੬. ਸਂਸਪ੍ਪਨੀਯਸੁਤ੍ਤਂ

੨੧੬. ‘‘ਸਂਸਪ੍ਪਨੀਯਪਰਿਯਾਯਂ ਵੋ, ਭਿਕ੍ਖਵੇ, ਧਮ੍ਮਪਰਿਯਾਯਂ ਦੇਸੇਸ੍ਸਾਮਿ. ਤਂ ਸੁਣਾਥ, ਸਾਧੁਕਂ ਮਨਸਿ ਕਰੋਥ; ਭਾਸਿਸ੍ਸਾਮੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

‘‘ਕਤਮੋ ਚ, ਭਿਕ੍ਖਵੇ, ਸਂਸਪ੍ਪਨੀਯਪਰਿਯਾਯੋ ਧਮ੍ਮਪਰਿਯਾਯੋ? ਕਮ੍ਮਸ੍ਸਕਾ, ਭਿਕ੍ਖਵੇ, ਸਤ੍ਤਾ ਕਮ੍ਮਦਾਯਾਦਾ ਕਮ੍ਮਯੋਨੀ ਕਮ੍ਮਬਨ੍ਧੂ ਕਮ੍ਮਪਟਿਸਰਣਾ, ਯਂ ਕਮ੍ਮਂ ਕਰੋਨ੍ਤਿ – ਕਲ੍ਯਾਣਂ ਵਾ ਪਾਪਕਂ ਵਾ – ਤਸ੍ਸ ਦਾਯਾਦਾ ਭਵਨ੍ਤਿ.

‘‘ਇਧ, ਭਿਕ੍ਖਵੇ, ਏਕਚ੍ਚੋ ਪਾਣਾਤਿਪਾਤੀ ਹੋਤਿ ਲੁਦ੍ਦੋ ਲੋਹਿਤਪਾਣਿ ਹਤਪਹਤੇ ਨਿਵਿਟ੍ਠੋ, ਅਦਯਾਪਨ੍ਨੋ ਸਬ੍ਬਪਾਣਭੂਤੇਸੁ. ਸੋ ਸਂਸਪ੍ਪਤਿ ਕਾਯੇਨ, ਸਂਸਪ੍ਪਤਿ ਵਾਚਾਯ, ਸਂਸਪ੍ਪਤਿ ਮਨਸਾ. ਤਸ੍ਸ ਜਿਮ੍ਹਂ ਕਾਯਕਮ੍ਮਂ ਹੋਤਿ, ਜਿਮ੍ਹਂ ਵਚੀਕਮ੍ਮਂ, ਜਿਮ੍ਹਂ ਮਨੋਕਮ੍ਮਂ, ਜਿਮ੍ਹਾ ਗਤਿ, ਜਿਮ੍ਹੁਪਪਤ੍ਤਿ.

‘‘ਜਿਮ੍ਹਗਤਿਕਸ੍ਸ ਖੋ ਪਨਾਹਂ, ਭਿਕ੍ਖਵੇ, ਜਿਮ੍ਹੁਪਪਤ੍ਤਿਕਸ੍ਸ ਦ੍ਵਿਨ੍ਨਂ ਗਤੀਨਂ ਅਞ੍ਞਤਰਂ ਗਤਿਂ ਵਦਾਮਿ – ਯੇ ਵਾ ਏਕਨ੍ਤਦੁਕ੍ਖਾ ਨਿਰਯਾ ਯਾ ਵਾ ਸਂਸਪ੍ਪਜਾਤਿਕਾ ਤਿਰਚ੍ਛਾਨਯੋਨਿ. ਕਤਮਾ ਚ ਸਾ, ਭਿਕ੍ਖਵੇ, ਸਂਸਪ੍ਪਜਾਤਿਕਾ ਤਿਰਚ੍ਛਾਨਯੋਨਿ? ਅਹਿ ਵਿਚ੍ਛਿਕਾ ਸਤਪਦੀ ਨਕੁਲਾ ਬਿਲ਼ਾਰਾ ਮੂਸਿਕਾ ਉਲੂਕਾ, ਯੇ ਵਾ ਪਨਞ੍ਞੇਪਿ ਕੇਚਿ ਤਿਰਚ੍ਛਾਨਯੋਨਿਕਾ ਸਤ੍ਤਾ ਮਨੁਸ੍ਸੇ ਦਿਸ੍ਵਾ ਸਂਸਪ੍ਪਨ੍ਤਿ. ਇਤਿ ਖੋ, ਭਿਕ੍ਖਵੇ, ਭੂਤਾ ਭੂਤਸ੍ਸ ਉਪਪਤ੍ਤਿ ਹੋਤਿ. ਯਂ ਕਰੋਤਿ ਤੇਨ ਉਪਪਜ੍ਜਤਿ. ਉਪਪਨ੍ਨਮੇਨਂ ਫਸ੍ਸਾ ਫੁਸਨ੍ਤਿ. ਏਵਮਹਂ, ਭਿਕ੍ਖਵੇ, ‘ਕਮ੍ਮਦਾਯਾਦਾ ਸਤ੍ਤਾ’ਤਿ ਵਦਾਮਿ.

‘‘ਇਧ ਪਨ, ਭਿਕ੍ਖਵੇ, ਏਕਚ੍ਚੋ ਅਦਿਨ੍ਨਾਦਾਯੀ ਹੋਤਿ…ਪੇ… ਕਾਮੇਸੁਮਿਚ੍ਛਾਚਾਰੀ ਹੋਤਿ… ਮੁਸਾਵਾਦੀ ਹੋਤਿ… ਪਿਸੁਣਵਾਚੋ ਹੋਤਿ… ਫਰੁਸਵਾਚੋ ਹੋਤਿ… ਸਮ੍ਫਪ੍ਪਲਾਪੀ ਹੋਤਿ… ਅਭਿਜ੍ਝਾਲੁ ਹੋਤਿ… ਬ੍ਯਾਪਨ੍ਨਚਿਤ੍ਤੋ ਹੋਤਿ… ਮਿਚ੍ਛਾਦਿਟ੍ਠਿਕੋ ਹੋਤਿ ਵਿਪਰੀਤਦਸ੍ਸਨੋ – ‘ਨਤ੍ਥਿ ਦਿਨ੍ਨਂ…ਪੇ… ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਨ੍ਤੀ’ਤਿ. ਸੋ ਸਂਸਪ੍ਪਤਿ ਕਾਯੇਨ, ਸਂਸਪ੍ਪਤਿ ਵਾਚਾਯ, ਸਂਸਪ੍ਪਤਿ ਮਨਸਾ. ਤਸ੍ਸ ਜਿਮ੍ਹਂ ਕਾਯਕਮ੍ਮਂ ਹੋਤਿ, ਜਿਮ੍ਹਂ ਵਚੀਕਮ੍ਮਂ, ਜਿਮ੍ਹਂ ਮਨੋਕਮ੍ਮਂ, ਜਿਮ੍ਹਾ ਗਤਿ, ਜਿਮ੍ਹੁਪਪਤ੍ਤਿ.

‘‘ਜਿਮ੍ਹਗਤਿਕਸ੍ਸ ਖੋ ਪਨਾਹਂ, ਭਿਕ੍ਖਵੇ, ਜਿਮ੍ਹੁਪਪਤ੍ਤਿਕਸ੍ਸ ਦ੍ਵਿਨ੍ਨਂ ਗਤੀਨਂ ਅਞ੍ਞਤਰਂ ਗਤਿਂ ਵਦਾਮਿ – ਯੇ ਵਾ ਏਕਨ੍ਤਦੁਕ੍ਖਾ ਨਿਰਯਾ ਯਾ ਵਾ ਸਂਸਪ੍ਪਜਾਤਿਕਾ ਤਿਰਚ੍ਛਾਨਯੋਨਿ. ਕਤਮਾ ਚ ਸਾ, ਭਿਕ੍ਖਵੇ, ਸਂਸਪ੍ਪਜਾਤਿਕਾ ਤਿਰਚ੍ਛਾਨਯੋਨਿ? ਅਹਿ ਵਿਚ੍ਛਿਕਾ ਸਤਪਦੀ ਨਕੁਲਾ ਬਿਲ਼ਾਰਾ ਮੂਸਿਕਾ ਉਲੂਕਾ, ਯੇ ਵਾ ਪਨਞ੍ਞੇਪਿ ਕੇਚਿ ਤਿਰਚ੍ਛਾਨਯੋਨਿਕਾ ਸਤ੍ਤਾ ਮਨੁਸ੍ਸੇ ਦਿਸ੍ਵਾ ਸਂਸਪ੍ਪਨ੍ਤਿ. ਇਤਿ ਖੋ, ਭਿਕ੍ਖਵੇ, ਭੂਤਾ ਭੂਤਸ੍ਸ ਉਪਪਤ੍ਤਿ ਹੋਤਿ, ਯਂ ਕਰੋਤਿ ਤੇਨ ਉਪਪਜ੍ਜਤਿ. ਉਪਪਨ੍ਨਮੇਨਂ ਫਸ੍ਸਾ ਫੁਸਨ੍ਤਿ. ਏਵਮਹਂ, ਭਿਕ੍ਖਵੇ, ‘ਕਮ੍ਮਦਾਯਾਦਾ ਸਤ੍ਤਾ’ਤਿ ਵਦਾਮਿ. ਕਮ੍ਮਸ੍ਸਕਾ, ਭਿਕ੍ਖਵੇ, ਸਤ੍ਤਾ ਕਮ੍ਮਦਾਯਾਦਾ ਕਮ੍ਮਯੋਨੀ ਕਮ੍ਮਬਨ੍ਧੂ ਕਮ੍ਮਪਟਿਸਰਣਾ, ਯਂ ਕਮ੍ਮਂ ਕਰੋਨ੍ਤਿ – ਕਲ੍ਯਾਣਂ ਵਾ ਪਾਪਕਂ ਵਾ – ਤਸ੍ਸ ਦਾਯਾਦਾ ਭਵਨ੍ਤਿ.

‘‘ਇਧ, ਭਿਕ੍ਖਵੇ, ਏਕਚ੍ਚੋ ਪਾਣਾਤਿਪਾਤਂ ਪਹਾਯ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ ਨਿਹਿਤਦਣ੍ਡੋ ਨਿਹਿਤਸਤ੍ਥੋ, ਲਜ੍ਜੀ ਦਯਾਪਨ੍ਨੋ ਸਬ੍ਬਪਾਣਭੂਤਹਿਤਾਨੁਕਮ੍ਪੀ ਵਿਹਰਤਿ. ਸੋ ਨ ਸਂਸਪ੍ਪਤਿ ਕਾਯੇਨ, ਨ ਸਂਸਪ੍ਪਤਿ ਵਾਚਾਯ, ਨ ਸਂਸਪ੍ਪਤਿ ਮਨਸਾ. ਤਸ੍ਸ ਉਜੁ ਕਾਯਕਮ੍ਮਂ ਹੋਤਿ, ਉਜੁ ਵਚੀਕਮ੍ਮਂ, ਉਜੁ ਮਨੋਕਮ੍ਮਂ, ਉਜੁ ਗਤਿ, ਉਜੁਪਪਤ੍ਤਿ.

‘‘ਉਜੁਗਤਿਕਸ੍ਸ ਖੋ ਪਨਾਹਂ, ਭਿਕ੍ਖਵੇ, ਉਜੁਪਪਤ੍ਤਿਕਸ੍ਸ ਦ੍ਵਿਨ੍ਨਂ ਗਤੀਨਂ ਅਞ੍ਞਤਰਂ ਗਤਿਂ ਵਦਾਮਿ – ਯੇ ਵਾ ਏਕਨ੍ਤਸੁਖਾ ਸਗ੍ਗਾ ਯਾਨਿ ਵਾ ਪਨ ਤਾਨਿ ਉਚ੍ਚਾਕੁਲਾਨਿ ਖਤ੍ਤਿਯਮਹਾਸਾਲਕੁਲਾਨਿ ਵਾ ਬ੍ਰਾਹ੍ਮਣਮਹਾਸਾਲਕੁਲਾਨਿ ਵਾ ਗਹਪਤਿਮਹਾਸਾਲਕੁਲਾਨਿ ਵਾ ਅਡ੍ਢਾਨਿ ਮਹਦ੍ਧਨਾਨਿ ਮਹਾਭੋਗਾਨਿ ਪਹੂਤਜਾਤਰੂਪਰਜਤਾਨਿ ਪਹੂਤਵਿਤ੍ਤੂਪਕਰਣਾਨਿ ਪਹੂਤਧਨਧਞ੍ਞਾਨਿ. ਇਤਿ ਖੋ, ਭਿਕ੍ਖਵੇ, ਭੂਤਾ ਭੂਤਸ੍ਸ ਉਪਪਤ੍ਤਿ ਹੋਤਿ. ਯਂ ਕਰੋਤਿ ਤੇਨ ਉਪਪਜ੍ਜਤਿ. ਉਪਪਨ੍ਨਮੇਨਂ ਫਸ੍ਸਾ ਫੁਸਨ੍ਤਿ. ਏਵਮਹਂ, ਭਿਕ੍ਖਵੇ, ‘ਕਮ੍ਮਦਾਯਾਦਾ ਸਤ੍ਤਾ’ਤਿ ਵਦਾਮਿ.

‘‘ਇਧ ਪਨ, ਭਿਕ੍ਖਵੇ, ਏਕਚ੍ਚੋ ਅਦਿਨ੍ਨਾਦਾਨਂ ਪਹਾਯ ਅਦਿਨ੍ਨਾਦਾਨਾ ਪਟਿਵਿਰਤੋ ਹੋਤਿ…ਪੇ… ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ ਹੋਤਿ… ਮੁਸਾਵਾਦਂ ਪਹਾਯ ਮੁਸਾਵਾਦਾ ਪਟਿਵਿਰਤੋ ਹੋਤਿ… ਪਿਸੁਣਂ ਵਾਚਂ ਪਹਾਯ ਪਿਸੁਣਾਯ ਵਾਚਾਯ ਪਟਿਵਿਰਤੋ ਹੋਤਿ… ਫਰੁਸਂ ਵਾਚਂ ਪਹਾਯ ਫਰੁਸਾਯ ਵਾਚਾਯ ਪਟਿਵਿਰਤੋ ਹੋਤਿ… ਸਮ੍ਫਪ੍ਪਲਾਪਂ ਪਹਾਯ ਸਮ੍ਫਪ੍ਪਲਾਪਾ ਪਟਿਵਿਰਤੋ ਹੋਤਿ… ਅਨਭਿਜ੍ਝਾਲੁ ਹੋਤਿ… ਅਬ੍ਯਾਪਨ੍ਨਚਿਤ੍ਤੋ ਹੋਤਿ… ਸਮ੍ਮਾਦਿਟ੍ਠਿਕੋ ਹੋਤਿ ਅਵਿਪਰੀਤਦਸ੍ਸਨੋ – ‘ਅਤ੍ਥਿ ਦਿਨ੍ਨਂ…ਪੇ… ਯੇ ਇਮਞ੍ਚ ਲੋਕਂ ਪਰਞ੍ਚ ਲੋਕਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਨ੍ਤੀ’ਤਿ. ਸੋ ਨ ਸਂਸਪ੍ਪਤਿ ਕਾਯੇਨ, ਨ ਸਂਸਪ੍ਪਤਿ ਵਾਚਾਯ, ਨ ਸਂਸਪ੍ਪਤਿ ਮਨਸਾ. ਤਸ੍ਸ ਉਜੁ ਕਾਯਕਮ੍ਮਂ ਹੋਤਿ, ਉਜੁ ਵਚੀਕਮ੍ਮਂ, ਉਜੁ ਮਨੋਕਮ੍ਮਂ, ਉਜੁ ਗਤਿ, ਉਜੁਪਪਤ੍ਤਿ.

‘‘ਉਜੁਗਤਿਕਸ੍ਸ ਖੋ ਪਨ ਅਹਂ, ਭਿਕ੍ਖਵੇ, ਉਜੁਪਪਤ੍ਤਿਕਸ੍ਸ ਦ੍ਵਿਨ੍ਨਂ ਗਤੀਨਂ ਅਞ੍ਞਤਰਂ ਗਤਿਂ ਵਦਾਮਿ – ਯੇ ਵਾ ਏਕਨ੍ਤਸੁਖਾ ਸਗ੍ਗਾ ਯਾਨਿ ਵਾ ਪਨ ਤਾਨਿ ਉਚ੍ਚਾਕੁਲਾਨਿ ਖਤ੍ਤਿਯਮਹਾਸਾਲਕੁਲਾਨਿ ਵਾ ਬ੍ਰਾਹ੍ਮਣਮਹਾਸਾਲਕੁਲਾਨਿ ਵਾ ਗਹਪਤਿਮਹਾਸਾਲਕੁਲਾਨਿ ਵਾ ਅਡ੍ਢਾਨਿ ਮਹਦ੍ਧਨਾਨਿ ਮਹਾਭੋਗਾਨਿ ਪਹੂਤਜਾਤਰੂਪਰਜਤਾਨਿ ਪਹੂਤਵਿਤ੍ਤੂਪਕਰਣਾਨਿ ਪਹੂਤਧਨਧਞ੍ਞਾਨਿ. ਇਤਿ ਖੋ, ਭਿਕ੍ਖਵੇ, ਭੂਤਾ ਭੂਤਸ੍ਸ ਉਪਪਤ੍ਤਿ ਹੋਤਿ. ਯਂ ਕਰੋਤਿ ਤੇਨ ਉਪਪਜ੍ਜਤਿ. ਉਪਪਨ੍ਨਮੇਨਂ ਫਸ੍ਸਾ ਫੁਸਨ੍ਤਿ. ਏਵਮਹਂ, ਭਿਕ੍ਖਵੇ, ‘ਕਮ੍ਮਦਾਯਾਦਾ ਸਤ੍ਤਾ’ਤਿ ਵਦਾਮਿ.

‘‘ਕਮ੍ਮਸ੍ਸਕਾ, ਭਿਕ੍ਖਵੇ, ਸਤ੍ਤਾ ਕਮ੍ਮਦਾਯਾਦਾ ਕਮ੍ਮਯੋਨੀ ਕਮ੍ਮਬਨ੍ਧੂ ਕਮ੍ਮਪਟਿਸਰਣਾ, ਯਂ ਕਮ੍ਮਂ ਕਰੋਨ੍ਤਿ – ਕਲ੍ਯਾਣਂ ਵਾ ਪਾਪਕਂ ਵਾ – ਤਸ੍ਸ ਦਾਯਾਦਾ ਭਵਨ੍ਤਿ. ਅਯਂ ਖੋ ਸੋ, ਭਿਕ੍ਖਵੇ, ਸਂਸਪ੍ਪਨੀਯਪਰਿਯਾਯੋ ਧਮ੍ਮਪਰਿਯਾਯੋ’’ਤਿ. ਛਟ੍ਠਂ.