૭. પુચ્છાવિભાગો

૩૯૮. કિં તે દિટ્ઠન્તિ કતમા પુચ્છા? કિન્તિ તે દિટ્ઠન્તિ કતમા પુચ્છા? કદા તે દિટ્ઠન્તિ કતમા પુચ્છા? કત્થ તે દિટ્ઠન્તિ કતમા પુચ્છા?

૩૯૯. કિં તે દિટ્ઠન્તિ વત્થુપુચ્છા, વિપત્તિપુચ્છા, આપત્તિપુચ્છા, અજ્ઝાચારપુચ્છા. વત્થુપુચ્છાતિ – અટ્ઠપારાજિકાનં વત્થુપુચ્છા, તેવીસસઙ્ઘાદિસેસાનં વત્થુપુચ્છા, દ્વેઅનિયતાનં વત્થુપુચ્છા, દ્વેચત્તારીસનિસ્સગ્ગિયાનં વત્થુપુચ્છા, અટ્ઠાસીતિસતપાચિત્તિયાનં વત્થુપુચ્છા, દ્વાદસપાટિદેસનીયાનં વત્થુપુચ્છા, દુક્કટાનં વત્થુપુચ્છા, દુબ્ભાસિતાનં વત્થુપુચ્છા. વિપત્તિપુચ્છાતિ – સીલવિપત્તિપુચ્છા, આચારવિપત્તિપુચ્છા, દિટ્ઠિવિપત્તિપુચ્છા, આજીવવિપત્તિપુચ્છા. આપત્તિપુચ્છાતિ – પારાજિકાપત્તિપુચ્છા, સઙ્ઘાદિસેસાપત્તિપુચ્છા, થુલ્લચ્ચયાપત્તિપુચ્છા, પાચિત્તિયાપત્તિપુચ્છા, પાટિદેસનીયાપત્તિપુચ્છા, દુક્કટાપત્તિપુચ્છા, દુબ્ભાસિતાપત્તિપુચ્છા. અજ્ઝાચારપુચ્છાતિ – દ્વયંદ્વયસમાપત્તિપુચ્છા.

૪૦૦. કિન્તિ તે દિટ્ઠન્તિ લિઙ્ગપુચ્છા, ઇરિયાપથપુચ્છા, આકારપુચ્છા, વિપ્પકારપુચ્છા. લિઙ્ગપુચ્છાતિ – દીઘં વા રસ્સં વા કણ્હં વા ઓદાતં વા. ઇરિયાપથપુચ્છાતિ ગચ્છન્તં વા ઠિતં વા નિસિન્નં વા નિપન્નં વા. આકારપુચ્છાતિ ગિહિલિઙ્ગે વા તિત્થિયલિઙ્ગે વા પબ્બજિતલિઙ્ગે વા. વિપ્પકારપુચ્છાતિ ગચ્છન્તં વા ઠિતં વા નિસિન્નં વા નિપન્નં વા.

૪૦૧. કદા તે દિટ્ઠન્તિ કાલપુચ્છા, સમયપુચ્છા, દિવસપુચ્છા, ઉતુપુચ્છા. કાલપુચ્છાતિ પુબ્બણ્હકાલે વા મજ્ઝન્હિકકાલે વા સાયન્હકાલે વા. સમયપુચ્છાતિ પુબ્બણ્હસમયે વા મજ્ઝન્હિકસમયે વા સાયન્હસમયે વા. દિવસપુચ્છાતિ પુરેભત્તં વા પચ્છાભત્તં વા રત્તિં વા દિવા વા કાળે વા જુણ્હે વા. ઉતુપુચ્છાતિ હેમન્તે વા ગિમ્હે વા વસ્સે વા [વસ્સાને વા (સી.)].

૪૦૨. કત્થ તે દિટ્ઠન્તિ ઠાનપુચ્છા, ભૂમિપુચ્છા, ઓકાસપુચ્છા, પદેસપુચ્છા. ઠાનપુચ્છાતિ ભૂમિયા વા પથવિયા વા ધરણિયા વા જગતિયા વા. ભૂમિપુચ્છાતિ ભૂમિયા વા પથવિયા વા પબ્બતે વા પાસાણે વા પાસાદે વા. ઓકાસપુચ્છાતિ પુરત્થિમે વા ઓકાસે પચ્છિમે વા ઓકાસે ઉત્તરે વા ઓકાસે દક્ખિણે વા ઓકાસે. પદેસપુચ્છાતિ પુરત્થિમે વા પદેસે પચ્છિમે વા પદેસે ઉત્તરે વા પદેસે દક્ખિણે વા પદેસેતિ.

મહાસઙ્ગામો નિટ્ઠિતો.