૫. પુગ્ગલસ્સેવકથિનત્થારો

૪૧૪. સઙ્ઘો કથિનં અત્થરતિ, ગણો કથિનં અત્થરતિ, પુગ્ગલો કથિનં અત્થરતીતિ. ન સઙ્ઘો કથિનં અત્થરતિ, ન ગણો કથિનં અત્થરતિ, પુગ્ગલો કથિનં અત્થરતીતિ. હઞ્ચિ ન સઙ્ઘો કથિનં અત્થરતિ, ન ગણો કથિનં અત્થરતિ, પુગ્ગલો કથિનં અત્થરતિ. સઙ્ઘસ્સ અનત્થતં હોતિ કથિનં, ગણસ્સ અનત્થતં હોતિ કથિનં, પુગ્ગલસ્સ અત્થતં હોતિ કથિનં. સઙ્ઘો પાતિમોક્ખં ઉદ્દિસતિ ગણો પાતિમોક્ખં ઉદ્દિસતિ પુગ્ગલો પાતિમોક્ખં ઉદ્દિસતીતિ ન સઙ્ઘો પાતિમોક્ખં ઉદ્દિસતિ, ન ગણો પાતિમોક્ખં ઉદ્દિસતિ, પુગ્ગલો પાતિમોક્ખં ઉદ્દિસતીતિ. હઞ્ચિ ન સઙ્ઘો પાતિમોક્ખં ઉદ્દિસતિ, ન ગણો પાતિમોક્ખં ઉદ્દિસતિ, પુગ્ગલો પાતિમોક્ખં ઉદ્દિસતિ. સઙ્ઘસ્સ અનુદ્દિટ્ઠં હોતિ પાતિમોક્ખં, ગણસ્સ અનુદ્દિટ્ઠં હોતિ પાતિમોક્ખં, પુગ્ગલસ્સ ઉદ્દિટ્ઠં હોતિ પાતિમોક્ખં. સઙ્ઘસ્સ સામગ્ગિયા ગણસ્સ સામગ્ગિયા પુગ્ગલસ્સ ઉદ્દેસા સઙ્ઘસ્સ ઉદ્દિટ્ઠં હોતિ પાતિમોક્ખં, ગણસ્સ ઉદ્દિટ્ઠં હોતિ પાતિમોક્ખં, પુગ્ગલસ્સ ઉદ્દિટ્ઠં હોતિ પાતિમોક્ખં. એવમેવ ન સઙ્ઘો કથિનં અત્થરતિ, ન ગણો કથિનં અત્થરતિ, પુગ્ગલો કથિનં અત્થરતિ. સઙ્ઘસ્સ અનુમોદનાય ગણસ્સ અનુમોદનાય પુગ્ગલસ્સ અત્થારા સઙ્ઘસ્સ અત્થતં હોતિ કથિનં, ગણસ્સ અત્થતં હોતિ કથિનં, પુગ્ગલસ્સ અત્થતં હોતિ કથિનન્તિ.