੮. ਆਰਞ੍ਞਕਸੁਤ੍ਤਂ

੯੮. ‘‘ਪਞ੍ਚਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਆਨਾਪਾਨਸ੍ਸਤਿਂ ਬਹੁਲੀਕਰੋਨ੍ਤੋ ਨਚਿਰਸ੍ਸੇਵ ਅਕੁਪ੍ਪਂ ਪਟਿਵਿਜ੍ਝਤਿ. ਕਤਮੇਹਿ ਪਞ੍ਚਹਿ? ਇਧ, ਭਿਕ੍ਖਵੇ, ਭਿਕ੍ਖੁ ਅਪ੍ਪਟ੍ਠੋ ਹੋਤਿ ਅਪ੍ਪਕਿਚ੍ਚੋ ਸੁਭਰੋ ਸੁਸਨ੍ਤੋਸੋ ਜੀਵਿਤਪਰਿਕ੍ਖਾਰੇਸੁ; ਅਪ੍ਪਾਹਾਰੋ ਹੋਤਿ ਅਨੋਦਰਿਕਤ੍ਤਂ ਅਨੁਯੁਤ੍ਤੋ; ਅਪ੍ਪਮਿਦ੍ਧੋ ਹੋਤਿ ਜਾਗਰਿਯਂ ਅਨੁਯੁਤ੍ਤੋ; ਆਰਞ੍ਞਕੋ ਹੋਤਿ ਪਨ੍ਤਸੇਨਾਸਨੋ; ਯਥਾਵਿਮੁਤ੍ਤਂ ਚਿਤ੍ਤਂ ਪਚ੍ਚਵੇਕ੍ਖਤਿ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਿ ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਆਨਾਪਾਨਸ੍ਸਤਿਂ ਬਹੁਲੀਕਰੋਨ੍ਤੋ ਨਚਿਰਸ੍ਸੇਵ ਅਕੁਪ੍ਪਂ ਪਟਿਵਿਜ੍ਝਤੀ’’ਤਿ. ਅਟ੍ਠਮਂ.