પઞ્ચવગ્ગો

૧. કમ્મવગ્ગો

૪૮૨. ચત્તારિ કમ્માનિ. અપલોકનકમ્મં, ઞત્તિકમ્મં, ઞત્તિદુતિયકમ્મં, ઞત્તિચતુત્થકમ્મં – ઇમાનિ ચત્તારિ કમ્માનિ. કતિહાકારેહિ વિપજ્જન્તિ? ઇમાનિ ચત્તારિ કમ્માનિ પઞ્ચહાકારેહિ વિપજ્જન્તિ – વત્થુતો વા ઞત્તિતો વા અનુસ્સાવનતો વા સીમતો વા પરિસતો વા.

૪૮૩. કથં વત્થુતો કમ્માનિ વિપજ્જન્તિ? સમ્મુખાકરણીયં કમ્મં અસમ્મુખા કરોતિ, વત્થુવિપન્નં અધમ્મકમ્મં; પટિપુચ્છાકરણીયં કમ્મં અપટિપુચ્છા કરોતિ, વત્થુવિપન્નં અધમ્મકમ્મં; પટિઞ્ઞાય કરણીયં કમ્મં અપટિઞ્ઞાય કરોતિ, વત્થુવિપન્નં અધમ્મકમ્મં; સતિવિનયારહસ્સ અમૂળ્હવિનયં દેતિ, વત્થુવિપન્નં અધમ્મકમ્મં; અમૂળ્હવિનયારહસ્સ તસ્સપાપિયસિકાકમ્મં કરોતિ, વત્થુવિપન્નં અધમ્મકમ્મં; તસ્સપાપિયસિકાકમ્મારહસ્સ તજ્જનીયકમ્મં કરોતિ, વત્થુવિપન્નં અધમ્મકમ્મં; તજ્જનીયકમ્મારહસ્સ નિયસ્સકમ્મં કરોતિ, વત્થુવિપન્નં અધમ્મકમ્મં; નિયસ્સકમ્મારહસ્સ પબ્બાજનીયકમ્મં કરોતિ, વત્થુવિપન્નં અધમ્મકમ્મં; પબ્બાજનીયકમ્મારહસ્સ પટિસારણીયકમ્મં કરોતિ, વત્થુવિપન્નં અધમ્મકમ્મં; પટિસારણીયકમ્મારહસ્સ ઉક્ખેપનીયકમ્મં કરોતિ, વત્થુવિપન્નં અધમ્મકમ્મં; ઉક્ખેપનીયકમ્મારહસ્સ પરિવાસં દેતિ, વત્થુવિપન્નં અધમ્મકમ્મં; પરિવાસારહં મૂલાય પટિકસ્સતિ, વત્થુવિપન્નં અધમ્મકમ્મં; મૂલાયપટિકસ્સનારહસ્સ માનત્તં દેતિ, વત્થુવિપન્નં અધમ્મકમ્મં; માનત્તારહં અબ્ભેતિ, વત્થુવિપન્નં અધમ્મકમ્મં; અબ્ભાનારહં ઉપસમ્પાદેતિ, વત્થુવિપન્નં અધમ્મકમ્મં; અનુપોસથે ઉપોસથં કરોતિ, વત્થુવિપન્નં અધમ્મકમ્મં; અપવારણાય પવારેતિ, વત્થુવિપન્નં અધમ્મકમ્મં. એવં વત્થુતો કમ્માનિ વિપજ્જન્તિ.

૪૮૪. કથં ઞત્તિતો કમ્માનિ વિપજ્જન્તિ? પઞ્ચહાકારેહિ ઞત્તિતો કમ્માનિ વિપજ્જન્તિ – વત્થું ન પરામસતિ, સઙ્ઘં ન પરામસતિ, પુગ્ગલં ન પરામસતિ, ઞત્તિં ન પરામસતિ, પચ્છા વા ઞત્તિં ઠપેતિ – ઇમેહિ પઞ્ચહાકારેહિ ઞત્તિતો કમ્માનિ વિપજ્જન્તિ.

૪૮૫. કથં અનુસ્સાવનતો કમ્માનિ વિપજ્જન્તિ? પઞ્ચહાકારેહિ અનુસ્સાવનતો કમ્માનિ વિપજ્જન્તિ – વત્થું ન પરામસતિ, સઙ્ઘં ન પરામસતિ, પુગ્ગલં ન પરામસતિ, સાવનં હાપેતિ, અકાલે વા સાવેતિ – ઇમેહિ પઞ્ચહાકારેહિ અનુસ્સાવનતો કમ્માનિ વિપજ્જન્તિ.

૪૮૬. કથં સીમતો કમ્માનિ વિપજ્જન્તિ? એકાદસહિ આકારેહિ સીમતો કમ્માનિ વિપજ્જન્તિ – અતિખુદ્દકં સીમં સમ્મન્નતિ, અતિમહતિં સીમં સમ્મન્નતિ, ખણ્ડનિમિત્તં સીમં સમ્મન્નતિ, છાયાનિમિત્તં સીમં સમ્મન્નતિ, અનિમિત્તં સીમં સમ્મન્નતિ, બહિસીમે ઠિતો સીમં સમ્મન્નતિ, નદિયા સીમં સમ્મન્નતિ, સમુદ્દે સીમં સમ્મન્નતિ, જાતસ્સરે સીમં સમ્મન્નતિ, સીમાય સીમં સમ્ભિન્દતિ, સીમાય સીમં અજ્ઝોત્થરતિ – ઇમેહિ એકાદસહિ આકારેહિ સીમતો કમ્માનિ વિપજ્જન્તિ.

૪૮૭. કથં પરિસતો કમ્માનિ વિપજ્જન્તિ? દ્વાદસહિ આકારેહિ પરિસતો કમ્માનિ વિપજ્જન્તિ – ચતુવગ્ગકરણે કમ્મે યાવતિકા ભિક્ખૂ કમ્મપત્તા તે અનાગતા હોન્તિ, છન્દારહાનં છન્દો અનાહટો હોતિ, સમ્મુખીભૂતા પટિક્કોસન્તિ, ચતુવગ્ગકરણે કમ્મે યાવતિકા ભિક્ખૂ કમ્મપત્તા તે આગતા હોન્તિ, છન્દારહાનં છન્દો અનાહટો હોતિ, સમ્મુખીભૂતા પટિક્કોસન્તિ, ચતુવગ્ગકરણે કમ્મે યાવતિકા ભિક્ખૂ કમ્મપત્તા તે આગતા હોન્તિ, છન્દારહાનં છન્દો આહટો હોતિ, સમ્મુખીભૂતા પટિક્કોસન્તિ. પઞ્ચવગ્ગકરણે કમ્મે…પે… દસવગ્ગકરણે કમ્મે…પે… વીસતિવગ્ગકરણે કમ્મે યાવતિકા ભિક્ખૂ કમ્મપત્તા તે અનાગતા હોન્તિ, છન્દારહાનં છન્દો અનાહટો હોતિ, સમ્મુખીભૂતા પટિક્કોસન્તિ, વીસતિવગ્ગકરણે કમ્મે યાવતિકા ભિક્ખૂ કમ્મપત્તા, તે આગતા હોન્તિ, છન્દારહાનં છન્દો અનાહટો હોતિ, સમ્મુખીભૂતા પટિક્કોસન્તિ, વીસતિવગ્ગકરણે કમ્મે યાવતિકા ભિક્ખૂ કમ્મપત્તા, તે આગતા હોન્તિ, છન્દારહાનં છન્દો આહટો હોતિ સમ્મુખીભૂતા પટિક્કોસન્તિ – ઇમેહિ દ્વાદસહિ આકારેહિ પરિસતો કમ્માનિ વિપજ્જન્તિ.

૪૮૮. ચતુવગ્ગકરણે કમ્મે ચત્તારો ભિક્ખૂ પકતત્તા કમ્મપત્તા, અવસેસા પકતત્તા છન્દારહા. યસ્સ સઙ્ઘો કમ્મં કરોતિ સો નેવ કમ્મપત્તો નાપિ છન્દારહો, અપિ ચ કમ્મારહો. પઞ્ચવગ્ગકરણે કમ્મે પઞ્ચ ભિક્ખૂ પકતત્તા કમ્મપત્તા, અવસેસા પકતત્તા છન્દારહા. યસ્સ સઙ્ઘો કમ્મં કરોતિ સો નેવ કમ્મપત્તો નાપિ છન્દારહો, અપિ ચ કમ્મારહો. દસવગ્ગકરણે કમ્મે દસ ભિક્ખૂ પકતત્તા કમ્મપત્તા, અવસેસા પકતત્તા છન્દારહા. યસ્સ સઙ્ઘો કમ્મં કરોતિ સો નેવ કમ્મપત્તો નાપિ છન્દારહો, અપિ ચ કમ્મારહો. વીસતિવગ્ગકરણે કમ્મે વીસતિ ભિક્ખૂ પકતત્તા કમ્મપત્તા, અવસેસા પકતત્તા છન્દારહા. યસ્સ સઙ્ઘો કમ્મં કરોતિ સો નેવ કમ્મપત્તો નાપિ છન્દારહો, અપિ ચ કમ્મારહો.

૪૮૯. ચત્તારિ કમ્માનિ – અપલોકનકમ્મં, ઞત્તિકમ્મં, ઞત્તિદુતિયકમ્મં, ઞત્તિચતુત્થકમ્મં. ઇમાનિ ચત્તારિ કમ્માનિ કતિહાકારેહિ વિપજ્જન્તિ? ઇમાનિ ચત્તારિ કમ્માનિ પઞ્ચહાકારેહિ વિપજ્જન્તિ – વત્થુતો વા ઞત્તિતો વા અનુસ્સાવનતો વા સીમતો વા પરિસતો વા.

૪૯૦. કથં વત્થુતો કમ્માનિ વિપજ્જન્તિ? પણ્ડકં ઉપસમ્પાદેતિ, વત્થુવિપન્નં અધમ્મકમ્મં. થેય્યસંવાસકં ઉપસમ્પાદેતિ, વત્થુવિપન્નં અધમ્મકમ્મં. તિત્થિયપક્કન્તકં ઉપસમ્પાદેતિ, વત્થુવિપન્નં અધમ્મકમ્મં. તિરચ્છાનગતં ઉપસમ્પાદેતિ, વત્થુવિપન્નં અધમ્મકમ્મં. માતુઘાતકં ઉપસમ્પાદેતિ, વત્થુવિપન્નં અધમ્મકમ્મં. પિતુઘાતકં ઉપસમ્પાદેતિ, વત્થુવિપન્નં અધમ્મકમ્મં. અરહન્તઘાતકં ઉપસમ્પાદેતિ, વત્થુવિપન્નં અધમ્મકમ્મં. ભિક્ખુનિદૂસકં ઉપસમ્પાદેતિ, વત્થુવિપન્નં અધમ્મકમ્મં. સઙ્ઘભેદકં ઉપસમ્પાદેતિ, વત્થુવિપન્નં અધમ્મકમ્મં. લોહિતુપ્પાદકં ઉપસમ્પાદેતિ, વત્થુવિપન્નં અધમ્મકમ્મં. ઉભતોબ્યઞ્જનં ઉપસમ્પાદેતિ, વત્થુવિપન્નં અધમ્મકમ્મં. ઊનવીસતિવસ્સં પુગ્ગલં ઉપસમ્પાદેતિ, વત્થુવિપન્નં અધમ્મકમ્મં. એવં વત્થુતો કમ્માનિ વિપજ્જન્તિ.

૪૯૧. કથં ઞત્તિતો કમ્માનિ વિપજ્જન્તિ? પઞ્ચહાકારેહિ ઞત્તિતો કમ્માનિ વિપજ્જન્તિ. વત્થું ન પરામસતિ, સઙ્ઘં ન પરામસતિ, પુગ્ગલં ન પરામસતિ, ઞત્તિં ન પરામસતિ, પચ્છા વા ઞત્તિં ઠપેતિ – ઇમેહિ પઞ્ચહાકારેહિ ઞત્તિતો કમ્માનિ વિપજ્જન્તિ.

૪૯૨. કથં અનુસ્સાવનતો કમ્માનિ વિપજ્જન્તિ? પઞ્ચહાકારેહિ અનુસ્સાવનતો કમ્માનિ વિપજ્જન્તિ – વત્થું ન પરામસતિ, સઙ્ઘં ન પરામસતિ, પુગ્ગલં ન પરામસતિ, સાવનં હાપેતિ, અકાલે વા સાવેતિ – ઇમેહિ પઞ્ચહાકારેહિ અનુસ્સાવનતો કમ્માનિ વિપજ્જન્તિ.

૪૯૩. કથં સીમતો કમ્માનિ વિપજ્જન્તિ? એકાદસહિ આકારેહિ સીમતો કમ્માનિ વિપજ્જન્તિ. અતિખુદ્દકં સીમં સમ્મન્નતિ, અતિમહતિં સીમં સમ્મન્નતિ, ખણ્ડનિમિત્તં સીમં સમ્મન્નતિ, છાયાનિમિત્તં સીમં સમ્મન્નતિ, અનિમિત્તં સીમં સમ્મન્નતિ, બહિસીમે ઠિતો સીમં સમ્મન્નતિ, નદિયા સીમં સમ્મન્નતિ, સમુદ્દે સીમં સમ્મન્નતિ, જાતસ્સરે સીમં સમ્મન્નતિ, સીમાય સીમં સમ્ભિન્દતિ, સીમાય સીમં અજ્ઝોત્થરતિ – ઇમેહિ એકાદસહિ આકારેહિ સીમતો કમ્માનિ વિપજ્જન્તિ.

૪૯૪. કથં પરિસતો કમ્માનિ વિપજ્જન્તિ? દ્વાદસહિ આકારેહિ પરિસતો કમ્માનિ વિપજ્જન્તિ – ચતુવગ્ગકરણે કમ્મે યાવતિકા ભિક્ખૂ કમ્મપત્તા તે અનાગતા હોન્તિ, છન્દારહાનં છન્દો અનાહટો હોતિ, સમ્મુખીભૂતા પટિક્કોસન્તિ, ચતુવગ્ગકરણે કમ્મે યાવતિકા ભિક્ખૂ કમ્મપત્તા તે આગતા હોન્તિ, છન્દારહાનં છન્દો અનાહટો હોતિ, સમ્મુખીભૂતા પટિક્કોસન્તિ. ચતુવગ્ગકરણે કમ્મે યાવતિકા ભિક્ખૂ કમ્મપત્તા તે આગતા હોન્તિ, છન્દારહાનં છન્દો આહટો હોતિ સમ્મુખીભૂતા પટિક્કોસન્તિ. પઞ્ચવગ્ગકરણે કમ્મે…પે… દસવગ્ગકરણે કમ્મે…પે… વીસતિવગ્ગકરણે કમ્મે યાવતિકા ભિક્ખૂ કમ્મપત્તા તે અનાગતા હોન્તિ, છન્દારહાનં છન્દો અનાહટો હોતિ, સમ્મુખીભૂતા પટિક્કોસન્તિ. વીસતિવગ્ગકરણે કમ્મે યાવતિકા ભિક્ખૂ કમ્મપત્તા તે આગતા હોન્તિ, છન્દારહાનં છન્દો અનાહટો હોતિ, સમ્મુખીભૂતા પટિક્કોસન્તિ. વીસતિવગ્ગકરણે કમ્મે યાવતિકા ભિક્ખૂ કમ્મપત્તા તે આગતા હોન્તિ, છન્દારહાનં છન્દો આહટો હોતિ, સમ્મુખીભૂતા પટિક્કોસન્તિ – ઇમેહિ દ્વાદસહિ આકારેહિ પરિસતો કમ્માનિ વિપજ્જન્તિ.

૪૯૫. અપલોકનકમ્મં કતિ ઠાનાનિ ગચ્છતિ? ઞત્તિકમ્મં કતિ ઠાનાનિ ગચ્છતિ? ઞત્તિદુતિયકમ્મં કતિ ઠાનાનિ ગચ્છતિ? ઞત્તિચતુત્થકમ્મં કતિ ઠાનાનિ ગચ્છતિ? અપલોકનકમ્મં પઞ્ચ ઠાનાનિ ગચ્છતિ. ઞત્તિકમ્મં નવ ઠાનાનિ ગચ્છતિ. ઞત્તિદુતિયકમ્મં સત્ત ઠાનાનિ ગચ્છતિ. ઞત્તિચતુત્થકમ્મં સત્ત ઠાનાનિ ગચ્છતિ.

૪૯૬. અપલોકનકમ્મં કતમાનિ પઞ્ચ ઠાનાનિ ગચ્છતિ? ઓસારણં, નિસ્સારણં, ભણ્ડુકમ્મં, બ્રહ્મદણ્ડં, કમ્મલક્ખણઞ્ઞેવ પઞ્ચમં – અપલોકનકમ્મં ઇમાનિ પઞ્ચ ઠાનાનિ ગચ્છતિ. ઞત્તિકમ્મં કતમાનિ નવ ઠાનાનિ ગચ્છતિ? ઓસારણં, નિસ્સારણં, ઉપોસથં, પવારણં, સમ્મુતિં, દાનં, પટિગ્ગહં, પચ્ચુક્કડ્ઢનં, કમ્મલક્ખણઞ્ઞેવ નવમં – ઞત્તિકમ્મં ઇમાનિ નવ ઠાનાનિ ગચ્છતિ. ઞત્તિદુતિયકમ્મં કતમાનિ સત્ત ઠાનાનિ ગચ્છતિ? ઓસારણં, નિસ્સારણં, સમ્મુતિં, દાનં, ઉદ્ધરણં, દેસનં, કમ્મલક્ખણઞ્ઞેવ સત્તમં – ઞત્તિદુતિયકમ્મં ઇમાનિ સત્ત ઠાનાનિ ગચ્છતિ. ઞત્તિચતુત્થકમ્મં કતમાનિ સત્ત ઠાનાનિ ગચ્છતિ? ઓસારણં, નિસ્સારણં, સમ્મુતિં, દાનં, નિગ્ગહં, સમનુભાસનં, કમ્મલક્ખણઞ્ઞેવ સત્તમં – ઞત્તિચતુત્થકમ્મં ઇમાનિ સત્ત ઠાનાનિ ગચ્છતિ.

૪૯૭. ચતુવગ્ગકરણે કમ્મે ચત્તારો ભિક્ખૂ પકતત્તા કમ્મપત્તા, અવસેસા પકતત્તા છન્દારહા. યસ્સ સઙ્ઘો કમ્મં કરોતિ સો નેવ કમ્મપત્તો નાપિ છન્દારહો, અપિ ચ કમ્મારહો. પઞ્ચવગ્ગકરણે કમ્મે પઞ્ચ ભિક્ખૂ પકતત્તા કમ્મપત્તા, અવસેસા પકતત્તા છન્દારહા. યસ્સ સઙ્ઘો કમ્મં કરોતિ સો નેવ કમ્મપત્તો નાપિ છન્દારહો, અપિ ચ કમ્મારહો. દસવગ્ગકરણે કમ્મે દસ ભિક્ખૂ પકતત્તા કમ્મપત્તા, અવસેસા પકતત્તા છન્દારહા. યસ્સ સઙ્ઘો કમ્મં કરોતિ સો નેવ કમ્મપત્તો નાપિ છન્દારહો, અપિ ચ કમ્મારહો. વીસતિવગ્ગકરણે કમ્મે વીસતિ ભિક્ખૂ પકતત્તા કમ્મપત્તા, અવસેસા પકતત્તા છન્દારહા. યસ્સ સઙ્ઘો કમ્મં કરોતિ સો નેવ કમ્મપત્તો નાપિ છન્દારહો, અપિ ચ કમ્મારહો.

કમ્મવગ્ગો નિટ્ઠિતો પઠમો.

૨. અત્થવસવગ્ગો

૪૯૮. [અ. નિ. ૨.૨૦૧-૨૩૦] દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. સઙ્ઘસુટ્ઠુતાય, સઙ્ઘફાસુતાય – ઇમે દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દુમ્મઙ્કૂનં પુગ્ગલાનં નિગ્ગહાય, પેસલાનં ભિક્ખૂનં ફાસુવિહારાય – ઇમે દ્વે અત્થવસે પટિચ્ચ તથાગતે સાવકાનં સિક્ખાપદં પઞ્ઞત્તં. દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દિટ્ઠધમ્મિકાનં આસવાનં સંવરાય, સમ્પરાયિકાનં આસવાનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દિટ્ઠધમ્મિકાનં વેરાનં સંવરાય, સમ્પરાયિકાનં વેરાનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દિટ્ઠધમ્મિકાનં વજ્જાનં સંવરાય, સમ્પરાયિકાનં વજ્જાનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દિટ્ઠધમ્મિકાનં ભયાનં સંવરાય, સમ્પરાયિકાનં ભયાનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દિટ્ઠધમ્મિકાનં અકુસલાનં ધમ્માનં સંવરાય, સમ્પરાયિકાનં અકુસલાનં ધમ્માનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. ગિહીનં અનુકમ્પાય, પાપિચ્છાનં પક્ખુપચ્છેદાય – ઇમે દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. અપ્પસન્નાનં પસાદાય, પસન્નાનં ભિય્યોભાવાય – ઇમે દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં. સદ્ધમ્મટ્ઠિતિયા, વિનયાનુગ્ગહાય – ઇમે દ્વે અત્થવસે પટિચ્ચ તથાગતેન સાવકાનં સિક્ખાપદં પઞ્ઞત્તં.

અત્થવસવગ્ગો નિટ્ઠિતો દુતિયો.

૩. પઞ્ઞત્તવગ્ગો

૪૯૯. દ્વે અત્થવસે પટિચ્ચ તથાગતેન સાવકાનં પાતિમોક્ખં પઞ્ઞત્તં…પે… પાતિમોક્ખુદ્દેસો પઞ્ઞત્તો… પાતિમોક્ખટ્ઠપનં પઞ્ઞત્તં… પવારણા પઞ્ઞત્તા… પવારણાઠપનં પઞ્ઞત્તં… તજ્જનીયકમ્મં પઞ્ઞત્તં… નિયસ્સકમ્મં પઞ્ઞત્તં… પબ્બાજનીયકમ્મં પઞ્ઞત્તં… પટિસારણીયકમ્મં પઞ્ઞત્તં… ઉક્ખેપનીયકમ્મં પઞ્ઞત્તં… પરિવાસદાનં પઞ્ઞત્તં… મૂલાયપટિકસ્સના પઞ્ઞત્તા… માનત્તદાનં પઞ્ઞત્તં… અબ્ભાનં પઞ્ઞત્તં… ઓસારણીયં પઞ્ઞત્તં… નિસ્સારણીયં પઞ્ઞત્તં… ઉપસમ્પદં પઞ્ઞત્તં… અપલોકનકમ્મં પઞ્ઞત્તં… ઞત્તિકમ્મં પઞ્ઞત્તં… ઞત્તિદુતિયકમ્મં પઞ્ઞત્તં… ઞત્તિચતુત્થકમ્મં પઞ્ઞત્તં…પે….

પઞ્ઞત્તવગ્ગો નિટ્ઠિતો તતિયો.

૪. અપઞ્ઞત્તે પઞ્ઞત્તવગ્ગો

૫૦૦. …પે… અપઞ્ઞત્તે પઞ્ઞત્તં, પઞ્ઞત્તે અનુપઞ્ઞત્તં…પે… સમ્મુખાવિનયો પઞ્ઞત્તો…પે… સતિવિનયો પઞ્ઞત્તો…પે… અમૂળ્હવિનયો પઞ્ઞત્તો…પે… પટિઞ્ઞાતકરણં પઞ્ઞત્તં…પે… યેભુય્યસિકા પઞ્ઞત્તા…પે… તસ્સપાપિયસિકા પઞ્ઞત્તા…પે… તિણવત્થારકો પઞ્ઞત્તો સઙ્ઘસુટ્ઠુતાય, સઙ્ઘફાસુતાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દુમ્મઙ્કૂનં પુગ્ગલાનં નિગ્ગહાય, પેસલાનં ભિક્ખૂનં ફાસુવિહારાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દિટ્ઠધમ્મિકાનં આસવાનં સંવરાય, સમ્પરાયિકાનં આસવાનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દિટ્ઠધમ્મિકાનં વેરાનં સંવરાય, સમ્પરાયિકાનં વેરાનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દિટ્ઠધમ્મિકાનં વજ્જાનં સંવરાય, સમ્પરાયિકાનં વજ્જાનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દિટ્ઠધમ્મિકાનં ભયાનં સંવરાય, સમ્પરાયિકાનં ભયાનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દિટ્ઠધમ્મિકાનં અકુસલાનં ધમ્માનં સંવરાય, સમ્પરાયિકાનં અકુસલાનં ધમ્માનં પટિઘાતાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. ગિહીનં અનુકમ્પાય, પાપિચ્છાનં પક્ખુપચ્છેદાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. અપ્પસન્નાનં પસાદાય, પસન્નાનં ભિય્યોભાવાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો. સદ્ધમ્મટ્ઠિતિયા, વિનયાનુગ્ગહાય – ઇમે દ્વે અત્થવસે પટિચ્ચ તથાગતેન સાવકાનં તિણવત્થારકો પઞ્ઞત્તો.

અપઞ્ઞત્તે પઞ્ઞત્તવગ્ગો નિટ્ઠિતો ચતુત્થો.

૫. નવસઙ્ગહવગ્ગો

૫૦૧. નવસઙ્ગહા – વત્થુસઙ્ગહો, વિપત્તિસઙ્ગહો આપત્તિસઙ્ગહો, નિદાનસઙ્ગહો, પુગ્ગલસઙ્ગહો, ખન્ધસઙ્ગહો, સમુટ્ઠાનસઙ્ગહો, અધિકરણસઙ્ગહો, સમથસઙ્ગહોતિ.

અધિકરણે સમુપ્પન્ને સચે ઉભો અત્થપચ્ચત્થિકા આગચ્છન્તિ ઉભિન્નમ્પિ વત્થુ આરોચાપેતબ્બં. ઉભિન્નમ્પિ વત્થુ આરોચાપેત્વા ઉભિન્નમ્પિ પટિઞ્ઞા સોતબ્બા. ઉભિન્નમ્પિ પટિઞ્ઞં સુત્વા ઉભોપિ વત્તબ્બા – ‘‘અમ્હાકં ઇમસ્મિં અધિકરણે વૂપસમિતે [વૂપસમેપિ (ક.)] ઉભોપિ તુટ્ઠા ભવિસ્સથા’’તિ. સચે આહંસુ – ‘‘ઉભોપિ તુટ્ઠા ભવિસ્સામા’’તિ, સઙ્ઘેન તં અધિકરણં સમ્પટિચ્છિતબ્બં. સચે અલજ્જુસ્સન્ના હોતિ, પરિસા ઉબ્બાહિકાય વૂપસમેતબ્બં. સચે બાલુસ્સન્ના હોતિ, પરિસા વિનયધરો પરિયેસિતબ્બો યેન ધમ્મેન યેન વિનયેન યેન સત્થુસાસનેન તં અધિકરણં વૂપસમ્મતિ. તથા તં અધિકરણં વૂપસમેતબ્બં.

વત્થુ જાનિતબ્બં, ગોત્તં જાનિતબ્બં, નામં જાનિતબ્બં, આપત્તિ જાનિતબ્બા.

મેથુનધમ્મોતિ વત્થુ ચેવ ગોત્તઞ્ચ – પારાજિકન્તિ નામઞ્ચેવ આપત્તિ ચ.

અદિન્નાદાનન્તિ વત્થુ ચેવ ગોત્તઞ્ચ – પારાજિકન્તિ નામઞ્ચેવ આપત્તિ ચ.

મનુસ્સવિગ્ગહોતિ વત્થુ ચેવ ગોત્તઞ્ચ – પારાજિકન્તિ નામઞ્ચેવ આપત્તિ ચ.

ઉત્તરિમનુસ્સધમ્મોતિ વત્થુ ચેવ ગોત્તઞ્ચ – પારાજિકન્તિ નામઞ્ચેવ આપત્તિ ચ.

સુક્કવિસ્સટ્ઠીતિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

કાયસંસગ્ગોતિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

દુટ્ઠુલ્લવાચાતિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

અત્તકામન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

સઞ્ચરિત્તન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

સઞ્ઞાચિકાય કુટિં કારાપનન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

મહલ્લકં વિહારં કારાપનન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

ભિક્ખું અમૂલકેન પારાજિકેન ધમ્મેન અનુદ્ધંસનન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

ભિક્ખું અઞ્ઞભાગિયસ્સ અધિકરણસ્સ કિઞ્ચિ દેસં લેસમત્તં ઉપાદાય પારાજિકેન ધમ્મેન અનુદ્ધંસનન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

સઙ્ઘભેદકસ્સ ભિક્ખુનો યાવતતિયં સમનુભાસનાય ન પટિનિસ્સજ્જનન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

ભેદકાનુવત્તકાનં ભિક્ખૂનં યાવતતિયં સમનુભાસનાય ન પટિનિસ્સજ્જનન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

દુબ્બચસ્સ ભિક્ખુનો યાવતતિયં સમનુભાસનાય ન પટિનિસ્સજ્જનન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ.

કુલદૂસકસ્સ ભિક્ખુનો યાવતતિયં સમનુભાસનાય ન પટિનિસ્સજ્જનન્તિ વત્થુ ચેવ ગોત્તઞ્ચ – સઙ્ઘાદિસેસોતિ નામઞ્ચેવ આપત્તિ ચ…પે….

અનાદરિયં પટિચ્ચ ઉદકે ઉચ્ચારં વા પસ્સાવં વા ખેળં વા કરણન્તિ વત્થુ ચેવ ગોત્તઞ્ચ – દુક્કટન્તિ નામઞ્ચેવ આપત્તિ ચાતિ.

નવસઙ્ગહવગ્ગો નિટ્ઠિતો પઞ્ચમો.