૩. નહાનવગ્ગો

૨૩૩. નગ્ગા નહાયન્તી દ્વે આપત્તિયો આપજ્જતિ. નહાયતિ, પયોગે દુક્કટં; નહાનપરિયોસાને આપત્તિ પાચિત્તિયસ્સ.

પમાણાતિક્કન્તં ઉદકસાટિકં કારાપેન્તી દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે, આપત્તિ પાચિત્તિયસ્સ.

ભિક્ખુનિયા ચીવરં વિસિબ્બેત્વા વા વિસિબ્બાપેત્વા વા નેવ સિબ્બેન્તી ન સિબ્બાપનાય ઉસ્સુક્કં કરોન્તી એકં આપત્તિં આપજ્જતિ. પાચિત્તિયં.

પઞ્ચાહિકં સઙ્ઘાટિચારં અતિક્કામેન્તી એકં આપત્તિં આપજ્જતિ. પાચિત્તિયં. ચીવરસઙ્કમનીયં ધારેન્તી દ્વે આપત્તિયો આપજ્જતિ. ધારેતિ, પયોગે દુક્કટં; ધારિતે, આપત્તિ પાચિત્તિયસ્સ.

ગણસ્સ ચીવરલાભં અન્તરાયં કરોન્તી દ્વે આપત્તિયો આપજ્જતિ. કરોતિ, પયોગે દુક્કટં; કતે, આપત્તિ પાચિત્તિયસ્સ.

ધમ્મિકં ચીવરવિભઙ્ગં પટિબાહન્તી દ્વે આપત્તિયો આપજ્જતિ. પટિબાહતિ, પયોગે દુક્કટં; પટિબાહિતે, આપત્તિ પાચિત્તિયસ્સ.

અગારિકસ્સ વા પરિબ્બાજકસ્સ વા પરિબ્બાજિકાય વા સમણચીવરં દેન્તી દ્વે આપત્તિયો આપજ્જતિ. દેતિ, પયોગે દુક્કટં; દિન્ને, આપત્તિ પાચિત્તિયસ્સ.

દુબ્બલચીવરપચ્ચાસા ચીવરકાલસમયં અતિક્કામેન્તી દ્વે આપત્તિયો આપજ્જતિ. અતિક્કામેતિ, પયોગે દુક્કટં; અતિક્કામિતે, આપત્તિ પાચિત્તિયસ્સ.

ધમ્મિકં કથિનુદ્ધારં પટિબાહન્તી દ્વે આપત્તિયો આપજ્જતિ. પટિબાહતિ, પયોગે દુક્કટં; પટિબાહિતે, આપત્તિ પાચિત્તિયસ્સ.

નહાનવગ્ગો તતિયો.