੬. ਆਨਨ੍ਦਸੁਤ੍ਤਂ

੩੭. ਏਕਂ ਸਮਯਂ ਆਯਸ੍ਮਾ ਆਨਨ੍ਦੋ ਕੋਸਮ੍ਬਿਯਂ ਵਿਹਰਤਿ ਘੋਸਿਤਾਰਾਮੇ. ਤਤ੍ਰ ਖੋ ਆਯਸ੍ਮਾ ਆਨਨ੍ਦੋ ਭਿਕ੍ਖੂ ਆਮਨ੍ਤੇਸਿ – ‘‘ਆਵੁਸੋ ਭਿਕ੍ਖਵੇ’’ਤਿ. ‘‘ਆਵੁਸੋ’’ਤਿ ਖੋ ਤੇ ਭਿਕ੍ਖੂ ਆਯਸ੍ਮਤੋ ਆਨਨ੍ਦਸ੍ਸ ਪਚ੍ਚਸ੍ਸੋਸੁਂ. ਆਯਸ੍ਮਾ ਆਨਨ੍ਦੋ ਏਤਦਵੋਚ –

‘‘ਅਚ੍ਛਰਿਯਂ, ਆਵੁਸੋ, ਅਬ੍ਭੁਤਂ, ਆਵੁਸੋ! ਯਾਵਞ੍ਚਿਦਂ ਤੇਨ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਸਮ੍ਬਾਧੇ ਓਕਾਸਾਧਿਗਮੋ ਅਨੁਬੁਦ੍ਧੋ ਸਤ੍ਤਾਨਂ ਵਿਸੁਦ੍ਧਿਯਾ ਸੋਕਪਰਿਦੇਵਾਨਂ ਸਮਤਿਕ੍ਕਮਾਯ ਦੁਕ੍ਖਦੋਮਨਸ੍ਸਾਨਂ ਅਤ੍ਥਙ੍ਗਮਾਯ ਞਾਯਸ੍ਸ ਅਧਿਗਮਾਯ ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਾਯ. ਤਦੇਵ ਨਾਮ ਚਕ੍ਖੁਂ ਭਵਿਸ੍ਸਤਿ ਤੇ ਰੂਪਾ ਤਞ੍ਚਾਯਤਨਂ ਨੋ ਪਟਿਸਂਵੇਦਿਸ੍ਸਤਿ [ਪਟਿਸਂਵੇਦਯਤਿ (ਕ.)]. ਤਦੇਵ ਨਾਮ ਸੋਤਂ ਭਵਿਸ੍ਸਤਿ ਤੇ ਸਦ੍ਦਾ ਤਞ੍ਚਾਯਤਨਂ ਨੋ ਪਟਿਸਂਵੇਦਿਸ੍ਸਤਿ. ਤਦੇਵ ਨਾਮ ਘਾਨਂ ਭਵਿਸ੍ਸਤਿ ਤੇ ਗਨ੍ਧਾ ਤਞ੍ਚਾਯਤਨਂ ਨੋ ਪਟਿਸਂਵੇਦਿਸ੍ਸਤਿ. ਸਾਵ ਨਾਮ ਜਿਵ੍ਹਾ ਭਵਿਸ੍ਸਤਿ ਤੇ ਰਸਾ ਤਞ੍ਚਾਯਤਨਂ ਨੋ ਪਟਿਸਂਵੇਦਿਸ੍ਸਤਿ. ਸੋਵ ਨਾਮ ਕਾਯੋ ਭਵਿਸ੍ਸਤਿ ਤੇ ਫੋਟ੍ਠਬ੍ਬਾ ਤਞ੍ਚਾਯਤਨਂ ਨੋ ਪਟਿਸਂਵੇਦਿਸ੍ਸਤੀ’’ਤਿ.

ਏਵਂ ਵੁਤ੍ਤੇ ਆਯਸ੍ਮਾ ਉਦਾਯੀ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਸਞ੍ਞੀਮੇਵ ਨੁ ਖੋ, ਆਵੁਸੋ ਆਨਨ੍ਦ, ਤਦਾਯਤਨਂ ਨੋ ਪਟਿਸਂਵੇਦੇਤਿ ਉਦਾਹੁ ਅਸਞ੍ਞੀ’’ਤਿ? ‘‘ਸਞ੍ਞੀਮੇਵ ਖੋ, ਆਵੁਸੋ, ਤਦਾਯਤਨਂ ਨੋ ਪਟਿਸਂਵੇਦੇਤਿ, ਨੋ ਅਸਞ੍ਞੀ’’ਤਿ.

‘‘ਕਿਂਸਞ੍ਞੀ ਪਨਾਵੁਸੋ, ਤਦਾਯਤਨਂ ਨੋ ਪਟਿਸਂਵੇਦੇਤੀ’’ਤਿ? ‘‘ਇਧਾਵੁਸੋ, ਭਿਕ੍ਖੁ, ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਾ ਪਟਿਘਸਞ੍ਞਾਨਂ ਅਤ੍ਥਙ੍ਗਮਾ ਨਾਨਤ੍ਤਸਞ੍ਞਾਨਂ ਅਮਨਸਿਕਾਰਾ ‘ਅਨਨ੍ਤੋ ਆਕਾਸੋ’ਤਿ ਆਕਾਸਾਨਞ੍ਚਾਯਤਨਂ ਉਪਸਮ੍ਪਜ੍ਜ ਵਿਹਰਤਿ. ਏਵਂਸਞ੍ਞੀਪਿ ਖੋ, ਆਵੁਸੋ, ਤਦਾਯਤਨਂ ਨੋ ਪਟਿਸਂਵੇਦੇਤਿ.

‘‘ਪੁਨ ਚਪਰਂ, ਆਵੁਸੋ, ਭਿਕ੍ਖੁ ਸਬ੍ਬਸੋ ਆਕਾਸਾਨਞ੍ਚਾਯਤਨਂ ਸਮਤਿਕ੍ਕਮ੍ਮ ‘ਅਨਨ੍ਤਂ ਵਿਞ੍ਞਾਣ’ਨ੍ਤਿ ਵਿਞ੍ਞਾਣਞ੍ਚਾਯਤਨਂ ਉਪਸਮ੍ਪਜ੍ਜ ਵਿਹਰਤਿ. ਏਵਂਸਞ੍ਞੀਪਿ ਖੋ, ਆਵੁਸੋ, ਤਦਾਯਤਨਂ ਨੋ ਪਟਿਸਂਵੇਦੇਤਿ.

‘‘ਪੁਨ ਚਪਰਂ, ਆਵੁਸੋ, ਭਿਕ੍ਖੁ ਸਬ੍ਬਸੋ ਵਿਞ੍ਞਾਣਞ੍ਚਾਯਤਨਂ ਸਮਤਿਕ੍ਕਮ੍ਮ ‘ਨਤ੍ਥਿ ਕਿਞ੍ਚੀ’ਤਿ ਆਕਿਞ੍ਚਞ੍ਞਾਯਤਨਂ ਉਪਸਮ੍ਪਜ੍ਜ ਵਿਹਰਤਿ. ਏਵਂਸਞ੍ਞੀਪਿ ਖੋ, ਆਵੁਸੋ, ਤਦਾਯਤਨਂ ਨੋ ਪਟਿਸਂਵੇਦੇਤੀ’’ਤਿ.

‘‘ਏਕਮਿਦਾਹਂ, ਆਵੁਸੋ, ਸਮਯਂ ਸਾਕੇਤੇ ਵਿਹਰਾਮਿ ਅਞ੍ਜਨਵਨੇ ਮਿਗਦਾਯੇ. ਅਥ ਖੋ, ਆਵੁਸੋ, ਜਟਿਲਵਾਸਿਕਾ [ਜਟਿਲਗਾਹਿਯਾ (ਸੀ. ਪੀ.), ਜਡਿਲਭਾਗਿਕਾ (ਸ੍ਯਾ.)] ਭਿਕ੍ਖੁਨੀ ਯੇਨਾਹਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ, ਆਵੁਸੋ, ਜਟਿਲਵਾਸਿਕਾ ਭਿਕ੍ਖੁਨੀ ਮਂ ਏਤਦਵੋਚ – ‘ਯਾਯਂ, ਭਨ੍ਤੇ ਆਨਨ੍ਦ, ਸਮਾਧਿ ਨ ਚਾਭਿਨਤੋ ਨ ਚਾਪਨਤੋ ਨ ਚ ਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋ [ਸਸਙ੍ਖਾਰਨਿਗ੍ਗਯ੍ਹਵਾਰਿਤਵਤੋ (ਸੀ. ਸ੍ਯਾ. ਕਂ. ਪੀ.), ਸਸਙ੍ਖਾਰਨਿਗ੍ਗਯ੍ਹਵਾਰਿਵਾਵਟੋ (ਕ.) ਅ. ਨਿ. ੩.੧੦੨; ੫.੨੭; ਦੀ. ਨਿ. ੩.੩੫੫], ਵਿਮੁਤ੍ਤਤ੍ਤਾ ਠਿਤੋ, ਠਿਤਤ੍ਤਾ ਸਨ੍ਤੁਸਿਤੋ, ਸਨ੍ਤੁਸਿਤਤ੍ਤਾ ਨੋ ਪਰਿਤਸ੍ਸਤਿ. ਅਯਂ, ਭਨ੍ਤੇ ਆਨਨ੍ਦ, ਸਮਾਧਿ ਕਿਂਫਲੋ ਵੁਤ੍ਤੋ ਭਗਵਤਾ’’’ਤਿ?

‘‘ਏਵਂ ਵੁਤ੍ਤੇ, ਸੋਹਂ, ਆਵੁਸੋ, ਜਟਿਲਵਾਸਿਕਂ ਭਿਕ੍ਖੁਨਿਂ ਏਤਦਵੋਚਂ – ‘ਯਾਯਂ, ਭਗਿਨਿ, ਸਮਾਧਿ ਨ ਚਾਭਿਨਤੋ ਨ ਚਾਪਨਤੋ ਨ ਚ ਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋ, ਵਿਮੁਤ੍ਤਤ੍ਤਾ ਠਿਤੋ, ਠਿਤਤ੍ਤਾ ਸਨ੍ਤੁਸਿਤੋ, ਸਨ੍ਤੁਸਿਤਤ੍ਤਾ ਨੋ ਪਰਿਤਸ੍ਸਤਿ. ਅਯਂ, ਭਗਿਨਿ, ਸਮਾਧਿ ਅਞ੍ਞਾਫਲੋ ਵੁਤ੍ਤੋ ਭਗਵਤਾ’ਤਿ. ਏਵਂਸਞ੍ਞੀਪਿ ਖੋ, ਆਵੁਸੋ, ਤਦਾਯਤਨਂ ਨੋ ਪਟਿਸਂਵੇਦੇਤੀ’’ਤਿ. ਛਟ੍ਠਂ.