੮. ਦੁਤਿਯਸਮਯਸੁਤ੍ਤਂ

੨੮. ਏਕਂ ਸਮਯਂ ਸਮ੍ਬਹੁਲਾ ਥੇਰਾ ਭਿਕ੍ਖੂ ਬਾਰਾਣਸਿਯਂ ਵਿਹਰਨ੍ਤਿ ਇਸਿਪਤਨੇ ਮਿਗਦਾਯੇ. ਅਥ ਖੋ ਤੇਸਂ ਥੇਰਾਨਂ ਭਿਕ੍ਖੂਨਂ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾਨਂ ਮਣ੍ਡਲਮਾਲ਼ੇ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਾਕਥਾ ਉਦਪਾਦਿ – ‘‘ਕੋ ਨੁ ਖੋ, ਆਵੁਸੋ, ਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁ’’ਨ੍ਤਿ?

ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਥੇਰੇ ਭਿਕ੍ਖੂ ਏਤਦਵੋਚ – ‘‘ਯਸ੍ਮਿਂ, ਆਵੁਸੋ, ਸਮਯੇ ਮਨੋਭਾਵਨੀਯੋ ਭਿਕ੍ਖੁ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਪਾਦੇ ਪਕ੍ਖਾਲੇਤ੍ਵਾ ਨਿਸਿਨ੍ਨੋ ਹੋਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ, ਸੋ ਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁ’’ਨ੍ਤਿ.

ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਤਂ ਭਿਕ੍ਖੁਂ ਏਤਦਵੋਚ – ‘‘ਨ ਖੋ, ਆਵੁਸੋ, ਸੋ ਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁਂ. ਯਸ੍ਮਿਂ, ਆਵੁਸੋ, ਸਮਯੇ ਮਨੋਭਾਵਨੀਯੋ ਭਿਕ੍ਖੁ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਪਾਦੇ ਪਕ੍ਖਾਲੇਤ੍ਵਾ ਨਿਸਿਨ੍ਨੋ ਹੋਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ, ਚਾਰਿਤ੍ਤਕਿਲਮਥੋਪਿਸ੍ਸ ਤਸ੍ਮਿਂ ਸਮਯੇ ਅਪ੍ਪਟਿਪ੍ਪਸ੍ਸਦ੍ਧੋ ਹੋਤਿ, ਭਤ੍ਤਕਿਲਮਥੋਪਿਸ੍ਸ ਤਸ੍ਮਿਂ ਸਮਯੇ ਅਪ੍ਪਟਿਪ੍ਪਸ੍ਸਦ੍ਧੋ ਹੋਤਿ. ਤਸ੍ਮਾ ਸੋ ਅਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁਂ. ਯਸ੍ਮਿਂ, ਆਵੁਸੋ, ਸਮਯੇ ਮਨੋਭਾਵਨੀਯੋ ਭਿਕ੍ਖੁ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਵਿਹਾਰਪਚ੍ਛਾਯਾਯਂ ਨਿਸਿਨ੍ਨੋ ਹੋਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ, ਸੋ ਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁ’’ਨ੍ਤਿ.

ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਤਂ ਭਿਕ੍ਖੁਂ ਏਤਦਵੋਚ – ‘‘ਨ ਖੋ, ਆਵੁਸੋ, ਸੋ ਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁਂ. ਯਸ੍ਮਿਂ, ਆਵੁਸੋ, ਸਮਯੇ ਮਨੋਭਾਵਨੀਯੋ ਭਿਕ੍ਖੁ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਵਿਹਾਰਪਚ੍ਛਾਯਾਯਂ ਨਿਸਿਨ੍ਨੋ ਹੋਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ, ਯਦੇਵਸ੍ਸ ਦਿਵਾ ਸਮਾਧਿਨਿਮਿਤ੍ਤਂ ਮਨਸਿਕਤਂ ਹੋਤਿ ਤਦੇਵਸ੍ਸ ਤਸ੍ਮਿਂ ਸਮਯੇ ਸਮੁਦਾਚਰਤਿ. ਤਸ੍ਮਾ ਸੋ ਅਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁਂ. ਯਸ੍ਮਿਂ, ਆਵੁਸੋ, ਸਮਯੇ ਮਨੋਭਾਵਨੀਯੋ ਭਿਕ੍ਖੁ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਨਿਸਿਨ੍ਨੋ ਹੋਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ, ਸੋ ਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁ’’ਨ੍ਤਿ.

ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੁ ਤਂ ਭਿਕ੍ਖੁਂ ਏਤਦਵੋਚ – ‘‘ਨ ਖੋ, ਆਵੁਸੋ, ਸੋ ਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁਂ. ਯਸ੍ਮਿਂ, ਆਵੁਸੋ, ਸਮਯੇ ਮਨੋਭਾਵਨੀਯੋ ਭਿਕ੍ਖੁ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਨਿਸਿਨ੍ਨੋ ਹੋਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ, ਓਜਟ੍ਠਾਯਿਸ੍ਸ ਤਸ੍ਮਿਂ ਸਮਯੇ ਕਾਯੋ ਹੋਤਿ ਫਾਸੁਸ੍ਸ ਹੋਤਿ ਬੁਦ੍ਧਾਨਂ ਸਾਸਨਂ ਮਨਸਿ ਕਾਤੁਂ. ਤਸ੍ਮਾ ਸੋ ਅਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁ’’ਨ੍ਤਿ.

ਏਵਂ ਵੁਤ੍ਤੇ ਆਯਸ੍ਮਾ ਮਹਾਕਚ੍ਚਾਨੋ ਥੇਰੇ ਭਿਕ੍ਖੂ ਏਤਦਵੋਚ – ‘‘ਸਮ੍ਮੁਖਾ ਮੇਤਂ, ਆਵੁਸੋ, ਭਗਵਤੋ ਸੁਤਂ ਸਮ੍ਮੁਖਾ ਪਟਿਗ੍ਗਹਿਤਂ – ‘ਛਯਿਮੇ, ਭਿਕ੍ਖੁ, ਸਮਯਾ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁਂ’’’.

‘‘ਕਤਮੇ ਛ? ਇਧ, ਭਿਕ੍ਖੁ, ਯਸ੍ਮਿਂ ਸਮਯੇ ਭਿਕ੍ਖੁ ਕਾਮਰਾਗਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ ਕਾਮਰਾਗਪਰੇਤੇਨ, ਉਪ੍ਪਨ੍ਨਸ੍ਸ ਚ ਕਾਮਰਾਗਸ੍ਸ ਨਿਸ੍ਸਰਣਂ ਯਥਾਭੂਤਂ ਨਪ੍ਪਜਾਨਾਤਿ, ਤਸ੍ਮਿਂ ਸਮਯੇ ਮਨੋਭਾਵਨੀਯੋ ਭਿਕ੍ਖੁ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ ਖੋ, ਆਵੁਸੋ, ਕਾਮਰਾਗਪਰਿਯੁਟ੍ਠਿਤੇਨ ਚੇਤਸਾ ਵਿਹਰਾਮਿ ਕਾਮਰਾਗਪਰੇਤੇਨ, ਉਪ੍ਪਨ੍ਨਸ੍ਸ ਚ ਕਾਮਰਾਗਸ੍ਸ ਨਿਸ੍ਸਰਣਂ ਯਥਾਭੂਤਂ ਨਪ੍ਪਜਾਨਾਮਿ. ਸਾਧੁ ਵਤ ਮੇ ਆਯਸ੍ਮਾ ਕਾਮਰਾਗਸ੍ਸ ਪਹਾਨਾਯ ਧਮ੍ਮਂ ਦੇਸੇਤੂ’ਤਿ. ਤਸ੍ਸ ਮਨੋਭਾਵਨੀਯੋ ਭਿਕ੍ਖੁ ਕਾਮਰਾਗਸ੍ਸ ਪਹਾਨਾਯ ਧਮ੍ਮਂ ਦੇਸੇਤਿ. ਅਯਂ, ਭਿਕ੍ਖੁ, ਪਠਮੋ ਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁਂ.

‘‘ਪੁਨ ਚਪਰਂ, ਭਿਕ੍ਖੁ, ਯਸ੍ਮਿਂ ਸਮਯੇ ਭਿਕ੍ਖੁ ਬ੍ਯਾਪਾਦਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ…ਪੇ… ਥਿਨਮਿਦ੍ਧਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ… ਉਦ੍ਧਚ੍ਚਕੁਕ੍ਕੁਚ੍ਚਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ… ਵਿਚਿਕਿਚ੍ਛਾਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ… ਯਂ ਨਿਮਿਤ੍ਤਂ ਆਗਮ੍ਮ ਯਂ ਨਿਮਿਤ੍ਤਂ ਮਨਸਿਕਰੋਤੋ ਅਨਨ੍ਤਰਾ ਆਸਵਾਨਂ ਖਯੋ ਹੋਤਿ, ਤਂ ਨਿਮਿਤ੍ਤਂ ਨ ਜਾਨਾਤਿ ਨ ਪਸ੍ਸਤਿ, ਤਸ੍ਮਿਂ ਸਮਯੇ ਮਨੋਭਾਵਨੀਯੋ ਭਿਕ੍ਖੁ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ ਖੋ, ਆਵੁਸੋ, ਯਂ ਨਿਮਿਤ੍ਤਂ ਆਗਮ੍ਮ ਯਂ ਨਿਮਿਤ੍ਤਂ ਮਨਸਿਕਰੋਤੋ ਅਨਨ੍ਤਰਾ ਆਸਵਾਨਂ ਖਯੋ ਹੋਤਿ ਤਂ ਨਿਮਿਤ੍ਤਂ ਨ ਜਾਨਾਮਿ ਨ ਪਸ੍ਸਾਮਿ. ਸਾਧੁ ਵਤ ਮੇ ਆਯਸ੍ਮਾ ਆਸਵਾਨਂ ਖਯਾਯ ਧਮ੍ਮਂ ਦੇਸੇਤੂ’ਤਿ. ਤਸ੍ਸ ਮਨੋਭਾਵਨੀਯੋ ਭਿਕ੍ਖੁ ਆਸਵਾਨਂ ਖਯਾਯ ਧਮ੍ਮਂ ਦੇਸੇਤਿ. ਅਯਂ, ਭਿਕ੍ਖੁ, ਛਟ੍ਠੋ ਸਮਯੋ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁਂ.

‘‘ਸਮ੍ਮੁਖਾ ਮੇਤਂ, ਆਵੁਸੋ, ਭਗਵਤੋ ਸੁਤਂ ਸਮ੍ਮੁਖਾ ਪਟਿਗ੍ਗਹਿਤਂ – ‘ਇਮੇ ਖੋ, ਭਿਕ੍ਖੁ, ਛ ਸਮਯਾ ਮਨੋਭਾਵਨੀਯਸ੍ਸ ਭਿਕ੍ਖੁਨੋ ਦਸ੍ਸਨਾਯ ਉਪਸਙ੍ਕਮਿਤੁ’’’ਨ੍ਤਿ. ਅਟ੍ਠਮਂ.