(੨੫) ੫. ਦੁਚ੍ਚਰਿਤਵਗ੍ਗੋ

੧. ਪਠਮਦੁਚ੍ਚਰਿਤਸੁਤ੍ਤਂ

੨੪੧. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਦੁਚ੍ਚਰਿਤੇ. ਕਤਮੇ ਪਞ੍ਚ? ਅਤ੍ਤਾਪਿ ਅਤ੍ਤਾਨਂ ਉਪਵਦਤਿ; ਅਨੁਵਿਚ੍ਚ ਵਿਞ੍ਞੂ ਗਰਹਨ੍ਤਿ; ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ; ਸਮ੍ਮੂਲ਼੍ਹੋ ਕਾਲਂ ਕਰੋਤਿ; ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਦੁਚ੍ਚਰਿਤੇ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਸੁਚਰਿਤੇ. ਕਤਮੇ ਪਞ੍ਚ? ਅਤ੍ਤਾਪਿ ਅਤ੍ਤਾਨਂ ਨ ਉਪਵਦਤਿ; ਅਨੁਵਿਚ੍ਚ ਵਿਞ੍ਞੂ ਪਸਂਸਨ੍ਤਿ; ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ; ਅਸਮ੍ਮੂਲ਼੍ਹੋ ਕਾਲਂ ਕਰੋਤਿ; ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਸੁਚਰਿਤੇ’’ਤਿ. ਪਠਮਂ.

੨. ਪਠਮਕਾਯਦੁਚ੍ਚਰਿਤਸੁਤ੍ਤਂ

੨੪੨. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਕਾਯਦੁਚ੍ਚਰਿਤੇ…ਪੇ… ਆਨਿਸਂਸਾ ਕਾਯਸੁਚਰਿਤੇ…ਪੇ…. ਦੁਤਿਯਂ.

੩. ਪਠਮਵਚੀਦੁਚ੍ਚਰਿਤਸੁਤ੍ਤਂ

੨੪੩. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਵਚੀਦੁਚ੍ਚਰਿਤੇ…ਪੇ… ਆਨਿਸਂਸਾ ਵਚੀਸੁਚਰਿਤੇ…ਪੇ…. ਤਤਿਯਂ.

੪. ਪਠਮਮਨੋਦੁਚ੍ਚਰਿਤਸੁਤ੍ਤਂ

੨੪੪. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਮਨੋਦੁਚ੍ਚਰਿਤੇ…ਪੇ… ਆਨਿਸਂਸਾ ਮਨੋਸੁਚਰਿਤੇ. ਕਤਮੇ ਪਞ੍ਚ? ਅਤ੍ਤਾਪਿ ਅਤ੍ਤਾਨਂ ਨ ਉਪਵਦਤਿ; ਅਨੁਵਿਚ੍ਚ ਵਿਞ੍ਞੂ ਪਸਂਸਨ੍ਤਿ; ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ; ਅਸਮ੍ਮੂਲ਼੍ਹੋ ਕਾਲਂ ਕਰੋਤਿ; ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਮਨੋਸੁਚਰਿਤੇ’’ਤਿ. ਚਤੁਤ੍ਥਂ.

੫. ਦੁਤਿਯਦੁਚ੍ਚਰਿਤਸੁਤ੍ਤਂ

੨੪੫. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਦੁਚ੍ਚਰਿਤੇ. ਕਤਮੇ ਪਞ੍ਚ? ਅਤ੍ਤਾਪਿ ਅਤ੍ਤਾਨਂ ਉਪਵਦਤਿ; ਅਨੁਵਿਚ੍ਚ ਵਿਞ੍ਞੂ ਗਰਹਨ੍ਤਿ; ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ; ਸਦ੍ਧਮ੍ਮਾ ਵੁਟ੍ਠਾਤਿ; ਅਸਦ੍ਧਮ੍ਮੇ ਪਤਿਟ੍ਠਾਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਦੁਚ੍ਚਰਿਤੇ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਸੁਚਰਿਤੇ. ਕਤਮੇ ਪਞ੍ਚ? ਅਤ੍ਤਾਪਿ ਅਤ੍ਤਾਨਂ ਨ ਉਪਵਦਤਿ; ਅਨੁਵਿਚ੍ਚ ਵਿਞ੍ਞੂ ਪਸਂਸਨ੍ਤਿ; ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ; ਅਸਦ੍ਧਮ੍ਮਾ ਵੁਟ੍ਠਾਤਿ; ਸਦ੍ਧਮ੍ਮੇ ਪਤਿਟ੍ਠਾਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਸੁਚਰਿਤੇ’’ਤਿ. ਪਞ੍ਚਮਂ.

੬. ਦੁਤਿਯਕਾਯਦੁਚ੍ਚਰਿਤਸੁਤ੍ਤਂ

੨੪੬. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਕਾਯਦੁਚ੍ਚਰਿਤੇ…ਪੇ… ਆਨਿਸਂਸਾ ਕਾਯਸੁਚਰਿਤੇ…ਪੇ…. ਛਟ੍ਠਂ.

੭. ਦੁਤਿਯਵਚੀਦੁਚ੍ਚਰਿਤਸੁਤ੍ਤਂ

੨੪੭. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਵਚੀਦੁਚ੍ਚਰਿਤੇ…ਪੇ… ਆਨਿਸਂਸਾ ਵਚੀਸੁਚਰਿਤੇ…ਪੇ…. ਸਤ੍ਤਮਂ.

੮. ਦੁਤਿਯਮਨੋਦੁਚ੍ਚਰਿਤਸੁਤ੍ਤਂ

੨੪੮. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਮਨੋਦੁਚ੍ਚਰਿਤੇ…ਪੇ… ਆਨਿਸਂਸਾ ਮਨੋਸੁਚਰਿਤੇ. ਕਤਮੇ ਪਞ੍ਚ? ਅਤ੍ਤਾਪਿ ਅਤ੍ਤਾਨਂ ਨ ਉਪਵਦਤਿ; ਅਨੁਵਿਚ੍ਚ ਵਿਞ੍ਞੂ ਪਸਂਸਨ੍ਤਿ; ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ; ਅਸਦ੍ਧਮ੍ਮਾ ਵੁਟ੍ਠਾਤਿ; ਸਦ੍ਧਮ੍ਮੇ ਪਤਿਟ੍ਠਾਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਮਨੋਸੁਚਰਿਤੇ’’ਤਿ. ਅਟ੍ਠਮਂ.

੯. ਸਿਵਥਿਕਸੁਤ੍ਤਂ

੨੪੯. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਸਿਵਥਿਕਾਯ [ਸੀਵਥਿਕਾਯ (ਸੀ. ਸ੍ਯਾ. ਕਂ. ਪੀ.)]. ਕਤਮੇ ਪਞ੍ਚ? ਅਸੁਚਿ, ਦੁਗ੍ਗਨ੍ਧਾ, ਸਪ੍ਪਟਿਭਯਾ, ਵਾਲ਼ਾਨਂ ਅਮਨੁਸ੍ਸਾਨਂ ਆਵਾਸੋ, ਬਹੁਨੋ ਜਨਸ੍ਸ ਆਰੋਦਨਾ – ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਸਿਵਥਿਕਾਯ.

‘‘ਏਵਮੇਵਂ ਖੋ, ਭਿਕ੍ਖਵੇ, ਪਞ੍ਚਿਮੇ ਆਦੀਨਵਾ ਸਿਵਥਿਕੂਪਮੇ ਪੁਗ੍ਗਲੇ. ਕਤਮੇ ਪਞ੍ਚ? ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤੋ ਹੋਤਿ; ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤੋ ਹੋਤਿ; ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤੋ ਹੋਤਿ. ਇਦਮਸ੍ਸ ਅਸੁਚਿਤਾਯ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਅਸੁਚਿ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ.

‘‘ਤਸ੍ਸ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤਸ੍ਸ, ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤਸ੍ਸ, ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤਸ੍ਸ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਇਦਮਸ੍ਸ ਦੁਗ੍ਗਨ੍ਧਤਾਯ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਦੁਗ੍ਗਨ੍ਧਾ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ.

‘‘ਤਮੇਨਂ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤਂ, ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤਂ, ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤਂ ਪੇਸਲਾ ਸਬ੍ਰਹ੍ਮਚਾਰੀ ਆਰਕਾ ਪਰਿਵਜ੍ਜਨ੍ਤਿ. ਇਦਮਸ੍ਸ ਸਪ੍ਪਟਿਭਯਸ੍ਮਿਂ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਸਪ੍ਪਟਿਭਯਾ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ.

‘‘ਸੋ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤੋ, ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤੋ, ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤੋ ਸਭਾਗੇਹਿ ਪੁਗ੍ਗਲੇਹਿ ਸਦ੍ਧਿਂ ਸਂਵਸਤਿ. ਇਦਮਸ੍ਸ ਵਾਲ਼ਾਵਾਸਸ੍ਮਿਂ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਵਾਲ਼ਾਨਂ ਅਮਨੁਸ੍ਸਾਨਂ ਆਵਾਸੋ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ.

‘‘ਤਮੇਨਂ ਅਸੁਚਿਨਾ ਕਾਯਕਮ੍ਮੇਨ ਸਮਨ੍ਨਾਗਤਂ, ਅਸੁਚਿਨਾ ਵਚੀਕਮ੍ਮੇਨ ਸਮਨ੍ਨਾਗਤਂ, ਅਸੁਚਿਨਾ ਮਨੋਕਮ੍ਮੇਨ ਸਮਨ੍ਨਾਗਤਂ ਪੇਸਲਾ ਸਬ੍ਰਹ੍ਮਚਾਰੀ ਦਿਸ੍ਵਾ ਖੀਯਧਮ੍ਮਂ [ਖੀਯਨਧਮ੍ਮਂ (ਸੀ.)] ਆਪਜ੍ਜਨ੍ਤਿ – ‘ਅਹੋ ਵਤ ਨੋ ਦੁਕ੍ਖਂ ਯੇ ਮਯਂ ਏਵਰੂਪੇਹਿ ਪੁਗ੍ਗਲੇਹਿ ਸਦ੍ਧਿਂ ਸਂਵਸਾਮਾ’ਤਿ! ਇਦਮਸ੍ਸ ਆਰੋਦਨਾਯ ਵਦਾਮਿ. ਸੇਯ੍ਯਥਾਪਿ ਸਾ, ਭਿਕ੍ਖਵੇ, ਸਿਵਥਿਕਾ ਬਹੁਨੋ ਜਨਸ੍ਸ ਆਰੋਦਨਾ; ਤਥੂਪਮਾਹਂ, ਭਿਕ੍ਖਵੇ, ਇਮਂ ਪੁਗ੍ਗਲਂ ਵਦਾਮਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਸਿਵਥਿਕੂਪਮੇ ਪੁਗ੍ਗਲੇ’’ਤਿ. ਨਵਮਂ.

੧੦. ਪੁਗ੍ਗਲਪ੍ਪਸਾਦਸੁਤ੍ਤਂ

੨੫੦. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਪੁਗ੍ਗਲਪ੍ਪਸਾਦੇ. ਕਤਮੇ ਪਞ੍ਚ? ਯਸ੍ਮਿਂ, ਭਿਕ੍ਖਵੇ, ਪੁਗ੍ਗਲੇ ਪੁਗ੍ਗਲੋ ਅਭਿਪ੍ਪਸਨ੍ਨੋ ਹੋਤਿ, ਸੋ ਤਥਾਰੂਪਂ ਆਪਤ੍ਤਿਂ ਆਪਨ੍ਨੋ ਹੋਤਿ ਯਥਾਰੂਪਾਯ ਆਪਤ੍ਤਿਯਾ ਸਙ੍ਘੋ ਉਕ੍ਖਿਪਤਿ. ਤਸ੍ਸ ਏਵਂ ਹੋਤਿ – ‘ਯੋ ਖੋ ਮ੍ਯਾਯਂ ਪੁਗ੍ਗਲੋ ਪਿਯੋ ਮਨਾਪੋ ਸੋ ਸਙ੍ਘੇਨ ਉਕ੍ਖਿਤ੍ਤੋ’ਤਿ. ਭਿਕ੍ਖੂਸੁ ਅਪ੍ਪਸਾਦਬਹੁਲੋ ਹੋਤਿ. ਭਿਕ੍ਖੂਸੁ ਅਪ੍ਪਸਾਦਬਹੁਲੋ ਸਮਾਨੋ ਅਞ੍ਞੇ ਭਿਕ੍ਖੂ ਨ ਭਜਤਿ. ਅਞ੍ਞੇ ਭਿਕ੍ਖੂ ਅਭਜਨ੍ਤੋ ਸਦ੍ਧਮ੍ਮਂ ਨ ਸੁਣਾਤਿ. ਸਦ੍ਧਮ੍ਮਂ ਅਸੁਣਨ੍ਤੋ ਸਦ੍ਧਮ੍ਮਾ ਪਰਿਹਾਯਤਿ. ਅਯਂ, ਭਿਕ੍ਖਵੇ, ਪਠਮੋ ਆਦੀਨਵੋ ਪੁਗ੍ਗਲਪ੍ਪਸਾਦੇ.

‘‘ਪੁਨ ਚਪਰਂ, ਭਿਕ੍ਖਵੇ, ਯਸ੍ਮਿਂ ਪੁਗ੍ਗਲੇ ਪੁਗ੍ਗਲੋ ਅਭਿਪ੍ਪਸਨ੍ਨੋ ਹੋਤਿ, ਸੋ ਤਥਾਰੂਪਂ ਆਪਤ੍ਤਿਂ ਆਪਨ੍ਨੋ ਹੋਤਿ ਯਥਾਰੂਪਾਯ ਆਪਤ੍ਤਿਯਾ ਸਙ੍ਘੋ ਅਨ੍ਤੇ ਨਿਸੀਦਾਪੇਤਿ. ਤਸ੍ਸ ਏਵਂ ਹੋਤਿ – ‘ਯੋ ਖੋ ਮ੍ਯਾਯਂ ਪੁਗ੍ਗਲੋ ਪਿਯੋ ਮਨਾਪੋ ਸੋ ਸਙ੍ਘੇਨ ਅਨ੍ਤੇ ਨਿਸੀਦਾਪਿਤੋ’ਤਿ. ਭਿਕ੍ਖੂਸੁ ਅਪ੍ਪਸਾਦਬਹੁਲੋ ਹੋਤਿ. ਭਿਕ੍ਖੂਸੁ ਅਪ੍ਪਸਾਦਬਹੁਲੋ ਸਮਾਨੋ ਅਞ੍ਞੇ ਭਿਕ੍ਖੂ ਨ ਭਜਤਿ. ਅਞ੍ਞੇ ਭਿਕ੍ਖੂ ਅਭਜਨ੍ਤੋ ਸਦ੍ਧਮ੍ਮਂ ਨ ਸੁਣਾਤਿ. ਸਦ੍ਧਮ੍ਮਂ ਅਸੁਣਨ੍ਤੋ ਸਦ੍ਧਮ੍ਮਾ ਪਰਿਹਾਯਤਿ. ਅਯਂ, ਭਿਕ੍ਖਵੇ, ਦੁਤਿਯੋ ਆਦੀਨਵੋ ਪੁਗ੍ਗਲਪ੍ਪਸਾਦੇ.

‘‘ਪੁਨ ਚਪਰਂ, ਭਿਕ੍ਖਵੇ, ਯਸ੍ਮਿਂ ਪੁਗ੍ਗਲੇ ਪੁਗ੍ਗਲੋ ਅਭਿਪ੍ਪਸਨ੍ਨੋ ਹੋਤਿ, ਸੋ ਦਿਸਾਪਕ੍ਕਨ੍ਤੋ ਹੋਤਿ…ਪੇ… ਸੋ ਵਿਬ੍ਭਨ੍ਤੋ ਹੋਤਿ…ਪੇ… ਸੋ ਕਾਲਙ੍ਕਤੋ ਹੋਤਿ. ਤਸ੍ਸ ਏਵਂ ਹੋਤਿ – ‘ਯੋ ਖੋ ਮ੍ਯਾਯਂ ਪੁਗ੍ਗਲੋ ਪਿਯੋ ਮਨਾਪੋ ਸੋ ਕਾਲਙ੍ਕਤੋ’ਤਿ. ਅਞ੍ਞੇ ਭਿਕ੍ਖੂ ਨ ਭਜਤਿ. ਅਞ੍ਞੇ ਭਿਕ੍ਖੂ ਅਭਜਨ੍ਤੋ ਸਦ੍ਧਮ੍ਮਂ ਨ ਸੁਣਾਤਿ. ਸਦ੍ਧਮ੍ਮਂ ਅਸੁਣਨ੍ਤੋ ਸਦ੍ਧਮ੍ਮਾ ਪਰਿਹਾਯਤਿ. ਅਯਂ, ਭਿਕ੍ਖਵੇ, ਪਞ੍ਚਮੋ ਆਦੀਨਵੋ ਪੁਗ੍ਗਲਪ੍ਪਸਾਦੇ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਪੁਗ੍ਗਲਪ੍ਪਸਾਦੇ’’ਤਿ. ਦਸਮਂ.

ਦੁਚ੍ਚਰਿਤਵਗ੍ਗੋ ਪਞ੍ਚਮੋ.