૪. કથિનાદિજાનિતબ્બવિભાગો

૪૧૨. કથિનં જાનિતબ્બં, કથિનત્થારો જાનિતબ્બો, કથિનસ્સ અત્થારમાસો જાનિતબ્બો, કથિનસ્સ અત્થારવિપત્તિ જાનિતબ્બા, કથિનસ્સ અત્થારસમ્પત્તિ જાનિતબ્બા, નિમિત્તકમ્મં જાનિતબ્બં, પરિકથા જાનિતબ્બા, કુક્કુકતં જાનિતબ્બં, સન્નિધિ જાનિતબ્બા, નિસ્સગ્ગિયં જાનિતબ્બં.

કથિનં જાનિતબ્બન્તિ તેસઞ્ઞેવ ધમ્માનં સઙ્ગહો સમવાયો નામં નામકમ્મં નામધેય્યં નિરુત્તિ બ્યઞ્જનં અભિલાપો યદિદં કથિનન્તિ.

કથિનસ્સ અત્થારમાસો જાનિતબ્બોતિ વસ્સાનસ્સ પચ્છિમો માસો જાનિતબ્બો.

કથિનસ્સ અત્થારવિપત્તિ જાનિતબ્બાતિ ચતુવીસતિયા આકારેહિ કથિનસ્સ અત્થારવિપત્તિ જાનિતબ્બા.

કથિનસ્સ અત્થારસમ્પત્તિ જાનિતબ્બાતિ સત્તરસહિ આકારેહિ કથિનસ્સ અત્થારસમ્પત્તિ જાનિતબ્બા.

નિમિત્તકમ્મં જાનિતબ્બન્તિ નિમિત્તં કરોતિ ઇમિના દુસ્સેન કથિનં અત્થરિસ્સામીતિ.

પરિકથા જાનિતબ્બાતિ પરિકથં કરોતિ ઇમાય પરિકથાય કથિનદુસ્સં નિબ્બત્તેસ્સામીતિ.

કુક્કુકતં જાનિતબ્બન્તિ અનાદિયદાનં જાનિતબ્બં.

સન્નિધિ જાનિતબ્બાતિ દ્વે સન્નિધિયો જાનિતબ્બા – કરણસન્નિધિ વા નિચયસન્નિધિ વા.

નિસ્સગ્ગિયં જાનિતબ્બન્તિ કરિયમાને અરુણં ઉટ્ઠહતિ.

કથિનત્થારો જાનિતબ્બોતિ સચે સઙ્ઘસ્સ કથિનદુસ્સં ઉપ્પન્નં હોતિ, સઙ્ઘેન કથં પટિપજ્જિતબ્બં, અત્થારકેન કથં પટિપજ્જિતબ્બં, અનુમોદકેન કથં પટિપજ્જિતબ્બં.

૪૧૩. સઙ્ઘેન ઞત્તિદુતિયેન કમ્મેન કથિનત્થારકસ્સ ભિક્ખુનો દાતબ્બં, તેન કથિનત્થારકેન ભિક્ખુના તદહેવ ધોવિત્વા વિમજ્જિત્વા વિચારેત્વા છિન્દિત્વા સિબ્બેત્વા રજિત્વા કપ્પં કત્વા કથિનં અત્થરિતબ્બં. સચે સઙ્ઘાટિયા કથિનં અત્થરિતુકામો હોતિ, પોરાણિકા સઙ્ઘાટિ પચ્ચુદ્ધરિતબ્બા, નવા સઙ્ઘાટિ અધિટ્ઠાતબ્બા. ઇમાય સઙ્ઘાટિયા કથિનં અત્થરામીતિ વાચા ભિન્દિતબ્બા. સચે ઉત્તરાસઙ્ગેન કથિનં અત્થરિતુકામો હોતિ, પોરાણકો ઉત્તરાસઙ્ગો પચ્ચુદ્ધરિતબ્બો, નવો ઉત્તરાસઙ્ગો અધિટ્ઠાતબ્બો. ઇમિના ઉત્તરાસઙ્ગેન કથિનં અત્થરામીતિ વાચા ભિન્દિતબ્બા. સચે અન્તરવાસકેન કથિનં અત્થરિતુકામો હોતિ, પોરાણકો અન્તરવાસકો પચ્ચુદ્ધરિતબ્બો, નવો અન્તરવાસકો અધિટ્ઠાતબ્બો. ઇમિના અન્તરવાસકેન કથિનં અત્થરામીતિ વાચા ભિન્દિતબ્બા. તેન કથિનત્થારકેન ભિક્ખુના સઙ્ઘં ઉપસઙ્કમિત્વા એકંસં ઉત્તરાસઙ્ગં કરિત્વા અઞ્જલિં પગ્ગહેત્વા એવમસ્સ વચનીયો – ‘‘અત્થતં, ભન્તે, સઙ્ઘસ્સ કથિનં, ધમ્મિકો કથિનત્થારો, અનુમોદથા’’તિ. તેહિ અનુમોદકેહિ ભિક્ખૂહિ એકંસં ઉત્તરાસઙ્ગં કરિત્વા અઞ્જલિં પગ્ગહેત્વા એવમસ્સ વચનીયો – ‘‘અત્થતં, આવુસો, સઙ્ઘસ્સ કથિનં, ધમ્મિકો કથિનત્થારો, અનુમોદામા’’તિ. તેન કથિનત્થારકેન ભિક્ખુના સમ્બહુલે ભિક્ખૂ ઉપસઙ્કમિત્વા એકંસં ઉત્તરાસઙ્ગં કરિત્વા અઞ્જલિં પગ્ગહેત્વા એવમસ્સુ વચનીયા – ‘‘અત્થતં, ભન્તે, સઙ્ઘસ્સ કથિનં, ધમ્મિકો કથિનત્થારો, અનુમોદથા’’તિ. તેહિ અનુમોદકેહિ ભિક્ખૂહિ એકંસં ઉત્તરાસઙ્ગં કરિત્વા અઞ્જલિં પગ્ગહેત્વા એવમસ્સ વચનીયો – ‘‘અત્થતં, આવુસો, સઙ્ઘસ્સ કથિનં, ધમ્મિકો કથિનત્થારો અનુમોદામા’’તિ. તેન કથિનત્થારકેન ભિક્ખુના એકં ભિક્ખું ઉપસઙ્કમિત્વા એકંસં ઉત્તરાસઙ્ગં કરિત્વા અઞ્જલિં પગ્ગહેત્વા એવમસ્સ વચનીયો – ‘‘અત્થતં, આવુસો, સઙ્ઘસ્સ કથિનં, ધમ્મિકો કથિનત્થારો, અનુમોદાહી’’તિ. તેન અનુમોદકેન ભિક્ખુના એકંસં ઉત્તરાસઙ્ગં કરિત્વા અઞ્જલિં પગ્ગહેત્વા એવમસ્સ વચનીયો – ‘‘અત્થતં, આવુસો, સઙ્ઘસ્સ કથિનં, ધમ્મિકો કથિનત્થારો, અનુમોદામી’’તિ.