૧. પરિમણ્ડલવગ્ગો

૧૭૫. અનાદરિયં પટિચ્ચ પુરતો વા પચ્છતો વા ઓલમ્બેન્તો નિવાસેન્તો કતિ આપત્તિયો આપજ્જતિ? અનાદરિયં પટિચ્ચ પુરતો વા પચ્છતો વા ઓલમ્બેન્તો નિવાસેન્તો એકં આપત્તિં આપજ્જતિ. દુક્કટં – અનાદરિયં પટિચ્ચ પુરતો વા પચ્છતો વા ઓલમ્બેન્તો નિવાસેન્તો ઇમં એકં આપત્તિં આપજ્જતિ.

…અનાદરિયં પટિચ્ચ પુરતો વા પચ્છતો વા ઓલમ્બેન્તો પારુપન્તો એકં આપત્તિં આપજ્જતિ. દુક્કટં….

…અનાદરિયં પટિચ્ચ કાયં વિવરિત્વા અન્તરઘરે ગચ્છન્તો એકં આપત્તિં આપજ્જતિ. દુક્કટં….

…અનાદરિયં પટિચ્ચ કાયં વિવરિત્વા અન્તરઘરે નિસીદન્તો એકં આપત્તિં આપજ્જતિ. દુક્કટં….

…અનાદરિયં પટિચ્ચ હત્થં વા પાદં વા કીળાપેન્તો અન્તરઘરે ગચ્છન્તો એકં આપત્તિં આપજ્જતિ. દુક્કટં….

…અનાદરિયં પટિચ્ચ હત્થં વા પાદં વા કીળાપેન્તો અન્તરઘરે નિસીદન્તો એકં આપત્તિં આપજ્જતિ. દુક્કટં….

…અનાદરિયં પટિચ્ચ તહં તહં ઓલોકેન્તો અન્તરઘરે ગચ્છન્તો એકં આપત્તિં આપજ્જતિ. દુક્કટં….

…અનાદરિયં પટિચ્ચ તહં તહં ઓલોકેન્તો અન્તરઘરે નિસીદન્તો એકં આપત્તિં આપજ્જતિ. દુક્કટં….

…અનાદરિયં પટિચ્ચ ઉક્ખિત્તકાય અન્તરઘરે ગચ્છન્તો એકં આપત્તિં આપજ્જતિ. દુક્કટં….

…અનાદરિયં પટિચ્ચ ઉક્ખિત્તકાય અન્તરઘરે નિસીદન્તો એકં આપત્તિં આપજ્જતિ. દુક્કટં….

પરિમણ્ડલવગ્ગો પઠમો.