੪. ਸੁਮਨਵਗ੍ਗੋ

੧. ਸੁਮਨਸੁਤ੍ਤਂ

੩੧. ਏਕਂ ਸਮਯਂ…ਪੇ… ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਸੁਮਨਾ ਰਾਜਕੁਮਾਰੀ ਪਞ੍ਚਹਿ ਰਥਸਤੇਹਿ ਪਞ੍ਚਹਿ ਰਾਜਕੁਮਾਰਿਸਤੇਹਿ ਪਰਿਵੁਤਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਸੁਮਨਾ ਰਾਜਕੁਮਾਰੀ ਭਗਵਨ੍ਤਂ ਏਤਦਵੋਚ –

‘‘ਇਧਸ੍ਸੁ, ਭਨ੍ਤੇ, ਭਗਵਤੋ ਦ੍ਵੇ ਸਾਵਕਾ ਸਮਸਦ੍ਧਾ ਸਮਸੀਲਾ ਸਮਪਞ੍ਞਾ – ਏਕੋ ਦਾਯਕੋ, ਏਕੋ ਅਦਾਯਕੋ. ਤੇ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯੁਂ. ਦੇਵਭੂਤਾਨਂ ਪਨ ਨੇਸਂ [ਤੇਸਂ (ਸੀ.)], ਭਨ੍ਤੇ, ਸਿਯਾ ਵਿਸੇਸੋ, ਸਿਯਾ ਨਾਨਾਕਰਣ’’ਨ੍ਤਿ?

‘‘ਸਿਯਾ, ਸੁਮਨੇ’’ਤਿ ਭਗਵਾ ਅਵੋਚ – ‘‘ਯੋ ਸੋ, ਸੁਮਨੇ, ਦਾਯਕੋ ਸੋ ਅਮੁਂ ਅਦਾਯਕਂ ਦੇਵਭੂਤੋ ਸਮਾਨੋ ਪਞ੍ਚਹਿ ਠਾਨੇਹਿ ਅਧਿਗਣ੍ਹਾਤਿ – ਦਿਬ੍ਬੇਨ ਆਯੁਨਾ, ਦਿਬ੍ਬੇਨ ਵਣ੍ਣੇਨ, ਦਿਬ੍ਬੇਨ ਸੁਖੇਨ, ਦਿਬ੍ਬੇਨ ਯਸੇਨ, ਦਿਬ੍ਬੇਨ ਆਧਿਪਤੇਯ੍ਯੇਨ. ਯੋ ਸੋ, ਸੁਮਨੇ, ਦਾਯਕੋ ਸੋ ਅਮੁਂ ਅਦਾਯਕਂ ਦੇਵਭੂਤੋ ਸਮਾਨੋ ਇਮੇਹਿ ਪਞ੍ਚਹਿ ਠਾਨੇਹਿ ਅਧਿਗਣ੍ਹਾਤਿ’’.

‘‘ਸਚੇ ਪਨ ਤੇ, ਭਨ੍ਤੇ, ਤਤੋ ਚੁਤਾ ਇਤ੍ਥਤ੍ਤਂ ਆਗਚ੍ਛਨ੍ਤਿ, ਮਨੁਸ੍ਸਭੂਤਾਨਂ ਪਨ ਨੇਸਂ, ਭਨ੍ਤੇ, ਸਿਯਾ ਵਿਸੇਸੋ, ਸਿਯਾ ਨਾਨਾਕਰਣ’’ਨ੍ਤਿ? ‘‘ਸਿਯਾ, ਸੁਮਨੇ’’ਤਿ ਭਗਵਾ ਅਵੋਚ – ‘‘ਯੋ ਸੋ, ਸੁਮਨੇ, ਦਾਯਕੋ ਸੋ ਅਮੁਂ ਅਦਾਯਕਂ ਮਨੁਸ੍ਸਭੂਤੋ ਸਮਾਨੋ ਪਞ੍ਚਹਿ ਠਾਨੇਹਿ ਅਧਿਗਣ੍ਹਾਤਿ – ਮਾਨੁਸਕੇਨ ਆਯੁਨਾ, ਮਾਨੁਸਕੇਨ ਵਣ੍ਣੇਨ, ਮਾਨੁਸਕੇਨ ਸੁਖੇਨ, ਮਾਨੁਸਕੇਨ ਯਸੇਨ, ਮਾਨੁਸਕੇਨ ਆਧਿਪਤੇਯ੍ਯੇਨ. ਯੋ ਸੋ, ਸੁਮਨੇ, ਦਾਯਕੋ ਸੋ ਅਮੁਂ ਅਦਾਯਕਂ ਮਨੁਸ੍ਸਭੂਤੋ ਸਮਾਨੋ ਇਮੇਹਿ ਪਞ੍ਚਹਿ ਠਾਨੇਹਿ ਅਧਿਗਣ੍ਹਾਤਿ’’.

‘‘ਸਚੇ ਪਨ ਤੇ, ਭਨ੍ਤੇ, ਉਭੋ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਨ੍ਤਿ, ਪਬ੍ਬਜਿਤਾਨਂ ਪਨ ਨੇਸਂ, ਭਨ੍ਤੇ, ਸਿਯਾ ਵਿਸੇਸੋ, ਸਿਯਾ ਨਾਨਾਕਰਣ’’ਨ੍ਤਿ? ‘‘ਸਿਯਾ, ਸੁਮਨੇ’’ਤਿ ਭਗਵਾ ਅਵੋਚ – ‘‘ਯੋ ਸੋ, ਸੁਮਨੇ, ਦਾਯਕੋ ਸੋ ਅਮੁਂ ਅਦਾਯਕਂ ਪਬ੍ਬਜਿਤੋ ਸਮਾਨੋ ਪਞ੍ਚਹਿ ਠਾਨੇਹਿ ਅਧਿਗਣ੍ਹਾਤਿ – ਯਾਚਿਤੋਵ ਬਹੁਲਂ ਚੀਵਰਂ ਪਰਿਭੁਞ੍ਜਤਿ ਅਪ੍ਪਂ ਅਯਾਚਿਤੋ, ਯਾਚਿਤੋਵ ਬਹੁਲਂ ਪਿਣ੍ਡਪਾਤਂ ਪਰਿਭੁਞ੍ਜਤਿ ਅਪ੍ਪਂ ਅਯਾਚਿਤੋ, ਯਾਚਿਤੋਵ ਬਹੁਲਂ ਸੇਨਾਸਨਂ ਪਰਿਭੁਞ੍ਜਤਿ ਅਪ੍ਪਂ ਅਯਾਚਿਤੋ, ਯਾਚਿਤੋਵ ਬਹੁਲਂ ਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਂ ਪਰਿਭੁਞ੍ਜਤਿ ਅਪ੍ਪਂ ਅਯਾਚਿਤੋ. ਯੇਹਿ ਖੋ ਪਨ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਹਰਤਿ ਤ੍ਯਸ੍ਸ ਮਨਾਪੇਨੇਵ ਬਹੁਲਂ ਕਾਯਕਮ੍ਮੇਨ ਸਮੁਦਾਚਰਨ੍ਤਿ ਅਪ੍ਪਂ ਅਮਨਾਪੇਨ, ਮਨਾਪੇਨੇਵ ਬਹੁਲਂ ਵਚੀਕਮ੍ਮੇਨ ਸਮੁਦਾਚਰਨ੍ਤਿ ਅਪ੍ਪਂ ਅਮਨਾਪੇਨ, ਮਨਾਪੇਨੇਵ ਬਹੁਲਂ ਮਨੋਕਮ੍ਮੇਨ ਸਮੁਦਾਚਰਨ੍ਤਿ ਅਪ੍ਪਂ ਅਮਨਾਪੇਨ, ਮਨਾਪਂਯੇਵ ਬਹੁਲਂ ਉਪਹਾਰਂ ਉਪਹਰਨ੍ਤਿ ਅਪ੍ਪਂ ਅਮਨਾਪਂ. ਯੋ ਸੋ, ਸੁਮਨੇ, ਦਾਯਕੋ ਸੋ ਅਮੁਂ ਅਦਾਯਕਂ ਪਬ੍ਬਜਿਤੋ ਸਮਾਨੋ ਇਮੇਹਿ ਪਞ੍ਚਹਿ ਠਾਨੇਹਿ ਅਧਿਗਣ੍ਹਾਤੀ’’ਤਿ.

‘‘ਸਚੇ ਪਨ ਤੇ, ਭਨ੍ਤੇ, ਉਭੋ ਅਰਹਤ੍ਤਂ ਪਾਪੁਣਨ੍ਤਿ, ਅਰਹਤ੍ਤਪ੍ਪਤ੍ਤਾਨਂ ਪਨ ਨੇਸਂ, ਭਨ੍ਤੇ, ਸਿਯਾ ਵਿਸੇਸੋ, ਸਿਯਾ ਨਾਨਾਕਰਣ’’ਨ੍ਤਿ? ‘‘ਏਤ੍ਥ ਖੋ ਪਨੇਸਾਹਂ, ਸੁਮਨੇ, ਨ ਕਿਞ੍ਚਿ ਨਾਨਾਕਰਣਂ ਵਦਾਮਿ, ਯਦਿਦਂ ਵਿਮੁਤ੍ਤਿਯਾ ਵਿਮੁਤ੍ਤਿ’’ਨ੍ਤਿ [ਵਿਮੁਤ੍ਤਨ੍ਤਿ (ਸ੍ਯਾ. ਕਂ.)].

‘‘ਅਚ੍ਛਰਿਯਂ, ਭਨ੍ਤੇ, ਅਬ੍ਭੁਤਂ, ਭਨ੍ਤੇ! ਯਾਵਞ੍ਚਿਦਂ, ਭਨ੍ਤੇ, ਅਲਮੇਵ ਦਾਨਾਨਿ ਦਾਤੁਂ ਅਲਂ ਪੁਞ੍ਞਾਨਿ ਕਾਤੁਂ; ਯਤ੍ਰ ਹਿ ਨਾਮ ਦੇਵਭੂਤਸ੍ਸਾਪਿ ਉਪਕਾਰਾਨਿ ਪੁਞ੍ਞਾਨਿ, ਮਨੁਸ੍ਸਭੂਤਸ੍ਸਾਪਿ ਉਪਕਾਰਾਨਿ ਪੁਞ੍ਞਾਨਿ, ਪਬ੍ਬਜਿਤਸ੍ਸਾਪਿ ਉਪਕਾਰਾਨਿ ਪੁਞ੍ਞਾਨੀ’’ਤਿ. ‘‘ਏਵਮੇਤਂ, ਸੁਮਨੇ! ਅਲਞ੍ਹਿ, ਸੁਮਨੇ, ਦਾਨਾਨਿ ਦਾਤੁਂ ਅਲਂ ਪੁਞ੍ਞਾਨਿ ਕਾਤੁਂ! ਦੇਵਭੂਤਸ੍ਸਾਪਿ ਉਪਕਾਰਾਨਿ ਪੁਞ੍ਞਾਨਿ, ਮਨੁਸ੍ਸਭੂਤਸ੍ਸਾਪਿ ਉਪਕਾਰਾਨਿ ਪੁਞ੍ਞਾਨਿ, ਪਬ੍ਬਜਿਤਸ੍ਸਾਪਿ ਉਪਕਾਰਾਨਿ ਪੁਞ੍ਞਾਨੀ’’ਤਿ.

ਇਦਮਵੋਚ ਭਗਵਾ. ਇਦਂ ਵਤ੍ਵਾਨ [ਇਦਂ ਵਤ੍ਵਾ (ਸੀ. ਪੀ.) ਏਵਮੁਪਰਿਪਿ] ਸੁਗਤੋ ਅਥਾਪਰਂ ਏਤਦਵੋਚ ਸਤ੍ਥਾ –

‘‘ਯਥਾਪਿ ਚਨ੍ਦੋ ਵਿਮਲੋ, ਗਚ੍ਛਂ ਆਕਾਸਧਾਤੁਯਾ;

ਸਬ੍ਬੇ ਤਾਰਾਗਣੇ ਲੋਕੇ, ਆਭਾਯ ਅਤਿਰੋਚਤਿ.

‘‘ਤਥੇਵ ਸੀਲਸਮ੍ਪਨ੍ਨੋ, ਸਦ੍ਧੋ ਪੁਰਿਸਪੁਗ੍ਗਲੋ;

ਸਬ੍ਬੇ ਮਚ੍ਛਰਿਨੋ ਲੋਕੇ, ਚਾਗੇਨ ਅਤਿਰੋਚਤਿ.

‘‘ਯਥਾਪਿ ਮੇਘੋ ਥਨਯਂ, ਵਿਜ੍ਜੁਮਾਲੀ ਸਤਕ੍ਕਕੁ;

ਥਲਂ ਨਿਨ੍ਨਞ੍ਚ ਪੂਰੇਤਿ, ਅਭਿਵਸ੍ਸਂ ਵਸੁਨ੍ਧਰਂ.

‘‘ਏਵਂ ਦਸ੍ਸਨਸਮ੍ਪਨ੍ਨੋ, ਸਮ੍ਮਾਸਮ੍ਬੁਦ੍ਧਸਾਵਕੋ;

ਮਚ੍ਛਰਿਂ ਅਧਿਗਣ੍ਹਾਤਿ, ਪਞ੍ਚਠਾਨੇਹਿ ਪਣ੍ਡਿਤੋ.

‘‘ਆਯੁਨਾ ਯਸਸਾ ਚੇਵ [ਆਯੁਨਾ ਚ ਯਸੇਨ ਚ (ਕ.)], ਵਣ੍ਣੇਨ ਚ ਸੁਖੇਨ ਚ;

ਸ ਵੇ ਭੋਗਪਰਿਬ੍ਯੂਲ਼੍ਹੋ [ਭੋਗਪਰਿਬ੍ਬੂਲ਼੍ਹੋ (ਸੀ.)], ਪੇਚ੍ਚ ਸਗ੍ਗੇ ਪਮੋਦਤੀ’’ਤਿ. ਪਠਮਂ;

੨. ਚੁਨ੍ਦੀਸੁਤ੍ਤਂ

੩੨. ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਅਥ ਖੋ ਚੁਨ੍ਦੀ ਰਾਜਕੁਮਾਰੀ ਪਞ੍ਚਹਿ ਰਥਸਤੇਹਿ ਪਞ੍ਚਹਿ ਚ ਕੁਮਾਰਿਸਤੇਹਿ ਪਰਿਵੁਤਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਚੁਨ੍ਦੀ ਰਾਜਕੁਮਾਰੀ ਭਗਵਨ੍ਤਂ ਏਤਦਵੋਚ –

‘‘ਅਮ੍ਹਾਕਂ, ਭਨ੍ਤੇ, ਭਾਤਾ ਚੁਨ੍ਦੋ ਨਾਮ ਰਾਜਕੁਮਾਰੋ, ਸੋ ਏਵਮਾਹ – ‘ਯਦੇਵ ਸੋ ਹੋਤਿ ਇਤ੍ਥੀ ਵਾ ਪੁਰਿਸੋ ਵਾ ਬੁਦ੍ਧਂ ਸਰਣਂ ਗਤੋ, ਧਮ੍ਮਂ ਸਰਣਂ ਗਤੋ, ਸਙ੍ਘਂ ਸਰਣਂ ਗਤੋ, ਪਾਣਾਤਿਪਾਤਾ ਪਟਿਵਿਰਤੋ, ਅਦਿਨ੍ਨਾਦਾਨਾ ਪਟਿਵਿਰਤੋ, ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ, ਮੁਸਾਵਾਦਾ ਪਟਿਵਿਰਤੋ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤੋ, ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂਯੇਵ ਉਪਪਜ੍ਜਤਿ, ਨੋ ਦੁਗ੍ਗਤਿ’ਨ੍ਤਿ. ਸਾਹਂ, ਭਨ੍ਤੇ, ਭਗਵਨ੍ਤਂ ਪੁਚ੍ਛਾਮਿ – ‘ਕਥਂਰੂਪੇ ਖੋ, ਭਨ੍ਤੇ, ਸਤ੍ਥਰਿ ਪਸਨ੍ਨੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂਯੇਵ ਉਪਪਜ੍ਜਤਿ, ਨੋ ਦੁਗ੍ਗਤਿਂ? ਕਥਂਰੂਪੇ ਧਮ੍ਮੇ ਪਸਨ੍ਨੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂਯੇਵ ਉਪਪਜ੍ਜਤਿ, ਨੋ ਦੁਗ੍ਗਤਿਂ? ਕਥਂਰੂਪੇ ਸਙ੍ਘੇ ਪਸਨ੍ਨੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂਯੇਵ ਉਪਪਜ੍ਜਤਿ, ਨੋ ਦੁਗ੍ਗਤਿਂ? ਕਥਂਰੂਪੇਸੁ ਸੀਲੇਸੁ ਪਰਿਪੂਰਕਾਰੀ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂਯੇਵ ਉਪਪਜ੍ਜਤਿ, ਨੋ ਦੁਗ੍ਗਤਿ’’’ਨ੍ਤਿ?

‘‘ਯਾਵਤਾ, ਚੁਨ੍ਦਿ, ਸਤ੍ਤਾ ਅਪਦਾ ਵਾ ਦ੍ਵਿਪਦਾ ਵਾ ਚਤੁਪ੍ਪਦਾ ਵਾ ਬਹੁਪ੍ਪਦਾ ਵਾ [ਅਪਾਦਾ ਵਾ ਦ੍ਵੀਪਾਦਾ ਵਾਚਤੁਪ੍ਪਾਦਾ ਵਾ ਬਹੁਪ੍ਪਾਦਾ ਵਾ (ਸੀ.) ਅ. ਨਿ. ੪.੩੪; ਇਤਿਵੁ. ੯੦] ਰੂਪਿਨੋ ਵਾ ਅਰੂਪਿਨੋ ਵਾ ਸਞ੍ਞਿਨੋ ਵਾ ਅਸਞ੍ਞਿਨੋ ਵਾ ਨੇਵਸਞ੍ਞਿਨਾਸਞ੍ਞਿਨੋ ਵਾ, ਤਥਾਗਤੋ ਤੇਸਂ ਅਗ੍ਗਮਕ੍ਖਾਯਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ. ਯੇ ਖੋ, ਚੁਨ੍ਦਿ, ਬੁਦ੍ਧੇ ਪਸਨ੍ਨਾ, ਅਗ੍ਗੇ ਤੇ ਪਸਨ੍ਨਾ. ਅਗ੍ਗੇ ਖੋ ਪਨ ਪਸਨ੍ਨਾਨਂ ਅਗ੍ਗੋ ਵਿਪਾਕੋ ਹੋਤਿ.

‘‘ਯਾਵਤਾ, ਚੁਨ੍ਦਿ, ਧਮ੍ਮਾ ਸਙ੍ਖਤਾ, ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਤੇਸਂ ਅਗ੍ਗਮਕ੍ਖਾਯਤਿ. ਯੇ, ਚੁਨ੍ਦਿ, ਅਰਿਯੇ ਅਟ੍ਠਙ੍ਗਿਕੇ ਮਗ੍ਗੇ ਪਸਨ੍ਨਾ, ਅਗ੍ਗੇ ਤੇ ਪਸਨ੍ਨਾ, ਅਗ੍ਗੇ ਖੋ ਪਨ ਪਸਨ੍ਨਾਨਂ ਅਗ੍ਗੋ ਵਿਪਾਕੋ ਹੋਤਿ.

‘‘ਯਾਵਤਾ, ਚੁਨ੍ਦਿ, ਧਮ੍ਮਾ ਸਙ੍ਖਤਾ ਵਾ ਅਸਙ੍ਖਤਾ ਵਾ, ਵਿਰਾਗੋ ਤੇਸਂ [ਤੇਸਂ ਧਮ੍ਮਾਨਂ (ਸੀ. ਪੀ. ਕ.)] ਅਗ੍ਗਮਕ੍ਖਾਯਤਿ, ਯਦਿਦਂ – ਮਦਨਿਮ੍ਮਦਨੋ ਪਿਪਾਸਵਿਨਯੋ ਆਲਯਸਮੁਗ੍ਘਾਤੋ ਵਟ੍ਟੁਪਚ੍ਛੇਦੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋ ਨਿਬ੍ਬਾਨਂ. ਯੇ ਖੋ, ਚੁਨ੍ਦਿ, ਵਿਰਾਗੇ ਧਮ੍ਮੇ ਪਸਨ੍ਨਾ, ਅਗ੍ਗੇ ਤੇ ਪਸਨ੍ਨਾ. ਅਗ੍ਗੇ ਖੋ ਪਨ ਪਸਨ੍ਨਾਨਂ ਅਗ੍ਗੋ ਵਿਪਾਕੋ ਹੋਤਿ.

‘‘ਯਾਵਤਾ, ਚੁਨ੍ਦਿ, ਸਙ੍ਘਾ ਵਾ ਗਣਾ ਵਾ, ਤਥਾਗਤਸਾਵਕਸਙ੍ਘੋ ਤੇਸਂ ਅਗ੍ਗਮਕ੍ਖਾਯਤਿ, ਯਦਿਦਂ – ਚਤ੍ਤਾਰਿ ਪੁਰਿਸਯੁਗਾਨਿ ਅਟ੍ਠ ਪੁਰਿਸਪੁਗ੍ਗਲਾ, ਏਸ ਭਗਵਤੋ ਸਾਵਕਸਙ੍ਘੋ ਆਹੁਨੇਯ੍ਯੋ ਪਾਹੁਨੇਯ੍ਯੋ ਦਕ੍ਖਿਣੇਯ੍ਯੋ ਅਞ੍ਜਲਿਕਰਣੀਯੋ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸ. ਯੇ ਖੋ, ਚੁਨ੍ਦਿ, ਸਙ੍ਘੇ ਪਸਨ੍ਨਾ, ਅਗ੍ਗੇ ਤੇ ਪਸਨ੍ਨਾ. ਅਗ੍ਗੇ ਖੋ ਪਨ ਪਸਨ੍ਨਾਨਂ ਅਗ੍ਗੋ ਵਿਪਾਕੋ ਹੋਤਿ.

‘‘ਯਾਵਤਾ, ਚੁਨ੍ਦਿ, ਸੀਲਾਨਿ, ਅਰਿਯਕਨ੍ਤਾਨਿ ਸੀਲਾਨਿ ਤੇਸਂ [ਅਰਿਯਕਨ੍ਤਾਨਿਤੇਸਂ (ਸੀ. ਸ੍ਯਾ. ਕਂ.)] ਅਗ੍ਗਮਕ੍ਖਾਯਤਿ, ਯਦਿਦਂ – ਅਖਣ੍ਡਾਨਿ ਅਚ੍ਛਿਦ੍ਦਾਨਿ ਅਸਬਲਾਨਿ ਅਕਮ੍ਮਾਸਾਨਿ ਭੁਜਿਸ੍ਸਾਨਿ ਵਿਞ੍ਞੁਪ੍ਪਸਤ੍ਥਾਨਿ ਅਪਰਾਮਟ੍ਠਾਨਿ ਸਮਾਧਿਸਂਵਤ੍ਤਨਿਕਾਨਿ. ਯੇ ਖੋ, ਚੁਨ੍ਦਿ, ਅਰਿਯਕਨ੍ਤੇਸੁ ਸੀਲੇਸੁ ਪਰਿਪੂਰਕਾਰਿਨੋ, ਅਗ੍ਗੇ ਤੇ ਪਰਿਪੂਰਕਾਰਿਨੋ. ਅਗ੍ਗੇ ਖੋ ਪਨ ਪਰਿਪੂਰਕਾਰੀਨਂ ਅਗ੍ਗੋ ਵਿਪਾਕੋ ਹੋਤੀ’’ਤਿ.

‘‘ਅਗ੍ਗਤੋ ਵੇ ਪਸਨ੍ਨਾਨਂ, ਅਗ੍ਗਂ ਧਮ੍ਮਂ ਵਿਜਾਨਤਂ;

ਅਗ੍ਗੇ ਬੁਦ੍ਧੇ ਪਸਨ੍ਨਾਨਂ, ਦਕ੍ਖਿਣੇਯ੍ਯੇ ਅਨੁਤ੍ਤਰੇ.

‘‘ਅਗ੍ਗੇ ਧਮ੍ਮੇ ਪਸਨ੍ਨਾਨਂ, ਵਿਰਾਗੂਪਸਮੇ ਸੁਖੇ;

ਅਗ੍ਗੇ ਸਙ੍ਘੇ ਪਸਨ੍ਨਾਨਂ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ.

‘‘ਅਗ੍ਗਸ੍ਮਿਂ ਦਾਨਂ ਦਦਤਂ, ਅਗ੍ਗਂ ਪੁਞ੍ਞਂ ਪਵਡ੍ਢਤਿ;

ਅਗ੍ਗਂ ਆਯੁ ਚ ਵਣ੍ਣੋ ਚ, ਯਸੋ ਕਿਤ੍ਤਿ ਸੁਖਂ ਬਲਂ.

‘‘ਅਗ੍ਗਸ੍ਸ ਦਾਤਾ ਮੇਧਾਵੀ, ਅਗ੍ਗਧਮ੍ਮਸਮਾਹਿਤੋ;

ਦੇਵਭੂਤੋ ਮਨੁਸ੍ਸੋ ਵਾ, ਅਗ੍ਗਪ੍ਪਤ੍ਤੋ ਪਮੋਦਤੀ’’ਤਿ. ਦੁਤਿਯਂ;

੩. ਉਗ੍ਗਹਸੁਤ੍ਤਂ

੩੩. ਏਕਂ ਸਮਯਂ ਭਗਵਾ ਭਦ੍ਦਿਯੇ ਵਿਹਰਤਿ ਜਾਤਿਯਾ ਵਨੇ. ਅਥ ਖੋ ਉਗ੍ਗਹੋ ਮੇਣ੍ਡਕਨਤ੍ਤਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਉਗ੍ਗਹੋ ਮੇਣ੍ਡਕਨਤ੍ਤਾ ਭਗਵਨ੍ਤਂ ਏਤਦਵੋਚ –

‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਅਤ੍ਤਚਤੁਤ੍ਥੋ ਭਤ੍ਤ’’ਨ੍ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਉਗ੍ਗਹੋ ਮੇਣ੍ਡਕਨਤ੍ਤਾ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਅਥ ਖੋ ਭਗਵਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਉਗ੍ਗਹਸ੍ਸ ਮੇਣ੍ਡਕਨਤ੍ਤੁਨੋ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਉਗ੍ਗਹੋ ਮੇਣ੍ਡਕਨਤ੍ਤਾ ਭਗਵਨ੍ਤਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਸਿ ਸਮ੍ਪਵਾਰੇਸਿ. ਅਥ ਖੋ ਉਗ੍ਗਹੋ ਮੇਣ੍ਡਕਨਤ੍ਤਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਉਗ੍ਗਹੋ ਮੇਣ੍ਡਕਨਤ੍ਤਾ ਭਗਵਨ੍ਤਂ ਏਤਦਵੋਚ – ‘‘ਇਮਾ ਮੇ, ਭਨ੍ਤੇ, ਕੁਮਾਰਿਯੋ ਪਤਿਕੁਲਾਨਿ ਗਮਿਸ੍ਸਨ੍ਤਿ. ਓਵਦਤੁ ਤਾਸਂ, ਭਨ੍ਤੇ, ਭਗਵਾ; ਅਨੁਸਾਸਤੁ ਤਾਸਂ, ਭਨ੍ਤੇ, ਭਗਵਾ, ਯਂ ਤਾਸਂ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ.

ਅਥ ਖੋ ਭਗਵਾ ਤਾ ਕੁਮਾਰਿਯੋ ਏਤਦਵੋਚ – ‘‘ਤਸ੍ਮਾਤਿਹ, ਕੁਮਾਰਿਯੋ, ਏਵਂ ਸਿਕ੍ਖਿਤਬ੍ਬਂ – ‘ਯਸ੍ਸ ਵੋ [ਯਸ੍ਸ ਖੋ (ਸੀ. ਸ੍ਯਾ. ਕਂ.)] ਮਾਤਾਪਿਤਰੋ ਭਤ੍ਤੁਨੋ ਦਸ੍ਸਨ੍ਤਿ ਅਤ੍ਥਕਾਮਾ ਹਿਤੇਸਿਨੋ ਅਨੁਕਮ੍ਪਕਾ ਅਨੁਕਮ੍ਪਂ ਉਪਾਦਾਯ, ਤਸ੍ਸ ਭਵਿਸ੍ਸਾਮ ਪੁਬ੍ਬੁਟ੍ਠਾਯਿਨਿਯੋ ਪਚ੍ਛਾਨਿਪਾਤਿਨਿਯੋ ਕਿਂਕਾਰਪਟਿਸ੍ਸਾਵਿਨਿਯੋ ਮਨਾਪਚਾਰਿਨਿਯੋ ਪਿਯਵਾਦਿਨਿਯੋ’ਤਿ. ਏਵਞ੍ਹਿ ਵੋ, ਕੁਮਾਰਿਯੋ, ਸਿਕ੍ਖਿਤਬ੍ਬਂ.

‘‘ਤਸ੍ਮਾਤਿਹ, ਕੁਮਾਰਿਯੋ, ਏਵਂ ਸਿਕ੍ਖਿਤਬ੍ਬਂ – ‘ਯੇ ਤੇ ਭਤ੍ਤੁ ਗਰੁਨੋ [ਗੁਰੁਨੋ (ਕ.)] ਭਵਿਸ੍ਸਨ੍ਤਿ ਮਾਤਾਤਿ ਵਾ ਪਿਤਾਤਿ ਵਾ ਸਮਣਬ੍ਰਾਹ੍ਮਣਾਤਿ ਵਾ, ਤੇ ਸਕ੍ਕਰਿਸ੍ਸਾਮ ਗਰੁਂ ਕਰਿਸ੍ਸਾਮ [ਗਰੁਕਰਿਸ੍ਸਾਮ (ਸੀ. ਸ੍ਯਾ. ਕਂ. ਪੀ.)] ਮਾਨੇਸ੍ਸਾਮ ਪੂਜੇਸ੍ਸਾਮ ਅਬ੍ਭਾਗਤੇ ਚ ਆਸਨੋਦਕੇਨ ਪਟਿਪੂਜੇਸ੍ਸਾਮਾ’ਤਿ [ਪੂਜੇਸ੍ਸਾਮਾਤਿ (ਸੀ.)]. ਏਵਞ੍ਹਿ ਵੋ, ਕੁਮਾਰਿਯੋ, ਸਿਕ੍ਖਿਤਬ੍ਬਂ.

‘‘ਤਸ੍ਮਾਤਿਹ, ਕੁਮਾਰਿਯੋ, ਏਵਂ ਸਿਕ੍ਖਿਤਬ੍ਬਂ – ‘ਯੇ ਤੇ ਭਤ੍ਤੁ ਅਬ੍ਭਨ੍ਤਰਾ ਕਮ੍ਮਨ੍ਤਾ ਉਣ੍ਣਾਤਿ ਵਾ ਕਪ੍ਪਾਸਾਤਿ ਵਾ, ਤਤ੍ਥ ਦਕ੍ਖਾ ਭਵਿਸ੍ਸਾਮ ਅਨਲਸਾ, ਤਤ੍ਰੁਪਾਯਾਯ ਵੀਮਂਸਾਯ ਸਮਨ੍ਨਾਗਤਾ, ਅਲਂ ਕਾਤੁਂ ਅਲਂ ਸਂਵਿਧਾਤੁ’ਨ੍ਤਿ. ਏਵਞ੍ਹਿ ਵੋ, ਕੁਮਾਰਿਯੋ, ਸਿਕ੍ਖਿਤਬ੍ਬਂ.

‘‘ਤਸ੍ਮਾਤਿਹ, ਕੁਮਾਰਿਯੋ, ਏਵਂ ਸਿਕ੍ਖਿਤਬ੍ਬਂ – ‘ਯੋ ਸੋ ਭਤ੍ਤੁ ਅਬ੍ਭਨ੍ਤਰੋ [ਅਬ੍ਭਨ੍ਤਰੇ (ਕ.)] ਅਨ੍ਤੋਜਨੋ ਦਾਸਾਤਿ ਵਾ ਪੇਸ੍ਸਾਤਿ ਵਾ ਕਮ੍ਮਕਰਾਤਿ ਵਾ, ਤੇਸਂ ਕਤਞ੍ਚ ਕਤਤੋ ਜਾਨਿਸ੍ਸਾਮ ਅਕਤਞ੍ਚ ਅਕਤਤੋ ਜਾਨਿਸ੍ਸਾਮ, ਗਿਲਾਨਕਾਨਞ੍ਚ ਬਲਾਬਲਂ ਜਾਨਿਸ੍ਸਾਮ, ਖਾਦਨੀਯਂ ਭੋਜਨੀਯਞ੍ਚਸ੍ਸ ਪਚ੍ਚਂਸੇਨ [ਪਚ੍ਚਯਂ ਤੇਨ (ਕ. ਸੀ.), ਪਚ੍ਚਯਂਸੇਨ (ਸ੍ਯਾ. ਕਂ.), ਪਚ੍ਚਯਂ ਸੇਨਾਸਨਂ ਪਚ੍ਚਤ੍ਤਂਸੇਨ (ਕ.) ਅ. ਨਿ. ੮.੪੬] ਸਂਵਿਭਜਿਸ੍ਸਾਮਾ’ਤਿ [ਵਿਭਜਿਸ੍ਸਾਮਾਤਿ (ਸੀ. ਸ੍ਯਾ. ਕਂ.)]. ਏਵਞ੍ਹਿ ਵੋ, ਕੁਮਾਰਿਯੋ, ਸਿਕ੍ਖਿਤਬ੍ਬਂ.

‘‘ਤਸ੍ਮਾਤਿਹ, ਕੁਮਾਰਿਯੋ, ਏਵਂ ਸਿਕ੍ਖਿਤਬ੍ਬਂ – ‘ਯਂ ਭਤ੍ਤਾ ਆਹਰਿਸ੍ਸਤਿ ਧਨਂ ਵਾ ਧਞ੍ਞਂ ਵਾ ਰਜਤਂ ਵਾ ਜਾਤਰੂਪਂ ਵਾ, ਤਂ ਆਰਕ੍ਖੇਨ [ਤਂ ਆਰਕ੍ਖਾਯ (ਸੀ.)] ਗੁਤ੍ਤਿਯਾ ਸਮ੍ਪਾਦੇਸ੍ਸਾਮ, ਤਤ੍ਥ ਚ ਭਵਿਸ੍ਸਾਮ ਅਧੁਤ੍ਤੀ ਅਥੇਨੀ ਅਸੋਣ੍ਡੀ ਅਵਿਨਾਸਿਕਾਯੋ’ਤਿ. ਏਵਞ੍ਹਿ ਵੋ, ਕੁਮਾਰਿਯੋ, ਸਿਕ੍ਖਿਤਬ੍ਬਂ. ਇਮੇਹਿ ਖੋ, ਕੁਮਾਰਿਯੋ, ਪਞ੍ਚਹਿ ਧਮ੍ਮੇਹਿ ਸਮਨ੍ਨਾਗਤੋ ਮਾਤੁਗਾਮੋ ਕਾਯਸ੍ਸ ਭੇਦਾ ਪਰਂ ਮਰਣਾ ਮਨਾਪਕਾਯਿਕਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ.

‘‘ਯੋ ਨਂ ਭਰਤਿ ਸਬ੍ਬਦਾ, ਨਿਚ੍ਚਂ ਆਤਾਪਿ ਉਸ੍ਸੁਕੋ;

ਸਬ੍ਬਕਾਮਹਰਂ ਪੋਸਂ, ਭਤ੍ਤਾਰਂ ਨਾਤਿਮਞ੍ਞਤਿ.

‘‘ਨ ਚਾਪਿ ਸੋਤ੍ਥਿ ਭਤ੍ਤਾਰਂ, ਇਸ੍ਸਾਚਾਰੇਨ [ਇਚ੍ਛਾਚਾਰੇਨ (ਸੀ.), ਇਸ੍ਸਾਵਾਦੇਨ (ਪੀ.)] ਰੋਸਯੇ;

ਭਤ੍ਤੁ ਚ ਗਰੁਨੋ ਸਬ੍ਬੇ, ਪਟਿਪੂਜੇਤਿ ਪਣ੍ਡਿਤਾ.

‘‘ਉਟ੍ਠਾਹਿਕਾ [ਉਟ੍ਠਾਯਿਕਾ (ਸ੍ਯਾ. ਕਂ. ਕ.)] ਅਨਲਸਾ, ਸਙ੍ਗਹਿਤਪਰਿਜ੍ਜਨਾ;

ਭਤ੍ਤੁ ਮਨਾਪਂ [ਮਨਾਪਾ (ਸੀ.)] ਚਰਤਿ, ਸਮ੍ਭਤਂ ਅਨੁਰਕ੍ਖਤਿ.

‘‘ਯਾ ਏਵਂ ਵਤ੍ਤਤੀ ਨਾਰੀ, ਭਤ੍ਤੁਛਨ੍ਦਵਸਾਨੁਗਾ;

ਮਨਾਪਾ ਨਾਮ ਤੇ ਦੇਵਾ, ਯਤ੍ਥ ਸਾ ਉਪਪਜ੍ਜਤੀ’’ਤਿ. ਤਤਿਯਂ;

੪. ਸੀਹਸੇਨਾਪਤਿਸੁਤ੍ਤਂ

੩੪. ਏਕਂ ਸਮਯਂ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਅਥ ਖੋ ਸੀਹੋ ਸੇਨਾਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੀਹੋ ਸੇਨਾਪਤਿ ਭਗਵਨ੍ਤਂ ਏਤਦਵੋਚ – ‘‘ਸਕ੍ਕਾ ਨੁ ਖੋ, ਭਨ੍ਤੇ, ਭਗਵਾ ਸਨ੍ਦਿਟ੍ਠਿਕਂ ਦਾਨਫਲਂ ਪਞ੍ਞਾਪੇਤੁ’’ਨ੍ਤਿ?

‘‘ਸਕ੍ਕਾ, ਸੀਹਾ’’ਤਿ ਭਗਵਾ ਅਵੋਚ – ‘‘ਦਾਯਕੋ, ਸੀਹ, ਦਾਨਪਤਿ ਬਹੁਨੋ ਜਨਸ੍ਸ ਪਿਯੋ ਹੋਤਿ ਮਨਾਪੋ. ਯਮ੍ਪਿ, ਸੀਹ, ਦਾਯਕੋ ਦਾਨਪਤਿ ਬਹੁਨੋ ਜਨਸ੍ਸ ਪਿਯੋ ਹੋਤਿ ਮਨਾਪੋ, ਇਦਮ੍ਪਿ ਸਨ੍ਦਿਟ੍ਠਿਕਂ ਦਾਨਫਲਂ.

‘‘ਪੁਨ ਚਪਰਂ, ਸੀਹ, ਦਾਯਕਂ ਦਾਨਪਤਿਂ ਸਨ੍ਤੋ ਸਪ੍ਪੁਰਿਸਾ ਭਜਨ੍ਤਿ. ਯਮ੍ਪਿ, ਸੀਹ, ਦਾਯਕਂ ਦਾਨਪਤਿਂ ਸਨ੍ਤੋ ਸਪ੍ਪੁਰਿਸਾ ਭਜਨ੍ਤਿ, ਇਦਮ੍ਪਿ ਸਨ੍ਦਿਟ੍ਠਿਕਂ ਦਾਨਫਲਂ.

‘‘ਪੁਨ ਚਪਰਂ, ਸੀਹ, ਦਾਯਕਸ੍ਸ ਦਾਨਪਤਿਨੋ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਯਮ੍ਪਿ, ਸੀਹ, ਦਾਯਕਸ੍ਸ ਦਾਨਪਤਿਨੋ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ, ਇਦਮ੍ਪਿ ਸਨ੍ਦਿਟ੍ਠਿਕਂ ਦਾਨਫਲਂ.

‘‘ਪੁਨ ਚਪਰਂ, ਸੀਹ, ਦਾਯਕੋ ਦਾਨਪਤਿ ਯਂ ਯਦੇਵ ਪਰਿਸਂ ਉਪਸਙ੍ਕਮਤਿ – ਯਦਿ ਖਤ੍ਤਿਯਪਰਿਸਂ ਯਦਿ ਬ੍ਰਾਹ੍ਮਣਪਰਿਸਂ ਯਦਿ ਗਹਪਤਿਪਰਿਸਂ ਯਦਿ ਸਮਣਪਰਿਸਂ – ਵਿਸਾਰਦੋ [ਵਿਸਾਰਦੋਵ (ਸੀ.) ਅ. ਨਿ. ੭.੫੭ ਪਸ੍ਸਿਤਬ੍ਬਂ] ਉਪਸਙ੍ਕਮਤਿ ਅਮਙ੍ਕੁਭੂਤੋ. ਯਮ੍ਪਿ, ਸੀਹ, ਦਾਯਕੋ ਦਾਨਪਤਿ ਯਂ ਯਦੇਵ ਪਰਿਸਂ ਉਪਸਙ੍ਕਮਤਿ – ਯਦਿ ਖਤ੍ਤਿਯਪਰਿਸਂ ਯਦਿ ਬ੍ਰਾਹ੍ਮਣਪਰਿਸਂ ਯਦਿ ਗਹਪਤਿਪਰਿਸਂ ਯਦਿ ਸਮਣਪਰਿਸਂ – ਵਿਸਾਰਦੋ ਉਪਸਙ੍ਕਮਤਿ ਅਮਙ੍ਕੁਭੂਤੋ, ਇਦਮ੍ਪਿ ਸਨ੍ਦਿਟ੍ਠਿਕਂ ਦਾਨਫਲਂ.

‘‘ਪੁਨ ਚਪਰਂ, ਸੀਹ, ਦਾਯਕੋ ਦਾਨਪਤਿ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਯਮ੍ਪਿ, ਸੀਹ, ਦਾਯਕੋ ਦਾਨਪਤਿ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ, ਇਦਂ [ਇਦਮ੍ਪਿ ਸੀਹ (ਕ.)] ਸਮ੍ਪਰਾਯਿਕਂ ਦਾਨਫਲ’’ਨ੍ਤਿ.

ਏਵਂ ਵੁਤ੍ਤੇ ਸੀਹੋ ਸੇਨਾਪਤਿ ਭਗਵਨ੍ਤਂ ਏਤਦਵੋਚ – ‘‘ਯਾਨਿਮਾਨਿ, ਭਨ੍ਤੇ, ਭਗਵਤਾ ਚਤ੍ਤਾਰਿ ਸਨ੍ਦਿਟ੍ਠਿਕਾਨਿ ਦਾਨਫਲਾਨਿ ਅਕ੍ਖਾਤਾਨਿ, ਨਾਹਂ ਏਤ੍ਥ ਭਗਵਤੋ ਸਦ੍ਧਾਯ ਗਚ੍ਛਾਮਿ; ਅਹਂ ਪੇਤਾਨਿ ਜਾਨਾਮਿ. ਅਹਂ, ਭਨ੍ਤੇ, ਦਾਯਕੋ ਦਾਨਪਤਿ ਬਹੁਨੋ ਜਨਸ੍ਸ ਪਿਯੋ ਮਨਾਪੋ. ਅਹਂ, ਭਨ੍ਤੇ, ਦਾਯਕੋ ਦਾਨਪਤਿ; ਮਂ ਸਨ੍ਤੋ ਸਪ੍ਪੁਰਿਸਾ ਭਜਨ੍ਤਿ. ਅਹਂ, ਭਨ੍ਤੇ, ਦਾਯਕੋ ਦਾਨਪਤਿ; ਮਯ੍ਹਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਸੀਹੋ ਸੇਨਾਪਤਿ ਦਾਯਕੋ ਕਾਰਕੋ ਸਙ੍ਘੁਪਟ੍ਠਾਕੋ’ਤਿ. ਅਹਂ, ਭਨ੍ਤੇ, ਦਾਯਕੋ ਦਾਨਪਤਿ ਯਂ ਯਦੇਵ ਪਰਿਸਂ ਉਪਸਙ੍ਕਮਾਮਿ – ਯਦਿ ਖਤ੍ਤਿਯਪਰਿਸਂ ਯਦਿ ਬ੍ਰਾਹ੍ਮਣਪਰਿਸਂ ਯਦਿ ਗਹਪਤਿਪਰਿਸਂ ਯਦਿ ਸਮਣਪਰਿਸਂ – ਵਿਸਾਰਦੋ ਉਪਸਙ੍ਕਮਾਮਿ ਅਮਙ੍ਕੁਭੂਤੋ. ਯਾਨਿਮਾਨਿ, ਭਨ੍ਤੇ, ਭਗਵਤਾ ਚਤ੍ਤਾਰਿ ਸਨ੍ਦਿਟ੍ਠਿਕਾਨਿ ਦਾਨਫਲਾਨਿ ਅਕ੍ਖਾਤਾਨਿ, ਨਾਹਂ ਏਤ੍ਥ ਭਗਵਤੋ ਸਦ੍ਧਾਯ ਗਚ੍ਛਾਮਿ; ਅਹਂ ਪੇਤਾਨਿ ਜਾਨਾਮਿ. ਯਞ੍ਚ ਖੋ ਮਂ, ਭਨ੍ਤੇ, ਭਗਵਾ ਏਵਮਾਹ – ‘ਦਾਯਕੋ, ਸੀਹ, ਦਾਨਪਤਿ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤੀ’ਤਿ, ਏਤਾਹਂ ਨ ਜਾਨਾਮਿ; ਏਤ੍ਥ ਚ ਪਨਾਹਂ ਭਗਵਤੋ ਸਦ੍ਧਾਯ ਗਚ੍ਛਾਮੀ’’ਤਿ. ‘‘ਏਵਮੇਤਂ, ਸੀਹ, ਏਵਮੇਤਂ, ਸੀਹ! ਦਾਯਕੋ ਦਾਨਪਤਿ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤੀ’’ਤਿ.

‘‘ਦਦਂ ਪਿਯੋ ਹੋਤਿ ਭਜਨ੍ਤਿ ਨਂ ਬਹੂ,

ਕਿਤ੍ਤਿਞ੍ਚ ਪਪ੍ਪੋਤਿ ਯਸੋ ਚ ਵਡ੍ਢਤਿ [ਯਸਸ੍ਸ ਵਡ੍ਢਤਿ (ਸ੍ਯਾ. ਕਂ.), ਯਸਂ ਪਵਡ੍ਢਤਿ (ਕ.)];

ਅਮਙ੍ਕੁਭੂਤੋ ਪਰਿਸਂ ਵਿਗਾਹਤਿ,

ਵਿਸਾਰਦੋ ਹੋਤਿ ਨਰੋ ਅਮਚ੍ਛਰੀ.

‘‘ਤਸ੍ਮਾ ਹਿ ਦਾਨਾਨਿ ਦਦਨ੍ਤਿ ਪਣ੍ਡਿਤਾ,

ਵਿਨੇਯ੍ਯ ਮਚ੍ਛੇਰਮਲਂ ਸੁਖੇਸਿਨੋ;

ਤੇ ਦੀਘਰਤ੍ਤਂ ਤਿਦਿਵੇ ਪਤਿਟ੍ਠਿਤਾ,

ਦੇਵਾਨਂ ਸਹਬ੍ਯਗਤਾ ਰਮਨ੍ਤਿ ਤੇ [ਸਹਬ੍ਯਤਂ ਗਤਾ ਰਮਨ੍ਤਿ (ਸੀ.), ਸਹਬ੍ਯਤਾ ਰਮਨ੍ਤਿ ਤੇ (ਕ.)].

‘‘ਕਤਾਵਕਾਸਾ ਕਤਕੁਸਲਾ ਇਤੋ ਚੁਤਾ [ਤਤੋ ਚੁਤਾ (ਸੀ.)],

ਸਯਂਪਭਾ ਅਨੁਵਿਚਰਨ੍ਤਿ ਨਨ੍ਦਨਂ [ਨਨ੍ਦਨੇ (ਸ੍ਯਾ. ਕਂ.)];

ਤੇ ਤਤ੍ਥ ਨਨ੍ਦਨ੍ਤਿ ਰਮਨ੍ਤਿ ਮੋਦਰੇ,

ਸਮਪ੍ਪਿਤਾ ਕਾਮਗੁਣੇਹਿ ਪਞ੍ਚਹਿ;

‘‘ਕਤ੍ਵਾਨ ਵਾਕ੍ਯਂ ਅਸਿਤਸ੍ਸ ਤਾਦਿਨੋ,

ਰਮਨ੍ਤਿ ਸਗ੍ਗੇ [ਰਮਨ੍ਤਿ ਸੁਮਨਾ (ਕ.), ਕਮਨ੍ਤਿ ਸਬ੍ਬੇ (ਸ੍ਯਾ. ਕਂ.)] ਸੁਗਤਸ੍ਸ ਸਾਵਕਾ’’ਤਿ. ਚਤੁਤ੍ਥਂ;

੫. ਦਾਨਾਨਿਸਂਸਸੁਤ੍ਤਂ

੩੫. ‘‘ਪਞ੍ਚਿਮੇ, ਭਿਕ੍ਖਵੇ, ਦਾਨੇ ਆਨਿਸਂਸਾ. ਕਤਮੇ ਪਞ੍ਚ? ਬਹੁਨੋ ਜਨਸ੍ਸ ਪਿਯੋ ਹੋਤਿ ਮਨਾਪੋ; ਸਨ੍ਤੋ ਸਪ੍ਪੁਰਿਸਾ ਭਜਨ੍ਤਿ; ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ; ਗਿਹਿਧਮ੍ਮਾ ਅਨਪਗਤੋ [ਗਿਹਿਧਮ੍ਮਾ ਅਨਪੇਤੋ (ਸੀ. ਪੀ.), ਗਿਹਿਧਮ੍ਮਮਨੁਪਗਤੋ (ਕ.)] ਹੋਤਿ; ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਦਾਨੇ ਆਨਿਸਂਸਾ’’ਤਿ.

‘‘ਦਦਮਾਨੋ ਪਿਯੋ ਹੋਤਿ, ਸਤਂ ਧਮ੍ਮਂ ਅਨੁਕ੍ਕਮਂ;

ਸਨ੍ਤੋ ਨਂ ਸਦਾ ਭਜਨ੍ਤਿ [ਸਨ੍ਤੋ ਭਜਨ੍ਤਿ ਸਪ੍ਪੁਰਿਸਾ (ਸੀ.)], ਸਞ੍ਞਤਾ ਬ੍ਰਹ੍ਮਚਾਰਯੋ.

‘‘ਤੇ ਤਸ੍ਸ ਧਮ੍ਮਂ ਦੇਸੇਨ੍ਤਿ, ਸਬ੍ਬਦੁਕ੍ਖਾਪਨੂਦਨਂ;

ਯਂ ਸੋ ਧਮ੍ਮਂ ਇਧਞ੍ਞਾਯ, ਪਰਿਨਿਬ੍ਬਾਤਿ ਅਨਾਸਵੋ’’ਤਿ. ਪਞ੍ਚਮਂ;

੬. ਕਾਲਦਾਨਸੁਤ੍ਤਂ

੩੬. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਕਾਲਦਾਨਾਨਿ. ਕਤਮਾਨਿ ਪਞ੍ਚ? ਆਗਨ੍ਤੁਕਸ੍ਸ ਦਾਨਂ ਦੇਤਿ; ਗਮਿਕਸ੍ਸ ਦਾਨਂ ਦੇਤਿ; ਗਿਲਾਨਸ੍ਸ ਦਾਨਂ ਦੇਤਿ; ਦੁਬ੍ਭਿਕ੍ਖੇ ਦਾਨਂ ਦੇਤਿ; ਯਾਨਿ ਤਾਨਿ ਨਵਸਸ੍ਸਾਨਿ ਨਵਫਲਾਨਿ ਤਾਨਿ ਪਠਮਂ ਸੀਲਵਨ੍ਤੇਸੁ ਪਤਿਟ੍ਠਾਪੇਤਿ. ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਕਾਲਦਾਨਾਨੀ’’ਤਿ.

‘‘ਕਾਲੇ ਦਦਨ੍ਤਿ ਸਪ੍ਪਞ੍ਞਾ, ਵਦਞ੍ਞੂ ਵੀਤਮਚ੍ਛਰਾ;

ਕਾਲੇਨ ਦਿਨ੍ਨਂ ਅਰਿਯੇਸੁ, ਉਜੁਭੂਤੇਸੁ ਤਾਦਿਸੁ.

‘‘ਵਿਪ੍ਪਸਨ੍ਨਮਨਾ ਤਸ੍ਸ, ਵਿਪੁਲਾ ਹੋਤਿ ਦਕ੍ਖਿਣਾ;

ਯੇ ਤਤ੍ਥ ਅਨੁਮੋਦਨ੍ਤਿ, ਵੇਯ੍ਯਾਵਚ੍ਚਂ ਕਰੋਨ੍ਤਿ ਵਾ;

ਨ ਤੇਨ [ਨ ਤੇਸਂ (ਪੀ. ਕ.)] ਦਕ੍ਖਿਣਾ ਊਨਾ, ਤੇਪਿ ਪੁਞ੍ਞਸ੍ਸ ਭਾਗਿਨੋ.

‘‘ਤਸ੍ਮਾ ਦਦੇ ਅਪ੍ਪਟਿਵਾਨਚਿਤ੍ਤੋ, ਯਤ੍ਥ ਦਿਨ੍ਨਂ ਮਹਪ੍ਫਲਂ;

ਪੁਞ੍ਞਾਨਿ ਪਰਲੋਕਸ੍ਮਿਂ, ਪਤਿਟ੍ਠਾ ਹੋਨ੍ਤਿ ਪਾਣਿਨ’’ਨ੍ਤਿ. ਛਟ੍ਠਂ;

੯. ਭੋਜਨਸੁਤ੍ਤਂ

੩੭. ‘‘ਭੋਜਨਂ, ਭਿਕ੍ਖਵੇ, ਦਦਮਾਨੋ ਦਾਯਕੋ ਪਟਿਗ੍ਗਾਹਕਾਨਂ ਪਞ੍ਚ ਠਾਨਾਨਿ ਦੇਤਿ. ਕਤਮਾਨਿ ਪਞ੍ਚ? ਆਯੁਂ ਦੇਤਿ, ਵਣ੍ਣਂ ਦੇਤਿ, ਸੁਖਂ ਦੇਤਿ, ਬਲਂ ਦੇਤਿ, ਪਟਿਭਾਨਂ [ਪਟਿਭਾਣਂ (ਸੀ.)] ਦੇਤਿ. ਆਯੁਂ ਖੋ ਪਨ ਦਤ੍ਵਾ ਆਯੁਸ੍ਸ ਭਾਗੀ ਹੋਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ; ਵਣ੍ਣਂ ਦਤ੍ਵਾ ਵਣ੍ਣਸ੍ਸ ਭਾਗੀ ਹੋਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ; ਸੁਖਂ ਦਤ੍ਵਾ ਸੁਖਸ੍ਸ ਭਾਗੀ ਹੋਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ; ਬਲਂ ਦਤ੍ਵਾ ਬਲਸ੍ਸ ਭਾਗੀ ਹੋਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ; ਪਟਿਭਾਨਂ ਦਤ੍ਵਾ ਪਟਿਭਾਨਸ੍ਸ ਭਾਗੀ ਹੋਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ. ਭੋਜਨਂ, ਭਿਕ੍ਖਵੇ, ਦਦਮਾਨੋ ਦਾਯਕੋ ਪਟਿਗ੍ਗਾਹਕਾਨਂ ਇਮਾਨਿ ਪਞ੍ਚ ਠਾਨਾਨਿ ਦੇਤੀ’’ਤਿ.

‘‘ਆਯੁਦੋ ਬਲਦੋ ਧੀਰੋ, ਵਣ੍ਣਦੋ ਪਟਿਭਾਨਦੋ;

ਸੁਖਸ੍ਸ ਦਾਤਾ ਮੇਧਾਵੀ, ਸੁਖਂ ਸੋ ਅਧਿਗਚ੍ਛਤਿ.

‘‘ਆਯੁਂ ਦਤ੍ਵਾ ਬਲਂ ਵਣ੍ਣਂ, ਸੁਖਞ੍ਚ ਪਟਿਭਾਨਕਂ [ਪਟਿਭਾਣਕਂ (ਸੀ.), ਪਟਿਭਾਨਦੋ (ਸ੍ਯਾ. ਕਂ. ਪੀ. ਕ.)];

ਦੀਘਾਯੁ ਯਸਵਾ ਹੋਤਿ, ਯਤ੍ਥ ਯਤ੍ਥੂਪਪਜ੍ਜਤੀ’’ਤਿ. ਸਤ੍ਤਮਂ;

੮. ਸਦ੍ਧਸੁਤ੍ਤਂ

੩੮. ‘‘ਪਞ੍ਚਿਮੇ, ਭਿਕ੍ਖਵੇ, ਸਦ੍ਧੇ ਕੁਲਪੁਤ੍ਤੇ ਆਨਿਸਂਸਾ. ਕਤਮੇ ਪਞ੍ਚ? ਯੇ ਤੇ, ਭਿਕ੍ਖਵੇ, ਲੋਕੇ ਸਨ੍ਤੋ ਸਪ੍ਪੁਰਿਸਾ ਤੇ ਸਦ੍ਧਞ੍ਞੇਵ ਪਠਮਂ ਅਨੁਕਮ੍ਪਨ੍ਤਾ ਅਨੁਕਮ੍ਪਨ੍ਤਿ, ਨੋ ਤਥਾ ਅਸ੍ਸਦ੍ਧਂ; ਸਦ੍ਧਞ੍ਞੇਵ ਪਠਮਂ ਉਪਸਙ੍ਕਮਨ੍ਤਾ ਉਪਸਙ੍ਕਮਨ੍ਤਿ, ਨੋ ਤਥਾ ਅਸ੍ਸਦ੍ਧਂ; ਸਦ੍ਧਞ੍ਞੇਵ ਪਠਮਂ ਪਟਿਗ੍ਗਣ੍ਹਨ੍ਤਾ ਪਟਿਗ੍ਗਣ੍ਹਨ੍ਤਿ, ਨੋ ਤਥਾ ਅਸ੍ਸਦ੍ਧਂ; ਸਦ੍ਧਞ੍ਞੇਵ ਪਠਮਂ ਧਮ੍ਮਂ ਦੇਸੇਨ੍ਤਾ ਦੇਸੇਨ੍ਤਿ, ਨੋ ਤਥਾ ਅਸ੍ਸਦ੍ਧਂ; ਸਦ੍ਧੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਸਦ੍ਧੇ ਕੁਲਪੁਤ੍ਤੇ ਆਨਿਸਂਸਾ.

‘‘ਸੇਯ੍ਯਥਾਪਿ, ਭਿਕ੍ਖਵੇ, ਸੁਭੂਮਿਯਂ ਚਤੁਮਹਾਪਥੇ ਮਹਾਨਿਗ੍ਰੋਧੋ ਸਮਨ੍ਤਾ ਪਕ੍ਖੀਨਂ ਪਟਿਸਰਣਂ ਹੋਤਿ; ਏਵਮੇਵਂ ਖੋ, ਭਿਕ੍ਖਵੇ, ਸਦ੍ਧੋ ਕੁਲਪੁਤ੍ਤੋ ਬਹੁਨੋ ਜਨਸ੍ਸ ਪਟਿਸਰਣਂ ਹੋਤਿ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨ’’ਨ੍ਤਿ.

‘‘ਸਾਖਾਪਤ੍ਤਫਲੂਪੇਤੋ [ਸਾਖਾਪਤ੍ਤਬਹੁਪੇਤੋ (ਕਤ੍ਥਚਿ), ਸਾਖਾਪਤ੍ਤਪਲਾਸੂਪੇਤੋ (?)], ਖਨ੍ਧਿਮਾਵ [ਖਨ੍ਧਿਮਾ ਚ (ਸੀ.)] ਮਹਾਦੁਮੋ;

ਮੂਲਵਾ ਫਲਸਮ੍ਪਨ੍ਨੋ, ਪਤਿਟ੍ਠਾ ਹੋਤਿ ਪਕ੍ਖਿਨਂ.

‘‘ਮਨੋਰਮੇ ਆਯਤਨੇ, ਸੇਵਨ੍ਤਿ ਨਂ ਵਿਹਙ੍ਗਮਾ;

ਛਾਯਂ ਛਾਯਤ੍ਥਿਕਾ [ਛਾਯਤ੍ਥਿਨੋ (ਸੀ.)] ਯਨ੍ਤਿ, ਫਲਤ੍ਥਾ ਫਲਭੋਜਿਨੋ.

‘‘ਤਥੇਵ ਸੀਲਸਮ੍ਪਨ੍ਨਂ, ਸਦ੍ਧਂ ਪੁਰਿਸਪੁਗ੍ਗਲਂ;

ਨਿਵਾਤਵੁਤ੍ਤਿਂ ਅਤ੍ਥਦ੍ਧਂ, ਸੋਰਤਂ ਸਖਿਲਂ ਮੁਦੁਂ.

‘‘ਵੀਤਰਾਗਾ ਵੀਤਦੋਸਾ, ਵੀਤਮੋਹਾ ਅਨਾਸਵਾ;

ਪੁਞ੍ਞਕ੍ਖੇਤ੍ਤਾਨਿ ਲੋਕਸ੍ਮਿਂ, ਸੇਵਨ੍ਤਿ ਤਾਦਿਸਂ ਨਰਂ.

‘‘ਤੇ ਤਸ੍ਸ ਧਮ੍ਮਂ ਦੇਸੇਨ੍ਤਿ, ਸਬ੍ਬਦੁਕ੍ਖਾਪਨੂਦਨਂ;

ਯਂ ਸੋ ਧਮ੍ਮਂ ਇਧਞ੍ਞਾਯ, ਪਰਿਨਿਬ੍ਬਾਤਿ ਅਨਾਸਵੋ’’ਤਿ. ਅਟ੍ਠਮਂ;

੯. ਪੁਤ੍ਤਸੁਤ੍ਤਂ

੩੯. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਠਾਨਾਨਿ ਸਮ੍ਪਸ੍ਸਨ੍ਤਾ ਮਾਤਾਪਿਤਰੋ ਪੁਤ੍ਤਂ ਇਚ੍ਛਨ੍ਤਿ ਕੁਲੇ ਜਾਯਮਾਨਂ. ਕਤਮਾਨਿ ਪਞ੍ਚ? ਭਤੋ ਵਾ ਨੋ ਭਰਿਸ੍ਸਤਿ; ਕਿਚ੍ਚਂ ਵਾ ਨੋ ਕਰਿਸ੍ਸਤਿ; ਕੁਲਵਂਸੋ ਚਿਰਂ ਠਸ੍ਸਤਿ; ਦਾਯਜ੍ਜਂ ਪਟਿਪਜ੍ਜਿਸ੍ਸਤਿ; ਅਥ ਵਾ ਪਨ ਪੇਤਾਨਂ ਕਾਲਙ੍ਕਤਾਨਂ ਦਕ੍ਖਿਣਂ ਅਨੁਪ੍ਪਦਸ੍ਸਤੀਤਿ. ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਠਾਨਾਨਿ ਸਮ੍ਪਸ੍ਸਨ੍ਤਾ ਮਾਤਾਪਿਤਰੋ ਪੁਤ੍ਤਂ ਇਚ੍ਛਨ੍ਤਿ ਕੁਲੇ ਜਾਯਮਾਨ’’ਨ੍ਤਿ.

[ਕਥਾ. ੪੯੧] ‘‘ਪਞ੍ਚ ਠਾਨਾਨਿ ਸਮ੍ਪਸ੍ਸਂ, ਪੁਤ੍ਤਂ ਇਚ੍ਛਨ੍ਤਿ ਪਣ੍ਡਿਤਾ;

ਭਤੋ ਵਾ ਨੋ ਭਰਿਸ੍ਸਤਿ, ਕਿਚ੍ਚਂ ਵਾ ਨੋ ਕਰਿਸ੍ਸਤਿ.

‘‘ਕੁਲਵਂਸੋ ਚਿਰਂ ਤਿਟ੍ਠੇ, ਦਾਯਜ੍ਜਂ ਪਟਿਪਜ੍ਜਤਿ;

ਅਥ ਵਾ ਪਨ ਪੇਤਾਨਂ, ਦਕ੍ਖਿਣਂ ਅਨੁਪ੍ਪਦਸ੍ਸਤਿ.

‘‘ਠਾਨਾਨੇਤਾਨਿ ਸਮ੍ਪਸ੍ਸਂ, ਪੁਤ੍ਤਂ ਇਚ੍ਛਨ੍ਤਿ ਪਣ੍ਡਿਤਾ;

ਤਸ੍ਮਾ ਸਨ੍ਤੋ ਸਪ੍ਪੁਰਿਸਾ, ਕਤਞ੍ਞੂ ਕਤਵੇਦਿਨੋ.

‘‘ਭਰਨ੍ਤਿ ਮਾਤਾਪਿਤਰੋ, ਪੁਬ੍ਬੇ ਕਤਮਨੁਸ੍ਸਰਂ;

ਕਰੋਨ੍ਤਿ ਨੇਸਂ ਕਿਚ੍ਚਾਨਿ, ਯਥਾ ਤਂ ਪੁਬ੍ਬਕਾਰਿਨਂ.

‘‘ਓਵਾਦਕਾਰੀ ਭਤਪੋਸੀ, ਕੁਲਵਂਸਂ ਅਹਾਪਯਂ;

ਸਦ੍ਧੋ ਸੀਲੇਨ ਸਮ੍ਪਨ੍ਨੋ, ਪੁਤ੍ਤੋ ਹੋਤਿ ਪਸਂਸਿਯੋ’’ਤਿ. ਨਵਮਂ;

੧੦. ਮਹਾਸਾਲਪੁਤ੍ਤਸੁਤ੍ਤਂ

੪੦. ‘‘ਹਿਮਵਨ੍ਤਂ, ਭਿਕ੍ਖਵੇ, ਪਬ੍ਬਤਰਾਜਂ ਨਿਸ੍ਸਾਯ ਮਹਾਸਾਲਾ ਪਞ੍ਚਹਿ ਵਡ੍ਢੀਹਿ ਵਡ੍ਢਨ੍ਤਿ. ਕਤਮਾਹਿ ਪਞ੍ਚਹਿ? ਸਾਖਾਪਤ੍ਤਪਲਾਸੇਨ ਵਡ੍ਢਨ੍ਤਿ; ਤਚੇਨ ਵਡ੍ਢਨ੍ਤਿ; ਪਪਟਿਕਾਯ ਵਡ੍ਢਨ੍ਤਿ; ਫੇਗ੍ਗੁਨਾ ਵਡ੍ਢਨ੍ਤਿ; ਸਾਰੇਨ ਵਡ੍ਢਨ੍ਤਿ. ਹਿਮਵਨ੍ਤਂ, ਭਿਕ੍ਖਵੇ, ਪਬ੍ਬਤਰਾਜਂ ਨਿਸ੍ਸਾਯ ਮਹਾਸਾਲਾ ਇਮਾਹਿ ਪਞ੍ਚਹਿ ਵਡ੍ਢੀਹਿ ਵਡ੍ਢਨ੍ਤਿ. ਏਵਮੇਵਂ ਖੋ, ਭਿਕ੍ਖਵੇ, ਸਦ੍ਧਂ ਕੁਲਪੁਤ੍ਤਂ ਨਿਸ੍ਸਾਯ ਅਨ੍ਤੋਜਨੋ ਪਞ੍ਚਹਿ ਵਡ੍ਢੀਹਿ ਵਡ੍ਢਤਿ. ਕਤਮਾਹਿ ਪਞ੍ਚਹਿ? ਸਦ੍ਧਾਯ ਵਡ੍ਢਤਿ; ਸੀਲੇਨ ਵਡ੍ਢਤਿ; ਸੁਤੇਨ ਵਡ੍ਢਤਿ; ਚਾਗੇਨ ਵਡ੍ਢਤਿ; ਪਞ੍ਞਾਯ ਵਡ੍ਢਤਿ. ਸਦ੍ਧਂ, ਭਿਕ੍ਖਵੇ, ਕੁਲਪੁਤ੍ਤਂ ਨਿਸ੍ਸਾਯ ਅਨ੍ਤੋਜਨੋ ਇਮਾਹਿ ਪਞ੍ਚਹਿ ਵਡ੍ਢੀਹਿ ਵਡ੍ਢਤੀ’’ਤਿ.

‘‘ਯਥਾ ਹਿ ਪਬ੍ਬਤੋ ਸੇਲੋ, ਅਰਞ੍ਞਸ੍ਮਿਂ ਬ੍ਰਹਾਵਨੇ;

ਤਂ ਰੁਕ੍ਖਾ ਉਪਨਿਸ੍ਸਾਯ, ਵਡ੍ਢਨ੍ਤੇ ਤੇ ਵਨਪ੍ਪਤੀ.

‘‘ਤਥੇਵ ਸੀਲਸਮ੍ਪਨ੍ਨਂ, ਸਦ੍ਧਂ ਕੁਲਪੁਤ੍ਤਂ ਇਮਂ [ਕੁਲਪਤਿਂ ਇਧ (ਸੀ.), ਕੁਲਪੁਤ੍ਤਂ ਇਧ (ਸ੍ਯਾ.)];

ਉਪਨਿਸ੍ਸਾਯ ਵਡ੍ਢਨ੍ਤਿ, ਪੁਤ੍ਤਦਾਰਾ ਚ ਬਨ੍ਧਵਾ;

ਅਮਚ੍ਚਾ ਞਾਤਿਸਙ੍ਘਾ ਚ, ਯੇ ਚਸ੍ਸ ਅਨੁਜੀਵਿਨੋ.

‘‘ਤ੍ਯਸ੍ਸ ਸੀਲਵਤੋ ਸੀਲਂ, ਚਾਗਂ ਸੁਚਰਿਤਾਨਿ ਚ;

ਪਸ੍ਸਮਾਨਾਨੁਕੁਬ੍ਬਨ੍ਤਿ, ਯੇ ਭਵਨ੍ਤਿ ਵਿਚਕ੍ਖਣਾ.

‘‘ਇਮਂ ਧਮ੍ਮਂ ਚਰਿਤ੍ਵਾਨ, ਮਗ੍ਗਂ [ਸਗ੍ਗਂ (ਸ੍ਯਾ. ਕ.)] ਸੁਗਤਿਗਾਮਿਨਂ;

ਨਨ੍ਦਿਨੋ ਦੇਵਲੋਕਸ੍ਮਿਂ, ਮੋਦਨ੍ਤਿ ਕਾਮਕਾਮਿਨੋ’’ਤਿ. ਦਸਮਂ;

ਸੁਮਨਵਗ੍ਗੋ ਚਤੁਤ੍ਥੋ.