੮. ਅਤ੍ਤਕਾਰੀਸੁਤ੍ਤਂ

੩੮. ਅਥ ਖੋ ਅਞ੍ਞਤਰੋ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਹਞ੍ਹਿ, ਭੋ ਗੋਤਮ, ਏਵਂਵਾਦੀ ਏਵਂਦਿਟ੍ਠਿ – ‘ਨਤ੍ਥਿ ਅਤ੍ਤਕਾਰੋ, ਨਤ੍ਥਿ ਪਰਕਾਰੋ’’’ਤਿ. ‘‘ਮਾਹਂ, ਬ੍ਰਾਹ੍ਮਣ, ਏਵਂਵਾਦਿਂ ਏਵਂਦਿਟ੍ਠਿਂ ਅਦ੍ਦਸਂ ਵਾ ਅਸ੍ਸੋਸਿਂ ਵਾ. ਕਥਞ੍ਹਿ ਨਾਮ ਸਯਂ ਅਭਿਕ੍ਕਮਨ੍ਤੋ, ਸਯਂ ਪਟਿਕ੍ਕਮਨ੍ਤੋ ਏਵਂ ਵਕ੍ਖਤਿ – ‘ਨਤ੍ਥਿ ਅਤ੍ਤਕਾਰੋ, ਨਤ੍ਥਿ ਪਰਕਾਰੋ’’’ਤਿ!

‘‘ਤਂ ਕਿਂ ਮਞ੍ਞਸਿ, ਬ੍ਰਾਹ੍ਮਣ, ਅਤ੍ਥਿ ਆਰਬ੍ਭਧਾਤੂ’’ਤਿ? ‘‘ਏਵਂ, ਭੋ’’. ‘‘ਆਰਬ੍ਭਧਾਤੁਯਾ ਸਤਿ ਆਰਬ੍ਭਵਨ੍ਤੋ ਸਤ੍ਤਾ ਪਞ੍ਞਾਯਨ੍ਤੀ’’ਤਿ? ‘‘ਏਵਂ, ਭੋ’’. ‘‘ਯਂ ਖੋ, ਬ੍ਰਾਹ੍ਮਣ, ਆਰਬ੍ਭਧਾਤੁਯਾ ਸਤਿ ਆਰਬ੍ਭਵਨ੍ਤੋ ਸਤ੍ਤਾ ਪਞ੍ਞਾਯਨ੍ਤਿ, ਅਯਂ ਸਤ੍ਤਾਨਂ ਅਤ੍ਤਕਾਰੋ ਅਯਂ ਪਰਕਾਰੋ’’.

‘‘ਤਂ ਕਿਂ ਮਞ੍ਞਸਿ, ਬ੍ਰਾਹ੍ਮਣ, ਅਤ੍ਥਿ ਨਿਕ੍ਕਮਧਾਤੁ…ਪੇ… ਅਤ੍ਥਿ ਪਰਕ੍ਕਮਧਾਤੁ… ਅਤ੍ਥਿ ਥਾਮਧਾਤੁ… ਅਤ੍ਥਿ ਠਿਤਿਧਾਤੁ… ਅਤ੍ਥਿ ਉਪਕ੍ਕਮਧਾਤੂ’’ਤਿ? ‘‘ਏਵਂ, ਭੋ’’. ‘‘ਉਪਕ੍ਕਮਧਾਤੁਯਾ ਸਤਿ ਉਪਕ੍ਕਮਵਨ੍ਤੋ ਸਤ੍ਤਾ ਪਞ੍ਞਾਯਨ੍ਤੀ’’ਤਿ? ‘‘ਏਵਂ, ਭੋ’’. ‘‘ਯਂ ਖੋ, ਬ੍ਰਾਹ੍ਮਣ, ਉਪਕ੍ਕਮਧਾਤੁਯਾ ਸਤਿ ਉਪਕ੍ਕਮਵਨ੍ਤੋ ਸਤ੍ਤਾ ਪਞ੍ਞਾਯਨ੍ਤਿ, ਅਯਂ ਸਤ੍ਤਾਨਂ ਅਤ੍ਤਕਾਰੋ ਅਯਂ ਪਰਕਾਰੋ’’.

‘‘ਮਾਹਂ, ਬ੍ਰਾਹ੍ਮਣ [ਤਂ ਕਿਂ ਮਞ੍ਞਸਿ ਬ੍ਰਾਹ੍ਮਣ ਮਾਹਂ (ਕ.)], ਏਵਂਵਾਦਿਂ ਏਵਂਦਿਟ੍ਠਿਂ ਅਦ੍ਦਸਂ ਵਾ ਅਸ੍ਸੋਸਿਂ ਵਾ. ਕਥਞ੍ਹਿ ਨਾਮ ਸਯਂ ਅਭਿਕ੍ਕਮਨ੍ਤੋ ਸਯਂ ਪਟਿਕ੍ਕਮਨ੍ਤੋ ਏਵਂ ਵਕ੍ਖਤਿ – ‘ਨਤ੍ਥਿ ਅਤ੍ਤਕਾਰੋ ਨਤ੍ਥਿ ਪਰਕਾਰੋ’’’ਤਿ.

‘‘ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ… ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ! ਅਟ੍ਠਮਂ.