੭. ਛਲ਼ਙ੍ਗਦਾਨਸੁਤ੍ਤਂ

੩੭. ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਵੇਲ਼ੁਕਣ੍ਡਕੀ [ਵੇਲ਼ੁਕਣ੍ਡਕਿਯਾ (ਅ. ਨਿ. ੭.੫੩; ੨.੧੩੪; ਸਂ. ਨਿ. ੨.੧੭੩)] ਨਨ੍ਦਮਾਤਾ ਉਪਾਸਿਕਾ ਸਾਰਿਪੁਤ੍ਤਮੋਗ੍ਗਲ੍ਲਾਨਪ੍ਪਮੁਖੇ ਭਿਕ੍ਖੁਸਙ੍ਘੇ ਛਲ਼ਙ੍ਗਸਮਨ੍ਨਾਗਤਂ ਦਕ੍ਖਿਣਂ ਪਤਿਟ੍ਠਾਪੇਤਿ. ਅਦ੍ਦਸਾ ਖੋ ਭਗਵਾ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਵੇਲ਼ੁਕਣ੍ਡਕਿਂ ਨਨ੍ਦਮਾਤਰਂ ਉਪਾਸਿਕਂ ਸਾਰਿਪੁਤ੍ਤਮੋਗ੍ਗਲ੍ਲਾਨਪ੍ਪਮੁਖੇ ਭਿਕ੍ਖੁਸਙ੍ਘੇ ਛਲ਼ਙ੍ਗਸਮਨ੍ਨਾਗਤਂ ਦਕ੍ਖਿਣਂ ਪਤਿਟ੍ਠਾਪੇਨ੍ਤਿਂ. ਦਿਸ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਏਸਾ, ਭਿਕ੍ਖਵੇ, ਵੇਲ਼ੁਕਣ੍ਡਕੀ ਨਨ੍ਦਮਾਤਾ ਉਪਾਸਿਕਾ ਸਾਰਿਪੁਤ੍ਤਮੋਗ੍ਗਲ੍ਲਾਨਪ੍ਪਮੁਖੇ ਭਿਕ੍ਖੁਸਙ੍ਘੇ ਛਲ਼ਙ੍ਗਸਮਨ੍ਨਾਗਤਂ ਦਕ੍ਖਿਣਂ ਪਤਿਟ੍ਠਾਪੇਤਿ’’.

‘‘ਕਥਞ੍ਚ, ਭਿਕ੍ਖਵੇ, ਛਲ਼ਙ੍ਗਸਮਨ੍ਨਾਗਤਾ ਦਕ੍ਖਿਣਾ ਹੋਤਿ? ਇਧ, ਭਿਕ੍ਖਵੇ, ਦਾਯਕਸ੍ਸ ਤੀਣਙ੍ਗਾਨਿ ਹੋਨ੍ਤਿ, ਪਟਿਗ੍ਗਾਹਕਾਨਂ ਤੀਣਙ੍ਗਾਨਿ. ਕਤਮਾਨਿ ਦਾਯਕਸ੍ਸ ਤੀਣਙ੍ਗਾਨਿ? ਇਧ, ਭਿਕ੍ਖਵੇ, ਦਾਯਕੋ ਪੁਬ੍ਬੇਵ ਦਾਨਾ ਸੁਮਨੋ ਹੋਤਿ, ਦਦਂ ਚਿਤ੍ਤਂ ਪਸਾਦੇਤਿ, ਦਤ੍ਵਾ ਅਤ੍ਤਮਨੋ ਹੋਤਿ. ਇਮਾਨਿ ਦਾਯਕਸ੍ਸ ਤੀਣਙ੍ਗਾਨਿ.

‘‘ਕਤਮਾਨਿ ਪਟਿਗ੍ਗਾਹਕਾਨਂ ਤੀਣਙ੍ਗਾਨਿ? ਇਧ, ਭਿਕ੍ਖਵੇ, ਪਟਿਗ੍ਗਾਹਕਾ ਵੀਤਰਾਗਾ ਵਾ ਹੋਨ੍ਤਿ ਰਾਗਵਿਨਯਾਯ ਵਾ ਪਟਿਪਨ੍ਨਾ, ਵੀਤਦੋਸਾ ਵਾ ਹੋਨ੍ਤਿ ਦੋਸਵਿਨਯਾਯ ਵਾ ਪਟਿਪਨ੍ਨਾ, ਵੀਤਮੋਹਾ ਵਾ ਹੋਨ੍ਤਿ ਮੋਹਵਿਨਯਾਯ ਵਾ ਪਟਿਪਨ੍ਨਾ. ਇਮਾਨਿ ਪਟਿਗ੍ਗਾਹਕਾਨਂ ਤੀਣਙ੍ਗਾਨਿ. ਇਤਿ ਦਾਯਕਸ੍ਸ ਤੀਣਙ੍ਗਾਨਿ, ਪਟਿਗ੍ਗਾਹਕਾਨਂ ਤੀਣਙ੍ਗਾਨਿ. ਏਵਂ ਖੋ, ਭਿਕ੍ਖਵੇ, ਛਲ਼ਙ੍ਗਸਮਨ੍ਨਾਗਤਾ ਦਕ੍ਖਿਣਾ ਹੋਤਿ.

‘‘ਏਵਂ ਛਲ਼ਙ੍ਗਸਮਨ੍ਨਾਗਤਾਯ, ਭਿਕ੍ਖਵੇ, ਦਕ੍ਖਿਣਾਯ ਨ ਸੁਕਰਂ ਪੁਞ੍ਞਸ੍ਸ ਪਮਾਣਂ ਗਹੇਤੁਂ – ‘ਏਤ੍ਤਕੋ ਪੁਞ੍ਞਾਭਿਸਨ੍ਦੋ ਕੁਸਲਾਭਿਸਨ੍ਦੋ ਸੁਖਸ੍ਸਾਹਾਰੋ ਸੋਵਗ੍ਗਿਕੋ ਸੁਖਵਿਪਾਕੋ ਸਗ੍ਗਸਂਵਤ੍ਤਨਿਕੋ ਇਟ੍ਠਾਯ ਕਨ੍ਤਾਯ ਮਨਾਪਾਯ ਹਿਤਾਯ ਸੁਖਾਯ ਸਂਵਤ੍ਤਤੀ’ਤਿ. ਅਥ ਖੋ ਅਸਙ੍ਖ੍ਯੇਯ੍ਯੋ [ਅਸਙ੍ਖੇਯ੍ਯੋ (ਸੀ. ਸ੍ਯਾ. ਕਂ. ਪੀ.)] ਅਪ੍ਪਮੇਯ੍ਯੋ ਮਹਾਪੁਞ੍ਞਕ੍ਖਨ੍ਧੋਤ੍ਵੇਵ ਸਙ੍ਖਂ ਗਚ੍ਛਤਿ.

‘‘ਸੇਯ੍ਯਥਾਪਿ, ਭਿਕ੍ਖਵੇ, ਮਹਾਸਮੁਦ੍ਦੇ ਨ ਸੁਕਰਂ ਉਦਕਸ੍ਸ ਪਮਾਣਂ ਗਹੇਤੁਂ – ‘ਏਤ੍ਤਕਾਨਿ ਉਦਕਾਲ਼੍ਹਕਾਨੀਤਿ ਵਾ ਏਤ੍ਤਕਾਨਿ ਉਦਕਾਲ਼੍ਹਕਸਤਾਨੀਤਿ ਵਾ ਏਤ੍ਤਕਾਨਿ ਉਦਕਾਲ਼੍ਹਕਸਹਸ੍ਸਾਨੀਤਿ ਵਾ ਏਤ੍ਤਕਾਨਿ ਉਦਕਾਲ਼੍ਹਕਸਤਸਹਸ੍ਸਾਨੀ’ਤਿ ਵਾ. ਅਥ ਖੋ ਅਸਙ੍ਖ੍ਯੇਯ੍ਯੋ ਅਪ੍ਪਮੇਯ੍ਯੋ ਮਹਾਉਦਕਕ੍ਖਨ੍ਧੋਤ੍ਵੇਵ ਸਙ੍ਖਂ ਗਚ੍ਛਤਿ. ਏਵਮੇਵਂ ਖੋ, ਭਿਕ੍ਖਵੇ, ਏਵਂ ਛਲ਼ਙ੍ਗਸਮਨ੍ਨਾਗਤਾਯ ਦਕ੍ਖਿਣਾਯ ਨ ਸੁਕਰਂ ਪੁਞ੍ਞਸ੍ਸ ਪਮਾਣਂ ਗਹੇਤੁਂ – ‘ਏਤ੍ਤਕੋ ਪੁਞ੍ਞਾਭਿਸਨ੍ਦੋ ਕੁਸਲਾਭਿਸਨ੍ਦੋ ਸੁਖਸ੍ਸਾਹਾਰੋ ਸੋਵਗ੍ਗਿਕੋ ਸੁਖਵਿਪਾਕੋ ਸਗ੍ਗਸਂਵਤ੍ਤਨਿਕੋ ਇਟ੍ਠਾਯ ਕਨ੍ਤਾਯ ਮਨਾਪਾਯ ਹਿਤਾਯ ਸੁਖਾਯ ਸਂਵਤ੍ਤਤੀ’ਤਿ. ਅਥ ਖੋ ਅਸਙ੍ਖ੍ਯੇਯ੍ਯੋ ਅਪ੍ਪਮੇਯ੍ਯੋ ਮਹਾਪੁਞ੍ਞਕ੍ਖਨ੍ਧੋਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿ.

[ਪੇ. ਵ. ੩੦੫ ਪੇਤਵਤ੍ਥੁਮ੍ਹਿਪਿ] ‘‘ਪੁਬ੍ਬੇਵ ਦਾਨਾ ਸੁਮਨੋ, ਦਦਂ ਚਿਤ੍ਤਂ ਪਸਾਦਯੇ;

ਦਤ੍ਵਾ ਅਤ੍ਤਮਨੋ ਹੋਤਿ, ਏਸਾ ਯਞ੍ਞਸ੍ਸ [ਪੁਞ੍ਞਸ੍ਸ (ਕ.)] ਸਮ੍ਪਦਾ.

‘‘ਵੀਤਰਾਗਾ [ਵੀਤਰਾਗੋ (ਸ੍ਯਾ. ਕਂ. ਕ.) ਏਵਂ ਅਨਨ੍ਤਰਪਦਤ੍ਤਯੇਪਿ] ਵੀਤਦੋਸਾ, ਵੀਤਮੋਹਾ ਅਨਾਸਵਾ;

ਖੇਤ੍ਤਂ ਯਞ੍ਞਸ੍ਸ ਸਮ੍ਪਨ੍ਨਂ, ਸਞ੍ਞਤਾ ਬ੍ਰਹ੍ਮਚਾਰਯੋ [ਬ੍ਰਹ੍ਮਚਾਰਿਨੋ (ਸ੍ਯਾ. ਕਂ.)].

‘‘ਸਯਂ ਆਚਮਯਿਤ੍ਵਾਨ, ਦਤ੍ਵਾ ਸਕੇਹਿ ਪਾਣਿਭਿ;

ਅਤ੍ਤਨੋ ਪਰਤੋ ਚੇਸੋ, ਯਞ੍ਞੋ ਹੋਤਿ ਮਹਪ੍ਫਲੋ.

[ਅ. ਨਿ. ੪.੪੦] ‘‘ਏਵਂ ਯਜਿਤ੍ਵਾ ਮੇਧਾਵੀ, ਸਦ੍ਧੋ ਮੁਤ੍ਤੇਨ ਚੇਤਸਾ;

ਅਬ੍ਯਾਪਜ੍ਜਂ ਸੁਖਂ ਲੋਕਂ, ਪਣ੍ਡਿਤੋ ਉਪਪਜ੍ਜਤੀ’’ਤਿ. ਸਤ੍ਤਮਂ;