੯. ਸਿਵਥਿਕਸੁਤ੍ਤਂ

੨੪੯. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਸਿਵਥਿਕਾਯ [ਸੀਵਥਿਕਾਯ (ਸੀ. ਸ੍ਯਾ. ਕਂ. ਪੀ.)]. ਕਤਮੇ ਪਞ੍ਚ? ਅਸੁਚਿ, ਦੁਗ੍ਗਨ੍ਧਾ, ਸਪ੍ਪਟਿਭਯਾ, ਵਾਲ਼ਾਨਂ ਅਮਨੁਸ੍ਸਾਨਂ ਆਵਾਸੋ, ਬਹੁਨੋ ਜਨਸ੍ਸ ਆਰੋਦਨਾ – ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਸਿਵਥਿਕਾਯ.

‘‘ਏਵਮੇਵਂ ਖੋ, ਭਿਕ੍ਖਵੇ, ਪਞ੍ਚਿਮੇ ਆਦੀਨਵਾ ਸਿਵਥਿਕੂਪਮੇ ਪੁਗ੍ਗਲੇ. ਕਤਮੇ ਪਞ੍ਚ? ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤੋ ਹੋਤਿ; ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤੋ ਹੋਤਿ; ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤੋ ਹੋਤਿ. ਇਦਮਸ੍ਸ ਅਸੁਚਿਤਾਯ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਅਸੁਚਿ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ.

‘‘ਤਸ੍ਸ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤਸ੍ਸ, ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤਸ੍ਸ, ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤਸ੍ਸ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਇਦਮਸ੍ਸ ਦੁਗ੍ਗਨ੍ਧਤਾਯ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਦੁਗ੍ਗਨ੍ਧਾ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ.

‘‘ਤਮੇਨਂ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤਂ, ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤਂ, ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤਂ ਪੇਸਲਾ ਸਬ੍ਰਹ੍ਮਚਾਰੀ ਆਰਕਾ ਪਰਿਵਜ੍ਜਨ੍ਤਿ. ਇਦਮਸ੍ਸ ਸਪ੍ਪਟਿਭਯਸ੍ਮਿਂ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਸਪ੍ਪਟਿਭਯਾ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ.

‘‘ਸੋ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤੋ, ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤੋ, ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤੋ ਸਭਾਗੇਹਿ ਪੁਗ੍ਗਲੇਹਿ ਸਦ੍ਧਿਂ ਸਂਵਸਤਿ. ਇਦਮਸ੍ਸ ਵਾਲ਼ਾਵਾਸਸ੍ਮਿਂ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਵਾਲ਼ਾਨਂ ਅਮਨੁਸ੍ਸਾਨਂ ਆਵਾਸੋ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ.

‘‘ਤਮੇਨਂ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤਂ, ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤਂ, ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤਂ ਪੇਸਲਾ ਸਬ੍ਰਹ੍ਮਚਾਰੀ ਦਿਸ੍ਵਾ ਖੀਯਧਮ੍ਮਂ [ਖੀਯਨਧਮ੍ਮਂ (ਸੀ.)] ਆਪਜ੍ਜਨ੍ਤਿ – ‘ਅਹੋ ਵਤ ਨੋ ਦੁਕ੍ਖਂ ਯੇ ਮਯਂ ਏਵਰੂਪੇਹਿ ਪੁਗ੍ਗਲੇਹਿ ਸਦ੍ਧਿਂ ਸਂਵਸਾਮਾ’ਤਿ! ਇਦਮਸ੍ਸ ਆਰੋਦਨਾਯ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਬਹੁਨੋ ਜਨਸ੍ਸ ਆਰੋਦਨਾ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਸਿਵਥਿਕੂਪਮੇ ਪੁਗ੍ਗਲੇ’’ਤਿ. ਨਵਮਂ.