૯. સમથા સમથસ્સ સાધારણવારો

૨૯૯. સમથા સમથસ્સ સાધારણા, સમથા સમથસ્સ અસાધારણા. સિયા સમથા સમથસ્સ સાધારણા, સિયા સમથા સમથસ્સ અસાધારણા.

કથં સિયા સમથા સમથસ્સ સાધારણા? કથં સિયા સમથા સમથસ્સ અસાધારણા? યેભુય્યસિકા સમ્મુખાવિનયસ્સ સાધારણા, સતિવિનયસ્સ અમૂળ્હવિનયસ્સ પટિઞ્ઞાતકરણસ્સ તસ્સપાપિયસિકાય તિણવત્થારકસ્સ અસાધારણા.

સતિવિનયો સમ્મુખાવિનયસ્સ સાધારણો, અમૂળ્હવિનયસ્સ પટિઞ્ઞાતકરણસ્સ તસ્સપાપિયસિકાય તિણવત્થારકસ્સ યેભુય્યસિકાય અસાધારણો.

અમૂળ્હવિનયો સમ્મુખાવિનયસ્સ સાધારણો, પટિઞ્ઞાતકરણસ્સ તસ્સપાપિયસિકાય તિણવત્થારકસ્સ યેભુય્યસિકાય સતિવિનયસ્સ અસાધારણો.

પટિઞ્ઞાતકરણં સમ્મુખાવિનયસ્સ સાધારણં, તસ્સપાપિયસિકાય તિણવત્થારકસ્સ યેભુય્યસિકાય સતિવિનયસ્સ અમૂળ્હવિનયસ્સ અસાધારણં.

તસ્સપાપિયસિકા સમ્મુખાવિનયસ્સ સાધારણા, તિણવત્થારકસ્સ યેભુય્યસિકાય સતિવિનયસ્સ અમૂળ્હવિનયસ્સ પટિઞ્ઞાતકરણસ્સ અસાધારણા.

તિણવત્થારકો સમ્મુખાવિનયસ્સ સાધારણો, યેભુય્યસિકાય સતિવિનયસ્સ અમૂળ્હવિનયસ્સ પટિઞ્ઞાતકરણસ્સ તસ્સપાપિયસિકાય અસાધારણો. એવં સિયા સમથા સમથસ્સ સાધારણા; એવં સિયા સમથા સમથસ્સ અસાધારણા.

સમથા સમથસ્સ સાધારણવારો નિટ્ઠિતો નવમો.