૧. લસુણવગ્ગો

૨૩૧. લસુણં ખાદન્તી દ્વે આપત્તિયો આપજ્જતિ. ખાદિસ્સામીતિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ પાચિત્તિયસ્સ.

સમ્બાધે લોમં સંહરાપેન્તી દ્વે આપત્તિયો આપજ્જતિ. સંહરાપેતિ, પયોગે દુક્કટં; સંહરાપિતે આપત્તિ પાચિત્તિયસ્સ.

તલઘાતકં કરોન્તી દ્વે આપત્તિયો આપજ્જતિ. કરોતિ, પયોગે દુક્કટં; કતે આપત્તિ પાચિત્તિયસ્સ.

જતુમટ્ઠકં આદિયન્તી દ્વે આપત્તિયો આપજ્જતિ. આદિયતિ, પયોગે દુક્કટં, આદિન્ને આપત્તિ પાચિત્તિયસ્સ.

અતિરેકદ્વઙ્ગુલપબ્બપરમં ઉદકસુદ્ધિકં આદિયન્તી દ્વે આપત્તિયો આપજ્જતિ. આદિયતિ, પયોગે દુક્કટં; આદિન્ને આપત્તિ પાચિત્તિયસ્સ.

ભિક્ખુસ્સ ભુઞ્જન્તસ્સ પાનીયેન વા વિધૂપનેન વા ઉપતિટ્ઠન્તી દ્વે આપત્તિયો આપજ્જતિ. હત્થપાસે તિટ્ઠતિ, આપત્તિ પાચિત્તિયસ્સ; હત્થપાસં વિજહિત્વા તિટ્ઠતિ, આપત્તિ દુક્કટસ્સ.

આમકધઞ્ઞં વિઞ્ઞાપેત્વા ભુઞ્જન્તી દ્વે આપત્તિયો આપજ્જતિ. ભુઞ્જિસ્સામીતિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ પાચિત્તિયસ્સ.

ઉચ્ચારં વા પસ્સાવં વા સઙ્કારં વા વિઘાસં વા તિરોકુટ્ટે વા તિરોપાકારે વા છડ્ડેન્તી દ્વે આપત્તિયો આપજ્જતિ. છડ્ડેતિ, પયોગે દુક્કટં; છડ્ડિતે આપત્તિ પાચિત્તિયસ્સ.

ઉચ્ચારં વા પસ્સાવં વા સઙ્કારં વા વિઘાસં વા હરિતે છડ્ડેન્તી દ્વે આપત્તિયો આપજ્જતિ. છડ્ડેતિ, પયોગે દુક્કટં; છડ્ડિતે આપત્તિ પાચિત્તિયસ્સ.

નચ્ચં વા ગીતં વા વાદિતં વા દસ્સનાય ગચ્છન્તી દ્વે આપત્તિયો આપજ્જતિ. ગચ્છતિ, આપત્તિ દુક્કટસ્સ; યત્થ ઠિતા પસ્સતિ વા સુણાતિ વા, આપત્તિ પાચિત્તિયસ્સ.

લસુણવગ્ગો પઠમો.