੩. ਨਰਵਗ੍ਗਵਣ੍ਣਨਾ
੨੨੭-੨੨੮. ਪੋਰਿਸਨ੍ਤਾਨਿ ਮਨੁਸ੍ਸਜਾਤਿਯਾ ਨਾਮਾਨਿ. ਮਨੋ ਉਸ੍ਸਨ੍ਨਮਸ੍ਸਾਤਿ ਮਨੁਸ੍ਸੋ, ਸਤਿਸੂਰਭਾਵਬ੍ਰਹ੍ਮਚਰਿਯਯੋਗ੍ਯਤਾਦਿਗੁਣਵਸੇਨ ਉਪਚਿਤਮਾਨਸਾ ਉਕ੍ਕਟ੍ਠਗੁਣਚਿਤ੍ਤਾ, ਕੇ ਪਨ ਤੇ? ਜਮ੍ਬੁਦੀਪਵਾਸਿਨੋ ਸਤ੍ਤਵਿਸੇਸਾ. ਤੇਨਾਹ ਭਗਵਾ – ‘‘ਤੀਹਿ, ਭਿਕ੍ਖਵੇ, ਠਾਨੇਹਿ ਜਮ੍ਬੁਦੀਪਕਾ ਮਨੁਸ੍ਸਾ ਉਤ੍ਤਰਕੁਰੁਕੇ ਮਨੁਸ੍ਸੇ ਅਧਿਗ੍ਗਣ੍ਹਨ੍ਤਿ ਦੇਵੇ ਚ ਤਾਵਤਿਂਸੇ. ਕਤਮੇਹਿ ਤੀਹਿ, ਸੂਰਾ ਸਤਿਮਨ੍ਤੋ ਇਧ ਬ੍ਰਹ੍ਮਚਰਿਯਵਾਸੋ’’ਤਿ [ਅ. ਨਿ. ੯.੨੧]. ਤਥਾ ਹਿ ਬੁਦ੍ਧਾ ਭਗਵਨ੍ਤੋ ਪਚ੍ਚੇਕਬੁਦ੍ਧਾ ਅਗ੍ਗਸਾਵਕਮਹਾਸਾਵਕਚਕ੍ਕਵਤ੍ਤਿਨੋ ਚ ਅਞ੍ਞੇ ਚ ਮਹਾਨੁਭਾਵਾ ਸਤ੍ਤਾ ਤਤ੍ਥੇਵ ਉਪ੍ਪਜ੍ਜਨ੍ਤਿ. ਸਮਾਨਰੂਪਾਦਿਤਾਯ ਪਨ ਸਦ੍ਧਿਂ ਪਰਿਤ੍ਤਦੀਪਵਾਸੀਹਿ ਇਤਰਮਹਾਦੀਪਵਾਸਿਨੋਪਿ ਮਨੁਸ੍ਸਾਤ੍ਵੇਵ ਪਞ੍ਞਾਯਿਂਸੂਤਿ ਏਕੇ, ਅਪਰੇ ਪਨ ਭਣਨ੍ਤਿ ‘‘ਲੋਭਾਦੀਹਿ, ਅਲੋਭਾਦੀਹਿ ਚ ਸਹਿਤਸ੍ਸ ਮਨਸ੍ਸ ਉਸ੍ਸਦਤਾਯ ਮਨੁਸ੍ਸਾ, ਯੇ ਹਿ ਸਤ੍ਤਾ ਮਨੁਸ੍ਸਜਾਤਿਕਾ, ਤੇਸੁ ਵਿਸੇਸਤੋ ਲੋਭਾਦਯੋ, ਅਲੋਭਾਦਯੋ ਚ ਉਸ੍ਸਦਾ, ਤੇ ਲੋਭਾਦੀਹਿ ਉਸ੍ਸਦਤਾਯ ਅਪਾਯਮਗ੍ਗਂ, ਅਲੋਭਾਦੀਹਿ ਉਸ੍ਸਦਤਾਯ ਸੁਗਤਿਮਗ੍ਗਂ, ਨਿਬ੍ਬਾਨਗਾਮਿਮਗ੍ਗਞ੍ਚ ਪੂਰੇਨ੍ਤਿ, ਤਸ੍ਮਾ ਲੋਭਾਦੀਹਿ, ਅਲੋਭਾਦੀਹਿ ਚ ਸਹਿਤਸ੍ਸ ਮਨਸ੍ਸ ਉਸ੍ਸਦਤਾਯ ਪਰਿਤ੍ਤਦੀਪਵਾਸੀਹਿ ਸਦ੍ਧਿਂ ਚਤੁਮਹਾਦੀਪਵਾਸਿਨੋ ਸਤ੍ਤਵਿਸੇਸਾ ਮਨੁਸ੍ਸਾਤਿ ਵੁਚ੍ਚਨ੍ਤੀ’’ਤਿ. ਲੋਕਿਯਾ ਪਨ ਮਨੁਨੋ ਅਪਚ੍ਚਭਾਵੇਨ ਮਨੁਸ੍ਸਾਤਿ ਵਦਨ੍ਤਿ, ਮਨੁ ਨਾਮ ਪਠਮਕਪ੍ਪਿਕੋ ਲੋਕਮਰਿਯਾਦਾਯ ਆਦਿਭੂਤੋ ਹਿਤਾਹਿਤਵਿਧਾਯਕੋ ਸਤ੍ਤਾਨਂ ਪਿਤੁਟ੍ਠਾਨਿਯੋ, ਯੋ ਸਾਸਨੇ ‘‘ਮਹਾਸਮ੍ਮਤੋ’’ਤਿ ਵੁਚ੍ਚਤਿ, ਪਚ੍ਚਕ੍ਖਤੋ, ਪਰਮ੍ਪਰਤਾਯ ਚ ਤਸ੍ਸ ਓਵਾਦਾਨੁਸਾਸਨਿਯਂ ਠਿਤਾ ਤਸ੍ਸ ਪੁਤ੍ਤਸਦਿਸਤਾਯ ਮਨੁਸ੍ਸਾਤਿ ਵੁਚ੍ਚਨ੍ਤਿ, ਤਤੋ ਏਵ ਹਿ ਤੇ ‘‘ਮਾਨਵਾ, ਮਨੁਜਾ’’ਤਿ ਚ ਵੋਹਰੀਯਨ੍ਤਿ, ਉਸ੍ਸਪਚ੍ਚਯੋ. ਮਨੁਨੋ ਅਪਚ੍ਚਂ ਮਾਨੁਸੋ, ਉਸੋ. ਮਰ ਪਾਣਚਾਗੇ, ਚੋ, ਮਚ੍ਚੋ, ਪਬ੍ਬਜ੍ਜਾਦਿਨਾ ਵਾ ਤ੍ਯਪਚ੍ਚਯੋ, ਧਾਤ੍ਵਨ੍ਤਸ੍ਸ ਲੋਪੋ ਚ. ਤਤੋ ‘‘ਯਵਤ’’ਮਿਚ੍ਚਾਦਿਨਾ ਚੋ, ਦ੍ਵਿਤ੍ਤਂ. ਮਨੁਨੋ ਅਪਚ੍ਚਂ ਮਾਨਵੋ. ਮਾਣਵੋਪ੍ਯਤ੍ਰ, ਣਵੋ. ਮਨੁਮ੍ਹਾ ਜਾਤੋ ਮਨੁਜੋ. ਨੀ ਨਯੇ, ਨੇਤੀਤਿ ਨਰੋ, ਅਰੋ. ਪੁਸ ਪੋਸਨੇ, ਣੋ, ਪੁਰੇਤੀਤਿ ਵਾ ਪੋਸੋ. ਪੁਰ ਪੂਰਣੇ, ਸੋ, ਉਸ੍ਸੋਤ੍ਤਂ, ਰਲੋਪੋ. ਪੁਨਾਤੀਤਿ ਪੁਮਾ,ਪੁ ਪਵਨੇ, ਮੋ, ਸਿਸ੍ਸਾ. ਪੁਰੇਤੀਤਿ ਪੁਰਿਸੋ, ਪੋਰਿਸੋ ਚ, ਇਸੋ, ਰਸ੍ਸਸ੍ਸ ਦੀਘਤਾਯ ਪੂਰਿਸੋ ਚ. ਏਤ੍ਥ ਚ ਮਨੁਸ੍ਸਾਦਿਪਞ੍ਚਕਂ ਇਤ੍ਥਿਯਮ੍ਪਿ ਵਤ੍ਤਤੇ, ਨਰਾਦਯੋ ਤੁ ਪੁਮੇਯੇਵ ਵਿਸਿਟ੍ਠਲਿਙ੍ਗਤ੍ਤਾ. ਤਤ੍ਰ ਮਨੁਸ੍ਸ ਮਾਨੁਸ ਮਨੁਜ ਮਾਣਵੇਹਿ ਨਦਾਦਿਤ੍ਤਾ ਈਪਚ੍ਚਯੋ, ਏਕਸਕਾਰਲੋਪੋ, ਮਨੁਸੀ, ਮਾਨੁਸੀ, ਮਨੁਜੀ, ਮਾਣਵੀ. ਮਚ੍ਚਾ, ਇਤ੍ਥਿਯਮਤੋ ਆਪਚ੍ਚਯੋ.
ਵਿਦ੍ਦਸੁਪਰਿਯਨ੍ਤਂ ਪਣ੍ਡਿਤੇ. ਪਣ੍ਡਾ ਬੁਦ੍ਧਿ ਸਞ੍ਜਾਤਾ ਅਸ੍ਸਾਤਿ ਪਣ੍ਡਿਤੋ, ਤਰਤ੍ਯਾਦਿ. ਪਡਿ ਗਤਿਯਂ ਵਾ, ਤੋ. ਬੁਜ੍ਝਤੀਤਿ ਬੁਧੋ. ਵਿਦਤਿ ਜਾਨਾਤੀਤਿ ਵਿਦ੍ਵਾ, ਵਿਦ ਞਾਣੇ, ਵੋ, ਸਿਸ੍ਸਾ. ਭੂ ਸਤ੍ਤਾਯਂ, ਅਤ੍ਥੇ ਵਿਭਾਵੇਤਿ ਪਕਾਸੇਤਿ ਸੀਲੇਨਾਤਿ ਵਿਭਾਵੀ, ਣੀ. ਰਾਗਾਦਯੋ ਸਮੇਤੀਤਿ ਸਨ੍ਤੋ, ਤੋ, ਸੁਨ੍ਦਰੋ ਅਨ੍ਤੋ ਅਵਸਾਨਮੇਤਸ੍ਸਾਤਿ ਵਾ ਸਨ੍ਤੋ. ਸੁਨ੍ਦਰਾ ਪਞ੍ਞਾ ਯਸ੍ਸ ਸਪ੍ਪਞ੍ਞੋ. ਕਿਨ੍ਨਾਮ ਨ ਵਿਨ੍ਦਤੀਤਿ ਕੋਵਿਦੋ, ਨੇਰੁਤ੍ਤੋ, ਕੁਂ ਪਾਪਂ ਵਿਨ੍ਦਤੀਤਿ ਵਾ ਕੋਵਿਦੋ. ਧੀ ਪਞ੍ਞਾ ਯਸ੍ਸਤ੍ਥੀਤਿ ਸੋ ਧੀਮਾ, ਸੋਭਨਂ ਝਾਯਤੀਤਿ ਸੁਧੀ, ਝੇ ਚਿਨ੍ਤਾਯਂ. ਝਸ੍ਸ ਧੋ, ਈ, ਸੁਨ੍ਦਰਾ ਧੀ ਯਸ੍ਸਾਤਿ ਵਾ ਸੁਧੀ. ਕਵਿ ਵਣ੍ਣੇ, ਇ, ਇਤ੍ਥਿਯਂ ਕਵੀ ਚ, ਕੁ ਸਦ੍ਦੇ ਵਾ, ਇ, ਕਵਿ. ਬ੍ਯਞ੍ਜਯਤੀਤਿ ਬ੍ਯਤ੍ਤੋ, ਅਞ੍ਜ ਗਤਿਯਂ, ਤੋ. ਭੁਜਾਦੀਨਮਨ੍ਤੋ ਨੋ ਦ੍ਵਿ ਚ. ਵਿਸਿਟ੍ਠੋ ਅਤ੍ਤਾ ਯਸ੍ਸਾਤਿ ਵਾ ਬ੍ਯਤ੍ਤੋ. ਚਕ੍ਖ ਦਸ੍ਸਨੇ, ਯੁ, ਵਿਚਕ੍ਖਣੋ, ਵਿਚਾਰੇਤੀਤਿ ਵਾ ਵਿਚਕ੍ਖਣੋ, ਨੇਰੁਤ੍ਤੋ. ਵਿਗਤੋ ਸਾਰਦੋ ਏਤਸ੍ਮਾਤਿ ਵਿਸਾਰਦੋ.
੨੨੯. ਮੇਧਾ ਧਾਰਣਾ ਮਤਿ ਪਞ੍ਞਾ ਯਸ੍ਸਾਤਿ ਮੇਧਾਵੀ, ਵੀ. ਅਤਿਸਯਮਤਿਯੁਤ੍ਤਤਾਯ ਮਤਿਮਾ. ਪਞ੍ਞਾਯ ਯੋਗਤੋ ਪਞ੍ਞੋ. ਵਿਸੇਸਂ ਜਾਨਾਤਿ ਸੀਲੇਨਾਤਿ ਵਿਞ੍ਞੂ, ਰੂ. ਵਿਦ ਞਾਣੇ, ਉਰੋ, ਵਿਦੁਰੋ [ਵਿਦੂਰੋ (ਕ.)]. ਰੂਪਚ੍ਚਯੇ ਵਿਦੂ. ਧੀਯੋਗਾ ਧੀਰੋ, ਰੋ. ਵਿਸਿਟ੍ਠਦਸ੍ਸਨਸੀਲਤਾਯ ਵਿਪਸ੍ਸੀ, ਣੀ. ਦੋਸਂ ਜਾਨਾਤੀਤਿ ਦੋਸਞ੍ਞੂ, ਰੂ. ਬੁਜ੍ਝਤੀਤਿ ਬੁਦ੍ਧੋ, ਤੋ. ਦੁ ਗਤਿਯਂ, ਅ, ਉਸ੍ਸਾਵੋ [ਦੁ ਗਤਿਯਂ ਅਬ੍ਬੋ (ਸੂਚਿ)], ਦਬ੍ਬੋ. ਵਿਦ ਞਾਣੇ, ਦਸੁ.
੨੩੦-੨੩੧. ਮਹਿਲਾਨ੍ਤਂ ਇਤ੍ਥਿਸਾਮਞ੍ਞੇ. ਇਸੁ ਇਚ੍ਛਾਯਂ, ਤੋ, ਨਦਾਦਿ. ਸੀਮਸ੍ਸ ਅਨ੍ਤੋ ਸੀਮਨ੍ਤੋ, ਕੇਸਵੇਸੋ, ਤਂਯੋਗਾ ਸੀਮਨ੍ਤਿਨੀ, ਇਨੀ. ਨਰਸ੍ਸਾਯਂ ਨਾਰੀ, ਇਦਮਤ੍ਥੇ ਣੋ. ਤਿਟ੍ਠਤਿ ਗਬ੍ਭੋ ਯਸ੍ਸਂ, ਸਾ ਥੀ. ਧਾ ਧਾਰਣੇ ਵਾ, ਵਣ੍ਣਵਿਕਾਰੋ, ਈ. ਬਨ੍ਧ ਬਨ੍ਧਨੇ, ਊ, ਬਨ੍ਧਸ੍ਸ ਵਧਾਦੇਸੋ ਚ [ਣ੍ਵਾਦਿ ੩], ਵਧੂਸਦ੍ਦੋ ਸੁਣਿਸਾਭਰਿਯਾਨਮ੍ਪਿ ਵਾਚਕੋ. ਵਨ ਸਮ੍ਭਤ੍ਤਿਯਂ, ਤੋ, ਇਕਾਰਾਗਮੋ ਚ. ਅਙ੍ਗ ਗਮਨਤ੍ਥੋ, ਯੁ, ਅਙ੍ਗਨਾ, ਵਿਸਿਟ੍ਠਨਾਰਿਯਮ੍ਪਿ ਅਙ੍ਗਨਾ, ਤਦਾ ਕਲ੍ਯਾਣਙ੍ਗਨਾਰੀਲਕ੍ਖਣੋਪੇਤਂ ਪਸਤ੍ਥਂ ਹਤ੍ਥਪਾਦਾਦਿਕਮਙ੍ਗਮਸ੍ਸਤ੍ਥੀਤਿ ਅਸ੍ਸਤ੍ਥ੍ਯਤ੍ਥੇ ਅਙ੍ਗਾ ਕਲ੍ਯਾਣੇ ਨਪਚ੍ਚਯੋ [ਮੋਗ੍ਗਲ੍ਲਾਨ ੪.੯੨]. ਵਿਰੂਪੇਸੁਪਿ ਮਦੋ ਰਾਗਮਦੋ ਯਸ੍ਸਾ ਸਾ ਪਮਦਾ, ਵਿਸਿਟ੍ਠਨਾਰਿਯਂਪ੍ਯਤ੍ਰ ਪਮਦਾ, ਤਦਾ ਪਕਟ੍ਠੋ ਮਦੋ ਰੂਪਸੋਭਗ੍ਗਜਨਿਤੋ ਚੇਤੋਵਿਕਾਰੋ ਯਸ੍ਸਾ ਸਾ ਪਮਦਾ. ਰੂਪਲਾਵਣ੍ਯਸਮ੍ਪਨ੍ਨਤਾਯ ਸੁਨ੍ਦਰੀ, ਵਿਸਿਟ੍ਠਾਯਮ੍ਪਿ. ਕਮਨੀਯਵੁਤ੍ਤਿਤਾਯ ਕਨ੍ਤਾ, ਕਮੁ ਕਨ੍ਤਿਯਂ, ਤੋ. ਕਨ੍ਤਿਯੋਗਾ ਵਾ ਕਨ੍ਤਾ, ਵਿਸਿਟ੍ਠਾਯਮ੍ਪਿ. ਰਮਯਤਿ ਵਿਨੋਦਯਤਿ ਨਾਯਕਂ, ਸਾ ਰਮਣੀ, ਨਨ੍ਦਾਦੀਹਿ ਯੁ, ਨਦਾਦਿ, ਵਿਸਿਟ੍ਠਾਯਮ੍ਪਿ. ਦਯ ਰਕ੍ਖਣੇ, ਕਮ੍ਮਨਿ ਤੋ. ਅਪ੍ਪਂ ਬਲਂ ਯਸ੍ਸਾ ਸਾ ਅਬਲਾ, ਅਪ੍ਪਤ੍ਥੋਯਂ ਅਕਾਰੋ. ਮਾਤੁਯਾ ਗਾਮੋ ਵਿਯ ਗਾਮੋ ਯਸ੍ਸਾ ਸਾ ਮਾਤੁਗਾਮੋ, ਮਾਤਾ ਵਿਯ ਗਚ੍ਛਤੀਤਿ ਵਾ ਮਾਤੁਗਾਮੋ, ਗਮੁ ਗਮਨੇ, ਣੋ, ਮਾਤਾ ਵਿਯ ਗਸਤੀਤਿ ਵਾ ਮਾਤੁਗਾਮੋ, ਗਸ ਅਦਨੇ, ਮੋ, ਮਾਤਾ ਵਿਯ ਗਾਯਤੀਤਿ ਵਾ ਮਾਤੁਗਾਮੋ, ਗਾ ਸਦ੍ਦੇ, ਮੋ. ਮਹੀ ਵਿਯ ਸੁਚਿਂ ਅਸੁਚਿਮ੍ਪਿ ਲਾਤੀਤਿ ਮਹਿਲਾ, ਮਹਨ੍ਤੇਸੁ ਬਹੂਸੁਪਿ ਰਤ੍ਤਚਿਤ੍ਤੇਸੁ ਇਲਤਿ ਗਚ੍ਛਤੀਤਿ ਵਾ ਮਹਿਲਾ, ਇਲ ਗਮਨੇ, ਮਹ ਪੂਜਾਯਂ ਵਾ, ਇਰੋ, ਲਤ੍ਤਂ, ਆ, ਮਹਿਲਾ. ਮਹੇਲਾਪ੍ਯਤ੍ਰ.
ਤਿਕਂ ਵਿਸਿਟ੍ਠਨਾਰਿਯਮੇਵ. ਲਲ ਵਿਲਾਸੇ, ਨਨ੍ਦਾਦੀਹਿ ਯੁ. ਲਲ ਇਚ੍ਛਾਯਨ੍ਤਿ ਚੁਰਾਦਿਗਣਤੋ ਵਾ ਯੁ. ਭਯਪਕਤਿ ਭੀਰੁ, ਭੀ ਭਯੇ, ਰੁ, ‘‘ਭੀਰੁ ਅਤ੍ਤੇ ਜਨੇ’ਤ੍ਥਿਯ’’ਨ੍ਤਿ ਰਭਸੋ. ਅਤਿਸਯਿਤਕਾਮਾ ਕਾਮਿਨੀ, ਕਾਮੋ ਸਿਙ੍ਗਾਰਰੂਪੋ ਮਦੋ ਯਸ੍ਸਾਤ੍ਥੀਤਿ ਇਨੀ, ਸਬ੍ਬਤ੍ਰੇਵਂ. ਵਾਮਲੋਚਨਾ, ਭਾਵਿਨੀ, ਨਿਤਮ੍ਬਿਨੀ, ਰਾਮਾਇਚ੍ਚਾਦੀਨਿਪਿ ਵਿਸਿਟ੍ਠਨਾਰੀਨਾਮਾਨਿ.
ਦ੍ਵਯਂ ਪਠਮਵਯਸਿ ਵਤ੍ਤਮਾਨਾਯਂ.
ਅਟ੍ਠਵਸ੍ਸਾ ਭਵੇ ਗੋਰੀ, ਦਸਵਸ੍ਸਾ ਤੁ ਕਞ੍ਞਕਾ;
ਸਮ੍ਪਤ੍ਤੇ ਦ੍ਵਾਦਸੇ ਵਸ੍ਸੇ, ਕੁਮਾਰੀਤ੍ਯ’ਭਿਧੀਯਤੇ [ਚਿਨ੍ਤਾਮਣਿਟੀਕਾ ੧੬.੮].
ਇਹ ਤ੍ਵਭੇਦੋਪਚਾਰੇਨੇਕਤ੍ਤਂ. ਅਞ੍ਞੇ ਪਨਾਹੁ ‘‘ਕਞ੍ਞਾਸਦ੍ਦੋਯਂ ਪੁਮੁਨਾਭਿਸਮ੍ਬਨ੍ਧਪੁਬ੍ਬਕੇ ਸਮ੍ਪਯੋਗੇ ਨਿਵਤ੍ਤੇਤੀ’’ਤਿ. ਕੁਮਾਰ ਕੀਲ਼ਾਯਂ, ਚੁਰਾਦਿ, ਕੁਮਾਰਯਤੀਤਿ ਕੁਮਾਰੀ, ਅ, ਨਦਾਦਿ, ਸਕਤ੍ਥੇ ਕੋ, ਣ੍ਵੁਨਾ ਵਾ ਸਿਦ੍ਧੋ. ਕਮਨੀਯਤੇਤਿ ਕਞ੍ਞਾ, ਕਨ ਦਿਤ੍ਤਿਕਨ੍ਤਿਗਤੀਸੁ, ਯੋ, ਨ੍ਯਸ੍ਸ ਞਤ੍ਤਂ, ਅ, ਆ.
ਯੁਵਸਦ੍ਦਤੋ ਪਾਟਿਪਦਿਕਤੋਤਿ, ਯੁਵਤਿ. ਵਰਿਤ੍ਥਿਪਰਿਯਾਯਸਾਮਞ੍ਞੇਪਿ ਯੁਵਤਿਸਦ੍ਦੋ ਪਕਤ੍ਯਨ੍ਤਰਮਤ੍ਥੀਤਿ. ਤਰ ਤਰਣੇ, ਯੁ, ਉਤ੍ਤਂ, ਈ ਚ.
੨੩੨. ਸਾਭਿਸੇਕਾ ਲਦ੍ਧਾਭਿਸੇਕਾ ਰਾਜਿਤ੍ਥੀ ਮਹੇਸੀ ਨਾਮ, ਮਹ ਪੂਜਾਯਂ, ਕਮ੍ਮਨਿ ਇਸੋ, ਇਸ੍ਸੇ, ਤਤੋ ਈ, ਮਹਤਿਯੋ ਰਾਜਿਤ੍ਥਿਯੋ ਈਸਤਿ ਅਭਿਭਵਤੀਤਿ ਵਾ ਮਹੇਸੀ, ਈਸ ਇਸ੍ਸਰਿਯੇ, ਈ. ਮਹੇਸਿਤੋ ਅਞ੍ਞਾ ਰਾਜਨਾਰਿਯੋ ਭੋਗਿਨਿਯੋ ਭੋਗਯੋਗਾ, ਈ, ਇਨੀ ਚ. ਯਾਨਾਰੀ ਪੁਰਿਸਸ੍ਸ ਸਙ੍ਕੇਤਂ ਯਾਤਿ, ਸਾ ‘‘ਧਵਤ੍ਥਿਨੀ, ਅਭਿਸਾਰਿਕਾ’’ਤਿ ਚੋਚ੍ਚਤੇ. ਧਵਂ ਪਤਿਂ ਅਤ੍ਥਯਤਿ ਇਚ੍ਛਤੀਤਿ ਧਵਤ੍ਥਿਨੀ, ਅਤ੍ਥ ਯਾਚਨਿਚ੍ਛਾਸੁ, ਇਨੀ, ਅਸਤੀਵਿਸੇਸੋ. ਸਰ ਗਤਿਯਂ, ਅਭਿਸਰਤਿ ਸਙ੍ਕੇਤਨ੍ਤਿ, ਣ੍ਵੁ.
੨੩੩. ਛਕ੍ਕਂ ਵੇਸਿਯਂ. ਚਤੁਸਟ੍ਠਿਕਲਾਕੁਸਲਤਾਯ, ਸੀਲਰੂਪਾਦਿਮਤ੍ਤਾਯ ਚ ਗਣ੍ਯਤੇ ਆਦੀਯਤੇ ਗਣਿਕਾ, ਗਣ ਸਙ੍ਖ੍ਯਾਨੇ, ਣ੍ਵੁ. ਵੇਸੋ ਆਕਪ੍ਪੋ, ਤੇਨਾਤਿਸੋਭਤੇ, ਕਮ੍ਮਵੇਸੇਹਿ ਵਾ ਇਚ੍ਛੀਯਤੇਤਿ. ਅਤਿਸੋਭਨੇ, ਇਚ੍ਛਤ੍ਥੇ ਵਾ ਯਪਚ੍ਚਯੋ. ਵਣ੍ਣਸਮ੍ਪਨ੍ਨਾ ਦਾਸੀ ਵਣ੍ਣਦਾਸੀ, ਦਾਸਿਮ੍ਪਿ ਹਿ ਵਣ੍ਣਸਮ੍ਪਨ੍ਨਂ ਕੇਚਿ ਸਾਮਿਕਾ ਧਨਲੋਭੇਨ ਗਣਿਕਂ ਕਰੋਨ੍ਤਿ. ਨਗਰਂ ਸੋਭੇਤੀਤਿ ਨਗਰਸੋਭਿਨੀ. ਰੂਪੇਨ ਉਪਜੀਵਤੀਤਿ ਰੂਪੂਪਜੀਵਿਨੀ. ਅਤਿਸਯਵੇਸਯੁਤ੍ਤਤਾਯ ਵੇਸੀ.
ਦ੍ਵਯਂ ਅਸਤੀਸਾਮਞ੍ਞੇ. ਕੁਲਾਨਿ ਅਟਤਿ ਨਾਸਯਤੀਤਿ ਕੁਲਟਾ. ਬਨ੍ਧਮਨੁਬਨ੍ਧਂ ਕਾਯਤੀਤਿ ਬਨ੍ਧਕੀ, ਨਦਾਦਿ.
੨੩੪. ਚਤੁਕ੍ਕਂ ਉਤ੍ਤਮਨਾਰਿਯਂ. ਵਰੋ ਆਰੋਹੋ ਸੋਣਿ ਯਸ੍ਸਾ ਸਾ ਵਰਾਰੋਹਾ. ਉਤ੍ਤਮਗੁਣਯੋਗਾ ਉਤ੍ਤਮਾ. ਸੋਣਿਗਾਰਵੇਨ ਮਤ੍ਤਗਜੋ ਵਿਯ ਬਨ੍ਧਨਗਾਮਿਨੀ ਮਤ੍ਤਕਾਸਿਨੀ, ਕਸ ਗਤਿਯਂ. ਵਰਵਣ੍ਣਯੋਗਾ ਵਰਵਣ੍ਣਿਨੀ, ਇਨੀ.
‘‘ਸੀਤੇ ਸੁਖੋਣ੍ਹਸਬ੍ਬਙ੍ਗੀ, ਗਿਮ੍ਹੇ ਯਾ ਸੁਖਸੀਤਲਾ;
ਭਤ੍ਤੁ ਭਤ੍ਤਾ ਚ ਯਾ ਨਾਰੀ, ਸਾ ਭਵੇ ਵਰਵਣ੍ਣਿਨੀ’’ਤਿ. ਰੁਦ੍ਦੋ;
ਦ੍ਵਯਂ ਅਖਣ੍ਡਿਤਚਰਿਤ੍ਰਾਯਂ. ਪਤਿ ਸਾਮਿਕੋਵ ਕਮਨੀਯੋ ਯਸ੍ਸਾ ਪਤਿਬ੍ਬਤਾ, ਪਤਿਮ੍ਹਿ ਵਤਮਸ੍ਸਾਤਿ ਵਾ ਪਤਿਬ੍ਬਤਾ. ਅਸ ਭੁਵਿ, ਅਨ੍ਤੋ, ਈ, ਆਦਿਲੋਪੋ. ਸਮੇਤੀਤਿ ਵਾ ਸਤੀ, ਸਮੁ ਉਪਸਮੇ, ਅਨ੍ਤੋ, ਈ.
ਦ੍ਵਯਂ ਕਾਮਰਤ੍ਤਰਾਜਪੁਤ੍ਤਾਦਿਨੋ ਕੁਲਸ੍ਸ ਨਿਯਤਪਤਿਯਂ. ਕੁਲਾਨੁਰੂਪਾ ਇਤ੍ਥੀ ਕੁਲਿਤ੍ਥੀ, ਕੁਲਂ ਪਾਲੇਤਿ ਰਕ੍ਖਤੀਤਿ ਕੁਲਪਾਲਿਕਾ, ਣ੍ਵੁ.
੨੩੫. ਦ੍ਵਯਂ ਮਤਭਤ੍ਤਿਕਾਯਂ. ਵਿਗਤੋ ਧਵੋ ਭਤ੍ਤਾ ਯਸ੍ਸਾ ਵਿਧਵਾ. ਪਤਿ ਸੁਞ੍ਞੋ ਨਟ੍ਠੋ ਯਸ੍ਸਾਤਿ ਪਤਿਸੁਞ੍ਞਾ.
ਦ੍ਵਯਂ ਅਤ੍ਤਿਚ੍ਛਾਯ ਪਤ੍ਯਨ੍ਵੇਸਿਨਿਯਂ ਕਞ੍ਞਾਯਂ. ਪਤਿਂ ਵਰਤਿ ਗਵੇਸਤੀਤਿ ਪਤਿਮ੍ਬਰਾ, ਦੁਤਿਯਾਯਾਲੋਪੋ. ਸਯਮੇਵ ਪਤਿਂ ਵਰਤੀਤਿ ਸਯਮ੍ਬਰਾ, ਪਠਮਾਯਾਲੋਪੋ, ਵਰ ਪਤ੍ਥਨਾਯਂ.
ਚਤੁਕ੍ਕਂ ਵਿਜਾਤਾਯਂ. ਵਿਜਨੀ ਗਬ੍ਭਵਿਮੋਕ੍ਖਨੇ, ਤੋ, ਵਿਜਾਯਿਤ੍ਥਾਤਿ ਵਿਜਾਤਾ. ਸੂ ਅਭਿਸਵੇ, ਤੋ. ਜਾਤਂ ਅਪਚ੍ਚਂ ਪੁਤ੍ਤੋ ਏਤਿਸ੍ਸਾਤਿ ਜਾਤਾਪਚ੍ਚਾ. ਪਸੂਤਾਵ ਪਸੂਤਿਕਾ, ਕਪਚ੍ਚਯੋ, ਇਤ੍ਤਞ੍ਚ.
੨੩੬. ਦ੍ਵਯਂ ਦੂਤਿਯਂ. ਯਾ ਪੇਸੀਯਤੇ, ਸਾ ਦੂਤੀ, ਦੁ ਗਮਨੇ,ਤਿ, ਈਮ੍ਹਿ ਦੂਤੀ. ਸਞ੍ਚਾਰਯਤਿ ਯਥਾਭਿਮਤਨ੍ਤਿ, ਣ੍ਵੁ.
ਤਿਕਂ ਦਾਸਿਯਂ. ਦੁ ਕੁਚ੍ਛਿਤਂ ਅਸਤਿ ਭਕ੍ਖਤੀਤਿ ਦਾਸੀ, ਈ, ਦੀਯਨ੍ਤੇ ਤਾਯਾਤਿ ਵਾ ਦਾਸੀ, ਦਾ ਦਾਨੇ, ਸੋ, ਈ ਚ. ਚਿਟ ਪੇਸਨੇ, ਕਮ੍ਮਨਿ ਣੋ, ਈ. ਕੁਟਂ ਉਦਕਕੁਮ੍ਭਂ ਧਾਰੇਤੀਤਿ ਕੁਟਧਾਰਿਕਾ, ਣ੍ਵੁ.
ਦ੍ਵਯਂ ਸੁਭਾਸੁਭਨਿਰੂਪਿਨਿਯਂ ਸਂਵਰਿਕਾਦਿਮ੍ਹਿ. ਵਰ ਗਤਿਯਂ, ਕਤ੍ਤਰਿ ਇਨੀ. ਸੁਭਾਸੁਭਸ੍ਸ ਇਕ੍ਖਣਂ ਨਿਰੂਪਨਂ ਯਸ੍ਸਾਤ੍ਥੀਤਿ, ਇ, ਸਕਤ੍ਥੇ ਕੋ. ਇਮੇ ਦ੍ਵੇ ਸਦ੍ਦਾ ਤੁਲ੍ਯਤ੍ਥਾ.
ਯਾ ਸਯਂ ਖਤ੍ਤਿਯਜਾਤਿ ਯਸ੍ਸ ਕਸ੍ਸਚਿ ਭਰਿਯਾ, ਸਾ ਖਤ੍ਤਿਯਾਨੀ, ਖਤ੍ਤਿਯਾ ਚ. ਖਤ੍ਤਿਯਸ੍ਸਾਪਚ੍ਚਂ ਖਤ੍ਤਿਯਾਨੀ, ਆਨੋ, ਈ. ਣਮ੍ਹਿ ਖਤ੍ਤਿਯਾ.
੨੩੭. ਪਜ੍ਜਂ ਅਗ੍ਗਿਸਕ੍ਖਿਪੁਬ੍ਬਕਤਪਾਣਿਗਹਿਤਾਯਂ ਭਰਿਯਾਯਂ, ਅਞ੍ਞਤ੍ਰ ਤੂਪਚਾਰਾ. ਦਾਰਯਨ੍ਤੇ ਯੇਨਾਤਿ ਦਾਰੋ, ਦਰ ਵਿਦਾਰਣੇ, ਅਕਤ੍ਤਰਿ ਚ ਕਾਰਕੇ ਸਞ੍ਞਾਯਂ ਣੋ. ਜਾਯਤਿ ਪੁਤ੍ਤੋ ਯਾਯਾਤਿ ਜਾਯਾ, ਜਨ ਜਨਨੇ, ਯੋ, ਜਨਿਸ੍ਸ ਜਾ ਚ, ਆ, ਜਯਤੀਤਿ ਵਾ ਜਾਯਾ, ਜਿ ਜਯੇ, ਯੋ, ਜਿਸ੍ਸ ਜਾ, ਆ, ਜਾਯਾ. ਕਲ ਸਙ੍ਖ੍ਯਾਨੇ, ਅਤ੍ਤੋ. ਘਰਂ ਨੇਤੀਤਿ ਘਰਣੀ, ਣਤ੍ਤਂ. ਭਰਿਤਬ੍ਬਤੋ ਭਰਿਯਾ, ਭਰ ਭਰਣੇ, ਯੋ. ਪਿਯਾਯਿਤਬ੍ਬਤੋ ਪਿਯਾ,ਪੀ ਤਪ੍ਪਨਕਨ੍ਤੀਸੁ, ਯੋ. ਪਜਂ ਪੁਤ੍ਤਂ ਪਾਲੇਤੀਤਿ ਪਜਾਪਤਿ, ਪਾ ਪਾਲਨੇ,ਤਿ, ਆਤ੍ਤਂ, ਰਸ੍ਸਤ੍ਤਞ੍ਚ. ਦ੍ਵਿਨ੍ਨਂ ਪੂਰਣੀ ਦੁਤਿਯਾ. ਪਠਮੋ ਭਤ੍ਤਾ, ਭਰਿਯਾ ਦੁਤਿਯਾ. ਸਾਮਿਕਸ੍ਸ ਪਾਦੇ ਪਰਿਚਰਤੀਤਿ ਪਾਦਪਰਿਚਾਰਿਕਾ, ਣ੍ਵੁ. ਪਤਿਨੀ, ਪਾਣਿਗਹਿਤਾ, ਸਹਧਮ੍ਮਿਨੀਤਿਪਿ ਤਸ੍ਸਾਯੇਵ ਨਾਮਾਨਿ.
੨੩੮. ਤਿਕਂ ਸਖਿਯਂ. ਤੇਸੁ ਤੇਸੁ ਕਿਚ੍ਚੇਸੁ ਸਹ ਖਾਯਤਿ ਪਕਾਸਤੀਤਿ ਸਖੀ, ਸਹਪੁਬ੍ਬੋ ਖਾ ਪਕਾਸਨਕਥਨੇਸੁ, ਈ. ਅਲ ਭੂਸਨੇ ਆਪੁਬ੍ਬੋ, ਇ. ਵਯਸਾ ਤੁਲ੍ਯਾ ਵਯਸਾ, ਤੁਲ੍ਯੇ ਸਞ੍ਞਾਯਂ ਸੋ [ਪਾਣਿਨਿ ੪.੪.੯੧ ਸੁਤ੍ਤੇ ਯਪਚ੍ਚਯੋ ਦਿਸ੍ਸਤਿ].
ਜਰੋਵੁਚ੍ਚਤਿ ਚੋਰਸ੍ਸਾਮਿਕੋ, ਤਸ੍ਸਾਯਂ ਜਾਰੀ, ਣੋ, ਈ. ਸਾਮਿਕਂ ਅਤਿਕ੍ਕਮ੍ਮ ਅਞ੍ਞਤ੍ਰ ਚਰਤੀਤਿ, ਇਨੀ.
੨੩੯. ਪੁਮੇ ਤੂਤਿ ਲਿਙ੍ਗਨ੍ਤੋ ਤੁਸਦ੍ਦੋ ਨ ਪੁਬ੍ਬਂ ਭਜਤੇ. ਅਰ ਗਮਨੇ, ਤੁ, ਅਰਸ੍ਸੁਤ੍ਤਂ. ਰਤਿਯਾ ਜਾਯਤੀਤਿ ਰਜੋ, ਤਿਲੋਪੋ. ਪੁਪ੍ਫ ਵਿਕਸਨੇ, ਪੁਪ੍ਫਂ.
ਤਿਕਂ ਰਜਸ੍ਸਲਾਯਂ. ਉਤੁਯੋਗਾਉਤੁਨੀ, ਇਨੀ. ਰਜਯੋਗਾ ਰਜਸ੍ਸਲਾ, ਸਲੋ. ਪੁਪ੍ਫਵਨ੍ਤਤਾਯ ਪੁਪ੍ਫਵਤੀ. ਥੀਧਮ੍ਮਿਨੀ, ਅਵੀ, ਅਤ੍ਤੇਯੀ, ਮਲਿਨੀ, ਉਤੁਮਤੀ, ਉਦਕੀਇਚ੍ਚਾਦੀਨਿਪਿ ਤਸ੍ਸਾ ਨਾਮਾਨਿ.
ਤਿਕਂ ਗਬ੍ਭਿਨਿਯਂ. ਗਰੁ ਅਲਹੁਕੋ ਗਬ੍ਭੋ ਕੁਚ੍ਛਿ ਏਤਿਸ੍ਸਾਤਿ ਗਰੁਗਬ੍ਭਾ. ਆਪਨ੍ਨੋ ਪਤ੍ਤੋ ਗਬ੍ਭਟ੍ਠੋ ਸਤ੍ਤੋ ਏਤਾਯਾਤਿ ਆਪਨ੍ਨਸਤ੍ਤਾ. ਗਬ੍ਭਯੋਗਾ ਗਬ੍ਭਿਨੀ.
ਤਿਕਂ ਯੇਨ ਵੇਠਿਤੋ ਗਬ੍ਭੋ ਕੁਚ੍ਛਿਯਂ ਤਿਟ੍ਠਤਿ, ਤਤ੍ਰਾਸਯੇਤਿ ਖ੍ਯਾਤੇ. ਗਬ੍ਭੋ ਆਸਯਤੇ ਤਿਟ੍ਠਤ੍ਯਤ੍ਰਾਤਿ, ਣੋ. ਜਰਂ ਏਤੀਤਿ ਜਲਾਬੁ. ਉ, ਰਸ੍ਸ ਲੋ, ਯਸ੍ਸ ਬੋ, ਜਰਾਪੁਬ੍ਬੋ ਇ ਗਤਿਯਂ. ਕਲਂ ਜਰਤਂ ਲਾਤੀਤਿ ਕਲਲੋ, ਕਲ ਸਙ੍ਖ੍ਯਾਨੇ ਵਾ, ਅਲੋ.
੨੪੦-੨੪੧. ਸਤ੍ਤਕਂ ਭਤ੍ਤਰਿ. ਧੂ ਕਮ੍ਪਨੇ, ਸਨ੍ਤਾਸਂ ਧੁਨੋਤੀਤਿ ਧਵੋ, ਅ. ਸਂ ਏਤਸ੍ਸਤ੍ਥੀਤਿ ਸਾਮਿਕੋ, ਆਮਿਪਚ੍ਚਯੋ, ਸਕਤ੍ਥੇ ਕੋ, ਇਪਚ੍ਚਯੋ ਵਾ, ਨਿਗ੍ਗਹੀਤਸ੍ਸ ਮੋ, ਅਸ੍ਸ ਚ ਦੀਘੋ, ਸਾਮਿਕੋ. ਭਰ ਭਰਣੇ, ਭਰਤੀਤਿ ਭਤ੍ਤਾ, ਰਿਤੁ. ਕਮੁ ਇਚ੍ਛਾਯਂ, ਤੋ, ‘‘ਪਕ੍ਕਮਾਦੀਹਿ ਨ੍ਤੋ ਚਾ’’ਤਿ ਨ੍ਤਤ੍ਤਂ. ਪਾ ਰਕ੍ਖਣੇ, ਅਤਿ, ਪਤਿ. ਵਰ ਇਚ੍ਛਾਯਂ, ਅ, ਵਰੋ. ਪੀ ਤਪ੍ਪਨਕਨ੍ਤੀਸੁ, ਯੋ.
ਰਤਿਕਾਰਣਤ੍ਤਾ ਪਤਿਨੋ ਉਪ ਉਪਪਤਿ, ਸਮਾਸੇ ਕਤੇ ਅਭਿਧਾਨਤੋ ਪੁਬ੍ਬਨਿਪਾਤੋ, ਅਪ੍ਪਧਾਨਭੂਤੋ ਵਾ ਪਤਿ ਉਪਪਤਿ. ਜਰ ਵਯੋਹਾਨਿਮ੍ਹਿ, ਜੀਯਨ੍ਤੇ ਅਨੇਨਾਤਿ ਜਾਰੋ, ਦਾਰੋ ਚ.
ਸਤ੍ਤਕਂ ਪੁਤ੍ਤੇ. ਨਰਕੇ ਨ ਪਤਨ੍ਤ੍ਯਨੇਨ ਜਾਤੇਨਾਤਿ ਅਪਚ੍ਚਂ, ਪਤ ਗਤਿਯਂ, ਯੋ, ਤ੍ਯਸ੍ਸ ਚੋ, ਨ ਪਤਤਿ ਨ ਵਿਚ੍ਛਿਨ੍ਦਤਿ ਵਂਸੋ ਏਤੇਨਾਤਿ ਵਾ ਅਪਚ੍ਚਂ, ਪੁਤ੍ਤੇ, ਧੀਤਰਿ ਚ ਨਿਚ੍ਚਨਪੁਂਸਕੋਯਂ. ਪੂ ਪਵਨੇ. ਪੁਨਾਤਿ ਪਿਤਰੋ ਤੇਨਾਤਿ ਪੁਤ੍ਤੋ. ‘‘ਛਦਾਦੀਹਿ ਤਤ੍ਰਣ’’ਤਿ ਤੋ. ਪੂਰੇਤੀਤਿ ਵਾ ਪੁਤ੍ਤੋ. ਅਤ੍ਤਤੋ ਜਾਤੋ ਅਤ੍ਰਜੋ, ‘‘ਅਤ੍ਤਜੋ’’ਤਿਪਿ ਪਾਠੋ. ਸੁਯਤੇਤਿ ਸੁਤੋ. ਸੁ ਅਭਿਸਵੇ, ਸੁਣਾਤੀਤਿ ਵਾ ਸੁਤੋ, ਤੋ, ਸੁ ਸਵਨੇ. ਤਨੁਮ੍ਹਾ ਜਾਤੋ ਤਨੁਜੋ, ਤਨਯੋ ਚ, ਯੋ, ਤਨੋਤਿ ਮੁਦਨ੍ਤਿ ਵਾ ਤਨਯੋ, ਅਯੋ. ਸੂਯਤੇਤਿ ਸੂਨੁ, ਕਮ੍ਮਨਿ ਨੁ, ਸੂ ਪਸਵੇ.
ਪੁਤ੍ਤਾਦਯੋ ਸੂਨੁਪਰਿਯਨ੍ਤਾ ਧੀਤਰਿ ਵਤ੍ਤਮਾਨਾ ਇਤ੍ਥਿਯਂ ਵਤ੍ਤਨ੍ਤਿ. ਦੁਹਿਤਾ, ਧੀਤਾ ਚ ਸਦਾ ਨਾਰਿਯਮੇਵ. ਦੁਹ ਪਪੂਰਣੇ, ਰਾਤੁ, ਓਤ੍ਤਾਭਾਵੋ, ਇਕਾਰਾਗਮੋ ਚ. ਧਾ ਧਾਰਣੇ, ਰਾਤੁ, ਆਸ੍ਸੀ. ਪੁਤ੍ਤਾਦਯੋ ਚ ਤੇ ਸਾਮਞ੍ਞੇਨੇਵ ਕੁਣ੍ਡਗੋਲਕਾਦੀਨਂ ਵਾਚਕਾ. ਸਵਣ੍ਣਾਯਂ ਤੁ ਊਢਾਯਂ ਸਜਾਤੋ ਸਯਂ ਜਨਿਤੋ ਸੁਤੋ ਓਰਸੋ ਨਾਮ. ਸਜਾਤਸਦ੍ਦੇਨ ਕੁਣ੍ਡਕਗੋਲਕਖਤ੍ਤਾਦਿਬ੍ਯਵਚ੍ਛੇਦੋ. ਜੀਵਤਿ ਭਤ੍ਤਰਿ ਜਾਰਜੋ ਸੁਤੋ ਕੁਣ੍ਡਾਖ੍ਯੋ. ਮਤੇ ਭਤ੍ਤਰਿ ਜਾਰਜੋ ਗੋਲਕਾਖ੍ਯੋ. ਅਰਿਯਾਸੁਦ੍ਦਜੋ ਸੁਤੋ ਖਤ੍ਤਾ ਨਾਮ [ਖਤ੍ਤਾ ਅਰਿਯਾਸੁਦ੍ਦਾਨਂ (ਅਮਰ ੨੦.੩)]. ਆਦਿਨਾ ਮਾਗਧਾਦੀਨਂ ਗਹਣਂ. ਵੁਤ੍ਤਞ੍ਹਿ –
‘‘ਅਮਤੇ ਜਾਰਜੋ ਕੁਣ੍ਡੋ,
ਮਤੇ ਭਤ੍ਤਰਿ ਗੋਲਕੋ’’ਤਿ [ਅਮਰ ੧੬.੩੬].
‘‘ਮਾਗਧੋ ਸੁਦ੍ਦਖਤ੍ਤਾਜੋ’’ਤਿ [ਅਭਿਧਾਨੁ ੫੦੩ ਗਾਥਾ] ਚ.
ਉਰਸਾ ਮਨਸਾ ਨਿਮ੍ਮਿਤੋ, ਉਰਸਦ੍ਦਾ ਤਤਿਯਨ੍ਤਾ ਨਿਮ੍ਮਿਤਤ੍ਥੇ ਣੋ, ਨਿਵਿਟ੍ਠਤ੍ਤਾ ਤੇਨ ਨਿਮ੍ਮਿਤੋਤਿ ਵੁਚ੍ਚਤਿ. ਉਰਸਿ ਭਵੋਤਿ ਵਾ ਓਰਸੋ.
੨੪੨. ਚਤੁਕ੍ਕਂਪਤਿਪਤਿਨੀਨਂ ਯੁਗੇ, ‘‘ਦਾਰਾ ਪੁਮੇ ਬਹੁਤ੍ਤੇ ਚ, ਦਂ ਕਲਤ੍ਰੇ ਨਪੁਂਸਕੇ’’ਤਿ [ਚਿਨ੍ਤਾਮਣਿਟੀਕਾ ੧੬.੩੮] ਅਮਰਮਾਲਾ, ਜਂਸਦ੍ਦੋ ਤ੍ਵਬ੍ਯਯੋ ਦਾਰਵਚਨੋ. ਤਸ੍ਮਾ ‘‘ਜਮ੍ਪਤਿ, ਦਮ੍ਪਤੀ’’ਤਿਪਿ ਭਵਿਤਬ੍ਬਂ, ਇਧ ਪਨ ਕਚ੍ਚਾਯਨਮਤੇਨੋਦਾਹਟਾ. ਜਾਯਾ ਚ ਪਤਿ ਚ ਜਾਯਾਪਤਿ. ਇਤਰੀਤਰਯੋਗਦ੍ਵਨ੍ਦੋ. ਜਾਯਾ ਚ ਪਤਿ ਚ ਜਾਨਿਪਤਿ, ਤਥਾ ਜਾਯਮ੍ਪਤਿਆਦਯੋ, ਜਾਯਾਸਦ੍ਦਸ੍ਸ ਪਤਿਮ੍ਹਿ ਪਰੇ ਜਾਨਿ, ਤੁਦਞ੍ਚ, ਜਾਯਞ੍ਚ ਯਦਾਦਿਨਾ.
ਤਿਕਂ ਨਪੁਂਸਕੇ. ਵਿਗਤੋ ਰਾਗਸ੍ਸਵੋ ਯਸ੍ਮਾ ਵਸ੍ਸਵਰੋ. ਸੁ ਸਵਨੇ, ਅਰੋ. ਪਣ ਬ੍ਯਵਹਾਰੇ, ਡੋ, ਪਡਿ ਲਿਙ੍ਗਵੇਕਲ੍ਯੇ ਵਾ, ਭੂਵਾਦਿ. ਨ ਇਤ੍ਥੀ ਨ ਪੁਮਾ ਨਪੁਂਸਕਂ, ਨਿਰੁਤ੍ਤਿਨਯੇਨ ਇਤ੍ਥਿਪੁਮਾਨਂ ਪੁਂਸਕਭਾਵੋ, ਨਸ੍ਸ ਚ ਪਕਤਿ. ਤਤਿਯਾਪਕਤਿ, ਸਣ੍ਡੋ, ਕਲੀਬਨ੍ਤਿਪਿ ਤਸ੍ਸ ਨਾਮਾਨਿ. ਤਤਿਯਾ ਪਕਤਿ ਤਤਿਯਪ੍ਪਕਾਰੋ, ਸਮਜਾਤਿਕੇ ਇਤ੍ਥਿਪੁਰਿਸੇ ਅਪੇਕ੍ਖਿਤ੍ਵਾ ਤਤਿਯਤ੍ਤਂ ਪਕਾਰਸ੍ਸ. ਪਠਮਾ ਹਿ ਪਕਤਿ ਇਤ੍ਥੀ, ਦੁਤਿਯਾ ਪਕਤਿ ਪੁਰਿਸੋ, ਇਤਰਪਕਤਿ ਤਤਿਯਾ ਪਕਤਿ.
੨੪੩. ਛਕ੍ਕਂ ਞਾਤਿਮਤ੍ਤੇ, ਬਨ੍ਧੁਯੇਵ ਬਨ੍ਧਵੋ, ਅ, ਉਸ੍ਸਾਵੋ. ਬਨ੍ਧਤੀਤਿ ਬਨ੍ਧੁ, ਉ. ਸਸ੍ਸ ਅਤ੍ਤਨੋ ਜਨੋ ਸਜਨੋ. ਸਮਾਨਂ ਗੋਤ੍ਤਂ ਕੁਲਂ ਅਸ੍ਸਾਤਿ ਸਗੋਤ੍ਤੋ, ਸਮਾਨਸ੍ਸ ਸਭਾਵੋ. ਞਾ ਅਵਬੋਧਨੇ, ਕਮ੍ਮੇਤਿ, ਞਾਤਿਯੇਵ ਞਾਤਕੋ, ਅਤ੍ਤਂ, ਸਕਤ੍ਥੇ ਕੋ ਚ. ਸੁਸਦ੍ਦੋਪ੍ਯਤ੍ਰ [ਸ੍ਵ (ਅਮਰ ੧੬.੩੬)].
ਦ੍ਵਯਂ ਸਤ੍ਤਪੁਰਿਸਾਵਧਿਕੇਸੁ ਨਿਕਟਞਾਤੀਸੁ. ਲੋਹਿਤੇਨ ਸਮ੍ਬਨ੍ਧੋ ਸਾਲੋਹਿਤੋ, ਸਮ੍ਬਨ੍ਧਸ੍ਸ ਸਾਦੇਸੋ, ਪੁਬ੍ਬਨਿਪਾਤੋ ਚ, ਸਮਾਨਂ ਪਿਣ੍ਡਦਾਨਂ ਯਸ੍ਸ ਸਪਿਣ੍ਡੋ, ਸਨਾਭਯੋਪ੍ਯਤ੍ਰ [ਨਾਭਿ ਸਤ੍ਤਪੁਰਿਸਾਵਧਿਕਕੁਲੇ (ਚਿਨ੍ਤਾਮਣਿਟੀਕਾ ੧੬.੩੩)]. ਤਿਕਂ ਪਿਤਰਿ. ਤਾ ਪਾਲਨੇ, ਤੋ ਕਤ੍ਤਰਿ. ਜਨਯਤੀਤਿ ਜਨਕੋ, ਣ੍ਵੁ. ਪਾ ਰਕ੍ਖਣੇ, ਰਿਤੁ, ਅਸ੍ਸਿਤ੍ਤਂ.
੨੪੪. ਛਕ੍ਕਂ ਮਾਤਰਿ. ਅਮ ਪੂਜਾਯਂ, ਕਮ੍ਮਨਿ ਮੋ, ਬੋ ਚ, ਅਮ੍ਮਾ, ਅਮ੍ਬਾ. ਜਨਯਤੀਤਿ ਜਨਨੀ, ਯੁ, ਨਦਾਦਿ. ਮਾਨ ਪੂਜਾਯਂ, ਪੁਤ੍ਤਂ ਮਾਨੇਤੀਤਿ ਮਾਤਾ, ਰਾਤੁ, ਪਾਤੀਤਿ ਵਾ ਮਾਤਾ, ਪਾਤਿਸ੍ਸ ਮੋ. ਜਨੇਤੀਤਿ ਜਨੇਤ੍ਤਿ,ਤਿ. ਜਨੇਤੀਤਿ ਜਨਿਕਾ, ਣ੍ਵੁ, ਇਤ੍ਤਂ.
ਅਪ੍ਪਧਾਨਭੂਤਾ ਮਾਤਾ ਉਪਮਾਤਾ, ਕੁਮਾਰੇ ਧਾਰੇਤੀਤਿ ਧਾਤਿ. ਧਾ ਧਾਰਣੇ,ਤਿ. ਜਾਯਾਯ ਭਰਿਯਾਯ ਭਾਤਿਕੋ ਕਨਿਟ੍ਠੋ ਚ ਜੇਟ੍ਠੋ ਚ ਸਾਲੋ ਨਾਮ, ਸਸ੍ਸ ਅਤ੍ਤਨੋ ਏਸਾ ਸਾ, ਭਰਿਯਾ, ਤਸ੍ਸਾ ਭਾਤਾ ਸਾਲੋ, ਜਾਯਾਯ ਭਾਤਰਿ ਅਲੋ. ਸਰ ਗਤਿਚਿਨ੍ਤਾਹਿਂਸਾਸੁ ਵਾ, ਣੋ, ਲਤ੍ਤਂ, ਸਾਲ ਵਿਤਕ੍ਕੇ ਵਾ, ਚੁਰਾਦਿ.
੨੪੫. ਸਾਮਿਨੋ ਭਤ੍ਤੁ ਭਗਿਨੀ ਨਨਨ੍ਦਾ ਨਾਮ, ਨ ਨਨ੍ਦਤੀਤਿ ਨਨਨ੍ਦਾ, ਅਤ੍ਤਾਭਾਵੋ ਨਸ੍ਸ ਵਿਭਾਸਾਧਿਕਾਰਾ. ਨਨ੍ਦ ਸਮਿਦ੍ਧਿਯਂ, ਭੂਵਾਦਿ.
ਦ੍ਵਯਂ ਅਯ੍ਯਿਕਾਯਂ. ਮਾਤੁਯਾ ਮਾਤਾ ਮਾਤਾਮਹੀ. ਪਿਤੂਨਂ ਪਿਤਰਿ ਚ ਮਾਤਰਿ ਚ ਆਮਹਂ ਯਦਾਦਿਨਾ, ਨਦਾਦਿ. ਅਰਹ ਪੂਜਾਯਂ, ਣ੍ਵੁ, ਰਹਸ੍ਸ ਯੋ, ਅਯ ਗਤਿਮ੍ਹਿ ਵਾ, ਣ੍ਵੁ, ਅਯ੍ਯਿਕਾ.
ਮਾਤੁਯਾ ਭਾਤਾ ਮਾਤੁਲੋ ਨਾਮ, ਮਾਤੁਯਾ ਭਾਤਾ ਮਾਤੁਲੋ, ਮਾਤੁ ਭਾਤਰਿ ਉਲਪਚ੍ਚਯੋ. ਅਸ੍ਸ ਮਾਤੁਲਸ੍ਸ ਪਜਾਪਤਿ ਜਾਯਾ ਮਾਤੁਲਾਨੀ ਨਾਮ, ਮਾਤੁਲਸ੍ਸ ਭਰਿਯਾ ਮਾਤੁਲਾਨੀ, ਮਾਤੁਲਭਰਿਯਾਯਂ ਆਨੋ, ਨਦਾਦਿ, ਅਥ ਵਾ ਮਾਤੁਲਸ੍ਸ ਏਸਾ ਮਾਤੁਲਾਨੀ, ਈ, ਅਸ੍ਸ ਆਨੋ.
੨੪੬. ਜਾਯਾਪਤੀਨਂ ਦ੍ਵਿਨ੍ਨਂ ਜਨਨੀ ਮਾਤਾ ਸਸ੍ਸੁ ਵੁਤ੍ਤਾ, ਸਸ ਗਤਿਹਿਂਸਾਪਾਨੇਸੁ. ਤਪ੍ਪਿਤਾ ਤੇਸਂ ਜਾਯਾਪਤੀਨਂ ਪਿਤਾ ਪਨ ਸਸੁਰੋ ਨਾਮ, ਸਸਧਾਤੁਮ੍ਹਾ ਉਰੋ. ਭਗਿਨਿਯਾ ਪੁਤ੍ਤੋ ਪਨ ਭਾਗਿਨੇਯ੍ਯੋ ਨਾਮ, ਭਗਿਨਿਯਾ ਅਪਚ੍ਚਂ ਭਾਗਿਨੇਯ੍ਯੋ, ਣੇਯ੍ਯੋ.
੨੪੭. ਦ੍ਵਯਂ ਸੁਤਸ੍ਸ, ਸੁਤਾਯ ਚ ਪੁਤ੍ਤੇਸੁ. ਨਹ ਬਨ੍ਧਨੇ, ਰਿਤੁ, ਨੀ ਨਯੇ ਵਾ. ਪੁਤ੍ਤਸ੍ਸ ਪੁਤ੍ਤੋ ਪਪੁਤ੍ਤੋ, ਤ੍ਤਲੋਪੋ, ਉਸ੍ਸਤ੍ਤਞ੍ਚ. ਸਾਮਿਭਾਤਾ ਦੇਵਰੋ ਨਾਮ, ਅਥ ਵਾ ਸਾਮਿਭਾਤਾ ਕਨਿਟ੍ਠੋ ਸਾਮਿਨੋ ਭਾਤਾ ਦੇਵਰੋ ਨਾਮ. ਜੇਟ੍ਠੋ ਤੁ ਸਸੁਰੋ ਏਵੋਚ੍ਚਤੇ. ਦਿਵੁ ਕੀਲ਼ਾਯਂ, ਅਰੋ.
ਦ੍ਵਯਂ ਧੀਤੁਪਤਿਮ੍ਹਿ. ਜਨ ਜਨਨੇ, ਰਿਤੁ, ਅਸ੍ਸਾਤ੍ਤਂ, ਨਸ੍ਸ ਮਾਦੇਸੋ ਚ. ਦ੍ਵਯਂ ਪਿਤੁਪਿਤਰਿ. ਪਿਤੁਨੋ ਪਿਤਾ ਪਿਤਾਮਹੋ.
੨੪੮. ਹੁਸਾਨ੍ਤਾਨਿ ਪਦੇਨ ਪਦੇਨ ਨਾਮਾਨਿ. ਮਾਤੁਯਾ ਭਗਿਨੀ ਮਾਤੁਚ੍ਛਾ, ਚ੍ਛੋ. ਪਿਤੁਨੋ ਭਗਿਨੀ ਪਿਤੁਚ੍ਛਾ, ਪਿਤੁਭਗਿਨੀ ਪਿਤੁਚ੍ਛਾ ਭਵੇਤ੍ਯਤ੍ਥੋ.
ਪਿਤਾਮਹਸਦ੍ਦੋ ਨ ਕੇਵਲਂ ਜਨਕਪਿਤਰਮੇਵ ਵਦਤਿ, ਅਥ ਖੋ ਜਨਕਪਿਤੁਪਿਤਾਦਯੋਪੀਤਿ ਏਤ੍ਥਾਪਿ ‘‘ਪਪਿਤਾਮਹੋ’’ ਇਚ੍ਚੁਦਾਹਟੋ. ਪਿਤੁਨੋ ਅਯ੍ਯਕੋ ਪਯ੍ਯਕੋ, ਤੁਲੋਪੋ. ਸੁ ਸਵਨੇ, ਣ੍ਹਾ. ਣਿਸਮ੍ਹਿ ਸੁਣਿਸਾ. ਸਮ੍ਹਿ ਹੁਸਾ, ਹਤ੍ਤਂ. ਸਬ੍ਬਤ੍ਰ ‘‘ਇਤ੍ਥਿਯਮਤੋ ਆਪਚ੍ਚਯੋ’’ਤਿ ਆ.
੨੪੯. ਚਤੁਕ੍ਕਂ ਏਕੋਦਰੇ ਭਾਤਰਿ. ਸਮਾਨੋਦਰੇ ਠਿਤੋ ਸੋਦਰਿਯੋ, ਸਮਾਨਸ੍ਸ ਸੋ. ਸਮਾਨੋ ਗਬ੍ਭੋ ਸਗਬ੍ਭੋ, ਤਤ੍ਰ ਭਵੋ ਸਗਬ੍ਭੋ, ਣੋ. ਸਮਾਨੋਦਰੇ ਜਾਤੋ ਸੋਦਰੋ. ਸਮਾਨੋਦਰੇ ਜਾਤੋ ਸਹਜੋ. ਸਹਸਦ੍ਦੋ ਤੁਲ੍ਯਵਚਨੋ.
ਮਾਤਾਪਿਤੂ ਤੇ ਦ੍ਵੇ ਜਨਾ ਪਿਤਰੋ ਵੁਚ੍ਚਨ੍ਤੇ. ਉਭਿਨ੍ਨਮ੍ਪਿ ਜਨਕਬ੍ਯਪ੍ਪਦੇਸਨਿਯਤਤ੍ਤਾ ਅਭੇਦਵਚਨਿਚ੍ਛਾਯਂ ਪਿਤੁਤ੍ਤਮਤ੍ਥੇਵ. ਨਨ੍ਵਭੇਦਾ ਜਾਤਿ, ਤਸ੍ਸਾ ਚੋਭਯਤ੍ਰ ਸਤ੍ਤਾਦੇਕਤ੍ਤਂ, ਨ ਚ ਜਾਤਿਯਾ ਲਿਙ੍ਗਸਙ੍ਖ੍ਯਾ ਭਵਨ੍ਤਿ, ਅਦਬ੍ਬਤ੍ਤਾ ਬਹੁਵਚਨਂ ਨ ਸਿਯਾਤਿ? ਨੇਸ ਦੋਸੋ, ਨ ਹਿ ਜਾਤਿਪਦਤ੍ਥਿਕਸ੍ਸ ਨ ਦਬ੍ਬਂ, ਦਬ੍ਬਪਦਤ੍ਥਿਕਸ੍ਸ ਵਾ ਨ ਜਾਤੀਤਿ. ਕਿਨ੍ਤੁਭਯੇਸਂਪ੍ਯੁਭਯਪਦਤ੍ਥੋ ਇਹਾਤ੍ਥਵਿਸੇਸੋ. ਜਾਤਿਪਦਤ੍ਥਿਕਸ੍ਸ ਜਾਤਿ ਪਧਾਨਭੂਤਾ ਦਬ੍ਬਂ ਗੁਣਭੂਤਂ, ਦਬ੍ਬਪਦਤ੍ਥਿਕਸ੍ਸ ਤੁ ਵਿਪਰਿਯਯੋ, ਤਤ੍ਰ ਜਾਤਿਵਚਨਿਚ੍ਛਾਯਂ ਦਬ੍ਬੇ ਵਿਯ ਲਿਙ੍ਗਸਙ੍ਖ੍ਯਾ ਵਤ੍ਤਬ੍ਬਾ, ਤਸ੍ਸ ਚ ਬਹੁਤ੍ਤਾ ਬਹੁਵਚਨਂ. ਪੁਬ੍ਬੇ ਵਿਯਾਭੇਦਵਚਨਿਚ੍ਛਾਯਂ ਪੁਤ੍ਤੋ ਚ ਧੀਤਾ ਚ ਪੁਤ੍ਤਾ ਵੁਚ੍ਚਨ੍ਤੇ, ਜਞ੍ਞਤ੍ਤਞ੍ਹਿ ਪੁਤ੍ਤਬ੍ਯਪਦੇਸਨਿਯਤਂ ਧੀਤਰਿਪ੍ਯਤ੍ਥਿ, ਵਿਪਰਿਯਯੇ ਤੁ ਨ ਭਵਤ੍ਯਨਭਿਧਾਨਤੋ. ਭੇਦਵਚਨਿਚ੍ਛਾਯਂ ਪੁਤ੍ਤਧੀਤਰੋਤਿ ਭਵਤਿ.
੨੫੦. ਸਸ੍ਸੁ ਚ ਸਸੁਰੋ ਚ ਸਸੁਰਾਤਿ ਵੁਚ੍ਚਨ੍ਤੇ. ਤਦਪਚ੍ਚੋਹਨਸਮ੍ਬਨ੍ਧਿਨਿਬਨ੍ਧਨਾ ਹਿ ਬ੍ਯਪ੍ਪਦੇਸੋ ਸਸ੍ਸੁਯਮ੍ਪਿ ਠਿਤੋ. ਭੇਦਵਚਨਿਚ੍ਛਾਯਂ ਤੁ ਪੁਬ੍ਬੇ ਵਿਯ ਪਚ੍ਚਤ੍ਥਂ ਸਦ੍ਦਨਿਵੇਸੋ. ਭਾਤਾ ਚ ਭਗਿਨੀ ਚ ਭਾਤਰੋ ਵੁਚ੍ਚਨ੍ਤੇ. ਏਕਗਬ੍ਭੋਸਿਤਤ੍ਤਂ ਭਾਤੁਬ੍ਯਪ੍ਪਦੇਸਨਿਯਤਂ ਭਗਿਨਿਯਂਪ੍ਯਤ੍ਥਿ. ਤਤੋ ਏਕਗਬ੍ਭੋਸਿਤਤ੍ਤਸ੍ਸਾਭੇਦਵਚਨਿਚ੍ਛਾਯਂ ਉਭੋ ਭਾਤਰੋ ਵੁਚ੍ਚਨ੍ਤੇ. ਏਤ੍ਥ ਚ ਸਬ੍ਬਤ੍ਰਾਪਿ ਵਿਰੂਪੇਕਸੇਸੋ ਦਟ੍ਠਬ੍ਬੋ. ਦੁਵਿਧੋ ਹਿ ਏਕਸੇਸੋ ਸਰੂਪਾਸਰੂਪਵਸੇਨ. ਤਤ੍ਰ ਸਰੂਪੇਕਸੇਸੇ ਬਹੁਵਚਨਮੇਵ, ਇਤਰਤ੍ਰ ਪਨ ਦ੍ਵਿਵਚਨਂ, ਯਥਾ ਪੁਰਿਸੋ ਚ ਪੁਰਿਸੋ ਚ ਪੁਰਿਸਾ, ਨਾਮਞ੍ਚ ਰੂਪਞ੍ਚ ਨਾਮਰੂਪਞ੍ਚ ਨਾਮਰੂਪਂ, ਮਾਤਾ ਚ ਪਿਤਾ ਚ ਪਿਤਰੋਤਿ.
ਬਾਲ੍ਯਯੋਬ੍ਬਨਵੁਡ੍ਢਤ੍ਤਾਨਿ ਤੀਣਿ ਵਯਾਨਿ. ਤਤ੍ਰ ਤਿਕਂ ਬਾਲ੍ਯੇ. ਦ੍ਵਯਂ ਯੋਬ੍ਬਨੇ. ਬਾਲਸ੍ਸ ਭਾਵੋ ਬਾਲਤ੍ਤਂ, ਤ੍ਤਂ. ਤਾਪਚ੍ਚਯੇ ਬਾਲਤਾ. ਣ੍ਯਮ੍ਹਿ ਬਾਲ੍ਯਂ, ਅਥ ਵਾ ਬਲ ਪਾਣਨੇ, ਬਲਨ੍ਤਿ ਅਸ੍ਸਸਿਤਪਸ੍ਸਸਿਤਮਤ੍ਤੇਨ ਪਣਨ੍ਤੀਤਿ ਬਾਲਾ, ਬਲ੍ਯਨ੍ਤੇ ਸਂਵਰੀਯਨ੍ਤੇਤਿ ਵਾ ਬਾਲਾ, ਬਲ ਸਂਵਰਣੇ. ਤੇਸਂ ਭਾਵੋ ਬਾਲਤ੍ਤਾਦਿ. ਯੁਵਸ੍ਸ ਭਾਵੋ ਯੋਬ੍ਬਞ੍ਞਂ, ਯੋਬ੍ਬਨਞ੍ਚ, ਭਾਵੇ ਣ੍ਯੋ, ਣੋ ਚ, ਅਥ ਵਾ ਯੁ ਮਿਸ੍ਸਨੇ, ਯੁ, ਉਸ੍ਸ ਉਵਾਦੇਸੋ, ਵੁਦ੍ਧਿ. ਤੇਸਂ ਭਾਵੋ ਯੋਬ੍ਬਞ੍ਞਾਦਿ.
੨੫੧. ਯੇ ਜਰਾਕਤਾ ਸੁਕ੍ਕਾ ਕੇਸਾਦਯੋ, ਤੇ ਪਲਿਤਂ ਨਾਮ ਸਿਯੁਂ, ਤੇਸਂ ਵਾ ਯਂ ਸੁਕ੍ਕਤ੍ਤਂ, ਤਂ ਪਲਿਤਂ ਨਾਮ. ਪਚ ਪਾਕੇ, ਇਤੋ, ਚਸ੍ਸ ਲਤ੍ਤਞ੍ਚ.
ਦ੍ਵਯਂ ਵਲਿਪਲਿਤਾਦਿਮਤਿ ਕਾਯਪਰਿਪਾਕੇ. ਜੀਯਨ੍ਤਿ ਵੁਡ੍ਢਾ ਭਵਨ੍ਤਿ ਅਸ੍ਸਂ ਜਰਾ, ਜਰ ਵਯੋਹਾਨਿਮ੍ਹਿ, ਜਰਾ ਏਵ ਜਰਤਾ, ਸਕਤ੍ਥੇ ਤਾਪਚ੍ਚਯੋ. ਵਿਸ੍ਸਸਾਤਿਪਿ ਜਰਾਯ ਨਾਮਂ. ਵਿਸੇਸੇਨ ਸਂਸਤੇ ਅਧੋ ਪਾਤਯਤੀਤਿ ਵਿਸ੍ਸਸਾ. ਸਂਸਤਿ’ਰਯਂ ਪਮਾਦਤ੍ਥੋ, ਅਵਸਂਸਨਤ੍ਥੋ ਚ, ਇਹ ਅਵਸਂਸਨਤ੍ਥੋ, ਨਿਗ੍ਗਹੀਤਲੋਪੋ, ਦ੍ਵਿਤ੍ਤਞ੍ਚ.
ਬਾਲ੍ਯਯੋਬ੍ਬਨਵੁਡ੍ਢਤ੍ਤਾਨਿ ਪੁਬ੍ਬੇ ਵੁਤ੍ਤਾਨਿ. ਇਦਾਨਿ ਤਬ੍ਬਤਿਨਾਮਾਨ੍ਯਾਹ. ਤਤ੍ਰ ਅਦ੍ਧਂ ਛਾਪਸਾਮਞ੍ਞੇ. ਪੁਥ, ਪਥ ਵਿਤ੍ਥਾਰੇ, ਉਕੋ, ਪੁਥੁਕੋ, ਪਲ ਗਮਨੇ, ਣ੍ਵੁ, ਅਸ੍ਸਿਤ੍ਤਂ, ਦ੍ਵਿਤ੍ਤਞ੍ਚ, ਪਿਲ੍ਲਕੋ. ਛੁਪ ਸਮ੍ਫਸ੍ਸੇ, ਉਸ੍ਸਾਤ੍ਤਂ, ਛਾਪੋ. ਕੁਮਾਰ ਕੀਲ਼ਾਯਂ, ਕੁਮਾਰੋ. ਬਲ ਪਾਣਨੇ, ਣੋ, ਬਾਲੋ, ਪੂ ਪਵਨੇ, ਤੋ, ਸਕਤ੍ਥੇ ਕੋ, ਪੋਤਕੋ, ਇਤ੍ਥਿਯਂ ਪੋਤਕੀ. ਪੋਤੋ, ਸਾਵੋ, ਸਾਵਕੋ, ਅਬ੍ਭਕੋ, ਡਿਮ੍ਭੋ, ਸੁਸੁਕੋ, ਸੁਸੁਇਚ੍ਚਾਦੀਨਿਪਿ ਛਾਪਸਾਮਞ੍ਞਤ੍ਥਾਨਿ.
੨੫੨. ਬਾਲਸਾਮਞ੍ਞਵਾਚਕਾਨਿ ਦਸ੍ਸੇਤ੍ਵਾ ਵਿਸੇਸਬਾਲਨਾਮਾਨਿ ਦਸ੍ਸੇਤੁਮਾਹ ‘‘ਅਥੁ’’ਚ੍ਚਾਦਿ. ਉਤ੍ਤਾਨੋ, ਉਤ੍ਤਾਨਂ ਵਾ ਸਯਤੀਤਿ ਉਤ੍ਤਾਨਸਯੋ. ਕਪਚ੍ਚਯੇ ਉਤ੍ਤਾਨਸੇਯ੍ਯਕੋ. ਥਨਂ ਪਿਵਤੀਤਿ ਥਨਪੋ, ਡਿਮ੍ਭਸਦ੍ਦੋਪ੍ਯਤ੍ਰ.
੨੫੩. ਸਤ੍ਤਕਂ ਤਰੁਣੇ.
ਆਸੋਲ਼ਸਾ ਭਵੇ ਬਾਲੋ,
ਤਰੁਣੋ ਤੁ ਤਤੋ ਭਵੇ;
ਵੁਦ੍ਧੋ ਤੁ ਸਤ੍ਤਤ੍ਯਾਯੁਮ੍ਹਾ,
ਤੀਣਿ ਵਯਾਨਿ ਲਕ੍ਖਯੇ.
ਤਰ ਤਰਣੇ, ਉਣੋ. ਵਯਸਿ ਯੋਬ੍ਬਨੇ ਤਿਟ੍ਠਤੀਤਿ ਵਯਟ੍ਠੋ, ਤੋ, ‘‘ਵਯੋ ਬਾਲ੍ਯਾਦਿ ਪਕ੍ਖੀ ਚ, ਯੋਬ੍ਬਨਞ੍ਚ ਵਯੋ ਕ੍ਵਚੀ’’ਤਿ [ਚਿਨ੍ਤਾਮਣਿਟੀਕਾ ੧੬.੪੨] ਰੁਦ੍ਦੋ, ਦਹ ਭਸ੍ਮੀਕਰਣੇ, ਅਰੋ, ਯੁ ਮਿਸ੍ਸਨੇ, ਅ, ਉਵਾਦੇਸੋ, ਸਿਸ੍ਸਾਕਾਰੋ. ਸਸ ਪ੍ਲੁਤਗਤਿਮ੍ਹਿ, ਉ, ਅਸ੍ਸੁਤ੍ਤਂ, ਸੁਸੁ, ਤਰੁਣਸ੍ਸ ਵਾ ਪਾਟਿਪਦਿਕਸ੍ਸ ਸੁਸ੍ਵਾਦੇਸੋ. ਮਨੁਨੋ ਅਪਚ੍ਚਂ ਮਾਨਵੋ, ਵਣ੍ਣਵਿਕਾਰੋ, ਨਸ੍ਸ ਣਤ੍ਤਂ, ਮਾਣਵੋ. ਕੁਚ੍ਛਾਯਂ ਕਪਚ੍ਚਯੋ, ਮਾਣਵਕੋਤਿ ਸਿਦ੍ਧਂ. ਵੁਤ੍ਤਞ੍ਚ –
‘‘ਅਪਚ੍ਚੇ ਕੁਚ੍ਛਿਤੇ ਮੂਲ਼੍ਹੇ, ਮਨੁਤੋਸ੍ਸਗ੍ਗਿਕੋ ਮਤੋ’’ਤਿ [ਮਹਾਭਾਸ੍ਸ ੪.੧.੧੬੧] ਦਰ ਵਿਦਾਰਣੇ, ਣ੍ਵੁ.
ਦ੍ਵਯਂ ਸੁਖਵਡ੍ਢਿਤੇ ਕੁਮਾਰੇ, ਸੁਖੋ ਕੁਮਾਰੋ ਸੁਕੁਮਾਰੋ, ਖਲੋਪੋ, ਸੁਖੇਨ ਏਧਤਿ ਵਦ੍ਧਤੀਤਿ ਸੁਖੇਧਿਤੋ. ‘‘ਸੁਖੋਚਿਤੋ’’ਤਿਪਿ ਪਾਠੋ, ਸੁਖਂ ਉਚਿਤਂ ਸਮ੍ਪਿਣ੍ਡਿਤਂ ਏਤ੍ਥਾਤਿ ਸੁਖੋਚਿਤੋ, ਉਚ ਸਮਵਾਯੇ.
੨੫੪-੨੫੫. ਦ੍ਵਿਪਾਦੇਨ ਵੁਡ੍ਢਸ੍ਸ ਨਾਮਾਨਿ. ਆਯੁਮਹਤ੍ਤਂ ਲਾਤੀਤਿ ਮਹਲ੍ਲਕੋ, ਣ੍ਵੁ, ਦ੍ਵਿਤ੍ਤਂ. ਵਡ੍ਢ ਵਡ੍ਢਨੇ, ਕਤ੍ਤਰਿ ਤੋ, ਤਸ੍ਸ ਢੋ, ਡ੍ਢਸ੍ਸ ਡੋ, ਅਸ੍ਸੁਤ੍ਤਂ, ਧਾ ਗਤਿਨਿਵਤ੍ਤਿਯਂ, ਇਰੋ, ਧਸ੍ਸ ਥਤ੍ਤਂ, ਇਸ੍ਸ ਏਤ੍ਤਂ. ਜਰ ਵਯੋਹਾਨਿਮ੍ਹਿ, ਕਤ੍ਤਰਿ ਤੋ, ਤਸ੍ਸ ਇਨ੍ਨਾਦੇਸੋ, ਧਾਤ੍ਵਨ੍ਤਲੋਪੋ, ਣਤ੍ਤਞ੍ਚ, ਜਿਣ੍ਣੋ, ਸਕਤ੍ਥੇ ਕਮ੍ਹਿ ਜਿਣ੍ਣਕੋ. ਪਕਤਂ ਵਯੋ ਯੋਬ੍ਬਨਮਸ੍ਸਾਤਿ ਪਵਯੋਤਿਪਿ ਵੁਡ੍ਢਸ੍ਸ ਨਾਮਂ.
ਵਲਿਨਨ੍ਤਾਨਿ ਪਾਦੇਨ ਨਾਮਾਨਿ. ਤਤ੍ਰ ਤਿਕਂ ਜੇਟ੍ਠਭਾਤਰਿ. ਅਗ੍ਗੇ ਪੁਰੇ ਕਾਲੇ, ਪੁਬ੍ਬੇ ਚ ਕਾਲੇ ਜਾਯਤੀਤਿ ਅਗ੍ਗਜੋ, ਪੁਬ੍ਬਜੋ ਚ. ਅਯਞ੍ਚ ਵੁਡ੍ਢੋ ਅਯਞ੍ਚ ਵੁਡ੍ਢੋ, ਅਯਮਿਮੇਸਂ ਵਿਸੇਸੇਨ ਵੁਡ੍ਢੋਤਿ ਜੇਟ੍ਠੋ, ਵੁਡ੍ਢਸਦ੍ਦਾ ਇਟ੍ਠਪਚ੍ਚਯੋ, ‘‘ਵੁਡ੍ਢਸ੍ਸ ਜੋ ਇਯਿਟ੍ਠੇਸੂ’’ਤਿ ਵੁਡ੍ਢਸ੍ਸ ਜੋ. ਅਲੋਪੇ ਪਰਸ੍ਸਾਸਵਣ੍ਣਤ੍ਤਂ.
ਤਿਕਂ ਪਚ੍ਛਾਜਾਤੇ ਭਾਤਰਿ. ਅਯਞ੍ਚ ਯੁਵਾ ਅਯਞ੍ਚ ਯੁਵਾ, ਅਯਮਿਮੇਸਂ ਵਿਸੇਸੇਨ ਯੁਵਾਤਿ ਕਨਿਟ੍ਠੋ, ਕਨਿਯੋ [ਕਣਿਟ੍ਠੋ ਕਣਿਯੋ (ਕ.)] ਚ. ਇਯਿਟ੍ਠੇਸੁ ਯੁਵਸਦ੍ਦਸ੍ਸ ਕਨਾਦੇਸੋ [ਕਣਾਦੇਸੋ (ਕ.)]. ਅਨੁ ਪਚ੍ਛਾਕਾਲੇ ਜਾਤੋ ਅਨੁਜੋ. ਜਘਞ੍ਞੇ ਪਚ੍ਛਾਕਾਲੇ ਜਾਤੋ ਜਘਞ੍ਞਜੋ. ਅਪਰਸ੍ਮਿਂ ਪਚ੍ਛਾਕਾਲੇ ਜਾਤੋ ਅਪਰਜੋਤਿ ਦ੍ਵੇਪ੍ਯਤ੍ਰ.
ਵਲਿ ਸਿਥਿਲਂ ਤਚੋ ਚਮ੍ਮਂ ਯਸ੍ਸ ਵਲਿਤ੍ਤਚੋ, ਦ੍ਵਿਤ੍ਤਂ. ਵਲਿ ਚਮ੍ਮਮੇਤਸ੍ਸਤ੍ਥੀਤਿ ਵਲਿਨੋ, ਇਨੋ. ਉਤ੍ਤਾਨਸਯਾਦਯੋ ਵਲਿਨਨ੍ਤਾ ਵਾਚ੍ਚਲਿਙ੍ਗਤ੍ਤਾ ਤੀਸੁ ਲਿਙ੍ਗੇਸੁ ਵਤ੍ਤਨ੍ਤਿ, ਯਥਾ – ਉਤ੍ਤਾਨਸਯੋ ਬਾਲੋ, ਉਤ੍ਤਾਨਸਯਾ ਕੁਮਾਰੀ, ਉਤ੍ਤਾਨਸਯਂ ਨਪੁਂਸਕਂ.
੨੫੬. ਪਞ੍ਚਕਂ ਮਤ੍ਥਕੇ. ਸਿ ਸਯੇ, ਸੋ, ਦੀਘੋ ਚ, ਅਙ੍ਗੇਸੁ ਉਤ੍ਤਮਙ੍ਗਤ੍ਤਾ ਉਤ੍ਤਮਙ੍ਗਂ, ਉਤ੍ਤਮੋ ਚ ਤਂ ਅਙ੍ਗਞ੍ਚਾਤਿਪਿ ਉਤ੍ਤਮਙ੍ਗਂ. ਸੀਸਞ੍ਚ ਉਤ੍ਤਮਙ੍ਗਞ੍ਚ ਸੀਸੋਤ੍ਤਮਙ੍ਗਾਨਿ. ਸਿ ਸੇਵਾਯਂ, ਰੋ, ਸੇਵਨ੍ਤਿ ਏਤੇਨਾਤਿ ਸਿਰੋ. ਮੁਦ ਤੋਸੇ, ਧੋ. ਸਿਸ੍ਸਾਕਾਰੋ. ਮਸ ਆਮਸਨੇ, ਤ੍ਥੋ, ਸਕਤ੍ਥੇ ਕੋ ਚ, ਮਸਿ ਪਰਿਮਾਣੇ ਵਾ.
ਪਜ੍ਜਦ੍ਧਂ ਕੇਸੇ. ਕੇ ਮਤ੍ਥਕੇ ਸੇਤਿ ਤਿਟ੍ਠਤੀਤਿ ਕੇਸੋ. ਸਤ੍ਤਮਿਯਾਲੋਪੋ, ਕਤਿ ਛੇਦਨੇ, ਅਲੋ, ਅਸ੍ਸੁਤ੍ਤਂ. ਵਲ ਸਂਵਰਣੇ, ਕਮ੍ਮਨਿ ਣਪਚ੍ਚਯੋ, ਵਾਲੋ. ਉਤ੍ਤਮਙ੍ਗੇ ਸੀਸੇ ਰੁਹਤੀਤਿ ਉਤ੍ਤਮਙ੍ਗਰੁਹੋ. ਮੁਦ੍ਧਨਿ ਜਾਯਤੀਤਿ ਮੁਦ੍ਧਜੋ. ਵਾਲੋ ਚ ਉਤ੍ਤਮਙ੍ਗਰੁਹੋ ਚ ਮੁਦ੍ਧਜੋ ਚੇਤਿ ਇਤਰੀਤਰਯੋਗਦ੍ਵਨ੍ਦੋ. ਚਿਕੁਰੋ, ਕਚੋਤਿਪ੍ਯਤ੍ਰ. ਚਿ ਚਯਨੇ, ਕੁਰ ਸਦ੍ਦੇ, ਅਨੇਕਤ੍ਥਤ੍ਤਾ ਛੇਦਨੇ. ਵਡ੍ਢਮਾਨੋ ਚਿਕਰੀਯਤੇਤਿ ਚਿਕੁਰੋ, ਕਚ ਬਨ੍ਧਨੇ, ਅ.
੨੫੭. ਕੁਸੁਮਗਬ੍ਭਾ ਕੇਸਾ ਕੇਸਚੂਲ਼ਾ ਮੁਤ੍ਤਿਕਾਦਿਨਾ ਬਹਿ ਸਂਯਤਾ ਸਨ੍ਥਤਾ ਧਮ੍ਮਿਲੋ ਨਾਮ. ਏਕਤੋ ਕਤ੍ਵਾ ਧਰੀਯਤਿ ਬਨ੍ਧੀਯਤੀਤਿ ਧਮ੍ਮਿਲੋ, ਕਮ੍ਮਨਿ ਇਲੋ. ਧਮ੍ਮੇਨ ਨਾਨਾਦੇਸਿਯਮਨੁਸ੍ਸਾਨਂ ਸਮਾਚਾਰੇਨ ਇਲਤੀਤਿ ਵਾ ਧਮ੍ਮਿਲੋ, ਇਲ ਗਮਨੇ.
ਦ੍ਵਯਂ ਕੁਮਾਰਾਨਂ ਸਿਖਾਪਞ੍ਚਕੇ, ਚੂਲ਼ਤ੍ਤਯੇਤਿ ਕੇਚਿ. ਕਾਕਾਨਂ ਪਕ੍ਖਸਣ੍ਠਾਨਤ੍ਤਾ ਕਾਕਪਕ੍ਖੋ. ਸਿਖਾ ਏਵ ਸਿਖਣ੍ਡਕੋ, ਸਕਤ੍ਥੇ ਕੋ. ਸਿਖਾਸਿਖਣ੍ਡਸਦ੍ਦਾਨਮਭੇਦਤ੍ਤਾਯੇਵ ਹਿ ‘‘ਸਿਖਣ੍ਡੀ, ਸਿਖੀ ਚਾ’’ਤਿ ਮੋਰੋ ਵੁਤ੍ਤੋ.
ਪਾਸੋ, ਹਤ੍ਥੋ ਚ ਇਮੇ ਦ੍ਵੇ ਕੇਸਚਯੇ ਕੇਸਪਰਿਯਾਯਤੋ ਪਰੇ ਹੁਤ੍ਵਾ ਕੇਸਾਨਂ ਕਲਾਪੇ ਵਤ੍ਤਨ੍ਤਿ, ਨ ਕੇਵਲਾ, ਯਥਾ – ਕੇਸਪਾਸੋ ਕੇਸਹਤ੍ਥੋ ਇਚ੍ਚਾਦਿ. ਪਾ ਰਕ੍ਖਣੇ, ਪਾਤਿ ਰਕ੍ਖਤਿ ਅਵਯਵੇਤਿ ਪਾਸੋ, ਸੋ, ਪਸ ਬਨ੍ਧਨੇਤਿ ਕੇਚਿ, ਣੋ. ਹਨ ਗਤਿਯਂ, ਅਵਯਵਾ ਨਿਹਨਨ੍ਤਿ ਏਤ੍ਥਾਤਿ ਹਤ੍ਥੋ, ਥੋ, ਪਕ੍ਖੋਪ੍ਯਤ੍ਰ.
ਤਾਪਸਾਨਂ ਵਤੀਨਂ ਤਹਿਂ ਕੇਸਚਯੇ ਜਟਾਸਦ੍ਦੋ ਵੁਚ੍ਚਤਿ, ਜਟ ਜਟਨੇ, ਜਟ ਸਙ੍ਘਾਤੇ ਵਾ, ‘‘ਇਤ੍ਥਿਯਮਤਿਯਵੋ ਵਾ’’ਤਿ ਅ.
੨੫੮. ਪੋਸਿਤਭਤ੍ਤਾਦੀਹਿ ਯਾ ਬਨ੍ਝਤੇ, ਤਤ੍ਰ ਵੇਣੀ, ਪਵੇਣੀ ਚ. ਵੀ ਪਜਨੇ, ਪਜਨਂ ਗਬ੍ਭਵਿਮੋਕ੍ਖੋ, ਵੀ ਤਨ੍ਤਸਨ੍ਤਾਨੇ ਵਾ, ਣੀ. ਪਕ੍ਖੇ ਪਵੇਣੀ.
ਦ੍ਵਯਂ ਸੀਸਮਜ੍ਝਟ੍ਠਚੂਲ਼ਾਯਂ. ਚੂਲ਼ ਸਞ੍ਚੋਦਨੇ, ਚੂਲ਼ ਹਾਵਕਰਣੇ ਵਾ, ਅ. ਸਿਖਾ ਵੁਤ੍ਤਾ. ਕੇਸਪਾਸੀਪ੍ਯਤ੍ਰ, ਨਦਾਦਿ.
ਨਾਰੀਨਂ ਕੇਸਮਜ੍ਝਮ੍ਹਿ ਪਦ੍ਧਤਿ ਉਜੁਗਤਮਗ੍ਗੋ ਸੀਮਨ੍ਤੋਤਿ ਮਤੋ ਕਥਿਤੋ. ਸੀਮਸ੍ਸ ਅਨ੍ਤੋ ਸੀਮਨ੍ਤੋ, ਸੀ ਸਯੇ ਵਾ, ਅਨ੍ਤੋ, ਮਜ੍ਝੇ ਮਕਾਰਵਣ੍ਣਾਗਮੋ.
੨੫੯. ਤਿਕਂ ਲੋਮੇ. ਲੂ ਛੇਦਨੇ, ਵਡ੍ਢਮਾਨਂ ਲੂਯਤੇਤਿ ਲੋਮਂ, ਮੋ. ਤਨੁਮ੍ਹਿ ਰੁਹਤੀਤਿ ਤਨੁਰੁਹਂ, ਅ. ਰੁਹ ਜਨਨੇ, ਰੂਹ ਪਾਤੁਭਾਵੇ ਵਾ, ਮੋ, ਹਲੋਪੋ, ਓਤ੍ਤਞ੍ਚ, ਲੂ ਛੇਦਨੇ ਵਾ, ਮੋ, ਲਸ੍ਸ ਰਤ੍ਤਂ, ਰੋਮਂ. ਅਕ੍ਖਿਮ੍ਹਿ ਜਾਤਂ ਲੋਮਂ ਪਮ੍ਹਂ, ਪਖੁਮਞ੍ਚੋਚ੍ਚਤੇ. ਪਮਿਨੋਤਿ ਤੇਨਾਤਿ ਪਮ੍ਹਂ,ਪਪੁਬ੍ਬੋ ਮਾ ਪਰਿਮਾਣੇ, ਹਪਚ੍ਚਯੋ. ਅਕ੍ਖਿਨੋ ਪਕ੍ਖਦ੍ਵਯੇ ਜਾਤਂ ਪਖੁਮਂ, ਉਮੋ, ਕਲੋਪੋ ਚ.
ਪੁਮਮੁਖੇ ਪੁਰਿਸਾਨਂ ਮੁਖੇ ਵੁਤ੍ਤਂ [ਪਵੁਟ੍ਠਂ (ਕ.)] ਲੋਮਂ ਮਸ੍ਸੁ ਨਾਮ, ਮਸ ਆਮਸਨੇ, ਸੁ, ਮਸ੍ਸੁ.
ਤਿਕਂ ਭਮੁਮ੍ਹਿ. ਭਮ ਅਨਵਟ੍ਠਾਨੇ, ਊ, ਮਲੋਪੋ, ਭੂ. ਉਮ੍ਹਿ ਭਮੁ, ਕਪਚ੍ਚਯੇ ਭਮੁਕੋ. ਭਮੁਕਸਹਚਰਣਤੋ ਭਮੁ ਪੁਲ੍ਲਿਙ੍ਗੋ.
੨੬੦. ਤਿਕਂ ਨੇਤ੍ਤੋਦਕੇ. ਖਿਪ ਪੇਰਣੇ, ਪੋ, ਇਸ੍ਸਤ੍ਤਂ. ਨੇਤ੍ਤੇ ਜਾਤਂ ਜਲਂ ਨੇਤ੍ਤਜਲਂ. ਅਸ ਅਧੋਪਤਨੇ, ਸੁ, ਅਸ੍ਸੁ. ਨੇਤ੍ਤਜਲਞ੍ਚ ਅਸ੍ਸੁ ਚਾਤਿ ਦ੍ਵਨ੍ਦੋ. ਅਸ੍ਸੁ ਨਪੁਂਸਕੇ.
ਦ੍ਵਯਂ ਅਕ੍ਖਿਪੁਤ੍ਤਲਿਕਾਯਂ. ਨੇਤ੍ਤੇ ਦਿਸ੍ਸਮਾਨਾ ਤਾਰਾ ਨੇਤ੍ਤਤਾਰਾ. ਕਞ੍ਞਾਸਦ੍ਦਤੋ ਤਦ੍ਧਿਤੋ ਅਪਚ੍ਚਯੋ, ਕਞ੍ਞਾਸਦ੍ਦਸ੍ਸ ਕਨੀਨਾਦੇਸੋ, ਇਤ੍ਥਿਕਤਾਕਾਰਪਰੇ ਕੇ ਪੁਬ੍ਬੋ ਅਕਾਰੋ ਇਕਾਰਮਾਪਜ੍ਜਤੇ [ਕਾਤਨ੍ਤ ੨.੨.੬੫], ਕਨੀਨਿਕਾ. ਤਾਰਕਾਪ੍ਯਤ੍ਰ.
ਛਕ੍ਕਂ ਮੁਖਵਿਵਰੇ, ਕਵਯੋ ਪਨ ਤਦੁਪਲਕ੍ਖਿਤੇਪਿ ਸਮੁਦਾਯੇ ਯੁਜ੍ਜਨ੍ਤੇ. ਵਦ ਵਿਯਤ੍ਤਿਯਂ ਵਾਚਾਯਂ, ਕਰਣੇ ਯੁ. ਮੁ ਬਨ੍ਧਨੇ, ਖੋ, ਓਤ੍ਤਾਭਾਵੋ ਨਿਪਾਤਨਾ, ਮੁਖਂ. ਸਬ੍ਬਧਰਕਤੇ ਪਨ ਖਞ੍ਞਤੇਤਿ ਧਾਤੁਨਾ ਮੁਖਨ੍ਤਿ ਨਿਪਾਤਿਤਂ, ਖਨੁ ਅਵਦਾਰਣੇ. ਤੁਡਿ ਤੋਡਨੇ, ਅ. ਤਨੁ ਵਿਤ੍ਥਾਰੇ ਵਾ, ਡੋ, ਅਸ੍ਸੁਤ੍ਤਂ. ਵਦਤਿ ਤੇਨਾਤਿ ਵਤ੍ਤਂ, ਤੋ, ਵੁਚ੍ਚਤੇ ਅਨੇਨਾਤਿ ਵਾ ਵਤ੍ਤਂ. ਵਦ ਵਿਯਤ੍ਤਿਯਂ ਵਾਚਾਯਂ, ਤੋ. ਲਪ ਵਚਨੇ, ਕਰਣੇ ਯੁ. ਆਨਨ੍ਤਿ ਅਸਨ੍ਤਿ ਅਨੇਨਾਤਿ ਆਨਨਂ, ਅਨ ਪਾਣਨੇ, ਯੁ. ਅਸ੍ਸਂਪ੍ਯਤ੍ਰ. ਅਸ ਭਕ੍ਖਨੇ. ਕਰਣੇ ਸੋ.
੨੬੧. ਅਡ੍ਢਂ ਦਨ੍ਤੇ. ਦ੍ਵੀਸੁ ਠਾਨੇਸੁ ਦ੍ਵਿਕ੍ਖਤ੍ਤੁਂ ਵਾ ਜਾਯਤੇਤਿ ਦ੍ਵਿਜੋ. ਲਪਨੇ ਮੁਖੇ ਜਾਯਤੀਤਿ ਲਪਨਜੋ. ਦਾ ਅਵਖਣ੍ਡਨੇ, ਦਾਯਤਿ ਭਕ੍ਖਮਨੇਨਾਤਿ ਦਨ੍ਤੋ, ਅਨ੍ਤੋ, ਦਸ ਅਦਨੇ ਵਾ, ਦਸਨ੍ਤਿ ਭੋਜ੍ਜਮਨੇਨਾਤਿ ਦਨ੍ਤੋ, ਅਨ੍ਤੋ, ਧਾਤ੍ਵਨ੍ਤਲੋਪੋ. ਦਮੁ ਦਮਨੇ ਵਾ, ਤੋ. ਦਂਸ ਦਂਸਨੇ, ਦਂਸਤੇ ਵਿਲਿਖ੍ਯਤੇ ਭਕ੍ਖਮਨੇਨਾਤਿ ਦਂਸਨੋ, ਯੁ. ਰਦ ਵਿਲੇਖਨੇ, ਯੁ, ਰਦਨੋ. ਅਮ੍ਹਿ ਰਦੋ.
ਦਨ੍ਤਭੇਦਸ੍ਮਿਂ ਦਨ੍ਤਵਿਸੇਸੇ ਦਾਠਾਸਦ੍ਦੋ. ਇਤ੍ਥਿਲਿਙ੍ਗੋਯਂ. ਦਂਸਧਾਤੁਤੋ ਠੋ, ਦਂਸਿਸ੍ਸ ਚ ਦਾ, ਦਾਠਾ, ਮੁਦ੍ਧਜਦੁਤਿਯੋਯਂ. ਅਕ੍ਖਿਕੋਟੀਸੁ ਵਾਮਦਕ੍ਖਿਣਨੇਤ੍ਤਾਨਂ ਅਨ੍ਤੇਸੁ ਅਪਾਙ੍ਗੋ ਵਤ੍ਤਤਿ, ਸਰੀਰਙ੍ਗਸਙ੍ਖਾਤਸ੍ਸ ਕਣ੍ਣਸ੍ਸ ਅਪ ਸਮੀਪਂ ਅਪਾਙ੍ਗੋ.
੨੬੨. ਚਤੁਕ੍ਕਂ ਓਟ੍ਠੇ. ਦਨ੍ਤੇ ਆਵਰਤਿ ਛਾਦਯਤੀਤਿ ਦਨ੍ਤਾਵਰਣਂ. ਉਸ ਦਾਹੇ, ਤੋ, ‘‘ਸਾਦਿਸਨ੍ਤਪੁਚ੍ਛਭਨ੍ਜਹਂਸਾਦੀਹਿ ਟ੍ਠੋ’’ਤਿ ਸਹਾਦਿਬ੍ਯਞ੍ਜਨੇਨ ਟ੍ਠੋ, ਓਤ੍ਤਦ੍ਵਿਤ੍ਤਾਨਿ, ਓਟ੍ਠੋ. ਗਦ੍ਰਭੇਪ੍ਯਯਂ. ਅਥ ਵਾ ਉਸ ਦਾਹੇ, ਟ੍ਠੋ, ਓਤ੍ਤਦ੍ਵਿਤ੍ਤਾਦਿ, ਉਭਯਤ੍ਰਾਪਿ ਮੁਦ੍ਧਜਦੁਤਿਯੋ, ਈਸਂ ਕਿਞ੍ਚਿ ਕਾਲਂ ਧਾਰੇਤਿ ਭਕ੍ਖਮੇਤ੍ਥਾਤਿ ਅਧਰੋ, ਈਸਤ੍ਥੋ ਹ੍ਯਤ੍ਰ ਅਕਾਰੋ.
‘‘ਅ ਪੁਮੇ ਮਾਧਵੇ ਞੇਯ੍ਯੋ,
ਪਟਿਸੇਧੇ ਤਦਬ੍ਯਯਂ;
ਈਸਤ੍ਥੇ ਚ ਵਿਰੁਦ੍ਧਤ੍ਥੇ,
ਸਦਿਸਤ੍ਥੇ ਪਯੋਗਤੋ’’ਤਿ. –
ਹਿ ਏਕਕ੍ਖਰਕੋਸੇ ਵੁਤ੍ਤਂ. ਦਸਨੇ ਦਨ੍ਤੇ ਛਾਦਯਤੀਤਿ ਦਸਨਚ੍ਛਦੋ. ਏਤ੍ਥ ਕੇਚਿ ਅਧਰਸਦ੍ਦੇਨ ਹੇਟ੍ਠਿਮੋਟ੍ਠਮੇਵਾਹੁ, ਤੇਸਂ ਵਚਨਂ ‘‘ਨੇਤ੍ਤਨ੍ਤਾਧਰਪਾਣਿਪਾਦਯੁਗਲੇਹਿ’’ਚ੍ਚਾਦੀਹਿ ਮਹਾਕਵਿਪਯੋਗੇਹਿ ਅਸਂਸਨ੍ਦਨਤੋ ਨ ਗਹੇਤਬ੍ਬਂ.
ਤਿਕਂ ਕਪੋਲੇ. ਗਡਿ ਵਦਨੇਕਦੇਸੇ, ਅ, ਧਾਤੁਪ੍ਪਕ੍ਰਿਯਤ੍ਥਞ੍ਹਿ ਧਾਤੁਪਾਠਵਚਨਂ, ਸਬ੍ਬਤ੍ਰਾਪ੍ਯੇਵਂ. ਕੇਨ ਜਲੇਨ ਪੂਰਿਯਤੇਤਿ ਕਪੋਲੋ, ਅਲੋ, ਕਪ ਅਚ੍ਛਾਦਨੇ ਵਾ, ਓਲੋ, ਕਪੋਲੋ, ਨਦਾਦਿ. ਗਣ੍ਡੀ. ਅਧਰਾ ਅਧੋਭਾਗੋ ਚੁਬੁਕਂ ਨਾਮ, ਚਿਬੁਕਂਪ੍ਯਤ੍ਰ. ਚਿਬੁ ਓਲਮ੍ਬਕੇ, ਣ੍ਵੁ, ਅਸ੍ਸੁਤ੍ਤਂ.
੨੬੩. ਦ੍ਵਯਂ ਗੀਵਾਯ ਪੁਰੋਭਾਗੇ. ਗਲ ਅਦਨੇ, ਕਰਣੇ ਅ, ਗਿਲ ਗਿਲਨੇ ਵਾ, ਗਿਲਤਿ ਅਨੇਨਾਤਿ ਗਲੋ, ਇਸ੍ਸਤ੍ਤਂ. ਕਣ ਸਦ੍ਦਤ੍ਥੋ ਦਣ੍ਡਕੋ ਧਾਤੁ, ਠੋ, ਕਣ੍ਠੋ, ਮੁਦ੍ਧਜਦੁਤਿਯੋਯਂ.
ਤਿਕਂ ਏਕਤ੍ਥਂ. ਗਾ ਸਦ੍ਦੇ, ਈਵੋ. ਕਂ ਸੀਸਂ ਧਰਤੀਤਿ ਕਨ੍ਧਰਾ. ਸਿਰਂ ਧਰਤੀਤਿ ਸਿਰੋਧਰਾ, ਸਿਰੋ ਧਿਯ੍ਯਤੇ ਅਸ੍ਸਨ੍ਤਿ ਵਾ ਸਿਰੋਧਰਾ, ਧਾ ਗਤਿਨਿਵਤ੍ਤਿਯਂ, ਅਰੋ.
ਸੁਵਣ੍ਣਮਯੋ ਆਲਿਙ੍ਗੋ ਮੁਰਜਭੇਦੋ, ਤੇਨ ਸਨ੍ਨਿਭਾ ਸਦਿਸਾ ਯਾ ਗੀਵਾ, ਸਾ ਕਮ੍ਬੁਗੀਵਾ ਮਤਾ, ਮਹਾਪੁਰਿਸਲਕ੍ਖਣਮੇਤਂ. ਅਥ ਵਾ ਯਾ ਗੀਵਾ ਤੀਹਿ ਲੇਖਾਹਿ ਅਙ੍ਕਿਤਾ ਲਕ੍ਖਿਤਾ, ਸਾ ਕਮ੍ਬੁਗੀਵਾ ਮਤਾ, ਮਹਾਪੁਰਿਸਲਕ੍ਖਣਮੇਤਞ੍ਚ. ਕਮ੍ਬੁ ਵੁਚ੍ਚਤਿ ਸੁਵਣ੍ਣਂ, ਕਮ੍ਬੁਮਯੇਨ ਆਲਿਙ੍ਗੇਨ ਸਨ੍ਨਿਭਾ ਗੀਵਾ ਕਮ੍ਬੁਗੀਵਾ, ਕਮ੍ਬ ਸਂਵਰਣੇ, ਉ, ਕਮ੍ਬੁ.
੨੬੪. ਤਿਕਂ ਖਨ੍ਧੇ. ਅਨ ਗਤਿਯਂ, ਸੋ. ਭੁਜਾਨਂ ਸਿਰੋ ਮਤ੍ਥਕਂ ਭੁਜਸਿਰੋ. ਕਂ ਮਤ੍ਥਕਂ ਦਧਾਤੀਤਿ ਕਨ੍ਧੋ, ਸੋ ਏਵ ਖਨ੍ਧੋ ਕਕਾਰਸ੍ਸ ਖਕਾਰਕਰਣਵਸੇਨ, ਖਮਤਿ ਭਾਰਨ੍ਤਿ ਵਾ ਖਨ੍ਧੋ, ਖਮੁ ਸਹਨੇ, ਤੋ, ਤਸ੍ਸ ਧੋ, ਮਸ੍ਸ ਨੋ, ਨਿਗ੍ਗਹੀਤਂ ਵਾ. ਤਸ੍ਸਨ੍ਧਿ ਤਸ੍ਸ ਖਨ੍ਧਸ੍ਸ ਮਜ੍ਝਂ ਜਤ੍ਤੁ ਨਾਮ, ਯਂ ਖਨ੍ਧਾਨਂ ਮਜ੍ਝੇ ਤਿਟ੍ਠਤਿ. ਜਨ ਜਨਨੇ, ਜਰ ਵਯੋਹਾਨਿਮ੍ਹਿ ਵਾ, ਤੁ, ਜਤ੍ਤੁ, ਤਂ ਨਪੁਂਸਕਂ.
ਦ੍ਵਯਂ ਬਾਹੁਮੂਲੇ. ਬਾਹੂਨਂ ਭੁਜਾਨਂ ਮੂਲਂ ਬਾਹੁਮੂਲਂ. ਕਚ ਬਨ੍ਧਨੇ, ਛੋ. ਅਸ੍ਸ ਕਚ੍ਛਸ੍ਸ ਅਧੋਭਾਗਟ੍ਠਾਨਂ ਪਸ੍ਸਂ ਵੁਚ੍ਚਤਿ, ਦਿਸ ਪੇਕ੍ਖਨੇ, ਅਪਚ੍ਚਯੋ, ਦਿਸਸ੍ਸ ਪਸ੍ਸਾਦੇਸੋ.
੨੬੫. ਤਿਕਂ ਬਾਹੁਮ੍ਹਿ. ਵਹਤਿ ਅਨੇਨਾਤਿ ਵਾਹੁ, ਵਾਹੁ ਏਵ ਬਾਹੁ, ਕੁ [ਣ੍ਵਾਦਿ ੬]. ਭੁਞ੍ਜਤੇ ਅਨੇਨਾਤਿ ਭੁਜੋ. ਭੁਜ ਪਾਲਨਜ੍ਝੋਹਾਰੇਸੁ. ਬਾਹੁ ਚ ਭੁਜੋ ਚੇਤਿ ਦ੍ਵਨ੍ਦੋ, ਏਤੇ ਦ੍ਵੇ ਦ੍ਵੀਸੁ, ਇਤ੍ਥਿਯਂ ਭੁਜਾ. ਵਹਤਿ ਯਾਯਾਤਿ ਬਾਹਾ. ਅਪਰੋਸਦ੍ਦੋਪ੍ਯਤ੍ਰ [ਅ ਪਾਰੋਸਦ੍ਦੋਪ੍ਯਤ੍ਰ (ਕ.), ਅ ਪਵੇਟ੍ਠਸਦ੍ਦੋਪ੍ਯਤ੍ਰ (?)].
ਤਿਕਂ ਹਤ੍ਥੇ. ਹਸ ਹਸਨੇ, ਥੋ. ਹਰ ਹਰਣੇ ਵਾ. ਨਕ੍ਖਤ੍ਤੇਪ੍ਯਯਂ. ਕਰ ਕਰਣੇ, ਅ. ਪਣ ਬ੍ਯਵਹਾਰਥੁਤੀਸੁ, ਇ. ਪਾ ਰਕ੍ਖਨੇ ਵਾ, ਣਿ. ਕਰੋ ਚ ਪਾਣਿ ਚ ਕਰਪਾਣਯੋ. ਪਞ੍ਚਸਾਖੋ, ਸਯੋਪ੍ਯਤ੍ਰ.
ਪਕੋਟ੍ਠਨ੍ਤੋ ਹਤ੍ਥਗਣ੍ਠਿ ਮਣਿਬਨ੍ਧੋ ਨਾਮ. ਪਕੋਟ੍ਠੋ ਨਾਮ ਆਮਣਿਬਨ੍ਧਂ ਕਪ੍ਪਰਸ੍ਸ ਅਧੋਭਾਗੋ. ਮਣਿਵਿਕਤਿਂ ਬਨ੍ਧਤਿ ਏਤ੍ਥਾਤਿ ਮਣਿਬਨ੍ਧੋ. ਕੁਸ ਅਕ੍ਕੋਸੇ, ਠੋ, ਪਕੋਟ੍ਠੋ.
ਦ੍ਵਯਂ ਭੁਜਮਜ੍ਝਗਣ੍ਠਿਮ੍ਹਿ. ਕਪੁ ਹਿਂਸਾਯਂ, ਅਰੋ. ਕੁਪ੍ਪਰੋਤਿਪਿ ਪਾਠੋ, ਤਦਾ ਅਸ੍ਸੁਤ੍ਤਂ. ਕਪੁ ਹਿਂਸਾਯਂ, ਓਣਿ, ਕਪੋਣਿ, ਇਤ੍ਥਿਯਂ. ਕਫੋਣੀਪ੍ਯਤ੍ਰ, ਤਤ੍ਥ ਪਸ੍ਸ ਫਤ੍ਤਂ.
੨੬੬. ਪਾਣਿਸ੍ਸ ਪਾਣਿਤਲਸ੍ਸ ਸਮ੍ਬਨ੍ਧੀਨਂ ਮਣਿਬਨ੍ਧਕਨਿਟ੍ਠਾਨਂ ਦ੍ਵਿਨ੍ਨਂ ਅਨ੍ਤਰਂ ਬਹਿਟ੍ਠਾਨਂ ਕਰਭੋ ਵੁਚ੍ਚਤਿ, ਯੇਨ ਕੁਮਾਰਕਾ ਸਤ੍ਥਂ ਕਤ੍ਵਾ ਅਞ੍ਞਮਞ੍ਞਂ ਪਹਰਨ੍ਤਿ, ਕਰ ਹਿਂਸਾਯਂ, ਅਭੋ, ਕਰ ਕਰਣੇ ਵਾ.
ਦ੍ਵਯਂ ਅਙ੍ਗੁਲਿਮਤ੍ਤੇ. ਕਰਸ੍ਸ ਪਾਣਿਸ੍ਸ ਸਾਖਾ ਕਰਸਾਖਾ. ਅਗਿ ਗਤ੍ਯਤ੍ਥੋ, ਅਙ੍ਗ ਗਮਨਤ੍ਥੋ ਵਾ, ਉਲਿ. ਇਤ੍ਥਿਲਿਙ੍ਗੋਯਂ [(ਨਦਾਦਿ) (ਕ.)], ਅਙ੍ਗੁਲਿ.
ਤਾ ਅਙ੍ਗੁਲਿਯੋ ਪਞ੍ਚਪ੍ਪਭੇਦਾ, ਯਥਾ – ਅਙ੍ਗੁਟ੍ਠੋ ਤਜ੍ਜਨੀ ਮਜ੍ਝਿਮਾ ਅਨਾਮਿਕਾ ਕਨਿਟ੍ਠਾ ਚੇਤਿ ਕਮਾ ਸਿਯੁਂ. ਅਙ੍ਗ ਗਮਨਤ੍ਥੋ, ਅਸ੍ਸੁਤ੍ਤਂ, ਅਗ੍ਗੇ ਪੁਰੇ ਤਿਟ੍ਠਤੀਤਿ ਵਾ ਅਙ੍ਗੁਟ੍ਠੋ, ਨਿਗ੍ਗਹੀਤਾਗਮੋ, ਅਸ੍ਸੁਤ੍ਤਞ੍ਚ. ਤਜ੍ਜ ਹਿਂਸਾਯਂ, ਤਜ੍ਜੇਤਿ ਯਾਯ, ਸਾ ਤਜ੍ਜਨੀ, ਯੁ, ਨਦਾਦਿ. ਮਜ੍ਝੇ ਤਿਟ੍ਠਤੀਤਿ ਮਜ੍ਝਿਮਾ. ਨਤ੍ਥਿ ਨਾਮਮਸ੍ਸਾਤਿ ਅਨਾਮਿਕਾ, ਸਕਤ੍ਥੇ ਕੋ. ਅਤਿਸਯੇਨ ਖੁਦ੍ਦਕਾਤਿ ਕਨਿਟ੍ਠਾ. ਯੁਵਪ੍ਪਾਨਂ ਕਨ, ਕਣ ਵਾ ਇਯਿਟ੍ਠੇਸੁ.
੨੬੭. ਤਜ੍ਜਨ੍ਯਾਦੀਹਿ ਯੁਤੇ ਅਙ੍ਗੁਟ੍ਠੇ ਤਤੇ ਪਸਾਰਿਤੇ ਸਤਿ ਪਦੇਸਾਦਿਕਾ ਚਤਸ੍ਸੋ ਸਞ੍ਞਾ ਕਮਤੋ ਸਿਯੁਂ, ਯਥਾ – ਤਜ੍ਜਨੀਯੁਤੇ ਅਙ੍ਗੁਟ੍ਠੇ ਤਤੇ ਪਦੇਸੋ. ਦਿਸ ਪੇਕ੍ਖਨੇ. ਮਜ੍ਝਿਮਯੁਤੇ ਅਙ੍ਗੁਟ੍ਠੇ ਤਤੇ ਤਾਲੋ, ਤਲ ਪਤਿਟ੍ਠਾਯਂ. ਅਨਾਮਿਕਾਸਹਿਤੇ ਅਙ੍ਗੁਟ੍ਠੇ ਤਤੇ ਗੋਕਣ੍ਣੋ, ਗੋਕਣ੍ਣਸਦਿਸਤ੍ਤਾ, ਤਪ੍ਪਮਾਣਤ੍ਤਾ ਵਾ ਗੋਕਣ੍ਣੋ, ਅਥ ਵਾ ਗੋਕਣ੍ਣੋ ਨਾਮ ਏਕੋ ਮਿਗਵਿਸੇਸੋ, ਤਕ੍ਕਣ੍ਣਸਦਿਸਪ੍ਪਮਾਣਤ੍ਤਾ ਗੋਕਣ੍ਣੋ, ਤਾਲੋ ਚ ਗੋਕਣ੍ਣੋ ਚ ਤਾਲਗੋਕਣ੍ਣਾ. ਲਿਙ੍ਗਭੇਦਾ ‘‘ਤਾਲਗੋਕਣ੍ਣਵਿਦਤ੍ਥੀ’’ਤਿ ਨ ਵੁਤ੍ਤਂ, ਕਨਿਟ੍ਠਾਯੁਤੇ ਅਙ੍ਗੁਟ੍ਠੇ ਤਤੇ ਵਿਦਤ੍ਥਿ, ਵਿਤਨੋਤੀਤਿ ਵਿਤਤ੍ਥਿ, ਵਿਤਤ੍ਥਿ ਏਵ ਵਿਦਤ੍ਥਿ, ਤਨੁ ਵਿਤ੍ਥਾਰੇ,ਤਿ, ਤਸ੍ਸ ਥੋ. ਵਿਦਤ੍ਥਿ. ‘‘ਕਮਾ ਤਤੋ’’ਤਿਪਿ ਪਾਠੋ.
ਕੁਞ੍ਚਿਤੋ ਸਙ੍ਕੋਚਿਤੋ ਪਾਣਿ ਪਸਤਾਖ੍ਯੋ, ਪਪੁਬ੍ਬੋ ਸਰ ਗਤਿਯਂ, ਤੋ. ਪਮਾਣਪ੍ਪਕਰਣਤੋ ਵਿਤਤਞ੍ਜਲਿਯੇਵਾਯਂ ਕਵੀਹਿ ਇਚ੍ਛਿਤੋ. ਸਮ੍ਪੁਟਞ੍ਜਲਿ ਪਨਾਯਂ, ਪਸਾਰਿਤਸਹਿਤਾ [ਪਸਾਰਿਤਸਹਿਤਤ੍ਤਾ (ਕ.)] ਯਸ੍ਸ ਅਙ੍ਗੁਲਿਯੋ ਭਵਨ੍ਤੀਤਿ.
ਕੁਞ੍ਚਿਤੋ ਚ ਤਤਙ੍ਗੁਟ੍ਠੋ, ਸਪਤਾਕੋਤਿ ਸਮ੍ਮਤੋ;
ਪਤਾਕੇਹਿ ਤੁ ਹਤ੍ਥੇਹਿ, ਸਮ੍ਪੁਟਞ੍ਜਲਿ ਇਚ੍ਛਿਤੋ.
ਦੇਵਤਾਨਂ ਗਰੂਨਞ੍ਚ, ਪਿਤੂਨਞ੍ਚੇ’ਚ੍ਛਿਤੋ ਪੁਰੇ;
ਅਤ੍ਥਪ੍ਪਕਰਣਾਦੀਹਿ, ਭੇਦੋ ਞੇਯ੍ਯੋ ਤਹਿਂ ਤਹਿਂ.
ਯਥਾ ਜਲਞ੍ਜਲਿਂ ਦਦਾਤਿ, ਅਞ੍ਜਲਿਨਾ ਪਿਵਤਿ, ਦੇਵੋਯਂ ਕਤਞ੍ਜਲਿਰਿਤਿ. ਪੁਟਞ੍ਜਲਿਸ੍ਸ ਵਾ ਵਕ੍ਖਮਾਨਤ੍ਤਾ ਇਧ ਵਿਤਤਞ੍ਜਲਿਯੇਵ.
੨੬੮. ਤਿਕਂ ਸਪ੍ਪਕੋਟ੍ਠੇ ਵਿਤਤਕਰੇ. ਰਮੁ ਕੀਲ਼ਾਯਂ, ਤਨੋ, ਮਲੋਪੋ, ਰਤਨਂ, ਮਣਿਬੁਦ੍ਧਾਦੀਸੁ ਚ. ਕੁਕ ਆਦਾਨੇ, ਉ, ਦ੍ਵਿਤ੍ਤਂ. ਹਸ ਧਾਤੁਮ੍ਹਾ ਥੋ, ਤੋ ਵਾ, ਹਤ੍ਥੋ, ਹਤ੍ਥਸਹਿਤਤ੍ਤਾ ਵਾ ਪਕੋਟ੍ਠੋ ਹਤ੍ਥੋ.
ਦ੍ਵਯਂ ਸਮ੍ਪੁਟਞ੍ਜਲਿਮ੍ਹਿ. ਕਰਮਯੋ ਪੁਟੋ ਕਰਪੁਟੋ, ਅਞ੍ਜ ਬ੍ਯਤ੍ਤਿਗਤਿਕਨ੍ਤੀਸੁ, ਅਲਿ, ਅਞ੍ਜਲਿ. ਕਰਪੁਟੋ ਚ ਅਞ੍ਜਲਿ ਚੇਤਿ ਕਰਪੁਟਞ੍ਜਲੀ.
ਦ੍ਵਯਂ ਨਖੇ. ਕਰੇ ਜਾਯਤਿ ਰੁਹਤੀਤਿ ਕਰਜੋ. ਨਤ੍ਥਿ ਖਂ ਇਨ੍ਦ੍ਰਿਯਂ ਏਤ੍ਥਾਤਿ ਨਖੋ, ਸਞ੍ਞਾਸਦ੍ਦਤ੍ਤਾ ਨ ਅਤ੍ਤਂ, ਅਵਿਸਯਤ੍ਤਾ ਵਾ. ਪੁਨਬ੍ਭਵੋ, ਕਰਰੁਹੋ, ਨਖਰੋਤਿਪਿ ਨਖਸ੍ਸ ਨਾਮਾਨਿ.
ਦ੍ਵਯਂ ਪੁਟਙ੍ਗੁਲਿਕਰੇਤਿਖ੍ਯਾਤੇ ਮੁਟ੍ਠਿਮ੍ਹਿ. ਖਟ ਇਚ੍ਛਾਯਂ, ਣ੍ਵੁ, ਖਦ ਹਿਂਸਾਯਂ ਵਾ, ਦਸ੍ਸ ਟੋ. ਮੁ ਬਨ੍ਧਨੇ,ਤਿ, ਤਸ੍ਸ ਠੋ, ਦ੍ਵਿਤ੍ਤਂ.
੨੬੯. ਪਸ੍ਸਦ੍ਵਯਵਿਤ੍ਥਤਾ ਪਸ੍ਸਦ੍ਵਯੇਪਿ ਵਿਤਤਾ ਪਸਾਰਿਤਾ ਸਹਕਰਾ ਸਪਾਣਯੋ ਦ੍ਵੇ ਬਾਹੂ ਬ੍ਯਾਮੋ ਨਾਮ, ਬ੍ਯਾਮੀਯਤੇ ਅਨੇਨਾਤਿ ਬ੍ਯਾਮੋ, ਵਿਪੁਬ੍ਬੋ ਯਾਮ ਅਞ੍ਛੇ. ਉਦ੍ਧਂ ਉਪਰਿ ਤਤਾ ਵਿਤਤਾ ਭੁਜਾ ਚ ਪੋਸੋ ਚ ਤੇਸਂ ਸਮੁਦਿਤਾਨਂ ਪਮਾਣਸਦਿਸਂ ਪਮਾਣਂ ਯਸ੍ਸ ਤਸ੍ਮਿਂ ਉਦ੍ਧਨ੍ਤਤਭੁਜਪੋਸਪ੍ਪਮਾਣੇ ਪੋਰਿਸਸਦ੍ਦੋ ਵਤ੍ਤਤਿ. ਭੁਜਸਦ੍ਦੇਨ ਸਹਕਰਾ ਭੁਜਾ ਗਯ੍ਹਤੇ, ਏਕਸ੍ਸ ਪਮਾਣਸਦ੍ਦਸ੍ਸ ਲੋਪੋ, ਪੁਰਿਸਸ੍ਸ ਪਮਾਣਂ ਪੋਰਿਸਂ. ਪੁਰਿਸਸਦ੍ਦੋ ਚੇਤ੍ਥ ਸਕਰਭੁਜਪੁਰਿਸਂ ਵਦਤਿ, ਤੀਸੁ, ਯਥਾ – ਪੋਰਿਸਂ ਜਲਂ, ਪੋਰਿਸੋ ਹਤ੍ਥੀ, ਪੋਰਿਸੀ ਯਟ੍ਠਿ.
੨੭੦. ਦ੍ਵਯਂ ਉਰਸਿ. ਉਸ ਦਾਹੇ, ਰੋ, ਸਲੋਪੋ, ਅਰ ਗਤਿਮ੍ਹਿ ਵਾ, ਅਸ੍ਸੁਕਾਰੋ. ਹਰ ਹਰਣੇ, ਯੋ, ਰਸ੍ਸ ਦੋ. ਕੋਲ਼ਂ [ਕੋਟ੍ਠ (ਕ.)], ਭੁਜਨ੍ਤਰਂ, ਵਕ੍ਖੋਤਿਪਿ ਉਰੋਨਾਮਾਨਿ. ਤਿਕਂ ਉਰੋਜੇ. ਤਨੁ ਵਿਤ੍ਥਾਰੇ, ਤਨੋਤਿ ਇਚ੍ਛਨ੍ਤਿ ਥਨੋ, ਤਸ੍ਸ ਥੋ, ਥਨ ਦੇਵਸਦ੍ਦੇ, ਥਨ ਚੋਰਿਯੇ ਵਾ. ਕੁਚ ਸਙ੍ਕੋਚਨੇ, ਕੁਚੋ. ਪਯੋ ਖੀਰਂ ਧਾਰੇਤੀਤਿ ਪਯੋਧਰੋ. ਕੁਚੋ ਚ ਪਯੋਧਰੋ ਚਾਤਿ ਦ੍ਵਨ੍ਦੋ.
ਥਨਗ੍ਗਸ੍ਮਿਂ ਥਨਸ੍ਸ ਅਗ੍ਗੇ ਚੂਚੁਕਂ, ਨਪੁਂਸਕੇ. ‘‘ਚੂਚੁਕੋ ਸੋ ਕੁਚਾਨਨ’’ਨ੍ਤਿ [ਚਿਨ੍ਤਾਮਣਿਟੀਕਾ ੧੬.੭੭] ਤੁ ਰਤਨਕੋਸੋ, ਚੁ ਚਵਨੇ, ਉਕੋ, ਦ੍ਵਿਤ੍ਤਂ, ਦੀਘੋ ਚ, ਚੂਚੁਕਂ, ਚਨ੍ਚੁ ਗਤਿਯਂ ਵਾ, ਉਕੋ, ਨਲੋਪੋ, ਅਸ੍ਸੂਕਾਰੋ, ਚੂਚੁਕਂ.
ਦ੍ਵਯਂ ਪਿਟ੍ਠੇ ਕਾਯਸ੍ਸ ਪਚ੍ਛਾਭਾਗੇ. ਪਿਟ ਸਦ੍ਦਸਙ੍ਘਾਤੇਸੁ, ਤੋ. ਇਤਰਤ੍ਰ ਤਿ, ਪਿਸੁ ਸੇਚਨੇ ਵਾ.
੨੭੧. ਤਿਕਂ ਤਨੁਮਜ੍ਝੇ. ਮਜ੍ਝੇ ਭਵੋ ਮਜ੍ਝੋ. ਲਗ ਸਙ੍ਗੇ, ਅ. ਮਜ੍ਝੇ ਭਵਂ ਮਜ੍ਝਿਮਂ. ਚਤੁਕ੍ਕਂ ਉਦਰੇ. ਕੁਸ ਅਕ੍ਕੋਸੇ, ਛਿ, ਸਸ੍ਸ ਚੋ. ਗਹ ਉਪਾਦਾਨੇ, ਅਨਿ, ਈਮ੍ਹਿ ਗਹਣੀ, ਗਬ੍ਭਂ ਗਣ੍ਹਾਤਿ ਧਾਰੇਤੀਤਿ ਵਾ ਗਹਣੀ, ਗਬ੍ਭਾਸਯਸਞ੍ਞਿਤੋ ਮਾਤੁਕੁਚ੍ਛਿਪ੍ਪਦੇਸੋ, ਤੇਜੋਧਾਤੁਮ੍ਹਿ ਪਨ ਯਥਾਭੁਤ੍ਤਾਹਾਰਸ੍ਸ ਵਿਪਾਚਨਵਸੇਨ ਗਣ੍ਹਨਤੋ ਅਛਡ੍ਡਨਤੋ ਗਹਣੀ. ਉਪੁਬ੍ਬੋ ਦਰ ਗਮਨੇ. ਉਦਰਤਿ ਉਦ੍ਧਂ ਗਚ੍ਛਤਿ ਵਾਯੁ ਯਤ੍ਰਾਤਿ ਉਦਰਂ. ਗੁ ਸਦ੍ਦੇ, ਅਭੋ, ਦ੍ਵਿਤ੍ਤਾਦਿ, ਗਬ੍ਭੋ. ਪਿਚਣ੍ਡ ਜਠਰ ਤੁਨ੍ਦਾਪ੍ਯਤ੍ਰ.
ਕੁਚ੍ਛਿਸਮ੍ਭਵੇ ਕੁਚ੍ਛਿਟ੍ਠੇ ਕੋਟ੍ਠੋ, ਅਨ੍ਤੋ ਚਾਤਿ ਇਮੇ ਦ੍ਵੇ ਵਤ੍ਤਨ੍ਤਿ, ਕੁਸ ਅਕ੍ਕੋਸੇ, ਤੋ, ਠੋ ਵਾ. ਅਮ ਗਮਨਤ੍ਥੋ, ਤੋ.
੨੭੨. ਚਤੁਕ੍ਕਂ ਕਟਿਯਂ. ਹਨਧਾਤੁਮ੍ਹਾ ਯੁ, ਹਸ੍ਸ ਦ੍ਵਿਤ੍ਤਂ, ਹਸ੍ਸ ਜੋ, ਹਨਸ੍ਸ ਘੋ ਚ, ਜਘਨਂ. ਨਿਚ੍ਛਯੇਨ ਤਮਤੀਤਿ ਨਿਤਮ੍ਬੋ, ਤਮੁਧਾਤੁਮ੍ਹਾ ਬੋ. ਸੂ ਪਸਵੇ, ਣਿ. ਕਟ ਵਸ੍ਸਾਵਰਣੇਸੁ, ਕਟ੍ਯਤੇ ਆਵਰੀਯਤੇ ਵਤ੍ਥਾਦੀਹਿ ਕਟਿ, ਇ, ਏਤੇ ਦ੍ਵੇ ਨਾਰਿਯਂ. ਏਤ੍ਥ ਚ ਜਘਨਸਦ੍ਦੇਨ ਇਤ੍ਥਿਕਟਿਯਾ ਅਗ੍ਗਭਾਗੋ, ਨਿਤਮ੍ਬਸਦ੍ਦੇਨ ਇਤ੍ਥਿਕਟਿਯਾ ਪਚ੍ਛਾਭਾਗੋ, ਸੇਸਦ੍ਵਯੇਨ ਕਟਿਸਾਮਞ੍ਞਂ ਵੁਤ੍ਤਨ੍ਤਿ ਦਟ੍ਠਬ੍ਬਂ, ਵੁਤ੍ਤਞ੍ਚ ‘‘ਪਚ੍ਛਾ ਨਿਤਮ੍ਬੋ ਥੀਕਟ੍ਯਾ, ਜਘਨਂ ਤੁ ਪੁਰੋ ਭਵੇ’’ਤਿ [ਅਮਰ ੧੬.੭੪].
੨੭੩. ਲਿਙ੍ਗਨ੍ਤਂ ਲਿਙ੍ਗਸਾਮਞ੍ਞੇ. ਅਙ੍ਗੇ ਸਰੀਰੇ ਜਾਯਤੀਤਿ ਅਙ੍ਗਜਾਤਂ, ਅਙ੍ਗਸਦ੍ਦੋ ਸਰੀਰਵਾਚਕੋ, ਅਙ੍ਗਮੇਤਸ੍ਸਤ੍ਥੀਤਿ ਕਤ੍ਵਾ. ਰਹਸਿ ਠਾਨੇ ਜਾਤਂ ਅਙ੍ਗਂ ਰਹਸ੍ਸਙ੍ਗਂ, ਸਤ੍ਤਮਿਯਾਲੋਪੋ, ਇਸ੍ਸਤ੍ਤਂ, ਸਸ੍ਸ ਦ੍ਵਿਤ੍ਤਞ੍ਚ. ਵਤ੍ਥੇਨ ਗੁਯ੍ਹਿਤਬ੍ਬਨ੍ਤਿ ਵਤ੍ਥਗੁਯ੍ਹਂ. ਮਿਹ ਸੇਚਨੇ, ਕਰਣੇ ਯੁ, ਮਿਹਤਿ ਰੇਤੋਮੁਤ੍ਤਾਨਿ ਯੇਨਾਤਿ ਮੇਹਨਂ. ਨਿਪੁਬ੍ਬੋ ਮਿਹ ਸੇਚਨੇ, ਤੋ, ਨਿਮਿਤ੍ਤਂ. ਉਤ੍ਤਮਙ੍ਗਤ੍ਤਾ ਵਰਙ੍ਗਂ. ਵਜ ਗਤਿਯਂ, ਅਸ੍ਸੀਕਾਰੋ, ਪਚ੍ਚਯੇਹਿ ਵਿਨਾ ਜਾਯਤੀਤਿ ਵਾ ਬੀਜਂ, ਵਿਰਹਤ੍ਤਜੋਤਕੋ ਹ੍ਯੇਤ੍ਥ ਵਿਕਾਰੋ. ਫਲ ਨਿਪ੍ਫਤ੍ਤਿਯਂ, ਫਲਤਿ ਏਤੇਨ ਪੁਤ੍ਤਨ੍ਤਿ ਫਲਂ. ਲਿਙ੍ਗਤਿ ‘‘ਇਤ੍ਥੀ, ਪੁਰਿਸੋ’’ਤਿ ਵਿਭਾਗਂ ਗਚ੍ਛਤਿ ਯੇਨਾਤਿ ਲਿਙ੍ਗਂ.ਲਿਙ੍ਗ ਗਮਨੇ, ਲੀਨਂ ਅਪਾਕਟਂ ਅਙ੍ਗਨ੍ਤਿ ਵਾ ਲਿਙ੍ਗਂ. ਏਤੇਸੁ ਬੀਜਫਲਸਦ੍ਦਾ ਅਣ੍ਡੇਪਿ ਵਤ੍ਤਨ੍ਤਿ.
ਦ੍ਵਯਂ ਪੁਰਿਸਲਿਙ੍ਗਪਸਿਬ੍ਬਕੇ. ਅਮ ਗਮਨੇ, ਡੋ, ਅਣਸਦ੍ਦਤ੍ਥੋ ਵਾ, ਡੋ, ਅਡਿ ਅਣ੍ਡਤ੍ਥੇ ਵਾ, ਤੋ. ਕੁਸ ਅਕ੍ਕੋਸੇ, ਣੋ. ਅਣ੍ਡਸਦ੍ਦੋ ਚੇਤ੍ਥ ਬੀਜੇਪਿ, ਅਣ੍ਡਕੋਸੋਤਿ ਸਮੁਦਿਤਮ੍ਪਿ ਕੋਸਸ੍ਸ ਨਾਮਂ, ‘‘ਕੁਕ੍ਕੁਟਚ੍ਛਾਪਕਸ੍ਸੇਵ ਅਣ੍ਡਕੋਸਮ੍ਹਾ’’ਤਿ [ਪਾਰਾ. ੧੩, ੧੪] ਹਿ ਵੁਤ੍ਤਂ, ਅਮਰਕੋਸੇਪਿ [ਅਮਰਕੋਸੇ ੧੬.੭੬] ਅਣ੍ਡਕੋਸੋਤਿ ਸਮੁਦਿਤੇਨੇਵ ਨਾਮਂ ਵੁਤ੍ਤਂ. ਏਤ੍ਥ ਚ ਅਣ੍ਡਸ੍ਸ ਬੀਜਸ੍ਸ ਕੋਸੋ ਅਣ੍ਡਕੋਸੋਤਿ ਵਿਗ੍ਗਹੋ ਕਾਤਬ੍ਬੋ.
ਦ੍ਵਯਂ ਇਤ੍ਥਿਯਾ ਅਙ੍ਗਜਾਤੇ. ਯੁ ਮਿਸ੍ਸਨੇ, ਅਧਿਕਰਣੇਨਿ, ਯੋਨਿ, ਇਤ੍ਥਿਯਂ ਪੁਮੇ ਚਾਯਂ, ਇਤ੍ਥੀ ਚ ਪੁਮਾ ਚ ਇਤ੍ਥਿਪੁਮਂ, ਤਸ੍ਮਿਂ. ਭਜਨ੍ਤਿ ਅਸ੍ਮਿਨ੍ਤਿ ਭਗਂ. ਮਾਰਮਨ੍ਦਿਰ ਮਾਰਕੂਪਾ ਚਾਤ੍ਰ.
੨੭੪-੨੭੫. ਤਿਕਂ ਇਤ੍ਥਿਪੁਰਿਸਾਨਂ ਸਮ੍ਭਵੇ. ਸੁਚਿਸ੍ਸ ਪਟਿਪਕ੍ਖੋ ਅਸੁਚਿ, ਇਕਾਰਨ੍ਤੋ, ਦ੍ਵੀਸੁ, ਸਮ੍ਭਵਲਿਙ੍ਗੋ ਵਾ. ਸਂਪੁਬ੍ਬਾ ਭੂਧਾਤੁਮ੍ਹਾ ਅ. ਸਕ ਸਾਮਤ੍ਥਿਯਂ, ਤੋ, ਤਸ੍ਸ ਕੋ, ਅਸ੍ਸੁਤ੍ਤਂ, ਸੁਚ ਸੋਕੇ ਵਾ, ਕੋ.
ਦ੍ਵਯਂ ਵਚ੍ਚਮਗ੍ਗੇ. ਪੁਨਨ੍ਤਿ ਅਨੇਨਾਤਿ ਪਾਯੁ. ਪੂ ਪਵਨੇ, ਉ, ਊਸ੍ਸਾਯੋ, ਪਯ ਗਮਨਤ੍ਥੋ ਵਾ, ਪਯਤਿ ਵਚ੍ਚਮਨੇਨਾਤਿ ਪਾਯੁ, ਕਰਣੇ ਉ, ਅਯਂ ਪੁਰਿਸੇ ਪੁਲ੍ਲਿਙ੍ਗੇ ਵਤ੍ਤਤਿ. ਗੁਦ ਕੀਲ਼ਾਯਂ, ਅ. ਅਪਾਨਂਪ੍ਯਤ੍ਰ.
ਅਟ੍ਠਕਂ ਵਚ੍ਚੇ. ਗੂਥ ਕਰੀਸੋਸ੍ਸਗ੍ਗੇ, ਗੁਪ ਗੋਪਨੇ ਵਾ, ਥੋ. ਕਿਰ ਵਿਕਿਰਣੇ, ਈਸੋ, ਕਰੀਸਂ. ਵਰ ਵਰਣਸਮ੍ਭਤ੍ਤੀਸੁ, ਚੋ, ਗੂਥਞ੍ਚ ਕਰੀਸਞ੍ਚ ਵਚ੍ਚਞ੍ਚੇਤਿ ਦ੍ਵਨ੍ਦੋ, ਤਾਨਿ ਵਿਕਪ੍ਪੇਨ ਪੁਮੇ ਵਤ੍ਤਨ੍ਤਿ, ਨਿਚ੍ਚਂ ਨਪੁਂਸਕੇ, ਪੁਲ੍ਲਿਙ੍ਗਤ੍ਤਂ ਤੇਸਂ ਕਤ੍ਥਚਿਯੇਵ, ਸਬ੍ਬਤ੍ਰ ਨਪੁਂਸਕਤ੍ਤਮੇਵ ਬਹੁਲਨ੍ਤ੍ਯਤ੍ਥੋ. ਮਲ ਚਲਨੇ, ਅ, ਮਲ ਧਾਰਣੇ ਵਾ. ਸਕ ਸਤ੍ਤਿਯਂ, ਸਸ੍ਸ ਛੋ. ਉਚ੍ਚਾਰੀਯਤੇ ਜਹ੍ਯਤੇਤਿ ਉਚ੍ਚਾਰੋ, ਉਪੁਬ੍ਬੋ ਚਰਧਾਤੁ ਚਜਨੇ, ਉਕ੍ਖਿਪਨੇ ਚ ਵਤ੍ਤਤਿ. ਮਿਹ ਸੇਚਨੇ, ਲੋ, ਵਣ੍ਣਵਿਪਰਿਯਯੋ, ਲ਼ਤ੍ਤਞ੍ਚ. ਅਵਕਰੀਯਤੇਤਿ ਉਕ੍ਕਾਰੋ, ਅਵਸ੍ਸੁਤ੍ਤਂ, ਕਿਰ ਵਿਕ੍ਖਿਪਨੇ. ਸਮਲਂਪ੍ਯਤ੍ਰ. ਸਮੁ ਉਪਸਮੇ, ਅਲੋ.
ਦ੍ਵਯਂ ਮੁਤ੍ਤੇ. ਸੁ ਸਵਨੇ, ਸਵਨਂ ਸਨ੍ਦਨਂ, ਚੁਰਾਦਿ, ਣੋ. ਮੁਚ ਮੋਚਨੇ, ਤੋ, ਮੁਤ੍ਤ ਪਸ੍ਸਾਵੇ ਵਾ. ਉਚ੍ਚਤੇ ਕਥੀਯਤੇ. ਗੋਮੁਤ੍ਤੇ ਗਵਂ ਸਮ੍ਬਨ੍ਧਿਨਿ ਮੁਤ੍ਤੇ ਪੂਤਿਮੁਤ੍ਤਸਦ੍ਦੋ ਵਤ੍ਤਤਿ. ਅਜ੍ਜ ਪਵਤ੍ਤਮ੍ਪਿ ਹਿ ਤਂ ਦੁਗ੍ਗਨ੍ਧਭਾਵੇਨ ਪੂਤਿਮੁਤ੍ਤਨ੍ਤ੍ਵੇਵ ਵੁਚ੍ਚਤਿ, ਯਥਾ ‘‘ਪੂਤਿਕਾਯੋ’’ਤਿ. ਅਸ੍ਸਾਦੀਨਂ ਮਲੇ ਛਕਣਸਦ੍ਦੋ, ਸਕ ਸਤ੍ਤਿਯਂ, ਯੁ, ਸਸ੍ਸ ਛੋ.
੨੭੬. ਨਾਭਿਯਾ ਅਧੋਭਾਗੋ ਵਤ੍ਥਿ ਨਾਮ, ਸੋ ਦ੍ਵੀਸੁ. ਵਤ੍ਥਿ ਮੁਤ੍ਤਪੁਟਂ. ‘‘ਮੁਤ੍ਤਾਸਯਪੁਟੋ ਵਤ੍ਥਿ’’ਰਿਤਿ [ਚਿਨ੍ਤਾਮਣਿਟੀਕਾ ੧੬.੭੩] ਰਤਨਮਾਲਾ. ਵਸਤਿ ਮੁਤ੍ਤਮੇਤ੍ਥਾਤਿ ਵਤ੍ਥਿ, ਵਸ ਨਿਵਾਸੇ,ਤਿ, ਤਸ੍ਸ ਥੋ, ਤ੍ਥਿਪਚ੍ਚਯੇਨ ਵਾ ਸਿਦ੍ਧਂ. ਉਚ੍ਛਙ੍ਗਂ ਅਙ੍ਕਞ੍ਚ ਇਮੇ ਦ੍ਵੇ ਉਭੋ ਸਦ੍ਦਾ ਪੁਮੇ ਵਤ੍ਤਨ੍ਤਿ. ਉਸ੍ਸਜ੍ਜਤਿ ਏਤ੍ਥਾਤਿ ਉਚ੍ਛਙ੍ਗਂ, ਸਜ ਸਙ੍ਗੇ, ਸਸ੍ਸ ਛੋ, ਦ੍ਵਿਤ੍ਤਂ. ਅਙ੍ਕ ਗਮਨਤ੍ਥੋ, ਅ, ਅਙ੍ਕੋ, ਅਥ ਵਾ ਅਙ੍ਕ ਲਕ੍ਖਣੇ, ਅ, ਅਙ੍ਕੋ, ‘‘ਉਚ੍ਛਙ੍ਗਚਿਹਨੇਸ੍ਵ’ਙ੍ਕੋ’’ਤਿ ਅਮਰਕੋਸੇ [ਅਮਰ ਕੋਸੇ ੨੩.੪].
ਦ੍ਵਯਂ ਜਾਣੂਪਰਿਭਾਗੇ. ਅਰ ਗਮਨੇ, ਉ, ਅਸ੍ਸੂਕਾਰੋ. ਸਨ੍ਜ ਸਙ੍ਗੇ, ਆਸਜ੍ਜਤਿ ਵਤ੍ਥਮਤ੍ਰਾਤਿ ਸਤ੍ਥਿ, ਥਿ. ਊਰੁ ਚ ਸਤ੍ਥਿ ਚੇਤਿ ਦ੍ਵਨ੍ਦੋ, ਨਪੁਂਸਕੇਪਿ.
ਤਿਕਂ ਜਾਣੁਮ੍ਹਿ, ਊਰੁਨੋ ਪਬ੍ਬਂ ਗਣ੍ਠਿ ਊਰੁਪਬ੍ਬਂ. ਜਨ ਜਨਨੇ, ਣੁ. ਦ੍ਵਿਤ੍ਤੇ ਜਣ੍ਣੁ.
੨੭੭. ਦ੍ਵਯਂ ਪਾਦਗਣ੍ਠਿਮ੍ਹਿ. ਗੁਪ ਰਕ੍ਖਣੇ ਫੋ, ਸਕਤ੍ਥੇ ਕੋ. ਪਾਦਸ੍ਸ ਗਣ੍ਠਿ ਪਾਦਗਣ੍ਠਿ. ਘੁਟਿਕਾਪ੍ਯਤ੍ਰ. ਘੁਟ ਪਰਿਵਤ੍ਤਨੇ, ਘੁਟ੍ਯਤੇ ਅਨੇਨੇਤਿ ਘੁਟਿਕਾ, ਣ੍ਵੁ.
ਦ੍ਵਯਂ ਪਾਦਸ੍ਸ ਪਚ੍ਛਾਭਾਗੇ ਗੋਪ੍ਫਕਸ੍ਸਾਧੋ ਭਾਗੇ. ਪੁਮੇ ਤੂਤਿ ਤ੍ਵਨ੍ਤਂ ਲਿਙ੍ਗਪਦਂ. ਪਸ ਬਾਧਨਫੁਸਨੇਸੁ,ਤਿ, ਤਸ੍ਸ ਣੋ, ਸਸ੍ਸ ਹੋ, ਵਣ੍ਣਵਿਪਰਿਯਯੋ, ਣਿਪਚ੍ਚਯੇਨ ਵਾ ਸਿਦ੍ਧਂ. ਸਕਾਰਵਣ੍ਣਾਗਮੇ ਵੁਦ੍ਧਿਯਞ੍ਚ ਪਾਸਣ੍ਹਿ. ਏਲਿਪ੍ਯਤ੍ਰ, ਇਲ ਗਤਿਯਂ,ਤਿ, ਤਲੋਪੋ.
ਦ੍ਵਯਂ ਪਾਦਗ੍ਗੇ. ਪਾਦਸ੍ਸ ਅਗ੍ਗਂ ਪਾਦਗ੍ਗਂ. ਪਕਟ੍ਠਂ ਪਦਂ ਪਪਦਨ੍ਤਿ ਕਮ੍ਮਧਾਰਯੋ. ‘‘ਪਪਦੋ’’ਤਿਪਿ ਪਾਠੋ. ਤਿਕਂ ਪਾਦੇ. ਪਦ ਗਤਿਮ੍ਹਿ, ਣੋ, ਪਜ੍ਜਤੇਤਿ ਪਾਦੋ. ਪਜ੍ਜਤੇ ਗਚ੍ਛਤੀਤਿ, ਅ. ਚਰਮ੍ਹਾ ਕਰਣੇ ਯੁ, ਚਰਣਂ, ਇਦਂ ਪੁਮੇ ਵਿਕਪ੍ਪੇਨ, ਨਿਚ੍ਚਂ ਨਪੁਂਸਕੇ. ਅਙ੍ਘਿਪ੍ਯਤ੍ਰ, ਅਹਿ ਗਤਿਯਂ. ਇ, ਹਸ੍ਸ ਘੋ.
੨੭੮. ਦ੍ਵਯਂ ਹਤ੍ਥਾਦ੍ਯਵਯਵੇ. ਅਙ੍ਗਿ ਗਤ੍ਯਤ੍ਥੋ, ਅ. ਅਵਪੁਬ੍ਬੋ ਯੁ ਮਿਸ੍ਸਨੇ, ਅ. ਪਤੀਕੋ, ਅਪਘਨੋਪ੍ਯਤ੍ਰ. ਪਤਿਪੁਬ੍ਬਾ ਇਮ੍ਹਾ ਕੋ. ਅਪਪੁਬ੍ਬਾ ਹਨਿਮ੍ਹਾ ਅ, ਘਨਾਦੇਸੋ ਚ.
ਦ੍ਵਯਂ ਪਸ੍ਸਟ੍ਠਿਮ੍ਹਿ. ਪਾ ਰਕ੍ਖਣੇ, ਸੁ, ਲ਼ਿਕਾਰਵਣ੍ਣਾਗਮੋ, ਸਕਤ੍ਥੇ ਕੋ, ਪਸ੍ਸ ਫੋ. ਅਲ਼ਾਗਮੇ ਫਾਸੁਕਾ. ‘‘ਪਾਸੁਲ਼ਿਕਾ, ਪਾਸੁਕਾ’’ਤਿਪਿ ਪਾਠੋ. ਫੁਸ ਸਮ੍ਫਸ੍ਸੇਤਿਪਿ ਧਾਤੁ, ਤਦਾ ਉਪਚ੍ਚਯਾਦਿ.
ਦ੍ਵਯਂ ਅਟ੍ਠਿਮਤ੍ਤੇ. ਅਸੁ ਖੇਪਨੇ, ਇ, ਸਸ੍ਸ ਟ੍ਠੋ, ਅਟ੍ਠਿ, ਇਦਂ ਪਣ੍ਡਕੇ ਨਪੁਂਸਕੇ ਵਤ੍ਤਤਿ. ਧਾ ਧਾਰਣੇ, ਤੁ, ਇਤ੍ਥੀ. ਕੀਕਸਂ, ਕੁਲ੍ਲਂਪ੍ਯਤ੍ਰ. ਗਲਸ੍ਸ ਕਣ੍ਠਸ੍ਸ ਹੇਟ੍ਠਿਮਨ੍ਤੇ ਜਾਤਮਟ੍ਠਿ ਗਲਨ੍ਤਟ੍ਠਿ. ਅਕ ਗਮਨੇ, ਖੋ, ਸਕਤ੍ਥੇ ਕੋ.
੨੭੯-੨੮੦. ਦ੍ਵਯਂ ਸਿਰਸੋਟ੍ਠਿਖਣ੍ਡੇ. ਸਮੁਦਿਤੇ ਤੁ ਕਰੋਟਿ, ਇਤ੍ਥੀ [ਅਮਰ ੧੬.੬੯]. ਕਪੁ ਸਾਮਤ੍ਥਿਯੇ, ਅਰੋ, ਕਂ ਸੀਸਂ ਪਾਲੇਤੀਤਿ ਵਾ ਕਪ੍ਪਰੋ, ਰਸ੍ਸੋ, ਲਸ੍ਸ ਰਤ੍ਤਞ੍ਚ. ਕਂ ਪਾਲਯਤੀਤਿ, ਕਮ੍ਮਾਦਿਮ੍ਹਿ ਣੋ. ‘‘ਸਿਰੋਟ੍ਠਿਮ੍ਹਿ ਕਪਾਲੋ’ਥੀ, ਘਟਾਦਿਸਕਲੇਪਿਚੇ’’ਤਿ ਰੁਦ੍ਦੋ [ਚਿਨ੍ਤਾਮਣਿਟੀਕਾ ੧੬.੬੮]. ਕਪਾਲੋ ਅਥੀਤਿ [ਅਨਿਤ੍ਥੀਤਿ ਅਤ੍ਥੋ] ਛੇਦੋ. ਕਪਾਲਸਦ੍ਦੋ ਵਿਕਪ੍ਪੇਨ ਪੁਲ੍ਲਿਙ੍ਗੋ. ਕਡਿ ਛੇਦੇ, ਅਰੋ. ਮਹਤੀ ਸਿਰਾ ਮਹਾਸਿਰਾ, ਸਿਰਾਤਿ ਚ. ਸਿ ਬਨ੍ਧਨੇ, ਰੋ.
ਤਿਕਂ ਸੁਸਿਰਵਤ੍ਯਂ ਵਾਯੁਵਹਨ੍ਤਸਿਰਾਯਂ. ਤਿਵਿਧਾ ਹਿ ਕਾਯਸਿਰਾ ਏਕਾ ਵਾਯੁਵਹਾ, ਅਪਰਾ ਸੁਤ੍ਤਮਿਵਾਟ੍ਠਿਬਨ੍ਧਿਨੀ, ਅਞ੍ਞਾ ਆਹਾਰਵਾਹਿਨੀ ਅਨ੍ਤਖ੍ਯਾ. ਤਤ੍ਰ ਤਤਿਯੇਨ ਪਠਮਾ, ਪਠਮਦੁਤਿਯੇਹਿ ਦੁਤਿਯਾ ਚ ਦੀਪਿਤਾ, ਤਤਿਯਾ ਪਨ ਪਰਤੋ ਵਕ੍ਖਤਿ. ਨਹ ਬਨ੍ਧਨੇ, ਅਰੁ. ਸਿ ਬਨ੍ਧਨੇ, ਰੋ. ਧਮ ਸਦ੍ਦੇ, ਯੁ. ਨਦਾਦਿ, ਅਨਿ ਵਾ, ਧਮਨੀ.
ਤਤਿਯਂ ਦਸ੍ਸੇਤੁਮਾਹ ‘‘ਰਸਗ੍ਗਸਾ’’ਤ੍ਯਾਦਿ. ਰਸਂ ਗਸਤੀਤਿ ਰਸਗ੍ਗਸਾ, ਗਸ ਅਦਨੇ. ਰਸਂ ਹਰਤਿ ਨੇਤੀਤਿ ਰਸਹਰਣੀ, ਯੁ, ਨਦਾਦਿ.
ਤਿਕਂ ਮਂਸੇ. ਮਨ ਞਾਣੇ, ਸੋ. ਮਿਸ ਸਦ੍ਦੇ, ਆਪੁਬ੍ਬੋ ਆਮਸਨੇ ਵਾ. ਪਿਸ ਅਵਯਵੇ, ਤੋ. ਪਲਲਂ, ਕਬ੍ਬਂਪ੍ਯਤ੍ਰ.
ਦ੍ਵਯਂ ਆਤਪਾਦਿਨਾ ਸੁਕ੍ਖਮਂਸੇ. ਤਿਲਿਙ੍ਗਕਨ੍ਤੂਤਿ ਤ੍ਵਨ੍ਤਂ ਲਿਙ੍ਗਪਦਂ. ਵਲ, ਵਲ੍ਲ ਸਂਵਰਣੇ, ਊਰੋ, ਇਤ੍ਥਿਯਂ ‘‘ਇਤ੍ਥਿਯਮਤੋ ਆਪਚ੍ਚਯੋ’’ਤਿ ਆ, ਵਲ੍ਲੂਰਾ. ਉਦ੍ਧਂ ਤਤ੍ਤਂ ਉਤ੍ਤਤ੍ਤਂ. ਤਪ ਸਨ੍ਤਾਪੇ, ਤੋ.