੨. ਅਧਿਵੁਤ੍ਤਿਪਦਸੁਤ੍ਤਂ

੨੨. ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਆਨਨ੍ਦਂ ਭਗਵਾ ਏਤਦਵੋਚ –

‘‘ਯੇ ਤੇ, ਆਨਨ੍ਦ, ਧਮ੍ਮਾ ਤੇਸਂ ਤੇਸਂ ਅਧਿਵੁਤ੍ਤਿਪਦਾਨਂ [ਅਧਿਮੁਤ੍ਤਿਪਦਾਨਂ (ਕ.)] ਅਭਿਞ੍ਞਾ ਸਚ੍ਛਿਕਿਰਿਯਾਯ ਸਂਵਤ੍ਤਨ੍ਤਿ, ਵਿਸਾਰਦੋ ਅਹਂ, ਆਨਨ੍ਦ, ਤਤ੍ਥ ਪਟਿਜਾਨਾਮਿ. ‘ਤੇਸਂ ਤੇਸਂ ਤਥਾ ਤਥਾ ਧਮ੍ਮਂ ਦੇਸੇਤੁਂ ਯਥਾ ਯਥਾ ਪਟਿਪਨ੍ਨੋ ਸਨ੍ਤਂ ਵਾ ਅਤ੍ਥੀਤਿ ਞਸ੍ਸਤਿ, ਅਸਨ੍ਤਂ ਵਾ ਨਤ੍ਥੀਤਿ ਞਸ੍ਸਤਿ, ਹੀਨਂ ਵਾ ਹੀਨਨ੍ਤਿ ਞਸ੍ਸਤਿ, ਪਣੀਤਂ ਵਾ ਪਣੀਤਨ੍ਤਿ ਞਸ੍ਸਤਿ, ਸਉਤ੍ਤਰਂ ਵਾ ਸਉਤ੍ਤਰਨ੍ਤਿ ਞਸ੍ਸਤਿ, ਅਨੁਤ੍ਤਰਂ ਵਾ ਅਨੁਤ੍ਤਰਨ੍ਤਿ ਞਸ੍ਸਤਿ; ਯਥਾ ਯਥਾ ਵਾ ਪਨ ਤਂ ਞਾਤੇਯ੍ਯਂ ਵਾ ਦਟ੍ਠੇਯ੍ਯਂ ਵਾ ਸਚ੍ਛਿਕਰੇਯ੍ਯਂ ਵਾ, ਤਥਾ ਤਥਾ ਞਸ੍ਸਤਿ ਵਾ ਦਕ੍ਖਤਿ ਵਾ ਸਚ੍ਛਿਕਰਿਸ੍ਸਤਿ ਵਾ’ਤਿ ਠਾਨਮੇਤਂ ਵਿਜ੍ਜਤਿ. ਏਤਦਾਨੁਤ੍ਤਰਿਯਂ, ਆਨਨ੍ਦ, ਞਾਣਾਨਂ ਯਦਿਦਂ ਤਤ੍ਥ ਤਤ੍ਥ ਯਥਾਭੂਤਞਾਣਂ. ਏਤਸ੍ਮਾ ਚਾਹਂ, ਆਨਨ੍ਦ, ਞਾਣਾ ਅਞ੍ਞਂ ਞਾਣਂ ਉਤ੍ਤਰਿਤਰਂ ਵਾ ਪਣੀਤਤਰਂ ਵਾ ਨਤ੍ਥੀਤਿ ਵਦਾਮਿ.

‘‘ਦਸਯਿਮਾਨਿ, ਆਨਨ੍ਦ, ਤਥਾਗਤਸ੍ਸ ਤਥਾਗਤਬਲਾਨਿ, ਯੇਹਿ ਬਲੇਹਿ ਸਮਨ੍ਨਾਗਤੋ ਤਥਾਗਤੋ ਆਸਭਂ ਠਾਨਂ ਪਟਿਜਾਨਾਤਿ, ਪਰਿਸਾਸੁ ਸੀਹਨਾਦਂ ਨਦਤਿ, ਬ੍ਰਹ੍ਮਚਕ੍ਕਂ ਪਵਤ੍ਤੇਤਿ. ਕਤਮਾਨਿ ਦਸ? ਇਧਾਨਨ੍ਦ, ਤਥਾਗਤੋ ਠਾਨਞ੍ਚ ਠਾਨਤੋ ਅਟ੍ਠਾਨਞ੍ਚ ਅਟ੍ਠਾਨਤੋ ਯਥਾਭੂਤਂ ਪਜਾਨਾਤਿ. ਯਮ੍ਪਾਨਨ੍ਦ, ਤਥਾਗਤੋ ਠਾਨਞ੍ਚ ਠਾਨਤੋ ਅਟ੍ਠਾਨਞ੍ਚ ਅਟ੍ਠਾਨਤੋ ਯਥਾਭੂਤਂ ਪਜਾਨਾਤਿ, ਇਦਮ੍ਪਾਨਨ੍ਦ, ਤਥਾਗਤਸ੍ਸ ਤਥਾਗਤਬਲਂ ਹੋਤਿ, ਯਂ ਬਲਂ ਆਗਮ੍ਮ ਤਥਾਗਤੋ ਆਸਭਂ ਠਾਨਂ ਪਟਿਜਾਨਾਤਿ, ਪਰਿਸਾਸੁ ਸੀਹਨਾਦਂ ਨਦਤਿ, ਬ੍ਰਹ੍ਮਚਕ੍ਕਂ ਪਵਤ੍ਤੇਤਿ.

‘‘ਪੁਨ ਚਪਰਂ, ਆਨਨ੍ਦ, ਤਥਾਗਤੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਕਮ੍ਮਸਮਾਦਾਨਾਨਂ ਠਾਨਸੋ ਹੇਤੁਸੋ ਵਿਪਾਕਂ ਯਥਾਭੂਤਂ ਪਜਾਨਾਤਿ. ਯਮ੍ਪਾਨਨ੍ਦ…ਪੇ… ਇਦਮ੍ਪਾਨਨ੍ਦ…ਪੇ….

‘‘ਪੁਨ ਚਪਰਂ, ਆਨਨ੍ਦ, ਤਥਾਗਤੋ ਸਬ੍ਬਤ੍ਥਗਾਮਿਨਿਂ ਪਟਿਪਦਂ ਯਥਾਭੂਤਂ ਪਜਾਨਾਤਿ. ਯਮ੍ਪਾਨਨ੍ਦ…ਪੇ… ਇਦਮ੍ਪਾਨਨ੍ਦ…ਪੇ….

‘‘ਪੁਨ ਚਪਰਂ, ਆਨਨ੍ਦ, ਤਥਾਗਤੋ ਅਨੇਕਧਾਤੁਂ ਨਾਨਾਧਾਤੁਂ ਲੋਕਂ ਯਥਾਭੂਤਂ ਪਜਾਨਾਤਿ. ਯਮ੍ਪਾਨਨ੍ਦ …ਪੇ… ਇਦਮ੍ਪਾਨਨ੍ਦ…ਪੇ….

‘‘ਪੁਨ ਚਪਰਂ, ਆਨਨ੍ਦ, ਤਥਾਗਤੋ ਸਤ੍ਤਾਨਂ ਨਾਨਾਧਿਮੁਤ੍ਤਿਕਤਂ ਯਥਾਭੂਤਂ ਪਜਾਨਾਤਿ. ਯਮ੍ਪਾਨਨ੍ਦ…ਪੇ… ਇਦਮ੍ਪਾਨਨ੍ਦ…ਪੇ….

‘‘ਪੁਨ ਚਪਰਂ, ਆਨਨ੍ਦ, ਤਥਾਗਤੋ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਇਨ੍ਦ੍ਰਿਯਪਰੋਪਰਿਯਤ੍ਤਂ ਯਥਾਭੂਤਂ ਪਜਾਨਾਤਿ. ਯਮ੍ਪਾਨਨ੍ਦ…ਪੇ… ਇਦਮ੍ਪਾਨਨ੍ਦ…ਪੇ….

‘‘ਪੁਨ ਚਪਰਂ, ਆਨਨ੍ਦ, ਤਥਾਗਤੋ ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਂ ਵੋਦਾਨਂ ਵੁਟ੍ਠਾਨਂ ਯਥਾਭੂਤਂ ਪਜਾਨਾਤਿ. ਯਮ੍ਪਾਨਨ੍ਦ…ਪੇ… ਇਦਮ੍ਪਾਨਨ੍ਦ…ਪੇ….

‘‘ਪੁਨ ਚਪਰਂ, ਆਨਨ੍ਦ, ਤਥਾਗਤੋ ਅਨੇਕਵਿਹਿਤਂ ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ, ਸੇਯ੍ਯਥਿਦਂ – ਏਕਮ੍ਪਿ ਜਾਤਿਂ ਦ੍ਵੇਪਿ ਜਾਤਿਯੋ…ਪੇ… ਇਤਿ ਸਾਕਾਰਂ ਸਉਦ੍ਦੇਸਂ ਅਨੇਕਵਿਹਿਤਂ ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ. ਯਮ੍ਪਾਨਨ੍ਦ…ਪੇ… ਇਦਮ੍ਪਾਨਨ੍ਦ…ਪੇ….

‘‘ਪੁਨ ਚਪਰਂ, ਆਨਨ੍ਦ, ਤਥਾਗਤੋ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ…ਪੇ… ਯਥਾਕਮ੍ਮੂਪਗੇ ਸਤ੍ਤੇ ਪਜਾਨਾਤਿ. ਯਮ੍ਪਾਨਨ੍ਦ…ਪੇ… ਇਦਮ੍ਪਾਨਨ੍ਦ…ਪੇ….

‘‘ਪੁਨ ਚਪਰਂ, ਆਨਨ੍ਦ, ਤਥਾਗਤੋ ਆਸਵਾਨਂ ਖਯਾ ਅਨਾਸਵਂ ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਂ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਤਿ. ਯਮ੍ਪਾਨਨ੍ਦ, ਤਥਾਗਤੋ ਆਸਵਾਨਂ ਖਯਾ ਅਨਾਸਵਂ ਚੇਤੋਵਿਮੁਤ੍ਤਿਂ…ਪੇ… ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਤਿ. ਇਦਮ੍ਪਾਨਨ੍ਦ, ਤਥਾਗਤਸ੍ਸ ਤਥਾਗਤਬਲਂ ਹੋਤਿ, ਯਂ ਬਲਂ ਆਗਮ੍ਮ ਤਥਾਗਤੋ ਆਸਭਂ ਠਾਨਂ ਪਟਿਜਾਨਾਤਿ, ਪਰਿਸਾਸੁ ਸੀਹਨਾਦਂ ਨਦਤਿ, ਬ੍ਰਹ੍ਮਚਕ੍ਕਂ ਪਵਤ੍ਤੇਤਿ.

‘‘ਇਮਾਨਿ ਖੋ, ਆਨਨ੍ਦ, ਦਸ ਤਥਾਗਤਸ੍ਸ ਤਥਾਗਤਬਲਾਨਿ, ਯੇਹਿ ਬਲੇਹਿ ਸਮਨ੍ਨਾਗਤੋ ਤਥਾਗਤੋ ਆਸਭਂ ਠਾਨਂ ਪਟਿਜਾਨਾਤਿ, ਪਰਿਸਾਸੁ ਸੀਹਨਾਦਂ ਨਦਤਿ, ਬ੍ਰਹ੍ਮਚਕ੍ਕਂ ਪਵਤ੍ਤੇਤੀ’’ਤਿ. ਦੁਤਿਯਂ.