੯. ਅਕੁਸਲਮੂਲਸੁਤ੍ਤਂ

੭੦. ‘‘ਤੀਣਿਮਾਨਿ, ਭਿਕ੍ਖਵੇ, ਅਕੁਸਲਮੂਲਾਨਿ. ਕਤਮਾਨਿ ਤੀਣਿ? ਲੋਭੋ ਅਕੁਸਲਮੂਲਂ, ਦੋਸੋ ਅਕੁਸਲਮੂਲਂ, ਮੋਹੋ ਅਕੁਸਲਮੂਲਂ.

‘‘ਯਦਪਿ, ਭਿਕ੍ਖਵੇ, ਲੋਭੋ ਤਦਪਿ ਅਕੁਸਲਮੂਲਂ [ਅਕੁਸਲਂ (ਸੀ. ਸ੍ਯਾ. ਕਂ. ਪੀ.)]; ਯਦਪਿ ਲੁਦ੍ਧੋ ਅਭਿਸਙ੍ਖਰੋਤਿ ਕਾਯੇਨ ਵਾਚਾਯ ਮਨਸਾ ਤਦਪਿ ਅਕੁਸਲਂ [ਅਕੁਸਲਮੂਲਂ (ਕ.)]; ਯਦਪਿ ਲੁਦ੍ਧੋ ਲੋਭੇਨ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਪਰਸ੍ਸ ਅਸਤਾ ਦੁਕ੍ਖਂ ਉਪ੍ਪਾਦਯਤਿ [ਉਪਦਹਤਿ (ਸੀ. ਸ੍ਯਾ. ਕਂ. ਪੀ.)] ਵਧੇਨ ਵਾ ਬਨ੍ਧਨੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਪਬ੍ਬਾਜਨਾਯ ਵਾ ਬਲਵਮ੍ਹਿ ਬਲਤ੍ਥੋ ਇਤਿਪਿ ਤਦਪਿ ਅਕੁਸਲਂ [ਇਦਂ ਪਨ ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ]. ਇਤਿਸ੍ਸਮੇ ਲੋਭਜਾ ਲੋਭਨਿਦਾਨਾ ਲੋਭਸਮੁਦਯਾ ਲੋਭਪਚ੍ਚਯਾ ਅਨੇਕੇ ਪਾਪਕਾ ਅਕੁਸਲਾ ਧਮ੍ਮਾ ਸਮ੍ਭਵਨ੍ਤਿ.

‘‘ਯਦਪਿ, ਭਿਕ੍ਖਵੇ, ਦੋਸੋ ਤਦਪਿ ਅਕੁਸਲਮੂਲਂ; ਯਦਪਿ ਦੁਟ੍ਠੋ ਅਭਿਸਙ੍ਖਰੋਤਿ ਕਾਯੇਨ ਵਾਚਾਯ ਮਨਸਾ ਤਦਪਿ ਅਕੁਸਲਂ; ਯਦਪਿ ਦੁਟ੍ਠੋ ਦੋਸੇਨ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਪਰਸ੍ਸ ਅਸਤਾ ਦੁਕ੍ਖਂ ਉਪ੍ਪਾਦਯਤਿ ਵਧੇਨ ਵਾ ਬਨ੍ਧਨੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਪਬ੍ਬਾਜਨਾਯ ਵਾ ਬਲਵਮ੍ਹਿ ਬਲਤ੍ਥੋ ਇਤਿਪਿ ਤਦਪਿ ਅਕੁਸਲਂ. ਇਤਿਸ੍ਸਮੇ ਦੋਸਜਾ ਦੋਸਨਿਦਾਨਾ ਦੋਸਸਮੁਦਯਾ ਦੋਸਪਚ੍ਚਯਾ ਅਨੇਕੇ ਪਾਪਕਾ ਅਕੁਸਲਾ ਧਮ੍ਮਾ ਸਮ੍ਭਵਨ੍ਤਿ.

‘‘ਯਦਪਿ, ਭਿਕ੍ਖਵੇ, ਮੋਹੋ ਤਦਪਿ ਅਕੁਸਲਮੂਲਂ; ਯਦਪਿ ਮੂਲ਼੍ਹੋ ਅਭਿਸਙ੍ਖਰੋਤਿ ਕਾਯੇਨ ਵਾਚਾਯ ਮਨਸਾ ਤਦਪਿ ਅਕੁਸਲਂ; ਯਦਪਿ ਮੂਲ਼੍ਹੋ ਮੋਹੇਨ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਪਰਸ੍ਸ ਅਸਤਾ ਦੁਕ੍ਖਂ ਉਪ੍ਪਾਦਯਤਿ ਵਧੇਨ ਵਾ ਬਨ੍ਧਨੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਪਬ੍ਬਾਜਨਾਯ ਵਾ ਬਲਵਮ੍ਹਿ ਬਲਤ੍ਥੋ ਇਤਿਪਿ ਤਦਪਿ ਅਕੁਸਲਂ. ਇਤਿਸ੍ਸਮੇ ਮੋਹਜਾ ਮੋਹਨਿਦਾਨਾ ਮੋਹਸਮੁਦਯਾ ਮੋਹਪਚ੍ਚਯਾ ਅਨੇਕੇ ਪਾਪਕਾ ਅਕੁਸਲਾ ਧਮ੍ਮਾ ਸਮ੍ਭਵਨ੍ਤਿ. ਏਵਰੂਪੋ ਚਾਯਂ, ਭਿਕ੍ਖਵੇ, ਪੁਗ੍ਗਲੋ ਵੁਚ੍ਚਤਿ ਅਕਾਲਵਾਦੀਤਿਪਿ, ਅਭੂਤਵਾਦੀਤਿਪਿ, ਅਨਤ੍ਥਵਾਦੀਤਿਪਿ, ਅਧਮ੍ਮਵਾਦੀਤਿਪਿ, ਅਵਿਨਯਵਾਦੀਤਿਪਿ.

‘‘ਕਸ੍ਮਾ ਚਾਯਂ, ਭਿਕ੍ਖਵੇ, ਏਵਰੂਪੋ ਪੁਗ੍ਗਲੋ ਵੁਚ੍ਚਤਿ ਅਕਾਲਵਾਦੀਤਿਪਿ, ਅਭੂਤਵਾਦੀਤਿਪਿ, ਅਨਤ੍ਥਵਾਦੀਤਿਪਿ, ਅਧਮ੍ਮਵਾਦੀਤਿਪਿ, ਅਵਿਨਯਵਾਦੀਤਿਪਿ? ਤਥਾਹਾਯਂ, ਭਿਕ੍ਖਵੇ, ਪੁਗ੍ਗਲੋ ਪਰਸ੍ਸ ਅਸਤਾ ਦੁਕ੍ਖਂ ਉਪ੍ਪਾਦਯਤਿ ਵਧੇਨ ਵਾ ਬਨ੍ਧਨੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਪਬ੍ਬਾਜਨਾਯ ਵਾ ਬਲਵਮ੍ਹਿ ਬਲਤ੍ਥੋ ਇਤਿਪਿ. ਭੂਤੇਨ ਖੋ ਪਨ ਵੁਚ੍ਚਮਾਨੋ ਅਵਜਾਨਾਤਿ, ਨੋ ਪਟਿਜਾਨਾਤਿ; ਅਭੂਤੇਨ ਵੁਚ੍ਚਮਾਨੋ ਨ ਆਤਪ੍ਪਂ ਕਰੋਤਿ, ਤਸ੍ਸ ਨਿਬ੍ਬੇਠਨਾਯ ਇਤਿਪੇਤਂ ਅਤਚ੍ਛਂ ਇਤਿਪੇਤਂ ਅਭੂਤਨ੍ਤਿ. ਤਸ੍ਮਾ ਏਵਰੂਪੋ ਪੁਗ੍ਗਲੋ ਵੁਚ੍ਚਤਿ ਅਕਾਲਵਾਦੀਤਿਪਿ, ਅਭੂਤਵਾਦੀਤਿਪਿ, ਅਨਤ੍ਥਵਾਦੀਤਿਪਿ, ਅਧਮ੍ਮਵਾਦੀਤਿਪਿ, ਅਵਿਨਯਵਾਦੀਤਿਪਿ.

‘‘ਏਵਰੂਪੋ, ਭਿਕ੍ਖਵੇ, ਪੁਗ੍ਗਲੋ ਲੋਭਜੇਹਿ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਦਿਟ੍ਠੇ ਚੇਵ ਧਮ੍ਮੇ ਦੁਕ੍ਖਂ ਵਿਹਰਤਿ, ਸਵਿਘਾਤਂ ਸਉਪਾਯਾਸਂ ਸਪਰਿਲ਼ਾਹਂ. ਕਾਯਸ੍ਸ ਚ ਭੇਦਾ ਪਰਂ ਮਰਣਾ ਦੁਗ੍ਗਤਿ ਪਾਟਿਕਙ੍ਖਾ.

‘‘ਦੋਸਜੇਹਿ…ਪੇ… ਮੋਹਜੇਹਿ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਦਿਟ੍ਠੇ ਚੇਵ ਧਮ੍ਮੇ ਦੁਕ੍ਖਂ ਵਿਹਰਤਿ, ਸਵਿਘਾਤਂ ਸਉਪਾਯਾਸਂ ਸਪਰਿਲ਼ਾਹਂ. ਕਾਯਸ੍ਸ ਚ ਭੇਦਾ ਪਰਂ ਮਰਣਾ ਦੁਗ੍ਗਤਿ ਪਾਟਿਕਙ੍ਖਾ. ਸੇਯ੍ਯਥਾਪਿ, ਭਿਕ੍ਖਵੇ, ਸਾਲੋ ਵਾ ਧਵੋ ਵਾ ਫਨ੍ਦਨੋ ਵਾ ਤੀਹਿ ਮਾਲੁਵਾਲਤਾਹਿ ਉਦ੍ਧਸ੍ਤੋ ਪਰਿਯੋਨਦ੍ਧੋ ਅਨਯਂ ਆਪਜ੍ਜਤਿ, ਬ੍ਯਸਨਂ ਆਪਜ੍ਜਤਿ, ਅਨਯਬ੍ਯਸਨਂ ਆਪਜ੍ਜਤਿ; ਏਵਮੇਵਂ ਖੋ, ਭਿਕ੍ਖਵੇ, ਏਵਰੂਪੋ ਪੁਗ੍ਗਲੋ ਲੋਭਜੇਹਿ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਦਿਟ੍ਠੇ ਚੇਵ ਧਮ੍ਮੇ ਦੁਕ੍ਖਂ ਵਿਹਰਤਿ, ਸਵਿਘਾਤਂ ਸਉਪਾਯਾਸਂ ਸਪਰਿਲ਼ਾਹਂ. ਕਾਯਸ੍ਸ ਚ ਭੇਦਾ ਪਰਂ ਮਰਣਾ ਦੁਗ੍ਗਤਿ ਪਾਟਿਕਙ੍ਖਾ.

‘‘ਦੋਸਜੇਹਿ…ਪੇ… ਮੋਹਜੇਹਿ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਦਿਟ੍ਠੇ ਚੇਵ ਧਮ੍ਮੇ ਦੁਕ੍ਖਂ ਵਿਹਰਤਿ ਸਵਿਘਾਤਂ ਸਉਪਾਯਾਸਂ ਸਪਰਿਲ਼ਾਹਂ. ਕਾਯਸ੍ਸ ਚ ਭੇਦਾ ਪਰਂ ਮਰਣਾ ਦੁਗ੍ਗਤਿ ਪਾਟਿਕਙ੍ਖਾ. ਇਮਾਨਿ ਖੋ, ਭਿਕ੍ਖਵੇ, ਤੀਣਿ ਅਕੁਸਲਮੂਲਾਨੀਤਿ.

‘‘ਤੀਣਿਮਾਨਿ, ਭਿਕ੍ਖਵੇ, ਕੁਸਲਮੂਲਾਨਿ. ਕਤਮਾਨਿ ਤੀਣਿ? ਅਲੋਭੋ ਕੁਸਲਮੂਲਂ, ਅਦੋਸੋ ਕੁਸਲਮੂਲਂ, ਅਮੋਹੋ ਕੁਸਲਮੂਲਂ.

‘‘ਯਦਪਿ, ਭਿਕ੍ਖਵੇ, ਅਲੋਭੋ ਤਦਪਿ ਕੁਸਲਮੂਲਂ [ਕੁਸਲਂ (ਸੀ. ਸ੍ਯਾ. ਕਂ. ਪੀ.)]; ਯਦਪਿ ਅਲੁਦ੍ਧੋ ਅਭਿਸਙ੍ਖਰੋਤਿ ਕਾਯੇਨ ਵਾਚਾਯ ਮਨਸਾ ਤਦਪਿ ਕੁਸਲਂ [ਕੁਸਲਮੂਲਂ (ਕ.)]; ਯਦਪਿ ਅਲੁਦ੍ਧੋ ਲੋਭੇਨ ਅਨਭਿਭੂਤੋ ਅਪਰਿਯਾਦਿਨ੍ਨਚਿਤ੍ਤੋ ਨ ਪਰਸ੍ਸ ਅਸਤਾ ਦੁਕ੍ਖਂ ਉਪ੍ਪਾਦਯਤਿ ਵਧੇਨ ਵਾ ਬਨ੍ਧਨੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਪਬ੍ਬਾਜਨਾਯ ਵਾ ਬਲਵਮ੍ਹਿ ਬਲਤ੍ਥੋ ਇਤਿਪਿ ਤਦਪਿ ਕੁਸਲਂ. ਇਤਿਸ੍ਸਮੇ ਅਲੋਭਜਾ ਅਲੋਭਨਿਦਾਨਾ ਅਲੋਭਸਮੁਦਯਾ ਅਲੋਭਪਚ੍ਚਯਾ ਅਨੇਕੇ ਕੁਸਲਾ ਧਮ੍ਮਾ ਸਮ੍ਭਵਨ੍ਤਿ.

‘‘ਯਦਪਿ, ਭਿਕ੍ਖਵੇ, ਅਦੋਸੋ ਤਦਪਿ ਕੁਸਲਮੂਲਂ; ਯਦਪਿ ਅਦੁਟ੍ਠੋ ਅਭਿਸਙ੍ਖਰੋਤਿ ਕਾਯੇਨ ਵਾਚਾਯ ਮਨਸਾ ਤਦਪਿ ਕੁਸਲਂ; ਯਦਪਿ ਅਦੁਟ੍ਠੋ ਦੋਸੇਨ ਅਨਭਿਭੂਤੋ ਅਪਰਿਯਾਦਿਨ੍ਨਚਿਤ੍ਤੋ ਨ ਪਰਸ੍ਸ ਅਸਤਾ ਦੁਕ੍ਖਂ ਉਪ੍ਪਾਦਯਤਿ ਵਧੇਨ ਵਾ ਬਨ੍ਧਨੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਪਬ੍ਬਾਜਨਾਯ ਵਾ ਬਲਵਮ੍ਹਿ ਬਲਤ੍ਥੋ ਇਤਿਪਿ ਤਦਪਿ ਕੁਸਲਂ. ਇਤਿਸ੍ਸਮੇ ਅਦੋਸਜਾ ਅਦੋਸਨਿਦਾਨਾ ਅਦੋਸਸਮੁਦਯਾ ਅਦੋਸਪਚ੍ਚਯਾ ਅਨੇਕੇ ਕੁਸਲਾ ਧਮ੍ਮਾ ਸਮ੍ਭਵਨ੍ਤਿ.

‘‘ਯਦਪਿ, ਭਿਕ੍ਖਵੇ, ਅਮੋਹੋ ਤਦਪਿ ਕੁਸਲਮੂਲਂ; ਯਦਪਿ ਅਮੂਲ਼੍ਹੋ ਅਭਿਸਙ੍ਖਰੋਤਿ ਕਾਯੇਨ ਵਾਚਾਯ ਮਨਸਾ ਤਦਪਿ ਕੁਸਲਂ; ਯਦਪਿ ਅਮੂਲ਼੍ਹੋ ਮੋਹੇਨ ਅਨਭਿਭੂਤੋ ਅਪਰਿਯਾਦਿਨ੍ਨਚਿਤ੍ਤੋ ਨ ਪਰਸ੍ਸ ਅਸਤਾ ਦੁਕ੍ਖਂ ਉਪ੍ਪਾਦਯਤਿ ਵਧੇਨ ਵਾ ਬਨ੍ਧਨੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਪਬ੍ਬਾਜਨਾਯ ਵਾ ਬਲਵਮ੍ਹਿ ਬਲਤ੍ਥੋ ਇਤਿਪਿ ਤਦਪਿ ਕੁਸਲਂ. ਇਤਿਸ੍ਸਮੇ ਅਮੋਹਜਾ ਅਮੋਹਨਿਦਾਨਾ ਅਮੋਹਸਮੁਦਯਾ ਅਮੋਹਪਚ੍ਚਯਾ ਅਨੇਕੇ ਕੁਸਲਾ ਧਮ੍ਮਾ ਸਮ੍ਭਵਨ੍ਤਿ. ਏਵਰੂਪੋ ਚਾਯਂ, ਭਿਕ੍ਖਵੇ, ਪੁਗ੍ਗਲੋ ਵੁਚ੍ਚਤਿ ਕਾਲਵਾਦੀਤਿਪਿ, ਭੂਤਵਾਦੀਤਿਪਿ, ਅਤ੍ਥਵਾਦੀਤਿਪਿ, ਧਮ੍ਮਵਾਦੀਤਿਪਿ, ਵਿਨਯਵਾਦੀਤਿਪਿ.

‘‘ਕਸ੍ਮਾ ਚਾਯਂ, ਭਿਕ੍ਖਵੇ, ਏਵਰੂਪੋ ਪੁਗ੍ਗਲੋ ਵੁਚ੍ਚਤਿ ਕਾਲਵਾਦੀਤਿਪਿ, ਭੂਤਵਾਦੀਤਿਪਿ, ਅਤ੍ਥਵਾਦੀਤਿਪਿ, ਧਮ੍ਮਵਾਦੀਤਿਪਿ, ਵਿਨਯਵਾਦੀਤਿਪਿ? ਤਥਾਹਾਯਂ, ਭਿਕ੍ਖਵੇ, ਪੁਗ੍ਗਲੋ ਨ ਪਰਸ੍ਸ ਅਸਤਾ ਦੁਕ੍ਖਂ ਉਪ੍ਪਾਦਯਤਿ ਵਧੇਨ ਵਾ ਬਨ੍ਧਨੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਪਬ੍ਬਾਜਨਾਯ ਵਾ ਬਲਵਮ੍ਹਿ ਬਲਤ੍ਥੋ ਇਤਿਪਿ. ਭੂਤੇਨ ਖੋ ਪਨ ਵੁਚ੍ਚਮਾਨੋ ਪਟਿਜਾਨਾਤਿ ਨੋ ਅਵਜਾਨਾਤਿ; ਅਭੂਤੇਨ ਵੁਚ੍ਚਮਾਨੋ ਆਤਪ੍ਪਂ ਕਰੋਤਿ ਤਸ੍ਸ ਨਿਬ੍ਬੇਠਨਾਯ – ‘ਇਤਿਪੇਤਂ ਅਤਚ੍ਛਂ, ਇਤਿਪੇਤਂ ਅਭੂਤ’ਨ੍ਤਿ. ਤਸ੍ਮਾ ਏਵਰੂਪੋ ਪੁਗ੍ਗਲੋ ਵੁਚ੍ਚਤਿ ਕਾਲਵਾਦੀਤਿਪਿ, ਅਤ੍ਥਵਾਦੀਤਿਪਿ, ਧਮ੍ਮਵਾਦੀਤਿਪਿ, ਵਿਨਯਵਾਦੀਤਿਪਿ.

‘‘ਏਵਰੂਪਸ੍ਸ, ਭਿਕ੍ਖਵੇ, ਪੁਗ੍ਗਲਸ੍ਸ ਲੋਭਜਾ ਪਾਪਕਾ ਅਕੁਸਲਾ ਧਮ੍ਮਾ ਪਹੀਨਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ. ਦਿਟ੍ਠੇਵ ਧਮ੍ਮੇ ਸੁਖਂ ਵਿਹਰਤਿ ਅਵਿਘਾਤਂ ਅਨੁਪਾਯਾਸਂ ਅਪਰਿਲ਼ਾਹਂ. ਦਿਟ੍ਠੇਵ ਧਮ੍ਮੇ ਪਰਿਨਿਬ੍ਬਾਯਤਿ.

‘‘ਦੋਸਜਾ…ਪੇ… ਪਰਿਨਿਬ੍ਬਾਯਤਿ. ਮੋਹਜਾ…ਪੇ… ਪਰਿਨਿਬ੍ਬਾਯਤਿ. ਸੇਯ੍ਯਥਾਪਿ ਭਿਕ੍ਖਵੇ, ਸਾਲੋ ਵਾ ਧਵੋ ਵਾ ਫਨ੍ਦਨੋ ਵਾ ਤੀਹਿ ਮਾਲੁਵਾਲਤਾਹਿ ਉਦ੍ਧਸ੍ਤੋ ਪਰਿਯੋਨਦ੍ਧੋ. ਅਥ ਪੁਰਿਸੋ ਆਗਚ੍ਛੇਯ੍ਯ ਕੁਦ੍ਦਾਲ-ਪਿਟਕਂ [ਕੁਦ੍ਦਾਲਪਿਟਕਂ (ਸੀ. ਸ੍ਯਾ. ਕਂ. ਪੀ.)] ਆਦਾਯ. ਸੋ ਤਂ ਮਾਲੁਵਾਲਤਂ ਮੂਲੇ ਛਿਨ੍ਦੇਯ੍ਯ, ਮੂਲੇ ਛੇਤ੍ਵਾ ਪਲਿਖਣੇਯ੍ਯ, ਪਲਿਖਣਿਤ੍ਵਾ ਮੂਲਾਨਿ ਉਦ੍ਧਰੇਯ੍ਯ, ਅਨ੍ਤਮਸੋ ਉਸੀਰਨਾਲ਼ਿਮਤ੍ਤਾਨਿਪਿ [ਉਸੀਰਨਾਲ਼ਮਤ੍ਤਾਨਿਪਿ (ਸੀ. ਸ੍ਯਾ. ਕਂ. ਪੀ.)]. ਸੋ ਤਂ ਮਾਲੁਵਾਲਤਂ ਖਣ੍ਡਾਖਣ੍ਡਿਕਂ ਛਿਨ੍ਦੇਯ੍ਯ, ਖਣ੍ਡਾਖਣ੍ਡਿਕਂ ਛੇਤ੍ਵਾ ਫਾਲੇਯ੍ਯ, ਫਾਲੇਤ੍ਵਾ ਸਕਲਿਕਂ ਸਕਲਿਕਂ ਕਰੇਯ੍ਯ, ਸਕਲਿਕਂ ਸਕਲਿਕਂ ਕਰਿਤ੍ਵਾ ਵਾਤਾਤਪੇ ਵਿਸੋਸੇਯ੍ਯ, ਵਾਤਾਤਪੇ ਵਿਸੋਸੇਤ੍ਵਾ ਅਗ੍ਗਿਨਾ ਡਹੇਯ੍ਯ, ਅਗ੍ਗਿਨਾ ਡਹਿਤ੍ਵਾ ਮਸਿਂ ਕਰੇਯ੍ਯ, ਮਸਿਂ ਕਰਿਤ੍ਵਾ ਮਹਾਵਾਤੇ ਵਾ ਓਫੁਣੇਯ੍ਯ ਨਦਿਯਾ ਵਾ ਸੀਘਸੋਤਾਯ ਪਵਾਹੇਯ੍ਯ. ਏਵਮਸ੍ਸ [ਏਵਮਸ੍ਸੁ (ਸੀ.), ਏਵਸ੍ਸੁ (ਕ.)] ਤਾ, ਭਿਕ੍ਖਵੇ, ਮਾਲੁਵਾਲਤਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ. ਏਵਮੇਵਂ ਖੋ, ਭਿਕ੍ਖਵੇ, ਏਵਰੂਪਸ੍ਸ ਪੁਗ੍ਗਲਸ੍ਸ ਲੋਭਜਾ ਪਾਪਕਾ ਅਕੁਸਲਾ ਧਮ੍ਮਾ ਪਹੀਨਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ. ਦਿਟ੍ਠੇਵ ਧਮ੍ਮੇ ਸੁਖਂ ਵਿਹਰਤਿ ਅਵਿਘਾਤਂ ਅਨੁਪਾਯਾਸਂ ਅਪਰਿਲ਼ਾਹਂ. ਦਿਟ੍ਠੇਵ ਧਮ੍ਮੇ ਪਰਿਨਿਬ੍ਬਾਯਤਿ.

‘‘ਦੋਸਜਾ …ਪੇ… ਮੋਹਜਾ ਪਾਪਕਾ ਅਕੁਸਲਾ ਧਮ੍ਮਾ ਪਹੀਨਾ ਉਚ੍ਛਿਨ੍ਨਮੂਲਾ ਤਾਲਾਵਤ੍ਥੁਕਤਾ ਅਨਭਾਵਂਕਤਾ ਆਯਤਿਂ ਅਨੁਪ੍ਪਾਦਧਮ੍ਮਾ. ਦਿਟ੍ਠੇਵ ਧਮ੍ਮੇ ਸੁਖਂ ਵਿਹਰਤਿ ਅਵਿਘਾਤਂ ਅਨੁਪਾਯਾਸਂ ਅਪਰਿਲ਼ਾਹਂ. ਦਿਟ੍ਠੇਵ ਧਮ੍ਮੇ ਪਰਿਨਿਬ੍ਬਾਯਤਿ. ਇਮਾਨਿ ਖੋ, ਭਿਕ੍ਖਵੇ, ਤੀਣਿ ਕੁਸਲਮੂਲਾਨੀ’’ਤਿ. ਨਵਮਂ.