૫. અધિકરણપચ્ચયવારો

૨૮૮. વિવાદાધિકરણપચ્ચયા કતિ આપત્તિયો આપજ્જતિ? વિવાદાધિકરણપચ્ચયા દ્વે આપત્તિયો આપજ્જતિ – ઉપસમ્પન્નં ઓમસતિ, આપત્તિ પાચિત્તિયસ્સ; અનુપસમ્પન્નં ઓમસતિ, આપત્તિ દુક્કટસ્સ – વિવાદાધિકરણપચ્ચયા ઇમા દ્વે આપત્તિયો આપજ્જતિ.

તા આપત્તિયો ચતુન્નં વિપત્તીનં કતિ વિપત્તિયો ભજન્તિ…પે… સત્તન્નં સમથાનં કતિહિ સમથેહિ સમ્મન્તિ? તા આપત્તિયો ચતુન્નં વિપત્તીનં એકં વિપત્તિં ભજન્તિ – આચારવિપત્તિં. સત્તન્નં આપત્તિક્ખન્ધાનં દ્વીહિ આપત્તિક્ખન્ધેહિ સઙ્ગહિતા – સિયા પાચિત્તિયાપત્તિક્ખન્ધેન, સિયા દુક્કટાપત્તિક્ખન્ધેન. છન્નં આપત્તિસમુટ્ઠાનાનં તીહિ સમુટ્ઠાનેહિ સમુટ્ઠન્તિ – સિયા કાયતો ચ ચિત્તતો ચ સમુટ્ઠન્તિ, ન વાચતો; સિયા વાચતો ચ ચિત્તતો ચ સમુટ્ઠન્તિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠન્તિ. ચતુન્નં અધિકરણાનં, આપત્તાધિકરણં. સત્તન્નં સમથાનં તીહિ સમથેહિ સમ્મન્તિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ.

૨૮૯. અનુવાદાધિકરણપચ્ચયા કતિ આપત્તિયો આપજ્જતિ? અનુવાદાધિકરણપચ્ચયા તિસ્સો આપત્તિયો આપજ્જતિ. ભિક્ખું અમૂલકેન પારાજિકેન ધમ્મેન અનુદ્ધંસેતિ, આપત્તિ સઙ્ઘાદિસેસસ્સ; અમૂલકેન સઙ્ઘાદિસેસેન અનુદ્ધંસેતિ, આપત્તિ પાચિત્તિયસ્સ; અમૂલિકાય આચારવિપત્તિયા અનુદ્ધંસેતિ, આપત્તિ દુક્કટસ્સ – અનુવાદાધિકરણપચ્ચયા ઇમા તિસ્સો આપત્તિયો આપજ્જતિ.

તા આપત્તિયો ચતુન્નં વિપત્તીનં કતિ વિપત્તિયો ભજન્તિ…પે… સત્તન્નં સમથાનં કતિહિ સમથેહિ સમ્મન્તિ? તા આપત્તિયો ચતુન્નં વિપત્તીનં દ્વે વિપત્તિયો ભજન્તિ – સિયા સીલવિપત્તિં, સિયા આચારવિપત્તિં. સત્તન્નં આપત્તિક્ખન્ધાનં તીહિ આપત્તિક્ખન્ધેહિ સઙ્ગહિતા – સિયા સઙ્ઘાદિસેસાપત્તિક્ખન્ધેન, સિયા પાચિત્તિયાપત્તિક્ખન્ધેન, સિયા દુક્કટાપત્તિક્ખન્ધેન. છન્નં આપત્તિસમુટ્ઠાનાનં તીહિ સમુટ્ઠાનેહિ સમુટ્ઠન્તિ – સિયા કાયતો ચ ચિત્તતો ચ સમુટ્ઠન્તિ, ન વાચતો; સિયા વાચતો ચ ચિત્તતો ચ સમુટ્ઠન્તિ, ન કાયતો; સિયા કાયતો ચ વાચતો ચ ચિત્તતો ચ સમુટ્ઠન્તિ. ચતુન્નં અધિકરણાનં, આપત્તાધિકરણં. સત્તન્નં સમથાનં તીહિ સમથેહિ સમ્મન્તિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ.

૨૯૦. આપત્તાધિકરણપચ્ચયા કતિ આપત્તિયો આપજ્જતિ? આપત્તાધિકરણપચ્ચયા ચતસ્સો આપત્તિયો આપજ્જતિ. ભિક્ખુની જાનં પારાજિકં ધમ્મં પટિચ્છાદેતિ, આપત્તિ પારાજિકસ્સ; વેમતિકા પટિચ્છાદેતિ, આપત્તિ થુલ્લચ્ચયસ્સ; ભિક્ખુ સઙ્ઘાદિસેસં પટિચ્છાદેતિ; આપત્તિ પાચિત્તિયસ્સ; આચારવિપત્તિં પટિચ્છાદેતિ, આપત્તિ દુક્કટસ્સ – આપત્તાધિકરણપચ્ચયા ઇમા ચતસ્સો આપત્તિયો આપજ્જતિ.

તા આપત્તિયો ચતુન્નં વિપત્તીનં કતિ વિપત્તિયો ભજન્તિ…પે… સત્તન્નં સમથાનં કતિહિ સમથેહિ સમ્મન્તિ? તા આપત્તિયો ચતુન્નં વિપત્તીનં દ્વે વિપત્તિયો ભજન્તિ – સિયા સીલવિપત્તિં, સિયા આચારવિપત્તિં. સત્તન્નં આપત્તિક્ખન્ધાનં ચતૂહિ આપત્તિક્ખન્ધેહિ સઙ્ગહિતા – સિયા પારાજિકાપત્તિક્ખન્ધેન, સિયા થુલ્લચ્ચયાપત્તિક્ખન્ધેન, સિયા પાચિત્તિયાપત્તિક્ખન્ધેન, સિયા દુક્કટાપત્તિક્ખન્ધેન. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠન્તિ – કાયતો ચ વાચતો ચ ચિત્તતો ચ સમુટ્ઠન્તિ. ચતુન્નં અધિકરણાનં, આપત્તાધિકરણં. સત્તન્નં સમથાનં તીહિ સમથેહિ સમ્મન્તિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ.

૨૯૧. કિચ્ચાધિકરણપચ્ચયા કતિ આપત્તિયો આપજ્જતિ? કિચ્ચાધિકરણપચ્ચયા પઞ્ચ આપત્તિયો આપજ્જતિ. ઉક્ખિત્તાનુવત્તિકા ભિક્ખુની યાવતતિયં સમનુભાસનાય ન પટિનિસ્સજ્જતિ, ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ પારાજિકસ્સ. ભેદકાનુવત્તકા ભિક્ખૂ યાવતતિયં સમનુભાસનાય ન પટિનિસ્સજ્જન્તિ, આપત્તિ સઙ્ઘાદિસેસસ્સ; પાપિકાય દિટ્ઠિયા યાવતતિયં સમનુભાસનાય ન પટિનિસ્સજ્જતિ, આપત્તિ પાચિત્તિયસ્સ – કિચ્ચાધિકરણપચ્ચયા ઇમા પઞ્ચ આપત્તિયો આપજ્જતિ.

તા આપત્તિયો ચતુન્નં વિપત્તીનં કતિ વિપત્તિયો ભજન્તિ…પે… સત્તન્નં સમથાનં કતિહિ સમથેહિ સમ્મન્તિ? તા આપત્તિયો ચતુન્નં વિપત્તીનં દ્વે વિપત્તિયો ભજન્તિ – સિયા સીલવિપત્તિં, સિયા આચારવિપત્તિં. સત્તન્નં આપત્તિક્ખન્ધાનં પઞ્ચહિ આપત્તિક્ખન્ધેહિ સઙ્ગહિતા – સિયા પારાજિકાપત્તિક્ખન્ધેન, સિયા સઙ્ઘાદિસેસાપત્તિક્ખન્ધેન, સિયા થુલ્લચ્ચયાપત્તિક્ખન્ધેન, સિયા પાચિત્તિયાપત્તિક્ખન્ધેન, સિયા દુક્કટાપત્તિક્ખન્ધેન. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠન્તિ – કાયતો ચ વાચતો ચ ચિત્તતો ચ સમુટ્ઠન્તિ. ચતુન્નં અધિકરણાનં, આપત્તાધિકરણં. સત્તન્નં સમથાનં તીહિ સમથેહિ સમ્મન્તિ – સિયા સમ્મુખાવિનયેન ચ પટિઞ્ઞાતકરણેન ચ, સિયા સમ્મુખાવિનયેન ચ તિણવત્થારકેન ચ.

ઠપેત્વા સત્ત આપત્તિયો સત્ત આપત્તિક્ખન્ધે, અવસેસા આપત્તિયો ચતુન્નં વિપત્તીનં કતિ વિપત્તિયો ભજન્તિ? સત્તન્નં આપત્તિક્ખન્ધાનં કતિહિ આપત્તિક્ખન્ધેહિ સઙ્ગહિતા? છન્નં આપત્તિસમુટ્ઠાનાનં કતિહિ સમુટ્ઠાનેહિ સમુટ્ઠન્તિ? ચતુન્નં અધિકરણાનં કતમં અધિકરણં? સત્તન્નં સમથાનં કતિહિ સમથેહિ સમ્મન્તિ? ઠપેત્વા સત્ત આપત્તિયો સત્ત આપત્તિક્ખન્ધે અવસેસા આપત્તિયો ચતુન્નં વિપત્તીનં ન કતમં વિપત્તિં ભજન્તિ? સત્તન્નં આપત્તિક્ખન્ધાનં ન કતમેન આપત્તિક્ખન્ધેન સઙ્ગહિતા. છન્નં આપત્તિસમુટ્ઠાનાનં ન કતમેન આપત્તિસમુટ્ઠાનેન સમુટ્ઠન્તિ. ચતુન્નં અધિકરણાનં ન કતમં અધિકરણં. સત્તન્નં સમથાનં ન કતમેન સમથેન સમ્મન્તિ. તં કિસ્સ હેતુ? ઠપેત્વા સત્ત આપત્તિયો સત્ત આપત્તિક્ખન્ધે, નત્થઞ્ઞા આપત્તિયોતિ.

અધિકરણપચ્ચયવારો નિટ્ઠિતો પઞ્ચમો.

અન્તરપેય્યાલં [અનન્તરપેય્યાલં (સી. સ્યા.)] નિટ્ઠિતં.

તસ્સુદ્દાનં –

કતિપુચ્છા સમુટ્ઠાના, કતાપત્તિ તથેવ ચ;

સમુટ્ઠાના વિપત્તિ ચ, તથાધિકરણેન ચાતિ.