੧੧. ਕੋਧਨਸੁਤ੍ਤਂ

੬੪. ‘‘ਸਤ੍ਤਿਮੇ, ਭਿਕ੍ਖਵੇ, ਧਮ੍ਮਾ ਸਪਤ੍ਤਕਨ੍ਤਾ ਸਪਤ੍ਤਕਰਣਾ ਕੋਧਨਂ ਆਗਚ੍ਛਨ੍ਤਿ ਇਤ੍ਥਿਂ ਵਾ ਪੁਰਿਸਂ ਵਾ. ਕਤਮੇ ਸਤ੍ਤ? ਇਧ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਏਵਂ ਇਚ੍ਛਤਿ – ‘ਅਹੋ ਵਤਾਯਂ ਦੁਬ੍ਬਣ੍ਣੋ ਅਸ੍ਸਾ’ਤਿ! ਤਂ ਕਿਸ੍ਸ ਹੇਤੁ? ਨ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਵਣ੍ਣਵਤਾਯ ਨਨ੍ਦਤਿ. ਕੋਧਨੋਯਂ [ਕੋਧਨਾਯਂ (ਕ.)], ਭਿਕ੍ਖਵੇ, ਪੁਰਿਸਪੁਗ੍ਗਲੋ ਕੋਧਾਭਿਭੂਤੋ ਕੋਧਪਰੇਤੋ, ਕਿਞ੍ਚਾਪਿ ਸੋ ਹੋਤਿ ਸੁਨ੍ਹਾਤੋ ਸੁਵਿਲਿਤ੍ਤੋ ਕਪ੍ਪਿਤਕੇਸਮਸ੍ਸੁ ਓਦਾਤਵਤ੍ਥਵਸਨੋ [ਓਦਾਤਵਸਨੋ (ਕ.)]; ਅਥ ਖੋ ਸੋ ਦੁਬ੍ਬਣ੍ਣੋਵ ਹੋਤਿ ਕੋਧਾਭਿਭੂਤੋ. ਅਯਂ, ਭਿਕ੍ਖਵੇ, ਪਠਮੋ ਧਮ੍ਮੋ ਸਪਤ੍ਤਕਨ੍ਤੋ ਸਪਤ੍ਤਕਰਣੋ ਕੋਧਨਂ ਆਗਚ੍ਛਤਿ ਇਤ੍ਥਿਂ ਵਾ ਪੁਰਿਸਂ ਵਾ.

‘‘ਪੁਨ ਚਪਰਂ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਏਵਂ ਇਚ੍ਛਤਿ – ‘ਅਹੋ ਵਤਾਯਂ ਦੁਕ੍ਖਂ ਸਯੇਯ੍ਯਾ’ਤਿ! ਤਂ ਕਿਸ੍ਸ ਹੇਤੁ? ਨ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਸੁਖਸੇਯ੍ਯਾਯ ਨਨ੍ਦਤਿ. ਕੋਧਨੋਯਂ, ਭਿਕ੍ਖਵੇ, ਪੁਰਿਸਪੁਗ੍ਗਲੋ ਕੋਧਾਭਿਭੂਤੋ ਕੋਧਪਰੇਤੋ, ਕਿਞ੍ਚਾਪਿ ਸੋ ਪਲ੍ਲਙ੍ਕੇ ਸੇਤਿ ਗੋਨਕਤ੍ਥਤੇ ਪਟਲਿਕਤ੍ਥਤੇ ਕਦਲਿਮਿਗਪਵਰਪਚ੍ਚਤ੍ਥਰਣੇ ਸਉਤ੍ਤਰਚ੍ਛਦੇ ਉਭਤੋਲੋਹਿਤਕੂਪਧਾਨੇ; ਅਥ ਖੋ ਸੋ ਦੁਕ੍ਖਞ੍ਞੇਵ ਸੇਤਿ ਕੋਧਾਭਿਭੂਤੋ. ਅਯਂ, ਭਿਕ੍ਖਵੇ, ਦੁਤਿਯੋ ਧਮ੍ਮੋ ਸਪਤ੍ਤਕਨ੍ਤੋ ਸਪਤ੍ਤਕਰਣੋ ਕੋਧਨਂ ਆਗਚ੍ਛਤਿ ਇਤ੍ਥਿਂ ਵਾ ਪੁਰਿਸਂ ਵਾ.

‘‘ਪੁਨ ਚਪਰਂ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਏਵਂ ਇਚ੍ਛਤਿ – ‘ਅਹੋ ਵਤਾਯਂ ਨ ਪਚੁਰਤ੍ਥੋ ਅਸ੍ਸਾ’ਤਿ! ਤਂ ਕਿਸ੍ਸ ਹੇਤੁ? ਨ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਪਚੁਰਤ੍ਥਤਾਯ ਨਨ੍ਦਤਿ. ਕੋਧਨੋਯਂ, ਭਿਕ੍ਖਵੇ, ਪੁਰਿਸਪੁਗ੍ਗਲੋ ਕੋਧਾਭਿਭੂਤੋ ਕੋਧਪਰੇਤੋ, ਅਨਤ੍ਥਮ੍ਪਿ ਗਹੇਤ੍ਵਾ ‘ਅਤ੍ਥੋ ਮੇ ਗਹਿਤੋ’ਤਿ ਮਞ੍ਞਤਿ, ਅਤ੍ਥਮ੍ਪਿ ਗਹੇਤ੍ਵਾ ‘ਅਨਤ੍ਥੋ ਮੇ ਗਹਿਤੋ’ਤਿ ਮਞ੍ਞਤਿ. ਤਸ੍ਸਿਮੇ ਧਮ੍ਮਾ ਅਞ੍ਞਮਞ੍ਞਂ ਵਿਪਚ੍ਚਨੀਕਾ ਗਹਿਤਾ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ ਸਂਵਤ੍ਤਨ੍ਤਿ ਕੋਧਾਭਿਭੂਤਸ੍ਸ. ਅਯਂ, ਭਿਕ੍ਖਵੇ, ਤਤਿਯੋ ਧਮ੍ਮੋ ਸਪਤ੍ਤਕਨ੍ਤੋ ਸਪਤ੍ਤਕਰਣੋ ਕੋਧਨਂ ਆਗਚ੍ਛਤਿ ਇਤ੍ਥਿਂ ਵਾ ਪੁਰਿਸਂ ਵਾ.

‘‘ਪੁਨ ਚਪਰਂ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਏਵਂ ਇਚ੍ਛਤਿ – ‘ਅਹੋ ਵਤਾਯਂ ਨ ਭੋਗਵਾ ਅਸ੍ਸਾ’ਤਿ! ਤਂ ਕਿਸ੍ਸ ਹੇਤੁ? ਨ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਭੋਗਵਤਾਯ ਨਨ੍ਦਤਿ. ਕੋਧਨਸ੍ਸ, ਭਿਕ੍ਖਵੇ, ਪੁਰਿਸਪੁਗ੍ਗਲਸ੍ਸ ਕੋਧਾਭਿਭੂਤਸ੍ਸ ਕੋਧਪਰੇਤਸ੍ਸ, ਯੇਪਿਸ੍ਸ ਤੇ ਹੋਨ੍ਤਿ ਭੋਗਾ ਉਟ੍ਠਾਨਵੀਰਿਯਾਧਿਗਤਾ ਬਾਹਾਬਲਪਰਿਚਿਤਾ ਸੇਦਾਵਕ੍ਖਿਤ੍ਤਾ ਧਮ੍ਮਿਕਾ ਧਮ੍ਮਲਦ੍ਧਾ, ਤੇਪਿ ਰਾਜਾਨੋ ਰਾਜਕੋਸਂ ਪਵੇਸੇਨ੍ਤਿ ਕੋਧਾਭਿਭੂਤਸ੍ਸ. ਅਯਂ, ਭਿਕ੍ਖਵੇ, ਚਤੁਤ੍ਥੋ ਧਮ੍ਮੋ ਸਪਤ੍ਤਕਨ੍ਤੋ ਸਪਤ੍ਤਕਰਣੋ ਕੋਧਨਂ ਆਗਚ੍ਛਤਿ ਇਤ੍ਥਿਂ ਵਾ ਪੁਰਿਸਂ ਵਾ.

‘‘ਪੁਨ ਚਪਰਂ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਏਵਂ ਇਚ੍ਛਤਿ – ‘ਅਹੋ ਵਤਾਯਂ ਨ ਯਸਵਾ ਅਸ੍ਸਾ’ਤਿ! ਤਂ ਕਿਸ੍ਸ ਹੇਤੁ? ਨ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਯਸਵਤਾਯ ਨਨ੍ਦਤਿ. ਕੋਧਨੋਯਂ, ਭਿਕ੍ਖਵੇ, ਪੁਰਿਸਪੁਗ੍ਗਲੋ ਕੋਧਾਭਿਭੂਤੋ ਕੋਧਪਰੇਤੋ, ਯੋਪਿਸ੍ਸ ਸੋ ਹੋਤਿ ਯਸੋ ਅਪ੍ਪਮਾਦਾਧਿਗਤੋ, ਤਮ੍ਹਾਪਿ ਧਂਸਤਿ ਕੋਧਾਭਿਭੂਤੋ. ਅਯਂ, ਭਿਕ੍ਖਵੇ, ਪਞ੍ਚਮੋ ਧਮ੍ਮੋ ਸਪਤ੍ਤਕਨ੍ਤੋ ਸਪਤ੍ਤਕਰਣੋ ਕੋਧਨਂ ਆਗਚ੍ਛਤਿ ਇਤ੍ਥਿਂ ਵਾ ਪੁਰਿਸਂ ਵਾ.

‘‘ਪੁਨ ਚਪਰਂ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਏਵਂ ਇਚ੍ਛਤਿ – ‘ਅਹੋ ਵਤਾਯਂ ਨ ਮਿਤ੍ਤਵਾ ਅਸ੍ਸਾ’ਤਿ! ਤਂ ਕਿਸ੍ਸ ਹੇਤੁ? ਨ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਮਿਤ੍ਤਵਤਾਯ ਨਨ੍ਦਤਿ. ਕੋਧਨਂ, ਭਿਕ੍ਖਵੇ, ਪੁਰਿਸਪੁਗ੍ਗਲਂ ਕੋਧਾਭਿਭੂਤਂ ਕੋਧਪਰੇਤਂ, ਯੇਪਿਸ੍ਸ ਤੇ ਹੋਨ੍ਤਿ ਮਿਤ੍ਤਾਮਚ੍ਚਾ ਞਾਤਿਸਾਲੋਹਿਤਾ, ਤੇਪਿ ਆਰਕਾ ਪਰਿਵਜ੍ਜਨ੍ਤਿ ਕੋਧਾਭਿਭੂਤਂ. ਅਯਂ, ਭਿਕ੍ਖਵੇ, ਛਟ੍ਠੋ ਧਮ੍ਮੋ ਸਪਤ੍ਤਕਨ੍ਤੋ ਸਪਤ੍ਤਕਰਣੋ ਕੋਧਨਂ ਆਗਚ੍ਛਤਿ ਇਤ੍ਥਿਂ ਵਾ ਪੁਰਿਸਂ ਵਾ.

‘‘ਪੁਨ ਚਪਰਂ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਏਵਂ ਇਚ੍ਛਤਿ – ‘ਅਹੋ ਵਤਾਯਂ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯਾ’ਤਿ! ਤਂ ਕਿਸ੍ਸ ਹੇਤੁ? ਨ, ਭਿਕ੍ਖਵੇ, ਸਪਤ੍ਤੋ ਸਪਤ੍ਤਸ੍ਸ ਸੁਗਤਿਗਮਨੇ ਨਨ੍ਦਤਿ. ਕੋਧਨੋਯਂ, ਭਿਕ੍ਖਵੇ, ਪੁਰਿਸਪੁਗ੍ਗਲੋ ਕੋਧਾਭਿਭੂਤੋ ਕੋਧਪਰੇਤੋ ਕਾਯੇਨ ਦੁਚ੍ਚਰਿਤਂ ਚਰਤਿ, ਵਾਚਾਯ ਦੁਚ੍ਚਰਿਤਂ ਚਰਤਿ, ਮਨਸਾ ਦੁਚ੍ਚਰਿਤਂ ਚਰਤਿ. ਸੋ ਕਾਯੇਨ ਦੁਚ੍ਚਰਿਤਂ ਚਰਿਤ੍ਵਾ ਵਾਚਾਯ…ਪੇ… ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤਿ ਕੋਧਾਭਿਭੂਤੋ. ਅਯਂ, ਭਿਕ੍ਖਵੇ, ਸਤ੍ਤਮੋ ਧਮ੍ਮੋ ਸਪਤ੍ਤਕਨ੍ਤੋ ਸਪਤ੍ਤਕਰਣੋ ਕੋਧਨਂ ਆਗਚ੍ਛਤਿ ਇਤ੍ਥਿਂ ਵਾ ਪੁਰਿਸਂ ਵਾ. ਇਮੇ ਖੋ, ਭਿਕ੍ਖਵੇ, ਸਤ੍ਤ ਧਮ੍ਮਾ ਸਪਤ੍ਤਕਨ੍ਤਾ ਸਪਤ੍ਤਕਰਣਾ ਕੋਧਨਂ ਆਗਚ੍ਛਨ੍ਤਿ ਇਤ੍ਥਿਂ ਵਾ ਪੁਰਿਸਂ ਵਾ’’ਤਿ.

‘‘ਕੋਧਨੋ ਦੁਬ੍ਬਣ੍ਣੋ ਹੋਤਿ, ਅਥੋ ਦੁਕ੍ਖਮ੍ਪਿ ਸੇਤਿ ਸੋ;

ਅਥੋ ਅਤ੍ਥਂ ਗਹੇਤ੍ਵਾਨ, ਅਨਤ੍ਥਂ ਅਧਿਪਜ੍ਜਤਿ [ਅਧਿਗਚ੍ਛਤਿ (ਸੀ.), ਪਟਿਪਜ੍ਜਤਿ (ਸ੍ਯਾ.)].

‘‘ਤਤੋ ਕਾਯੇਨ ਵਾਚਾਯ, ਵਧਂ ਕਤ੍ਵਾਨ ਕੋਧਨੋ;

ਕੋਧਾਭਿਭੂਤੋ ਪੁਰਿਸੋ, ਧਨਜਾਨਿਂ ਨਿਗਚ੍ਛਤਿ.

‘‘ਕੋਧਸਮ੍ਮਦਸਮ੍ਮਤ੍ਤੋ, ਆਯਸਕ੍ਯਂ [ਆਯਸਕ੍ਖਂ (ਸ੍ਯਾ.)] ਨਿਗਚ੍ਛਤਿ;

ਞਾਤਿਮਿਤ੍ਤਾ ਸੁਹਜ੍ਜਾ ਚ, ਪਰਿਵਜ੍ਜਨ੍ਤਿ ਕੋਧਨਂ.

[ਇਤਿਵੁ. ੮੮ ਇਤਿਵੁਤ੍ਤਕੇਪਿ] ‘‘ਅਨਤ੍ਥਜਨਨੋ ਕੋਧੋ, ਕੋਧੋ ਚਿਤ੍ਤਪ੍ਪਕੋਪਨੋ;

ਭਯਮਨ੍ਤਰਤੋ ਜਾਤਂ, ਤਂ ਜਨੋ ਨਾਵਬੁਜ੍ਝਤਿ.

‘‘ਕੁਦ੍ਧੋ ਅਤ੍ਥਂ ਨ ਜਾਨਾਤਿ, ਕੁਦ੍ਧੋ ਧਮ੍ਮਂ ਨ ਪਸ੍ਸਤਿ;

ਅਨ੍ਧਤਮਂ ਤਦਾ ਹੋਤਿ, ਯਂ ਕੋਧੋ ਸਹਤੇ ਨਰਂ.

‘‘ਯਂ ਕੁਦ੍ਧੋ ਉਪਰੋਧੇਤਿ, ਸੁਕਰਂ ਵਿਯ ਦੁਕ੍ਕਰਂ;

ਪਚ੍ਛਾ ਸੋ ਵਿਗਤੇ ਕੋਧੇ, ਅਗ੍ਗਿਦਡ੍ਢੋਵ ਤਪ੍ਪਤਿ.

‘‘ਦੁਮ੍ਮਙ੍ਕੁਯਂ ਪਦਸ੍ਸੇਤਿ [ਸਦਸ੍ਸੇਤਿ (ਸੀ.), ਪਠਮਂ ਦਸ੍ਸੇਤਿ (ਸ੍ਯਾ.)], ਧੂਮਂ ਧੂਮੀਵ ਪਾਵਕੋ;

ਯਤੋ ਪਤਾਯਤਿ ਕੋਧੋ, ਯੇਨ ਕੁਜ੍ਝਨ੍ਤਿ ਮਾਨਵਾ.

‘‘ਨਾਸ੍ਸ ਹਿਰੀ ਨ ਓਤ੍ਤਪ੍ਪਂ [ਨ ਅਸ੍ਸ ਹਿਰੀ ਓਤ੍ਤਪ੍ਪਞ੍ਚ (ਕ.)], ਨ ਵਾਚੋ ਹੋਤਿ ਗਾਰਵੋ;

ਕੋਧੇਨ ਅਭਿਭੂਤਸ੍ਸ, ਨ ਦੀਪਂ ਹੋਤਿ ਕਿਞ੍ਚਨਂ.

‘‘ਤਪਨੀਯਾਨਿ ਕਮ੍ਮਾਨਿ, ਯਾਨਿ ਧਮ੍ਮੇਹਿ ਆਰਕਾ;

ਤਾਨਿ ਆਰੋਚਯਿਸ੍ਸਾਮਿ, ਤਂ ਸੁਣਾਥ ਯਥਾ ਤਥਂ.

‘‘ਕੁਦ੍ਧੋ ਹਿ ਪਿਤਰਂ ਹਨ੍ਤਿ, ਹਨ੍ਤਿ ਕੁਦ੍ਧੋ ਸਮਾਤਰਂ;

ਕੁਦ੍ਧੋ ਹਿ ਬ੍ਰਾਹ੍ਮਣਂ ਹਨ੍ਤਿ, ਹਨ੍ਤਿ ਕੁਦ੍ਧੋ ਪੁਥੁਜ੍ਜਨਂ.

‘‘ਯਾਯ ਮਾਤੁ ਭਤੋ ਪੋਸੋ, ਇਮਂ ਲੋਕਂ ਅਵੇਕ੍ਖਤਿ;

ਤਮ੍ਪਿ ਪਾਣਦਦਿਂ ਸਨ੍ਤਿਂ, ਹਨ੍ਤਿ ਕੁਦ੍ਧੋ ਪੁਥੁਜ੍ਜਨੋ.

‘‘ਅਤ੍ਤੂਪਮਾ ਹਿ ਤੇ ਸਤ੍ਤਾ, ਅਤ੍ਤਾ ਹਿ ਪਰਮੋ [ਪਰਮਂ (ਸੀ. ਸ੍ਯਾ.)] ਪਿਯੋ;

ਹਨ੍ਤਿ ਕੁਦ੍ਧੋ ਪੁਥੁਤ੍ਤਾਨਂ, ਨਾਨਾਰੂਪੇਸੁ ਮੁਚ੍ਛਿਤੋ.

‘‘ਅਸਿਨਾ ਹਨ੍ਤਿ ਅਤ੍ਤਾਨਂ, ਵਿਸਂ ਖਾਦਨ੍ਤਿ ਮੁਚ੍ਛਿਤਾ;

ਰਜ੍ਜੁਯਾ ਬਜ੍ਝ ਮੀਯਨ੍ਤਿ, ਪਬ੍ਬਤਾਮਪਿ ਕਨ੍ਦਰੇ.

‘‘ਭੂਨਹਚ੍ਚਾਨਿ [ਭੂਤਹਚ੍ਚਾਨਿ (ਸੀ. ਸ੍ਯਾ.)] ਕਮ੍ਮਾਨਿ, ਅਤ੍ਤਮਾਰਣਿਯਾਨਿ ਚ;

ਕਰੋਨ੍ਤਾ ਨਾਵਬੁਜ੍ਝਨ੍ਤਿ [ਕਰੋਨ੍ਤੋ ਨਾਵਬੁਜ੍ਝਤਿ (ਕ.)], ਕੋਧਜਾਤੋ ਪਰਾਭਵੋ.

‘‘ਇਤਾਯਂ ਕੋਧਰੂਪੇਨ, ਮਚ੍ਚੁਪਾਸੋ ਗੁਹਾਸਯੋ;

ਤਂ ਦਮੇਨ ਸਮੁਚ੍ਛਿਨ੍ਦੇ, ਪਞ੍ਞਾਵੀਰਿਯੇਨ ਦਿਟ੍ਠਿਯਾ.

‘‘ਯਥਾ ਮੇਤਂ [ਏਕਮੇਤਂ (ਸ੍ਯਾ.), ਏਕਮੇਤਂ (ਸੀ.)] ਅਕੁਸਲਂ, ਸਮੁਚ੍ਛਿਨ੍ਦੇਥ ਪਣ੍ਡਿਤੋ;

ਤਥੇਵ ਧਮ੍ਮੇ ਸਿਕ੍ਖੇਥ, ਮਾ ਨੋ ਦੁਮ੍ਮਙ੍ਕੁਯਂ ਅਹੁ.

‘‘ਵੀਤਕੋਧਾ ਅਨਾਯਾਸਾ, ਵੀਤਲੋਭਾ ਅਨੁਸ੍ਸੁਕਾ [ਅਨਿਸ੍ਸੁਕਾ (ਸੀ. ਸ੍ਯਾ.) ਤਦਟ੍ਠਕਥਾਸੁ ਪਨ ‘‘ਅਨੁਸ੍ਸੁਕਾ’’ ਤ੍ਵੇਵ ਦਿਸ੍ਸਤਿ];

ਦਨ੍ਤਾ ਕੋਧਂ ਪਹਨ੍ਤ੍ਵਾਨ, ਪਰਿਨਿਬ੍ਬਨ੍ਤਿ ਅਨਾਸਵਾ’’ਤਿ [ਪਰਿਨਿਬ੍ਬਿਸ੍ਸਥਨਾਸਵਾਤਿ (ਸ੍ਯਾ.), ਪਰਿਨਿਬ੍ਬਿਂਸੁ ਅਨਾਸਵਾਤਿ (ਕ.)]. ਏਕਾਦਸਮਂ;

ਅਬ੍ਯਾਕਤਵਗ੍ਗੋ ਛਟ੍ਠੋ.