૧. પારાજિકકણ્ડં

૧૫૭. મેથુનં ધમ્મં પટિસેવન્તો કતિ આપત્તિયો આપજ્જતિ? મેથુનં ધમ્મં પટિસેવન્તો તિસ્સો આપત્તિયો આપજ્જતિ. અક્ખાયિતે સરીરે મેથુનં ધમ્મં પટિસેવતિ, આપત્તિ પારાજિકસ્સ; યેભુય્યેન ખાયિતે સરીરે મેથુનં ધમ્મં પટિસેવતિ, આપત્તિ થુલ્લચ્ચયસ્સ; વટ્ટકતે [વિવટકતે (સ્યા.)] મુખે અચ્છુપન્તં અઙ્ગજાતં પવેસેતિ, આપત્તિ દુક્કટસ્સ – મેથુનં ધમ્મં પટિસેવન્તો ઇમા તિસ્સો આપત્તિયો આપજ્જતિ.

૧૫૮. અદિન્નં આદિયન્તો કતિ આપત્તિયો આપજ્જતિ? અદિન્નં આદિયન્તો તિસ્સો આપત્તિયો આપજ્જતિ. પઞ્ચમાસકં વા અતિરેકપઞ્ચમાસકં વા અગ્ઘનકં અદિન્નં થેય્યસઙ્ખાતં આદિયતિ, આપત્તિ પારાજિકસ્સ; અતિરેકમાસકં વા ઊનપઞ્ચમાસકં વા અગ્ઘનકં અદિન્નં થેય્યસઙ્ખાતં આદિયતિ, આપત્તિ થુલ્લચ્ચયસ્સ; માસકં વા ઊનમાસકં વા અગ્ઘનકં અદિન્નં થેય્યસઙ્ખાતં આદિયતિ, આપત્તિ દુક્કટસ્સ – અદિન્નં આદિયન્તો ઇમા તિસ્સો આપત્તિયો આપજ્જતિ.

૧૫૯. સઞ્ચિચ્ચ મનુસ્સવિગ્ગહં જીવિતા વોરોપેન્તો કતિ આપત્તિયો આપજ્જતિ? સઞ્ચિચ્ચ મનુસ્સવિગ્ગહં જીવિતા વોરોપેન્તો તિસ્સો આપત્તિયો આપજ્જતિ. મનુસ્સં ઓદિસ્સ ઓપાતં ખણતિ ‘‘પપતિત્વા મરિસ્સતી’’તિ, આપત્તિ દુક્કટસ્સ; પપતિતે દુક્ખા વેદના ઉપ્પજ્જતિ, આપત્તિ થુલ્લચ્ચયસ્સ; મરતિ, આપત્તિ પારાજિકસ્સ – સઞ્ચિચ્ચ મનુસ્સવિગ્ગહં જીવિતા વોરોપેન્તો ઇમા તિસ્સો આપત્તિયો આપજ્જતિ.

૧૬૦. અસન્તં અભૂતં ઉત્તરિમનુસ્સધમ્મં ઉલ્લપન્તો કતિ આપત્તિયો આપજ્જતિ? અસન્તં અભૂતં ઉત્તરિમનુસ્સધમ્મં ઉલ્લપન્તો તિસ્સો આપત્તિયો આપજ્જતિ. પાપિચ્છો ઇચ્છાપકતો અસન્તં અભૂતં ઉત્તરિમનુસ્સધમ્મં ઉલ્લપતિ, આપત્તિ પારાજિકસ્સ; ‘‘યો તે વિહારે વસતિ, સો ભિક્ખુ અરહા’’તિ ભણતિ, પટિવિજાનન્તસ્સ આપત્તિ થુલ્લચ્ચયસ્સ; ન પટિવિજાનન્તસ્સ આપત્તિ દુક્કટસ્સ – અસન્તં અભૂતં ઉત્તરિમનુસ્સધમ્મં ઉલ્લપન્તો ઇમા તિસ્સો આપત્તિયો આપજ્જતિ.

ચત્તારો પારાજિકા નિટ્ઠિતા.