਸਮ੍ਬਣਮਤ੍ਤਂ ਹੋਤਿ, ਤੇ ਦ੍ਵਿਜਾ ‘‘ਦ੍ਵਿਜਮਹਾਸਾਲਾ’’ਤ੍ਯੁਚ੍ਚਨ੍ਤੇ.

ਨਿਧਾਨਗੇ, ਵਲ਼ਞ੍ਜੇ ਚ ਧਨੇ ਤਦੁਪਡ੍ਢੇ ਤੇਸਂ ਦ੍ਵਿਜਮਹਾਸਾਲਾਨਂ ਧਨਸ੍ਸ ਉਪਡ੍ਢਭਾਗੇ ਸਤਿ ਗਹਪਤਿਮਹਾਸਾਲਾ ਨਾਮ ਸਿਯੁਂ, ਉਭਯਤ੍ਰਾਪਿ ਹੇਟ੍ਠਿਮਨ੍ਤੇਨੇਵ ਧਨਪਰਿਚ੍ਛੇਦੋ.

੩੪੦. ਯੋ ਨ ਹੀਨੋ, ਨ ਚੁਕ੍ਕਟ੍ਠੋ, ਮਜ੍ਝਿਮਾਧਿਕਾਰਬ੍ਯਵਟ੍ਠਿਤੋ ਰਾਜਪੁਤ੍ਤਸੇਨਾਪਤਿਮਹਾਕਣਿਤ੍ਥਰਾਦਿ, ਸੋ ਮਹਾਮਤ੍ਤੋ. ਮਹਤੀ ਮਤ੍ਤਾ ਪਰਿਚ੍ਛੇਦੋ ਯਸ੍ਸ ਮਹਾਮਤ੍ਤੋ, ਰੂਪਭੇਦੇਨ ਪਟ੍ਠਾਨਂ ਕ੍ਲੀਵਂ.

‘‘ਪਕਤਿਯਂ ਮਹਾਮਤ੍ਤੇ, ਪਞ੍ਞਾਯਂ ਪਰਮਤ੍ਤਨਿ;

ਨਪੁਂਸਕਂ ਪਧਾਨਂ ਤਂ, ਏਕਤ੍ਤੇ ਤੁ’ਤ੍ਤਮੇ ਸਦਾ’’ਤਿ.

ਰਭਸੋ ਚ. ‘‘ਮਹਾਮਤ੍ਤੋ, ਪਟ੍ਠਾਨੋ ਚਾ’’ਤਿ ਤੁ ਪੁਂਸਕਣ੍ਡੇ ਵੋਪਾਲਿਤੋ. ਪਕਟ੍ਠੇ ਤਿਟ੍ਠਤੀਤਿ ਪਟ੍ਠਾਨਂ, ਯੁ [ਅਭਿਧਾਨਪ੍ਪਦੀਪਿਕਾ ਟੀਕਾ ੯੮੩, ੧੧੨੩ ਗਾਥਾਸੁਪਿ ਪਸ੍ਸਿਤਬ੍ਬਂ].

ਪਞ੍ਚਕਂ ਮਨ੍ਤਿਨਿਮ੍ਹਿ. ਮਤਿਪ੍ਪਧਾਨੋ ਸਚਿਵੋ ਸਹਾਯੋ. ਇਤਿਕਤ੍ਤਬ੍ਬਤਾਵਧਾਰਣਂ ਮਨ੍ਤੋ, ਤਂਯੋਗਾ ਮਨ੍ਤਿਨੀ. ਅਸ੍ਸਤ੍ਥ੍ਯਤ੍ਥੇ ਇਨੀ, ਅਥ ਵਾ ਮਨ੍ਤੇਨ ਨਯਤੀਤਿ ਮਨ੍ਤਿਨੀ, ਅਥ ਵਾ ਮਨ੍ਤਯੋਗਾ ਮਨ੍ਤਿ, ਨੇਤੀਤਿ ਨੀ, ਮਨ੍ਤਿ ਚ ਨੀ ਚਾਤਿ ਮਨ੍ਤਿਨੀ. ‘‘ਮਤਿਸਚਿਵਮਨ੍ਤਿਨੀ’’ਤਿਪਿ ਪਾਠੋ, ਤਦਾ ਦ੍ਵਿਨ੍ਨਂ ਤਿਣ੍ਣਂ ਵਾ ਦ੍ਵਨ੍ਦੋ. ਰਞ੍ਞਾ ਸਹ ਜੀਵਤੀਤਿ ਸਜੀਵੋ. ਸਚਤੇ ਸਮਵੇਤੋ ਭਵਤੀਤਿ ਸਚਿਵੋ. ਸਚ ਸਮਵਾਯੇ, ਵੋ, ਇਕਾਰਾਗਮੋ ਚ. ਸਬ੍ਬਕਿਚ੍ਚੇਸੁ ਰਞ੍ਞਾ ਮਨ੍ਤੇਨ ਅਮਾ ਸਹ ਭਵਤੀਤਿ ਅਮਚ੍ਚੋ, ਅਮਾਸਦ੍ਦੋਯਂ ਨਿਪਾਤੋ ਸਹਤ੍ਥੇ ਚ੍ਚਪਚ੍ਚਯੋ. ਸਜੀਵਮਤ੍ਤੇ ਚਾਮਚ੍ਚਸਦ੍ਦੋ ਵਤ੍ਤਤਿ. ਦ੍ਵਯਂ ਸੇਨਾਪਤਿਮ੍ਹਿ. ਸੇਨਂ ਨਯਤੀਤਿ ਸੇਨਾਨੀ. ਚਮੂਨਂ ਸੇਨਾਨਂ ਪਤਿ ਚਮੂਪਤਿ.

੩੪੧. ਨ੍ਯਾਸਾਦੀਨਂ ਇਣਾਦਾਨਦਾਯਵਿਭਾਗਾਦੀਨਂ ਵਿਵਾਦਾਨਂ ਵੋਹਾਰਾਨਂ ਉਪਦਟ੍ਠਰਿ ਉਪਦਸ੍ਸਿਤੇ ਅਕ੍ਖਦਸ੍ਸੋ, ਅਕ੍ਖੇ ਵੋਹਾਰੇ ਪਸ੍ਸਤੀਤਿ ਅਕ੍ਖਦਸ੍ਸੋ, ਣੋ, ਧਮ੍ਮਾਧਿਕਰਣਿਯੋ. ਪੁਚ੍ਛਾਵਿਵਾਕੋ, ਪਞ੍ਹਵਿਵਾਕੋਪ੍ਯਤ੍ਰ.

ਪਜ੍ਜਡ੍ਢਂ ਪਟਿਹਾਰੇ. ਦ੍ਵਾਰੇ ਨਿਯੁਤ੍ਤੋ ਦੋਵਾਰਿਕੋ, ਣਿਕੋ, ਓਕਾਰਾਗਮੋ. ਪਟਿਹਰਤਿ ਵਿਞ੍ਞਾਯਤਿ ਤੇਨਾਤਿ ਪਟਿਹਾਰੋ, ਣੋ. ਦ੍ਵਾਰੇ ਤਿਟ੍ਠਤੀਤਿ ਦ੍ਵਾਰਟ੍ਠੋ, ਸਕਤ੍ਥੇ ਕੋ. ਦ੍ਵਾਰਪਾਲਕੋ. ਦ੍ਵਾਰਟ੍ਠਿਤੋ, ਦਸ੍ਸਕੋਪ੍ਯਤ੍ਰ.

੩੪੨. ਰਾਜੂਨਂ ਅਙ੍ਗਰਕ੍ਖਗਣੋ ਅਨੀਕਟ੍ਠੋਤਿ ਮਤੋ. ‘‘ਰਕ੍ਖਿਵਗ੍ਗੋ ਤੁ ਯੋ ਰਞ੍ਞਂ, ਸੋ’ਨੀਕਟ੍ਠੋ’ਭਿਧੀਯਤੇ’’ਤਿ ਅਮਰਮਾਲਾਯਞ੍ਚ, ਅਨੀਕੇਨ ਸਮੂਹੇਨ ਤਿਟ੍ਠਤੀਤਿ ਅਨੀਕਟ੍ਠੋ, ਣੋ.

ਦ੍ਵਯਂ ਮਹਲ੍ਲਕੇ. ਕਞ੍ਚੁਕਂ ਚੋਲ਼ਂ, ਤਂਯੋਗਾ ਕਞ੍ਚੁਕੀ. ਸੋਕਂ ਵਿਨ੍ਦਤੀਤਿ ਸੋਵਿਦਲ੍ਲੋ. ਵਿਦ ਲੋਭੇ, ਲੋ, ਕਲੋਪੋ. ਥਾਪਤਿ, ਸੋਵਿਦੋਪ੍ਯਤ੍ਰ. ਦ੍ਵਯਂ ਸੇਵਕੇ. ਪਭੁਨੋ ਪਚ੍ਛਾ ਜੀਵਤੀਤਿ ਅਨੁਜੀਵੀ, ਣੀ. ਸੇਵ ਸੇਵਨੇ, ਭੂ, ਣ੍ਵੁ. ਅਤ੍ਥੀਪ੍ਯਤ੍ਰ. ਅਤ੍ਥ ਯਾਚਨਾਯਂ. ਅਤ੍ਥਨਮਤ੍ਥੋ, ਆਸੀਸੋ, ਤਂਯੋਗਾ ਅਤ੍ਥੀ.

੩੪੩. ਦ੍ਵਯਂ ਅਧਿਕਮਤ੍ਤੇ. ਗਾਮੇਸੁ ਅਧਿਕਤ੍ਤਾ ਅਧਿਕਾ ਇਕ੍ਖਾ ਅਨੁਭਵਨਮੇਤਸ੍ਸ ਅਜ੍ਝਕ੍ਖੋ, ਇਸ੍ਸਤ੍ਤਂ. ਅਧਿਕਂ ਕਰੋਤੀਤਿ ਅਧਿਕਤੋ. ਇਦਂ ਦ੍ਵਯਂ ਥਾਯੁਕਗੋਪਾਨਂ ਦ੍ਵਿਨ੍ਨਮ੍ਪਿ ਨਾਮਂ. ਤਤ੍ਰ ਏਕਗਾਮੇ ਅਧਿਕਤੋ ਥਾਯੁਕੋ, ਬਹੂਸੁ ਗਾਮੇਸ੍ਵਧਿਕਤੋ ਗੋਪੋ. ਵੁਤ੍ਤਞ੍ਚਾਮਰਕੋਸੇ ‘‘ਥਾਯੁਕੋਧਿਕਤੋ ਗਾਮੇ, ਗੋਪੋ ਗਾਮੇਸੁ ਭੂਰਿਸੂ’’ਤਿ. [ਅਮਰ ੧੮.੭] ਰੁਦ੍ਦੇਨਾਪਿ ਵੁਤ੍ਤਂ ‘‘ਗਾਮੇਸ੍ਵਧਿਕਤੇ ਗੋਪੋ, ਗੋਟ੍ਠਜ੍ਝਕ੍ਖੇਪਿ ਵਲ੍ਲਭੋ’’ਤਿ [ਚਿਨ੍ਤਾਮਣਿਟੀਕਾ ੧੮.੭].

ਦ੍ਵਯਂ ਸੁਵਣ੍ਣਰਜਤਜ੍ਝਕ੍ਖਾਨਂ ਦ੍ਵਿਨ੍ਨਮ੍ਪਿ ਨਾਮਂ. ਹਿਰਞ੍ਞਂ ਵੁਚ੍ਚਤਿ ਅਕਤਸੁਵਣ੍ਣਾਦਿ, ਤਤ੍ਰ ਨਿਯੁਤ੍ਤੋ ਹੇਰਞ੍ਞਿਕੋ. ਕਨ ਦਿਤ੍ਤਿਗਤਿਕਨ੍ਤੀਸੁ, ਨਿਪੁਬ੍ਬੋ, ਖੋ, ਨਿਕ੍ਖੋ, ਸੁਵਣ੍ਣਾਦਿਵਿਕਾਰੋ, ਤਤ੍ਰ ਨਿਯੋਗੋ ਨਿਕ੍ਖਿਕੋ. ਵਿਸੇਸਤੋ ਪਨ ਸੁਵਣ੍ਣਜ੍ਝਕ੍ਖੇ ਭੋਰਿਕੋ. ਭੂਰਿਸਦ੍ਦੋ ਸੁਵਣ੍ਣੇ, ਤਂਯੋਗਾ ਭੋਰਿਕੋ. ਰੂਪ੍ਯਾਜ੍ਝਕ੍ਖੇਨਿਕ੍ਖਿਕੋ, ਤਸ੍ਮਾ’ਯ’ਮੁਭਯਤ੍ਰਾਪਿ ਹੇਰਞ੍ਞਿਕੋਤਿ ਸਾਮਞ੍ਞਸ੍ਮਿਂਯੇਵ. ਵੁਤ੍ਤਞ੍ਚ –

‘‘ਭੋਰਿਕੋ ਕਨਕਾਜ੍ਝਕ੍ਖੋ,

ਰੂਪ੍ਯਾ’ਜ੍ਝਕ੍ਖੋ ਤੁ ਨਿਕ੍ਖਿਕੋ’’ਤਿ [ਅਮਰ ੧੮.੭].

ਸਸ੍ਸ ਅਤ੍ਤਨੋ ਵਿਜਿਗੀਸਭੂਤਸ੍ਸ ਦੇਸਾਨਨ੍ਤਰੋ ਸਮਨ੍ਤਤੋ ਮਣ੍ਡਲੀਭੂਤੋ ਰਾਜਾ ਸਤ੍ਤੁਰੁਚ੍ਚਤੇ ਏਕਤ੍ਥਾਭਿਨਿਵੇਸਿਤਤ੍ਤਾ. ਤਤੋ ਪਰਂ ਵਿਜਿਗੀਸਭੂਮ੍ਯੇਕਨ੍ਤਰਿਕੋ ਮਿਤ੍ਤੋ ਏਕਤ੍ਥਕਾਰਿਤ੍ਤਨੋਪਕਾਰਤ੍ਤਾ. ਅਰਿਵਿਜਿਗੀਸਮਿਤ੍ਤਾਨਂ ਪਨ ਮਣ੍ਡਲਾਨਂ ਬਹਿਭੂਤੋ ਦੂਰਮਣ੍ਡਲਟ੍ਠੋ ਵਿਜਿਗੀਸਭੂਮਿਯਾ ਅਚ੍ਚਨ੍ਤਬ੍ਯਵਹਿਤੋ ਬਲਾਧਿਕੋਪਿ ਯੋ ਨਾਪਕਰੋਤ੍ਯੁਪਕਾਰੋਤਿ ਵਾ, ਸ ਉਦਾਸੀਨੋ ਦੂਰਮਣ੍ਡਲਤ੍ਤੇਨੋਪਕਾਰਤ੍ਤਾ. ਦੂਰਮਣ੍ਡਲੇ ਆਸਤੀਤਿ ਉਦਾਸੀਨੋ, ਉਪੁਬ੍ਬੋ ਆਸ ਉਪਸੇਵਨੇ, ਯੁ, ਅਸ੍ਸਿ, ਦਾਗਮੋ ਚ. ਸਤ੍ਤੁਮਭਿਯੁਞ੍ਜਮਾਨਸ੍ਸ ਵਿਜਿਗੀਸਸ੍ਸ ਸਤ੍ਤੁਹਿਤਾਯ ਯੋ ਪਣ੍ਹਿਂ ਗਣ੍ਹਤਿ ਪਿਟ੍ਠਿਤੋ ਵਤ੍ਤਤਿ, ਸੋ ਪਣ੍ਹਿਗ੍ਗਾਹੋ. ‘‘ਪਣ੍ਹਿ ਪਚ੍ਛਾ ਪਦਂ ਵਿਜਿਗੀਸਸ੍ਸਾ’’ਤਿ ਰਤਨਕੋਸੇ. ‘‘ਪਣ੍ਹਿਪਾਦੇ ਬ੍ਯੂਹਪਿਟ੍ਠੇ’’ਤਿ [ਤਿਕਣ੍ਡਸੇਸ ੩.੩.੧੩੪] ਤਿਕਣ੍ਡਸੇਸੋ. ‘‘ਪਣ੍ਹਿ ਪਚ੍ਛਿਮਭਾਗੇ ਚ, ਪਾਦਮੂਲੋਮਦਿਟ੍ਠਿਸੁ. ਸੇਨਾਪਿਟ੍ਠੇ ਕੁਮ੍ਭਿਯਞ੍ਚੇ’’ਤਿ ਤੁ ਨਾਨਤ੍ਥਸਙ੍ਗਹੇ.

੩੪੪-੩੪੫. ਦਿਟ੍ਠਨ੍ਤਂ ਰਿਪੁਮ੍ਹਿ. ਮਿਤ੍ਤਪਟਿਪਕ੍ਖਤ੍ਤਾ ਅਮਿਤ੍ਤੋ, ਰਪਤ੍ਯਵਣ੍ਣਂ ਰਜਤੇਤਿ ਰਿਪੁ, ਉ, ਇਤ੍ਤਂ, ਰਪ, ਲਪ, ਜਪ, ਜਪ੍ਪ ਵਚਨੇ ਵਾ. ਵੇਰਂ ਵਿਰੋਧੋ ਯਸ੍ਸਤ੍ਥੀਤਿ ਵੇਰੀ, ਈ, ਦੁਕ੍ਖਹੇਤੁਤ੍ਤਾ ਸਪਤ੍ਤਿ ਇਵ ਸਪਤ੍ਤੋ, ਇਵਤ੍ਥੇ ਅਕਾਰਪਚ੍ਚਯੋ. ਅਰ ਗਮਨੇ,ਤਿ, ਭੂਵਾਦਿਤ੍ਤਾ ਆਗਮੋ. ਸਦ ਸਾਦਨੇ, ਤੁ, ਭੂਵਾਦਿ, ਸਤ੍ਤੁ, ਯਵਾਦਿਚੁਣ੍ਣੇਪਿ. ਅਰ ਗਮਨੇ, ਵੇਰਮਰਤੀਤਿ ਅਰਿ, ਰਸ੍ਸਨ੍ਤੋ ਇ. ਸਪਤ੍ਤਾਦੀਨਂ ਚਤੁਨ੍ਨਂ ਦ੍ਵਨ੍ਦੋ, ‘‘ਬ੍ਯਞ੍ਜਨੋ ਚ ਵਿਸਂਯੋਗੋ’’ਤਿ ਸੁਤ੍ਤੇ ਚਗ੍ਗਹਣੇਨ ਏਕਤਕਾਰਸ੍ਸ ਲੋਪੋ ਚ. ਪਤਿਯਮਤ੍ਥਨਂ ਪਚ੍ਚਤ੍ਥੋ, ਤਂਯੋਗਾ ਪਚ੍ਚਤ੍ਥਿਕੋ, ਪਤਿਯਂ ਵਿਪਰੀਤਗਮਨਂ. ਪਨ੍ਥ ਗਤਿਯਂ, ਚੁਰਾਦਿ. ਪਰਿਪਨ੍ਥੋ ਪਰਿਸ੍ਸਵਟ੍ਠਾਨਂ, ਤਂਯੋਗਾ ਪਰਿਪਨ੍ਥੀ. ਪਟਿਵਿਰੁਦ੍ਧੋ ਪਕ੍ਖੋ ਸਹਾਯੋ ਪਟਿਪਕ੍ਖੋ, ਤਥਾ ਵਿਪਕ੍ਖੋ. ਨ ਹਿਤੋ ਅਹਿਤੋ. ਹਿਂਸਾਯਂ ਰਮਤੀਤਿ [ਪਰਤੀਤਿ (?)] ਪਰੋ, ਕ੍ਵਿ. ਪਟਿਪਕ੍ਖਭਾਵੇਨ ਅਮਤਿ ਗਚ੍ਛਤੀਤਿ ਪਚ੍ਚਾਮਿਤ੍ਤੋ, ਅਮ ਗਮਨੇ, ਤੋ, ਦ੍ਵਿਤ੍ਤਂ. ਨਤ੍ਥਿ ਏਤਸ੍ਮਾ ਈਤਿ ਉਪਦ੍ਦਵੋਤਿ ਅਨੀਤੋ, ਮਿਤ੍ਤੋ, ਤਪ੍ਪਟਿਪਕ੍ਖੋ ਪਚ੍ਚਨੀਤੋ, ਸੋ ਏਵ ਪਚ੍ਚਨੀਕੋ, ਤਸ੍ਸ ਕੋ, ਯਥਾ ਨਿਯਕੋ. ਵਿਰੋਧੋਸ੍ਸਤ੍ਥੀਤਿ ਵਿਰੋਧੀ, ਈ. ਦਿਸ, ਦੁਸ ਅਪ੍ਪੀਤਿਯਂ, ਦਿਵਾਦਿ. ਵਿਦੁਸ੍ਸਨਸੀਲਤਾਯ ਵਿਦ੍ਦੇਸੀ, ਦ੍ਵਿਤ੍ਤਂ, ਇਸ੍ਸੇਤ੍ਤਂ. ਦੁਸ੍ਸਤੀਤਿ ਦਿਸੋ, ਅ. ਤਪਚ੍ਚਯੇ ਦਿਟ੍ਠੋ, ਧਾਤ੍ਵਨ੍ਤੇਨ ਸਹ ਟ੍ਠਾਦੇਸੋ. ਦ੍ਵੇਸਣੋ, ਦੁਹਦਯੋ, ਦਸ੍ਸੁ, ਸਾਤ੍ਤਵੋ, ਅਭਿਘਾਤੀਪ੍ਯਤ੍ਰ.

ਦ੍ਵਯਂ ਅਨੁਕੂਲਨੇ. ਅਨੁਰੋਧਨਂ ਅਨੁਰੋਧੋ, ਣੋ. ਰੁਧ ਆਵਰਣੇ. ਅਨੁਰੂਪਂ ਪਵਤ੍ਤਨਂ ਅਨੁਵਤ੍ਤਨਂ, ਵਤੁ ਵਤ੍ਤਨੇ, ਭੂ, ਯੁ.

੩੪੬. ਪਞ੍ਚਕਂ ਮਿਤ੍ਤਸਾਮਞ੍ਞੇ. ਮਿਦ ਸ੍ਨੇਹੇ, ਭੂਵਾਦਿ, ਤੋ, ਵਯਸਾ ਤੁਲ੍ਯੋ ਵਯਸੋ, ਮੂਲਵਯੋਸਦ੍ਦੇਹਿ ਸਞ੍ਞਾਯਂ ਸਪਚ੍ਚਯੋ [ਯਪਚ੍ਚਯੋ (?) ਪਾਣਿਨਿ ੪.੪.੯੧ ਸੁਤ੍ਤਂ ਪਸ੍ਸਿਤਬ੍ਬਂ], ਸਬ੍ਬਕਾਰਿਯੇਸੁ ਸਹ ਵਯਤੀਤਿ ਵਾ ਵਯਸੋ, ਵਯ ਗਮਨੇ, ਸਹਸ੍ਸ ਸੋ ਵਣ੍ਣਵਿਪਰਿਯਯੋ. ਸਹ ਅਯਤਿ ਕਿਚ੍ਚੇਸੂਤਿ ਸਹਾਯੋ, ਅਯ ਗਮਨੇ, ਸਹਸ੍ਸ ਸਾਭਾਵੋ, ਯਥਾ ਸਹਧਮ੍ਮਿਕੋ. ਸਹ ਵਾ ਹਾਨਿ, ਅਯੋ ਵਾ ਵੁਡ੍ਢਿ ਯਸ੍ਸ ਸਹਾਯੋ, ਤਿਪਦਬਹੁਬ੍ਬੀਹਿ, ਯਥਾ ਪਰਕ੍ਕਮਾਧਿਗਤਸਮ੍ਪਦਾ. ਅਥ ਵਾ ਹਾਨਿ ਚ ਆਯੋ ਚ ਹਾਯਾ, ਨਿਲੋਪੋ, ਤੇ ਯਸ੍ਸ ਅਤ੍ਥਿ, ਸੋ ਸਹਾਯੋ, ‘‘ਸਪਕ੍ਖਕੋ, ਸਲੋਮਕੋ’’ਤ੍ਯਾਦੀਸੁ ਵਿਯ ਸਸਦ੍ਦਸ੍ਸ ਵਿਜ੍ਜਮਾਨਤ੍ਥਤ੍ਤਾ. ਸੁਨ੍ਦਰਂ ਹਦਯਮੇਤਸ੍ਸਾਤਿ ਸੁਹਦਯੋ, ਅਲੋਪੋ, ਦ੍ਯਸ੍ਸ ਜੋ, ਸੋਵ ਸੁਹਜ੍ਜੋ. ਸਹ ਪਰਿਸਹਨੇ. ਪਰਿਸਹਨਂ ਅਦੁਸ੍ਸਨਂ, ਖੋ, ਹਲੋਪੋ, ਸਖਾ, ਰਾਜਾਦਿ, ਸਮਾਨੋ ਖ੍ਯਾਤੋ ਪਤੀਤੋ ਵਾ ਸਖਾ, ਯਲੋਪੋ, ਸਮਾਨਸ੍ਸ ਚ ਸਭਾਵੋ. ਸਿਨਿਦ੍ਧੋ, ਸ੍ਨਿਦ੍ਧੋ, ਸਵਯੋਪ੍ਯਤ੍ਰ. ਸਖ੍ਯਸਤ੍ਤਪਦਿਨਾ ਪਨ ਮੇਤ੍ਤਿਯਂ ਵਤ੍ਤਨ੍ਤਿ. ਸਖਿਮ੍ਹਿ ਭਵਂ ਸਖ੍ਯਂ. ਸਤ੍ਤਹਿ ਪਦੇਹਿ ਅਵਗਮ੍ਯਤੇਤਿ ਸਤ੍ਤਪਦਿਨਂ [ਸਤ੍ਤਪਦੀਨ (ਅਮਰ ੧੮.੧੨)], ਇਨੋ.

ਦ੍ਵਯਂ ਅਭੇਜ੍ਜਮਿਤ੍ਤੇ. ਸਬ੍ਬਕਾਲਂ ਭਜਤੀਤਿ ਸਮ੍ਭਤ੍ਤੋ, ਭਜ ਸੇਵਾਯਂ, ਭੂਵਾਦਿ. ਦਲ਼੍ਹੋ ਥਿਰੋ ਮਿਤ੍ਤੋ ਦਲ਼੍ਹਮਿਤ੍ਤੋ. ਦ੍ਵਯਂ ਦਿਟ੍ਠਮਤ੍ਤਮਿਤ੍ਤੇ. ਕਿਞ੍ਚਿ ਕਾਲਂ ਪਸ੍ਸਿਤਬ੍ਬੋਤਿ ਸਨ੍ਦਿਟ੍ਠੋ. ਸਂਸਦ੍ਦੋਯਮਪ੍ਪਤ੍ਥੋ. ਦਿਸ ਪੇਕ੍ਖਨੇ, ਦਸ੍ਸਨਂ ਦਿਟ੍ਠਂ, ਤਂ ਮਤ੍ਤਾ ਪਮਾਣਮੇਤਸ੍ਸ ਦਿਟ੍ਠਮਤ੍ਤਕੋ, ਸਕਤ੍ਥੇ ਕੋ.

੩੪੭. ਦ੍ਵਯਂ ਚਰਪੁਰਿਸੇ ਤਾਪਸਾਦਿਰੂਪੇਨ ਚਰਮਤ੍ਤੇ. ਚਰਤਿ ਜਾਨਾਤਿ ਪਰਚਕ੍ਕਨ੍ਤਿ ਚਰੋ, ਅ, ਚਾਰੋਪਿ, ਣੋ. ਗੁਲ਼੍ਹਪੁਰਿਸੋ ਗੁਤ੍ਤਪੁਰਿਸੋ. ਯਥਾਰਹਵਣ੍ਣੋ, ਪਣਿਧਿ, ਅਪ੍ਪਸਪੋ, ਫਸ੍ਸੋਪ੍ਯਤ੍ਰ. ਤਤ੍ਰਾਦਿਦ੍ਵਯਂ ਵਾਣਿਜਕਸਿਬਲਲਿਙ੍ਗਭਿਕ੍ਖੁਕਚ੍ਚਾਯਨਾਦਿਲੇਸੇਨ ਥਾਯਿਨਿਚਰੇ. ਇਤਰੇ ਇਧਾਗਤਸਦਿਸਤ੍ਥੇ. ਵਣ੍ਣੋ ਪਕਾਰੋ, ਯਥਾਰਹਵਣ੍ਣੋ ਯਥਾਰਹਪ੍ਪਕਾਰੋ. ਯੇਨ ਪਰਚਕ੍ਕਂ ਸਕ੍ਕਾ ਞਾਤੁਂ ਤਪ੍ਪਕਾਰਵਾ ਇਚ੍ਚਤ੍ਥੋ. ਪਣਿਧਿਯ੍ਯਤੇ ਞੇਯ੍ਯਮਸ੍ਮਿਂ ਪਣਿਧਿ, ਇ. ਅਪਕਟ੍ਠਂ ਸਪ੍ਪਤਿ ਚਰਤੀਤਿ ਅਪਸਪ੍ਪੋ, ਅ. ਫੁਸ ਬਾਧਨਫੁਸਨੇਸੁ, ਅ, ਫਸ੍ਸੋ.

ਤਿਕਂ ਪਥਿਕੇ. ਪਥੇ ਗਚ੍ਛਤੀਤਿ ਪਥਾਵੀ, ਵੀ, ਦੀਘੋ. ਇਕੋ, ਪਥਿਕੋ. ਅਦ੍ਧਨਿ ਮਗ੍ਗੇ ਗਚ੍ਛਤਿ ਸੀਲੇਨਾਤਿ ਅਦ੍ਧਗੂ. ਅਦ੍ਧਗੋਪ੍ਯਤ੍ਰ.

ਦ੍ਵਯਂ ਦੂਤੇ. ਦੁ ਪਰਿਤਾਪੇ, ਤੋ. ਸਨ੍ਦੇਸਂ ਵਾਚਿਕਂ ਹਰਤ੍ਯਨੇਨੇਤਿ [ਹਰਤੀਤਿ (?)].

ਦ੍ਵਯਂ ਜੋਤਿਸਿਕੇ. ਗਣਯਤੀਤਿ ਗਣਕੋ, ਣ੍ਵੁ. ਮੁਹੁਤ੍ਤਂ ਕਾਲਵਿਸੇਸਂ ਜਾਨਾਤੀਤਿ ਮੁਹੁਤ੍ਤਿਕੋ, ਵਾਗ੍ਗਹਣੇਨ ਨ ਵੁਦ੍ਧਿ. ਸਂਵਚ੍ਛਰੋ, ਜੋਤਿਸਿਕੋ, ਦੇਵਞ੍ਞੂ, ਮੋਹੁਤ੍ਤੋ, ਞਾਣਿਕੋ, ਕਾਤਨ੍ਤਿਕੋਪ੍ਯਤ੍ਰ. ਕਤਨ੍ਤੋ ਦੇਵਮਤ੍ਤਂ, ਤਂ ਜਾਨਾਤੀਤਿ ਕਾਤਨ੍ਤਿਕੋ.

੩੪੮. ਦ੍ਵਯਂ ਲੇਖਕੇ. ਲਿਖ ਲੇਖਨੇ, ਭੂ, ਣ੍ਵੁ. ਲਿਪੇਨ ਮਸ੍ਯੋਪਦੇਸੇਨ ਭਵਤੀਤਿ ਲਿਪਿ, ਇ, ਵਣ੍ਣਸਣ੍ਠਾਨੋ, ਤਂ ਕਰੋਤੀਤਿ ਲਿਪਿਕਾਰੋ. ਅਕ੍ਖਰਚਣੋ, ਅਕ੍ਖਰਚੁਞ੍ਚੁਪ੍ਯਤ੍ਰ. ਚਨ ਦਾਨੇ, ਭੂ. ਚਞ੍ਚੁ ਗਤਿਯਂ.

ਮੇਲਾਨਨ੍ਦਾ ਮਸਿਮਣਿ, ਮੇਲਨ੍ਧੁ ਵਣ੍ਣਕੂਪਿਕਾ;

ਮਸਿਜਲਨ੍ਤੁ ਮੇਲਾ ਚ, ਪਤ੍ਤਞ੍ਜਨਂ ਮਸਿ ਦ੍ਵਿਸੁ.

ਲੇਖਨੀ ਵਣ੍ਣਤੂਲੀ ਚ, ਵਣ੍ਣਕਕ੍ਖਰਤੂਲਿਕਾ;

ਵਣ੍ਣਦੂਤੋ ਸੋਤ੍ਥਿਮੁਖੋ, ਲੇਖੋ ਵਾਚਿਕਹਾਰਕੋ.

ਕਾਚਨਕਿਤਲਿਕੋ ਚ, ਕਾਚਨਂ ਤਨ੍ਨਿਬਨ੍ਧਨਂ;

ਲੇਖ੍ਯਟ੍ਠਾਨਂ ਗਨ੍ਥਕੁਟਿ, ਮੁਦ੍ਦਾ ਪਚ੍ਚਯਕਾਰਿਨੀ [ਤਿਕਣ੍ਡਸੇਸ ੨.੮.੨੭, ੨੮, ੨੯].

ਦ੍ਵਯਂ ਵਣ੍ਣੇ. ਵਣ੍ਣੀਯਤਿ ਪਕਾਸੀਯਤਿ ਅਤ੍ਥੋ ਯੇਨ, ਸੋ ਵਣ੍ਣੋ, ਵਣ੍ਣ ਪਕਾਸਨੇ. ਨ ਖਰਤਿ ਨ ਖੀਯਤੀਤਿ ਅਕ੍ਖਰੋ, ਖਰ ਵਿਨਾਸੇ, ਖਿ ਖਯੇ ਵਾ, ਤਦਾ ਅਰੋ. ਲਿਖਨਂ, ਲਿਪਿ, ਲਿਖਿ ਇਮੇ ਵਣ੍ਣਸਣ੍ਠਾਨੇ ਵਤ੍ਤਨ੍ਤਿ. ਲਿਪਿਲਿਖਿਯੋ ਇਤ੍ਥਿਯਂ.

ਭੇਦਾਦਯੋ ਇਮੇ ਚਤੁਰੋ ਉਪਾਯਾ ਸਤ੍ਤੁਵਿਜਯਕਾਰਣਾਨਿ. ਸਤ੍ਤੁਵਿਜਯਮੁਪਗਚ੍ਛਨ੍ਤਿ ਏਤੇਹੀਤਿ ਉਪਾਯਾ. ਪਰਸ੍ਮਾ ਵਿਸਿਲੇਸਨਂ ਭੇਦੋ.

ਸ੍ਨੇਹਰਾਗਾਪਨਯਨਂ, ਸਂਹਾਸੋਪ੍ਪਾਦਨਂ ਤਥਾ;

ਸਨ੍ਤਜ੍ਜਨਞ੍ਚ ਭੇਦੋਯਂ, ਵਿਞ੍ਞੂਹਿ ਤਿਵਿਧੋ ਮਤੋ [ਕਾਮਨ੍ਦਕੀਯਨੀਤਿਸਾਰ ੧੭.੮].

ਤਤ੍ਰਾਯਂ ਤਵਾਨੁਗ੍ਗਤੇਨ ਪਵੁਦ੍ਧੋ ਪਾਸਾਦਤਰਵੋ ਵਿਯ ਅਤ੍ਤਾਨਞ੍ਚੋਚ੍ਛਿਨ੍ਦਿਸ੍ਸਤੀਤਿ ਸਙ੍ਕਾਯਂ ਜਨਿਤਾਯਂ ਸ੍ਨੇਹਭਤ੍ਤਿਞ੍ਚਾਪਨਯਤਿ. ਅਭਿਭਵਨਞ੍ਚੋਪਾਦਯਤਿ [ਪਦ੍ਧਞ੍ਚੋਪਾਦਯਤਿ (ਕ.)]. ਅਞ੍ਞਸ੍ਸ ਚ ਪਰਿਯਪਚ੍ਚਾਮਿਤ੍ਤਾਨੁਗ੍ਗਹਣਸ੍ਸ ਮਰਣਮੇਵਨ੍ਤੋ ਭਵਿਸ੍ਸਤੀਤ੍ਯੇਵਂਪਕਾਰਮਭਿਭਯਨਂ ਸਨ੍ਤਜ੍ਜਨਂ.

ਵਧੋਤ੍ਥਗ੍ਗਹਣਞ੍ਚੇਵ, ਪਰਿਕ੍ਲੇਸੋ ਤਥੇਵ ਚ;

ਇਤਿ ਦਣ੍ਡਵਿਧਞ੍ਞੂਹਿ, ਦਣ੍ਡੋਪਿ ਤਿਵਿਧੋ ਮਤੋ [ਕਾਮਨ੍ਦਕੀਯਨੀਤਿਸਾਰ ੧੭.੯].

ਪਰਿਕ੍ਲੇਸੋ ਬਨ੍ਧਨਤਾਲ਼ਨਾਦਿ.

ਅਞ੍ਞਮਞ੍ਞੋਪਕਾਰਾਨਂ, ਦਸ੍ਸਨਂ ਗੁਣਕਿਤ੍ਤਨਂ;

ਸਮ੍ਬਨ੍ਧਸ੍ਸ ਸਮਕ੍ਖਾਨਂ, ਆਯਤਿਂ ਸਮ੍ਪਕਾਸਨਂ.

ਵਾਚਾ ਪੇਸਲਯਾ ਸਾਧੁ, ਤਵਾਹਮਿਤਿ ਚਪ੍ਪਣਂ;

ਇਤਿ ਸਾਮਵਿਧਞ੍ਞੂਹਿ, ਸਾਮਂ ਪਞ੍ਚਵਿਧਂ ਮਤਂ [ਕਾਮਨ੍ਦਕੀਯਨੀਤਿਸਾਰ ੧੭.੪-੫].

‘‘ਅਸ੍ਮਿਂ ਏਵਂ ਕਤੇ ਇਦਂ ਅਮ੍ਹਾਕਂ ਭਵਿਸ੍ਸਤੀ’’ਤਿ ਆਸਾਦਸ੍ਸਨਂ ਆਯਤਿਸਮ੍ਪਕਾਸਨਂ. ਅਪ੍ਪਣਮਿਤ੍ਯਙ੍ਗਸ੍ਸ ਦਾਨਂ.

ਦਾਨਞ੍ਚ ਪਞ੍ਚਧਾ ਸਾਰਸ੍ਸਾਸਾਰਸ੍ਸ ਚ ਦਬ੍ਬਸ੍ਸ ਗਹਿਤਸ੍ਸ ਸਮਪ੍ਪਣਂ, ਤਥਾਗਹਿਤਸ੍ਸਾਨੁਮੋਦਨਂ, ਤਥਾ ਅਪੁਬ੍ਬਦਾਨਂ, ਤਥਾ ‘‘ਅਮੁਸ੍ਸ ਦਬ੍ਬਂ ਗਣ੍ਹਾਹਿ, ਤਥੇਵ ਭਵਿਸ੍ਸਤੀ’’ਤਿ ਪਰਸੇਸੁ ਸਯਂ ਗਾਹਪ੍ਪਵਤ੍ਤਨਂ, ਤਥਾ ਇਣਪ੍ਪਮੋਚਨਞ੍ਚੇਤਿ. ਯਥਾਹ –

‘‘ਯੋ ਸਮ੍ਪਤ੍ਤਧਨੋਸ੍ਸਗ੍ਗੋ, ਉਤ੍ਤਮਮਜ੍ਝਿਮਾਧਮੋ;

ਪਤਿਦਾਨਂ ਤਥਾ ਤਸ੍ਸ, ਗਹਿਤਸ੍ਸਾਨੁਮੋਦਨਂ.

ਦਬ੍ਬਦਾਨ’ਮਪੁਬ੍ਬਞ੍ਚ, ਸਯਂ ਗਾਹਪ੍ਪਵਤ੍ਤਨਂ;

ਦੇਯ੍ਯਸ੍ਸ ਪਟਿਮੋਕ੍ਖੋ ਚ, ਦਾਨਂ ਪਞ੍ਚਵਿਧਂ ਮਤ’’ਨ੍ਤਿ [ਕਾਮਨ੍ਦਕੀਯਨੀਤਿਸਾਰ ੧੭.੬-੭].

ਏਤੇ ਚਤ੍ਤਾਰੋ ਉਪਾਯਾ ਮਾਯਾਦੀਸ੍ਵੇਵਨ੍ਤੋਗਧਾ, ਤਥਾ ਹਿ ਮਾਯੋਪੇਕ੍ਖਾ ਚ ਦਣ੍ਡਨ੍ਤੋਗਧਾ. ਇਨ੍ਦਜਾਲਞ੍ਚ ਭੇਦੇ ਅਨ੍ਤੋਗਧਂ. ਕੇਚਿ ਪਨਾਹੁ

‘‘ਸਾਮਂ ਦਾਨਞ੍ਚ ਭੇਦੋ ਚ, ਦਣ੍ਡੋ ਚੇਤਿ ਚਤੁਕ੍ਕਕਂ;

ਮਾਯੋਪੇਕ੍ਖਿਨ੍ਦਜਾਲਞ੍ਚ, ਸਤ੍ਤੋਪਾਯਾ ਪਕਿਤ੍ਤਿਤਾ’’ਤਿ [ਕਾਮਨ੍ਦਕੀਯਨੀਤਿਸਾਰ ੧੭.੩].

੩੪੯. ਨਾਮਮਤ੍ਤੇਨ ਵੁਤ੍ਤਾਨਂ ਭੇਦਾਦੀਨਮਿਦਾਨਿ ਪਰਿਯਾਯਾਨ੍ਯਾਹ. ਤਤ੍ਰ ਦ੍ਵਯਂ ਭੇਦੇ. ਜਪ ਮਾਨਸੇ ਚ [ਜਪੋ ਚਿਨ੍ਤਨਵਾਚਾਸੁ (ਧਾਤ੍ਵਤ੍ਥਸਙ੍ਗਹ, ੧੩੫ ਗਾਥਾ)], ਭੂ, ਣੋ. ਭਿਦਿ ਦ੍ਵਿਧਾਕਰਣੇ, ਣੋ.

ਤਿਕਂ ਦਣ੍ਡੇ. ਦਣ੍ਡ ਨਿਪਾਤਨੇ, ਚੁਰਾਦਿ. ਸਹੋ ਵੁਚ੍ਚਤਿ ਬਲਂ, ਤਬ੍ਭਵਂ ਸਾਹਸਂ. ਦਮਨਂ ਦਮੋ, ਦੀਘਪਟਿਸੇਧੋ.

੩੫੦. ਸਾਮਂ ਸੁਦ੍ਦਵਗ੍ਗੇ, ਦਾਨਞ੍ਚ ਬ੍ਰਾਹ੍ਮਣਵਗ੍ਗੇ ਕਥੇਸ੍ਸਤਿ. ਸਾਮ੍ਯਾਦਯੋ ਸਤ੍ਤਰੇਵਾਚਰਿਯਮਤੇ. ਪਰਮ੍ਪਰੋਪਕਾਰਿਤ੍ਤਾ ਰਜ੍ਜਸ੍ਸਙ੍ਗਾਨਿ. ਪਕਟ੍ਠਮੁਪਕੁਬ੍ਬਨ੍ਤਿ ਰਜ੍ਜਨ੍ਤਿ ਪਕਤਿਯੋਤਿ ਚੋਚ੍ਚਨ੍ਤੇ. ਵੁਤ੍ਤਞ੍ਚ ਕਾਮਨ੍ਦਕੀਯੇ –

‘‘ਸਾਮ੍ਯ’ਮਚ੍ਚਞ੍ਚ ਰਟ੍ਠਞ੍ਚ, ਦੁਗ੍ਗਂ ਕੋਸੋ ਬਲਂ ਸਖਾ;

ਪਰਮ੍ਪਰੋਪਕਾਰੀਦਂ, ਸਤ੍ਤਙ੍ਗਂ ਰਜ੍ਜਮੁਚ੍ਚਤੇ [ਕਾਮਨ੍ਦਕੀਯਨੀਤਿਸਾਰ ੪.੧].

ਅਮਚ੍ਚਰਟ੍ਠਦੁਗ੍ਗਾਨਿ, ਕੋਸੋ ਦਣ੍ਡੋ ਚ ਪਞ੍ਚਮੋ;

ਏਤਾ ਪਕਤਿਯੋ ਵੁਤ੍ਤਾ, ਵਿਜਿਗੀਸਸ੍ਸ ਰਾਜਿਨੋ.

ਏਤਾ ਪਞ੍ਚ ਤਥਾ ਮਿਤ੍ਤਂ, ਸਤ੍ਤਮੋ ਪਥਵੀਪਤਿ;

ਸਤ੍ਤਪ੍ਪਕਤਿਕਂ ਰਜ੍ਜਂ, ਇਚ੍ਚਾਹ ਸੂਰਪੂਜਿਤੋ’’ਤਿ.

ਤਤ੍ਰ ਪੋਰਸੇਣੀਨਂ ਪਧਾਨਭਾਵੇਪਿ ਸਤਿ ਰਟ੍ਠਗ੍ਗਹਣੇਨ, ਬਲਗ੍ਗਹਣੇਨ ਵਾ ਗਹਣਸਿਦ੍ਧਨ੍ਤਿ ਨੇਹ ਵਿਸੁਂ ਗਹਣਂ ਕਤਂ, ਅਮਰਕੋਸੇ ਪਨ ਦ੍ਵੀਹਿ ਗਹਣੇ ਸਿਦ੍ਧੇਪਿ ਪਧਾਨਤ੍ਤਾਖ੍ਯਾਪਨਤ੍ਥਂ ਵਿਸੁਂ ਗਹਿਤਾ. ਵੁਤ੍ਤਞ੍ਹਿ ਤਤ੍ਰ –

‘‘ਸਾਮ੍ਯ’ਮਚ੍ਚੋ ਸਖਾ ਕੋਸੋ, ਰਜ੍ਜਦੁਗ੍ਗਬਲਾਨਿ ਚ;

ਰਜ੍ਜਙ੍ਗਾਨਿ ਪਕਤਯੋ, ਪੋਰਾਨਂ ਸੇਣਿਯੋਪਿ ਚੇ’’ਤਿ [ਅਮਰ ੧੮.੧੭].

ਏਸਞ੍ਚ ਸਾਮ੍ਯਮਚ੍ਚਰਟ੍ਠਦੁਗ੍ਗਕੋਸਬਲਸਖੀਨਂ ਪੁਬ੍ਬਤਰਸ੍ਸ ਗਰੁਤ੍ਤਂ ਵਿਞ੍ਞੇਯ੍ਯਂ, ਇਹ ਤੁ ਨਾਮਲਿਙ੍ਗਾਨੁਸਾਸਨੇ ਅਭਿਧਾਨਸਤ੍ਥੇ ਅਨੁਪਯੋਗਤੋ ਯਥਾਕ੍ਕਮਂ ਗਰੁਤ੍ਤਂ ਨ ਵਤ੍ਤੁਮਿਚ੍ਛਤੀਤਿ ਬ੍ਯਤਿਕ੍ਕਮੇਨੋਪਞ੍ਞਾਸੋ ਕਤੋ.

ਸੁਵਣ੍ਣਾਦਿਮਯਭਣ੍ਡਾਗਾਰਂ ਕੋਸੋ, ਪਬ੍ਬਤੋਦਕਰੁਕ੍ਖਾਦੀਹਿ ਦੁਗ੍ਗਮਂ ਪੁਰਂ ਦੁਗ੍ਗਂ, ਵਿਜਿਤਂ ਜਨਪਦਵਤੀ ਭੂਮਿ, ਬਲਂ ਚਕ੍ਕਂ, ਤਞ੍ਚ ਮੋਲਭਤਸੇਣਿਸਹਾਯਾਮਿਤ੍ਤਾਟਵਿਕਭੇਦੇਨ ਛਬ੍ਬਿਧਂ. ਤਤ੍ਰ ਕਮਾਗਤਂ ਮੋਲਂ, ਵੇਤਨਸਮ੍ਬਨ੍ਧਂ ਭਤਂ, ਪੋਰਂ ਬਲਂ ਸੇਣੀ, ਸਹਾਯਭੂਤਂ ਸਹਾਯੋ, ਅਮਿਤ੍ਤਭੂਤਂ ਅਮਿਤ੍ਤਂ, ਅਟਵਿਕਂ ਅਟਵਿਸਹਾਯੋ ਮਿਤ੍ਤਂ. ਤਦਪਿ ਸਹਜ੍ਜਂ, ਪਾਕਤਂ, ਕਿਤ੍ਤਿਮਞ੍ਚੇਤਿ ਤਿਵਿਧਂ. ‘‘ਲਿਙ੍ਗੇ ਸਭਾਵੇ ਪਕਤਿ, ਪੋਰਾਮਚ੍ਚਾਦਿਯੋਨਿਸੁ. ਤਿਲਿਙ੍ਗਂ ਗੁਣਸਾਮ੍ਯੇਪੀ’’ਤਿ [ਬ੍ਯਾਖ੍ਯਾਸੁਧਾ ੧.੪.੨੯] ਰੁਦ੍ਦੋ.

੩੫੧. ਪਭਾਵਾਦੀਨਂ ਵਸਾ ਸਤ੍ਤਿਯੋ ਨਾਮ ਤਿਸ੍ਸੋ ਭਵਨ੍ਤਿ. ਸਕ ਸਤ੍ਤਿਯਂ,ਤਿ. ਤਤ੍ਰ ਯਂ ਸਨ੍ਧਾਦੀਨਂ, ਭੇਦਾਦੀਨਞ੍ਚ ਯਾਥਾਵਤੋ ਅਵਟ੍ਠਾਪਨਂ, ਤਂ ਞਾਣਬਲਂ ਮਨ੍ਤਸਤ੍ਤਿ, ਸਕਸਮ੍ਪਤ੍ਤੁਪ੍ਪਤ੍ਤਿਯਂ ਕੋਸਦਣ੍ਡਾ ਪਭੂਸਤ੍ਤਿ, ਤੇਸਂਯੇਵ ਪਭੁਤ੍ਤਸਮ੍ਪਾਦਨੇ ਸਾਮਤ੍ਥਿਯਤੋ. ਵੁਤ੍ਤਞ੍ਚ ‘‘ਕੋਸਦਣ੍ਡਬਲਂ ਪਭੂਸਤ੍ਤਿ’’ਰਿਤਿ [ਚਿਨ੍ਤਾਮਣਿਟੀਕਾਯਮ੍ਪਿ]. ਬਲਵਤੀ ਉਸ੍ਸਾਹਚੇਟ੍ਠਾ ਉਸ੍ਸਾਹਸਤ੍ਤਿ. ਵੁਤ੍ਤਞ੍ਚ ‘‘ਵਿਕ੍ਕਮਬਲਮੁਸ੍ਸਾਹਸਤ੍ਤਿ’’ਰਿਤਿ [ਬ੍ਯਾਖ੍ਯਾਸੁਧਾ ੨.੮.੧੯ ਚਿਨ੍ਤਾਮਣਿਟੀਕਾਯਮ੍ਪਿ].

ਪਭਾਵਾਦੀਨਂ ਸਕਾਰਣਂ ਸਰੂਪਂ ਦਸ੍ਸੇਤੁਮਾਹ ‘‘ਪਭਾਵੋ’’ਚ੍ਚਾਦਿ. ਦਮਨਂ ਦਣ੍ਡੋ, ਤਦਤ੍ਥਿਯਾ ਬਲਮ੍ਪਿ ਦਣ੍ਡੋ. ਤਤੋ ਜਾਤਂ ਯਂ ਤੇਜੋ, ਤਂ ਪਭਾਵੋ. ਤਤੋ ਜਾਤੋ ਯੋ ਤੇਜੋ, ਸੋ ‘‘ਪਭਾਵੋ’’ਤਿਪਿ ਪੁਲ੍ਲਿਙ੍ਗੇਨ ਯੋਜਨੀਯਂ. ਪਭਵਨ੍ਤਿ ਤੇਜਸ੍ਸਿਨੋ ਅਨੇਨੇਤਿ ਪਭਾਵੋ, ਣੋ. ਪਕਟ੍ਠੋ ਵਾ ਭਾਵੋ ਪਭਾਵੋ. ਕੋਸੋ ਧਨਂ, ਤਤੋ ਜਾਤੋ ਯੋ ਤੇਜੋ, ਸੋ ਪਭਾਵੋ ਨਾਮ. ਤਥਾ ਕੋਸਜੋ ਤੇਜੋ ਧਨੇਨ ਸਤ੍ਤੂਨਮੁਪਕਰਣਂ. ਪਤਪਨ੍ਤਿ ਤੇਜਸ੍ਸਿਨੋ ਭਵਨ੍ਤ੍ਯਨੇਨੇਤਿ ਪਤਾਪੋ, ਣੋ.

੩੫੨. ਦ੍ਵਯਂ ਮਨ੍ਤੇ. ਮਨ੍ਤਾ ਵੁਚ੍ਚਤਿ ਪਞ੍ਞਾ, ਸਾ ਏਤਸ੍ਮਿਂ ਵਿਜ੍ਜਤਿ ਤਾਯ ਨਿਪ੍ਫਾਦੇਤਬ੍ਬਤ੍ਤਾਤਿ ਮਨ੍ਤੋ, ਅਥ ਵਾ ਮਨ੍ਤ ਗੁਤ੍ਤਭਾਸਨੇ, ਭਾਵੇ ਣੋ. ਇਤਰਤ੍ਰ ਭਾਵੇ ਯੁ.

ਸੋ ਮਨ੍ਤੋ ਦ੍ਵਿਗੋਚਰੋ ਦ੍ਵਿਨ੍ਨਂ ਜਨਾਨਂ ਵਿਸਯਭੂਤੋ ਚਤੁਕ੍ਕਣ੍ਣੋ ਨਾਮ. ਚਤ੍ਤਾਰੋ ਕਣ੍ਣਾ ਏਤ੍ਥ ਚਤੁਕ੍ਕਣ੍ਣੋ. ਸੋ ਮਨ੍ਤੋ ਤਿਗੋਚਰੋ ਤਿਣ੍ਣਂ ਜਨਾਨਂ ਵਿਸਯਭੂਤੋ ਛਕ੍ਕਣ੍ਣੋ ਨਾਮ. ਮਨ੍ਤੋ ਨਾਮ ਚਤੁਕ੍ਕਣ੍ਣੋ ਵਾ ਛਕ੍ਕਣ੍ਣੋ ਵਾ ਕਤ੍ਤਬ੍ਬੋ, ਨ ਤਤੋ ਪਰਨ੍ਤਿ ਦ੍ਵਿਨ੍ਨਮੇਵੇਤ੍ਥ ਗਹਣਂ. ਅਮਰਕੋਸੇ ਪਨ ਛਕ੍ਕਣ੍ਣੋਪਿ ਪਟਿਕ੍ਖਿਤ੍ਤੋ. ਵੁਤ੍ਤਞ੍ਹਿ ਤਤ੍ਥ ‘‘ਅਛਕ੍ਕਣ੍ਣੋ, ਯੋ ਤਤਿਯਾਦ੍ਯਗੋਚਰੋ’’ਤਿ [ਅਮਰ ੧੮.੨੨].

ਸਬ੍ਬਪਾਰਿਸਦਤ੍ਤਾ [ਸਬ੍ਬਪਾਠਿਪਦਤ੍ਤਾ (ਕ.)] ਬ੍ਯਾਕਰਣਸ੍ਸ ਸੋਤੂਨਂ ਸਮਯਨ੍ਤਰੇਸ੍ਵਪਿ ਪਟੁਭਾਵਜਨਨਤ੍ਥਂ ਇਧਾਨਾਗਤਾਪਿ ਛਗ੍ਗੁਣਾਦਯੋ ਆਨੇਤ੍ਵਾ ਕਥੇਤਬ੍ਬਾ. ਵੁਤ੍ਤਞ੍ਹਿ –

‘‘ਸਬ੍ਬਪਾਰਿਸਦਂ [ਸਬ੍ਬਪਾਟਿਪਦਂ (ਕ.)] ਹਿਦਂ, ਸਬ੍ਬਸਤ੍ਥ’ਮਤੋ ਮਤਂ;

ਨਿਸ੍ਸੀਯਤੇ ਕ੍ਵਚਿ ਕਿਞ੍ਚਿ, ਸਬ੍ਬੇਸ’ਮਤ੍ਰ ਵਾਦਿਨ’’ਨ੍ਤਿ.

ਯਥਾ ਛਗ੍ਗੁਣਾ ਸਨ੍ਧਿ ਵਿਗ੍ਗਹਯਾਨਾਸਨਦ੍ਵੇਧਾਸਯਾ [ਅਮਰ ੧੮.੧੮-੯]. ਤਤ੍ਰ ਸਨ੍ਧਿ ਉਪਹਾਰਲਕ੍ਖਣੋ ਤਿਵਿਧੋ ਕੋਸਦਣ੍ਡਭੂਮਿਪ੍ਪਦਾਨਹੇਤੁਕੋ. ਅਪਹਾਰਲਕ੍ਖਣੋ ਵਿਗ੍ਗਹੋ, ਸੋਪਿ ਤਿਵਿਧੋ ਪਕਾਸਯੁਦ੍ਧਂ ਕੂਟਯੁਦ੍ਧਂ ਤੁਣ੍ਹਿਯੁਦ੍ਧਨ੍ਤਿ.

ਪਰਬ੍ਯਸਨਤਾਸਪਤ੍ਤਿਦੇਸਕਾਲਾਤ੍ਯੁਦਯਾਵਾਪਯਾਨਮਤ੍ਤੇਨ ਸਾਦ੍ਧੇ ਪਰਸ੍ਮਿਂ ਕਤਾਚਰਸ੍ਸ ਗੁਣਾਨੁਰਤ੍ਤਪਕਤਿਸ੍ਸ ਵਿਜਿਗੀਸਸ੍ਸ ਯਾਤ੍ਰਾ ਯਾਨਂ [ਕਾਮਨ੍ਦਕੀਯਨੀਤਿਸਾਰੇ ੧੧ ਸਗ੍ਗੇ ਪਸ੍ਸਿਤਬ੍ਬਂ], ਤਞ੍ਚ ਵਿਗ੍ਗਯ੍ਹਯਾਨਂ ਸਨ੍ਧਾਯਯਾਨਂ ਸਮ੍ਭੂਯਯਾਨਂ ਪਸਙ੍ਗਯਾਨਂ ਉਪੇਕ੍ਖਿਯਯਾਨਮਿਤਿ ਪਞ੍ਚਵਿਧਂ. ਪਤਿਗ੍ਗਾਹੀਨਂ ਨਿਗ੍ਗਯ੍ਹ, ਸਨ੍ਧਾਯ, ਉਪੇਕ੍ਖਿਯ ਵਾ ਯਂ ਯਾਨਂ, ਤਂ ਵਿਗ੍ਗਯ੍ਹਯਾਨਾਦਿ. ਯਦਾ ਨ ਸਕ੍ਕੋਤਿ, ਤਦਾ ਸਾਮਨ੍ਤੇਹਿ ਸਹੇਕੀਭੂਯ ਯਾਨਂ ਸਮ੍ਭੂਯਯਾਨਂ. ਅਞ੍ਞਤ੍ਰ ਗਨ੍ਤਬ੍ਬੇ ਅਞ੍ਞਸ੍ਮਿਂ ਪਸਙ੍ਗਤੋ ਗਮਨਂ ਪਸਙ੍ਗਯਾਨਂ.

‘‘ਨ ਮਂ ਪਰੋ ਹਨ੍ਤੁਂ ਸਮਤ੍ਥੋ, ਨਾਹਮ੍ਪਿ ਪਰ’’ਮਿਤਿ ਕਾਲਾਦਿਕੇ ਪਰਿਕ੍ਖਿਤ੍ਵਾ ਵਿਜਿਗੀਸਸ੍ਸ ਦੁਗ੍ਗਾਦੀਨਿ ਵਡ੍ਢਯਤੋ ਠਿਤਿ ਆਸਨਂ, ਤਦਪਿ ਵਿਗ੍ਗਯ੍ਹਾਸਨਸਨ੍ਧਾਯਾਸਨਾਦਿਭੇਦੇਨ ਪਞ੍ਚਵਿਧਂ. ਬਲੀਨਂ ਸਤ੍ਤੂਨਂ ਮਜ੍ਝੇ ਕਾਕਕ੍ਖਿਵਾ’ਲਕ੍ਖਿਤਸ੍ਸੋ’ਭਯਤ੍ਰ ਵਚਨੇਨਤ੍ਤਨੋ ਸਮਪ੍ਪਣਂ ਦ੍ਵੇਧਂ. ਅਞ੍ਞਤਰੇਨ ਵਾ ਬਲਵਤਰੇਨ ਸਨ੍ਧਿ, ਅਞ੍ਞਤਰੇਨ ਅਬਲੇਨ ਵਿਗ੍ਗਹੋ ਦ੍ਵੇਧਂ. ਸਤ੍ਤੁਨੋ ਵਾ ਪਕਤੀਹਿ ਸਨ੍ਧਾਯ ਯੋ ਤੇਨ ਵਿਗ੍ਗਹੋ, ਸਤ੍ਤੁਨੇਵ ਵਾ ਯੋ ਸਨ੍ਧਿਵਿਗ੍ਗਹਸਮੁਦਾਯਹੇਤੁਕੋ [ਸਤ੍ਤੁਨੋਵ ਵਾ ਸਨ੍ਧਿਵਿਗ੍ਗਹਸਮੁਦਾਯਹੇਤੁਨੋ (ਬ੍ਯਾਖ੍ਯਾਸੁਧਾ ੧.੮.੧੮)] ਦੁਗ੍ਗਾਸਯਸ੍ਸ ਬ੍ਯਾਪਾਰੋ, ਸੋਪਿ ਦ੍ਵੇਧਂ. ਪਰਸਨ੍ਤਾਨਮਪ੍ਯੋਭਯਵੇਦਨਾਨਂ ਉਭਯਤੋ ਵੁਤ੍ਤਿ ਦ੍ਵੇਧਮੁਚ੍ਚਤੇ.

‘‘ਉਚ੍ਛਿਜ੍ਜਮਾਨੋ ਰਿਪੁਨਾ ਨਿਰੁਪਾਯ ਪਤਿਕ੍ਰਿਯੋ. ਸਤ੍ਤਿਹੀਨੋ ਸਮਾਸਿਯਤੇ’’ਤਿ [ਬ੍ਯਾਖ੍ਯਾਸੁਧਾ ੧.੮.੧੮] ਹੀਨੇਨਾਞ੍ਞਸ੍ਸ ਬਲਵਤਰਸ੍ਸ ਧਮ੍ਮਵਿਜਯਿਨੋ ਸਮਾਸਯਨਂ [ਬਲਵਤਾ ਅਰਿਨਾ ਉਚ੍ਛਿਜ੍ਜਮਾਨਸ੍ਸ ਹੀਨਸਤ੍ਤਿਨੋ ਯਂ ਬਲਵਧਮ੍ਮਵਿਜਯਿਸਮਾਸਯਨਂ (ਬ੍ਯਾਖ੍ਯਾਸੁਧਾ ੧.੮.੧੮)], ਤਸ੍ਸੇਵ ਵਾ ਬਲਿਨੋ ਸਤ੍ਤੁਨੋ ਕੋਸਾਦਿਪ੍ਪਦਾਨੇਨ ਆਸਯਨਂ ਆਸਯੋ ਵੁਚ੍ਚਤੇ. ਏਤੇ ਛਗ੍ਗੁਣਾ.

ਯਸ੍ਮਿਞ੍ਚ ਗੁਣੇ ਠਿਤੋ ਵਿਜਿਗੀਸੋ ਸਕ੍ਕੋਤ੍ਯਤ੍ਤਨੋ ਅਟ੍ਠਵਗ੍ਗਿਯਕਮ੍ਮਾਨਿ ਪਵਤ੍ਤਯਿਤੁਂ, ਪਰਸ੍ਸ ਚੇਤਾਨ੍ਯੁਪਹਨ੍ਤੁਂ, ਗੁਣਮਾਧਿਟ੍ਠੇਯ੍ਯ, ਸਾ ਵੁਡ੍ਢਿ.

ਕਸਿ ਵਣਿਜ੍ਜਂ ਪਥੋ ਦੁਗ੍ਗਂ, ਸੇਤੁ ਕੁਞ੍ਜਰਬਨ੍ਧਨਂ;

ਖਨ੍ਯਾਕਰਧਨਾਦਾਨਂ, ਸੁਞ੍ਞਾਨਞ੍ਚ ਨਿਵੇਸਨਂ [ਕਾਮਨ੍ਦਕੀਯਨੀਤਿਸਾਰ ੫.੭੮].

ਇਤ੍ਯੇਸੋ ਅਟ੍ਠਵਗ੍ਗੋ.

ਯਸ੍ਮਿਂ ਵਾ ਗੁਣੇ ਠਿਤੋ ਸਕਮ੍ਮਾਨਂ ਵੁਡ੍ਢਿ, ਖਯਂ ਵਾ ਨਾਭਿਪਸ੍ਸਤਿ, ਤਂ ਠਾਨਂ, ਯਸ੍ਮਿਂ ਵਾ ਗੁਣੇ ਠਿਤੋ ਸਕਮ੍ਮਾਨਮੁਪਘਾਤਂ ਪਸ੍ਸਤਿ, ਤਸ੍ਮਿਂ ਨ ਤਿਟ੍ਠੇਯ੍ਯ, ਸੋ ਖਯੋ, ਅਯਂ ਨੀਤਿਵੇਦੀਨਂ ਤਿਵਗ੍ਗੋ [ਅਮਰ ੧੮.੧੯]. ਇਤਰੇਸਂ ਧਮ੍ਮਤ੍ਥਕਾਮਾ ਤਿਵਗ੍ਗੋ.

ਦ੍ਵਯਂ ਗੁਯ੍ਹੇ. ਰਹਸਿ ਭਵਂ ਰਹਸ੍ਸਂ, ਸੋ, ਰਹੇ ਵਾ ਭਵਂ ਰਹਸ੍ਸਂ. ਗੁਹ ਸਂਵਰਣੇ, ਕਮ੍ਮਨਿ ਯੋ. ਇਦਂ ਦ੍ਵਯਂ ਤੀਸੁ. ਰਹਸ੍ਸੋ ਮਨ੍ਤੋ, ਰਹਸ੍ਸਾ ਵਾਚਾ, ਰਹਸ੍ਸਂ ਮਨ੍ਤਨਂ.

੩੫੩. ਪਞ੍ਚਕਂ ਵਿਜਨੇ. ਵਿਜਿ ਪੁਥਭਾਵੇ, ਭੂ, ਤੋ ਚ. ਵਿਚਿ ਵਿਵੇਚਨੇ, ਪੁਥੁਭਾਵੇ ਚ ਵਾ. ‘‘ਵਿਵਿਤ੍ਤਂ ਤੀਸੁ ਵਿਜਨੇ, ਅਸਂਪਕ੍ਕਪਵਿਤ੍ਤੇਸੂ’’ਤਿ ਰੁਦ੍ਦੋ. ਵਿਗਤੋ ਜਨੋ ਅਸ੍ਮਾਤਿ ਵਿਜਨੋ. ਛਾਦੇਤੀਤਿ ਛਨ੍ਨੋ. ਛਦ ਸਂਵਰਣੇ. ਵਿਤ੍ਤਮਰਹਤੀਤਿ ਰਹੋ, ਰਹ ਚਾਗੇ, ਰਮਨ੍ਤੇ ਅਸ੍ਮਿਨ੍ਤਿ ਵਾ ਰਹੋ, ਵਣ੍ਣਵਿਕਾਰੋ. ‘‘ਰਹੋ ਨਿਧੁਵਨੇ ਚਾਪਿ, ਰਹੋ ਗੁਯ੍ਹੇ ਨਪੁਂਸਕ’’ਨ੍ਤਿ [ਬ੍ਯਾਖ੍ਯਾਸੁਧਾ ੨.੮.੨੨] ਰਭਸੋ. ਦੁਤਿਯੋ ਰਹੋਸਦ੍ਦੋ ਅਬ੍ਯਯਂ. ਨਿਸ੍ਸਲਾਕਾ, ਉਪਾਸੁਪ੍ਯਤ੍ਰ. ਨਿਸ੍ਸਲਾਕਾ ਥੀ, ਉਪਾਸੁ ਅਬ੍ਯਯਂ.

ਦ੍ਵਯਂ ਵਿਸ੍ਸਾਸੇ. ਸਸ ਪਾਲਨੇ, ਣੋ. ਸਮ੍ਭ ਵਿਸ੍ਸਾਸੇ. ‘‘ਵਿਸ੍ਸਮ੍ਭੋ ਕੇਲਿਕਲਹੇ, ਵਿਸ੍ਸਾਸੇ’ਪਣਯੇਪਿ ਚੇ’’ਤਿ [ਚਿਨ੍ਤਾਮਣਿਟੀਕਾਯਮ੍ਪਿ] ਰੁਦ੍ਦੋ.

ਦ੍ਵਯਂ ਨ੍ਯਾਯੇ. ਯੁਜ ਸਮਾਧਿਮ੍ਹਿ, ਸਮਾਧਿ ਅਭ੍ਯੁਪਗਮੋ, ਤੋ. ਉਪਗਨ੍ਤਬ੍ਬਤ੍ਤਾ ਉਪਾਯਿਕਂ. ਉਪਾਯਾ ਸਕਤ੍ਥੇ ਇਕੋ, ਓਪਾਯਿਕਂ, ਓਪਯਿਕਮ੍ਪਿ [ਪਾਣਿਨਿ ੫.੪.੩੪ (ਗਣ)], ਲਬ੍ਭਂ, ਭਜਮਾਨਂ, ਅਭਿਨੀਤਂ, ਨ੍ਯਾਯਂ, ਞਾਯਂਪ੍ਯਤ੍ਰ.

੩੫੪. ਸਿਲੋਕਂ ਓਵਾਦੇ. ਅਵਪੁਬ੍ਬੋ ਵਦ ਵਿਯਤ੍ਤਿਯਂ ਵਾਚਾਯਂ, ਭਾਵੇ ਣੋ. ਸਾਸ ਅਨੁਸਿਟ੍ਠਿਮ੍ਹਿ,ਤਿ, ਆਸ੍ਸਿ, ਅਨੁਸਿਟ੍ਠਿ. ਅਨੁਸਾਸਤੇ ਅਨੁਸਾਸਨਂ. ਪੁਮਵਜ੍ਜੇ ਇਤ੍ਥਿਯਂ, ਨਪੁਂਸਕੇ ਚ. ਏਤ੍ਥ ਚ ਏਕਸ੍ਸੇਵਤ੍ਥਸ੍ਸ ਭਿਨ੍ਨਲਿਙ੍ਗੇਹਿ ਤੀਹਿ ਨਾਮੇਹਿ ਕਥਨਂ ਨ ਕੇਵਲਂ ਵਾਚ੍ਚਲਿਙ੍ਗੋਯੇਵ ਸਦ੍ਦੋ, ਅਥ ਖੋ ਵਾਚਕਲਿਙ੍ਗੋਪ੍ਯਤ੍ਥੀਤਿ ਦੀਪਨਤ੍ਥਂ.

ਦ੍ਵਯਂ ਆਣਾਯਂ. ਆਣ ਪੇਸਨੇ, ਭਾਵੇ ਅ, ਆਣਾ, ਇਤ੍ਥੀ. ਅਵਵਾਦੋ, ਨਿਦ੍ਦੇਸੋ, ਸਿਟ੍ਠਿਪ੍ਯਤ੍ਰ. ਦ੍ਵਯਂ ਬਨ੍ਧਨੇ. ਦਾ ਦਾਨੇ, ਭਾਵੇ ਯੁ, ਦਾ ਅਵਖਣ੍ਡਨੇ ਵਾ, ਵਿਯੋਗਦਾਨਤੋ ਉਦ੍ਦਾਨਂ.

੩੫੫-੩੫੬. ਦ੍ਵਯਂ ਅਪਰਾਧੇ. ਅਪਗਚ੍ਛਨ੍ਤ੍ਯਨੇਨਾਤਿ ਆਗੁ, ਣੁ, ਪਲੋਪੋ, ਰਸ੍ਸਸ੍ਸ ਦੀਘਤਾ, ਨਪੁਂਸਕੇ ਆਗੁ. ਅਪਗਤੋ ਰਾਧੋ ਯੇਨ ਅਪਰਾਧੋ, ਰਾਧ ਸਂਸਿਦ੍ਧਿਮ੍ਹਿ. ਦ੍ਵਯਂ ਰਾਜਗਯ੍ਹੇ. ਕਿਰ ਵਿਕਿਰਣੇ, ਕਤ੍ਤਰਿ ਅ, ਅਤ੍ਤਂ. ਬਲ ਪਾਣਨੇ, ਇ. ਕਰਸਾਹਚਰਿਯਤੋ ਬਲਿ ਪੁਲ੍ਲਿਙ੍ਗੇ. ਭਾਗਧੇਯ੍ਯੋਪ੍ਯਤ੍ਰ. ਭਾਗਾਸਕਤ੍ਥੇ ਧੇਯ੍ਯੋ [ਪਾਣਿਨਿ ੫.੪.੩੬ (ਵਾ.)], ਭਾਗਤ੍ਤੇਨ ਤਿਟ੍ਠਤੀਤਿ ਵਾ ਭਾਗਧੇਯ੍ਯੋ, ਇਯੋ.

ਦ੍ਵਯਂ ਤੁਟ੍ਠਿਦਾਯੇ. ਮਨੋਰਥਪੁਣ੍ਣਤ੍ਤਾ ਪਤ੍ਤਬ੍ਬੋ ਭਾਗੋ ਪੁਣ੍ਣਪਤ੍ਤੋ. ਤੁਸ੍ਸਨਂ ਤੁਟ੍ਠੋ, ਸੋਸ੍ਸਤ੍ਥੀਤਿ ਤੁਟ੍ਠੀ, ਤੇਨ ਦਾਤਬ੍ਬੋ ਦਾਯੋ ਤੁਟ੍ਠਿਦਾਯੋ, ਆਕਾਰਨ੍ਤਾਨਮਾਯੋ.

ਛਕ੍ਕਂ ਪਾਭਤੇ. ਤਥਾ ਹਿ –

‘‘ਹੇਮਂ ਸੀਹਾਸਨਂ ਵੇਸਂ, ਵੁਤ੍ਤਂ ਭਦ੍ਦਾਸਨਂ ਤਥਾ;

ਉਪਾਯਨ’ਮੁਪਗ੍ਗਯ੍ਹਂ, ਪਾਭਤਞ੍ਚੋ’ਪਦਾ ਥਿਯ’’ਨ੍ਤਿ.

ਸਿਲੋਕਾਦ੍ਧਂ ਨਾਮ ਅਮਰਮਾਲਾ.

ਉਪਗਨ੍ਤ੍ਵਾਦਾਤਬ੍ਬਾਤਿ ਉਪਦਾ, ਅ, ਇਤ੍ਥੀ, ਤਂ ਤਮਤ੍ਥਂ ਪਤ੍ਥੇਨ੍ਤੇਹਿ ਆਭਰੀਯਤੇ ਆਨੀਯਤੇਤਿ ਪਾਭਤਂ, ਪਤ੍ਥਨਤ੍ਥਜੋਤਕੋਯਂ ਪਸਦ੍ਦੋ. ਉਪੇਯ੍ਯਤੇਤਿ ਉਪਾਯਨਂ, ਇਤੋ ਯੁ, ਉਪਗਚ੍ਛਤਿ ਯੇਨਾਤਿ ਵਾ ਉਪਾਯਨਂ. ਕੁਚ ਸਙ੍ਕੋਚਨੇ, ਣੋ, ਵਿਗਤੋ ਕੋਚੋ ਯੇਨ ਉਕ੍ਕੋਚੋ. ਪਣ੍ਣੇਨ ਸਤ੍ਥਪਣ੍ਣੇਨ ਸਦ੍ਧਿਂ ਆਕਰੀਯਤੇ ਆਨੀਯਤੇਤਿ ਪਣ੍ਣਾਕਾਰੋ, ਅਞ੍ਞਤ੍ਰ ਉਪਚਾਰਾ. ਪਹਿਣਨ੍ਤ੍ਯਨੇਨੇਤਿ ਪਹੇਣਕਂ, ਹਿ ਗਤਿਯਂ, ਯੁ, ਸਕਤ੍ਥੇ ਕੋ. ਪਦੇਸਨਂ, ਉਪਗ੍ਗਯ੍ਹਂ, ਉਪਹਾਰੋਪ੍ਯਤ੍ਰ.

ਗੁਮ੍ਬਾਦਿਦੇਯ੍ਯੋ ਗੁਮ੍ਬਘਟਾਦਿਕੋ [ਗੁਮ੍ਬਘਟਾਦਿਤੋ (?)] ਦੇਯ੍ਯੋਸੁਙ੍ਕਂ, ਅਨਿਤ੍ਥੀ, ਗੁਮ੍ਬੋ ਨਾਮ ਜਲਥਲਮਗ੍ਗਾਦੀਸੁ ਲਦ੍ਧਬ੍ਬਭਾਗੋ, ਤਥਾ ਘਟ੍ਟੋਪਿ, ਸਮਾਨਤ੍ਥਾ ਹੇਤੇ. ਆਦਿਨਾ ਪਾਭਤਮ੍ਪਿ ਸਙ੍ਗਣ੍ਹਾਤਿ. ਸੁਙ੍ਕ ਗਮਨੇ, ਸੁਙ੍ਕਤਿ ਯੇਨ, ਤਂ ਸੁਙ੍ਕਂ. ਗਮੁ ਗਮਨੇ, ਬੋ, ਅਸ੍ਸੁ, ਗੁਮ੍ਬੋ. ਦ੍ਵਯਂ ਗਾਮਜਨਪਦਾਦਿਤੋ ਲਦ੍ਧਬ੍ਬਭਾਗੇ. ਅਯ ਗਮਨੇ, ਣੋ, ਆਯੋ. ਅਪਚ੍ਚਯੇ ਅਯੋ. ਧਨਾਨਂ ਸਮ੍ਪਤ੍ਤਕਾਲੇ ਆਗਮੋ ਧਨਾਗਮੋ.

੩੫੭. ਦ੍ਵਯਂ ਛਤ੍ਤਸਾਮਞ੍ਞੇ. ਆਤਪਤੋ ਸੂਰਿਯਾਲੋਕਤੋ ਤਾਯਤੀਤਿ ਆਤਪਤ੍ਤਂ, ਤੋ. ਛਾਦਯਤੀਤਿ ਛਤ੍ਤਂ, ਛਦ ਅਪਵਾਰਣੇ, ਤੋ, ਤ੍ਰਣਪਚ੍ਚਯੇ ਛਤ੍ਰਂ, ਹੇਮਂ ਸੁਵਣ੍ਣਖਚਿਤਂ ਰਞ੍ਞਂ ਰਾਜੂਨਂ ਆਸਨਂ ਸੀਹਾਸਨਾਖ੍ਯਂ. ਸੀਹਾਕਤਿਪ੍ਪਧਾਨਤ੍ਤਾ ਸੀਹਾਕਤਿਪ੍ਪਧਾਨਂ ਆਸਨਨ੍ਤਿ ਵਿਗ੍ਗਹੋ.

ਦ੍ਵਯਂ ਚਾਮਰੇ. ਵਾਲੇਨ ਕਤਾ ਬੀਜਨੀ ਵਾਲਬੀਜਨੀ. ਚਮਰੋ ਮਿਗੋ ਤਸ੍ਸੇਦਂ ਚਾਮਰੀ. ‘‘ਚਾਮਰਾ ਚਾਮਰਂ ਰੋਮਂ, ਗੁਚ੍ਛਕਞ੍ਚਾਵਚੂਲਕ’’ਨ੍ਤਿ [ਤਿਕਣ੍ਡਸੇਸ ੨.੮.੪੦੬] ਤਿਕਣ੍ਡਸੇਸੋ. ਪਕਿਣ੍ਣਕਂਪ੍ਯਤ੍ਰ. ਪਕਰੀਯਤੇ ਵਿਕ੍ਖਿਪਤੇ ਪਕਿਣ੍ਣਕਂ, ਸਕਤ੍ਥੇ ਕੋ.

੩੫੮. ਖਗ੍ਗਾਦਯੋ ਇਮੇ ਪਞ੍ਚ ਰਾਜੂਨਂ ਕਕੁਧਭਣ੍ਡਾਨਿ ਭਵਨ੍ਤਿ. ਕੁਕ ਆਦਾਨੇ, ਧੋ, ਵਣ੍ਣਵਿਪਰਿਯਯੋ. ਰਞ੍ਞੋ ਗਮਨਕਾਲੇ ਸਦਾ ਆਦਾਤਬ੍ਬਤੋ ਕਕੁਧਾਨਿ ਚ ਤਾਨਿ ਰਾਜਧਨਤ੍ਤਾ ਭਣ੍ਡਾਨਿ ਚੇਤਿ ਕਕੁਧਭਣ੍ਡਾਨਿ.

੩੫੯. ਦ੍ਵਯਂ ਪੁਣ੍ਣਘਟੇ. ਜਲਪੁਣ੍ਣਤ੍ਤਾ ਭਦ੍ਦੋ ਕਲ੍ਯਾਣੋ ਕੁਮ੍ਭੋ ਭਦ੍ਦਕੁਮ੍ਭੋ. ਦ੍ਵਯਂ ਹੇਮਭਾਜਨੇ. ਭਰ ਭਰਣੇ, ਭਰਣਂ ਧਾਰਣਂ ਪੋਸਨਞ੍ਚ, ਧਾਰਣਤ੍ਥਸ੍ਸ ਭਰਤਿਸ੍ਸ ਭਿਙ੍ਗਾਦੇਸੋ, ਭਰਤਿ ਦਧਾਤਿ ਉਦਕਨ੍ਤਿ ਭਿਙ੍ਗਾਰੋ, ਆਰੋ. ਕਰਕੋ, ਕੁਣ੍ਡਿਕਾਪ੍ਯਤ੍ਰ.

ਹਤ੍ਥੀ ਚ ਅਸ੍ਸੋ ਚ ਰਥੋ ਚ ਪਤ੍ਤਿ ਚ, ਤੇਸਂ ਸਮੂਹੋ ਹਤ੍ਥਿਸ੍ਸਰਥਪਤ੍ਤਿ ਚਤੁਰਙ੍ਗਿਨੀ ਸੇਨਾਤ੍ਯੁਚ੍ਚਤੇ, ਸੇਨਙ੍ਗਤ੍ਤਾ ਸਮਾਹਾਰਦ੍ਵਨ੍ਦੋਯਂ. ਚਤ੍ਤਾਰਿ ਅਙ੍ਗਾਨਿ ਯਸ੍ਸਂ ਸਂਵਿਜ੍ਜਨ੍ਤਿ, ਸਾ ਚਤੁਰਙ੍ਗਿਨੀ, ਈ, ਇਨੀ.

੩੬੦. ਦਨ੍ਤ੍ਯਨ੍ਤਂ ਹਤ੍ਥਿਨਿ. ਕੁਞ੍ਜੋ ਹਨੁ, ਦਨ੍ਤੋ ਚ, ਤਂਯੋਗਾ ਕੁਞ੍ਜਰੋ, ਅਤਿਸਯੇ ਰੋ, ਕੁਂ ਪਥਵਿਂ ਜਰਾਪੇਤੀਤਿ ਵਾ ਕੁਞ੍ਜਰੋ, ਅਲੁਤ੍ਤਸਮਾਸੋ, ਕੁਞ੍ਜੇ ਵਾ ਗਿਰਿਕੂਟੇ ਰਮਤਿ, ਕੋਞ੍ਚਨਾਦਂ ਨਦਨ੍ਤੋ ਵਾ ਚਰਤਿ, ਕੁਂ ਵਾ ਪਥਵਿਂ ਤਦਾਘਾਤੇਨ ਜਰਯਤੀਤਿ ਕੁਞ੍ਜਰੋ. ਵਾਰਯਤਿ ਪਰਬਲਂ ਵਾਰਣੋ, ਨਨ੍ਦਾਦੀਹਿ ਯੁ. ਹਤ੍ਥਯੋਗਾ ਹਤ੍ਥੀ. ਮਤਙ੍ਗਸ੍ਸ ਇਸਿਨੋ ਅਪਚ੍ਚਂ ਮਾਤਙ੍ਗੋ, ਮਹਨ੍ਤਂ ਅਙ੍ਗਂ ਸਰੀਰਮੇਤਸ੍ਸਾਤਿ ਵਾ ਮਾਤਙ੍ਗੋ, ਹ ਨਲੋਪੋ, ਅਸ੍ਸਾਕਾਰੋ ਚ. ਦ੍ਵੇ ਰਦਾ ਦਨ੍ਤਾ ਯਸ੍ਸ ਦ੍ਵਿਰਦੋ, ‘‘ਰਦ ਵਿਲੇਖਨੇ ਦਨ੍ਤੇ’’ਤਿ ਹਿ ਨਾਨਤ੍ਥਸਙ੍ਗਹੇ. ਗਜ ਸਦ੍ਦੇ, ਗਜਤੀਤਿ, ਅ. ਨਗੋ ਪਬ੍ਬਤੋ, ਸੋ ਵਿਯ ਦਿਸ੍ਸਤੀਤਿ ਨਾਗੋ, ਣੋ. ਕਰੇਨ, ਮੁਖੇਨ ਚਾਤਿ ਦ੍ਵੀਹਿ ਪਿਵਤੀਤਿ ਦ੍ਵਿਪੋ. ਇ ਗਮਨੇ, ਭੋ. ਦਨ੍ਤਯੋਗਾ ਦਨ੍ਤੀ. ਸਟ੍ਠਿਹਾਯਨੋ, ਦਨ੍ਤਾਵਲੋ, ਅਨੇਕਪੋ, ਮਤਙ੍ਗਜੋ, ਕਰੀ, ਥਮ੍ਭੇਰਮੋ, ਪਦ੍ਮੀ, ਮਹਾਮਿਗੋ, ਪੀਲੁ, ਸਿਨ੍ਧੁਰੋ, ਦੀਘਮਾਰੁਤੋ, ਰਾਜੀਵੋ, ਜਲਕਕ੍ਖੋ, ਨਿਲ੍ਲੁਰੋ, ਕਰਟੀ, ਵਰਙ੍ਗੋ, ਸੁਪ੍ਪਕਣ੍ਣੋ ਇਚ੍ਚਾਦੀਨਿਪਿ ਹਤ੍ਥਿਨੋ ਨਾਮਾਨਿ. ਸਟ੍ਠਿਵਸ੍ਸਿਕਤ੍ਤਾ, ਜਾਤਿਯਾ ਸਟ੍ਠਿਵਸ੍ਸਕਾਲੇ ਥਾਮੇਨ ਹਾਯਨਤੋ ਵਾ ਸਟ੍ਠਿਹਾਯਨੋ.

ਵਨਕਰੀਨਂ ਯੋ ਯੂਥਜੇਟ੍ਠੋ, ਸੋ ਸਯੂਥਾਨਂ ਜੇਟ੍ਠਤ੍ਤਾ ਯੂਥਜੇਟ੍ਠੋ. ਸਯੂਥੇ ਪਾਤਿ ਰਕ੍ਖਤੀਤਿ ਯੂਥਪੋਤਿ ਚੋਚ੍ਚਤੇ.

੩੬੧. ਕਾਲ਼ਾਵਕਾਦੀਨਿ ਏਤਾਨਿ ਹਤ੍ਥਿਰਾਜਾਨਂ ਕੁਲਾਨਿ. ਕਲਮ੍ਬਤੇ ਸਦ੍ਦਾਯਤੇਤਿ ਕਾਲ਼ਾਵਕੋ, ਣ੍ਵੁ, ਮਲੋਪੋ. ਗਙ੍ਗਾਯਂ ਜਾਤੋ ਗਙ੍ਗੇਯ੍ਯੋ, ਠਾਨਵਸੇਨ ਸਾ ਸਞ੍ਞਾ. ਪਣ੍ਡਰਵਣ੍ਣਤਾਯ ਪਣ੍ਡਰੋ. ਵਣ੍ਣਵਸੇਨ ਤਮ੍ਬਵਣ੍ਣਤਾਯ ਤਮ੍ਬੋ. ਪਿਙ੍ਗਲਵਣ੍ਣਤਾਯ ਪਿਙ੍ਗਲੋ. ਗਨ੍ਧਯੁਤ੍ਤਤਾਯ ਗਨ੍ਧੋ. ਮਙ੍ਗ ਗਮਨਤ੍ਥੋ, ਸੋਭਨਗਮਨਯੁਤ੍ਤਤਾਯ ਮਙ੍ਗਲੋ, ਅਤਿਸਾਯਨੇ, ਪਸਂਸਾਯਂ ਵਾ ਲੋ. ਹੇਮਵਣ੍ਣਤਾਯ ਹੇਮੋ. ਉਪੋਸਥਕੁਲੇ ਜਾਤਤ੍ਤਾ ਉਪੋਸਥੋ, ਉਪਗਨ੍ਤ੍ਵਾ ਅਰਯੋ ਉਸਤੀਤਿ ਵਾ ਉਪੋਸਥੋ, ਥੋ, ਉਸ ਦਾਹੇ, ਉਪਪੁਬ੍ਬੋ ਵਸ ਨਿਵਾਸੇ ਵਾ, ਵਸ੍ਸੋ, ਉਪੋਸਥੋ, ਤਿਥੀਵਿਸੇਸੋ ਚ. ਛਬ੍ਬਣ੍ਣਦਨ੍ਤਤਾਯ ਛਦ੍ਦਨ੍ਤੋ. ਏਤੇਸਞ੍ਚ ਕਾਲ਼ਾਵਕੋ ਦਸਨ੍ਨਂ ਪੁਰਿਸਾਨਂ ਬਲਂ ਧਾਰੇਤਿ, ਗਙ੍ਗੇਯ੍ਯੋ ਦਸਨ੍ਨਂ ਕਾਲ਼ਾਵਕਾਨਂ, ਏਵਂ ਯਾਵਛਦ੍ਦਨ੍ਤਾ ਨੇਤਬ੍ਬੋ, ਸਮ੍ਮਾਸਮ੍ਬੁਦ੍ਧੋ ਪਨ ਦਸਨ੍ਨਂ ਛਦ੍ਦਨ੍ਤਾਨਂ ਬਲਂ ਧਾਰੇਤਿ, ਤੇਨੇਵ ਭਗਵਾ ਕਾਲ਼ਾਵਕਹਤ੍ਥਿਗਣਨਾਯ ਕੋਟਿਸਹਸ੍ਸਬਲਂ ਧਾਰੇਤਿ, ਪੁਰਿਸਗਣਨਾਯ ਦਸਨ੍ਨਂ ਪੁਰਿਸਕੋਟਿਸਹਸ੍ਸਾਨਂ ਬਲਂ.

੩੬੨. ਪਾਦੋ ਕਰਿਪੋਤੇ. ਪਞ੍ਚਵਸ੍ਸਾਨਿ ਯਾਵ ਕਲਭੋ, ਕਲ ਸਙ੍ਖ੍ਯਾਨੇ, ਅਭੋ, ਕਲਭੋ, ਲ਼ਤ੍ਤੇ ਕਲ਼ਭੋ, ਮਾਤਾਪਿਤੂਹਿ ਭਰਿਤਬ੍ਬਤ੍ਤਾ ਭਿਙ੍ਕੋ, ਭਰਤਿਸ੍ਸ ਭਿਙ੍ਕੋ. ਕਰਿਸਾਵਕੋਪ੍ਯਤ੍ਰ. ਪਾਦੋ ਮਤ੍ਤਮਾਤਙ੍ਗੇ. ਦਾਨਂ ਪਭਿਨ੍ਨੋ ਯਸ੍ਸ ਪਭਿਨ੍ਨੋ. ਮਜ੍ਜਤੀਤਿ ਮਤ੍ਤੋ, ਮਦ ਉਮ੍ਮਾਦੇ. ਗਜੇ ਜਾਯਤੀਤਿ ਗਜ੍ਜੋ, ਣ੍ਯੋ, ਮਦੋ. ਸੋ ਸਞ੍ਜਾਤੋ ਯਸ੍ਸ ਗਜ੍ਜਿਤੋ.

ਦ੍ਵਯਂ ਹਤ੍ਥਿਸਮੂਹੇ. ਹਤ੍ਥੀਨਂ ਸਮੂਹੋ ਹਤ੍ਥਿਘਟਾ. ਗਜਾਨਂ ਸਮੂਹੋ ਗਜਤਾ, ਗਾਮਜਨਬਨ੍ਧੁਸਹਾਯਾਦੀਹਿ ਤਾ. ਪਾਦੋ ਹਤ੍ਥਿਨਿਯਂ. ਹਤ੍ਥਯੋਗਾ ਹਤ੍ਥਿਨੀ, ਈ, ਇਨੀ. ਕਣ ਸਦ੍ਦੇ, ਇਰੁ, ਸਕਤ੍ਥੇ ਕੋ. ਕਰੇਣੁਕਾਤਿਪਿ, ਤਦਾ ਕਰਯੋਗਾ ਕਰੇਣੁਕਾ, ਇਣੁ. ਕਰਿਣੀ, ਧੇਨੁਕਾ, ਵਸਾ, ਕਰੇਣੁਪ੍ਯਤ੍ਰ.

੩੬੩. ਹਤ੍ਥਿਸਿਰੋਪਿਣ੍ਡਾ ਹਤ੍ਥਿਨੋ ਸਿਰਸਿ ਦ੍ਵੇ ਪਿਣ੍ਡਾ ਕੁਮ੍ਭਾਖ੍ਯਾ. ਕੇ ਸਿਰਸਿ ਭਵਤੀਤਿ ਕੁਮ੍ਭੋ, ਅਸ੍ਸੁ, ਨਿਗ੍ਗਹੀਤਾਗਮੋ ਚ. ਦ੍ਵਿਨ੍ਨਂ ਪਨ ਕੁਮ੍ਭਾਨਂ ਮਜ੍ਝਿਮਂ ਵਿਦੁ ਨਾਮ [ਅਮਰ ੧੮.੩੭]. ਅਙ੍ਕੁਸਸਙ੍ਘਾਤਂ ਵਿਨ੍ਦਤ੍ਯਸ੍ਮਿਨ੍ਤਿ ਵਿਦੁ, ਪੁਮੇ, ਉ. ਦ੍ਵਯਂ ਕਣ੍ਣਮੂਲੇ. ਚੂਲ਼ ਨਿਮਜ੍ਜਨੇ, ਣ੍ਵੁ, ਚੂਲ਼ਿਕਾ, ਚੁਦ ਸਞ੍ਚੋਦਨੇ ਵਾ, ਚੋਦੇਨ੍ਤਿ ਏਤ੍ਥ ਅਙ੍ਕੁਸਾਦੀਹਿ ਅਦਨ੍ਤਨ੍ਤਿ ਚੂਲ਼ਿਕਾ, ਦਸ੍ਸ ਲ਼ੋ, ਣ੍ਵੁ.

ਆਸਤੇ ਅਸ੍ਮਿਨ੍ਤਿ ਆਸਨਂ, ਖਨ੍ਧਦੇਸੋ. ਖਨ੍ਧੋ ਏਵ ਦੇਸੋ ਖਨ੍ਧਦੇਸੋ, ਤਸ੍ਮਿਂ. ਦ੍ਵਯਂ ਪੁਚ੍ਛਮੂਲੇ. ਪੁਚ੍ਛਸ੍ਸ ਮੂਲਂ ਹੇਟ੍ਠਿਮਭਾਗੋ.

੩੬੪. ਤਿਕਂ ਗਜਬਨ੍ਧਨਥਮ੍ਭੇ. ਆਲਨ੍ਤ੍ਯਸ੍ਮਿਂ, ਅਨੇਨ ਵਾ ਬਨ੍ਧਨ੍ਤਿ ਆਲਾਨਂ, ਯੁ. ਆਪੁਬ੍ਬੋ ਬਨ੍ਧਨਤ੍ਥੋ ਲਾਧਾਤੁ. ਆਹਨਨ੍ਤਿ ਬਨ੍ਧਨ੍ਤ੍ਯਸ੍ਮਿਂ, ਅਨੇਨ ਵਾ ਆਲ਼੍ਹਕੋ, ਹਨਧਾਤੁ, ਨਸ੍ਸ ਲ਼ੋ, ਵਣ੍ਣਵਿਪਰਿਯਯੋ ਚ, ਣ੍ਵੁ. ਥਮ੍ਭ ਪਟਿਬਨ੍ਧਨੇ. ਬਨ੍ਧੋਪ੍ਯਤ੍ਰ.

ਤਿਕਂ ਸਙ੍ਖਲੇ. ਅਨਿਤ੍ਥੀ ਤੂਤਿ ਤ੍ਵਨ੍ਤਂ ਲਿਙ੍ਗਪਦਂ. ਗਲ ਸੇਚਨੇ. ਨਿਗਲ਼ਤਿ ਬਨ੍ਧਤਿ ਯੇਨਾਤਿ ਨਿਗਲ਼ੋ, ਅ, ਕਤ੍ਤੁਸਾਧਨਂ ਵਾ. ਅਦਿ ਬਨ੍ਧਨੇ, ਅਨ੍ਦਤੀਤਿ ਅਨ੍ਦੁਕੋ. ਣ੍ਵੁ, ਅਸ੍ਸੁ. ਭੁਸਂ ਖਲਤ੍ਯਨੇਨ ਸਙ੍ਖਲਂ, ਕਟਿ ਵਤ੍ਥਬਨ੍ਧਨੇਪਿ, ‘‘ਥੀਕਟੀਵਤ੍ਥਬਨ੍ਧੇਪਿ, ਨਿਗਲ਼ੇ ਸਙ੍ਖਲਂ ਤਿਸੂ’’ਤਿ [ਚਿਨ੍ਤਾਮਣਿਟੀਕਾ ੧੮.੪੧] ਰਭਸੋ. ਸਙ੍ਖਲਿਕਾਪ੍ਯਤ੍ਰ.

ਦ੍ਵਯਂ ਗਜਗਣ੍ਡੇ. ਗਣ੍ਡ ਵਦਨੇਕਦੇਸੇ, ਅਧਾਤੂਨਮ੍ਪਿ ਧਾਤੂਸੁ ਪਾਠੋ, ਧਾਤੁ ਹਿ ਕ੍ਰਿਯਤ੍ਥੋ. ਗਣ੍ਡੋ ਕਪੋਲਸਾਮਞ੍ਞੇਪਿ. ਕਟ ਵਸ੍ਸਾਵਰਣੇਸੁ, ਅ. ਦ੍ਵਯਂ ਕਰਿਮਦਜਲੇ. ਦੀਯਤੇਤਿ ਦਾਨਂ. ਮਦ ਉਮ੍ਮਾਦੇ, ਕਰਣੇ ਅ.

੩੬੫. ਦ੍ਵਯਂ ਹਤ੍ਥਿਕਰੇ. ਸੋਣ ਵਣ੍ਣਗਤੀਸੁ, ਡੋ, ਸੋਡ ਗਬ੍ਬੇ ਵਾ, ਨਿਗ੍ਗਹੀਤਾਗਮੋ, ਣੋ ਚ. ਦ੍ਵੀਸੁ ਦ੍ਵੇਪਿ.

ਦ੍ਵਯਂ ਸੋਣ੍ਡਗ੍ਗੇ. ਕਰਸ੍ਸ ਸੋਣ੍ਡਸ੍ਸ ਅਗ੍ਗਂ. ਪੁਸ ਪੋਸਨੇ. ਖਰੋ, ਸਸ੍ਸ ਕੋ, ਉਸ੍ਸੋਤ੍ਤਂ, ਪੁਸ ਵੁਡ੍ਢਿਮ੍ਹਿ ਵਾ, ਭੂ, ਪੁਸ ਸ੍ਨੇਹਸੇਚਨਪੂਰਣੇਸੁ ਵਾ, ਕਿਯਾਦਿ, ਪੁਸ ਧਾਰਣੇ ਵਾ, ਚੁਰਾਦਿ.

ਹਤ੍ਥਿਸ੍ਸ ਕਾਯਮਜ੍ਝਮ੍ਹਿ ਬਨ੍ਧਨਰਜ੍ਜੁ ਕਚ੍ਛਾ ਨਾਮ. ਕਚ ਬਨ੍ਧਨੇ, ਛੋ. ਦੂਸਾ, ਵਰਤ੍ਰਾਪ੍ਯਤ੍ਰ. ਕੁਥੋ ਨਾਮ ਹਤ੍ਥਿਪਿਟ੍ਠਤ੍ਥਰਿਤਚਿਤ੍ਰਕਮ੍ਬਲਂ, ਸੋ ਆਦਿ ਯੇਸਨ੍ਤੇ ਕੁਥਾਦਯੋ. ਕੁਥਾਦਯੋ ਏਵ ਕਪ੍ਪਨੋ ਨਾਮ ਭਵਨ੍ਤਿ. ਕਪ੍ਪ ਸਾਮਤ੍ਥਿਯੇ, ਸਜ੍ਜਨਾਯਞ੍ਚ, ਕਰਣੇ ਯੁ. ਕਪ੍ਪਨਾਪਿ. ਕਚ ਸਜ੍ਜਨਾਯਂ, ਥੋ, ਕੁਥੋ, ਤੀਸੁ. ‘‘ਨਪੁਂਸਕਮਤ੍ਥਰਣਂ, ਥੀ ਪਵੇਣੀ ਕੁਥਂ ਤਿਸੂ’’ਤਿ [ਚਿਨ੍ਤਾਮਣਿਟੀਕਾ ੧੮.੪੨] ਹਿ ਵੋਪਾਲਿਤੋ. ਪਵੇਣੀ, ਅਤ੍ਥਰਣਂ, ਵਣ੍ਣੋ, ਪਰਿਤ੍ਥੋਮੋਤਿ ਏਤੇ ਕੁਥਪਰਿਯਾਯਾ.

੩੬੬. ਦ੍ਵਯਂ ਰਾਜਾਰਹੇ ਹਤ੍ਥਿਨਿ. ਰਾਜਾਨਮੁਪਗਨ੍ਤ੍ਵਾ ਵਹਿਤੁਮਰਹਤੀਤਿ ਓਪਵਯ੍ਹੋ, ਅਰਹਤ੍ਥੇ ਣ੍ਯੋ. ਰਾਜਾਨਂ ਵਹਿਤੁਂ ਅਰਹਤੀਤਿ ਰਾਜਵਯ੍ਹੋ, ਣ੍ਯੋ. ਦ੍ਵਯਂ ਕਪ੍ਪਿਤਹਤ੍ਥਿਨਿ. ਸਜ੍ਜਾ ਸਜ੍ਜਨਾ ਸਞ੍ਜਾਤਾ ਯਸ੍ਮਿਂ ਸਜ੍ਜਿਤੋ. ਕਪ੍ਪਾ ਕਪ੍ਪਨਾ ਸਞ੍ਜਾਤਾ ਯਸ੍ਮਿਂ ਕਪ੍ਪਿਤੋ. ਏਤਸ੍ਮਾਯੇਵ ਪਾਠਾ ਸਜ੍ਜਕਪ੍ਪਾ ਸਜ੍ਜਨਾਕਪ੍ਪਨਾਨਂ ਪਰਿਯਾਯਾਤਿ ਞੇਯ੍ਯਾ.

ਹਤ੍ਥਿਨੋ ਪਾਦੇ ਵਿਜ੍ਝਨਕਣ੍ਟਕੋ ‘‘ਤੋਮਰੋ’’ਤ੍ਯੁਚ੍ਚਤੇ. ਤੁਜ੍ਜਤੇਨੇਨੇਤਿ ਤੋਮਰੋ, ਤੁਦ ਬ੍ਯਥਨੇ, ਅਰੋ, ਦਸ੍ਸ ਮੋ, ਓਤ੍ਤਂ. ਵੇਣੁਕਂਪ੍ਯਤ੍ਰ [ਕੋਤ੍ਰਂ ਵੇਣੁਕਮਾਲਾਨਂ (ਅਮਰ ੧੮.੪੧)], ਕ੍ਵਚਿ ਵੇਲ਼ੁਕਨ੍ਤਿਪਿ ਪਾਠੋ.

੩੬੭. ਹਤ੍ਥਿਨੋ ਕਣ੍ਣਮੂਲਮ੍ਹਿ ਵਿਜ੍ਝਨਕਣ੍ਟਕੋ ‘‘ਤੁਤ੍ਤ’’ਮਿਤ੍ਯੁਚ੍ਚਤੇ. ਤੁਜ੍ਜਤੇਨੇਨੇਤਿ ਤੁਤ੍ਤਂ, ਤੋ. ਹਤ੍ਥਿਨੋ ਮਤ੍ਥਕਮ੍ਹਿ ਵਿਜ੍ਝਨਕਣ੍ਟਕੋ ‘‘ਅਙ੍ਕੁਸੋ’’ਤ੍ਯੁਚ੍ਚਤੇ. ਅਙ੍ਕਤੇ ਅਨੇਨੇਤਿ ਅਙ੍ਕੁਸੋ, ਅਙ੍ਕ ਲਕ੍ਖਣੇ, ਸੋ, ਅਸ੍ਸੁ.

ਪਜ੍ਜਦ੍ਧਂ ਹਤ੍ਥਾਰੋਹੇ. ਮਡਿ ਭੂਸਾਯਂ, ਹਤ੍ਥਿਂ ਮਣ੍ਡਯਤਿ ਰਕ੍ਖਤੀਤਿ ਹਤ੍ਥਿਮਣ੍ਡੋ, ਸੋਵ ਹਤ੍ਥਿਮੇਣ੍ਡੋ, ਮਿ ਹਿਂਸਾਯਂ ਵਾ, ਡੋ, ਨਿਗ੍ਗਹੀਤਾਗਮੋ. ਹਤ੍ਥਿਂ ਪਾਤਿ ਰਕ੍ਖਤੀਤਿ ਹਤ੍ਥਿਪੋ, ਕਮ੍ਮਨਿ ਣੋ. ਹਤ੍ਥਿਂ ਗੋਪਯਤਿ ਰਕ੍ਖਤੀਤਿ ਹਤ੍ਥਿਗੋਪਕੋ. ਗੁਪ ਰਕ੍ਖਣੇ, ਸਕਤ੍ਥੇ ਕੋ. ਆਧੋਰਣੋ, ਨਿਸਾਦਿਨੋਪ੍ਯਤ੍ਰ.

੩੬੮. ਮਾਤਙ੍ਗਹਯਾਦੀਨਂ ਗਮਨਾਦਿਕ੍ਰਿਯਾਸਿਕ੍ਖਾਪਕੋ ਆਚਰਿਯੋ ‘‘ਗਾਮਣੀਯੋ’’ਤ੍ਯੁਚ੍ਚਤੇ. ਗਮਨਂ ਗਾਮੋ, ਭਾਵੇ ਣੋ. ਹਤ੍ਥਾਦੀਨਂ ਗਮਨਕ੍ਰਿਯਾ ਗਾਮੋ, ਤਂ ਨੇਤਿ ਸਿਕ੍ਖਾਪੇਤੀਤਿ ਗਾਮਣੀਯੋ, ਅਞ੍ਞਕ੍ਰਿਯਾਸਿਕ੍ਖਾਪਨੇਤੂਪਚਾਰਾ, ਗਾਮਂ ਵਾ ਹਤ੍ਥਾਦਿਸਮੂਹਂ ਨੇਤੀਤਿ ਗਾਮਣੀਯੋ, ਗਮਨਂ ਵਾ ਸਿਕ੍ਖਾਪੇਤੀਤਿ ਗਾਮਣੀਯੋ, ਸਬ੍ਬਤ੍ਰ ਨਸ੍ਸ ਣਤ੍ਤਂ.

ਪਾਦਦ੍ਵਯਂ ਅਸ੍ਸੇ. ਹਯ ਗਤਿਯਂ, ਅ. ਤੁਰਂ ਸੀਘਂ ਗਚ੍ਛਤੀਤਿ ਤੁਰਙ੍ਗੋ, ਕ੍ਵਿ, ਬਿਨ੍ਦਾਲੋਪੋ, ਲੋਪੇ ਸਤਿ ਤੁਰਗੋ. ਵਾਹ ਪਯਤਨੇ, ਅ. ਅਸ ਭਕ੍ਖਨੇ, ਅ. ਸਿਨ੍ਧੂਨਮਦੂਰਭਵੋ ਜਨਪਦੋਪਿ ਸਿਨ੍ਧਵੋ, ਤਤ੍ਰ ਭਵੋ ਸਿਨ੍ਧਵੋ, ਸਂਯੋਗਨ੍ਤਤ੍ਤਾ ਨ ਵੁਦ੍ਧਿ. ਘੋਟਕੋ, ਪੀਤਿ, ਤੁਰਙ੍ਗਮੋ, ਵਾਜੀ, ਗਨ੍ਧਬ੍ਬੋ, ਸਤ੍ਤਿਰਿਚ੍ਚਾਦੀਨਿਪਿ ਅਸ੍ਸੇ. ਘੁਟ ਪਰਿਵਤ੍ਤਨੇ, ਣ੍ਵੁ. ਪਾ ਪਾਨੇ,ਤਿ. ‘‘ਪਾਨੇ ਥੀ ਪੀਤਿ ਅਸ੍ਸੇ ਸੋ’’ਤਿ ਰੁਦ੍ਦੋ. ਵਾਜਯੋਗਾ ਵਾਜੀ, ਈ. ‘‘ਏਸਞ੍ਚ ਪੁਬ੍ਬਂ ਪਕ੍ਖੋ ਆਸਿ, ਸ ਤੁ ਦੇਵੇਤ੍ਯਤ੍ਯਤ੍ਥਿਤੇਨ ਸਾਲੀਭੂਤਮੁਨਿਨਾ ਸਕ੍ਕਂ ਪਯੋਜੇਤ੍ਵਾ ਵਜਿਰਛੇਦਿਤੋ’’ਤਿ ਨਿਕਾਯਨ੍ਤਰਿਯਾ. ਸਪ ਸਮਵਾਯੇ,ਤਿ, ਸਤ੍ਤਿ, ਸਾਮਤ੍ਥਿਯੇਪਿ.

੩੬੯. ਤਸ੍ਸ ਅਸ੍ਸਸ੍ਸ ਭੇਦੋ ਵਿਸੇਸੋ ਅਸ੍ਸਤਰੋ, ਅਸ੍ਸਂ ਤਰਤੀਤਿ ਅਸ੍ਸਤਰੋ, ਤਰ ਅਤਿਕ੍ਕਮਨੇ, ਤਰਪਚ੍ਚਯੇਨਾਪਿ ਸਿਦ੍ਧਂ. ਪਧਾਨਸ੍ਸਭੂਮਿਭਵੋ ਸੁਜਾਤਿਕੋ ਅਵਿਕਾਰੀ ਕੁਲੀਨਕੋ ਅਸ੍ਸੋ ਆਜਾਨੀਯੋ ਨਾਮ, ਆ ਭੁਸੋ ਕਾਰਣਾਕਾਰਣਂ ਜਾਨਾਤੀਤਿ ਆਜਾਨੀਯੋ, ਅਨੀਯੋ, ਣ੍ਯਪਚ੍ਚਯੇਨ ਵਾ ਸਿਦ੍ਧਂ, ਤਦਾ ‘‘ਕਿਯਾਦਿਤੋ ਨਾ’’ਤਿ ਨਾਗਮੋ, ਈਕਾਰਾਗਮੋ ਚ [ਚਿਨ੍ਤਾਮਣਿਟੀਕਾ ੧੮.੪੪ ਗਾਥਾਯਮ੍ਪਿ ਪਸ੍ਸਿਤਬ੍ਬਂ]. ਕੁਲੇ ਸਮ੍ਭੂਤੋ ਕੁਲੀਨਕੋ, ਈਨੋ, ਸਕਤ੍ਥੇ ਕੋ. ਸਙ੍ਗਾਮੇ ਗਰੁਸਤ੍ਥਪ੍ਪਹਾਰੇਨ ਨਿਹਤੋ ਸਨ੍ਤੋ ਪਿਯੋ ਸਾਮਿਕਂ ਨ ਜਹਤਿ ਸੁਖਂ ਵਹਨਸੀਲੋ ਯੋ ਅਸ੍ਸੋ, ਸੋ ਵਿਨੀਤਸਦ੍ਦੇਨੋਚ੍ਚਤੇ. ਵਿਸੇਸੇਨ ਦਮ੍ਮਤਂ ਨੇਤਿ ਯਨ੍ਤਿ ਵਿਨੀਤੋ.

ਦ੍ਵਯਂ ਅਸ੍ਸਪੋਤੇ. ਕਸ ਗਮਨੇ, ਓਰੋ, ਅਸ੍ਸਿ, ਕਿਞ੍ਚਿ ਸਰਤੀਤਿ ਵਾ ਕਿਸੋਰੋ, ਬਿਨ੍ਦੁਲੋਪੋ, ਅਸ੍ਸੋ ਚ, ਹਯੋ ਏਵ ਬਾਲਤ੍ਤਾ ਹਯਪੋਤਕੋ, ਅਪ੍ਪਤ੍ਥੇ ਕੋ.

੩੭੦. ਦ੍ਵਯਂ ਅਥਾਮਸ੍ਸੇ. ਘੁਟ ਪਰਿਵਤ੍ਤਨੇ, ਣ੍ਵੁ, ਘੋਟਕੋ, ਅਸ੍ਸਸਾਮਞ੍ਞੇਪ੍ਯਯਂ, ਖਰਂ ਗਚ੍ਛਤੀਤਿ ਖਲੁਙ੍ਗੋ, ਸੋ ਏਵ ਖਲ਼ੁਙ੍ਕੋ, ਗਕਾਰਸ੍ਸ ਕਕਾਰਂ ਕਤ੍ਵਾ, ਰਸ੍ਸ ਲੋ, ਲ਼ਤ੍ਤਮੁਤ੍ਤਞ੍ਚ, ਖਲ਼ੁਕੋਤਿਪਿ. ਜਵੇਨ ਸਬ੍ਬੇਸਮਧਿਕੋ ਅਸ੍ਸੋ ਜਵਨੋ, ਯੁ.

ਦ੍ਵਯਂ ਕਵੀਤਿਖ੍ਯਾਤੇ ਮੁਖਬਨ੍ਧਨੇ. ਮੁਖਮਾਤਿਟ੍ਠਤੀਤਿ ਮੁਖਾਠਾਨਂ. ਖੇ ਮੁਖਵਿਵਰੇ ਲੀਨੋ ਖਲੀਨੋ. ‘‘ਕਵਿਕਾ ਤੁ ਖਲੀਨੋਤਿ [ਖਲੀਨੇ ਥੀ (?)], ਕਵਿਯਂ ਕਥਨਂਤ੍ਯਪੀ’’ਤਿ ਰਭਸੋ. ਕਵਿ, ਕਵਿਕਾਪ੍ਯਤ੍ਰ. ਕੁ ਸਦ੍ਦੇ. ਇ, ਈ ਚ, ਸਕਤ੍ਥੇ ਕੋ. ਵਾਸਦ੍ਦੇਨ ਨਪੁਂਸਕਤ੍ਤਂ ਸਮੁਚ੍ਚਿਨੋਤਿ. ਵੁਤ੍ਤਞ੍ਚ ਅਮਰਕੋਸੇ ‘‘ਕਵਿਕਾ ਤੁ ਖਲੀਨੋ’ਨਿਤ੍ਥੀ’’ਤਿ [ਅਮਰ ੧੮.੪੯].

ਅਸ੍ਸਾਭਿਤਾਲ਼ਿਨੀ ਵੇਤ੍ਤਵਿਕਤਾਦਿ ਕਸਾ ਨਾਮ. ਕਸ ਗਮਨੇ, ਅ, ਕਰਣਸਾਧਨਂ.

੩੭੧. ਅਸ੍ਸਸ੍ਸ ਨਾਸਾਗਤਰਜ੍ਜੁਮ੍ਹਿ ਕੁਸਾ, ਕੁਸ ਸਿਲੇਸਨੇ. ਦ੍ਵਯਂ ਅਸ੍ਸਾਯਂ. ਵਲ ਸਂਵਰਣੇ, ਵੋ, ਲ਼ਤ੍ਤਂ, ਆ, ਵਲ਼ਵਾ. ਅਸਤੀਤਿ ਅਸ੍ਸਾ, ‘‘ਇਤ੍ਥਿਯਮਤਿਯਵੋ ਵਾ’’ਤਿ ਅ, ਆ ਚ, ਅਸ੍ਸਾ. ਵਾਮੀਪ੍ਯਤ੍ਰ. ਦ੍ਵਯਂ ਖੁਰੇ. ਖੁਰ ਛੇਦਨੇ. ਸਂ ਸੁਖਂ ਫਰਤ੍ਯਨੇਨ ਸਫਂ, ਨੇਰੁਤ੍ਤੋ. ‘‘ਸਫਂ ਕ੍ਲੀਵੇ ਖੁਰੋ ਪੁਮਾ’’ਤਿ [ਅਮਰ ੧੮.੪੯] ਅਮਰਕੋਸੋ.

ਦ੍ਵਯਂ ਪੁਚ੍ਛਮਤ੍ਤੇ. ਪੁਚ੍ਛ ਪਮਾਦੇ. ਨ ਗਚ੍ਛਤੀਤਿ ਨਙ੍ਗੁਟ੍ਠੋ, ਅਙ੍ਗ ਗਮਨੇ, ਠੋ, ਅਸ੍ਸੁ, ਦ੍ਵੇਪਿ ਅਨਿਤ੍ਥਿਯਂ. ਲੂਮਂਪ੍ਯਤ੍ਰ. ਦ੍ਵਯਂ ਕੇਸਵਤਿ ਨਙ੍ਗੁਟ੍ਠਮਤ੍ਤੇ, ਨ ਤੁ ਹਤ੍ਥਿਨੋ ਏਵ. ਵਾਲਸਮੂਹਯੋਗਾ ਵਾਲਹਤ੍ਥੋ, ਯਥਾ ਕੇਸਹਤ੍ਥੋ ਚਯੇ, ਤਥਾਤ੍ਰਾਪਿ. ਵਾਲੋ ਧਿਯ੍ਯਤੇ ਅਸ੍ਮਿਨ੍ਤਿ ਵਾਲਧਿ, ਇ.

ਏਤ੍ਥਾਨਾਗਤਾਪਿ ਅਸ੍ਸਸ੍ਸ ਧਾਰਾਖ੍ਯਾ [ਧਾਵਾਖ੍ਯਾ (ਕ.)] ਪਞ੍ਚ ਗਤਿਯੋ ਕਥੇਤਬ੍ਬਾ. ਯਥਾ –

ਅਕ੍ਕਨ੍ਦਿਤਂ ਧੋਰਿਤਕਂ, ਰੇਚਿਤਂ ਵਗ੍ਗਿਤਂ ਪ੍ਲੁਤਂ;

ਗਤਿਯੋਮੇ ਪਞ੍ਚ ਧਾਰਾ [ਧਾਵਾ (ਕ.)], ਅਸ੍ਸਾਨਂ ਵਿਞ੍ਞੁਨਾ ਮਤਾ [ਅਮਰ ੧੮.੪੮-੯].

ਤਤ੍ਥ ਵਿਤ੍ਥਮ੍ਭਾ ਸਮਾਵਗਤਿ ਅਕ੍ਕਨ੍ਦਿਤਂ, ਕਨ੍ਦਿ ਗਤਿਸੋਸਨੇਸੁ, ਤੋ. ਤਤੋ ਅਧਿਕਾ ਚਤੁਰਾਗਤਿ ਧੋਰਿਤਕਂ, ਧੋਰ ਗਤਿਚਾਤੁਰਿਯੇ, ਤੋ, ਸਕਤ੍ਥੇ ਕੋ. ਮਣ੍ਡਲਿਕਾਯਾਨੇਨ ਗਮਨਂ ਰੇਚਿਤਂ, ਰਿਚ ਵਿਯੋਜਨਸਮ੍ਬਜ੍ਝਨੇਸੁ, ਸਮ੍ਬਜ੍ਝਨਂ ਮਿਸ੍ਸਨਂ. ਵੇਗੇਨ ਪਰਿਕ੍ਖਿਤ੍ਤੋ ਪਰਿਚਰਣਂ ਵਗ੍ਗਿਤਂ, ਵਗ੍ਗ ਗਮਨਤ੍ਥੋ. ਤੁਰਂ ਸਮੇਨ ਗਮਨਂ ਪ੍ਲੁਤਂ, ਪ੍ਲੁ ਗਤਿਯਂ. ਤ’ਦੁਤ੍ਤ’ਮਸ੍ਸਸਤ੍ਥੇ ‘‘ਸਮੋ’ਧਿਕੋ ਲਯੋ ਵੇਗੀ, ਤੁਰਿਤਸ੍ਸੋ ਭਵੇ ਕਮਾ’’ਤਿ.

੩੭੨. ਦ੍ਵਯਂ ਯੁਦ੍ਧਤ੍ਥੇ ਚਕ੍ਕਯੁਤ੍ਤਯਾਨੇ. ਸਨ੍ਦ ਗਮਨੇ, ਸਨ੍ਦਤੇ ਗਮ੍ਯਤੇਨੇਨੇਤਿ ਸਨ੍ਦਨੋ, ਯੁ. ਰਮਤੇਨੇਨੇਤਿ ਰਥੋ, ਥੋ, ਮਲੋਪੋ. ਸਤਙ੍ਗੋਪ੍ਯਤ੍ਰ. ਸਤਮਙ੍ਗਾਨ੍ਯਸ੍ਸ.

ਯਂ ਨ ਰਣਾਯ ਯੁਦ੍ਧਤ੍ਥਂ ਚਕ੍ਕਯੁਤ੍ਤਂ ਯਾਨਂ, ਅਪਿ ਤੁ ਕੀਲ਼ਾਭਮਨਾਦ੍ਯਤ੍ਥਂ, ਸੋ ਪੁਸ੍ਸਰਥੋ. ਵੁਤ੍ਤਞ੍ਚ ਅਮਰਕੋਸੇ ‘‘ਅਯਂ ਪੁਸ੍ਸਰਥੋ ਚਕ੍ਕ-ਯਾਨਂ ਨ ਸਮਰਾਯ ਯ’’ਨ੍ਤਿ [ਅਮਰ ੧੮.੫੧]. ਪੁਸ ਪਾਸਨੇ, ਸੋ, ਪੁਸਨਾਮਕੇਨ ਫਲਵਿਸੇਸੇਨ ਯੁਤ੍ਤੋ ਰਥੋ ਪੁਸ੍ਸਰਥੋ, ਪੁਸ੍ਸਨਕ੍ਖਤ੍ਤੇਨ ਕਤੋ, ਸਜ੍ਜਿਤੋ ਵਾ ਰਥੋਤਿ ਪੁਸ੍ਸਰਥੋ.

ਬ੍ਯਗ੍ਘਸ੍ਸ ਚਮ੍ਮਾਵੁਤੋ ਪਰਿਕ੍ਖਿਤ੍ਤੋ ਰਥੋ ਵੇਯ੍ਯਗ੍ਘੋ ਨਾਮ, ਬ੍ਯਗ੍ਘਸ੍ਸ ਵਿਕਾਰੋ ਚਮ੍ਮਂ ਵੇਯ੍ਯਗ੍ਘਂ, ਣੋ, ਤੇਨ ਪਰਿਵੁਤੋ ਰਥੋ ਵੇਯ੍ਯਗ੍ਘੋ, ਣੋ, ਉਭਯਤ੍ਰਾਪਿ ਵੁਡ੍ਢਾਗਮੋ. ‘‘ਪਚ੍ਚਤ੍ਤਂ [ਪਚ੍ਚਤ੍ਥਂ (ਕ.)] ਅਯਨ੍ਤਿ ਗਚ੍ਛਨ੍ਤੀਤਿ ਪਚ੍ਚਯਾ’’ਤਿ ਵਚਨਤ੍ਥਤੋ ਪਚ੍ਚਤ੍ਤਮੇਵ [ਪਚ੍ਚਤ੍ਥਮੇਵ (?)] ਪਚ੍ਚਯਾ ਭਵਨ੍ਤਿ, ਯਥਾ ਕਾਰਿਤਨ੍ਤਸ੍ਮਾਪਿ ਪਯੋਜਕਵਸੇਨ ਅਨੇਕਕਾਰਿਤਪਚ੍ਚਯਾ. ਦੀਪਿਨੋ ਚਮ੍ਮਾਵੁਤੋ ਰਥੋ ਦੀਪੋ ਨਾਮ, ਦੀਪਿਨੋ ਵਿਕਾਰੋ ਚਮ੍ਮਂ ਦੀਪਂ, ਣੋ, ਤੇਨ ਪਰਿਵੁਤੋ ਰਥੋ ਦੀਪੋ, ਣੋ.

੩੭੩. ਦ੍ਵਯਂ ਪੁਰਿਸਯੁਤ੍ਤਯਾਨੇ. ਸਿ ਸੇਵਾਯਂ. ਸੁਖਤ੍ਥਿਕੇਹਿ ਸੇਵੀਯਤੇਤਿ ਸਿਵਿਕਾ, ਣ੍ਵੁ, ਵਾਗਮੋ, ਇਤ੍ਤਂ, ਕਿਤਪਚ੍ਚਯਾ ਹਿ ਯੇਭੁਯ੍ਯੇਨ ਕਮ੍ਮਾਦੀਸੁਪਿ ਵਤ੍ਤਨ੍ਤਿ, ਕਿਚ੍ਚਪਚ੍ਚਯਾ ਚ ਕਤ੍ਤਰਿਪਿ, ਯਥਾ ‘‘ਵਿਨਯੋ, ਨਿਸ੍ਸਯੋ, ਤਪਨੀਯਾ ਧਮ੍ਮਾ’’ਤ੍ਯਾਦੀਸੁ, ਮਹਾਪਦੇਸੇਨ ਵਾ ਕਿਤਕਿਚ੍ਚਪਚ੍ਚਯਾਨਂ ਕਤ੍ਤੁਕਮ੍ਮਾਦੀਸ੍ਵਪਿ ਪਵਤ੍ਤਿ ਵੇਦਿਤਬ੍ਬਾ, ਸਿਵਂ ਕਰੋਤੀਤਿ ਵਾ ਸਿਵਿਕਾ, ਇਕੋ. ਯਾਪ੍ਯੇਹਿ ਅਧਮੇਹਿ ਯਾਯਤੇ ਨਿਯ੍ਯਤੇਤਿ ਯਾਪ੍ਯਯਾਨਂ. ‘‘ਯਾਪ੍ਯ ਪਾਨੀਯਕੇ ਨਿਨ੍ਦ੍ਯੇ’’ਤਿ ਹਿ ਨਾਨਤ੍ਥਸਙ੍ਗਹੇ.

ਦ੍ਵਯਂ ਸਕਟੇ. ਅਨਿਤ੍ਥੀ ਤੂਤਿ ਤ੍ਵਨ੍ਤਂ ਲਿਙ੍ਗਪਦਂ. ਸਕ ਸਤ੍ਤਿਯਂ, ਅਟੋ. ਅਨ ਪਾਣਨੇ, ਕਰਣਸਾਧਨਂ, ਨਤ੍ਥਿ ਨਾਸਾ ਯਸ੍ਸਾਤਿ ਵਾ ਅਨਂ, ਸਾਲੋਪੋ, ਰਸ੍ਸੋ ਚ. ਕ੍ਲੀਵੇ’ਨਂ, ਸਕਟੋ, ਨਿਤ੍ਥੀਤ੍ਯਮਰਕੋਸੋ [ਅਮਰ ੧੮.੫੨].

ਦ੍ਵਯਂ ਚਕ੍ਕੇ. ਕਰੋਤਿ ਗਮਨਮਨੇਨੇਤਿ ਚਕ੍ਕਂ, ਦ੍ਵਿਤ੍ਤਂ, ਚਕ੍ਕਾਦਿ. ਰਥਸ੍ਸ ਅਙ੍ਗਂ ਰਥਙ੍ਗਂ. ਤਸ੍ਸ ਚਕ੍ਕਸ੍ਸ ਅਨ੍ਤੋ ਅਵਸਾਨਂ ਨੇਮਿ, ਸਾ ਨਾਰਿਯਂ ਇਤ੍ਥਿਯਂ. ਨਯਤਿ ਚਕ੍ਕਂ ਨੇਮਿ. ਯਾ ਭੂਮਿਂ ਫੁਸਤਿ, ਨੀ ਨਯੇ, ਮਿ, ਈਪਚ੍ਚਯੇ ਨੇਮੀ ਚ. ਪਧਿਪ੍ਯਤ੍ਰ.

੩੭੪. ਤਮ੍ਮਜ੍ਝੇ ਤਸ੍ਸ ਰਥਸ੍ਸ, ਚਕ੍ਕਸ੍ਸ ਵਾ ਮਜ੍ਝੇ ਚਕ੍ਕਾਕਾਰੋ ਪਿਣ੍ਡਿਕਾ, ਯਸ੍ਸਂ ਸਬ੍ਬਾਨਿ ਕਟ੍ਠਾਨਿ ਆਸਜ੍ਜਨ੍ਤੇ. ਪਿਣ੍ਡਿਕਾਸਾਹਚਰਿਯਾ ਨਾਭਿ ਇਤ੍ਥੀ, ਈਪਚ੍ਚਯੇ ਨਾਭੀ ਚ. ਸਬ੍ਬਾਨਿ ਕਟ੍ਠਾਨਿ ਪਿਣ੍ਡੇਤੀਤਿ ਪਿਣ੍ਡਿਕਾ, ਪਿਣ੍ਡ ਸਙ੍ਘਾਤੇ, ਅ, ਸਕਤ੍ਥੇ ਕੋ. ਪਿਣ੍ਡੀਪਿ, ਨਾਭਿ ਵਿਯਾਤਿ ਨਾਭਿ.