੧੦. ਮਹਾਸਾਲਪੁਤ੍ਤਸੁਤ੍ਤਂ

੪੦. ‘‘ਹਿਮਵਨ੍ਤਂ, ਭਿਕ੍ਖਵੇ, ਪਬ੍ਬਤਰਾਜਂ ਨਿਸ੍ਸਾਯ ਮਹਾਸਾਲਾ ਪਞ੍ਚਹਿ ਵਡ੍ਢੀਹਿ ਵਡ੍ਢਨ੍ਤਿ. ਕਤਮਾਹਿ ਪਞ੍ਚਹਿ? ਸਾਖਾਪਤ੍ਤਪਲਾਸੇਨ ਵਡ੍ਢਨ੍ਤਿ; ਤਚੇਨ ਵਡ੍ਢਨ੍ਤਿ; ਪਪਟਿਕਾਯ ਵਡ੍ਢਨ੍ਤਿ; ਫੇਗ੍ਗੁਨਾ ਵਡ੍ਢਨ੍ਤਿ; ਸਾਰੇਨ ਵਡ੍ਢਨ੍ਤਿ. ਹਿਮਵਨ੍ਤਂ, ਭਿਕ੍ਖਵੇ, ਪਬ੍ਬਤਰਾਜਂ ਨਿਸ੍ਸਾਯ ਮਹਾਸਾਲਾ ਇਮਾਹਿ ਪਞ੍ਚਹਿ ਵਡ੍ਢੀਹਿ ਵਡ੍ਢਨ੍ਤਿ. ਏਵਮੇਵਂ ਖੋ, ਭਿਕ੍ਖਵੇ, ਸਦ੍ਧਂ ਕੁਲਪੁਤ੍ਤਂ ਨਿਸ੍ਸਾਯ ਅਨ੍ਤੋਜਨੋ ਪਞ੍ਚਹਿ ਵਡ੍ਢੀਹਿ ਵਡ੍ਢਤਿ. ਕਤਮਾਹਿ ਪਞ੍ਚਹਿ? ਸਦ੍ਧਾਯ ਵਡ੍ਢਤਿ; ਸੀਲੇਨ ਵਡ੍ਢਤਿ; ਸੁਤੇਨ ਵਡ੍ਢਤਿ; ਚਾਗੇਨ ਵਡ੍ਢਤਿ; ਪਞ੍ਞਾਯ ਵਡ੍ਢਤਿ. ਸਦ੍ਧਂ, ਭਿਕ੍ਖਵੇ, ਕੁਲਪੁਤ੍ਤਂ ਨਿਸ੍ਸਾਯ ਅਨ੍ਤੋਜਨੋ ਇਮਾਹਿ ਪਞ੍ਚਹਿ ਵਡ੍ਢੀਹਿ ਵਡ੍ਢਤੀ’’ਤਿ.

‘‘ਯਥਾ ਹਿ ਪਬ੍ਬਤੋ ਸੇਲੋ, ਅਰਞ੍ਞਸ੍ਮਿਂ ਬ੍ਰਹਾਵਨੇ;

ਤਂ ਰੁਕ੍ਖਾ ਉਪਨਿਸ੍ਸਾਯ, ਵਡ੍ਢਨ੍ਤੇ ਤੇ ਵਨਪ੍ਪਤੀ.

‘‘ਤਥੇਵ ਸੀਲਸਮ੍ਪਨ੍ਨਂ, ਸਦ੍ਧਂ ਕੁਲਪੁਤ੍ਤਂ ਇਮਂ [ਕੁਲਪਤਿਂ ਇਧ (ਸੀ.), ਕੁਲਪੁਤ੍ਤਂ ਇਧ (ਸ੍ਯਾ.)];

ਉਪਨਿਸ੍ਸਾਯ ਵਡ੍ਢਨ੍ਤਿ, ਪੁਤ੍ਤਦਾਰਾ ਚ ਬਨ੍ਧਵਾ;

ਅਮਚ੍ਚਾ ਞਾਤਿਸਙ੍ਘਾ ਚ, ਯੇ ਚਸ੍ਸ ਅਨੁਜੀਵਿਨੋ.

‘‘ਤ੍ਯਸ੍ਸ ਸੀਲਵਤੋ ਸੀਲਂ, ਚਾਗਂ ਸੁਚਰਿਤਾਨਿ ਚ;

ਪਸ੍ਸਮਾਨਾਨੁਕੁਬ੍ਬਨ੍ਤਿ, ਯੇ ਭਵਨ੍ਤਿ ਵਿਚਕ੍ਖਣਾ.

‘‘ਇਮਂ ਧਮ੍ਮਂ ਚਰਿਤ੍ਵਾਨ, ਮਗ੍ਗਂ [ਸਗ੍ਗਂ (ਸ੍ਯਾ. ਕ.)] ਸੁਗਤਿਗਾਮਿਨਂ;

ਨਨ੍ਦਿਨੋ ਦੇਵਲੋਕਸ੍ਮਿਂ, ਮੋਦਨ੍ਤਿ ਕਾਮਕਾਮਿਨੋ’’ਤਿ. ਦਸਮਂ;

ਸੁਮਨਵਗ੍ਗੋ ਚਤੁਤ੍ਥੋ.