੪. ਸਰਭਸੁਤ੍ਤਂ

੬੫. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਗਿਜ੍ਝਕੂਟੇ ਪਬ੍ਬਤੇ. ਤੇਨ ਖੋ ਪਨ ਸਮਯੇਨ ਸਰਭੋ ਨਾਮ ਪਰਿਬ੍ਬਾਜਕੋ ਅਚਿਰਪਕ੍ਕਨ੍ਤੋ ਹੋਤਿ ਇਮਸ੍ਮਾ ਧਮ੍ਮਵਿਨਯਾ. ਸੋ ਰਾਜਗਹੇ ਪਰਿਸਤਿ [ਪਰਿਸਤਿਂ (ਸੀ. ਪੀ.)] ਏਵਂ ਵਾਚਂ ਭਾਸਤਿ – ‘‘ਅਞ੍ਞਾਤੋ ਮਯਾ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮੋ. ਅਞ੍ਞਾਯ ਚ ਪਨਾਹਂ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮਂ ਏਵਾਹਂ ਤਸ੍ਮਾ ਧਮ੍ਮਵਿਨਯਾ ਅਪਕ੍ਕਨ੍ਤੋ’’ਤਿ. ਅਥ ਖੋ ਸਮ੍ਬਹੁਲਾ ਭਿਕ੍ਖੂ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹਂ ਪਿਣ੍ਡਾਯ ਪਵਿਸਿਂਸੁ. ਅਸ੍ਸੋਸੁਂ ਖੋ ਤੇ ਭਿਕ੍ਖੂ ਸਰਭਸ੍ਸ ਪਰਿਬ੍ਬਾਜਕਸ੍ਸ ਰਾਜਗਹੇ ਪਰਿਸਤਿ ਏਵਂ ਵਾਚਂ ਭਾਸਮਾਨਸ੍ਸ – ‘‘ਅਞ੍ਞਾਤੋ ਮਯਾ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮੋ. ਅਞ੍ਞਾਯ ਚ ਪਨਾਹਂ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮਂ ਏਵਾਹਂ ਤਸ੍ਮਾ ਧਮ੍ਮਵਿਨਯਾ ਅਪਕ੍ਕਨ੍ਤੋ’’ਤਿ.

ਅਥ ਖੋ ਤੇ ਭਿਕ੍ਖੂ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਸਰਭੋ ਨਾਮ, ਭਨ੍ਤੇ, ਪਰਿਬ੍ਬਾਜਕੋ ਅਚਿਰਪਕ੍ਕਨ੍ਤੋ ਇਮਸ੍ਮਾ ਧਮ੍ਮਵਿਨਯਾ. ਸੋ ਰਾਜਗਹੇ ਪਰਿਸਤਿ ਏਵਂ ਵਾਚਂ ਭਾਸਤਿ – ‘ਅਞ੍ਞਾਤੋ ਮਯਾ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮੋ. ਅਞ੍ਞਾਯ ਚ ਪਨਾਹਂ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮਂ ਏਵਾਹਂ ਤਸ੍ਮਾ ਧਮ੍ਮਵਿਨਯਾ ਅਪਕ੍ਕਨ੍ਤੋ’ਤਿ. ਸਾਧੁ ਭਨ੍ਤੇ, ਭਗਵਾ ਯੇਨ ਸਿਪ੍ਪਿਨਿਕਾਤੀਰਂ [ਸਪ੍ਪਿਨਿਕਾਤੀਰਂ (ਸੀ. ਪੀ.), ਸਪ੍ਪਿਨਿਯਾ ਤੀਰਂ (ਸ੍ਯਾ. ਕਂ.)] ਪਰਿਬ੍ਬਾਜਕਾਰਾਮੋ ਯੇਨ ਸਰਭੋ ਪਰਿਬ੍ਬਾਜਕੋ ਤੇਨੁਪਸਙ੍ਕਮਤੁ ਅਨੁਕਮ੍ਪਂ ਉਪਾਦਾਯਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ.

ਅਥ ਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨ ਸਿਪ੍ਪਿਨਿਕਾਤੀਰਂ ਪਰਿਬ੍ਬਾਜਕਾਰਾਮੋ ਯੇਨ ਸਰਭੋ ਪਰਿਬ੍ਬਾਜਕੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਨਿਸਜ੍ਜ ਖੋ ਭਗਵਾ ਸਰਭਂ ਪਰਿਬ੍ਬਾਜਕਂ ਏਤਦਵੋਚ – ‘‘ਸਚ੍ਚਂ ਕਿਰ ਤ੍ਵਂ, ਸਰਭ, ਏਵਂ ਵਦੇਸਿ – ‘ਅਞ੍ਞਾਤੋ ਮਯਾ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮੋ. ਅਞ੍ਞਾਯ ਚ ਪਨਾਹਂ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮਂ ਏਵਾਹਂ ਤਸ੍ਮਾ ਧਮ੍ਮਵਿਨਯਾ ਅਪਕ੍ਕਨ੍ਤੋ’’’ਤਿ? ਏਵਂ ਵੁਤ੍ਤੇ ਸਰਭੋ ਪਰਿਬ੍ਬਾਜਕੋ ਤੁਣ੍ਹੀ ਅਹੋਸਿ.

ਦੁਤਿਯਮ੍ਪਿ ਖੋ, ਭਗਵਾ ਸਰਭਂ ਪਰਿਬ੍ਬਾਜਕਂ ਏਤਦਵੋਚ – ‘‘ਵਦੇਹਿ, ਸਰਭ, ਕਿਨ੍ਤਿ ਤੇ ਅਞ੍ਞਾਤੋ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮੋ? ਸਚੇ ਤੇ ਅਪਰਿਪੂਰਂ ਭਵਿਸ੍ਸਤਿ, ਅਹਂ ਪਰਿਪੂਰੇਸ੍ਸਾਮਿ. ਸਚੇ ਪਨ ਤੇ ਪਰਿਪੂਰਂ ਭਵਿਸ੍ਸਤਿ, ਅਹਂ ਅਨੁਮੋਦਿਸ੍ਸਾਮੀ’’ਤਿ. ਦੁਤਿਯਮ੍ਪਿ ਖੋ ਸਰਭੋ ਪਰਿਬ੍ਬਾਜਕੋ ਤੁਣ੍ਹੀ ਅਹੋਸਿ.

ਤਤਿਯਮ੍ਪਿ ਖੋ ਭਗਵਾ ਸਰਭਂ ਪਰਿਬ੍ਬਾਜਕਂ ਏਤਦਵੋਚ – (‘‘ਯੋ [ਮਯਾ (ਸ੍ਯਾ. ਕਂ. ਪੀ.)] ਖੋ ਸਰਭ ਪਞ੍ਞਾਯਤਿ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮੋ) [( ) ਸੀ. ਪੋਤ੍ਥਕੇ ਨਤ੍ਥਿ] ‘‘ਵਦੇਹਿ, ਸਰਭ, ਕਿਨ੍ਤਿ ਤੇ ਅਞ੍ਞਾਤੋ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮੋ? ਸਚੇ ਤੇ ਅਪਰਿਪੂਰਂ ਭਵਿਸ੍ਸਤਿ, ਅਹਂ ਪਰਿਪੂਰੇਸ੍ਸਾਮਿ. ਸਚੇ ਪਨ ਤੇ ਪਰਿਪੂਰਂ ਭਵਿਸ੍ਸਤਿ, ਅਹਂ ਅਨੁਮੋਦਿਸ੍ਸਾਮੀ’’ਤਿ. ਤਤਿਯਮ੍ਪਿ ਖੋ ਸਰਭੋ ਪਰਿਬ੍ਬਾਜਕੋ ਤੁਣ੍ਹੀ ਅਹੋਸਿ.

ਅਥ ਖੋ ਤੇ ਪਰਿਬ੍ਬਾਜਕਾ ਸਰਭਂ ਪਰਿਬ੍ਬਾਜਕਂ ਏਤਦਵੋਚੁਂ – ‘‘ਯਦੇਵ ਖੋ ਤ੍ਵਂ, ਆਵੁਸੋ ਸਰਭ, ਸਮਣਂ ਗੋਤਮਂ ਯਾਚੇਯ੍ਯਾਸਿ ਤਦੇਵ ਤੇ ਸਮਣੋ ਗੋਤਮੋ ਪਵਾਰੇਤਿ. ਵਦੇਹਾਵੁਸੋ ਸਰਭ, ਕਿਨ੍ਤਿ ਤੇ ਅਞ੍ਞਾਤੋ ਸਮਣਾਨਂ ਸਕ੍ਯਪੁਤ੍ਤਿਕਾਨਂ ਧਮ੍ਮੋ? ਸਚੇ ਤੇ ਅਪਰਿਪੂਰਂ ਭਵਿਸ੍ਸਤਿ, ਸਮਣੋ ਗੋਤਮੋ ਪਰਿਪੂਰੇਸ੍ਸਤਿ. ਸਚੇ ਪਨ ਤੇ ਪਰਿਪੂਰਂ ਭਵਿਸ੍ਸਤਿ, ਸਮਣੋ ਗੋਤਮੋ ਅਨੁਮੋਦਿਸ੍ਸਤੀ’’ਤਿ. ਏਵਂ ਵੁਤ੍ਤੇ ਸਰਭੋ ਪਰਿਬ੍ਬਾਜਕੋ ਤੁਣ੍ਹੀਭੂਤੋ ਮਙ੍ਕੁਭੂਤੋ ਪਤ੍ਤਕ੍ਖਨ੍ਧੋ ਅਧੋਮੁਖੋ ਪਜ੍ਝਾਯਨ੍ਤੋ ਅਪ੍ਪਟਿਭਾਨੋ ਨਿਸੀਦਿ.

ਅਥ ਖੋ ਭਗਵਾ ਸਰਭਂ ਪਰਿਬ੍ਬਾਜਕਂ ਤੁਣ੍ਹੀਭੂਤਂ ਮਙ੍ਕੁਭੂਤਂ ਪਤ੍ਤਕ੍ਖਨ੍ਧਂ ਅਧੋਮੁਖਂ ਪਜ੍ਝਾਯਨ੍ਤਂ ਅਪ੍ਪਟਿਭਾਨਂ ਵਿਦਿਤ੍ਵਾ ਤੇ ਪਰਿਬ੍ਬਾਜਕੇ ਏਤਦਵੋਚ –

‘‘ਯੋ ਖੋ ਮਂ, ਪਰਿਬ੍ਬਾਜਕਾ [ਪਰਿਬ੍ਬਾਜਕੋ (ਪੀ. ਕ.)], ਏਵਂ ਵਦੇਯ੍ਯ – ‘ਸਮ੍ਮਾਸਮ੍ਬੁਦ੍ਧਸ੍ਸ ਤੇ ਪਟਿਜਾਨਤੋ ਇਮੇ ਧਮ੍ਮਾ ਅਨਭਿਸਮ੍ਬੁਦ੍ਧਾ’ਤਿ, ਤਮਹਂ ਤਤ੍ਥ ਸਾਧੁਕਂ ਸਮਨੁਯੁਞ੍ਜੇਯ੍ਯਂ ਸਮਨੁਗਾਹੇਯ੍ਯਂ ਸਮਨੁਭਾਸੇਯ੍ਯਂ. ਸੋ ਵਤ ਮਯਾ ਸਾਧੁਕਂ ਸਮਨੁਯੁਞ੍ਜਿਯਮਾਨੋ ਸਮਨੁਗਾਹਿਯਮਾਨੋ ਸਮਨੁਭਾਸਿਯਮਾਨੋ ਅਟ੍ਠਾਨਮੇਤਂ ਅਨਵਕਾਸੋ ਯਂ ਸੋ ਤਿਣ੍ਣਂ ਠਾਨਾਨਂ ਨਾਞ੍ਞਤਰਂ [ਅਞ੍ਞਤਰਂ (ਕ.)] ਠਾਨਂ ਨਿਗਚ੍ਛੇਯ੍ਯ, ਅਞ੍ਞੇਨ ਵਾ ਅਞ੍ਞਂ ਪਟਿਚਰਿਸ੍ਸਤਿ, ਬਹਿਦ੍ਧਾ ਕਥਂ ਅਪਨਾਮੇਸ੍ਸਤਿ, ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰਿਸ੍ਸਤਿ, ਤੁਣ੍ਹੀਭੂਤੋ ਮਙ੍ਕੁਭੂਤੋ [ਤੁਣ੍ਹੀਭੂਤੋ ਵਾ ਮਙ੍ਕੁਭੂਤੋ (ਸੀ. ਸ੍ਯਾ. ਕਂ.), ਤੁਣ੍ਹੀਭੂਤੋ ਵਾ ਮਙ੍ਕੁਭੂਤੋ ਵਾ (ਪੀ.)] ਪਤ੍ਤਕ੍ਖਨ੍ਧੋ ਅਧੋਮੁਖੋ ਪਜ੍ਝਾਯਨ੍ਤੋ ਅਪ੍ਪਟਿਭਾਨੋ ਨਿਸੀਦਿਸ੍ਸਤਿ, ਸੇਯ੍ਯਥਾਪਿ ਸਰਭੋ ਪਰਿਬ੍ਬਾਜਕੋ.

‘‘ਯੋ ਖੋ ਮਂ, ਪਰਿਬ੍ਬਾਜਕਾ, ਏਵਂ ਵਦੇਯ੍ਯ – ‘ਖੀਣਾਸਵਸ੍ਸ ਤੇ ਪਟਿਜਾਨਤੋ ਇਮੇ ਆਸਵਾ ਅਪਰਿਕ੍ਖੀਣਾ’ਤਿ, ਤਮਹਂ ਤਤ੍ਥ ਸਾਧੁਕਂ ਸਮਨੁਯੁਞ੍ਜੇਯ੍ਯਂ ਸਮਨੁਗਾਹੇਯ੍ਯਂ ਸਮਨੁਭਾਸੇਯ੍ਯਂ. ਸੋ ਵਤ ਮਯਾ ਸਾਧੁਕਂ ਸਮਨੁਯੁਞ੍ਜਿਯਮਾਨੋ ਸਮਨੁਗਾਹਿਯਮਾਨੋ ਸਮਨੁਭਾਸਿਯਮਾਨੋ ਅਟ੍ਠਾਨਮੇਤਂ ਅਨਵਕਾਸੋ ਯਂ ਸੋ ਤਿਣ੍ਣਂ ਠਾਨਾਨਂ ਨਾਞ੍ਞਤਰਂ ਠਾਨਂ ਨਿਗਚ੍ਛੇਯ੍ਯ, ਅਞ੍ਞੇਨ ਵਾ ਅਞ੍ਞਂ ਪਟਿਚਰਿਸ੍ਸਤਿ, ਬਹਿਦ੍ਧਾ ਕਥਂ ਅਪਨਾਮੇਸ੍ਸਤਿ, ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰਿਸ੍ਸਤਿ, ਤੁਣ੍ਹੀਭੂਤੋ ਮਙ੍ਕੁਭੂਤੋ ਪਤ੍ਤਕ੍ਖਨ੍ਧੋ ਅਧੋਮੁਖੋ ਪਜ੍ਝਾਯਨ੍ਤੋ ਅਪ੍ਪਟਿਭਾਨੋ ਨਿਸੀਦਿਸ੍ਸਤਿ, ਸੇਯ੍ਯਥਾਪਿ ਸਰਭੋ ਪਰਿਬ੍ਬਾਜਕੋ.

‘‘ਯੋ ਖੋ ਮਂ, ਪਰਿਬ੍ਬਾਜਕਾ, ਏਵਂ ਵਦੇਯ੍ਯ – ‘ਯਸ੍ਸ ਖੋ ਪਨ ਤੇ ਅਤ੍ਥਾਯ ਧਮ੍ਮੋ ਦੇਸਿਤੋ, ਸੋ ਨ ਨਿਯ੍ਯਾਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯਾ’ਤਿ, ਤਮਹਂ ਤਤ੍ਥ ਸਾਧੁਕਂ ਸਮਨੁਯੁਞ੍ਜੇਯ੍ਯਂ ਸਮਨੁਗਾਹੇਯ੍ਯਂ ਸਮਨੁਭਾਸੇਯ੍ਯਂ. ਸੋ ਵਤ ਮਯਾ ਸਾਧੁਕਂ ਸਮਨੁਯੁਞ੍ਜਿਯਮਾਨੋ ਸਮਨੁਗਾਹਿਯਮਾਨੋ ਸਮਨੁਭਾਸਿਯਮਾਨੋ ਅਟ੍ਠਾਨਮੇਤਂ ਅਨਵਕਾਸੋ ਯਂ ਸੋ ਤਿਣ੍ਣਂ ਠਾਨਾਨਂ ਨਾਞ੍ਞਤਰਂ ਠਾਨਂ ਨਿਗਚ੍ਛੇਯ੍ਯ, ਅਞ੍ਞੇਨ ਵਾ ਅਞ੍ਞਂ ਪਟਿਚਰਿਸ੍ਸਤਿ, ਬਹਿਦ੍ਧਾ ਕਥਂ ਅਪਨਾਮੇਸ੍ਸਤਿ, ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰਿਸ੍ਸਤਿ, ਤੁਣ੍ਹੀਭੂਤੋ ਮਙ੍ਕੁਭੂਤੋ ਪਤ੍ਤਕ੍ਖਨ੍ਧੋ ਅਧੋਮੁਖੋ ਪਜ੍ਝਾਯਨ੍ਤੋ ਅਪ੍ਪਟਿਭਾਨੋ ਨਿਸੀਦਿਸ੍ਸਤਿ, ਸੇਯ੍ਯਥਾਪਿ ਸਰਭੋ ਪਰਿਬ੍ਬਾਜਕੋ’’ਤਿ. ਅਥ ਖੋ ਭਗਵਾ ਸਿਪ੍ਪਿਨਿਕਾਤੀਰੇ ਪਰਿਬ੍ਬਾਜਕਾਰਾਮੇ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ ਵੇਹਾਸਂ ਪਕ੍ਕਾਮਿ.

ਅਥ ਖੋ ਤੇ ਪਰਿਬ੍ਬਾਜਕਾ ਅਚਿਰਪਕ੍ਕਨ੍ਤਸ੍ਸ ਭਗਵਤੋ ਸਰਭਂ ਪਰਿਬ੍ਬਾਜਕਂ ਸਮਨ੍ਤਤੋ ਵਾਚਾਯਸਨ੍ਨਿਤੋਦਕੇਨ [ਵਾਚਾਸਤ੍ਤਿਤੋਦਕੇਨ (ਸੀ.)] ਸਞ੍ਜਮ੍ਭਰਿਮਕਂਸੁ [ਸਞ੍ਚੁਮ੍ਭਰਿਮਕਂਸੁ (ਪੀ., ਦੀ. ਨਿ. ੧.੪੨੧) ਸਂ. ਨਿ. ੨.੨੪੩ ਉਪਰਿਪਾਠੋ ਵਿਯ] – ‘‘ਸੇਯ੍ਯਥਾਪਿ, ਆਵੁਸੋ ਸਰਭ, ਬ੍ਰਹਾਰਞ੍ਞੇ ਜਰਸਿਙ੍ਗਾਲੋ ‘ਸੀਹਨਾਦਂ ਨਦਿਸ੍ਸਾਮੀ’ਤਿ ਸਿਙ੍ਗਾਲਕਂਯੇਵ [ਸੇਗਾਲਕਂਯੇਵ (ਸੀ. ਸ੍ਯਾ. ਕਂ. ਪੀ.)] ਨਦਤਿ, ਭੇਰਣ੍ਡਕਂਯੇਵ ਨਦਤਿ [ਭੇਦਣ੍ਡਕਂ (ਕ.)]; ਏਵਮੇਵਂ ਖੋ ਤ੍ਵਂ, ਆਵੁਸੋ ਸਰਭ, ਅਞ੍ਞਤ੍ਰੇਵ ਸਮਣੇਨ ਗੋਤਮੇਨ ‘ਸੀਹਨਾਦਂ ਨਦਿਸ੍ਸਾਮੀ’ਤਿ ਸਿਙ੍ਗਾਲਕਂਯੇਵ ਨਦਸਿ ਭੇਰਣ੍ਡਕਂਯੇਵ ਨਦਸਿ. ਸੇਯ੍ਯਥਾਪਿ, ਆਵੁਸੋ ਸਰਭ, ਅਮ੍ਬੁਕਸਞ੍ਚਰੀ [ਅਮ੍ਬਕਮਦ੍ਦਰੀ (ਸੀ.)] ‘ਪੁਰਿਸਕਰਵਿਤਂ [ਫੁਸ੍ਸਕਰਵਿਤਂ (ਸੀ.), ਪੁਸ੍ਸਕਰਵਿਤਂ (ਸ੍ਯਾ. ਕਂ. ਪੀ.)] ਰਵਿਸ੍ਸਾਮੀ’ਤਿ ਅਮ੍ਬੁਕਸਞ੍ਚਰਿਰਵਿਤਂਯੇਵ ਰਵਤਿ; ਏਵਮੇਵਂ ਖੋ ਤ੍ਵਂ, ਆਵੁਸੋ ਸਰਭ, ਅਞ੍ਞਤ੍ਰੇਵ ਸਮਣੇਨ ਗੋਤਮੇਨ ‘ਪੁਰਿਸਕਰਵਿਤਂ ਰਵਿਸ੍ਸਾਮੀ’ਤਿ, ਅਮ੍ਬੁਕਸਞ੍ਚਰਿਰਵਿਤਂਯੇਵ ਰਵਸਿ. ਸੇਯ੍ਯਥਾਪਿ, ਆਵੁਸੋ ਸਰਭ, ਉਸਭੋ ਸੁਞ੍ਞਾਯ ਗੋਸਾਲਾਯ ਗਮ੍ਭੀਰਂ ਨਦਿਤਬ੍ਬਂ ਮਞ੍ਞਤਿ; ਏਵਮੇਵਂ ਖੋ ਤ੍ਵਂ, ਆਵੁਸੋ ਸਰਭ, ਅਞ੍ਞਤ੍ਰੇਵ ਸਮਣੇਨ ਗੋਤਮੇਨ ਗਮ੍ਭੀਰਂ ਨਦਿਤਬ੍ਬਂ ਮਞ੍ਞਸੀ’’ਤਿ. ਅਥ ਖੋ ਤੇ ਪਰਿਬ੍ਬਾਜਕਾ ਸਰਭਂ ਪਰਿਬ੍ਬਾਜਕਂ ਸਮਨ੍ਤਤੋ ਵਾਚਾਯਸਨ੍ਨਿਤੋਦਕੇਨ ਸਞ੍ਜਮ੍ਭਰਿਮਕਂਸੂਤਿ. ਚਤੁਤ੍ਥਂ.