૪. વિપત્તિપચ્ચયવારો

૨૮૪. સીલવિપત્તિપચ્ચયા કતિ આપત્તિયો આપજ્જતિ? સીલવિપત્તિપચ્ચયા ચતસ્સો આપત્તિયો આપજ્જતિ – ભિક્ખુની જાનં પારાજિકં ધમ્મં પટિચ્છાદેતિ, આપત્તિ પારાજિકસ્સ; વેમતિકા પટિચ્છાદેતિ, આપત્તિ થુલ્લચ્ચયસ્સ; ભિક્ખુ સઙ્ઘાદિસેસં પટિચ્છાદેતિ, આપત્તિ પાચિત્તિયસ્સ; અત્તનો દુટ્ઠુલ્લં આપત્તિં પટિચ્છાદેતિ, આપત્તિ દુક્કટસ્સ – સીલવિપત્તિપચ્ચયા ઇમા ચતસ્સો આપત્તિયો આપજ્જતિ.

તા આપત્તિયો ચતુન્નં વિપત્તીનં કતિ વિપત્તિયો ભજન્તિ…પે… સત્તન્નં સમથાનં કતિહિ સમથેહિ સમ્મન્તિ? તા આપત્તિયો ચતુન્નં વિપત્તીનં દ્વે વિપત્તિયો ભજન્તિ – સિયા સીલવિપત્તિં, સિયા આચારવિપત્તિં. સત્તન્નં આપત્તિક્ખન્ધાનં ચતૂહિ આપત્તિક્ખન્ધેહિ સઙ્ગહિતા – સિયા પારાજિકાપત્તિક્ખન્ધેન, સિયા થુલ્લચ્ચયાપત્તિક્ખન્ધેન, સિયા પાચિત્તિયાપત્તિક્ખન્ધેન, સિયા દુક્કટાપત્તિક્ખન્ધેન. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠન્તિ – કાયતો ચ વાચતો ચ ચિત્તતો ચ સમુટ્ઠન્તિ. ચતુન્નં અધિકરણાનં, આપત્તાધિકરણં. સત્તન્નં સમથાનં તીહિ સમથેહિ સમ્મન્તિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ.

૨૮૫. આચારવિપત્તિપચ્ચયા કતિ આપત્તિયો આપજ્જતિ? આચારવિપત્તિપચ્ચયા એકં આપત્તિં આપજ્જતિ. આચારવિપત્તિં પટિચ્છાદેતિ, આપત્તિ દુક્કટસ્સ – આચારવિપત્તિપચ્ચયા ઇમં એકં આપત્તિં આપજ્જતિ.

સા આપત્તિ ચતુન્નં વિપત્તીનં કતિ વિપત્તિયો ભજતિ …પે… સત્તન્નં સમથાનં કતિહિ સમથેહિ સમ્મતિ? સા આપત્તિ ચતુન્નં વિપત્તીનં એકં વિપત્તિં ભજતિ – આચારવિપત્તિં. સત્તન્નં આપત્તિક્ખન્ધાનં એકેન આપત્તિક્ખન્ધેન સઙ્ગહિતા – દુક્કટાપત્તિક્ખન્ધેન. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ. ચતુન્નં અધિકરણાનં આપત્તાધિકરણં. સત્તન્નં સમથાનં તીહિ સમથેહિ સમ્મતિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ.

૨૮૬. દિટ્ઠિવિપત્તિપચ્ચયા કતિ આપત્તિયો આપજ્જતિ? દિટ્ઠિવિપત્તિપચ્ચયા દ્વે આપત્તિયો આપજ્જતિ. પાપિકાય દિટ્ઠિયા યાવતતિયં સમનુભાસનાય ન પટિનિસ્સજ્જતિ, ઞત્તિયા દુક્કટં [ઞત્તિયા દુક્કટં, દ્વીહિ કમ્મવાચાહિ દુક્કટા (સ્યા. ક.)]; કમ્મવાચાપરિયોસાને આપત્તિ પાચિત્તિયસ્સ – દિટ્ઠિવિપત્તિપચ્ચયા ઇમા દ્વે આપત્તિયો આપજ્જતિ.

તા આપત્તિયો ચતુન્નં વિપત્તીનં કતિ વિપત્તિયો ભજન્તિ…પે… સત્તન્નં સમથાનં કતિહિ સમથેહિ સમ્મન્તિ? તા આપત્તિયો ચતુન્નં વિપત્તીનં એકં વિપત્તિં ભજન્તિ – આચારવિપત્તિં. સત્તન્નં આપત્તિક્ખન્ધાનં દ્વીહિ આપત્તિક્ખન્ધેહિ સઙ્ગહિતા – સિયા પાચિત્તિયાપત્તિક્ખન્ધેન, સિયા દુક્કટાપત્તિક્ખન્ધેન. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠન્તિ – કાયતો ચ વાચતો ચ ચિત્તતો ચ સમુટ્ઠન્તિ. ચતુન્નં અધિકરણાનં, આપત્તાધિકરણં. સત્તન્નં સમથાનં તીહિ સમથેહિ સમ્મન્તિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ.

૨૮૭. આજીવવિપત્તિપચ્ચયા કતિ આપત્તિયો આપજ્જતિ? આજીવવિપત્તિપચ્ચયા છ આપત્તિયો આપજ્જતિ – આજીવહેતુ આજીવકારણા પાપિચ્છો ઇચ્છાપકતો અસન્તં અભૂતં ઉત્તરિમનુસ્સધમ્મં ઉલ્લપતિ, આપત્તિ પારાજિકસ્સ; આજીવહેતુ આજીવકારણા સઞ્ચરિત્તં સમાપજ્જતિ, આપત્તિ સઙ્ઘાદિસેસસ્સ; આજીવહેતુ આજીવકારણા ‘‘યો તે વિહારે વસતિ, સો ભિક્ખુ અરહા’’તિ ભણતિ, પટિવિજાનન્તસ્સ આપત્તિ થુલ્લચ્ચયસ્સ; આજીવહેતુ આજીવકારણા ભિક્ખુ પણીતભોજનાનિ અત્તનો અત્થાય વિઞ્ઞાપેત્વા ભુઞ્જતિ, આપત્તિ પાચિત્તિયસ્સ; આજીવહેતુ આજીવકારણા ભિક્ખુની પણીતભોજનાનિ અત્તનો અત્થાય વિઞ્ઞાપેત્વા ભુઞ્જતિ, આપત્તિ પાટિદેસનીયસ્સ; આજીવહેતુ આજીવકારણા સૂપં વા ઓદનં વા અગિલાનો અત્તનો અત્થાય વિઞ્ઞાપેત્વા ભુઞ્જતિ, આપત્તિ દુક્કટસ્સ – આજીવવિપત્તિપચ્ચયા ઇમા છ આપત્તિયો આપજ્જતિ.

તા આપત્તિયો ચતુન્નં વિપત્તીનં કતિ વિપત્તિયો ભજન્તિ…પે… સત્તન્નં સમથાનં કતિહિ સમથેહિ સમ્મન્તિ. તા આપત્તિયો ચતુન્નં વિપત્તીનં દ્વે વિપત્તિયો ભજન્તિ – સિયા સીલવિપત્તિં, સિયા આચારવિપત્તિં. સત્તન્નં આપત્તિક્ખન્ધાનં છહિ આપત્તિક્ખન્ધેહિ સઙ્ગહિતા – સિયા પારાજિકાપત્તિક્ખન્ધેન, સિયા સઙ્ઘાદિસેસાપત્તિક્ખન્ધેન, સિયા થુલ્લચ્ચયાપત્તિક્ખન્ધેન, સિયા પાચિત્તિયાપત્તિક્ખન્ધેન, સિયા પાટિદેસનીયાપત્તિક્ખન્ધેન, સિયા દુક્કટાપત્તિક્ખન્ધેન. છન્નં આપત્તિસમુટ્ઠાનાનં છહિ સમુટ્ઠાનેહિ સમુટ્ઠન્તિ – સિયા કાયતો સમુટ્ઠન્તિ, ન વાચતો ન ચિત્તતો; સિયા વાચતો સમુટ્ઠન્તિ, ન કાયતો ન ચિત્તતો; સિયા કાયતો ચ વાચતો ચ સમુટ્ઠન્તિ, ન ચિત્તતો; સિયા કાયતો ચ ચિત્તતો ચ સમુટ્ઠન્તિ, ન વાચતો; સિયા વાચતો ચ ચિત્તતો ચ સમુટ્ઠન્તિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠન્તિ. ચતુન્નં અધિકરણાનં, આપત્તાધિકરણં. સત્તન્નં સમથાનં તીહિ સમથેહિ સમ્મન્તિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ.

વિપત્તિપચ્ચયવારો નિટ્ઠિતો ચતુત્થો.