૩. પાચિત્તિયાદિપઞ્હા

૪૮૧. અધિટ્ઠિતં રજનાય રત્તં;

કપ્પકતમ્પિ સન્તં;

પરિભુઞ્જન્તસ્સ આપત્તિ;

પઞ્હા મેસા કુસલેહિ ચિન્તિતા.

અત્થઙ્ગતે સૂરિયે ભિક્ખુ મંસાનિ ખાદતિ;

ન ઉમ્મત્તકો ન ચ પન ખિત્તચિત્તો;

ન ચાપિ સો વેદનાટ્ટો ભવેય્ય;

ન ચસ્સ હોતિ આપત્તિ;

સો ચ ધમ્મો સુગતેન દેસિતો;

પઞ્હા મેસા કુસલેહિ ચિન્તિતા.

ન રત્તચિત્તો ન ચ પન થેય્યચિત્તો;

ન ચાપિ સો પરં મરણાય ચેતયિ;

સલાકં દેન્તસ્સ હોતિ છેજ્જં;

પટિગ્ગણ્હન્તસ્સ થુલ્લચ્ચયં;

પઞ્હા મેસા કુસલેહિ ચિન્તિતા.

ન ચાપિ આરઞ્ઞકં સાસઙ્કસમ્મતં;

ન ચાપિ સઙ્ઘેન સમ્મુતિ દિન્ના;

ન ચસ્સ કથિનં અત્થતં તત્થેવ;

ચીવરં નિક્ખિપિત્વા ગચ્છેય્ય અડ્ઢયોજનં;

તત્થેવ અરુણં ઉગ્ગચ્છન્તસ્સ અનાપત્તિ;

પઞ્હા મેસા કુસલેહિ ચિન્તિતા.

કાયિકાનિ ન વાચસિકાનિ;

સબ્બાનિ નાનાવત્થુકાનિ;

અપુબ્બં અચરિમં આપજ્જેય્ય એકતો;

પઞ્હા મેસા કુસલેહિ ચિન્તિતા.

વાચસિકાનિ ન કાયિકાનિ;

સબ્બાનિ નાનાવત્થુકાનિ;

અપુબ્બં અચરિમં આપજ્જેય્ય એકતો;

પઞ્હા મેસા કુસલેહિ ચિન્તિતા.

તિસ્સિત્થિયો મેથુનં તં ન સેવે;

તયો પુરિસે તયો અનરિયપણ્ડકે;

ન ચાચરે મેથુનં બ્યઞ્જનસ્મિં;

છેજ્જં સિયા મેથુનધમ્મપચ્ચયા;

પઞ્હા મેસા કુસલેહિ ચિન્તિતા.

માતરં ચીવરં યાચે, નો ચ સઙ્ઘે [નો સંઘસ્સ (ક.), નો ચ સંઘસ્સ (સ્યા.), નો ચે સંઘસ્સ (સી.)] પરિણતં;

કેનસ્સ હોતિ આપત્તિ, અનાપત્તિ ચ ઞાતકે;

પઞ્હા મેસા કુસલેહિ ચિન્તિતા.

કુદ્ધો આરાધકો હોતિ, કુદ્ધો હોતિ ગરહિયો;

અથ કો નામ સો ધમ્મો, યેન કુદ્ધો પસંસિયો;

પઞ્હા મેસા કુસલેહિ ચિન્તિતા.

તુટ્ઠો આરાધકો હોતિ, તુટ્ઠો હોતિ ગરહિયો;

અથ કો નામ સો ધમ્મો, યેન તુટ્ઠો ગરહિયો;

પઞ્હા મેસા કુસલેહિ ચિન્તિતા.

સઙ્ઘાદિસેસં થુલ્લચ્ચયં;

પાચિત્તિયં પાટિદેસનીયં;

દુક્કટં આપજ્જેય્ય એકતો;

પઞ્હા મેસા કુસલેહિ ચિન્તિતા.

ઉભો પરિપુણ્ણવીસતિવસ્સા;

ઉભિન્નં એકુપજ્ઝાયો;

એકાચરિયો એકા કમ્મવાચા;

એકો ઉપસમ્પન્નો એકો અનુપસમ્પન્નો;

પઞ્હા મેસા કુસલેહિ ચિન્તિતા.

અકપ્પકતં નાપિ રજનાય રત્તં;

તેન નિવત્થો યેન કામં વજેય્ય;

ન ચસ્સ હોતિ આપત્તિ;

સો ચ ધમ્મો સુગતેન દેસિતો;

પઞ્હા મેસા કુસલેહિ ચિન્તિતા.

ન દેતિ ન પટિગ્ગણ્હાતિ, પટિગ્ગહો તેન ન વિજ્જતિ;

આપજ્જતિ ગરુકં ન લહુકં, તઞ્ચ પરિભોગપચ્ચયા;

પઞ્હા મેસા કુસલેહિ ચિન્તિતા.

ન દેતિ ન પટિગ્ગણ્હાતિ, પટિગ્ગહો તેન ન વિજ્જતિ;

આપજ્જતિ લહુકં ન ગરુકં, તઞ્ચ પરિભોગપચ્ચયા;

પઞ્હા મેસા કુસલેહિ ચિન્તિતા.

આપજ્જતિ ગરુકં સાવસેસં;

છાદેતિ અનાદરિયં પટિચ્ચ;

ન ભિક્ખુની નો ચ ફુસેય્ય વજ્જં;

પઞ્હા મેસા કુસલેહિ ચિન્તિતા.

સેદમોચનગાથા નિટ્ઠિતા.