(੮) ੩. ਅਪਣ੍ਣਕਵਗ੍ਗੋ

੧. ਪਧਾਨਸੁਤ੍ਤਂ

੭੧. ‘‘ਚਤੂਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਅਪਣ੍ਣਕਪ੍ਪਟਿਪਦਂ ਪਟਿਪਨ੍ਨੋ ਹੋਤਿ, ਯੋਨਿ ਚਸ੍ਸ ਆਰਦ੍ਧਾ ਹੋਤਿ ਆਸਵਾਨਂ ਖਯਾਯ. ਕਤਮੇਹਿ ਚਤੂਹਿ? ਇਧ, ਭਿਕ੍ਖਵੇ, ਭਿਕ੍ਖੁ ਸੀਲਵਾ ਹੋਤਿ, ਬਹੁਸ੍ਸੁਤੋ ਹੋਤਿ, ਆਰਦ੍ਧਵੀਰਿਯੋ ਹੋਤਿ, ਪਞ੍ਞਵਾ ਹੋਤਿ. ਇਮੇਹਿ ਖੋ, ਭਿਕ੍ਖਵੇ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਅਪਣ੍ਣਕਪ੍ਪਟਿਪਦਂ ਪਟਿਪਨ੍ਨੋ ਹੋਤਿ, ਯੋਨਿ ਚਸ੍ਸ ਆਰਦ੍ਧਾ ਹੋਤਿ ਆਸਵਾਨਂ ਖਯਾਯਾ’’ਤਿ. ਪਠਮਂ.

੨. ਸਮ੍ਮਾਦਿਟ੍ਠਿਸੁਤ੍ਤਂ

੭੨. ‘‘ਚਤੂਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਅਪਣ੍ਣਕਪ੍ਪਟਿਪਦਂ ਪਟਿਪਨ੍ਨੋ ਹੋਤਿ, ਯੋਨਿ ਚਸ੍ਸ ਆਰਦ੍ਧਾ ਹੋਤਿ ਆਸਵਾਨਂ ਖਯਾਯ. ਕਤਮੇਹਿ ਚਤੂਹਿ? ਨੇਕ੍ਖਮ੍ਮਵਿਤਕ੍ਕੇਨ, ਅਬ੍ਯਾਪਾਦਵਿਤਕ੍ਕੇਨ, ਅਵਿਹਿਂਸਾਵਿਤਕ੍ਕੇਨ, ਸਮ੍ਮਾਦਿਟ੍ਠਿਯਾ – ਇਮੇਹਿ ਖੋ, ਭਿਕ੍ਖਵੇ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਅਪਣ੍ਣਕਪ੍ਪਟਿਪਦਂ ਪਟਿਪਨ੍ਨੋ ਹੋਤਿ, ਯੋਨਿ ਚਸ੍ਸ ਆਰਦ੍ਧਾ ਹੋਤਿ ਆਸਵਾਨਂ ਖਯਾਯਾ’’ਤਿ. ਦੁਤਿਯਂ.

੩. ਸਪ੍ਪੁਰਿਸਸੁਤ੍ਤਂ

੭੩. ‘‘ਚਤੂਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਅਸਪ੍ਪੁਰਿਸੋ ਵੇਦਿਤਬ੍ਬੋ. ਕਤਮੇਹਿ ਚਤੂਹਿ? ਇਧ, ਭਿਕ੍ਖਵੇ, ਅਸਪ੍ਪੁਰਿਸੋ ਯੋ ਹੋਤਿ ਪਰਸ੍ਸ ਅਵਣ੍ਣੋ ਤਂ ਅਪੁਟ੍ਠੋਪਿ ਪਾਤੁ ਕਰੋਤਿ, ਕੋ ਪਨ ਵਾਦੋ ਪੁਟ੍ਠਸ੍ਸ! ਪੁਟ੍ਠੋ ਖੋ ਪਨ ਪਞ੍ਹਾਭਿਨੀਤੋ ਅਹਾਪੇਤ੍ਵਾ ਅਲਮ੍ਬਿਤ੍ਵਾ ਪਰਿਪੂਰਂ ਵਿਤ੍ਥਾਰੇਨ ਪਰਸ੍ਸ ਅਵਣ੍ਣਂ ਭਾਸਿਤਾ ਹੋਤਿ. ਵੇਦਿਤਬ੍ਬਮੇਤਂ, ਭਿਕ੍ਖਵੇ, ਅਸਪ੍ਪੁਰਿਸੋ ਅਯਂ ਭਵਨ੍ਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਸਪ੍ਪੁਰਿਸੋ ਯੋ ਹੋਤਿ ਪਰਸ੍ਸ ਵਣ੍ਣੋ ਤਂ ਪੁਟ੍ਠੋਪਿ ਨ ਪਾਤੁ ਕਰੋਤਿ, ਕੋ ਪਨ ਵਾਦੋ ਅਪੁਟ੍ਠਸ੍ਸ! ਪੁਟ੍ਠੋ ਖੋ ਪਨ ਪਞ੍ਹਾਭਿਨੀਤੋ ਹਾਪੇਤ੍ਵਾ ਲਮ੍ਬਿਤ੍ਵਾ ਅਪਰਿਪੂਰਂ ਅਵਿਤ੍ਥਾਰੇਨ ਪਰਸ੍ਸ ਵਣ੍ਣਂ ਭਾਸਿਤਾ ਹੋਤਿ. ਵੇਦਿਤਬ੍ਬਮੇਤਂ, ਭਿਕ੍ਖਵੇ, ਅਸਪ੍ਪੁਰਿਸੋ ਅਯਂ ਭਵਨ੍ਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਸਪ੍ਪੁਰਿਸੋ ਯੋ ਹੋਤਿ ਅਤ੍ਤਨੋ ਅਵਣ੍ਣੋ ਤਂ ਪੁਟ੍ਠੋਪਿ ਨ ਪਾਤੁ ਕਰੋਤਿ, ਕੋ ਪਨ ਵਾਦੋ ਅਪੁਟ੍ਠਸ੍ਸ! ਪੁਟ੍ਠੋ ਖੋ ਪਨ ਪਞ੍ਹਾਭਿਨੀਤੋ ਹਾਪੇਤ੍ਵਾ ਲਮ੍ਬਿਤ੍ਵਾ ਅਪਰਿਪੂਰਂ ਅਵਿਤ੍ਥਾਰੇਨ ਅਤ੍ਤਨੋ ਅਵਣ੍ਣਂ ਭਾਸਿਤਾ ਹੋਤਿ. ਵੇਦਿਤਬ੍ਬਮੇਤਂ, ਭਿਕ੍ਖਵੇ, ਅਸਪ੍ਪੁਰਿਸੋ ਅਯਂ ਭਵਨ੍ਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਸਪ੍ਪੁਰਿਸੋ ਯੋ ਹੋਤਿ ਅਤ੍ਤਨੋ ਵਣ੍ਣੋ ਤਂ ਅਪੁਟ੍ਠੋਪਿ ਪਾਤੁ ਕਰੋਤਿ, ਕੋ ਪਨ ਵਾਦੋ ਪੁਟ੍ਠਸ੍ਸ! ਪੁਟ੍ਠੋ ਖੋ ਪਨ ਪਞ੍ਹਾਭਿਨੀਤੋ ਅਹਾਪੇਤ੍ਵਾ ਅਲਮ੍ਬਿਤ੍ਵਾ ਪਰਿਪੂਰਂ ਵਿਤ੍ਥਾਰੇਨ ਅਤ੍ਤਨੋ ਵਣ੍ਣਂ ਭਾਸਿਤਾ ਹੋਤਿ. ਵੇਦਿਤਬ੍ਬਮੇਤਂ, ਭਿਕ੍ਖਵੇ, ਅਸਪ੍ਪੁਰਿਸੋ ਅਯਂ ਭਵਨ੍ਤਿ. ਇਮੇਹਿ ਖੋ, ਭਿਕ੍ਖਵੇ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਅਸਪ੍ਪੁਰਿਸੋ ਵੇਦਿਤਬ੍ਬੋ.

‘‘ਚਤੂਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਸਪ੍ਪੁਰਿਸੋ ਵੇਦਿਤਬ੍ਬੋ. ਕਤਮੇਹਿ ਚਤੂਹਿ? ਇਧ, ਭਿਕ੍ਖਵੇ, ਸਪ੍ਪੁਰਿਸੋ ਯੋ ਹੋਤਿ ਪਰਸ੍ਸ ਅਵਣ੍ਣੋ ਤਂ ਪੁਟ੍ਠੋਪਿ ਨ ਪਾਤੁ ਕਰੋਤਿ, ਕੋ ਪਨ ਵਾਦੋ ਅਪੁਟ੍ਠਸ੍ਸ! ਪੁਟ੍ਠੋ ਖੋ ਪਨ ਪਞ੍ਹਾਭਿਨੀਤੋ ਹਾਪੇਤ੍ਵਾ ਲਮ੍ਬਿਤ੍ਵਾ ਅਪਰਿਪੂਰਂ ਅਵਿਤ੍ਥਾਰੇਨ ਪਰਸ੍ਸ ਅਵਣ੍ਣਂ ਭਾਸਿਤਾ ਹੋਤਿ. ਵੇਦਿਤਬ੍ਬਮੇਤਂ, ਭਿਕ੍ਖਵੇ, ਸਪ੍ਪੁਰਿਸੋ ਅਯਂ ਭਵਨ੍ਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਸਪ੍ਪੁਰਿਸੋ ਯੋ ਹੋਤਿ ਪਰਸ੍ਸ ਵਣ੍ਣੋ ਤਂ ਅਪੁਟ੍ਠੋਪਿ ਪਾਤੁ ਕਰੋਤਿ, ਕੋ ਪਨ ਵਾਦੋ ਪੁਟ੍ਠਸ੍ਸ! ਪੁਟ੍ਠੋ ਖੋ ਪਨ ਪਞ੍ਹਾਭਿਨੀਤੋ ਅਹਾਪੇਤ੍ਵਾ ਅਲਮ੍ਬਿਤ੍ਵਾ ਪਰਿਪੂਰਂ ਵਿਤ੍ਥਾਰੇਨ ਪਰਸ੍ਸ ਵਣ੍ਣਂ ਭਾਸਿਤਾ ਹੋਤਿ. ਵੇਦਿਤਬ੍ਬਮੇਤਂ, ਭਿਕ੍ਖਵੇ, ਸਪ੍ਪੁਰਿਸੋ ਅਯਂ ਭਵਨ੍ਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਸਪ੍ਪੁਰਿਸੋ ਯੋ ਹੋਤਿ ਅਤ੍ਤਨੋ ਅਵਣ੍ਣੋ ਤਂ ਅਪੁਟ੍ਠੋਪਿ ਪਾਤੁ ਕਰੋਤਿ, ਕੋ ਪਨ ਵਾਦੋ ਪੁਟ੍ਠਸ੍ਸ! ਪੁਟ੍ਠੋ ਖੋ ਪਨ ਪਞ੍ਹਾਭਿਨੀਤੋ ਅਹਾਪੇਤ੍ਵਾ ਅਲਮ੍ਬਿਤ੍ਵਾ ਪਰਿਪੂਰਂ ਵਿਤ੍ਥਾਰੇਨ ਅਤ੍ਤਨੋ ਅਵਣ੍ਣਂ ਭਾਸਿਤਾ ਹੋਤਿ. ਵੇਦਿਤਬ੍ਬਮੇਤਂ, ਭਿਕ੍ਖਵੇ, ਸਪ੍ਪੁਰਿਸੋ ਅਯਂ ਭਵਨ੍ਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਸਪ੍ਪੁਰਿਸੋ ਯੋ ਹੋਤਿ ਅਤ੍ਤਨੋ ਵਣ੍ਣੋ ਤਂ ਪੁਟ੍ਠੋਪਿ ਨ ਪਾਤੁ ਕਰੋਤਿ, ਕੋ ਪਨ ਵਾਦੋ ਅਪੁਟ੍ਠਸ੍ਸ! ਪੁਟ੍ਠੋ ਖੋ ਪਨ ਪਞ੍ਹਾਭਿਨੀਤੋ ਹਾਪੇਤ੍ਵਾ ਲਮ੍ਬਿਤ੍ਵਾ ਅਪਰਿਪੂਰਂ ਅਵਿਤ੍ਥਾਰੇਨ ਅਤ੍ਤਨੋ ਵਣ੍ਣਂ ਭਾਸਿਤਾ ਹੋਤਿ. ਵੇਦਿਤਬ੍ਬਮੇਤਂ, ਭਿਕ੍ਖਵੇ, ਸਪ੍ਪੁਰਿਸੋ ਅਯਂ ਭਵਨ੍ਤਿ. ਇਮੇਹਿ ਖੋ, ਭਿਕ੍ਖਵੇ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਸਪ੍ਪੁਰਿਸੋ ਵੇਦਿਤਬ੍ਬੋ.

‘‘ਸੇਯ੍ਯਥਾਪਿ, ਭਿਕ੍ਖਵੇ, ਵਧੁਕਾ ਯਞ੍ਞਦੇਵ ਰਤ੍ਤਿਂ ਵਾ ਦਿਵਂ ਵਾ ਆਨੀਤਾ ਹੋਤਿ, ਤਾਵਦੇਵਸ੍ਸਾ ਤਿਬ੍ਬਂ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਿਤਂ ਹੋਤਿ ਸਸ੍ਸੁਯਾਪਿ ਸਸੁਰੇਪਿ ਸਾਮਿਕੇਪਿ ਅਨ੍ਤਮਸੋ ਦਾਸਕਮ੍ਮਕਰਪੋਰਿਸੇਸੁ. ਸਾ ਅਪਰੇਨ ਸਮਯੇਨ ਸਂਵਾਸਮਨ੍ਵਾਯ ਵਿਸ੍ਸਾਸਮਨ੍ਵਾਯ ਸਸ੍ਸੁਮ੍ਪਿ ਸਸੁਰਮ੍ਪਿ ਸਾਮਿਕਮ੍ਪਿ ਏਵਮਾਹ – ‘ਅਪੇਥ, ਕਿਂ ਪਨ ਤੁਮ੍ਹੇ ਜਾਨਾਥਾ’ਤਿ! ਏਵਮੇਵਂ ਖੋ, ਭਿਕ੍ਖਵੇ, ਇਧੇਕਚ੍ਚੋ ਭਿਕ੍ਖੁ ਯਞ੍ਞਦੇਵ ਰਤ੍ਤਿਂ ਵਾ ਦਿਵਂ ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਤਾਵਦੇਵਸ੍ਸ ਤਿਬ੍ਬਂ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਿਤਂ ਹੋਤਿ ਭਿਕ੍ਖੂਸੁ ਭਿਕ੍ਖੁਨੀਸੁ ਉਪਾਸਕੇਸੁ ਉਪਾਸਿਕਾਸੁ ਅਨ੍ਤਮਸੋ ਆਰਾਮਿਕਸਮਣੁਦ੍ਦੇਸੇਸੁ. ਸੋ ਅਪਰੇਨ ਸਮਯੇਨ ਸਂਵਾਸਮਨ੍ਵਾਯ ਵਿਸ੍ਸਾਸਮਨ੍ਵਾਯ ਆਚਰਿਯਮ੍ਪਿ ਉਪਜ੍ਝਾਯਮ੍ਪਿ ਏਵਮਾਹ – ‘ਅਪੇਥ, ਕਿਂ ਪਨ ਤੁਮ੍ਹੇ ਜਾਨਾਥਾ’ਤਿ! ਤਸ੍ਮਾਤਿਹ, ਭਿਕ੍ਖਵੇ, ਏਵਂ ਸਿਕ੍ਖਿਤਬ੍ਬਂ – ‘ਅਧੁਨਾਗਤਵਧੁਕਾਸਮੇਨ ਚੇਤਸਾ ਵਿਹਰਿਸ੍ਸਾਮਾ’ਤਿ. ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬ’’ਨ੍ਤਿ. ਤਤਿਯਂ.

੪. ਪਠਮਅਗ੍ਗਸੁਤ੍ਤਂ

੭੪. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਅਗ੍ਗਾਨਿ. ਕਤਮਾਨਿ ਚਤ੍ਤਾਰਿ? ਸੀਲਗ੍ਗਂ, ਸਮਾਧਿਗ੍ਗਂ [ਸਮਾਧਗ੍ਗਂ (ਸੀ. ਸ੍ਯਾ. ਕਂ)], ਪਞ੍ਞਾਗ੍ਗਂ, ਵਿਮੁਤ੍ਤਗ੍ਗਂ – ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਅਗ੍ਗਾਨੀ’’ਤਿ. ਚਤੁਤ੍ਥਂ.

੫. ਦੁਤਿਯਅਗ੍ਗਸੁਤ੍ਤਂ

੭੫. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਅਗ੍ਗਾਨਿ. ਕਤਮਾਨਿ ਚਤ੍ਤਾਰਿ? ਰੂਪਗ੍ਗਂ, ਵੇਦਨਾਗ੍ਗਂ, ਸਞ੍ਞਾਗ੍ਗਂ, ਭਵਗ੍ਗਂ – ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਅਗ੍ਗਾਨੀ’’ਤਿ. ਪਞ੍ਚਮਂ.

੬. ਕੁਸਿਨਾਰਸੁਤ੍ਤਂ

੭੬. ਏਕਂ ਸਮਯਂ ਭਗਵਾ ਕੁਸਿਨਾਰਾਯਂ ਵਿਹਰਤਿ ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇ ਅਨ੍ਤਰੇਨ ਯਮਕਸਾਲਾਨਂ ਪਰਿਨਿਬ੍ਬਾਨਸਮਯੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

‘‘ਸਿਯਾ ਖੋ ਪਨ, ਭਿਕ੍ਖਵੇ [ਦੀ. ਨਿ. ੨.੨੧੭], ਏਕਭਿਕ੍ਖੁਸ੍ਸਪਿ ਕਙ੍ਖਾ ਵਾ ਵਿਮਤਿ ਵਾ ਬੁਦ੍ਧੇ ਵਾ ਧਮ੍ਮੇ ਵਾ ਸਙ੍ਘੇ ਵਾ ਮਗ੍ਗੇ ਵਾ ਪਟਿਪਦਾਯ ਵਾ, ਪੁਚ੍ਛਥ, ਭਿਕ੍ਖਵੇ, ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ – ‘ਸਮ੍ਮੁਖੀਭੂਤੋ ਨੋ ਸਤ੍ਥਾ ਅਹੋਸਿ, ਨਾਸਕ੍ਖਿਮ੍ਹ ਭਗਵਨ੍ਤਂ ਸਮ੍ਮੁਖਾ ਪਟਿਪੁਚ੍ਛਿਤੁ’’’ਨ੍ਤਿ. ਏਵਂ ਵੁਤ੍ਤੇ ਤੇ ਭਿਕ੍ਖੂ ਤੁਣ੍ਹੀ ਅਹੇਸੁਂ. ਦੁਤਿਯਮ੍ਪਿ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਿਯਾ ਖੋ ਪਨ, ਭਿਕ੍ਖਵੇ, ਏਕਭਿਕ੍ਖੁਸ੍ਸਪਿ ਕਙ੍ਖਾ ਵਾ ਵਿਮਤਿ ਵਾ ਬੁਦ੍ਧੇ ਵਾ ਧਮ੍ਮੇ ਵਾ ਸਙ੍ਘੇ ਵਾ ਮਗ੍ਗੇ ਵਾ ਪਟਿਪਦਾਯ ਵਾ, ਪੁਚ੍ਛਥ, ਭਿਕ੍ਖਵੇ, ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ – ‘ਸਮ੍ਮੁਖੀਭੂਤੋ ਨੋ ਸਤ੍ਥਾ ਅਹੋਸਿ, ਨਾਸਕ੍ਖਿਮ੍ਹ ਭਗਵਨ੍ਤਂ ਸਮ੍ਮੁਖਾ ਪਟਿਪੁਚ੍ਛਿਤੁ’’’ਨ੍ਤਿ. ਦੁਤਿਯਮ੍ਪਿ ਖੋ ਤੇ ਭਿਕ੍ਖੂ ਤੁਣ੍ਹੀ ਅਹੇਸੁਂ. ਤਤਿਯਮ੍ਪਿ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਿਯਾ ਖੋ ਪਨ, ਭਿਕ੍ਖਵੇ, ਏਕਭਿਕ੍ਖੁਸ੍ਸਪਿ ਕਙ੍ਖਾ ਵਾ ਵਿਮਤਿ ਵਾ ਬੁਦ੍ਧੇ ਵਾ ਧਮ੍ਮੇ ਵਾ ਸਙ੍ਘੇ ਵਾ ਮਗ੍ਗੇ ਵਾ ਪਟਿਪਦਾਯ ਵਾ, ਪੁਚ੍ਛਥ, ਭਿਕ੍ਖਵੇ, ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ – ‘ਸਮ੍ਮੁਖੀਭੂਤੋ ਨੋ ਸਤ੍ਥਾ ਅਹੋਸਿ, ਨਾਸਕ੍ਖਿਮ੍ਹ ਭਗਵਨ੍ਤਂ ਸਮ੍ਮੁਖਾ ਪਟਿਪੁਚ੍ਛਿਤੁ’’’ਨ੍ਤਿ. ਤਤਿਯਮ੍ਪਿ ਖੋ ਤੇ ਭਿਕ੍ਖੂ ਤੁਣ੍ਹੀ ਅਹੇਸੁਂ.

ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਿਯਾ ਖੋ ਪਨ, ਭਿਕ੍ਖਵੇ, ਸਤ੍ਥੁਗਾਰਵੇਨਪਿ ਨ ਪੁਚ੍ਛੇਯ੍ਯਾਥ, ਸਹਾਯਕੋਪਿ, ਭਿਕ੍ਖਵੇ, ਸਹਾਯਕਸ੍ਸ ਆਰੋਚੇਤੂ’’ਤਿ. ਏਵਂ ਵੁਤ੍ਤੇ ਤੇ ਭਿਕ੍ਖੂ ਤੁਣ੍ਹੀ ਅਹੇਸੁਂ. ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਅਚ੍ਛਰਿਯਂ, ਭਨ੍ਤੇ, ਅਬ੍ਭੁਤਂ, ਭਨ੍ਤੇ! ਏਵਂ ਪਸਨ੍ਨੋ ਅਹਂ, ਭਨ੍ਤੇ! ਨਤ੍ਥਿ ਇਮਸ੍ਮਿਂ ਭਿਕ੍ਖੁਸਙ੍ਘੇ ਏਕਭਿਕ੍ਖੁਸ੍ਸਪਿ ਕਙ੍ਖਾ ਵਾ ਵਿਮਤਿ ਵਾ ਬੁਦ੍ਧੇ ਵਾ ਧਮ੍ਮੇ ਵਾ ਸਙ੍ਘੇ ਵਾ ਮਗ੍ਗੇ ਵਾ ਪਟਿਪਦਾਯ ਵਾ’’ਤਿ.

‘‘ਪਸਾਦਾ ਖੋ ਤ੍ਵਂ, ਆਨਨ੍ਦ, ਵਦੇਸਿ. ਞਾਣਮੇਵ ਹੇਤ੍ਥ, ਆਨਨ੍ਦ, ਤਥਾਗਤਸ੍ਸ – ‘ਨਤ੍ਥਿ ਇਮਸ੍ਮਿਂ ਭਿਕ੍ਖੁਸਙ੍ਘੇ ਏਕਭਿਕ੍ਖੁਸ੍ਸਪਿ ਕਙ੍ਖਾ ਵਾ ਵਿਮਤਿ ਵਾ ਬੁਦ੍ਧੇ ਵਾ ਧਮ੍ਮੇ ਵਾ ਸਙ੍ਘੇ ਵਾ ਮਗ੍ਗੇ ਵਾ ਪਟਿਪਦਾਯ ਵਾ’. ਇਮੇਸਞ੍ਹਿ, ਆਨਨ੍ਦ, ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਯੋ ਪਚ੍ਛਿਮਕੋ ਭਿਕ੍ਖੁ ਸੋ ਸੋਤਾਪਨ੍ਨੋ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ’’ਤਿ. ਛਟ੍ਠਂ.

੭. ਅਚਿਨ੍ਤੇਯ੍ਯਸੁਤ੍ਤਂ

੭੭. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਅਚਿਨ੍ਤੇਯ੍ਯਾਨਿ, ਨ ਚਿਨ੍ਤੇਤਬ੍ਬਾਨਿ; ਯਾਨਿ ਚਿਨ੍ਤੇਨ੍ਤੋ ਉਮ੍ਮਾਦਸ੍ਸ ਵਿਘਾਤਸ੍ਸ ਭਾਗੀ ਅਸ੍ਸ. ਕਤਮਾਨਿ ਚਤ੍ਤਾਰਿ? ਬੁਦ੍ਧਾਨਂ, ਭਿਕ੍ਖਵੇ, ਬੁਦ੍ਧਵਿਸਯੋ ਅਚਿਨ੍ਤੇਯ੍ਯੋ, ਨ ਚਿਨ੍ਤੇਤਬ੍ਬੋ; ਯਂ ਚਿਨ੍ਤੇਨ੍ਤੋ ਉਮ੍ਮਾਦਸ੍ਸ ਵਿਘਾਤਸ੍ਸ ਭਾਗੀ ਅਸ੍ਸ. ਝਾਯਿਸ੍ਸ, ਭਿਕ੍ਖਵੇ, ਝਾਨਵਿਸਯੋ ਅਚਿਨ੍ਤੇਯ੍ਯੋ, ਨ ਚਿਨ੍ਤੇਤਬ੍ਬੋ; ਯਂ ਚਿਨ੍ਤੇਨ੍ਤੋ ਉਮ੍ਮਾਦਸ੍ਸ ਵਿਘਾਤਸ੍ਸ ਭਾਗੀ ਅਸ੍ਸ. ਕਮ੍ਮਵਿਪਾਕੋ, ਭਿਕ੍ਖਵੇ, ਅਚਿਨ੍ਤੇਯ੍ਯੋ, ਨ ਚਿਨ੍ਤੇਤਬ੍ਬੋ; ਯਂ ਚਿਨ੍ਤੇਨ੍ਤੋ ਉਮ੍ਮਾਦਸ੍ਸ ਵਿਘਾਤਸ੍ਸ ਭਾਗੀ ਅਸ੍ਸ. ਲੋਕਚਿਨ੍ਤਾ, ਭਿਕ੍ਖਵੇ, ਅਚਿਨ੍ਤੇਯ੍ਯਾ, ਨ ਚਿਨ੍ਤੇਤਬ੍ਬਾ; ਯਂ ਚਿਨ੍ਤੇਨ੍ਤੋ ਉਮ੍ਮਾਦਸ੍ਸ ਵਿਘਾਤਸ੍ਸ ਭਾਗੀ ਅਸ੍ਸ. ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਅਚਿਨ੍ਤੇਯ੍ਯਾਨਿ, ਨ ਚਿਨ੍ਤੇਤਬ੍ਬਾਨਿ; ਯਾਨਿ ਚਿਨ੍ਤੇਨ੍ਤੋ ਉਮ੍ਮਾਦਸ੍ਸ ਵਿਘਾਤਸ੍ਸ ਭਾਗੀ ਅਸ੍ਸਾ’’ਤਿ. ਸਤ੍ਤਮਂ.

੮. ਦਕ੍ਖਿਣਸੁਤ੍ਤਂ

੭੮. ‘‘ਚਤਸ੍ਸੋ ਇਮਾ, ਭਿਕ੍ਖਵੇ, ਦਕ੍ਖਿਣਾ ਵਿਸੁਦ੍ਧਿਯੋ. ਕਤਮਾ ਚਤਸ੍ਸੋ? ਅਤ੍ਥਿ, ਭਿਕ੍ਖਵੇ, ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ; ਅਤ੍ਥਿ, ਭਿਕ੍ਖਵੇ, ਦਕ੍ਖਿਣਾ ਪਟਿਗ੍ਗਾਹਕਤੋ ਵਿਸੁਜ੍ਝਤਿ, ਨੋ ਦਾਯਕਤੋ; ਅਤ੍ਥਿ, ਭਿਕ੍ਖਵੇ, ਦਕ੍ਖਿਣਾ ਨੇਵ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ; ਅਤ੍ਥਿ, ਭਿਕ੍ਖਵੇ, ਦਕ੍ਖਿਣਾ ਦਾਯਕਤੋ ਚੇਵ ਵਿਸੁਜ੍ਝਤਿ ਪਟਿਗ੍ਗਾਹਕਤੋ ਚ.

‘‘ਕਥਞ੍ਚ, ਭਿਕ੍ਖਵੇ, ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ? ਇਧ, ਭਿਕ੍ਖਵੇ, ਦਾਯਕੋ ਹੋਤਿ ਸੀਲਵਾ ਕਲ੍ਯਾਣਧਮ੍ਮੋ; ਪਟਿਗ੍ਗਾਹਕਾ ਹੋਨ੍ਤਿ ਦੁਸ੍ਸੀਲਾ ਪਾਪਧਮ੍ਮਾ [ਪਟਿਗ੍ਗਾਹਕੋ ਹੋਤਿ ਦੁਸ੍ਸੀਲੋ ਪਾਪਧਮ੍ਮੋ (ਸ੍ਯਾ. ਕਂ. ਕ.) ਮ. ਨਿ. ੩.੩੮੧ ਓਲੋਕੇਤਬ੍ਬਂ]. ਏਵਂ ਖੋ, ਭਿਕ੍ਖਵੇ, ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ.

‘‘ਕਥਞ੍ਚ, ਭਿਕ੍ਖਵੇ, ਦਕ੍ਖਿਣਾ ਪਟਿਗ੍ਗਾਹਕਤੋ ਵਿਸੁਜ੍ਝਤਿ, ਨੋ ਦਾਯਕਤੋ? ਇਧ, ਭਿਕ੍ਖਵੇ, ਦਾਯਕੋ ਹੋਤਿ ਦੁਸ੍ਸੀਲੋ ਪਾਪਧਮ੍ਮੋ; ਪਟਿਗ੍ਗਾਹਕਾ ਹੋਨ੍ਤਿ ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਏਵਂ ਖੋ, ਭਿਕ੍ਖਵੇ, ਦਕ੍ਖਿਣਾ ਪਟਿਗ੍ਗਾਹਕਤੋ ਵਿਸੁਜ੍ਝਤਿ, ਨੋ ਦਾਯਕਤੋ.

‘‘ਕਥਞ੍ਚ, ਭਿਕ੍ਖਵੇ, ਦਕ੍ਖਿਣਾ ਨੇਵ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ? ਇਧ, ਭਿਕ੍ਖਵੇ, ਦਾਯਕੋ ਹੋਤਿ ਦੁਸ੍ਸੀਲੋ ਪਾਪਧਮ੍ਮੋ; ਪਟਿਗ੍ਗਾਹਕਾਪਿ ਹੋਨ੍ਤਿ ਦੁਸ੍ਸੀਲਾ ਪਾਪਧਮ੍ਮਾ. ਏਵਂ ਖੋ, ਭਿਕ੍ਖਵੇ, ਦਕ੍ਖਿਣਾ ਨੇਵ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ.

‘‘ਕਥਞ੍ਚ, ਭਿਕ੍ਖਵੇ, ਦਕ੍ਖਿਣਾ ਦਾਯਕਤੋ ਚੇਵ ਵਿਸੁਜ੍ਝਤਿ ਪਟਿਗ੍ਗਾਹਕਤੋ ਚ? ਇਧ, ਭਿਕ੍ਖਵੇ, ਦਾਯਕੋ ਹੋਤਿ ਸੀਲਵਾ ਕਲ੍ਯਾਣਧਮ੍ਮੋ; ਪਟਿਗ੍ਗਾਹਕਾਪਿ ਹੋਨ੍ਤਿ ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਏਵਂ ਖੋ, ਭਿਕ੍ਖਵੇ, ਦਕ੍ਖਿਣਾ ਦਾਯਕਤੋ ਚੇਵ ਵਿਸੁਜ੍ਝਤਿ ਪਟਿਗ੍ਗਾਹਕਤੋ ਚ. ਇਮਾ ਖੋ, ਭਿਕ੍ਖਵੇ, ਚਤਸ੍ਸੋ ਦਕ੍ਖਿਣਾ ਵਿਸੁਦ੍ਧਿਯੋ’’ਤਿ. ਅਟ੍ਠਮਂ.

੯. ਵਣਿਜ੍ਜਸੁਤ੍ਤਂ

੭੯. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸਾਰਿਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚਸ੍ਸ ਤਾਦਿਸਾਵ ਵਣਿਜ੍ਜਾ ਪਯੁਤ੍ਤਾ ਛੇਦਗਾਮਿਨੀ ਹੋਤਿ? ਕੋ ਪਨ, ਭਨ੍ਤੇ, ਹੇਤੁ ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚਸ੍ਸ ਤਾਦਿਸਾਵ ਵਣਿਜ੍ਜਾ ਪਯੁਤ੍ਤਾ ਨ ਯਥਾਧਿਪ੍ਪਾਯਾ [ਯਥਾਧਿਪ੍ਪਾਯਂ (ਸੀ.)] ਹੋਤਿ? ਕੋ ਨੁ ਖੋ, ਭਨ੍ਤੇ ਹੇਤੁ ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚਸ੍ਸ ਤਾਦਿਸਾਵ ਵਣਿਜ੍ਜਾ ਪਯੁਤ੍ਤਾ ਯਥਾਧਿਪ੍ਪਾਯਾ [ਯਥਾਧਿਪ੍ਪਾਯਂ (ਸੀ.)] ਹੋਤਿ? ਕੋ ਪਨ, ਭਨ੍ਤੇ, ਹੇਤੁ ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚਸ੍ਸ ਤਾਦਿਸਾਵ ਵਣਿਜ੍ਜਾ ਪਯੁਤ੍ਤਾ ਪਰਾਧਿਪ੍ਪਾਯਾ ਹੋਤੀ’’ਤਿ?

‘‘ਇਧ, ਸਾਰਿਪੁਤ੍ਤ, ਏਕਚ੍ਚੋ ਸਮਣਂ ਵਾ ਬ੍ਰਾਹ੍ਮਣਂ ਵਾ ਉਪਸਙ੍ਕਮਿਤ੍ਵਾ ਪਵਾਰੇਤਿ – ‘ਵਦਤੁ, ਭਨ੍ਤੇ, ਪਚ੍ਚਯੇਨਾ’ਤਿ. ਸੋ ਯੇਨ ਪਵਾਰੇਤਿ ਤਂ ਨ ਦੇਤਿ. ਸੋ ਚੇ ਤਤੋ ਚੁਤੋ ਇਤ੍ਥਤ੍ਤਂ ਆਗਚ੍ਛਤਿ, ਸੋ ਯਞ੍ਞਦੇਵ ਵਣਿਜ੍ਜਂ ਪਯੋਜੇਤਿ, ਸਾਸ੍ਸ ਹੋਤਿ ਛੇਦਗਾਮਿਨੀ.

‘‘ਇਧ ਪਨ, ਸਾਰਿਪੁਤ੍ਤ, ਏਕਚ੍ਚੋ ਸਮਣਂ ਵਾ ਬ੍ਰਾਹ੍ਮਣਂ ਵਾ ਉਪਸਙ੍ਕਮਿਤ੍ਵਾ ਪਵਾਰੇਤਿ – ‘ਵਦਤੁ, ਭਨ੍ਤੇ, ਪਚ੍ਚਯੇਨਾ’ਤਿ. ਸੋ ਯੇਨ ਪਵਾਰੇਤਿ ਤਂ ਨ ਯਥਾਧਿਪ੍ਪਾਯਂ ਦੇਤਿ. ਸੋ ਚੇ ਤਤੋ ਚੁਤੋ ਇਤ੍ਥਤ੍ਤਂ ਆਗਚ੍ਛਤਿ, ਸੋ ਯਞ੍ਞਦੇਵ ਵਣਿਜ੍ਜਂ ਪਯੋਜੇਤਿ, ਸਾਸ੍ਸ ਨ ਹੋਤਿ ਯਥਾਧਿਪ੍ਪਾਯਾ [ਯਥਾਧਿਪ੍ਪਾਯਂ (ਸੀ. ਕ.)].

‘‘ਇਧ ਪਨ, ਸਾਰਿਪੁਤ੍ਤ, ਏਕਚ੍ਚੋ ਸਮਣਂ ਵਾ ਬ੍ਰਾਹ੍ਮਣਂ ਵਾ ਉਪਸਙ੍ਕਮਿਤ੍ਵਾ ਪਵਾਰੇਤਿ – ‘ਵਦਤੁ, ਭਨ੍ਤੇ, ਪਚ੍ਚਯੇਨਾ’ਤਿ. ਸੋ ਯੇਨ ਪਵਾਰੇਤਿ ਤਂ ਯਥਾਧਿਪ੍ਪਾਯਂ ਦੇਤਿ. ਸੋ ਚੇ ਤਤੋ ਚੁਤੋ ਇਤ੍ਥਤ੍ਤਂ ਆਗਚ੍ਛਤਿ, ਸੋ ਯਞ੍ਞਦੇਵ ਵਣਿਜ੍ਜਂ ਪਯੋਜੇਤਿ, ਸਾਸ੍ਸ ਹੋਤਿ ਯਥਾਧਿਪ੍ਪਾਯਾ [ਯਥਾਧਿਪ੍ਪਾਯਂ (ਸੀ. ਕ.)].

‘‘ਇਧ, ਸਾਰਿਪੁਤ੍ਤ, ਏਕਚ੍ਚੋ ਸਮਣਂ ਵਾ ਬ੍ਰਾਹ੍ਮਣਂ ਵਾ ਉਪਸਙ੍ਕਮਿਤ੍ਵਾ ਪਵਾਰੇਤਿ – ‘ਵਦਤੁ, ਭਨ੍ਤੇ, ਪਚ੍ਚਯੇਨਾ’ਤਿ. ਸੋ ਯੇਨ ਪਵਾਰੇਤਿ ਤਂ ਪਰਾਧਿਪ੍ਪਾਯਂ ਦੇਤਿ. ਸੋ ਚੇ ਤਤੋ ਚੁਤੋ ਇਤ੍ਥਤ੍ਤਂ ਆਗਚ੍ਛਤਿ, ਸੋ ਯਞ੍ਞਦੇਵ ਵਣਿਜ੍ਜਂ ਪਯੋਜੇਤਿ, ਸਾਸ੍ਸ ਹੋਤਿ ਪਰਾਧਿਪ੍ਪਾਯਾ [ਪਰਾਧਿਪ੍ਪਾਯਂ (ਕ.)].

‘‘ਅਯਂ ਖੋ, ਸਾਰਿਪੁਤ੍ਤ, ਹੇਤੁ ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚਸ੍ਸ ਤਾਦਿਸਾਵ ਵਣਿਜ੍ਜਾ ਪਯੁਤ੍ਤਾ ਛੇਦਗਾਮਿਨੀ ਹੋਤਿ. ਅਯਂ ਪਨ, ਸਾਰਿਪੁਤ੍ਤ, ਹੇਤੁ ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚਸ੍ਸ ਤਾਦਿਸਾਵ ਵਣਿਜ੍ਜਾ ਪਯੁਤ੍ਤਾ ਨ ਯਥਾਧਿਪ੍ਪਾਯਾ ਹੋਤਿ. ਅਯਂ ਖੋ ਪਨ, ਸਾਰਿਪੁਤ੍ਤ, ਹੇਤੁ ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚਸ੍ਸ ਤਾਦਿਸਾਵ ਵਣਿਜ੍ਜਾ ਪਯੁਤ੍ਤਾ ਯਥਾਧਿਪ੍ਪਾਯਾ ਹੋਤਿ. ਅਯਂ ਪਨ, ਸਾਰਿਪੁਤ੍ਤ, ਹੇਤੁ ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚਸ੍ਸ ਤਾਦਿਸਾਵ ਵਣਿਜ੍ਜਾ ਪਯੁਤ੍ਤਾ ਪਰਾਧਿਪ੍ਪਾਯਾ ਹੋਤੀ’’ਤਿ. ਨਵਮਂ.

੧੦. ਕਮ੍ਬੋਜਸੁਤ੍ਤਂ

੮੦. ਏਕਂ ਸਮਯਂ ਭਗਵਾ ਕੋਸਮ੍ਬਿਯਂ ਵਿਹਰਤਿ ਘੋਸਿਤਾਰਾਮੇ. ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ –

‘‘ਕੋ ਨੁ ਖੋ, ਭਨ੍ਤੇ, ਹੇਤੁ ਕੋ ਪਚ੍ਚਯੋ, ਯੇਨ ਮਾਤੁਗਾਮੋ ਨੇਵ ਸਭਾਯਂ ਨਿਸੀਦਤਿ, ਨ ਕਮ੍ਮਨ੍ਤਂ ਪਯੋਜੇਤਿ, ਨ ਕਮ੍ਬੋਜਂ ਗਚ੍ਛਤੀ’’ਤਿ? ‘‘ਕੋਧਨੋ, ਆਨਨ੍ਦ, ਮਾਤੁਗਾਮੋ; ਇਸ੍ਸੁਕੀ, ਆਨਨ੍ਦ, ਮਾਤੁਗਾਮੋ; ਮਚ੍ਛਰੀ, ਆਨਨ੍ਦ, ਮਾਤੁਗਾਮੋ; ਦੁਪ੍ਪਞ੍ਞੋ, ਆਨਨ੍ਦ, ਮਾਤੁਗਾਮੋ – ਅਯਂ ਖੋ, ਆਨਨ੍ਦ, ਹੇਤੁ ਅਯਂ ਪਚ੍ਚਯੋ, ਯੇਨ ਮਾਤੁਗਾਮੋ ਨੇਵ ਸਭਾਯਂ ਨਿਸੀਦਤਿ, ਨ ਕਮ੍ਮਨ੍ਤਂ ਪਯੋਜੇਤਿ, ਨ ਕਮ੍ਬੋਜਂ ਗਚ੍ਛਤੀ’’ਤਿ. ਦਸਮਂ.

ਅਪਣ੍ਣਕਵਗ੍ਗੋ ਤਤਿਯੋ.