੧੦. ਅਧਮ੍ਮਿਕਸੁਤ੍ਤਂ

੭੦. ‘‘ਯਸ੍ਮਿਂ, ਭਿਕ੍ਖਵੇ, ਸਮਯੇ ਰਾਜਾਨੋ ਅਧਮ੍ਮਿਕਾ ਹੋਨ੍ਤਿ, ਰਾਜਾਯੁਤ੍ਤਾਪਿ ਤਸ੍ਮਿਂ ਸਮਯੇ ਅਧਮ੍ਮਿਕਾ ਹੋਨ੍ਤਿ. ਰਾਜਾਯੁਤ੍ਤੇਸੁ ਅਧਮ੍ਮਿਕੇਸੁ ਬ੍ਰਾਹ੍ਮਣਗਹਪਤਿਕਾਪਿ ਤਸ੍ਮਿਂ ਸਮਯੇ ਅਧਮ੍ਮਿਕਾ ਹੋਨ੍ਤਿ. ਬ੍ਰਾਹ੍ਮਣਗਹਪਤਿਕੇਸੁ ਅਧਮ੍ਮਿਕੇਸੁ ਨੇਗਮਜਾਨਪਦਾਪਿ ਤਸ੍ਮਿਂ ਸਮਯੇ ਅਧਮ੍ਮਿਕਾ ਹੋਨ੍ਤਿ. ਨੇਗਮਜਾਨਪਦੇਸੁ ਅਧਮ੍ਮਿਕੇਸੁ ਵਿਸਮਂ ਚਨ੍ਦਿਮਸੂਰਿਯਾ ਪਰਿਵਤ੍ਤਨ੍ਤਿ. ਵਿਸਮਂ ਚਨ੍ਦਿਮਸੂਰਿਯੇਸੁ ਪਰਿਵਤ੍ਤਨ੍ਤੇਸੁ ਵਿਸਮਂ ਨਕ੍ਖਤ੍ਤਾਨਿ ਤਾਰਕਰੂਪਾਨਿ ਪਰਿਵਤ੍ਤਨ੍ਤਿ. ਵਿਸਮਂ ਨਕ੍ਖਤ੍ਤੇਸੁ ਤਾਰਕਰੂਪੇਸੁ ਪਰਿਵਤ੍ਤਨ੍ਤੇਸੁ ਵਿਸਮਂ ਰਤ੍ਤਿਨ੍ਦਿਵਾ [ਰਤ੍ਤਿਦਿਵਾ (ਕ.)] ਪਰਿਵਤ੍ਤਨ੍ਤਿ. ਵਿਸਮਂ ਰਤ੍ਤਿਨ੍ਦਿਵੇਸੁ ਪਰਿਵਤ੍ਤਨ੍ਤੇਸੁ ਵਿਸਮਂ ਮਾਸਦ੍ਧਮਾਸਾ ਪਰਿਵਤ੍ਤਨ੍ਤਿ. ਵਿਸਮਂ ਮਾਸਦ੍ਧਮਾਸੇਸੁ ਪਰਿਵਤ੍ਤਨ੍ਤੇਸੁ ਵਿਸਮਂ ਉਤੁਸਂਵਚ੍ਛਰਾ ਪਰਿਵਤ੍ਤਨ੍ਤਿ. ਵਿਸਮਂ ਉਤੁਸਂਵਚ੍ਛਰੇਸੁ ਪਰਿਵਤ੍ਤਨ੍ਤੇਸੁ ਵਿਸਮਂ ਵਾਤਾ ਵਾਯਨ੍ਤਿ ਵਿਸਮਾ ਅਪਞ੍ਜਸਾ. ਵਿਸਮਂ ਵਾਤੇਸੁ ਵਾਯਨ੍ਤੇਸੁ ਵਿਸਮੇਸੁ ਅਪਞ੍ਜਸੇਸੁ ਦੇਵਤਾ ਪਰਿਕੁਪਿਤਾ ਭਵਨ੍ਤਿ. ਦੇਵਤਾਸੁ ਪਰਿਕੁਪਿਤਾਸੁ ਦੇਵੋ ਨ ਸਮ੍ਮਾ ਧਾਰਂ ਅਨੁਪ੍ਪਵੇਚ੍ਛਤਿ. ਦੇਵੇ ਨ ਸਮ੍ਮਾ ਧਾਰਂ ਅਨੁਪ੍ਪਵੇਚ੍ਛਨ੍ਤੇ ਵਿਸਮਪਾਕਾਨਿ [ਵਿਸਮਪਾਕੀਨਿ (ਸੀ. ਸ੍ਯਾ. ਕਂ.), ਵਿਸਮਂ ਪਾਕਾਨਿ (ਕ.)] ਸਸ੍ਸਾਨਿ ਭਵਨ੍ਤਿ. ਵਿਸਮਪਾਕਾਨਿ, ਭਿਕ੍ਖਵੇ, ਸਸ੍ਸਾਨਿ ਮਨੁਸ੍ਸਾ ਪਰਿਭੁਞ੍ਜਨ੍ਤਾ ਅਪ੍ਪਾਯੁਕਾ ਹੋਨ੍ਤਿ ਦੁਬ੍ਬਣ੍ਣਾ ਚ ਬਵ੍ਹਾਬਾਧਾ [ਬਹ੍ਵਾਬਾਧਾ (ਕ.)] ਚ.

‘‘ਯਸ੍ਮਿਂ, ਭਿਕ੍ਖਵੇ, ਸਮਯੇ ਰਾਜਾਨੋ ਧਮ੍ਮਿਕਾ ਹੋਨ੍ਤਿ, ਰਾਜਾਯੁਤ੍ਤਾਪਿ ਤਸ੍ਮਿਂ ਸਮਯੇ ਧਮ੍ਮਿਕਾ ਹੋਨ੍ਤਿ. ਰਾਜਾਯੁਤ੍ਤੇਸੁ ਧਮ੍ਮਿਕੇਸੁ ਬ੍ਰਾਹ੍ਮਣਗਹਪਤਿਕਾਪਿ ਤਸ੍ਮਿਂ ਸਮਯੇ ਧਮ੍ਮਿਕਾ ਹੋਨ੍ਤਿ. ਬ੍ਰਾਹ੍ਮਣਗਹਪਤਿਕੇਸੁ ਧਮ੍ਮਿਕੇਸੁ ਨੇਗਮਜਾਨਪਦਾਪਿ ਤਸ੍ਮਿਂ ਸਮਯੇ ਧਮ੍ਮਿਕਾ ਹੋਨ੍ਤਿ. ਨੇਗਮਜਾਨਪਦੇਸੁ ਧਮ੍ਮਿਕੇਸੁ ਸਮਂ ਚਨ੍ਦਿਮਸੂਰਿਯਾ ਪਰਿਵਤ੍ਤਨ੍ਤਿ. ਸਮਂ ਚਨ੍ਦਿਮਸੂਰਿਯੇਸੁ ਪਰਿਵਤ੍ਤਨ੍ਤੇਸੁ ਸਮਂ ਨਕ੍ਖਤ੍ਤਾਨਿ ਤਾਰਕਰੂਪਾਨਿ ਪਰਿਵਤ੍ਤਨ੍ਤਿ. ਸਮਂ ਨਕ੍ਖਤ੍ਤੇਸੁ ਤਾਰਕਰੂਪੇਸੁ ਪਰਿਵਤ੍ਤਨ੍ਤੇਸੁ ਸਮਂ ਰਤ੍ਤਿਨ੍ਦਿਵਾ ਪਰਿਵਤ੍ਤਨ੍ਤਿ. ਸਮਂ ਰਤ੍ਤਿਨ੍ਦਿਵੇਸੁ ਪਰਿਵਤ੍ਤਨ੍ਤੇਸੁ ਸਮਂ ਮਾਸਦ੍ਧਮਾਸਾ ਪਰਿਵਤ੍ਤਨ੍ਤਿ. ਸਮਂ ਮਾਸਦ੍ਧਮਾਸੇਸੁ ਪਰਿਵਤ੍ਤਨ੍ਤੇਸੁ ਸਮਂ ਉਤੁਸਂਵਚ੍ਛਰਾ ਪਰਿਵਤ੍ਤਨ੍ਤਿ. ਸਮਂ ਉਤੁਸਂਵਚ੍ਛਰੇਸੁ ਪਰਿਵਤ੍ਤਨ੍ਤੇਸੁ ਸਮਂ ਵਾਤਾ ਵਾਯਨ੍ਤਿ ਸਮਾ ਪਞ੍ਜਸਾ. ਸਮਂ ਵਾਤੇਸੁ ਵਾਯਨ੍ਤੇਸੁ ਸਮੇਸੁ ਪਞ੍ਜਸੇਸੁ ਦੇਵਤਾ ਅਪਰਿਕੁਪਿਤਾ ਭਵਨ੍ਤਿ. ਦੇਵਤਾਸੁ ਅਪਰਿਕੁਪਿਤਾਸੁ ਦੇਵੋ ਸਮ੍ਮਾ ਧਾਰਂ ਅਨੁਪ੍ਪਵੇਚ੍ਛਤਿ. ਦੇਵੇ ਸਮ੍ਮਾ ਧਾਰਂ ਅਨੁਪ੍ਪਵੇਚ੍ਛਨ੍ਤੇ ਸਮਪਾਕਾਨਿ ਸਸ੍ਸਾਨਿ ਭਵਨ੍ਤਿ. ਸਮਪਾਕਾਨਿ, ਭਿਕ੍ਖਵੇ, ਸਸ੍ਸਾਨਿ ਮਨੁਸ੍ਸਾ ਪਰਿਭੁਞ੍ਜਨ੍ਤਾ ਦੀਘਾਯੁਕਾ ਚ ਹੋਨ੍ਤਿ ਵਣ੍ਣਵਨ੍ਤੋ ਚ ਬਲਵਨ੍ਤੋ ਚ ਅਪ੍ਪਾਬਾਧਾ ਚਾ’’ਤਿ.

‘‘ਗੁਨ੍ਨਂ ਚੇ ਤਰਮਾਨਾਨਂ, ਜਿਮ੍ਹਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਤਾ ਜਿਮ੍ਹਂ ਗਚ੍ਛਨ੍ਤਿ, ਨੇਤ੍ਤੇ ਜਿਮ੍ਹਂ ਗਤੇ ਸਤਿ.

‘‘ਏਵਮੇਵਂ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਚੇ ਅਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਦੁਕ੍ਖਂ ਸੇਤਿ, ਰਾਜਾ ਚੇ ਹੋਤਿ ਅਧਮ੍ਮਿਕੋ.

‘‘ਗੁਨ੍ਨਂ ਚੇ ਤਰਮਾਨਾਨਂ, ਉਜੁਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਤਾ ਉਜੁਂ ਗਚ੍ਛਨ੍ਤਿ, ਨੇਤ੍ਤੇ ਉਜੁਂ ਗਤੇ ਸਤਿ.

‘‘ਏਵਮੇਵਂ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਸਚੇ [ਸੋ ਚੇਵ (ਸੀ. ਪੀ.), ਸੋ ਚੇ (ਸ੍ਯਾ.)] ਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਸੁਖਂ ਸੇਤਿ, ਰਾਜਾ ਚੇ ਹੋਤਿ ਧਮ੍ਮਿਕੋ’’ਤਿ. ਦਸਮਂ;

ਪਤ੍ਤਕਮ੍ਮਵਗ੍ਗੋ ਦੁਤਿਯੋ.