੧੦. ਨਾਰਦਸੁਤ੍ਤਂ

੫੦. ਏਕਂ ਸਮਯਂ ਆਯਸ੍ਮਾ ਨਾਰਦੋ ਪਾਟਲਿਪੁਤ੍ਤੇ ਵਿਹਰਤਿ ਕੁਕ੍ਕੁਟਾਰਾਮੇ. ਤੇਨ ਖੋ ਪਨ ਸਮਯੇਨ ਮੁਣ੍ਡਸ੍ਸ ਰਞ੍ਞੋ ਭਦ੍ਦਾ ਦੇਵੀ ਕਾਲਙ੍ਕਤਾ ਹੋਤਿ ਪਿਯਾ ਮਨਾਪਾ. ਸੋ ਭਦ੍ਦਾਯ ਦੇਵਿਯਾ ਕਾਲਙ੍ਕਤਾਯ ਪਿਯਾਯ ਮਨਾਪਾਯ ਨੇਵ ਨ੍ਹਾਯਤਿ [ਨਹਾਯਤਿ (ਸੀ. ਸ੍ਯਾ. ਕਂ. ਪੀ.)] ਨ ਵਿਲਿਮ੍ਪਤਿ ਨ ਭਤ੍ਤਂ ਭੁਞ੍ਜਤਿ ਨ ਕਮ੍ਮਨ੍ਤਂ ਪਯੋਜੇਤਿ – ਰਤ੍ਤਿਨ੍ਦਿਵਂ [ਰਤ੍ਤਿਦਿਵਂ (ਕ.)] ਭਦ੍ਦਾਯ ਦੇਵਿਯਾ ਸਰੀਰੇ ਅਜ੍ਝੋਮੁਚ੍ਛਿਤੋ. ਅਥ ਖੋ ਮੁਣ੍ਡੋ ਰਾਜਾ ਪਿਯਕਂ ਕੋਸਾਰਕ੍ਖਂ [ਸੋਕਾਰਕ੍ਖਂ (ਸ੍ਯਾ.)] ਆਮਨ੍ਤੇਸਿ – ‘‘ਤੇਨ ਹਿ, ਸਮ੍ਮ ਪਿਯਕ, ਭਦ੍ਦਾਯ ਦੇਵਿਯਾ ਸਰੀਰਂ ਆਯਸਾਯ ਤੇਲਦੋਣਿਯਾ ਪਕ੍ਖਿਪਿਤ੍ਵਾ ਅਞ੍ਞਿਸ੍ਸਾ ਆਯਸਾਯ ਦੋਣਿਯਾ ਪਟਿਕੁਜ੍ਜਥ, ਯਥਾ ਮਯਂ ਭਦ੍ਦਾਯ ਦੇਵਿਯਾ ਸਰੀਰਂ ਚਿਰਤਰਂ ਪਸ੍ਸੇਯ੍ਯਾਮਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਪਿਯਕੋ ਕੋਸਾਰਕ੍ਖੋ ਮੁਣ੍ਡਸ੍ਸ ਰਞ੍ਞੋ ਪਟਿਸ੍ਸੁਤ੍ਵਾ ਭਦ੍ਦਾਯ ਦੇਵਿਯਾ ਸਰੀਰਂ ਆਯਸਾਯ ਤੇਲਦੋਣਿਯਾ ਪਕ੍ਖਿਪਿਤ੍ਵਾ ਅਞ੍ਞਿਸ੍ਸਾ ਆਯਸਾਯ ਦੋਣਿਯਾ ਪਟਿਕੁਜ੍ਜਿ.

ਅਥ ਖੋ ਪਿਯਕਸ੍ਸ ਕੋਸਾਰਕ੍ਖਸ੍ਸ ਏਤਦਹੋਸਿ – ‘‘ਇਮਸ੍ਸ ਖੋ ਮੁਣ੍ਡਸ੍ਸ ਰਞ੍ਞੋ ਭਦ੍ਦਾ ਦੇਵੀ ਕਾਲਙ੍ਕਤਾ ਪਿਯਾ ਮਨਾਪਾ. ਸੋ ਭਦ੍ਦਾਯ ਦੇਵਿਯਾ ਕਾਲਙ੍ਕਤਾਯ ਪਿਯਾਯ ਮਨਾਪਾਯ ਨੇਵ ਨ੍ਹਾਯਤਿ ਨ ਵਿਲਿਮ੍ਪਤਿ ਨ ਭਤ੍ਤਂ ਭੁਞ੍ਜਤਿ ਨ ਕਮ੍ਮਨ੍ਤਂ ਪਯੋਜੇਤਿ – ਰਤ੍ਤਿਨ੍ਦਿਵਂ ਭਦ੍ਦਾਯ ਦੇਵਿਯਾ ਸਰੀਰੇ ਅਜ੍ਝੋਮੁਚ੍ਛਿਤੋ. ਕਂ [ਕਿਂ (ਕ.)] ਨੁ ਖੋ ਮੁਣ੍ਡੋ ਰਾਜਾ ਸਮਣਂ ਵਾ ਬ੍ਰਾਹ੍ਮਣਂ ਵਾ ਪਯਿਰੁਪਾਸੇਯ੍ਯ, ਯਸ੍ਸ ਧਮ੍ਮਂ ਸੁਤ੍ਵਾ ਸੋਕਸਲ੍ਲਂ ਪਜਹੇਯ੍ਯਾ’’ਤਿ!

ਅਥ ਖੋ ਪਿਯਕਸ੍ਸ ਕੋਸਾਰਕ੍ਖਸ੍ਸ ਏਤਦਹੋਸਿ – ‘‘ਅਯਂ ਖੋ ਆਯਸ੍ਮਾ ਨਾਰਦੋ ਪਾਟਲਿਪੁਤ੍ਤੇ ਵਿਹਰਤਿ ਕੁਕ੍ਕੁਟਾਰਾਮੇ. ਤਂ ਖੋ ਪਨਾਯਸ੍ਮਨ੍ਤਂ ਨਾਰਦਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਪਣ੍ਡਿਤੋ ਵਿਯਤ੍ਤੋ [ਵ੍ਯਤ੍ਤੋ (ਸੀ. ਪੀ.), ਬ੍ਯਤ੍ਤੋ (ਸ੍ਯਾ. ਕਂ., ਦੀ. ਨਿ. ੨.੪੦੭)] ਮੇਧਾਵੀ ਬਹੁਸ੍ਸੁਤੋ ਚਿਤ੍ਤਕਥੀ ਕਲ੍ਯਾਣਪਟਿਭਾਨੋ ਵੁਦ੍ਧੋ ਚੇਵ [ਬੁਦ੍ਧੋ ਚੇਵ (ਕ.)] ਅਰਹਾ ਚ’ [ਅਰਹਾ ਚਾ’ਤਿ (?)]. ਯਂਨੂਨ ਮੁਣ੍ਡੋ ਰਾਜਾ ਆਯਸ੍ਮਨ੍ਤਂ ਨਾਰਦਂ ਪਯਿਰੁਪਾਸੇਯ੍ਯ, ਅਪ੍ਪੇਵ ਨਾਮ ਮੁਣ੍ਡੋ ਰਾਜਾ ਆਯਸ੍ਮਤੋ ਨਾਰਦਸ੍ਸ ਧਮ੍ਮਂ ਸੁਤ੍ਵਾ ਸੋਕਸਲ੍ਲਂ ਪਜਹੇਯ੍ਯਾ’’ਤਿ.

ਅਥ ਖੋ ਪਿਯਕੋ ਕੋਸਾਰਕ੍ਖੋ ਯੇਨ ਮੁਣ੍ਡੋ ਰਾਜਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮੁਣ੍ਡਂ ਰਾਜਾਨਂ ਏਤਦਵੋਚ – ‘‘ਅਯਂ ਖੋ, ਦੇਵ, ਆਯਸ੍ਮਾ ਨਾਰਦੋ ਪਾਟਲਿਪੁਤ੍ਤੇ ਵਿਹਰਤਿ ਕੁਕ੍ਕੁਟਾਰਾਮੇ. ਤਂ ਖੋ ਪਨਾਯਸ੍ਮਨ੍ਤਂ ਨਾਰਦਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਬਹੁਸ੍ਸੁਤੋ ਚਿਤ੍ਤਕਥੀ ਕਲ੍ਯਾਣਪਟਿਭਾਨੋ ਵੁਦ੍ਧੋ ਚੇਵ ਅਰਹਾ ਚ’ [ਅਰਹਾ ਚਾ’ਤਿ (?)]. ਯਦਿ ਪਨ ਦੇਵੋ ਆਯਸ੍ਮਨ੍ਤਂ ਨਾਰਦਂ ਪਯਿਰੁਪਾਸੇਯ੍ਯ, ਅਪ੍ਪੇਵ ਨਾਮ ਦੇਵੋ ਆਯਸ੍ਮਤੋ ਨਾਰਦਸ੍ਸ ਧਮ੍ਮਂ ਸੁਤ੍ਵਾ ਸੋਕਸਲ੍ਲਂ ਪਜਹੇਯ੍ਯਾ’’ਤਿ. ‘‘ਤੇਨ ਹਿ, ਸਮ੍ਮ ਪਿਯਕ, ਆਯਸ੍ਮਨ੍ਤਂ ਨਾਰਦਂ ਪਟਿਵੇਦੇਹਿ. ਕਥਞ੍ਹਿ ਨਾਮ ਮਾਦਿਸੋ ਸਮਣਂ ਵਾ ਬ੍ਰਾਹ੍ਮਣਂ ਵਾ ਵਿਜਿਤੇ ਵਸਨ੍ਤਂ ਪੁਬ੍ਬੇ ਅਪ੍ਪਟਿਸਂਵਿਦਿਤੋ ਉਪਸਙ੍ਕਮਿਤਬ੍ਬਂ ਮਞ੍ਞੇਯ੍ਯਾ’’ਤਿ! ‘‘ਏਵਂ, ਦੇਵਾ’’ਤਿ ਖੋ ਪਿਯਕੋ ਕੋਸਾਰਕ੍ਖੋ ਮੁਣ੍ਡਸ੍ਸ ਰਞ੍ਞੋ ਪਟਿਸ੍ਸੁਤ੍ਵਾ ਯੇਨਾਯਸ੍ਮਾ ਨਾਰਦੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਨਾਰਦਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਪਿਯਕੋ ਕੋਸਾਰਕ੍ਖੋ ਆਯਸ੍ਮਨ੍ਤਂ ਨਾਰਦਂ ਏਤਦਵੋਚ –

‘‘ਇਮਸ੍ਸ, ਭਨ੍ਤੇ, ਮੁਣ੍ਡਸ੍ਸ ਰਞ੍ਞੋ ਭਦ੍ਦਾ ਦੇਵੀ ਕਾਲਙ੍ਕਤਾ ਪਿਯਾ ਮਨਾਪਾ. ਸੋ ਭਦ੍ਦਾਯ ਦੇਵਿਯਾ ਕਾਲਙ੍ਕਤਾਯ ਪਿਯਾਯ ਮਨਾਪਾਯ ਨੇਵ ਨ੍ਹਾਯਤਿ ਨ ਵਿਲਿਮ੍ਪਤਿ ਨ ਭਤ੍ਤਂ ਭੁਞ੍ਜਤਿ ਨ ਕਮ੍ਮਨ੍ਤਂ ਪਯੋਜੇਤਿ – ਰਤ੍ਤਿਨ੍ਦਿਵਂ ਭਦ੍ਦਾਯ ਦੇਵਿਯਾ ਸਰੀਰੇ ਅਜ੍ਝੋਮੁਚ੍ਛਿਤੋ. ਸਾਧੁ, ਭਨ੍ਤੇ, ਆਯਸ੍ਮਾ ਨਾਰਦੋ ਮੁਣ੍ਡਸ੍ਸ ਰਞ੍ਞੋ ਤਥਾ ਧਮ੍ਮਂ ਦੇਸੇਤੁ ਯਥਾ ਮੁਣ੍ਡੋ ਰਾਜਾ ਆਯਸ੍ਮਤੋ ਨਾਰਦਸ੍ਸ ਧਮ੍ਮਂ ਸੁਤ੍ਵਾ ਸੋਕਸਲ੍ਲਂ ਪਜਹੇਯ੍ਯਾ’’ਤਿ. ‘‘ਯਸ੍ਸਦਾਨਿ, ਪਿਯਕ, ਮੁਣ੍ਡੋ ਰਾਜਾ ਕਾਲਂ ਮਞ੍ਞਤੀ’’ਤਿ.

ਅਥ ਖੋ ਪਿਯਕੋ ਕੋਸਾਰਕ੍ਖੋ ਉਟ੍ਠਾਯਾਸਨਾ ਆਯਸ੍ਮਨ੍ਤਂ ਨਾਰਦਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਯੇਨ ਮੁਣ੍ਡੋ ਰਾਜਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮੁਣ੍ਡਂ ਰਾਜਾਨਂ ਏਤਦਵੋਚ – ‘‘ਕਤਾਵਕਾਸੋ ਖੋ, ਦੇਵ, ਆਯਸ੍ਮਤਾ ਨਾਰਦੇਨ. ਯਸ੍ਸਦਾਨਿ ਦੇਵੋ ਕਾਲਂ ਮਞ੍ਞਤੀ’’ਤਿ. ‘‘ਤੇਨ ਹਿ, ਸਮ੍ਮ ਪਿਯਕ, ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ ਯੋਜਾਪੇਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਪਿਯਕੋ ਕੋਸਾਰਕ੍ਖੋ ਮੁਣ੍ਡਸ੍ਸ ਰਞ੍ਞੋ ਪਟਿਸ੍ਸੁਤ੍ਵਾ ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ ਯੋਜਾਪੇਤ੍ਵਾ ਮੁਣ੍ਡਂ ਰਾਜਾਨਂ ਏਤਦਵੋਚ – ‘‘ਯੁਤ੍ਤਾਨਿ ਖੋ ਤੇ, ਦੇਵ, ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ. ਯਸ੍ਸਦਾਨਿ ਦੇਵੋ ਕਾਲਂ ਮਞ੍ਞਤੀ’’ਤਿ.

ਅਥ ਖੋ ਮੁਣ੍ਡੋ ਰਾਜਾ ਭਦ੍ਰਂ ਯਾਨਂ [ਭਦ੍ਰਂ ਭਦ੍ਰਂ ਯਾਨਂ (ਸ੍ਯਾ. ਕਂ. ਕ.), ਭਦ੍ਦਂ ਯਾਨਂ (ਪੀ.)] ਅਭਿਰੁਹਿਤ੍ਵਾ ਭਦ੍ਰੇਹਿ ਭਦ੍ਰੇਹਿ ਯਾਨੇਹਿ ਯੇਨ ਕੁਕ੍ਕੁਟਾਰਾਮੋ ਤੇਨ ਪਾਯਾਸਿ ਮਹਚ੍ਚਾ [ਮਹਚ੍ਚ (ਬਹੂਸੁ)] ਰਾਜਾਨੁਭਾਵੇਨ ਆਯਸ੍ਮਨ੍ਤਂ ਨਾਰਦਂ ਦਸ੍ਸਨਾਯ. ਯਾਵਤਿਕਾ ਯਾਨਸ੍ਸ ਭੂਮਿ ਯਾਨੇਨ ਗਨ੍ਤ੍ਵਾ, ਯਾਨਾ ਪਚ੍ਚੋਰੋਹਿਤ੍ਵਾ ਪਤ੍ਤਿਕੋਵ ਆਰਾਮਂ ਪਾਵਿਸਿ. ਅਥ ਖੋ ਮੁਣ੍ਡੋ ਰਾਜਾ ਯੇਨ ਆਯਸ੍ਮਾ ਨਾਰਦੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਨਾਰਦਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਮੁਣ੍ਡਂ ਰਾਜਾਨਂ ਆਯਸ੍ਮਾ ਨਾਰਦੋ ਏਤਦਵੋਚ –

‘‘ਪਞ੍ਚਿਮਾਨਿ, ਮਹਾਰਾਜ, ਅਲਬ੍ਭਨੀਯਾਨਿ ਠਾਨਾਨਿ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿਂ. ਕਤਮਾਨਿ ਪਞ੍ਚ? ‘ਜਰਾਧਮ੍ਮਂ ਮਾ ਜੀਰੀ’ਤਿ ਅਲਬ੍ਭਨੀਯਂ ਠਾਨਂ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿਂ. ‘ਬ੍ਯਾਧਿਧਮ੍ਮਂ ਮਾ ਬ੍ਯਾਧੀਯੀ’ਤਿ…ਪੇ… ‘ਮਰਣਧਮ੍ਮਂ ਮਾ ਮੀਯੀ’ਤਿ… ‘ਖਯਧਮ੍ਮਂ ਮਾ ਖੀਯੀ’ਤਿ… ‘ਨਸ੍ਸਨਧਮ੍ਮਂ ਮਾ ਨਸ੍ਸੀ’ਤਿ ਅਲਬ੍ਭਨੀਯਂ ਠਾਨਂ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿਂ.

‘‘ਅਸ੍ਸੁਤਵਤੋ, ਮਹਾਰਾਜ, ਪੁਥੁਜ੍ਜਨਸ੍ਸ ਜਰਾਧਮ੍ਮਂ ਜੀਰਤਿ. ਸੋ ਜਰਾਧਮ੍ਮੇ ਜਿਣ੍ਣੇ ਨ ਇਤਿ ਪਟਿਸਞ੍ਚਿਕ੍ਖਤਿ – ‘ਨ ਖੋ ਮਯ੍ਹੇਵੇਕਸ੍ਸ ਜਰਾਧਮ੍ਮਂ ਜੀਰਤਿ, ਅਥ ਖੋ ਯਾਵਤਾ ਸਤ੍ਤਾਨਂ ਆਗਤਿ ਗਤਿ ਚੁਤਿ ਉਪਪਤ੍ਤਿ ਸਬ੍ਬੇਸਂ ਸਤ੍ਤਾਨਂ ਜਰਾਧਮ੍ਮਂ ਜੀਰਤਿ. ਅਹਞ੍ਚੇਵ ਖੋ ਪਨ ਜਰਾਧਮ੍ਮੇ ਜਿਣ੍ਣੇ ਸੋਚੇਯ੍ਯਂ ਕਿਲਮੇਯ੍ਯਂ ਪਰਿਦੇਵੇਯ੍ਯਂ, ਉਰਤ੍ਤਾਲ਼ਿਂ ਕਨ੍ਦੇਯ੍ਯਂ, ਸਮ੍ਮੋਹਂ ਆਪਜ੍ਜੇਯ੍ਯਂ, ਭਤ੍ਤਮ੍ਪਿ ਮੇ ਨਚ੍ਛਾਦੇਯ੍ਯ, ਕਾਯੇਪਿ ਦੁਬ੍ਬਣ੍ਣਿਯਂ ਓਕ੍ਕਮੇਯ੍ਯ, ਕਮ੍ਮਨ੍ਤਾਪਿ ਨਪ੍ਪਵਤ੍ਤੇਯ੍ਯੁਂ, ਅਮਿਤ੍ਤਾਪਿ ਅਤ੍ਤਮਨਾ ਅਸ੍ਸੁ, ਮਿਤ੍ਤਾਪਿ ਦੁਮ੍ਮਨਾ ਅਸ੍ਸੂ’ਤਿ. ਸੋ ਜਰਾਧਮ੍ਮੇ ਜਿਣ੍ਣੇ ਸੋਚਤਿ ਕਿਲਮਤਿ ਪਰਿਦੇਵਤਿ, ਉਰਤ੍ਤਾਲ਼ਿਂ ਕਨ੍ਦਤਿ, ਸਮ੍ਮੋਹਂ ਆਪਜ੍ਜਤਿ. ਅਯਂ ਵੁਚ੍ਚਤਿ, ਮਹਾਰਾਜ – ‘ਅਸ੍ਸੁਤਵਾ ਪੁਥੁਜ੍ਜਨੋ ਵਿਦ੍ਧੋ ਸਵਿਸੇਨ ਸੋਕਸਲ੍ਲੇਨ ਅਤ੍ਤਾਨਂਯੇਵ ਪਰਿਤਾਪੇਤਿ’’’.

‘‘ਪੁਨ ਚਪਰਂ, ਮਹਾਰਾਜ, ਅਸ੍ਸੁਤਵਤੋ ਪੁਥੁਜ੍ਜਨਸ੍ਸ ਬ੍ਯਾਧਿਧਮ੍ਮਂ ਬ੍ਯਾਧੀਯਤਿ…ਪੇ… ਮਰਣਧਮ੍ਮਂ ਮੀਯਤਿ… ਖਯਧਮ੍ਮਂ ਖੀਯਤਿ… ਨਸ੍ਸਨਧਮ੍ਮਂ ਨਸ੍ਸਤਿ. ਸੋ ਨਸ੍ਸਨਧਮ੍ਮੇ ਨਟ੍ਠੇ ਨ ਇਤਿ ਪਟਿਸਞ੍ਚਿਕ੍ਖਤਿ – ‘ਨ ਖੋ ਮਯ੍ਹੇਵੇਕਸ੍ਸ ਨਸ੍ਸਨਧਮ੍ਮਂ ਨਸ੍ਸਤਿ, ਅਥ ਖੋ ਯਾਵਤਾ ਸਤ੍ਤਾਨਂ ਆਗਤਿ ਗਤਿ ਚੁਤਿ ਉਪਪਤ੍ਤਿ ਸਬ੍ਬੇਸਂ ਸਤ੍ਤਾਨਂ ਨਸ੍ਸਨਧਮ੍ਮਂ ਨਸ੍ਸਤਿ. ਅਹਞ੍ਚੇਵ ਖੋ ਪਨ ਨਸ੍ਸਨਧਮ੍ਮੇ ਨਟ੍ਠੇ ਸੋਚੇਯ੍ਯਂ ਕਿਲਮੇਯ੍ਯਂ ਪਰਿਦੇਵੇਯ੍ਯਂ, ਉਰਤ੍ਤਾਲ਼ਿਂ ਕਨ੍ਦੇਯ੍ਯਂ, ਸਮ੍ਮੋਹਂ ਆਪਜ੍ਜੇਯ੍ਯਂ, ਭਤ੍ਤਮ੍ਪਿ ਮੇ ਨਚ੍ਛਾਦੇਯ੍ਯ, ਕਾਯੇਪਿ ਦੁਬ੍ਬਣ੍ਣਿਯਂ ਓਕ੍ਕਮੇਯ੍ਯ, ਕਮ੍ਮਨ੍ਤਾਪਿ ਨਪ੍ਪਵਤ੍ਤੇਯ੍ਯੁਂ, ਅਮਿਤ੍ਤਾਪਿ ਅਤ੍ਤਮਨਾ ਅਸ੍ਸੁ, ਮਿਤ੍ਤਾਪਿ ਦੁਮ੍ਮਨਾ ਅਸ੍ਸੂ’ਤਿ. ਸੋ ਨਸ੍ਸਨਧਮ੍ਮੇ ਨਟ੍ਠੇ ਸੋਚਤਿ ਕਿਲਮਤਿ ਪਰਿਦੇਵਤਿ, ਉਰਤ੍ਤਾਲ਼ਿਂ ਕਨ੍ਦਤਿ, ਸਮ੍ਮੋਹਂ ਆਪਜ੍ਜਤਿ. ਅਯਂ ਵੁਚ੍ਚਤਿ, ਮਹਾਰਾਜ – ‘ਅਸ੍ਸੁਤਵਾ ਪੁਥੁਜ੍ਜਨੋ ਵਿਦ੍ਧੋ ਸਵਿਸੇਨ ਸੋਕਸਲ੍ਲੇਨ ਅਤ੍ਤਾਨਂਯੇਵ ਪਰਿਤਾਪੇਤਿ’’’.

‘‘ਸੁਤਵਤੋ ਚ ਖੋ, ਮਹਾਰਾਜ, ਅਰਿਯਸਾਵਕਸ੍ਸ ਜਰਾਧਮ੍ਮਂ ਜੀਰਤਿ. ਸੋ ਜਰਾਧਮ੍ਮੇ ਜਿਣ੍ਣੇ ਇਤਿ ਪਟਿਸਞ੍ਚਿਕ੍ਖਤਿ – ‘ਨ ਖੋ ਮਯ੍ਹੇਵੇਕਸ੍ਸ ਜਰਾਧਮ੍ਮਂ ਜੀਰਤਿ, ਅਥ ਖੋ ਯਾਵਤਾ ਸਤ੍ਤਾਨਂ ਆਗਤਿ ਗਤਿ ਚੁਤਿ ਉਪਪਤ੍ਤਿ ਸਬ੍ਬੇਸਂ ਸਤ੍ਤਾਨਂ ਜਰਾਧਮ੍ਮਂ ਜੀਰਤਿ. ਅਹਞ੍ਚੇਵ ਖੋ ਪਨ ਜਰਾਧਮ੍ਮੇ ਜਿਣ੍ਣੇ ਸੋਚੇਯ੍ਯਂ ਕਿਲਮੇਯ੍ਯਂ ਪਰਿਦੇਵੇਯ੍ਯਂ, ਉਰਤ੍ਤਾਲ਼ਿਂ ਕਨ੍ਦੇਯ੍ਯਂ, ਸਮ੍ਮੋਹਂ ਆਪਜ੍ਜੇਯ੍ਯਂ, ਭਤ੍ਤਮ੍ਪਿ ਮੇ ਨਚ੍ਛਾਦੇਯ੍ਯ, ਕਾਯੇਪਿ ਦੁਬ੍ਬਣ੍ਣਿਯਂ ਓਕ੍ਕਮੇਯ੍ਯ, ਕਮ੍ਮਨ੍ਤਾਪਿ ਨਪ੍ਪਵਤ੍ਤੇਯ੍ਯੁਂ, ਅਮਿਤ੍ਤਾਪਿ ਅਤ੍ਤਮਨਾ ਅਸ੍ਸੁ, ਮਿਤ੍ਤਾਪਿ ਦੁਮ੍ਮਨਾ ਅਸ੍ਸੂ’ਤਿ. ਸੋ ਜਰਾਧਮ੍ਮੇ ਜਿਣ੍ਣੇ ਨ ਸੋਚਤਿ ਨ ਕਿਲਮਤਿ ਨ ਪਰਿਦੇਵਤਿ, ਨ ਉਰਤ੍ਤਾਲ਼ਿਂ ਕਨ੍ਦਤਿ, ਨ ਸਮ੍ਮੋਹਂ ਆਪਜ੍ਜਤਿ. ਅਯਂ ਵੁਚ੍ਚਤਿ, ਮਹਾਰਾਜ – ‘ਸੁਤਵਾ ਅਰਿਯਸਾਵਕੋ ਅਬ੍ਬੁਹਿ ਸਵਿਸਂ ਸੋਕਸਲ੍ਲਂ, ਯੇਨ ਵਿਦ੍ਧੋ ਅਸ੍ਸੁਤਵਾ ਪੁਥੁਜ੍ਜਨੋ ਅਤ੍ਤਾਨਂਯੇਵ ਪਰਿਤਾਪੇਤਿ. ਅਸੋਕੋ ਵਿਸਲ੍ਲੋ ਅਰਿਯਸਾਵਕੋ ਅਤ੍ਤਾਨਂਯੇਵ ਪਰਿਨਿਬ੍ਬਾਪੇਤਿ’’’.

‘‘ਪੁਨ ਚਪਰਂ, ਮਹਾਰਾਜ, ਸੁਤਵਤੋ ਅਰਿਯਸਾਵਕਸ੍ਸ ਬ੍ਯਾਧਿਧਮ੍ਮਂ ਬ੍ਯਾਧੀਯਤਿ…ਪੇ… ਮਰਣਧਮ੍ਮਂ ਮੀਯਤਿ… ਖਯਧਮ੍ਮਂ ਖੀਯਤਿ… ਨਸ੍ਸਨਧਮ੍ਮਂ ਨਸ੍ਸਤਿ. ਸੋ ਨਸ੍ਸਨਧਮ੍ਮੇ ਨਟ੍ਠੇ ਇਤਿ ਪਟਿਸਞ੍ਚਿਕ੍ਖਤਿ – ‘ਨ ਖੋ ਮਯ੍ਹੇਵੇਕਸ੍ਸ ਨਸ੍ਸਨਧਮ੍ਮਂ ਨਸ੍ਸਤਿ, ਅਥ ਖੋ ਯਾਵਤਾ ਸਤ੍ਤਾਨਂ ਆਗਤਿ ਗਤਿ ਚੁਤਿ ਉਪਪਤ੍ਤਿ ਸਬ੍ਬੇਸਂ ਸਤ੍ਤਾਨਂ ਨਸ੍ਸਨਧਮ੍ਮਂ ਨਸ੍ਸਤਿ. ਅਹਞ੍ਚੇਵ ਖੋ ਪਨ ਨਸ੍ਸਨਧਮ੍ਮੇ ਨਟ੍ਠੇ ਸੋਚੇਯ੍ਯਂ ਕਿਲਮੇਯ੍ਯਂ ਪਰਿਦੇਵੇਯ੍ਯਂ, ਉਰਤ੍ਤਾਲ਼ਿਂ ਕਨ੍ਦੇਯ੍ਯਂ, ਸਮ੍ਮੋਹਂ ਆਪਜ੍ਜੇਯ੍ਯਂ, ਭਤ੍ਤਮ੍ਪਿ ਮੇ ਨਚ੍ਛਾਦੇਯ੍ਯ, ਕਾਯੇਪਿ ਦੁਬ੍ਬਣ੍ਣਿਯਂ ਓਕ੍ਕਮੇਯ੍ਯ, ਕਮ੍ਮਨ੍ਤਾਪਿ ਨਪ੍ਪਵਤ੍ਤੇਯ੍ਯੁਂ, ਅਮਿਤ੍ਤਾਪਿ ਅਤ੍ਤਮਨਾ ਅਸ੍ਸੁ, ਮਿਤ੍ਤਾਪਿ ਦੁਮ੍ਮਨਾ ਅਸ੍ਸੂ’ਤਿ. ਸੋ ਨਸ੍ਸਨਧਮ੍ਮੇ ਨਟ੍ਠੇ ਨ ਸੋਚਤਿ ਨ ਕਿਲਮਤਿ ਨ ਪਰਿਦੇਵਤਿ, ਨ ਉਰਤ੍ਤਾਲ਼ਿਂ ਕਨ੍ਦਤਿ, ਨ ਸਮ੍ਮੋਹਂ ਆਪਜ੍ਜਤਿ. ਅਯਂ ਵੁਚ੍ਚਤਿ, ਮਹਾਰਾਜ – ‘ਸੁਤਵਾ ਅਰਿਯਸਾਵਕੋ ਅਬ੍ਬੁਹਿ ਸਵਿਸਂ ਸੋਕਸਲ੍ਲਂ, ਯੇਨ ਵਿਦ੍ਧੋ ਅਸ੍ਸੁਤਵਾ ਪੁਥੁਜ੍ਜਨੋ ਅਤ੍ਤਾਨਂਯੇਵ ਪਰਿਤਾਪੇਤਿ. ਅਸੋਕੋ ਵਿਸਲ੍ਲੋ ਅਰਿਯਸਾਵਕੋ ਅਤ੍ਤਾਨਂਯੇਵ ਪਰਿਨਿਬ੍ਬਾਪੇਤਿ ’’’.

‘‘ਇਮਾਨਿ ਖੋ, ਮਹਾਰਾਜ, ਪਞ੍ਚ ਅਲਬ੍ਭਨੀਯਾਨਿ ਠਾਨਾਨਿ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿ’’ਨ੍ਤਿ.

‘‘ਨ ਸੋਚਨਾਯ ਪਰਿਦੇਵਨਾਯ,

ਅਤ੍ਥੋਧ ਲਬ੍ਭਾ ਅਪਿ ਅਪ੍ਪਕੋਪਿ;

ਸੋਚਨ੍ਤਮੇਨਂ ਦੁਖਿਤਂ ਵਿਦਿਤ੍ਵਾ,

ਪਚ੍ਚਤ੍ਥਿਕਾ ਅਤ੍ਤਮਨਾ ਭਵਨ੍ਤਿ.

‘‘ਯਤੋ ਚ ਖੋ ਪਣ੍ਡਿਤੋ ਆਪਦਾਸੁ,

ਨ ਵੇਧਤੀ ਅਤ੍ਥਵਿਨਿਚ੍ਛਯਞ੍ਞੂ;

ਪਚ੍ਚਤ੍ਥਿਕਾਸ੍ਸ ਦੁਖਿਤਾ ਭਵਨ੍ਤਿ,

ਦਿਸ੍ਵਾ ਮੁਖਂ ਅਵਿਕਾਰਂ ਪੁਰਾਣਂ.

‘‘ਜਪ੍ਪੇਨ ਮਨ੍ਤੇਨ ਸੁਭਾਸਿਤੇਨ,

ਅਨੁਪ੍ਪਦਾਨੇਨ ਪਵੇਣਿਯਾ ਵਾ;

ਯਥਾ ਯਥਾ ਯਤ੍ਥ ਲਭੇਥ ਅਤ੍ਥਂ,

ਤਥਾ ਤਥਾ ਤਤ੍ਥ ਪਰਕ੍ਕਮੇਯ੍ਯ.

‘‘ਸਚੇ ਪਜਾਨੇਯ੍ਯ ਅਲਬ੍ਭਨੇਯ੍ਯੋ,

ਮਯਾਵ ਅਞ੍ਞੇਨ ਵਾ ਏਸ ਅਤ੍ਥੋ;

ਅਸੋਚਮਾਨੋ ਅਧਿਵਾਸਯੇਯ੍ਯ,

ਕਮ੍ਮਂ ਦਲ਼੍ਹਂ ਕਿਨ੍ਤਿ ਕਰੋਮਿ ਦਾਨੀ’’ਤਿ [ਜਾ. ੧ ਜਾਤਕੇਪਿ].

ਏਵਂ ਵੁਤ੍ਤੇ ਮੁਣ੍ਡੋ ਰਾਜਾ ਆਯਸ੍ਮਨ੍ਤਂ ਨਾਰਦਂ ਏਤਦਵੋਚ – ‘‘ਕੋ ਨਾਮੋ [ਕੋ ਨੁ ਖੋ (ਸੀ. ਪੀ.)] ਅਯਂ, ਭਨ੍ਤੇ, ਧਮ੍ਮਪਰਿਯਾਯੋ’’ਤਿ? ‘‘ਸੋਕਸਲ੍ਲਹਰਣੋ ਨਾਮ ਅਯਂ, ਮਹਾਰਾਜ, ਧਮ੍ਮਪਰਿਯਾਯੋ’’ਤਿ. ‘‘ਤਗ੍ਘ, ਭਨ੍ਤੇ, ਸੋਕਸਲ੍ਲਹਰਣੋ [ਤਗ੍ਘ ਭਨ੍ਤੇ ਸੋਕਸਲ੍ਲਹਰਣੋ, ਤਗ੍ਘ ਭਨ੍ਤੇ ਸੋਕਸਲ੍ਲਹਰਣੋ (ਸੀ. ਸ੍ਯਾ. ਕਂ. ਪੀ.)]! ਇਮਞ੍ਹਿ ਮੇ, ਭਨ੍ਤੇ, ਧਮ੍ਮਪਰਿਯਾਯਂ ਸੁਤ੍ਵਾ ਸੋਕਸਲ੍ਲਂ ਪਹੀਨ’’ਨ੍ਤਿ.

ਅਥ ਖੋ ਮੁਣ੍ਡੋ ਰਾਜਾ ਪਿਯਕਂ ਕੋਸਾਰਕ੍ਖਂ ਆਮਨ੍ਤੇਸਿ – ‘‘ਤੇਨ ਹਿ, ਸਮ੍ਮ ਪਿਯਕ, ਭਦ੍ਦਾਯ ਦੇਵਿਯਾ ਸਰੀਰਂ ਝਾਪੇਥ; ਥੂਪਞ੍ਚਸ੍ਸਾ ਕਰੋਥ. ਅਜ੍ਜਤਗ੍ਗੇ ਦਾਨਿ ਮਯਂ ਨ੍ਹਾਯਿਸ੍ਸਾਮ ਚੇਵ ਵਿਲਿਮ੍ਪਿਸ੍ਸਾਮ ਭਤ੍ਤਞ੍ਚ ਭੁਞ੍ਜਿਸ੍ਸਾਮ ਕਮ੍ਮਨ੍ਤੇ ਚ ਪਯੋਜੇਸ੍ਸਾਮਾ’’ਤਿ. ਦਸਮਂ.

ਮੁਣ੍ਡਰਾਜਵਗ੍ਗੋ ਪਞ੍ਚਮੋ.