੯. ਸੀਹਸੁਤ੍ਤਂ

੯੯. ‘‘ਸੀਹੋ, ਭਿਕ੍ਖਵੇ, ਮਿਗਰਾਜਾ ਸਾਯਨ੍ਹਸਮਯਂ ਆਸਯਾ ਨਿਕ੍ਖਮਤਿ; ਆਸਯਾ ਨਿਕ੍ਖਮਿਤ੍ਵਾ ਵਿਜਮ੍ਭਤਿ; ਵਿਜਮ੍ਭਿਤ੍ਵਾ ਸਮਨ੍ਤਾ ਚਤੁਦ੍ਦਿਸਂ [ਚਤੁਦ੍ਦਿਸਾ (ਸ੍ਯਾ. ਕਂ. ਪੀ. ਕ.) ਅ. ਨਿ. ੪.੩੩; ਸਂ. ਨਿ. ੩.੭੮ ਪਸ੍ਸਿਤਬ੍ਬਂ] ਅਨੁਵਿਲੋਕੇਤਿ; ਸਮਨ੍ਤਾ ਚਤੁਦ੍ਦਿਸਂ [ਚਤੁਦ੍ਦਿਸਾ (ਸ੍ਯਾ. ਕਂ. ਪੀ. ਕ.) ਅ. ਨਿ. ੪.੩੩; ਸਂ. ਨਿ. ੩.੭੮ ਪਸ੍ਸਿਤਬ੍ਬਂ] ਅਨੁਵਿਲੋਕੇਤ੍ਵਾ ਤਿਕ੍ਖਤ੍ਤੁਂ ਸੀਹਨਾਦਂ ਨਦਤਿ; ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ ਗੋਚਰਾਯ ਪਕ੍ਕਮਤਿ. ਸੋ ਹਤ੍ਥਿਸ੍ਸ ਚੇਪਿ ਪਹਾਰਂ ਦੇਤਿ, ਸਕ੍ਕਚ੍ਚਞ੍ਞੇਵ ਪਹਾਰਂ ਦੇਤਿ, ਨੋ ਅਸਕ੍ਕਚ੍ਚਂ; ਮਹਿਂਸਸ੍ਸ [ਮਹਿਸਸ੍ਸ (ਸੀ. ਸ੍ਯਾ. ਕਂ. ਪੀ.)] ਚੇਪਿ ਪਹਾਰਂ ਦੇਤਿ, ਸਕ੍ਕਚ੍ਚਞ੍ਞੇਵ ਪਹਾਰਂ ਦੇਤਿ, ਨੋ ਅਸਕ੍ਕਚ੍ਚਂ; ਗਵਸ੍ਸ ਚੇਪਿ ਪਹਾਰਂ ਦੇਤਿ, ਸਕ੍ਕਚ੍ਚਞ੍ਞੇਵ ਪਹਾਰਂ ਦੇਤਿ, ਨੋ ਅਸਕ੍ਕਚ੍ਚਂ; ਦੀਪਿਸ੍ਸ ਚੇਪਿ ਪਹਾਰਂ ਦੇਤਿ, ਸਕ੍ਕਚ੍ਚਞ੍ਞੇਵ ਪਹਾਰਂ ਦੇਤਿ, ਨੋ ਅਸਕ੍ਕਚ੍ਚਂ; ਖੁਦ੍ਦਕਾਨਞ੍ਚੇਪਿ ਪਾਣਾਨਂ ਪਹਾਰਂ ਦੇਤਿ ਅਨ੍ਤਮਸੋ ਸਸਬਿਲ਼ਾਰਾਨਮ੍ਪਿ [ਸਸਬਿਲ਼ਾਰਾਨਂ (ਕ.)], ਸਕ੍ਕਚ੍ਚਞ੍ਞੇਵ ਪਹਾਰਂ ਦੇਤਿ, ਨੋ ਅਸਕ੍ਕਚ੍ਚਂ. ਤਂ ਕਿਸ੍ਸ ਹੇਤੁ? ‘ਮਾ ਮੇ ਯੋਗ੍ਗਪਥੋ ਨਸ੍ਸਾ’ਤਿ.

‘‘ਸੀਹੋਤਿ ਖੋ, ਭਿਕ੍ਖਵੇ, ਤਥਾਗਤਸ੍ਸੇਤਂ ਅਧਿਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ. ਯਂ ਖੋ, ਭਿਕ੍ਖਵੇ, ਤਥਾਗਤੋ ਪਰਿਸਾਯ ਧਮ੍ਮਂ ਦੇਸੇਤਿ, ਇਦਮਸ੍ਸ ਹੋਤਿ ਸੀਹਨਾਦਸ੍ਮਿਂ. ਭਿਕ੍ਖੂਨਞ੍ਚੇਪਿ, ਭਿਕ੍ਖਵੇ, ਤਥਾਗਤੋ ਧਮ੍ਮਂ ਦੇਸੇਤਿ, ਸਕ੍ਕਚ੍ਚਞ੍ਞੇਵ ਤਥਾਗਤੋ ਧਮ੍ਮਂ ਦੇਸੇਤਿ, ਨੋ ਅਸਕ੍ਕਚ੍ਚਂ; ਭਿਕ੍ਖੁਨੀਨਞ੍ਚੇਪਿ, ਭਿਕ੍ਖਵੇ, ਤਥਾਗਤੋ ਧਮ੍ਮਂ ਦੇਸੇਤਿ, ਸਕ੍ਕਚ੍ਚਞ੍ਞੇਵ ਤਥਾਗਤੋ ਧਮ੍ਮਂ ਦੇਸੇਤਿ, ਨੋ ਅਸਕ੍ਕਚ੍ਚਂ; ਉਪਾਸਕਾਨਞ੍ਚੇਪਿ, ਭਿਕ੍ਖਵੇ, ਤਥਾਗਤੋ ਧਮ੍ਮਂ ਦੇਸੇਤਿ, ਸਕ੍ਕਚ੍ਚਞ੍ਞੇਵ ਤਥਾਗਤੋ ਧਮ੍ਮਂ ਦੇਸੇਤਿ, ਨੋ ਅਸਕ੍ਕਚ੍ਚਂ; ਉਪਾਸਿਕਾਨਞ੍ਚੇਪਿ, ਭਿਕ੍ਖਵੇ, ਤਥਾਗਤੋ ਧਮ੍ਮਂ ਦੇਸੇਤਿ, ਸਕ੍ਕਚ੍ਚਞ੍ਞੇਵ ਤਥਾਗਤੋ ਧਮ੍ਮਂ ਦੇਸੇਤਿ, ਨੋ ਅਸਕ੍ਕਚ੍ਚਂ; ਪੁਥੁਜ੍ਜਨਾਨਞ੍ਚੇਪਿ, ਭਿਕ੍ਖਵੇ, ਤਥਾਗਤੋ ਧਮ੍ਮਂ ਦੇਸੇਤਿ ਅਨ੍ਤਮਸੋ ਅਨ੍ਨਭਾਰਨੇਸਾਦਾਨਮ੍ਪਿ [ਅਨ੍ਨਭਾਰਨੇਸਾਦਾਨਂ (ਕ.)], ਸਕ੍ਕਚ੍ਚਞ੍ਞੇਵ ਤਥਾਗਤੋ ਧਮ੍ਮਂ ਦੇਸੇਤਿ, ਨੋ ਅਸਕ੍ਕਚ੍ਚਂ. ਤਂ ਕਿਸ੍ਸ ਹੇਤੁ? ਧਮ੍ਮਗਰੁ, ਭਿਕ੍ਖਵੇ, ਤਥਾਗਤੋ ਧਮ੍ਮਗਾਰਵੋ’’ਤਿ. ਨਵਮਂ.