૧. પારાજિકકણ્ડં

૨૨૮. અવસ્સુતા ભિક્ખુની અવસ્સુતસ્સ પુરિસપુગ્ગલસ્સ કાયસંસગ્ગં સાદિયન્તી કતિ આપત્તિયો આપજ્જતિ? અવસ્સુતા ભિક્ખુની અવસ્સુતસ્સ પુરિસપુગ્ગલસ્સ કાયસંસગ્ગં સાદિયન્તી તિસ્સો આપત્તિયો આપજ્જતિ. અધક્ખકં ઉબ્ભજાણુમણ્ડલં ગહણં સાદિયતિ, આપત્તિ પારાજિકસ્સ; ઉબ્ભક્ખકં અધોજાણુમણ્ડલં ગહણં સાદિયતિ, આપત્તિ થુલ્લચ્ચયસ્સ; કાયપટિબદ્ધં ગહણં સાદિયતિ, આપત્તિ દુક્કટસ્સ – અવસ્સુતા ભિક્ખુની અવસ્સુતસ્સ પુરિસપુગ્ગલસ્સ કાયસંસગ્ગં સાદિયન્તી ઇમા તિસ્સો આપત્તિયો આપજ્જતિ.

વજ્જપ્પટિચ્છાદિકા ભિક્ખુની વજ્જં પટિચ્છાદેન્તી કતિ આપત્તિયો આપજ્જતિ? વજ્જપ્પટિચ્છાદિકા ભિક્ખુની વજ્જં પટિચ્છાદેન્તી તિસ્સો આપત્તિયો આપજ્જતિ. જાનં પારાજિકં ધમ્મં પટિચ્છાદેતિ, આપત્તિ પારાજિકસ્સ; વેમતિકા પટિચ્છાદેતિ, આપત્તિ થુલ્લચ્ચયસ્સ; આચારવિપત્તિં પટિચ્છાદેતિ, આપત્તિ દુક્કટસ્સ – વજ્જપ્પટિચ્છાદિકા ભિક્ખુની વજ્જં પટિચ્છાદેન્તી ઇમા તિસ્સો આપત્તિયો આપજ્જતિ.

ઉક્ખિત્તાનુવત્તિકા ભિક્ખુની યાવતતિયં સમનુભાસનાય ન પટિનિસ્સજ્જન્તી કતિ આપત્તિયો આપજ્જતિ? ઉક્ખિત્તાનુવત્તિકા ભિક્ખુની યાવતતિયં સમનુભાસનાય ન પટિનિસ્સજ્જન્તી તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ પારાજિકસ્સ – ઉક્ખિત્તાનુવત્તિકા ભિક્ખુની યાવતતિયં સમનુભાસનાય ન પટિનિસ્સજ્જન્તી ઇમા તિસ્સો આપત્તિયો આપજ્જતિ.

અટ્ઠમં વત્થું પરિપૂરેન્તી કતિ આપત્તિયો આપજ્જતિ? અટ્ઠમં વત્થું પરિપૂરેન્તી તિસ્સો આપત્તિયો આપજ્જતિ. પુરિસેન – ‘‘ઇત્થન્નામં ઓકાસં [ઇત્થન્નામં ગહનં (સી.), ઇત્થન્નામં ગબ્ભં (સ્યા.)] આગચ્છા’’તિ વુત્તા ગચ્છતિ, આપત્તિ દુક્કટસ્સ; પુરિસસ્સ હત્થપાસં ઓક્કન્તમત્તે આપત્તિ થુલ્લચ્ચયસ્સ; અટ્ઠમં વત્થું પરિપૂરેતિ, આપત્તિ પારાજિકસ્સ – અટ્ઠમં વત્થું પરિપૂરેન્તી ઇમા તિસ્સો આપત્તિયો આપજ્જતિ.

પારાજિકા નિટ્ઠિતા.