૨. ભૂતગામવગ્ગો

૧૬૬. ભૂતગામં પાતેન્તો દ્વે આપત્તિયો આપજ્જતિ. પાતેતિ, પયોગે દુક્કટં; પહારે પહારે આપત્તિ પાચિત્તિયસ્સ.

અઞ્ઞેનઞ્ઞં પટિચરન્તો દ્વે આપત્તિયો આપજ્જતિ. અનારોપિતે અઞ્ઞવાદકે અઞ્ઞેનઞ્ઞં પટિચરતિ, આપત્તિ દુક્કટસ્સ; આરોપિતે અઞ્ઞવાદકે અઞ્ઞેનઞ્ઞં પટિચરતિ, આપત્તિ પાચિત્તિયસ્સ.

ભિક્ખું ઉજ્ઝાપેન્તો દ્વે આપત્તિયો આપજ્જતિ. ઉજ્ઝાપેતિ, પયોગે દુક્કટં; ઉજ્ઝાપિતે આપત્તિ પાચિત્તિયસ્સ.

સઙ્ઘિકં મઞ્ચં વા પીઠં વા ભિસિં વા કોચ્છં વા અજ્ઝોકાસે સન્થરિત્વા અનુદ્ધરિત્વા અનાપુચ્છા પક્કમન્તો દ્વે આપત્તિયો આપજ્જતિ. પઠમં પાદં લેડ્ડુપાતં અતિક્કામેતિ, આપત્તિ દુક્કટસ્સ; દુતિયં પાદં અતિક્કામેતિ, આપત્તિ પાચિત્તિયસ્સ.

સઙ્ઘિકે વિહારે સેય્યં સન્થરિત્વા અનુદ્ધરિત્વા અનાપુચ્છા પક્કમન્તો દ્વે આપત્તિયો આપજ્જતિ. પઠમં પાદં પરિક્ખેપં અતિક્કામેતિ, આપત્તિ દુક્કટસ્સ; દુતિયં પાદં અતિક્કામેતિ, આપત્તિ પાચિત્તિયસ્સ.

સઙ્ઘિકે વિહારે જાનં પુબ્બુપગતં ભિક્ખું અનુપખજ્જ સેય્યં કપ્પેન્તો દ્વે આપત્તિયો આપજ્જતિ. નિપજ્જતિ, પયોગે દુક્કટં; નિપન્ને આપત્તિ પાચિત્તિયસ્સ.

ભિક્ખું કુપિતો અનત્તમનો સઙ્ઘિકા વિહારા નિક્કડ્ઢેન્તો દ્વે આપત્તિયો આપજ્જતિ. નિક્કડ્ઢતિ, પયોગે દુક્કટં; નિક્કડ્ઢિતે આપત્તિ પાચિત્તિયસ્સ.

સઙ્ઘિકે વિહારે ઉપરિવેહાસકુટિયા આહચ્ચપાદકં મઞ્ચં વા પીઠં વા અભિનિસીદન્તો દ્વે આપત્તિયો આપજ્જતિ. અભિનિસીદતિ, પયોગે દુક્કટં; અભિનિસિન્ને આપત્તિ પાચિત્તિયસ્સ.

દ્વત્તિપરિયાયે અધિટ્ઠહિત્વા તતુત્તરિ અધિટ્ઠહન્તો દ્વે આપત્તિયો આપજ્જતિ. અધિટ્ઠેતિ, પયોગે દુક્કટં; અધિટ્ઠિતે આપત્તિ પાચિત્તિયસ્સ.

જાનં સપ્પાણકં ઉદકં તિણં વા મત્તિકં વા સિઞ્ચન્તો દ્વે આપત્તિયો આપજ્જતિ. સિઞ્ચતિ, પયોગે દુક્કટં; સિઞ્ચિતે આપત્તિ પાચિત્તિયસ્સ.

ભૂતગામવગ્ગો દુતિયો.